شفاه مخملية الفصل الثالث وخمسون 53 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#الرجولة أحلى من المال والجاه والجمال ..
تعرف الرجولة دي معناها ايه ؟!
الأمان .. أي ست في الدنيا ما تقدرش تعيش من غيره

♛ ♛ ♛ ♛ ♛ ♛ ♛ ♛ ♛ ♛

"جوري"
صفنت هجران بوجهي وفوراً تقوس حلگهه وهمست...

-شلون

-جوري: هجران الشغله واضحة و....

قاطعتني وراحت لغرفتهه، طبت وطبگت الباب وراهه، ركضت اشوفهه خاف بيهه شي لان هدوأهه عجيب..

فتحت الباب وزنوبه هستوهه گاعده وهجران لازمة ملابس زينب وتريد تبدللهه..

-هجور انتي زينه؟

-هجران: اي

-جوري: محتاجة شي؟ تردين شي؟

-لاء شكراً

-ماشي لعد اني احضر الريوگ وانتظرچ

-ماريد جوريه تريگو وحدكم

-ليش لچ تعاي نآكُل ؏ الواهس

-مارييد جوري

حچتهه بنتر، طلعت وعفتهه رحت للمطبخ ريگت علاوي واجت زنوبه هم گعدتهه ؏ الكاونتر وريگتهه، بالي ويه هجران هدوأهه خوفني وحسيتهه مو طبيعيه..

نفضت راسي اتناسى الموضوع ورحت احضر ملابسي والجهال خليتهم بغرفة الالعاب، شويه واجتني زنوبه تركض..

-زينب: هاله هاله

-جوري: ها خالاتي

-زينب: هاله ماما تبچي

مبرطمه وتحچي ويايه، رجعت زينب يم علاوي ورحت اشوف هجران، عرفتهه رح تبچي وهذا الهدوء ما قبل العاصفة..

طبيت لغرفتهه چانت نايمه ؏ الچربايه ومغطيه راسهه بالمخده وبس جسمهه يهتز..

-جوري: هجور حُبي وخري المخده رح تختنگين

-هجران: طلعي جوري

-هجران عليچ الله خلينه نحچي سولفيلي فضفضيلي

-طلعييييي جووووورييييييي

عاطت بعلو صوتهه وانتفضت من مكانهه وگفت ؏ حيلهه، وجهها احمممر وعيونه منفخات وعروگ رگبتهه ناطه، تقربت عليهه وحضنتهه لصدري وهيه انفجرت...

-هجران: لچ ليييش يتزوج لييييش؟؟؟ والله ممسويتله شيي والله

-جوري: يمكن هذا هوه السبب هجراان ميشوفچ كـ زوجة اله!

-يحبنييي والله يحبنييي

تحچي بحرگة ودموعهه تنزل، گعدت ؏ الچربايه وحطت راسهه بحضني وتبچي كأن طير مذبوح وتونّ..

-هجران: البارحة گلي احبچ اووووف جوري تعبتتت تعبتتتت يااربي اخذنييي خليني ارتاااح

-انچبيي وخلينه نفتهم السالفه

گامت من حظني وصاحت...

-لچ يا سالفه رحمة لواالديچ انتييي شايفتههه!!!! شايفه هاااديه شلون حلووووة لچ صخااام لطااام بوجهييي لچ ما اوصل لربعههه لچ تموووت تجذب العيييين واكيد تخبل عليهه امدااااني امداااااني لان فكرررت وصدگته امداااااني

صارت تدگ ؏ وجهها بدون وعي، حسيت اختي تخبلت وفقدت بعد، گوة لزمت ايدهه وهيه دفعتني حيل عنهه وگعدت بالگاع وحضنت جسمهه...

-هجران: حرااام عليه والله حرااام شنو من گلب عنده حرررام

-جوري: هجراان عليچ الله كاافي ؏ كيفچ ويه نفسچ!!

-جوري اني طاايح حظييي ماعندي حظظ ماعندييي الله ميحبنييي والله الله ميحبنييي

-استغفرر الله شهالحچييي ولچ

-شسوووي شسوووي خلي يرجعلللي والله شنو يريد خلي ياخذ والله والله اني اريده ليروووح جوووري

-هجراان اتصلي بي وافتهمييي

-اخااااف اخاااااف

-من شنووو

-خاف يگولهه بوجهييي مثل اخوووو يگولي ماااحبچ

-لااا مستحيل عُثمان يوصل لربع نذالة بكررر

-نفسسس الشي مو اخوااان والله لو يگولهه الي اموووت

-ميگولهه هسة گولي يا الله وگومي اتصلي بي يله هجور گوميي

مسحت دموعهه وگامت ؏ تلفونهه، اتصلت بي ثواني ورجعت تبچي، شمرت التلفون ؏ الفراش وعاطت...

-غااالق جهاااازه اوووووف يممما اووووووف

كل اووف تگولهه احسهه تطلع من اعماق گلبهه، ماتت اختي من بكر تزوج عليهه ماسوت هيچ ولا تخبلت بهالطريقه، معقوله تحب عُثمان لهدرجة؟؟ بَـس ليش كلما اسألهه تگول متحبه وتشوفه انسان عادي!!

-هجران كافي حبيبتي كاافي شوفي حتى بتچ صارت تبچي وياچ

-هجران: شسووي جوري انتي گوليليي يمكن اگدر اللحگ عليه وميتزوجهه شنو اگوله؟؟ احچي شگووول

-هجران شتگوليله وهوه غالق جهازه!

-اتصل بأي احددد جوري اموت اذا عُثمان تزوج عليه مااتحمل والله اني اعرف روحي ماااگدرر لچ اوووووف يوميه ينامووون راس براااس ويبوس ويتغزل وتنام بحضنه اطططگ واموووت مااااگدرر

-لعد لييش حارمة الرجاال منچ!!! ارتاحيتييي هسة من بزعتييي وخليتي يشرد منج!!!!

-خلييي يرجععع والله ادللهه وانطي شنو يريد بَـس خلي يرجعليي

-وبكر؟؟

-لچ شتحچيييين انتيييي بكرر ميجييي لأظفررر عثمااان الرجال مااات وماريد احچي عليييه بَـس چنت عميييه ويااه ومارجعلي البصر اله ويه عثماان صخاااام بوجهييي شگد غبييييه

عفتهه تبچي وتون ورحت آخذ موبايلهه بلكي نگدر نتواصل ويه أي واحد من اهله، جايتهه كومة اشعارات وهاي العوبه متفتحهن وبين ذني الاشعارات جذني اسم عُثمان..

دست عليه چان دازلهه رسالتين وبصمه ساعه بالستة الصبح، فتحت البصمه وهجران فوراً رفعت راسهه وظلت صافنه، چان يگول بيهه...

"حبيبتي صباح الخير أنَا رايح للانبار اليوم تا اخلص كم شغله طلعتلي صفح، ردت اگلِك بَـس ما هان عليه اگعدِك فَـہ لا يظل بالِك أنَا بخير ومن تگعدين من النوم اتصلي بيه"

صفنه وحده بوجه الثانيه وهجران عيونهه يبست حتى مترمش، تقدمت عليه بخطوات ثقيله وگالت...

-هذا صوت عُثمان

-جوري: اي

-شلون؟

-جوري: دازهه من السته الصبح

-شنو؟

-جوري: يعني ماراح علمود يتزوج!!!

-بَـس انتي گلتي...

صفنت بوجهها صدُك فيصل گلي عُثمان رجع للانبار ومن سألته ليش گلي هيچ..

-جوري: فيصل گالي والله

-شگال؟

-گتله خاف رجع علمود يتزوج بت خاله گال اي يجوز لان خاله كساب موصي عُثمان اذا يموت ياخذ بنته!

-يعني هذا اجتهاد من يمكم ان راح يتزوج!

-والله اني معليه هذا فيصل

-طلعي بره جوري

-هجران شبيچ اني معليه هذا....

-هجران: طلعييييي برررره فدووووه (طلعت جوري واني فوراً وگعت ؏ فراشي، احس حيلي انهد ورجليه ترجف، غمضت عيوني اريد اهدأ وبلكي تخمد نار گلبي بَـس ماكو احسهه مشعوله بيه ودتنزل لمعدتي..

ركضت للحمام الي بالغرفه تقيأت حسيت شويه ارتاحيت، رجعت ؏ فراشي واخذت الموبايل وعدت البصمه مرة وثنين وتلاثه، ردت اتأكد من نبرة صوته واسلوبه بالكلام خاف متوتر لو ضايج بَـس نفس صوته الخشن المميز ببحة خفيفه..

جريت نفس ونزلت دمعتي، اخخ لو صدُك راح يتزوج يمكن چان متت والله ولا يشوف وجهي بعد، مستحيل اعيد نفس غلطتي ويه بكر وادوس ؏ نفسي لخاطر رجال..

فتحت الواتس اب ودزيتله رساله، كتبت...

-💬عُثمان وينك ادگ عليك متجاوبني؟

طلع عندي بَـس صح واحد يعني ماعنده نت، دگيت عليه ويطلعلي الجهاز مغلق، رجع گلبي يلعب وانفاسي تتسارع..

قررت اتصل بـ عميد الدين اكيد عنده علم، اول ماتصلت جاوب...

-سلام عليكم شلونك سيد

-عميد: عليكم السلام هـلا علويه

-سيد عُثمان تدري بي وين؟

-عميد: اي طلع للانبار

-لعد ليش ميجاوب ؏ اتصالاتي ظل بالي عليه

-عميد: اخر مرة حچيت وياه گال موبايله خلص شحن جوز هذا السبب

-هااا هيچيي زين ليش رجع للانبار شو مگالي البارحة؟

-عميد: صار حريق چبير بمحلاتهم والنار اكلت كلشي وعثمان فلوسه وكل شي يحتاجه بالمحل فَـہ اتصلو بي الصبح حتى يجي ويتصرف بغراضه

-لعد ليش محچة لـ فيصل؟؟

-چا شون ما حچاله!

-والله ميدري بي رايح علمود حريق المحل

-عميد: اظن حتى ما يخوفه لو يلحگه هوه انه وگبل ساعه دزلي گالي طلعت مدهوش وماعرف شسوي

-هااا ماشي يله مع السلامة

سديت الخط وگعدت بالغرفه انتظر اتصال منه، مر الوقت وجوري تنگ براسي حتى اتغده بَـس والله مالي نفس شي ولعبانه روحي من روحي..

للعصر ودگ عليه جاوبته بلهفة،..

-عثمااان ويننك

-عُثمان: شلونِك هجران هستوني طبيت للبيت

-لييش رحت وعفتنيي

-حبيبتي صار حريق كبير وفلوسيي وكلشي بالمحل

-صدُك تحچي!!

-والحمزة هجراان تعب سنييين كلو كان رااح هيك برمشة عين

-اسم الله وهسة شنو مصارلهن شي؟

-لاا الف الحمد لله حاطهم بالقاصه وما متأثرات

-هجران: دخيلك ربي عبن فلوس حلال، زين ليش هيچي صار؟

-اللتماس كهربائي هوه سبب الحريق وجر للزگاگ كلو

-اووف عُثمان وانته شلونك طمني

-تعباان

-الله يساعدك شوف هسة انته ارتاح وارجع اتصل بيك بالليل

-ماشي

-الله وياك

سديت الخط وياه وطلعت اساعد جوري بالعشه بَـس نوعاً ما مرتاحة، ؏ الاقل دريت بي مراح يتزوج عليه..

-جوري: شلون صرتي حياتي

-احسن

-جوري: لچ تخبلتي لهدرجة تحبي!!

-اسكتي جوري

-اني الي مدا افهمه ليش متقبلين تعترفين بحبچ

-اسكتي جوري

-لا ماسكت كافي مصخت السالفه هجران الرجال تعب وانتي هم تعبتي عيشو حياة تستاهلوهه حبوا بعض وكونو سند لبعض!

هديت السچينه من ايدي وهمست..

-جوري استحي

-من شنوو تستحين!!

-لچ شلون احب حمايه شيگولون عليه!!

-لخاطر الله هوه رجلچ هسة هجراان لتخبلينيي

-ماعرف جوري استحي منه هوااي لتلوميني بَـس مادري احس بغرابه من اكون وياه

-جوري: بَـس مرتاحة!

-صح مرتاحة راحة عجيبه واحب ابقى واقضي وقتي وياه واتمنى ميسكت ويظل يحچيلي عن يومه وعن حياته بَـس الخجل الي عندي دمرني جوريه ماعرف شسوي مدا اگدر اتقربله ولا ابادله ولا أي شي كلما انام بصفه يخيلي بكر واحسه يضحك عليه ويگول هواي مصدگة نفسچ انتي منو يحبچ بت الچايچي

-استغفر الله هسة شلون تخليني احجي ؏ الرجال وهوه ميت

-جوريه ساعديني شسووي

-انسي بكر هجران انسي حياتچ العشتيهه وياه، بكر ما فادچ بشي بَـس اذاچ وخله شخصيتچ بالحظيظ!

-تعبت والله

-حقچ ومحد اله حق يحچي عليچ ولو شگد متحچيلنه ؏ حياتچ وياه يبقى اكو جانب مخفي بعلاقتكم ومتگدرين تحچيلنه

-اي واريد انسى كل لمسه كل همسه كل قُبله ينطينياهه بَـس بدافع اشباع غريزته بيه! جوري انتي عبالچ بكر صدُك يحب جواهر؟؟ لو چان يحبهه چان مو هوه خاطبهه وينام ويه اختهه

-شنوووو

-اييي اني شكيت بالموضوع بَـس چذبت روحي بَـس اعترف بلسانه قبل ليموت وگال يخوني ويه فردوس، حتى من چانت جواهر تگولي بكر چذاب ميحبهه وچانت عنده سوالف ثانيه من جوة الجوة طلعت هالسوالف فردوس وعنده علاقه وياهه!!

-جوري: هجراان اني مصدوومة ليش مگلتيلييي

-گلت الرجال مات وماريد اذكر جانبه السيء بَـس هسة اضطريت احچي لان لو ساكته انفجر والله

-سوده عليه حبيبتي، هسة هجور هذا الحچي ولى وراح وبكر الله يحاسبه ؏ كل شي سواه

هزيتلهه براسي وكملنه العشه واجه فيصل تعشينه سوه ورحت لغرفتي، نيمت زنوبه وانتظر اتصال عُثمان، تأخر الوقت وهوه ماكو ردت ادگ عليه بَـس اخاف نام ونسى يتصل بيه..

حطيت موبايلي يم راسي وتمددت ؏ الچربايه حتى خاف يدگ احس عليه، حسيت الصبح ساعه بـ 11 الظهر، گمزت من فراشي واخذت موبايلي اشوف الاشعارات اوووف هم دازلي رساله ساعه بالـ 2 بالليل وكاتب "گاعده؟" خربب هم محسيت هايي لييش هيچ..

دگيت عليه وره شويه جاوبني..

-هلااوو صبااح الخيير

-عُثمان: هـلا حبيبي ظهر الخير

-ههههه اي محسيت ونمت هواي

-بالعافيه

-شكراً، ايي انته شخبارك شو البارحة مادگيت عليه!!

-اي لان خالي تخربط واضطرينه ناخذو للمستشفى ورجعت متأخر ودزيتلِك رساله وعرفت نمتي

-ايي ماحسيت والله

-مو مشكله الصرگعانه شلونهه؟

-زينه گاعده تگمز ويه علاوي ومكيفه بي

-حبيبت ابوا

سمعت صوت يمه عرفته مشغوله..

-اكولك خاف مشغول روح كمل شغلك وبعدين نسولف

-ماشي مع السلامة

-الله وياك.. ديربالك ؏ نفسك عُثمان

-ان شالله

سديت الخط وطلعت اشوف زنوبه چانت بعدهه تلعب ، رحت لجوري چانت بالمطبخ بيدهه مريم وبالايد الثانيه تگلب گدر المرگة...

-جوري: هاي شنووو الضحكة تارسه وجهج اليوم اللهم صل على محمد وال محمد

-هههه جورييي جوزي منييي

-جوري: يبااوو صارت حمررة

-اششش اسكتي كافي اگولج ميته جوع اني

-جوري: بالـ 11:30 عينيي تردين شي خفيف تاكلي؟

-اي والله شو شهيتي مفتوحة اليوم

-ممممم مفتوحة ممممم

تغمز وتضحك، ضربتهه ؏ چتفهه خفيف وضحكت، گعدنه سوه نسولف وللظهر اجه فيصل تغدينه وراحو ينامون الظهر وزينب هم نامت، بقيت وحدي..

دگيت ؏ جواهر اشوف اخبارهه وصدمتني من گالت...

-هجران: جواااهر انتي حااامللل

-جواهر: اييي خربببب اييييي

-عزااا صدُك والله!! لعد مو حللتي من چنه بالانبااار!

-جواهر: اييي بَـس طلع خط واحد وهسه خطييين لچ هاي كلام صافيه صححح

-لا عليچ الله اسكتيي لتگولين هيچ گلبي رح يوگف

-جواهر: عزاا لچ مادري شسووي تعاركت ويه عميد الدين وتخبلت عليه

-يااا والرجال شعليه!!

-لچ اخذ ماانع شلوون احبل اوووف هوه هوه اكيد يسوي شي اني متأكدة

-ههههههه خرب عرضچ شيسوي يعني عود هاي انتي الدكتوره

-لچ تخبلت والله بناتي صغاار واني بالضييم واتفقت وياه بَـس نرجع هناك اتعيّن واشتغل وهوه وافق گوووة انوب هسة حامل لا والله هواي رح يخليني

-هجران: جواهر شنو السالفه يعني خلص حملتي هذا رزق من الله

-اني ماحچي ؏ حملي لان هذا ؏ گولتچ رزق بَـس عميد مكيييف اخخخ متأكدة اله ايد بالموضوع

-ههههههههه حموووت ههههههههههه

-كافي هجراان يعني والله شسوي هسه انيي

-متسوين شي انتظري تجيبين وبس ههههههه

-جواهر: شو دروحي اني صوچي دا اگولچ

-يله يله اسفه اگولج شنو مخططاتكم اليوم؟

-عساس اروح اشوف فردوس

-شعجب؟

-غير شهد العوبه موتتني تكول خنروحلهه لان مريضه

-ديلا روحيلهه هم اختچ هيه

-تجون انتي وجوريه ويانه؟

-هجران: لااا يبوو والله اذا اشوفهه يمكن ارفس ببطنهه

-هههه ديلا لعد باي عميد يصيحلي

-ماشي باي

سديت منهه وجوري طبت للصاله تفرك بعينهه..

-جوري: ها شو گاعده وحدچ؟

-انتظر الفرج

-ههههه تنتظرين عثماان

-هجران: لعد منو ليش ما اجه لسه!!

-يمكن عنده شغل عوفي عُثمان هسة جواهر وشهد ميطلعن اليوم شو ضايجة اني

-رح يرحن لفردوس وعزمنه نروح وياهن

-عاااا ورح ترحيييين

-لا طبعاً وانتي شبيچ هيچ متحمسه

-عليچ الله خلينه نرووح

-يااا شوف هاي الخبله وين نروحلهه اييع ماتحمل تلعب نفسي منهه اني

-جوري: هجران لخااطري اكو شغله ببالي اريد اتأكد منهه حبابه خلينه نرووح

-جوررري مااااا

-حبااابه

-اوووف جوري اووووف

-ديلا اني حَ بدل وانتي اتصلي بجواهر

ركضت لغرفتهه تبدل هاي شبيهه وشنو البالهه وهيه مو شاكة بـ فيصل يخونهه ويه فردوس شو رايحتلهه برجليهه..

بدلنه ملابسنه وانتظرنه التوأم يجن، نص ساعه ودگ هورن سلمان لان هوه الي رح ياخذهن..

طلعنه وبوجهنه لبيت اهل جواهر الي صار فارغ وبس فردوس بي، دگينه الباب وفتحلنه ابنهه يطلع عمره سبع سنين عرفته ابنهه لان كُلش يشبهلهه..

-جواهر: هلوو زيوني وين امك

-زين: جوة

طبينه جوة واستقبلتنه فردوس بـ تنوره توصل لنص الفخذ وكيمونه وفاتحة شعرهه الاشقر القصير...

-فردوس: ياا هلاا بخواتييي

حضنتهن وهنه من وره خشمهن يسلمن عليهه، گلتلنه تفضلو بالصاله، رحنه نگعد وراحت جابتلنه موطه من المطبخ وقدمتلنه..

اخذنه كلنه وهيه گعدت رجل ؏ رجل گبالنه..

-فردوس: هلاوو بيچن حبيبات گلبي نورتو البيت

-جوري تهمسلي: اگولج هاي مو عساس مريضه؟

-هجران: شمدريني

سكتنه احنه وبس شهد وجواهر يحچن وياهه وهيه تجاوب، ترخصت منهن ورحت للمطبخ اغسل لـ زنوبه وبأثناء اني هنا واندگت الباب، واضح هنا الباب الخلفي لان مو منا طبينه احنه..

اجت فردوس تفتحهه ومديت راسي اشوف منو يمكن واحد من زلمنه بَـس تفاجأت من جان رجال غريب وتقرب ؏ فردوس وهيه دفعته عنهه وماسمعلكم غير ضحكتهه الرنانه..

ماعرف شنو گلتله وهوه راح، من الصدمه ظليت ماده راسي وهيه لگفتني..

-فردوس: هذا ابو المي اجه ينطيني الفاتورة

-هاا

رجعت جوه واني تبسمرت بمكاني ابو الميي وهيه تدلع عليه وهوه تقدم عليهه راد يبوسهه!! نفضت راسي من الافكار ورجعت للصاله چانن لسه گاعدات وبنات جواهر يلوعن متعرف شبيهن..

-فردوس: يمكن جوعانات جواهر

-جواهر: قبل لنجي رضعتهن

-فردوس: روحي نزعيلهن اكيد احترن

هزت براسهه اي وراحت لوحده من الغرف..

-فردوس: اييي جوري شلونچ شو گطعتيني ومتجين بعد

-جوري: فيصل مشغول

-فردوس: هههههههههههههه مشغول اي مشغول

-جوري: ليش تضحكين؟

-فردوس: سلامتچ بيبي

گامت للغرفه ورجعت بيدهه شي يطلع دخان، حطتهه بحلگهه وسحبت نفس وطلع كله دخان من حلگهه..

-شهد: هاي شنو البيدچ؟

-فردوس: نرگيله الكترونيه

-شهد: يبوو فردوس مبطلتي تدخيين

-فردوس: بطلت بَـس هاي الكترونيه

تسحب منهن نفس وتزفر دخان، حسيت جوري مو طبيعيه وصارت تلوب، اخير شي نترت...

-جوري: هاي منيلچ النرگيله؟؟

-فردوس: ممممم يمكن اجتني هديه؟

-جوري: من منو؟؟

-فردوس: شخص احبه هواااي ويحبنيي

طفرت من مكانهه وجرت النرگيله منهه وصارت تگلب بيهه، فتحت عيونهه وعاطت...

-جوري: انتييي لييييش حقييييره

-فردوس بهدوء: تؤ تؤ تؤ عيب تعلين صوتچ وانتي ببيتي

-جوري: هاااي فيصل منطيهه الچ موووو

-فردوس: وشمعنه فيصل

-جوري: لان جايبيله نفسسسهه بالضبططط قبل اسبووع من دُبي ومحفور حرف الفاء عليهه شوفيييي

قربتهه عليه وفعلاً حرف الفاء محفور عليهه، رجعت عاطت...

-جوري: اختفتتت قبل يومييين ومن اسأله وينهه يگول انطيتهه لصااحبييي طلعتي انتيييي صاحبببه

-فردوس: يمكن صدفه

تحچي ومبتسمه بخبث، جوري صارت تعيط لدرجة شحط صوتهه...

-جوري: شنووو هالصدفففة العجيييبه ولچ ليييش مو دخلتچ بيتييي واكلتي ويانه وسولفنه وتعرفنه تالللي تبوگييين رجليييي

-هجران: جوري ؏ كيفچ يمعوده ؏ كيفچ

طلعت جواهر مهرولة من الغرفه واجت علينه فاتحة عيونهه..

-جوري: لااااء مو ؏ كيفيي وتدرين شنو فردوووس اني ماعندي شغل وياچ ماااريد انگس ايدددي بيچ شغلي كللله ويه فييصل والله اللعب بي لعبببب

طلعت من الصاله ورحت وراهه...

-جوووري وين رايحة وحدچ!!

عاطت بوجهي..

-لجهنممم الحمررررة

-هجران: تعاالي نتصل ؏ عميد الدين لو سلمان يجون علينه

-جوري: ما ابقى ولا دقيييقه هنا هجرااان تردين تجين ويايه لو اطلع وحدييي

-لچ عُثمان ميقبل اروح وحددي اني اعرففه حبابه لتسويلي مشاكل

-جوري: لعد ابقي هنا اني اخذ جهالي واروح

-لااا تخبلتي تطلعين وحدچ ثواني هسة اجي بَـس اجيب زينب

ركضت جوة چانن جواهر وفردوس وشهد يحچن ومبينه السالفه حاميه لان جواهر معصبه...

-جواهر: شنو هجران وين رايحة؟

-هجران: ويه جوري يله باي

-جواهر: ديري بالچ بالطرييق (طلعت بدون متجاوبني، رجعت اباوع لـ فردوس وعطت...

-لچ شوووكت تتربين انتييييي

-فردوس: انچبييي جواهر مو اني اليگولولي شوكت تتربين

-شهد: لعد منووو حراام عليچ فردووس الزلم تارسه الدنياا ماحلالچ اله فيصل!!

-فردوس: اششش معليچن انتن رح اطلب اكل تردن؟

-جواهر: شوووف هاااي فردووووس جاوبيييينييي ليييش سويتي علاقة ويه فيصل لييييش

-فردوس: ماااسوينه ماااسوينه شييي

-شهد: لعد ليش مدافعتي عن نفسچ وگلتي ماكو شي بينچ وبينه

-فردوس: اني مگلت ماكو شي بيني وبينه اني گلت مسوينه شي سوه!!

-جواهر: يعنييي تردين تقنعينييي ما نااام وياااچ!!

-فردوس: لااا ابددد

-شهد: لتكذبيين

-فردوس: وغلاوة ولدي اصلاً فيصل ماعرض عليه هيچ مشرووع

-جواهر: شمعنه؟؟

-فردوس: لان ميعرف اني شنووو عباله نفسچن بنيه شريفه وحاربتهه الدنيا وتطلگت من زوجهه وهوه وعدني يتزوجني واعيش وياه عيشه حلووة

-ومرتتته!!!!

-معليه بيهه كلمن ببيت هوه گال رح يعوضني كلشي خسرته!!

-جواهر: وانتييي صدگتييي

-فردوس: وليش لعدد فيصل خووش رجاال واني مراح أأذي جووري لان يريد يتزوجني بالسرر

-شهد: ولليش تقبليين

-فردوس: لانييي وحيييده الكل عايفنييي گاعده بين اربع حياطين واتصفنن!! محد يدخل لهلبيت غير الگو*** من يردون شي منييي وشفت الراحة والاستقرار ويه فيصلل اريدد اتغير واعيش حالي حالچن عندي بيت وجهاال واسرة متكامله!!

-جواهر: ؏ حساب بنيه فقيرة مثل جوري!

-فردوس: شسوي جواهرر فيصل الوحيد الي ميباوعلي بتك عين ويگول عني گحـ** يحبنيي ومدللني وممقصر ويه مرته! ترا هوه مو اول رجال يتزوج ثنين ؏ كيفچن وياايه

-شهد: بَـس لييش تهدمين بيت كاامل علمود رغباتچ فردووس شبيچ انتي!! ترا فيصل ماخذچ بَـس علمود جماالچ ويتونس وياچ

-فردوس: لااا مو صحيح چان بادر بشي بالايام الفاتت

-جواهر: لو يمكن ينتظر الوقت المناسب حتى يطلبهه منچ!! لو يحبچ صدُك مياخذچ بالسر عبالك عيبه!!

-فردوس: اششش اشششش معليچن انتن

-جواهر: فردوووس اذا تردين تتغيرين لتتغيرين لخاطر احدد تغيري لخاطر نفسچ!! وترا مو الرجال الي يغيرچ هم نفس الشي اذا هملچ ترحين تخونين بي وتنعاد سالفه طلال!!

-فردوس: لا ماخونه لان احبه

-جواهر: وتحبين طلال هم وخنتي!!

-فردوس: ماااعندي احد بنااات ليش متفهمون عليييه

-جواهر: افتهم عليچ بَـس لتزوجين بَـس لان تردين تمشين بحياتچ وتخلفين وتردين ونيس وياچ!! اختاري سَند الچ ولجهالچ سَند يبقى وياچ لكبرتچ وتظلون ايد بأيد محد يعيّر الثاني بأغلاطه ولا بمستوى تفكيره اخذي رجال تنتچين عليه ومن توگعين يشيلچ ومن تنجحين يفرحلچ ويشجعچ مو تاخذين واحد بَـس يريدچ بصفه بالليل!!!

-فردوس: انتي شنوو ؏ گلبچ كل هالصفاات موجوده بعميد الدين مرتاااحة وراسچ باارد يحبچ ويدللچ وميخونچ ولا يباوع لغيرررچ

-جواهر: لان اختاريت صح ماختاريت رجال بَـس حتى اتزوج واخلص من العنوسه ومن حچي النااس

-شهد: فردوس احنه نريدلچ الزين مو عبالچ احنه محاربيچ

صفنت بوجوهنه ولأول مرة بحياتي اشوف فردوس تبچي، گعدت ؏ القنفه وظمت وجهها بين ايديهه وتنوح..

-جواهر: انتي اختنه ومن دمنه ولحمنه ولو شنو سويتي بينه رح نظل نحبچ وندعمچ ونكون سوه بَـس يا عيني عوفي سوالف الدعارة والله ميفيدوچ ذوله بَـس ياخذون من عافيتچ ويتونسون براسچ

-فردوس: تعبت اني

-شهد: ندري والله وحقچ علينه احنه كل وحده ملتهية برجلهه وحياتهه وامي وحلاوة كذلك عافونه ونسونه

-فردوس: بنات اني احب فيصل

-شهد: لا انتي متحبي!! لو چنتي تحبي چان غرتي من جوري وتشوفين تعامله شلونه وياهه وشوفي تعامله وياچ!! كله بالسر والختلات

-فردوس: يخاف منهه

-جواهر: لا حُبي هذا يحبهه ويخاف لا يخسرهه

-فردوس: گلي رح نتزوج هالايام

-شهد: صارله شگد من گايلچ هالحچي؟

سكتت ونزلت راسهه..

-فردوس: من يوم تطلگت من طلال

-جواهر: تفضلي وصلچ الجواب

-فردوس: ليش يضحك عليه؟ شنو غايته؟؟

-شهد: حبيبي لو جوري تگوله يتركچ بنفس الثانيه يعوفچ! جوري شخصيتهه قويه وفيصل يعشقهه ومستحيل يتنازل عنهه!!

الهدوء احتل المكان، اتفرقنه كلمن بمكان واني اتصلت بـ عميد الدين يجيني لان البنات دمرني بالبچي وبعد ماتحمل شي اما شهد بقت يم فردوس وگالت بالليل يجيهه سلمان..

**

"هجران"
رجعنه للبيت وجوري تلوب يا رايحة يا رادة، اتصلت بـ امي وگالت بعدلهم اسبوع ويرجعون للعراق..

حاولت اهدأ جوري بَـس ماكو احسهه كُتله نار وتمشي، لليل واجه فيصل سلم عليهه وهيه جاوبته بوجه ثگيل ماعرف ليش مافتحت الموضوع وياه..

عفتهم ورحت للغرفه اللعب ويه زنوبه لان خبصتني تريدني اللعب وياهه مكعبات، صار وقت نومتهه ونيمتهه وگابلت موبايلي وگعدت انتظر عُثمان يدگ عليه..

جزعت وهوه ماكو، قررت اني اتصل بي وره كم دگة وشال الموبايل..

-الوو

-عُثمان وينك شنو هاي شو مادگيت عليه

-عُثمان: عذريني والله وصدگيني انتو ببالي بَـس من الصبح اشتغل هسه ياله طبيت للبيت

-الله يساعدك زين شوكت ترجع؟

-بعد كم يوم لان عيب اعوفهم بهيك حاله

-واني؟

-شبيكي انتي؟

-اني ابقى هنا؟

-لا رجعي ويه عميد الدين للناصريه وانا كم يوم واجي

-مو تتأخر عفيه لان كُلش ضايجة

-خير؟؟

-لا هيچ ماكو شي بَـس ماحس بأستقرار

-؏ طاري الاستقرار هجراني عندي موضوع وياكي

-گول

-رح اشتري بيت

-وين بالانبار؟

-لا لا بالناصريه تا من ارجع نستقر بي

-وحدنه؟؟

-عجل منو تردين يجي ويانه؟

-هااا لاا مو هيچ بَـس شلون اجه ؏ بالك هيچ موضوع؟

-علساس مفاجئه ردتهه بَـس تخربط كلشي، أنَا قبل لا نجي للانبار شايفو للبيت وعاجبني كثير وگلت من نرجع نشوفو سوا واذا حبيتي نشتري لان صراحة أنَا ما مرتاح عايش ببيت عميد الدين

-هم صدُك خطيه بيته صاير ملجأ

-اي وبيني وبينِك أنَا وابويه بمكان واحد ما نرهم

-اففف لشوكت تظلون هيچ!!

-انسي الموضوع جزعت أنَا

-ماشي زين منيلك مبلغ حتى تشتري بيت؟

-بعت بيتي الي هينا صارلي كم شهر وعندي كم فلس احطهم فوگاه

-هااا وزين هسة من ترجع نشوف البيت؟

-لا انتي دحگيلو وحدِك لان أنَا رايحلو وعاجبني بقيتي انتي، فَـہ نختصر الموضوع واخوي احمد ياخذِك واذا عجبِك نتوكل

-ماشي لعد هذا هوه

-عُثمان: اتفقنه؟

-ايي

-عجل تصبحين ؏ خير لان رح امووت من التعب

-اسم الله وانته من اهله

فرحت وخفت بنفس الوقت، مشاعر متلخبطه دا احس بيهه تجاهه، نمت واني افكر بالموضوع واخطط شنو اسوي بالبيت الجديد..

ثاني يوم طلعنه كلنه للناصريه وجوري بعدهه مبين ضايجة وفيصل عجز وهوه يسألهه وتجاوبه بـ "ماكو شي" وصلنه للبيت واستقبلونه سلام وترحيب عبالك صارلنه دهر بعيدين عنهم..

تفرقنه كلمن بمكانه ولليل نزلت اتعشى هالمرة ما بادرت واسوي العشه شو مابيه حيل وكُلش تعبت بالطريق وهمزين عميد الدين جاب من بره كباب..

تعشينه سوه وسوالف وضحك غزاله ورهف ينعش البيت واصوات الجهال يلعبون يرد الروح..

تأخر الوقت واخذت زنوبه حتى انيمهه وبيبي عطيه صاحتلي..

-حجية عطيه: تعاي سلبوحة

-نعم بيبي

-تعالي حبوبه عندي سالفه وياچ

رحت وراهه وگعدت بغرفتهه وهيه راحت للكنتور طلعت منه علاگه وبيهه فد شي يخرخش، مدتهه الي وبچت..

-بيبي شبيچ تبچين حبيبتي؟؟

-حجية عطيه: تعاي حبوبه احبنچ

بوستني وحضنتني لصدرهه، وحچت بصوت ناصي...

-حبوبه شكثر شايفه بنيات وشكثر مارات عليّ بَـس مثل حنيتچ وطيبت گلبچ ماشفت، بچر الله يرحمه چان اثول وعاميه عيونه بنيات الحرام وما يعاين ؏ الجوهرة البحده

-بيبي خلص الله يرحمه

-اي حبوبه الله يرحمه ويغفرله وهسّ اريدچ تاخذين هاي وترحين تبدلين الدشاشه السوده اللابستهه

طلعت من العلاگة دشداشه بصلي ملفوفه بعلاگة هم، طلعتهه وقدمتهه الي..

-حجية عطيه: انه ادري بيچ لابسه اسود لخاطرنه واحنه نريدچ تنزعي وتعيشين حياتچ ويه زلمتچ

تنهدت ورجعت گالت...

-حجية عطيه: حبوبه عُثمان ذهب صافي من صغره چنه نگول يهنيالهه التاخذه وتصير من نصيبه ؏ الگلب الشايله، زلمه ينشد بي الظهر يخاف الله ويهابه

-ادري بي بيبي من قبل لا يتوفى بكر اني اعرفه

-چا شمالچ وياه ماترضين يتگربلچ؟

-شنوو؟؟

فتحت عيوني مصدومة هاي شمعرفهه؟؟

-حجية عطيه: حبوبه لا تخافين موش هوه الحچالي بَـس مبينه علاقتكم وشلون تحاچون بعض وهسّ تأكدت من صفنتي بوجهي يمسلوعه

سكتت ونزلت راسي وهيه كملت...

-بنيتي انتي زينه وهوه زين شمالكم ما تعيشون حالكم حال الوادم وتخلفولنه فريخ تفرحونه بي، انسي الجرالچ گبل وعيشي من جديد وياه انه متأكدة يحطچ ببطن عينه چا هذا عثيمن مو ياهو الچان

-بيبي هوه ممتقربلي وحاطني ببطن عينه ويخاف عليه ويحبني ومدللني

-چا شنهي شمنتظرة بعد؟ يله حبوبه بعد وصلتلچ الفكرة وگومي نزعي الاسود يله يچبدي

بوستهه واخذت الدشداشه وصعدت، غزاله گلتلي تريد زنوبه تنام يمهن هيه ورهف، رحت سبحت وبدلت دشداشتي لبست مال بيبي عطيه، صح بيهه كُبر عليه بَـس فرحت ان طلعت من عدهه هيه ونزعتني..

تمددت ؏ الچربايه وافكر بكلامهه، وفكرة تجيبني وفكرة توديني، غفيت واني افكر وگعدت الصبح ؏ مكالمة عُثمان اتصل بيه حتى اروح اشوف البيت ويه احمد..

اجه عليه واجت ويايه جوري حتى تشوفه وهم ردتهه تغير جو، طبيت للبيت چان شُبه موثث وچبير ونفه، سألت احمد عن مساحته گلي 200 متر..

طبيت افتر بي والضحكة شاگه حلگي، اخيراً رح يصير عندي بيت واعيش حالي حال البنات..

فريت البيت 3 مرات من الفرحة، كُلش عجبني والشمس تجنن طابه بكل البيت وتحسون بجو عائلي مُريح..

طلعت من البيت وفوراً اتصلت بـ عُثمان بَـس مجاوب وتركته براحته ادري بي من يشتغل يفقد وحتى موبايل مينتبه عليه..

رجعت للبيت وحچيت للبنات ؏ البيت فرحانه وهنه هوواي فرحنلي، لليل ورجع عُثمان دگ عليه كاميرا، چان مجرد من قميصه ومبين متمدد وشعره مخربط ؏ وجهه..

-عُثمان: ول هاي شَنوو

-هههههه متغيره صحح

-كثيير يولييي الاسود ظالمك

-هاي بيبي عطيه نزعتني البارحة

-بالعافيه يا روحي

-تسلم

-هاا بشري حبيتي البيت؟؟

-كُلش كُلش كُلش حلوو عُثمان يجننن

-عُثمان: هههه يعني نتوكل؟؟

-اييي ان شالله عُثمان اني كُلش فرحانه والله لو تشوف الابتسامة شاكه حلگي ههههه

-الله يطول بعمري تا ارسم ؏ وجهِك هالبسمه

-امين

-يله انتي اذا تحبين تبدين تأثثين احمد ياخذِك واختاري كلشي

-وانته خاف ميعجبك ذوقي؟

-شلون مايعجبني يولي كلشي منِك حلو

-ماشي لعد

-أنَا اسبوع الجاي ارجع تا اخلص كلشي هينا وانتقل بشكل رسمي للناصريه

-ماشي يعني بعد ميحتاج تروح للانبار؟

-يبقى عندي كم شغله لتنسين أنَا..

قطع كلامه صوت طرق الباب، جاوبهم...

-عُثمان: منوو

اجه صوت مخنوگ ماگدرت اميزه بَـس عرفتهه هاديه من گال...

-عُثمان: لا هاديه شكراً ماشتهي

رجعت حچت وياه وهوه گالي..

-هجران ثواني هسه ارجعلِك

عاف الموبايل ؏ الفراش وگام مبين فتح الباب، احترررگت شلوون يفتح الباااب وهوه نازع ملابسسسه، وحديثهم واضح مبين گعد تگوله اروح اصبلك وماعرف شنوو..

اوووف لو يمي اتمنى اگطعهه شنو هاللزگة هااي شبيهه!! تأخر وهوه يحچي وياهه وكلمه اسمعهه وكلمه لا، شعوط گلبي وبعد ماتحملت وطبگت الخط من القهر، ذبيت موبايلي وحطيت راسي ؏ المخده واحس وجهي مشتعل ناار من العصبيه..

تندمت لان طبگت الخط بوجهه وغميت روحي الف مرة اهمداايه هاي شبيه تخبلتت انوب خاف يظل يحچي وياهه من يشوفني مموجوده..

صرت الوب بمكاني والنوم جفاني واني افكر هسة يرجع يدگ عليه، تالي ماكو لا دگ ولا دز رساله..

ركضت لغرفت رهف وغزاله بلكي انسى ويتغير مزاجي ولگيتهن نايمات اوووف هجران شگد غبيييه..

رجعت لغرفتي وهالليله ما زارني النوم، صارت فكرة تجيني وفكرة توديني..

ثاني يوم اجه احمد وبوجهنه طلعنه للسوگ، ارتاحيت من اتصل بيه عُثمان وگال ماتصل بيه عباله نمت واني هم غلست وگتله اي نمت..

چنت اشتري واني متحمسه وفرحانه وعثمان اصرّ عليه اشتري كل اليعجبني، وگالي اختاري غرفة نوم جديده وغرفة لـ زنوبه وشنو بعد يعجبني..

الگاع مسايعتني من الفرحة وهم رجعت للبيت وراويت البنات شنو اشتريت وثاني يوم وثالث يوم ورابع وخامس گظيت اسبوع ضبط واني اشتري وتقريباً خلصت كل شي واغلب الاشياء اختاريتهن ؏ ذوقي حبيت اعتمد ؏ روحي وچنت افرح من ارجع للبيت واراويهن لـ جواهر وجوري يگولن كُلش حلوات..

اشتريت غراض المطبخ وعجبني كوابه مال كبلات، صايرات نفس النوعيه وعليهن گلوب هم اشتريت منهن واشتريت برانص للحمام الي واله مرهمات نفس اللون والفصال..

چنت اجهز واحس روحي عروسه وتقريباً كلشي اشاركه ويه عُثمان وماعنده تعليق غير "عاش ذوقِك حبيبتي" چان يعجبه كلشي اشتري وهالشي فرحني اكثر..

رجعت للبيت اني وجواهر وغزاله ورهف ورتبناه ونظفناه لان اول ما يرجع عُثمان نجيب باقي الاثاث وننتقل مباشرةً ومتحمسه اكثر لان لو اليوم بالليل يجي لو باچر..

تعبت كُلش واني انظف بَـس ميخالف هالتعب ميروح خالي بلاش هالتعب رح يجيب راحتي واستقراري..

رجعنه احمد لبيت عميد الدين ونزلنه وگبل توجهنه للبيت، طبيت للصاله وانفتحن عيوني ؏ وسعهن، مستحيل انسى المنظر الشفته گبال عيني ولا حرگت گلبي وشوطت روحي واني اشوف الگدامي...

يتبع🍀...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات شباباتي🥳🦋.

بنوتات اريدكم تدعمون شهررات التميمي مصممه اغلقه وكاتبه هذا حسابهه Shahrazat_altimimi