رواية شريعة العشق الفصل الخمسون 50 - بقلم نورا ناصر

شريعة العشق
بارت ٤٥
نورا ناصر

شفت عمو متمدد بالممر وميتحرك ، ظليت الطم على وجهي ، التفتت شفت رشا واكفة مصدمومة ، عطت بوجهه  ؛- ارتاحيتي هسه راح تموتين واحد من وره سوالفج .

دنكت لمستواه اريده يكعد ميكعد ، جتي رشا تكعد بي وتعيط على صوتها جتي عمه ، شافته امدد ، ظلت تمشي وتصرخ كوه وصلت يمه انهارت كلش ، كعدت يم راسه وخلته بحضنها وتباوعلنا ؛  تعاركتن وجلطتنه هاا اعترفن ولجن ..

عفت رشا تتلاغه وياهه واني صعدت  اركض لغرفتي اخابر ع صفاء يجي بسرعة عمو راح يروح بيها ...

اتصلت عليه ميجاوب ، نزلت شفتهن يمه يحاولن وياه بس هو ماكو ولا حركة ،  طلعت لبيت اهلي دكيت الباب طلعلي بابا ؛- زهراء خير شكوو وجهج اصفر شمسويه من مصيبة بعد ..

_ بابا الحك عمو وكع وميتحرك ..

بدون ميحجي ركض وطب للبيت ، شافه وراح طلع السيارة مالته ورجع ويانه  كوة شلناه اني وبابا وعمه ورشا وصعدناه بالسيارة مالة بابا  وراحت وياه عمه اخذوا للمستشفى...

بقيت وحدي بالحديقة وكلي ارجف واعصر باصابعي وادعيله يكون مابي شي ،  وراها بشويه دخل صفاء ...
اجه باتجاهي كال شكووو ؟
_ عمو تخربط ووداه بابا للمستشفى انته وين جنت وليش ماترد على التليفون ..

انصدم  ؛ شبي ابويه شصار ؟ حجه هيج وهو يطلع تليفونه من جيبه وكال صامت وراح   بسرعة صعد فوك للغرفة واني تبعته ،  بدل ملابسه واخذ الباج ولحكهم ...

انتبهت رشا ماكو اختفت الحقيرة شردت لغرفتها...

بقيت بس افكر بعمو خطية وضميري يأنبني خاف بسببي هيج تخربط ، خابرت صفاء كال ضغطه والسكر

لليل جابوا عمو ، التمينه كلنا عليه وولده كلهم موجودين ، يطمئنون على صحته ..

اجتي رشا ومبينه متندمة وكفت مقابيله تريد تحجي وياه كال: وخروها عن وجهي لا اكوم اجرم بيها لو مخلف ولد سرسري ولا مخلف هيج بنية اخلاقها متنباع بفلس...

عمه كامت على حيلها واخذتها باتجاه غرفتها والولد ظلوا يتسائلون شكو وشصاير ؟
عمو كاللهم روحوا لبيوتكم اني اريد ارتاح تعبان ..

هم اخذوا كلامه تحمدوا اله على السلامة و راحوا ..
نريد نطلع عمو كال صفاء صيح الملعونة رشا ..

_ يابه انتَ تعبان عوفها تولي طبها طوب توك تعرفها مريضة نفسية وماتحب الخير لأحد ..

بإصرار ؛- صيحها كتلك يله .. 

هز راسه صفاء باستسلام وهمس ؛- صار يابه ..

اجت رشا وجهه على الكاع وتمشي على كيف ..

كاللها عمو اسمعي ولج هسه تروحين لبيتج وبعد مالج فوته ع بيت ابوج وانسي عندج اهل وشوفيلج احد يبات وياج حتى لو تاخذين امج وياج بس فكينه منج

باوعتلي وخزرتني تريد تحجي خزرها وعاط بيها بتعب وايده على قلبه ؛- ولي مناااااا يله صفاء ودووها لبيتهاااااااا..

تنفس صفاء بعصبية وراح باتجاه رشا ، اخذها من عكسها ودفعها باتجاه غرفتها وهو يأمرها بنبرة أمر
_ يلله ولي لمي اغراضج وامشي اوديج لبيتج ...

راحت جوه وتباوعلي وتخزر اجتي عمه كعدت يم عمو وتتوسل بي صدك جذب منك توك تعرفها انت زين هسه شون تروح هيه ماتكولي تبقى وحدها ابيتها والوضع خطر ورجلها مامنه خبر يطبون عليها يذبحونها
ويذبحون  اطفالها الله يرضاهه رسوله ؟

اشرلها عموو اششش سكتي انتِ عاجبتج سوالفها روحي وياها يله كومي من وجهي وين صفاء يوديني لغرفتي انام ومن اطلع ماريد اشوفها كدامي ..

عمه خزرتني واني درت وجهي وصعدت فوك ....

                             ***

مريم:...

طلعنا اني وماما  لعرس إبن عمتي يمنه بالمنطقة
عبير راحت قبل الحنه بيوم بقت يمهم ، واني بقيت ويا أمي ، وصلنه لبيت عمتي دخلنا للبيت جان هوسه كلش كعدنا بالصالة والناس طابة طالعة وبعدها الحفلة مابدت ،  صار بوجهي محمد ظل  بس يخزر بيه....

ندست ماما انتبهت باوعتله
سألته ؛ خير ماما شبيك مضيع شي ..

جاوبها بحدية ؛- لا خاله سلامتج بس هاي شلون مطلعتها هيج ؟

ماما عصبت ؛ وانت شعليك بنتي واني حرة بيها وابوها راضي انت منو حتى تدخل اخوها لو ابن عمها ومن هسه اكولك كطنه وخليها بأذنك لو تنطبق السما ع الارض مريومه ماانطيها الك يلا وخر من كدامي يله .

راح ويتلفت ويخوزر بيه ، لمن ما اختفى من كدامي
كمت ادور على عبير اريد اشوفها وين فتت ع الممر الي يودي للدرج محد موجود بي دااريد اصعد  مااحس الا محمد جرني ولزكني ع الحايط وكال ادبسززز
عطت ؛ مامااااا 

باوعت  قسور ع الدرج نزل بسرعه و دفعه عني
لزكه بالكاع ودنك صار بمستواه يريد يضربه صارت عمه ام قسور بيناتهم وفاككتهم بس قسور بقى معصب وبس يريد ينتقم منه ..

                             ***

عبير: جنت كاعدة ويا البنات فوك سمعت صوت هوسه جوة نسيت نفسي بالبدلة ربع ردن وقصيرة ورحت نزلت شفت قسور لازم محمد و يصيح لك خزيتنا الله ينتقم منك ..

وعمه تفاكك بيهم .. ويمهم اولاد عمتي
باوعلي قسور خزرني ، حسيت على نفسي
ركضت صعدت فوك وايدي على قلبي واكول الله يستر شكو شصاير وكتها هسه يتعاركون الحمدلله والشكر ..

لشويه صعدت مريم كوه تحجي وتتنفس بسرعة
باوعتلها مصدومة ولج شكوو شبيج ؟

تحجي وترجف ؛- امشي عبير ماما دزتني عليج تكول نرجع للبيت متشوفين هالهوسة الجوة بسبب محمد ..

_ولويش نرجع شعلينه هو هذا محمد واحد سافل
حيل بي

_لج دمشي يمعوده ترى هم اتعاركوا بسببي ..
وحجيت السالفه لعبير

_ طبه مرض عاشت ايده لقسور شكو ديسحبج شنو خطيبته لو زوجته شهالاستهتار هذا حييييل بي هالنذل ومع ذلك ماارجع للبيت واترك الحنة دروحي بنتي مخبله انتي اترك الحفلة هو اني جايه اريد اركص وداعتج عظامي يحتاجلها هزة

_ انت ماتشبعين ؟ مو من البارحة لليوم انت هنا بعد شكوو ؟

بعدنا نحجي ومريم تتوسل بيه اروح صعد  قسور واجه يمي  : عبير امشي ارجعي ويا اهلج يلا بسرعه واذا حضرتج معوزة ركص عود شغلي اغاني واركصي يلا بسرعه امشي حتى اوصلكم

اباوعله خجلانه و حجيت بقلبي : خررررب شكد عيب سمعني من كلت اريد اركص ..

رحت لبست شال طلعت ماشفتهم نازلين ، نزلت جوة ، سجى بنت عمتي مشغلو اغاني التفتت ورايه ماكو أحد كابلتها وركصت جان يكمزني صوت قسور وهو يعيط

_لج غضضضضضب وينج ادري بيج د تركصين يلا بسرعه اطلعي لتخلين غضبي يطلع عليجج

طلعت اركض شفته واكف بالحديقة  ويمه مريم
شافني دار وجهه ومشى باتجاه باب الشارع ، تبعناه  يمشي كدامي ويسب بأخوه خفت احاجي  واني روحي واصله لخشمي التفتت ع مريم

_اكولج انتي شكد غبية بدال ماتعيطين جان كفختي هسه هيج احسن انحرمنا من العرس بسبب غبائج ثول الثولج كون شكد اعلم بيج بس ميفيد .

التفتلي قسور كاتم ضحكته ، هم سمعني تنهدت بعصبية  هذا شدعوة هيج مركز ويايه ، عضيت شفتي  وتمتمت عابت .

سألت عن ماما مريم كالت بسيارة قسور تنتظرنا ...
اسمع صوت عمه ورانه تصيح التفتت تخزر بينا
وتعيط على قسور وين مولي سكطت اخوك شبعته كتل علمود هذني شجاك تخبلت وهسه رايح تفرفر بيهن ؟

تقرب منها قسور ؛ يووم صوتج وابنج سكط وممتربي شكو يتحارش بالبنية مو بنت اخوج هاذي ؟

باوعت لمريم وكالت ؛ هيه صلفة ومتنجرع ..

عبير ؛ عمه شنو هالحجي هذا متشوفي لابنج لازك لاختي لزكة خلي يفك ترة عيب عليه واختي مو صلفة .

ظلت تأشر عليه وتحجي وي قسور ؛ هيه هاي الي كتلت اخوك علمودها ام لسان شوفها شون تحاجيني اسمع ولك قسور اذا هاي تفرق بينك وبين اخوك من هسه لا نعقد الكم ولا تنخطبون كطنه وشيلها من اذنك فااهم ؟

طبك اسنانه وحجه ؛ يوووم راح اوصل البنات واجي وبعدين نحجي ..

اشرلنه مشينه اني ومريم وهي تعيط وراه وممهتمه للناس الي يسمعوهه اذا رحت اتبره منك والله .......

                               ***

كرار: كاعد بغرفتي دا انتظر مها تجي من الدكتورة
دخلت للغرفة وجهه شاحب وعيونها مغوركة
سألتها شبي وجهج مكلوب جينكو ؟

سألتها!!!!
وياريتني ما سألت انفتحت تبجي وتعيط

_انت راح تعوفني وانت منا وجاي حتتركني

_يمعوده شكو شبيج لج خوفتيني عليج كافي بجي
ماكو متحجي وبس تشهك ،  عطت بيها بصوت فززها يلا حجت ؛- الدكتورة تكولي عندج التهابات وعندي ضعف بالمبايض

_اي وشنو يعني الالتهابات تتعالج والمبايض تاخذيلهم منشطات ع هاي ثبرتيني وجايه تنوحين واطمئني حتى اذا ماصار اطفال وجودج يكفيني انتي طفلتي المدلله شسوي بالاطفال اذا اجوا يبعدوج عني انت دگة گلب كرار .

مسحت دموعها عبالك ممقتنعة وتباوعلي ..

كامت على حيلها تركتني ونزلت جوا ، تركتها مانزلت وراها ، احسن  خلي تهدأ ، اصلا  أني بالفعل موضوع الاطفال مو ببالي وهي ذابحه نفسها ..

طولت جوا ضجت وحدي نزلت  لحكتها لكيتها كاعدة يم أمي وابويه وتبجي وهم يهدأون بيها  .

كمبصت كدامها : لج عيني ادري مالكيتي مكان غير تكعدين بالنص ادري صينية جاي انتي

كامت تبجي بالزايد باوعتلها: اكولج اذا فكرت أتزوج مو لان متخلفين بس لان تلطمين هواي واني رجال احب الضحك وانتي محرم وصفر مجتمعات عندج .

مدنكه ولا يمي بعدها تبجي وتشهك ..

اتقربت شاورتها : ادري اجيب كلنكس لدموعج لو للاستخدامات الاخرى

عبالي تفك ماكو قافله ،  ابويه حجه وياها حتى يضحكها : باباتي شنو بالطفل احنه عدنا كرار اكبر قرد يكمز واحنه نفتر وراه

_الله يخليك حجي خوش تخليلي احترام كدام زوجتي

مااهتم وكمل كلامه: يا بنتي اذا تريدين طفل اول شي ربينله كرار لان ربالي عله

باوعتله : اكولك حجي هو القرد ابو شنو هسه قابل اني طفرة وراثيه

_لا ياادبسز يا ناقص قصدك اني قرد يادايح ابو الشوارع

التفتت لمها تضحك كلتلها : ها هسه ارتاحيتي من شبعت غلط بسببج!!!!!

صفاء: مرت ايام واشهر واني وزهراء حياتنا ماشيه تعودنا على بعض وتعلقنا ببعض ، وبيوم  راجع من الدوام  بالطريق وكفت بالتقاطع وازدحامات ، وصلني مسج من رقم غريب ..

اخذت الموبايل فتحت المسج مكتوب بي
(انت بالدوام والمي يمشي من جوا رجليك زعطوطه تقشمرك وتتمعشق ويا استاذها)

مااهتميت للرساله لان اني واثق من زهراء ثقتي بيها عمياء  واعرف هي شنو فتحت عينها عليه وينها وين هالسوالف حتى طخ براسي هذا ملعوب من رشا لان اعرف بيها متوب وهسه اكيد حاقدة اكثر لان ابويه مانعها من الجية لبيتنا اكيد دتسوي مشاكل من بعيد ، بس منو عدها بالكلية ويصور !!!
تنهدت و اتعوذت من الشيطان ...

واني داافكر ومحتار وصلني مسج على وتساب وجان توه منتشر النت بالعراق فتحت المسج باوعت صورة زهراء بالكلية  ووياها ولد وجانت هي مبتسمة بس الولد ممبين ، انصدمت وكف شعر راسي ماعونت يخلص الازدحام واطلع  سقت باقصى سرعه وانطلقت للبيت.

واني بطريقي  حاولت اتصل بالرقم يطلعلي مغلق ورا تقريب نص ساعه وصلتني صورة ثانية وهي كاعدة وهو كاعد يمها على ميز بالكافتريا مال الكلية...

انوب النرفزني ازدحامات بغداد بس أريد اوصل للبيت اني اعرف هي مستحيل عدها شي بس ردت اعرف هذا منو ؟ 

بالف يا الله يلا وصلت للبيت  صعدت للغرفه بعدها ماجاية ، كعدت انتظرها على نار ..

وكلساع اطل من الشباك ، ورا ساعه او اكثر يلا اجت شفتها نزلت من سيارة ، هي بالعادة تجي قبلي بس اليوم مااعرف ليش اجت ورايه ، انتبهت ع ملابسها نفس الملابس الجانت لابستهم بالصورة عقلي كام يفسر بكيفه بس گلبي يبررلها .

انتظرتها تصعد ، واحاول اتماسك بس مجاي اكدر ..

باوعت عليه وارتبكت عبالك مسويه مكسورة واني منا دين ما باقي براسي وهي دتجيب الشكوك لنفسها

سألتها: خاتون الساعه بالاربعه الا ربع وين جنتي؟

ظلت مصفصفه وتباوعلي ابد مرمشت جريتها من ايدها وقربتها عليه ظلت تهتز بيدي مثل السعفة
ووكعت اغراضها من ايدها ..

عطت بوجهه : دااسألججججج وييييين جنتي لتنخرسين مية مرة اكولج من اسألج الغييييي لتظلين صافننننه بوجههي وتخليني اخربط بالحجي

ظلت على نفس صفنتها وعيونها تبث الرعب والخوف ومدمعة  وترجف ، تذكرت تخاف من الصوت العالي واني منا نار لعنت الشيطان خررررب حظي هسه هاي شلون اتفاهم وياها؟ 

نصيت صوتي ورققت لزمتي لايدها : احجي زهراء وين جنتي

بتوسل جاوبتني ؛ صفاء والله السيارة مال الخط عطلت واجيت أاجر تكسي بس خفت منك انت متقبل ومانعني من انو اجي تكسي

_اكولج هسه شفتج من الشباك اجيتي بغير سيارة الخط شنو كدامج طرطور وتجذبين عليه ترى راضع ويا ابليس أني منو هذا الي وصلج

_بلي بس على كيفك خل افهمك ،  والله هو خابر أبن عمه جابنه لان سيارته عطلت واجينا اني والبنات وياه

تركتها بدفعة خفيفة ، موبايلي جان ع الجربايه سحبته وفتحت الرسائل
وشوفتها الصور  : وهاي شنو بعد ست الحسن عطل الستول مالتج وكعدتي ويا هذا التيس لو شنو لج راااااح اتخبل

باوعتلي محتارة ورجعت باوعت للموبايل جاوبتني بنبرة تحاول تقنعني : هذا دكتور عدنا يدرسني واكو محاضرة جنت مفاهمتها وهو درسنياها اليوم وبعدين ترى هذا رافد ابن عمة بابا يعني مو غريب بمقام عمو واذا كعدت وياه وبعدين اني حاجيتلك عنه .

_بمقام عمو!!! لعد بعد عمج.. هذا عمج ليش ما مطلع وجهه شنو يستحي اخطبه لو اصجمه وهو خافي وجهه عني ..

وبعدين اني مو محذرج من رافد السكط وكايلج ماارتاحله هذا مو راحه شكو تكُعدين وياه وحدكم
ابتلي بيج هسه لو شسوي

_اتذكر انته مرة كتلي راح توصي عليه لو نسيت وبعدين هو حباب والله انت ظالمه .

_لججج اعتبريني محذرج منه هسه وترة لاتكولين حباب ما تعرفيني بسوالف الولد بهاء اخويه جان وياه وسولفلي كل سوالفه قبل فترة وانتي توكفين وياه طول بطول وتتمضحكين

_بس اني شمدريني ؟
_لابس ولا شي اسكتي لا اجرم بيج ومحمد تعرفين هذا ليش دز الرسائل اليه؟؟

تقربت منها وكزيت ع اسناني هذا دزهم لان معجب بيج لان يريدج ياغبرة

خزرتني
لتخزرين لا افكس عيونج بالعباس هسه اموتج فسرررررريلي ليششش يدزلي هيج صور

_منو يكول هو ها شنو دليلك
_لعد منو دزهم أمي لو الكائنات

_ماادري ماادري تعبانه ومالي خلك وروحي طالعه روح انت ابحث عن الرقم وشوف صاحبه احسن من ما جاي تحقق ويايه وتتهم استاذ رافد

_شو دتدافعله خير سالمين

سكتت وتنهدت بضيق ،  رفعت أيدي اريد اضربها هي باوعت لايدي وخزرتني والصدمة تزيد اتساع عيونها ، كوة سيطرت على نفسي وماضربتها ،  دفعتها وطلعت من الغرفه....

ظليت احاول ابحث عن صاحب الرقم واتصلت باصدقائي ، طلعت من البيت لان اذا ابقى اجرم بيها شلون صلفه واكفه كدامي وتدافعله سهلة  !!

                              ***

عبير: خابرني قسور  سألني عندج شي لولا هالايام جاوبته لا بس استغربت لويش دتسأل شكو؟

_مو دوامي صار اسبوع ب١٤ يوم علمود اذا ماعندج شي نهاية هالاسبوع نسوي حفلة الخطوبة ونعقد

_هاا بس انت غير اول شيء تخابر اهلي ليش دتخابرني اليه

_لا ياعمري اول شيء انتي حتى اذا عندج رفض او تأجيل مايحتاج ابلغهم لان اذا وصل الخبر الهم بعد زحمه اكعد أاجل لذلك سألتج بالاول

_ لا ماعندي .
_عبير انطيت لامي فلوس البدلات والذهب شنو يعجبج اختاري وشنو الي بنفسج واريده كله من الزين ترى دااتعب علمودج انتي وبس ابد لتبخلين ع نفسج خوش حبيبة

_قسور اني مااريد اشياء ضخمه ومتهمني المظاهر اني من وافقت عليك وافقت لانك رجل وبيك صفات تشبه بابا اما الذهب اني حشتري بس حلقه ومن تجي انت نشتري الباقي اني وياك ع ذوقنا

ضحك ع كيف: ها يعني وافقتي عليه بس لان عندي صفات اشبه ابوج بس اني احلى من ابوج ترى

_ياااا منيلك مو زين قبلت بيك لتنسى ركضتك سنة ونص يلا وافقت عليك هههه

_ذليني بعد ذليني ومن نتزوج سولفيها لاطفالنا لتنسين ابد

ضحكت .. 
_عبير امي تجي وياكم ترى من تأجرون البدلات

_اهووووو شعدها قسور اني مااحب أمك نسيت اخر مرة شسوت بينا امك كلش متغيرة ويانه والسبب اخوك .

_ميخالف لخاطري وبعدين هاي أمي عبير
لتظلين كل مااخابرج تحجين عليها ترى مااقبلج ابد خوووش

حسيته عصب :هي كل متشوفني تظل تشمر حجي عبالك كاطعه ليلة عرسها عليها ذاك اليوم تكولي مدري اشاف بيج وذبح نفسه عليج أني لو يرجعلي ازوجه بنت صديقتي انتي شكو وحجتها كدام الكل

لو بعرس ايهاب من رحنا لزمت مريم وغسلتها غسل كدام الولد والبنات وكدام نسوان العشيرة تكولها انتي ع شنو شايفه نفسج مو زين داانطيج الكادود مال بيتي كطنه وطلعيها من اذنج اني ادخلج لبيتي وهاي اختج المسترجله قسور كسر كلمتي وكال لو هي لو مااخذ
انته صدك كسرت كلمتها قسور ؟ لو هيه جانت رايدتني اريد اعرف شغيرها ؟

كال عبير ...

قاطعته ؛ بعدين تعال اكولك اذا اخوك محمد السكير كادود البيت انت شنو لعد فانوس لو شمعة شحن

_بس كافي اسكتي

_اوكي اسكت بس امك كوللها لتظل تشمر حجي لو مو عمتي ترى مااسكتلها مو تمشي وتشمر قنابل لو تصيح بنات تحسين مستهترات والله شنو لان ما لابسات حجاب شعليها بينا هي بمكان الله خوما بمكانه كل لشه تتعلك من كراعها

_اكولج ترى روحي طافرة وخابرتج مو اجي اسمع الموشح هذا اخابر امي هم تسطر رأسي اجي اخابرج تاكليني اكل احسن شي اعزلج بيت وحدج واخلص من هالدوخه بس اسكتي لخاطر ربج

سكتت حسيته كولش ضاج لان حجيت ع امه صح هي حقيرة وتضوج منه بس تبقى امه ..

سمعته كال  يلا اروح أني وباجر الصبح تجيكم أمي

_اوكي
_محتاجه شيء
_لا

عاط بيه: خرررررب يومج خرررررب عشيرتي بيوم حبيتج لج انتي غضب انتقام ونزل ع رأسي اني كلب أبن كلب مو شلعتي گلبي لجججج انتي شنوووو

_شبيك شسويت كلتلي اسكتي لتحجين ع امي وسكتت شتريد بعد

سد الخط بوجهي ، عصبت ظليت ادردم  درروووح عشتو نزلت سويتلي لفة وطلعت كعدت بالحديقه صارت ساعه ١١ نعست صعدت داانام واجيت اوقت الموبايل شفت ١٢ مكالمه من قسور تفاجأت شبي وشيريد بعد ..  بعده الفون بيدي واني افكر  رجع اتصل بيه

اول مفتحت خط كال: اسف سيدة قلبي عصبت عليج بس وغلاتج عندي مضغوط من كولشي وبس صوتج يريحني

_عادي مصار شي

زفر حسيته مهموم .وجعتني نبرة الضيق بصوته ..
بس محبيت اسأله يمكن كبرياء مني او مااحب اتدخل بخصوصية غيري او اخاف اذا اسأله وميجاوبني وانحرج ففضلت السكوت

كال: خو ما زعلانه مني
_لا جنت ضايجه من عصبت عليه بس هسه عادي

_لعد احنه لازم نفترق احنه مد وجزر هاي باجر عكبه تصير مكافش بيناتنه ومراح نعيش بسعادة الاحسن كلمن يشوف طريقه!!!!!

يتبع ....