رواية شريعة العشق الفصل السابع وثلاثون 37 - بقلم نورا ناصر

شريعة العشق
بارت ٣٣
نورا ناصر ..

كمت ونزلت من السرير باوعت لماما ووجهت كلامي الها :  صارت بيها عبرة معناها اكو رزاله اني اعرفج
متكولين عبرة الا اذا اكو شي مصخم .

كالت بحزم : اسكتي ولج خلي اكمل كلامي
جاوبتها : العفو يوم كملي...

_بيت عمتج ام قسور ، جوا وشكلهم جايين
خطابه عليج يابه وحق القرأن اذا نزلتي وفشلتيني وحجيتي كلمه كدامهم اكفخج ع حلكج افتهمتي
تنزلين تسلمين مثل الاوادم مو تنطنطين مثل القرودة

_شكو ام السوس شو استلمتيني رزايل وقرودة
شايفتني كاعده ع الشجرة واكل موز واشمر الكشور عليكم ؟

ماكدرت تمنع نفسها من الضحك تقربت مني مدت ايدها و كفختني ع راسي بخفه ووياهه نزلت خصلات من شعري على وجهي .

حركت راسي بعبث وجنون اوخر خصلات شعري
كالت : زين ماما ؟ ماوصيج بعد ! اي شي يسألوج كولي بكيف ماما وبابا واحنه اي قرار تريدي توافقين
او ترفضين احنه وياج وابد لتفكرين بعلاقتي اني وعمتج وجتبقى قويه ان شاءالله ..  لان هذا زواج وعشرة عمر مااريد باجر عكبه تكولين بسببج وافقت!

بابتسامة حجيت : لا شكو اكول وبعدين  منو كلج حوافق ؟

_ توافقين متوافقين شي راجع الج بس عرفي شون تحجين ؟

_ صااااار شكم ام السوس عدنه ادللي الي تريديه يصير

ابتسمت ماما ؛ عفيه بنيتي ، كامت ، اني نزلت وراها ، فتت للاستقبال صار كبالي  قسور  ..

اجت عينه عليه تغيرت ملامحه و تعابير وجهه  ، وكدرت اقرا بيها القلق والاعجاب بوقت واحد ..

بعدت عيوني من نظراته بدون اهتمام ، وفتت سلمت عليهم ،  وطلعت رحت للمطبخ حضرت عصير وكيك واجيت قدمتلهم واخذتلي مكان كعدت .

بدأ زوج عمتي  يحجي ويا بابا : ابو زهراء احنه اليوم جايين نطلب ايد بنتك عبورة لابني قسور ..

بس سمعت كلامه استنكرته بداخلي ردت اعبر عن رفضي بأي طريقة بس تذكرت كلام ماما قبل شويه لا مترهم عيب ارد على الرجال قررت اكوم من مكاني بلكت يحسون اني مموافقة .

وكفت على حيلي دا اريد اطلع من الاستقبال واحاني صوت عمتي : وين ماما عبورة وين رايحة ؟ قابل هو غريب حتى تكومين اشو ابن عمتج وتعرفي ويعرفج اكعدي بنتيتي اكعدي خلي يكمل عمج كلامه .

باوعت لماما اشرتلي اكعد كعدت بمكاني .. اما قسور بانت على ملامحه سخريه واستياء ممزوجين ..

بابا جاوبه : والله اني كلش احبه لقسور وهو خوش ولد والمنطقة كلها تشهد اله مو  بس اني لكن القرار لبنتي اولا واخيرا وان شاءالله ارجعلكم جواب ..

انتبهت لقسور ديباوع عليه ، وجهت نظراتي اله
التقت عيوني بعيونه ، شفته ابتسم باستهزاء وعوج حلكه بسخريه ونظراته كلها يأس  وكأن هو يعرف جوابي مقدماً ..

اشتعلت نظراتي بتحدي  و هو دار وجهه مزعوج ..

بداخلي انقهرت عليه بس مو بيدي يا ابن عمتي
اعرف كلش زين هو خوش ولد واخلاقه زينه
بس المشكلة تكمن بأعماقي ، بمضخة الدم الي محبوسة بأضلاعي هيه المسؤؤلة عن قراري ، ماكو اي مشاعر تجاهه للاسف !

عمه باوعتلي وحجت بنبرة تحاول من خلالها اقناعي وتثنيني عن قراري الي كان واضح للجميع
: - ماما عبورة ابوج يكول بكيفج اعرف لازم
تفكرين لان هذا زواج مو لعب بس انتي مبدئيا
شنو رأيج؟

باوعت لماما نظراتها تحسسني بانه تكولي مثل مكتلج وحسيت الورطه تحاصرني ..
ماما كالتلي اكولهم بكيف اهلي وهسه بابا كاللهم
اشوف رأي عبير خرررب بالحظ الي ورطني هالورطة
تجمعت شجاعتي ورديت .

_عمه الله كريم ليش مستعجله هيج موضوع مو
من هسه انطيج جواب لازم افكر

_براحتج حبيبة عمتج بس والله الولد شاريج واحنه ميتين عليج فكري زين ولا تستعجلين .. وشتردون احنه حاضرين .

اكتفيت بهز راسي وابتسامة على وجهي بدون ماباوع عليها ، وعيني ع الكاع بس مبتسمة ..

بعدها ترخصوا وطلعوا ، اجه بابا يضحك باوع لماما

_ولج سوسن شو بناتنه وحده ورا الثانية كاموا يخطبوهم زهراء شافت حياتها وهسه عبك اجوها
خطابه عبالك وحده جرت الثانيه

ماما: هههههههههه لتستعجل عبير متوافق..

بابا وهو متفاجأ سألها : ليش متوافق قسور خوش ولد والله حاله حال ولد اخواني

ماما: اييي جيب اليقتنع هههههههه

عبير : ها ماما سالمين قبل شويه تكوليلي شنو يكون
قرارج احنه وياج اشو هسه تغيرت الموجه

_ولج شحجيت اني

بابا: باباتي فكري براحتج وانطينا جواب ومثل مكالت امج شنو يكون جوابج احنه وياج

مريم: محمد ابن عمه  هواي ديلح زهكني خو من
اندعمت يومية يجي يمنا الى ان طكت روحي
ورزلته رزاله غسل ولبس وهم ميحس واحد خرگه
جاي براسي يريد يصير رجال..

وبيوم جان جاي يمنا كاعدين بالصاله ظل يلغي
كالعادة ، اني مغلسه  وما اجاوبه ، اباوع عوالتلفزيون متابعه برنامج بس كلساع اباوعله بعصبيه واخزره
لوو ما البرنامج ما اكابل جهرته واكعد ابد .

جانت عبير تضحك وياه وتسولف ، محمد بنفس عمر عبير هم ١٦ سنة
وهو بهالعمر يدخن وهم كل السوالف الطايح حظها بي
تمنيت اطرده بس لو ماعيب من امه وهم امي ترفض هالشي .

باوعلي بنظراته القبيحة ووجه سؤاله لعبير وكانو يحاول استفزازي : أكولج عبير هاي اختج ليش هيج قاسيه مو مثلج اريحيه وحبابه

بعدها عبير ممجاوبته نطيت من مكاني: أني مو قاسية بس انت ماعندك رجوله ولزكه يااخي بنية
متريدك شكو لازك يمنه عجيب امرك

عبير التفتت عليه معجبها كلامي كالتلي كومي
اصعدي للغرفه كمتي تجفصين مهما يكن هو اكبر
منج ولو هو كلامج صح اني اتعجب ع شخص
يلزك لواحد ميريده

محمد ضاج بسرعه وكام على حيله ظل يتحلف ..
اني هيج تكوليلي اني اعلمج بسيطة

عبير عاطت بي: لك انت شو متستحي داخل بيتنا
وتتحلف بيها شنو هي هيته الا اكول لعمو عليك
بسيطه قليل الادب ..

ضحك باستهزاء وعيونه تشع من الغضب وطلع بره .

اجت عبير عليه لزمتني من كتفي الثاني حيل: ارتاحيتي انتي شنو لسانج متعرفين شوكت تستخدمي هذا واحد هتلي وسرسري من كام يتحلفلج الله يستر ..

هزيت ايدي ايييه وخري بلله اذيتيني متشوفي شون سكط وبعدين انت كله منج دتنطي مجال اطرده وماخلي يعتب باب بيتنا بعد .

_ لج انت صدك متستحين شنو اطرده مو عيب ؟ انت من تروحين لبيتهم هم يطردوج ؟

_ قابل اني مثله اشو محترمة نفسي بس هو واحد طايح حظه ..

دنتعارك بالحجي  اجت ماما من بيت خالو.
توها كعدت ماما دترتاح  عبير حجتلها من الالف ياء عصبت وظلت تدردم كالت جيبولي تليفوني شوفو وين ؟

عبير ماما اكيد بجنطتج .. اخذت جنطتها بعصبيه طلعت تليفونها وخابرت عمتي  وحجتلها كل شي سواه ابنها ..

سدت التليفون ماما واحنا سألناهه : شكالت عمه
كامت على حيلها ماما كالت ظلت تتعذر شتكول بعد ؟ اسمعي اذا احنا مموجودين بعد متفوتينه للبيت مفهوم ؟

هزيت راسي صار ماما .. راحت ماما لغرفتها تبدل
باوعت لمريم فرحانه وتحجي ايييه الحقير بعد ميجي لبيتنا اكيد وبعد قسور حيبسطه مثل الحيوان العععب ..

تحجي وفرحانه ظليت اهز بيدي واضحك على سوالفها .. اخذتها للمطبخ سوينه كيك واجتي ماما دتسوي العشاء .. واحنه رحنه للصالة كعدنه
  اجه بابا من برا ..

باوعتله من الباب وهو ديفوت عرفته من ملامحه  كولش ضايج ومعصب
استغربت هو مو من عادته يجي معصب ..ويزفر بغضب ..

  طلعت ماما من المطبخ وتلكته ، سألته : شبيك تحسين مو على بعضك شكو صاير شي ؟
باوعلها وعيونه حمرة تجاهلها و مجاوبها على سؤالها بس كاللها :  فايت انام ولحد يكعدني ترا مالي خلك .

قبل لا احد يجاوب هو فات للغرفة ..

بقينا نتصفن بابا شبي هيج ضايج .. سألنا ماما

ماما باوعت علينا: بنات اصعدوا لغرفتكم ابوكم تعبان مااريد صوت وانتي مريم مو تضوجين
اختج وتكب عيطتكم ..

ركضنا ، صعدنا فوك

عبير:  لزمتني انفلونزا ظليت بس اعطس وسخنت ، وبلاعيمي طبكن طبكه معدلة ووجعهن مينحمل
نزلت لماما انطتني علاج ..

كتلها ماما باجر ماراح اداوم مابيه والله على هاي حالتي ..
مقبلت كالت برفض اسكتي تفوتج دروس منا للصبح تصيرين زينه ..

واذا ماصرت زينه والله ولا بيه اروح ماما رحميني ..

كالت صعدي ارتاحي هسه لاتظلين تكمزين يم راسي واني راح اسويلج حليب كافي تشربي تكعدين الصبح كلشي مابيج .

صعدت تمددت بفراشي وغفيت مادريت بنفسي ماحسيت غير على امي تغطيني ورجعت كملت نومتي .

الصبح اجتي كعدتني دا اروح للمدرسة بس اني كولش مابيه اكوم مسطورة سطر .. توسلت لماما لحتى ما اروح وكوة يله اقتنعت .

رجعت نمت واسمع الباب تندك ، غلست ورجعت نمت بلكي يشوفون  محد يطلع الهم ويروحون ..

يربي شون عديمي ذوق هسه منو جاي من الصبح ، سحلت نفسي من الفراش سحل ونزلت جوة ، رحت فتحت الباب صارت بوجهي زهراء...

كتلها شجابج ...!!!

كالت طيح الله حظج شبيج من الصبح دوخري خل افووت ..

  فتحت عيوني زين باوعتلها  تضحك و وجهه مورد ...

باوعت عليها بتركيز وحاجب صاعد وحاجب نازل  همست الله يتمم علينا العقل اكولج اكو واحد يجي ساعه ٨ الصبح شنو زوجج مطردج ؟

باوعت عليه وضحكت وفاتت جوا وتحجي : يااا عشتو شحده غير اطرده ..

سبقتها بسرعة واجيت اصعد فوك اكمل نومتي
سمعت صوتها لج وين موليه تجاهلته وطكيتها ركضه اريد اشرد منها رغم انفلونزا ..

لحكتني للسرير تكعد بيه وتوخر البطانيه من على وجهي ..
_كومي لج جايه يمج شنو ترجعين تنامين شكد
ماعندج ذوق انتي

_اهوووووو زهراء بالكوة ماما قبلت مااداوم اتركيني انام لتلحييين النوم بالنسبة اليه شريان
الحياة والحب الابدي

_ميخالف بس كومي دااحجيلج لتظلين بومه شبيج

_ تمام بس انام ساعه واكعد كومي انزلي سويلي ريوك واتاخري بداعة صفاء حبييج واني بس اشبع نوم اكعد واسمعج وعد

ظلت تأشر بأصبعها السبابه : باعي حنزل اسويلج ريوك واصعد اكعدج زين

_اي اي اي بس روحي غير لزكه يبوووو عرستي ومرتاحيت منج ..

ضحكت وطلعت من الغرفة واني تنفست بارتياح  وخليت راسي على المخدة غمضت عيوني .

قبل لا اغفى رررن موبايلي ، كمممممت بعصبيه وشمرت البطانيه اوووو وكتتتك هسه ، اخذت الموبايل شفته رقم  كرار منور موبايلي هه واني شون كارهته بالفترة الاخيرة بلحظتها احس الشياطين تربعت
براسي..

بس فتحت خط عطت بي: انتوووووووا شنوووو متواعدين تدرون بيه اليوم غبت اريد انطمرررررر

_وسم شبيج انتي مو زعلانه عليه شهالميانه هاي
تعيطين هههههههههههه

جريت نفس باستياء وغضب ..
   اردف : اكولك عبود الصبح شفتك مداومت خير خوما بيك شي؟

_بيه سم اريد انام بعد لتتصل يله روووح ..

_اوكفي لج باعي انتي وحدج بالبيت مو ؟

مجاوبته وبس اتنفس بعصبية ..

اجاني صوته : - لج دااكول مو
هم مجاوبته وبقيت ساكته ..

عيط : ياالكائنات دااكول مو؟  اوكي احسن شي اجاوب نفسي ، وعود جاوب نفسه ويقلد صوتي
اي وحدي بالبيت.. 

بقيته ساكته كال خاتون راح اخليلج ماعون كيمر وكاهي ورا الباب افتحي اخذيهم واتريكي بيهم

ظل يصيح : الووووو دتسمعين

صيحت بنفس نبرته : بلي دااسمع شبيك طرشتني..

_وسم اي لعد  متحجين ؟

تثاوبت وحجيت وياه : مااريد زهراء دتسويلي ريوك

_ميخالف خليته الج بالباب انزلي اخذي...

سد الخط واني كمت واغلط عليه هو وزهراء لان
منمت بسببهم ،  نزلت ورحت للباب  اخذت الماعون ودا اطب التفتت  صارت  زهراء كدامي قبل لتحجي كلتلها هذا من كرار .. وفتت جوا بالمطبخ ، ريحة البيض المقلي والجاي المهيل اخترقت انفاسي كعدت ع الطاولة وظلينه نحجي اني وزهراء ..

زهراء: كعدنا ناكل اني وعبير واستغليتها فرصة ماما ماكو ولا مريم حتى افضفض الها واحجيلها الي صار بالفندق لمن جنه بدبي ..

سكتت وبقت صافنه بوجهي ثواني ، وكالت : الصراحه حيل بيج اكو وحده متربايه تكول لزوجها بس الكلب صوته صوته عالي وحقير وقنادر مكطعه بربج ماما وبابا هيج علموج شنو هالاحترام العندج لج عيب والله
من يمي خجلت انتي مخجلتي من نفسج

والله تستاهلين لو ساحلج من شعرج جان
ارتاحيت شنو بس راشدي وكفخه هاي ماما صارلها ٢٠ سنه متزوجه لليوم مسمعت صوتها يرتفع بوجه بابا وانتي بأول شهر تحجين هيج ؟ لا ربحنا

بقيت ساكته بمكاني وهيه كامت كملت الريوك ..
طلعت رحت للصالة وافكر ، صاحتني : تعالي خاتون حتى ناكل مو خبصتيني

رحت يمها كعدنا ناكل وهم  افكر بكلامها والله صح اذا عرفت ماما غير تشوي البصل ع اذاني كملنا ريوك وهي راحت غسلت المواعين ونظفت البيت واني رحت تمددت بغرفتي منتظرة ماما
تجي اريد اروح وياها للسوگ ...

كرار : راجع من الدوام شفت عبير بالطريق هم جانت جايه  من المدرسة ،  باوعتلها ابتسمت الها .. باوعت ورايه وفتحت عيونها بصدمة طفيفة
و كامت تمشي سريع ،  استغربت شبيها ؟

توني اريد  اصيحها سمعت صوت مألوف ورايه
التفتت شفت جماعتي ورايه ، ابتسمت وعرفت
ليش شردت الغبيه خافت مني ..

سلمت على اصدقائي من بعيد ولحكتها للبيت
وصلت يم بابهم سرعت بخطواتي وصرت يمها
اجت دتسد الباب خليت رجلي شافتني !!

بسرعه حجت برجاء: والنبي هالمرة مسلمت عليك واصلا بس شفتهم اجيت للبيت وكملت بتهديد
روح حباب عليك الله ماما هنا والله اصيحها عليك ترى ..

من شفتها هيج خايفه حبيت انصب عليها خزرتها:
لج اني مو كلتلج غيري ملابسج شنو انتي عبالج
هاي شخصيه لو تحبين تستعرضين ؟

بسرعه دنكت ع ملابسها وحجت بصدق: والله غيرتهم واشتريت
صدريه حتى مو قياسي  اكبر

باوعت لصدريتها شفتها عريضه بس اني حبيت اراوغ ..

كالت بتوسل : يلا حباب روح

بعدني دااحجي جان تطبك الباب بوجهي وهمست:
عابت شكد مكروه متروح لخطيبتك تحاسبها شكو لازك
بيه !!

صيحت عليها من وره الباب : لجججج ترى سمعتج نيلز قزمه اشو معاجبج كلامي

سمعت صوت مشيتها عرفتها فلتت
اجيت دااروح طلع صفاء من بيتهم شافني اجه
سلم عليه باوعتله وضعه متغير

كرار: اكولك شنو انت ممداوم اليوم
_لا ولك داومت واخذت زمنيه ورجعت

_اي شكو عليك قابل مثل حالي ابوها ابو كرش
ميقبل نتزوج هسه ميكول هذا شاب خطيه شلون
يكضي الليل

_اهووووو حطيت عينك جنك امي دمشي ولي
الله لايبارك بيك مثل الغراب

_اي شسوي مو كاطع ليلة عرسك وماادري ابو وجه
اليبجي اكولك انت هم تضحك

_ليش لعد ؟

_والله مااتصور وجهك يلطم يااخي هاي زهراء
شلون متحملتك ؟

من ذكرت اسمها اشو هذا ابتسم ...

صوفرت :ها لك وكعت مو كول لتستحي احجي
واحرك بحواجبي

_لك شبيك جنك مطي ويجعر

هجمت عليه ادفر بي احجي بروح اختك المشعوله رشا هههههههههههه من اشتعلت روحها اذا ماتت
اكابل الجدورة واضرب ثريد واسب بيها

_لا يا سكط يومك قبل يومها يا حمار

_ولك اني اتعجب عليكم شلون تحبوها هاي لو اختي وحق الله اسمها وادخل السجن يااخي عذاب نفسي

_انجببببببببب لك يلا ولي

_تعااااااال لك وين مووولي اشعل اهلك والله بس
تروح

_سم وقزالقرط كون شكو تعيط شارع الخلفك العصر عود تعال عليه نروح لشارع النضال اذا
مااجيت حظك اطيحه ...

_كبر طمك كون هو انت هم تنحب عجيب ولي

رجعت للبيت صعدت فوك لغرفتي دا ابدل رن موبايلي    باوعت عبير دتتصل  مجاوبتها و نزلت تغديت ..

خلصت غده صعدت نمت من كعدت تذكرت عبير اتصلت عليه ، اخذت تليفوني و رجعت اتصلت بيها مجاوبت ورا شويه رجعت اتصلت طلعلي مشغول تركتها ....

زهراء:  اول يوم دوام بالكلية  اخذني صفاء ووصلني للجامعة ، نزلت من السيارة واشوف الجامعه جبيرة وبيها هواي بشر  ، خفت رجعت التفتت لصفاء وعيوني تعلكت بيه ..

هو شافني هيج رجع باوع عليه كال شبيج ؟ شنو هالنظرة هاي ؟

مادري صفاء ابقى ويايه خاف اضيع ...

ضحك بشقاوة ولج جنج طفل اول يوم بالمدرسة ويتوسل بأمه ..

رجعت عيوني ع الكليه ،  اني بطبعي
مو اجتماعية ابد عكس اخواتي ..

اخذني وصلني للقسم مالتي .. كال يله اني رايح ..
باوعتله بقلق كال بنبرة حانيه لتخافين شوي شوي تتعودين واي شي تحتاجي او يصير وياج خابريني واني بس يصير الي مجال اخابرج تمام .

هزيت راسي ، دار ظهره ومشى تعلكت عيوني بي واني اباوعله يبتعد بخطواته عني من صدك تمنيته يبقى ويايه ..

دخلت للكلية ونظرات الحيرة على عيوني .. اجت بنية
وكفت يمي كالت هلاو  .. باوعتلها متفاجأة : هلاو

سألتني :   يا مرحله ؟

جاوبتها : مرحله اولى ..

_ اني هم  مرحله اولى ، شفت محتارة وحدج .

_ اي ..

_ اسمي نور ..

_ اني زهراء ..

بقت كاعدة يمي تسولف ويايه ، وراها  قسمونا ع القاعات هي ويايه نفس القاعه ظليت امشي وياها خففت عني القلق والحيرة شويه ..

بالاضافه الى هذا هيه هواي مرحه وتضحك هواي
مثل عبير وكرار  ارتاحيت الها وتعلقت بيها ..

مرت ايام صارت نور اقرب صديقه اليه وبعدها تعرفنا
ع ٣ بنات وحده من المدينه اسمها انوار والثانيه
من البياع نسرين والثالثه من كربلاء  اقسام
داخليه اسمها ..

هواي اصفن عليها  ايات واحس  شايفتها بس مدااتذكر وين حتى طريقة كلامها مألوفه عندي ونبرتها سامعتها
   بس خجلت اسألها وتركتها للايام ..

بالبيت دا احجي وي صفاء كتله تدري منو يجينه ؟
كال منو ؟
استاذ رافد ابن عمة بابا ..

_ صد ُك خوش لعد حتى احاجي واوصي يدير باله عليج ..

بسرعه كمزت: لاااا ماااريد خاف يصير شي بعدين
ويكولون تنجح بالواسطه لا لتحاجي خيولي مااحبه

_وانتي شنو قابل حتعيشين وياه حتى متحبي ورفعلي تك حاجب
وجدحني بنظرة شرسة .

بلعت ريك وغلست مجاوبته ....

عبير: كاعده بالمطبخ دا اكل ،  اجت ماما باوعتلي
جرت كرسي وكعدت يمي ومبين بنظراتها هواي حجي .

_اكول بنتي شو مرجعتي جواب ع ابن عمتج هاي
صار ١٠ ايام وهم ينتظرون منج كلمة

جاوبتها ببرود : ماادري والله ماما مفكرت نسيت ..

_شلون حجي هذا كولي اي لولا

_باجر ارجع جواب ..

_وشمعنى باجر ؟

_مو علمود  بالليل افكر

_خبال كون الله يتممج بعقلج انتي ضاربه فيوز
ابد مو صاحيه

دتحجي وترزل بيه دخل بابا : اتركيها براحتها ياعيني

_هسه اني شسويت مجرد سألتها بيت خالتها دينتظرون جوابها

باوعلي بابا وابتسم : اني متأكد هي حتفكر عدل
وتنطينا الجواب الصح...

بلعت لطمتي وجيت اغص انصدمت ، خررررب هذا معناه بابا موافق على  قسور !!!! ويريدني هماتين اوافق ؟؟؟ لو شنو معنى كلامه !

باوعت لبابا حيرانه شفته غمز لماما تعالي للغرفه اريدج.... 

راحوا للغرفه وخلوني بذروة افكاري ..
هو قسور خوش ولد ومثقف وخلوق مناقصه شي وبعدله سنتين  ويتخرج ... بس اني محتارة ..

صعدت للغرفه ، بلا تردد خابرت على كرار دااريد
اخذ رأيه لان هو حيل قريب مني ، اتصلت مجاوبني 
عفت التليفون ..

للعصر رن موبايلي شفته ديتصل بيه ..
ضوجني ، خابرت على الشركه وحظرته ..

صار المغرب وبعدني دا افكر ، اخذت الموبايل واتصلت على قسور سلمت عليه حسيته يحجي ويايه ببرود مصطنع ..

كلتله باع اذا ميعجبك احجي وياك كول عادي ترى اني اصلا اتصلت بيك لان عندي موضوع مهم وياك....

هو جاوبني وحاول يغير نبرته بس صوته هالمرة يحجي بحزن  : لا والله ليش هيج تحجين بس تعبان اني والله عبير .

جريت نفس وسألته : من شنو؟

_منج ومن الدنيا كلها المهم كولي شنو الموضوع

جاوبته بسرعة : قسور اذا وافقت عليك اكمل دراسة وشوكت مااريد اجي لماما تجيبني والاهم من كل هذا تبعد اخوك عن مريم ..

اجاني صوته يحجي بحماس ولا عبالك قسور الي جاوبني قبل شويه عبالك نسى كل هموم الدنيه بلحظة :  اول طلبين اني عن نفسي مااقبل تتركين دراستج ابد واذا على عمتي  شوكت ميعجبج نروح هاي سهلة ومنتهين منها ، بس شنو دخل محمد ومريم بموضوعنا؟

_لا اله دخل اذا اخوك استمر يضايق اختي هالشي
يأثر علينا

_اي صح هسه الله كريم واني هذا محمد والله
ماساكتله ولا حتى ابويه قابل على تصرفاته
المهم افهم من كلامج انتي موافقه مو؟

ابتسمت: باجر ماما تبلغكم جوابي

هو ضحك بصوت عالي: لج قزمه منين طلعتي انتي اني الثكيل من اشوفج اكوم ارجف واتبهذل
كدامج طفله ولا عبه بيه لعب

حاجيته بنبرة امر : لتكول طفله ...

_احلى طفله والله اموووووت على ربج ...
سكتت وبس اتنفس ...

كال : روحي عبير انفاسي مااريد الوثج واتغزل بيج بالحرام من تصيرين الي  اشبعج غزل احبج و ادللج وحق ستر العقيله ديري بالج ع نفسج بنية گلبي ..

بقيت ما اعرف شنو ارد على كلامه ابد ما اعرف
ارد على هيج كلام ومشاعري متباينه ما اعرف احساسي بلحظتها مجرد مستغربة وبس .

سديته منه دخلت ماما تبتسم : ولج جنتي تحجين
ويا قسور؟

_بلي ماما انطيته موافقتي وبس شرطت عليه اكمل دراستي..

_ايييي .. سهلة هاي يووم ، يعني موافقه مو ؟

_بلي يوم بس من اخلص السادس يلا نتزوج

ابتسمت وباستني براسي الله يسعدج بنتي ويوفقج قسور خوش ولد يستاهلج

_اااااا ماما مو هسه تنطيهم جوابي باجر

احتضنت خدي بحنيه وبسمتها متفارك شفايفها هزت راسها بخفة وكالت ؛ ماشي
تركتني ونزلت

زهراء ....  طلعنا  اني وصفاء للربيعي بزيونه
دنتمشى ونسولف مندمجين ...

باوعت شفت وحدة مو غريبة عليه بس شافتنا ركزت علينا ، احس نظراته تجلدني بقسوة ، حسيت بالضيق يفتك صدري ، ماريد التفتت لصفاء واشوف نظراته الها خايفه انقهر وانصدم ..

حسيته لزم ايدي وظل يضغط عليها ، باوعتله بقهر
و اني اكتم اهات الوجع ..

ظل يباوعلي ونظراته عكس تفكيري تماما ، كأن يكولي انتي اهم منها هي ماضي وانتي الحاضر والمستقبل...

تقربوا منه ،  اجه زوجها سلم
علينا وهي سلمت على صفاء وعيونها تتوسل ووتعذب بشوفته و شوقها مفضوح بعيونها ..

اجت حضنتني عود دتسلم عليه ، هه استغربت الحنيه الي نزلت عليها فجأة ..

قربت من اذني وهمستلي ولسان حالها يتوسل الشفقة : ديري بالج عليه بس متأكدة متنسعدين وياه لان نفسي بي!!!!!

يتبع