شفاه مخملية الفصل الخمسون 50 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طويل لعيونكم الحلوة♥️.

"شفاه مخملية" 💋

بقلم: زهراء السلامي.

عُثمان يگول:
كلبي ماعشك غيرك ولامال
ومنك مازعل مرة ولا مال
حياتي انت وحلم روحي والامال
واجيب الروح لعيونك هدية❤️.

♛ ♛ ♛ ♛ ♛ ♛ ♛ ♛ ♛ ♛

بلعت ريگي ولزگن عيوني بعيونه مدا اگدر انزلهن وهوه نزلت عيونه ؏ شفايفي ورجع يباوع لعيوني، همس...

-عُثمان: لا تخافين مني يُبا أنَا تزوجتِك لخاطر بنتِك وتا ما تعيش يتيمة الأبوين، لا يجي يوم وتتخيلين اسوي شي من ذاتي ابداً أنَا هينا اعتبريني صديقِك ما اكثر من هيك أنَا صح ضد هالفكرة بَـس بيناتنه عقد شرعي واريد نتعامل هيك تا نكسر الاحراجات الي بيناتنه

-بَـس هذا مو ذنبك تتزوج بهالطريقه

-ذنبي لو ما ذنبي أنَا اخترت هالشي كلو لخاطر هالطفله وما تتأذه وتبتعد عن امهه

هزيتله راسي وهوه رجع لطرف السرير واتمدد وغطه عيونه بذراعه، توقعته يفرش وينام بالگاع بَـس طلع توقعي غلط..

بقيت بمكاني وسندت راسي ؏ راس زنايب وبسرعه غفيت وجريتهه نومة للصبح..

فتحت عيوني زينب مو يمي ولا عُثمان، گمت بسرعه رحت للحمام وغسلت ولبست حجابي، طلعت للصاله وصارت نرجس بوجهي عاگده الحاجب وعيونهه مظيگتهن، اول مشافتني همست...

-حية حية ماينگدرلچ تف عليچ وع تربيتچ يا ساقطه كتلتي بچر وخذيتي اخو

-هجران: نرجس شبيچ اليسمعچ يگول اني قتلت بكر

-نرجس: ليش گليّل السم الذبيتي عليه وتالي لفيتي ؏ اخيّه وخذيتي

هستوني دا اجاوبهه وشفت جواهر طلعت من غرفتهه، من شافتني فتحت عيونهه وشهگت...

-جواهر: هجرااان شوكت وصلتووو

اجت عليه وحضنتني وبوستني..

-هجران: البارحة بالليل چنتو كلكم نايمين

-جواهر: نوّر البيت بجيتچ يروحي

ابتسمت بوجهها وهيه اللتفتت تباوع لهلحية نرجس، نترت بيهه...

-جواهر: خيير نرجس خيير اكو شيي؟؟

-نرجس: وابو فاضل لوما السيد بظهرچ اله ارفس ببطنچ واملش شعفتچ الصفرة

-جواهر: هههههههه حبي سواء عميدي بظهري لو لا فنننچ لو ضوجتيني بشي والله اللعب بيچ لعب

عافتنه وراحت بعدما ذبت سمهه ومدت لسانهه، جرتني جواهر من ايدي ورحنه للمطبخ جانت بيبي عطيه گاعده وعمه دلال وكالعادة مرجانه وياهن..

-حجية عطيه: هااا سلبوحة يمته جيتو تعاي تعاي انطيني حبة (بوسه)

بوستهه وبوست عمه دلال وگعدت وياهن...

-بيبي شفتي زينب؟

-حجية عطيه: اي جاي تلعبهه غزاله

-دلال: خليني اسويلچن ريوگ يبعدهن

-جواهر: لا عمه گُعدي اني اسوي

-دلال: استچني انتي بطنچ واصله لخشمچ

ضحكنه وياهه وخطيه گامت گلتلنه بيض وطلعت گيمر وسوالف الريوگ، مرّ اليوم طبيعي نفس الحياة القديمة ماكو أي تغير عدى اسلوب فتوح ونرجس صاير اسوء من قبل ويايه وكلما يتعدن من يمي يذبن حچي سمّاني واني ابلع واسكت..

لليل اني گاعده ارتب بكنتوري لان نزلت ملابسي حطيتهن ويه عُثمان بالكنتور وزنوبه گاعده ؏ الچربايه تتابع كارتون وهوه دخل للغرفه...

-سلام عليكم

-هجران: عليكم السلام

گمت ؏ حيلي وهوه راح لزنوبه يبوس بيهه وكالعادة جابلهه علاگة اشكال نميات واتفق وياهه تآكُل شغله وحده باليوم...

-عُثمان: بابه زنايب اذا افتهمتو ماكله اكثر من شغله بعد ماحبكي

-زينب: اي

-عُثمان: عفيه بنيتي تعاي ابوسِك

گعدت بحظنه وهوه يبوس بيهه وهيه هم باسته وتشكرت من عنده، گامت من حظنه وطلعت ركض ومن اسألهه وين رايحة تگول...

-زينب: ئزاله انطيهه مصاصه

-هجران: بنتي غزاله يمكن نامت

-زينب: لااء لااء

ركضت بره واني هزيت راسي يأسانه منهه، ذبيت الملابس من ايدي وعثمان بقه ؏ گعدته ساند جسمه ؏ ايده وصاير شبه متمدد ويحرك براسه يدوره بكل الاتجاهات واصوات طقطقه تصدر من رگبته...

-هجران: شنو تحول شغلك هنا؟

-عُثمان: لا بَـس بالايام الي ابقى هينا اشتغل ويه الشباب احسن من گعدة البيت

-اي صح، زين ممفكر تكمل دكتورا؟

-لا

-شعجب؟

-ماكو عجب بَـس احس بالي ما صافي حالياً

-ممم

گام وتوجه للحمام واخذ وياه منشفه، طلعت من الغرفه بسرعه لان ادري رح يطلع هيچ، ظليت گاعده وحدي بالصاله وانتظر بلكي جواهر تطلع من غرفتهه..

طولت تقريباً ساعه وجواهر ماكو ولا زينب فَـہ صعدت لغرفه غزاله اشوفهه وينهه...

-يممه بنيتي نامت!

-غزاله: اي خية جايه تقرالي قصه وغفت هههه

-هيه تقرالچ؟؟

-ايي مو عميدي وعُثمان يقرولهه هيه تجيلي تحچيلياهه

-يعني اليوم من چانت ويه عميد الدين بالديوان چان يقرالهه قصه؟

-اي

ابتسمت وردت اخذهه بَـس غزل گالت عوفيهه يمي لان صايره تستاحش وحدهه بالغرفه، ترددت اعوفهه لان ماريد اختلي ويه عُثمان وحدنه بَـس هم انقهرت ؏ غزل..

رجعت جوة وطبيت للغرفه چان عُثمان متمدد ؏ الفراش وبيده الموبايل ديحچي بي، من شافني نهى المكالمه وحط الموبايل ؏ الميز وتمدد بمكانه...

-متريد عشه؟

-عُثمان: لا عاشت ايدكي اكلت بره

-هاا بالعافيه، اءء احم هاي زنوبه نامت يم غزاله

-ممم

-تريدني اجيبلك شي؟

-ارتاحي اذا احتاج شي أنَا اجيبو لنفسي

گالهه وابتسم، هزيتله براسي ورجعت للكنتور اكمل، انتبهت عليه نزع ملابسه وتغطه فَـہ عرفت يريد ينام واستحى يگول طفي الضوة فَـہ من ذاتي طفيته وعلگت التيبل لاب..

تأخر الوقت واني اشتغل بالكنتور، ظهري انكسر وتعبت كُلش فَـہ رحت انام ؏ الفراش بصفه واني بداخلي ادعي ما اتدنه عليه هالمرة لان بطبعي اتحرك بنومي وماحس ؏ روحي..

غمضت عيوني وغفيت بسرعه كالعاده، حسيت بأحد يگعدني والنومه لسه بعيني..

فتحت عيوني واذا اخترع من اشوفه بوجهي..

-هااا شنووو

-عُثمان: شبيكيي

-شبييه شصاار؟؟ زنوبه بيهه شيي؟؟

-لااء يُبا انتي شبيكي تونين وتبكين

-انيي أون وابچيي؟؟؟

-اييي

-هجران: عُثمان شبيك حلماان؟!

-لا انتي الحلمانه أنَا سمعتِك تبكين وتونين وتحكين حكي ما فهمتو واخترعت صراحة خفتو بيكي شي

-انييي احچي واني نايمه؟؟

-ايي وانتبهت اول يوم من نمنه بالفندق هم حكيتي شوي بَـس هسة صرتي تبكين يولي

-عزاا صدُك تحچي!! زين شنو چنت اگول؟؟؟

-مادري حكي ما مفهوم، يعني انتي حلمانه؟

-لا ماتذكر چنت اشوف حلم

-ماشي اسف لان گعدتِك بَـس خفتو عليكي والله

-لا عادي اصلاً اني اسفه

رجع لمكانه واني لو بيدي اطم روحي من الفشله، هاي من شوكت ابچي واحچي بنومي وليش محد گايلي من قبل؟!!

مشه شهر ؏ زواجي من عُثمان واحنه حياتنه روتينيه ماكو أي جديد، هوه يطلع اليوم كله وحتى ؏ الغده ميجي بَـس بالليل ويلف راسه وينام واني گاظيتهه شغل واسمع حچي من نرجس وفتوح واسكُت لان مابيه حيل..

وبيوم احنه نايمين واسمع صوت عياط مخنوگ جاي من الصاله، طلع عُثمان يركض واني وراه، شفنه جواهر گاعده ؏ القنفة ولازمه تيشيرت عميد الدين بقوه وتصيح بكتمة...

-جواهر: عميييد الديييين حمووووووت

-عميد الدين: دهرر ولچ گوومي خليني اخذچ للمستشفى، يماااا ولچ يمااااا

طلعت خاله انتصار مبوزة، صارلهه شهر متتحاچه ويه عميد لان طلگ سُهى بحجة متخلف وشيسوي بيهه عايفهه ؏ گلبه وهيه ميته قهر علبو دم مرتضى راح هدر..

-انتصار: هاا شبيكم تصايحون

-عميد: يوووم فدوة اروحلچ هاي جوهرة چنهه رح تجيب

هيه سمعت هيچ وتخبلت وصارت تعيط بفتوح ودلال يجن...

-انتصار: خايباات وينچنننن بساااع تعاالن

طلعن عمه دلال وبيبي عطيه من غرفهن ورهف واگفه بصف جواهر ودموعهه بعيونهه...

-دلال: فلك فلكني خاب شني مو عمليتچ بعد چم يوم

-حجية عطيه: خووب الله نزل عليهه الطلگ شنهيي تظم الفريخ لحدما يصير وكت عمليتهه خايبه شني ماعندچ عگل انتي!!!

-فتوح: يما موش هذا حچي دليّل بَـس نگول جوهرة رح تطب بالعاشر وما اجاهه الطلگ يعني شني بين ليله وضحاها اجاهه

شالت عوچيتهه تريد تضرب فتوح وعميد صاح...

-عميد: بسكممم لخاطر الحمزة، يمااا تعاي سنديهه خليني اجيبن السيارة

-عُثمان: ظل وياهه أنَا اجيبهه

جواهر تبچي ورهف وياهه خايفه وخاله انتصار تحچي وياهه وتهدأ بيهه وفتوح وبيبي عطيه يتناگرن ودلال بَـس تگمز متعرف شتسوي، تخيلت عبالك اول طفل يصير عدهم واول وحده تجيب ببيتهم وهيچ مخبوصين..

-جواهر: عميدي اني احبك وانته الرجال الوحيد الحبيته بحياتي حبيت اكولك هالشي اخاف اموت بالولادة

-عميد الدين: وابو فاضل اذا مانلصمتي اطيح حظچ وعلييي

-جواهر: هئ هئ ليش تغلط عليه مو اخاف امووووت

-عميد الدين: جوااااهررررر ولچ يمااااا سودنتنيييي هااااي

-انتصار: حبوبه شمالچ يواشچ ؏ رويحتچ يبعدي

-رهف ببكاء: جوااهر حاولي وقاومي انتي گدهه ان شالله ما تموتين

-عميد الدين: انتييي طبييي لحجرتچ لا ابتليي بيچ شنهييي رايحة حرررب

-جواهر: تستهزأ حضرتكككك يعني انييي شعرايه بيني وبين الموت وانته هيچ تحچي!!!!!

عميد تخبل خطيه مبين عليه شگد متوتر، اجه عُثمان طاير صاح دخل السيارة بالگراج..

نزل عميد ؏ جواهر وشالهه وطلع بيهه بره وخاله انتصار وعمه دلال ورهف طلعو وراهم وفتوح بدت تعوج بحلگهه معاجبهه..

-فتوح: نسوان اخر وكت صاحت ااخ خلت زلمتهه يشيلهه

-حجية عطيه: انچعمي فتيحاان لا وعليي اييب مريانه تحوس بفاددچ خلي الزلمه ومريته بحالهم من فلك طرچ

-نرجس: حبوبه جواهر هواي تتنعوص هسة شني اول وحده تجيب وهيچ مخبوصين

-هجران: جواهر حامل بتوأم والبنيه متأخرة هواي بشهر التاسع وبُنية جسمهه متتحمل

-فتوح: اهااا اجت المحاميه هوه انتن وحده تحامي وتدافع للخ

گولبت عيوني ورحت للغرفه اقرالهه سورة الانشقاق حتى تسهل ولادتهه، گظيت الليل كله اقره قرآن واسبح وكل شويه اتصل بـ عُثمان واسأله، اخير اتصال گال دخلوهه لغرفة الولادة والحمدلله رح تجيب طبيعي..

وره ساعه تقريباً اتصل عليه فرحان وگال اجن بنات عميد الدين بخير وسلامه واخذوهن للخدج حتى يفحصوهن..

-هجران: مبرووك الف الحمد لله يربييي شگد فرحتلهم

-عُثمان: اي والحمزة يستاهلون كل خير

-اگولك حباب تعال عليه اريد اروح اشوف جواهر

-عُثمان: عجل وزنايب؟

-يم غزاله نايمه حباب تعال

-خوش بدلي وانا مسافة الطريق

بدلت بسرعه وانتظرته بالحديقه علما يجي، شلت الموبايل اتصلت بجوري خلال هالوقت وبينما اني وياهه نسولف اجه عُثمان...

رحت وياه والطريق كله هدووء، نزل يشتري كم شغله وجاب اكل وياه ورجع للسيارة بدون ميحچي شي، احس علاقتنه باارده جامده ويين قبل چنه منسكت ونگظي الطريق كله سوالف وضحك واحچيله ادق تفاصيل يومي وهسة ؏ گد السلام وبس..

صراحة بيني وبينكم مشتاقتله هواي بَـس ممشتاقتله بصفة زوجي مشتاقة اريده يرجع حمايه وترجع علاقتنه الحلوة، عُثمان چان الوحيد الي افرغله كل الي بگلبي، چنت اشكيله من بكر وهوه يساعدني ويحاول ينطيني حلول وطاقة ايجابيه حتى اگدر اكمل واعيش حياتي..

وصلنه للمستشفى وتوجهنه لغرفة خاصه ناقلين بيهه جواهر، طبيتلهه چانت متمدده وعميد الدين گاعد بصفهه يباوعلهه، عبالي نايمه فَـہ ردت اطلع وعميد صاح...

-تعالي علويه جوهرة صاحية

-هجران: الحمد لله على سلامتهه

-عميد: الله يسلمچ بويه

ابتعد عنهه واني رحت ابوسهه وهيه مبتسمه خفيف بَـس وجهها ذبلاان كُلش ومبين عليهه التعب، گعدت بمكان عميد الدين وهوه طلع يم عُثمان بره...

-هجران: شلونچ جوهرتي سوده عليه مبين تأذيتي هواي

-جواهر: الحمد لله ؏ كل شي

-هجران: بشريني بناتچ شلونهن

ابتسم وهزت راسهه بـ "زينات"..

-هجران: خاله انتصار ورهوفه وين؟

-جواهر: راحن للكافتيريا ياكلن

-هاا لعد انتي ارتاحي اني اطلع بره

حركت راسهه بـ اي، گمت اشوفهم چانو عميد وعثمان مبين ديحچون وثنينهم منطين ظهرهم للباب فَـہ ميشوفوني..

گعدت ؏ الكراسي قريب عليهم وهمه مستمرين يحچون ومادري ليش خايلي سمعت لو صدُك الحديث چان يدور هالشكل...

-عميد الدين: يوم الالك حبيب واشوفن خلفتك

-عُثمان بأستهزاء: بالمشمش

-عميد الدين: تفرج خوية تفرج

بَـس هذا السمعته بَـس يا الله شگد تأذيت، حسيت اجه سچينه بنص صدري، انقهرت عليه كُلش وتأذيت، عُثمان كتوم واني من اشوفه ساكت توقعته راضي بهالعيشة وقانع بَـس اووف ويه نفسيتي وقابليتي هوه اني انام وياه ؏ نفس الفراش وگوة انام احس مسويه شي چبير وفد خطيئه اكبر..

ابتعدو وظلو يسولفون ولسه واضح مانتبهو عليه مندمجين، حسيت الدمعه بعيني شويه وتطفر من القهر، ماتحملت ابقى اكثر واتصلت بي يرجعني للبيت..

طريق الرجعة نفس طريق الروحه جامدين كأن لوحين خشب گاعدين بصف بعضهم لا احساس ولا مشاعر بيناتهم، طبيت للبيت وبوجهي لغرفتي احتاجيت ابچي، شگد حاولت اكابر واللزم الدمعه بَـس خلص طفح الكيل تعبت من كل شي..

من البچي محسيت بعد اله وزنوبه تگعدني، فتحت عيوني اباوعلهه چانت مبدله وريحتهه شگد طيبه مال اكل..

-ها ماماتي وين چنتي؟

-زينب: ئزاله

-غزاله شنو غسلتلچ؟

-زينب: اي

-تعاي بنيتي

جريتهه نيمتهه بصفي، سحبت موبايلي اشوف خاف احد داگ عليه ومحاسه وفعلاً مكالمتين فائتتين من امي..

اتصلت بيهه وسولفت وياهه واتطرقت للموضوع الي صارلي شگد اتهرب منه..

-صباح: هجران بنيتي اني اگولچ احسبي شهر شهرين والرجال يتزوج عليچ

-عادي ميهمني لان اني ماشوفه زوج

-صباح: انتي الخسرانه الوحيده ياخذ عليچ مرة ويذبچ ولا يهتملچ

-لااا منو يگول اصلاً عُثمان يحب زنايب ويحترمني انتي متشوفين كل يوم قبل ليرجع من الشغل يتصل بيه ويسألني خاف محتاجة شي واكثر من مرة يريد يطلعني حتى يغيرلي جو واني ماقبل

-لعد دكليهه يغبرة خلي الرجال يبزع منچ ويتزوج

-خلي يتزوج ماما ميهمني

-صباح: روحي روحي طلعتي روحي

سديت الاتصال واني افكر معقوله يتزوج؟ اي واضح لان من گال لعميد بالمشمش يعني مبين يريد طفل! وليش ميريد الرجال عمرة قريب الـ 35 سنة هم يريد يشوف دربه ويكمل حياته يظل ينتظرني قابل!!

گمت اسبح حتى اصحصح وبدلت ملابسي، مليت من الاسود واتمنى انزعه بَـس هنا عدهم عيب قبل السنه ينزع الاسود، اني ببيتنه اول ماطلعت من العدة نزعته لان نفسي مانطتني اللبس اسود ؏ رجال خاني واذاني، رغم حُبي اله بَـس انهانيت هواي واهين روحي اكثر من احزن عليه بَـس اضطريت ارجع اللبسه واشتري كله سوادات لان اجيت هنا ولازم گدامهم ابين اني بعدني حزينه..

رحت للمطبخ آكُل ووكلت زينب واجت غزاله تغسل مواعين، عفتهه ورجعت للغرفه، تربعت ؏ الچربايه وفكرة تجيبني والثاني توديني..

ثاني يوم رجعت جواهر ومرت عشرين يوم ؏ ولادة زمرد وياقوت بناتهه، ضحكتني من غيرت اسمائهن بآخر لحظة لخاطر عميد الدين رغم ما لح وياهه وگللهه بكيفچ شتحبين تسميهن سمي بَـس رادت تفرحه بشي بسيط وهذا الحلو بعلاقتهم هواااي بيهه تنازلات صح عنوديين بَـس من تجي السالفه لحبهم يتنازلون..

رحت اشوفهه چانت دترضع وحده من عدهن والثانيه نايمه، گعدت بصفهه ؏ الچربايه وگلت..

-يعمريي اروح فدوة لچ جواهر انتي ماعندچ بنات ذني لعابات

-جواهر: هههه خلي يسمعچ عميدي موتني يروح ويجي يقره عليهن وينفخ نفس سوالف العجايز هههههه

-هههه والله مينلام دباعي الجمال سبحانك ربي الله يحفظهن نسخة منچ

-جواهر: اي مماخخذات شي من ابوهن

-هجران: الله يحفظهن

قريت الفلق والناس ونفخت عليهن وع امهن اخاف كلشي يصير، بَـس من صدُك جمالهن جمال اجنبي شلون جهال الاجانب الشعر اشگر والعيون كبار خضر والحلو طلعن توأم متماثل نفس الشكل بالضبطط ماكو أي اختلاف وعميد الدين لسه يتيه بيناتهن..

رجعت لغرفتي چان عُثمان متمدد ماعرف شوكت جاي..

-هاا الله يساعدك هاي شوكت اجيت؟

رفع ذراعه المغطيه عيونه وباوعلي نظره ورجعهن ؏ عيونه...

-عُثمان: قبل شوي

-محسيت عليك، زين جوعان اصبلك غده؟

-چؤؤ (لا)

حسيته مو طبيعي فَـہ ماردت اللح عليه وطلعت من الغرفه ورحت اكمل شغلي..

وره كم يوم چنت نايمة بالليل وهوه تأخر ياله رجع، زنوبه نايمه عند غزاله وبيني وبينكم مگدرت انام مادري ليش بالي يمه وصارت تجيني افكار ليش هيچ تأخر، اول ما فتح باب الغرفه طفرت من مكاني...

-هااا وينك شو تأخرت؟؟

-عُثمان: مو گلتلِك رح اتأخر

-اي صح بَـس ماتوقعت لهلوقت صارت بالوحدة وانته ماكو ظل بالي

ابتسم وهز راسه، راح للحمام واني ظليت گاعده انتظره، طلع مجرد من الملابس بَـس منشفه لافهه ؏ خصره، توجه للمرايه يمشط ويتعطر نفسسس اسلوب بكر بالضبططط، رحت اوگف بصفه وگلت...

-عُثمان شبيك انته ضايج مني؟

-لاء ليش اضوج منِك

-مادري شو صاير متحچي ويايه

-وانتي منتظرتني احكي؟

-مو احنه عايشين بنفس الغرفة والله احسنه غربه ولا كأن چنه اصدقاء ونسولف دائماً

ظل ساكت ويمشط بشعره، شال زجاجه العطر ورش منهه تالي مشط شواربه ولحيته بمشط صغير ولسه عيونه ؏ المراية..

-متعشي؟ لو اسويلك؟

-متعشي عاشت ايدكي

ظليت احوس هذا شبي ويايه معقوله اني مسويه شي من انام واضوجه لان منلتقي وميصير حچي بيناتنه بَـس انام بصفه بالليل...

-هجران: صح ردت اگولك اني هواي اتحرك بنومتي فَـہ اسفه اذا فد يوم ضوجتك لو صرت ؏ جهتك والله ما اقصد

-عادي

سُكتت وغميت روحي بداخلي، صارلنه شهرين متزوجين وهسة ياله احچي، هسة زين هوه جاراني بالكلام وما فشلني..

رحت ؏ الچربايه وتمددت وهوه لبس بَـس بجامه، توجه للكنتور وظل يبحوش بي، راح ؏ موبايله واتصل بواحد بَـس مبين خاله لان گاله "ها خالي" خلص الاتصال ووجهه معقوچ وضايج..

-صاير شي؟

باوعلي بنظرة ماعرف افسرهه، ادري لحيت وياه بَـس بطبعه هادئ وميحچي اله احد يسأله، گمت ع حيلي ورجعت اوگف بصفه...

-اذا تحتاج شي مني لتتردد ابد ترا اني نفسني هجران الخدومة ماتغيرت

اللتفت يباوعلي واستمر يباوع بعيوني، استحيت ودنگت راسي، همس...

-بطلي تكونين هيك

-شنو؟

تقدم عليه لدرجة اللتصق بيه واني ابتعدت خطوتين ليوره وهوه مستمر يتقدم...

-عُثمان: ليش ظل بالِك اليوم؟

-لان اءء تأخرت

-وشعليكي انتي

-هااا مو مادري

-شَنو ماتدرين؟!!

حچاهه بحدة ومستمر يتقدم عليه، انضرب ظهري بالحايط وبعد ماكو مجال ابتعد وهوه صار بوجهي بالضبط، اخذله صفنه بعيوني وهمس...

-انتي ليش هيك؟

-شلون

-انتي اختصاص تعذيب الذات

-مفهمت

استمر يباوعلي ونزلت عيونه ؏ حلگي ورجع لعيوني، قرب وجهه عليه كُلش واني دگات گلبي يسمعهه الاطرش.. انفاسه الحارة تلفح وجهي واختلطت ويه انفاسي وانسجمت، دگت انوفنه ويه بعض وبحركة مفاجأة قطف شفايفي ببوسه عمييقه هادئه مليانه رقة خالية من الوحشيه والهمجية..

لزم وجهي بثنين ايديه وتعمق اكثر، حسيت رجليه بادن وجسمي رخه وصار يرجف، رفعني عليه وشالنه وگعد ؏ الچربايه وهوه مستمر بالقُبلة، من حس انگطع نفسي ابتعد شويه لثواني ورجع، حسيت گلبي رح يطلع من صدري من قوة ضخه للدم وجسمي كزبر وبحركة لا ارادية مني دفعته من حسيته يريد يسوي حركة ثانيه...

دفعته بقوه لدرجة ضربت صدره وگمزت من حظنه، وگفت ؏ حيلي وابتعدت بسرعه وهوه ظل صافن ومنزل راسه، رفعه يباوعلي وماعرف منين اجتني البچيه وصرت ابچي مثل الجهال...

-اسفه اني اسفه بَـس ماعرف شصارلي اسفه والله ماقصد اسوي هيـ...

قاطعني وحط اصلعه ؏ شفايفه وگال...

-اشششش خلص ماصار شي أنَا اسف

راح لمكانه وتمدد يريد ينام، مسحت دموعي والشهگة لسه بيه، نمت بفراشي وانطيته ظهري وجسمي لسه يهتز من الموقف، حسيت بي ورايه ونوعاً ما قريب ؏ ظهري وطلع احساسي صح من درت وجهي اباوع، صرنه وجه بوجه، همس...

-ماقصد اسوي هيك هجران اعذريني بَـس تعبت كثير انتي ما تحسين شَنو گعد تسويلي

ظليت ساكته وهوه كمل...

-انتي ما گعد تنطيني فرصه اكحز (ابتعد) دائماً وياي وبجانبي تسأليني اذا كنت حوعان وكل شوي تجيبلي شي وتهتميلي

جر حسرة وكمل...

-أنَا تعبان اكثر منِك جسمي يونّ عليه وگلبي يوجعني احس انو أنَا منبوذ

-هجران: لاا عُثمان مو هيچ بَـس....

-خليني اكمل، حاولت وجاهدت اتحاطى منِك وماهتملِك وانتي وراية وراية من ما اجي ؏ الغده تتصلين وتسألين وما تكتفين بقولي ماريد اكل لاا تدزيلي بيد عميد الدين للمحل، حنيتِك واهتمامِك صار نقمة عليه ما نعمة ومن احاول اتقربلِك احس بالنبُذ وكأنو أنَا انسان ما مريود

-بَـس اني هذا طبعي من قبل

-ادري ومن قبل كنتي تعذبيني، تصبحين ؏ خير

دار وجهه من الجهة الثانيه ونام واني الليل كله منمت ميتته من القهر، احس شُعلة نار بگلبي شسوي بروحي؟ شلون تاليتي واني ممتقبله الموضوع بكبره! الرجال بزع ومَل من عندي..

گعدت الصبح وچان لسه نايم، گمت بسرعه وطلعت من الغرفه ماريد يجمعنه حديث بعد موقف البارحة الغريب، لسه جسمي يرجف وكلما اتذكر گلبي يدگ بهمجية..

سويت ريوگ واجت رهف تريد تروح للامتحان..

-هاا بشري شلونهه المعنويات؟

-رهف: بَـس خليني اخلص وعلي لعبت روحي من القرايه

-يله اليوم اخر امتحان شدي حيلچ وركزي عدل مو تحلين شلون مچان

-رهف: لاا انه گايله اذا ماطلعت معدل طبيه انتحر

-ههههه اسكتي لچ ليجي ابوچ يسمعچ

-رهف: اي والله يله مع السلامة

-الله وياچ حبيبتي

طلعت للمدرسة والباقين كلهم گعدو ومن ضمنهم اكيد عُثمان بَـس چان كُلش طبيعي واسلوبه نفس قبل لا بارد ولا ضايج مني..

اللتمينه حول السفرة واصوات زمرد وياقوت ضافو روح حلوة للبيت، كملنه ريوگ وكلمن راحت تسوي شغلهه شويه واجت رهف مكيفه وفرحانه مجاوبه كُلش زين بالامتحان وتگول اذا متحيني مية تعترض..

رحت لغرفتي انظفهه وزنايب تطفر منا ومنا، رتبتهه وعطرتهه وبدلت الي ولزينب وطلعت تگمز واكيد تروح لعميد الدين يقرالهه قصه كالعادة بهيچ وقت هوه بالديوان وهيه تروحله..

رحت لجواهر اشوفهه چانت دترتب بغرفتهه..

-اگولچ جواهر شهوده شلون صارت؟

-جواهر: بعدهه والله خطيه متگدر تتحرك

-يعني بعدهه مهدده بالاسقاط؟

-جواهر: اي وتگول سلمان متخبل ممنوع تگوم وممنوع تتحرك يخاف عليهه

-الله يساعدهم هذا ثاني طفل تسقطه

-اي والله ماعرف شبيهه ومن تروح للدكتوره تگوللهه جسمچ مهيئ لحمل بَـس ليش ميثبت عدهه مادري

-الله كريم

-جواهر: اگولج افتهمتي رح نروح للانبار بعد كم يوم؟

-شنو؟؟ هاي شوكت منو گال؟؟؟

-جواهر: يااا لعد عُثمان محچالچ متشوفي شحاله وميتحچه

-اي اشوفه بَـس هوه ميحچيلي

-جواهر: خاله كساب كُلش مريض فد مرة صاير وصايره عدهم طلابه چبيره ودزو ؏ عميد الدين وگال ياخذنه وياه

-يممه هاي ليش هيچيي

-شمدريني داده ما اسأل والله لعبت نفسي من الطلايب ومليت منهن

هزيتلهه براسي ورحت اكمل شغل، لليل اجه عُثمان عاگد النونه ومبين كُلش معصب، ترددت احچي وياه بَـس حالته كُلش متسر..

-شلون صار خالك؟

رفع راسه يباوعلي بعدما چان منزله وبيده الموبايل..

-بعدو

-بعده هيچ مريض؟

-اي

-شو مگتلي رح نروح للانبار

-انتي ما تجين

-هاا يعني ابقى هنا؟

-لا ادزِك لبيت اهلِك

-والباقين كلهم يرحون؟

هز راسه بـ اي، گام من مكانه وگال...

-بعد يومين نطلع حظري غراضِك اذا تحبين

هزيتله براسي ميخالف وگمت ركض اتصلت بأمي والصدمة گالت حجزو بعد يومين يرحون لأيران..

-مامااا لعد ليش مگلتوليي

-صباح: لچ ابوچ فد مرة تعبان سوده بوجهي گوة يجر النفس

-صخام الصخمني ماما لتخوفيني شبيي

-اني ادريي ماعرف والله حايرين وحجزنه ؏ الثلاثاء نروح لأيران يسوي التحاليل

-يله ترحون وترجعون بالسلامه ماما امانه سلميلي ؏ بابا وبوسيلياا ولتگطعون اخباركم اتصلي بيه كل يوم حبابه

-ميخالف حبيبتي

سديت الخط ومگلت لـ عُثمان بعد گلت هوه فد مرة من يردون يطلعون اگوله اجي وياكم..

مرت اليومين بسرعه وحظرنه كلشي ومن گلت لـ عُثمان اجي وياهم ماعلق ؏ الموضوع..

طريق الانبار جَزعنييي بعيييد واحس طلعت روحي وزينب تبچي وتنحست واحس عُثمان متهستر من الوضع وكل شويه يتصلون عليه..

بعد كم ساعه وصلنه اخيراً لصحراء الانبار، هاي اول مرة اجي هنا، استقبلونه مجموعه غفيره من الزلم ناس معگلين بشماغ ابيض وناس بالدشاديش وناس رسمي..

نزلنه من السيارات وزينب بيدي، عُثمان گلي اروح يم جواهر والبنات وهوه راح للزلم، سلمو عليه بحرارة ومحاضن ومباوس وهللّو ورحبو بينه لدرجة خجلونه..

اجه رجال أشيّب واضح عليه الكبر ووقور، فتح ايده لعميد الدين وعميد بادله الحضن واجه سلم ؏ عُثمان وع الباقين كلهم وگال كلمة مفهمتهه...

-تعدو سادة تعدو

من عميد حط ايده ؏ راسه وگله الله يسلمك افتهمت قصده تفضلو، طبينه كلنه لبيتهم چان كُلش كُلش چبير يعني اكبر من بيت عميد الدين بمرتين وچان مترووس نسوان وجهال..

اجت علينه مرة چبيره بالعمر قصيرة ووجهها تعبان ومدگدگة بحنچهه وحواجبهه وحتى بأصابيع ايدهه، فتحت ايديهه ؏ وسعهن وصاحت بصوت فحولي خشن نززني..

-هـلا هـلا بالطش والرش والماي المبشبش

تقدمت ؏ بيبي عطيه واكيد بيبي ماسكتت...

-حجية عطيه: خايبه هـلا بالهلا وبصاحبه الملگه يا ماي عيني

وظلن وحده تصد والثانيه ترد ويمكن باسن بعض فوگ العشرين بوسة وكله هاي ام الطگة، جواهر تقربت عليه وهمست...

-اگولچ هاي شكو شنو ناويات يظلن هيچ للصبح

ورهف من الجهة الثانيه سمعتهه، وگالت..

-رهف: خيات هاي الجدة عيشة حبوبة عُثمان كلش صاحبة ملگه وتموت ؏ حبوبه

-هاااا

وبعد سلام دام لأكثر من نص ساعه اجه دورنه يسلمون علينه، واول وحده تقربت هيه جواهر راحت للجدة عيشة، فززتنه من صاحت بصوتهه الخشن..

-هااي منوووو المزيونة

خاله انتصار جاوبتهه...

-انتصار: هاي الشيخة مريت وليدي عميد الدين

-الجدة عيشه: دخيلو للحمزة يولي تعااي انطيني نصيبي

وجرتهه وتمطگ شفطتهه شفط انوب شافو بناتهه تخبلو عليهن وراهه اجه دوري..

-شلونچ بيبي

-الجدة عيشه: وهاي منووو؟؟

-حجية عطيه: هاي مريت عُثمان

هيه گالت هيچ ولو اشوف الوجوه كلهه تگلبت وحتى اكو بنات شابات واگفات بزاويه الغرفه صارن يتبسبسن ويباوعنلي..

-الجدة عيشه: هلاا امييي هـلا بنيتيي حُرمت عزيز گلبي تعااي جده انطيني نصيبي

بوستني وحضنتني واخذت زنايب تبوس بيهه مبين كُلش حبتهه، گالولنه تفضلو وگعدنه ؏ القنفات وراحن البنات الشابات جابنلنه عصير ومي..

ردت اروح للحمام علمود زنوبه وجواهر هم رادت تبدل لبناتهه فَـہ همست لعمة دلال...

-عمه نريد نروح لمكان نبدل لبناتنه

-دلال: ايي يبعدي هاديه وينهيي؟؟

سألت البنيه الشابه الواگفه بالباب، حچت بصوت بارد...

-بالغرفة

-دلال: يله بنيات روحن ليهه

گمنه وهاي البنيه دلتنه ؏ غرفتهه، ماعرف ليش ودونه لهاي هاديه بَـس يمكن هيه ام البيت..

دگيت الباب وبيدي زينب وجواهر بيدهه زمرد ورهف بيدهه ياقوت، اجه صوت انثوي ناعم صاح...

-منوو

بعدني مجاوبتهه وفتحت الباب، طلعت بوجهنه بنيه شابه جميله، رشيقه ذات بشرة بيضاء صافيه وشعر كستنائي مرفوع وعيون صفرة محاطة برموش كثيفه، ابتسمت بوجوهنه وگالت...

-بناويت السيد انتم؟

-جواهر: اي سيد عميد الدين زوجي

فتحت عيونهه متفاجأة وراحت لجواهر بوستهه وسلمت عليهه بحرارة...

-هاديه: تعدو تعدو علويات لا تظلون واگفات هينا

دخلنه لغرفتهه شكبرهه وتجنن، جذبتني اخشابهه كلهن باللون الابيض والترتيب والنزاكة شگد عجبتني، گالت اخذو راحتكم وهيه طلعت شويه ورجعت جايبه مناشف وصينيه بيهه دولكة مي وگلاصات...

-هاديه: يا هـلا ببناويت السيد وشيختو

-جواهر: حبيبتي هـلا بيچ

باوعتلي وباوعت لرهف وگالت بضحكة غنج...

-ماعرفتونه يولن

-رهف: انه بنيت عميد الدين

-هاديه: يعمريي جمالوو دحگي عرفت تعوديلو لانِك تشبهيلو

-رهف: هههه اي صح

-هاديه: وانتي حبيبتي

-هجران: اني هجران

صفنت اگوللهه چنت زوجة بكر لو رأساً اگول مرت عُثمان، گلت بسرعه...

-زوجة عُثمان

ذبلت ملامح وجهها ورمقتني بنظره غريبه عجيبه معرفت قصدهه، هزت براسهه وگامت طلعت من الغرفه، ماهتميت ونزعت زينب وكملت وطلعت من الغرفه حتى ارجع من ما اجيت وعفت رهف وجواهر يبدلن للبنات بعدهن..

رجعت للصاله الچنه گاعدين بيهه بَـس چانت فارغه وخيلي شفت عُثمان تعده، رجعت للغرفه والبنات چانن هستوهن مخلصات..

-اگوللچن وينهم شو ماكو

-جواهر: شنو ماكو؟

-هجران: ماكو الصاله فارغه

-رهف: ياا شني وين راحو

تعدينه الممر وشو ذني اخذن يسره...

-هجران: يااا ولچن لعد اني متيهه ورايحة يمنه

-جواهر بضحك: نيااالي

لگيناهم كلهم گاعدين وناس چانو ديصلون الظهر وناس گاعدين يسولفون، وره شويه فرشو السفره وجابو الاكل وعيننني وما مدت الاكل وكله ما لذ وطاب والهبيط مله السفرة والباچة والسمچ والدجاج..

اكلت شويه لان نفسي جاي تلعب واخاف اتقيأ فَـہ اكلت لگمتين ووكلت زنوبه، كملنه اكل وردنه نساعدهم نغسل مواعين بَـس ماقبلو ماشالله كووومة بنات عدهم وكلهن هب ريح يروحن ويجن ميگعدن..

زنوبه تنحست لان نعسانه فَـہ اجتني مرة عمرهه يطلع ببدايه الاربعينات، گالت بأبتسامه...

-انتي مريت بكر؟

صفنت بوجهها وهيه فوراً عدلت كلامهه..

-اقصد عُثمان؟

-اي خاله

-تعاي حبيبتي تعدي هينا

اشرت ؏ الممر ورحت وراهه، دخلتني لغرفه چبيره ومرتبه حيل، گالت وهيه بعدهه مبتسمه..

-هينا عُثمان يجيل عدنه من يجينه

-العفو خاله مافهمت

ضحكت خفيف ورجعت عادت...

-يجيل يعني يبات هينا

-هااا ماشي

ابتسمت وكالت ارتاحي وطلعت وسدت الباب، نزعت حجابي وگعدت ؏ الچربايه وحطيت زنوبه بحضني انيمهه وهيه تعالج ويايه وتعاند وتبچي، طلعت روحيي ياله رادت تغفى ورجعت گعدت تصرخ من انفتحت الباب بهمجية، صحت بجزع...

-عثمااان گعدتهه

عض ؏ شفته السفليه وعفس ارنبة خشمه، اخذهه مني وشالهه يفتر بيهه بالغرفه وحاطهه ؏ چتفه، ظل هيچ ربع ساعه ياله نامت، حطهه ؏ الفراش وغطاهه وگال..

-ماتوقعتِك هينا

-اي هاي مرة چبيره گلتلي ارتاحي بهاي الغرفه

-اكيد مرتو لخالي كساب ما صح؟

-ماعرف والله بَـس عيونهه صفر

-اي هيه

هزيتله براسي وهوه اجه صعد ؏ الچربايه وتمدد، اني گمت اگعد ؏ الكرسي الموجود بالغرفه واكو كتب مسفطات ع رفوف اخذت واحد وگعدت اگلب بي..

مليت واحس تعبت ورحت ؏ الچربايه اتمدد يمهم بَـس ماگدرت انام فَـہ گعدت انتظر عُثمان يگعد حتى بلكي اگدر اطلع وياه من الغرفه..

مرت ساعتين وهوه نايم طگت روحي وجزعت من الانتظار، تعمدت اطلع صوت حتى يگعد مادري منين اجتني هالحقارة واللئامة بَـس خلص صارله هواي نايم..

گعد يفرك بعيونه، باوع ؏ ساعته الي بيده وباوعلي وگام..

-هجران: عُثمان احنه ليش اجينه هنا؟

مطه جسمه وحرك راسه بحركات عشوائيه وگال...

-صارت طلابه واحتاجو مساعده عميدي

-زين ليش جاب الكل وياه؟

-ما يأمن يخليكم بالبيت وحدكم وماكو احد من الزلم بالبيت

-بَـس قبل مچان هيچ

-من صارت موتت مرضى تغير كثير

هزيت براسي وهوه راح للحمام وطلع وجهه مبلل، طلع من الغرفه واني ركضت وراه.. طب من باب عرفته مطبخ وشفت نفس المرة الچبيرة سلم عُثمان عليهه وباس ايدهه وراسهه وهيه حضنته وبوسته..

اخذ تفاحة وعض منهه وقدملي وحده وتوجه للصاله واني وراه، حسيت بي يضحك خفيف وكل شويه يلتفت يباوعلي..

-عُثمان: محتاجة شي هجران؟

-هااا لا بَـس ماعرف وين اروح

-عُثمان: كأنِك بزونه وتركض ورايه ههههه

-عثمااان هاي شبييك

ضحك وفر بأيده، رجعنه لنفس الصاله الكعدنه بيهه اول ما طبينه وهوه گال يريد يطلع..

-عُثمان: اذا احتاجيتي شي اتصلي بيه

-ماشي اءء اگولك هم تتأخر؟

-ماعرف والله

-حباب بسرعه تعال شو مادري احس روحي مستاحشه هنا

-عُثمان: اعتبري البيت بيتِك لا تتقيدين

-مو ماريد انته تعال حباب

-هههه خوش يولي يله أنَا اروح بوسيلي زنايب

هزيت براسي اي وابستمت وهوه باوعلي وردلي الابتسامه، طلع واني رحت اگعد ويه غزاله چانت الوحيده گاعده والباقين مادري وينهم..

مرت يومين اني هنا وعثمان يطلع من الصبح ويرجع بنص الليل واليوم رجع هلكان تعب..

-الله يساعدك

-ويساعدِك ربي

-هجران: مبين كُلش تعبان

-اي سويت كثير شغلات اليوم وظهري احسو مقسوم

-سلامتك

راح ؏ الچربايه ونزع ملابسه وتمدد ؏ بطنه، انقهرت عليه وتمنيت اگدر افركله واخفف وجعه بَـس ماعندي هالجرأة..

رحت اگعد بصفه وهمست..

-متوجع كُلش؟

رفع راسه يباوعلي وهزه، برطمت شفايفي وارتسمت ؏ وجهي ملامح حزينه..

-رح اسويلك زنجبيل دافي هذا كُلش يفيد

گمت اريد اروح وحسيت بي يجر اديه وبحركة سريعه مددني بصفه وصار فوگايه، تفاجأت من حركته وهوه نظراته تتوزع ؏ كل وجهي، تنهد وهمس بصوت راخي...

-احبُكي

يبست وگلبي مينبض بعد وگف، رجع همس...

-احبُكي كثيير هجران كثيير

استمريت مبحلقه عيوني عليه وهوه كمل...

-ولأجلكِ تركتُ الهوى، فلا هوى بعدكِ يهتوي .. نويتكِ بيني وبين نفسي، ولكلِ امرئٍ ما نوى

-حچيت بفهاوة: هااا

-ولا تنفست الا وكنتي في نفسي، تجري بكِ الروحُ مني في مجاريها

سكتت وهوه سكت وصار الهدوء سيد الموقف، طبع قبله ؏ جبيني وهمس بأذني..

-احبكي لدرجة احسِك الهوى الاتنفسو هجراني

بلعت ريگي واحس عيوني رح يطلعن من گد الصدمة، رجع حچة بهمس...

-انتي سعادتي وروحي وراحتي ودُنياي واكتمال ديني اتمنى يجي اليوم وتبادليني ربع حُبي الِك يا هَجر عمري وسنيني..

جر حسرة عميقه شگت صدره وگال..

-هوى الهجران لوعني وماكو احد يگدر يوگفني

گام عني بعدما رجع باسني ؏ خدي واني تبسمرت بمكاني، راح لنهاية الغرفه لبس قميصه وطلع منهه بأكملها..

گلبي احسه صار بحضني، عيوني تحرگني ماعرف ليش؟ معقوله بسبب حرارة عيونه ولهفتهن وهوه يباوعلي يحچيلي عن حُبه؟

صابني الارق بليلتهه وماگدرت انام وهوه بعد مارجع ولا شفته، اجاني اتصال من امي وگالت بابا وضعه كُلش سيء وحالته متدهورة..

نمت واني ابچي ؏ ابويه ونسيت كلمات عُثمان العميقه والي زرفت گلبي، ثاني يوم گظيته كله بالي شارد وگاعده بالغرفة وهم عُثمان ماشفته بَـس گالو الگعده علساس باچر الصبح والليل كله زينب تبچي وتوّن ماعرف شبيهه..

گعدت الصبح واحس راسي يدكون بي طبول يموتني..

-آآآه شنو هالالم!!

صخونه تدگ بيه وجسمي يرجف شجابني هناا اني خرب
حظي والله، گوة وكفت ؏ حيلي مابية قوتي تخونني
رحت ع موبايلي اشوف بلكي امي متصله، نار شابة بگلبي متت من كالت بابا كُلش مريض وتحسه موات..

ذبيت الموبايل بيأس من ماشفت شي، بقيت بالغرفه گاعده
استحي اطلع ماعرف ليش بس لسة متعودت ع الوضع..

فزيت من سمعت صوت عياط بره طلعت اركض واذا اشوفه
مدمی، شايلي الولد ويصيحون راااح من ايدنه رااااح
گلبي انخمش وذبلت ملامح وجهي واني اشوفه گدام عيني
جثة ميصعد بيهه النفس، دموعي من وحدهه تنزل ورجليه
جامده وبيبي عطيه تدگ وتلطم والنسوان حواليهه، چانت
ثواني بس حسيتهه عمر..

-حجية عطيه: يبووووو اتصخمتي يعطيييه يبووووو
تعزييينه يبووووو راح وليدنه!!!! تعالن يمعثوراات تعالي يا
سلمى تعالي يا انتصار گابلني يبووووو

يتبع☘️...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات حبايب ئلبي😉☘️

احبكم واايد واايد🤤💗.