رواية شريعة العشق الفصل الاول 1 - بقلم نورا ناصر

سلام لأحلى متابعين ..
اليكم مشهد من رواية (في شريعة العشق )
نبدأها بخاطرة بقلمي ..

في شريعة العشق كيف لي ان لا اكترث اليك
كيف لي ان لا اخضع لهيامُك وادنو من قلبك
لم اتعمد ان احبك لكن حبك تعمدني
وتورد في داخلي .. وشاءَ هواك ان يغمرني كالمد الجارف فملئ قلبي الى حافته فما عاد هناك من متسع  لمشاعر أخرى لسواك انت ..

كنت كاعدة بغرفتي مثنية رجليه ومخلية كتاب التاريخ على ركبي اتصنع القراءة بس بالي بغير مكان مشتاقة اشوفه اشوفه وبس حتى من الشوف حرموني منه ..

انفتحت الباب ودخل هو اي هو !!وكأنه شوكي ناداه وجابه لعندي اترس عيوني بشوفته واكحلهم ..

__  ها ولج اني اعرف عمي عنده ٣ بنات شو دااشوف بس اثنين والثالثه ماكو شنو زعلانه عليه واني ماادري؟

طفرت من السرير ووكع مني الكتاب ع الارض
كلتله اطلع برا اني انطيت وعد لامي بعد
من تدخل للبيت مااتواجد بنفس المكان اني وياك اطلع صفاء اطلع الله يخليك .. ( احجي وارجف محتارة شسوي دنكت اخذت الكتاب ورجعته لايدي من حيرتي وقلة حيلتي )

حسيته استغرب من كلامي فتح عيونه على اوسعها متفاجأ من كلامي .. تقرب مني خطوات واني ارجع ليورة طخيت بالدلاب ..

كال :-  ليش اني شعليه ؟ تعاركتي ويه اسراء واعتقد اني اخذت حقج منها وزيادة مديت ايدي على البنت الي احبها وكدامج ليش زعلانة هسه ؟

__ حباب صفاء اطلع ...
_ غير اعرف شكو اعتديت عليج مثلا اذيتج شي
شنو معنى كلامج هذا ؟

نصيت راسي كتله وبنبرة هدوء
_وعدت امي  اطلللع صفاء
اجاني صوته معصب رفعت راسي بسرعة اباوعله
_ ولج احجي شموصله صورة لعمتي عني حتى هيج تسوي ومتقبل اني وياج ننجمع بمكان ؟

...  سكتت مكدرت احجي شي
عاط احجييييي لا ادفنج انتي تعرفين امج شلون عزيزه عليه احجييي شصاير..؟؟

محجيت شي سحبني وطبني ع الحايط  غمضت عيوني بقووة وعطره يتسرب لانفاسي ويملي رياتي حاسة راح اضعف ما اكدر اتحمل اكثر .
كال افتحي عيونج وخليها بعيني اريد
اعرف شكو ..؟؟

تشنجت كلي حسيت واني مغمضة عيوني انترست دموع وصوته يمي يصيح افتحي داكولج فتحيهن سمعي الكلام يلله حااالا ..

زاد رفضي  بسرعه ترك ايديه و دفعني وكعت منهارة خليت راسي على ركبي وابجي بنشيج مسموع ..
وهو واكف فوك راسي يحجي
كال :-  مع الاسف عليج لوثتي دماغج بهيج امور وانتي بعدج طفله ..

حسيته دنك لمستواي رفع راسي وجبرني اباوع اله عيونه مشتعلات وتفترسني لزمني  من زندي 
وكال :- نصيحه الج ادرسي وارفعي راس ابوج
ترى اني ماافيدج ابد ولو تموتين مااباوعلج لج
انتي زعطوطه  افتحي دماغج ويايه وركزي
بلي راح اكوله لو تموتين مااباوعلج لو تبقين
اخر وحده مفهوووم؟؟

اباوعله بتوسل ودموعي تجري والم ينهش بيه وياكل قلبي اكل ، اتوسله بعيوني يسكت ويتوقف عن الكلام ويبطل يجرحني ويعذبني ..

فتح عيونه بغضب  رعبني منه وعاط مفهووووم ؟
اريد اسمعج احجي ..
هزيت راسي بأي بحركة سريعة ، ترك زندي وكام على حيله وحسيته زفر نفس بقوة رجعت راسي على ركبي وصرت ابجي بصوت عالي كلش .. وبس سمعت صوت الباب ينسد بقووة .. 

.
.
.

مشهد أخر ..

.
.
.

دنيا ظهر لزمت مخدتي وسقتها اقصد خليت راسي عليها واستسلمت للنوم ..

واني بعز نومي حسيت بصوت يم اذني ينده بأسمي ..
بنتي كومي سدي ورانه الباب دنطلع اني واختج ..
كمت مخروعة شفته بابا ظليت اهز براسي وافرك بعيوني وهو راح طلع من الغرفة بس باوعتله وشفته ماكو اخذت ريموت السبلت الي جان يمي ع الدولاب الي بصف السرير عليت درجة البرودة ورجعت غصت بالمخدة والبطانية وتلفلفت ونمت يابوب يا بطيخ جو الغرفة يخبل ويشجع ع النوم ..

واني نايمة حسيت بصوت بالبيت كمت من فراشي ونزلت من السرير اتمطى واتثائب .. طلعت من الغرفة
ظليت  اباوع لباب المطبخ شفته مفتوح و
صوت ولد وضحك وشقه!!

كلت شنو بيتنا انكلب ملهى واني ماادري ؟؟ هذا منو الي هنا جاي وبابا وصاني اقفل الباب وكفت بمكاني لحظات هسه شسوي ؟

خلي اروح اشووف منو ؟ اخذت شال وخليته ع راسي واني لابسه برمودا وكيمونه شلون دبرتها ماادري
المهم الفكرة والمهم شعري مغطى واطراف الشال نازلة على اكتافي ولازمته من يم ركبتي ..

فتحت  باب الاستقبال وطلعت منه
الحديقه تصير كدامه جان اشوف ابن عمي
كاعد هو و٤ ولد نازلين من الجنه ...
الجمال والعضلات قضية عيوني صارت مثل توم من
يشوف البزونه وعيونه تطلع منها  قلوب ..
اني سامعه بحور العين بالجنه بنات معقولة هم اكو حور العين ولد ؟ لا ونزلوا للكاع ؟؟

انوب بعد لا بيه ارجع
ولا اتقدم اني والبرمودا الي جنها شورت  .. يونس محمود يونس وطب
عليهم للحديقه بس محجب هم ظلوا صافنين ثواني
وابن عمي  وجهه ظل يضرب الوان ..

درت اريد افتح باب الاستقبال مينفتح انقفل من داخل بسرعه اجه ابن عمي عليه وحاوطني بذراعه ودفعني للمدخل مال البيت بصف الاستقبال ..

وأصدقائه استأذنوا وراحوا
واني المطيه بقيت ع وكفتي
لا فلتت للغرفة وقفلتها ولا ختلت بمكان هو اجه
يركض عليه جان يكول عبووووود والعباس محد
اليوم ميخلصك مني ؟؟

ولجججج وين طالعه بهذا لبسج لا والله مو لبس صخام وجهج ادري انتي شلون تلبسين هيج ؟

اشرتله بيدي باشارة الصبر كتله  اوكف بس ابدل واجي اتعارك وياك..

كال وين وين عباد الله كلها شافت
ظلت عليه اليوم اشعل عشيرتج وحق علي الفحل...
معصب ويحجي ..

اني بس كال هيج تذكرت روحي شلابسة باوعت ليجوة جان ادور ظهري و اطفر سويت الدرج ٤ شبخات وهو يركض ورايه جان يدنك ويجرني
من زندي وكعت اجه كومني ولطشني ع الحايط
اني بسرعه بجيت ...

كلتله انت واحد حقير شفت
البيت مابي احد شلون تدخل جماعتك الا اكول
لبابا عليك وفوكاها تريد تضربني ...احجي وابجي ..

بقى صافن بعيوني ثواني وكال  لعنة الله
عليك يالشيطان..ولك  شوف عبود اول شي انت
مثل الولد وحاسب روحك حالك حالنا بس
اليوم صاير انثى وشوكت صرت انثى من اجو
جماعتي؟؟ اله اليوم يعني؟  وحق الحق والي انزله اذا شفت وجهج اليوم كدامي اسويج وصلة مسح ... وهذا شورتج
هسه تروحين تنزعي وتجيبي بأيدج تكصي كدامي وتشمري بالمطبخ
وتسوينه وصلة للطباخ يلا داانتظرج ..

من فشلتي ما اعرف شحجي بعد لساني بلعته واني ام لسان اكتفيت بس هزيت راسي ورحت للغرفة قفلت الباب ورحت اريد ارجع انام شويه وجان يدكها كلتله من ورة الباب بصوت عالي  والعباس اذا متروح هسه احرك روحي ..

كال من ورة الباب علاوا ولج حتى نأكل ثريد واني اخذ الباجه وانتي ياكلج التراب والدود ومناك لجهنم ...بس
تعالي كوليلي عندج جداحه لو انطيج واجيب
وياها بطل بانزين؟

هذا شون ويا اليوم ؟ كمت ركض فتحت الباب بعصبية هو بس انفتح الباب وصار كبالي كال اشتعلت عشيرتج ناوية عليه بنت الشريف انعل ابوه اليجي يمكم بعد اني عبالي عمي مخلف بس بنات اثنين طلعوا ٣ بس
الثالث مسوي نفسه ولد عمي خلف الله عليج
من جنتي مسويه نفسج ولد وتلعبين ويانه
طوبه اني جنت اطخطخ بيج وحاسبج عبودي اخويه
بس طلعت مستفاد تعالي بالليل نلعب بلي حتى
هم استفاد ..

صرخت بوجهه ترووح منا لا شلون وياااك اليوووم ..

دار وجهه يريد يروح تالي رجع كال اكولك ابو ذنون ولو انت تحب نشأت اكرم بس ميخالف شنو رأيك اشتريلك
ترانشوز ونروح لملعب الشعب وتنزل انت
وشورتك بلكي تسجل هدف وارفع راسي
بيك خويه ؟

خزرته كتله روح يلله روح وحسابك عند بابا عسير  كال اني رايح ومااعيدها عليج هذا شورتج تسوي وصلة طباخ لا احركج واحركه افتهمتي؟؟؟

....

يارب يكون عجبتكم المشاهد تغشيشة صغيرة البنت والشاب الي بالمشهد الاول مو نفسهم الي بالمشهد الثاني ..

رأيكم بالغلاف تصميم عبير حسناوي 😘❤
AbeerAL_Hussnawy

نلتقي بالبارت الاول الى ذلك الحين استودعكم الله ..
احبكم ❤😘