شفاه مخملية الفصل الثالث وأربعون 43 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طويل لعيونكم الجميله♥️♥️.

"شفاه مخملية" 💋

بقلم: زهراء السلامي.

#گولوله ماتعشگ بعد الشافت ضلم من ايدك
گولوله تحبك تره ..
بس حلفت متريدك
گولوله ماتعشك بعد مره وجوتها الحرگه
گولوله ماينشف دمع مو هينه ذيج الفرگه
گولوله تغيرت بعد اليوم التغيرت.!!

♛ ♛ ♛ ♛ ♛ ♛ ♛ ♛ ♛ ♛

"هجران"
يبس حلگي وعيوني غوشت بَـس سيطرت ؏ روحي ووازنت جسمي، حچيت بصوت يرجف...

-شنو؟

-بكر: انتي مو ترديني اطلگچ يله طلگتچ..

نزل شال زينب واندار لـ غيث وگال..

-بكر: يله امشينا

-سيد فارس: هاي وين ماخذ الطفله

اللتفت علينه واني محچيت شي لان قوتي خانتني، متوقعت رح يطلگني بهالسهوله عاف كلشي ونسى كل لحظة حلوة عاشهه ويايه كل لهفة تصدر مني من تتعانق عيوننه كل صوت خادر يطلع من حلگي واني اللهج بأسمه كل هذا باعه وحتى ما حاول ويايه..

-بكر: البت ما تظل هنا اردهه لبيت ابوهه

-سيد فارس: ماكو هيج حچي الحظانه للام والكل يعرف بهالشي

ابتسم تك خد وگال...

-بكر: لا عمي ماكو هيچ حچي احنه عدنه ما يخصنه بسوالف المحاكم احنه عشاير وآخذ البت غصباً ؏ الكل

-صباح: انته شدتگول بكررر خوش روووح ونگول لعميد الدين هوه مو الشيخ مالتكم هوه يحللنه الموضوع

ضحك بسخريه واشر لـ غيث بعيونه حتى يحچي...

-غيث: سيد فارس مريت بهالتجربه من طلگت مريتي والحظانه صارت ليه وحتى عميد الدين ماگدر يتدخل لان الشي موش راد اله

ماما تخبلت وبابا يعيط وبكر يجادلهم واني بغير عالم اصلاً مدا استوعب شي، تمنيت روحي ميته ولا شاهدة هاليوم، گعدت ؏ القنفة اللقط انفاسي وغمضت عيوني عسى هالبوط يروح مني..

حمه الوضع بيناتهم واجه حيدر من الشغل وهم تلاسن ويه بكر وهذاك مُصرّ زينب ترجع وياه، ماتحملت الاصوات العاليه وصراخ وبكاء زنوبه وصحت بصوت مهزوز...

-هجران: ماما بابا فدوه خلونه وحدنه نتفاهم

صفنت ماما بوجهي وبابا مقبل يطلع لكن فسرو نظرات التوسل النابعه من عيوني واخيراً اقتنعو وحيدر گوة سحب بابا وطلعو بره بالحديقه وغيث راح وياهم وماما اخذت زنوبه وراحت للصاله، بقينه اني وبكر وحدنه...

-هجران: بكر ليش اني مو مرتك؟

واگف گدامي وعيونه يتطاير منهه شرار وكلهن حقد وغيض، گلب شعره الاسود الكثيف اليزيده جمال وجاذبيه وضحك بأستهزاء، گال بنبرة صوت ماكرة..

-بكر: انتي ياهو يگلبچ؟ هو انه وگوة دبسوچ بيه ولوما خذيتچ چا برتي ؏ افاد هلچ يبت الچايچي الفگر..

نزلت دموعي تچوي خدودي وگلبي احسه وگف مينبض من الصدمة ومن كلامه، ميطلع صوتي گوة جمعت قوتي وگلت بقهر..

-بَـس انته گلت تحبني؟

ضحك بقوه لدرجة اجتاحته نوبة سعال، فر ايده وتقرب ولزمني من شعري حسيت بصيلات راسي انزرفن من قوة الشد، همس بفحيح..

-انه مات كلبي من يوم اخوي ابن امي كتل امي وحرمني منهه وزاد سواد گلبي من ابن عمي خاني واخذ البت العاشگهه

هد شعري وابتعد وانطاني ظهره، زفر بقوه ورجع اللتفتلي ومد اصبعه مُحذر...

-بكر: والله العلي العظيم اقُسم بجاه الله لندمهم ؏ كلشي سووا بيه وروح امي هجراان وانتي الشاهدة لوكل جواهر من نفس الماعون الوكلتني منه واللوع گلبهه ؏ عميد الدين ورح يجي اليوم الي اذبحة بأيدي چن ذابح بهيمة وگولي بكر ما گال

دموعي غلبتني وينزلن بحيرة وقهر، عاط بـ امي حتى تجيبله زينب ومچانت عندي مُهجة احچي طلع من البيت وقبلهه نظرلي بنظره اشمئزاز، كرهت روحي وكرهت حياتي وكرهت كلشي يجي گدامي هسة!!

دخل بابا للبيت وجهه ميتفسر يعيط ويتعارك ويتوعدله ووعدني يرجع زينب، ااه زينب اخذ زينب اخذ بنتي مني، اخيراً استوعبت الصار وصرت اعيط وادگ ؏ وجهي فقدت ماعرف شسوي وين انطي وجهي بنتي اريدهم يرجعوهه اني اموت وهيه بعيده عني!!....

**

"جواهر"
انتظرت وانتظرت وانتظرت وانتظرت وعميد لسه مابيّن، اسمع صوته جاي من الاستقبال مبين ديسولف ويه بابا واني هنا طگت روحي والدمعه محبوسه بعيني، أيست يجي يشوفني وگمت ترخصت منهم وگلت تعبانه اريد انام..

خاله انتصار گالت انتظر شويه بَـس ماگدر اصبر اكثر البدله چبيره والتسريحة ثگيله حتى رگبتي وجعتني

صعدت لغرفتي واجت شهد ساعدتني نزلت التسريحة ونزعت البدله ورحت اسبح، طلعت لبست دشداشه النوم ماگدر انام بشي ثخين حتى لو الدنيا ثلج لازم كيمونه والدشداشه فوگ الفخذ..

نمت بفراشي وشعري بعده ناگع درت وجهي من الجهه الثانيه ومتحملت بعد طگيت بچي..

-شهد: لچ غبيه شكو تبچين اكو وحده تبچي وهيه هستوهه عاقده ؏ حبيبهه!

اللتفتت عليهه وانفجرت..

-جواهر: وييينه هوه وييينه طول تلبيس الذهب ماحط عينه بعيني عبالك مغصووب تدرين شهد اني غبيه لان رضيت وقبلت بي اني ثووله

-شهد: جواهر ؏ كيفچ شبيچ انتي تعرفين عميد الدين يستحي وخجول ليش تضغطين عليه

-جواهر: شهد طلعي بره مبيه حيل احچي يله بره بره لسلمانچ خلي يشبعچ بوس

طلعت من الغرفه تدردم عليه واني الليل كله الوب، اسمع اصواتهم عاليه جايه من جوة مبين باتو يمنه بَـس شعجب مراحو لبيت فيصل يباتون..

فزيت ساعه بـ 3 الفجر عرگانه وميته من العطش مطفيه الكهرباء واتوقع طاگه، لبست روب خفيف فوگ دشداشتي ونزلت الدرج ؏ كيفي..

چيكت خاف اكو احد گاعد واتسنطت زين بَـس هدوووء، همزين رجعت الكهرباء ورحت للمطبخ، طلعت مي شربت كومة وبطني تقرقر من الجوع ممتغديه ولا متعشيه..

طلعت ككو شفته بالثلاجة خفت احد يجي فَـہ اخذته وصعدت فوگ لغرفتي، تصنمت بمكاني من شفته كاعد ؏ سريري ويباوع لمخدتي..

-جواهر: عمييد هاي شجابك هنا؟؟

رفع راسه يباوعلي وابتسم، اشرلي بيده تعالي ورحت يمه، جر ايدي وانصدمت وگعني بحظنه، عيونه معلگه بوجهي او بالاخص لشفايفي، جسمي رجف من مد اصبعه ومسح شفتي وهمس...

-عميد الدين: ماتجوزين من الككو انتي

-هااا

ابتسم واشر بعيونه ؏ شفايفي..

-عميد: ككو ؏ حلكچ چان

-ها

رفع ايدي الي لازمة بيهه النستله وقظم لگمه منهه، ضحكت لان چنت دا آكُل بيهه...

-جواهر: اذا تحب اروح اجيبلك وحده؟

-چؤ اريدن مالتچ

ابتسمت ووكلتلهيا واحسه فرحان، خلصت النستله ولفيت الكاغد بيدي..

-جواهر: احم شسمه

-شسمه؟

-اءء شتسوي هنا؟

-مايصير اجي لحجرة خطيبتي؟

-جواهر: لا يصير بَـس...

قاطعني وگال بنفس النبره الهامسه..

-چنتي طالعه خيال اليوم بالمهر لدرجة ماگدرت اكظ روحي وانه اعاين لملاك واگف بحدي (بصفي) جاهدت ما اعاينلچ خاطر ماسوي شي يفشل ونجحت بالموضوع لكن تهيألي شكلچ وانه نايم وماگدرت اصبر للصبح واجيت اشوفن جوهرتي

-هاااا

-دخيل علي الفهاوة

-يعني شفتني بالمهر؟

-چا شون

-وعجبتك؟

ابتسم وهز راسه بـ "اي"..

-عميد: هو يمته ما عجبتيني انتي ولابسه اللون الاعشگه

-صدُك تحچي؟

-رب الصگد

-بَـس شلون وانته متحبني؟

-لا بله

-والله

-من كل عگلچ؟

-جواهر: اي

-عميد: چا شكو كسرت گلب ابن عمي وخذيتچ اذا ماحبچ؟

-شنووو؟؟؟ شلووون؟ عميد انته دتضحك عليه؟؟

-لا

-لعد شلون وانته تحب هجراان وميت عليهه!!!

فتح عيونه مدهوش واني گمت من حظنه ووجهي احسه بوّخ من الحر والعصبيه، گال بعَجب...

-عميد الدين: مني احبهه؟؟

همست بنتره...

-هجرااان هجرااان عمييد

-وشكوو احب هجران؟!

-عمتك گالت ردت تخطبهه وصارت لبكر

-اي وشني يعني؟

-شلون شنو يعني وانته حتى عيونك فاضحتك تركض وره هجران!!

-لاااا جواهر لهناا اوگفچ انه عيوني تركض وره هجران؟!!!

-اييي وحتى هيه تگول منتبهه لنظراتك!!!

-لا بويه البت متوهمة مستحيييل شني انه اعاين لحليله ابن عمي

-ايي ايي انته

-جوااهر لا تكدريني ترا انه صاعد هنا بَـس خاطر اشوفچ وعفت العادات والعيب وچنت اتعنه لبغداد مثل المراهق خاطر اشوفچ ساعه باليوم تالي تجين تگليلي انه عاشگ هجران!!!

-مستحيل ماصدگ شلون وهجران تگول اكثر من مرة تشوفك تباوعلهه

-ايي عادي تصير بويه شمالچن انتن اذا زلمه عاين لبت وصحتن حباهه

-لاا مو هيچ عميد هيه تگول اكثر من مرة حتى بيوم العقد مالتهم انتبهت لنظراتك

صفن دقيقتين كأنما ديتذكر وفتح عيونه وگال...

-عميد: ايييي اتذكررر چنت اعاين لغزاله لان چانت مزوگه (متمكيجه) وما مغطيه وجهها وهيه افتهمت نظراتي وبوكتهه تغشت جوااهر ترا انه اتذكر لا عبالچ انسى شي وسالفه مال اعاين لهجران اي صارت ليش اچذب عليچ لان البت ماعرف شمالهه وياي كلما حاچتني ونترت بچلامهه لو تتهرب مني لبالك جني ويركض وراهه وانه من اعاينلهه اريد افتهم لو افسر شمالهه وهم تتصرف ويه الكل بهالطريچة لو بَـس وياي واكتشفت بَـس انه هيچ!!

سكتت ونزلت راسي خجلانه، هاي اكيد هجران شگد ما توهوهس تتخيله يباوعلهه هواي وهوه الرجال ممهتم بيهه، گلب وجهه مبين عليه كُلش تنرفز، توجه للباب يريد يطلع وركضت وراه لزمته من البدي وحچيت بطفوليه...

-اني اسفه

رفع تك حاجب معاجبه كلامي، حرت ماعرف شنو لازم اتصرف فاجأني من جرني عليه وحظني بقوه حسيت روحي رح ادخل بنصه..

حط وجهه برگبتي ويشمني واني جافلة حسيت جسمي رخه كُلش وعيوني ذبلت بقينه هيچ قريب الدقيقتين ووخر عني، صرنه وجه بوجه ومن شاف حالتي ضحك وگال...

-عميد الدين: انتي حتى بهاي مايعه وما تتحملين

مجاوبته، باسني ؏ خدي الايمن واندار ؏ الايسر ورفع كف ايدي وظل يتمايزهه، گال بهيام...

-فهميني بله شلون ترفه هالگد وآخ من صبغ الاظافر الاسود

ضحكت خجلانه وهوه اردف...

-عميد: اغدي فدوه ونذر لهلضحكة يا لبة گلبي

-عميديـي ؏ كيفك ترا ماعرف شجاوب

-محد ينطق اسمي بنفس نبرتچ ولا طريقتچ وحدچ تحسسيني انه انسان مُميز ومحد شايل اسم عميد غيري

-هههه لان صدُك هالشي ترا

قهقه بخفه وباس ايدي، حسيت روحي صرت حمرة من الخجاله وهوه مستمر يطبع قبلات خفيفه ببطن وظهر ايدي ويحچيلي شگد يحبني اووف حسيت روحي بحلم مستحيل الي دا اسمعه حقيقي، يحبني كل هالفترة وخافي هالشي شنو هالقوة اليملكهه..

-عميد الدين: جوهرتي الليله غير، شعوري غير، شوگي غير، حتى الاغاني والچلام غير، احسنچ سما وانه بحدچ طير

-جواهر: ههه انگلبت كاظم الساهر

-عميد: ادري بيچ تحبينه وتسمعيله هواي

-احبك اني

-عميد الدين: موش اكثر مني

گظينه الليله ويه بعض، اسولفله ؏ ايام قبل وهوه يستمعلي ومبتسم هذا طبعه حتى قبل ميحچي اله نادر ويصغيلي بكل اهتمام، عميد الدين بهالليله ماحتاج يشرحلي هوه شگد يحبني لان عيونه تسولف، عيونه الي مانزلت عن عيوني واكلت تفاصيل وجهي اكل كأنه عطشان بنظرات عيونه ورويته هسة..

للصبح وگال لازم يرجع توسلت بي يبقى اكثر بَـس گال بعد يومين رايح لأيران علمود علاج رهوفة رجع گلبهه يوجعهه وتتعب، جرني لصدره وشم شعري وهمس بأذني...

-عميد: اياام واياام انه اتمنى اكظ هالذهب بيدي واجه هاليوم الهي لك الحمد

وخرت وجهي عن صدره وباوعتله...

-جواهر: واني اياام واياام اتمنى اباوع بعيونك واگولك اني شگد احبك واتمناك

ابتسم وباس راسي..

-عميد الدين: وعدتيني تردين لبيتنه وبعد ماكو نقاش

-هذا هوه حياتي ارجع

-عفيه بنيتي ويله اودعناچ

طلع من غرفتي ورحت انام ؏ چربايتي وغطيت بنوم عميق وبالي هادئ وبداخلي طايره من الفرح..

گظه تقريباً شهر واني رجعت للناصريه علمود الدوام وانتظر عميدي يرجع، يوميه انام ؏ صوته وهوه يسولفلي ويگولي شنو سوه بيومه...

سديت الاتصال منه ورحت للمطبخ اشرب مي ودگ موبايلي "هجران" جاوبت...

-هلووو هجرانه

بَـس ما اجاني صوت هجران چانت ندى اختهه...

-ندى: هلوو جواهر شلونج

-هـلا گلبي بخير وانتي شخبارچ

-ندى بحسرة: ابد مو زينه هجران حتموت جواهر ومنعرف شنسويلهه

حچتلي سالفتهه ويه بكر اني افتهمت ان تطلگو وحاولت اتصل بيهه كذا مرة بَـس متجاوبني والعَجبني ماخذ زنوبه ومختفي بس وينه؟؟؟، اصلاً مشفت بكر اجه هنا ولا تدنه للبيت من رجعت لسه..

-جواهر: نداوي صدُك تحچين؟؟! لعد وينه؟؟

-ندى: ماعرف ماعرف هاي تخبلت علينه وبابا راح للمحكمة يقدم بلاغ بَـس گلوله البنيه ويه ابوهه لا هيه المخطوفه ولا هيه الضايعه وهاي هجران تدگ وتلطم وتبچي وصارلهه كم يوم متحط لگمه بحلگهه

-عزاا يعني اخذ زنوبه وانهزم؟!!

-ندى: مادري جواهر اني گلت اتصل عليچ بلكي تسألين عميد الدين

-اووّك گلبي هسه اتصل بي

سديت الخط منهه وفوراً دگيت ؏ عميد، استفسرت منه يگول ماعنده تواصل ويه بكر من يوم العركة لسه..

**

"ندى"
اتصلت بيه جواهر وگالت عميد الدين ميدري بـ بكر حرت اكثر واني اباوع لأختي منتهيه لا ايد ولا رجل، نايمة كأنها جُثة هامدة تأن بصوت يكسر القلب الى اشلاء، تلهج بأسم قطعه من روحها "زينب" تناغيلهه وكأنها وياهه تبچي من تآكُل اكله دسمه ويدُر حليبها، كل هالاشياء خلتني اكره اسم "بكر" واكره أي بشر يملك هالاسم..

طگت روحي وطلعت للصاله ابچي وادعي ربي يريح بالهه ويرجعهه النه مثل قبل، اندگت الباب ورحت افتحها لان ماكو غيري وغير هجران بالبيت الكل طالع..

صحت...

-منوو؟؟

اجاني صوته ابتسمت لا ارادي من سمعته، فتحت الباب وبقيت ؏ ابتسامتي...

-هلوو عُثمان

بادلني الابتسامه مصحوبه بأيمائه خفيفه، اشر بعيونه لداخل البيت وسأل...

-عُثمان: اختك نايمه؟

-ندى: اي ؏ حطت ايدك من اجيت ذاك السبوع

عفس وجهه متحسف ؏ حالتهه، قدم العلاگه الشايلهه بأيده وقدمها ناحيتي...

-ندى: عُثمان شنو هاي ترا بابا يزعل هيچ

-عُثمان بأبتسامه: أنَا ماعليه هذا خالي دازهه وانا بَـس مرسال

ابتسمت بوجهه وطببت العلاگه للمطبخ وهوه ظل واگف بالباب، عُثمان رجاال يُعتمد عليه النظر اليه يثير البهجة بالقلب وجهه مريح وابتسامته العذبه التظهر اسنانه الناصعه البياض مريحة اكثر احبه واشوفه كـ اخ وبطبعي ماحب اختلط هواي صح اوقات اگول هذا حلو وذاك حلو بَـس اگولهه بدافع المزاح لا اكثر..

كل كم يوم يجي ويسأل عن هجران ولازم يجيب وياه شي وهسه جايب علاگه لحم ماعرف كم كيلو بَـس مبين ثگيله واني متأكدة خاله ماله أي علاقه لان اصلاً لا يعرفنه ولا نعرفه بَـس يگول هيچ حتى ميحسسنه احنه فقرة ومحتاجين...

رجعت للباب ومديت راسي احچي وياه، ثواني واجت ماما چانت تزور ابا الفضل العباس (سلام الله عليه)..

-صباح: يا هـلا بسيد عُثمان شوكت اجيت أمي؟

-عُثمان: اهلاً بيكي خالة هاا اهاا هستوني

-صباح: تفضل تفضل لتظل بالباب

ابتسم ودخل وراهه واني رحت اجيب مي وعصير، قدمته ناحيته اخذه من ايدي ومطرني بكلام يخجلي...

-عُثمان: زحمتك كثير علويه عاشت ايدِك

-ندى: لا شدعوة تدلل

-صباح: ماكو اخبار تخص بكر؟

تنهد وفتح قوطيه العصير...

-عُثمان: ابد حرت وماكو مكان ما سألت عنو لكن يگولو ماشافو

-صباح: والله حيره وين راح هالرجال ووين ماخذ الطفله وياه

-عُثمان: أنَا احسو مسافر

-ندى: وشلون رح نعرف؟

-عُثمان: عندي صديقي يشتغل بالمطار بلكت اگدر اسألو ويجيبلي معلومة

-صباح: الله وايدك يوم والله ماعدنه غير الله وغيرك انته الوحيد الوگفت ويانه حتى عميد الدين اتخلى عنه

-عُثمان: لا لا خالة عميد ماتخلى عنكم بَـس رهف بنتو مرضت كثير فَـہ اضطر يسفرهه لأيران تا يعالجهه

-صباح: هااا الله يشافيهه

-عُثمان: امين

نزل راسه يباوع للقوطيه البيده ورفعه مره ثانيه وسألني...

-عُثمان: افتهمنه بيكي هالسنه رح تقدمين جامعه؟

-ندى: اي صح لان ذيچ السنه معجبني من طلعلي هندسه معماريه

-عُثمان: عجل شَنو يعجبِك؟

-ندى: ههههههه احب من تگول عجل عههههههه

ضحك خفيف وماما خزرتني واشرتلي بيدهه اني اعلمچ، بلعت ريگ وجاوبته...

-ندى: يعجبني اقدم هندسه اطراف صناعيه

-عُثمان: اوووه كثييير حلو وانا اتذكر هجران گالتي معدلِك كثير عالي يمكن كان 93؟

-ندى: اي بالضبط وبما ان اني تطبيقي فَـہ التمريض والتحليلات متقبلني فَـہ اروح اطراف احسنلي

-عُثمان: حلو هالقسم أنَا لو ما كنت ادبي ممكن كان رحتلو

-ندى: ليش انته هم معدلك عالي؟

-عُثمان: اي أنَا معدلي كان 98

-صخااااام الصخمنييي 98 ورحت تااارييييخ

رجعت ماما خزرتني واشرت ؏ لسانهه وسوت اصابعهه مثل المگص عود اگص لسانچ ؏ هالصوت..

-عُثمان: اييي والله انكم عجيبين عاادي يُبا احبوو ورحتلوو شنو يعني

-ندى: عززاا اني لو 98 وچنت طالبه ادبي يمكن چان ذبحت روحي

ضحك ورفع اصبعه وحركه نافي كلامي، استمرينه بالسوالف واني انفتگت اسولفله وهوه بَـس يستمع، قاطع كلامنه جيت هجران...

-هجران: السلام عليكم

گام عُثمان ؏ حيله ورد السلام، اباوع لأختي شاااحبه وشفايفهه الحلوه الچانت تغورنه بيهن بييض وضعفانه حيييل، تقربت وگعدت ؏ الكرويته گبال عُثمان وگالت بأنكسار...

-هجران: عبالي بكر اجه من سمعت صوتك

ظل ساكت ما علق ؏ كلامهه وهيه تباوعله منتظرته يحچي شي لكن فضل السكوت..

گمت احظر العشه وهوه ترخص گال يطلع وماما چلبت بي يبقى..

-عُثمان: خاله اعذريني والله الطريق طويل وخطر ماگدر ابقى اكثر

-صباح: شنو طويل شنو خطر ماكو تبات يمنه انته من اهل البيت

مقبل وماما أصرت واتصلت ؏ بابا حتى هم يبقى لان رح يرجع للانبار ويخافون يصيرله شي بالطريق لان خطر..

رجع گعد وماما لحگتني للمطبخ تساعدني اما هجران رجعت لغرفتهه..

**

"هجران"
رجعت تمددت بفراشي وافكر وين راح بكر واخذ زينب وياه، اووف يگلبي والله تعبت ومليت من المصايب ماريد شي من هالدنيا غير بنتي ترجع بحظني بسلامة..

گمت من الفراش وطلعت مرة ثانيه بالصاله چان عُثمان گاعد بالصاله وبيده الموبايل ويحچي بي بهدوء، وضحلي من طريقه كلامه هذا عميد الدين..

اجيت اگعد بطرف الكرويته وهوه من شافني غلق الموبايل ورجعه بجيبه...

-هجران: ماكو خبر عن بكر؟

-ابد

-وين راح؟

-عُثمان: علمي علمِك

-زين مثلاً مدا يخطر ؏ بالك مكان؟

هز راسه بـ لا وگال...

-عُثمان: ماعندو بيت تا يروحولو فَـہ اظنو مسافر

-وشلون نعرف وين مسافر؟

-رح اسألو لصاحبي وندعي ينطيني معلومة

هزيتله براسي وهوه نزله يلعب بالخيط الطالع من الچرچف المغطي الكرويته ماتحملت نزلن دموعي وتنهدت بقهر..

حسيت بي رفع راسه ورجع نزله، وگال خاطره فصيحة بهمس...

-عُثمان: أنني متأكدٌ من شيء واحد ؏ الاقل وهوه قيمتُكِ عندي كل ما بداخلي يندفع لكي بقوه لكن مظهري ثابت

رفعت راسي اباوعله لكن بقى مدنگ وعبالك قراهه مكتوبه ع الچرچف، من كل عقلي دورت عليهه بعيوني وكأن رح اللگاهه...

-هجران: شنو گلت؟

-عُثمان: ولا شي بَـس هالخاطره قريتهه بالطريق وظلت ببالي

هزيتله براسي ورجعت للغرفه وافكر لحدما دخت ونمت، حسيت ؏ فدشي يهز جوه مخدتي طلعته چان موبايلي وديدگ رقم غريب..

جاوبته واني مفتحة تك عين...

-الوو

فزيت من مكاني مرعوبه من سمعت صوته، چان هادئ مصحوب بنبره تحذير...

-هلا هجران اسمعيني يا بت الناس سالفه مال تحطون محامي وماعرف شني خاطر تاخذين زينب انسيهه وعلي ابن ابي طالب لا يهمني محامي ولا قاضي ولا قانون بكبره كللشي يمشي بالفلوس احشي زردومه فلوس ويصير جوه ايدي واذا ما فاد اهدده..

-بكر وينك انته؟؟ حباب عليك الله اريد زنوبه فدووه والله مجاي انام ليلي

-بكر: سمعيني ماحب اللف وادور انه مسافر وزينب وياي

-عليك الله رجعهه

-هجراان انه حذرتچ وحتى لو تسوون گعده والحسين الشهيد اوصل الدم للرچاب اساساً انه اريدهه فرصه حتى اذبح عميد الدين وانتي رح تساعديني بهالشي

-بكررر حرااام عليييك والله اريد بنتييييي

غطيت حلگي بأيدي وابچي محروگه گلب، رجع گال...

-هااا هسّ شني شصفيتي؟؟

جمعت قوتي وگلت..

-اريد زينب

-اي تردينهه مايهم اردچ ونرجع كلشي مثل گبل

-ماريدك اريد بَـس زينب

-وانه گتلچ البت ماتعوف ابوهه

-شسوي هسه فدوه ابوس ايدك والله تعبت

-گتلچ اردچ ؏ ذمتي لان اساساً طلاگنه باطل

-شنو شلون؟

تنهد وحچة...

-الطلاگ ما يصح اله يتواجد عادلين شهود

-اي وانته گلتهه گدام بابا واخوك غيث

-اييي بَـس غيث موش عادل يعني يشرب ويكبسل وما يصلح يصير عادل

-لعد من تعرفة مو عادل شلون طلگتني بهالسهولة وبعتني؟

-چا انه اكلچ شلونچ؟ انتي تگليلي طلگني هنتيني جدام ابوج واخوي فأكيد اطلگج

تنرفزت من كلامه وضجت حيل حرت ماعرف شسوي طبگت التلفون بوجهة بدون ما اجاوبة ورجعت راسي على المخدة وافكر وافكر وافكر وافكر شسوي؟ ارجعلة وترجع حياتي مثل قبل لو اعوفة واتنازل عن بنتي لان ادري مستحيل يرجعلياهة اعرف بكر وخبالات بكر وشنو يكدر يسوي

اسمع صوت حچي بالصالة وعرفت عثمان لسة يمنه ماحسيت على روحي غفيت ، گعدت الصبح على أثر حلم مزعج كأنما زنوبة دتبچي ومادة ايدهة لناحيتي تريدني اشيلهة واني صافنه من دون اي ردة فعل وهيه فرفحت من الصريخ... فزيت وصوت صرخاتهة ترن باذاني

لبست شالي وطلعت من الغرفة توجهت للحمام غسلت وتوضيت بلكي اهدئ وتروح الرجفة من جسمي...

رحت بوجهي للمطبخ أسال ماما عن عثمان

-صباح: طلع من الغبشة

هجران: صدُك والله ليش هيج مستعجل؟

-صباح: لأن يكول خاله مريض خطية وخايف علي كُلش وصايرة عدهم طلابة وعركة وميريد يعوف أهلة بهيچ وضع

- ها الله يساعدهم خطية اني اتذكر حاجيلي عن خوالة حبابين حيل

صباح: اي خطية الله يعينهم

تريگت شلون مچان ماللي نفس اكل شي من يوم اللي علساس بكر طلگني لهذا يومي ردت احچي لماما عن الحلم اللي شفته بس ترددت اعرف راح تگولي مثل كل مرة "اضغاث احلام" ولأن هواي افكر بزنوبة دا احلم هيج احلام

گظة اليوم طبيعي ولليل اجانة بابا محني ظهرة، گعد على الكرويته وصاح آآآآه بألم

-هجران: سلامتك باباتي بعدك تتوجع؟

-فارس: اي والله بنيتي شسوي

-شوكت راح تروح لأيران علمود العملية

-بس تفظ شغلتچ انشالله اروح

-هجران: ءاءا بابا اريد احچي وياك بموضوع واتمنه تفهمني ولتعيط ولا تعصب ولا تزعل...

-قاطعني: اختصري هجران شرايدة؟

-بابا راح ارجع لـ بكر

فتح عيونه مدهوش وسرعان ما تحول وجهة للون الأحمر وعاط بوجهي...

-تخبلتيييي انتييييي

-بابا فدوه افهمني اريد بنتي

-وكتلج اني اجيبهه لحظنچ!!!!

-بابا شوف بكر مراح يجزع واذا انطانياهه هسة يرجع ياخذهه منييي وشفت المحامي الاول شنو گاال شمعنه بالبدايه گال ترجع لامهه ووره يومين گال الحظانه لابوهه معناهه بكر مهدده

-ميخصنييي نغييره شنو بَـس هالمحاميي

-باباا فدوه اسمعنييي رح يوجعك راسك وانته مو ناقص تذب فلوسك هوه الدين فوگ راسك ولا انته التقبل عثمان يساعدك ولا احد وبكر رح يخسرك ويعيدهه ويه الف محامي بابا ذوله عشااير ميهتموون وياخذون اليردو غصباً ؏ الكل لا محامي يوگف بوجههم ولا قاضي

-فارس: عميد الدين يخاف الله وميعوفنه

-عميد الدين صح يخاف الله بَـس القرار مو كله اله اذا عمو خليل تدخل وبقيه اخوان بكر والله يفشلون عميد بنص الديوان وحتى قراره يغيره وترجع تنعاد سالفه غيث ومرته وهوه اخذ الجهال ومرته ميته من القهر وعايشه بالضيييم!!

-هجراااان اذا رجعتي لبكرر لا اني ابوج ولا اعرفچ فهمتيييي

-اساساً طلاقي باطل منه وما وقع

-فارس: معلييييه نعيددده

رجع يعيط وماما تدخلت وحيدر هم واني ساكته، يهدد بيه اذا ارجع لبكر يتركني وميهتملي بعد، متت من القهر ورجعت للغرفه ابچي...

مرن يومين واني القهر ماخذ من حيلي حيصيرلي شهرين مشايفه زينب والامتحانات راحن عليه، حسيت خسرت كلشي وماعندي احد خصوصاً بابا كُلش تعب لدرجة مبي يوگف على حيلة وماما توسلت بي حتى يسافر ويسوي العملية وأخيراً قبل

بالأسبوع الأول من سفرته ليلي ما انامة بسبب الأحلام او نگدر نگول كوابيس أكعُد مفزوعة وابچي تعبت من حالتي وأحس فجوة بصدري...

صبحت اليوم الورا وحسمت الموضوع راح اتصل بـ بكر يرجعني بعد ما اتحمل مااعرف شنو تگولون عني ماعندي كرامة أو ماعندي إحساس أو راح اطيح حظي بيدي بس كل هذا اضربة بعرض الحايط مقابل نظرة لبنتي

أخذت موبايلي ودگيت دگة عليه رفض مكالمتي ورجع اتصل

-بكر: الو

-هجران: بكر فدوة جيبلي زينب

-هجران انه چنت واضح وياج تردين نتطلگ محكمة وشغلة الحظانة بعد تبقة ياهو المحامي مالتة اقوة

حچاهة بنبرة مستفزة وكأنما دا يگولي اكيد اني رح اخذ الحضانة واتحدى اكبر قاضي وأكبر محامي، طفح الكيل وحسيت خلص انتهى دور الكبرياء

حچيت بصوت مخنوگ مليان بالعبرة

-ماشي رجعني

تنهد قوي وگال

-حظري روحج للعصر انه يمكم

حظرت غراضي بسرعه بسرعه واني ادعي بگلبي امي تهدة علية من احچيلهة ومتثور بوجهي ، لكن صار المتوقع عاركتني وغلطت علية وحته وصلت ضربتني حتى اگعد بس اني راكبة راسي انتهى الموضوع..

بـ 3 العصر سمعت صوت هورناته طلعت والدمعه بعيني ماما مزاعلتني وابوية أكيد اذا يعرف راح تكون ردة فعلة اقوى من ردة فعل أمي بس كُلشي يهون اهم شي ما ارجع اضوگ اللوعة اللي ضگتهة بهالشهرين من زنوبة چانت بعيدة عني

طلعت ملهوفة من باب البيت شفته گاعد بالسيارة وعيوني تدور على زينب فتحت الباب وصحت بلهفة

-زينب وين؟؟

-بكر: شني ترديني اجيبهة وياي بطريج فوگ الست ساعات حته تموع البت بهالحر

هزيت راسي بانكسار ودخلت للسيارة وذبيت جنطتي على الكراسي الليورة وساق بكر بهدوء، أخيراً نطق وگال..

-بكر: خلينه نفتح صفحة جديدة انسي الصار بيناتنه لخاطر بنيتج

جاوبته بنترة..

-مو عبالك رجعت علمودك اني رجعت اريد بنتي وهاي الطريقة الوحيدة الي راح انجمع وياهة لا اريدك تتقربلي ولا اريدك تمارس حقوقك الزوجية وياية وحتى سلام لتسلم علية

گلت هالكلمات واشوف الصعقة بعيونه اللتفت علية باوعلي فاغر فاهة أكيد انصدم من ردة فعلي لكن بادلته ببرووود مستفز نفس استفزازة قبل وياي، سندت راسي على الجامه وكالعادة دخلت بنوم عميق ماتحمل طريق ادوخ وانام بسرعة

قريب لنوصل حسيت على مطبة قوية فتحت عيوني وراسي انرگع بالشباك حييل، قهقهة بخفة ودار عيونه باوعلي وكال..

-بكر: يواشج شمالج؟؟

كلبت وجهي علي وجاوبته بصوت ناصي..

-فوگ ميكول لروحة على كيف

عرفته سمعني بس مهتميت، وصلنه قريب البيت وچانت السيارة بعدهه تمشي ماركنهه، فتحت الباب ونزلت ملهوفة ودگيت باب البيت بكل قوتي فتحتلي غزالة الباب..

-غزاله: هجرااان يا هلاااا

تقربت علية وحظنتني وبوستني بادلتهة باستعجال وعفتتة ودخلت اركض للبيت تعديت لمطبخ وچانت فتوح گاعدة تشرب چاي سمعتهة تگول

-فتوح: يااااااا هاي شمالهة طبت علينه هيچ چنهة سعدية ام اللبن

لبستهة وتعديت ورحت للصالة ادور زنوبة مچانت موجودة، ركضت لغرفة عمة دلال اكيد يمهة بس چانت نايمة عيوني انترست دموع واني ادور عليهة

اخير شي بكر دخل للصالة واشر بعيونه على باب غرفة عميد الدين..

-بكر: تلگيهة عد جواهر

فتحت الباب بسرعه بدون ما ادگهة چانت جواهر متمددة على فراش عميد الدين وبصفهة زنوبة وحاطة الملهية بحلگهة ، فزت جواهر من مكانهة وعاطت..

-جواهر: هجرااان هاااي شجابج؟

ماهتميت ولا رديت عليهة رحت گبل لزنوبه اخذتهة وحظنتهة ابوسهة واشمشم بيهة بچيت بحرگة شوق ، الم ، بدموع دفعت بيهة كرامتي ورجعت للرجال الذلني وهاني بس لخاطر طفلتي

-جواهر: هجران مفهمت شجابج هنا؟

-هجران بحسرة: جواهر لخاكر الله اسكتي راسي راح ينفجر

سكتت جواهر بس احسهة موطبيعية ووجهة مخطوف ماتعبت روحي وسألت من الشوق الأني بي حطيت زنوبة بحظني حتى ارضعهة بس ماتقبلت صدري

-جواهر: ابوهة يگول دتاخذ حليب قواطي

بچيت اباوع لبنتي چنت مصممة واعاند ما اخلي ذرة حليب معلب تدخل لمعدتهة بس كُلشي تغير

-جواهر: يمعودة كافي بچي ماتعبتي؟

هزيت راسي بحسرة وجريت نفس شگ صدري اخذت زنوبة وطلعت من الغرفة بدون صوت

صعدت الدرج وتوجهت لغرفتي وصارت بوجهي بنية شابة تملك عيون عسلية صفنت بوجهة ومهتميت كُلش تعديتهة وسمعتهة گالت بصوت ناعم..

-أنتي أكيد هجران؟

درت وجهي اباوعلهة وهزيت راسي بـ "اي"، ابتسمت ابتسامه حلوة وگالت بنبرة مُرحبة..

-أني نور زوجة بكر

ماحسيتهه حچت حسيت وكأنما صاعقة ووگعته ؏ راسي وهشمت جمجمتي وصارت قطع قطع..

-شنوو؟؟؟

-نور: اعرف انصدمتي وهذا حقچ هواي گلت لـ بكر خلي يگولچ بَـس چان معاند

-لحظه لحظه وحده وحده عليه هسه انتي صدُك مرته؟؟

هزت راسهه بـ "اي" ماتحملت ابقى واگفه گدامهه واني اشوفهه بنيه تملك من الجمال احسنهُ، عفتهه ورحت لغرفتي حطيت زنوبه ؏ الچربايه ولو بيدي املخ روحي..

حسيت عيوني رح يطلعن من الصدمة وراسي انفخ، زينب رجعت تبچي اخذتهه اللوليلهه وابچي وياهه اوووف يگلبي شگد بعد تتحمل الله ياخذنني واخلص عساني اموت واخلص من هالعيشه ومن هالزواجه الماشفت بيهه غير المرار والعذاب من ساعه السوده التزوجت بيهه واجيت لهلبيت المليان حيايه وثعابين وغدر وقهر..

ابچي بالسكته لان زينب نامت، غميت روحي الف غمه ليييش بعدني احببه ليييش محروگ گلبييي اووف لو بيدي اطلع گلبي وادوس عليه بالنعال حتى يبطل من حب انسان ماهميته ولا حبني شي يوم!!

لليل كُلش وسمعت صوت طرقات ؏ باب غرفتي، الغرفه ظلللمة هندس وزينب جرتهه نومة لان هدوء وگاعده وحدي مثل المخبله..

-تفضل

انفتحت الباب چانت جواهر فتحت الضوه وچانت شايله بيدهه صينيه صغيره بيهه لفات وقوطيتين ببسي...

-جواهر: داده متت من الجوع وعميدي لسه مارجع اريد آكُل وياچ

-هجران: ماريد جواهر أُكلي انتي بالعافيه

-جواهر: دنچبييي هوه بكيفچ ديلا وخري وخري عندي كومة سوالف وياچ

حطت الصينيه ؏ الميز وجابتلي لفه ووياهه الببسي...

-هجران: جواهر لخاطر الله مابيه

-جواهر: اني اعرف ليش انتي زعلانه وضايجة صدگي انسان نفس بكر ميستاهل دمعه من عيونچ

-هه انگلبتيلي عُثمان

فتحت عيونهه وكأنه تفاجأت من كلامي، مهتميت ولا علقت ؏ الموضوع وهيه اردفت...

-جواهر: هجران ترا بكر ديسوي هيچ مو بَـس عناد بيچ يريد يأذي كل البيت صارله يومين من رجع من ايران ولَعب لعب

-وعميد وينه؟ مو متزاعلين شلون رجع للبيت؟

-جواهر: عميد صارله 3 ايام بالنجف يگول كم مرة راد يرجع ويچلبون بي ميقبلون

-هجران: الله يساعده اكيد تعب

-كُلش سوده عليه ويستحي يگللهم اريد ارجع طلعلهم عذر وماقبلو ماعرف شنو سالفتهم

-هجران: اهووو وكتهم هسه ذوله

-جواهر: استغفر الله فتو گلبي

-هجران: وهاي الحلوة شوكت بكر تزوجهه؟

هزت راسهه بأسى وگالت...

-جواهر: حسب كلام فتوح صارله فتره رايحة وخاطبتله نور وماخذهه ورايح لأيران

حسيت جمرة بصدري ومن لا وعي صرت ادگ ؏ وجهي وابچي...

-جواهر: عليچ الله كافي مو زين لچ موو زيين كافي هجران

-هجران: شسوووي جوااهر وين انطيي وجهييي من سوده بوجهي يارب اخذني وخليني ارتااح

-اسكتييي كافي اهدي وسمعيني بكر حقير وديدوس عليچ حتى يهينچ لتسمحيله ولا تتأثرين وحتى لو تأثرتي دوسي ؏ گلبچ وگولي طُزز بي وبعشرته وبكلشي يتعلق بي

-ماگدر اعوف زنوبه

-جواهر: مگتلچ عوفيهه شوفي بَـس يرجع عميد الدين من النجف احچي وياه بخصوص موضوعچ هوه سوده عليه ما فرغ من شغله لشغله حتى ميگدر يحك راسه

-واذا مقبل بكر يتركني؟

-معليچ همه الزلم وبيناتهم يلگون حل واني متأكده عميد ميتركچ لان يدري اني شگد احبج ولو شنو اطلب منه يسوي ويكول حاظر وتدللين

ابتسمت ؏ كلامها وحبيت اسمع شلونهه علاقتهم ويه بعض...

-هجران: عوفچ مني انتي شلونچ ويه الحُب؟

ضحكت ونزلت راسهه شجعتهه تحچي لان حسيتهه متريد تحچي بسعادتهه گدام بنيه تعيسه والسواد محاوط حياتهه من كل جهه..

-جواهر: يحبني وبس

-احچيلي عليچ الله اريد اشوف الشيوخ هم نفس الزلم العاديه من يحبون لو هم عيب

-جواهر: ههههه يااا عززاا ليش لعد ترا همه هم بشر لچ عميد يلعب لعب ليغرچ ثگله وهدوئه من نكون وحدنه يحير شيسوي هاي واحنه بعدنه مخطوبين

-ههههه اووف جواهر ضحكتيني واني الدنيا طالعه من عيني

-لچ ضحكييي والله ميلوگلچ الزعل هجراني

-احبچ هواي جوهرة الله يكتبلچ السعاده ويه عميد الدين ويوم افرح بعرسچ ونشوف ابنكم عبوسي واكيد يطلع صاك ؏ امه

-ههههه ان شالله ولو هوه مفلفل عليه وميت بَـس بابا ميقبل هسه اله اكمل هالسنه

-هجران: يله مابقه شي اهم شي تشوفون بعض كل يوم وهم نعمه ابوچ قبل حتى بالعطله الصيفيه تبقين هنا

-جواهر: يااا شوف هاي اني اهلي قبلو بَـس لان مسافرين مو عبالچ لسواد عيوني

-هجران: هاااا زين شوكت يرجعون؟

-جواهر: والله يا داده بابا كُلش تعبان ومريض فَـہ بلكي يحصل علاج مناك

-نفس بابا اووي شلون بينه

-جواهر: الله كريم تهون

دگ موبايلهه ووجهته گدامي وضحكت شفته مكتوب (عميد گلبي❤️) توسلت بيهه تفتح مكبره احس صاير عندي جفاف عاطفي ويعجبني اسمع كلامهم وهيه قبلت بسرعه وجاوبته بمياعتهه المعتادة...

-جواهر: هلاووو حبيبييي

-عميد الدين: رويحتي شلونهه؟

-جواهر: مو زينه لان انته مو يمهه

-عميد الدين: اشتعلووو والعباس طر افادي

-جواهر: يله انته مو گلت اليوم راجع؟

-عميد الدين: يي بويه هسّ ما بقه شي راجع

-؏ كيفك بالطريق حياتي

-عميد: تأمرين أمر

باوعتلي همست وگالت...

-جواهر: شوفي شوفي شنو رح اگوله

ضحكت وهزيتلهه براسي...

-جواهر: ميدووو

-عميد: اشتعلو مروان وخلقته ولچ بابه لا تگولين هيچ والعباس لو يسمعوچ عُثمان وسلمان شيخلصني منهم

-ههههههه يشروك ؏ الحبال

-اي وعلي

-المهم حبيبيييي

-عميد: روحه

-جواهر: اريد ككو

-عميد: تدللين بَـس ارد تلگي بحظنچ

-امممم واريد ببسي

-عميد: صاار وغيره؟

-واممم منتظرتك نكمل المسلسل

-لااا جوهرة كلشي ولا هالمسلسل ولچ تالي عمري اتابع تركي والعباس ماصايره

-حبيبي هاي مسلسله بنات الشمس تجنن عليك الله منتظرتك ونسوي سهره واممم شسمه

ضحك خفيف وگال بنبره خبث...

-عميد: شني شسمه؟

-جواهر: موفاجأة يله منتظرتك باااي

سدت الخط وياه والضحكة تارسه وجهها، نسيت كلشي بهالمكالمه وحسيت الدنيا بعدهه بخير ولسه اكو زلم وفيه وتحب خصوصاً من بدت تسولفلي شلون حبهه واصلاً ميريدني وماحبني واني العوبه چنت اتختل منه وماطيق اتواجد وياه بنفس المكان وخجلت من گالت هوه ضايج لان انتر وياه بالحچي بَـس والله مانتبه ؏ روحي..

**

"جواهر"
تركت هجران گالت نعسانه وتريد تنام بَـس حسيتهه غيرت جو وشويه نست، رحت لغرفه رهوفه چانت هستوهه دتنام..

-جواهر: رهوفتي تعشيتي بيبي؟

-رهف: اي ونعسانه رح انام بوسيلي ابوي عود

غمزت من حچتهه واني ضحكت وعفتهه ورحت لغرفتي، بسرعه سبحت وبدلت لبست دشداشه قصيره اوف وايت صايره ربع ردن وبيهه دلعه ماعرف ليش دا اتجرأ باللبس گدامه يمكن بسبب فردوس وكلامهه مأثر عليه من تگولي لبسي وخلي يشبع عيونه بيچ..

حطيت مكياج ترابي وعجبني اللبس عدسات بَـس تذكرت مرة لبستهن وماعحبه يگول لتخربين لون عيونچ جوهرتي..

رحت لغرفته وتفاجأت من شفت خاله انتصار دترتب ببيهه واني هنااا يا گااع انشگيي وبلعيني شلون لبس وشلون شكل طالعه، رفعت راسهه تباوعلي وابتسمت...

-انتصار: عميد شوي ويجي

-هااا اي اءء اي خالاتي اني شسمه اجيت اجيب شي و...

قهقهت بخفه وتقربت عليه وهمست...

-انتصار: عادي يوم هوه زلمتچ لبسي وتمكيجي ولا عبالچ انه مادري نايمة بغرفته چم مرة

فتحت عيوني عزا العزاني هاي شمعرفهه وچنهه قرت تعبيرات وجهي لان اردفت...

-انتصار: ضحككم وسوالفكم تسمع الجيران ديه هههههه

-جواهر: عزا بعيني لا خاله ترا احنه بعدنه مخطوبين ماكو شي اني بَـس اوقات انعس وانام هنا

-انتصار: ادري ادري يبعدهن لا لبالچ عميدي مايحچيلي وحتى لو مايحچي اقره لهفة عيونه وتراچ مسودنته وگوة يكظ رويحته عليچ

ابتسمت خجلانه ونزلت راسي وهيه طلعت من الغرفه، رتبت الميز وجبت حبشكلات وگعدت انتظره شويه وانفتحت الباب من شافني فتح عيونه واني ركض رحت حظنته من رگبته...

-عميد: اويلاااه لو هيچ الاستقبال لو ماينراد

صرنه وجه بوجه وبسته ؏ خده وهمست...

-حبيبي مشتاقتلك اني

-عميد: اللهم صلِّ على محمد وال محمد

-هههه ها شنوو

-اشتعلت عشيرتي شني هالحسن ولچ

-هههه عجبك

-خايبه انتي ليش تتحارشين بسچ رحميني

-هااا هيچي يله لعد اني حروح ابدل وارجع

عفته ودا اروح وسحبني وگعني ؏ الفراش وصار فوگايه، ضحكت من حط وجهه برگبتي ويشمني ويبوسني ساعه بوجهي ساعه ؏ شفايفي ساعه برگبتي وصدري، اخير شي حسيت خلص الرجال فقد دفعته ؏ كيف وهمست...

-جواهر: ستووب عميدي هاي شنوو متطورين

-جوهرة خلنتزوج بسنه عاد ترا گظيت انه

-وبابا شلون ميقبل

-اووووف هسّ اگول حچايه شكبرهه خليني ساكت

ضحكت وهوه گام راح للحمام، طلعت الككو الجابه من العلاگة والچبوسه وگعدت ؏ الچربايه انتضره حتى افتح المسلسل..

اجه لابس تراك زيتوني وشعره يقطر مي، گعد بصفي وجرني صرت بحظنه، وكلته چبس وكل شويه يعض اصبعي متعمد وانوب يبوسني عود يعتذر اويلي منه ملتح، رجع وجهه برگبتي ويبوس بيه واني اتابع وكل شويه يعضني واني اصيح...

-جواهر: عميدييي ترا اثر يظل حباب لتفضحني گدامهم

-اشتعل مروان چا انه گايلچ صيري هيچ طيبه والعباس چن كيكة وجاي اكلهه

-اويلييي منك يله كافي خلينه نتابع

-اوگفي اريدن بوسة

-مااا هواي بست كافي عيب

-شني بويه وشكو هسه انه شطالب

باوعتله چان مبتسم بخبث ضحكت خجلانه وهوه استلمني باسني بوسة عميقه مليانه حب ولهفة ورغبه، بوسة اخذتني لغير عالم استمر يوزع قبلات خفيفه ؏ كل اجزاء وجهي نزولاً لجسمي ويهمس بكلمات غزليه...

-عميد: انتي چوية گلبي اصدگ هسّ بحظني

-اني الك من قبل حبيبي ورح ابقى الك

-عميد الدين: اهيم بشوك وصلك وانثر الروح.. وعلة اشفافك ثلج من تنزل اشفافي.. واعض اشفاف حسنك واشتعل نار.. وكطعهه بصدك ياكلمة الكافي

-جواهر: ههه عميييد كافيي استحييي

-جعل محد غيرچ يستحي يجوهرة روحي وصباي، يمته انيمچ ؏ زندي وامسد شعرچ بيدي واغنيلچ واسولفلچ شكثر احبچ

-شگد تحبني عميد؟

-كثر ابداع الله من خلگچ

-احبك

-اعشگچ فوگ العشگ عشگين

ضحكت ونمت ؏ صدره وهوه يلعب بشعري ويبوس براسي وساعه يعيب ؏ الممثلين ويگول احنه احلى ذوله شنو يخزون وشدعوه هذا هيچ عيونه زرگ وهذا هيچ اشگر الزلمه لو ما اچلح املح مينراد لحدما بزعت وطفيته وهوه ظل يتغزل بيه واني احس بفراشات تطير بگلبي..

قاطع كلامنه صوت طرق الباب، طرقات قويه ومتتاليه، گام عميد وفتح الباب وجفلنه من شفنه مرتضى ايده متروسه دم ونزل ؏ رجلين عميد يبوس بيهه..

شهگنه وگومة من الگاع وهذا مستمر يبچي ويبوس بي ويصيح...

-مرتضى: اللحگتي خوية اللحگني راح اخووك

-عميد الدين: شنييي ولك شمالك؟؟؟

-مرتضى: ذبحته راااح راااح وروح ابوي غصباً عني وغلاتك ماگدرت اكظ رويحتي..

عميد عاط بي صوت خله الكل يگعد ويجي لغرفتنه واني لافه اللاحاف عليه لان فضحيه ابقى هيچ...

-عميد الدين: ياااهوو هااذ ولللك

مرتضى فحط من البچي والرجيف مدا يسيطر ؏ روحه، اخير شي نطق...

-مرتضى: ستاار ذبحت ستااار بچر مروان

فتحنه عيونه وضربنه صدورنه وعميد الدين تخبل وظل يضرب بي ويعيط ويصيح...

-غضببب الله علييييك انتهيناااا رحنه بين رجلين العواذل

يتبع...💋

♛ ♛ ♛ ♛ ♛ ♛ ♛ ♛ ♛ ♛
لتنسون التعليق بين الفقرات والتصوييت يبيبي🤍🦋
اشكر اختي بتول لان ساعدتني بكتابه البارت لان مثل متعرفون اصبعي يوجعني وگوة كتبته..

ثانكيووو بتول🥰 btolsala