شريعة العشق الفصل السابع وسبعون 77 - بقلم نورا ناصر

شريعة العشق
بارت ٦٦
نورا ناصر

سنوات البعد طوال ...
وقد تركت في قلبي اثر الهجران ..
كرماد بارد بعد ان اكلته نيران الاشتياق ..
ابحث بين ثنايا الاحلام عن طيفك الذي هجرني بالوصال ..
وارى نفسي غارق في المنام ..
ولا ارى لحالتي سوى اليأس و الخذلان ..............
الخاطرة بقلم HafsaHafsa710

بلعت ريك ومديت اصابعي ، كمشت الورقة وفتحتها
غمضت عيوني لحتى استعد لقراءتها ، فتحتها واني اتحسر داخلي ينبض بالالم ' مشتاقتلها ' ، اللتهمت عيوني احرف الوصية بوجل .. واني اتأمل حروف خطتها انامل صديقتي الشهيدة .

" عبورة حبيبتي لمن تقرين هاي الرسالة اكيد اني مو بالدنيا ، عندي احساس اموت بالولادة واحلامي كلها عن الموت دااشوف موتي بعيوني ، لذلك كتبت هالوصية حتى اوصيج ، شوفي صح انت عصبية وقاسية بس داخلج عكس القوة الي تظهرينها ، ولج عبير كرار أمانة يمج عليج بداعة خالة سوسن ، هوني عليه فراگي واذا متت بالولادة ابني امانة يمج ، وحببي كرار بيچ "عليچ العباس " ، شوفي خبلة مو تگوليلي حلفي بالعباس هاي حلّفتچ بي ، خلي كرار يزرع بذرة حب بصف بذرة حبه اليه " وكوني انتِ هالبذرة "
ماكو مثلچ حتدير بالها عليه وتسعده "

صعد الدم القلبي بعنف شديد واظلمت عيوني!!!!
تصلب جسمي ومفاصلي ترتجف ، رجفة مزقت روحي ، مااحس بس الدمع ينزل من عيوني ، الورقة تبللت ، حظنتها لوجهي
وبچيت بحرگة.

سمعت صوت ماما من ورايه " يله بنتي زوجچ ينتظرچ لتأخريه خاف تعبان ويريد يروح يرتاح .

التفتت الها بيدي الورقة باوعت على السرير شافت العلبة : اي دااسألج عن هالعلبة مدري منين همام طلعها وهو ديلعب وضميتها هنا هاي لزهراء لو الچ ؟
عبير شبيچ ماماتي انتِ دتبچين ؟

تقربت مني شمرت نفسي بحضنها وبعدها الامانة بيدي عصرتها حيل باصابعي وشهگت حواسي مضطربة وارجف .

ظليت اتمتم' ولج مها وصيتج هاي ثكيلة عليه ااااه لو تدرين اني متزوجة هسه وما اعرف شنو حيصير لو جان فتحتها قبل زواجي ماعرف مااااعرف كل الي اعرفه اني مشتاقة الها هواي كلش هواي ومحتاجتها بحياتي '

ظلت ماما تمسدلي واتي احجيلها ظلت تهدأ بيه
اتصل قسور على موبايلي
جاوبته بس محجيت
اجاني صوته : وينج ياعيني .
خليت ايدي على حلكي وجريت نفس ..
_ لحظة بس شوية انتظر
_ اوكي حياتي على راحتج بس راح اغفي على روحي والله نعسان .
_ بس احجي وي ماما ..
_ ماشي .
سديته منه ..

باوعت لماما: ماما عادي ابات عدكم الليلة والله مادري شبيه تعبانة اريد ابقى وحدي .

_ صدگ چذب منج ‏‏୪ بنتي تردين عمتج تشرنا على الحبل ؟ مصار الها اسبوع من تزوجت عافت زوجها وباتت يم اهلها وهو هم خطية خلي يشبع منج حتخلص اجازته ويلتحق ودتشوفين الاوضاع شلونها وهو بالرمادي يداوم والامه مخبوصة بسبب المظاهرات .

مسحت دموعي وجاوبته بدون مااباوعلها واحس اهدابي ثقيلة بسبب الدمع ؛ اي ماما هم حقج ..

_ گومي غسلي بنتي ومسحي وجهچ ولا تبينين لزوجچ
شي ، ومن توصلين لبيتج توضي واقري قرأن واهدي الها الله يرحم روحها الطيبة ويغفرلها وهسه بس تقرين الها بسرعة ترتاحين .

_ صار ماما كايمة بس شوفيلي عمة راحت لو بعدها ؟ ماريدها تشوفني بهالوضع .

_ ‏‏୪ بنتي ماراحت گالت تروح وياكم قسور يوصلها .

هزيت راسي وگمت ، توجهت للمغسلة غسلت وجهي وتخلصت من آثار دموعي ، جريت نفس ، اتخلص من شهگاتي المسيطرة على انفاسي .

طلعت من يم المغسلة ، شفت ماما حبيبتي محضرة الي گلاص مي اخذته من ايدها وهزيت راسي بامتنان وشربت رشفة منه وانتظرت شوية دقايق بين ما ارتاح وبالي يم قسور شون حطلع هيج اكيد رح يحس عليه بيه شي .

واني واكفة واحس الزمن واكف ويايه ومديمر تمنيت بهاي اللحظة اكدر اتحكم بعواطفي ومشاعري واكتم آهاتي ووجعي ..

اجاني صوت عمة المستفز وبنفس القسوة المعهودة
_ يلا عيني عروووس وينج مو تأخرنا حيصير المغرب حمودي وحده بالبيت ماجبنا ويانه ليضوجون بعض الناس ..

كالت هيج واندارت على مريم الي شحت وجهه منها منقرفة من سيرة محمد الي ماايفك منها لهسه يضايقها بين فترة والثانية ..

خليت ايدي على خدي اتأكد من جفافه الي غرگ بسبب الدموع
وجريت انفاسي ، هي التفتت الي : شبيج ؟ جنج دتبجين ؟ شنو عيني معجبج العرس وهسه شفتي اهلج وجلبتي بيهم ؟ وذاكه الي خله الوراه والكدامه عليج .

جاوبتها بانفعال : بالله سكتي عني عمه مناقصتج ..

لطمت خدها وعاطت عزااا شون بلا اخلاق ..

عفتها ودااطلع لان اذا اطلع اتعارك وياها مابيها مجال بعد .

سمعت امي تعاتبها ..
_ صدم جذب منح ام قسور هاي المرجية منج هيج تحجين ليش تتهمينها باطل ترة هيه مرته لقسور واذا خله الوراه والكدامه عليها ترة هو يحبها والي يخلي الها معناهه اله وهيه مو متريدة لاتسيئين الظن بيها مل ما بالموضوع هيه شافت رسايل صديقتها وظلت تبجي عليها وهي عبير حساسة .

عمه كالت ؛ اي عشتو حساسة تسكتني بيج خير جان ربيتيها المتستحي شون تحاجيني .

تركتها تدردم ورحت بوست بابا وودعته بسرعة قبل ليحس عليه ورجعت ادور زهراء ، لكيتها اباب المطبخ
رحت كرصتها من ساعد ايدهه انتبهت عليه متفاجئة
رفعت تك حاجب : شبيج عبير انتِ باجية ؟

جاوبتها بتجهم : بعدين الي صرفة وياج وينه ابنج الوكح خلي ابوسه قبل لا اروح ؟

سألتني بنبرة مليانه شك : شكو ولج عبير ؟

_ ماكو ، دنكت على همام بوسته وطلعت للكراج
صار مقابيلي كرار جان ديسولف ويه قسور
ظليت اباوعله واحس تجمدت
رمقته بنظرة أسى وحزن على حاله ..

مو كرار القديم ابد رغم يضحك ويريد يعيش بآي طريقة ، بس مو هو والله ، كرار المليان حيوية
اباوعله اكتافه محنيه ، شعره مبعثر ولحيته ممرتبة
وقميصه الاسود ، حيصير الها سنة ثانية وهو مايلبس غير الاسود .

هو حس دا اباوعله باوعلي وابتسم
_ ها عبود حتروح ؟

انتبهت لقسور صافن عليه ويحاول يفسر نظراتي لكرار ..

مكدرت انطق احس اختنكت ، قسور ضرب كرار
على رقبته من وره : وولك لا تگلب اسمها لا اشعل عشيرتك هو اكو احلى من اسمها ؟

مجاوبتهم هم الاثنين بس حسيت بنظرات قسور عليه تحركني ، طلعت برة وتوجهت لسيارة قسور
حسيته لحكني ، ظل يمشي بصفي ويسأل بيه .

_ شبيج عبير صاير شي حبي ؟

بدون ما اباوعله جاوبته : ماكو شي ..

_ امي مضوجتج ؟

اومئت براسي بمعنى لا .. وفتحت باب الوره وصعدت
ظل يضرب ع الجامة بيده ، تنهدت وفتحتها بدون ما اباوعله .

دنك وطل من جامة السيارة وكال شو باوعيني ؟

دنكت وخليت اديه على حلكي ظل يلح عليه مباوعتله
اجت عمه بنفس اللحظة ونقذتني من الموقف الي انطيت بي وخلصتني من الحاحه ، بس اكيد حنروح للبيت وينفرد بيه .

جتي عمه وطبت بالسيارة كعدت بالصدر وايناس كعدت يمي وراها قسور دخل وحرك ، طول الطريق احاول اتهرب من نظراته الي محاوطتني .

كلساع اشوفه يباوعلي بالمراية واصد نظراته ...
ماريده يعرف الي بيه ، ماريده يعرف الامانة ويضوج
وخايفة يظل يكره كرار همينه واني ماعونت تتحسن علاقتهم بعد ما جانت متوترة .

وصلنا لبيت عمتي ، نزلت هيه وإيناس ووكفت يم جامة السيارة : ها ماتنزلون ويانه ؟

جاوبهه قسور : لا يوم نروح لبيتنا نمر الكم ان شاءالله .

فاتت جوه بلا متجاوبه حسيت بيها باوعتلي .

التفتتلي قسور وتنهد : شبيج يا لبة قلبي منو وياج ؟

جاوبته واني مدنگة : مابيه شي فدوة يله حرك وديني للبيت تعبانة وبس اريد انام ارتاح ويصير خير واحجيلك كولشي .

_ براحتج ؛ بس شنو حتبقين گاعدة وره متنزلين تگعدين يمي ؟

فتحت الباب ونزلت بدون ما احجي ، وصعدت يمه .

ما ان صرت بصفه ، اخذ ايدي باسها وجهه وكفه وهو مغمض عيونه وكال : اشتاقيت الج .

باوعت لوجهه وعيني بعينه صارت ابتسمت بألم وايدي داعبت خده وتعبث بلحيته .

فتح عيونه انتِ باچية مو ؟ منو مبجيج ؟ كرار شبي وياج ؟

_ كرار !!! شبي بعد مابي شي ..
اريده يغير الموضوع نبرتي راح تفضحني ..
_ حرامات راح تلتحق وتزيين لحيتك واني احبها ..

_ بس لحيتي تحبيها اني متحبيني ؟

بتوتر جاوبته : هم احبك ...

دار وجهه مني ممقتنع وحرك السيارة وانطلقنا لبيتنا ..

غمضت عيوني وبقلبي حجيت "'والله أحبك"'

باوعتله عينه ع الطريق واحس جسمه متصلب لمن يسوق وبعد ماباوعلي ضجت كلش
وصلنا للبيت صعدت بسرعة ، ضميت العلبة مالة مها بعد مابوستها وشميتها ، غسلت ورحت للفراش نمت .

جريتها نومه للمغرب ، كعدت شفت قسور متمدد يمي ويلعب بموبايله ، التفتت عليه بس مالي واهس لكل شي .

حس بيه كعدت ، كلب نفسه على جهتي ، اديه جوه راسه ويباوعلي : صار مغرب متكومين تصلين حتى نتعشه جوعان مجوعانة ؟

جاوبته بتململ : لأ مجوعانة هسه اسويلك عشه انت مو ع الاساس تعبان مانمت ؟

_ لأ مانمت انتظرج تكعدين حتى تسولفيلي شبيج ؟

_ مابيه .. حجيت هيج ودا اكوم ، سحبني وكعت بحضنه قيدني بديه ، باسني وظل يلعب بشعري

_ لا تنكرين بيج شي كولي شنو ؟ ليش تخليني قلق عليج ؟

رجفت بحضنه ، تملصت منه بسرعة ونزلت من السرير
_ رايحة اتوضى وأصلي بعدين عود .

سكت وماتكلم ابد واني نزلت جوه ، طلعت شغلات من الثلاجة حتى اسويهم للعشه وخليتهم ع الكاونتر
رحت توضيت وصليت بالهول .
وهو مانزل بعد ..

لمن خلصت صلاة رحت بلشت بالعشه سويته وحضرته بالمطبخ ، وصعدت اصيح اله ، شفته متمدد
سألته صليت ؟

باوعلي ونظراته الشاردة عليه اكتفى بس هز راسه .

وكام على حيله وطلع من الغرفة تبعته جوه ، ساكتين فتنه اثنينه للمطبخ كعد على ميز الطعام ويريد ياكل
جريت تليفوني ودا اصعد فوك .

اجاني صوته مراح تتعشين .. ؟؟

انداريت اله : ما اشتهي والله ..

باوعلي بشك وبنبرة مليانة شكوك سألني
_ لأخر مرة اكولج شبيج واريد جواب ...

_ مابيه شي والله

كام على حيله ودفع الكرسي عاط : لتحلفين جذابة ...
نبرة صوته تدل على انو لا مجال للمناقشة ...

بس اني ما اكدر اسكت : مو جذابة اني ومابيه شي شنو بالكوه لازم اكُل ؟

ترك المطبخ وطلع من بابه الي يطل على الكراج
تبعته صحت عليه وين رايح ؟ قسور ؟

اشرلي بيده بدون ميباوعلي وطلع وركع الباب وراه .

غمضت عيوني وتحسررررت بقوووة وفتت ..

مرت ٣ أيام علاقتنا متوترة مااعرف شلون اصالحه
وهو مبين عليه ميحب يلح زايد ابد .

اما اني مجاي اكدر انسى مها ، عبالك انفتح جرحي من جديد ولهسه ماتت وسمعت خبرها ، ابجي من هو مو يمي ولمن يجي اسكت وامسح دموعي وافوت بالبطانية واسمع بس حسراته تملي اسماعي ..

جنت متمددة بالغرفة ، سمعت صوت المطر بره
اول مرة تمطر بداية شهر ال ١١ ... جنت نعسانة حيل
وصوت المطر وهو يضرب ع الجامة عبالك يهدهدني
يغنيلي انشودة نوم وينومني مثل طفل صغير ..
نمت .

سمعته يحوس بالغرفة وبالكنتور وانوب سمعت شي وكع فزيت بس ماطلعت من البطانية وبقيت خاتلة قبل شوي جنت باجية وماريده يشوف دموعي .

سكنت حركته عرفته طلع من الغرفة ، رجعت احاول انام ما گدرت ، وخرت الغطى وكمت من على السرير
التافيت صار بوجهي قسور واكف يباوع وهيئته متصلبه ونظرات عيونه تبث شرارات عتاب ويباوعلي بخيبة ، باوعت لايده شفته لازم ورقة الرسالة مالة مها!

حسيت بدمي يتحول الى ثلج وعيونه تراقبني واني احاول ابقى هادئة ، بصوت راجف مغلف بثقة زائفة
سألته : شبيك قسور؟؟

رفع الرسالة بيده ليفوك لتكون بمستوى نظري
وبنبرة تهكم غاضبة : هو هذا الشي الي غيرچ عليه ؟

هزيت راسي بصدمة وتوتر ‏‏୪‏‏୪‏‏୪ قسور انتَ فاهم غلط تره خلي اشرحلك .

تقرب مني بعدة خطوات رشيقة ووكف غاصت نظراته بأعماقي ، عيونه مثبتتة عليه بعتاب .
وسألني بشك : ندمانة لأن تزوجتيني عبير ؟

رمشت عدة رمشات وفتحت عيوني بصدمة وفكي متدلي للاسفل ، اريد اجاوبه ؛ اشرلي بعدم إهتمام
فهمت انو ماكو فايدة من الكلام الي راح اكوله
واصلا ماعندي اي كلام او اي مبرر .

هو مد ايده اخذ ايدي وخله الرسالة براحة كفي وسداه
قبل ليطلع من الغرفة كال : باجر راح التحق حضري نفسج اوديج يم أهلج .

.....

زهراء .. استمر صفاء يتعالج وبيوم عمه وعمو طلعوا وبقوا يم بيت بهاء ، اجااني صفاء وانطاني شغلات اغسل بيها البيت وادعية اقراها ، وكال طلعي كل ملابس اسراء واغراضها وخليهن على صفحة اخلي احمد يوديهن لبيت اهلها .

هنا اعترضت !! لالا صفاء معليه اني باغراض اسراء ولا الزمهم تريد انت روح طلعهن ..
باوعلي بعدم رضا وراح ظل يطلع بيهن لمن فرغ الغرفة كلها صاح عليه اغسلها وانظفها .
وكفت مقابيله اباوعله بتحدي واديه على خصري : بله رجعتها شلون بالله ؟

تقرب مني يباوعلي بنظرات الندم : مترجع دا امشي باجراءات الطلاق .

انداريت منه وظليت اغسل بالبيت واطلع المي منه .
اجه صار مقابيلي يباوع لملامحي بتفحص .
رفعت نظراتي باتجاه عيونه وبثقة كلت اي ميهمني قابل شنووو انت تدري سبب وجودي هنا محاجة اعيد وازيد ... واني جاي ادردم ، لزمني من زنودي حييل لدرجة وكعت الماسحة مني ، قربني اله وباس شفايييفي حيييل وابتعد عني .

لمن وخر عني شهكت بقوة وهو ظل يضحك بمكر وخبث ، خزرته حييل وعطت واني رافعة اصبع الشهادة بتهديد : دير بالك تعيدهااااا .

ضحك شسووين بالله ؟؟؟ تشتكين عليه ؟؟ مرتي حلالي وبكيفي ..

بقيت اباوعله بعدم رضا وشفافي ترجف ..

ررن تليفونه باوعلي وبعدها الابتسامة ممفاركة وجهه وجاوب عرفت ديحجي ويه احمد عمود ملابس اسراء واغراضها ...

وراها بايام صعدلي للشقة بالليل .. جنت بالصالة ومخليه همام بحضني توه غافي ..

كنبص يمي ، دنك باس همام ، بعدها اخذه مني وراح وداه لفراشه ، رحت للغرفة اريد انام وهو ديطلع منها
وكفني صوته : طلكتها ..

رجف قلبي ما اعرف مشاعري بوقتها ما اكدر اوصفها فرح سعادة عدم اهتمام مااعرف بس الي انكسر بروحي لهسه يوجعني جرح قلبي عميق هوايه .

هزيت راسي وداافوت وكفني ، لزمني من اكتافي
باوعتله ببرود وعدم اهتمام سألته شعندك ؟

كافي تعذبيني زهراء ، غفريلي سامحيني ربج يسامح انت ليش هيج قاسية ليش ؟

شتريد مني ؟

اريدج تسامحيني وبس ..

تمام مسامحتك وخر عني وسويلي طريق داافوت انام نعسانة وباجر وراي دوام ..

اخذني لحضنه بلمح البصر ، وقيد شفايفي بشفايفه .
صارت انفاسنا وحدة ، ظليت احوس احاول اتملص منه ، ماتركني الى ان اختنكت كلش .

دفعته .. وعطت : صفاء اتركني لخاطر ربك مو من راحت اسراء رجعتلي لتخليني اعيط ويطلع صوتي

_باع هاي لج بابا يااسراء يابطيخ أني ميت عليج بس انتي مدتنطيني مجال صارلج اشهر يمي واني تاركج ع راحتج لا اسراء تعوض مكانج ولا حتى عشرة منها

شكد حاولت أصده بس مكدرت بالنهاية اخذ اليريده صح جنت مشتاقتله وميته عليه بس اكو شي يمنعني الحضن جان مالتي وحدي شاركوني بي جنت بحضنه وابجي وهو يمسح دموعي باحلى لحظات العلاقه الزوجيه واني دموعي جانت تنزل ومن كمل باسني بكصتي و دموعي حارة تلهبني ، تعانقت نظراتنا بين خوف وحيرة و "حب " ..

همسلي : زهراء وداعتج عندي مااعرف شلون صار وتزوجت عليج لج والله عبالك كابوس ومااعرف شلون صحيت ولكيت نفسي متزوج من أفكر اكول معقولة الصار لو هذا حلم

جان يحجي وشفايفه ع كصتي ودموعه بللت كصتي همسلي : ساعديني زهرة صفاء أني دااموت

من سمعت كلامه قلبي انتفض لزمت وجهه بأثنين اديه : شبيك صفاء ؟

أبتسم وجاوبني : تخافين عليه ؟ زهراء تخافين عليه بعد مااذيتج ؟ اني مااستاهلج بس أعترف اني اناني بحبج مااكدر اتخلى عنج حبج ادمان مااكدر أبتعد عنج ولا لحظه من تركتيني متت والله

من أبتعد عن حضني اختنك وخشمه طك دمي وحتى حلكه نزف انرعبت من المنظر وابتعدت عنه هو طفر للحمام راح يغسل حتى خفت الحكه من طلع طمني

كال: هاي يومية أني هيج هانت ان شاءالله مبقى شي واصير زين واثق بربي اني ميتركني .

اجه تمدد يمي ، كمت غسلت ورجعت نشفت شعري ، اخذت مخدة وفراش ونمت جوه ..

بعدها سمعت من عمه انو اسراء طلعت للاردن ويه خالتها مهتميت للموضوع ولا حتى جاوبت عمة ..

المغرب جنت بالشقة مالتي وهمام جوه وطفت الكهرباء ، صارت ظلمه سمعت صوت همام ظل يبجي بهيستريا ماعولت البس شالي واخذ ضوه واطلعله سمعت صوت صرخته طلعت اركض لكيته واكع وشفته دتنزف وصفحة خده فقدت من شفته هيج ..

اجاني صفاء يركض من جوه اخذه وظل يسكت بي واني بس ارجف ، اخذني من اكتافي لحضنه وظل يهدأ بيه : اسكتي شبيج زهورة شجاج ..

بنبرة كلها بجي جاوبته باع شوف شلون دينزف ..

اهدأي هسه احول ع الكهرباء واعالجه مابي شي لتخافين ..

طلعت عمه واحنه دنصعد الدرج صفاء صعد قبلي يعالج لهمام سألتني شكو جاوبتها
كالت : وشدعوه عليج خاتله فوك منو يمج اشو البنية وتطلكت وراحت بحال سبيلها شهالعيارة هيج احسن لو ميت الطفل جان فلا رحمتج

ظليت اطحن بداخلي ومااريد اجاوبها لان متأكدة اذا جاوبتها حتعصب عليها ومااريد أعكس اخلاقي وتربيتي سكتت عنها بس هي استمرت تحجي عليه

اخر شي كالت : مدري ع شنو خابصنه بيج ينام ويكعد يدعي علينا ويكول الله لايوفقكم بگتوا سعادتي وحرمتوني منها ..

مااعرف ليش أبتسمت من سمعت كلامها

صعدت فوك شفت صفاء معالجه لهمام بس ملابسه بيها دم اخذته منه بوسته وحضنته وهو حبيبي جان يشهك

حجه صفاء بنبرة حزم : من باجر الغي الدرج الخارجي والعازل مال الشقه وتعيشين ويانه أني مو بوضع يسمحلي أخسر أبني بعد مخسرت عافيتي .

وخزرني ونزل محجيت لان سلامة أبني أهم من كولشي .. ثاني اليوم كعدني من الفجر نزلت جوا جان جايب عمال لغوا العازل وظلوا يشتغلون اسبوع الى ان كملوا البيت هلكت بيها ..

وراها اخذني سفرة لتركيا كال نغير جو ونرجع المياه لمجاريها ، وافقت ورحت وياه .. جنه دنمشي بتركيا
والمح اسراء من بعيد للحظة كذبت نفسي هي لو مو هيه بس الي جذبني سمنانه وعبالك مورمة وكرش عدهه ..

انصدمت وبلعت ريك هي الظاهر عرفتني احتارت شسوي ، صفاء دغني كال شبيج على شنو تباوعين ؟
التفتت لصفاء باوعتله وصفنت ثواني احتاريت بين اكوله او لا ، رجعت اباوع نفس المكان مشفتها .

سألني صفاء : شبيج انخبصتي ؟
_ ماكو بسس عبالك شفت اسراء ؟ انت همين شفتها ؟

_ لج يا نعل شبيج انتي اسراء بالاردن شجابهه هنا ..

هزيت راسي بلا ما اجاوبه ، اجاه اتصال وانخبص خبص ..

ورا ماختمه سألته شكوو شبيك شصاير ؟

كال : رشا المطية مسويه حاادث هي واطفالها بالسيارة للللج شكد حذرناهه بعدج مو مال سياقة بعدج مبتدئة لا تتهورين لجج زهراء اطفالهااااا اطفااالها هيه طبها طوب لج اطفالها حالتهم خطرة ..

يتبع .

احبابي بعد بارتين للنهاية النشر حيكون بينهم يوم وترك اتمنى تنطوني مجال بيها ..

احبكم 😘💚