شفاه مخملية الفصل السادس وخمسون 56 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية" 💋

بقلم: زهراء السلامي.

#وتلاگينه اعله نيتنه
وچنه شما تقربنه يزيد المستحه العدنه
ورغم هذا
وتشابگنه...

♛ ♛ ♛ ♛ ♛ ♛ ♛ ♛ ♛ ♛

گاعده ؏ الكرسي وبحضني القرآن ورجليه بالماي، اسمع صوت الميمون يعقد ويسألني اذا ارضى بـ زيد يكون رجلي واكمل حياتي وياه..

جسمي يختظ واطرافي ترعش، جريت نفس عميق وحچيت بصوت شُبه الهامس...

-رهف: نعم انتَ وكيلي

انطيت الوكاله وسمعت عمه دلال هلهلت ؏ كيف وحيدهه، سكتت بساع من حبوبه عطيه خزرتهه..

اجت تبوسني وتباركلي وانه ابادلهه، گوموني ابدل واللبس البدله وجوهرة ساعدتني بكلشي، مثل هيچ يوم هواي بنيات يحسن باليتُم بَـس انه ماحسيت ابد..

جوهرة ماخلتني وبيبي انتصار وياي واشوف الكل فرحانلي بَـس بالسكته حتى ما يأذون مشاعر بيبي انتصار..

نزلت الدرج وكاظه ايدين غزاله، گعدوني ؏ الكوشه وگالو تحظري رح يطب زيد، گلبي صار يدگ يدگ احسنه دنبگ، ريجي نشف وگوة ابلع چن لگمة واگفه بنص زردومي..

صاحت عمه دلال بحماس...

-يا نساويين تغطن راح يطب زيد

لبسن عبايات وحجاب وانه ظميت چتافي وصدري بالشال، گووة لبسته عمه دلال ماترضى تگول انه حلاله بَـس لسه استحي منه وماگدر اتشلتح جدامه..

طب عليّ وعمه دلال اشتغلت بالهلاهل، ماهتمت لأي احد وظلت ترگص وتهوس وحيدهه، گابلنهه فتوح ونرجس ولا چن متعاركه وياهن انه بَـس ذني مايهتمن وماعدهن كرامه المهم يرگصن ويتونسن...

لبسني الذهب واعاينله يكت عرگ، يمسح بوجهه وما ملحگ، من لگفني اعاينله ضحك وتقرب عليّ وهمس...

-زيد: شلونچ

نصيت راسي وهمست...

-رهف: زينه

هز راسه وطبع قُبله ؏ گصتي تلتهه قُبله ؏ خدودي ثنينهن، وهمه يهوسوله حتى يكررهه وراد بعد وانه دفعته ؏ كيف وهمست..

-بسّك زيد

ضحك وابتعد عني، صاحو ابوي يريد يجيني وانه سمعت هيچ لو صرت اتراعد وعيوني انملت دموع، تقدمت عليّ جواهر وهمست...

-جواهر: رهوفه شبيچ حياتي؟؟

-رهف: استحيي جوهرة فدوه لا يشوفني هيچ

-جواهر: حُبي هوه ابوچ هسة شكوو

گوة قنعوني وظليت واگفه، طب علينه بهيبته وطوله الفارع چن هوه العريس، بَـس عاينتله ضحكت وهوه رفع تك حاجب مستغرب..

اتدنه زيد عني واجه ابوي وگف بحدي، باس راسي وكظ ايدي حطهه بين ايده، احسّن برجفة ايده وكل شوي يبلع بريچة وعيونه تطاير منا ومنا..

استمرن النسوان يهوسن وفرحانات بَـس احسّن ابوي مو طبيعي وچنه زعلان؟

صاح بـ بيبي انتصار تجيبله شغله، راحت شويه وردت شايله عُلبه سوده چبيره، اخذهه وفتحه جدامي..

ضحكت خفيف وانه اشوفن الذهب نفس ذهب غزاله الي هدالهيا بعرسهه، بَـس غير موديل..

لبسني الذهب وويه كل قطعه يصلي ؏ محمد ويقره المعوذات، العبرة خنگتني والدمعه بطارف عيني شويه وتطيح..

صفن بوجهي وانه اعاينله، حلگه متقوس وعيونه ذبلانه، كل هذا بَـس لان راح اتزوج؟ هاي عود بعدني بَـس مهر چا لو تزوجت شيسوي؟

حضنته من خصره وحطيت راسي ؏ صدره، دموعي ملت عيوني وبعد ماگدر اكظ رويحتي، لوما جوهرة جارتني عنه چان صارت مناحه..

-جواهر: يلله حبيبي خلونه ناخذ صور

كظت ايدي اليسره وايد ابوي اليمنه، وگفت بيناتنه وصارو يگصولنه صور، جابو زمرد وياقوت واخذت وياهن واجو الباقين وكلنه اخذنه صوره جماعيه..

جرني ابوي عليه وحضني نص حضنه وراد صور النه وحيدنه، رفعت راسي اعاينله وهمست...

-باباتي زعلان؟

-عميد الدين: لا يرويحتي

-چا شمالك عيونك الحلوة ذبلانه

ضحك خفيف بَـس ضحكة مليانه حسرات، نزل عيونه يعاينلي وهمس...

-عميد الدين: لان ضوه داري راح يروح من عندي وتظلم داري وگليبي وياه

-حشه ماعوفك وعلي نايمه ؏ افادك

ضحك وحضني لصدره اكثر، رديت گلت...

-رهف: لو الدنيا كلهه تريد تفرگنه انه ماعوفك

صارت عندي غصه قويه وگوة حچيت...

-رهف: انتي ابوي واخوي وحبيبي ورفعة راسي وانه حبيبتك وبنيتك وتعب عمرك، انه نويت كل عمري افدي لخاطر نظل سوه ومانفترگ احبك باباتي وانه راح اظل اميرة دارك حتى لو جبت عشر بنات وراي

-هههه چا وزمرد وياقوت لا يزعلن علينه

-رهف: هههه بعدهن زعلطيط ذني وين يفتهمن

ضحك ؏ كيف وباس راسي، گطعت المشاعر الجياشه الصارت هنا جواهر من اجت وكظت ابوي وحيده واشرت للمصوره تصورهم، ضحكنه كلنه ؏ حركاتهه چنهه عروس وشلون تذب روحهه عليه وهوه بَـس يضحك..

-جواهر: عميدييي شبييك الزمني عددل شو عبالك گوة عليك

-عميد بهمس: جوهرة بعدين

-جواهر: مااا اريد هسة الكوشه حلوة خلينه نستغلهه

ابوي يكت عرگ خجلان وهاي الصلفه ماتهتم ههه، بَـس حقهه لا سوت عرس مثل البنات ولا شي، گصو چم صورة وابوي يخزر بالمصوره كلما تگله ؏ حركة ويأشر براسه لا، مايرضى يسوي شي جدامنه..

طلع هوه وزيد وظلينه البنيات وحيدنه، رگص وردح واغاني وحبوبه عطيه بَـس تصيح طفوو وعيب وماعرف شنهي..

-غزاله: حبوبه شمالچ خلييينه نفررح

-حجية عطيه: جيييرة بگصتچ معزايه ولا چن زلمتهه مات هذاك اليوم

-غزاله: استغفففر الله الله يرحمه ووين هذاك اليوم صارله شگددد

غمتهه حبوبه وغزاله گلبت وجهها ماعاجبهه، اجنلي جواهر وجوري وشهد وهجران كلنه نرگص وفرحانات..

للمغرب وصاحو طفو حرام نفتح اغاني ويه الوذان، طفينه وصعدت فوگ ابدل بحجرة غزاله القديمه..

گعدت شهد بالگاع وبطنهه شكبرهه بحضنهه وجرت علبه چبيره وصارت تدگ عليهه والبنيات يغنن "بس ميوو"..

من وصلن جوري وهجران لمقطع بنات كربلا صارن يحچن بصوت عالي كلللش...

-جوري وهجران: احننه بنااات كربلا اكلنه كييك ونستتله بسس ميووو

وانوب جواهر وشهد تخبلن بمقطع بنات لغداد.. والضحك والوناسه مله المكان..

تعشينه وكلمن راح لبيته وبقينه وحيدنه، اتصل بيه زيد بالليل يريد يشوفني بَـس ماجازف برويحتي واروحن غير ابوي يطرني نصين..

ثاني يوم حضرنه جنطنه من الصبح والبيت مخبووص خبيصه، اليوم بـ 12 بالليل طيارتنه لأصفهان، ابوي حجزلنه كلنه حتى تتغير نفسيتنه بعد موتته بكر وعمو مرتضى، وگال نهدي زيارتنه الهم حتى يحصلون ثواب..

اهل الانبار جايين ويانه لان عدهم مراجعه طبيب لخالهم كساب هناك بأصفهان والعائله كلهه جايه ؏ الواهس..

رتبنه كلشي واجرنه سيارة وطلعنه لمطار النجف لان طيارتنه مناك، الطريق چان ممل بَـس اكو حماس بداخلنه وفرحانين..

وصلنه للمطار وسلمنه الجنط وختمنه جوازاتنه وركبنه الطيارة، ابوي وجوهرة گاعدين ؏ الكراسي الثلاثيه وزيد وعمه دلال همات..

عاينب لأبوي اشرلي حتى اگعد بحده وزيد هم اشرلي ؏ كيف حتى اجيلهم..

حرت ومادري وين انطي وجهي، ابوي عاط...

-عميد الدين: علوويه تعاي هيين

هزيتله براسي ورحت، ردت اگعد بصف جواهر وهيه گالت...

-جواهر: هااي شنو رهف شجابچ هنا؟؟

-عميد الدين: انه گلتلهه

-جواهر: عميد وبناتك وين احطهن؟؟؟

-عميد: بحضنه

-جواهر: ايي واحنه حجزنه مقعد كامل علمود نحطهن بحضنه!!

-عميد: چا رهوفه وين ترووح!!

اللتفتت جواهر تعاين لمكان فارغ، وحسيت بيهه تضحك بخبث وتباوعلي، گالت ببرود...

-جواهر: تروح تگعد يم عمه دلال

فتحت عيوني وضحكت خفيف، ابوي خزرني ورد خزرهه وگال..

-عميد: ماااكو تگعد هين بحدي

-جواهر: شلون وياك عميد الدين وزمرد وياقووت وين اوديهنن

-عميد: جيبيهن بحضني

-جواهر: مااكوو ما أأمن ؏ بناتيي روحي رهوفه گعدي يمهم روحي بيبي

-عميد: هووه بكييفچ!!!

يبووو اندهرنه اصواتهم علت وغيث الغثيث اندار علينه وحچه...

-غيث: خايبين شني شكو

-عميد: مايخصك ودور وجهك جدام

-جواهر: عميد اليوم لو اني لو عنادددك

-عميد: ماااتگعددد بحدددده

-جواهر: اييي ليييش مو خطييبهه وعمه دلال گاعده وياهم

-اششش جوهرة لا تحچين چلام زايد، تعالي بابه گعدي هين

هذا حچيهم كله ينترون بالهمسه بَـس حسيته عالي حتى الناس الي بصفنه عاينو علينه..

جواهر طفرت من مكانهه وگالت تروح تگعد بحد شهد اختهه، ابوي صار ناار ووجهه انصبغ احممر، نتر بغضب وگوة كاظ روحه..

-عميد الدين: شتردييين جوااهر شتردييين

جاوبته بلا مبالاة..

-جواهر: گتلك الاريده

-عميد: اله تردييلهنن كرسيي ولچ هنه هالطوولهنن

يأشر بچف ايده عود هنه بكبره..

-جواهر: اووّك خلص عميد ارتاح واني اخذهن واگعد يم شهد وسلمان

-استنتغفررر الله شنيي ترحيين هنااك استچنيي بمچاانچ!!

-ماگدر ممرتاحة

-ليييش

تباوعلي وغمزت بعينهه...

-جواهر: عنادك مدا اگدر اتحمله بالمناسبه

زفر بقوه وضرب فخذه خفيف، حك لحيته واندار يعاين لمچان عمه دلال وزيود، رد يباوعلي ونتر بهمس...

-عميد: روووحي گعدي هنااك بَـس من جهة عمتچ مو بنصهمم

هزيت راسي بالموافقه ورحت فرحانه، اندارت جواهر تعاينلي ضحكت وشمرتلهه بوسة بالهوى والحظ الفگر زيد شافني ونتر بيه...

-زيد: شنوو هااي المن گاعدده تبووسييين بنص الععالم

-رهف: اهووو زيد هاي لجواهر

-زيد: وشكوو تبوسين بيهه!!

-رهف: ماعليك هاي حركتنه

ظل يدردم ماعاجبه، ذوله شني شمالهم كلهم گالبين الوجه چن رايحين لـ عزه موش نسافر!!

**

-بنتي لتضوجين ابوچ

-زينب: ماما الليد ئلاوي

-عُثمان: من ننزل بابه مو هسة

-زينب: مليم هم الليد

-عُثمان: يُبا مريم وعلي من ننزل تشوفيهم حبيبي لا تتحركين يولي اهجبييي

-هجران: زينب اثبتي خلي يلبسچ الحزام

خبصته خبص بَـس تتحرك وتلوب، صايرهه روحهه معلگة بعلاوي وهاي جوريه ام لسان متگعد راحه، اللتفتت علينه لانهم گاعدين گدامنه بالضبط وكالت بغمزة...

-جوري: يمممه شبيهه چنتي مطنگررة ولچ هجراان شبيچ وياهه

-هجران: محد طلع عينهه غيرچ انداري شوو انداريي

رجعت اندارت وعثمان تقرب عليه وهمس...

-عُثمان: لا تحكون هيك گدام زنايب هجران تا لو كان مزح بَـس بعدهه صغيره

-ادري والله وهوه رح اگوللهه تبطل هالسالفه

هز براسه ورجع يحاچي زنوبه واني حطيت راسي ؏ الطبله الگبالي، راسي يدور واني تعبته اكثر من سهرت الليل كله افكر شلون بيه هنا..

اهل الانبار جايين واكيد هاديه حتشوف عُثمان واخاف يصير حچي لو يصير بخاله شي ويضطر يعقد عليهه، خصوصاً عُثمان ميعارض كلام خاله ابد..

بعد رحلة دامت ساعتين ونص وصلنه لأصفهان، رتبنه كلشي واستلمنه جنطنه وطلعنه من المطار..

اتصل ثامر بـ عُثمان وگاله حتى نروح نگعد بفندقهم، لزمت ذراع عُثمان وهمست...

-فدوه عُثمان خلينه نروح لغير فندق

-عُثمان: هجران الساعه عبرت الـ 3 الفجر وين نلگه بهالليل

هزيت راسي يأسانه، اني كيفت خلص من الانبار حتى بعد ميتشاوفون انوب هنا لحگونه!

اجرنه سيارات ووصلونه للفندق، اول مادخلنه صارو بوجهنه ثامر واسحاق، تسالمو وياهم سلام حار وخطيه طلعو حاجزيلنه غرف فَـہ بسرعه دخلنه بَـس عُثمان وعميد واحمد بقو وياهم بره..

نزعت زنوبه ونيمتهه حتى اخلص راسي رح ينفجر متنحسه وبس تونون وميعجبهه شي، اخيراً غفت واني رحت اسبح وفرشت اسناني وتمددت ؏ الچربايه انتظره..

تأخر والساعه عبرت الاربعه الفجر وهوه ماكو وفوگاهه ماعندي خط هنا ولا عندي رمز النت وظاله هيچ..

گمت اصلي ورجعت تمددت، هستوهه عيني مشكله دا اغفى وكالعاااده انفتحت الباب بكل همجية، ضحكت من شفته وهمست خاف زينب تسمع...

-انته متجوز

-عُثمان: ول انسسسى والله انسسسى

-هههه تعال نام متعبت

-عُثمان: اصلي وانام

راح للحمام توضه وطلع، فرش سجادته وصله وسوه تسبيحات، لم السجادة ورجعهه بالجنطة واجه تمدد بصفي..

نمت ؏ بطني وتقربت عليه وهوه متمدد ؏ ظهره ومغطي عيونه بذراعه..

-عثماااان

-ممم

-شنو چنت تسوي ويه ثامر؟

-عُثمان: كان يحاكيني ؏ علاج خالي

-هااا بسس؟؟

-ممم

-وبعد محچيتو بشي؟

-چؤؤ

-شبيك گوة تحچي؟ انته مزاعلني؟

رفع ايده عن عيونه وصفن عليه، حرك راسه وعگد حاجبه متسائل...

-عُثمان: مادري احنه زعلانين ؏ بعض؟

-لااء

-عُثمان: هاا مو اگول معقوله نسيت

-شنو قصددك يعني اذا چنه متزاعلين ونسيت واجيت تحاچيني من تتذكر رح ترجع زعلان؟؟

-طبعاً

-عُثمان هاي شبيييك

-يولي هسه احنه تزاعلنه!! خلص نامي

نهضت روحي ونمت ؏ صدره، جريته من شواربه ؏ كيف وهمست..

-والله انته زعلان

-اي زعلان

-عرفت ونبي شمسويه اني گول!

-مو منِك زعلان

-لعد؟

-؏ خالي كثير تعبانه وضعيتو

-الله يشافي

تنهد بعمق وهز راسه شلون المتحسف..

-عُثمان: ثامر يگول عنو موات وتا العمليه يمكن ماتفيدو

-لا اسم الله لتگولهه حبااب

-كلو بيد الله هجران

-صخام بوجهي اذا صدُك!!

رفع تك حاجب ونظرلي نظره واحد مستهزأ...

-عُثمان: والله ماكنت اعرف انِك تحبين خالي هيك

-هاااا لاا مو هيچ بَـس خطيه الله يطول بعمره ويظل خيمه ؏ راس ثامر وهاديه

حسيت بغصه من گلت اسمهه بَـس مثلت روحي طبيعيه..

-عُثمان: امين امين

-يله انته نام ولتظل تفكر زايد مو زين

-ماشي

-تصبح ؏ خير

-وانتي من اهلو

نمنه او نگول اني نمت هوه مادري بي نام لو لا، گعدت الصبح هوه مو بفراشه طفرت طفرره، ركضت للحمام وفتحت الباب بدون مادگه وطلع فارغ، نار واشتعلت بيه ماعرف شبيه صايره مخبله وانفعاليه زياده..

لبست حجابي شلون مچان وشلت زنوبه اخذتهه ويايه، خطيه چانت بعدهه نايمه وگعدت تفرك بعيونهه..

دگيت الباب ؏ غرفه جوري لان بصفي بالضبط، فتحتلي ومدت جزء من راسهه بَـس عيونهه طالعه من شافتني فتحت الباب ؏ وسعهه وطبيت..

-جوريه فيصل وين؟

-جوري: شمدريني

-هجران: شنو شمدرييچ لعد متسألين!!

-جوري: هجران دايخة والليل كله مانمت ومابيه حيل

-زين عندج رمز النت مال الفندق؟

-لا ماخذته

تأفأفت بقوه وطلعت وطبگت الباب، رجعت لغرفتي وزينب گعدتهه ؏ الچربايه وبس تصفن، ضحكت من شفت شكلهه الشعر منفوش وعيونهه منفخه..

-ماماتي تاكلين شي حبيبتي

-زينب: هااا

-هههه مامه اصحي شنو بعدچ نايمه؟؟

ضحكت خفيف وغطت حلگهه يممه مال گرط، بوستهه وعضعضتهه وطلعتلهه بسكت وحليب من جنطتهه وگعدت تآكُل، موتتني اله توكلني وياهه تجيب وتدحس بحلگي وتضحك..

كملت وغسلنه وبدلنه ملابسنه وگعدنه ننتظر عُثمان، ما تأخر شويه واجه، من شافني گاعده تفاجأ وگال..

-عُثمان: گاعدات بناتي

-هجران: دننتظرك تأخرت

-عُثمان: توقعتِك نايمه وگلت خليكي مرتاحة

-هجران: وين چنت؟

-بغرفه خالي

گمزت من مكاني وحچيت بسرعه...

-لييش شعندك هناك؟؟؟

-عُثمان: رحت اشوفو

-ايي لييش مأخذتني ويااك عثماان

-ميخالف حبيبتي من نرجع من المستشفى تشوفينو

گلبت وجهي وهوه راح للحمام، طلع مبدل ملابسه وراح يمشط وتعطر وكشخ ذيچ الكشخه، وگفت بصفه وگلت...

-المن هاي الكشخه كلهه؟

ضحك خفيف وهوه يمشط شواربه ؏ المرايه..

-عُثمان: ليش شايفتني مخربط بيوم؟

-لااء

-عجل خلص

ابتسم ونقر خشمي بأصبعه خفيف، راح لزنوبه شالهه يبوس بيهه وبدغدغهه وهيه تضحك..

-هجران: شنو رأيك نتريگ سوه؟

-وهوه هيك يله جاهزه تا نروح؟

-اي اي ثواني بَـس اعدل الشال

عدلته بسرعه بسرعه وهوه واگف منتظرني بالباب وبيده زينب، طلعنه سوه ومن وصلنه قريب المطعم لفيت ايدي ؏ ذراعه، باوعلي بطرف عينه وضحك مادري ليش ضحك وظلت ببالي السالفه..

مثل ماتوقعت من دخلنه للمطعم چانو الكل هناك وكلمن گاعد ويه عائلته ؏ طاوله وديتريگون، دورت بعيوني ؏ هاديه چانت ملتهية تحچي ويه امهه ومانتبهت علينه..

اخذت الاريده من البوفيه وعثمان هم اخذ واخذت لزنايب ورحنه نريد نگعد وثامر اشر لـ عُثمان حتى نگعد يمهم..

هستوني جاي اگوله نگعد وحدنه وهوه گال بصوت عالي..

-عُثمان: لا احنه نگعد هينا

يمممماايي فد فرحتتت ان طلعت منه حتى نگعد وحدنه، گعدنه واحد گبال الثاني وزينب گعدتهه بصفي ووكلتهه..

كل شويه عيني تروح لـ هاديه واشوفهه تباوع لـ عُثمان مادري تباوعلنه المهم انزعجت كُلش وتمنيت احط اصابعي بعينهه..

كملت زنوبه ريوگهه وموتتني تريد تگعد ويه جوري وجهالهه، عاد جوري صاحتلهه ووديتهه يمهم..

رجعت لطاولتنه عُثمان چان حاط ايده ؏ الميز وديآكُل بكل هدوء وممنتبه، جريت چف ايده وشابكت اصابعنه سوه، رفع راسه وگال مستغرب...

-ها؟

-هجران: شنو؟

-عُثمان: محتاجة شي؟

-اي

-شَنو؟

تقربت ؏ الميز كُلش وهمست بأبتسامه...

-اريدك

عگد حاجبه وركز عيونه عليه، اكيد انصدم من الموضوع لان هاي اول مرة احچي وياه بهالطريقه بَـس هوه اني تخبلت وعقل ماظل براسي وبعد ماعرف منين دتطلع هالسوالف..

-هجران: ههه شبيك

-عُثمان: ولاشي

-ممم زين وين حنروح اليوم؟

-أنَا اروح ويه خالي للمستشفى

ضغطت ؏ ايده وجعصت اصابعه، حچيت بضوجة...

-لييييش

-شَنو ليش عجل اعوفو وحدو؟؟

-هجران: مو ثامر واسحاق هناا

-عُثمان: تا لو هجران عيب اعوفو هيك

-هجران: هففف وانيي

-بَـس اليوم وعد

-عثمااان وانيييي

-هجراني حبيبي أنَا ماعرفتك انانيه هيك

-مو انانيه بَـس اريد نظل سوه ومنفترق ابد

-بَـس اليوم

-اجي وياك

-چؤ شيجيبِك للمستشفى!

-اريد اجي وياك فدووه

-لااء

-لييش

-لانو

-لان شنوو

-كافي هجران كافي

-اني شسويت حتى كااافي

-لا تلحين اكون قربانِك

-اي هوه بَـس هذا حاضرين بي انته واخووك هجراان لتلحيين وهجراان اضووج من الملحة

ضغط ؏ اصابعي بقوه وخزرني، هم صوتي چان عالي وهم ذكرت بكر گدامه وهوه يتخبببيبل من هالموضوع، نتر بين سنونه...

-عُثمان: أنَا رح اسوي روحي ماسمعت شي تا مانسوي مشكله هينا

-اسفه عُثمان ماقصد ماعرف شلون گلت.....

-اشششش

هد ايدي وگام واني ظليت اللوم بروحي، هاي شبيه اكو وحده تحچي هيچ!! رجعنه للغرفه وهوه كلمه ماگال بَـس حچه ويه زنايب وافتهمت رح يطلعون هسة للمستشفى..

للظهر واني گاعده آكُل روحي بروحي واندگت الباب عليه، گمت افتحهه چانت جوري..

-جوري: هجور هسه رح نطلع احنه لحديقه الزهور يله بدلي

-ماجي اني

-جوري: لييش؟؟

-مابيه حيل

-شنو دايخة؟؟

-اي

-نساتچ صعبه هالمرة؟

-هجران: چنهه اي

طبت للغرفه ويايه واني رحت تمددت ؏ الچربايه، وگفت فوگ راسي وگالت...

-جوري: اتصلي بـ عُثمان بلكي يجي يظل وياچ

-لا ماريد هوه ويه خاله

-جوري: زين ؏ الاقل گوليله!!

-ماريد يظل باله

-جوري: شنو يظل باله بعد انتي حامل وهالشي طبيعيي

-ميدري بيه حامل

-ماحچيتيله لييش؟؟

انتفضت من مكاني وصحت...

-لاان چنت مخططه اسووي اجوااء هنااا واحچيييله

-جوري: لعد ليش ماحچيتي لسه؟!!

-هفففف جووري اسكتيي مرتبه كلشي ببالي وهسه خربت كلشي بغبائي وطلع زعلان

-عزاا ليش تزاعلتو؟؟

-لاني غبيه

-شسويتي يالغبيه

-ذكرت بكر گدامه

-ععععع شجاب هالعار ؏ بالچ

-استغفر الله كافي جوررري

-جوري: هسة احچيلي شكو تجيبين طاري؟!!

-لاني ثوله هاي لييش

-ادري بيچ وهسه ديلا ماصار شي اعتذري منه وراضي

-لچ عُثمان عصبي تلگي لسه معصب وضايج

-بَـس يحبچ وراح يسامحچ بسرعه

-هيچ رأيچ؟

-اي

-اووف جوري شگد ريحتينيي

-ديلا لعد امشي ويانه نطلع سوه حتى من ترجعين يكون مزاجچ حلو وتتصالحون

-اي ماشي

طلعت وياهم ورغم شگد المكان حلو بَـس هم ضايجة وبالي وياه، اشتريت شريحة وقررت اتصل بي واعتذر..

اتصلت وبأول رنه فتحه..

-عُثمان: الو؟

-هلااو اني هجران، شلونك؟

-عُثمان: زين

-بالي يمك

-يسّلّمو

يحچي گوة مبين لسه ضايج، عفت زينب يم جواهر ورحت اتمشى بالحديقه واحچي وياه..

-هجران: عُثمان بعدك زعلان عليه؟

-انتي شَنو تگولين؟

-احسك اي

-عجل خلص

-حباب ماقصد والله واصلاً ماعرف شلون گلت هيچ ؏ الريوگ

-خلص انسي

-بعدك زعلان؟

-لاء

-هجران: والله بعدك

-خلص هجران جري (روحي)

-فدوه لتزعل ماتحمل زعلك اني

عيوني دمعت وصوتي صار يرجف، گوة بلعت ريگي وعضيت ؏ شفتي حتى متنزل دمعتي، اردفت...

-هجران: حتى من طلعت وياهم ماحطيت نقطة مكياج لان ادري انته متقبل وماريد اسوي شي من وره ظهرك، شوف اني حتى من انته مو ويايه احترمك وماحب ازعلك

ظل ساكت بَـس اسمع صوت انفاسه، گلت گوة...

-هجران: عُثمان فدوه ارضى ولتظل زعلان ترا اني ماتحمل

-عُثمان: شَنو يولي گعد تبكين؟

-ايي من وراك بچيتني

-ههه يُبا خلص امسحي دموعِك ماتسوه الشغله

-ورضيت انته؟

-اي

-تحبني؟

-ههه اي

-ماصدگ

-احبُكي وبسطالو للحمزة

تخيلته گدامي وكفخ عطره بخشمي فجأة، غمضت عيوني وگلت من لا وعي..

-واني احبك حبيبي

-عُثمان: شَنوو؟؟

صفنت وتوني استوعبت اني گتله احبك!! صخام ييوو شسووي، من التوتر طبگت التلفون بوجهه، انتفض جسمي وصار يرعش وگلبي حَ يطلع من صدري..

ظليت الوب اروح واجي بالحديقه وحدي، وشگد ما امشي سريع واعض بشفايفي حسيت الناس صارت تباوعلي..

دقايق واجتني رساله منه، مكتوب بيهه..

"أحبيني .. ولا تتساءلي كيفا..
ولا تتلعثمي خجلا
ولا تتساقطي خوفا
أحبيني .. بلا شكوى
أيشكو الغمد .. إذ يستقبل السيفا؟
وكوني البحر والميناء..
كوني الأرض والمنفى
وكوني الصحو والإعصار
كوني اللين والعنفا..
أحبيني .. بألف وألف أسلوب"

نزار قباني.

من الفرح ردت اگمز بمكاني بَـس سيطرت ؏ روحي، عدت قراءة الشعر مرة وثنين وتلاثه وعشره وويه كل مرة اقراه عيوني تدمع بَـس اجاهد واللزم الدمعه..

بهالطلعه تونست ونسه خياليه، عميد الدين فرنه بكللل مكان واخذنه لسوگ واشتريت كم شغله واكلنه موطه وبالاخير رحنه نتعشى..

رجعنه للفندق وبسرعه بدلت لزنوبه ونيمتهه لان بدت تتنحس، غفت زنايب وهسة بده الوقت الي اهتم لروحي..

رحت سبحت وطلعت لبست دشداشه نوم لنص الفخذ لونهه بنفسي طوخ كيمونه خيط وصدرهه كيبور طلعت اخبل بيهه وكُلش لاگتلي، فتحت شعري الاسود الفحمي وحطيت مكياج سموكي ؏ گوله جواهر هههه..

گعدت ؏ فراشي انتظره وگلبي يدگ، نص ساعه واجه..

-سلام

-عليكم السلام

ابتسم وتقرب عليه باسني براسي وراح للحمام، حظرت حبشكلات وجيلاتين اشتريته قبل لا اجي للفندق وطلعت عصير لثنينه وحطيته ؏ الميز، طلع من الحمام لابس تراك نيلي فديته شگد لايگله هههه..

راح ؏ الميز يريد يمشط وجريته من ايده..

-تعال نسولف

-عُثمان: بَـس امشط

-لاا عوفه هيچ حلو

ضحك واجه گعد ؏ الكرسي، لفيت من وراه وردت اگعد ؏ الكرسي البصفه وجرني بحضنه..

-هههه خليني اگعد بصفك انته تعبان

-وشَنو يعني تعبان

-خاف ثگيله

گلب وجهه وذبل عيونه بطريقه مستهزأ، گال بفهاوة موتتني من الضحك..

-عُثمان: انتي ثگيله

-ههههههههههههه اي شبيييك اتمنى اصير ثگيله

-لاااع هيك احلى رشيقه

-واذا چنت سمينه مراح اعجبك؟

-منو گال؟

-مادري احسك تحب الرشاقه

-عُثمان: سمينه، ضعيفه، قصيرة، طويله، بيضه، سمره، حنطاويه كلكم نموت عليكم ههههه

-انتو فد ملتحييين

-عُثمان: وانتم كيدكم فد عظيييم

ضحكت ولفيت ايديه حول رگبته، باوعت بعيونه الملهوفه وقربت وجهي اتمايزه، شلت وحده من ايديه وحطيتهه ؏ لحيته، ضحك وبرزن سنونه اليصچن صججج، شلت ايدي وتلمست خشمه وشفايفه وعيونه واخير شي جريت شواربه خفيف وهمست قريب شفايفه...

-شواربك موتني

جاوبني وعينه ؏ شفايفي...

-وهوه المطلوب

-تريدني اموت

-هههه لا بَـس احب من تنضغطين

طبع بوسة ؏ شفايفي ورجع همس..

-عُثمان: ومن تغارين

-يمته اغار اني

-عُثمان: ابد

-هجران: اصلاً ابد

-ماشي

-ترا انته كُلش تغار

-إني كريم أحب المال مشتركا... لكن غيور أحب الحسن محتكرا

-احب غيرتك حلوة

-وانتي غيرتِك حلوة

گالهه وغمز، برزت شفايفي ليگدام وگلت بضوجة...

-بعد ماهبك

قهقه بخفه وگال..

-وانا اهبكي

رجع باسني ودارني كلني عليه، يعني رجليه حاوطت خصره..

-عُثمان: هاي اكو صرگعانه اليوم گالتلي احبك

-عززا منو هااي الحقيييره

ضحك بقوه وهز براسه، اردفت...

-هجران: ممم وشسمه شنو چانت ردة فعلك من گلتهه؟

-عادي

-شنو عادي؟

-عادي يعني عادي

-چذااب يعني مافرحتت

-عادي لانو مو اول مرة اسمعهه منِك

-يمته اني مگايلتلك ابد

-لاا گايلتهه كذا مرة وانتي نايمه

-عثمااان انته تضحك عليه صححح

-ههههه وبسطالو للحمزة لا

-شو ماصدگ هالحچي

-لا صدگي

گالهه وشالني بنفس وضعية گعدتي، غطيت حلگي خاف زينب تگعد، اضحك واعيط خفيف حتى ينزلني وهوه ميقبل، شمرني ؏ الچربايه وبدأت سهرة العُشاق..

سأقتلك بقُنبلة لا نون لها...♥️

گظينه يومين بأصفهان، چانن احلى يومين بحياتي، ماخلينه مكان يعتب علينه والاحلى من كل هذا هاديه مالتقيت بيهه ابد ولا جمعنه حديث وياهه..

-هجران: حبيبي جيب فرشت اسنانك من الحمام

طلع من الحمام ونفضهه بالهوا وانطانيهه، لفيتهه بالچيس ويه مالتي وضميتهه بجنطه السفر..

اليوم رحلتنه الى مشهد، متحمسه كُلش واكو اشتياق مو طبيعي بقلبي تجاه الامام الرضا، طلعت من الغرفه ورحت لغرفه جواهر لان زنوبه يمهه دتلعب ويه بناتهه..

-ها جواهر بشري؟

-جواهر: موتنيي وما اصالحه لو اموووت

-اففف مو عساس سويتو اجواء البارحه؟؟ ماتصالحتوو؟؟

-جواهر: ابد ابدد لچ شلع گلبيي حاط باله وبال هالمسكين زيد

-ههههه يغار ؏ بنته ولچ

-جواهر: هجران يعني شلوون هذا خطيبهه ولازم يتقبل الموضوع، شنو اذا زيد مشه ويه رهف شويه يگلب الدنيا لو اذا يحاچيهه ؏ كيف يريد يسمع شيحچوون لچ تخبلت والله مادري شبي

-هههههه يممه فلم فلممم

-جواهر: اني صرت فلم

-هجران: يله عود بالامام تصالحو

-معليه هوه يصالح اني ميخصني بعد

ضحكت واخذت زنوبه وطلعت، خلصنه كلشي واجرنه سيارات وطلعنه للمطار، الطريق لمشهد صار شطووووله، اعصابي تلفت وجسمي صار يوجعني وهاي زنوبه هم صخنت وعثمان ميتحچه صاير نااار ماعرف شبي هيچ من وحده..

-هسة غير افتهم شبيك؟؟

-عُثمان: گلت مابيه شي

حچاهه بين سنونه يعني اذا اللح بعد وياه مو بعيده يشيل البطل المي الگدامه ويشمره بوجهي..

اللتفتت اباوع ورانه وشفتهه گاعده، اوووف انوب اني هيچ حالتي والجو متكهرب وهاي جايه ويانه لا كُلش كملت هالسفرة وواضحه من اولهه..

لزمت ايده بين ثنين اديه، باوعلي بطرف عينه ورجع يباوع ليگدام، بلعت ريگي وهمست ؏ كييف...

-حبيبي

-ممم

-اريد اسألك شي بَـس لتعصب فدوه

دار وجهه يباوعلي والحاجب معگود اي هواي مراح يعصب، اشر براسه يعني احچي..

-هجران: هاديه ليش جايه ويانه؟ يعني اهلهه بقو هناك هيه ليش ماظلت وياهم؟

حچيتهه ؏ كييييف مصحوبه بمياعه بسيطه حتى ميثور عليه هنا وننفضح، صفن بوجهي وحرك چتافه بمعنى ماعرف، اردفت...

-ممم زين ابوهه مگلك شي؟

-گال هاديه بأمانتك

-شنو شنو شنووو؟؟؟

زفر بقوه وفرك وجهه، رجعت هدأت روحي وگلت...

-هجران: شمعنى بأمانتك انته؟ ليش ثامر ما اجه وياهه؟؟

-غير ثامر ويه ابوو

-خو يعوفهه بأمانة اسحاق مو جاي ويانه!!

-اندري هجراان مادري بشي هذا خالي ماعرف شَنو براسوو

-عُثمان شوف من هسة اگولك اذا صار شي بيناتكم والله اتطلگ منك

باوعلي بنظرة مفهمتهه ورفع تك حاجب، نتر بين سنونه...

-عُثمان: شو انتي صايره تخربطين

-ماخربط بَـس ماقبل بهالشي

قاطع حديثنه المضّيّفه اجت وانطتنه وجبة الاكل، حطته گدامنه وهوه ما مد ايده عليه..

-هجران: عُثمان لتعصب اني دا احچي هيچ لان احبك واموت عليك وماريد احد يشاركني بيك

هز راسه بـ "اي" وظل ساكت، فتحتله الاكل الگدامه وماقبل يمد ايده فَـہ خليته براحته...

اخيييراً وصلنه لمشهد وبوجهنه رحنه للامام نزور، حطينه جنطنه بالامانات وطبيت من باب الصحن ايدي بأيد عُثمان وزينب بأيده من الجهة الثانيه..

بَـس صارت عيني ؏ السرداب الي يگعدون بي عيوني دمعن، رجعتلي كل ذكريات شهر العسل من اجيت ويه بكر وشنو صارلي وشلون ضعنه والزلم تحارشو بجواهر، كلما اتذكر شي اشد الضغط ؏ ايديه لدرجة نبتت اظافري بمعصم ايده وهوه ماحچه..

ردنه نفترق حتى كلمن يروح يزور واني گلت...

-هجران: حبيبي خلينه نگعُد جوه شويه نرتاح وبعدين نروح نزور

-عُثمان: مايهم اول نزور بعدين نروح

-لا فدوه بالبدايه عاجبني نظل سوه هنا شويه

ابتسم وهز براسه، اييي يعني فكت عصبيته بَـس الخلاني افور من اللتفت يباوع لـ هاديه وصاحلهه، اجتنه تتماوع بمشيتهه والشعر نصه طالع شلون العجميات...

-هاديه: ها عُثمان

-عُثمان: دحگي انتي زوري وظلي ويه البنوات تمام؟

-هاديه: عجل انته وين رايح؟

-أنَا اروح هينا

اشر ؏ السرداب، لزمت كلبي خاف تريد تجي ويانه بَـس الحمد لله گالت تظل ويه البنات مادري شعجب..

نزلنه اني وياه وزينب وتمنيت نگعد سوه بَـس ميصير لان مفرقين الرجال عن النساء فَـہ گعدنه كلمن بجهة بَـس ميخالف المهم احس بي ويايه..

زرت الزيارة واندعيت هوواي وگمت اشوفه، چان ديصلي فَـہ انتظرته شوكت يكمل واشرتله حتى يجيني..

اجه وگال..

-عُثمان: تقبل الله

-منا ومنكم، هاا نروح نزور الضريح هسه؟

-اي يله

رجعنه للصحن وافترقنه مرة ثانيه بعدما اتفقت وياه وين اللگاه، زرت وكملت وزورت زنوبه بَـس من بعيد لبعيد حتى مننمرد بهالازدحام..

گعدت بلكي اشوف وحده من البنات وصدُك شفت غزاله وهاديه جايات بأتجاهي..

-غزاله: ها خيه وينچ انتي؟؟

-هجران: موجوده هنا صارلي هواي گاعده

-غزاله: هاا وانه ظل بالي عبالي ضعتي والعباس تسودنت

-هجران: هههه لا حُبي چنت ويه عُثمان بالبدايه

-غزاله: هاا يمه اشوى

گعدن بصفي كلمن من جهة وحاولت ما اباوع لـ هاديه، فكرت بيني وبين روحي ؏ شنو اغث نفسي واضوجهه وواضح عُثمان هم معاجبه جيتهه ويانه بَـس اضطر ياخذهه من وره خاله..

صار الوقت الي لازم نلتقي ويه بعض فَـہ گمنه صعدنه بالصحن وشفنه جواهر وشهد وجوري والباقين كلهم واكفين ينتظرون بَـس الزلم ماهمه..

-هجران: بيبي وين عُثمان؟

-حجية عطيه: راحو يدورون ؏ سكن

-جوري: ليش مو علساس نروح لبيت خالة عميد الدين؟

-جواهر: لا حُبي منروح

-غزاله: شني شعجب؟

-حجية عطيه: بعد عينيي يخاف ؏ مشاعر سلبوحته

-جواهر: بيبيييي

-حجية عطيه: ياا والغسلل چا شنهيي حلوة وگفتنه هيين

-جواهر: بيبي والله اني معليه اصلاً هوه من وحده گال منروح

-دلال: اي حبوبه لان اخر مرة الحجية داست بمصارين ام سارة

-حجية عطيه: خايبات انچعمن شنهيي انه شگلتت اي شكو البت موش حلوة شنهي عمييّد يخطبهه شناگصه طوول جسم شهامة حتى ياخذ هيچ وحده چنهه صخلة طارحة لا ايد ولا رجل والفهاوة والمياعه وععع لعبت روحي

-انتصار: خلص عمه راحت السالفه بعد

-حجية عطيه: اي راحت وبعد التفك حلچهه وتحچي بيهه والعباس امرعدهه

-جوري بضحك: زين مگلتي تجيبين مرحانه تحوس بفادهه

-حجية عطيه: لااع مو مريانه موش هين والله الچ وحشه يا بنيتي

متنه من الضحك من اندارت ؏ القُبة ودعت بگلب محروگ لمرجانه تجيب بالسلامه لانهه حامل، يمه هاي بيبي عطيه فلمم واشك اكو واحد يزعل منهه..

-حجية عطيه: يالرضاا اذا جابت مريانتي بالسلامة الك مني زوليه

-فتوح: اي يمه مو الرضا محتاج زوليه منچ

-حجية عطيه: چا وشكوو والعباس اله اجيبله

-فتوح: يمه شمالچ تحچين صگد انتي!! هاي اذا ما ردينه وشفنه مريانه ميته اييي يالرضاا عساهه بالمووت

-حجية عطيه: ولچ طرچاعه لا تخليني ادعي عليچ وع بنيتچ السلبوحة الچنهه سحلية حبله

-فتوح: انتي دوبچ من دوب نريس (نرجس) عيفيهه يمه عيفيهه!!!

ظلن يدردمن ويتعاركن واحنه فاطسات ضحك، گعدنه ننتظرهم يجون وجواهر الطنگوره مالتهه واصله للستار وشهد تهدأ بيهه، الله يعلم شصاير بينهه وبين عميد الدين..

-جوري: لچ متعاركييين وواصله عركتهم للسماء السابعه

-ادري لچ انصدمت همه نادر يتعاركون

-جوري: اي اني هم استغربت صدگيني عين واجتهم والله

-هجران: يجوز والله مو بعيده

-جوري: خطيه والله الله يهدي سرهم

-امين، اگولچ هاي زنايب تريد مي رح اطلع اجيبلهه واجي

-لاا هجران گُعدي لتضيعين وعثمان يجي يطيح حظنه

-لا ولچ هذا وينه اندليت والله

-جوري: اوگفي اجي وياچ

-وين جايه وجهالچ يلوعون، گُعدي ما اتأخر

-خوش بَـس لتتأخرين

-ماشي

گمت واخذت زنوبه ويايه، طلعت بره الصحن ورحت للترامز وصبيت لزنوبه وشربتهه واني هم شربت..

اللتفتت حتى ارجع وشفت هاديه ورايه، نزيت بَـس فوراً حولتهه لضحكة...

-هجران: يمه خرعتينيي

-هاديه: سلامتكي

-شكراً

عفتهه ورجعت حسيتهه تمشي ورايه، فجأة ولزمت ايدي وجرتني عليهه، اللتفتت اشوف شبيهه..

-هجران: ها هاديه خير؟

-هاديه: هجران خلص اعتقي عُثمان

-شنوو؟؟؟

-اتركي تعب من التمثيل عليكي!!!

-شنوو؟؟ انتي شدتگوللين؟؟

تنهدت بعمق وگالت بكل بساطه جُملة اجت طلقه بنص صدري..

يتبع💋...

♛ ♛ ♛ ♛ ♛ ♛ ♛ ♛ ♛ ♛
توقعاتكمممم 🙉؟؟؟؟
اذا تحسون ماكو احداث هواي بالبارت هذا لان قربنه للنهاية وان شالله كم بارت ونختم.

لتنسون التصويت والتعليق شبابات ئلبي 🦦💋

شباب مُمكن متابعه لهلبنوته ومتابعه لقصصهه♥️
Jojo-aljuburya