شفاه مخملية الفصل السابع وخمسون 57 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طوييييل يعادل بارتين ♥️.

"شفاه مخملية" 💋

بقلم: زهراء السلامي.

#لا أذكر أنِّي أحببتُ شيء
في هذا العالم المُرتبك
بقدر ما أحببتُ شعور الطمأنينة
الذي تُهديني إياها عيناه .🤍

♛ ♛ ♛ ♛ ♛ ♛ ♛ ♛ ♛ ♛

انصلبنه واحنه ننتظرهم، ردن هجران وهاديه من بره واستلمتهن حبوبه عطيه رزاله ناشفه عبن طلعن وماحچن..

اربع ساعات مرت والساعه عبرت الـ 10:30 بالليل، الجهال يبچون واحنه جواعه وحبوبه بَـس تدردم ومايعجبهه شي يعني بين قوسين زهگنه!!

-غزاله: اشش اشش حبوبه هاي اجو الزلم لا يسمعون اصواتنه

سكتت حبوبه واحنه گمنه من مكاننه ورحنالهم، يعني اختصرنه الطريق...

-انتصار: ها يوم عمييّد لگيتو سكن؟

تنهد بعمق وهز راسه بـ "اي"، اشرلنه حتى نروح وراهم وطلعنه من الصحن، بوجهنه اخذولنه تكاسي وطلعنه للفندق الاجرو..

نمشي بالسيارة وماملحگين نمشي وماكو نمشي ورهف كل ساع تگول...

-رهف: عمو عُثمان شني لسه ماوصلنه؟؟

-عُثمان: ما ظل شي حبيبتي

-غزاله: چنه هالفندق بعييد

-عُثمان: هلكنا واحنه ندور وماكو كل مكان مقبط

-غزاله: شني السالفه هاي ليش عود؟؟

-عُثمان: يُبا هاي عطله والكل مسافر تا قبل لا يبدي الدوام

هزينه بروسنه وسكتنه، السيارة هدوووء بَـس صوت زينب تلوب وتگمز بحضن امهه، فاجأتنه هجران من عاطت بيهه...

-هجران: كااافييي شبييييچ تخبللللتييي

اللتفت عُثمان عليهه وخزرهه خزره علييي رح ياكلهه بَـس صدك صوتهه عالي كللش لدرجة السايق عاينلهه من الجامه الاماميه، نتر بيهه ؏ كيف...

-عُثمان: جيبيهه

-هجران: عوفهه بحضني

-عُثمان: جيبييهه

انطته زينب وگعدت بحضنه وظلت ثابته ماتتحرك اظن خافت منه..

اخييراً وصلنه جدام باب، نزلنه من السيارة والباقين كلهم نزلو من سياراتهم، فتح عميد الدين الباب ونزلو الزلم الجنط وصاحو طبو..

طبينه جوه وچان اكو زلمه واگف بالباب سلم علينه بالعجمي مافتهمت شگال، اشر جوه وچنه بيته هذا ومأجرين منه!!

نزلنه درجتين وطبينه للمكان، اول مانطب صايره صاله يعني زين حجمهه چبيره، حطو الجنط بيهه والكل دخل، افتريت بالمكان چان عباره عن غرفتين وحمام ومطبخ وصاله، صفنت وانه اعاين للمكان شنيي هاي ذوله وين جايبينه!!

سكتنه ماحچينه شي بَـس شهد گالت وهيه گالبه وجهها...

-شهد: سلمان هاي وين جايبنه؟؟

-سلمان: وابو فاضل رجلينه وگعن واحنه ندور مااكو حجوزات مااكو

جواهر گالت وهيه كاشه وجهها...

-جواهر: لعد رح نبقى بهالخرابه؟؟

غيث ضحك خفيف وگال بصوت هامس خادر گدرت اسمعه لاني واگفه بحده...

-غيث: اشتعلو مروان وخلفته ؏ هالچهرة (هالوجه)

عاينتله مصدومه وسرعان ما رد اللتفت ؏ عميد الدين من زفر بهوى قوي وظل ساكت واضح ماسمعه شگال، اسحاق جاوب هالمرة...

-اسحاق: علويات ندري المكان ما من مقامكم بَـس امهلونه بَـس الليله ومن الصبح نطلع ندور غيرو

-غزاله: عميد الدين شني معقوله ماكو غير هالمكاان!!

-عميد: يعنييي لو اكوو غير مچاان اجيبكممم هييين

نتر بيه بقوه وچن بالونه وانفجرت، استغفر وفرك وجهها وگال ناهي الجدال الصار...

-عميد الدين: الليله ننام مفترگين الزلام بالصاله والنساوين بالغرف

-حجية عطيه: لا حبوبه شني زحمه انتم بالصاله چا ذني الطراچيع كل وحده عدهه فريخ شلون لو رادت تواليت ماعرف شنهي شلون يجن

-عميد: خلص احنه بالغرف وهنه بالصاله

-انتصار: يوم عميّيد شنهي شمالك شلون تنيم النساوين هيچ مفلگح عليهن الشسمه

-عميد: رحمممه لأبووي شتردددن؟!!!

نخلسنه كلنه وهذا صاير چبريت وانوب زادت عصبيته من شاف جواهر دايره وجهها عنه وماحاچته بأي شي..

-عُثمان: يُبا انتم اختارو وين تردون تنامون هيه ليله وحده!!

-دلال: خلص يوم احنه بالصاله وانتم بالغرف چا شنسوي

-نرجس بتذمر: شنيي شلوون ترضوهه بله واحد منهم طلع وكشف عليننه

-عميد بعصبيه: اشتعلوو مروان وخلفتته بووويه قفلو البوب علينه مثل المساجيين زييين؟؟؟

سكتنه وعمه انتصار هدأته وگالت همه ينامون بالصاله واحنه بالغرف هذا انسب شي، رحنه كلنه بالغرف وانقسمنه قسمين، نزعت ملابسي ولبست دشداشه وشال وسمعتهم يصيحون يردون ماي وفواكه وماكو غير غزاله...

طلعت ادردم وگالبه الوجي، يعني لا عشه لا صخام ويردون فواكه شني من سالفه هاي، رحت للمطبخ شفت بطاله ماي ؏ الكاونتر وعلاليگ فاكهه بحدهن..

فرغت الفواكه بالمغسله حتى اغسلهن واجه اسحاق للمطبخ...

-اسحاق: اريد ماي كثير عطشان

-غزاله: هذا ؏ الكاونتر هسه اجيبلكم

راح ؏ الكاونتر وفتح بطل وشرب منه وانه منطيته ظهري اغسل بالفواكه، حسيت بشي ورايه وماهتميت ولا درت وجهي..

استمريت اغسل بيهن واحس هالشي ضوجني، حركت چتافي وراسي مامرتاحه وماحس غير فدشي وگع بنص صدري..

نفضت دشداشتي ؏ كيف توقعتهه دوده بَـس الطرگاعه العظمى من وخرت شالي وعاينت وشفت جراده شطولهه طابه بنص صدري، ياااا بوووويه غير تسووودنت، صرت اگمز بمچاني واعيط چني مسودنه...

-غزاله: ابوووووفاااااضللللللللللل

صرت اركض واسحاق اجه عليّ يريد يفتهم شمالني وانه مستمره اعيط واگمز وساعه اركض، اجو الزلم والنسوان كلهم وصارو يصيحون....

-عميد الدين: ولچ شكوووو شصااااير

-غزاله: يبببباااووووو عمييييد الديييييييييين

انفض بدشداشتي وصدري نصه طلع وانه مو يمه اريدن تطلع مني، صارو يصيحون وعثمان واحمد تسودنو من شافوني بهالحال واسحاق يصيح...

-اسحاق: يولييي اهجبييي وفهمييينا

وانه اگمز طلعت الجراده مني وطارت بالمطبخ، غير صار طشار النسوان كلهه تصيح وجواهر وشهد وجوري وهجران تخبلن والزلم رادو يملخون رواحهم صوتهن شعلوه وهاي المعزايه تطير..

موش جراده چن طير ؏ كبرهه هاي شلون طبت بيه وانه لابسه شال مادري، عميد صار يركض وراهه بالنعال وجواهر تعيط...

-جواهر: عميييييد اكتللللههه

-عميد: چااا جاي اللعب وياااهه توكييي!!!!

اخيراً لگفهه وداسهه بالحذاء، شالهه بكلينسه وشمرهه بره واحنه وجوهنه صفررره ونلهث..

-عُثمان: هيه جرااده يرادلهه كل هالعيااط

-غزاله: عثماان طبت بنصييي يباااووو

-احمد: حسسسچ غزاااله

-جوري: صخااام بوجهي لچ هاي شلون طبت بيچ يمممه

-غزاله: ولچ اششش لساع جسمي ينتفض منهه

-اسحاق: خلص ماتت شبيكي

-غزاله: ماتحمل والعباس ماگدرر

-عُثمان: روحي اسبحي تا ترتاحين

هزيت براسي واخذت ملابس وطبيت للحمام حتى اسبح، وانه بالحمام ودگو عليه الباب حتى اطلع وياهم لان راح يتعشون، گلتلهم ماريد كشت روحي من الاكل وبس اريدن انام..

طلعت من الحمام ومحد اكو غير حبوبه عطيه وعمه دلال، رحت للحجره وتفاجأت من شفت هجران متمدده ونايمه ؏ بطنهه...

-ها هجرانه شو هنا؟ شني مارحتي وياهم؟

-هجران: لا تعبانه

-چا مو جوعانه؟

-لا

-هااا

-هجران: شلونچ انتي؟

-غزاله: زينه بَـس بعدهه روحي كاشه

-هجران: اقصد شلونچ ويه اسحاق؟

فتحت عيوني مصدومة، بلعت ريجي وگلت امثل البرود...

-غزاله: شني شكو يا اسحاق هذا

-هجران: سمعتكم غزاله بـ اصفهان

-شسمعتي؟

-هجران: غزل ليش متنطين لنفسچ فرصه؟

-ماريد

-هجران: بعدچ تردين عميد الدين؟؟

طفرت من مكاني واللتفتت اعاينلهه، عيونهه چانت مطفيه ومبين تعبانه كللش، هزيت راسي متسائله وسرعان ماغيرت الموضوع...

-غزاله: اءء انتي شماله وجهچ اصفر؟؟

-هجران: شوفي غزل اني ادري مو من حقي اتدخل بخصوصياتچ بَـس اريد اگولچ شغله وحده، انطي لنفسچ فرصه وابد لتدفرين النعمه التجيچ برجليچ.. لتظلين متأملة يحبچ رجال گلبه ويه غيرچ واني من احچي هيچ احچيلچ عن تجربه!!

نزلت راسي وگلت..

-غزاله: انه مافكر بي بهالطريقه بعد

-لعد ليش متقبلين بـ اسحاق واضح الرجال نيته زواج وياچ

-غزل: انه ماريد اتزوج هسّ

-هجران: وبعدين؟

-اظلن هيچ انه ماريد هجران وحتى من اسحاق حاچاني صديته وفهمته انه ماريييد اتزوج وهالقرار ماراح اغيره طول عمري

-تندمين

-ماندم ان شالله

گلت هالچلام ونمت بفراشي، غمضت عيوني اريد انسى محادثتي ويه اسحاق وشلون حچالي وگال واحنه واگفين بحد شجرة الورد بأصفهان...

-اسحاق: امي گالتهه

اللتفتت اعاينله وچانت واگفه بحدي هجران...

-غزاله: شني؟

ضحك خفيف وهمس وهوه يعابن للورده...

-اسحاق: امي گالت راح اتزوج بنت عيونهه كبيره كثير تشبه الغزال

ماجاوبته وانطيته ظهري، رد همس...

-اسحاق: شتگولين غزل نحقق هالشي؟

سرت رجفة قويه بكل جسمي، انداريت عليه وگلت...

-انته ما تستحي!!

-اسحاق: أنَا اسف ماقصد شي ما زين من كلامي

-عييب تحچي وياي بهيچ موضوع

-اسحاق: يعني عيب اذا ردت اخطبِك من ابوكي؟!!

-غزاله: اسحاق انسى الموضوع وهاديه حاچتني واظن وصلتلهه فكرتي وگلتلهه انه ماريد اتزوج

-اسحاق: لانِك تحبين رجلِك لسه

-غزل: لا مو هذا السبب انه ماريد اتزوج وبس

-اسحاق: انتظرِك وعد

-لا تنتظر شي مستحيل يصير

-اسحاق: انتظرِك ام عيون الوسيعه

جاي اريدن اجاوبه وعافني وراح لان اجه عميد الدين وسألني شماله وجهي اصفر وردت اتيه الموضوع وانسى الصار وبعد ماحاچيته...

**

"هجران"
الافكار تتناطح براسي وافكر بكلام هاديه اليوم الي سممني، تعبت واحس مابيه بعد افكر بشي والله گلبي خلص وزهگت من عيشتي، يعني اني ممكتوبلي ارتاح واعيش حالي حال البنات؟ لازم يجي احد ويطفي فرحتي ويخرب عليه!!

فتحت عيوني وسرحت بالفضاء وتذكرت كلامهه من گالت بنبرة حاده...

-هاديه: اتركي تعب من التمثيل عليكي!!!

-شنوو؟؟ انتي شدتگوللين؟؟

تنهدت بعمق وگالت بكل بساطه جُملة اجت طلقه بنص صدري..

-دحگي حواليكي هجران دحگي للبنوات وشكلهم واحكي ضميرك، عُثمان شَنو ذنبو يعيش ويه بنت تشهِك؟؟

-شبيه اني؟

-شبيكيي؟؟ يا امي اصحيي وفتحي عيونِك ودحگي للفوارق البينكم!! انتم مجرد توگفون بصف بعض نشااز والكل يدحگلكم عجل هوه شلون حالو

-انتي شبيچ؟؟ اني شمسويتلچ؟؟

-هاديه: ما مسويه شي بَـس أنَا انقهر عليه هوه خطيه وگعد اشوفِك ماعندِك احساس

-اني ماعندي احسسااسس؟؟

-عجل لو عندِك ما تأذي هيك وتخلي يعيش بهالطريقه، هم متزوج ارملتو لأخو وهم ما حلوة وهم عندهه بنت ولازم يربي بنتهه

-هجران: هاديه من الاخير شتردين؟؟

گوة حچيت احس الغصه صعدت ببلعومي وهسه انفجر بچي هنا..

-هاديه: اتركي وخلي وحدو يختار البنت اليحبهه

-هوه يحبني

-كذذبب يولي كذذذب هوه هيك يحكي تا ما يجرح مشاعرِك!!

-وليش يچذب؟؟ ممضطر يچذب ترا!!

-هاديه: لا مضطر تعرفين ليش؟؟

-ليش بله؟

-لانو گعد يوهم حالو ويحاول يتعايش وياكي

-اسكتي هاديه اني ادري انتي تردي واصلاً حاطه عينچ عليه من قبل وادري حقچ تزعلين لان من الصغر چانو موهميچ وزارعين فكرة براسچ ان هوه نصيبچ بَـس حبيبتي ميصير هسة هوه تزوجني ويحبني ولهفة اسمي بصوته تترجم حُبه الي وشلون يريدني ويعشقني!!

احچي ودموعي تنزل ماگدرت اللزم روحي اكثر، زنوبه بيدي وتباوعلي واني احچي بحرگة گلب ونفس واحد ماگطعته...

-هاديه: والله حرام عليكي

-انييي حرام عليهه؟؟؟

-هاديه: ايي لانو أنَا احبوو شسوي يعني اطلع گلبي وادوس عليه تا يهدأ لو شَنو اسوووي هجراان

-ماعررف شتسوين مااعرف بَـس عوفينه بحالنه اروحلچ فدووه اني احبه فدووه لتاخذي منيي

-وانا احبوو يعني هذا حق من اخذتي منيي!!

-هجران: حبابه انسيي هاديه ماگدر اني بدونه، عُثمان صارلي كُلشي واني هسة حامل من عنده وهوه يتمنى هالطفل وهذا البيبي رح يغير حياتي وحياته اني متأكدده، الله عليچ عوفي تعبت اني والله تعبت اريد ارتاح واعيش!!

من گلت هيچ ودموعي تصب هيه صفنت، تجمعت الدموع بعيونهه ومسحتهن فوراً، عضت ؏ شفتهه السفليه وصعدت بؤبؤ عينهه فوگ حتى تمسك دموعهه ومتوگع..

عافتني وراحت تمشي سريع، رحت وراهه ورجعنه للصحن وبعد شهدتو الصار، راسي يفتر واني افكر اخاف متگعد راحة وتسويلي مشاكل ربيي دخيلك!!

غمضت عيوني وبعد ماحسيت اله الصبح وزنوبه تگعد بيه...

-هجران: صباح الخير حبيبتي

-زينب: صباه النول ماما بابا يصيهلچ

-هجران: شيريد؟

-زينب: مادلي

گالتهه وركضت بره، دورت عيوني بالغرفه فارغه والفراشات مرتبه يعني واضح البنات كلهن گاعدات، باوعت ؏ ساعه موبايلي وچانت بالـ 10:30..

تنهدت بعمق وگمت للحمام غسلت وفرشت اسناني ورجعت للغرفه بدون ماشوفه..

رجعت ؏ فراشي من الدوخه موتتني ومدا تفك مني، دقايق واندگت باب الغرفه وانفتحت..

رفعت راسي وشفته هوه الدخل، ظليت متمدده وسارحه عيوني بالفضاء..

-عُثمان: صباح الخير

-صباح النور

-عُثمان: حاكيت زنايب تصيحلِك

مجاوبته وگعدت ؏ حيلي، اجه گعد بصفي وگال...

-عُثمان: لگينه غير هالمكان وهسة شوي ونطلع

-هجران: زين

-عُثمان: انتي مريضه؟

-لاء

-وجهِك شاحب

-يمكن لان ماتعشيت

-عُثمان: صاير أكلِك قليل ودائماً تعبانه شبيكي حبيبتي؟

من گال هيچ فوراً نزلت راسي وجاهدت اللزم الدمعه، تقرب اكثر لدرجة لزگ بيه وجر وجهي ناحيته..

چانت اكو دمعه مشكله بطرف رمشي ماگدرت تقاوم اكثر ونزلت، مسحهه بأبهامه وهمس...

-عرفت بيكي شي

-تعبت

-سلامتِك

-عُثمان شدنسوي احنه؟

-گاعدين نسولف

-اقصد علاقتته ؏ شنو مبنيه؟

-؏ الحب والاحترام والصداقه والثقه و.... لو ابقى منا لثاني يوم اعدد ماخلص

-هم تفكر بيوم تتركني؟؟

-ليش تفكرين هيك؟

-لان اخاف تعوفني لو تخوني

تنهد بعمق وحك طرف حاجبه، رجع يباوعلي وگال بجديه...

-عُثمان: حقِك تخافين وانا ماگدر اللومِك لان العشتي ويه اخوي صعب ينتسى

جر شهيق بهدوء وزفره اهدأ، اردف...

-عُثمان: بَـس لازم تفرقين بيني وبينو ، هجران أنَا ما بكر أنَا عُثمان! صح احنه اخوان من بطن وحده بَـس طول عمري كنت اختلف عنّو تربيتي تختلف عن تربيتو، بكلشي احنه غير عن بعض وهذا ما كلامي هذا كلام خوالي وعمي عباس! بكر مات الله يرحمو وما ترك شي حلو تا واحد يذكرو بيهه.. بعد هاي قسمتو او نگدر نگول اختيارو.. بكر سوه شغلات بحياتو لو احكيلِك عليهه يشيب شعر راسِك!! بَـس ماحكيهه تا ما نذكرو بشي مو زين لانو مات وما تجوز ؏ الميت غير الرحمه!

-هجران: اني ادري انته مو نفسه بَـس...

-خليني اكمل هجران، أنَا تعبت بحياتي وعانيت وماريد اكرر الموضوع وانتي تعرفين اغلبية احداث حياتي وحاكيلِك عنهه.. من دخلتي حياتي هجران غيرتيني، خليتيني احس أنَا انسان مرغوب، أنَا ما مجرد عبد يشتغل تا يرضي خوالو والحواليه!! انتي زرعتي بگلبي بذرة صغيره ويوم بعد يوم گعد ترويهه بحُبِك وحنانِك وعطفِك وانسانيتِك.. كُبرت هالبذرة واخر مرة فحصتهه لگيتهه صايرة شجرة ورد ملون.. كل ورده ملونه بداخلي مُلقحه من صفه حلوة بيكي..

ابتسمت ونزلت راسي خجلانه، ابتسم خفيف وگرص خدي وجر وجهي ويه الگرصه...

-عُثمان: سأليني أي شي يدور ببالِك وانا اجاوب

-هجران: تحبني

-ههههههه والله انِك تحبين هالكلمة

-هجران: احبهه بحلگك

ابتسم وهز براسه..

-عُثمان: احبُكي

-هجران: تتزوج بت خالك هاديه؟

فتح عيونه متفاجئ، هز راسه وگال نافي كلامي...

-لاا طبعاً

-مو خالك موصيك اذا صارله شي تعقد عليهه؟؟

-منيلِك هالحكي؟؟؟

-فيصل گال

-اخخخخ فيصل اخخخ

-يعني صدُك هالشي!!

-كان اي

-شوكت؟

-بأول فترة تزوجنه بيهه

-شلووون؟؟؟

-لانو أنَا من تزوجتِك ماكانت الي نيه اخذِك كـ زوجه بَـس گلت اذا كانت ارادتِك هيك ما امانع بَـس انتي كنتي تنفرين مني وتتهربين كأني رح اكلِك لو اخذِك غصب حالي من حال هالهمج، مشت ايامنه سوه واجتني فتره بديت اتقرب منِك واتمنى تبادليني بَـس من شفتِك هيك وخالي حاكاني بموضوع بنتو للمره الثالثه لان مايثق بأحد غيري و...

-هجران: وثاامر مو ابنه؟؟؟ ليش ميثق بيي؟؟؟

-من يومو كانت علاقتو مو قريبه من ثامر، يعني أنَا كان معتبرني ابنو الاول وثامر الثاني

-ايي؟؟

-فَـہ من رحنه للانبار تا نحضر الطلابه الصارت ومن تصوبت وتقربنه من بعض اكتشفت اكو شي اكبر بداخلي تجاهِك هنيك

-وگتلي احبچ!

-صح

-وهاديه؟

-هاديه استمر موضوعهه وخالي زعل مني وعصب من غلست ؏ الموضوع وحاول يبينلي اكثر من مره وانا اتهرب من الجواب

-ليش مو رأساً گتله ماريدهه

-اكيد يزعل من جسارتي!! هجران شبيكي انتي هذا ابوي ما بَـس خالي!!

-زين وشصار بعدين؟

-احترگو المحلات ورحتلهم هنيك وبعد مانفتح الموضوع نهايئاً!

-ليش مفتحه وياك؟

-يمكن تترجملو معنى هروبي منّو بهذيك الفترة

-لعد من دگت هاديه باب غرفتك؟ شلون طلعت گدامهه هيچ بدون ملابس؟!!

-ومنو گال مالبست

-يعني لبست؟؟

-طبعاً عجل شلون

-اكيد عُثمان؟؟

ضحك وهز براسه، برزت شفايفي بحركة طفوليه وگلت...

-لعد ليش چنت زعلان بالطيارة وگوة تحاچيني بطريقنه لمشهد؟

-ااخخ هجران

-شنو؟

-تعاركت ويه ثامر

-يااا شلوون؟؟

-انفتح الموضوع بالمستشفى وخالي حس انو قربت ايامو ولمحلي مرة ثانيه وانا حكيتهه بوجهو وگلتلو أنَا ماريد اتزوج بعد ومرتاح وخالي تفهم الموضوع بَـس ثامر زعل كثير لان كان متأمل

-وهوه شعلييييه!!!

-؏ كيفِك يوليي

-افففف شعليييه هوه!!

ميل حلگه وحرك چتافه بطريقه "ماعرف"، تنرفزت كُلش وانقهرت معناهه السالفه ماخلصت وراح يظلون يلحون عليه ويمكن يتزوجهه...

-هجران: زين ليش خالك دزهه هنا وياك؟؟ شنو هالمنطق انته مو متريدهه؟؟

-عُثمان: مو گلتلِك ماعرف شنو براسو لخالي

-عود شنو وين يردون يوصلوون؟؟

-مايهمني

گالهه وتمدد ؏ ظهره وثنه ايديه وحطهن جوه راسه، قرفصت روحي وحضنت ركباتي لصدري وهمست...

-واذا گلولك لازم تتزوجهه

-ماكو شي غصب

-واذا جبروك عثماان!!

-هههههههه انتي من كل عقلِك

-اييي

-ماكو هيك شي

-هجران: عُثمان بله گال اغضب عليك شتسوي بعدين؟!!

نهض روحه ؏ عكسه وضيگ عيونه وركزهن عليه...

-عُثمان: اولاً أنَا ما خرخاشه بيدو تا يجبرني ؏ شي أنَا ماريدو، هجران يمكن انتي ماعرفتي طبعي لسه أنَا مستحيل اسوي شي أنَا ما مقتنع بي لو يگصون راسي

-وترضى ؏ زعل خالك؟

-يزعل فترة ويرجع يرضى

-يعني متعوفني

-چؤؤ

حرك حواجبه ورجع نام ؏ ظهره، تقربت عليه وتمددت بصفه..

-هجران: عُثمان اذا تريد تتزوج گولي فدوه والله ماسوي شي بَـس اتطلگ

ضحك بقوه ومسح وجهه، هز راسه واستمر بالضحك...

-هجران: والله احچي صدُك ليش تضحك!!

-عُثمان: حبيتهه هاي ماسوي شي بَـس اتطلگ

-لعد تريد تتزوج عليه وابقى وياك!!

-لا لان أنَا ما ارضى تبقين وياي

-شلون يعني؟

-انسي

-لا مانسى گول شتقصد؟؟

-استغفر الله يُبا حكيت الحكايه واسحبهه يله

-قصدك تريد تتركنيي بعدين؟؟

-انتي بكيفِك تحكين!!!

-اي هيچ واضح من كلامك

-لااء اتطمني ماكو هيك حكي

گلبت وجهي وگلت گوة...

-هجران: هسة متتزوج هاديه؟

-انا لله وانا اليه راجعوون

گالهه مال واحد زهگاااان وطالعه روح روحه..

-هجران: عُثمان شوف اني گلبي يلعب وممرتاحة

تنهد ورخه چتافه، ثنه رجليه گدامه واشرلي بيده اجي بصفه، رحت بصفه بالضبط وهوه ظل يتمايز وجهي، نصيت راسي خجلانه ورجع رفعه...

-عُثمان: انتي تسوين الف هاديه هجراني

-گلبي يوجعني

-اسم الله ؏ گلبِك

-انته متخجل من نطلع سوه؟

عگد حاجبه مستغرب، هز راسه وكأن يريد يتأكد من السمعه...

-عُثمان: اخجلل؟؟؟

-اي يعني احنه غير عن بعض

-عُثمان: واذا غير

-يعني متخجل؟

-لاء

-لتچذب احچي الصدُك

-هجران لو كنت اخجل ما كنت قبل لا اتزوجِك نطلع سوا ونفتر بالجامعه سوا وناكل سوا ونسولف گدام الكل و و و و.. تتوقعين الخجلان يسوي كل هذا؟!!

-لاء

-عجل خلص، حبيبي لا تفكرين كثير رح يتعب عقلِك ويصير بوجهِك الصغير تجاعيد

-هجران: يعني انته متفكر هواي؟

-عُثمان: شلون؟

-لان بشرتك تجنن مابيهه ولا تجعودايه

ضحك وحط ايده ؏ راسه، اردفت...

-تدري اني وجوري انتبهنه عليك اول ماجيت للناصريه شگدما بشرتك حلوة عبالك بشره طفل لا تجاعيد لا مسامات لا كلف كلشي ماكو

-لان اكلي صحي

-خو اني هم اكلي صحي

-يمكن لان اشرب ماي كثير

-اني سقه مال مي

-عجل الفاكهه كثير تغير بالبشره

-اني هم آكُل فاكهه

-استتتغفرر الله شمدررينييي يُباا

-مو جوري تريد تعرف السر

-ماكو سر

-تستخدم مستحضر تجميل معين؟

-تحكين صدك انتيي؟؟

-اييي

-فد يوم شايفتني حاط مكياج ؏ وجهيي؟!!

-مو مكياج حبيبي اقصد مستحضر يعني من تحلق يحطولك لو مثلاً صابونه معينه

-اي استعمل صابونه معينه

-شنو اسمهه بله؟؟ شو مشايفتهه اني

-لونهه اخضر وهيك صايره مربعه

-عثمااان هاي صابون رگيييي

-اي عجل شبي

-هفففف خلص انسى هوه انته حلو هيه گووة

غمز بعينه اليسره وحچه بخبث...

-عُثمان: ادري

-هجران: يبووو شيخلصني بعدد ههههه

ضحك وسولفنه سويه بَـس احس براحة مو طبيعيه خصوصاً من عرفت هوه ميريد هاديه ومبينه مو بباله ولا مفكر بيهه..

فجأة صارت تلعب نفسي وسكتت بعد ماحچيت وهوه انتبه عليه وسأل...

-عُثمان: شَنو؟

-هجران: ماكو شي

-عجل شبيكي وجهِك صار اصفر؟

-هجران: خررب عود اني ردت اسوي اجواء من نروح لشمال ايران واگولك

-شتگولين؟؟

بلعت ريگي ؏ كيف وصرت اتنفس سريع، گمت افتح الشباك المچنگل فوگ ماكدر اللوحه فَـہ عُثمان فتحه..

-عُثمان: واضح السفر ما يوالمِك

انداريت عليه وتقربت وگفت گباله، حطيت ايدي ؏ بطني وضحكت خفيف..

رفع تك حاجب وشعت ابتسامه حلوة من بين شفايفه، همس بتردد...

-عُثمان: انتي.. حامل؟

هزيت راسي بـ اي وغطيت وجهي، فرقت اصابعي عن وجهي اباوعله، چان فاتح عيونه ؏ وسعهن ومركزهه عليه، صاح...

-عُثمان: هاااا يعني حااامل؟؟؟

-هههه يمعود صوتك فضحتنه ايي حامل

بحركة سريعه حضني حضنه مردتني مرد، يضحك وفرحان ويصيح "الحمد لله" ودافن وجهه بچتفي واني اضحك فرحانه ؏ ردة فعله، حاولت ادفعه عني وميقبل لزگ...

-هجران: حياتيي شو باوعلي يااا عثماان هههه هاي شبييك

وخر عني والضحكة تارسه وجهه، حچه ملهوف...

-عُثمان: ايمت؟؟ ايمت عرفتي انتي حامل؟؟

-بمهر رهوفه سويت التحليل ولزگ ؏ خط واحد وبعدين طلع الثاني هههه مادري شنو يلعب ويايه

عگد حاجبه وگال بتشكك...

-خاف ما حامل يولي؟

-لا لا حامل والله وكل اعراض الحمل عندي

رجع يضحك وبوسني فرحان، رفع ايدي يبوسهه وهمس...

-عُثمان: مبارك حبيبي الله يگومِك بالسلامة وتقر عيوننا بشوفتو

-امين حياتي

جرني لصدره وحضني نص حضنه وجرني يريدني اطلع وياه للصاله، وگفت بمكاني وگلت بضحك...

-هاي وين ماخذني؟؟

-بره تا نتريگ

-هههه واطلع هيچ بدون شال؟؟

ضرب گصته خفيف وضحك، هز براسه وگال يطلع ينتظرني بره..

لبست جبه وشال وطلعت بره واول ماشافتني بيبي عطيه صارت تهوسلي بشيلتهه، ضحكت خجلانه وكلهم باركولي بَـس واضحه الفرحة ما سايعتهم خصوصاً عُثمان..

الابتسامه مانطفت من وجهه احسه ممصدگ وكل شويه يضربله صفنه عليه ومن انتبه عليه يدور وجهه ويضحك..

تريگت وياهم وكل ساعه جايب شي گدامي، هوه من قبل هيچ انوب هسة عرف حامل صار اكثر وكل شويه يوصيني ما اشتغل شي وما اتعب نفسي ومازعل روحي وأكد عليه من گال...

-عُثمان: هاديه تنسيهه هجران ماريد ينفتح موضوعهه نهائيياً!!

-حبيبي اخااف والله اخااف شبيك

-اشش ماعليكي أنَا اتصرف المهم ترتاحين اريدو للولد بصحتو

گالهه وابتسم ابتسامه واسعه، لزمت ايده وحضنتهه بين ايديه ثنينهن وهمست...

-هجران: والله لوما موجودين اله ابوسك هههههه

-عُثمان بضحك: هاا ول طالعه عينِك انتي

-ههههه تخبلت اني ليش متدري

ضحكنه ثنينه وگالو حضروا غراضكم نروح لغير فندق ومشت ثمان تيام واحنه هنا تونست كُلش وارتاحيت من هاديه ماحچت ويايه بعد ولا تدنتلي بَـس لسه احسهه تباوع لـ عُثمان وتتحسر، ميخالف اتحمل اهم شي هوه ميباوعلهه وممهتم بيهه..

گعدنه بالصحن اني وجوري وجواهر وشهد وسولفنه ويه بعض شويه وجوري حچت بحماس...

-جوري: لچ جوااهرر صرگعاانه تصالحتي ويه ميدوو

شابگت جواهر ايديهه ويه بعض ومطتهن بدلال وگالت بمياعه...

-جواهر: اييي ميدواتي صالحني

-شهد بضحك: الله يساااعده لـ ميدو تچفصين بمصارينه ولازم هوه يراضيچ

-جواهر: لاااا شوفي من اضوجه اني اراضي بَـس من هوه يزعلني لازم هوه يراضيني اي عيني هم عايزه اني اصالحه

-جوري: كفووو من شاربچ

-جواهر: عززاا شنو شواربي طالعااات؟؟؟

-هجران: هههههههههههههه خرب عرضچ جواهرررر

ضحكنه كلنه وصارت تحچيلنه شلون تصالحو وشنو گللهه بالضبط خلت جوري وشهد يگمزن...

-جواهر: اييي ولچن دخليني الغييي باعن شسمه اول ماطبينه البارحة للفندق وگال يريد يسبح حتى احضرله ملابسه وطبعاً جوجو شسوت ظلت نايمه ؏ ضهرهه وماتحركت ابد..

راح يسبح وطلع لاف المنشفه ؏ خصره وگال...

-عميد الدين: جواهر وين هدومي؟

-جواهر: بالجنطه غير

-عميد: چا انه مو گتلچ طلعيلي

-جواهر: تعبانه

تأفأف بقوه وراح يطلعله ملابس، التوأم صارن يبچن واخذتهن ارضعهن گدامه..

نطت جوري وصاحت بحماس...

-جوري: الادبسزززز تسويله اغرائااات

-جواهر: ههههههه انچبي لا والله ما قصدت هيچ

-هجران: هههههه يله لچ كملييي

-جواهر: اي المهم رضعتهن وياقوت نامت بقت بَـس زوزو (زمرد) صارت تلوب وتبچي ماعرف شبيهه واني انوب نفسيتي تعبانه صارلنه عشر تيام متعاركين وابد ماحاول يصالحني

-شهد: غييير تنچببب مو سحلتي جد جدددده مو كم مرة يحاول وياچ وانتي متهتمييله

-جواهر: دسكتتتن لعد شلون يتعلم لخاطر الله

-هجران: والله هالمرة صدُك كفو من شاربچ ولو ماكو بَـس ميهم

-جواهر: اييي المهييييم زوزو تبچي واني اهز بيهه، رضعتهه بعد وحاولت انيمهه وماكو وانوب بطني صارت توجعني ولعبان نفس قوي عندي وعميد صافن علينه ماحچه شي، ماتحملت الموضوع وصحت بغصه...

-تعااال شوف بنتتتك شبيييهه

اجه قريب عليه وصح عيطت بَـس ماحچه شي لان شافني منهارة، اخذهه من ايدي ويدگدگ ؏ ظهرهه خفيف وفجأة يداده وصارتلكم زرگة الطفله..

-جواهر: يمممه بنتييي عميد الدييين شبيييهه يمعوود صارت زررگةة

-عميد: بويه هاي من البچي

هيه تبچي وصرت اني ابجي وياهه وادك ؏ خدودي خفيف...

-عميد: بسچ جواهر لا تخرعيين الفرخه مابييهه شي

-يمعوود شنو مبيهه شييي شوفههه يمممه بنتي مااااتت عميد الديييين

انخبص ويايه وگال لبسي ناخذهه للمستشفى، لبست شلون مچان واخذت ياقوته حطيتهه بغرفه غزاله ورهف وطلعنه بدون لا احد يدري عميدي مقبل نحچي حتى منخرعكم..

وصلنه للمستشفى واني انذر نذوره ولچن صايره چني عجوزه امشي وانذر من الخوف، المهم دخلنه للدكتور وگال غاصه بالحليب ومختنگه..

اتخذو الاجراءات اللازمة وگالو تگدرون تاخذوهه للبيت، اجرنه سيارة ورجعنه للفندق مهدود حيلي وبس اشهگ وجسمي بعده يرجف...

-عميد الدين: بابه بسچ مابيهه شي الفرخه

-رادت تموت

-اسم الله ماصار شي عاينيلهه هاا اهاا شحلاتهه بنيتي

باوعتلهه نايمه بحضن ابوهه، مسحت دموعي ولزمت چف ايدهه الصغيروني..

وصلنه للفندق وكلمه ماحچينه بعد، اخذت ياقوته من رهوفه ورجعت بيهه للغرفه ونيمتهن، نمت بصفهن واباوع لبناتي..

حسيت بي يحوم ورايه واجه نام بصفي، صار فوگايه عود يعني حتى يشوف بناته ومن هالكلاوات هههه..

بوّس ايديهن وهمس بصوت تعبان...

-عميد: شحلاتهن البنيات

-اي والله

-عميد: لو يجنلي عشره هم اگولن گليلات

-عاد انته تموت ؏ البنات

-چا اكو احلى منهن يصيرن حبيبات ابوهن

ابتسمت وسكتنه، رجع حچه بصوت ناصي...

-جوهرة بسنه زعل

استمريت هادئه مجاوبته، اردف بتعب...

-بويه انه لو بَـس افتهم يمته يكبر عگلچ ارتاح

انداريت عليه ونترت خفيف...

-جواهر: يعني من تجي عمتك الحية وتقنعك تتزوج بتهه السلبوحه وانته تظل ساكت واني ازعل عليك هنا اني عقلي صغير صححح؟؟

-بابه اسايرهن شمالچ

-لاا عميد الدين مو تسايرهن هاي منطيهن مجااال وهاي نرجوسه العوبه مصدگه روحهه

-جوهرة هاي عمتي مريضه وماگدر اظل اجادلهه هواي وانتي تعرفين هيه الله يسلمهه لسانهه طويل ومن تمده چنهه دلاله تتمرض

-ومرضتهممم انته لو صدُك تحبني توگفهه عند حدهه وتگول ماتزوج ؏ زوجتي لان احبهه وهيه ام بنااتي!! لو عندك رأي ثاني شيخ عميد الدين؟؟؟

-طبعاً ماعندي رأي ثاني، والعباس ماريد غيرج وديلا!!

-اثبتلي هالشي من توگف عمتك السعلوه عد حدهه

-ولچ بسچ تغلطين عليهه

-عميد ماغلط واسفه ماقصد احچي عليهه گدامك بَـس گلبي يوجعني والله

نزل باس چافي وهمس...

-سلامتچ يبعد هلي

-عميدي انته تعرف اني احبك مو؟

-عميد: لا هاي معلومه جديده

ضحكت ؏ كيف وهوه هم ضحك وباس خدي خفيف..

-عميد الدين: بويه شتأمرين انه حاضر

-احبك

-وانه اعشگچ

-احب احترامك الي حبيبي

-وانه احبچ كلچ

-احب اسلوبك

-بسچ مصختيهه

-ههههههه عميييدييي

-هههه والله شني شمالچ لطشتي

-مو صوچك صوچي اني الأكولك احبك

-چا شنهي غير انتي جوهرته لعميد الدين

-افدي عميد الدين ورهوفته وبناته التوأم والنونو الجاي بالطريق ههههه

گلتهه وبرزت شفايفي ليگدام بطريقه طفوليه وعاد هوه مصدگ تعال وبوسني وبعد امشن ولن ادبسزيات ماحچيلچن...

-جوري: عهههههههههه عااابتتتت

-شهد: ههههه لئيييمة

-هجران: ههه همزين من تصالحتو ان شالله تدوم عليكم السعاده حُبي جوهرتي

-جواهر: اميييين بَـس خلي هالحيايه يطلعن من حياتي ماريد شي والله

-هجران: ان شالله حُبي

دگ عليه عُثمان وگال ميت من الجوع ويريدنه نروح نتغده، طلعت وياه والبنات بقن كلمن تنتظر زوجهه..

وصلنه للمطعم وگعدنه ؏ طاوله وجاب عُثمان القائمه حتى نطلب..

-هجران: گلبي اني فد مرة صايره وماگدر احط لگمة بحلگي والله

-عُثمان: ول لا يُبا تاكلين وتشبعين ابني

-هجران: عثمااان ماگدر والله هسة اتقيأ هنا

زفر بقوه وراد يحچي وسبقته من گلت...

-حياتي أُكل انته وزنايب واني اخذلي سفري من اجوع آكُل بالفندق

-خوش

طلبلي ورجع يآكُل هوه وزنوبه واني اباوع عليهم، وهوه حبيبي كل شويه يريد يحط لگمة بحلگي حتى اشاركه يگول ميحب يآكُل وحده واني ارفض وماقبل آكُل..

رجعنه للفندق وصارت بوجهي هاديه گاعده بالريسبشن، عفتهه ورحت للغرفه، عُثمان وگف وگالي...

-عُثمان: هجران جري بَـس احاكي ابو الفندق وارجع

هزيت براسي وعرفت ديچذب لان انتبهت لـ هاديه اشرتله مبين تريد تحاچي، رجعت للغرفه والف حسبه وحسبه اجت ببالي وگلت اذا عُثمان ماحچالي كلشي دار بيناتهم ازاعله ولو يموت مارضى..

نص ساعه ورجع للغرفه، همزين زنوبه نامت حتى اگدر احچي براحتي..

-هجران: عُثمان شعندك ويه هاديه؟؟

بهتت ملامحه وكأنما ديگول شمعرفچ حاچيتهه...

-عُثمان: ماعندي شي

-هجران: متأكد؟؟؟

-طبعاً، البنت مجرد سألتني ؏ ابوا

-ومتعرف ترفع موبايل وتسأل اخوهه!!

رمقني بنظرة حاده وگال...

-عُثمان: ماريد اگلِك بشَنو حكينا

-وليش عيني؟؟

-لان ماريد اخجل البنت

-شحچيتو عُثمان؟؟!

-انسي هجران

-مااانسى!!

استغفر بصوت عالي وفرك وجهه، لحيت عليه حتى يحچي وگلبت وجهي عنه، اخير شي گال...

-عُثمان: گلتلهه تشيل فكررة زواجنه من راسهه!!

-مستحييييل هيچ گلتلهه؟؟؟؟

-ايي

-وهيه شگالت؟؟

-ما حكت شي

-گول والله

-هجراان شبيكيي!!

-عليك الله احچيليي

-عُثمان: صارت تبكي

-وبعدين؟؟

-گالت براحتِك الي يريحِك سوي

-ههههههههههههه هسة صارت تدور راحتك موووو

-صوووتِك!!!

-عُثمان من الاخر انته شنو رأيك بكلامهه؟

-ماعندي رأي والبنت كانت كثير مؤدبه ومالحت بالموضوع واصلاً حسيتهه خجلت من حاكيتهه

-ايي؟؟؟

-شَنو اي؟؟

-وابوهه بله گلك تزوجهه؟؟

-هجران گعد اگلِك البنت خلص تفهمت الموضوع وگالت تحاكي ابوا وتا لو راد يمشي بالموضوع هيه توگفو

-وصدگتهه انته؟؟؟

-اي

-شمعنه؟؟

-لانهه ماتكذب

-ومنو يگول متچذب؟!!

-أنَا لاني ربيت وياهه واعرفهه زييين مستحيل تذب روحهه بهالطريقه خصوصاً بعدما صارحتهه بمشاعري وگلتلهه أنَا ما نيتي اتزوجهه

سكتت لان حسيته كُلش ضايج او يمكن مقهور عليهه، اچذب اذا اگولكم ماغرت لو ماضجت بَـس شسوي ماكو بيده شي غير يحچي وياهه هوه ويفهمهه وعاد كون ان شالله فهمت..

وره يومين رحنه لشمال ايران عاد هنا الونسه الحقيقيه هههه، ماكو مكان مرحناله ورحنه لبحر قزوين وشگد تمنيت اسبح بَـس عُثمان ماقبل..

اجرنه ڤيلا حتى تكفينه وكُلنه نگعد بيهه والحمد لله چانت چبيره وحصلت غرفه كامله الي ولـ عُثمان بالطابق الثاني، چانت الساعه عابرة الـ 12 بالليل واحنه هلكانين تعب واحس عُثمان يلوب وكل ساعه لازم موبايله ويدگدگ ومبين الطرف الثاني ميجاوب...

-هجران: عُثمان شبيك حبيبي؟

-عُثمان: غيث مختفي

-اييي صدُك من البارحة مشفته وينه؟؟

-عُثمان: ماعرف هجران خايف كثير صايرلو شي

-لا اسم الله ان شالله ماكو شي، زين ليش متدور عليه بالمنطقه هنا قريب

-وتتوقعين الگاه؟

-بلكت الله واخذ وياك احمد وفيصل لو عميد الدين بعد بكيفك

هز راسه وگام اخذ موبايله وياه وطلع من الغرفه، واني رجعت تمددت ؏ الچربايه انتظره وادگدگ لزنوبه حتى تنام..

مرت فوگ الساعه وهمه ماكو، دگيت ؏ عُثمان يكول گلبو الدنيا ومختفي واحس الرجفه بصوته واضح خايف ؏ اخو..

-هجران: يا عمري اهدأ ترا غيث مو طفل

-عُثمان: اوووف غيث اضرب من الطفللل

-عوفه عُثمان وارجع هوه شوكت ميعجبه يجي

-عُثمان: يوليي أنَا مايهمنيي ايمت يرجعع أنَا بَـس اريد اتأكد انو بخير

-وهسة شنو حتسوي؟

-گلت للشباب نروح للبحر يمكن نلگاه هنيك

-حيييييل شيوديكمم

-مادري هجران والحمزة راسي راح ينفجر

-اسم الله دير بالك ؏ نفسك وانتبه ؏ جهازك حتى من ادگ عليك تجاوب

-صار، يله مع السلامه

-الله وياك

سديته منه ونيمت زينب بجهة عُثمان واني رجعت ؏ جهتي، سويت تسبيح شويه حتى يبرد گلب عُثمان ويهدأ، اني ادري لو غيث صارله شي عمو خليل يذب الصوچ كله براس عُثمان ويكرهه عيشته!!

بينما اني متمدده اسبّح وحسيت هستوني دا اغفى وانچفت عليه باب الغرفه، انداريت ؏ جهة الباب وتوقعته عُثمان كالعاده بَـس انصدمت من شفته غيث!!!

طفرت من مكاني فد طفرة وركضت ؏ عبايتي لبستهه ؏ راسي وصحت...

-غيييث شعنددك هنااا

ضرب گصته ؏ كيف وهمس...

-غيث: اخخخ عبالي حجرة جواهر

-شنوو؟؟

نتر بين سنونه..

-غيث: حسسسچ عاالي

-هجران: غييث ترا عُثمان تخبل عليك ديدورون كلهم!!

-غيث: حتى عميد الدين؟؟

-اييي

-چا زين

راح لباب غرفتي وطبگهه، جسمي صار يرجف وفوراً بطني خبطت من الخوف، رجعت صحت بصوت اعلى...

-هاااي شبييييك

اندار عليه وحط اصبعه السُبابه ؏ شفايفه وهمس بلسان ثگيل وعيون طافيه...

-غيث: اسسس چلمة زايده واگولن لعثمان انتي الصحتيلي بحجرتچ وتنفضحين وتنشهرين وجيبي اليصدگچ

-عززا بعينييي لك لييش

-بكيفييي ويله هسّ اريد احاچيچ

-اطلع غيث فدووه اخاف يرجعون ويفتهمون غير شي حباب عليك الله

-غيث بنتر: ولچ صخام اريد بَـس احاچيچ چلمتين

-هجران: نحچي بره بالصاله حبااب

-چؤؤ

سوه هالصوت بحلگه ورفع حواجبه ثنينهن، واگف ؏ الباب وساند ظهره عليه حتى خاف اريد اهرب واني هنا ارجف مثل السعفه وانخى ام البنين بگلبي ميجي احد وننفضح...

-غيث: من گتلچ ادعيلي مادعيتيلي صحح؟؟

-شنوو؟؟؟

-غيث: من چنه بالسطحح وگلتي ادعييلك شو كلشي ما اجاانيي

يحچي گوة وعيونه من وحدهن ينطفن عرفته سكران لو مكبسل خرب عرضك حتى هناا..

-هجران: والله دعيتلك والله

-غيث: ويين شو كلشي ماكوو

-هجران: شسويلك غييث شنو تريدني اسوي يعني اني!!

-غيث: اريد البااالي

-هجران: الله ينطيك البالك بَـس افتح البااب حبااب ترا والله اعيط والله

-غيث: انتي جربي صيحي وشوفي شيصيرلچ

واگف گدامي يهدد بكل جسارة، فكرت اعيط واللم عليه النسوان الي هنا بَـس هم خفت خاف يتوعدلي بغير شي لو يلفق عليه حچي والله كُلشي يطلع من عنده هذا...

-هجران: الله ينطيك التريده

جر حسرة عمييييقه شگت صدره وگال بقهر...

-غيث: اريدن جواهر

لطمت خدي وصحت ؏ كيف...

-لطااام بوجهچ هجرااان لك جواهر متزوووجة ابن عممك

-اييي مايهمني اريدهه

تقدم ناحيتي واني ابتعدت ؏ الحايط، رجع گال...

-غيث: هسّ اريدچ تدعيلي حتى تحبني وتبادلني

-هجران: شنوووو

-خايبه شمالچ فاهيه انه عاشگ جواهر

-ولكمم شبيكم ويه البنيه لخااطر الله يعني تزوجتت ومخلصت منكمم

-غيث: اشششش انطمي انتي!! اصلاً انه شحابني لحجرتچ اريد حجرة جواهر وينهي؟؟

-شتسوي بيهه؟؟

-اريدهه ومايخصچ

-غيث روح نام انته مبين مو بوعيك روووح

-انچبي ومايخصچ دليني ؏ حجرتهه لو جيبيلي غرض منهه

-شتريد؟

احچي وارجف لان كُلش صار قريب عليه..

-غيث: اريد تجيبيلي ملابسهه الداخليه بسس هااا تكون لابستهم

-هجران: عزززا يمممه عززااا

-وجعععه

-صخاام بوجهيي انته متستحييي

-مااايخصچ گلتتت

كل كلامه ينتر وعيونه كل ساعه تتگلب، غميت روحي بداخلي الف مرة لان اخذت الغرفه الفوگ وهيه الوحيده هنا حتى اذا اريد اصيح يمكن ميوصلهم صوتي..

-غيث: هااا تجيبيلي لو تدليني ؏ حجرتهه؟؟

-هجران: بَـس فهمني شلون تحب وحده متزوجة؟؟؟

-ولچ غير دولبتني هذاك اليوم

گالهه وگعد ؏ الچربايه، ظليت واگفه بمكاني وعيني ؏ الباب حتى اشرد، جاريته بالحچي...

-شسوت هذاك اليوم؟

تنهد وگال بتعب...

-غيث: چنت جاي لبيت عميد الدين وهوه مو بالدار ويا بويه اشتعلو شفتهه جاي تسبح

-صخاام شلوون

-شني شلوون انتي شيخصچ!!!

سكتت والصدمة احتلتني خصوصاً من صار يحچي بمواصفاتهه ومفاتنهه، يحچي واني ارجف خوف منه الله ياخذه هذا شلون شافهه، همست برجفه...

-هجران: هيه تدري بيك شفتهه؟؟

-لااع

-لعد شتسوي بيهه اخذ وحده تحبك هيه تحب عميد الدين

-ااخخخ يا عميد الدين اخخخخخ ماخذ كل الحلاوة وعايفنه بالضيم

مشيت ؏ كيف بأتجاه الباب وگلت...

-غير مرته يا غيث انته شبيك

-اي اريدهه انه

-انساهه لان مراح تحبك

-مايهم انه اريدهه

-انته تريدهه علمود جمالهه صح

-لااع تعجبني بكل شي حتى من تحچي والعباس افول

صفنت عليه وتخيلته بكر گدامي، نفس اسلوب بكر ونفس التصرفات ونفس العشق الشايله تجاه جواهر، حسيت وكأن الزمن ديعيد نفسه ومكتوب ؏ هالبنيه الشلاع الگلب، قاطع صفنتي من گال...

-غيث: هسّ تجيبيليي هدومهه لو تدليني حجرتهه

-هااا

-ولچ شنييي نايمه انتي

-لا لا احم اءء اي هسة اجيبلك ملابسهه

-لا دليني حجرتهه احسن

-لا شنو هسة يجي عميد الدين وتنفضحون

-چا يله ولي جيبي

عبرت الچربايه وطفرت عليهه حتى اركض لباب الغرفه وفتحتهه بسرعه، صار بوجهي اخررر انسااان اريد اشوفه بالوقت الحاضر چان گبالي يباوعلي بقلق وگال....

-ماعرف شنسوي

بهالاثناء وطلع غيث من غرفتي جحظت عيوني وكأن شريط حياتي كله مر من گدامي واني اشوف حمايه يطلع من غرفة نومي بهيچ وقت بالليل....

يتبع💋...

♛ ♛ ♛ ♛ ♛ ♛ ♛ ♛ ♛ ♛
توقعاتكممم 🥲💞
لتنسون التصويت والتعليق بين الفقرات حبايبي 💞

تابعو هالبنوته سوت ويايه مقابله بكتابهه احچي بيهه تفاصيل اكثر عني هم تابعوهه اذا تحبون 🤍 flower-lotus