رواية شريعة العشق الفصل السابع وأربعون 47 - بقلم نورا ناصر

     شريعة العشق
     بارت ٤٢ ...
    نورا ناصر

احس بخنكة مو طبيعية حتى نفسي ما اكدر اجره
احس رياتي تنعصر عصر وينسحب منها الهواء سحب
ويجرح قلبي ويمزق قصباتي ، مشتاكة لبغداد ياناس ماكدر اعيش بعيده عنها ، بغداد امي وابويه ماتخيلت بيوم تلفضني وتبعدني ، شكد تعذبت بيها وشفت الموت بيها مرتين بس تبقى مثل الام تضرب طفلها ورة لحظات يرجع لحضنها بس مايكرهها .

ضجت من اهلي وانعزلت عنهم ، مايحسون بيه لو يحسون بيه بس يخافون عليه نسوا الاية ((يدرككم الموت ولو كنتم في بروج مشيدة .. ))

الحجي ضاع مني وماكدر حتى احجي التزمت الصمت وسكتت حتى رجوع بصري الي مافرحني ٣ اشهر هنانه احنه واحس الوقت يمر بطيئ كولش..

اجتني ماما بيدها الفون وتحجي والغصة بحجيها ..
عبورة امي ابوويه اهلي انتي لاتسوين بينا هيج ..

مسحت دموعي بظاهر كفي واباوعلها بنظرات هيه تعرف شنو معناهه .

كعدت يمي على السرير ولج يووم ع الاقل جاوبي لقسور راح يطك من القهر ، ٣ اشهر صارله متعلعل يريد بس يسمع صوتج مو هذا العزيز هذا بي ريحة بغداد جاوبي يووم جاوبي خطية .

هنا ماتحملت طلعت مني شهكة قووية وخليت راسي على رجل امي وطكيت بجي ، واني اللتهم اطراف اصابعي بوجع ،  ظلت تمسح على شعري وتبجي ويايه .

بعد دقايق هدأت اخذت جرعة مهدئة من حضنها الدافي الي كان قادر على ردم بحر من الاوجاع وكلامها الي يلامس قلبي ويناغي اسماعي  وعطرها الي يخليني اتنفس واعوض عن الحنين الي يعصف بداخلي لبغداد  .

باوعتلها وحجيت بتعب ؛ شوكت يتصل قسور حتى احاجي.

ابتسمت رغم لمعان عيونها بالدمع ؛ يا صلوات على محمد والله هسه اتصل بي واحجي ويا هو حتى كال اذا متحاجيني اجيكم لسوريا ما اتحمل بعد .

_ لا لا تخابرينه هسه ماما من يخابر هو عود احجي ويا
.. حجيت وانفاسي مسدودة وتعيق مخارج الحروف الي تطلع من حلكي . 

_ براحتج يوم براحتج .

_ مريم وبابا وين ؟

_ اختج دتغسل مواعين وابوج نزل يتسوك ليش تسألين تردين شي حبيبة .

هزيت راسي برفض .

بعدها اجت ماما وانطتني التليفون ووجهه مبتسم
كالت هذا قسور يريد يحاجيج .

اخذت التليفون منها وخليته على اذني ..
حجيت بغصة ؛الو ؟
اجاني صوته بكل حنية وغصة ؛ عبيري شلونج ؟

اطبقت اجفاني وانسابت العبرات من عيوني ..
همست زينة اني .

كال مشتاقلج كد تعب البية ..

سكت شويه كمل ؛- تدرين هذا التعب من شنو .

بلعت ريك همست ؛ لا .

جاوب بسرعة ؛- من فراكج عبير والله هد حيلي .

_ قسور بابا مديقبل نجي واني منعزلة عن كل شي اريد ارجع حباب قنعهم .

_ اني هسه عندي دورة مالة ضباط بس اخلصها اجيكم لسوريا بعد ما اصبر والله واحتمال حتى امي وابويه اجيبهم ويايه حتى نعقد .

_ قسور شتحجي اني اريد ارجع لديرتي واهلي وناسي هنا اني مخنوكة وانت دتحجيلي ع العقد اني بيا حال قسور لتصير اناني .
حجيت بعصبية ..

_ عمري انتِ حبيبتي اني ماخابرت حتى اضوجج واعصبج اني بس ع مزدج اسوي هالشي حتى اكدر ارجعج لبغداد .

_ وتتوقع بابا يقبل ؟؟ لا تره بابا ع مودي جابني هنانه واني هم ماارجع بدون اهلي .

_تمام تمام الي تريدي يصير بس اني هم اجي اشوفج مو إله نعقد بس ارتاحي فدوة لروحج رحت اني .

اني ماكو شي يمنعني عنج لاحدود ولا مسافات ولا دول ولا حتى اسلوبج الجاف هذا وياي ، يجي يوم وتلينين الي واني الي اغيرج مؤمن بهالشي اني .

اعرف الحوادث الي تعرضتي الها تعبتج واذتج واثرت على شخصيتج ونفسيتج واني الي راح اعوضج عبيري انتي .

هسه اتركج ترتاحين حبيبي واخابرج بغير وقت .

كال اخر كلامه واحسه كوة مسيطر على اعصابه ..
ختمتها وياه بالسلام .. خليت الفون على الكومدي الي بصف السرير وتمددت صفح وخليت اديه جوة خدي .

صوت قسور وكلامه بعده يطرق اسماعي ويذكرني
بديرتي وبلادي ، ويخلي اعاصير الحنين تعصف بداخلي .

اني هنا بنصف قلب ونصف روح ورئة وحدة كلشي بقى ببغداد وهنا اني مجرد نصف وكل نصف يحن لنصفه الاخر .

زهراء: طلعت رشا وتركتني حايرة ، ويسكنني الخوف .. تهديدها استعمر صدري و خله نبضاتي ترتفع بلا هوادة ..

ايدي جوه حنكي وواكفة بصف الطباخ واراجع كلامها ، فكرت اكول لصفاء ، بس شحجي انوب استحي...

هسه عباله ميته عليه استبعدت التفكير بالموضوع ..  فكرت باهلي ، تصير مشكلة  اذا عرفوا الله يستر يربي وهم مو ناقصين الي بيهم كافيهم ..

ظليت النهار كله اتصفن .. بعدها شفتها مبدلة ملابسها واخذت ابنها الصغير عمره ٦ أشهر وطلعت وبقت بس بنتها يم عمه .

للساعة عشرة اجتي مرة بهاء وكعدت بالصالة سويت عصير وديت الها ، كعدت تشكي يم عمه .

عمه شفتي بنتج شسوت علكتها بيننا اني وبهاء البارحة لنص الليل احنه نتعارك ترة والله الي سوته عيب عليها .

عمه جانت دتمشط للينا بنت رشا ، باوعتلها بطرف عينها وجاوبتها ؛ وانت شنو جاهلة وتصدكين كلامها صوجج انتِ تعلمي شون تثقين برجلج وتحافظين عليه ..

اي بس ياعمه رشا غلطت وهيه دومها مشكلجية وتخرب علاقات اخوانها بزواجتهم عبالك عدوينها وانت لازم تشوفولكم صرفة وياهه .

عمه شمرت المشط ونطت بعصبية ؛ وشنسويلها ندفنها خو ماندفنها ونضحك الناس علينه شكلك دفنوا بنتهم كلمن عقله براسه يعرف خلاصه انت لاتحاجينها ولاتسمعين منها مامجبورة وديري بالج وحافظي على بيتج واذا اجتج عود سدي بابج بوجهه واذا خابرتج سدي منها اكعد اعلمج اني مرة شكبرج وشكدج .

مرة بهاء بقت صافنة وعمه عاطت زهراء انطيني المشط ، كمت وتناوشت المشط من الكاع وانطيته الها .

كامت مرة بهاء ؛ اترخص اني الله وياكم ..

عمه مجاوبتها وبقت تزفر بعصبية واني تبعتها للباب ..

ودااوصللها كالت اني اكول الله بس يعينج على هالنسرة هاي شون معاشرتها وانوب اهلج راحوا بس الله يوكفلج وانت هم فقيرة .

همست الله كريم ..

كالت هو رجلها ماطلعت معاملة لم شمل مالتهم ؟

قوست شفايفي وحجيت والله ما ادري ..

كالت هه والله اني متاكدة هو سافر شرد منها ماتنجرع عوذة واني متأملة عود يسحبها يمه بس  والله فلا نرتاح منها تظل من بعيد تحفر وتسوي مشاكل .

ضحكت وجان اسمع عمه تصييح زهراء وينج وين صرررتي ؟

كالت روحي روحي عمه تصيحج هيه عمتي الله يسلمها هم ماتقبل على بنتها يله اني اروح سلميني على اهلج اذا خابرتيهم ..

الله وياج يوصل سلامج .. طلعت وسديت الباب وراها وركضت لعمه كالت تعالي ضفريلها شعرها مداااسيطر عليها ايدي ترجف شكول عليج ليلى(مرة بهاء).

كعدت اظفر شعر لينا فردت شعرها من الجانب وخليته بالجهة الثانيه و سويته كصيبه صفح والباقي كله لزكته بالكصيبة وسويته ذيل حصان .

واني دااربط الستوته بشعرها طبت رشا شافتني ظلت تعوج بحلكها ، ربطتها على السريع وكمت .

عمه كالتلها ها لقحتي سيوفي ..
كالتها اي اثير بعده نايم ؟
روحي شوفي تلاكي كعد هسه ..

كمت اني واسمعها تكول لبنتها شنو هالتمشيط هذا يلعب ستين نفس اشو تعالي افتحه الج .

ظليت افر بيدي واني بالمطبخ طليت شفت لينا تمشي ورة امها وشعرها مفتوح ومنكوش بقلبي كلت مو صوجج .

ظليت اشتغل للظهر تعبت وصعدت فوك شفت اثير ولينا بالغرفة وديلعبون بمكياجي واغراضي .

رحت اخذته من اديهم وخليته بالمجرات وطلعتهم برة الغرفة كتلهم  بعد لاتعيدوها خوووش ؟

جانت هيه توها صاعدة وشافتني ادفعهم من اكتافهم واطلعهم بره .

اجتي تخصرت ووكفت مقابيلي شكوو تدفعين بيهم ولج ؟

خزرتها وخري بالله مالي خلكج .. اعرف لو شكد مراح احجي ميفيد ، دااطب للغرفة دفعت الباب وطبت صررخت بوجهه طلعي بررررة يللله رووووحي ..

اسمع صوت عمه تكول شكوو شصاير .

وكفت يم الباب وظلت تصيح جنتج تطرد بيه وبجهالي
كمت طبكت الباب عليها ، واسمعها تهدد من وره الباب .

رحت دخلت للحمام وفتحت المي وظليت اغسل .
سبحت وطلعت وبعد مانزلت جووة ابد بقيت بغرفتي .

العصر سمعت صوت سيارة صفاء وهو توه جاي من الدوام ، نزلت بسرعة ، شفتها طلعت للباب واخذت اخوها وراحت للحديقة ، تملكني القلق ، ركضت للاستقبال لان شباكها يشرف على الحديقه يعني اذا قريبين عليه اسمعهم...

رحت  شفتهم  كاعدين بالطرف الثاني وديحجون وانظمت الهم عمه طلعت من باب المطبخ ، مسمعت شي  وشديحجون هم ال ٣ وعمه تشاركهم الحديث
عرفت الشغلة انلاصت ، وكبل صعدت لغرفتي وظليت اروح واجي حتى عدد الكاشي حسبته واعصر بأصابعي .
وافكر شدتكوله ؟ دتحضر لمصيبة جديدة الله لايوفقها .

سمعت صوت خطوات ع الدرج رحت كعدت ع الجرباية ، تنفست بعمق وقلبي عبالك حيطلع من بلعومي .

دخل صفاء باوعتله  وجهه ميتفسر ؛ كال ها شلونج

بارتباك جاوبته ؛ زينه..
سكت تنهد بس مبين معصب ويباوعلي بعده بنفس النظرات ..
       _  شبيك هيج تباوعلي شكو؟

_شكو؟ المفروض اني اسأل شكو مو انتي !!!شصاير بينج وبين رشا اني كم مرة محذرج تتجنبين هالانسانه ليش تعاندين هااا؟

ظليت اباوعله محتارة شجاوبه وكالعادة سكتت والتزمت الصمت ..

صرخ بيه: شبيييييييج تباوووووعين شنو اول مرة تشوفيني احجيييييي شلون تطرديها من بيت ابوها ولج شنو أنتي شفتيني حجيت عليها كدامج تروحين تطرديها ؟

سكتت مصدومة شبسرعة راحت ألفت هاي المسرحية ؟

اجه تقرب عليه لزمني من كتفي حيل: احجي لج لتظلين ساكته ترى اجرم بحقج والله

باوعت عليه بس هو سبقني كال: احجي طردتيها لولا؟

_صفاء بس اسمعني افهمك
_لحظه اوكفي

مد رأسه من الغرفه وصاح لعمه  لرشا واجوي و هي بكل عين صلفه تبجي تكول لاخوها بعده ابويه عايش وانطرد اذا مات ابويه شتسوي بيه زوجتك .

كلت بداخلي : انهجم بيتج لعد منو ذاك اليوم تدعي ع ابوها امي لو انتي ..

وعمه ايدتها  كالت سمعتها تكوللها اطلعي برة متوقعتها منها زهراء وين تروح تطلع برة وزوجها مسافر .

صفاء باوعلي بمعنى احجي بس شفت نفسي عاجزة كدام هالانسانة الحقيرة وانصدمت بعمه .

مااعرف ليش محجيت والتزمت الصمت يمكن ماعندي شي احجي وهو مدينطي مجال ، هو افتهم سكوتي انو صح اني طاردتها أشر لاخته تطلع طلعت وعمه تبعتها .

اجه عليه: من شوكت انتي هيج وكحه وتطردين بكيفج ها احجي ولج فشلتيني كدام امي شون تطردين بنتها كدامها ؟

زفرت بعصبية وحجيت بحدية ونتر ؛  اسمع صفاء بس افهمك...

ضربني راشدي  رفعت راسي خزرته ..

عاط ؛ عينننننج لجججج لا افكسها طايحة الحظ ..

درت وجهي منه ونطيته ظهري ، ماريده يشوف دموعي سمعته يتنهد ،  وطلع من الغرفة وطبك الباب قوي .

كعدت ابجي تندمت ليش محجيت شجاني وسكتت انفتحت الباب عبالي هو شفتها رشا دخلت  تباوعلي وتضحك

_شوفي هاي البداية لا عبالج لهنا وخلصت اني الج سهلة اذا مطلعتج من البيت فلا اسمي رشا

كمت من مكاني ورحت عليها : امشي اطلعي برا غرفتي يا قذرة وسختيها برررررا ادبسز اني سكتت لان انصدمت بوقاحتج ومكرج مو سكتت لان خايفه منج والا انتي انسانه وضيعه شايفه
هذا واشرتلها ع نعالي هذا بي مااشتريج فلسين متسوين ويجيج يوم اطلعيييييييي

ضحكت بصوت مستفز وطلعت ..

ظليت اغلي ، رحت ادور على مفتاح بيت اهلي اريد اروح اكعد بي واخلص منهم . مالكيته .

لبست شال ونزلت جوه طلعت من باب المطبخ وطلعت من البيت وجان دنيا مغرب ، كعدت يم باب بيت اهلي وابجي واشهك وميتة قهر ، مشتاقتلهم واحس انظلمت هوايه .

وحتى ما اكدر اخابرهم بهاللحظة خاف ماما تحس بيه شي من صوتي .

بقيت دقايق كاعدة يم الباب ، انفتحت الباب مالتنا وطلع صفاء عبالك يدور على شي باوع عليه مرعوب
درت وجهي منه وشهكت بلا وعي ، تلاحكت روحي خليت ايدي على حلكي امنع شهكاتي المتبقية .

اجه عليه لزمني من ايدي وفوتني جوة للحديقة ظليت ادفع بي ..

لزمني ثبتني ويحجي للللج تخبلتي شمكعدج بالشارع شجاج ..

دفعته وووخر عني وووخر روووح صدك اختك وامك واني افتحلي بيت اهلي اكعد بي تعبت منك تعععبت .

اريد ارجع اطلع من البيت رجع سحبني ويصيح تعالي شنو هالحجي ؟

عيطت بووجهه روووح جييب المفتاح روووح ييله ..

دفعني وثبتني ع السيارة ويباوع بووجهي واني ابجي واشهك وميته قهر وحاقدة عليه كارهته .

ظل مركز نظره عليه درت وجهي للجهه الثانية

همس بحدية : باعي عليه لتدرين وجهج
مدرتله بال وبس اتنفس بعصبية .. سحبني وصعدني للغرفة سحل ..

فتت للغرفة طبيت بالفراش  غطيت حتى وجهي
واحس بي واكف فواك راسي ويتحسر ...

دقايق  سمعت صوت الدوش معناها دخل للحمام..
غفيت مادريت بنفسي ..

كعدت على صوت تليفوني باوعت  هو مو يمي ..
اخذته شفت ماما تتصل .. جاوبتها وحجينه ..
سألتني شبي صوتي كتلها منشولة وهماتين جنت نايمة ..

كالت حيجي قسور هو وامه النا اكو كم شغلة بالبيت اريدج تدزيها بيدهم .

تفاجإت سألتها ؛- شنو ماما مطولين انتوا مناوين ترجعون ؟

_ اي بنتي ابوج مصمم نطلع لاوروبا هماتين ..

سكتت شويه ورجعت احاجيها بس بالي مو مرتاح ابد
راح ابقى وحيدة اني هنا ..!!!!ختمت وياهه المكالمة ..

  واني كارهه الحياة كلها وبس افكر ، اهلي مراح يرجعون شون بيه اني شووون ؟

واني على هذا الحال  انفتحت باب الغرفة غطيت وجهي بسرعة حتى الفون بقى بيدي ، حسيت الفراش نزل ، معناهه اجه يمي ،  مدري شبيه كمت ابجي بصوت مسموع .. وهو ظل يستغفر

كال: كافي بس عندي دوام باجر اريد انام ياامة الاسلام ترى تعباااااان

شمرت الغطى وباوعتله: انت واحد كولش حقير واناني وسطحي طلكني وخليني الحك اهلي ماابقى وياك ولا دقيقة ..

خزرني ويحاول يسيطر على اعصابه ..

كملت بعصبية : لتخزررررر انت تعرف اختك وحده طايحة الحظ شلون تصدك بيها هاااا شلون تصدك اني اطردها اذا اختك اهلك ممربيها اني اهلي تعبانين عليه يعني مو مثلها اني واعرف اسوي هيج سوالف بس وداعة امي اني مطردتها

اني احجي وهو صافن بوجهي تقرب عليه كال: مال حقير واناني وسطحي هاي بعدين احاسبج عليها اما اذا جنت متندم لان ضربتج فهسه لااااا انتي تستاهلين هيج راشدي بلكي يصحيج ويخليج بعد متسكتين ع الظلم وتدافعين عن حقج وهسه يلا انخمدي اريد انام ترى ابتلي بيج والله

ظليت ابجي ؛ قسور وعمه حيروحون لامي اريد اروح وياهم .

جان يعيط: كااااافي وكطنه وشيليها من اذنج فاهمة ماكو سفر ..

مسكتت صيحت لا ماابقى يمك كافي تعبت من عشرتك هاي ..

جرني عليه وحضني كمت ادفر بي ، حبس رجليه بين رجليه وضم راسي لصدره وباسني من رأسي

همس : كافي فدوة اروحلج مو شلعتي گلبي يابه اسف تنكسر ايدي اذا مديتها عليج بعد بس زهراء الله يخليج لتسكتين عن حقج

رفعت رأسي باوعتله كمل كلامه: يعني هي صح اختي حقيرة وشريرة بس هم صعبة عليه تطرديها واني من سألتج سكتي وامي سمعتج ..

كتله تطردتها من الغرفة مطردتها من البيت .

_ وليش محجيتي  لو بس ناطقه وكايله لا جان صار تصرفي غير شكل هذا الراشدي اخذي درس الج

اجيت احجي كال: دخيل ربج شكد تلغين وسحب شفايفي بين شفايفه ادفع بي اريده يوخر ماكو
اختنكت دفرته كام يضحك عليه

همس : زهراء اريدج افهمي عاد والله اريدج

_بس انت متحبني اني شلون اسلم نفسي لشخص ميريدني افهمني صعبة عليه انو اكون بين ايدك وانت تفكر بغيري

_منو كال؟

_انت
_شوكت كلت
_انت تصرفاتك توضح هذا الشي وانت رفضتني بيوم عرسنا

تقرب عليه همس بصوت مليان حنية: زهراااااء احببببج افهمي عااااد

اووووويلي هو حجاها احس گلبي يريد يطلع من مكانه ظليت اباوعله وهو تقرب عليه لدرجة من يحجي انفاسه تضرب وجهي شافني صافنة عليه

نفخ بوجهي غمضت ، همس: احجي شبيج ساكته اعرف تعبتج أني واعرف اذيتج بس هي قسمتج هيج ماادري اني صدك حقير مثل مكلتي بس المهم هسه أني احببببببببج

لج من تمشين احسج تدوسين ع گلبي من كد ممركز بيج حتى خطواتج احسبها ، بالليل من تنامين واتأكد انتي نايمه ادفن وجهي بشعرج حتى اتنفس عطرج لج حتى شامات وجهج حفظتهن انتي نايمه واني مشتعل شعل

همستله: صفاء انت دتحجي صدوك لو لان تريدني

ضحك ع كيف: اوووويلي ع حظي لج والعباس احبببببببج ميت بيج افهمي حبيبتي

حجيت بداخلي : لا هيج هواي والله لو ماعيب اكوله اكرصني حتى اصدك هاي حقيقه مو حلم
احس فراشات ببطني ونبضات گلبي مدااسيطر عليها

حسيت انفاس دافية ع ركبتي انتبهت من صفنتي صفاء ديبوسني لا مجانت بوسة عادية عبالك جان
ديتنفسني  شواربه دغدغتني

همستله :صفاء

_عيونه ونبض گلبه كولي ابويه انتي

_حباب وخر انطيني مجال واني كارهتك اليوم لان ضربتني .

بسرعه ابتعد وباسني بكصتي :صار تدللين .
بعده ممكمل بوسته دفعته ..

ابتعد عني مثل الزعلان ..

زفرت بضيق وابتعدت عنه ، نزلت من السرير مقهورة  ..

دخلت للحمام كعدت ابجي وحاضنة نفسي ، بجيت كلش هوايه ، كمت على حيلي اتأمل روحي بالمراية واباوع لانعكاسي ، شفت خدي شون متلون بسبب ضربته اليه ، لشوكت اتحمل لازم انطي درس مينساه ابد .

ظليت افكر هوايه والايام الي بعدها انطويت على نفسي ، انعزلت واكلي قل  شعور عميق ينمو بداخلي  جنت مصممة اتبع اهلي ..

استعيد نفسي ابتعد عن صفاء واختبر حالي
اشوف نفسي شلون من ابتعد عنه اكدر على بعاده لو ما اكدر .

ساءت صحتي ، صفاء احتار ويايه وشيسويلي بس اني تعبانه تعبانة كلش مطلب واحد بس واحد اريد ابتعد  .

عمه تصعد وتنزل تكول خاف حامل واني حتى ابتسامة ماكدر ابتسم ، اخذت عمه صينيه الاكل الي مااكلت منها ولا شويه ونزلت وبقى صفاء يمي .

يباوعلي بنظرات كلها حزن ، درت وجهي منه .

شتردين لخاطر الله تره تعبتيني زهراء والله تعبت منج .

كمت بوهن وضعف متملك جسمي ونطقت بتعب ؛- اريد اروح يم اهلي .

كطنه وشيليها من اذنج .

لعد اموت هنا . كلت هيج وتمددت ..

كال باعي ترة اني ما اوديج .

لاتوديني انته قسور وعمه حيروحون عود اروح وياهم انته بس خلص الاجراءات مالة السفر .

لج زهراء خايف تروحين واخسرج .....

اني لازم اروح لو اموت هنا وانته كيفك بعد ..

ليش تردين ترحين ؟ تردين تعاقبيني ؟ اكو عقاب اكبر من دموعج هايه ووضعج هذا ؟

سكتت رغم مليانه حجي بس ماريد احجي .

استمريت على هذا الحال الى ان رضخ صفاء وقبل اروح ويه قسور وعمه بس بقى مطنكر عليه ..

دخل عليه للغرفة بالليل جنت دا اخلي ملابسي بالجنطة مالة السفر .

راح سبح وطلع مزعوج ومعصب كال باجر اذا ردتي تطلعين كعدين خوش ومستمسكاتج وجوازج كلها حاضرة بالمجر لتنسيهن عود .

هزيت راسي وهو فات بالفراش وغطه روحه واسمع تنهيداته واحس حينفجر ..

مانمت غير بس كم ساعة والالم يعصر كل قطعة بجسدي الواهن ،  كعدت سبحت وجهزت نفسي ، لبست وكولشي حضرته ، رحت يم السرير واباوعله نايم .

اتمنى احطك بعيوني واغمض عليك بس شسوي ضروري ابتعد عنك هالفترة تعبتني صفاء هوايه تعبت منك وخاطري كسرته وقلبي حطمته  .

طلعت من الغرفة وماكعدته مثل ماطلب مني .
نزلت جوة انتظر عمه وقسور يجون عليه .
بقيت دقايق كاعدة بالصالة البيت صنطة وهدوء
والكل نايمين ، جريت نفس وزفرته وصارت دموعي
على خدي تجري .

سمعت صوت عمو ورايه بسرعة مسحت دموعي.
ودرت كتله صباح الخير ..
كال والله غلط روحتج هاي عبالك زعلانه ..

عمو لازم اروح وهم اشوف اهلي خاف يعبرون لاوروبا وبعد شوفتهم تصير صعبة عليه .

اي حقج بنيتي .. صفاء نايم ؟

اي عمو نايم

متكعدي يروح وياج يوصلكم للمطار ؟

لا عمو خلي نايم احسن ماريده يكعد  .

اندكت الباب طلعت بسرعة شفت عمه وقسور اجوي
اخذ قسور الجنطه وصعدها بالسيارة ، باوعت للسماء بعد شويه ويصير صبح  .

دااجيب الجنطة شفت صفاء طلع من البيت واجه باتجاهي وكالعادة مخنزر ومعصب ..

اجه يمي همس تردين تروحين بدون حتى ماتودعيني ؟ لهدرجة ؟؟!
رافعه حاجبة ومركز نظره بيه ..

ماتحملت نظراته ، خايفة لا اضعف ، دنكت تجمعت الدموع بعيوني ، غمضت عضيت شفتي تمنيت احضنه تمنيت ماروح وابقى يمه بس لازم اغير من وضعي تعبت .

كال بعدين من ترجعين احاسبج عليها .

جريت نفس رفعت راسي بوجهه كتله اذا رجعت عود .

هو بقى صافن ..

اصر اله يوصلنا للمطار ورجع عمو ابو قسور للبيت

صعدت بالسيارة وانطلقت بينا للمطار متوجهين لسوريه
وتاركة كل شي ورايه ..

يتبع ..

اسفة حبايب ماعندي نت الشبكة عاطلة كلها هسه طلعت وحصلت ان شاءالله افعل ع الخط والتزم وياكم