رواية شريعة العشق الفصل الثاني 2 - بقلم نورا ناصر

#في_شريعة_العشق
بارت ١
نورا ناصر ..

خوف ، ترقب وقلق .
بشهر الثالث سنة ٢٠٠٣ والحرب الامريكية على العراق  .. جنت كاعدة ابيتنا بالهول
اندكت الباب كام بابا فتحها ودخل رجال بالاستقبال اجه كال جيبو جايات ، كامت امي سوت جاي دكت الباب واجه بابا اخذه وصوتهم يوصلنا وهم يتناقشون بالاوضاع الي يمر بيها العراق .. ورا ماطلع الرجال
اجه بابا
كال ؛- الامريكان ع الابواب وحيدخلون لبغداد ..
والدورة مو مكان امن النه لازم نطلع منا ..

كامت امي مرعوبة كلتله ووين نرووح ؟
جاوبها ؛- ابو حسين  اقترح عليه نروح للوزيرية ونكعد بيت ايجار علما تهدأ الاوضاع ونرجع لبيتنا لان هناك 
بيت طارق عزيز و المنطقه امان ..

كلتله امي لا شون نطلع ونعوف بيتنا و ثاني شي منطقتنا مسالمه و شارعنا  بي كل الطوائف والاديان وهنا اخوتي ما اكدر ابو زهراء ما اكدر كول غيرهه ..

__ يا مرة فكري ببناتج ترة هسه اهلج يحيرون بروحهم الامريكان مبقى شي ويوصلون لهنا وخاف تصير حرب شوارع ومدن ويفوتون علينه للبيوت ..

__ انتَ ليش تخوفني يا رجال كتلك ما اطلع من بيتي يعني ما اطلع احساسي يكولي هنا أمن النا خلينا هنانه ..
__ اوو صار بيهه احساسج مدام هيج لعد كيفج نبقى هنا اني علمودكم غير الرجال ابو حسين يعرف بالاوضاع والمناطق وناخذ حجايته ..

__ ادري وين تروح بالوزيرية وين اكو ايجارات بهالزلك والحرب مشتعلة ..
__ هو يكدر يدبرلنا بيت ايجار هو هم راح يأجر هناك
__ والله ممرتاحة خلينا هنا دخيلك ..
__ بكيفج ابقي هنا دنشوف شراح يصير ..

بقينا بالدورة منطقة المهدية ، امي راحت تزور اهلها هم قريبين علينا كلش واخذت اختي مريم الصغيرة  وياهه
اني وبابا وعبير واخواني التوأم بقينا بالبيت راحت واجت دموعها مغركتها وتبجي ..

تلاكاهه بابا يسألها بقلق خيرج شبيج ليش دتبجين اهلج بيهم شي ؟
كالت لا بس كلهم حينتقلون للقائم يكولون الوضع مايطمن هنا ببغداد بعد ..

__ ها شحجينا احنا يا ام زهراء ؟

زادت امي بالبجي وكعد بابا يهدأهه ويقنع بيها نطلع منا احنا هماتيين  وفعلا اقتنعت اخذنا اغراضنا وطلعنا من الدورة للوزيرية استقر بينا الحال
ببيت ايجار ١٠٠ متر  طابقين ونظيف
بس امي  ممرتاحه ابد من يوم الي طلعنا
ابد ولا بابا جان مرتاح .. صارت النا الغرفه
الفوك  اخذناها احنه البنات وغرفة نوم
جوا صارت لبابا وامي واخواني الصغار التوأم
فدى وعلي ..

  اسبوع يلله خلصنا ترتيب البيت  ..
جنت اشوف امي تبجي هوايه على اهلها وتريد بس تشم خبر عنهم ماكو لا خطوط تليفونات ولا اي تواصل..

  بيوم ٤/٧ جانت الاوضاع ببغداد مخيفه الى درجة...

جنه نايمين ودخل بابا للغرفة وصاح زهراء زهراء كعدت بسرعة ..

كال كومي بابا كومي وكعدي اخواتج متت من الخوف والرعب ..

كعدت عبير ومريم بسرعة كعدن منعسات وخايفات ويسألن شكوو ، طلعت من الغرفة افرك بعيوني نزلت جوة فتت للهول شفت ماما متخربطة وكاعدة ع القنفة بس مسنحة

رحت يمها لزمت ايدها ابوسهه وابوس خدهه
ماما حبيبتي جاوبيني شبيج كوليلي فدوة ..
ابجي واحجي و بابا يوصي عبير
كال ديري بالج على اخواتج بقو نايمين بالغرفة ..

عبير ومريم خايفات ويباعن لامي ويبجن اشرلهن بابا كاللهن فوتن للغرفة يم فدى وعلي وانت زهراء لبسي بسرعة وامشي ويايه نودي امج للمشفى .. رحت اركض لبست وغسلت وجهي ونزلت طلعت للكراج شفت بابا مخلي امي بالسيارة ورة ومشغل السيارة ، اشرلي اكعد بالورة يم ماما .. فتحت الباب وكعدت خليت راس ماما بحضني ودمعي يوكع عليها ادعي وابجي ربي يشفيها ..

عرفت ماما راح تتأذى بسبب قلقها وخوفها على اهلها
لان هيه عدهه سكر وفتحة بالقلب .

مشت بينا السيارة وشوارع بغداد جانت تمووت خوف ثكنات عسكرية ومواضع بكل مكان وسيطرات الجيش الي مجنه نشوفهم هيج متمركزين بالمدن ..

كوة فتنا بالاضافة الى اصوات القصف ومشاهد البنايات المقصوفة والمهدمة بفعل القصف الجوي  ..

كوة وصلنا لمستشفى مدينة الطب وجانت الدنيا مكلوبة بيها ومليانة جرحى ومحد بحال امي عدهم الاولوية لجرحى الحرب ..

كعدنا اني وماما بالردهة ماما متخربطة ومدتحس على شي واني خايفة ومرعوبة من المنظر الدم والجرحى ، شي اول مرة اشوفه ..

وبابا دخل يدور على طبيب يشوف حالة امي ... حسيت راح انهار ما اتحمل ابد الدموع تجري واصوات الالم وصراخ الوجع  ملئ إذني ماعدت اكدر اتحمل وامي يمي دتموت وكدامي حضنتها وصرت اصرخ وابجي انهاريت وخليت وجهي على كتف امي ومستمرة اصرخ ..

واني على هذا الحال حسيت احد لزمني يهز بيه قوي هدأت عبالي بابا رفعت راسي امسح دموعي واباوع لكدامي وعيوني مغوشة وارجف  واسمع صوت صفاء ملأ اذني  ..

بس شفته انهاريت بالزايد لزمته من ايده وهو لابس البالطو الابيض مال الدكاترة ظليت ابجي واحجي منهارة .. صفاء صفاء امي حتموت حتموووت انقذهه عفية ..

كال ساعديني نحطها بالكرسي المتحرك كوة حصلته الها السديات كلها مشغولة يلله زهراء اريدج قوية ..
كمت وسندتها وكوة شلناهه وخليناهه بالكرسي ..

سألته بابا ويين صفاء
راح يدور على كرسي ميدري بيه لكيت واحد هسه نشوفه ..
اخذ امي وظل يدفعها بقووة بالردهه وامي خربانة ومتدري بروحها واني امشي وراه
كتله انت شسوي هنا انت مو  بعدك ممتخرج من كلية الطب ؟

كال لا ولج متطوع هنا اني لان جرحى هواي واحنا طلبة الكليات الطبية اجينه متطوعيين ..

اخذهه خلاهه ع السرير قاس الها السكر
كال مرتفع ٤٥٠ وعدهه خفقان خلي اشوف طبيب ينطيهه علاج ابقي هنا لتتحركين راح هو وبقيت يم امي مسنحة وكلساع تفتح عيونها وتغمضهن ..
بقينه للفجر وبعدهه طلعناهه للبيت ، منظر الشوارع  يعصر القلب بألم وبوجع أأأه يا بغداد يا حبيبتي مكتوب عليج متعيشين غير الحروب والدمار  ...

.
.
.
بغـــــــدادُ عذراً ومثلي كيف يعــــــتذرُ

والروم تحشـــــد من أرضي وتأتمر؟!
.
.
.

يوم ٤/٩ /٢٠٠٣ جنا نايميين واقتحم  اسماعنا صوت القصف بشكل مرعب كعدنا مفزوعيين اطرافنا تتراجف ونبجي ثواني وانفتحت باب غرفتنا وفاتو امي وبابا
اخذونا بسرعة وسط صرخاتنا وبكاءنا ..

شالونا ونزلو بينا الدرج  ودونا جوة الدرج وهناك جانو علي وفدى يصارخون ويبجون اخذتهم امي وظلت تسكت بيهم وتقرا ايات على راسهم ..  بس هم جانوا يبجون بشكل هستيري

بابا  كال لحد يتقرب يم الجام وابقو هنانه بمكانكم
استمر القصف حوالي ٥ ساعات .. وصار هدوء 
بيومها اجانه خبر انو سقطت بغداد وصارت تحت سيطرة قوات الاحتلال الامريكي ..

طلع بابا من البيت وبقينا ننتظره على نار رجع ضايج مهموم وحزين تلكته امي واحنه وياهه كلنا كلتله امي شنو الاوضاع ؟

كاللها وهو الغصة مسيطرة على نبرة صوته
_ بغداد صفت بس دخان  ولج ياريتني ميت ولا اشوف ولايتي هيج صايرة رماد لاجنود لاصخام بس دخان والعمارات متفلشه وناسها الخوف بعيونهم بشكل ينذر بالموت ..

لزم راسه بأسى وتربع وكعد بالكاع وامي مكابلته وتبجي ..

بيومها الصبح اندكت الباب طلع بابا ودخل ويا صفاء
بابا كله شنو انت وين جنت مرحت ويه اهلك لديالى ؟
جاوبه لا عمو مرحت وياهم جنت بالمستشفى وهسه طلعت منها .. والله يا عمو تعبان كلش بلكي اطب اسبح
_ زهراء جيبي لابن عمج خاولي .

_ صار بابا .. رحت اخذت خاولي وديته اله جان واكف يم المغسلة دينزع ساعته صفنت عليه مرات تجتاحني مشاعر مجهولة تجاهه ما اكدر افسرها لهناك وافكر بأمي وبابا وكل المعوقات وانكر احساسي بس ما اكدر ما اصفن بي واتأمله هيه نظراتي وحدهه تتسرسح وتروح لعنده ..

كال لتصفنيين مثل المطي مو الج الصفنة
جيبي الخاولي يلله ..

عبست بوجهه برطمت شفايفي  وناوشته الخاولي بعصبية
كرصني من خدي وكلي لزعلين ام الزوز ..
اكتفيت بابتسامة متكلفة جانبية وعفته دخل للحمام ..

طلع من الحمام ينشف براسه اجه بالمطبخ بابا كال سويله ريوك سويتله اخذ فدى ظل يلعبها ويبوسها وهيه تدفعه متقبل تكوله اوي لحيتك توجع وهو بالعناد يبوسها ويحرك خده على خدهه الناعم وهيه تجره من سكسوكته بيها طول  ..

اجت يمي عبير قربت حلكهه من اذني تهمسلي وتأشر عليهم تكولي باعي فدى تجر صفاء من لحيته عبالها الصخل مال بيت جيرانه من جنه بالدورة هذا الي جابو يذبحو ابيتهم عمود جان بي جني ..

مكدرت الزم نفسي من الضحك ضحكت وكرصتها وبابا وصفاء ظلوا يباوعولنه ..
صفاء ؛- ها شكو ضحكونه وياكم ..

كتله بدلع ماكو شي يله كوم حخلي الريوك ع الميز ..
خليت الاكل ع الميز وهو خلى فدى بالارض وكام يباوعلي ويخزر خليت ايدي على حلكي اكتم ضحكي لايطلع بصوت عالي ظل يأشرلي بيده واصبع السبابة  موجهه عليه يحجي بتهديد اكو شي ولازم اعرفه
طلعت من المطبخ اركض واضحك ..

وراها بيومين اجانه بابا يركض وفحطان
كال لماما اجو  جنود الاحتلال  اخذي بناتج وصعدي فوك حيفتشون البيت ..

ماما ؛- يا عزا ابو زهراء خاف يكتلونه الميخافون من الله ..
_ لج لا عيني لتخافين جايين يفتشون عن الاسلحة وعن العناصر الامنية السابقة  ..

_ واحنا شعدنا ماتكولي ..
_ لتنسين احنا كاعدين بمنطقة جان بيها شخص مسؤول بالدوله يلله بسرعة اصعدي فوك راح يطبون وصلولنه ..

اخذتنا ماما فوك الى ان راحو نزلنا سمعنا بابا ديحجي ويا صفاء بعصبية ..

بابا :- شبيك انت متفتهم كاعد تخزر بيهم وتريد بس تتلاوة وياهم
عايش اللحظه براسنا لو  براسهم لو ماخذيك
اني شكول لابوك ..

_ والله عمي ماتحملتهم هالانجاس هذوله

_ ادري شنسوي وشبيدنا عليهم متكولي احنه عزل وهم مدججين بالسلام اكعد واسكت مو طفل انت واعلمك
_ صار عمو  ههه ولا يهمك لتخاف ..

وهو ديحجي ويا بابا واني لازمة المحجر مال الدرج
وصافنة عليهم هو انتبه عليه طلعلي لسانه..

بسرعة سويت نفسي مشغولة دنكت اخذت لعابة الجهال من الارض هو يريد يطلع صاح عليه بابا
وين رايح متشوف الدنيا مخبوصة ؟
شبيك عمو مصدك اني طفل عمري ٢١ سنة هسه رايح لبيت خالتي ليظل بالك ..
_ ضروري تروح لبيت خالتك هسه ؟
_ اي والله ضروري هم محتاجيني بشغلة
_ اوصلك بالسيارة
_ لا ميحتاج عمو خليك مرتاح ..

انعصر قلبي من كال راح يروح لبيت خالته خمنت اكيد راح يروح لخالته ام اسراء ..

حاولت بس الهي روحي رحت يم اخواتي وامي
كتلها وشحيصير هسه يعني راح يبقون الامريكان محتلينه ويوميه مقتحمين بيتنا ..
جانت مخلية علي بحضنها وتهدهدله تريدة ينام
كالت بس الله اليستر شراح يصير بالايام الجاية واني بالي يم اهلي مامنهم خبر وتليفونات مقطوعة الخطوط ..

كتلها ماما انت بس لتفكرين والله تتعبين وتتمرضين والله ..
شفت دمعة تلألأت بعيونها رحت يمها اخلي شعرها وره اذنها وبستها ، اخذت منها علي ونومته بفراشه ..

للعصر اجه صفاء بس مو وحده وويا خالته وبنتها اسراء او بالاحرى  حبيبته لصفاء مثل ما هو واضح 

انعصر قلبي عصر اجاني شعور فضيع جنت اجهله بس هسه تأكدت منه
شعور مضخم بالغيرة اجتاحني من شفتهم فاتوا
يضحكون ويسولفون ..
ظليت اباوعلهم واني متسلحة بنظرات الخصام
       حست عليه اسراء وضاجت مني
بس صفاء ميهتم لنظراتي ولا يكدر يفسرها
      يشوفني على انو اني طفلة وبس ..

اسراء وامها راحو للمطبخ يم امي وبابا وصفاء كعدو بالاستقبال ، ضجت من اسراء وهيه بس تسولف بصفاء وتباوعلي طلعت من المطبخ واسمع بابا يكول لصفاء
شنو عندك ويا بنت خالتك ؟ دا اشوف اكو شي ؟

جاوبه علي اي عمو  اني احبها من زمان بس تعرف صارت ضروف الحرب  وتأجلت الخطبه ..
_ زين ليش مستعجل يا ابني غير تكمل دراستك بالاول ..
_ اي هسه نخطب وان شاءالله الزواج بعدين اريد احجزهه من هسه ..
_ الله يتمملكم على خير ..

اني هنا مدري شصار بيه قلبي احسه احترك وصار رماد ما اكدر اسيطر على مشاعري هالمشاعر حتموتني
صعدت للغرفة بسرعة فتحت الباب وسديته عليه
ودموعي ظلت تتطافر من عيوني من شدتها بجيت هوايه لحد مسمعت صوت امي تصيحني جوة جاوبتها وبصوتي الف غصة ..

.. جايه ماما جايه .. مسحت دموعي وغسلت بالمغسلة البرى ونزلت جوة اشوف امي شتريد .. شفتهم يم الدرج واكفين طيور الحب يسولفون وعيونهم بعيون بعض جايين يقهروني فوك قهري اجت عيوني بعيون اسراء خزرتها خزرة خليتها تفتح عيونها مستغربة ..

وصلت لاخر بايه وخرتها عن طريقي بعصبية وكتلها شويه بتكبر ظلت تأفأف وتهمس لصفاء توقعت حجت عليه بس اني بلحظتها تمنيت اكتلها كتلة معدلة اريح كلبي من همه وعذابه ..

  كاعدين ع العشا وام اسراء طلبت من بابا تبقى عدنا
كالتله ابو زهراء اريد اطلب منك طلب ..
كاللها تفضلي غالي والطلب رخيص ..

_ تدري منطقتنا خطرة هالايام خطف وبوك واسعد وابو اسعد كالو بلكي تبقين ابيت ابو زهراء بين ميتحسن الوضع ..

_ اي تدللين نشيلكم على راسنا ابقوا شكد متردون ..
_ بس بينما يرجعون بيت ابو صفاء ونروح يمهم ..
_ لا يمعودة ابقي هنانه ماكو فرق بينا احنا وبيت ابو صفاء ..
امي كلتلها عين غطى وعين فراش الكم ..
_ متقصرين دادة ..

وبقت اسراء وامها يمنا وصفاء هماتين بقى عدنا يروح  للمستشفى ويجي يمنا جنت اشوفهم سوا اموت من قهري ما عندي شي غير اخزر اسراء بدون قصد مني عيوني تتأمر عليه وتخوني وتخليني اباوعله واخزرها ...

بيوم اني نايمة واحس اندفرت دفرة على بطني
باوعت واشوف اسراء فوك راسي بس باوعتلها
عاطت بوجهي
_ ادبسز ساقطه بعدج بكد الفصمه وتباوعين
لابو بيتي ..

انصدمت ابو بيتي شنو هاي صدك تحجي ظليت ارفعلها تك حاجبي ما ادري شنو اسوي .. هيه عبالها دا استفزها سحبتني من شعري ورفعتني الها
نطقت من بين اسنانها كالت بكره
_ اسمعي لج بطلي هاي تصرفاتج لا والله اطيح حظج متدرين شسوي بيج افتهمتي ..

لزمت ايدها اريد اوخرها مني وجان تجيها ضربة على راسها من مريم بالمطارية مال مي ..
كفخت اسراء حيل ع راسها ..
وكلتلها ولج حقيرة كاعده بيتنا وتضربين اختي  ؟

لزمت راسها وصااحت اخخخخ وخرت ايدها كلها دم ..

اخذتها عبير ونزلت جوة بسرعة
كمت لمريم كتلها لج شسويتي ..

شسويت خو متموت ؟ ختموت موتتنا كاعدة على كلبنا الله يخلصنا منها ولا اكو حكومة ولا سجن جلبة وماتت واندفنت ..

دااحجي ويه مريم واسمع صوت اسراء  ظلت تعيط
نزلنا نركض نشوف شكو .. شفتها كاعدة جوة الدرج اكو صيدلية بيهه  كطن وشاش وادويه وهي بيدها كطن بس الدم مينكطع ..

بقيت واكفة ع الدرج اباوع الها كعد صفاء
عباله اني ضاربتها ظل يخزر وراح يركض الها يفحص راسها ويكوللها اشو بالله اشوف اثبتي ولج دا اشوف جرحج خاف يحتاج خياط ..

هي صرخت وكلتله ذني بنات عمك شلة مال كح** بعدهن هلكدوتهن وهيج يسون سوالف اذا كبرن شلون؟
هاي مريم  بكد القندرة وفتحت راسي الادبسز اني الها اليوم ..

جان تنزل مريم  كلتلها وافتح بطنج ولج ام الولد فوك
ماكاعده ببيتنا تضربين زهراء ، باوع ولك صفاء اخذ مرتك واطلع من بيتنا ..
هي من حجت هيج هو خرب من الضحك كرصهه من خدهه بشقة لان هيه جانت طفلة

كامت اسراء ظلت تعيط وهجمت تريد تضرب مريم  كام صفاء لزمها ولوه ايدها وخزرها وكاللها اياني واياج تمدين ايدج ع بنات عمي اكسرها الج ولج هم لفو وهم تتمادين؟

كعدت امي على صوت الصياح
كالت شكو هاي شصاير اسراء  ليش هيج راسج دينزف

دتحجي توها جان صفاء كاللها وكعت ع راسها وهسه راح اخيطه الها وهسه اخذي هاي الجنيه مالتكم خلي اداوي رويحتي..

كامت اسراء فلتت ايدها من صفاء وهجمت عليه كدام  وظلت تدفر بيه واني سكتت مادافعت حتى عن نفسي
وخرها صفاء مني كوة وهم رجعت فلتت روحها وهجمت عليه خرمشتني اخذتني امي لحضنها
وبعدت اسراء مني بقوة وعصبية .. واني بس ساكتة ودموعي تصب صب .. واباوع لصفاء بتوسل وخوف

امي ظلت تصيح بوجه اسراء كلتلها
_ولج لحظه وحده متبقين ابيتي هسه ساعه ١٢ بالليل
اذا صارت ١٢ وعشر دقايق وشفتج هنا اخلي
دمج بطولج شنو ملفيه بيتي اني وحده دايحه ؟

صفاء  كال لامي حقج عمه بكولشي تكولي اجه
دياخذ اسراء  جان تدفعه حييل وصرخت بوجهه ..

وخر انت السبب انت السبب ..

هو بسرعه ضربها راشدي من قوته وكعت بالكاع
رفعت راسها تباوعله بغضب ..

لا ياحقير تضربني .. وظلت تبجي وتتمسكن وتغلط وصفاء يجر بيها يريد يكومها من الكاع متقبل يحاول يهدأها يسكتها ميفيد كالها ولج عيب عمي نايم اسكتي اذا كعد شيكوول اسكتي  ..

كعدت امها وصار بوجها فشار بنتها
ظلت تعتذر من امي وتحاول تسكت اسراء متسكت واني حاضنه امي وواكفة
عاد امي كلتلها
_ والقرأن هاي لخاطرج لو ما انتي الا اني هيج
نماذج ما الفيها بيتي ما ناقصه مغثه اني الله يخليج اليه بيه كافي وزايد اني بروحي مريضة تجي بنتج هيج تسوي وتضرب بنتي كدامي بلا مستحى وبلا خجل ..
_ حقج عيني ..لج امي اسكتي اسكتي
صفاء كاللها باجر من الصبح اخذهم لبيتنا اني اعتذر عمه .  وسحبها حييل من ايدها ووداهه للاستقبال ..

صفاء .. اخذتها للاستقبال وهي تدفع بيه ومتقبل اعالج جرحها 
اسراء ؛- انت مابيك خير انضربت كدامك وفوك كل هذا
انت ضربتني لك جان خجلت ع روحك تضربني
كدام اطفال وهن وحدتهن عبالك بنات شارع ..

صفاء :- احترمي نفسج ادبسز بنات عمي صغار
ولو ما انتي ضاربه اختهن كدامهن ميسوون هيج
وياج بس انتي مااحترمتي نفسج واني اعلمج منا
وجاي ادللي وهسه انجبي وخلي اضمد راسج
لتخليني اتصرف غير تصرف وياج ؟

_ هاي الكلبة الحقيرة جبيرتهن كلما تفوت من يمي تدعس على رجلي لو تدفعني لوو ..

خليت ايدي على حلكهه اسكتها كتلها اششش ولا كلمة
_ ماريدك عووفني عووفني ..

_ ماترديني ارووح لغيرج يعني .. وظليت ارفع حواجبي ..

_ ليش تضربني ..
_ الي سويتي عيب اسراء انت غلطانة والبادي اظلم زهراء فقيرة اني اعرفها كلش زين  ..
_ اني الادبسز اني الساقطة اني ال..

لزمت وجهه وعصرت خدودها كتلها لج شنو بالعة مسجل دسكتي لخاطر ربج خلي اداويج دمج خلص بنت الاوادم .. لزمت ايدي ووخرتها منها ودارت وجهه مزعوجة واني كعدت اعالج جرح الي براسها ..

زهراء .. امي اخذتنا  للغرفه
كالت  شكو شصار اني اعرف اسراء حبابه وسويت هيج حتى متتمادى وتمد ايدها عليج بعد احجيلي شكو لا اكعد ابوج واخلي هو يتصرف ..

ظليت ساكته بس ابجي ..
كالت ولجن شكو عبير مريم شبيجن ؟
احجلي ولجن شبيها هاي اختج الخوثه مدمايه وذيج
مريم  طالعه اليه انوب صفح والله مربية وحوش
اني طايحات الحظ شلون هيج تسوون اكو بنات
يسوون سوايتجن تضربن بنية شابه ؟

كلتلها عبير يوم هو احنه نايمات منحس الا اسراء وكعت ضرب وتدفر لزهراء وسحلتها من شعرها وتكوللها تباوعين لابو بيتي ؟

امي باوعتلي  بشك وخزرتني خزرة تمووت خوف

كملت عبير كلامها   هسه انتي اتركي هذا ع جهه
اني سامعه من ست سعاد ابو بيتها يعني زوجها
بس هاي الثخينه ممتزوجه منو ابو بيتها عزززززة
يووووم هاي اسراء  متزوجه صفاء بالسر و زهراء الفالحه لكفتهم احجي ولج زهراء  شنو شفتي عليج النبي حتى اكول لابوها هاي الثخينه حتى يربيها ..

وجان تعيط امي بعبير؛-  ولج انتي منين جايبه هالسوالف العوجه ؟

كلتلها شبيج ام السوس ع كولت بابا هو كلتلج
من ست سعاد بس انتي بالج مو يمي وهاي بنتج
زهيران مسحي خشمها وحلكها هسه اذا كعد بابا
وشافها عباله بنته تحولت مصاص الدماء لج
يوم..

رجعت عاطت  امي ولج هاي عليمن ولج مو اكوم اشلع شعرج هسه ..

كلتلها تحمست عبالي صديقتي مها ودااحجي وياها المهم يوم لو شايفتها  لزهراء عبالك خنفسانه ووكعت بيد اسراء  وذيج تكولين ثور وكام عليها مردتها مرد
وبنتج اصبحت طريحة الارض خلف الله على مريم
اخذت حقها وبعدين اني اتحمست كلت اذا مريم
تضرب اسراء شنو ظلت عليه عاد خبزتها خو ما
اخلي اختي وحدها تعارك الله ميقبل ..

باوعت امي كوه كاتمه ضحكتها بعدين خزرتها
وكالت كومي من يمي عبالي براسج خير واسألج بس
الكتاب مبين من عنوانه ..

_ يا عنوان يا كتاب شدتحجين يوم ..

_  اطلعي برا بسرعه

_ تمام بس بنتج خلي تمسح حلكها شكلها يخوف
مصاص دماء وكاعد بنصه..

بعدها من طلعت امي استلمتني
كالت بنبرة تهديد وروحها لامي اذا شفتج توكفين يم شباك المطبخ منا وجاي متلومين الا نفسج وابتعدي عن صفاء اني جنت شاكه بس هسه تأكدت ولج تعرفين
ابن عمج يحب بنت خالته شعندج تباوعيله
منا وجاي يدخل صفاء منا انتي تولين لغرفتج
منا زين؟  لتخليني اقسي عليج ..

كتلها والله ماما بعد مااعيديها بس لتزعلين عليه
والقرأن بعد مااباوعله اهم شي انتي متزعلين
و اوعدج بعد مااباوعله ..

امي كامت دتجيب مواد معقمه وعقمت اماكن الخرمشتني بيها  صعدت  للغرفه وبس ابجي مكدرت حتى اسكت ..

يوم ثاني صفاء اخذ خالته و بنت خالته وطلع من البيت ..

يتبع ..

السلام عليكم .. رجاءً رجاءً بنات بطلات الرواية يطلبون منكم عدم الغلط على اهلهم انتقاد عادي انتقدوا بس سب وغلط لا رجاء ⚘😘