رواية شريعة العشق الفصل الخامس وثلاثون 35 - بقلم نورا ناصر

#شريعة العشق
بارت٣١
نورا ناصر ..

********

  ♡    وگلبك مو گلب!!!!  صخرة وعليها اضلوع....

*******

زهراء: قربت حواجبي من بعضها واباوع للمسج مستغربة !! منو هذا وشبسرعة حصل رقمي عود جديد هم مصار هوايه من خليته !

رجعت قريت المسج بالنهايه مخلي حرف S!!
شنو القصه؟ منو هذا    ال S ...!!!!

احس انصعقت عبالك اني ناقصه مشاكل ..
وانوب هذا مدري منو؟ وشنو يريد ؟وشنو الي يريد يوصل اله بالتحديد !  بقيت افكر !

رفعت راسي اباوع على صفاء كاعد كدام ، هو انتبه عليه بالمرايه ودار وجهه عليه يباوعلي بنظرات يريد تفسير ..

هزيت اله راسي بمعنى ماكو شي ، باوع ع التليفون الي بعده جان بيدي ، ارتبكت ، كمت ضميته بالجنطة....

اكيد مو وكته هسه اكوله  ، وحتى اذا وكته شراح يسوي هو ؟ اول شي  حيكسر  السيم وثاني شي يشمره بالزبل وثالثا يجيب غيره اكيد معنده غيرها هايه  ..

بعد طول مسافة الطريق وصلنا لمنطقتنا ، نزلت من التكسي باوعت ع الباب مالة البيت مقفوله من بره بقفل حديد ومسلسلة ..

التفتت لصفاء جان بعده دينزل الجنط من التكسي
رحت تقربت منه حاجيته من ورا خشمي ..
_ الباب مقفوله ترا ،  انت عندك مفاتيح؟
_لا مماخذهم ويايه ...
_ لعد هسه شلون حندخل ؟ وبعدين عمه وعمو وين معقولة كلهم يم بهاء ؟

رفع راسه بملل وجاوبني : ما ادري علمي علمج .

_ هو انت شتدري بس بيك جبتنه سحل مناك لهناك بدون متتأكد ؟

باوعلي وخزرني ..

وكفت ظليت اتأفأف وصفاء ملتهي ينزل الجنط وراح حاسب ابو التكسي ، ظليت اخذ  بالجنط واقربهم من الباب ، انفتحت باب بيت اهلي و طلعت عبير بيدها الصوندة دتريد ترش الحديقه الخارجيه...

ظلت تباوع ثواني متفاجأة  وين يلا حجت:ياا هاي
شجابكم مو بعد وقت الي اعرفه بعد اسبوعين
لازم يلا ترجعون؟ صاير شي ؟

صفاء: واني الي اعرفه الواحد من يشوف واحد
مسافر يسلم عليه ويكوله الحمدلله ع السلامه
لو هاي مموجوده بقاموسج ست عبير؟

_ها ههه والله نسيت مو انصدمت من شفتكم

اجت سلمت علينا بوستها وحظنتها ، صفاء سألها عن بهاء شلون صار؟

استغربت وظلت تباوع متفاجأة كالت : بهاء!!! ليش شبي بهاء؟ اعتقد بالدوام هسه ، هو البارحه بالليل جان يمنا وبيت عمو بكربلاء ياخذولهم كم يوم ويرجعون...

تعالوا تفضلوا ماما مسويه دولمه ع ضلوع ودجاج شوي ع كولتهم حماتك تحبك ...

ظلينا نباوع لبعضنا مصدومين . ..

كامت عبير سحبت الجنط قبلنا ودخلت للبيت واحنه دخلنه وراها .. دخلت وهي تصيح: تحسين يا تحسين عيني ام السوس اجه نسيبج وبنته ...

وضحكت اي والله صار عدكم نسيب ٢٤ ساعه عاكد حواجبه عنده الضحكه حرام مدري بفلوس .... تحجي وتضحك ...

احنه جنا ساكتين ونباوع لبعض بعدم استيعاب
وبس هي تحجي رجعت التفتت
علينا: هاي شبيكم شو عقال عبالك طالب صف
اول ابتدائي ،  مستغرب الدوام تعالوا يا عيني تعالوا ..

ابتعدت بخطواتها عنا واني التفتت على  صفاء ضحكت بتشفي وحاجيته...
_ها شكلتلك مو كلتلك لعبة قذرة من خالتك مصدكتني عود ابقى هيج لتصدكني... 

_اششش اسكتي ... حجاهه بعصبية وحواجبه معكودة ويخوزر .. ظليت افر بيدي ..

_ اي ماعندك غيرها خو بس تريد تسكتني وماتريد تبين انته ملعوب عليك ظل هيج ..

صك على اسنانه وكال زهرااااااء ...

باوعتله باستهتار حتى مرة الثانيه تصدكني ترا اني ما احجي شي عبث ،  مجاوبني طبيت للاستقبال وهو ورايه كعدت ع التخك اتأفأف واهز بيدي واباوعله
وهو ولا يمه الموضوع متجاهلني كأنه ميشوفني ..

اجه بابا طب للاستقبال كمنا اني وصفاء ،   سلم علينا ..وبعدها جتي  ماما وراه ، اثنينهم عيونهم مدمعه من الفرح بشوفتنا  ، حضنت  ماما واني ماكدر اطفي شوقي واشتياقي الها ، حضنتها حيل واتمنى اضمها بين ضلوعي وما ابتعد عنها واتمنى احجيلها علي الي بيه بس ما اكدر ..

وخرت من حضنها رجعت حضنتني وتحجي : فدوووة بنيتي كبرت وجايه هي
ورجلها من السفر الله يسعدج يوم بجاه محمد وال
محمد ..

بابا: كافي عيني عاد اذكريني بدعوه من هاي ادعيتج لو هاي ملك حصري لبناتج

صفاء: عمي انت طاقه ايجابيه تمشي وتتغزل بعمتي هذا الغزل مالتك ميخلص

بابا: لتحط عينك ولك متزاعلين واريد اصلح الموقف بوجودكم

زهراء : اي بس بابا ماما متزعل الا اذا شي جبير مسوي
اعترف

عبير: والله ممسوي شي هي ماما تدلع ..

ماما توجه كلامها لعبير بتذمر : ولج انتي لو مخلفتلي بزونه احسن منج يايوم صرتي ويايه امشي ولي حضري الاكل ...

ماما بعدها حاضنتني من اكتافي ، التفتت تباوعلي وكالت : زهوره  اخذي رجلج وروحي لغرفتج القديمه غيروا ملابسكم وارتاحوا
بين ميجهز الاكل ...

باوعتله انطيته نظرة عود يله ،  كام واجه وكف يمي  فتنه للممر دنروح للغرفة ، وصلنه لباب الغرفة وجتي عبير  تركض وتصيح اوكفوا اوكفوا اوكفوا.....

التفتنا نباوعلها متعجبين ، فاتت من بيناتنا مثل الزيطة دخلت للغرفه وظلينا نباوع اني وصفاء لبعضنا ..

جانت النظرات والتنهيدات تحجي اكثر ، تحجي عتب والم وخذلان ..

شويه وطلعت تضحك خجلانه خدودهه حمرة ..
كالت يله هسه تكدرون تتفضلون ..

باوعلها صفاء: شسويتي جوا سويتيلنا سحر مو ولج ؟

عبير باوعت لصفاء بصدمه وعاطت وهيه تخلي ايدها على قلبها وبعدين ترفعها وتحركها كدام وجها
: عززززززا هاي انت تعرف تضحك لا مستحيل انصدمت دفوت عيني فوت ابو عيون الزرگ اسويله سحر ..

فات كاللها كولشي اتوقع منج انتي ..

وكفت بباب الغرفه جاوبتها .. والله يا نسيبي انت مايفيد وياك لا سحر ولا اي شي حتى لو اجيبلك الجني الازرك بنفسه ..

اجت ماما اخذتها من اكتافها وسحبتها عليها ..
وهيه توجه كلامعا الها : لج ام لسانين تعالي كافي لغوة لاتدوخيهم جايين تعبانين من السفر خليهم يرتاحون ..
وداراها ماما واخذتها وهيه تكوللها ام السوس انطي مجال .. مدت ايدها ماما وسدت الباب علينه ..

بالغرفة هو راح كعد السرير بتعب ظليت اباوعله ثواني .. هو مد ايده لجيبه واطلق تنهيدة طلعت من صدره بضجر ، بقيت صافنه عليه بدون عي مني .

تمتم بصوت شبه مسموع : غير يجاوبون ولا واحد منهم يرد ..

رفع راسه اجت عيني بعيونه ، نظراته تعذبني وتزيد اصراري بامتلاك قلبه ، ونبضاتي تثور بدون رحمة .

رفع حاجبه شبيج ؟ افتهمت ادري الجنط بقن بالاستقبال  كايم اجيبهم .

حمدت الله ماكدر يفسر نظراتي معقولة هلكد مبين عليه الالم  ! لدرجة فسر نظراتي  اني معصبه ؟

واكفة بنص الغرفة وهو كام يريد يروح لزمته من ايده
صارت ايدي على بطنه وكوع ايده  ..

حاجيته برفض : لا اني طالعه اجيبهم ابقى انته ..
ووخرت ايدي منه بدون مااباوعله وطلعت من الغرفة وهو بقى .

طلعت وجريت جنطه ورجعتها للغرفة ، دفعته باتجاهه وهو كاعد على الجربايه ومخلي رجل على رجل .

كتله هاك هاي جنطتك وبيها ملابسك ..

باوع عليها كال هاي مو الي الج ..

باوعتلها احنه عدنه اثنين جنط متشابهات ..
هزيت راسي برفض لا مو جنطتي مالتك هاي.

كام على حيله وزفر بملل ليش تلحين دااكولج الج هاي
رفعها من الارض وسفطها ع الجربايه ، مد ايده لقفالتها وفتحها ، غمضت عيوني يربي تطلع اله حتى استهزأ بي .

بعدني مغمضه عيوني اجاني صوته هاااا شكككلنه مو كلت الج بس شسوي لراسج اليابس !!

فتحت عبوني وي ماسمعت صوته ، باوعت لكيته متخصر ولازم الجنطه من فوك والجنطه صدك بيها ملابسي .

رحت للجنطه سديتهه بعصبيه واني ادردم لان عبالك خسرت التحدي وهالشي يزعجني ، ...
شلونه راسك عاد انت؟؟؟ اصلا ولا يتقارن ويايه كتلك اهلك مبيهم شي وخالتك كذابه ماصدكتني ع الاقل هياتها الصالة هنا هسه اطلع اجيب الجنطه الثانيه مو انت جبتنه سحل من دبي لبغداد حتى كولشي ماافتهمنا .

تقرب مني اكثر ويباوع بوجهي ، درت وجهي عنه ، حسيت باصابعه على وجهي ويدور وجهي عليه ، تعلكت نظراتي بي ..
عبالك النيران الي اشتعلت بداخله راح تطلع من خشمه واذنه ، ظل يحجي بانفعال وصاك على اسنانه  : لاتظلين تعيدين وتصقلين بهالموضوع كافي جنه بدبي وهسه ببغداد وانسي الموضوع وانسي خالتي مفهوم .

عفته بدون اجابه واريد اطلع ، وهيئتي كلها استهزاء ، رجع لزمني من عكسي وسحبني عليه لدرجه انضربت بصدره عبالك حايط او صبه كونكريتيه .

كال بتسلط .. شكلت اني مفهوووم ؟ من اكووول مفهووم ؟ انت همين تكولين ! شتكووولين .

بقيت ساكته وعيوني بعيونه ، قرب وجهه من وجهي لدرجة انمزجت انفاسنه .. فتح عيونه على اوسعها لدرجة رعبني وحجى من بين اسنانه وملامحه تأمرني احجي ..

انفرجت شفافي وحجيت بملل مفهووم .
ووووخرررر .. كلت هيج وابتعدت عنه ..

طلعت من الغرفة ادردم ، انت خبيث وكريه ومتعجرف ياريت اكدر على اقتلاع جذور حبه  السامة من  قلبي ياريت ...

دامشي ومندمجه  ادردم بحقدي على صفاء الي زاد معياره بالفترة الاخيرة ، طخيت بمريم جانت تفرك بعيونها هستوها كاعدة ، مشيت عنها اريد اروح للجنط بالصالة ، سحبتني من ملابسي ..
ونبرتها عبالك بجي وكالت ليش مدتردين عليه مو دااحاجيج ؟

التفتت عليها جريت نفس ، التهم ذرات الهواء المحيطه بيه كلها  وزفرت ، نزلت صرت بمستواها وحضنتها واني اتأسف الها حبيبتي مشتاقتلج متشبعين نوم انتي ؟

ضحكت واجت ورايه تسألني شوكت جيتو ؟
باوعت عليها واني اسحب الجنطه مصار هوايه هياتني بملابسي شوفي ؟

طلعت ماما من المطبخ كالت بعدج ممبدلة ..
جاوبتها احاول ابين ماعليه شي من النرفزة الي بسبب صفاء لا  ماما هسه دا اخذ الجنط للغرفه ..

صاحت عبير عبير لج امي اختج تعبانه ليش ما وديتيلها الجنط لحد غرفتها .

جاوبتها عبير من المطبخ مادري ماما عبالي هيه اخذتهم وانت هم منطيتيني مجال .

حاجيت ماما عادي اني هسه اخذهم . اخذت جنطته ورحت للغرفة جان واكف يم الشباك يدخن .

فتحت الجنطه طلعتله ملابس ورحت وديتهم اله
اخذهم وراح للحمام...

رحت لجنطتي طلعتلي ملابس وانتظره يطلع من الحمام حتى اروح اني ..

اجه  مبدل ورأسا راح  تمدد ، رحت بدلت واجيت لكيته
يلعب بموبايله ، كعدت على طرف السرير منطيته ظهري ، اهز رجلي بملل .

التفتت باوعتله: بالله هسه انت الواحد شيحجي وياك سويت ذاك المهرجان وتالي حتى مفاتيح البيت
ماعندك

تنهد ويباوعلي وملامحه ونظراته تكول ماتصيرلج جارة .. درت وجهي خليت ايدي على حلكي اهتزت اكتافي بسبب ضحكي الي كتمته ..

اجاني صوت بانفعال يحجي بدون ميباوعلي : خابرت على حسين هسه يجيبلي النسخه الثانية لاتظلين تلحين زهراء ترا حتصيرين مكروهه كولش .

صكيت على اسناني وكورت قبضة ايدي ، منطيته ظهري ، واضرب قبضة ايدي براحة كفي اللخ واحرص على عدم افتعال صوت ، كمت على حيلي وكفت ، وادردم بقلبي لا والله ماغيرك مكروه بس قلبي حقير يحبك اخخخ لو بيدي اشلع قلبي الي انته بي واشمره .

تركته بدون مااحجي ورحت يم ماما بالمطبخ شافتني ابتسمت واني هم رغم الهم الي بيه ابتسمت حسيت ابتسامته لجروحي دوه ، وكفت يمها هيه كاعدة ع الطاولة  تنضف الخضرة ، رفعت راسها كالت اكعدي يوم .. جريت كرسي وكعدت ..

ظلت تحجي ويايه وتوصيني على صفاء ..
باوعتلها وصفنت بوجهه ، حجيت بداخلي : خطيه امي عبالها زواجي مثل البنات أني بيش ورطت نفسي وشجاني عقلي وين جان هو اعرف الحب اعمى
بس اني كرامتي وين جانت من جنت اركض وراه
واستجدي النظره منه شكد نصحوني ولا سمعت
منهم بعد ميفيد الندم وياريت يفيد ...

اخذتني الدقائق واني صافنه ، انتبهت من صفنتي
على صوت ماما  باوعت عليها ها ماما ردتي شي ؟

_ اي بنتي شبيج صافنه ؟
دنكت ومسحت وجهي بيديه جاوبته وصوتي مغلف بالحسرة : ماكو شي هيجي مدري وين شرد بالي ..

_ روحي  صيح صفاء ع الغده ..

كمت من مكاني و رحت لكيته ديغفي...
وكفت يم راسه صحت بغصه صفاء مجاوبني اول مرة...

شمرت كل ثقلي ع السرير واني اكعد ع طرفه ، فتح عيونه بثقل ..

عيونه حمرة من النعاس ، حاجيته يله كوم تغده

  ماريد زهراء تغدوا انتوا بالعافيه متشوفيني شون نعسان قبل ثواني بس نمت .

كوم صفاء ماما دزتني اصيحك تغده وارجع نام .

اعتذريلي منها ...

لا  تشلع قلبي يله كوم خطيه عيب من بابا ، كوم غسل وجهك هسه تصحصح ....

ظل يتأفأف ، اكو بطل مي اخذته عبيت ايدي مي وخليته ع الكومدي بينما اريد اغسل وجهه بي نصه وكع على حضني ، لحد ما وصلت ايدي لوجهه باقي بس شويه بللت وجهه بي ..

وهو ظل يفتح عيونه ويسدد بيهم بانزعاج واني مبتسمة ، لزمني من رسغي وكومني عنه ، وكفت وسويتله مجال ، كام من الجربايه وراح للمغسلة
واني رحت للسفرة كعدت .

سألوني وينه صفاء ، جاوبتهم راح يغسل هسه يجي ...

اجه وكعد وبلشنا ناكل ، انتبهت ع الغده اهلي شلون يحبون صفاء بابا يجيب ويخلي اكل كدامه وهو ويا عبير ومريم منطلق ضحك وشقه بس يمي عاكد الحاجب والخلقه مكلوبه ...

تحسرت تمنيت ممتزوجته وباقيه ويا مجرد ابن عمي جان صارت العلاقه احلى من زوج وزوجه علاقه مملة رتيبه بس مناكر .

كرهت نفسي للحظات واباوعله ومتعذبه بحبه اريده حتى لو جان قربه الم  بعده عني راح يكون عذاب  .

كملنا غدا  ،  بسرعه رحت للغرفه ، نعسانه وافرك بعيوني واتثاوب تمددت ع السرير واستسلمت لنوم عميق وبسرعة ...

كعدت على صوت ماما يجي من ورا الباب فتحت عيوني وصحصحت ، انتبهت شي مطوقني من خصري اريد اتحرك حسيت وراي شي مثبتني عليه ، لكيت نفسي بحضن صفاء

عزززا هاي شوكت وشجابه يمي باوعت ع الباب شفت ماما فتحته ،  استحيت منها كلش هي ابتسمت وطلعت...

تحركت بحضنه وهو ولا يمه  انوب حضني اكثر وسحبني اله اكثر ..
همست واني اتحرك : صفاء حباب وخر صفاء دتسمعني خررررب مو حتى ماما شافتنا

جرني لحضنه وهمس بصوت كله نعاس:
اششششش حبابه اسكتي واذا شافتنا قابل ناهبج
ترى زوجتي

اجيت احجي حط ايده ع حلكي ورجع راسي ع المخده ورجع نام ،  التفتت عليه ظليت اباوع بوجهه

شنو البيك وخلاني هيج احبك انتبهت حتى وهو نايم عاكد حاجبه وشواربه مغطيه حلكه جانت
انفاسه الحاره تجي بوجهي ابتسمت اجيت داادير
وجهي

همس: شكو هلكد تباوعين عليه مضيعه شي بوجهي جان يحجي بصوت مليان نعس يحجي وهو مبتسم

تحركت كمت من حضنه كووة ، رحت دااتوضئ شافتني ماما : جان كعدتي زوجج ميصلح ياامي نايم دنيا المغرب

_ ان شاءالله ماما هسه رايحه اكعده ..

توضيت ورحت ، كعدته ماكعد عفته ورحت صليت وصفاء على نومته..

بالكوة كعد كام صلى وطلع كعد يم بابا
بينما اجه حسين انطانه المفاتيح اهلي توسلوا
بي نبقى يمهم مقبل رحنا للبيت هو بسرعه صعد
نام حسيته ديتهرب مني ميريد اعاتبه تركته
اني هم مالي مزاج.....

كرار: ايامي ويا مها تجنن صح اهلها مزعجين بس
صوتها وبسمتها جانت بلسم لجروحي ومن ازعل
منها تحير شتسوي حتى ارضى

فديوم دنتخابر جان يوم خميس

كلتلها: لج حبيبة اليوم الخميس هسه شيصير لو
ابوج قابل وانتي منورة غرفتي يمكن جان هذا
الخميس عرسنا بس شنسوي لعريف شلتاغ قافل
ع الكائنات

هي ساكته متحجي
_شبيج عيني متحجين
_يعني شحجي ياكرار قابل هو بيدي وانت كل متفتح هالموضوع نختمها بعركه ليش متسد هالسيرة افضل

بصياح : يعني لشوووووكت مها لشوووووكت مو روحي طكتتتتتتت

همست: اهدأ شبيك مو زين تصيح ليروح يصير بيك شي محد يفيدك والله

رجعت همست بصوت ناصي : حبيبي عمرري انت
ع شنو مستعجل اول وتالي حنتزوج وتمل مني
فدوة تروحلك مها لتعصب عمري

_روحي مها بعدين نحجي
_لا مااروح عادي حتى لو تفرغ غضبك بيه بس
لتظل تحرك بدمك حباب

_دااكولج روحي عجييييب روحي ابويه انتي شويه وارجع اتصل بيج

همست: ماااااا

_اوك متروحين لعد أسمعي تعرفين هسه انتي لو يمي شنو دنسوي جان هسه اني منز

عاطت : كافي اسكت انت ولا تستحي دااحجي وياك حتى متقهر نفسك وانت تحجي ويايه هيج
حجي متخجل

_مو يالكائنات دااكولج روحي تجبريني احجي هيج يلا تولين وبعدين تعالي جاي ترى انتي مرتي
وعادي اذا حجيت هيج مرة ثانية اذا كلتي متستحي اشك حلكج

سديته بوجهه ونزلت لكيت اخويه ليث يمنه هو واطفاله بس شافوني اجو يركضون عليه شلتهم
وبوستهم ورحت سلمت على ليث و زوجته...

زوجة ليث  سماهر كالت لابويه: عمي انت
لاتمر علينا ولاتجي عاد تعال فد يوم يمنا ترى
من حقنا تنور بيتنا

حجيت : بدت اللواكه من الاخير شتريدين انتي
جيه ميجون يمكم متفكرين بينا اني والبغل عبدالله منو يطبخلنا مو يغسل ملابسنا

_اهوووو كرار تعال وياهم

_وهاي وين يكفينا بيتج ناس تنام بالمطبخ واحنه
انام بالطرمه بهذا البرد شنو ضحية مقدمتنا

جنت احجي وياها بميانه لان هي بنت خالتي
بعدين هي كامت تريد تروح للمطبخ توكل بنتها
امي كلتلها : البيت كدامج خاله

_تقصد باب البيت كدامج ذاك اطلعي منه جايبه
جهالها وجايتنه جوعانين لا وفوكاها تعزم بينا
ع هالحسبه نموت من الجوع ...

التفتت عليه تضحك انته متجوز من سوالفك كرار ؟

امي كالتلها مو تزعلين عليج الله ..

كالت لا خاله مازعل هو كرار ينزعل منه ..

ليث كال هو مرات يجفص بالبطن واني ضاملكياهه تره تزوج واني اعلمك .

رفعت ايدي باستسلام لا ياجماعه اني استسلم مرتي متتحمل شقه ام دميعه بسرعه تبجي ..

ليث .. لعد واني مرتي شنووو جبار ابو المولدة ..

لا يمعودة حشاه جبار اقصد هيه حشاهه يله عيني البيت كله كدامج نكدر نكول غير شي احنه ..
ظلوا يضحكون وسماهر راحت للمطبخ توكل ابنها ..

صفاء .. طلعت اشتريت صمون من يم الفرن الي يم المدرسة ، جان وقت حلة البنات ، مشيت اريد ارجع للبيت ، واني بطريقي طلعت تليفوني دا اخابر على ابويه اشوفه شوكت يرجع .

واني دا امشي سمعت صوت شخطة مالة بريك
التفتت ع الشارع شفت سايق نزل من سيارته يدك على راسه ...

والتمن البنات الطالبات ، غلقت المكالمة ورحت باتجاههن اركض واسمعهن يحجن مرعوبات
بنت ست سوسن اندعمت!!!!

صرت احشك نفسي بيناتهن اريد اشوف منو من بنات عمي تحسين اندعمت ، عقل مظل براسي وكع الصمون من ايدي ..

فتت من بين جموع الطالبات واوخر بيهن اريد اوصل الها ، وفعلا وصلت واشوفها متمددة وغركانه بدمها !!!

يتبع ..

((في شريعة الحب من احيا قلباً بعد موته ف هو له))

هذا الكلام الجميل من زهراء بطلة القصة 😘👆

النشر يومين ويوم استراحة ..

برمضان احتمال يعني مو اكيد يتغير النشر يصير بين يوم ويوم والسبب تعرفون اكيد 😘❤وبعد رمضان بأذن الله نرجع لنفس البرنامج 😘❤