رواية شريعة العشق الفصل التاسع وأربعون 49 - بقلم نورا ناصر

شريعة العشق
بارت ٤٤
نورا ناصر ..

لَم يكُن حبيبي شاعراً يُقيدني بين الأسطر
كان هادئاً ، قليل الكلام ، كثير المشاعر،
حادَ اللهجه
عادةً يُخبرني بأن يريد قول الكثير
لكِنه يصمت ، يتنهد ويقول :
- أحبج"
        ⠀     ┈┉━❀❃❀━┅

اتسعت عيوني بذهول واني اشوف الدم ينزل من راسه
ظليت اصفك بخدودي واعيط عزااا بعيني صفاء عزااا والنبي ممتقصدة والنبييييي ..

عاط بوجهي بعصبية اششش اسكتي ولااااحرف هيه هاي سوايه تسوينها يا غبيه !!!!

اخذ باكيت الكلينكس وظل يمسح راسه ويدردم طاح حظج اني صوجي ناطيج مجال اصبري اني اعلمج منا وجاي ..

اني صارت صورته توصلي مغوشة وانعزلت عن بقية الاصوات صرت مااسمعها ووكعت من طوولي على الكاع .. 

لحظات ومااحس بس بالمي يقطر على وجهي وراشديات صفاء على خدي وعمه تصيح صلوات صلوات حامل

بين الوعي واللاوعي اسمع صفاء يكول لامه: يمه متسكتين منين تحبل من الهوا

جاوبته يااا شنو من الهوا ولك لعد انت شنو دورك هااا بس لا مو كدها احجي يلا احجي

_اي اي يمه حامل منج ومن اختج

باوعت شفت عمو واكف يمهم ويحجي وي صفاء
: ولك فهمنا شكو بلا هذا الرطن مالتك انت وامك .

صفاء بده صوته يضعف ويتعب ماكو شي يابه ماكو شي ..

كمت ابجي باوعلي صفاء كال انت زينه مابيج شي هاا زهراء احجي مابيج شي ؟

لالا بس انته انته واباوع للدم ..

عمه عاطت صفاء شجاكم غير افتهم ؟

ماكو شي يوم ليظل بالج .. يابه بلكي تخابر كرار خلي يجي يوديني للمستشفى مااعتقد اكدر اسوق اني .

ظلت عمه تباوعلي بشك ، نزل عمو ونزلت وراه وصفاء راح غسل راسه واجه شاده ونزل جوة واني كمزت نزلت وراه شفتهم كاعدين ينتظرون كرار ، عمه ظلت تباوعلي بنفس نظرات الشك ؛ احجوا شكو شبيكم هاا ولك صفاء شبيك سابح بدمك .

صفاء رد عليها بضعف ؛ ماكو شي يوم وكعت عليه الفازة ...

_ ششون وكعت بالله ماتكولي ، اني سمعت زهراء تكولك والله مادري والله ممتقصده ولج ملعونه انت ضربتي .

باوعت لصفاء واريد احجي خزرني بمعنى لاتحجين ..

عمه انتبهت على نظراته وكامت على حيلها تعيط وتصيح عليه ولج انت شنووو ووين رشووو عنج والله ماتنلام بيج ابد هيج تضربج رجلج وين تربيتج وين اخلاقج ..

كام صفاء على حيله كال يووم كاافي ماله داعي هالحجي وانت كوومي صعدي فوك حسابي وياج بعدين .

وطلع تليفونه وخابر وعااط كراار انته وووينك مطي وييينك ..

عمه بعدهه تدردم عليه واني بقيت واكفة ساكتة وبس ابجي ،  قفل التليفون وباوعلي شحجيت شكلت كتلج رووحي صعدي فووك ..

تمتمت وبنبرة بكاء ؛ اريد اروو وو ح  وياك للمستشفى ..

رمقني بنبرة غضب وكال ؛ لااااء صعدي كتلج ..

درت وجهي منه كوة مسيطرة على نفسي وصعدت للغرفة كوة امشي وارجف  ..

عبير .. اني بغرفتي سمعت صوت بابا وهو يسب ويلعن بزهراء ويصيح ماعرفت اربي بس سهله تدلل نرجع واني اعلمها .

تفاجئت شكووو وشصاير بس نعسانه مابيه اكوم والنوم ابدا من كل شي بالنسبة الي ، توني اغفى وجان تجي مريم السعلوة : اكعدي عبير اكعدي عندي خبر الج يجنن بس اول شي انطيني غمه

_غمه شنو ولج وغميتها

_لا يا حقيرة غمه يعني خمسه شكو تغمين ولججج

_انتي كلتي انطيني غمه واني غميتج خلصيني شعندج

_ولج عمه ام صفاء خابرت على ماما تشكي من  زهراء ضاربه صفاء براسه مخليه دمه بطوله هاي بطولات اختنا والله عفيه عليها كفووو معاً لمناصرة حقوق المرأة

_طيح الله حظج شنو اليضحك بالله هسه وانتي جايه تتمضحكين ليش عبالج حقوق المرأة بالعرامة كومي كومي والله خطيه انتي واختج فاهمات السالفه من ذيلها يلا اطلعي وطفي الضوء اريد انام واذا رجعتي للغرفه انوب اشمرج من البالكونه والله

طلعت وهي تدردم واني اجيت انام تذكرت شغله
صحتها اجتني

لزمتها من اذنها حيل: باعي لج صرتي واعية الخطأ من الصح

_ايييي بس اذني

_اششششش خلي اكمل كلامي مرة ثانيه اذا اجيتي وجايبه سالفه عوجه وداعتها لامي ابتلي بيج عيب واكبر عيب انتي بنية وتنقلين حجي وتفتنين ادوس ع رأسج والله منا وجاي افتهمتي لليوم محد كال علينا ينقلن حجي جايه انتي من
تالي ماخذه دور ساعي البريد

_لج والله بس الج احجي مو سمعت بابا وماما يحجون واني هم عرفت كلت اجي اكولج قابل بقت عليج ليش تفهمين خطأ

حصرتني الضحكه كوة كتمتها: اليوم تنقلين اليه باجر لغيري والله مريم اذا انوب جبتي خبر اطيح حظج يلا امشي ولي ....

طلعت من الغرفة مبرطمه شفايفها ..

وراها رجعنا للعراق ووصلنه لبغداد جانت الفرحة مسايعتني ابد التهم ذرات الهواء المحيطة بيه وما اشبع
جان باستقبالنا قسور يمكن جان فرحان اكثر مني .

وكفت السيارة يم بيتنا واني وكفت  يم قسور
ودا ينزل الجنط من السيارة ..
واني اساعده وبابا جان يم امي ومريم .. 
كال ؛-  والله دااحس حتى هوا بغداد اليوم تغير لان انمزج ويه انفاسج .

ضحكت ؛- قسور توه وصلنا والله ملحكت اتنفس ..

باوعلي مبتسم وعيونه تشع سعادة وحب ؛ اي اي ضحكي ضحكي اصلا صوت ضحكتج عافية لو يدرون بضحكتج شون تداوي جروحي وتهون عليه تعبي جان باعوهه دوة بالصيدليات .

استمريت اضحك : لالا هيج هوايه عليه والله قسور .

كال ؛ اششش ماكو كلام يوصف حبي ومشاعري والله عبير ..

اجت مريم قاطعته همست بأذني ولج زهراء حتجي هسه وماتدري بابا محضرلها رزالة معدلة ارووح ابشرها
تريد تروح جريتها من ملابسها ورجعتها يمي وخزرتها خزرة بكل قوتي وهمست من بين اسناني المطبقة ..
تعااي عوفيها خلي يربيها من تالي لاتظل هيج عرمة .

قسور ظل صافن علينا ونظراته تتساءل شكو ..ومتعجب من تصرفي القاسي ويه مريم .

ابتسمت بوجهه كال والله متلوكلج القساوة على كيفج وياهه مو راح تشلعين ايدها .

جاوبته ؛ لا قسور   مو انته هم متدري شكو حقك .
وبقيت محافظة على ابتسامتي بعصبية ولازمه ايد مريم عن  لا تفلت .

دخلنه جوه ارتاحينه شويه واني بس اكمز وماما تعيط عليه ولج لاتتعورين ...

شويه ودخلت علينا زهراء فرحانه وبيدهه كيكة .
ضحكت عليها ماتدري شمنتظرها ، خلت الكيكة ع الكاونتر  بوست ماما وحظنتها ، واجت علينا بوسناهه

سألت عن بابا ومريم طكتها ضحكة امي خزرتها اشرتلها ع الصالة راحت باتجاه بابا تبعناهه احنا .
بابا بس اجت عينه عليها تريد تحضنه اشرلها تكعد باوعتله وبنبرة تنذر ببكاء قريب سألته ؛ خير بابا شكووو ..

انفجر بابا بوجهه ولج هيج احنه ربيناج زهراء مزوجيج رجال يسوة الدنيا تفشخين راسه هيه هاي سوايه ؟؟
عمتج تخابرنه لهناك تحجي تكول شوفوا بنتكم شسوت .

جاوبته وبدت تبجي ؛ بابا والله مجنت متقصدة والله حتى صفاء عذرني والله .

نتر بيها بابا اشش سكتي ولا حرف ماريد تبرير لفعلتج هايه تعلمي شلون تتحكمين باعصابج مو جاهلة انتي ولاربيناج عرمة ، ولج بابا اساس الشخصية القوية هي ضبط النفس والتحكم بيها اثناء الغضب...

مو عبالج الي سويتي شخصية قوية وجرأة لاء هاي وقاحة وقلة ادب وطيحان حظ عبالج شكو بيدج تشمرينه عليه عود انتصرتي عليه اذيتي فيضتي دمه  لا عيب لج ابويه  هذا زوجج اني مالي علاقه بعلاقتج بي هسه ولا مشاكلكم بينكم حلوها بس لا تسيئين لاخلاقج ولا لتربيتي وتعبي بيج بهاي التصرفات .

هزت راسها ودموعها توكع ع الكاع من شدة غزارتها .
عافنه بابا وفات للغرفة وهي كعدت ع التخم كملت بجي ، كعدت يمها ماما وهم استلمتها محاضرة شطولها تحسسها بخطأها وذنبها .

                                ***

كرار: رحنا  اني ومها وابويه لبيت خالة مها مسوية عملية لعيونها قبل فترة ، ورحنا نتحمد الها بالسلامة اول مادخلنا استقبلتنا احسن استقبال...

كعدنا وكعد يمي مها قربت منها وهمستلها: مو اكولج هاي تريد تتزوج متصدكين كل مرة نجي وحدنا تكلب الخلقه هسه ويانه ابويه شوفي استقبالها كوليلها ترى متزوج ميدور سوالف مكسرة

ضحكت ؛- كرار عيب اسكت حباب لتروح تسمعك ..

_شعليه اني غير خالتج ذبت زروك ترى اخابر امي او اكولج خلي انتبه ع الوالد هذا عسكري ينخاف منه شكو سالفه عوجه تلكيها عنده

_عزززززا بعيني حتى عمو ماسلم من لسانك شنو انت

_اخبل شنو اني  ...
ظل ابويه يباوعلنه غمزتله خزرني  وظل يحك بلحيته
كال شعندك حمار دتصنف عليه موو ؟

يابه مرتي بطولي ، باوعتلها لا اقصر مني بهواي لج شوكت تجيبيلي خلفة اتباهه بيها كدام اهلي حتى ابويه لايغلط عليه بعد .

كال لو عشرة يصير عندك تبقى مطي وحمار ..

كلت افاااا
اجت خالتها جابت الضيافه  واكلتنا اكل بالكلام الحلو المعسول ..

باوعتلها : خاله هالايام خففي حجي عني العصفورة تكول بالطالعه والنازله تحجي عليه شمسويلج

تصنعت الصدمة وكالت ؛ يايمه ع بختك منو كال هيج مدت ايدها وكرصت مها

_اذا تريدين تتزوجين كولي

_ليش جايبلي عريس

_اي وداعتج وشلون عريس الحدقجي مالتنا خوش زلمه

_لايمه النفس طابت بعد المرحوم ...

همست هاا متأكدة فتحت عيونها كالت شنوو ومها طختني وابتسمت اي خالة شوونج عيونج شونها هسه خو ماتأذيج ؟

حجت بضيكة خلك ؛ لا عيوني زينات رفعت العدسة قبل اسبوع وهسه الحمدلله اشوف زين ..
ورجعت دارت وجهه على ابويه وظلت تسولف وياه ..

همست لمها لو جايب امي ويايه والله قصرت والله دشوفيها راح تاكل ابويه اكل بعيونها .
رجعت دغتني مها كرار حتسمعك والله وتطلعنه بالنعل من البيت ...

_ يله لعد نروح ، وكمت على حيلي كملت ؛  لاناكل نعل  ..

خالة مها ؛ ها وين بعد وكت .

_ لا والله خالة عندي طلعة ..

_ طلعاتك اله بيوم الي تريد تجيني بي ؟

_ اي والله خالة  عود نمرلج غير مرة .

_ هلا بيكم بأي ووقت ..

سلمنا ورجعنا للبيت بدلت متواعد ويا جماعتي اني طول ماابدل مها عينها منزلت مني

التفتتلها: شبيج مهاوي اول مرة تشوفيني ؟
_شو هالمرة مهتم بنفسك زيادة عن اللزوم

_ليش شنو مبهذل اني اشو دائما هيج
_لا بس طالع حلو هالمرة هسه البنات يباوعولك

_اي عادي خلي يباوعون المهم اني مااشوف غيرج
بس ترى للامانه اني قبلج جنت اكبر ابو بنات فد حنين وماارد بنية

_ياااا عزززززا بعيني صدوك تحجي

_اي وداعتج هن كريمات ويجن يعترفن واني حنين عليهن ومايرد الكريم الا البخيل معوزات حنان واني مثلهن شكو بيها
يلا حبي راح اطلع محتاجه شي

_تعال وين طالع
_بالليل اتعاركي مهاوي هسه وربج مستعجل واذا نسيتي اني اذكرج واخليج تتعاركين ويايه باي حب.

عبير .. زارتني مها للبيت وكعدنا اول ماكعدنا ظلت تشكي من كرار ..

جاوبتها بعصبية :- ترى هسه اسبج واسب اهلي الخلفوني ولجج ابتلييييييت بيجن انتي منا وزهراء منا خو اتزوج وافضها واكعد احل مشاكلي احسن

_اي اتزوجي شكو بيها مو قسور يريدج
_متسكتين انتي وهذا زوجج ترى هو حلو واذا باوعوله البنات احد كالج اتزوجي حلو اخذي واحد
ازرك حتى تضمنين محد يباوعله....

_ هسه كوليلي لج شسوووي النار شاعلة بيه ..

_ لج شدعواج متكوليلي ترة كرار ميباوع لغيرج اني اعرفه كولش زين ارتاحي هسه .

حجت بضجر: يمعودة أبن عمج خبلني مااعرف شيريد من يعصب واسكت يتخبل واذا ارده يعصب بالزايد مدااعرف شيريد

ضحكت بصوت عالي

باوعتلي : وسم شكو تضحكين حجيت نكته طاحظج اكوم اروح اشرفلي عود عندي صديقه واجيت احجيلها

استمريت اضحك اشو سوتها صدوك وكامت تريد تروح
لزمتها من ايدها: اكعدي عليج الله هسه احجيلج
عن كرار

باوعتلي صفح: يلا احجي فضيني

_باعي ولج هذا كرار مثلي بالضبط من يعصب لا تجاوبي بطريقة تخلي يعصب بالزايد ولا تسكتين واهم شي اذا جاوبتي لتستفزي اذا استفزيتي ترى يجن جنونه

_هاي شلون حيرة يربي هسه اني احير بعصبيته لو احير شلون اجاوبه جواب ميستفزه

اكولج عبير شو انتي وكرار هواي تتشابهون بالاطباع وبالخلقه وبكولشي حتى بالاكل التحبوا والتكرهوا

_غير أبن عمي
_اي هم صح يلا أني اروح لايجي وميلكاني ويتخبل مدري شبي هالايام

_ليش طالعه بدون علمه
_لا يااا شلون يصير حتى يسويني نصين بس كالي لتتأخرين كون من ارجع الكيج بالبيت

_ ها ..

او وجعاه ارووح اني ..

تبعتها للباب ودعتها وراحت ..

كرار... رجعت بالليل فتت للغرفة شفت مها كاعدة ومبينه ضايجة بدت سوالف الزواج الطايح حظها
حاولت اخذ وانطي وياها بالكلام بلكي تفك لان بس تنفخ كتلها بابتسامة : هاحب ؟ 

مجاوبت رحت كعدت   يمها بستها من خدها برقة
عاطت  : دوخررر
_لج بس دااذكرج ترى جانت عندج نية تتعاركين

_شوف اذا مابطلت حركاتك البس صايتي واهج ومتعرف وين مكاني

_لا عليج الله بس ترى هذا مصطلح امي مال البس عبايتي واهج ليش تخمطين منها مو عيب دتعالي خلي اخمط شفايفج ببوسه ترى مفرفح عليج

_كرار ليش هيج دتسوي بيه

_اي شمسوي لخاطر الله ابتليت طلعت ويا المكاميع جماعتي بعدين شبيج مسويتها دراما انعل ابوه هالعيشة

باوعتلها صافنه عليه: ترى اني حلو والبنات صايرات عليه مثل الكشمش بس وداعتج وعيونج عندي بنظرة مااباوعلهم لتسوين مشاكل مفتعله بدون سبب الله يخليج ترى تعباااااان

_كذاب

_ولج صح اني كذاب بس مو دائما

ظلت تضحك ..

_اووويلي باع الضحكه تركص ع اوتار گلبي همزين متعشي عشاء دسم هسه اسويج كرزات بنت الحلال جايج...

اجت تحجي ماانطيتها مجال اخذتها لحضني....

                                ***

زهراء: طلعت من بيت اهلي دمعتي بعيني وارجف ، ضجت من تصرف عمه شون راحت كالتلهم واني عود رايحة وفرحانة بيهم لان جايين الكي رزالة كدامي جانوا ضاميها اليه ..

فتت للبيت سمعت صوت رشا الظاهر توها جايه من بيت خالته ، حجيت بقلبي لا هلا ولا مرحبا بالسم والطيحان حظ ، ما فتت جوة بقيت بالحديقة اخلي اهدأ يله افوت خاف تحجيلها حجايه واني مالي خلكها
ومنا صفاء صارله كم يوم ينام جوة وتاركني وعمه تسمعني كوومه حجي يسم البدن بعد الي صار
احس بثقل جاثم على صدري مثل صخرة على كتف نملة ..

طلعت عمه باوعتلها كالت ها شعندج هنا كاعدة ؟ مو جنتي ابيت اهلج شنو طردوج وضحكت بسخرية

طلعت من وراها رشا حاجت امها ليش طردوها شنو شمسوية ؟

عمه ؛ هيه تعرف بنفسها شمسوية ..

رأسا دخلت للبيت وصعدت لغرفتي ، للعصر اجه صفاء صعد للغرفة تفاجئت بي بس جان كلش معصب خفت منه فتت للحمام ..

حسيت صار هدوء طلعت من الحمام شفته مبدل ونايم
نزلت جوة رشا وعمه ماكو الظاهر طالعين بس عمو واثير ابن رشا الكبير .

بقيت يمهم للمغرب صليت جوة ورحت سويت العشه
اجوا رشا وعمه محملين اغراض وكعدوا بالصالة يسفطون بيهن ويقيسون ملابس للاطفال ويسولفون واني بالمطبخ يجيني صوتهم .

كملت العشه ودزيت لينا تصيح صفاء ينزل يتعشه اني ماصعدت اله واحس خايفة منه .

نزل عاكد الحواجب بس شايل لينا وهيه لافه ايدها على رقبته وتضحك وياه هو يحجي وياهه ومحنزر .

تعشينا وصعدت فوك بسرعه اول وحدة كامت من السفرة اني مااتحمل اكعد ويه رشا بنفس المكان .

صعدت فرشت اسناني وغسلت وكعدت اقرا ..

دخل  صفاء للغرفة ظليت اباوعله محتارة مشتاقتله ومتندمة على الي سويته لو يرجع الزمن ليورة فلا اتجرأ ولا اسويها صارله كومه معاقبني وتاركني .

اجه يمي حسيته تنهد وتكلم بجدية ؛- زهراء كافي لهنا وبس واحنا لازم نتمم زواجنه واللليلة ..

كمزت وعطت شنوووو ؟؟

كام على حيله واجه باتجاهي ، لزمني من عكسي وعاط بوجهي ؛- اششش للج هم اخذيلج شي وركعي بعد حتى اكسر ايدج هالمرة .

وخرته عني بدلع وكتله بلعثمة ؛ مممستعدة هسه ودا اقرا اجلها عود ..

رجع لزمني من عكسي ولافني عليه وكال بنبرة حزم
_ ماكو اجلها هسه يعني هسه ..
_ لالا والله عندي عذر ميصير هسه خلي اخلص وبعدين انوب ..

رفع حواجبه بنفي ومن عيونه تنبثق نظرات شرسة _مااقتنع شوفيني شي يثبت انتي عندج عذر
بصدمه ؛ شلون يعني ششوفك؟

انصدمت بي اتقرب واشر على  خانة ملابسي الداخلية رجعت التفتت عليه رفعلي حاجبه ورقق نبرته بالكلام صارت رجاء وتوسل وحديه وبنظرات تتملكها رغبة؛- زهورتي ترى اعرف كولشي مابيج  واذا جنتي تكولين مااحبج ثقي بالله ميت بيج لج يا بنت عمي افهمي عليه احبببببببج صار كم يوم انام جوه خايف اصعدلج واذيج على الي سويتي من سوايه كشرة .

_بس بس لتصيح فهمت والله فهمت
اجه تقرب عليه اجيت اشرد للحمام لحكني ومد رجله حتى لا اسد الباب

_تعالي شنو ليفه انتي كل مااسويلج شي تختلين بالحمام هههه تعالي ابويه ..

جرني عليه اجيت بحضنه كام يبوس ورا إذني واحنه واكفين اديه على صدره واني اتحرك بخفة ولمساته تذوبني ..
وهمساته وهو يتغزل تزيد حبي وتخليني ارجف اكثر ونبضاتي تنطلق بلا توقف امام سرعة وتيرة انفاسه الدافية الي تلفح بشرتي  .

رفعني من الارض واخذني للجربايه وهو مندمج يهمس بنبرة مخدرة بكلمات غزل تخترق اسماعي وتغزوا قلبي ...

خلاني ع الفراش همستله: فدووة صفاء اخاف والله حباب وخر
وعضيت شفتي ..

باسني :لتخافين ياروح صفاء هو اني وين اكدر ااذيج بس هي وراج وراج اخلصي منها

سكتت مستسلمه بس جنت ارجف اتذكرت كلام ماما من وصتني هو انتبه عليه حط كصته ع كصتي وحجه بمكر: انتي ليش خايفه ترى هو اني خايف عليج اكثر منج لان راح اشرحج اليوم ههههه

عطت ؛- عززززززا وخرررر انهزمت جواه بسرعه
رجع سحبني ورجعني ع السرير ؛- دتعالي!!!!

واخذني لحضنه جان كولش هادئ بس لمسته قاسية ومن يشوفني اعصر عيوني يرقق لمسته بس ادركت ان هو قاسي حتى بالفراش يعني مو القسوة النعرفها بس هو يحب يمتلك كل شي بطريقته

حسيت بألم قوي توني اعيط جان يكتم ع انفاسي واخذ شفايفي حبسهن حتى مااعيط من ابتعد كمت ابجي جرني لحضنه

_مبروك عمري ..
نطق بنبرة مخدرة ...
وظل يمسح بدموعي عصر راسي بصدره وشم راسي وظل يهمس ؛- زهورتي كافي بجي الله يخليج هو المفروض يصير هيج من أول يوم بس اني ما ردت اتقربلج وانتي تعرفين الاسباب بس هسه اني متيم بيج

رفع راسي وركز بعيوني وابتسم : لج انتي من تبجين تصيرين احلى عيونج تلمع بطريقة غريبة احبها .

جر الغطى من جواه وانطانيا : كومي نسبح

_نسبح!!!! وين وين شو انت داخل هجمه مرتدة لا عفيه مو كلها مرة وحده الله يخليك

ضحك بصوت عالي: ولج يا هجمه هسه مو هجمت عليج وصارلج ساعه تبجين هسه اجه وقت الاسترخاء وغمزلي بعدني صافنه عليه مااحس الا شالني من الفراش شهكت وهو الخبيث يضحك عرف ليش شهكت

قرب حلكه ع اذني: يلا حبيبي بس اول ايام تتأذين بعدها تصير سوالف

دخلني للحمام: حباب اطلع الله يخليك ماسمعلي ابد  وسبحني بيده وطلعني وهو بقى يسبح بين ما كملت تمشيط طلع اجه حضني من ورا وحط راسه على كتفي وهمسلي ؛- اليوم اني اسعد انسان بالدنيا احس سعادتي اكتملت اليوم ....

باوعتله وكلامه يسعدني ممصدكة بيوم راح يحبني وينسى الماضي متفاجئة ، اخذني للجرباية ومدد
سحبني على صدره ..

احس تعبانه ونعسانه وبس اريد أنام اجفاني احسها ثكلت وحدها ،  وهو ميقبل كل شويه وضغط ع ايدي قوي حتى ماانام ومن نمت شويه حسيته عصر ايدي

_اكعدي زهراء لتنامين اريد احجيلج كلشي اليوم

_حباب صفاء نعساااانه بس شويه انام وعود كعدني الله يخليك

ديريد يحجي رفعت اصابعي خليتهم ع شفته اللتهم  اصابعي وعضاهم ، فزيت باوعتله ضحك

عدلت نفسي وكلت وتثائبت: يلا احجي ..

_ تعالي اصحيج اول ، واخذ وجهي بديه وظل يبوس بخدودي ويعضني بخفة  ولحيته تبززني  .
دفعته ؛- عليك الله كافي ..

ضحك وظل مركز نظره عليه ويحجي ؛- تدرين زهراء انتي من جيتي للدنيا اني جان عمري ٨ سنوات من اجت بيبتي كالت زوجة تحسين جابت بنية دبدوبه تجنن غبت من الدوام حتى اروح اشوفج ومن رحنا لبيتكم شفتج جنتي نايمه وخامله كلها كالت هاي متعيش تعبانه اجيت
شلتج وبوكتها ماقبلوا لان اني طفل ويخافون خاف ااذيج

اجه ابويه تقربلي: ها ولك عجبتك
جاوبته اي بابا تخبل اريدها اليه هاي لعابه بوقتها الكل ضحك عليه وبيبي كالت عود من تكبر واذا اكو نصيب تصير الك وكبرتي صار عمرج ٣ سنوات واني اتخبل اذا واحد تقربلج او اذاج اضربه واذيه خو اذا بجيتي گلبي يفز

_لعد ليش بعدين محبيتي وحبيت غيري وجنت وتأذيني بكلامك

_مو اني كبرت واسراء هم كدام عيني وهي جانت اكبر منج وانضج لذلك گلبي مال الها وحبيتها بس انتي طفلة گلبي صح جنت ااذيج بس ثقي بمحمد كل نظرة منج وانتي مدمعه احترك حرك اجي هنا اخلص باكتين جكاير وماانام الليل واظل اسب بنفسي شلون بجيتج

ضحكت : بس بالنهاية جبتك للطريق

_الا جبتيني واجيتج واني الممنون انتي حبج انفرض عليه من اصفن اكول شلون ماحبيتها شنو البيها مينحب كتلة مال انوثه ورقه وحنان انتي كاملة مكمله زهراء اني النقص بيه جنت ارفضج

_حشاك عمري
باوعلي بهيام وغمزلي : مابيج بعد ؟

_لالالا مااتفقنا هيج كافي وخلصت اللعبة
عزلنا انتهت بالفوز الك كملت كلامي وغطيت راسي واني اضحك

سحبني ونيمني بحضنه الصبح كعدت ع بوسات تتوزع على وجهي حاولت ادفعه بس مكدرت حجيت بنعس : عفيييه صفاء

_اشتعل صفاء هي بس نبرة صوتج تجيب التايه شيفكج منييي بعد ...

حاولت ابعده مكدرت رفع اديه فوك رأسي واخذني بس هالمرة اتأذيت كولش كمل وابتعد
وكام سبح ونزل جوا

كمت سبحت ونزلت وراه شفته يريد يطلع كال راح اجيب صمون واجي وانطاني بوسة بالهوا ابتسمت اله وهو راح ..

طبيت للمطبخ  تلكتني رشا الغضب عبالك ماعدها بيت داكة اقامه هنا ظلت تباوعلي وركزت ع مشيتي رحت للمطبخ سويتلي كلاص عصير لحكتني

_اشو تمشين بالكوة خير شبيج؟

_شعليج انتي شكد حشرية رحمة لنبيج خليج بحالج ترى لعبتي نفسي انتي

_هه الظاهر اخويه قرر يسترجل و**

_عزززززا بعينج شكد قبيحه انتي وخري من وجهي

دفعتني : لا عبالج ساكته عنج اصبري اليوم اكولهم جنتكم متقبل صفاء يتقربلها الله يعلم ويامن مصخمه

_يابه دولي متحجين خايفه منج اني

مااحس الا صوت طبة قوية وصرخة الظاهر عمو سمع كولشي وعاط بصوت ضعيف ومبحوح : ولججججج رشاااااا

طلعت للممر  لكيته واكع وميتحرك ..

يتبع ....