شفاه مخملية الفصل الثاني وأربعون 42 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت كُلش طويل يعادل بارتين♥️.

"شفاه مخملية"

بقلم: زهراء السلامي.

شيخ عميد الدين يگول♥️:
ايدج تمسكت بـ ايدي
وما اهدج بعد للموت يَ بنيتي
جوهرتي يا عشك الصبا يا فرحة عيوني انتِ
يا اغلى من كِل البشر يا اللي صرتي مريتي
يشبهوج كِلهم بالكُمر
بس انه احس مقصرين
كِلشي حلو بهالدنيا انتِ تشبهين
جوهرته انتِ وعشكه لـ عميد الدين
و غيرج ابد ما عشك يا بعد العين

بقلم♥️ Shahad_alhsnawe

♛ ♛ ♛ ♛ ♛ ♛ ♛ ♛ ♛ ♛

"عمـــيد الديــن"
السلام عليكم، انه السيد عميد الدين عباس منصور الگصاب، من مواليد 1979 عزوبي (ارمل) وعندي بت وحدة هي روحي من هالدنيا ترخصلهه الروح والمال وحتى العافيه..

عشت طفوله حلوة ويه ابوي ربيت جوه جناحه وتعلمت من علمه ومن ثقافته رغم ابوي أُمي مايعرف يقره ويكتب بَـس واعي ومثقف أصرّ عليّ وع اخواني ندرس وناخذ شهادات حتى اختي حلا وصلت سادس اعدادي وبطلت من اراداتهه..

شبيت وانه ارسم بخيالي قصص چنت اتمنى اعيش حالي حال الشباب احب وانحب واسافر واتونس بَـس للاسف عاداتنه وگفت بوجهي واگدر اگولن دمرت احلامي واوهامي وچن اجتني صفعة قويه صحتني ؏ زماني خصوصاً من ابوي لح عليّ اتزوج وانه بعدني مرحلة اولى جامعه وعمري ما يتجاوز 19 سنه!!

توسلت وتأذيت هواي لان مو هذا الاريده بَـس لا حياة لمن تنادي، تزوجت شيلاء صغيره ماتفتهم شي چانت جاهله حتى بالتصرفات وما اچذب عانيت هواي وياهه واكثر من مرة تمنيت انسحب من العلاقة بَـس يتُمهه ووحدتهه وعشگهه ليه يوگف بوجهي..

عشگتني بخبال واعترف بهالشي وانه بادلتهه الحُب لكن موش نفسهه چانت تغلبني بحبهه وحنانهه ودلالهه يعني نگدر نگول خشت بعيني، وره فتره قليله ونورت حياتي رهوفة نبض گلبي..

مشت ايامي عاديه وتركت شيلاء وسكنت بغداد حتى اداوم هناك وخلصت الاربع سنوات وانه ما حاط عيني بعين بت لخاطرها رغم هذا چانت تبچي ليل نهار وتشك وتغار بشكل مو طبيعي، چانت صغيره واعذرهه ومازعلهه بَـس حساسيتهه زياده لدرجة تبچي اذا زيدت الملح بالتمن..

تعبت نفسيتي من ابوي راح وودعنه واجت السوالف الجَد واستلمت المشيخة من بعده وانه عمري 22 سنه فرفحت روحي وانه اقنع بعمي خليل ياخذهه بدالي لان چان بعده عندي امل اغير حياتي بَـس كلشي انهدم من گعدت بالديوان وصار اسمي "شيخ عميد الدين" او مثل ما يسموني بقيه الشيوخ شبل سيد عباس..

ورغم المشاكل الواجهتهه والطلايب الحليتهه والتعب والروحه والرده بَـس ما استسلمت واجهت كلشي وشيلاء وياي براس مرفوع ما نزل بيوم اله باليوم الطبيت لداري وشفتهه بهالحال آآآه يگلبي هاليوم شلع وصله من افادي وترك نُدبة بي..

ساعه الاربعه ونص العصر رديت من السماوة للبيت فتحت الباب تفاجأت من لگيته مفتوح لان بطبع شيلاء تقفله خصوصاً من انتقلنه لهلبيت وعشنه وحيدنه خاطر تقل المشاكل بين شيلاء وعمتي فتوح..

اسمع أنات خفيفه جايه من الصاله ماعرف شصار وما طبيت بسرعه ضربتلي صفنه ؏ المطبخ چنت ادور ؏ مواعين حتى ناكل حلويات جبتهن وياي..

وما فطنت اكو احد بالبيت وكل عگلي هالونين من رهف جاي تنگ ؏ امهه وتضوجهه مثل عادتهه، طبيت وانه شايل المواعين بأيد وعلاگة البقلاوة بالايد الثانيه، صحت...

-شيلاااء وينچ حبيبتي؟

تعديت الممر اليفصل بين المطبخ والصاله وطبيت للصاله الغمه وانه اشوفن شيلاء سابحة بدمهه وجارهه رهوفه ينزل دم منهه وتبچي..

ماعرفت شني الاسوي اندهشت وچن طرگاعه ووكعت ؏ راسي، ركضت عليهه وصحت حتى تصحى بَـس طفت عيونهه وطفت الدنيا بعيوني صرت اصيح مثل المخبل ورهف مستمرة بالبچي، سمعت صوت جاي من السطح والباب واضح انفتحت ماهتميتلهه كل بالي وتفكيري ويه شيلاء..

شلتهه واخذت رهوفه وركضت بيهن للمستشفى بنص الطريق وصحت وتون چن طير مذبوح، كاظة بطنهه المنفوخ بسبب حملهه بوليدي 8 اشهر وتبچي، وما كالت غير...

-شيلاء: عميدي چانو 3 عليه ثلاث زلم ومروان اذاني هواي وحاول وياي چم مرة و.....

كملتلي شلون مروان چان يحارشهه ويريدهه ويقنعهه حتى تهرب وياه وتعوفني بَـس اكدتلي موش مروان الي اعتده عليهه گالت چانو شباب وعرفت ذوله من جماعته وسوه هيچ عناد بيه وبيهه عبن مارضت تتركني وراد يهيني ويهينهه، تحچي وتبچي وتعيط من الوجع عسى سوده بوجهي عليهه، سكتتهه لان تعبت حيل والدم مستمر ينزل منهه..

اتصلت بـ بكر لان ماعندي غيره بالوقت الحالي وسولفتله، اجاني للمستشفى وطببو شيلاء ورهف للطوارئ، طلعولي گالو رهف زينه بَـس وواضح متعرضه للاغتصاب وطلبو مني السماح حتى يفحصوهه حتى يتأكدون وطامة وگعت عليّ من گالو انأخذ شرفهه..

طحت من طولي وماحسيت اله ببكر وامي هم جايه ومرتضى يصحوني وگالو "البقية بحياتك" راحت شيلاء وجابت وليدك..

هالفترة من حياتي چانت اسوء فترة ومستحيل انسى اليوم الي وره اسبوعين وليدي "هاني" لحگ امه وصار طير بالجنة..

تأزمت حالتي وطحت بالفراش وحتى رهف مالي خلگهه، اربع اشهر انه محد يشوفني بالديوان وحتى ثار شيلاء ماخذيته لان حيلي باد محد گدر يقنعني حتى عُثمان اجه وحاول وياي..

وبيوم صحيت من حلم وهاي اول مرة تزورني بالطيف فارت روحي ورحت هداده ؏ مروان والخبلني گال ذوله ولدي واختار التريده واخذ بثارهه..

تسودنت وماحسيت ؏ روحي اله وانه ذابح ثنين من ولده بگلب بارد وهوه ولا رفله جفن لبالك مو ضناه الي انذبح هس..

عفتهم وطلعت وعفت البيت بكبره رديت عشت ببيت ابوي الي صار بيتي من بعدما وزعنه الورث وانطيت اخواني حصصهم وصار البيت كله ليه..

سنه مرت ؏ وفاه المرحومة وهم صحيت ؏ كابوس حبوبه عطيه نصحتني ازور الكاظم هوه الراح يبرد افادي ويطفي نار گلبي..

الفجر طلعت متوجه للكاظم صليت واندعيت وبچيت چن جاهل وعافته امه الوادم تعاينلي وتستخطيني، مسحت دموعي وودعت الامامين واجاني اتصال من حجي اسماعيل انطيته رفض مابيه اجاوب احد لحد ما دزلي رساله يتوسلني حتى يجيلي للناصريه لان عنده سالفه...

گلتله انه اجيك وهوه رحب بالموضوع، زرته ببيته وهاي مو اول مرة اجي هنا چم مرة عازمني انه وهلي وجايله وچنت اجيب شيلاء وياي بَـس مادري ببناته ولا شايفهن ولا اعرف اسمائهن..

طلعت من بيته وچان عدهم عطار بالفرع نزلت اشتري شي يرويني طگيت بطل الببسي وشربته كمعه وحده من العطش والحر الچان بهذا اليوم...

طلعت من العطار وشفت بت حديثه تلعب توكي، الشعر اصفففر كهرب يوصل جوه وركهه ولابسه ثوب بنفسجي وتگمز وشعرهه يگمز وياهه، جذبتني وسحر عيني جمالهه وانوثتهه الطاغية..

تعوذت من الشيطان ودرت وجهي بَـس عيني من وحيدهه تروح عليهه، ركبت السيارة وانه امشي بالطريچ وافكر بيهه شني هالحسن بحياتي ما شايف بت بهالجمال اهلهه شلون يرضون تطلع وحيدهه ولابسه هيچ لبس ضيگ بارز جسمهه ومفاتنهه بوضوح والله هاي لو عندي ما اطلعهه الشارع واذا اريدن اطلعهه اضمهه بجيبي خاطر ما تنحسد لو واحد تظيگ عينه عليهه..

گظت تلاث اشهر من حياتي نفس الشي ماكو أي تغيير نفسيتي تحت الصفر وگلبي ما جاي تخمد ناره وهم حبوبه نصحتني اروحن للكاظم واطلبه يهديني..

زرت واندعيت وطلعت وصار طريچي ؏ بيت حجي اسماعيل بَـس مانزلتلهم رحت لنفس العطار واشتريت ماي منه وطلعت وصادفتني نفس البت صرنه عين بعين اويليي مو عيون نظرتهه چوت گلبي، زفرت بقوه وذكرت الله هاي شمالني منين اجتني هالخفية انه مو هيچ..

حسيت بعيون البت تتابعني، اللتفتت عليهه وصگد چانت تعاينلي والخشم احمر والشفايف دم وعيونهه الخضر مدمعه، تفاجأت من تقدمت عليه وگالت بحس فاهيي..

-عموو هاي سيارتك؟

اشرت ؏ سيارتي وانه هزيتلهه براسي اي، استرسلت...

-عمو اني اسفه

گالتهه وبچت وغطت وجهها، صوااب هاي شمالهه وانه مابيه مياعه هسّ انه گاظي تعب وقهر، جريت نفس وسألتهه...

-شمالچ بنيتي ليش تبچين؟

فرقت اصابعهه عن وجهها بحركة طفوليه خلتني ابتسم وحسيتهه ابتسمت من بين دموعهه، جرت خشمهه چم مرة ومسحت دموعهه وحچت بنعوصه...

-عمو شوف شسمه اني اسفه وترا مو قصدي اسوي هيچ بَـس انته حاط سيارتك بمكان خطأ

صفنت هاي شجاي تحچي وليش هيچ تحچي فاهيه وتمط بالحچايه..

-عميد الدين: بابه شني مافهمت؟

-اني بالغلط دا اللعب اووّك وبالغلط شسمه شوف ونبي بالغلط صارت دا اشمر الحجارة حتى احدد المكان الي ميصير اگمز عليه وبالغلط والله طفرت الحجارة صارت ؏ جامة الشسمه جامه السيارة

درت وجهي واذا اشوفن الجامعه الاماميه مفطوره من الطول للطول، انه لو بغير وكت وهيچ نفسيتي چان شطت وكظيت السوه هيچ وملصت راسه عن رگبته بَـس هالبت استخطيتهه وانه اشوفن عيونهه تصب دموع، چتفت ايدي ورفعت تك حاجب حسيتهه خافت مني...

-عميد الدين:،زين وهسّ شلون بيه؟

-جواهر: عمو اني اگولك شوف شسمه اني اگول لو متگول لأهلي احسن حبااب

-وليش ماگولن لهلچ چا شني انه هيج ارد وسيارتي جديده مو حرامات

-جواهر: حباااب اسوي كلشي تريده فدووه بَـس لتگوللهم اختي الچبيره تكتلني والله مترحمني والله

وصارت تبچي وتشهگ اويلي اشتعلت عميدان شصخمت هاي العيون مال تبچيهه..

-عميد الدين: خلص بنيتي لا تبچين ماصار شي

عفتهه ورديت للسيارة وگفني صوتهه...

-جواهر: عمو ادفعلك فلوسهه وروح صلحهه

-عميد: لا بله ومنين تجيبين سعرهه

تقدمت عليّ صارت جدامي بالضبط مايفصلنه غير ربع متره وعطرهه طب بنص خشمي وعيونهه معلگه بعيوني...

-جواهر: انته كل شهر تعال انطيك مصروفي اني اجمع دائماً واحط بدخلي واشيله وانطيكيا

-من كل عگلچ انتي

دمعن عيونهه وحچت متوسله...

-جواهر: اني اسفه يربي الله ياخذني الله ياخذنييي

-لا بويه شني هالدعاوي خلص اجي كل شهر وتنطيني هذا هوه اتفقنه

ضحكت فرحانه وبرزت سنونهه الليلو ضحكت ؏ ضحكتهه وانه مادري شمالني من كل عگلي اخذ فلوس من بت بَـس مادري ليش حسيت لازم اردن واشوفهه وهاي الطريچة الوحيده...

اجيت الشهر الوراه وچانت بنفس مچانهه تلعب من شافتني اجت تركض گالت..

-جواهر: شوف عمو هستوني رجعت من المدرسة بدلت وركض اجيت هنا وگفت انتظرك اصبرلي ثواني اجيب الفلوس واجيلك

ضحكت وغميت روحي بداخلي ردت اگلهه لا تجيبين شي بَـس سبقتني وراحت تركض، انتبهت هم لابسه بنفسجي بَـس هالمرة برمودة وبدي ربع ردن تسودنت ذوله اهلهه شني من بشر شلووون يرضوهه..

اجتني وجايبه بيدهه عشرين الف بهذاك الوكت تحچي انصدمت هاي شلون لمتهن؟ ودعتهه وعفت الفلوس بالسيارة ما كظيتهن وتكررت روحاتي لبغداد بَـس خاطر اشوفهه وهيه تجيني مبتسمه وتدنگ راسهه مستحيه..

صرت احب هالشارع واحب الروحه والرده بي واتونس من اشوفهه وبدت تسولفلي ؏ حياتهه وحنه واگفين واول شي گالته اسمهه "جواهر" اييي وعلي اسم ؏ مسمى..

حچتلي عن اهلهه وانه مادري بحجي اسماعيل ابوهه لان ماتذكرلي اسماء، حبيت سوالف ولسان هالبت لسانهه شطوله وصلفه وجريئة ما تخجل خصوصاً باليوم الگالتلي...

-جواهر: عمو انته شگد حلوو

جفلت وانعگد لساني شجاوبهه، انداريت عليهه وگلت...

-خايبه انتي شگد صلفه

صفنت بوجهي وضحكت وضحك گلبي وياهه وردت گالت بكل جرأة...

-جواهر: عمو تحچي صدُك كذب اصلاً لازم تكيف احسن ما تكون اجگم

ضحكت من كل گلبي بيومهه وظلت ترن باذاني حچايتهه،
بَـس مادري ليش ضجت وردت اسمع اسمي من حلگهه...

-عميد الدين: صيحيلي عميدي

-جواهر بخجل: اسمك عميدي؟

هزيتلهه براسي وابتسمت، ضحكت وغطت وجهها فرحانه چن گايللهه ؏ سر..

مرت شهووور وانه وياهه اسولف واضحك نسيت هلي نسيت عاداتنه وكلشي چنت من كل عگلي اعوف شغلي وكلشي خاطر اشوفهه وچنت مستمر اخذ منهه فلوس بَـس ماكظهن ومن لميتهن وصار مبلغ محترم رجعتلهيا وهيه مارضت بَـس حلفت ما اخذهن..

سولفتلهه ؏ رهوفه وحبتهه كللش لدرجة طلبت مني صوره الهه حتى تشوفهه وتحتفظ بيهه..

چنت فرحان بيهه وحسيت روحي تعلگت بهالفاهيه ام عيون چتاله ولون عيونهه سحرني وبيوم طلعت للسوگ ولگيت سبحة جذبتني نفس لون عيونهه اشتريتهه بدون تردد وانه اتمايزهه واللعب بيهه بأصابعي ويتهيألي شكلهه..

بهالفترة عُثمان اجه للناصريه وسولفتله ؏ جواهر وچان يداهرني بيهه خصوصاً مرة من المرات اجه وياي لبغداد عنده سالفه ومن شاف جواهر صاح....

-اويليييييي اشتعلووو مروان وخلفتوو يُبا هاي لعااابه!!

-عميد: عُثمان عيب شمالك ولك

-ههههههاااي تغاار عليهه موو يول هااا هااا گوول

-عميد الدين: لا وشكو اغار عليهه بَـس عيب تحچي ببنيات الوادم

-ممم هيك يعني طيب يله أنَا اروح احكي وياهه عجبتني

كظيته من ايده قوي ونترت...

-عميد: عُثمان شمااالك انته صااحي

-اي دحگلهه يول هاي ماتتفوت دحگ لشعراتهه نسحل گلبي

عصبت وتكدرت منه بَـس مارديته، تگرب عليّ وحچة بخبث...

-عُثمان: هاا ضلعي نگول وگعنه

-لاااء ماوگعت ولا شي البت حبابه وتسولف وياي شني كفرت

-بَـس تعرف هالشي عيب تحكي ويه بنت ما تحلك

-ادري عُثمان وانه اصلاً رح انسحب مو عبالك

-عُثمان: اوووف دحگ قربانووو أنَا شنو هالجمال سبحانك ربي

-هواي زحفت انطم بسك

-ماكدر عميدي ماكدر اگظب روحي شوفهه يُبا

فار دمي وتمنيت اكظه واطره نصين، ماچنت ادري حچاهه متعمد وماچان يعنيهه وگالهه بَـس حتى يثبتلي انه وگعت بعشگهه بَـس اغالط روحي، استمريت اجي وعُثمان اوقات يجي وياي وبقه ؏ هالاسلوب يداهرني ويبزعني بَـس من احاچيهه مايجي..

چنت اسألهه ؏ اهلهه تگول دائماً بالدوام ومايهتمولهه حتى لو ردت نص الليل، علمتهه هوااي وفهمتهه ؏ الصلاة خصوصاً من صدمتني وكالت ماتعرف تصلي وتصوم..

مرت ايامي عسل وياهه الى ان اجه اليوم وگلتلهه انه رح اسافر زعلت هواي وحتى وصلت بيهه بچت وگالت لا تعوفني حسيت ؏ روحي انه شسويت وشلون علگت بت بيه بهالطريقه بَـس وعدتهه ارد وترد علاقتنه نفس گبل..

الى ان رديت وياريتني ما رديت وانه مفتهم بكر خطب بت ومني هالبت چانت جواهر الي هيه بت حجي اسماعيل!! حسيت نغزات بگلبي بَـس ماتكدرت كللش لان انه ما احبهه چنت اشوفهه صديقه وچذبت ؏ رويحتي وگلت انه مستحيل اعشگ بت نفسهه سافرة وعائلتهه فالته ولا دين ولا ديانه..

انگطعت عنهه وبعد مارحت ولا شفتهه لفتره طويييييله احتراماً لابن عمي، بَـس بكر ما گعد راحه وچان يحچي بيهه ليل نهار ويحچيلي عنهه وعن سوالفهه وشلون تضحك وحتى وصفلي ريحتهه وشني اليحس بي من يشمهه..

من يسولفلي احس بغصة وگلبي يصير يوجعني وچن يچوي بصيخ حديد.. ابتعدت عن بكر خاطر مايحچيلي عنهه لان حسيت روحي نذل وانه افكر بيهه وهيه مو ليه بَـس ما تاب ولا جاز استمر واوقات يجي لحجرتي ويسولف وياهه بالموبايل وانصدمت من گالي هيه ماتدري بروحهه مخطوبه..

تكدرت ؏ روحي لييش صاير هيچ لييش بَـس افكر بيهه ليش ماجاي تروح من بالي واسهر الليل وانه افكر واتخايلهه جدامي حتى من اسبح بسبحتي اتذكرهه واتذكر ضحكتهه وصوتهه المدلول، حرمت بغداد عليّ ومارحتلهه الى ان اجه اليوم وطگ گلبي عليهه بعد ماگدرت اتحمل چانت سادس اعدادي شفتهه وساح گلبي والالم بده يدگ بصدري..

اجتني ملهوفة بَـس من شافتني جافي وياهه شحب وجهها وسحبت روحهه، متت بالايام الي ابوهه يطلب مني ادرسهه وادرس اختهه احياء چنت ؏ اعصابي وهيه شني من لبس وشني من عطر والشعر مفلول وتگعد بصفي لزگ وتتفهالي وتتماوع عليّ يا بويه تدمرت..

تعبت وگلت لامي بعد ماريد اشوفهه وامي اكيد افتهمت وليدهه ملوع بعشگ چاوي گلبه، نجحت جواهر من السادس والطرگاعه طلعت مسجله جامعه ذي قار تصخمت وتلطمت بالفترة الاجت يمنه جسيت وياهه كلللش وماعاينلهه عسى اطلعهه من گلبي بَـس دفرت الباب وطبت وتمددت بنص افادي مو بَـس تربعت..

انه ادري بيهه تحبني وتريدني لان اكثر من مرة وضحتلي هالشي ماعدى لهفة اسمي بحسهه من تگول "عميديــي" وتمد بالياء لو مدت روحي وياهه!!

مشت الايام وامي تنگ براسي تريدني اتزوج وگلت صح هاي خوش طريچة حتى انساهه والتهي عنهه بَـس رديت هودت من افتهمت فسخت من بكر غير طرررت من الفرح لكن من شفت حالت بكر گلت مستحيل اتدنالهه وابن عمي رايدهه...

رديت لسالفه الزواج وگالولي نخطبلك بت سيد فارس "هجران" انه ماعرف البت ولا شايفهه بَـس گالو حاچيهه بلچن يلين الهه گلبك..

عُثمان عارض كللش وعاركني وگال مايصير اضعف وابتعد عن معشوگتي خاطر انسان ما يسوه بَـس انه چنت اشوفن بكر خوش بكر وماعنده سوالف مكسره..

-عُثمان: يول انته تحكي صدك!!!

-اي عُثمان والعباس تعبت بلچن انساهه

-عُثمان: كذببب عميدي كذذب ما تنسااهه حتى لو تزوجت اربعه يول هذي البنت ماخذهه گلبك وعقلك وتفكيرك وكلشي

-اييي ايي چا شسويي خلص انه اتخذت القرار وباچر رايح لبيت سيد فارس خاطر اشوفن البت

-غبيي عميد غببييي لو تركت جواهر وانته تعرف البنت تعشقك مو بَـس تحبك ليش تأذيهه وتأذي حالك

-اسكت رحمة لأمك انه شطيح حظي غير هالعشگ المستحيل يصيرلي

عاندت ودست ؏ گلبي ورحت لبيت الوادم وحاچيت البت چانت حبابه وهادئه وحسيت بنظراتهه وانجذابهه الي وگلت هذا هوه اخطي هالخطوه واخطبهه بَـس الصدمة من عمي خليل خطبهه لبكر، تسودنت وعصبت حييل هاي اهانة بحگي شني يگلولي ؏ بت وتالي يخطبهه لأبنه شني انه فريخ جدامه!!

طلعت من بيتهم وانه ميت من القهر من عمي رديت للبيت وتعاركت ويه امي وگلتلهه تنهي سالفه الزواح نهائياً، تزوج بكر وانه ؏ امل ينسى جواهر بَـس الحظ اتمسك بيهه اكثر ورادهه اكثر..

اسمع حسهه تبچي وحيدهه بالهول كلما امي تفتح موضوع الزواج وياي وانه يموت گلبي ويه كل شهگه تطلع منهه، حلفت ماتزوج وامي ما گعدت راحه رحنه لأيران وفاتحت خالتي بالموضوع وحطتني امام الامر الواقع بَـس الله وگف وياي والبت ماعجبت حبوبه عطيه ورفضناهه..

ايااام وايااام وايااام ماظگت طعم النوم، اخافن احد يدري بعشگي لجواهر ويسمعني حچايه ويگلي انه خاين ابن عمي وعاشگ اليريدهه، چنت كللش حذر بعشگي الهه ومن اكتشفن رهف وغزاله انه عاشگ حسيت انتهى الموضوع ومابيهه مجال بعد بكر رح يفتهم ويكرهني طول عمره وانه احبن بكر كللش وما ارضى يعاينلي بنص عين..

تحملت هوااي وما فد يوم گلتلهه لو وضحتلهه، يجوهه خطاطيب كل يوم وگلبي ينشلع من صدري بَـس الخفف عليّ هيه ما ترضى لحدما افتهمت بآخر واحد خطبهه الي هوه "قيس" اشتعلتت من شفتهم منسقين هدومهم ويه بعض وكلت هاهيه عميدان راحت جوهرتك من ايدك..

رديت للبيت ودعيت من كل گلبي ترفضه وما تضعف وتروح مني، وصدك اجتني رهوفه وجابتلي الاخبار الحلوة وبكر طلع كاتلهه وانه محذره ما يتندالهه واجه كلشي لصالحي..

صح تأذيت عليهه وتمنيت اذبح بكر بَـس كلشي بي صالح ولوما هالكتله چان مو باچر اروح امشي عليهه..

طلعت من الصاله ورحت للديوان صليت ركعتين هدية للكاظم سلام الله عليه لان طلبتهه منه واجاني عُثمان ونظرات المكر والتلمز تنبع من عيونه...

-عُثمان: قبل الله ضلعي

-عميد: منا ومنكم ابوي

-عُثمان: احييييي وكان جوهرتك تصيرلك يووول

-عميد الدين: عُثمان مامصدگ شنيي اعشگهه عشر سنين وتالي صارتلي دخيلك ربي تممهه

-عُثمان: ان شالله وهسه يله ايمت تخطبهه؟

-باچر وعلي اخذ كل الشيوخ والوجهاء تستاهل چوية گلبي

-ههههه نيالك جواهر الرجال مولع

-خاب هوه بَـس مولع غير مسحول سحل

-هههههههه الله يديمهه يُبا

ضحكت ونزلت راسي اسبح واندگت باب الديوان، گام عُثمان يفتحه وتفاجئنه من شفنه هجران....

**

"هجران"
دموعي ماوگفت واني اشوف بكر يتوسل بعميد حتى ميتزوج جواهر، نهيت الموضوع ولميت غراضي وملابسي وملابس زنوبه ونزلت ادور ؏ واحد من الولد يرجعني لأهلي وهاي اول مرة اگول طُززز بـ بكر وماهتمله اذا هوه ماعبرني وگعد يتوسل ويبچي علمود حبيبة گلبه..

دورت ؏ الولد خاله انتصار گالت بالديوان گاعدين رحتلهم وعثمان فتحلي الباب، عقچ حاجبه مستغرب..

-هجران: عُثمان فدوه تگدر توديني لأهلي؟

-عُثمان: ليش تبكين هجران؟

-حباب مو وكتهه تگدر لو اتصل ؏ اخويه

دار وجهها يباوع لعميد الگاعد ؏ السجاده وهزله براسه فسرتهه "اخذهه" جر نفس عميق وطلع گدامي واني حرت شلون اركب وياه وحدي بالسيارة والدنيا ليل..

رغم هذا مهتميت وركبت السيارة والطريق كله اني اشهگ وابچي وزنوبه تبچي ويايه، حسيت بنظراته عليه وكل شويه يتنهد ويجر حسرة بَـس مگال شي..

گوة نيمت زينب وفتحت الشباك لان اختنگت..

-عُثمان: يُبا كافي مو زين كافي ماتعبتي

-عثمااان حمووووت...

حچيتهه وطگيت من البچي عبالك چنت منتظرته يحچي ويايه ويهدأني، گال بصوت هادئ..

-عُثمان: هجران مايفيد البكي والله بَـس رح تتأذين يولي

-زين مابچي بَـس گولي شسوي؟؟

اللتفت يباوعلي ورجع انظاره ؏ الطريق..

-عُثمان: انتي فكري شنو الي لازم تسوينو

-مثل شنووو

ضحك بسخريه وهز راسه ماعرف شبي وشنو الي بباله..

-عُثمان: يُبا أي بنت بمكانك شنو تسوي؟

سكتت ماجاوبت، واضح كلامه ان طلبي الطلاق بَـس هالشي شبه المستحيل لان بكر رح يحرمني من بنتي..

ظلينه ساكتين الطريق كله واني كل شويه اتذكر وابچي وزينب تنحست عليه كُلش لحدما وصلنه بالاربعه الفجر..

نزلت من السيارة وركض دگيت باب بيت اهلي ووگعت بحظن امي اشهگ وابچي ماما وبابا تخبلو وعثمان حار شيجاوبهم وترخص وطلع گال يروح يزور وبوجهه يطلع للانبار لان عنده شغل هناك..

ودعو اهلي واجتلي ماما تركض وبابا وحيدر وياهه وندى اخذت زنوبه، خطيه كلهم گعدو ؏ صوت بچيي..

حچيت لأهلي كلشييي بدون أي اختصار ومراوغ وبابا تخبل وظل يرزل ويغلط ويسب ببكر وحتى عليه گام يغلط يگول اني ماعندي كرامه لان باقيه وياه كل هالمدة وانوب اندار ؏ ماما وهم اكلت نصيب من الرزاله شلون عايفتني هيچ...

للصبح استمر نقاشنه وبابا ختم الموضوع وگال مابيهه مجال اطلب الطلاق ونرفع دعوه حتى اخذ زنوبه واستلم الحظانه واذا ؏ دراستي يحاول يسويلي نقل لو يشوف شلون بَـس هسه رح ياخذلي اجازة منا لأمتحانات نهاية السنه..

رضعت زينب ونمت وياهه وماگعدت اله بالاربعه العصر، مارست يومي الطبيعي بَـس ايدي ؏ گلبي اخاف يجي بكر ويفتهم ماخذه زينب وياخذهه..

استمرت ايامي واني كل يوم افز من النوم حلمانه لو بكر ذابحني لو كاتلني لو مأذي زينب يعني احلام مخربطة كُلش ومن اسأل ماما تكول هاي اضغاث احلام وهاي بسبب خوفي هيج دا احلم..

وباليوم الصارلي اسبوعين عند اهلي وبكر ماله حس اجتني رسالة من عُثمان كاتب بيهه..

-💬 عُثمان: السلام عليكم، شلونِك هجران وشلونهه زنوبه اتمنى اتصل عليكي واشوف زنايب لان كثير مشتاقلهه بَـس اخاف اسببلِك ازعاج

ابتسمت واني اقره الرساله، الادب الي شايله هالرجال يخليني اصفن واكول ماكو أي ربط بينه وبين بكر ولا كأن اخوان..

ماجاوبته برساله فوراً دگيت عليه فديو ووجهت الكامرة ؏ زنوبه گاعده تآكُل ثريد بانيه وملطخة وجهها وملابسهه بَـس ماهتميت خطيه ماريدهه تظل بنفسه..

جاوبني بسرعه ومن شاف زنوبه شهگ، متت من الضحك ؏ ردة فعله لان اگدر اشوف وجهه بالشاشه، ظل يحچي وياهه وهيه صافنه متعرف منين ديجي الصوت..

وحهت التلفون گبال وجهها ونسيت اگلب الكامرا يعني صارت عليه وبيومهه چانت حارة ولابسه دشداشه نص ردن ليموني وگاعده وحدي بالغرفه وشايله شعري كبه وندى موتتني يوميه تمكيجني مشتريه علبة مكياج جديده وتجرب بيه عبالك فرحانه رح اتطلگ..

غص وظل يگحگح ويحمحم واني العوبه ولا يمي الموضوع اضحك ويه زنوبه وهيه تضحك من تشوف وجهه بَـس تفاجأت من طبگ الخط بوجهي، بعدييين ياله افتهمت وفكرت بالسالفه وغميت روحي الف غمه ومتتت من الفشاله تمنيت اطم روحي..

وخمس تيام هوه لا يراسل ولا يدگ ومن راد يحاچي زينب دگ ؏ بابا وهوه ياخذهه ويسولفون ويه بعض..

كل هالايام مرت وبكر ما فد يوم رفع موبايل واتصل ومن اسأل غزاله تگول اصلاً ميجي للبيت وحتى جوري تگول ميروح لبيتهه وبابا من يتصل بي يطلعله الجهاز مغلق، لعب گلبي وحسيت اكو شي غلط بَـس بعدت كل الافكار من راسي وگمت اساعد ماما بالمطبخ..

لليل واجاني اتصال من وحده بالي يمهه طول هالايام اكيد عرفتوهه "جواهر" ايي اييي مشى عليهه عميد الدين وشون مشيه چانت اشكال شيوخ اجو حتى ابوهه گال مشية مُحترمة وثگيله رفعت روسهم وبوقتهه جوري اتصلت بيهه وگالت تخبلت البنيه حتى بچي بچت متت ضحك عليهه وبعد يومين المهر مالتهم عساس هوه مهر هوه زفة بَـس ابوهه ما قبل تتزوج لحدما تتخرج، جاوبت الاتصال...

-هجران: هلااا بالعروووس

-جواهر: هجراااان ممصدگه ممصدگه!!!!

-هجران: لچ كاافي اله تحسدين روحچ

-جواهر: يمكن رح انجلط لچ ميتصل عليه ولا يراسلني غير احنه مخطوبين ويهتملي

-لا لچ بعد وكت شبيچ عود عقدو سيد ذاك الوقت گلبي وجهچ اذا ميراسلچ

-هاا اي صدُك يلا حب بَـس ردت اتطمن عليچ وهسه رايحة للصالون

-لچ يا صالون بنص الليل

-ههههه عادي هاي صديقه ماما وگالت تعالي اسويلچ ماسكات وحفافه وكلشي بالليل احسن حتى ماكو احد

-هاا يله باي حبي

-باي

سديت الاتصال منهه ونمت ثاني يوم اتصلت امهه وعزمت ماما ؏ المهر وماما گالت نروح عادي ماعدنه شي، فرحت لان رح احظر عقد صديقتي المقربه ورح اوگفلهه بفرحتهه..

حظرت نفسي وطلعت ويه امي وندى حتى نشتري ملابس لان مجايبه ويايه شي كشخة واني ادري بجماعتهم يباوعون خصوصاً بعرس شهد انتبهت عليهم..

اشتريت فستان بينصل ماروني وفوگاه ستره سوده قصيره واكسسوارات ومكياج ونداوي هم اشترت وماما هم..

رجعنه للبيت ونمنه ثاني يوم طلعنه من الصبح لبغداد، وصلنه لفرعم وچانت جواهر هستوهه جاي تطلع من باب البيت حتى تروح صالون من شافتني صارت تعيط من الفرحة لان اني گلتلهه ما اجي وتفاجأت من شافتني، توسلت بيه حتى اروح وياهه وماما گالت اعوف زينب يمهه..

رحت وياهه وركبت بسيارة حلاوة لان هوه الي رح يوصلنه چانن رهف وحلا وشهد وخالة انتصار وحتى جوري گاعده من شافني تخبلن وانگلبت السيارة ديسكو..

علگ حلاوة اغاني والرگص والردح الصار وشهد وحلا ورهف كل شويه يهلهلن ويغنن ويصفگن وحلاوة يخزر بيهن وساعه يضحك، اما جواهر ماعرف شلون اعبر عن فرحتهه عيونهه وحده تحچي والراحة المبينه ؏ وجهها مو طبيعي..

وصلنه للصالون وخاله انتصار كل شويه تگول لجواهر...

-انتصار: خاله حبيبتي من نطلع من الصالون ميخالف تغطين وجهچ عميدي مايرضى

-جواهر: هههه اي خاله تدللين هاي خامس مرة تگوليلي

ضحكت خجلانه واني غمزتلهه وهمست...

-هجران: واضح ميدو يغار وموصي امه

-جواهر: اويلييي جعل محد غيره يغاار

طبينه للصالون چان كُلش حلو وچبير بَـس العَجبني بي ولد وبنات يشتغلون وخاله انتصار فتحت عيونهه متعجبه وصدفت عميد الدين اتصل بهاللحظه ظلت تتراجف ومتعرف شلون تجاوبه فَـہ رهف گلتلهه فتحيلنه مكبر حتى اذا گال شي ومعرفت تحچي خاله هيه تجاوبه، فتحت الخط وحچت بصوت يرجف...

-ها يمه عميدان

-عميد الدين: ها يوم وصلتو؟

-انتصار: اي حبوبي

-عميد الدين: وجوهرة بدو بيهه لو بعدهه؟

-انتصار: لا يوم لسه

-عميد الدين: هاا چا زين استعجلو ترا الوادم كلهه منتظره ويمه مثل ماوصيتچ ؏ مكياجهه والتسريحة قنعيهه اغديلچ فدوه

-انتصار: اي اي يوم هذا هوه

صفنه وحده بوجه الثانيه وخاله انتصار اشرتلنه بعدين تفهمنه، رجع گال...

-عميد: يمة يله مابيه صبر بعد ترا حموت وعلي

ضحكنه كلنه وجواهر صارت حمرة خجلانه بَـس فرحانه حييييل، قطعت الاتصال خاله واجه رجال مبين مو عراقي لو سوري لو لبناني اجه وگال...

-انساتي شو مين العروس؟

احنه وحده تباوع للثانيه وجواهر گالت هيه العروسه، بهالاثناء رأساً رجع اتصل عميد الدين وخاله رجعت ترجف...

-رهف: بيبي شمالچ تتراجفين هسه شني شكو

-انتصار: ولچن معزايات شني زلمة رح يسويلچ مكياجچ جوهرة

-جواهر: لا خاله هذا بَـس حتى يوصلني للغرفه الخاصه مال تصفيف الشعر

-انتصار: هاا چا خوش وهسّ اجاوب عميدي؟

-رهف: بيبي چا يظل ينتظر ويعصب

-هااا اي اي يله

جاوبته ومافتحت مكبر كملت المكالمه ورحنه وره هذا الرجال وخاله انتصار ترعش خايفه لحدما طلع ياله جرت نفس، تقربت ؏ جواهر وگالت بخجل...

-انتصار: خاله جوهرة حبوبه هذا عميدي يغار ويخاف عليچ وطلب مني اقنعچ واذا ماقتنعتي عادي كال لا تضغطون عليهه ماريد ازعلهه

-جواهر: گولي خاله اسمعچ

-انتصار: حبوبه انتي اسم الله الرحمن يحفظج حيل حلوة والعيون عليچ عميّيد يگول لو تحط مكياج خفيف وشعرهه ماتذبه يعني تشيله كله ترفعه فوگ احسنلهه وهاااا شوفي كال اذا مارضت لحد يضغط عليهه

ضحكنه كلنه وجوري گامت تگمز وتگول..

-جوري: اويلااااه نيااالچ جواااهر لو هيچ الرجال لو مينراد هم يغاار وهم يخااف وهم ميريد يزعلچ ويضغط عليگ احيييي يا ناار گلبييي

-جواهر: شو دجيبي عينچ خليني افگسهه اذا النسوان محسدني انتي تحسديني

-هجران: اي والله بنات خلص خلونه نطفي عيونه

-جواهر: تطفنهه غصباً عليچن (اندارت ؏ خاله وحچت) خالاتي حبيبي اصلاً اني ردت مكياج خفيف واشيل شعري وماطول عميدي هم گال يدلل عليه اخفف مكياجي اكثر لخاطره

سحبتهه لصدرهه خاله انتصار وتبوس بيهه وتحظن وتتشكر وگالت تروح تبشر عميد الدين واحنه تركناهه وكلمن گعدت ؏ كرسي واستلمتنه وحده تشتغل بشعرنه ومكياجنه..

اني سويت شعري كيرلي ومكياج هادئ وكالعادة الحمرة طوخ وجوري نفسي وحلا وشهد كذلك ورهوفه بَـس كحله ومسكارا لان تگول ابوهه ميقبل تحط مكياج اما جواهر اويلي ؏ جواهر مو بنيه طرگاعه ههههه جوري صوفرت من شافتهه وصاحت...

-جوري: يباااوووو الرجال رح يتسرح يروووح بعد ماعدنه عميد الدين دتشوفون الجمال بنااات

-انتصار: قل اعوذ برب الفلق اللهم صلِّ على محمد وال محمد يحفظچ الرحمن ويحرسچ بنيتي اسم الله اسم الله اسم الله

-شهد: خاااله شدعووه شو اني مسويتيلي هيچ لو هاي لان جواهر وعميد الدين هيچ تهتمين

-انتصار: هههههه خايبه لسانچ كظي وع كيفچ وياي لا يبعدي بَـس صگد طالعه حلوة وشوفي حتى النسوان شلون يعايننلهه شوفي شوفي

درنه وجهنه وصدُك كلهه فاكه حلگهه خو ام الصالون تخبلت ورادت اله تاخذ صور للمكياج ؏ جواهر بَـس خاله انتصار ماقبلت وگالت...

-انتصار: لا ديه المكياج عادي مو ذاك الشي بَـس چنتي المحليته

-ام الصالون: هههه اي والله داده ديربالكم عليهه عيوني محصنه ان شالله

-جواهر بضحك: يمعوودين يله كافي هسه شكو شطالعه هيه حميره وكحيله ؏ گوله عمة دلال

ضحكنه كلنه وگمنه نبدل ملابسنه، تفاجأت من جواهر لبست بدله بنفسجيه عنابي منفوشه، رحت عليهه متسائله...

-هجران: اگولچ عميد الدين مو يكره اللون البنفسجي شعجب اشتريتي؟

-جواهر: اي شمدريني من طلعت خاله انتصار اشرت عليهه گلتلهه عميدي ميحبه گالت معليچ انتي غصباً عليه يعجبه

-هههههه لچ وااضح خاله انتصار فرحانه بيچ اكثر من عميد الدين

-جواهر: ايي فديتهه هواي تحبني

هزيتلهه براسي وساعدناهه تلبس البدله كُلش چبيره بَـس مابيهه سيم يعني كلهه تول ومنفوش لكن فعلاً طلعت تأسر العين وتخطف الانفاس ورجعت خاله تقره عليهه وتنفخ انوب خربتنه ضحك من گالت لأم الصالون...

-انتصار: اگلچ خيتي ماعدكم حرملات نحرمل هنا

-رهف: بيبييي شني حرمللل شمالچ لو احد رح يحسد البت ماكو غيرچ

ام الصالون باوعت لجواهر وگالت بضحك...

-نيالچ ؏ هيچ مرت عم ونيال العريس ؏ عروسه نفسچ عاد گوليلي يستاهل كل هالكيك

ضحكت جواهر وهزت راسهه وحلا گمزت وگالت...

-حلا: اي اي يستاهل چا شون ما يستاهل اصلاً انه اخوي عميد الدين احلى خواني ومهيوب وچريم وخوش وليد

-ام الصالون: الله يحفظه ويتمم عليهم

كلنه گلنه "آمين"، لبسنه حجاباتنه ولبسنه جواهر كبوس ابيض كتلت روحهه ؏ كبوس بنفسجي وتگول فرت الدنيا ومالگت، ضمينه وجهها بَـس صدرهه ورگبتهه شويه طالعه فَـہ خاله جابت شال ابيض وحطته عليهه بَـس ماثبتته يعني بَـس هيچ شمرته..

طلعنه وگفنه بالباب لگينه سلمان واحمد ومرتضى واگفيلنه بره ينتظرون..

ركبت ويه جواهر بسيارة سلمان وخاله انتصار وشهد ويايه والباقيات توزعن بسيارات الباقيين..

الطريق كله ردح ورگص وسلمان ومرتضى وگفو بنص الشارع تگولون زفه وگابلو بعض ويهزون رعاشي وخاله انتصار مكيفة وفرحانه وتهلهل وتگول گفلات...

-انتصار: واحنه الشوبشنه عليهه وهيه زغيرونه كللللووووششش

وسلمان صعد بالسيارة ويرگص ويهوس...

-سلمان: العريس وربعه يزفونه العريس وربعه يزفونه

وصلنه للبيت بعد فرة ساعة ضبط بالسيارة حرگو الجو حرگ ومن وصلنه قريب بيتهم كلنه شهگنه من شفنه الامة العربيه مگلوبه لدرجة بيت اهل جواهر ممكفي وناصبين چادر بنص الشارع ومادي، وگفنه شويه بعيد عن البيت لان مسدود الطريق وشفنه عُثمان من بعيد لابس دشداشه نيلي ولاف الشماغ مثل الاماراتيين ومناظره الشمسيه لونهن ازرگ طوخ عبالك صدُك خليجي..

چان لازم مسدس بيده وعبالك چان يرمي من شافنه اجه علينه وسلم سلام جماعي وگال بأستعجال...

-عُثمان: سلمان الگه غير طريق يول شلون ندخلهه هيك گدامهم

خاله انتصار جاوبته...

-انتصار: عادي حبوبي هيه مغطايه ماكو شي لا تخاف وانتهم اوگفو حوالينه حتى مانبين

زفر بقوه وحك رگبته وهز راسه بالموافقه، صاح ؏ غيث اجه وياهم وصدُك حاوطونه حتى مگدرنه نشوف شي خصوصاً همه ماشالله كلهم تگولون عمالقه بالطول والقلافه..

طبينه للبيت وهنا اشتغل الركص والردح الصح من شافنهه النسوان وهيه بعدهه مغطايه والهلاهل والچكليت والتدبچ انخبصنه خبص، گوة طلعناهه وصعدناهه لغرفتهه جابولي زنوبه حتى ارضعهه وجواهر نزعت كلشي حتى البدله ومن سألتهه...

-هجران: اذا رح تنزعيهه ليش لبستيهه هناك من الاساس؟

-جواهر: ردت اشوف توالم الميكب مالتي حتى اذا محلو ابدله

-هجران: هاااا ويله هسه اكيد رح تعقدون سيد بسرعه لبسي سيت المهر علمود ننزل

ساعدناهه احنه البنات وبقت بَـس بالدشداشه الكيمونه مالت السيت وصار مطافر من سمعنه صوت دبچ عالي جاي من بره، ركضنه كلنه ؏ الشباك نشوف واذا الدنيا مگلوبه وديهوسوون لعميد الدين ويدبچوله..

چان اكو هوااي لابسين شماغ لونه ابيض وهاي اول مرة اعرف اكو يلبسون شماغ بهاللون ومن سألت رهوفه گالت...

-رهف: ذوله خوال عُثمان وبكر جايين من الانبار

-هااا لعد ليش لابسين شماغات بيض؟

رهف حركت چتافهه بحركة ماعرف وحلا جاوبتني...

-حلا: لانهم سُنة وهمه هيچ لبسهم

-هاااا

سكتنه من شفنه عُثمان تحظر حتى يگول هوسه لعميد الدين اشرت لزنوبه عليه وهيه شافته وگامت تصفگ وتضحك وهاي اول مرة تصفگ تعجبت عليهه والبنات مكيفات وندى تسرسحت من شافته موتتنه من الضحك من گالت...

-ندى: خيات هذا البقلاوة منو

-هجران: هههههه طاح حظچ هذا عثماااان

-ندى: اويلي يالزهرة هذا عُثمان التحچون بي

-حلا: ايي خايبه اييي ويله اسكتن خلنسمع هوسته

وگف بنص الدائرة وگال بصوت عالي...

-عُثمان: الرجل من غير اخو ومن غير ابن عمو.. محد بالكلافة يشرك بهمو.. الزلمة الزين من يسمع بأخو يمر عليه البين من وحده يفور ويحترگ دمو.. الدم يتحرك للدم هااا.. وأنَا شاهد هنا...

وانگلب الشارع كلهه تردد "الدم يتحرك للدم وانه شاهد هنا" بَـس شگد حلووو وعميد الدين بَـس يحط ايده ؏ راسه يتشكرهم وعثمان علگ الدنيا وظل يرمي ومرتضى وياه وسلمان گام يضرب چقلمبات وشهد تضحك وتگول...

-شهد: معليكم بنات بَـس صارله فتره كابت هالطاقه وحن لأصله ههههه

-حلا: ويا حلات هالاصل

استمرت الگفلات والهوسات والرمي ما سكت حتى انخلست من الصوت وخفت كُلش بَـس زنوبه مكيفه هيه وعلاوي يرگصون ويگمزون..

صاحتلنه خاله انتصار وگالت رح يجي السيد حتى يعقدون وكلنه انخبصنه نلبس بجواهر ونعدلهه ونزلناهه جوة ونعادت سالفه الهلاهل والچكليت تفشخت روسنه من وراه..

گعدوهه بالصاله ؏ كرسي وغطو راسهه بشال ابيض وغمست رجليهه بطاسه بيهه مي وياس وبين اصابيع ايدهه هيل وبيدهه قرآن تقره سورة الفتح..

عمه دلال وبيبي عطيه يصيحن بالنسوان حتى يفتحن ايدهن بوضعيه الدعاء وميسدنهه حتى ميتشربك العقد وحياتهم تكول سلسه وحلوة مابيهه عُقد ومشاكل..

واكو نسوان ماسدن ايدهن وبيبي شاطت ورفعت عوچيتهه وعاطت بيهن...

-حجية عطيه: ولچن خاايباات تفتحن ايديناتچن لو بعلي احوس بفادچن

وحدة جاوبتهه...

-خالاتي حبيبتي هاي منيلكم الخرافات مال فتحو ايدكم شنو هالسوالف

-حجية عطيه: اييي ايييي هاي الخرافات عدنه انتن شكوو لو مايعجبچن سوالف الجنوب بناات بغدااد

ضحكن النسوان وسكتن وسكتنه كلنه نسمع السيد شيگول، ظل يردد بدعاء ويسألهه هل تقبلين بالزواج لو لا وهيه صامته متجاوب لان خاله انتصار گلتلهه لحدما يگولهه 14 مرة ياله تجاوبين..

ام جواهر واگفه فوگ راسهه تسبح وفردوس گاعده ؏ القنفة كلشي متگول وشهد متحمسه وكل شويه تهزلهه چتف، اخيراً گالهه 14 مرة وختمهه.. "اذا تقبلين الزواج فَـہ قولي نعم انتَ وكيلي"

وجواهر گالتهه بصوت يرجف وتم عقدهم ؏ خير وسلامه ويا عيني الهلاهل منعرف منين تجي من الزلم لو من النسوان انگلب البيت گلاب بالتبريكات وانوب الزلم گاعدين بالاستقبال ورجعو يهوسون ويگولون بگفلات كُلش حلوة عن العريس يحچون..

گومنه جواهر وبدلت ملابسهه لبست البدله وعدلت مكياجهه وچانت كُلش متوترة وترجف، نزلناها جوة والملا بدت تقره گومناهه نرگصهه ؏ الخفيف وشهد وجوري وحده گابلت الثانيه ويرگصن وحلاوي ورهف هم مكيفات وفرحانات اله غزاله گاعده بصف امهه ما حچت شي بَـس من تصير عينهه بعينه تبتسم خفيف..

شويه وصاحو العريس رح يدخل حتى يلبسهه الذهب وطبعاً بالگوووة قنعته خاله يدخل گدام النسوان سمعتهه تقنعه بالموبايل وتتوسل بي وتگله عادي ومابيهه شي بَـس مبين يستحي..

لبسنه حجاباتنه وحظرنه الكيك والعصير وهالسوالف وجواهر گعدت بالكوشه وتصيح برهف وشهد حتى يجيبولهه شال لان متونهه وظهرهه وصدرهه نصه طالع وهيه عساس تلبس الشال ويه البدله بَـس خاله گالت من يطب عميد الدين ياله تلبسهه وهسه معاندات وعمه دلال تضحك وتگول...

-دلال: خايبه جواهر شمالچ خلي الزلمه يشوف ويمتع نظره خطايا صاير عنده جفاف شني هسه شكو هوه كله صدر وكلنه عدنه

خربنه ضحك وجواهر تطخوهه تبچي من الخجاله وامهه تگولهه عادي وحتى فردوس تدخلت وگلتلهه خلي يشبع عينه بيچ..

اجت رهوفه تگمز وتضحك مكيفة وتصيح..

-رهف: ابوووي رح يدخل ابوووي رح يجيي

دخل منزل راسه وساعه يرفعه بَـس ابد مباوع لجواهر والنسوان استلمنه هلاهل وچكليت وهوسات وخاله انتصار تجرجر بي وتبوس وبيبي عطيه وعمه دلال خو فتوح اشتغلت اللواكه مالتهه وحتى لجواهر صارت تهوس گدام عميد الدين وهيه الگعده كلهه چانت تعيب وميعجبهه...

-عمه دلال: حبهه ولك حبهه ولا تخااف من امهه

والكل يصيح وراهه وهوه يمسح بوجهه العرگ ومبتسم وابد ماتقربلهه وحتى جواهر گلبت وجهها وضاجت حيييل، اخير شي لمحته خطف نظره منهه سريع ودار وجهه وتقرب باسهه من راسهه وابتعد..

والنسوان أصرن عليه يبوسهه بعد بَـس مقبل، جابو الذهب ولبسهه مبين ثگيل وهوااي خاله انتصار تطلع بي وما ملحگة، انوب وكلو بعض كيك وعصاير بَـس شنو كل هذا ماطول خمس دقايق كمل كلشي وطلع وجواهر مبوزه..

كملت الحفله وبابا اتصل ؏ ماما حتى نرجع گال هم ياله نوصل لكربلاء قبل الليل..

ودعتهن وگلت لجواهر تفك عگدة حواجبهه شويه ولا تنزع البدله اكيد رح يجي يشوفهه وحدهه وهيه گالت ماشي تنتظر..

ودعناهم كلهم وطلعنه صار بوجهي عُثمان سلم عليه واخذ مني زنوبه يحظن ويشمشم بيهه ويگول...

-عُثمان: باباتي اخذوكي من عدنه والله أنَا بالانبار واحكي بزنايب لجديتي

-هجران: ههههه زين حتى هناك تذكرهه

-عُثمان: شَنو يُبا ماكو احد ما حكيتلو عليهه تا عبالهم تزوجت وصارت عندي بنت وزنايب بنتي

-اويلييي هههه لهدرجة

باوعلي بنظره مطوله وهز راسه وابتسم، بادلته الابتسامه وگال وهوه يياوعلهه...

-عُثمان: والحمزة ماگدر ارجع للناصريه البيت احسو فارغ من دونكم

-هجران: شنسوي بعد

جر حسره وسكت واجه بابا وگف بصفنه وسأله ؏ بكر اذا يعرف مكانه...

-عُثمان: والله عمي ماعرف مكانو صارلو كثير مختفي وجهازو مغلق اظنو مسافر

-سيد فارس: يسافر ويعوف هجران معلگه يله نريده يطلگ حتى نخلص

فتح عيونه متفاجأ وباوعلي وگال..

-عُثمان: يعني خلص رح تتطلگو؟

-هجران: اي ماريده بعد

ابتسم ابتسامه كُلش واسعه برزت سنونه وعيونه لمعن بفرح، ودعته وهوه نصحني بَـس اكمل امتحانات بالناصريه حتى لو أأجر بيت بهالفترة حتى حرمات تروح مني سنه كامله وبابا أيَد الموضوع وگال هوه هم مفكر بالسالفه..

گظيت الطريق نوم من التعب وزنوبه بحظن نداوي تلعبهه ومنطيتهم موبايلي ومطلعات يوتيوب ويتفرجن، وصلنه ونزلنه للبيت وگبل الكل لفراشه رغم الساعه بعدهه بالعشره..

نمت وحسيت ؏ ندى تگعدني ساعه بالعشره ونص تگول....

-ندى: هجرانه هذا بكر اجه واخو غيث وياه

گمزت من الفراش مفزوعة اخذت زينب چانت بعدهه گاعده ولبست شال ؏ راسي ورحت للهول چان گاعد وغيث وبابا وماما گاعدين كلهم سوه..

سلمت ودخلت وذبيت زنوبه بالگاع وابوهه اشرلهه حتى تروحله، اخذهه يبوس بيهه ويناغيلهه وهيه ساكته محچت شي ولا بچت عبالك مستغربه..

حطهه بحظنه ورفع راسه يباوعلي وحلّ الهدوء بيناتنه، اول كلمه صدرت منه...

-بكر: شلونچ؟

واول كلمه صدرت مني وگلتهه من لا وعي...

-هجران: بكر طلگني

باوعلي بابا وهز براسه وماما هم، وبكر كذلك هز براسه وكال كلمه وگفت كلبي ويبست الدم بجسمي وانهارت قواي لدرجة حسيت ضربوني ؏ راسي، گام ؏ حيله وگال...

-بكر: صايرين علويه، انتِ طالق!

يتبع☘️...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات حبايبي وانتظر توقعاتكم🙃😎.