رواية شوگ و ورد الفصل الحادي والعشرون 21 - بقلم wad. al.Basha

للكاتبه: ود الباشا

‏"لا سبيل للمقارنة، فكل شيء نَعيشه دفعة واحدة، مرة أولى، وبدون تَحضير.."

غسق: ماسالته بعد وصلنه لبغداد راح لبيت اهله شفت ابو ورائد واكفين بلباب
التفتلي

ارشد: دخلي جوه

غسق: ليش ماخذتني للبيت؟

ارشد: غسق مو وكتج رحمه لوالديج دخلي وبعدين افهمج

غسق: دخلت مكدرت احجي ويا حرف زايد خفت يزمخ بيه بنص الشارع ورائد الحقير يتشمت بيه
شفت خاله واكفه اباب الصاله وتفرك بيدها متوتره
سلمت عليها حضنتني وبوستتي

ام ارشد: زياره مقبوله حبيبتي

غسق: يتقبل الله اعمالج كعدنا وهيه بعدها على نفس توترها مكدرت اسكت الفضول اكلني شديصير
خاله اكو شي اوضاعكم مو تمام

ام ارشد: لا دوخين راسج كومي ارتاحي تمددي شويه

غسق: لا مرتاحه اريد ارجع للبيت

ام ارشد: ابقي كم يوم عدنا لا ترجعين هسه

غسق: صاير شي

ام ارشد: مادري منو متهجم على بيتكم ومكسر كل الغراض

غسق: يعني شنو حرامي

ام ارشد: مامعلوم

غسق: شاكين باحد انتو ؟

ام ارشد: يكولون ريتاج وثامر خابرت امهم سألت عليهم عبالي جايين لبغداد طلعو بيتهم وبقينه مامتاكدي ارشد يكول جماعة ثامر
هسه يردون ياخذون كامره الجوارين علمود يتاكدون

غسق: سكتت خايفه اكيد السالفه وراها مشاكل دخلو عمي ورائد لمحت ارشد من الشباك بلحديقه يفتر ويخابر صوته واصل لسابع جار

ام ارشد: بشر شسويتو

ابو ارشد: ماسوينه شي منتضرين الكامرات

غسق: رائد يباوع عليه بخزره عبالك حارگه بيته درت وجهي منه وگمت طلعت للحديقه وكفت علما خلص مكالمته راح نبقى اهنا؟

ارشد: حالياً مأمن عليج غير اهنا فتره بين ما الكي بيت وارتبه

غسق: ليش تغير البيت

ارشد: من كل عقلج ارجعج بي اذا هلمره عدت سلامات ومكسرين بس البيت مره ثانيه يكسروج ويا البيت

غسق: تعرف منو ؟

ارشد: شاگ مامتاكد اتاكد يلا اكدر اتصرف

غسق: عووفه هو وربه يتجازه الصار صار لا تفتح باب مشاكل رفعلي حاجبه

ارشد: روحي ارتاحي ولا تفكرين بهلسالفه انه طالع محتاجه شي

غسق: سلامتك عافني وطلع كعدت وراسي مصدع
افكر بكلامه الصبح لوو الصاار هسه جريت نفس حسيت احد وكف قريب مني رفعت راسي رائد كمت ادخل جوه وكفني كلامه

رائد: هذه شي بسيط الجااي اكبرر بهووواي لهلسبب طلبت منج تنسحبين من حيااته

غسق: متتعب من التهديد انت خله ايده بجيوبه
وتقرب

رائد: انه مامهدد افهمي الكلام وبعدين احجي الديصييرر حذرتج منه وادعي ربج مايصير الاكثر

غسق: كلشي اتوقع من امثالك

رائد: تتوقعين ائذي اخوي ؟

غسق: الله العاالم عفته ودخلت بسرعه شارده منه دخلت للغرفه القديمه الجنت بيها ذبيت صايتي ونمت تعبانه وحتى راسي صدع مداكدر افكر بشي للعصر يلا كعدت على صوت صياح كمت بسرعه لفيت حجابي ولبست الصايه وطلعت رائد لازم ارشد صاير جمر

رائد: خليناا نفتهمم لخاطر الله

ارشد: داكلك هووو وجماعته شفتهم بعينييي

رائد: لا تكبرها ارشد فكر بعقلك خلي الوالد يروح يحجي ويا ابووو

ابو ارشد: لخاطر العشرره ارشد لا تسوويها دماايه بيناتنه تالي عمرنا

غسق: كعد وجه صاير اسود من العصبيه محجيت ولا حررف

ارشد: بطريقك كله بنته لو يصبهاااا ذهب بعد ماااريدها كاافي تحملتها هلسنين

رائد: اهدى هسه انت عصبي ومدتعرف شتحجيي

ارشد: لااا اعرف كلش زين ماترجع على ذمتي مااريدها كووووه

ابو ارشد: ياابه اهدى عليش هلعصبيه البيت فدوه الك
والتريده يجرالك

ام ارشد: ثامر فقير مايتصرف من راسه بس عندك ريتاج العررمه هيه وراء

ابو ارشد: يااا مره نريدددج عوون مو فرعووون

ارشد: مكالت غير الحقيقه هلخنيث متيتصرف من راسه اذا مو اخته البربوك وراء

رائد: كاافي نازل غلط علعالم وتره انت هم غلطان

ارشد: بشنووو غلطاااان لا تخبلني فوك مامتحمل بنتهم العرمه هلسنين وساكت وبالعها اطلع انه الغلطان ماتاكل تبنن حضرتك

رائد: كل احنا ندري غيره ريتااج عليك وانت بيوم وليله رحت تزوجت عليها وهملتها وهجرتها تره كلنا متوقعين هلردة الفعل منها

ارشد: انت ليش مصر ادافعلها وطلعني الغلطااان
براااسك قندرره مدتفتهم الحجييي

رائد: طبعا انتتت غلطان بيوم وليله جبت عليها وحده لا تحجيييننييي ابديلك من عمامها لو اخوها غسلت مخك علئ مرتك وخررربت بيتك وانتت بلذاات تعرف شكد تحبك وتغار عليييك حرگت گلبها شتررريد تاخذك بلاحضان مثلاً ردة فعلها طبيعيه

غسق: الدمعه وكفت بطرف عينيي من كلامه

ارشد: لا تخليييني اكوووم اخلي القندره بحلك طااااايح الحظ مرررره ثااانيه اذا حجيييت ويايي بهلطررريقه انسى انت اخوووي

ابو ارشد: احترررموو يا ولدي يا عزوتيي تاليتي ولدي كدامي ومايحترمون شيباتي واحد يتجاوز على الثاني

ارشد: محشوووم يابه بس الظاهر رائد صاير مايوزن كلاامه ويراد اعدل السااانه علموود يعرف يحجييي

غسق: عفتهم ورجعت للغرفه دميي محروك اعصابي تفوور تمنيت الموووت
نفتحت الباب دخل بكل ثكل وهدوء ولا كأنو صاير شي
كعد مقابيلي

ارشد: الله اليستر اليوم من الصبح مبين خرا بخرا شبيج انتي الثانيه

غسق: جبرررتك اني تتزوجني ضربتك علئ ايدددك
ليش تحسسوني اني خربت بيتك وحياتك السعيده اني الدمرتها طبگ حواجبه

ارشد: شدتحجين يا حياة خربتيها انتي

غسق: كلاام رائد

ارشد: ماعليج منه يحجي بكيفه

غسق: شنوو هو يحجي بكيفه اني ماجبرررتك انت الجبرتني كام وكف

ارشد: الله يصبرنيي يابه علشنووو جبرتج شقصتكم انتوووو ناويين عليه اليوم

غسق: كمت وكفت صرت مقابيله كزيت علئ اسناني اعصابي تفور مداكدر اسيطر علئ نفسيي انتتت الجبرتنييي علئ كلشييي انييي مجبوره اسمع هلتفاااهات واسكتتت بسببك رحت ونكسرت رگبتي وردت اشوووف دربيي ولاحگتني

ارشد: تااااالي لشووكت تعيدين وتصقلين بنفس الموضوع مااامليتيييي حااولي تتاقلمين هلحجي كله ميفيدددج اما بنسبه للكلام تره انه مساكتتت
بس انتي دائمااا كلااامج سم ماييوووم سمعتيني حجايه بيها خيررر وساكت واكول ميخالف اول وتالي تتعووود

غسق: بعمري مراح اتعووود علئ شي انجبرت عليه
وفوكاها خربت حياة غيرري

ارشد: براحتج لا تتعودين اصبري كم يوم اشوفلج بيت كعدي بي وكملي دراستج ولا تحسبيني موجود بحياااتج شتردين اكعد اتوسل بييييج
غلطانه هسه اكدر اشمرررج وترجعين تفترين من بيت لبيتتت بس كاسره خاطري لأن غبيه وراح تضيعين ومايهون عليه تخربين اسم ابوج الله يرحمه

غسق: عافني وطلع بعصبيه كعدت شسوي؟
اسأل منو؟ مسحت دموعي كلامه اذاني بس صحاني نوعاً ما يشمرني واخرب اسم ابوي عمو مراح يستقبلني شي خلصانين منه وخاله ام مسره يمكن من الباب تطردني واكيد راح اصفى بلشارع والشارع يسحبني لطريق مسدود جريت نفس وطلعت اريد اطلع حتى من ملابسي من الخنكه بصدري كعدت بلحديقه وسحبت رجليه لصدري وبقيت اباوع على السما جانو قبل من واحد يموت اتذكر يكولون روحه تصعد للسما والروح تبقى تباوع على عائلتها متاكده دتشوفوني ساعدوني بابا اني ضايعه بدونكم مداعرف اتصرف مداكدر افكر
سمعت صوت حمحمه درت وجهي غسان ابتسم واجه كعد يمي

غسان: الله بلخيرر يابه وين هلغيبه

غسق: الله بلخير انت الغبت وماكوو

غسان: ليش تبجين صاير شي؟

غسق: هزيت راسي لا بس مخنوگه شويه

غسان: غسق نصيحه من اخ حافضيي على ارشد
تره رجال والنعم منه ومعليج بلحجي وبنسبه لزوجته تره مشاكلهم من زماان مو اليوم والبارحه ولا تفكرين بسببج من شفتهم وشافوني همه يتناكرون وييوميه جانت زعلانه وابوها يرجعها وارشد يتحملها يكول لخاطر ابوها وابوي بلكت تعقل بس هيه يوم بعد يوم تستخف اكثر ومحد بعينها

غسق: ليش كلام رائد يختلف؟
دائماً يحسسني بكلامه اني السبب واني الخربت حياتهم

غسان: مالج علاقه بي خلي يحجي من يوم يومه خبيث ويغار من اخو مو شي جديد كلها تعرفه

غسق: كلامه يجرح غسان ياذيني حيل بكلامه متقصد

غسان: وانتي مثل الحبابه ترحين اطلعين حركه گلبج بارشد

غسق: هزيت راسي اي

غسان: هو هذه غاييته داكلج يضوج منه مايحبه ينسعد يريده دائماً مشاكل واكلان خره
غسق انتي اختي الله شااهد انه اعزج واحترمج واريد مصلحتج من دانصحج فعلياً اريدج ترتاحين مالج علاقه بيهم زوجج ديدور على بيت يكعدج بي بسبيل يبعدج من المشاكل ويخلي راسج بارد لدراستج
وديريد يرجعج لدراسه باي طريقه علمود مصلحتج ومستقبلج لليوم مامسمعج حجايه تغثج شنو التردي اكثرر؟
فكري بعقلج ولا تضوجين من كلامي انتي ماعندج احدد وعمج واحد عاار واصلاً حرام تسمي عم
وين ترحين اذا ارشد عافج؟
تعرفين شكد صعبه بمجتمعنا البنيه تعيش وحدها تعرفين الحجي اليطلع عليها شلون ادبريها

غسق: بس اني ردت اكمل قاطعني

غسان: لا تفكرررين بأحد تره محد يفكر بيج بوكت عازتج فكري بنفسج وبسس

غسق: كلامه قنعني وخلاني اراجع روحي وافكر الف مره بلگلمه الحجيها

رائد: اليوم اهنا غسان

غسق: التفت عليه حاط ايده بجيوبه ويحجي ابتسامه صفره على وجه

غسان: اي والله اجيت اشوف غسق شمحتاجه ممحتاجه

رائد: خير ان شالله ابوك يدور عليك

غسان: اترخص

غسق: راح غسان كمت ادخل جوه مااطيق المكان الموجود بي

رائد: عندي كلمتين وياج

غسق: ماااعندي اي كلاام وياك

رائد: مسكينه انتي تدريين؟
عبالج ارشد يحبج وميت بحبج وجاي يتصرف وياج بهلطريقه من فرط حبه الج غلطانه

غسق: وين تريد توصل وليش مصر تشوهه صوره اخووك كدامي

رائد: اخووي ديستغلج علمودد ورثج

غسق: طبگت حواجبي يا ورث مو خليل باعه كله؟
رجع ابتسم

رائد: وانتي صدگتي اصحي على روحج

غسق: عافني ومشى خطوتين اووكف دقيقه شمدريك بهذه الحجيي؟

رائد: روحي اسألي وانتي راح تعرفين كلشيي

غسق: جذاب انت واحد حاقد متروس سم
تقرب مني عيونه براسه

رائد: اي صح حاقد عليج وعلى تصرفاتج الدتسويها
تاليتج تنشمرين شمرة الچلب

غسق: لا تتجاووز واعرف حدك لا تخليني اتجاوز علييك

رائد: جرربي علمود افرگلج حلگج بنت القندره تتجاوز

غسق: لاااا تغلطط خوووش ماكووو غيرك قنددررره
انت لو مو عاار ماتغلط على رجال مييييت
دفعني ررفع اصبعه بوجهي

رائد: سهله انه اعلمج اذا ماكسرت عينج ماتسمى

غسق: عافني وراح بقيت واكفه بمكاني ممستوعبه الصار ليييش هلكثر حااقد ليش
كعدت بمكاني حسيت رجليه بادن من الصدمه
سمعت صوت خطوات ورايه التفت ارشد وخاله وكفو يمي

ارشد: ليش كاعده اهنا؟

غسق: لازمتني العبره بلكوه احجي مخنوكه طلعت شويه اشتم هوى كرفص كدامي

ارشد: صاير شي ؟

غسق: مجاوبته خاله حجت

ام ارشد: ارشد ماتطلع منا علما تحل كلشي تره ماقبلك تزعلها انه اوكف بوجهك

غسق: باوعلي وابتسم نسيت ضوجتي وقهري وانتبهت على ابتسامته خطفت گلبي بلعت ريگي

ارشد: شوفي شلون اخذتي معزتي تعزج وتحبج اكثر مني مخلتني اشوف دربي شلون مزعلج وطالع

غسق: ابتسمت وكمت بست راسها

ام ارشد: عزيزه عليه الله شااهد

غسق: وانتي غاليه على گلبي خاله والله ربي يحفظج وينطيج الصحه والعافيه
باستني وترخصت تقرب مني لزم ايدي

ارشد: وجهج مايبشر بخير صاير شي

غسق: باوعتله ردت احجي ودگ موبايله

ارشد: هلا. يابه بلبيت انه
صار دقايق واجيك

غسق: شمر جكارته طفاها برجله

ارشد: شويه واجيج ماتاخر اشوف الوالد

غسق: اخذ راحتك

ارشد: امشي وياي لا تبقين اهنا

غسق: خليني مخنوكه والله اشتم شوي هوى واجي ماحجه شي راح رجعت كعدت كرفصت رجليه منو الصح ومنو الغلط؟ كمت حتى بنفسي اشك معقوله ديستغلني علمود ورث بس هو كال خليل ممبقي شي بايع كلشي زين شنو هلسر الميريد احد يعرفه ويريده يندفن بينه وبين اهله
جريت حسره طويله على نفسي وعلى اهلي الضاعو مني بيوم وليله كمزت على صوت عيطه بأسمي وطلع ارشد اعصاااب الظاهر اليوم مناوي يعدي على خير اجوي وراء عمو وخاله و رائد وكف يم باب الصاله مجتف ايده بلعت ريگي بخوف
وكف كدامي وشياطين الانس والجن كلها تكمز على راسه

ارشد: انه متزوجج علمووود ورثج؟

غسق: منو كال هلحجي حجيت بخوف الموقف بنسبه الي مرعب عمو واكف خازرني خاله تضرب ايد فوك ايد متوتره والحقير يباوع عليه مستهزء

ارشد : مااااعليج منوووو كاااال انتييييي هيج حاجيه لوووو لا

غسق: هزيت راسي لا ماحسيت الا لزمني من زندي ويهز بيه

ارشد: لاااا تجذبييين ليششش تردين تخربين صورتي باي طريقه كدام العالم فهميني هاااي جزاتي حبيتج ولميتج ومااااردتج اتضيعييين وتضيعين نفسج

غسق: انيي محاجيه هيج شي بكيفك تصدك او لا ماحسيت الا على راجدي خله خدي نار ماتحملت صرخت عليه باااي حق نضربني تمد ايدك عليييه؟

ارشد: واكسر راسج لج چلبه صابر عليج واكول ميخالف تاليتها تصير ادميه

غسق: مسحت دموعي احس گلبي راح يوكف من الغصه والقهر ادميه غصب عنك ومحترمه نفسي لااا تتجاووز وبعدين انت مو بنفسك كلت خليل باااع كلشي قبل لا يموووت اني شلون هيج اكول واصلاً المن اكووول

ام ارشد: صلو علنبي ماتنحل هيج دخلو جوه خلونه نسولف براحتنا

ابو ارشد: ماااكو اسوالف من الاخير هلانسانه ماتبقى على ذمتك ولا اريدها ابيتييي طلكها وارجع مرتك وتگف هلمشاكل كلها

غسق: بقى يباوعلي مكدرت افسر نظراته
التفت على ابو بدوون ماتحجيي اني بعد دقيقه مابقى اهنا اليوم قبل باجر اطلگنيييي عفتهم ومشيت وكفت كبال رائد حسبي الله علييك اذيتني بدون سبب دخلت للغرفه لبست صايتي وطلعت لاگتني خاله
لزمت ايدي

ام ارشد: بنيتي العاقله الحبابه لا طلعين وكت عصبيه
لا تاخذين على كلامهم

غسق: خاله الانسان يبين معدنه بوكت عصبيته كلشي انتهى عفتها ردت اطلع ودخل ارشد شافني طفر عليه لزمني من ايدي قوي

ارشد: وييين؟

غسق: كزيت على اسناني دقيقه مابقى وانتتت اذا رجال من صدك اطلگنييي
قوه لزمته على ايدي اكثررر.

ارشد: فوك شينج كوه عييينج

غسق: ماااعندي شيين مو ذنبي اذ تروح تصدگ بكلااام اخوك الحقير

ارشد: لا تتجاوزييين

غسق: دتاذيني عوف ايدي دفعني وزمخ علييه

ارشد: جرررربي اطلعيي خطوه بره هلبيييت وشوفي اليجرااالج

غسق: عافني وطلع تقربت خاله وكفت يمي
لا تبررين خاله الله عليج لا تحجين اني مابقى اهنااا لو اموووت لا يهمني هو ولا تهديده مايخووفني
عفتها وطلعت وصلت للكراج كاعد ويا ابو ورائد ماهتميتلهم وصلت لنص الكراج انسحبت من ايديي

ارشد: شكلتتتتت انه

غسق: واني كلت مابقى اهنا دقيقه وحددده

ارشد: غسق انعلي الشيطان ودخلي جووه بعدين نتفاهم

غسق: ماكووو شي نتفاهم عليه كلشي صار من الاسااااس غلط وهذه الغلط مامفروض يستمررر لهنا وانتهى كلشيي

ارشد: مووو بكيفج تقرررين

غسق: بكيفييي

ارشد: امشيي كدامي

غسق: ماااامشي اررريد اروح
سحبنيي من ايدي بره ومحد كلف نفسه يحجي ويا يعوفني فتح باب السياره دفعني بيها وطبك الباب بقوووه ركب شغلها

ارشد: وين تردين اخذذذج؟

غسق: مااايخصك اني اروووح

ارشد: شلووون مايخصني تردين تخبليني انتيييي غيررر اخليج عند واحد من اهللج باجر عكبه شيكولون شمر مرته بلشااارع وتصخمين وجهي فوك ما هو مصخم

غسق: بقيت مدمعه لا دمعتي تنزل ولا كلمتي تطلع
زمخ بيه بعلو صوته

ارشد: احجييييي لا تسكتييين

غسق: طفرن دموعي اخذني لبيت عمو

ارشد: انعل اليوم الشفتج بي لا تخلينيييي انعل عممج واكعد اقسم علييييييه

غسق: لاااا تصرخ انتتت البديت انت المديت ايدك وتجاوووزت بدون ماتسمع مني

ارشد: لج قندره شتجاوززززت رايحه كايلتلهم متزوووج علمووود ورثج؟
وترديني اسكت

غسق: اني ماحجيت هيج هووو اجه كااال ارشد تره عنده غايه وياج ومتزوجج علمود ورثج والله وگبر بابا هو گال وكف السياره على صفحه ورثه جكارته ورجع راسه ليوره

ارشد: التردي شنووو؟

غسق: مااريد شي بس ابتعدوو عني
ماحجه شي حرگ السياره وصلنا يم بيت اشرلي نزلت
نزلت طلع المفتاح فتح الباب بيت كامل بس مترب مبين متروك

ارشد: فتره تبقين اهنا علما اشوف غيره

غسق: اريد اشتغل

ارشد: گطنه وتشيليها من اذنج
تكملين دراستج والله كريم

غسق: ليييش تحرك دمي ابرود اعصابك. التفتلي خازرني

ارشد: يا برود اعصاب شتردين يعني اكمززززز كبالج علموود ابينلج طييحان حضي

غسق: عفته ودخلت للمطبخ سمعت ركعت الباب عرفت بي طلع اخذتلي صفنه علبيت مابيه حيل اكوم انضف احسس جسمي متكسر من القهر تمدد علقنفه صافنه بلديصير وياي وغفيت بمكاني فزيت على صوت موبايل باوعت مو جهازي دخلت للمطبخ شفت جهاز ارشد بس هو ماكو شوي ونفتحت الباب بيده علاليك خلاهن على الطبله

ارشد: حضري الاكل رايح اغسل

غسق: كعدت اصحصح شويه احس النومه بعدها بعيني
اجه شافني كاعده باوعلي صفح بس ماحجه كف اردانات قميصه واخذ العلاليك يطلع بيهن عوفهن شويه اصحصح واحضره مجاوبني كعد اكل قرب الصمون عليه

ارشد: اذا صحصحتي مدي ايدج

غسق: مكدرت ارفض لان جوعانه كلش

ارشد: بعد الاكل عندي وياج موضوع لازم نكعد نحجي ونحله

غسق: هزيت راسي وبداخلي فضوول قاتل خلصنا راح كعد بلصاله شوي وصاحني رحتله كعدت مقابيله

ارشد: خليل صح باع اغلب ورث ابووج بس مو كله

غسق: شلوون مو كله مو اني سئلتك وكتلي صفى على الحديده

ارشد: انطيني مجال اكمل عمج محمد جان ناوي ياخذ
حقج واضطريت اكوول خليل بايع كلشي علمود يبتعد منج ومايسحبج مصلحه
السندات كلها عندي وكلها الج

غسق: بأي حقج ماتنطيني خبررر وتصرف بكيفك

ارشد: كتلج ماردت عمج يستغلج

غسق: كمت وكفت شعلييييك يستغلني او لا شلك علاااقه

ارشد: صوووتج انه سويت كلشي علمووودج لووو عايفج تضيعين غسق ورب العزه تضيعين
من حبي الج تصرفت مثل الام التخاف على ضناهااا
انه مو بس احبج انه واصل مرحله بيج حتى بعز دوامي افكر بيييج لا تتوقعيييين سويت هيج وحافظت على حقج طمع بيج اذا تردين انطيج اضعاافهن ماتهمني الفلوووس انه شاريج رايدج الج

غسق: كعدت مخنوگه مجاوبته بعد ماحجيت شي
شنو الاكوله اصلاً بعد الحجي مايفيد بشي تقرب مني كعد بصفي حضني كمت بسرعه رجع سحبني

ارشد: لشووكت تردين تشررردين ممكن اعرف ؟
ترضين ماترضين انه زوجج والي حقوق عليج
وهلسالفه كعدت حجيتلجياهاا علمود اريح ضميرري وبس باجر رايح للدوام من ارجع اريد كلشي يصير طبيعي مو من تشوفيني بمكان تشردين لغيره

غسق: مجاوبته

ارشد: لا تبقين ساااكته احجيييي ريحي گلبي لا تعبيني غسق زين براحتج

غسق: اخذ سويجه وباكيته وكف

ارشد: راجعي نفسج وامووورج تره هلمرره انزل من دوامي هذه الوضع مايعحبني انه

غسق: دار وجه وراح حقيررر ابو عين الوصخه يعني بوكتها مكالي اكو بيوت خليل مبايعها علمود ابقى ملطشه جوه ايدده واقبل بي والله الا احرگ دمك مثل ما حركتني وحركت دمي بسيطه اني الك جريت نفس ومن قهر كلبي كمت نضفت البيت كله واحس بعد عندي طاااقه دك جهازي كمت شفته هو المتصل دك 3 مرات يلا رديت

ارشد: نايمه

غسق: اي انتضر من اكعد ارد عليك

ارشد: قفلي البيبان مرراح ارجع ومنا اطلع للدوام عفتلج افلوس بكاونتر المطبخ اذا احتاجيتي شي وراح ادزلج مسواك باجر

غسق: بسلامه

ارشد: الله يسلمج مرتي العزيزه

غسق: كطعته بوجهه مستفززز يحرك اعصااابي بطريقه كلامه شمرت الموبايل رحت شغلت التلفزيون ماكو شي عجبني اخذت الموبايل فتحت فيس بقيت اگلب هم ماكو شي عاد نمت بمكاني لنص الليل كعدت من برودة السبلت دخلت للغرفه تغطيت ورجعت نمت
مرت الايام ممله يوميه يخابرني يسألني على احاوالي ويگطعه احس البيت ديخنگني مليت اخذت الموبايل طلعت اسمه وبقيت اقره قاله باله برتقاله اتصل لو لا اتصلت بسرعه جاوبني

ارشد: الشمس منين طالعه اليوم

غسق: خابرتك انطيك علم اريد طلع مخنوكه

ارشد: طلعه وحدج ماكو

غسق: انت كلشي يمك ماكوو صوجي اني خابرتك

ارشد: لوو يمج جان طيرتلج االضوجه

غسق: قصدك جان زدته عليه هو انت وجهك يجيب الكأبه

ارشد: اخذي راحتج يابه السانج طولان لو بس عضلاتج تطلع وره الموبايل خليني اجي واشوفج منو وجهه يجيب الكأبه

غسق: اروح يم خاله

ارشد: لا اصبري 3 ايام وانزل انه اخذج

غسق: اكلك مخنوكه دكلي 3 ايام منو يكول عايشه اني لهل 3 ايام.

ارشد: تاكلين راسي وراس عشيرتي لا تخافين

غسق: اييع هو اني راس الباجه ماكلها ادور اكل راسك
طكها بضحكه

ارشد: بنت اللذينه تجيببن راسي لراس حيوان والله لو يمي جان عرفت شغلي ويا لسااانج

غسق: شنو الفرق يعني

ارشد: راحت الضوجه منج لووو بعد؟

غسق: بعدها اروح لبيت خاله ام مسره خابر غسان يجي ياخذني حباب

ارشد: لاا اكعد واسكتي راح احاول انزل مجاز

غسق: ليش تنزل خليك بشغلك ميصير ادور يعاقبوك

ارشد: عادي يعاقبوني المهم انه انزل اعاقبج الج

غسق: اروح انام احسنلي يلا اخذ راحتك

ارشد: هيج على الناشف الله وياك بوسه معطه كولي الرجال صارله اسبوع جفاف

غسق: ان شالله تبقى طول عمرك جفاف اني شكووو يلا بااي كطعته بوجه وتمددت ارتاحيت من نصبت عليه اجتني رساله اتوقعت هو بس طلع رقم غريب
مكتوب عندي الج خبر تشتري بروحج وينقذج من كلشي

يتبع<>
للكاتبه ود الباشا

"يُشفق المرء على نفسه عندما يدرك ان كل اذاه منبعه من سوء اختياراته، وانه عندما سعى لكسب سعادة اضافية فقد كان ينجرف لا اراديًا لحزن عظيم."