رواية شيء من رصيف الدم الفصل الاول 1 - بقلم Leo Alfatlawi

شيء من رصيف الدم

البارت الاول

بقلمي leo Alfatlawi

علقوا بين الاسطر …

نسرق ساعات من الزمن ولانعلم انها من اعمارنا ؛

نهرب منها ونعود اليها فلا عقاربها تتوقف ولاسنين عمرنا تأخذ حقها؛

الجو بارد والدنيا بلشت  تظلم رفعت راسي للسما اباوع بيها مطرة قوية

اخذت نفس ولزمت ايد راية سحبتها حيل اريدها  تسرع بالمشي  اكثر  اعرف تأخرنا واعرف راح نتعاقب بدون رحمة بس مجان عدنا حل ثاني لازم نخلص بطالة البنزين ونرد بيدنا المبلغ كامل

عيني بالطريق امشي وندعي انلحگ ندخل للمنطقة قبل لاتعتم  وتتحول من  مكان بيع المنكر والتحرش الى مكان خاص بالوحوش

اشكد ما نحاول نسرع بس الطريق بعيد احس روحي بهتت ورجليه بلش الخدر بيها اتلفت  اباوع نص المسافة بعدنا مامخلصيها  والشارع بدأ يفرغ من غير صوت الجلاب الي صارت واضحة

من كثر الخوف كمت امشي بكل سرعتي واعثر بدون وعي وردد بصوت يرجف  ياربي رحمتك

وصلنا يم محط النفايات جان اكو تانكر مكسور  سحبت راية ايدها مني ودنگت على رجليها  تتنفس سريع  همست بعد مااگدر

-ماضل شي ونوصل اتحملي فدوه اغوحلج

-رئال كليتي دتموتني بعد ماتحمل

-جيبي العلاگه وستندي عليه

- تأخرنا  بعد ما يفيد هالحجي لاتضحكين على نفسج

- لالا بعدها ما مظلمة كلش بلكي انلحگ ولج ماما هسه نلگيها متخبلة علينه

-والله راح يلزمونا  ومحد راح يخلصنا منهم

-محد غاح يلزمنا بس استندي عليه و مشينا ابوس ايدج ماضل احد بالشاغع  استعجلي

ماردت باوعتلي بكسره ابتسمت اطمنها  اخذت العلاگه منها وكمشت ايدها  استندت عليه گوه تمشي من الالم

تباوعلي لبالها صدگ قوية وماخايفه  ماتدري الهم والخوف الي بكلبي يعادل عمر  ويه كل خطوة روحي  تنعصر من منظر الشوارع

صارت منطقتنا كدامنا وهنا كلبي بدأ يقل حتى النبض؛  مجرد شوفت المكان  وحده يسبب دمار للنفس مو الدخول بيها

وكفنا خليت الاغراض بالگاع عدلنا  اللثام على وجوهنا وحده كمشت ايد الثانية دنكت شلت الأغراض  سمينا بأسم الله اخذنا نفس  ودخلنا
نمشي بكل ماعدنا سرعة  خايفين يطلع واحد وكتها صدگ يكون امرنا انتهى

المكان شبه مهجور اكثر البيوت مهدمة متروسة نفايات ضالة بس للحيونات والمتسولين الماعدهم مكان

وقسم  تعبانه سكانها من للمشعوذين وتجار الاعضاء والممنوعات و الي يتبنون الاطفل الماعدهم  اهل  ويشغلوهم حسب اعمارهم

كمزنا صوت تكسير بطل بالكاع اندارينه لكينه شايب كاعد وبصفه  كومه بطالة فارغة يفر براسه مبين عايش بغير عالم صارت عينه بينا ضحك ضحكه قبضة گلبي

حسيت على رجفه  ايد رايه وهيه تعصر جفي غمضت عيوني سويت روحي مانتبهتله سحبتها  ومشيت عالكيف حتى لايحس خفنا وانهزمنه منه

جسمنا متبنج نتحرك  بدون شعور  ماكو بلسانه بس ياربي دخلنا بأمانتك

النفس خلص اريد اتبلعم مااگدر احس اذا سحبت الهوا راح يسمعنا عصرت روحي كوه احرك برجليه  موشارع صار شطوله الهوا خلص بريتي غمضت وشددت قبضتي على ايدها خايفه توگع حسيت برفتها  وبخنگه احتلت صدري عرفتها ماراح تتحمل اكثر

غمضت حيل و قويت مشيتي صار الفرع قريب بدون وعي  ركضنا دخلنا بي وكفنا كلمن ايدها على كلبها تشهگ النفس بعجز  مامصدگه

فركت صدري ونفخت براحه  باوعتلها ضحكت بتعب وهمست مبين اذا مانموت بأديهم نموت من الخوف

-غاح يجي يوم نطلع منا

-ادري نطلع بس لو بيع للغجر لو للكبر  لاتتأملين غيرهن

-غزوان وعدنا يطلعنا منا

-قبله وعدنا محمود تالي سكن التراب قبل حتى  لايدلينه طريق الامان

سكتت لان ادري صدگ هذا مصيرنا مدت ايدها باوعتلها والعبره لازمتني بينت الابتسامه بعيونها اشرتلي يله مسحت عيوني ولزمت ايدها

كلمنا طريقنا عيونه تتجول من بيت لبيت ؛
الي يطلع منه صوت طرب  والي اظلم حتى نفس مابي والي ضال بس هيكل

وصلنا بيت اليهودي الي يبعد عن بيتنا مسافة صغيرة

جان فصاله  غريب وسكانه  اغرب منه  محد يعرف عنهم شي؛  لو وين اختفوا على ساعة  دوم اصوات وريحه تخنگ  تطلع منه  خاصتاً تالي الليل وهذا الشي مسبب الرعب للمنطقة بكبرها وخال محد يتجرأ يوصل يمه

بعدنا عيونه عليه مثل كل يوم نباوع لرهبة هيئته وشكله المرعب ونسمع صوت ضحكت زلم جاي من بيتنا  باوعت الراية بيأس  همستلي مو كلتلج ماراح نلحگ

- شنسوي هسه  اكيد شغبوا

-خلينه نرجع نبات بسطيتنا والله الشارع ارحم منهم 

-حتى امج تموت لبالها انخطفنا امشي اني ادخل واذا انتبهوا  أشغلهم وانتي غكضي

-لاتتخبلين رئال  اذا لزموج يفصخوج هاي اذا مو ابوج هو الي بلش اول واحد بيج بدون لايحس

داارد وسكتني صوت الرجال وهو يغني بصوت عالي  اندارينا وانشوفه نفسه جاي ورانا ويا واحد لخ  بيده بطل منكر  شافنا اشر تعالوا

قبل لاتحجي لو تعترض جريت ايدها  مشيت حيل وكفت يم  الباب  سديت عيوني وكزيت على سنوني  سحبت الخيط  عالكيف انفتح دفعته بطرف اصابعي  لفحتني ريحه النكاسه والشرب بسرعة سديت خشمي

فتحت عيوني  اباوع لممر المدخل  هندس ماكو بس ضوه العاكس من شباج الاستقبال وخيال سعد بنيه يركص وصوت اسوالفهم والفشايره تكرهك بعيشتك اكثر مانت كارهه

درت وجهي للرياجيل قربوا ما ضلت مسافة قليله تفصلنا  رجعت باوعت لباب الاستقبال صح  موكلش مردود اذا دخلنا يشوفونه  بس صوت الزلم وهمه يصيحون تعالوووا خلاني بدون  تفكير  ادفع رايه جوه وادخل اسد الباب بسرعة باوعتلي فاتحه عيونها بكبرهم رفعت اصبعي  اشرت اشش

-الباب مفتوحه مانگدر نعبره

-غاح نگدغ بس صوتج لايسمعونه

-رئال لاتجربين حضج

-لاتخافين گولي ياالله ومشي على كيفج ماغاح يحسون

-لالا رئال ماراح نخلص روحنا والله

كمشت ايدها اخذت نفس  ضغطت عليها حيل اريدها تهدأ ماجان عندي غير حل سحبتها اتحركنا على اطرف أصابعنا

عينه بالباب نلهج بذكر الله وصلنا يمه واشوف دمعتها نزلت  غمضت عيوني كتمت  النفس

واسمع الباب تندگ حيل وصوت واحد يصيح طلعوووا 

ماشفت  غير الدرج صار كدامي جريتها وركضت بدون لاباوع وراي صعدنا بكل سرعتنا  للغرفة  وصلنا دكيتها بثنين اديه اجه صوت غيمة من داخل الغرفة صاحت  منوو

-فتحي ولج احنااااا بسااااع

-لاتصرخين ومرررض هسه افتحه

كالتها وسحبت الباب  دفعت رايه ودخلت وراها ركض جريت الباب بسرعة سلقيته ويه صعود اصواتهم من جوه  الي يصح منو دخل والي يتعارك يريد يفتهم شكو داگين الباب

انتجيت عالباب خليت ايدي على گلبي كالت غيمة شافوجن اكيد

-ماعغف ماعغف بس سمعونا وحنا ندگ الباب جيبي الميز خلي انسده بي اخاف يصعدولنا

- لاتخافين هسه الحيوان ابوج يمنعهم من الصعود لان يعرف هاي انتن رجعتن

فتحت اللثام اخذ نفس

-وين جنتن  عمتي اتخبلت عليجن وابوج جنزها هيه ورؤيا تجنيز 

انداريت واشوف ماما  كاعده لاحول ولاقوة لامه رجليها لحضنها  دموعها على خدودها وجهه مصلوخ ورؤيا مربوطه بالشباج شعرها منثور  زرگ من الضرب 

شمرت الاغراض ركضنا رايه لماما واني لرؤيا دنگت كمشت اديها داافتحهن صرخت بألم تركتها اباوعلها مغمضه ضاغطه على سنونها  تحاول تكتم الوجع
رجعت دنكت لزمت الحبل على كيفي افتحه  وعيوني عليها خايفه اوجعها لان الحبل داخل باللحم ؛

دموعي حاجب النظر امسحهن بظهر بمتني ويرجعن ينزلن وايدها بين اديه ترجف ماعرف اشلون افتحها كد ماضابهن

سحبته حيل واسمع شهگتها طلعت من كلبها احسها خذت روحي اعرف بجيتها مو من الالم لا من عجزها ماتعرف تحمي نفسها لان ضريره

شمرت الحبل وكعدت يمها ردت اخذ راسها لحضني دفعتني مسحت عيونها ولمت رجليها لحضنها انتجت تسحب النفس بحرگه همست بحقد والله راح اخلي يتمنى الموت وكلام الله راح اخلي يتمنى ماخلفنه اله ادفنه وهو عدل

-لويش كتلج كم مغه اگلج لاتوصلين يمه لاتلاسني ماتعغفي حيوان يكتلج بلا غحمه

- اذا ما جردته من رجولته وعذبته عذاب اليهود ماطلع بنت اليهوديه الي ينحلف بشرفها

-شنو سوالج ؟؟

غيمة - كلشي ماسوالها اجه يصيح على عمتي بسببجن لان تأخرتن حضرتها كامت عاطت بوجهه اتكله انت الي مطلعهن للشغل روح شوف وين شمرتهن بلكي تنهز رجولتج شوية وانت تشوف اشلون يركضن بين الشباب حتى يجيبن فلوس لقذارتك

-وانتي اشبيج  ماعغفتي تسدين الباب عليها لحد مايهدأ يعني تشوفي معصب اشلون خليتي يدخل يمها لو موتها

-حمدي ربج بس كتلها راد يسحلها يشمرها بالسرداب ويه الحيايه لو ماامج تسحل روحها وتبوس رجلي وهم رد طلع حرگته بيها لان مربيتج سكط

-شلون حس  احنا ماموجودات هو مايگعد اله بعد الاذان من يجون جماعته

-كله من امج اتخبلت علينه تگول دازه ملائكة للشغل  مو يهوديات كاتلهن الوسخ ماارتاحت لمن كعدته من النوم وسودنته علينه وحتى هاي اختج الصغيره انجلبت كل دقيقة وفاكه حلكها تبجي جوعانه تره مملتوني شذنبي اتحمل عيشتكم وفگركم

-واحنا ماغاصبين عليج اخذي اخوج وطلعوا شوفولكم مكان زين عيشوا بي احنا هاي عيشتنا ابونا مابي خير ومنطقتنا خاصه بالمجرمين والمجاديه الي محد يتقبلهم مثلنا

-اني اعرف لويش هيج غزوان  مجلب بيجن وراضي بالذل والتعب كل ماحجيت ويا وصاح لو اعرف اموت ولااتركهن وحدهن تگول من بقية اهلي بس اااخ كله من عمتي هيه الي مسممه راسه وخالته هيج متسودن عليجن ولو المفروض اعرف حظنا اعوج من ساعة الماتوا اهلي وشمرنا بفكركم القذر 

اخذت نفس وانداريت لرؤيا الي على صفنتها حتى ماتسمعنا شنو نحجي حسيتها  بغير عالم عرفته راجع يحاول يتحارش بيها بس ماتحجي تخاف على ماما تعرفها راح تنتحر لان وكتها تتأكده هيه عاجزه حتى عن حمايتنا من حيونته

صفنت وين اروح والمن اشكي  اهله كلهم نفس وسخه واذا هو من يصحى يحس اكو رابط دم بينه اخوته حتى هالشي فاقدي اول شي يفكرون بلحمنا  هاي اذا ماباعونا للغجر حالهم حال اكثر العالم العايشين بهاي المنطقة

كمت رحت يم ماما كعدت وخرت رايه عن حضنها وسحبتني مكانها خليت راسي بحضنها وشهكت بيأس على وضعنا باست راسي وگالت لاتبجين يبعد امج

-لويش تخلي يدخل اشگد دنوصيج من نطلع قفلوا الباب بالاخص من يبلش بالسم 

-والله جان بعد ماشارب و خفت عليجن گلبي وجعني الدنيا ظلمت وانتن ماكو دزيت غيمة كلتلها بس كليله خلي طلع وراجن يشوفجن وين صرتن

-يعني وين نولي ياماما مودتشوفينا نطلع حالنا حال المجاديه ملثمين ونخلصها بين السياغات نتوسل لحد ما نحصل كم فلس نسد حلگه بيهن

-ولج والله كلبي ماينطيني كلما اسمع صوت نكس بالشارع  لو اسمع خبر وحده روحي تشوغ عليجن وانتن تأخرتن ماعرفت شسوي

-كلشي ماتسوين ماما بس تقفلين الباب عليج ماعلينه تدغين بينا ممنوع نوصل للبيت اذا فلوسنا بيهن نقص والله خوف الشاغع اهون بهواي من الصونده الي يصلخنه بيها

- تهون يبعد امج تكبرن وتتزوجن وترتاحن بس صبرن

-لحدمن ماما والله ملينه نص حياتنا تخلص من ندخل  للمنطقة ونص الثاني واحنا گاعدين للصبح اخاف يدخلون علينه جماعته هاي من غيغ امنيتنا ناكل خبزه بشبع

-ربي كاتب نعيش هيج لازم نحمده اكو اتعس من حالتنا اقلها اكو سكف يلمنا ولكمه ناكلها تالي الليل حتى لو قليله وحضن دافي وانتن تنجمعن سوه واذا على ابوج يجي يوم وربي يهدي عليجن ويخلي يبطل هالسم الدياخذه  وبعدين لويش هيج تبجن تره ماضربنا حيل

رايه:-  اشلون موحيل وجهج ازرگ  ورؤيا ماضال شي صاحي بيها معقوله هاي كلها بس لان كلتيله اطلع دورهن

-اي والله يا ماما وروح اخوي حتى مافتحت حلگي وحجيت  غير كلمتين بس هو ماعرف لويش تخبل

رؤيا :-  لا ماتخبل  هاي بت اخوج النكسه الي خالتها بينه وتنطيها لگمتج هيه الي تزن براسه من الصبح  تحيل بي حتى يكتلج كل شوية وكالتله روح شوف اشكد لامات افلوس من وراك   لالبالك  صدگ يطلعن للشغل تره امهن ادزهن يتنقلن من حضن لحضن  وبايعاتها كدامك شريفات

غيمة :- انجبي لا انزل هسه اصيحه واخلي ياخذله بعد كم صونده بيج ولبالجن مااشوفجن من تجيبن افلوس وتنطن لامجن تضم وخالات اخوي يكرب من صبح لليل وينطي لابوج  واني بحسرت الثوب

-ولخاطر هالشي نايمه جوه رجلي تحيلي اربعة وعشرين ساعة لبالج هيج راح تكدرين تخلي يبيعنا وانتي تاخذين راحتج تره لالبالج هذا البيت بي حظ وتفكرين بي ولالبالج يسمعلج لوجه الله مثل ماخالج هنا مايطلعج للشغل يعرف بتفكيرج نكس ومفكرلج بشغله يخلي بيها الحيوان انظف منج

- مايطلعني للشغل لان يعرف امج اسگطت  محد يكومها ويكعدها وانتي اسگط منها منو يداريجن وماكو نكسه وحيوانه غيرج اقلها كل يوم جايني خطابه شكل ويضلون بالساعات يتوسلون حتى ارضه مو مشمورة فوگ محد مگلبني فوگ ماعمية يخافون يتقربون لان يعرفون مجلوبة

-قصدج مشتري مو خطابة لوما متأكدين رخيصة وقابلة تبيعين نفسج  مايباوعولج بس يدرون بيج مستعده حتى دخلين بالحرام لخاطر كم دينار وسخ مثلج

استوها ترد وعاطت ماما كافييي صدگ انتن ماتستحن ولجن انتن خوات بدل ماتوكفن وحده بظهر الثانية هيج تتعايرن  اني اشلون ربيتجن وانتي رؤياااا هاي اخر مرة توكفين بوجه ابوج وتجاوبي  ييمه  اني سكطت بعد ماكدر ادافع عنج تالي يوجع كلبي بيج اكثر ماهو موجوع

- ولاتخافين ماضل شي حتى يوجعج بي هو نظري وخذه خلاني حالي حال اي غرض تعبان بالبيت منتظره اشوكت يجي شراي يشمروني  عليه

-محد يشمرج  والي براسج شيلي لبالج ماعرف بيمن تفكرين  ولويش دتنزلين جوه بس وداعت خواتج يا رؤيا اذا سويتها  اغضب عليج وماشوفج ليوم الدين

-ههه الاعمى ماتهمه العتمة خلي يصير الي براسي  وسهل غضبج اووو لا  اصلا مايهمني مغمضة مفتحة اني ماشايفتج

-ولج والله مايرحمج يموتج تعذيب هذا كافر ماعنده مخافة الله ولج ماعندي غيرجن ضاله اشم الهوا بيجن لويش تموتيني وراج

-هيه موته موته ان جان هسه لو بعد دهر خلينه نموت مرتاحين  بشرفنا افضل من الذل والعيشة المره الدنعيشها

-ماينطيني كلبي ادعي عليج بت روحي انتي واعز وحده بخواتج روحي يمه  الله يهديج  وانتي رئال كافي يبعد امج لاتبجين مابيه شي

شلت راسي ابتسمت وعيونها مليانه دموع

-لادتتوجعين وشبعانه اهاين وظلم وصابغه بسببنا تغه  دنشوف كبغنا ماما لويش حاسبتنا بعدنا جهال  اسكتينا  بضحكة

-تخلص ما تضل ما وراء الصبر اله الفرج واهم شي العافية

رايه - يافرج اشلون صاير هذا هااا واشوكت ناوي يجي وياعافيه دتحجين عنها تدرين وين چنه  لو لويششش تأخرنا جنه نركض وره السيارات الي تمسح جام والي تبيع بنزين  لويشش هاا بس حتى نحصل كم دينار زيادة لخاطر نشلع هالجبس من رجلج الي صارله اشهر ماكدرنه نلم فلوسه  لو رؤيا الي راح نظرها بسبب الفگر ماعالجناها  شنو ضل منو عدنا رند شوفيهااا ضالة عظم وجلد من الجوع حتى كومه ماتگدر تكوم على ساعة تسكت

-استغفري ربج يا امي

-استغفر الله ربي بس ماما ملينه تعبنا ما ضلت طاقه حتى نصبر والله امشي واتلفت خايفه اشتغل خرساوي بس حتى لا يعرفون اني بنيه وهذا جسمنا كد مانربط بي ونضيع معالم الانوثه للصبح منكدر نام من الالم

-لاتموتين كلبي شواكع بيدي وماسويته كلما تكبرن تزيد حيرتي بيجن  لا اكدر احميجن ولاكلبي ينطيني  اكتلجن واريحجن من هالدنيا

رؤيا -  ولويشش تكتلينه خو كتلييي اولا انتي عمرج ماراح تصيرين  ام  وقدوة النه  اني اعرف اشلون اسودنه اذا ماخليته ينتحر مااطلع بنت اليهوديه

-صح استاهل هالكلمة اني مو ام ولا عمري راح اصير قدوتجن شيلي ايدج خلي ربي يستعجل بروحي حتى تعيشين براحتج

كمشت ايدها بستها
-من عمغي على عمغج ما نسوى شي من دونج  الدنيا المابيها انتي منغيدها وهاي اخغ  مغه نتأخغ بس والله غصبا عنه ومالبالي يجون من وكت

-من العصر اجوي  محتفلين بزواجه الميخاف ربه ياخذ تعبجن ويصرفه على حيونته وغريزته

-عزه هم اتزوج؟؟

-هالمره بنيه صغيره خبصت الامه بالعياط ماعرف من يامله جايبيها احتاريت شسوي كاعده واندعي مثل المخبله ربي يهدي ويردها لاهلها

- عزا اخاف خاطفها

- لا العصر جانت رند تلعب جوة واجت تركض  كالت اجه رجال ويا بنية صغيرة هيه تبجي وابوها يبسطها وانطاها لبابا واخذ افلوس منه

-واكيد عقدها عقد لسان مثل القبلها كم يوم ويشمغها على اهلها الي باعوها علمود كم فلس لاحول الله اشوكت الله يتوب علينه  من هالعيشة اخذتي علاجج

-ها لامابيه شي بعد ماعتازه

-خلص مو لويش ماكلتيلنه من طلعنا

-مو وصيت غزوان من البارحة اشو هذا هم اتاخر اليوم

-الله يساعده هم ابتلى بينه فوگ ضيم موتت اهله متحمل حيونة ابونا ومصغفنا

-صح ابن اخوي بس اني ربيته بأيدي  واعرف معزتي عنده  من معزة  امه و لاتستعملين الكلمات البيهن راء هواي حتى نفتهم شنو دتحجين

-مامااااا

-ههههه يروح امج شوفت ضحكتجن تشيل شكو مرض وهم  بگلبي تعالي يمي ماشبعت منج

ضحكت ورجعت راسي بحضنها احس  التعب كله ينزال  بشمة عطرها اجت رند تركض دفعتني وگعدت مكاني  ضايجة باوعت لماما وگالت تره اني نعسانه

ماما -اووف يمه الغيرة

-مااغار ماما  وجوعانة يله اريد اكل مو كلتي من يجن يجيبن خبز شو ماكو

باوعتلي ماما اشرت جبتي

-اي ماما جبنه بس ماحصلنه غير اربع خبزات بس جبنه نص كيلو طماطة

-الحمدالله نعمة كومي رايه ماما سوي لخواتج عشه

اباوع لرايه تعصر بكليتها وتباوعلنه بتعب كلتلها لااني اكوم وهم احميلج مي دتسبحين حتى  تغتاحين

-لاتلحين ماكو شي يوجعني ياامي بس تعبت من الكعده  هسه انام يروح التعب كومي يبعد امج وانتي رند روحي يم رؤيا لاتضلين تطفرين تالي يسمعون صوتج

رند -: لامااحجي  بابا يسمعني تالي يضربني مثل هاي البنيه

- لايحبيتي مايضربج  هاي  سوت وكاحة عاقبها ابوها وكم مرة كلتلج لاتباوعين عليهم اذا شافج بابا مره لخ يعاقبج

رايه-: رئال كومي سوي عشه وطفي الضوه تأخر الوقت هسه يثگلون بالشرب وانتي ام رايه يله حبيبتي كومي داغيرلج حتى تتعشين وتنامين مرتاحة

جريت رند بوست خدودها ودفعتها على رؤيا الي تتلمس حتى توصل لفراشها  اشكد تريد تبين هادئه ومامهتمة  بس اعرف داخلها يغلي منتظرة اي فرصة  ترد حق ثمن نظرها ظلمها من ابونا

كمت تركت رايه تساعد ماما تغير ملابسها وحده تكتم عن الثانية وجعها  وغيمة متمدده تبرد بأضافيرها تباوعلهن صفح

شلت البنزين خليته على كتر غطيته بقمصلة قديمة حتى لاتلعب بي  رنود

اخذت علاگه الطماطة  رحت للمطبخ هو مو مطبخ حمام قديم واحنا فرغنا وخلينه جولة وكم شغلة حتى لا ننزل  جوه

شغلت الفانوس  رحت طفيت ضوه الغرفه وتأكدت الباب مقفولة رجعت للمطبخ جريت التخته وكعدت شلت الصندوگ طلعت بتيته ضامتها لان ادري غيمة تسويها وتاكلها بالبسكوت بدون فهم وتخلي الباقي جوعانين

استوني بلشت اكشر  اجت رايه كعدت تغسل اديها كالت حمصي الطماطة

همست صوتج وادغي  غزوان يحبها محمصة مايعتاز تگولين واشلونها  كليتج بعدها توجعج

-لاراح الالم لان باردة صلت عليه شوية  شتكولين لشوكت احنا نضل هيج عايشين بالظلمة والهمس

-تعودنا صار سنين هاي حالتنا شنو الجديد 

-الجديده كبرنا وابوج كام يباوعلنه بغير نظرة بالاخص من كام يجيب كل يوم وحده شكل صار يعتاز افلوس اكثر لخاطر سهراته

-شنسوي قابل وين انغوح من اشوف البنات نايمة  بالشارع ومتحملات اذية العالم احمد الله  على عيشتي گومي غوحي يم الصوبة لاتصل گليتج  وعلاجن باجغ اجيبه  لواعغف اجدي

-هيه بس هاي ماسويناها  ولج رئال خايفه شافونا من دخلنا اخاف يخلون بابا يثگل بالشرب ويعصدولنه يسولنا شي

-ابوج يلعب ويه الشياطين امني  ما يسويها   مو غبي وهيج يضيعنا  ضامنه للغوس الكباغ اذا مو افلوس كد وزنا ماينطينا

-واحنا نضل ننتظر اشوكت يجي واحد يشترينا هاي اذا مادفع فلوس وخذنا شغلنا حالنا حال باقي بنات البتاوين

- شنو البيدنا  ذا اشتكينه غاح يصدكونه  وهو نص المغكز من جماعته وكولي اكو واحد شغيف بيهم منيلنا هويات وبالاخص  من يعغفون احنا  من البتاوين اول شي يفكغون بي لحمنا هاي اذا ماابوج انطه وحده منه مقابل طلعته مناك

سكتت كامت طلعت جرت الصوبه طلعت حركتها بيها تحاول تشغلها وهيه مجمره ادري كل قهرها على غزوان تخاف يمل من تصرفات بابا ويتركنا واحنا ضالين بطرگه

خلصت بديت اگلي وعيني تتجول بسگف الغرفة الي شايلي بجذع شجره  خايفه يوگع على ساعة هلكد ماتعبان من غير الحياطين الي ضالة بس طابوگ مفلش يخوف شكله كد ماقديم

اباوع لرؤيا  تسولف بهمس ويه رند رغم الله اخذ نظرها بس عوضها بجمال ما يتوصف فتحة عيونها ولونهن الي يشوفها مايصدگ ماتشوف صح خواتي مامعوزات كلمن تمتلك جمالها الخاص وسالفة ماما  ربي انطاجن جمال بني اسرائيل بس رؤيا  احلى وحده بينه ماخذه لون عيون غزوان وجمال ماما  وهاي اكثر وحده خايفه عليها ماما  لان متسرعة وماتعرف الخوف شنو

عكس رايه ماخذه دور امنا بحنانها دوم تنطي من روحها لخاطرنا حتى اللگمة ماتخليها بحلگها اذا ماتشوفنا شبعنا

كملت العشه كمت شلت الصينيه طلعت لكيت الصوبة يم ماما  والبنات كاعدات كدامها مجمرة
مابيها دفو داخلات جوه البطانية بحضن امي  الي ضحكتها مدفيتهن تسولف وياهن تحاول تنسيهن العوز العايشات بي

خليت الاكل يمهن ورحت اسد فتحت الباب من جوه طافره ماكلها الزنجار دااخلي فروه قديمة  واسمع واحد يغني ديصعد  انتبه لاديه من جوه كال منو الكمر هنا

خليت ايدي على كلبي  من الهبطة  باوعتلهن دگ الباب كال فتحي يحلوة

همست ماما اشش ونصت الفانوس عالاخر

رد دفر الباب وصاح جاسسم  الكلببب ضام الساقطة بس الك فتحي الباااااب لج

وكفت متصنمة مااعرف شسوي ماما لمت خواتي بحضنها وعينها بالباب خايفة ينكسر وهو على صوته يصيح فتحي  رفعت راسي للسما مغمضة همست يارب دخيلك

كمزتني صوت دفره من قوتها فلعت الباب من فوگ وصوت صرخته وهو يصيح  تعالوااا ولكم هاي هنااا

؛باوعت ماما  همست وين نغوح  غاح يشلع الباب

ماما-:  كومي رايه  اخذي خواتج  ودخلي للمطبخ بسرعه سلقنه عليجن

رايه -:وانتي لاتگولين اضل هنا بابا  ميحس مثكل بالشرب راح يأذوج

هيه تحجي والضربة اجت بالباب خلعته من الجهه الثانية بعد اريد اتحرك ماگدر  اباوع لماما حضنتهن حيل ورايه اجت تركض كعدت ورا الباب سدته بظهرها واشرت روحي اخذيهن وانظمي

من الهبطه لزمت الحايط شفايفي يبسن ماعرف حتى اندعي استوها تدفعني رايه  واجه صوت بابا من جوه يصيح لك هاي اليهوديه المعفنه  هناااك  تعال  اجن الفختايات بسس دير ب اا الك لااا تهد.ن ك هههههه

حچي منتظم بگد ماشارب اخذت نفس  واني اسمعه يضحك وخطواته تبتعد دقايق واختفى صوتهم رد نزل

خليت ايدي عالحايط ردت اتحرك ماگدرت كامت رايه سندتني اخذتني يم ماما كعدت مهدود حيلي اخذتني لحضنها وبجت بصوت

همست خلصت ماما  غاح واحنا مابينه شي لاتبجين

-لو لاح شوية جان خذوجن من حضني

رايه -:امني والله مستعده اذبحهن كلهن  بيدي  مااسملهم وحده منهن  

- رايه يمه اخاف اموت خواتج امانه بيدج انتي امهن اشما طگجن العوز وابوجن غصبجن على المنكر لاترحن بطريق الحرام

رايه -: اسم الله عليج ماما وبعدين انتي شايله نفس وهو شايل نفس والنفس بيد الله ان شاء الله يومه قبل يومج

- ياامي هذا مايخاف الله ناقص غيره  منتظر الغجر يدفعون بيجن مبلغ زين حتى يبيعجن  مثل صاحبه ويستفاد من اجرجن

- غزوان مايخلي

- سوده عليه هو وينه غزوان اشو يشتغل شفتين بس حتى يسدد دين هالحيوان يخاف يكول كثر ديني وخليني ازوج وحده منهن والله مااعرف شگول لاخويه يوم القيامة من يسألني عن امانته

غيمه -: كليله اخذت جهالك وبدل مااراعيهم بنتك خليتها تخدم جوه رجليه وابنك يخدم جوه رجلين رجلي وخالتهم بحسره  الاكل

-والله خالتكم بگلبي شنو بديه وقصرته عليكم  تعرفين قصتنا شنو وتعرفين ماعدنا سند غير سبحانه وتعالى وهاي كدامج ماعندي غير اندعي يحفظلي  غزوان ويعوضني بي  مكان الصارلنا

رايه -:تفرج ماما مسحي دموعج رند تباوعلج خايفه واذا على غزوان  مو طفل دخل السن القانوني  يعرف شنو يتصرف وشاب ماعليه يتحمل

ماما -:شيتحمل وهو كوه يجر النفس وهذا واگعله ضرب واهاين حتى اكله يسند طويله مامحصل  ربي من عمري على عمره اخذ وخلي ماعدنا غيره احمي وخلي سند لبناتي

اتحسرت ماعرف المن اباوع لو الشنو اندعي عيشتنا عباره عن ظلام  وفريسه سهله بين الوحوش

بست ايدها وصعدت ضوه الفانوس لان سمعتهم ردو للشغلهم وصوت الغنى والضحك 

كعدت ماما رغم التعب والمرض بس ماأثر على جمالها اليشوفها ميكول بنهايه الثلاثين حسباله بعمرنا وهذا الشي الي مخبل بابا لان رافضته ودائما نسمعه يردد بأسم واحد بالاخص من يشرب لو يشوف المداليه بركبتها ينجن يبلش كتل بينه بدون رحمه

اخذت نفس اباوع لايدها  ترجف ما تسيطر بس لازم تسوي لفات توزعلنا وتباوع لحلكنا تكول بعدنا جهال مو اقل وحده بينا عمرها راح يعبر الاربع سنوات ؛ اكلت وضحكت ضربتني على راسي كالت على شنو تضحكين ام لدغه

-ههههه تغه غايه  تدخلت السن القانوني واحنا بالتسلسل بعدها اشوكت تقتنعين كبغنا

- مبين من هاي كفشتج ماتلميها اذا ما اني امشطه

-بسببج  انتي واگعتلنا حنه واعشاب خالته يصيغ اطول منه غحمينا والله دافكغ اگصه

-حتى اكص راسج يالفاهيه حلاوه البت بشعرها وذكريني هالجمعة من اودي رايه   للمستشفى  اجيب قرنفل خلص عدنا بين مالم افلوس الحنه

رؤيا -:  اويلي ام رايه هيه الف عندج  اشوكاحتج والله لو يدري الحيوان هذا التخلي بروسنا حنه موطين جان زينه كرعات بس بيج بخت قاطع حاسة الشم بسبب اعماله القذرة

- مثل ماراح يگطع لسانج المامستفاده منه بس الوكاحه  اگلي وجهج اصفر صاير

ردت تسوي لفات كوه كل شوية واكعه منها البتيته وتشيلها  اديها متاذايه من الضرب بس اهم شي توكلنا واحنا فرحانات كل همنا يروح من نگعد يمها ونسمع سوالفها الحلوه تحاول بأي وسيلة تحنن كلوبنا وحده عالثانية خايفه يجي وقت  ونفترق ووحده تنسى الثانيه تكول كلبها حاسها

خلصنا الاكل شلت الصنيه ورايه خلت فراشها  نيمتها وكعدت تسويلها كمادات على مكان الضرب بلكي يخف الالم عليها

رحت غسلت المواعين ورتبت المطبخ اشلون مجان خليت البنزين بي وسلقيته من فوك اخاف رند تغافلنا وتروحله

طلعت الكل نايم و اريه تفتر ادنگ  على وحده بيهمن تبوسها وتغطيها  عالكيف  وصلت لغيمة  لبالي راح تتركها لان دوم تنكتل بسببها وتأذيها بالكلام بس ابتسمت من شفتها عدلت غطاها وهم دنگت باستها من راسها

راحت لفراشها جريت الصوبة خليتها على صفحة وكعدت يمها طلعت دفتر مذكراتي وكتابي المفضل

كتبت احداث اليوم المرينا بيها عالسريع خليته على صفحة وفتحت الكتاب وبلشت اقرا بالقصة واخطط جو الكلمات التاخذني لغير عالم  تعده الوقت اني مستمره اشكد ما أقرا احس بشي يشدني اكثر  بالاخص من اوصل لاحداث القرين وحياة الثانية

دنكت شفت الاسوارة  بيدي يلمع كمشته وغمضت اتخيل بعدنا بيت خالي عايشين   اندكت الباب ركضت فتحتها دخل محمود بملابسه العسكرية گرص خدي وگال اشوكت تكبرين مو شليتي حالي

اجاه صوت خالي  گله خلي يكبر عقلك بالاول

-بابا منا وجاي تضربلي تحية

-من تبطل تتوسل بطفلة وهيه تسحل بيك  ذاك الوكت تعال اطلب اضربلك تحية

-لعد ماترحمني وتنطينياها

-ولي لك اذا ماشوف متنك متروس نجوم لاتحلم تاخذها 

فززني صوت دكت الباب كمت وصلت يمها وكفت اتسنط اخاف واحد من جماعة بابا ردت اندكت وصوت غزوان يكول اني فتحوا

فتحته اباوعله تعبان ملابسه وشعره  متروسات تراب من الشغل همست  ليش تعطلت

- جان عندي شفت ثاني ماكدرت ارجع

-وماغاح تسويها  لمن تموت بغد (برد) وتعب صدگ تحجي

- فداجن التعب وصاحبه اهم شي انتن بخير
تركي التأخير ميت جوع عدنا اكل لولااا يعني عادي اذا ماكو ماضل شي للصبح

-اصدگ غايه تاكل وتخيلك جوعان 

ابتسم  دنگ خجلان عدل نظارته

-ادخل اكعد يم الصوبة  والاكل هياته بگدغ الخبز

-بروح محمود حميلي مي رجليه جامد الدم بيهن

اشرت على عيوني دخلنا هو راح يم الصوبة واني دنگت شلت البطانيه لفيت روحي زين رحت يم الباب   مديت راسي كال ماكو البيت فارغ طلعوا

اباوع صدگ ماكو احد ظلمة هندس بس ضوه الگمر عاكس لان مكانه مكشوف بدون سگف

بيتنا خمسين متر عبارة عن طبقين الفوگ غرفة احنا بيها وهذا معزول تماما والجوه غرفة لبابا  واستقبال يمه ممر ضيگ يودي للشارع  ومطبخ محطم وصحيات تعبان ومخزن صغير كلش بيتنا تعبان   مثل باقي بيوت المنطقة

نزلت ركض للحمام ترست گدر شغلت الجولة خليت المي وعيني بره اخاف يطلع ابوي  وادري بي ياخذ اشياء تخلي فاقد

حمه المي شلته  صعدت ورجعت  للغرفة دخلت لكيت غزوان لام روحه ونايم بالكاع كامش اللفه بيده ومغمض

خليت المي بالكاع سديت الباب  رحت يمه دنكت  همست غزوان

ماكو بس صوت ونته

رديت حركته فتح عيونه بتعب وسدهن

-كوم غسل حتى تاكل

-مم

-تسمعني غزوان

-مم

كسر كلبي نايم فاتح حلكه من التعب سحبت نظارته وخرتها  وجريت اللفة من ايده اباوع لايده صايره زرگه كلها شخوط مدماية من شيل الطابوگ

غطيته  اخذت كتابي ضميته ورجعت لفراشي صارت رايه كدامي دموعها نازلة  تمددت خليت راسي على نفس المخدة  حضنت ايدها همست ليش الحلوه تبجي

-بسببي كل الديصير بي خايفة يجي يوم ويمل ويتركني

-لوجان ناوي يسويها ماضل لحد الان وتحمل كل هالمذله   والتعب ولج يحبج يالثوله مايصدگ اشوكت يصيغ عمغج ١٨ حتى ياخذج غصباً على بابا

-شنو جانت حياتنا لومجان صاير الحادث

- جان اني هسه زوجة الضابط محمود وانتي  متزوجه غزوان غؤيا بعدها تشوف وياهو الي يوصل يمها تعضه  وغند  دتلعب بحديقة خالي  مكان هاي حبستها

-مجان دخلنا هالمنطقة ولاعرفنا شنو العوز  والخوف

اخذت حسره وغمضت حضنت ايدي خلت راسها على متني نمنا

ماكعدنه الا على صرخة كمزتنا كلنا طلعنا نركض صارت بوجهنا غيمة استوها صاعده جرها  غزوان كاللها وين جنتي

-ها جنت دانزل جوه ردت مي عطشانه بس سمعت عمي ديضرب زوجته خفت بطلت

-ليش ماگعدتيني اذا تردين تتسممين كم مره نبهتج ماتنزلين وحدج

- كلها نايمه وماكو احد وبعدين ليش محسسني صغيره وماافتهم تره اني اكبر منك مالك حق هيج لازمني واكف تحاسبني

-انعل ابو عمرج لا بو تربيتج اذا شفتج نازله وحدج مره ثانيه اطيح حضج اربطج واشمرج بالمطبخ حتى الضوه ماخليج تشوفي هذا اخر انذار سمعتييي

اشرت اي

-يله صعدددي

كالها ودفعها صعدت گالبه خلقتها مرت من يمنه باوعتلنا بكره راد تذب حجي بس صوت صرخه البنيه سكتها عضت شفتها وكملت طريقها ماعرف ليش حسيت  الها ايد بالمصيبة

وكفنا عالدرج منتظرين اشوكت ينهد حيله ويتركها كل صوت صرخه ياخذ الكلب  وهو  مثل الحيوان يضرب بلا فهم

باوعت لغزوان بترجي لان احس صوت بجيها وتوسلها يعصر كلبي اخذ نفس واستغفر نزل راح دگ الباب وگال عمي كول يالله

مارد او يمكن ماسمع لان مستمر  يضرب وهيه تبجي بصوت عالي 

رد دگ الباب حيل وصااح يمعود راح تمووت افتح البااااب

انفتح الباب رجع غزوان بسرعة ليورا  طلع بابا بيده صونده صاگ على سنونه فاتح عيونه على كبرهن تكول وحش  اشر شكوو

-اترك البنيه تره صوتها بالشارع راح تفزع العالم واذا ماتت شيخلصك من ابوها

-انعل ابوها لابو عشيرته اني اريد كلب ابن كلب يجي حتى انعل ابو ابو بكبررره

-ميخالف بس اهدأ كلشي ينحل لاتضربها ماتريدها ردها لاهلها

-انت منوووو واكف تلغييي اذبحها اسكطها نص كلمة ماتحجي حتى لااخليك بصفها وادوس حلگك ابن الكلببب ادگ الباب شنووووو

هو يحجي وطلعت البنيه وكعت على رجلي تبوس وتكول مروتك اخر مره دخيلك والله بعد مااسويها توبه

دنگ شالها من شعرها شمرها داخل الغرفة تفل بوجهه واندار كال انتوا  تعالوا

دخل للغرفة واحنا  واحد باوع للثاني رد صاح وينكممممم

نزلنا ركض للغرفة دخل غزوان كدامنا وحنا ورا لكينا  كاعد يم الجرباية شكله مكروه وقذر بطرگ البجامة وكرشه كدامه وريحة العفونة طالعة من الغرفة

اباوع للبنيه  الجديده صغيره تطلع بعمري لامه روحها ودموعها على خدودها عيونها دم وجهه وشعرها صايرات مجزره من الكتل  فززني وهو يكول وين الفلوس

غزوان-:  ذني عمي  بس مال شفت لان ضاگ النفس عليه وماكدرت اكمل

رايه-: وذني فلوسنا كاملات بس ماعدنا بنزين بعد بس كم واحد ميكفن لليوم

بابا -:واليهوديه اشوكت ترجع للشغل

-بابا حتى كرسي متحرك  ماعدها اشلون تشتغل

اشر اي وسحب الصونده اول واحده اجت  بغزوان

ردت اشرد بس مالحكت واني احس الصونده لسعة رجليه شهكت سحبني غزوان خلاني ورا وجر رايه خلاها بصفي فتح اديه يحمينا كله شمسويااات ليششش  تكتلهن

- هالمره بس ضربتهن عالكيف لان رديت اكو نقص بفلوسك  مرة ثانية اعلكهن الك بالسكف واصلخ لحمهن وافلوس بنزين ماكو اليوم تاخذهن تخليهن يجدن

-ميخالف

-وانتن اذا ماكاملات الفلوس لاتردن وروح ابوي  اربطجن وانطيجن لانكس واحد من جماعتي حتى تعرفن ربجن منو وتترحمن عالعيشه عندي

-هاي هيه عمي بليل كاملات يمك

-بنات الزنا رؤيا ورند تاخذهن وياك شوفلهن شغلة مااضل علف بحلكهن

-ششغلهن عمي  وهنه وحدة عاجزة والثانية طفلة متجاوز الاربع سنوات 

-يجدن

-  شنو يجدن  ورؤيا عمية ورند طفلة حتى الطريق ماتندله  صدگ دتحجي هنه يرحن ويه عمتي للمستشفى الف يارب يالله  يردن سالمات  مو انوب يشتغلن  احنه نسد مكانهن

بابا- لاتعلي صوتك ابن النكسس

- عمي بدل مايجيبن افلوس ذني ينخطفن وانوب نضل ندور  اشكد يردن يطلعن اجيبلك مكانهن

-دبر اجرتك يالخنيث وانت نص روح انوب يشتغل مكانهن  وانت منو وتوكف بوجهي كلك ابن يهودي  لميتك من الشارع نص كلمة اردك  انت واختك لنفس الزبالة الجبتكم منها

اباوع لغزوان عيونه صارت حمر صگ على اسنونه بسرعة كمشت ظهره ورايه عصرت جف ايده  خفنا  يرد عليه  وهم ينكتل غمض عيونه واخذ نفس يهدأ روحه مسح وجهه كله المطلوب شنو عمي؟؟

-روحك النكسه  تاخذ ذني العوج  وتولي للشغل  وذنيج اني اعرف ششغلهن بس يا غزوان  اذا سمعت صوتك لو عرفت بيك تضم من اجرتك اعتبر روح  ذني معلكة يم اهلك اليهود

اشر اي اندار طلع واحنا ورا ركضنا صعدنا للغرفة   لكينه ماما كاعده بكسره  بس دموعها تنزل شافتنا ضمت وجهه وبجت بصوت  راحولها غزوان ورايه يسكتوها  حتى ياخذوها للحمام قبل لانطلع

واني اخذت رؤيا ورند للبوري كمشتهن انزل من الدرج و محتاره بأمرهن اعرفه ماطول خلاهن براسه بعد مايتركهن  ماعرف منين اجته فكرة التكدي

وصلت رؤيا للحمام وكعدت اغسل بوجه رند داكوم طلعت  البنيه  اجت يمي تسحل بروحها وجها اصفر وخشمها وحلكها مورمات  -ملابسها كلها دمايه كالت وين الحمام

-هياته بس دقايق بين ماتطلع اختي  بيج شي

- بطني دتموتني فدوه اروحلج شسوي داحس روحي تتگطع

- ماعغف والله بهيج سوالف هسه  تجي ماما وسأليها

- ابوس ايدج خلصيني من ابوج فدوه اروحلج راح يموتني

- هو اني لو اكدغ جان خلصت غوحي هاي كدامج سمعتي شنو گال لالبالج عايفنا يمه محبة بينا لاحبيبتي بس يشوف افلوس شغلنا قلت وتجي بيعه زينه  يبيعنا مثل ماباعج ابوج

-انتحر والله اي انتحر احسلي من هالعيشه

-اي عفيه فوگ عذاب الدنيا كمليها بجهنم  دتعالي وياي لاتوگعين وجهج اصفر

كمت وديتها عالدرج كعدت اتلوج كعدت يمها وخرت شعرها عن وجهه صغيره وحلوه كلتلها شجابج هنا ليش وافقتي على العقد

-غصباً عني بجيت ولطمت كتلني ابوي وسحلني شمرني جوه رجلي بس حتى ينطي افلوس يلعب اقمار ويشرب

-هو منيله ابوي افلوس حتى يدفعله

- دموت بطني يمه

-اخاف العاده جايتج

-شنو عاده؟؟

-عزه بعينج لاتكولين بعدج مابالغه

-ماادري شنو يعني فهميني فدوه هسه يرد يكتلني لو اخذيني وياج للشغل والله اعرف كلشي اشتغل حتى اجدي ميخالف بس لاتخليني يمه

-الله ياخذه حتى الحيوان مايسوي سوايته وتدني عينه على طفلة امج وين عنج

-امي ماتكدر تحجي لان احنا هواي عايشين بخرابه  وماعدهم يوكلونه كالت تزوجي احسلج من عيشتنا راح يدللج انتي حلوة وصغيرة

-كلش  يدللج من گد دلاله امي نايمه متسگطة واحنا گمنا نمشي اعوج 

-يعني انتي مو بت هاي  الي دگت الباب الصبح

- عزه بعينها والله عرفتها ماكو مصيبه اذا ماتكون الها ايد بيها على شنو دگت الباب شكالتله وخلته هيج متخبل

باوعتلي استوها ترد وصاح بابا بعلو صوته هاي لسه  ماطلعووووا

خلانا كلنا نكمز ركضت سحبت رؤيا ورند صعدتهن للغرفة  وغزوان ورايه نزلوا ماما للحمام  

من الاستعجال حتى جاي ماسويت دخلت للمطبخ لفيت الباندج حيل على صدري مثل ماعلمتنا ماما حتى ماننعرف  بنات لبست ملابسي  وكفت الف الجماغ

دخلوا ماما راح غزوان ينيمها ورايه وكفت اتلف جماغها غطاها كال يله

شلنه البنزين الباقي عدنا عيني بماما كلبي ماينطي اتركها وهيه حلكها يابس من الجوع  ماعدهن غير نص گرصة  واعرف بابا ماراح ينطيهم اليوم بعناد  غزوان لان ماسلمه الاجره كاملة

عيوني تتنقل بينهن رؤيا لازمه رجليها بزويتها تتصفن وادري بيها خايفه نطلع ويرد بابا يتحرش بيها

رند حاضنة لعابتها وعينها بالخبزه خايفه غيمه تاكلها وتخليها جوعانه مثل كل مرة

غيمة تباوع لماما بحقد محملتها مسؤوليه عيشتها والفكر الي ضيع عمرها

من غير سكف الغرفة الي كل دقيقه يوكع منه قطعة  عاصره كلبي لافد يوم ارجع واشوفه منهد بيهن  

اخذت حسره اشرت لغيمة تقفل الباب ورانا نزلنا فتحنا باب البيت

صباح  منطقة البتاوين…

الهوا بارد يرد الروح  والجهال تارسة المنطقة  صوت الناس وضجت المكان تحسسك انت عايش رغم المعانات

اكثر العوائل تكعد هيج وقت تطلع للشغل تشوف النسوان كلمن لازمة كم طفل رايحه تتسول

والي بيدهم قطع قماش وملمع جام للسيارات

والي اصلا بعده مانايم بالطريق مايدري بنفسه كد ماشارب

نمشي عيني بالبيوت اشكد ما بليل تخوف بالنهار تصفن على بنائها وتصميمها امشي وتخيل العالم  الجانوا عايشين قديم هنا اشكد حياتهم ترفة

صافنه عالبيوت واسمع غزل غزوان يحجي  ويه رايه باوعتلهم تكول عصافير حب كامش ايدها يحجي وياها عالكيف ماعرف شكاللها وهيه زعلت دارت وجهه كرص خدها من وره الجماغ وضحك بصوت  ردت ضربته على زنده

دنكت عالسوار كمشته  واني اسمعه يغنيلها  بصوت يشبه بالهمس …صغير جنت وانت صغيرون

الحب عرفنا بنظرات العيون

كالوا تره ذولة يحبون من الصغر لمن يكبرون

…غمضت صوته بأذني ومنظر محمود بعيوني هو  ومدنگ يلبسني السوار 

رفع ايدي باسها وهمس احبج

تعال شوف حبيبتك وين صفى بيها الوكت بعد ذاك الدلال

اخذت نفس مسحت عيوني كملنا الطريق وصلنا لمكانه بعد ما اشترالنه ملمع جام وصانه الف مره ندير بالنا على نفسنا نزع قمصلته صح ماضال بيها شي صاحي بس لبسها لرايه لان شافها ترجف وهيه مريضه  راح يركض  بطرگ التيشيرت لشغله لان تأخر

اخذت البطالة  اسطرها وهيه اخذت ملمع جام راحت للشارع

كملت ترتيب ولفيت روحي كعدت انفخ بأديه باردة واباوع  على رايه الي تركض بين السيارات تمسح جام حتى مامبينه ولد لو بنيه بسبب لبسها

اخذت نفس صاروا كدامي لطلاب المدارس كلمن شايل جنطته ولد وبنات يمشون ويضحكون ضحكت على ضحكتهم

انداريت اباوع لجهال الشارع اشلون يتراگضون بين السيارات ماهامهم  البرد بلكي يحصلون رزق اكثر رفعت راسي للسما سبحان واهب الحياة وموزع الارزاق 

شلت بطاله ثنين  وكمت يم الشارع أشر بيهن بلكي احد معتاز بنزين يشتري

للظهر على فد وكفة احس رجليه صارن خيوط  اجت رايه  كالت تعبت بعد مابيه

- غوحي كعدي يم البسطيه خلي اشوف بلكي الحگ على ذيج السياغه

-ياسيارة ولج مااكدر بعد اوكف صارت الثنتين واحنا لحد الان بدون ريوك فدوه جيبيلي شي اكله راح اموت

-سوده عليه هسه غند تلكيها تبجي من الجوع

-رؤيا ماتخليها تنزل تتعارك ويا بابا وتاخذ خبز غصبا عنه وتنطيها مثل كل مره 

-هم نغجع ونلكيها مكتوله

-بعد ماتحس بالضرب عادي اندعي كون بابا ماطگ براسه وتالي يعقدها لواحد من جماعته حتى يخلص من رعونتها

-  قبل لايسلمها تكتله وتكتل نفسها وهذا الي ماما خايفه ومتأكده منه

-هم يجي يوم يموت بابا ونطلع نعيش بمكان نظيف  مثل باقي الناس

-وين نغوح منو يتقبل بنات يهودية من البتاوين ابوهن سمعته اوسخ من مكان الحيوانات  بطلي احلام وانطيني افلوس خلي اجيب لفات

- يالفات ولج حتى ماحصلت هواي هنه كم دينار لاتنسين كون نضم الفين حتى نلم لعلاج ماما  جيبي بس وحده  نتقاسم بيها نسد جوعتنا لمن الله يفرجها

-كمشي ذني البطالة ولاتحجين بصوت عالي يالحماغه وانطيني صغف اذا عندج لان هذا  مايغد الباقي واني مااكدغ احجي

اشرت اي طلعت خمس ميه اخذت  منها ورحت وكفت يم ابو اللفات احس بطني تعصرني من الجوع شفت لفه البركر  اتحسرت تذكرت ماما تحبها هم يجي يوم واكدر اجيبها الج

اخذت نفس اشتريت لفه ورجعت كعدت اتقاسمنا ناكل من جوه الجماغ  ونضحك على روحنا لان بدل ماتشبعنا جوعتنا بالزايد  خلصنا عالسريع

هيه كعدت واني اخذت وصلتي افتر عالسيارات امسح جام  بدون صوت حتى لا انعرف

للمغرب واني  اركض بين السيارات اشكد حصلت اهانات وشتايم من السواق ضميتهن بكلبي  بس اريد  الم الخمسة وعشرين  بأي وسيله حتى ماننكتل  مع هيج مااكدرت للولد مهما يكون همه اخف واخاف اتجاكر وياهم اذا لزموا السياره ابتعد بهدوء

لمن خلصت طاقتي احس  انهد حيلي وحتى السير بده يقل  رجعت لمكاني  كعدت  عظامي طگطت من البرد  خليت  راسي على متنها كالتلها اشكد حصلتي

-عشرة 

-واني هم  وذني ١٣ ونص   ماكو كلها اغباع ينطوني حتى افلوس علاج الماما مانكدغ نضم

-امبين ماكو رزق اليوم اشلون نجيب مخضر واحنا اجرت اليوم مادبرناها لبابا

-اذا امج خالتنا  يم  عالمغكز منو يجي هنا حتى الدوام خلص

-غير تخاف علينه من الشارع

-وعالاساس هسه مبين شكلنا اشو سنين نشتغل محد عغف احنا شنو وانوب لبالهم خرسان

-خليج عالخرسه افضل مايسمعون لدغتج والله تصيرين تصنيف

-اكول انلصمي ولفي جماغج عدل بت امج الي عافت الاسماء كلها وجلبت بحغف الغاء

-غااء؟؟

-والنبي غاح ابجي

-هههه كومي خلي نروح للشارع العام بلكي نحصل سيارات واذا ماكو نرجع لان الدنيا صارت ظلمة حتى لو ناخذ بس خبز هسه  ماما فحطانه من الجوع والعطش هاي رؤيا بس للعركات حاضره

-لعد شتسوي اذا  ابوج جلب قافل حتى الثلاجة مسويه حصاغ علينه  وخليها هيه الوحيده بينا وكحه هم يالله   تقايش وياهم صدك شنو جنتوا تحجون انتي وغزوان

-رجع يتوسل خلي نتزوج

-تغه  الولد مل وطلعت غوحه تعبه كله دياخذه ابوج واذا فتح حلكه وحجه يكتله ويكتلج كدامه حتى يكمشه من ايده التوجعه ويتوبه

-وين نتزوج ناخذ وحده من الخرابات نكعد بيها وكولي رهمت نأجر غرفة  منين يجيب المهر وابوج خال مهر يكسر الظهر

-لان الناقص ناوي يجبغه (يجبره)يبيع كليته غايه انهزموا و تزوجوا بعيد عنه وكملوا حياتكم

-واتركم  واعرف بابا راح يبيعجن  وحده وره الخ لان الفلوس تقل بيده  صدك تحجين غير اموت

-لعد اشلون تضلون عمغكم كله تشتغلون  تغه مايعتقكم والله ولايخليكم تتزوجون حتى بالحلم

-مااعرف احس راسي مشوش بالاخص من سمعت بابا اليوم يسولف بخواتي حتى لوجنت مفكره بعد ماكدر اتحرك

-هاي اسوالف غيمة مو منه الحجي دتحوص على  غؤيا اشلون مجان اتغيدها تذلها وتخليها تحت رحمتها لان داحس لازمه شي عليها

-مثل شنو لازمه؟؟

-ماعغف بس دوم اشوفها خايفه منها بالاخص اذا دخل غزوان تضل عيونها عليها حتى تخنس وجهه يسود

- تره اكو كدمات  على جسم ماما شفت  هواي مال تگرص موضرب صونده  بس مااكدر اكول  لان حلفتني ماما تكول  غزوان  يروح يذبح غيمه وتالي يضيع شبابه بالسجن وانتن تضيعن ورا

-لاتخافين بابا مايخلي يكتلها كنز والله جابه لحلگه منو بعد ييجيبله افلوس لنزواته و وسخه  لالبالج هذا شغلنا موكله خبز يادوب مشروب يجيبله 

-لعد لويش كل كلمة يهدده اطردك

-يدغي بغزوان يتحمل كلشي في سبيل مايعوفنا يمه وحدنا لان حيوان بس يتوازه ويزيد الدين عليه  يشغلنا حتى ويه الغجغ 

-الله كريم  لابد ماتفرج يله نزلي الجماغ عدل ضوه الكمر قوي راح تبين عيونج  وشنوو مالابسه المشد اليوم  تره جسمج بارز

-والله لابسه وكده ماضاغته داحس راح انفجر بس هو التيشيرت ضيگ

-يله كومي خلينه نروح للشارع العام بلكي نحصل حتى باجر نروح للمستعمل لان هم اريد بجامة لرؤيا  بدل هاي الصارت وصله مسح 

ردت امنعها   شفتها كامت شالت البطالة راحت كدامي عرفتها معتازه افلوس لعلاجها بس ماتحجي

كمت وراها شلت الباقيات وبگلبي الف حيره
من جهه بالي بخواتي وماما الي خايفه على ساعة تسكت من كثر الجوع والكتل

ومن جهه اباوع لرايه كدامي اشلون تمشي  مهمومة خايفه غزوان يجي يوم ويمل ياخذ اخته ويروح

تعدينا المركز نمشي وبعدنا ماواصلين الشارع مسافه بعيده عن المركز

ناس ماكو الشارع شبه خالي بسبب بروده الجو الدنيا ظلمة  استونا نوصل للشارع واشوف ثنين ولد جاين اتجاهنا 

دنگنه وصلوا يمنه بحركة سريعة جرني وخله شفره بركبتي همس نفس انحرك

فتحت عيوني على كبرها عيوني تتنقل اريد احد يمر يخلصنا ماكو على حضنه الشارع مابي ولابشر رد صاح موويااااك

-  شتغيد الله يخليك عوفني

-الله بنات يله ولجن طلعن شكو افلوس عدجن بسررعة

-ماعدنا والله شوف البطالة كدامك مابايعيهن

-من اذبحج عود حلفي هناك  كالها واحس نبت الشفره صرخت رايه عندي الفلوس اتركها

-طلعيهن بسرررعة يلاااا

طلعتهن اخذهن صاحبه وهو دفعني وكعت بالكاع دفرني وراحوا يركضون كمشت بطني والعبرة جارحتني  دنكت رايه كالت  تأذيتي

باوعتلها بكسره همست تعبنا كله  غاح بلحظه حتى مالحكنه نجيب خبز

-بسببي  اني الكلتلح خلي نجي هنا

-متانيات انجيبلهن اكل

-شيخلصنه من بابا گال اذا نقص بالفلوس اعلگجن موانوب نرد ولادينار

مارديت بس دموعي نزلت بحرگه

-ليش حتى نتحمل كل هالشي موذنبنا انخلقنا بنات ولاذنبنا صرنا بيد واحد مابگلبه رحمة

دفعتها وكمت شلت البطالة  احسه روحي مختنگه وصلت كعدت تحت السقيفه لميت رجليه خليت راسي الشهگه تطلع من كلبي

اجت  كعدت يمي خلت ايدها على متني كالت كومي نرجع اصلا تعودنا عالكتل بعد منحس

شلت راسي باوعتلها ونزلت دموعي

-لاتبجين اگله اني ضيعت الفلوس مااخلي يكتلج

شفت ضوه سياره من بعيد  جايه  بدون تفكير دفعتها  اخذت بطل بنزين وكمت وكفت عالشارع  ماعرف شحس بس ردت اطلع غضبي بشغلة ردت اتعب نفسي حتى لو ضليت للصبح بس حتى احس اني صدگ موجوده وهذا الداحس بي صح مو وهم

وصل يمي دك هورن وعبرني من  حرگه كلبي  شمرت البطل اجه بالجنطة من قوة الضربة شخطتها

شحط السياره ورجع ليورا  استوعبت السويته اريد اتبلعم ماكدر صار قريب وكف نزل الجام واشوف  واحد ملثم  ماطالع منه بس عيونه  خزرني و اشر تعالي

رجعت ليورا

-وحگ داحي خيبر   انزل اربط بالهمر واخذج سحل للكلب المسيبج بهالوكت تعااااالي لج

-والله عمو اسفه ماقصدك اضغب سياغتك

-ماتجين ؟؟

اشرت اي ودموعي نزلت

-حلو چا خليج مكانج

كالها وفتح باب السيارة  نزل شهكت واني اشوفه لابس زي عسكري من كد ماضخم نرعبت من شكله انداريت بدون وعي وركضت بكل حيلي مااسمع غير سحبة اقسام ثارت الطلقة ويه صوت صرخت  اختي رايه  …

لاتنسوا التصويت ❤️

ملاحظه : ممنوع النسخ واللصق والنشر بأي مكان خلونا نكمل القصة بدون مشاكل رجاءاً