رواية شريعة العشق الفصل الثامن وأربعون 48 - بقلم نورا ناصر

شريعة_العشق
بارت ٤٣
نورا ناصر

وصلنا للمطار وصار وقت اودع صفاء ، جنت طول الوقت اتجنب اباوع لعيونه ، استصعب الموقف
عيونه تضعفني تخليني هشه ومهزوزة ، نقطة ضعفي هو .

تقرب مني دنكت ، بلعت ريك وغمضت عيوني ، صار يهمس لي ؛- باعي ١٠ ايام ويرجعون قسور وعمتي ترجعين وياهم تمام ؟

سحبت نفس من عطره ، باوعت لعيونه ساكته
بس عيوني تحجي عتب ولوم وتشكيله حزني وخيبتي .

هزيت راسي بدون قناعة ، وانطيته ظهري ومشيت واني اسحب بجنطتي ، وبروحي صدمات تركت بكياني اثار مايكدر يمحيها الزمن  ، ومحملة بالخيبة ، خيبة حطمتني الى اشلاء....

وصلنا  لمطار دمشق ظليت اباوع للوجوه بتفحص بداخلي احساس غريب مثل طير فر من صقيع ايامه...
صرت ادور بابا الي جان ينتظرنا ، لمحته رحت اله اركض ودموعي بللت وجهي..

حضنته وحضني بكل حنيه ويبوس براسي
يخاطبني ؛- زهراء بنيتي شلوونج ولج ذبلانه هذا كله على فراكنا .

ظليت بس اجر انفاسي وامسح بدموعي واشهك وافرك راسي على كتفه .

اخذني من اكتافي وخليت راسي على صدره ، واخذ جنطتي مني وراح سلم على عمه وقسور .

وانطلقنا للشقة واني طول الطريق  بس اريد اوصل واشوف اهلي وبس افكر بصفاء .

وصلنا لشقة اهلي ، بابا فتح الباب وفات ويصيح
ام السووس وينج تعالي وصلت زهرتج .

طلعت ماما تلكتنا صاحت بحنيه ييمه زهرتي .

رحت لحضنها واني اشهك بكلمة 'ماما' الي طالعه من اعماقي بنبرة تشكي الخيبة والالم .

                                ***

فتحت عيوني مشوشة و  متخدرة الحواس ، على صوت مريم ؛- عبير عبير كُعدي شوفي منو اجه ، لج كعدي وصلت زهراء !!!

استيقظ ادراكي تدريجيا ، دا اريد اكوم واني افرك بعيوني هبطت عليه زهراء تبووس بيه واني مستلقية وراسي على المخدة .

وخرت مني عدلت نفسي وهيه كعدت يمي ..
تحجي وبنبرتها حزن متبقي وسعادة مؤقتة ..
_  هاي بعدج متشبعين من النوم لج كومي كومي داشوفج .

كمت حضنتها مرة ثانية واشم بيها ..
_ زهراء جيتي ولج مادري بنفسي ونمت العلاج الي اخذه ينعسني والا جنت انتظرج والله بس تأخرتوا .

شنسوي هاي حال رحلات الطيران يكولولج ب ١٠ نطير وتالي نروح ننتظر ومنطير اله ب ٢ ..

طبت مريم ؛- لج عبير قسور كاعد برة على نار وبس يتلفت خطية دينتظرج تطلعين تسلمين عليه .

جريت نفس ووخرت االفراش الي مغطية نفسي بي وكمت اعدل روحي ع المراية ، زهراء سحبت مريم من ايدها وظلت تحجي بأذنها بصوت شبه مسموع .
_ شبيج ولج ويه عمه اشوو ماسلمتي عليها .

مريم سحبت ايدها من زهراء واستقامت تعدل نفسها وتحجي بنبرة مقتضبة ؛- ايييه هيه متحبني عمه شسويلها اصلا عمه مبينه جايه على اعصابها وممتحملتنه .

نبرة تحذيرية ؛ - اششش لتسمعج ولج  .

عفتهن اني طلعت اسلم عليهم ، بوست عمه اول شي ورحت وكفت كبال قسور ونطقت بابتسامه خجولة
_ شلونك قسور ؟

ابتسامة لطيفة على وجهه  ونظراته كلها حب وأمل
وصوته تغلف بالحنية جاوبني ؛ - الحمدلله انتِ شلوونج عبيررررررر .

جان يريد يكول عبيري ، الكلمة المتعود عليها هو بيناتنا يكولها بس بالوقت المناسب سيطر على لسانه وشدد على حرف الراء وماكالها لان خجل من الكل الي موجودين يمنه .

بالوقت المناسب داس ع البريك ههههههه ....

التهبت وجناتي بخجل وابتسمت باحراج واني ابادله النظرات ..

بعد الغداء كعدنا وحدنا نحجي ..
كال شلونج هسه زينة ؟

اي الحمدلله ، قسور حباب قنع بابا نرجع الله يخليك هو يحبك ويحترمك .

دا احجي وياه والله وهواي حاجيته بالتليفون بس هو قافل خايف عليج .

اني ماعليه شي والله هو قضاء وقدر والحمدلله طلعت منها سلامات وهسه اريد ارجع لبغداد ميته هنا والله ميته .

كال بحماس ؛- اسم الله عليج عيوني على كيفج ويه نفسج وخالي ان شاءالله يقتنع لعد علويش جيتي بس انتِ رفضتي اقتراحي من قبل وما اريد الح عليج اكثر .

قسور يمعود مو هيج نحل المشكلة اني اريد بابا يقتنع ونرجع اقتراحك هذا مو حل والله هو اصلا جابنا لهنا عمودي مو غير شي .

دار وجهه وتحسر وقبضة ايده على حلكه ، ظل يستغفر ويكول بعصبية لاحول ولا قوة الا بالله ، لو ما الانفجار جان هسه انتِ مرتي على سنة الله ورسوله الله ينتقم من الي كان السبب .

باوعتله بتجهم هو وين يفكر واني وين ، هزيت راسي بعدم رضا .

يوم ثاني من الصبح عمه اخذته وراحوا يزورون واصلا عمه مبينه ضايجة حيييل مدري شبيها .

                                 ***

بعد ما وصلت لاهلي وشفتهم وصولي يمهم ولقائي بيهم يعتبر جرعة من الطمأنينة و شوية دفأ واحتواء لمسة حنية وشوق
مشاعر تهون عليه خيبتي الثقيلة الي اجيت محملة بيها.

بعد لحظات من اللذة الوهمية ، رجعت افكر بلي شاغل بالي ، كاعدة على السرير وافكر .
ياترى هسه هو مشتاقلي !! اني مشتاقة لكل شي بي
حتى عكدة حواجبه .

ميلت راسي على كتفي ، تملكني يقين دافئ
وخاصة بعد ما اعترف بحبه الي ، انو هو مشتاقلي هسه ومفتقدني .

الاحساس المنساب بداخلي ونبضات قلبي هي الي انبئتني ..

هواي اتصل على بابا بس اني ماحاجيته ابد ، لدرجة ماما وبابا ظلوا يسألون شكو بينكم وشصاير !!
بس اني هم ماجاوبتهم وهمَ خلوني على راحتي .

جتي ماما كعدت يمي ، ظلت تطالعني بنظرات تسأل عن حالي ، حاجيتها واني اخلي خصلاتي ورة اذني
في تصرف يدل على الحيرة وبنبرة مرتبكة  ؛- ها ماما اكو شي هم رجع خابر صفاء كرة ثانية ؟

_ ولج امي لاتخوفيني عليج ميصير ترة توكفين قلبي هيج .

_ شكو ماما ؟ ليش هيج تحجين ؟ تره هياتني كدامج مابيه شي .

_ ماتقنعيني مستحيل شصاير بينج وبين صفاء ماردت اسألج كدام عمتج .

_ اي احسن زين سويتي ماسألتي كدامها ماما اني عندي شوية مشاكل بيني وبينه وجيتي لهنا حتى اعاقبه او اعرف غلاتي عنده .

_ صدك تحجين عود زهراء ولج شصاير بينكم ؟

اخذت كف ايدها وصلني دفئ بشرتها الناعمة لمن احتكت ببشرتي حاجيتها مطمئنة ؛- ماكو شي ماما مجرد مشاكل والله لاتفكرين ولاتشغلين بالج .

_ ومشاكلج هاي ماتنحل اله  بالبعد لو متردين تنطين بصفاء كدامي ؟ شمسوي بيج صفاء يمه كوليلي ؟

حسيت بكف انمدت لقلبي وعصرته جاوبتها بشي من الحيرة والتلعثم ؛- والله ممسوي شي ماما مشاكل خاصة ميصير تعرفيها .

سحبت كف ايدها مني وكامت على حيلها
تتنهد باحتجاج  ؛- اوووف منج زهراء اوووف كتلج راح تتعذبين راح .... ميفيد الحجي بعد هسه لا احجي احسن .

تأفأفت اني همين وخليت راسي على ركبي وتنفست بعمق ، غمضت عيوني ورجعت افكر بصفاء وحياتي الجاية وياه ، مهما ابتعدت ابقى مؤمنة ان  المشاعر  الي خنكتني وعذبتني راح تبقى عايشة ويايه وماكدر اقدمله ذره من الكره حتى واني فرحانة ويه اهلي يكمز اسمه باصرار ويتملك تفكيري يشوش عليه ويربكني
يجي لذاكرتي قسرا مرارا وتكرارا شكد اتمنى اطلق سراحه من قفص مشاعري وارتاح .

انقضت الايام العشرة بسرعة ، وصار وقت نرجع لبغداد
جنت ممستعدة ارجع ابد رغم الشوق الفاضحني والحنين الي مستولي عليه .

تظاهرت بالمرض او تعمدت امرض نفسي ، كدام عمه ام قسور ، تركت الاكل لأيام مجازفة .

هي وكفت متجهمة تباوعلي وتوجه كلامها لأمي
؛- سوسن خاف بنتج حامل ؟

باوعتلها وعيوني متسعة على الاخير ..

كملت كلامها ؛- اي يابنتي يوم الي تدرين بنفسج حامل وتعبانه ليش جيتي ؟ جان بقيتي ابيتج أمن الج وللطفل واهلج لاحكة عليهم وتشوفيهم .

_ عمه الله يخليج لاتكولون لصفاء مراح اجي اله لمن توصلون .

_ غير يكلب علينا الدنيه ؟

امي كالتلها لا عيوني اني اخلي تحسين يحجي وياه شوفي البنيه شصاير بيها .

_ اي غير ماتاكل اكولج داده ماعليها شي ميصير جبناهه ويانه نردهه لرجلها احسن يلا كومي زهرتء مابيج شي .

غطيت راسي بالبطانية وسكتت وماما تولت مهمة اقناعها .

                              ***
وكف كبالي يريد يودعني ، سمعته تحسر واني مدنكة راسي ، اجاني صوته ؛- راح اشتاقلج .

همست ؛- دير بالك على نفسك والله يهدي بابا ونرجع .
كال ان شاءالله وخله ايده على قبضة الباب وميباوعلي.

انقهرت على حاله كتله قسور لاتضوج الي كاتبة الله يصير .

وخر ايده من الباب وباوعلي وهو مبتسم بمرارة
لا عليمن اضوج اصلا انتي متدرين شلون ردتيلي روحي من شفتج اخذت جرعه منج ودعيت يم السيدة هواي الله يردج الي وتتقلص المسافات الي بيننا .

ابتسمت ؛ الله يستجيب دعائك ان شاءالله .

طلعت عمه ووراهه بابا وماما ومريم راح قسور اخذ الجنط من ايدها ، ودعناهم وراحوا ، قسور كلساع يدور يباوعلي وامي تتحسر باوعت لبابا خطية تعذب هالولد
كاتل نفسه عليها والله يا تحسين اني اشوف نرجع لبغداد احسن شوف حال بناتنا شصار بيهن شوف زهراء شحالها اصلا اذا مرجعنه والله تموت على صفاء والله .

بابا كال دخلي جوة مو هنا نحجي بهذا الموضوع وزهراء اني هسه رايح اشوف شبيها .

واحنه دنفوت جاوبته ماما ؛ نايمه هسه وصفاء حرك الدنيا بالمكالمات ومتقبل تحاجي .

ظل يتنهد بابا ودخل جوة خابر على صفاء وحجه وياه .كاله زهراء مريضة وبقت يمنه وظل يشاقي ويضحك عليه ومبين صفاء معصب ومصدك شقه بابا وياه .

رحت لامي حجيت وياهه بنبرة توسل ؛ ماما الله يخليج قنغي بابا والله هو ياخذ كلامج متشوفي شلون غير رأيه بس حاجيتي والله هو بس انت تكوليله نرجع بسرعه يرجعنا بس انت ماتبادرين ابد .

ولج يوم قلب والدة اخاف عليجن اني متشوفين الي صار بيج مابينه حيل والله .

ماما الي كاتلة الله يصير وكل واحد منه انولد وقدره ونصيبه  وياه ليش مصعبين الامور انتوا خليها على الله .

تنهدت كالت والنعم بالله ..

يعني هسه حتكوليله ؟؟

امري لله اني هم ماريد اشوفجن هيج انت واختج .

                                ***

قرار بقائي خله صفاء يتخبل ، عشرات المكالمات منه اجتي ومارديت على ولا وحدة منها ، جنت خايفة من ردة فعله ، ماما تتوسل وبابا يتوسل واني لافة راسي ونايمة خايفة من قسوة الكلام الي راح يتوجه الي منه .

اجتي ماما تضحك كالت ابشرج حنرجع لبغداد

عدلت كعدتي ممصدكة صدك ماما الله عليج ؟

اي والله لج صفاء حيتخبل ابوج ماكاله حنرجع
كاله سمعت بيك مزعل زهورة راح اخذهه وياي نعبر لاوروبا وصفاء تخبل .

عضيت شفتي واباوع بحيرة ..

كملت ماما كلامها صفاء يكول ماتكدرون تطلعوهه بدون اذن مني ابوج كاله بالتزوير كولشي نسوي .

ضحكنا وسكتت ماما شويه جنت متعطشة اسمع اخباره ، وميته على سماع صوته بس بداخلي خوف منه ماريد اسمع كلام قاسي او يجرحني .

كتلها اي ماما وبعد شنو كال صفاء ؟

عبير كالت جاوبي على مخابراته وانت تعرفين شنو كال بعد .

هزيت راسي ودخلته وجهي بالبطانية وهم ظلوا يضحكون .

،،، مرت ايام ،،،
كاعدين بالصالة بابا كال صفاء متخبل يريد يجي ..
عطت عززززه بابا دخيلك لاتخلي يجي ولاحتى تدلي الشقة .

ظلوا يضحكون ماما واخواتي ، بابا ظل يباوعلي بجدية خيرج بنيتي هو شصاير بينكم بالضبط ليش هالخوف هذا؟

لابابا بس لان كال رجعي ومرجعت بابا والله ماكدر مريضة انته شفت حالتي . ودنكت ..

اي بابا ظلت يمكم انتي وياه بعد شون تحلون مشاكلكم  حلوها واعرفج انت بنيتي هادئة وحبابة وهو صفاء ابن اخويه وتربى كدامي اكيد مامنه غلط واذا احتاجيتوا مني شي اني حاضر ولو اني اشوف كلشي مابيكم مرتاحين ان شاءالله .

حاولت اكتم حسرتي كدام بابا وما ابين اله شي ابد

كمل كلامه بابا كال هو اكيد مشغول وماينطو اجازة وميكدر يجي احنه نرجع ونسويهه اله مفاجأة مابقى بس كم يوم ان شاءالله نخلص كل شي ونرجع .

جانت اكثر وحدة فرحانة هيه عبير طكتها ضحكه وكامت حضنت بابا وفرحانه واني بين خوف وحيرة
دعيت بقلبي يربي اكتبلنا كل خير واحنه راجعين ياربي .

ورة ايام جنت كاعدة وافكر بصفاء تفكير اخذني لغير عالم بس اني وياه واتذكر كل ايامنا ، لحظات  سمعت صوت صفاء بالشقة ، كذبت نفسي معقولة اجه ؟

دخلت عبير للغرفة كالت ووولج اجه صفاء اجه رووحي طلعيله رووحي بس فات سأل عنج .

فتحت عيوني على اوسعها صرت مؤمنة
ان التفكير العميق بالاشياء يخليها تكمز من راسك وتصير كدام عينك...

ظلت تجر بيه عبير فلتت منها وكمزت ع السرير غطيت راسي وقلبي يضرب على اضلاعي بعنف وجنون ، اريد اجر نفس ماكدر احس خايفه محتارة ممستوعبه ابد .

صار هدوء بالغرفة وبعدها انفتحت الباب ، اجاني احساس قوي صرت احرك بؤبؤ عيني جوة البطانية
حسيت بخطوات تجي باتجاهي ، كرسي انجر وسوا صوت احد كعد عليه .

لحظات من السكون والهدوء بس احس اكو صوت انفاس بالغرفة ، صوت انفاسه هو .

طالت فترة السكون وخرت البطانية شويه باوعت شفتها كاعد ع الكرسي بصف السرير ومكتف اديه
باوعت على عيونه مخنزر عيونه وعاكد حواجبه .
شهكت من جوة البطانية وغطيت راسي عدل .

سمعت صوت تنهيداته ، حسيته كام من الكرسي
وكعد ع السرير وشويه شويه وخر الغطى من عليه
شهكت ودفنت وجهي بكفوف اديه .

اجاني صوته هو هذا حبج الي صرعتيني بي ؟ هيج تردين تتركيني وترحين ؟

لزم اديه وخرهم من على وجهي باوعتله وعضيت شفتي مادري شوكت صارن دموعي على خدي .

ظل يعاتبني بس معصب وانفاسها ممسيطر عليهن .
وبعده لازم معاصمي جاوبته تعبانه تعبانه .

اخذني لصدره حضني حيل لدرجة الوجع مادري حب اشتياق لوعه لو حقد .

جنت اتمنى ادخل بصدره واحتضن قلبه لقلبي
ماعرف منين جتي القوة وتركته ، ماعرف شون كدرت بس هسه مجاي اكدر اشبع منه مدا اكدر اتركه ، جلبت بملابسه حسيت راح يتشككن بديه .

مدد وهو حاضني خله راسه على المخدة ، وسحبني لصدره وظل يلعب بشعري ويباوع بعيوني ، هواي سولفنه انتبه عليه تعبانه وجهي شاحب سألني .

كتله بس مريضة ..

كال لا هذا فراكي ادري ..

ضحكت ..  كال شوفي ممجذب والله بس انت تكابرين بالله شستفاديتي هسه من عفتيني كل هالفترة وانوب متردين ترجعين مو كتلج احبج وكل الماضي صار ورة ظهري ليش هالعناد بلله .

دفنت راسي بصدره واتنفسه ...

هو عنده شغل مكدر منرجع وتحضرنه للسفر ودعنا بابا وماما واخواتي على امل نلتقي ببغداد بعد فترة .   وطلعنا .

وصلنا لبغداد ولبيتنا جانت رشا ماكو البيت مريح
عمه وعمو فرحوا بيه وكعدوا يعاتبوني ليش ما اجيت ويه عمه ام قسور صفاء جاوب عني كال مريضة .

صعدنا لغرفتنا ورأسا غفينه تعبانين كلش ..

كعدنا المغرب  هو نايم واني كمت غسلت ملابسنه وتوضيت ورحت للغرفة شفته توه خلص صلاة فرشت سجادتي وصليت .

اجه وكعد بصفي ومركز بيه ،  كملت صلاة التفتتله
_شبيك صفاء مدتشوفني دااصلي

_واني شسويت عجبني اكعد يمج وانتي تصلين لج انتي شدعوة هلكد حلوة واني شكد اثول من جنت رافضج .

ابتسمت بعصبية ؛- توك تدري .

عصب شنو توة ادري شنو قصدج انت حلوة لو اني اثول .

اريد اجاوبه  ودك موبايله ، رحت طليت بالموبايل منوو شفته وهم تبارك من صدوك انزعجت ..

جاوبها واني شلت السجادة كمل اتصال اجه حاوطني من خصري وحط رأسه ع كتفي بعدته عني

_صفاء ترى تبارك هواي تتصل بيك بديت اضوج اني تقبل زميلي يتصل بيه

بسرعه حط ايده ع حلكي : حتى ابتلي بيج لج ابويه افهمي هاي تبارك تخابرني علمود تسألني وهذا كل ما في الامر والا هي متجي لاظفرج .

_دوخر لخاطر ربك اذا اتصلت بيك بعد والنبي اسوي بيها سواية بعمرها مصايرة بيك يززززي عاد متعرف رجال متزوج شوكت ماعجبها واتصلت شنو فاتحين عيادة هنا وحلوة هاي مال تسألك ليش شنو هي درست طب بيطري حتى تجي تسألك ترى اثنينكم نفس الاختصاص .

_ تريدين الصدك من جنتي مسافرة هيه مقصرت بالاتصالات عبالك تعلم .

عصبت عليه: صفاء كوم اطلع برا صح احبك بس مو معناها تدوس عليه كافي هواي تحملت لهنا وبس يلا كوم اطلع برا غرفتي

عصب ظل يعيط هم رجعنا لخبالاتج لو ضاله يم اهلج مو احسن هسه اني شلي بشلعان القلب .

  سكتت بس اتنفس بعصبية ..

  كالي: لتخلقين شي مموجود انتي شدعوه هلكد نكديه ترى طلعت روحي منج .

  احس اعصابي ماكدر اتحكم بيها هاي اول يوم رجعنه هيج  كمت ارجف ارجف وهو يزيد نار فوك ناري عبالك يريد يطلع حرقة قلبه لان مارجعت ويه عمه .

التفتت يمي فازه شلتها وشمرتها عليه  واجت  برأسه ..

اباوعله الدم ملئ وجهه متتت بدمي كمت اعيط واديه على حلكي ، وهو بعده ممستوعب الموقف رحت اركض عليه هو رفع ايده لمقدمة رأسه و نزلها شافها كلها
دم !!!!!

يتبع ..