شريعة العشق الفصل الثامن وسبعون 78 - بقلم نورا ناصر

شريعة العشق
٦٧
نورا ناصر

كل ساقي سيسقي بما سقي
فوالله الذي لا تغفل عينه ولا تنام إن الله يسمع دبيب النملة السمراء في الليلة الظلماء في شقوق الجبال
أن الحياة قصيرة والدائرة تدور
ثم يُصاب كل ظالم بما ظلم
وكل شامت بما شمت وكل مسيء بما أساء به
( ليرفعن الله دعوة المظلوم فوق الغمام ويقول لها
وعزتي وجلالي لأنصرنك ولو بعد حين )
لا تحزن إن ربك أعدل العادلين.....

اخذنا سحل للفندق وبس يستغفر ...
حتى وجهه عرك لزمته من وجهه لسعتني حرارته الي ارتفعت ..
_ عزااا صفاء شجاك اهدأ حبيبي الله يعديها على خير ان شاءالله ليروح يصير بيك شي حباب .

بعدني عنه ؛ ولللج شهدا شهدااااا اني اني الصوووج بيه انييي لج حلفتها باطفالها وحللفت بيهم شمدريني عبالي ادمية ماتتجرأ تحلف بيهم بس الظاهر هي واصلة مرحلة حتى الحيوان ما واصل الهاااا ...

لج الحيوان وهو الحيوان يخاف على اطفاله ويحاول بكل وسيلة يحميهم هاي شنو من بشررر شنووو الي تحلف باطفالها كذب شنو !!!!

بقيت فاتحة عيوني مصدوومة مااعرف عن شنوو يحجي .. حباب صفاء انت عن شنو تحجي شوكت حلفت باطفالها رشا ؟ شون تتجرأ تحلف بيهم ...

لزم جبينه وظل يتنهد بعصبية وقهر وبس يحوس بالغرفة اشرلي بيده وبعده معصب ؛ حضري نفسج بآي لحظة نرجع لبغداد واعتراض ماااريد خوش .

هزيت راسي وضعه يخليني اكتم احتجاجي بداخل نفسي ، هاي اذا امتلك حق الاحتجاج ، مها يكون والي سوته بيه رشا وبيوم اني دعيت عليها ؛ بس ما اگدر اعارض وابقى اتونس هنا والاطفال خطية بين الحياة والموت هم همه مالهم ذنب والظفر ميطلع من اللحم والدم عمره ميصير مي .

اخذت همام انطيته موزة وحليب ، وطلعت الجنط وبلشت امليها باغراضنا وملابسنا ، اتصلت بماما
وظلت تحجيلي كالت اثير ولينا حالتهم خطرة خطية
بس الصغير عبدالله( ٥ سنوات ) باقي يم عمه ام صفاء وطالعين بس هي ولينا واثير وصاير الحادث .

انقهرت كلش وكعدت ادعيلهم اطفال مالهم ذنب ابد اثير عمره ١٠ سنوات ولينا ١١ سنة ..

واني داافكر بيهم تذكرت اسراء شجابهه لتركيا!!!
بس وضعها ليش هيج بطنها ليش كبيرة معقولة تكون حامل!!!! هزيت راسي وبعدت هالافكار السيئة عني كلها عني .

اجه صفاء كضاهه روحه بخشمه وكلساع نخابرهم نطمئن عليهم والجواب يكون بعدهم حالتهم حرجة ..

وره ايام يله كدرنه نرجع لبغداد وكبالها صار الخبر
مات اثير!!!! دخلت للبيت واسمع عمه تصرخ والكل داير مدايرها تبجي وتصرخ وعبدالله الطفل خطية مفزوع اخذته يمه غسلتله وبدلتله جان حتى ملابسه وصخة وجوعان وعمه جانت بحالة مايسمح الها تهتم بي لان خايفة على رشا وعلى لينا ، صفاء بس وصلنا للبيت كبل طلع للمستشفى ..

مرت ايام ورشا ماتدري بأبنها ميت كالولها بعده بالمستشفى ، طلعت هيه ولينا وجابوهم يمنه للبيت
جان مكسرة ومورمة ولينا خطية هم حالتها فد نوب واضلاعها متكسرة وتون من الالم الى ان ينطيها صفاء مسكنات وتنام .

يومين والثالث اصرت اله تشوف ابنها وكف بوجهه صفاء كاللها متروحين ميصير تفوتين عليه ابقي هنانه بين ميصير زين نوديج اله .

هيه ولا عبالك متكسرة كامت وكفت كباله
انت معليك بيه مو على تالي وكت صاير براسي خييير ابني وبكيفي اريد اروح اشوفه .

ولا وكف بعينها شي هالرشا وهالتعب ليالي وهو يسهر عليها وعلى بنتها ويجيب الها طبيب كسور للبيت لحتى يشوفها وهي بكل قباحة تمد اله لسان اطول منها ناكرة الجميل .

عصب صفاء وعيونه صارن بكصته وهي استمرت تعير بي وتتجاوز مل وطكت رووحه ..
كاللها بعصبية ؛ ولج انت شعبالج هيه هينه تحلفين باطفالج جذب لجج قتلتي طفلي وهو ابطن امه راح تتعداج هالفعلة ومتاخذين جزائج لج اثير مات مات بسببج انت الحلفتي بي كذب .

كال اخر كلماته واحسه اختنك فتح اول دكمة من دكم قميصه وكعد ع القنفة ..

هيه متكدر تمشي لان رجلها مكسورة وايدها همين ماصدكت كلامه صاحت على امها وظلت تصرررخ
يوووم شديكوول ابنج شديكوول ؟ ولج يووم صدك اثير مات صدددك ؟

عمه ظلت تبجي وتنشغ وتضرب على وجهه باديها
ايي ولج ماات اثير ابو لسان الحلو ابو الوجه الحلو ولج مات ولج .

رشا هيه صرخة وهيه وكعة بس السانها المتبري منها حتى لو ينكص هم ميفيده شي ظلت تسب وتغلط بيهم ولكم ابني ماات ومتكلولي انتوا شنو ولكم شنوووو هيييج تعاقبوني هيييج الله ياخذكم كلكم لو كلكم ميتين وباقيلي اثييير ابنيييي لك ماما حبيبي ليش تركتنييي ليييش لك اثير سامحني يووم سااامحني .

بقى صوتها يكطع كلبي اخذت ابنها عبدالله ليصير بي شي خطية ، عاطت بيه وين ماخذتها تردين تمووتيه مثل ماموتوا اثير انتوا الي كتلتوا تردون تنتقمون مني بجهالي اي انتقموا مني اني ليش ابني ليش ليششش .

تركت الطفل وجسمي كله يرجف رغم كل شي سوته بي بس مجنت رايدة يصير بيها هيج ابد ...

صعدت لغرفتي حضنت همام وبعدها رشا تصرخ ، الى بح صوتها واختفى ، شويه ودخل صفاء سألته عنها
كال جبت الها ابرة مهدئة ..

ظل بس يتحسر ويستغفر ويفرك بوجهه ومن نظرات عيونه يشع الالم والندم .

تقربت منه صفاء تريد اخليلك غده ؟ حباب اكلك كلش قليل هالايام ميصير هيج فدوة انت معليك هذا قدر ربك ورشا الله يعوضها .

ضرب بقبضة ايده ع السرير حيل خلاني اتردد بخطواتي ليوره واحضن همام حيل وهو متمسك بطرف ملابسي .

ظل يحجي صفاء بنبرة تقهر ؛ للج زهراء اني السبب اني حلفتها انييي وهاي نتيجتها لج اني غبييي ماااااعرفها لاختي انانية حقيرة وظالمة ماااعرفها لييش يربي ليششش شسوي هسه شسوييي .

تقربت منه لزمته من راسه ؛ انت معليك شعليك انته والله مو ذنبك كافي تلوم روحك عفية انت شكد قلبك طيب بس خلي ايمانك بالله قوي هذا كله تدبير من الله .

انتفض وبعدني عنه بالكوة وعاط : شوكت ارتاح يربي شوووكت .

وطلع من الغرفة تبعته ع الدرج صحت باسمه صفاء صفاء مجاوبني ، خفت لا يصير بي شي لان طلع معصب كلش ، رجعت للغرفة ادعيله واكر ر اخر جملة كالها شوكت نرتاح ياربي شوكت .

لليل يله رجع تعبان كلش ومنها حتى اكل ما اكل سبح وطلع شمر نفسه على السرير وحتى ماله خلك لاي شي كلمة مانطق واني هم ماحاجيته ابد التزمت الصمت .

رفع راسه سألني عن همام جاوبته يم اهلي تحسر ورجع خله راسه على المخدة ويحاول يغفى بس دااحسه ميكدر ، نظراته مثبتها ع السكف ويباوع بالفراغ بدون هدف .

همام هالطفل المسكين تعبت نفسيته بسبب المشاكل والصياح الى بالبيت والنفسية االمتأزمة وكلمن روحه بخشمه ، وديته يم اهلي افضل هناك شويه هدوء عكس هنانه .

دا اريد انزل جوه صاحني وين رايحة تعالي يمي ؟

رجعت كعدت على طرف السرير ، اشرلي اروح يمه
رحت تمددت يمه ، سحبني من خصري وصار ظهري عليه وحوط خصري باديه وبس احس بحسراته الحارة تلفح رقبتي..

سألني همام حيبقى يم اهلج الليلة ؟

همست اي حيبقى يمهم .. بعد ما تكلم ابد وغركنا اثنينه ببحور افكارنا الى ان نمنه ..

الصبح كعدت هو نايم ، نزلت جوه شفت رشا حاضنه اطفالها باديها السليمة وتبجي ، رشا مخليه راسها على رجلها وعبدالله حاضنته من اكتافه وعمه مكابلتهم وكاعدة تبجي وياهم .

احتاريت حتى ما اكدر اكول صباح الخير الهم
الكلمات ماتت على شفافي قبل لا تنولد ..

باوعتلي رشا بنظرة حقد عبالها شمتانة بيها
للاسف ماتعرفني ، الي يعرفك مايثمنك ، للاسف هي ماتعرفني او عبالها الناس كلها مثلها .

فتت للمطبخ وبلشت احضر بالريوگ
اجه عمو هم خطية متأثر ومتألم
كال صباح الخير ، رديت عليه صباح النور
كعد وصبيت اله جاي وكعد ياكل .
واني صعدت فوك واني ع الدرج سمعت صوت صفاء يصيح .

سرعت بمشيتي والافكار احتلتني والحيرة
اخذت مني مأخذ ، فتت بسرعة شفته توه
ختم المكالمة وظل يشتم ويسب .

شافني سكت وركع التليفون ع الجرباية
وهو يستغفر ويتأفأف ..

سألته بخوف : شكو صفاء شصاير ؟

رد بتجهم وعيونه حمرة من الغضب
_ هذا الگ*****د غيث رجل هاي المطية رشا خابرني يكول اريد اطلكها موتت ابني واني متزوج بالخارج
ابن الننننعل صارلها سنين تنتظره هسه يجي يحجي هالحجي عبالك يريدها حجه اني اله لا والله مو صوجه صوج هاي الغبية النايمة جوة .

خفت من صياحه مانطقت ولا حرف الراحة مفقودة بهذا البيت لشوكت ماادري!!! طب للحمام وبعده يدردم
كعدت على السرير واحس دوخة لزمتني ، تنفست بعمق ولزمت راسي حيل صداع لزمني .

بقيت ثواني على كعدتي وكمت حتى مالي نفس انزل جوه أكل ، كمت حضرت ملابسي حتى ابدل واروح للدوام .

طلع صفاء من الحمام ، تقربت منه وسألته
_ الريوك جوه حضرته .. قبل لا اكمل كلامي
قاطعني كال بتذمر ؛ ماريد نزلي اكلي بسرعة دنروح راح نتأخر...

جاوبته بهدوء ؛ أني هم ما اريد نفسي انسدت ..

غمض جر نفس وتخصر ، بعدها باوعلي واني داافوت للحمام ، جرني من ايدي ووكفني مقابيله ، ظل يباوع عليه بهدوء ثواني ، حضن وجهي باديه وركز نظراته بعيوني .

_ حبيبتي ادري تعبتي حاسس بيج والله زهراء متستاعلين الي ديصير لج هذا عمري ان شاءالله اعوضج عن كل شي .

بقيت ساكنة بدون حركة وبس عيوني بعيونه ، اخذني لحضنه ، شبگني حييل وظل يشم بيه ويبعثر شعري باديه ، واني بس مستسلمة لحضنه .

بهاي اللحظة دااحس بنفسي رجعت احبه من جديد ....

لملمت غصاتي وآهاتي كلها واستسلمت لحب عمري وكأني اليوم حبيته اليوم عشقته ، دا احس نفسي
بنت ال ١٣ سنة يوم الي عشگته وتمنيته الي , و صار من نصيبي وبعدها بدات رحلة العذاب وتعذبت بحبه سنين وسنين..

بين فراق وعذابات جحيمية ودموع وألم وغيرة ، مرات اصفن على حالي واكول يمكن استوليت على شي مو الي ، يمكن اسراء بعدها نفسها بي ، بس اني شنو الذنب الي اقترفته ، وافقت عليه بعد ما هي تزوجت وهو اجه خطبني .

▪︎▪︎▪︎

عبير .. نزل جوه تبعته ، دورته لكيته كاعد بالصالة ، مدد رجلينه وايده تعبت براسه وصافن ، نظراته تتجول بالفراغ كدامه ، تقربت منه وكعدت جوه يم رجلينه .

رفعت راسي باوعت لمستوى عيونه ، وانجبرت اتحمل نظرته الباردة الخالية من اي تعبير ، سألته برجاء وعيوني متضامنة وي نبرتي ومتوسلة .

_ قسور انت زعلان مني ؟

_ انت شتشوفين نفسج ؟ تصرفج هذا شنو نتيجته؟ يحاجيني بجفاف واني غركانة بعمق عيونه ..

كمت من مكاني ، ارتميت على صدره الصلب والدافي بأمان واني واثقة من حبه ..
تكلمت بحزن واني احس نفسي اغرق اكثر بعمق صدره الرجولي ..
_ خليني اشرحلك قسور اني اليوم يله شفتها للرسالة تأثرت صح بس مو بسبب مضمونها لا وانما بسبب ثاني وصيتها مستحيل تتنفذ بس ياقسور شميت ريحتها قريت حروفها هذا الي خلاني انقهر وانزوي عنك ماردتك تحس بحزني هاي طبيعتي .

جر حسرة وما حچه آي شي ، دمعت عيوني ..
باوعت بعيونه واني ماكدر امنع نفسي من هالشي
ترجيته بنظراتي واني اراقب نظرات الاستنكار الي تبثها عيونه ..

لزمني من راسي وويا لزمته تبعثر شعري وتداخلت خصلاتي بأصابع ايده ورجعني على صدره .
على الرغم من غضبه شعرت انو مهتم بيه
استرخيت بجانبه واني احس بنفسي استمد الدفئ والقوة من رجولته القوية .

تنفست بعمق ووياهه اخذت جرعة من عطر صدره وتخلل بانفاسي ، رفعت اديه وعانقت رقبته ، حسيته تجمد ع اثر لمستي .

ويعدها صد نظراتي ، تصرفه هذا يبين شدة غيرته ..
لزمت خده ورجعته عليه ابتسمت بشيء من الحزن واحس عيوني بيها بقايا دموع .
_ ما اكلت شي مو ؟ كوم ناكل اني وياك .

هز راسه وتملص من لمساتي وكال بخشونة
_ ما اشتهي ..

بعدني عنه بهدوء وكام على حيله ، شكله بعده زعلان
دااحسه يغلي بس ميريد يأذيني ..

طلع من الصالة واني بقيت ضايجة ومقهورة .. صعدت فوك انتظره يصعد ، طوّل هوايه وماصعد ، نزلت دااشوفه ، شفته نايم بالصالة ، متممدد ع الكاع ومخلي راسه بس على الكوشايات مالات التخم وغافي .

هزيت راسي باستنكار ، وصعدت جبت مخدات وبطانية
رفعت راسه ، فز يباوعلي ، ابتسمت بوجهه وداعبت ذقنه المشعر باصابعي ، وهو يباوعلي ببرود وهدوء وعيونه حمرة بسبب النعاس .

بعدت الكوشايات وخليت راسه ع المخدة ، وغطيته بالبطانية وهو بسرعة استسلم للنوم ، تمددت بصفه حشكت روحي بي كلش
ومديت ايدي وحوطت خصره ، حسيت بيده الدافية يخليها على ايدي ، نمت يمه بسرعة غفيت .

الصبح حسيته يكعد بيه بنبرة خشنة ومبين بعده زعلان .. عبير عبير يله كومي مو ع الاساس اليوم عندج دوام ؟

كعدت بسرعة تمططت وجاوبته اي وانت محتلتحق مو ؟

دنك وهز راسه بمعنى ‏‏୪ .. كمزت من الفرح بسته على خده هو ابد مااكو رد فعل ، بسته على خده الثاني وهم نفس الشي ، برطمت وهو تجاهلني ورجع تمدد وخله المخدة على راسه ورجع نام ..

رحت اني غسلت وحضرت الريوك ورحت كعدته
كام معصب ليش دتكعديني لخاطر الله هم وراي دوام اني ؟

لا حبيبي على كيفك مو انت حتوديني للكلية كوم اكل لكمة خاف تجوع بالطريق .

باوعلي وعرفت من ملامحه انو بعده معصب..

سند جسمه بيده وبعده ديحاول يصحصح رمقني بنظرة باردة ابرد من الجليد
مو اني اوديج خابرت ابو الخط البارحة وحيجي عليج .

كمت على حيلي انتفضت معصبة
لا يابه ابو الخط شنووو؟ انت وديني اول يوم اداوم من بعد العرس خليهم يشوفون العريس والعروسة .

هز ايده باستهزاء وبنبرة سخرية
_ هو انت خليتي بيها عريس خليتي عروس .

فتحت عيوني متعجبة اباوعله ، خزرني ورجع نام
وكال لتكعديني بعد وروحي ويه ابو الخط
تكلم بنبرة جافة ومنعس ...

وكفت بتحدي اباوعله بسيطة اني اعرف شون اخليك توديني ، رحت فوك كعدت اصبغ اظافري وحضرت ملابسي ، حرصت اتأخر وما ابدل ، سمعت صوت ابو الخط يدك هورنات وهذا يتخبل من وحدة تتأخر حده ٥ دقايق متطلع يخليها ويروح .

لشويه صعد قسور ، وكف يم الباب عيونه حمرة معصب واني دااخلي اللمسات الاخيرة على مكياجي وبعدني ممبدلة حتى .

سويت نفسي ممهتمة واباوع بالمراية واخلي بالحمرة على شفافي بس داخلي يرجف احس خايفة منه يمكن زودتها اليوم وياه هوايه .

كال بنبرة برود غاضبة ؛ دتسمعين الغضب جوه لوووو لا ؟

وخرت الحمرة من ع شفافي وباوعتله اتصنع البلاهة ..
شنوو ؟ منوو ؟ شتقصد ...

مد ايده لراسه ورجعها ليوره ، دااحسه يحاول يسيطر على اعصابه بكل قوة ، بس مانجح ، ضرب الباب حيل
وعاط لج ابووو الخط سطرني من اشتعلت عشيرتج شوكت تخلصين .

كلت ببرود مستفز ليش هو اجه ؟ شعنده خل ينتظرني بين ماابدل .

تأفأف بضجر ودار وجهه نزل واني بدلت ملابسي واني داابدل صعد عاط وللج هذا وله رااح .

اي خلي يروح انت وصلني ..

كور قبضة ايده بعصبية .. وظل يضربها براحة ايده اللخ ..

تصنعت الخوف : لو عليمن اخذ تكسي واروح خاف مابيك انته ..

حسيته حينفجر كولش ..

ابتسمت بذكاء : غيرت رايّ ماراح اروح للكلية ..

تركني وطب للحمام واني كعدت على السرير ، طلع جر ملابسه من الكنتور وبدل ، شفته ديبدل نزلت جوه بسرعة ، خليت الاكل الي حظرته بحافظه واخذتها ويايه .

طلع مبدل لابس قميص جوزي طوخ وسترة بيج
ويه لون بشرته ولون عيونه طالع سكر بني .
انبهرت بي اني شوفتي اله تخلي قلبي يرفرف داخل صدري ..

حيروح هيج للكلية!!! يشوفوه البنات لايربي مااتحمل اي والله مااتحمل شون هسه اغير رأي ماروح وباجر اروح ويه ابو الخط ؟؟ لا والله الملازم يدفني بالحديقة خلي اسكت احسن الي .

شغل السيارة وانطلقنا للكلية هو ساكت ، وبس يتنهد واني طلعت الحافظة وطلعت صمونه وظليت اخلي بيها جبن واسوي لكمات واخلي بحلكه وهو لازم الستيرن ميكدر يمنعني ترست حلكه ترس .

كال مو شعلتي عشيرتي شعلتي جدي بكبره اكو احد داز عليج كالج وكليني كافي ولج كافي .

ضميتها وخليتها بالعلاكة وشمرتها وره بالمقعد الخلفي اخذت كلينس وظليت امسح حلكه وهو يباوعلي ويخزر ؛ لج ادري شسالفتج طفل كدامج اني بطلي هالسوالف ..

اي مو انت طفلي المدلل ..

باوعلي بنظرة جانبية ووياهه خزرة ...

متريد ادللك براحتك يابه براحتك ..

سكتت طول الطريق الباقي ، وصلنا للكلية نزل ويايه الكل يباوع النا ، تمنيت اضمه عن عيون الكل ، احطه بقلبي واقفل عليه ، اول مرة احس بالغيرة ، يربي الغيرة شعوور مؤلم مينطاق .

لحد ماراح طلع من الكلية اني مثل النار بعز هالبرد مشتعلة بيه ..

خلصت محاضراتي وخابرته جاوبني نعسان
اشتعلت عشيرتج لا والله مو عشيرتج عشيرتي اني .

ضحكت هاي شنووو هم رجعت نمت صاير متشبع من النوم ؟

اي تعلمت منج غير من عاشر القوم ..

ضحكت بصوت عالي .. عاط بيه اشش لج انت وين ودتضحكين هيج ؟

ماكو احد يمي تجي عليه ؟

ابو الخط وين ؟ هم عافج وراح ؟

لا بعده مااجه واني هسه خلصت كل شي والصراحة مشتاقة الك واريد للبيت على وكت .

ظلي اشتاقيلي شعندج ...

يعني ماتجي عليه ؟

لأ تعالي ويه ابو الخط ..

اوكي وسديته دااحسه يعاملني بالمثل لك ليش هيج إففف ..

وفعلا رجعت للبيت ويه ابو الخط وشفته نايم بالصالة رحت سويت غده كعدته بعده جان مطنكر كال اتركيني اتخطى الموضوع ..

تركته بس انقهرت على نفسي كعدت ابجي وحدي اريده يرضى عني بس ماريد اتوسل بي اكثر ..

قررت بس اروح لبيت اهلي او اشوف كرار انطي العلبة مالة مها واكول لقسور همين على هالشي ..
بلكي يرضى ..

نمت بلا غده وجريتها نومه للمغرب ... حسيته كاعد يم راسي يكعدني ، باوعتله عيوني حمر ، تفاجأ بس ماابدى رد فعل .

كال بنبرة جافة امي واخواتي جوه كومي سلمي عليهم وهم حيبقون عدنا للعشه .

باوعتله بحزن وهو باوعلي بجفاء وكام طلع من الغرفة
رحت للحمام غسلت وجهي ورجعت بدلت ملابسي رفعت شعري ليفوك وخليت مكياج ، حاولت اخفي آثار دموعي وابلع غصتي .

نزلت سلمت عليهم ورحبت بيهم ، قسور مشفته كمت طلعتلهم سجادات للصلاة صلوا لان وقت صلاة المغرب .

وره شويه سمعت صوت بالمطبخ رحت
شفت قسور جايب عشه من بره .. مشاوي مشكلة
ظليت احضر بيها للعشه ، دخلت عمه ذبتلهه مسمار
لازم كاضينهه كله اكل من برة سوده عليه ابني ..

هو لزمني من اكتافي وسحبني اله طبع بوسه على راسي وكال لا والله يمه بنت اخوج معدلة وممقصرة اطيب اكل اكلها واحد يحجي الحق بس هاي اني طلبته من العصر ومادري بيكم تجون .

باوعت لعيونه بنظرات حيرانه وممتنة
ومتفاجئة من تصرفه وهو هز راسه الي بس بعدهه نظرة الزعل على عيونه .

تعشوا وهو راح يوصلهم واخذني وياه مرينه على اهلي وديت العلبة وياي وامنتها يم مريم طلبت منها تنطيها لكرار لمن يجي ..

انتبهت لقسور كدام اي احد مايبين احنه زعلانين ابد يتصرف عادي ويايه ولمن رجعنا للبيت رجع رفع خشمه وطنكر عليه هنا اني جن جنوني وطكيت من القهر انهاريت وظليت ابجي واعيط ...

هو انصدم من تصرفي اجه ركض حضني صديته وبعدته عني باوعلي وعاط بيه شبيج ؟

ايييي لاتعاملني هيج قسور غلطت اني ماكفرت والعلبة رجعتها وحتنطيها مريم لكرار بعد كافي زعل كافي ترة تعبت من هذا الوضع .

لعد اني شكد تعبتيني انتي اذا من البارحة لليوم وما اتحملتي .

اي اسسسفة اعتذر يرضيك هيج ؟

ابتسم لا مايرضيني اخذني لحضنه واخذ شفايفي بين شفافه ، لمن وخر كال هذا الي يرضيني ..

ابتسمت والدموع بعيني وهو ظل يعدل بشعري المخربط بسبب خبالي ويكول مرتي الخبلة شكد احبها ..

حضنته بجنون وتعلكت بي مثل طفلة ، رفعني ومددني على السرير ..

.....

زهراء .. بعد ايام ظلينه نهتم برشا وبلينا وعبدالله
رشا رغم لسانها الطويل السليط والمتبري منها بس حالتها تصعب ع الكافر وتبجي الحجر .

مدري اني حساسة زيادة وانقهر حتى على الي يأذيني ..

جانت تحضن جهالها وتبجي على ابنها وعلى حالها وخاصة لمن سمعت بزوجها متزوج عليها بتركيا
ومجذب عليها طول هالفترة ويكول انو هو باوروبا ..

جانت تباوعلي بنظرات قويه اجهلها وماكدر افسرهه ..

وبيوم رجع زوجها لبغداد واجه وطلكها رسمي
هيه تخبلت بالزايد وصارت تذب سم وكلام يموت
بس اني احاول اتجنبها واسكت عنها .

وره ما طلكها اجه اخذ لينا وعبدالله وكال راح اوديهم لبيت جدهم يشوفوهم يقصد بيت اهله ، بس الي صار هو اخذهم لمكان مجهول بالنسبة النا وبعد ماعرفنه مصيرهم ابد هالشي خله رشا تتخبل بالزايد لدرجة صفاء ظل ميلحك على ابر المهدئات الي يجيبها الها لحتى يهديها الى ان اخذها اخوها بهاء يمه .

▪︎▪︎▪︎

عبير .. مرت الاشهر اني وقسور سمنه على عسل على كولتهم حياتنا تجنن عايشين مرتاحين ومتفاهمين
حبيته جنيت بي ومتتت عليه ..

الى ان اجت اوقات عصيبة مر بيها العراق وهي سقوط الموصل وهو بيومها جان يريد يلتحق ، هو يداوم بالرمادي والرمادي بوقتها جانت صامدة بس اني قلبي عليه وميتة خوف لايروح مني ..

ترجيته كعدت يم رجليه اباوعله والدموع بعيني
حباب قسور لاتروح الله يخليك ابقى يمي .

لزمني من شعري على كيف لململه كله ورفعه على شكل ذيل حصان بيد وحده والايد الثانية لازم حنكي .
حبيبتي شتكولين انت لج شنو اني جبان واتملص من واجبي لج اني رايح مو بس احميج احمي العراق كله لج عبير نسيتي لمن اخذج ابوج لسوريا ؟ شكد بجيتي على بغداد ؟ شكد توسلتي بخالي حتى ترجعين ؟

بس بس قسور مابيه حيل ماااابيه ..

كومني من الكاع وخلاني كلي بحضنه .. حضني حييل ويبوس بيه ، بس اني فقدت بيومها متتت بجي ضغطي هبط ووكعت ، وتخربطت عليه ، اهلي جانوا بكربلاء ، راح على امه اخذهه ويانه للمستشفى .

اجت الدكتورة قاست ضغطي وسوولي تحاليل كولشي مابيه بس الضغط مالتي مخربط .

ظلت عمه تشمر بالمسامير .
هه عبالي حامل والله والا انت منين يجيج الحمل اذا انفجارين تصوبتي بيهن يمكن عمرج كله ماتخلفين وابني يظل بلا خلفة ادري بي ذايب بيج وميقبل يبدلج .

سكتت عنها بالي يم قسور باجر يلتحق وشلوووون بيه اني!!!!

▪︎▪︎▪︎

مريم : جنت داانتظر النتائج ع احر من الجمر أريد طب حلمي هذا ولازم احققه أريد اكون بنت دكتور تحسين الدكتورة حلم حياتي هذا أريد افرح بابا وماما جانوا يتمنون عبير تصير دكتورة بس هي محققت حلمهم بسبب وضعها الصحي

وصار موعد النتائج جنت ميته خوف ، عبير بوقتها جانت يمنه لان لمن يلتحق قسور تجي عدنا ، نزلت جوا
والتفكير موتني وعبير تهدأ بيه ، وراح بابا طلعلي النتيجه واجه ضايج

من شفته متت خوف كال : ممقسوم وحده من بناتي تصير دكتورة

شافني اجيت ابجي ضحك كال :تعالي
رحتله حضني وباسني وعيونه دمعت همسلي : رفعتي رأسي دكتورة مريومه

من سمعت كمت اعيط اجت عبير حضنتني وماما كامت تبجي

طررت من الفرح ، بالليل رقم غريب دزلي رساله استغربت : مبروك يروحي سمعت صرتي دكتورة
بلكي تداويلي قلبي ..

عرفته هذا محمد ركعته ببلوك ونمت ..

عبير ... مرت الاشهر عصيبة عليه ، كلما يروح قسور للرمادي ويلتحق ، روحي تذوب واظل قلقة ليل نهار علما يجي اني مية مرة متخربطة وضغطي يهبط ..

وبيوم عيد ميلاد زواجنا هو جان ملتحق كوة احصله اخابره واحجي وياه وعدني يجي ونحتفل
كال بس هسه ما اكدر انزل الاوضاع موزينة ابد ..

بقيت انتظره عيد ميلاد زواجنا يصادف اليوم

خابرني كال راح اجي اوصل المغرب ان شاءالله وانقطع الاتصال شبكة ماكو كوة سمعته ..

ركضت لماما بشرتها كتلها ماما حيجي قسور ..
واني رايحة لبيتي ..
كالت اجي وياج ميصير تبقين وحدج ..

لالا ماما هو يوصل المغرب وضحكت نريد نحتفل بعيد ميلاد زواجنا ..

لزمتني من خدي داعبته بيدهه وتضحك ..

تمام براحتج امي ..

اخذت اغراضي ووصلتني ماما لبيتي ، وبالطريق اشتريت كيكة ونفاخ وتجهيزات لحتى احتفل ويه حبيبي كلش فرحانة بجيته
اله فوك الشهر مانازل مشتاقتله موووت ..

وصلتني ماما لبيتي وصتني اقفل الباب طمنتها كتلها المغرب يوصل لتخافين ..

ودعتني وراحت ..

انشغلت بالتحضيرات حضرت طاولة وشموع وترست البيت نفاخ .....

صار مغرب رحت صليت وقريت قرآن ، وكفت يم آية
(( ولا تحسبن الذين قتلوا في سبيل الله امواتا بل احياء عند ربهم يرزقون ))

من قريتها حسيت رجفة بكلبي ، وخنكه بانفاسي وغصة ..

تعوذت من الشيطان .. وكمت .. انتبهت تأخر قسور هوايه ..

ظليت رايحة راجعة ، اتصلت بي كومة ماحصلته ...

بعدها رن موبايلي قسوور ماصدكت رجفت ايدي حيوكع الموبايل مني لزمته وثبته بيدي جاوبته اجاني صوته متقطع .

سمعته كال عبير معجزة حصلتج ، بيني وبين الموت خطوات قليلة اني رايح للموت برجليه سامحيني ..

للحكاية بقية اخيرة .. 💔

"احصائيات الحرب مخطئة تماماً فكل رصاصة تقتل اثنين".....

البارت الاخير شوكت مايخلص انزله انطوني فرصة انطي حقه .. صبرتوا عليه هواي اتمنى تصبرون ع البارت الاخير .. تحياتي الكم جميعا 😞