شفاه مخملية الفصل الحادي وخمسون 51 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طويل لعيونكم الحلوة♥️.

"شفاه مخملية"

بقلم: زهراء السلامي.

عُثمان يگول:
"أنتِ مُعتادة على ملامحك،
لا تعلمين كم تبدين جميلة لشخص غريب❤️‍🔥"

♛ ♛ ♛ ♛ ♛ ♛ ♛ ♛ ♛ ♛

"غزاله"
واگفة اغسل مواعين ويه هادية ونسولف..

-هاديه: ايمت تزوجهه؟

-غزاله: كلشي صار بساع من مات بكر الله يرحمه وابوي گال اذا ماتتزوج واحد من اخواني تنحرم من بنيتهه

نترت بغضت مكتوم...

-ومالگيتوو غير عثمااان

-هاديه شمالچ چا عُثمان الوحيد عزابي

-لااء عُثمان خطيبيي أنَا لو گولي انو ضحك عليه؟؟!

-ولچ خية ما ضحك عليچ وترا عُثمان ما رادهه بَـس توازه وصارت بعد

-اففف غزل افففف

-بسچ اهدي كلشي ينحل

-هاديه: أنَا اعرفو واحسو يتهرب مني من يوم ابويه عرضني عليه احسو مايريدنيي

-خايبه شمالچ ما تگليلي هسّ انتي سولفتي وياه سألتي؟؟

-لاا اخاف

-من شني تخافين

-هاديه: اخاف يگولي انو يحبهه ومايريدني غزاله أنَا احبو كثير ومن أنَا طفله اسمع ابويه يگول هاديه لعثمان تالي اكبر ويروح يتزوج ويعوفني هيك!! يولي حطي نفسِك مكاني وحسي بأحساسي

-غزاله: خية احس بيچ وعلي انه الي احس بَـس هسّ انتي حاچي وافتهمي منه جوز الزلمه مايريدچ

-غزززل لا تگولين هيك والله انتحر

-انلصمي انوب تنتحر لخاطر زلمه

سكتنه وكملنه تعزيل المطبخ ورحنه نگعد بالصاله، اجتني زنوبه هستوهه گاعده من النوم، رحت اريگهه ورجعت للصاله، بعدنه بالباب وسمعنه صوت الرمي صار، طفرت من مچاني وهاديه ركضت تصيح امهه والبيت انخبص والرمي متواصل ما وگف..

زينب ختلت بين رجليه وجواهر طلعت مدهوشة ورهف والتوأم وياهن، ثواني واذا نشوف ثامر واحمد واسحاق شايلين زلمه مدمى ويصيحون..

گلبي طاح وانه اشوفن اخوي بهالحال، اشتغلت حبوبه عطيه وگابلتهه جدة عيشه واحنه واگفات مانعرف شنسوي..

-حجية عطيه: خايبااات راح الوليييد يا بوويه راااح ما تهنى سووده بوجهييي سووووده بوجهييي

تلطم ؏ وجهها وتبچي والنسوان اشتغل العويل والصريخ مالتهن، حسيت روحي مبنجة جسمي خدران، ماگدر اتحرك، هاديه واگفه بحدي تعاينله وتبچي وهجران اجتلي والصدمة مبينه ؏ وجهها واول كلمه همست بيهه...

-هجران: عُثمان مات؟

صفنت بوجهها مادري شجاوبهه، جوز مات وجوز لا بَـس متصاوب، دموعي تنزل واحس صدري قبط من القهر، ما مستعده اخسر عزيز عليّ بعد والله تعبنه..

انخبصت الصاله والزلم طبو واحنه واگفات متكترات ودموعنه تصب، انرجت الصاله بـ حس عميد الدين، عاط بعلو صوته...

-عميد الدين: ولكممم وخروووو

راح عليه وصاح بـ ثامر واحمد يگابلو، شالو وطلعو من الصاله وحبوبه عطيه لسه تلطم عليه سوته مات وراح..

ركضت وراهم واسحاق عاط بيه من شافني...

-اسحاق: ولي غاد يولييي

-عليك الله شمااله شصاار گلييي

-اسحاق: انتيي منوو كحزي من هينا (ابتعدي منا)

-هذا اخووي انه اخته

صفن بوجهي ثواني وعافني وطلع، رجعت جوة والدنيا مگلوبه وهجران وجهها مبلوع وصاير اصفرر، تقدمت عليه وحچت بصوت يرجف...

-غزاله شبي؟ شصار

-غزاله: مادري مادري خلي احد يجي يفهمنه!!

ظلينه نضرب اخماس بأسداس وجواهر حرگت الموبايل ؏ عميد الدين وما يجاوبهه، للظهر واجه ثامر يصير ابن خال عُثمان، طب علينه وتورشعنا نريد نفتهم شصار...

-ثامر: يولن خلوني اجر نفس

-جدة عيشه: ول احكي لا ابتلي بيك

-ثامر: جدة رح احكي

جر نفس عميق وحچة...

-ثامر: دحگو كنه گاعدين ويا محلانه والشيوخ كلهم متواجدين ونحكي مثل الاوادم وفجأة واحد من جماعتهم نط من مكانو حسيتو خبل وظل يصيح ويعيط ويتعارك وصار يحكي علينه.. انجنينه وصار ملاطم بالحكي وناس تصدو وناس سكتت، طردو من الگعده وعثمان اجالو اتصال من ابوي (الخال كساب) راحلو تا يشوفو وراح وياه مؤمل وفجأة ما نسمع غير الرمي صار وجماعتنه سمعو وطلعو بالتفگ ويصيحون ويرمون، صارت جبهه ناس ترمي وناس ختلو خافو يصيبهم شي والحظ المعثور صارت طلقة بـ عُثمان ويونس

-جدة عيشه: احااا وليداتي وبعدين ول كمل

-ثامر: جدة ماعرف شَنو صار طلعت اريد ادحگلو كان سابح بدمو والطلقه صايره بصدرو مادري ببطنو مادري مادحگتلو زين

-حجية عطيه: صخااام الصخم وجهچ عطياات راح الولييد رااح ماات انتهى

-ثامر: جدة شبيكي ؏ كيفيِك ما يصير تفاولون ؏ الرجال

استمرت حبوبه وجده عيشه من الجهة الثانيه يلطمن ويصيحن وعمه دلال ومجموعه من جماعتهم هم وياهن، ملخن رواحهن خبلونه چن صدك ماتو..

حسيت بدوخه ورحت اگعد صرت اسبح وادعي ربي بگلب محروگ تعدي ؏ خير ومايصيرله شي..

للعصر والاوضاع متكهربه واسحاق طاب طالع علينه حتى يطمننه عليهم، اخر شي افتهمنا طببوهم للعمليات وبعد ماندري شصار..

رحت لأمي ابچي محتاجة احد يسولف وياي ويطمني ؏ اخوي...

-سلمى: ماما غزل كافي بچي مو زين لتفاولين ؏ اخوچ

-غزاله: ماما اخافن عليه اخافن هم يروح نفس بكر

-سلمى: لا اسم الله اسكتي لتحچين هيچ

سكتت وبلعت عبرتي وگلت صدك مايصير افاوله، رجعت ادعي وانخى ام البنين تمر ؏ خير بَـس مارتاحيت وظليت اللوبن لحدما حاچيت عميد الدين وگال ان شالله ماكو شي..

**

"هجران"
كلشي صار بسرعه عيوني تغوش وارجع افركهه حتى تعدل الصورة گدامي، گلبي احسه بنص رجليه وكلما يدخل اسحاق علينه اگول رح يجيب خبر وفاته..

رحت لغرفتي اگعُد وحدي واتصلت بجورية متت من البچي، اشكيلهه من گلبي احسه نار شابه بي الرجال خاف يموت اكيد اني فگرته الله ياخذني اكتل منو اليتدنالي..

-جوري: انچبي هجراان بله لغوه زايده گعدي ادعيله بدل هالمسلته

-لچ جوري طلع يحبني صخام الصخمني قبل يومين حچالي شگد يحبني امدانييي

-جوري: وانتي؟

-شنو اني؟؟

-تحبي؟

-هسة وكتههه

-جوري: اييي وكتهه فكري زين هجران اذا خسرتي عُثمان تخسرين كلشي

-ادري والله ادري اصلاً ماعرف شسوي من دونه لچ عُثمان ابوهه لزينب تعرفين شنو يعني ابوهه!!

-ادري بي يحبهه ويحبچ يا غبيه وترا ديسوي كل هذا لخاطرچ فَـہ صيري عاقلة وتغيري خلص انسي بكرر انسيي راح والله يرحمه لازم تلتفتين للي صدُك يريدچ ويحبچ

-واذا داسني نفس بكر اذا انطيته حُبي

-انطي حُب معقول لتبالغين وتنطي روحچ وعافيتچ حبي نفس ما كلنه نحب ازواجنه

-يله جوري اروح اني تعبانه

-ارتاحي وفكري عدل حتى لو متحبي بَـس حاولي تتقبلي

-ان شالله

سديت الخط وياهه وطلعت اشوفهم بره، زينب مادري بيهه وين والدوخة مدا تفارقني، طلعت بحديقتهم كُلش چبيره ومليانه اشجار وخضار وورود، رفعت راسي اباوع للسما چانت الدنيا غروب، دعيت من اعماق قلبي يرجعلنه بالسلامه ويرجع لزنايب واحبابه..

گعدت ؏ الكرسي الموجود بالحديقه اتابع الطيور الي گعد ترجع لأعشاشهه لان ظلمت الدنيا، تمنيت روحي طير واهج من هالدنيا كلهه، ماريد انجبر ؏ شي وماريد اقدم كلشي املكه ونهايتي ماحصل غير الاذية والحرمان..

نزلن دموعي حارة ؏ خدودي واني اتذكر كلماته المليانه احساس ونظرات عيونه حسيتهن معلگات بوجهي ينتظر مني مُبادرة حتى لو صغيره بَـس اني چنت جامده والصدمة احتلتني وماگدرت اگول شي..

وحتى لو ردت اگول شنو اگول؟ اچذب عليه واگوله اني هم احبك واتمناك؟ لو اصدمه بالحقيقه واگوله اشوفك انسان طبيعي وماعندي أي مشاعر تجاهك..

عُثمان وسيم وجذاب وحنون ومليان مشاعر والف بنيه تتمنه نظرة منه واني انتبهت ؏ البنات الي هنا شلون يباوعنلي ومتأكدة يحسدوني عليه! بَـس شبيه اني ماحسد روحي ويوميه اغم روحي ؏ الغلطه الي ارتكبتهه من تزوجته!!

وبين ما اني افكر وراسي يدور اجت بنيه گعدت بصفي، درت بَـس عيوني اباوعلهه واذا چانت هاديه، جرت نفس وحچت...

-هاديه: انتي حامل؟

-شنو؟

-حامل؟

-هجران: لاء ليش تگولين هيچ

-هاديه: لان انتبهت عليكي من اجيتو لليوم ما تاكلين زين وسمعتِك تگولين لمرتو للسيد نفسِك تلعب

-هجران: لا عادي هاي دائماً تصير بيه

-هاا يعني ما حامل من عُثمان انتي

-لاء

-هاديه: و.. واءء هم مفكرين بهيك موضوع؟

-لاء

سكتت وظلت صافنه ؏ شجرة الورد الي گبالنه..

-هجران: هاديه انتي شگد عمرچ؟

-هاديه: 23

-اكبر مني بسنه

-هاديه: انتي كثير انتيشه

-هجران: عُثمان دائماً يگولي هيچ حتى قبل لنتزوج واي ادري بروحي صغيره وضعيفه

-ما مبين عليكي عمرِك

-صح

رجع الصمت اجتاح المكان، مرت خمس دقايق وفاجأتني من گالت وعيونهه مدمعه...

-يارب يرجعلنه

-حبيبتي لتبچين ان شالله يرجع اني عندي ثقه بالله سبحانه ودعيته بگلب محروگ ميخيبني ان شالله

-هاديه: ان شالله

مسحت دموعهه وگامت جوه، رحت وراهه وفعلاً ساعتين اجانه الخبر من جواهر تگول طلعو من غرفه العمليات وحالتهم مستقره، بچيت من كل گلبي وحمدت ربي الف مرة ومن الفرحة شلت زنوبه من الگاع وصحت بفرحه...

-زنايب بابه حيرجع رح يرجع باباتچ

تبچي ويايه ومتعرف شكو بَـس ؏ الواهس، رحت للغرفه بسرعه ودگيت عليه بلكي يجاوب، دگيت هوااي وماكو محد يرد أيست يجاوب وگلت يمكن بعده مبنج وهاي اخر مرة ادگ واذا مجاوب ؏ باچر، دگ وره شويه اجاني صوت رجال بَـس متأكدة مو صوته...

-الووو

-الوو خوية عُثمان شلونه؟؟

-أنَا ابن خالو ثامر وهوه هسة نايم

-زين هسه هوه شلونه؟

-ثامر: يگولون الاطباء انو حالتو مستقره حالياً بَـس يبات الليله هينا يخافون يصيرلو شي

-هاا زين الله يگومه بالسلامه

-الله يسلمِك

سديت الخط وظليت اللوب الليل كله منمت بَـس افكر واسبح وادعي، بطلاع الروح نيمت زينب وره اذان الفجر وحاولت انام وياهه، للصبح واني گاعده جفاني النوم، ظليت گاعده بالغرفه واحس وضعي متخربط من البارحة بلا اكل طلعت اصب لزنوبه غده واني اكلت لگمتين وعفت الماعون، رجعت للغرفه تمددت وهستوهه مشكله عيني دا اغفى ودگ موبايلي، طفرت اشوف منو، شهگت من شفت اسم عُثمان يظهر ؏ الشاشه..

-الوو عُثمان شلونك انته زين؟؟

-شلونِك هجران

صوته تعباان وناصي كُلش، بچيت وجاوبته..

-اني زينه انته شلونك طمني

-زين

-متوجع؟؟

-ممم

-اسم الله عليك ان شالله بعدوينك، ارتاح هسة انته وليظل بالك احنه زينين

-ماشي

-يله حَ سد الخط ماشي؟ زنايب تسأل عنك وتگول تهبك هواي

قهقه بخفه وطبگ الخط، فرحت من سمعت صوته وتطمنت هوه بخير، رحت لـ جواهر اشوفهه احس احتاج طاقة ايجابيه واريد احد يگولي ان كلشي رح يكون بخير وكلشي رح يرجع نفس قبل، دگيت باب غرفتهه وسمحتلي ادخل..

-جواهر: ها شلونچ

-زينه اجيت اشوفچ

-جواهر: تعاي حبي

گعدت ؏ فراشهه وهيه واگفه ؏ المرايه تمشط شعرهه..

-جواهر: اليوم عميدي يرجع للبيت ويروح بداله ثامر

-هجران: خطيه تعب صارله يومين بالمستشفى

-لا داده شتحچين انتي عُثمان اخو عميد الدين مو ابن عمه

-ادري من قبل عُثمان يگول هيچ

-جواهر: مممم (سولفنه شويه وترخصت هجران وطلعت من غرفتي وظليت وحدي، بدلت ملابسي ورشيت عطر وگعدت انتظر عميدي..

دگيت عليه وگال بالطريق، انتظرت شويه وحسيته تأخر فَـہ طلعت اشوف خاف گاعد بالصاله وفعلاً طلع توقعي صح..

چان گاعد بالصاله المعزوله ؏ القنفه وغزاله گاعده بصفه، وگفت بمكاني وچان عندي فضول قاتل اسمع حديثهم لان اني ادري بغزاله تحب وتريد عميد الدين..

حسيت بالموضوع بعدما مات مرتضى صح اني وعميد چنه متعاركين بَـس چنت اهتم وانتبه لأبسط تفاصيله، چنت اراقبه من بعيد لبعيد بسبب اشتياقي القاتل اله، وبوكتهه من شفتهه هيچ گلت بيني وبين نفسي يمكن محتاجة عطف وحنان منه بَـس طلعت غلطانه!

خصوصاً من انتبهت لنظراتهه عليه وشلون تهتمله وتباوع لحلگه تنتظر حچايه منه بأيام ولادتي، انزعجت كُلش بوكتهه وغرت منهه، تبقى اصغر مني وتصير ارملة اخو ويمكن ؏ ساعه يعقد عليهه من باب "خطيه" وهسة اريد اتأكد من هالشي وهل عميد هم عنده هيچ نية تجاهها؟؟

-عميد الدين: بويه لا تخافين مابي شي وداعتچ

-غزاله ببكاء: اخافن وعلي ماريده يروح نفس بكر

-عميد: شمالچ غزل اسم الله ؏ الزلمة لا تحچين هيچ!!

-غزاله: اخااف

وصارت تبچي، بالبدايه عبالي عيارة بَـس شو هاي صارت تشهگ وتبچي وتحچي بصوت مخنوگ...

-غزاله: عُثمان من يومه لا يحچي لا يگول متوجع لا يحب يكدر احد ولا يزعله بابا عليك الزهرة عينك عليه ترا ابوي ما يحبه

-عميد الدين: بنيتي لا تبچين عُثمان ببطن عيني لا تتكدرين واذا چانت ؏ سالفه عمي ماعليچ انه احاچي ونشوفلنه حل

-اي اغديلك فدوة خلص خليهم يرحمون الزلمة هلك من الجفه (الجفاء) نابذينه ولا چنه اخونه

-عميد الدين: بسچ غزاله گتلچ السالفه يمي

هزت راسهه ومسحت دموعهه..

-عميد الدين: رهوفة وينهي؟

-نامت

-عميد: خذت علاجهه؟

-اي

-يله بابه چا انتي همات روحي نامي

-غزاله: عميدي صدك رهوفه حتروح لجامعه بغداد

حچتهه بصوت يرجف ومليان عبرات..

-عميد: مو وكتهه هسة

-عليك الله يعني صدك هالحجي خايبين انه وين اروح ياهو عندي لو رهوفه تروح والعباس ماعندي غيرهه

-عميد الدين: غزل بسچ بچي يا بويه هسّ هيه راحت وتبچين عليهه!!

-مو انتم ماتحسون كلمن حاير بعيشته وبفروخه ونسوانه وعايفيني

-افااا ياهو هاذ العايفچ؟

-انته وامي وابوي واخواني ولا چن انه بنيتكم لا احد يسأل عليّ ولا يگول شمالني شمحتاجه!!

-عميد: بابه شني انتي حلمانه؟ شمالچ تصيحين؟

-عميد الدين انته من يوم ماتزوجت هملتني!! ترا انه مو بعازت الهدمه واللگمه انته صاير لا تحچي وياي لا تسولف ومن تريد تسولف وياي وتحچي كله بالرسميات چن وحده غريبه عليك!!

-انه يمته محاچيچ بالرسميات؟! حالچ من حال رهوفه!!

-انه.. انه انه...

تشهگ وتحچي، انكسر گلبي عليهه، عميد حس عليهه قصدهه ان هيه وحيدة وماكو احد وياهه، فوراً تغيرت ملامح وجهه للعطف والحنان وحچة بصوت ناصي لكن مسموع...

-بابه انه حتى لو تزوجت وخلفت وشلت من البيت ولو اروح لآخر الدنيا انتي تبقين بنيتي الاحبهه والربيتهه، غزاله انتي اول بت بحياتي اول بت گالتلي چلمة بابه، چنتي ماترضين تصيحين لـ عمي بابا لاا تجيني الي تگليلي..

انتي گطعه من افادي وما راح يجي يوم ويتغير هالشي، رح تظلين هين (اشر ؏ گلبه) ولا رح يجي احد ويوخرچ من هالمچان، انه ابوچ واخوچ وسندچ ووليد عمچ، لا تتردين بيوم وتگولين عميدي مشغول وماريد اكدره وازعجه، لااا هنا انه انزعج وازعل عليچ، اريدچ تجيلي بالصغيره وبالچبيره شلون گبل!! من يوم يومچ غزالتي ورح تظلين هيچ ولو الف بت تجيني تظلين انتي اول بنياتي!

-غزاله بشهگة: بَـس صارن عندك تلاثه شتسوي بيه بعد

-لاااء غلطانه

رفع اربع اصابع وگال بأبتسامه حلوة...

-انه عندي اربع بنيات، اربع وردات نورن حياتي وزادنهه جمال وراحة

-غزاله: يعني حتى لو انه كبرت رح تظل تحبني

-اكييد چا شنهي اكو اب يكره بنيته بَـس لان كبرت؟

-مو شوف انه اگول...

-لا تگليلي ولا اگلچ طلعي كل هالافكار من راسچ وردي غزالتي الاعرفهه، ردي للمدرسه وادرسي ونجحي، رفعي راسي مثل رهف وانه اخذچ بنفسي للجامعه واردچ

-چا ورهف شلون

-شمالهه رهف؟

-اذا هيه بجامعه بغداد انه هم اريدن هناك

-غااليه والطلب رخيص بعيني اخذچ هناك وكل عطله اجيبچن سوه واردچن چان شنهي قابل اتعاجز منچن

-وشوكت اداوم؟

-ما تداومين تقرين بالبيت للسادس واوديچ لأحسن المدرسين نفس رهوفه وتطلعين معدل حلو وتصيرين طبيبه

-انه ماريد اصيرن طبيبه

-چا شتردين؟

-احب اصير معلمه

-ههههه لا بويه صيري مُدرسه احسن وميخالف صيري مدرسه شحلاتهه تعلم اجيال وتخرجهم ؏ ايديهه

-مو اخافن ابوي ما يرضى اداوم كليه

-ماعليچ انه احاچي واذا كلش ما رضى ؏ جامعه بغداد تداومين بذي قار يمنه حتى ماتروحين ونشتاگلچ

ضحكت خجلانه ونصت راسهه، ابتسم ورجع گال...

-ابد لا تحسين روحچ ما مريوده ومنبوذه انتي بنيتي وتاج راسي وحتى لو مريتي بفترة صعبه بحياتچ حاولي تنسيهه وكملي بحياتچ واتذكري اكو وادم تحبچ وتتمنى تشوف ضرسچ يضحك

-ان شالله

-عفيه باباتي هسّ مسحي هالليلو وروحي اقري الي علمتچ عليه ونامي

-حاضر

-تعاي تعاي جاي تسوين العلمتچ عليهن؟

مضيگ عيونه ويباوعلهه، ضحكت وغطت وجهها وگالت..

-غزاله: اي

-مممم اكيييد

-اي وعلي اتوضه واقره الفلق والناس والتوحيد والكافرون

-وبعد؟

-بعدين اسوي عشر مرات استغفر الله واسأله التوبه واسوي عشر مرات اللهم صلِّ على محمد وال محمد

-ايي؟؟

-واقره الفاتحة لـ بكر ومرتضى ورضا واهديلهم اية الكرسي حتى يتنور گبرهم وتجيهم رحمة

ابتسم وهز راسه بعدين اشر ؏ صدرهه ورفع تك حاجب، ابتسمت غزاله وحچت بهمس مسموع...

-غزاله: بعدين احطن ايدي ؏ گلبي واگولن يا مقلب القلوب ثبت قلبي ؏ دينك والحمد لله رب العالمين ؏ كل نعمة صغيرةً كانت ام كبيرة

-عميد الدين: كفو ويله حبيبتي روحي ارتاحي ومن نرد ان شالله اروحن اشتغل بمعاملتچ واذا يجي يوم وتگولين انه ماحبچ اطيح حظچ

-هههههه عميديييي

-هههه يله بويه روحي

گامت تروح واني رجعت للغرفه حتى ميشوفوني بَـس اكو فرحة بگلبي خصوصاً من ثبتلي ان هيه بنته ومستحيل رح يتغير هالشي..

شفت بنوتاتي خاف گعدن بَـس همزين نايمات بعمق، شويه ودخل عميد للغرفه...

-عميد: سلام عليكم

-هلوو گلبي عليكم السلام

ساعدته ينزع ملابسه وراح للحمام، طلع ونشف وجهه، تقربت عليه ولفيت ايدي حول رگبته وبسته ؏ خده..

-اشتاقيتلك ميدو

-عميد: ردينه لسالفه ميدو جوهرة!

-حبيبييي شگد كيوت هالاسم

-عوفي الكيوت وتعاي مشتاگلچ

سحبني گعدني بحضنه واني حضنته من رگبته، احس بي يمسد بشعري ويشمه، وخرت وجهي عن چتفه وهمست...

-حبيبي تعبان؟

-اي والله

-الله يساعدك هاي وگفتك ترفع الراس وبينت لأهل عُثمان ان عنده ظهر وهوه مرغوب وكلنه نحبه ونريده

-چا يا اثول ما يحبه

-هسة عوفنه من عُثمان تعال يمييي حبيبي شو انته متكبر هههه

-لا بله

-والله

-احسچ جاي تگولين عميد شكبرك صاير

-عزاا لااا والله حبيبي شيخ الشباب انته

-اي ضحكي عليّ ضحكي

-عميديي شبيك انته حتى لو تصير بالخمسين تخبل

-اي ذكريني رح اطب بالاربعين

-اهووو يا كلمه ردي لمكانچ

-هههههه تعاي

جرني عليه و....

(ديلا نطلع شباب 🚶🏼‍♀️🥵)

**

"هجران"
گعدت ثاني يوم وقررت ان هذا هوه لازم انطي لنفسي فرصة واحاول اتعايش ويه الوضع واني متأكدة عُثمان مراح يضغط عليه لو يغصبني ؏ شي..

رحت للصاله وكلنه متجمعين اليوم يرجع عُثمان للبيت والكل فرحان ومتحمس وخاله كساب اخيراً ظهر وشفناه، يگولون عنه چان نايم طول الوقت لان كُلش مريض وميگدر يگوم من فراشه..

اندگت الباب وهاديه ركضت تفتحها، دخل عُثمان مسنود ؏ عميد الدين من جهة واحمد من الجهة الثانيه، چان يمشي عبالك رجال هرِم عجوز ماخذه الدنيا كل عافيته لكن ابتسامته بقت صامده وبقه وجهه البشوش يضحك من شافنه كلنه منتظرين جيته..

توسعت هالأبتسامه من همست لزينب تروح تحضنه وتبوسه، شالهه احمد وانطته بوسه ؏ خده وهوه بادلهه، دخلو لغرفتنه واستحيت اروح وراهم لان بَـس الزلم ومرت خاله طبت..

شويه وطلعو بقه بَـس عميد الدين وثامر، رهف غمزتلي وهمست...

-رهف: ماتروحيله خيه شمالچ

-هجران: هههه لچ سلبوحة معليچ

-جواهر: يااا شنو معليهه صدُك كلام رهف روحيي شوفي تحمديله ؏ السلامه انطي شسمه سالفه ضحكة غمزه بوسة لوسة شغلات اخرى

تحچي وتغمز، وجهي اشتعل من الخجل وضليت بَـس اضحك عليهن، طلع الكل من غرفته يعني بقى وحده، جواهر گرصتني وهمست...

-استغلي الفرصه وروحيله

-استحي جواهر

-جواهر: حقچ بَـس اتذكري كلام جوري من گلتلچ الرجال يبزع ويمل ترا صحيح هالحچي

-مو ماعرف شسوي

-جواهر: انتي لتسوين شي هوه يسوي ويله روحي

سمعت حچيهه وردت اروح للغرفه، ورجعت سحبتني..

-هجران: ها مو تگولين اروح؟

-جواهر: تعاي لغرفتي ثواني

رحت وراهه واخذت عطر رشتلي ورادت تحطلي مكياج وصحت..

-لا جواهر عزاا شنو تخبلتيي

-وجهچ اصفر هجران ؏ الاقل بَـس كحلة

-لا لا استحي عيب گدامهم

-انتي رح تبقين وياه بالغرفه عود من تطلعيلنه مسحيهه، يله هجران لتشلعين گلبي

گوة قبلت تحطلي كحلة وشويه حمرة خفيفه من اللون الاحبه عدهه نفس حمرتي، رحت لغرفتي وگفت بالباب وجريت نفس، دگيتهه ؏ كيف وسمعت صوته...

طبيت واني منزله راسي خجلانه، رفعته شويه شفته يباوعلي..

-الحمد لله ؏ سلامتك

-عُثمان: الله يسلمِك

-تحب اسويلك شي تشربه، تاكله؟

-لا شكراً

-اءء احم خاف تريد شي

ضحك خفيف وهز راسه بـ لا، معت من الفشله والخجاله، حتى مگال گعدي هنا لو ؏ الاقل بينلي يريد وجودي..

-عُثمان: اريد انام تعبان

-هااا اي نام

ردت اطلع وصاح...

-عُثمان: هجران يصير تنامين بصفي؟

درت وجهي اباوعله چانت عيونه بيهه هواي حچي وحسيته من صدُك يريدني بصفه، ابتسمت وهزيتله براسي..

رحت انام بطرف السرير وهوه همس...

-يصير تنامين بحضني؟

-هاااا

-ماسوي شي يولي

-ها اء اي

تقربت عليه وهوه سحبني وحضني بين ايديه حيل، خفت اوجعه بَـس هوه مبين مرتاح فَـہ سُكتت، حط حنچه ؏ راسي وصار خشمي ؏ صدره، غمضت عيوني وحاولت مافكر بشي غيره حالياً، بلكي اگدر اصمد وما انفر منه..

استمرينه ؏ هالحال وتوقعت عُثمان غفه، رفعت راسي اباوعله وطلع بعده گاعد وفاتح عيونه وسارح بالفضاء، نزل راسه يباوعلي وابتسم..

-مانمت شو؟

-طارت النعسه

-خاف اني مضايقتك الله عليك گول

-لا ابد بالعكس مرتاح كثير

-اكيد؟

-رب الاكيد

ابتسم مرة ثانيه وظل يباوع لعيوني، خجلت ونزلت راسي ورجع رفع حنچي بأصابيعه، طبع قبله خفيفه ؏ جبيني وهمس...

-اشتاقيتلِك كثير هجراني

-مكانك خالي انته هم

رفع ايدي الحاطتهه ؏ صفحتي اليسره وشابك اصابعنه سوه، شالهه يتمايزهه متت من الخجل من وره لون بشرتنه المختلف وضعف ايدي، اخذتهه من عنده وظميتهه لصدري ونزلت راسي...

-شبيكي؟

-ماكو شي

رجع اخذهه وفوراً حطهه ؏ شفايفه وطبع قبله عليهه، حطهه ؏ خده واستمر يباوع لعيوني المطيرتهن منا ومنا استحي اباوعله..

-عُثمان: جمالِك غير

صفنت عليه اباوعله والدمعه ترگص بعيني، خنگتني العبره وحسيت خلص رح ابچي ماتحمل بعد..

-هجران: ادري اني موحلوة

-منو گال هيك؟

-الكل

-الكل ماعندو ذوق

نزلت دمعتي وهمست...

-مستحيل هالشي

-عُثمان: شَنوه المستحيل؟

-عُثمان اني ادري اني موحلوة ولا جسمي حلو ولا بشرتي لونهه حلو ولا...

-تؤ تؤ تؤ شَنو هالحكي هجران

-هذا الحچي الصدُك انته متشوف اهلك شلون يباوعولي وكأني كائن فضائي

وخرت عن حضنه وگعدت گباله بالضبط، ختنگت واني ابچي والحسرة مردت گلبي واموت اذا ماحچي..

-بأذني سمعت بت خالك اديان تگول شنو هاي الجگمة متزوجهه عُثمان! عُثمان ترا اني ما جبرتك تاخذني ولا اني ردت اتزوج وشبعت ضيم من بكر ومن نضراته الي وكأني غوله گدامه كافي بعد ماتحمل والله ماريد شي غير اعيش ويه بنتي و...

عدل گعدته بصعوبه وقاطعني...

-عُثمان: خلينه نحكي بوحده وحده، نجي ؏ اديان أنَا اتصرف وياهه

-لااا حباب اني من گتلك ما اقصد تأذيهه بَـس...

-لا بَـس ولا غيرو يُبا افرك حلگو اليحكي عليكي فتهمتي لو لا!! هجران انتي مرتي وعاجبتني وانا احبكي وماريد غيرِك

-بَـس انته حلوو

-واذا حلوو يُبا فتحي عيونِك ترا الجمال مو كلشي وانا ماشوفِك بهذني عيوني هجران أنَا اشوفك بعيون گلبي يا بعدو

-عُثمان شوف اني ادري انته دتحچي هيچ حتى متزعلتي ومن قبل چنت هيچ بَـس...

-أنَا من قبل اشوفِك بعيون گلبي حتى من كنتي ؏ ذمة بكر!

-شنو؟ شلون؟

-عيون الگلب اهم من العيون الحقيقيه، وانا كنت اشوفِك شي كبير ومهم بالنسبه الي كنت اتمنى تحاكيني وتسولفين ويايه لاني حبيت گلبِك قبل شكلِك، شكلِك ما كان يحقلي احبو لانِك مو حلالي بَـس گلبِك كل الحق الي وهذا مو بَـس كلامي أنَا حتى عميد الدين واحمد وابوي كلنه حبيناكي ونشوفِك حلوة بعيون گلبنه لان شفناكي انتي شَنو وشَنو اخلاقِك ويا حظي لان صرتيلي

شال ايده ومسح دموعي وهمس...

-احبكي أنَا وماريد اشوف هالدموع ؏ وجناتِك هَجر عمري، تعالي..

سحبني عليه ونمت ؏ صدره وهوه يلعب بشعري، رفع راسي عليه مره ثانيه وگال..

-احب عيونِك

-منيلهن عيوني زروف چفچير

-ههههههه يولي شنو هالحكي أنَا هم عيوني مو كبار ترا

-انته رجال

-وشَنو يعني

-انته حلو

-منيلي املح

-ههههه لا ابد ابد مو هيچ اني ماشوفك هيچ

-عجل شلون تشوفيني؟

مبتسم بخبث ويحچي، نصيت راسي خجلانه وحچيت...

-انته حلو وجذاب وابتسامتك تسرق النظر، نظيف ومنظم ومرتب حيل

-هيك تشوفيني؟

-اي

-تعرفين أنَا شلون اشوفِك؟

-شلون؟

-اشوفِك بنت حلوة لكن جمالهه مُميز تختلف عن باقي البنات، بطبعي ماحب الاشياء المعتادة والي تجذب الكل، اتمنى تگدرين تشوفين نفسِك بعيون گلبي هجراني

-عُثمان انته كُلش رومانسي

-هههههه ما كنت اعرف بهالشي اله منِك

ابتسمت بوسط دموعي..

-شكراً عُثمان

-؏ شَنو؟

-؏ كلشي انته غير والله انته غير

-اكره كلمه غير لان طول عمري اسمعهه الگيلِك شي ثاني

-هههه ماشي خليني افكر

صفنت افكر واجت ببالي كلمه فعلاً توصفه واجت فيت عليه، رفعت راسي مره ثاني وگلت بحماس...

-انت ألمُعي

-الللله أنَا المُعي؟

-اي ألمُعي وفريد انته مو تگول اني اختلف عن البنات بشكلي انته تختلف عن باقي الزلم بأطباعك واسلوبك وجمال روحك، الي يشوفك من بعيد يگول اوووه هذا شايف روحه وسامة وطول وجسم وكاريزما، لبسك ونظرتك الحادة تدل ؏ قوة شخصيتك وغروور

چان صافن ؏ شفايفي واني احچي ومبين راح لغير مرسى، اردفت...

-بَـس من يتعرفون عليك ويشوفون داخلك نظرتهم رح تتغير، يا حظه الي يصير صديقك لو خليلك، عندك اسلوب نظيف وگلب طاهر وابيض ببياض سنونك ههههههه

-ههههههههههههه

-هههه والله شبيك هههههه

-يصير اتشكرِك بطريقتي؟

-شلون؟

-رفعي نفسِك شوي

عرفت شيريد يسوي وزادت دگات گلبي، رغم هذا رفعت نفسي وهوه قرب وجهه وطبع قبله ؏ خدودي وقُبله مطوله ؏ شفايفي، شلون العطشان وديرتوي بالضبط يقبلني بهالطريقه، ابتعد عني وظل يباوع لملامحي وكأن ديدرسهن...

-عُثمان: شفتان ممتلئتان مرسومتان بأتقان، ابدع الباري في خلقهما، مذاق الشهد مذاقهما، تنشو الفؤاد عند تذوقها فَـہ يرغب الجسم بالمزيد اقاوم وابتعد لكي لا تنزعج فتاتي لكنهه شقيّة وتلونهم باللون المخملي فَـہ تثير غضبي اود انتزاعه من شفتاها ليتسنى لي ولي فقط بأن اثمل بها واعيش حياةً رغيد

-تحب الفصحى

-اعشقو مثل ما اعشقِك

-عُثمان اني استحي وماگدر هيچ

-جعل محد غيرِك يستحي

نصيت راسي ورجع يگول...

-عُثمان: مخمليتي الفريده

-شنو؟

-انتي مخملية

-شنو قصدك عود لان احط هاللون؟

تنهد وحچه بنبرة هادئه وبطيئه..

-المخمل هوه نسيج يلبسو الاغنياء والناس المُترفه، اكو كثير ما يحبونو ويمقتونو ممكن اللوانو ماتعجبهم او في ناس شكلو ما يحبونو لكن يبقى مميز وانيق وراقي، مو أي واحد يلوگلو هاللون والي يملكو ويرهملو ويتوفر هالنسيج عندو حظو كبير لانو غالي الثمن وصعب حصولو وانتي احسِك كثير مشابهه للمخمل تگولين الناس مايحبو شكلِك رغم أنَا اشوف العكس يمكن ينغاظو من طيبتِك ومن تمييزِك عنهم

-معقوله؟؟؟

-اكييد اكو ناس گلوبهم سوده وماتعجبهم الناس الطيبه اللطيفه واكو ناس توصل يتضايقون منهم ويحسوهم منافس قوي الهم فَـہ يبعدو عنهم ويحاولو يكسرونو للانسان الي يتميز بالروح المخمليه!

صفن بوجهي واني سرحت افكر بكلامه، الي رجعني للواقع من همس وهوه يفرك خشمه بخشمي...

-انتي مخمليتي

-ههههه

-اضحكي يا روحي احب ضحكتِك

-عُثمان ماعرف شنو اگول

-ما لازم تگولين شي المهم عرفتي قصدي ووضحتلِك الصورة وأي شخص يضوجِك لا تترددي وتعالي احكيلي حتى اتصرف ماشي مخمليتي؟

-هههه ماشي

غمض عيونه وظليت بحضنه، حسيت براحة عجيبه من كلامه وكأن شَع لون ماروني مخملي بين صفوف حياتي السوده، ابتسمت واني اتذكر كلماته واضحك مثل المخبله من اتذكره يگول "مخمليتي" الله شگد عجبني هالدلع بكلشي مختلف حتى من يدلع..

حسيته غفه وحاولت اغفه بَـس ماگدرت فَـہ گمت حتى يرتاح، غطيته عدل وطلعت من الغرفه، رحت بوجهي للحمام حتى امسح مكياجي، تمايزت روحي ؏ المرايه وضحكت من شفت الحمرة ممسوحة هههه صدُك انتزعها مني حتى محد يشوفني بيهه غيره..

مسحت الكحلة وطلعت من الحمام ورحت للمطبخ اشوف شديسوون، گالولي اروح ارتاح وفعلاً رحت بدون ما ابادر واللح بالمساعده، رحت للصاله شفت جواهر ورهف ومرت احمد "هدى" گاعدات يسولفن، گعدت وياهن وجواهر صفنت عليه وگالت..

-هاي شنو الابتسامه والوجه مشعشع ياربي تدووم

-هجران: ههههههه

-رهف: خية شنهي هيچ عمو عُثمان يونس خايبه ماتخليني اگعد وياه شوي

-جواهر: هههه انچبي رهفف ادبسززز

-هجران: هههه عمچ عُثمان نام

-هدى بضحك: وره ما اخذ حصته

ضحكت خجلانه من وره حچيهن، ظلينه نسولف للمغرب ورحت اشوف عُثمان بالغرفه خاف گعد..

رحتله وشفته صدُك گاعد وزنوبه تگمز ؏ راسه وتسولف وياه..

-هجران: زنوبه عوفي بابا حبيبتي بعدين سولفي وياه هسة هوه مريض

-عُثمان: خليهه يولي خلينه نشوف شبيهه زنايب خانم

-زينب: بابا انته گلت تجيبلي مصاصه

-عُثمان: ول يُبا دحگيلي ماگدر اگووم

وگفت ؏ الچربايه وتخصرت..

-زينب: وبابا عميييد

-روحيلو وگليلو يجيبلِك بنيتي

-زينب: رهتله وگال نعساان

-عجل نجيبلِك بعدين

عگدت حاجبهه وطنگرت ونزلت من الچربايه وتدردم..

-زينب: ماهبكم كلكم ماهبكم

-عُثمان: هههههه تعالي أنَا اهبِك

دارت وجهها وزفرت بقوه ولسه مخصره ايديهه..

-زينب: اني ماهبك انته مو هباب

-عُثمان: انتي الحبابه يولي

-زينب: اصلاً اي اني هبابه

-عُثمان: واضح

باوعتلي وحلگهه متقوس مستعدة للبچي وعبالهه رح ادافعلهه..

-هجران: عيب عليچ تحچين ويه ابوچ هيچ انتي ليش صايره مو مؤدبه!!

بدت تشهگ وچتافهه تتحرك..

-زينب: اصلاً اني مؤدبه

-هجران: ايي واگفه ومتخوصره هيچ امشي بره يله ومن تتأدبين رجعي

-زينب: صرت هبابه

-هجران: لا مو حبابه يله طلعي بره

انفتحت اذاعتهه والدموع عشره عشره ينزلن، راحت لـ عُثمان وصعدت يمه ؏ الچربايه، تبچي وتگوله...

-زينب: اني هبابه بابا اني هبابه

-عُثمان: مادري هجران شتگولين زينب هبابه؟

-هجران: اذا اعتذرت تصير هبابه

-زينب بشهگة: اني اسفه اصلاً اصلاً.. اصلاً ماريد مصاصه

باست خده وانتظرته يبوسهه، اووي بنيتي انكسر گلبي عليهه بَـس صايره تتجاوز هواي وطالعه عينهه، جرهه عُثمان باسهه وگال...

-اجيبلِك عشر مصاصات بَـس اصير زين ماشي؟

-زينب: اي

نزلت وطلعت تركض وكالعادة من نسألهه وين تگول رايحة لـ غزاله..

عفت عُثمان ورحت اسبح، طلعت شعري مبلل ولابسه دشداشه خفيفه، حسيت بعيونه تباوعلي واني غلست لان كُلش استحي من نظرته..

مشطت شعري وعفته ؏ چتافي، رشيت عطر ودرت وجهي اباوعله وهوه نايم بمكانه ويباوعلي...

-اني رح اصبلك عشه واجي ماشي

هز راسه بـ "اي"، لبست شالي ورحت للمطبخ، چانت هاديه واگفه، گلتلهه اريد اصب لـ عُثمان وفاجئتني من نترت...

-هاديه: أنَا اصبلوو

-هجران: لا لتعبين نفسچ اني اصب

رمقتني بنظرة حاقده، اصلاً تعودت كلهم هنا واضح ميحبوني ماعرف شسالفتهم، صبيت العشه وبعدني بالمطبخ وسمعت صوت كُلش عالي جاي من بره نززني وزيّد دگات گلبي، ركضن هاديه واديان بره ووياهن ام ثامر يشوفون شكو، چان صوت رجال خشن يعيط..

-عثماااان وينوووو عثماااااان

يتبع☘️...

♛ ♛ ♛ ♛ ♛ ♛ ♛ ♛ ♛ ♛
ها حبيبي شلونكم شلونهه القفله؟؟ تخبووول ترا😁❤️‍🔥
لتنسون التصويت والتعليق بين الفقرات يحلوييين🙈❤️‍🔥.