رواية شريعة العشق الفصل السادس وثلاثون 36 - بقلم نورا ناصر

شريعة العشق
بارت ٣٣
نورا ناصر

ومثل كل يوم
نبقه ثنينه نتاني..
منو اليتنازل ويحجي.!
وياهو اليحن ع ثاني .؟

واشوف مريم متمدده وغركانه بدمها ربي دخيلك ضليت اضرب على راسي ، رحت يمها والسايق جان يمها يدردم ، صيحت بوجهه شبيك ماتشوف غير تنتبه متشوف مكان بي مدرسة وكت الحلة وطالبات غير تقلل سرعتك ..

ظل يرجف كال يابه والله هيه صارت كدامي ..

ظليت اسب واغلط ، رفعتها من الكاع وركضت بيها طلعت بوجهي لمدينة الطب ، بالطريق خابرت عمي وبلغته بالحادث ..

وصلت للمستشفى اخذوها مني ، الضربه براسها وايدها متعورة ، وكفت من جبروا ايدها اسمع
صياحها والمها وروحي تتكطع عليها ....

صار عمي بوجهي وجهه اصفر وبالكوة يجر نفسه ووياه كرار وعبدالله ... لزمت عمي طمنته
_عمي حالتها زينه بس ايدها انكسرت وشويه جرح براسها خيطوا الجرح وهسه ديجبرون ايدهه .

_الحمدلله والشكر باوع صفاء لتبلغ عمتك مابيها
حيل صدمه الله يخليك وليدي

جاوبته بنبرة مطمئنة : اي اكيد عمي بدون متوصي ..

بقينا اكثر ٣ ساعات علما استقرت حالتها وطلعناهه للبيت...

زهراء: كعدت الصبح مالكيت صفاء يمي تمططت وكمت غسلت ونزلت للمطبخ طب صفاء معصب عيونه براسه وحمره دم انصدمت طب يسب ويشتم ..

خليت ايدي على قلبي واكول بسم الله الرحمن ، سكنهم مساكنهم ..

باوعلي صاح شبيييج ؟

خليت ايدي على خصري اني الي شبيه لو انت الي شبيك من الصباحيات وانوب مبدل وجنت طالع هاي وين جنت ؟؟

دخل يتأفأف ... وحجه بتذمر بدون ميباوعلي
رحت لبيت خالتي ام ضرغام تعاركت وياهه عمود دكتها ..

_ اي ام الدكايك وشكالتلك بلله ؟

باوعلي معاجبه وكمل كلامه وهو ديجر الكرسي ويكعد.

من رحت طلعلي ضرغام ابنها ظل يصيح بالشارع شتريد جاي اعتقد مابينا علاقه ولا قرابه لا من بعيد ولا من قريب شرايد ؟

شفت خالتي تطل من الحديقة ع الباب ونظراتها مرتبكة ، دفعته بكل قوتي وفتت جوة ..

وصلت يمها كالت خير جنك ثور هايج شتريد ؟

حجيت بعصبيه يعني ماتدرين شريد موو ؟
اني اكولج شريد ؟ بلله انت شنو الي تردين توصليله بهاي سوايتج ..

كالت والله اريد اطيح حظك ، عشتو يريد يتونس
هو ومرته وهو بقى حسرة بنفس بنتي......

صيحت عليها بلله ما استحيتي مو بنتج تزوجت ليش تدورين دفاتر عتيكة ..

اجه ضرغام كال يوم شمسويه ..؟

ظليت اهددها تبتعد عني وعنج وبعد مايتكرر الشي الصار واذا صار وتكرر متلوم اله نفسها .. عفتها تتعارك ويه ضرغام وطلعت ..

بقيت استمع اله بهدوء بس بداخلي نار شلون بلله مراح نخلص من اسراء وامها يربي ؟

اجاني صوته فززني من صفنتي رغم يحجي بهدوء .. _خليلي ريوك جوعان على لحم بطني طلعت .

ءءءءء صمون ماكو ترا ...

وشبيج تكوليها خايفه راح اسويج صمونه واكلج كايم اجيب صمون متعرفين تخابرين ؟ لمن جنت برا ؟

كام يدردم مشيت وراه ، وهم ادردم قابل شمدريني بيك برا هستوني كعدت اني وشفتك ماكو ..

ديله فوتي جوا اني رايح ....

اوكف اوكف بس دا اكتبلك قائمه اريد اسوي معجنات .
باوعلي بعدم رضى ورحت اني كتبت اله قائمة بشغلات اريدها وانطيتها اله اخذهه .

راح صفاء واني كعدت احضر الريوك بين ميجي ، تاخر هواي قلقت عليه هواي هذا وين راح ؟

اخذت التليفون وخابرته ، خابرته دك هواي يلا
جاوبني سألته: شو تاخرت انت وين هياته
السوبر ماركت براس الشارع ؟

اجاني صوته متوتر ؛ زهوره عيني اسمعيني زين بس ممنوع تبلغين امج

خفت من سمعت هيج ، حسيت اكو شي صاير
بالكوة حجيت : خير صفاء شكو فدوة خوفتني

_مريومه اندعمت وهسه اني وياها بالمستشفى...

شهكت من سمعت هالكلام ، توترت كلش وقلبي زادت نبضاته .. جاجيته بتوتر عليك صفاء اختي مابيها شي ؟

_ مابيها شي لتخافين فدشويه ونطلع وعمي هنا خاف تخابرج امج كوليلها صديقتها متخربطه وشايفه صفاء وطالبه منه ياخذهم لمدينة الطب اوكي مو تكوليلها وتخليها تنفعل انت اعرف بحالة امج بعد .

_ماشي ! وهسه هي شلونها مريم ، حباب خوما مابيها شي ؟

_لا مابيها شي يلا باي

سده مني وراح ، دمعت عيوني سفطت التليفون ع الميز وظليت رايحه جايه لساني يلهج بالدعاء لاختي وخايفه على امي وردة فعلها ماما متتحمل ابد .

اتذكرت عبير توديها وتجيبها
لعد عبير وين جانت عنها من اندعمت! بعدني داافكر اندك الباب رحت طلعت فتحته ..

صارت مقابيلي عبير وجهه اصفر والقلق مبين
عليها .. تساءلت بداخلي معقولة تدري ؟

عبالك قرت افكاري سألتني : اكولج زهراء مريم يمج لحد الان ما جايه للبيت

_لج لعد انتي مو يوميه تجيبيها وتوديها
اليوم ليش مجبتيها... حاجيتها بانفعال ..

جاوبتني بتبرير : مو صار عندي درس اضافي بعد الدوام ومكدرت اطلع هسه كوليلي يمج هي لولا

جريتها من ايدها وفوتتها جوه ، حجيتلها وكلتلها ممنوع تكول لماما

اباوع ع عبير وجهه انطعن وكامت تبجي وتلطم
ع راسها وتغلط على نفسها: كله صوجي الله لايوفقني لو تاركه الدرس لج شلووون ماما اذا
شافتها تتخربط هاي امي ولا متكوبتلها الراحه العام اني وهسه مريم

_لج اهدئي شبيج اني اريدج تقوين امي وانتي
كاعده تلطمين يمي كومي دنروح يم ماما وممنوع
تحجين افتهمتي ؟

باوعت لوجهه محتقن وعيونها غوركت بالدمع .. جريتها للمغسلة كتلها غسلي لتشوفج ماما هيج وتفتح تحقيق سين وجيم حبابه .. غسلت وجهه وبعدهه تشهك بالبجي ..

دقايق انتظرتها تهدأ اخذتها ورحت لبيت اهلي..
دخلت للبيت صحت ماما ماما وينج ؟ اجاني صوت ماما وطلعت من غرفتها ، عبير طكتها ركضه فووووك..

ماما باوعتلها باستغراب ورجعت باوعتلي هاي شبيها اختج ؟

توسلت بنفسي حتى لا اتوتر من احاجيها ودعيت ربي كون تصدكني جاوبتها ماما تليفونها يرن وراحت تشوف منو ديتصل .

ياربي سامحني على هالجذبه وموم مريم بالسلامة واحفظ الي امي ..

قويت نفسي وحجيت لماما ، رغم هذا بقت ممقتنعه بكلامي ، بقيت يمها ..

كالت حتبقين هنا ؟
اي ماما انتظر صفاء يجي ...

بعد وقت اجوا من المستشفى ...
ماما بس شافت مريم لطمت على صدرها بصدمه
ظلت تباوعلي بعتب وزعل ، دنكت واعصر بأصابعي ..

راحت ماما المريم الي شايلها صفاء
وكفت يمها بعد شويه يختل توازنهه وتوكع
كامت تصيح : اني عرفت قلبي كان حاس اكو
شي وهاي الرعنه تكذب عليه تكولي صديقتها متخربطه وذيج فلتت فوك حتى مااشوفها ..

صفاء : عمه غير يخافون عليج ميخالف اعذريهن سويلنه مجال عمه .. ولتخافين مابيها شي ..

_ صدك صفاء كولي مابيها شي ..
واخذت مريم لحضنها وظلت تفحص بيها ..

وكعدت ع التخم وحاضنتها لصدرها وتحجي وياهه ... شيوجعج شلونج هسه؟
وتبجي وتتحلطم ..

فات بابا شاف حال امي حجه وياها: دكافي يامرة اتركيها ترتاح هياتها كدامج كامله مكمله لتروحين تتخربطين فدوة لعينج انتي متعرفين من تتخربطين شيصير بيه حتى دكات قلبي تتخربط

بابا ديحجي وناسي وجود صفاء وكرار

كرار استغلها فرصة ظل يصوفر بصوت عالي : حلوووو عمي حلووووو اريد ادخل دورة يمك بشرفي خوش تتغزل خوما ابويه محسسني امي شرطي عنده بس يتأمر عليها ...

صفاء: انجب حبيبي لتخلي عينك عليهم هسه الي يسمع كلامك يكول حرف ميعرف يحجي لعد منو
ذاك اليوم خاتل بالسيارة ويبوس بالموبايل امي

ضحكنا عليهم ، تطمنت على مريم ونزلت عبير كعدت يم راسها توعدها انو بعد متتركها وحدها ..

صفاء اشرلي اروح وياه وكمت استأذننا منهم وطلعنا رجعنا للبيت ، سويت اكل ع السريع وخليت كدامه لان اذا جاع يخبلني ..

اللتهيت انضف البيت الظهريه والعصر كوله لان البيت متروك صار كم يوم محتاج تنظيف واحنه قبلها بيوم اجينه وانوب جنه يم اهلي وبالليل يله رجعنا مالحكت انظفه كله بالليل واليوم الصبح بقيت خايفه على مريم وهسه صار وقت الجلف ...

بالليل وصلوا عمو وعمه ، سلمنه عليهم واني داا اسوي عشاء الهم صفاء كعد يمهم وسولف لامه دكة خالته بينه
تعصبت لزمت الموبايل وخابرت اختها وظلت تصيح عليها ... على صوت الصياح وكفت بباب المطبخ الي يطل ع الهول ..

كلتلها: يعني هي كوة قسمه ومصارت والله خلصنا من شركم شعندج تركضين ورا ابني حتى فرحته منغصتها عليه حسبي الله ونعم الوكيل عليج ...

سكتت شويه تسمع اختها شتكول ورجعت انهدت بيها : لج انت اخت انتي ؟ انت سم وزقنبوت ماخذ مرته يونسها تجين تسوين بيهم هيجي وتفاولين على بهاء انوب لج عساهه تطلع باولادج مو باولادي شتردين مني متكوليلي ..

لج بنتج وزوجتيها شرايده بعد شرايدة ؟؟؟ مو انتوا الي ماردتوا ابني وولدج ورجلج حاروا شسووو ؟؟

اجه صفاء اخذ منها الموبايل وسدت المكالمة كافي يوم كافي دخيلج ليصيرلج شي الله يخليج عوفيها ولاتظلين تفتحين دفاتر قديمه وياهه الفات مات احنه ولد اليوم وان شاءالله زهراء اني اعوضها .

باوعتله بنظرة اسى ، تركتهم وفتت جوا كملت العشاء وخليته كدامهم ، وصعدت دايخه اريد انام...

طلعتلي فراش وفرشته جوه تمددت وغطيت نفسي انفتحت باب الغرفه ودخل صفاء للغرفه .. وكفت يم راسي يباوعلي .

سألته : تريد شي ؟

كمبص ونصه لمستواي : بلي كومي نامي.. واشر ع الجربايه كومي نامي ع الجربايه

عكدت حاجبي: مفهمت!!!
_لا فهمتي كولش زين يلا بنيتي ادخل اغير ملابسي الكاج نايمه ع الجربايه زين يحلوة ولتفكرين تطلعين من الغرفه ترى قافل الباب والمفتاح بجيبي

تركني ودخل للحمام ظليت اباوع وراه هذا شبي
شيريد ، ظليت اردد كلامه بنيتي ؟ يحلوة ؟ هذا صفاء لو مبدليه .!! لو اني احلم ؟ خاف مصخنه ؟ ظليت اتحسس وجهي بيديه ، لا والله كولشي مابيه .

شويه وطلع باوعلي برفض و اجه يمي: اني شكلت ليش تعاندين وجر اللحاف مني وشمره
واجه ديكومني ..

مديت ايدي لوجهه اتحسس حرارته : شبيك صفاء مصخن ؟

وخر ايدي منه وظل يسحب بيه يريد يكومني من السرير .. دفعته ..: وخر حباب مااريد
_هو شنو متردين دااكولج نامي ع الجربايه

_اي مااريد كوه هي خوما كوة مرتاحة هنا ..

_بلي كوة يلا كومي شكولج تسوين ..

كمت مجبورة ومعصبة ، خفت خاف يكوم يصيح ويفضحنا كعدت ع الجربايه امنيات حبيسة صدري اتمنى اقرب منه واعيش ويا حياة طبيعيه لكن وكبريائي الي يرفض التنازل .

انقهرت ما اعرف شسوي ظليت ادعي ع نفسي: ان شاءالله اموت واخلص منك

التفتلي بسرعه واجه يمشي سريع خفت عبالي حيضربني حميت وجهي بأديه وقلصت جسمي قدر المستطاع ورعشه مستميته عصفت بأطرافي

اجه حط ايده ع حلكي وخزرني :اششششش لتدعين على نفسج لججججج حيوانه

حسيت بطمأنينه وامنت انو محيضربني
كملت كلامي من ساعة السودة الحبيتك اني شنو
شفت بيك حتى حبيتك هااا كولي شنو شفت بيك

كام يضحك: والله شمدريني اسألي نفسج شكو تسأليني اني هم اتعجب عليج ع شنو حبيتيني
ولج اني مرات مااطيق نفسي واكره روحي شحبيتي بيه انت شكد فارغه وبطرانه !

لكمت المخده بقبضة ايدي ، احس بوخز بقلبي الموجوع والمتشبع بالالم تمدد وغطيت حتى راسي

سمعته يحجي بصوت ناصي : ولج هيج تختنكين
شويه اتركي مجال تتنفسين شكد فطيرة لخاطر ربج

تجاهلته ، واني اسمع خطواته يمشي بالغرفة واسمع صوت باب الكنتور ، وبعدها اجه كعد يم رجليه بسرعه ابتعدت ، ثنيت ركبي ورفعت راسي باوعت عليه
حاجيته مرعوبه : شكو شبيك والله حنام بعد مااحجي

ابتسم مد ايده جر رجلي سحبتها منه باوعلي : بس اهدئي مااسويلج شي وداعتج

صفنتت هذا شبي يحلف بداعتي شو من شوكت هاي
لو اني بحلم لو واحد منه مصخن ..

انتبهت عليه ديتلمس برجلي عطت بي: وخرررررر
حباب

_هسه غير تسكت انطي صبر شبيج مخبوصه انتي

وحجه بصوت ناصي هسه قابل سويت شسمه وياج

خزرته وهو كام يضحك...

حسيت باديه على رجلي ، حسيت بالدم يتدفق بقوة بشراييني واوردتي ، لبسني حجل واجه تقرب مني لزم وجهي بين اديه واني اباوعله ببراءة وعتب ، غمضت عيوني ، سرت قشعريره بجسمي ، انفاسه لفحت وجهي فتحت عيوني ظل صافن بعيوني قرب وجهه باسني من كصتي وطول بوسته .. عطره الرجولي القوي تغلغل باعمق اعماقي ..

همس...
_اسف لان ضربتج بس انتي طلعتيني عن طوري
ان شاءالله تنذكر ومتنعاد

ضم راسي لصدره اتمنيت ميبتعد عني تمنيت تستمر هاللحظة سنوات وقرون ، استنشقت عطره الاعشقه ، واحس قلبي يضرب على جدران قلبي بقووة وكانه لايحتمل البقاء حبيس اضلاعي ، صار ينبض وينبض وينبض بكل قوة .

وخر راسي من صدره و كعد بصفي ..
حجه بالكوة وانفاسه متخربطه ..
_زهوره نسيت اكولج طلع قبولج تحليلات ان شاءالله الاحد اخذج نسجل بالكلية ونشوف شوكت دوامج
اوكي؟

_تمام .. حجيت بتخدر ولساني احس انعكد اريد اعيش هاللحظة لاطول وقت ممكن . وان كانت حلم ماريد اصحى منه .

باوعت بعيونه متوترة . وكوة استنشق الهواء
ابتسم هو ومسح ع راسي وكام من يمي ..

عبير: اندكت الباب رحت فتحتها ، صار كدامي قسور بهتت وحسيت نفسي مجرد جماد ماكو اي تعبير على وجهي ..

ابتسم وحجه برقه : لج فدووة لهالطول ادري الله
من خلقج مافكر بعبده الفقير قسور

رفعت حاجبي : الواحد لازم يسلم مو يدخل باحماء بعدين شو جاي وحدك وين انوسه لعد ؟

_نايمه ومالي خلك انتظرها ، بس انت عبير شبيج حسي بيه ترا حرام عليج .

مجنت اتجاوب وياه ابد وهالشي يزعجه ويعصب
: قسور ترا اني مكايلتلك تحبني ! ترى انت من حبيتني
مطلبت منك هالشي هو شعور واني مااحس اتجاهك اي شي

_لج هو بيدي غير بيد هذا الكلب ابن الكلب من يشوفج يكوم يرجف لج وحق الخلقج اخاف عليج
من الهواء ليأذيج انطيني مجال والله متأكد تحبيني
اعرف بداخلج يمكن تكولين ماعنده كرامه لازك بيه

همست بدون قناعه : لاحشاك

_خليني اكمل وداعة حليب امي اني رزن ويا الكل بس يمج اصير طفل ويركض ورا امه

من حجه هيج انقهرت عليه بعده ديحجي طلع بابا
صاح هلا قسور .. سويت مجال لبابا واني تركتهم ودخلت ..

وسيبقى عناقك إطمئنان
يهدأ به كل وجع .

كاعدة بالغرفة وبيدي موبايلي
وصفاء متمدد ع السرير ، رغم يجمعنا المكان
بس هو مو وياي ابد ، احسه بغير عالم صافن
وما اعرف شنو الي يدور اباله واتمنى اعرف ..

ملل وضوجة باوعت لصفاء بس مجاي على بالي
اكسر الجليد الي بيننا ، اذا مو هو يبادر مستحيل اني اتنازل ..

طلعت رقم صديقتي ودا احاول اتصل بيها
بس مدتضبط ، موبايلي مااعرف شبي كل مااريد اتصل مااكدر ...

كمت من السرير وتوجهت للجهة الثانية
احوس بي ماكو فايدة
سمعت صوت صفاء :- شبيج تحوسين جنج دوامة ؟؟
ظليت اشر ع الموبايل : مدري شبي موبايلي
اشو ماجاي اكدر اتصل بصديقتي.....

_ اشو جيبي اشوفه
مديت ايدي وانطيته اله
اخذه مني وكعد ، نزل رجليه ع الارض
تكلم ببرود وهو يباوع للموبايل ؛- شبي خاف ماعندج رصيد ؟
_ لا بي رصيد بس اي رقم اتصل بي يعلك ويطلع من المكالمة ...
ضل يشتغل بي واني اباوعله ... تذكرت الملابس بالحمام ، طلعت من الغرفة ونزلت جوة ، دخلت للحمام
دااطلع الملابس لان نشفتهم وشريت قسم وقسم بقى
دااريد اطلع من الحمام مااحس الا صفاء صار كبالي
صار حاجز بيني وبين باب الحمام
باوعتله عيونه صايره بكصته
سترك يارب شصاير شبي يباوعلي هيج
واحس بنظرات الاتهام تشع من عيونه؟

اجه تقرب عليه: زهراء من شوكت هذا الرقم يدزلج رسائل ؟ وليش مكلتيلي؟ تعرفي انتي؟

انصدمت !!! اني مردت اكوله حتى ميشك بيه
وتالي حظي الاغبر شافهم مع العلم اني دائما احذفهم بس مرات يدز مسجات ما اكلف نفسي وااقراهم
فيبقون بالجهاز واليوم راح عن بالي ونسيتهم ..

جاوبته بنبرة مرتعشة تنذر ببكاء قريب
_ صفاء والله مااعرفه وهو من اول متزوجنا بدأ
يدزلي رسائل مو انطيتك الموبايل بوقتها وكسرت
الخط وغيرته والله مااعرف منين ديجيب رقمي

بقيت اعصر بيديه ومدنكة واعض بشفتي
حسيته تقرب عليه لدرجة جسمه طخ بجسمي
رفعت راسي بقيت اباوع بوجه أريد اشوف ليش هيج ديتقرب مني هالايام اريد اقرأ عيونه
المشكله من يتقرب مني كل احواله تتخربط ونفسه يتخربط

همس: تعرفين شي؟

_لااا شنو .. جاوبته وعيوني تتحرك بالارجاء اريد اخفي توتري ..
تكلم بنبرة حزم وانفاسه تضرب وجهي
_أني لو ماواثق منج واعرف انتي خام وفتحتي عيونج عليه جان البيت حركته هسه وداعة امي ..

دنكت ظليت اهز براسي علامة الايجاب ..
نصه صوته لدرجة بالكوه اسمعه : زهراء اني من مااخذتج ترى الي قصد بيها ما ردت اطخج واني
بالي بغير مكان أريد اكون بس الج دتفهميني زهوره؟

بعدني مرتبكة قربه مني يوترني
جاوبته : امممم اي اي داافهمك صفاء

هو طويل كولش دنك لمستواي ظل يباوع ع ركبتي وع الشامه البيها تلمسها باطراف اصابعه
مرر اصابعه على ركبتي برقة
لحد ما وصل لحنكي رفع وجهي
باوعتله ابتسمتله ابتسامة مرتعشة
وعيونه مركزها ع عيوني .. عبالك نظراته تريد تسرقني
نصه باس الشامه وطول بالبوسه....

بعدها ظل يشم بركبتي انفاسه حاره احس قلبي مثل طير محبوس بقفص وظل يرفرف بجنحانه يريد يطلع من سجنه ... وانهارت كل دروع الكبرياء الي حصنتها ضده ، صارت هشه وبسرعة تدمرت
امام هذا السيل الجارف من الحب والرغبة ..

جلدي كزبر دااحس صفاء مو هو
الي اعرفه فقد لمساته صارت جريئة

حطيت ايدي ع صدره اريد ادفعه لان احنه بالحمام وخاف عمه تدخل علينا لزم ايدي قوي خزرني
وهمس بعصبيه : لتدفعيييين لجججج

_صفاء مو شسمه
_اشششش لتكولين شسمه كم مرة كلتلج لتكوليها

_اوك بس احنه بالحمام فدووة وخر عيب خاف تجي عمه حباب

ابتسم وابتعد مسح مكان الشامه وراح
تنفست الصعداء واني امس عرك كصتي
همزين طلع بالكوة سيطرت ع نفسي وبقيت واكفه
ع رجليه جسمي ذبل ونفسي تخربط بعدني ع نفس وكفتي جان تجي عمه

_ياااا هاي بعدج بالحمام ولج

_هسه عمه حطلع
_لا والله عمه العتب مو عليج ع ذاك ابني انوب
يتختل بالحمام شنو يمه ممكفيتكم الغرفه

متتت من الخجل احس دم جسمي تجمع بخدودي
و حراره جسمي ارتفعت ، بعدها تحجي رجع صفاء
مرة ثانية

لزمته: ولك يمه بس لا حبلتها بالحمام انوب يجيني حفيد مسكون صخااام بعينك كون

صفاء ضحك بصوت عالي وجاوبها بعد ماكمل نوبة الضحك: الله اكبر هم اول بوسه واول شمه وانلكفت بيها هو الحظه اعوج يبقى
اعوج

يبوووو انوب هذا ولايخجل يحجيها طك بطك
همزين عمه مفهمت كلامه تركتهم وصعدت ركض
للغرفه حتى الملابس تركتهم وراي وماكملتهم

صعدت واسمع عمه تحجي وتضحك: انوب حتى الملابس تركتهم العوبه اني صحتها تشرهم لو صحتها حتى
تختل بالحمام

صفاء يكولها: ديلا يمه هسه اني اشرهم الج
وهيه تكوله ديلله عيني الدكتور دنشوف شون تشرهن ..

دخلت للغرفة وخليت ايدي على قلبي
تذكرت الصار بالحمام قبل شويه
لا اراديه ابتسمت وخليت ايدي على قلبي
غمضت عيوني واني احس الموقف ينعاد
بكل لحظة ، احس انفاسي مليانه بعطره
ولذة بكل جسمي وجسمه قريب مني ...

حسيت بيدة الباب تحركت طكيتها ركضة
للحمام مال الغرفة ، دخلت وسديت الباب ..

****

عبير: دنيا العصر جنت بغرفتي صعدتلي ماما تباوعلي من ورا خشمها: أسمعي عبرة ...

طفرت من مكاني وصحت ياستار متكولي عبرة اله اذا صاير شي !!!!

يتبع ..