رواية شريعة العشق الفصل الثامن وثلاثون 38 - بقلم نورا ناصر

#شريعة العشق
بارت ٣٤
نورا ناصر

أنستي العَزيزة يا ذات العُيون السَرمدية كُتِبَ عليّ العذاب بِجمال عينيكِ كما كُتِب الحُزن على كُلِّ عراقي .

؛

ما ان اخترق صوتها اسماعي ، حسيت بقلبي يعلن عن انقباضة قاسية ، الادبسز ويه زوجها وتحجي هالحجي!!

وخرت عني ظليت اباوع عليها بحقد زاد معياره اكثر واكثر من السابق ، صدمتني وقاحتها ..

وهي لمن شافت نظراتي ظلت تباوعلي ونظرة انتصار على محياهه ،  كدرت تستفزني ، خزرتها وكورت قبضة ايدي بقووة ..

صفاء حس اكو شي من خزرتي الها بسرعه اترخص منهم وسحبني مشينا مسافة عنهم ،  التفتلي

بصوت مصرور سألني : شكالتلج؟
جنت صافنه افكر بكلامها ماطلعت مني غير : منو ؟

جاوبني بنبرة ملقنة ؛ يعني منو اسراء طبعاً ..

بلحظتها كل حواسي احتشدت لحتى اكدر افسر لسانه شون نطق اسمها !!

رفعت تك حاجبي وحجيت الكلام الي كالته الي بالحرف الواحد :تكول ديري بالج عليه بس متأكدة متنسعدين وياه لان نفسها بيك

كلت اخير كلمه وعوجت حلكي الغضب يخنك انفاسي ، ظل يباوع بوجهي ثانيه وحده بعدها
مد ايده مسح وجهه بأثنين اديه وهمس: امشي نروح
نتعشى

برفض : مااريد .. انسدت نفسي والله ..

كال بإصرار : زهراء لتنكدين عليه بشي مجان بالحسبان امشي يلا .

شفته بدأ يعصب  سكتت مشيت وياه بشرود طول الوقت افكر ،  رحنا تعشينا بس ساكتين ..

بقيت صافنه بوجهه وهو هم مو طبيعي بس يسوي نفسه انو ممهتم ..

باوعلي كال شبيج ؟

مديت ايدي دلكت مكان قلبي ، اريد اهدأ النار الي شبت بي فجأة وما دا تنطفي حتى بعد ما اختفت اسراء من كدامي بقيت للحظة افكر بكلامها وكلساع اتذكر نطق اسمها على لسانه .

بعدك تحبها  حجيت هالكلمتين بلا وعي وبشرود .. ونظراتي هايمه على الي وراه .

ليجاولني هو بغضب مسيطر عليه : شجاج زهراء عود صدك تحجين انتي ؟

وجهت نظراتي اله هالمرة ورديت عليه بإرهاق متوسل : بس جاوبني ؟

وكف على حيله وجاوبني :  لأ ماا اجاوبج انت اكتشفي الجواب بنفسج ..

اخذ السويج وموبايله وكمل وماتردين تاكلين يله كومي نرجع . وميل راسه باتجاه باب الخروج .

كمت بهدوء واحس عيوني نترست دموع على اوسعها
شافني كمت راح حاسب واني رحت غسلت
وطلعت شفته ينتظرني ، مشه ومشيت وراه بخطوات بطيئة وعيوني ع االكاع واحس مخنوووكة .

طول الطريق   للبيت بس ساكتين ، واني بس اتحسر وهو بس يسمع حسراتي ، يشد بقبضته على الستيرن اكثر بس ميحجي وهالشي يعذبني .

اول موصلنا للبيت نزلت بسرعة من السيارة
حاولت ما اللتقي بأحد ماريد احد يشوف حالتي
فتت من باب المطبخ رحت  نزعت الحذاء
وغسلت رجليه وصعدت ،  نزعت الحجاب وبملابسي
دخلت للفراش ..

حتى مبدلت ملابسي وبقيت بالملابس الي جنت طالعه بيهم ، دقايق ظليت اتكلب بفراشي وبس افكر بكلامها عبالك صدى ويتكرر كل ثانيه ..

انتبهت على صفاء ما اجه للغرفه ، هم ظليت افكر بي وساوس وهواجس عصفت بيه ودتهمتني ، ليش ما اجه ، معقولة اثرت بي شوفتها ، وهسه مختلي بنفسه وصافن يفكر بيها !!

حسيت نفسي متبعثرة الروح ومشتتة الفكر ، شلون الي حيصير بعد يربي ، وخرت الغطى فركت وجهي بيديه .

كمت سبحت ورجعت تمددت مااعرف
شلون نمت من كعدت التفتت شفت صفاء  نايم بصفي على بطنه وبس بالشورت ،  بسرعه جريت الغطاء وغطيت حتى وجهه

هو حس بيه فز وعاط: دوخرررررري منو كايلج
تغطينيييي ؟ متشوفيني مطمور شكوووو تغطيني ؟

هو منا نومته عزيزه وانوب فز مزعوج واصلا هو
من يكعد مزاجه مكلوب ١٨٠ درجه وين يلا يفك
تركته بدون مااجاوبه  ونزلت من السرير
اتأفأف وهو ظل يدردم .

نزلت جوا غسلت وجهي ، حضرت الريوك ورجعت صعدت للغرفة شفته نايم ، دا احضر ملابسي اريد ابدل لحتى اروح للجامعه .

من داافتح الكنتور صار صوت وحركة ، كعد صفاء عاط بيه شووون وياااج انت متكولين مطمور نايم خامد شجااج من الصبح .

شمرت الملابس من ايدي وماتحملته ظليت اصيح بعصبية ؛ هاي شبيك يعني وين اولي ورايه دوام اذا انت نومتك هيج خفيفه وتريدلك جو خاص بيك شوفلك غير مكان نام بي ، والله حلوة هاي من
الصبح كاعد بس يعارك ويه ذبان خشمه شلون خلك

دفر اللحاف وكام يباوعلي بنظرات مهددة ، درت وجهي منه متتت خووف وبس اسمع صوته يسب ويلعن : انعل ابو هالحظ لابو حتى هالعيشة شوكت ارتاح ماادري حتى بخمدتي ممرتاح عيشة كشره على راسي...

وكفت بوجهه لازم معاجبتك العيشة وياي ها ؟ تتمناهه هيه بدالي يمك موو ؟ لو هيه يمك جان مسويت هالمهرجان من الصبح طبعا طبعا ضرب الحبيب مثل اكل الزبيب مووو ؟

صااح : اسكتي زهراء ووخري من كدامي ولاتظلين تااكلين ......

مكمل كلامه بس عيونه بعد شويه يطلعن من مكانهن
مسح على وجهه وظل يستغفر .. 

عافني ودخل للحمام ، ظليت افر بيدي واتحسر دنكت على الملابس اخذتهن وشمرتهن ع الجربايه  ..

وكفت بمكاني ايدي على وجهي واضغط  بخدودي براحة كفي
سمعته صاحني: من يمج انطيني الخاولي نسيته ...

تجاهلته ثواني ، اجاني صوته يرعد ....
دتسمعييييني لوووو لاااا جيبيلي االلل*** الخاوولي

اهتزت كل خليه بيه وركضت جريت الخاولي من الزاويه و رحت انطيته اله ، بدلت ملابسي وداخلي مكياج هو طلع من الحمام ينشف بشعره وبس يتأفأف وتوجه للكنتور مالته فتحه وصفن عليه ، مجنت مستعدة لمواجهه ثانيه نزلت بسرعة قبله
اكلت شويه  وطلعت للدوام ...

صفاء: جايبين ضحايا انفجار للمستشفى ، ناس محروكة ومتألمة ، المستشفى كلها وكفت على تك رجل ظلينه نشتغل بدينه ورجلينا ومملحكين .

وين يله كدرت اخذ استراحه دقايق بس وارجع لشغلي بس جنت تعبان ومتألم اريد اجر نفس ما اكدر وخايف لا مريض يموت واني باستراحتي هاي وحتى اكل مدا اكدر احطه بحلكي .

بعدت الاكل من كدامي وكمت على حيلي مو مال استراحة هسه ، رن موبايلي قبل لا اطلع شفته رقم غريب مو وكته هسه دا ارفض الخط وانثولت وجاوبت ..

واجاني صوت اسراء ، انتفضت اطرافي وتوجس قلبي
حجيت بغصه الوو خيرج اسراء شتريدين ؟

همست بخفوت ومرارة : مشتاقتلك صفاء ..

_ شنو هالحجي اسراء هسه انت متزوجه شجاج صدك جذب كافي دخيلج بعد لتخابريني ابد ماكو شي ينحجي بي بعد .

صفاء لاتسد الله يخليك حس بي داموت صفاء داااموت يوميه ادعي على اهلي واخوتي يوووميه والله ..

جريت نفس وبعدني احس مختنك ..

سديته بوجهه وكملت شغلي احاول ابعدها عن افكاري واركز بشغلي ..

طلعت من الدوام ، محبيت اروح للبيت ، طاكه روحي نزلت للسوك اخذت شغلات ورحت لبيت  حسين اخويه الجبير ..

تلكتني زوجته وهو جان مموجود ، كعدت بالاستقبال ظلت تسأل شو متبين ابد لا تمر لتجي ..

والله تدرين يا ام حمودي مشاغل ..

اي حقك عيني دكتور بس والله نشتاقلك كلي  شلونك مرتاح ويا زهراء ؟

تنهدت وجاوبتها : عادي والله لا مرتاح ولا شي كولشي عادي ، حتى هي احسها هم مثلي بس من اجي من الدوام وهي جايه قبلي اشوف لهفتها من تشوفني ام احمد عيونها تشع بالحب اتجاهي بس اني اااخ اني ما اعرف شكولج .

ام احمد: اني متأكدة بعدين تكوم تموت عليها زهوره هادئه وتنحب بس يرادلك ووقت ...

_بعد ماكو حب ام احمد جربته مرة وفشلت تبهذلت وبهذلت عمامي ويايه ومحصلت الاحبها ...

_ شنو هالحجي صفاوي انته مناوي تنسى عاد كافي ..

_ انسى !! سنه سنتين شنسى ؟ هسه من احجي كلها تكولي ماعندك كرامه بس هذا گلبي شيقنعه بهالحجي تدرين لحد الان تخابرني تبجي وتتوسل واني مو نذل لا اكدر اجاوبها ولا اكدر ماارد هسه هي راحت وتزوجت
غير تلتهي كل فترة واتصلت وتبقى تبجي وتدعي
ع اهلها واني ترجعلي ذكرياتي وياها لا اراديا واتعذب واتدمر كلما احظرها تخابر من غير رقم .

_ هاي شنو صدك تحجي شكد صلفة لعد تروح فدوة لزهراء حبابه ومتربايه الله يحبك بعدهه عنك صفاء
بس خو مازهراء تدري بيها تخابرك خطيه لتنقهر

_اسمعي هاي البارحة طلعت ويا زهراء صدفه شغناهم
وهم غثت زهراء بحجايه والله حرت ويا الكل

_صفاوي يمه ديربالك منها هاي حية صفرة تزوجت وبعدها تخابرك شنو هالجساره هاي وانت
ولك بس لا تجاوبها .

_ شجاوبها والله تتصل من رقم غريب ..

_ ادري مو متزوجه زوجها ممكفيها ؟ مو بعينها مو رجال كدامها شتريد تتصل ؟

_  ظلت تبجي وتشكي تالي سديته بوجهه ام احمد اني مو نذل واحجي ويا عرض غيري باجر تطلع بعرضي

_اي شون مااعرفك اني قابل ، نيالها لزهراء الله يحفظك الها ويحفظها الك ان شاءالله

_هاي هم ميته عليه مدري شبيها هسه هي زهراء
المثلها كون متباوع بوجهي والله هههههههههه شكد
رزلتها واني ممنطيها وجه ابد جنت بالطابه والطالعه ارزل بيها كلت بلكت تكرهني انوب الفطيرة تزيد ههههههههههه ولحد هسه من تشوفني تظل صافنه بوجهي واني هم اغلس مااحرجها ههههههه

_شبيك ولك لازم تفرح وين لاكيها هيج جماره تحبك وتموت عليك

_هي مال جماره فهي جماره ونص بس شخصيتها ضعيفه وبريئة زيادة عن اللزوم تدرين مرات من اعيط انسى وجودها بعدين التفتت ادورها ادري بيها تخاف من الصوت العالي وتخاف مني من اصير عصبي الكاها مدمعه حظي الاغبر اكطم عصبيتي ع النص واسكت ههههههههه اني گلبي خلصان ومخبل  شلون الزم روحي ماادري

بالله عليج متكوليلي شلون راح اكمل حياتي ويا
هيج بنية بس اني حبي لعمتي وعمي مااريد اخيبهم وااذي بنتهم واعرف من ااذيها هم يتأذون
يشهد الله عليه عمتي ام زهراء احبها اكثر من امي

انتي متعرفين هاي الانسانه شكد وكفلتي بكل مشاكلي كل مشكله اركض الها والكاها سند وعون
اليه كلامها الهادئ ونبرتها المليانه حنية تحسسني
بالامان اعز من روحي وحق محمد ولهذا السبب
مردت زهراء اخاف من المشاكل مااريد اخسر امي
الثانيه

_ولك شبيك تموت عليك بس دللها وشوف شتنطيك من حنان بنات دكتور تحسين خوش
بنات ندارة ونزاكه وهدوء بس انت متعافي تريد
وحده مشلوشه مثل فلانه شفايتلي لو جنتي مثل
زهوره جمال وهدوء وترتيب

_اوووووف انتي مشايفتها من تحجي تمط الحجايه تمطط واني نار وهي ثلجججج ابقى انتظر
شوكت تكمل كلامها اني قاسي وهي من تمشي خطواتها تنحسب حتى بالمستشفى الدكاتره منتبهيلي دائما عاكد حاجبي اني مو بيدي عندي قساوة مو طبيعيه وهاي زهوره انفخ عليها تطير ..

ام احمد ظلت تضحك : نزووول عليك شنوو نفاخه

_ اي والله انوب ضعيفه شكدوتها مريم ماخذه عافيتها هههههه هسه لو بيها شويه لحمه عاد ماادير بال
خاف اكفخها تتعوق لو يصير بيها شلل

_هاي منو كلك هي ضعيفه ولك انت غير مشفتها
بالبدله جسمها يجنن مرصوصه رص بس انت خبل
مدري شبيك حلالك ويمك متتقربلها دافر نعمتك
برجلك

_مو مودي ابد بس صارت القسمه انوب امي تحبها
اكثر من بنت اختها شحدي احجي عليها هههههه

_حيل بيك والله تستاهل هههه انوب عمتي تنتظر حفيد منكم متدري جنتها بعدها خام

_واني منتظر اخوه لعد

_ ياااا يله عاد فضها لو اكوولك خليها تكمل كليه احسن ..

كالت كلامها وضحكت واني هزيت راسي وهمست الله كريم ..

بقيت يمهم على العشى اجه اخويه وولده تونست وياهم وغيرت جوو وبالليل رجعت للبيت .

كرار: فتت للبيت صار  ابويه كبالي سلمت اشرلي اكعد كعدت يابه والنبي تعبان اريد اصعد ارتاح ..

قز القرط خل احجي ابن الاوادم ..

بخوف مصطنع جاوبته تفضل يابه

كال بعد باجر جمعه خلي نعزم بيت عمك على غده عيب لازم نقوي علاقتنا بيهم ..

اي فعلا يابه كلامك صحيح والله ولو ما اطيقهم بس فعلا كلامك حجي .

ماتصيرلك جارة كووم ولي من كدامي ولتنسى العزيمه يوم الجمعه ..

كمت صعدت فوك ريحت شويه ونزلت تغديت وظلينه نحجي بالعزيمه ..

واجه يوم الجمعه وجوي اهل مها على الغده
همزين النسوان وحد يكعدون والزلم وحد من جهتي هاي حتى اختلي بمها ..

رحت سلمت عليهم وشفتها يا يابه من اشوفها ترد
روحي والله ظليت اباوعلها مبتسم ، وهي . ارتسمت السعادة بنظراتها .. غمزت الها ظلت تحذرني بنظراتها بوجود اهلها وخدودها تحولت حمرة من الخجل .

عفتهم ورحت كعدت  يم الزلم شويه وكمت هذا ابوها مراقبني عبالك ناهب بنته امداك وامده حظي وياك ..

كمت رحت للمطبخ لكيت سماهر دتساعد امي بالمطبخ
اشرتلها وحجيت بنبرة اقرب للهمس اكولج اني صاعد فوك وانتي  صيحي  لمها وصعديها لغرفتي..

ضربتني على كتفي هاا ولك علييينا شتريد تسووي ..

هسه انت شعليج حطيتي رووحج دييله رووحي ..

صار عيني صار ..

اريد اطلع رجعت كتلها  بدون محد يحس تمام ؟

زين اني حكوللها تساعدني بالمطبخ وانوب اصعدها الك تهريب من الصالة ..

اي عفيه هيج اريدج .. ضحكت واني صعدت للغرفه

وظليت انتظر مها تجيني على نار ، كلساع افتح باب الغرفة واطل وارمش على تليفون سماهر وهيه تكطعه

ورا شويه  اندكت الباب فتحته وصارت كبالي مها
بس شافتني شهكت : كرار هذا انته اني رايحه

... ،  اجت دتروح ركضت وراها لزمت ايدها : وين وين وين بالموت يلا حصلت هيج لقاء وتريدين تفلتين والله باحلامج ابوج ابو كرش خانكني بس يباوع عليه يمكن حس اريد ابوكه هههه

بخجل كالت : عفيه كرار عيب ....

_العيب بالجيب باباتي صار سنه ونص خاطبج وعاقدين
بوسه ممحصل بالك**** مصايره هاي اليوم اشبع
بوس ودااشوف يا كلب يمنعني

_ولك دوخر متستحي انت

_لتكولين لك وخزرتها

_اوكي اوكي اسفه بس حباب وخر فدوة اروحلك

هي تحجي وتدفع بيه قيدتها زين ، وحطيت شفايفي على شفايفها وسكتتها ، ظلت تدفع بيه جريتها لحضني اكثر ..

ارتويت من شفايفها مثل صايم وخلوا كدامه مي بعد صيام كوومه وقت ، حسيت بنبضاتي تحاكي نبضاتها الثائرة ، وبداخلي اشتعلت رغبة ، على اثرها تلخبط قلبي ونبضاته ..

تركتها وباوعت لعيونها شفتها على وسعها مليانه دموع وانطلقت منها شهكات شبه مسموعة ،  جريتها لحضني: حبيبي والله مسويت شي هي بس بوسات ترى اسوي الاكبر .

باوعتلي برفض ودفعتني واجت دتنزل لزمتها وسحبتها باتجاهي  : وين نازله امشي عدلي حجابج وحمرتج وجهج صار احمر تحسس من لحيتي غمزتلها ..

مدت ايدها لوجهها تتحسسسه : تكذب عليه كرار تريد تنفرد بيه هاا ؟

لج لا اخذت حصتي وارتويت من هاللفراولة بس انت حتنزلين ويشوفوج هيج شراح يكولون ؟

باوعتلي بتفكير ، سحبتها من ايدها وحجيت لاتفكرين قابل شحسويلج فوووتي يله ودخلتها لغرفتي

راحت للمرايه ظلت تعدل بنفسها واني كاعد على الجربايه اتأملها  وبداخلي لهيب من براكين مشتعلة بسبب الرغبة ، رحت يمها حضنتها من ظهرها ، ارتجف جسمها بين اديه .

تمنيت اضمها واحتويها بقفصي الصدري بس اهديها وبعدين اتركها من جديد

قربت حلكي من اذنها وايدي مقيدتها ، همستلها: حبيبي شوكت تنورين غرفتي واكعد الكاج كبالي ولج مو راح اموت والله

التفتت عليه ، حطت ايدها ع حلكي: اسم الله لتجيب طاري الموت ع لسانك فدوة يومي قبل يومك ان شاءالله

مديت ايدي وشلت الشال مالتها دفنت وجهي وبوستها على ركبتها وطولت ،  مبتعدت الا سويتلها اثر ، باوعت لعيونها ذبلانه ، ابتعدت عنها وركزت ع الاثر الي صار على رقبتها ، عكدت حواجبها ..

والتفتت على المرايه تتفحص رقبتها ،  من شافت الاثر تركتها ونزلت لان حتظل تحجي وتعكر مزاجي واني لهسه احساس قربي منها مسيطر عليه .

رحت يم الزلم لكيتهم يحجون بوضع ابوها الصحي   بس انتبه عليه وشافني بسرعه سألني: وين جنت عمي ؟

جاوبته واحاول اسيطر على نفسي : هنا خابرني ولد صديقي

بداخلي حجيت جنت اتونس ويا بنتك غصباً عليك وع كرشك بستها ابو خشم بستها من ورااك واكفلي سجينه
خاصرة

سمعت ابويه يوصفله دكتور بالحارثيه هو بالحقيقه خوش دكتور بس اني عجبني اخبث

كلتله عمي الله وكيلك بس تروحله عدل وكبل يوديك لثلاجة الموتى ونصيت صوتي ان شاءالله
اوديك بيدي لثلاجة الموتى يمي عبدالله اخويه كرصني

هو انجر بوشه : لالا ابقى ع الاعشاب احسلي

_اي صح هو انت شبيك شو حيلك اقوى مني هسه اذا تلزمني تطلع روحي بيك بعد تعيش فد
١٠ سنوات ترى هواي مو بالله

اباوع ابويه خازرني بس بالكوة كاتم ضحكته
وهو عيونه تريد تطلع من مكانها

تركتهم وطلعت للطرمه اضحك بصوت عالي ....

زهراء: كاعدة وحدي بحديقة الكلية  عدنا ريست  والبنات راحوا للحمامات ..

من بعيد شفت استاذ رافد جاي باتجاهي ، وتقرب وصار يمي بقيت اباوعله بعدم فهم

وهو بهدوء كال : زهراء ممكن احجي وياج..

جاوبته : بلي دكتور تفضل

سعل يريد يحجي  ، اجوا البنات ..
هو شافهم كال بعدين نحجي  سلميلي ع الاهل ..

بقيت باهته وتمتمت : يوصل دكتور ..

رحنا للنادي دااكل رن موبايلي باوعته  رشا تتصل بيه

شعدها هاي !!!

اووو خلي اجاوبها فتحت خط و بعدني مكايله الوو

انهدت بيه: بنت ابوج وتعالي للبيت
اليوم بنت ام السحووووره اني اعلمج هاي شمسويه ولج ..؟؟

يتبع ..