رواية شيء من رصيف الدم الفصل الثاني 2 - بقلم Leo Alfatlawi

شيء من رصيف الدم

البارت الثاني

بقلمي: leo Alfatlawi

انتظر تعليقاتكم بين الاسطر ❤️

…عندما تكون اوجاعنا اعمق من  ثمانية وعشرين حرفاً لايسعنا الا الصبرُ والصمت"

فكل الوعود كاذبة اله وعد الله صادق…

وكفت جامدة  واني اسمع صوت صرخة رايه انداريت احس جسمي كله يرجف شفايفي بهتت واني اتوسل بربي لاتفجعني بمنظر اتمنى ماافتح عيوني بعده

غمضت واني اشوفها واكفه كدامه تريد تمنعه جرها دفعها عن طريقه واجه اتجاهي اباوع عاصر السلاح بيده ويمشي بسرعته عرفته اذا لزمني ماراح يرحمني

ركضت بكل قوتي صار كدامي شارع  طويل دخلت بي بدون لااندار اركض بحيلي عيوني بنهاية الطريق بس اريده يخلص اشكد مااسرع بعده احس الكاع تنطوي بيه 

ماصدكت دخلت الشارع الثاني احس صدري ضاگ  وبطني اتشنجت بعد مااگدر اواصل درت وجهي ماشفت احد وراي دنكت على رجليه اسحب الهوا كوة

وكفت انفت انداريت اتأكد خالي الطريق مااعرف ضيعني لو مل ؛ اخذت نفس  رحت اسحل  بروحي كعدت يم الحايط خليت ايدي على گلبي احسه يريد يطلع من كثر ما ينبض

غمضت اكثر من عشر دقايق واسمع صوت رايه تصيح رئااال شلت راسي لكيتها جايه كمت مفزوعة لبالي وراها اشرت ماكو راح

رجعت كعدت احمد ربي  لمن وصلت صاحت صدك تحجين انتي لااكيد تخبلتي

-ماعغف اشلون سويت هيج مجان بالي بس افلوس الخبز

-لو كامشج جان فلش راسج على ذيج الحرگه مالته

-شدعوه قابل شنو سويت

-لاماكو شي بس سيارته انشخطت ولج يمسح بيها ويحلف اذا لزمج يشخط وجهج

-الحمد الله مالزمني

-والله هو جان ناوي يلحگج لو ماا ركض ادنگ ابوس أديه وابجي تالي نزل واحد ويا فرغ البانزين وهو كال اذا لگفتجن هنا اخذجن سحل للمركز واختج گليلها خلي تختفي بس الگفها اعدل السيارة بوجها

-كملت منين طلعنه هذا ووين غاح نشتغل و شنو نكول لابوج

-انگله تعرضولنا الدولة ورادوا ياخذونه للسجن وهمه اخذوا كلشي منه  ونحلف بلكي يخاف ويصدگ بدل مايضربنا يغير مكانه

-ماغاح يصدگ لان يعغف جماعة المغكز كلهم هسه يسألهم وبدل الكتل غاح يصلخنه بالزيت مثل ذيج المغه

-لا نگله جاي نقل جديد لان صدگ ماشايفته هنا هاي اول مره اشوفه ولاتخافين متأكده راح يتصل ويتأكد حتى يضيف سگط جديد للسهرة مالته يالله كومي تأخر الوقت خلي نلحگ نرد قبل لايجون جماعته

باوعتلها ادري بيها تريد تهدأني وادري  راح ننكتل بس سايرتها

كمشت ايدها وكمت كوه التعب والرجفه بعدها بجسمي  سندتني مشينا  ساكتين كل وحده ماكو  بعينها بس منظر صوندة بابا الخضرة ولسعة الزيت الحار

دخلنا للمنطقة صعدت اللثام نغزني جسمي انعصرت فوگ الخوف منظرها بليل يرعب اقوى واحد

نمشي عالسريع ونتلفت وصلنا لنص المسافة وانتبهنا لواحد كاعد بداية الفرع لام روحه من البرد عرفنا من نظارته غزوان شافنا كام اتخصر واخذ نفس براحة

واحنا  ماصدكنه رحنا ركض وصلنا يمه  گال وين صرتن متگللي صار ساعة ونص منتظر لااگدر الحگجن اخاف طريقنا يعكس وتالي دخلن وحدجن ولااگدر انتظر صدگ تحجن

رايه-  بشر بابا شنو وضعه

-منتظر وصاير نار كبرة مبين متعارك ويه ابو مرته وجاي مهدده يريد القسم الثاني مال الفلوس

-عزه وانوب رجعنا بدون اجرة يعني اليوم يموتنا

-ليش ماحصلتن اي شي؟؟

-ولد الشارع خذوا شكو فلوس واحد الله غاضب عليه لابس عسكري  فرغ البنزين بالگاع

-كلش مووقتها هسه اشلون حتى اني ماگدرت اشتغل غير شفت واحد الربو گطع نفسي

-دبرنا غزوان

اباوعله وكف محتار ايده داخله بشعره عيونه علينه وياكل بشفته واحنا نتراجف كلما نذكر اشلون راح نتعلگ

اخذ نفس عدل نظاراته ومد ايده بجيبه طلع افلوس شغله كال لرايه  كمشي ذني

-لا راح يكتلك مكانه  انكله عالصار اصلا تعودنا بعد منحس

-كمشي لج اكو واحد منزل طابوگ بناء راح اخابره واروحله انگلهن لداخل بيته بلگي ينطيني كم فلس

-مو دتگول ماگدرت تعبان وبابا  هم راح يحاسبك اذا تاخرت  ورجعت الفلوس نقص

-كلوله الربو سكته اخذوا اصدقائه للمستشفى  يله لج كمشي  منتظرجن واظن اليوم هم سهرة عنده شفت  مشروب بالاستقبال استعجلن قبل لايجون

اخذتهن منه وعيونها تلمع تدري  بي كوه يسحب النفس من التعب باوعلها  وابتسم مسح على متنها بحسرة واشر يله

بعدنا ماتحركنا  گال اوكفن

طلع جيس اسود من جيبه وشال علاگة من يم الحايط

-ذني نساتل لرند ديري بالج لايشوفهن عمي  وذني كم صمونه زادن من العمال كلت  هم يفيدنا

-لعد اخذ وحده اكلها لان ادري راح تضل للصبح هناك

-من كثرهن واخذ منهن خلي يكفنجن  وبعدين موجوعان استوني ماكل  يله انطلقن بسرعة حتى ارجع قبل لاينام الرجال

اخذت جيس النساتل ورايه الصمون وندري جذاب ماماكل بس يكابر لان يعرفهن هسه ميتات جوع ومنتظراتنا

كمشت ايدها رحنا  هو ضل واكف يباوعلنا  دخلنا الشارع وصلنا لبيت اليهودي ونسمع صوت طگة قوية بي  بعد حتى طريقنا منندله ركضنه بكل سرعتنا  للبيت

الباب عباره عن قطعة مال تانگي مشكليها  حتى قفل ماكو ضالين عالخيط والسلقي من جوه

دفعناها استونا نعبر العتبة واجانه صوت بابا  من جوة الغرفة  يصيح وينجن بناااات اليهودية

وحده باوعت للثانية رد كمزنا وهو يصرخ  مو وياجن گ…

ردينه الباب عالسريع  لزمتني رايه سحبتني دخلنا نمشي واحنا نردد دخيلك ربي اهدي

من كد الخوف نسيت حتى العلاكة بيدي وخرت البرده مال الباب ودخلنا

جان گاعد گدامه صينية مال منكر منتجي عالحايط  يباوع للتلفزيون مشغل مقطع مال راقصات 

بيده النرگيله ومرته الجديدة يم رجلي لامة روحها ؛  اخذ نفس نفخه واشر تعالن

رايه:- هاي الفلوس بابا

-ليش تأخرتوا

- ماكو شغل گوه گدرنا نلم الفلوس والله بابا على وكفتنا من رحنا لسه حتى اسأل ابو الكافتريا  اذا اجذب

-هاي العلاگة شنو ؟؟

-هاا ذني وحده وزعت نذر مااكلناهن ضميناهن لرند  لان خطية دوم تگعد بليل تبجي من الجوع

-الله ياخذج انتي وياهن  بساعة وحده جيبيييي لج

مد ايده جرتهن من ايدي وركضتله

اباوعله شكله مقرف قذر  اخذ الفلوس والعلاكة منها ؛ عصر ايدها وباوعلها بنظره نكسه سحبت ايدها وخرت بسرعة تفل عليها

نگت مسحت وجها بظهر ايدها واجت يمي وكفت

كمشت ظهرها اريد اتبلعم مااگدر كوه واكفه واني اشوف عيونه تتجول علينه من فوگ ليجوه گد مانظرته وسخة  حتى شكيت بروحي ما لابسه المشد مع العلم الخنگة بصدري منه تاكل بروحي من كثر الضغط

دار راسه تفل بصفه ودنگ يحسب ثواني وشال راسه يباوع بحرگة گال شنو اربعة وعشرين ؟؟

رايه :- بابا  والله واحد  شكله يخوف لابس عسكري اخذ الاغراض وشمروهن

-گلتي واحد عسكري خوش حجي شوفن ولجن تكولن وين تضمن الفلوس لاوروح ابوي اصلخ جلدجن هسه

-والله ماضمينه  تعال باجر ويانه وشوف حتى كالوا بعد لاتجن هنا شوفن غير شغل وداعت امي

هيه تحجي وكام دفر مرته وخرها  وجر الصونده  اجه يمشي لجهتنا  من الخوف بس دموعنا تنزل وحده تختل بالثانية نريد  نحمي نفسنا

جر رايه شمرها وكعت على مرته  وجرني من راسي دنكت على ايده بستها كلتله بترجي دخيل بابا

ماحسيت غير الصونده اجت بظهري سوته نصين خليت ايدي عليه واجت الثانية برجليه من كثر الالم كعدت بالگاع گاطعة النفس بعدني ماساحبته واجتني الدفرني بطني دنكت مختنگه

كامت رايه كمشت ايده تبجي تريد تمنعه  اندارلها حتى مالحگت تحجي وهو  جرها شمرها للگاع خله رجله على راسها سحكه وبلش بالصونده

اباوعلها اشلون تشوط روحها ويه  كل ضربة لزمت بطني اعصر بيها ودموعي تنزل بخوف كلما توصلها الصونده  تفتح عيونها  بكل قوتها وتشهگ

ماانطاني كلبي اعوفها گمت ركضتله قبل لا اوصل تركها وندارلي لسعني براسي حسيت الدنيا افترت گعدت بالگاع 

رجع الها غمضت مااگدر اباوع بس توسلها واطفرها حتى اتخلص روحها يعصرن كلبي صاحت بصوت دخل بروحي وهيه تستنجد

فتحت عيوني لكيته حاصرها بالزاوية ويضرب برجليها بكل قوته ومرته ترجف خانسه يم الجرباية صوت صرختها وهيه تصيح يمه لحگيني يشگ الگلب

شهكت اتلفت محتاره المن انخى لو اشلون اخلصها رفعت اديه بعجز  اضرب على خدودي ماعرف شسوي رجعت گمت  ركضتله  دنگت على رجليه ابوس بيهن دفرني بكل قوته گلبني ليورا سحگ على صدري حيل و صرخ بصوت محى كل امل بالرحمه وهو يصيح اطلعن  الفلوسس لو اخذهن من لحمجننننن

لزمت رجله همست بتعب كوه طلعت الكلمة والله ماضمينه شي  شوف بلعومي بي شخط غادوا يذبحوني لان مارضينا ننطي يوميتنا

-وفاااااء كومي احمي الزيت بسرررعة

رايه -  لابابا دخيلك وروح خالي مانجذب وداعت خواتي هاي اخر مره اذا عدناها اشمرنا بالسرداب عمرنا كله

-لج بت الكلببب كومييي احمييي الزيت  ذني مينعدلن مثل امهن اليهودية اذا ماينصلخ جلدهن مايتربنننن

-دخل الله ودخلك بابا بيش احلف حتى تصدگ ماضامين زين خابر صديقك واسئله عن الضابط الجديد  الي هددنا اذا گلك جذب سوي التريده

-ياابن كلب هذاا وين شافجن بنات العاهره

-يم المركز كال اذا لمحتجن هناا بعد اشمرجن بالحجز وجيب الي مسيبجن هنا لليل واعلمه اشلون يخليجن گاعدات بهذا المكان

-اكيد تلكي شم ريحتج القذره انتن بعد مومال شغل اشوفلجن واحد يستر عليجن

سكتنا بس نريد نخلص روحنا شافنا هيج دفرني زحفت بسرعة رجعت ليورا جرتني رايه  يمها 

- وييين غزوان

رايه -:بالمستشفى مختنگ خذوا جماعته

-يعني هم مااشتغل اليهوديييي

-لالا اشتغل بس تعب وره الشغل وراح

-كون تعلگ روحه وماترد ابن الزنا

سكتت

-بعد بيع ماكو  ترحن لغير منطقة تجدن ماتردن اذا مو ضعف المبلغ  بأيدجن  تخلقن افلوس من جوه الگاع بدل الخمسة وعشرين اريد خمسين  لو تحضرن نفسجن للموت

اشرنا اي تفل علينه ورد لصينيته جر زوجته شمرها وكعد مكانها
كمت عالسريع كمشت ايد رايه كومتها كوه وكفت عصرت نفسها مغمضه شايطة روحها

خفت لا يرد لان عيونه صارت على رجليها  سندتها على متني واخذتها اسحل بيها طلعنه  دااصعد الدرج لگيت علاگة الصمون شلتها وصعدت للغرفة بسرعة  صارت ماما بوجهي زاحفة للباب تريد تنزل ورند كامشتها وتصرخ مرعوبة

دخلت  رايه خليتها على فراشها  وركضت طلعت  شبكتها حضنتني بجت بصوت وصاحت كتلجن الميخاف الله

بستها ومسحت دموعها همست لاتبجين بغوح اخوج

-يطلع ضيم الاقمار  وفگره بيجن السكير

-فدوه اغوحلج سكتي هسه يسمع ويصعدلج

-خلي يسمممع الله يكسر ايده مثل مايضربجن النكس شنو ابتلينا بي وبعربدته الماعنده غيره وشرف  شكول عليك يخويه  من ضعيتني ويه واحد نكسسس مثله

-ابوس ايدج لاتحجين هسه يكتلج ويشمرج بالشاغع  واحنا مانگدغ نوكف بوجهه تعغفينا  لاحول ولاقوة  ولج غيمة ايدج وياي خلي نغجعها لمكانها وانتي غند اول مندخل سدي الباب بسااع

-وين ارد ولج رؤياااا اخذها من العصر ولسه ماكووو ولج اخيتج ماعرف وين شمرهااا

-عزه بعيني شنووو اخذهااا  بس لا انطاها لجماعته يمه سوده بوجهيييي

غيمه -  صوتج لج شكو انخبصتييي لاتخافين منو ياخذها عمية وعرمة اتجاوزت عليه شمرها بالسرداب هسه كم ساعة ويطلعها قابل اول مرة

-ليششش خليتوها تنززل

-اشلون يعني متنه جوع ورند خبصتنا تريد اكل اني مابتليت هم اخدم وهم اتحمل فگركم وهيه اختج صلفة وبدون تربية  ماتطلب منه بأدب تصرخ بوجهه كاللها ولي ماعندي بدل ماتنجب وترد للغرفة لزمت عصتها فلشتها على وجهه

-يعني كولي موتها

-ماعرف بس سمعت صرختها يمكن صلخها

غمضت احس كلبي انخمش مجرد اتخيلت اشلون دار عليها الزيت وهيه تتلوه بين اديه ماتعرف اشلون تخلص روحها

ردت اكوم لزمتني ماما گالت لاترحين داسمع الباب انفتحت يعني دخلوا جماعته  وغزوان ماكو هذا حيوان مايعرف الحرام شنو

-لعد واخيتي

- خليني هنا گاعده اتسنطلها  گوموا دخلوا قفلوا الباب انتظره بس يطلعون وينام اكلج تنزلين اطلعيها

-واذا ثگل بالسم ودخل عليها لوصعدوا جماعته وشافوج  شنو تسوين لالبالج تصيحين غاح يفزعون تغه العالم هنا  انكس منه

-لا كومن لزمن كل وحده سجينة بس اصيح طلعن  موتنه لان مو حرام كتله اذا قذارة عقله خلته تدني على بنته لو يسلمني لجماعته

-لحدمن نضل عايشين بهالظلم ومتحملي

-ماضل شي واخلصجن بس گومي يبعد امج دخلي بسرررعة داسمع صوتهم دخلوا قريب وصوت بجية رند راح تفضحنا

-مااخليج وحدج

-لاتوجعين گلبي بيج ولج مااگدر احميج كافي وجع گلبي على ذيج ماعرفها اشلونها اذا تردين تحمين اخياتج  گومي وسوي مثل ماگلتلج

ردت احجي واسمع صدگ صوتهم بلشوا يدخلون ودموع ماما الي تترجاني ماجان عندي حل ثاني عاجزه عن كلشي واعرف  التكوله صح  ماانگدر نحمي نفسنا غير بهاي الطريقة

بست راسها وگمت لزمت رند دخلنا للغرفة حتى مالحگت انطيها بطانية لان ضحكهم صار عالي سديت الباب بسرعة سلقيته رگضت للمطبخ طلعت سجاجين انطيت وحده لراية واحده لزمتها گعدنا ورا الباب خليت رند بحضني انطيتها صمونة عصرت راسها بصدري حتى تسكت انتجيت عيوني على رايه الي گاعده بهتانه مابيها تتنفس واذني يم ماما منتظره تصرخ حتى نطلع نفزع لرؤيا

دقايق وسكتت رند باوعتلها تاكل الصمونة بشراهة مبينه جوعانة كلش وتعودت هلكد ماننكتل بعد ماتهتم لليصير

درت وجهي باوعت من ثقب الباب واشوف ماما لازمه مداليتها صافنة ودموعها تنزل بقهر

غمضت وعدلت راسي حتى روح للتفكير ماعندي اقل من ساعة واسمع  صعدت على الدرج وصوت ماما تبجي وتحجي بهمس فتحوا الباب

كمزنا فتحت الباب لكيت رؤيا واكفة شعرها منثور وجهه ازرگ من الضرب وبصفها وفاء مرت بابا ساندتها  كالت هاي اختج طلعتها بسكوت عادي اضل يمكم منا لمن يطلعون

بدون لاارد سحبتهن دخلتهن للغرفة وركضنا اني ورايه  طلعنا اتگابلنا على ماما  نريد نشيلها مانگدر هيه مو ثگليه بس احنا جسمنا متهالك من التعب  كوه سحلنا سحل رجعناها لمكانها وفاء  قفلت الباب

رايه ردت لمكانها تمددت واني  گعدت بصف ماما بهتانة خليت راسي بحضنها الدنيا تفتر بيه

راحت وفاء جابت ماي وقطعت قماش كعدت تمسح رجلين رايه لان ورمن ورؤيا على مكانها حاضنه رجليها وصافنه مااعرف شتفكر 

صار هدوء بس صوت الونه ينسمع وهمس ماما وهيه وتردد كله بسببك نفس الكلمة النسمعها كل يوم بدون لانفهم معناتها ولانعرفها المن تقصد

غمضت اكثر من ساعتين واحنا صوت مالنا من الوجع والخوف نعض ادينه ودموعنا تنزل بكتمة حتى لاتحس علينا ماما ونزيدها عليها

شفت رند نامت  شلت راسي لكيت ماما منتجيه روحها رايحه لازمه مداليتها وعيونها كوه فاتحتهن ماتهون توخرني من حضنها

اشرت لغيمة تجيها دارت وجهه بعدم اهتمام لفت روحها وغمضت اخذت نفس كعدت مسحت دموع ماما وهمست نامي حتى اغطيج واكوم لغند

-روحي يم رؤيا شوفيها شبيها ليش هيج ساكته

-تعغفين ماتحجي وتضل هيج للصبح لمن تتعب وتنام لاتكول شنو سوالها ولاشنو ناوية

-ااااخ ياالاهي ماتگلي اشوكت تخلصنا منا

-الله كغيم ماما صيحي لوفاء خلي تنام يمج ماعدنا غطه وخطية ضالة تتصفن  هاي هم الله بلاها بهم ماغاح تخلص منه

اخذت حسره واشرت لوفاء اجت يمها واني كمت كوه اجر  روحي شلت رند  نيمتها بفراشها  غطيتها طفيت الضوه ورحت لفراشي مابيه حتى احجي

زحفت رؤيا تتلمس بدون صوت وصلت يمي دخلت وياي بنفس الغطة كالت جسمج يوجعج مو ؟؟

-مومثل وجع گلبي والله ل…

-لاتحلفين الحيوان هذا حصتي غيمة جانت يمه من وصلتوا

-لا بس زوجته الجديده ليش

-ترست براسه اشياء وختلت مثل الحية

-تغيد طلع ضيم موتت اهلها بينا شنو ملت بغاسه بعد

-على رند

-شنو غندد ؟؟

-سمعتها تكول اكو ناس ماعدهم خلفة وجاين يتبنوها اشكد تريد افلوس راح ينطوك  تكول خوش ناس لاتخاف عليها والفلوس تفيدنا هم تعدل وضعنا  وهم اوفي دينك

-عزه بعينها غاحت اخيتي يمه ماكو غيغ اغوح اشتكي عليه هذا بلش يبيعنا بعد ماكو شي يلزمه

-وين تشتكين وهو رئيس المخفر يجي يمنا يسهر وصوتج لاتسمع ماما والله تموت

همست رايه. هسه اتقنعه  ماطول خلتها براسها

-اكول لغزوان

رؤيا :- وهيه متمنيه هيج حتى يكتلها وتخلي ابوج يروح يشمر عليه تهمة ويذبه سجن حتى تلعب براحتها واحنا نصير تحت رحمتها

-وين اغوح بيها گليلي شسوي

رايه :- دخيل الله خايفة تقصد عالغجري وهذا عنده كومه افلوس راح يعمي ابوي بيهن

-اخذها وانهزم

-وين ترحين احنه شنو نندل اشو تحركنا خطوة وحدة عن مكانه اجينه ننذبح ولبالج الشارع ارحم من ابونا مودتشوفين وتسمعين التشرد شيصير بيها   اذا انتي يبيعون اعضائج اختج صغيره يربوها ويعلموها على الشغل

- لعد اشلون نسكت هيج

-لاتخافين غزوان مايخلي يوصل يمنا  مستعد ينحره ويدخل السجن ولايخلي وحدة منه تتحرك وانتي رؤيا على شنو اتعاركتي ويا بابا واشلون تضربي بالعصة انتي اشوكت تعقلين

رؤيا-:  ماضربته بس حبيت اجرب العصة الجابها غزوان اصليه لو يضحك عليه

-وين صلخج شو دااشوف

-لا الزيت جان بارد والغبي شمرني بالسرداب لباله راح اهتم مايدري اني والحشرات صارنه صحبة  على كد ماتگابلنه

-رؤيا وجهج اصفر ادري متأذايه لاتكابرين داشوف المكان لايلتهب مثل القبله وتالي تتأذين بالزايد

-اي مو اني ام لدغة النعواصه خايبه ماتنجبين تركج مني  تره ماما باجر موعد الاخير  لفتح الجبس مالتها وانتي  موعد مراجعة التحليل مال الكلى مالتج

- رئال تاخذ رند وتروح للشغل واني وياج ناخذها للمستشفى

باوعتلها كلتلها اغوح للشغل شنو اشتغل واني ماعندي ولاديناغ وفوگ كل هذا غضب الله الطلع بوجهنا و منعنا من المكان

رؤيا:- ياهو

-واحد الله ساخط حظه   تكول ملك الموت مايتفاهم  حتى مالحگت احجي گبل طلع سلاحه وغماني

-اشلون شكله

-كلشي ماطالع  منه ملثم ولابس جيشي بس اطول من حياتي وبي خمسة من ابوج النكس يمكن  ياكل الموته بعد مايكتلهم

-بول تيري

-شنو بول تيغي؟؟

-شي مال كبار لاتسألين او صدگ كولي ثلث مرات ريري الراوي رقاصه واگلج شنو هو

رايه -: بله شكلجن مال بشر استوه ماكل طن كتل صدگ بدون احساس انتن

رؤيا- ذكرتيني ضل نص من عصتي مجلب بوجهه نزلي جيبي يفيدني ادخل بي للحمام

- كملتي انجبي 

-الاخت الكبرى تتصف بالاخلاق الحسنه - اختنا

-اشلون راح تخليني اطلع وجع الصونده بيهااا وانت رئال ماما عدها خمسة ضامتهن للحنه جوه الطشت بالمطبخ اخذيهن اشتري بنزين واني احاول اخلص شغل المستشفى من وكت وأمن على ماما هناك يم رؤيا واجي وياج نمسح جام بلكي الله يرزقنا هالمرة ونعوضها

-دتون سودة عليه

-من هيه وكاعده انتبهتلها  تغمض وتنز

-بس لاتغد هم تنتكس حالتها

استغفرت وگامت تسحل بروحها راحت يمها خلت ايدها على وجهه همست ولج هاي صايره ناار

-والله عغفتها ماغاح تتحمل فوگ ماعلاجها خلص ونهبطت  كعدت بالبغد وهاي حتى الصوبه مطفية

-عزه بعيني ولج رئال كوه تتنفس هاي ردت فقدت 

-شسوي متگليلي وين اغوح منو انخاه حتى مااگدغ انزل اخلي نفط سمعيهم وين واصل صوتهم

-كومي وياي خلي انغيرلها  ونغسللها بلكي توعى  وتخف حرارتها

انتجيت وگمت كوه اتحرك  اتكابلنه عليها مثل الجثه بيدينا  غيرنالها  گعدت رايه تسوي كمادات واني اخذت رند  لحضني وتمددت امسح على راسها محتارة اشلون اخلصها

مااعرف اشلون رحت بالنوم ماگعدت اله على صوت نغمه الموبايل عرفته وقت الاذان لان ماما توقته للصلاة

اباوع الكل نايم و غزوان بعد ماجاي درت وجهي لماما لكيتها خاله اديها جوه راسها ومغمضة يعني رادة لوعيها

جريت البطانية لفيت رند حتى ادفيها ردت ارجع انام تذكرت هسه تگعد اتصلي والغرفة  مثلجة وخرت الغطه احس جسمي مكسر مااعرف من التعب لو الضرب لو الجوع اختلطت  عليه

گمت اخذت لجلكان مال الصوبة  فتحت الباب مديت راسي هدوء عرفتهم رايحين طلعت بسرعة نزلت على طراف اصابعي حتى لايحس بابا ركضت لبرميل النفط كعدت خليت الجلكان فتحت البوري استوني اترسه واسمع صوت ضحكة خفيفة شلت راسي اتلفتت ماكو احد كلت يمكن غلطانه

رجعت دنگت ثواني ورجعت الضحكة وياها صوت همس بنيه جاي من غرفة بابا كمت وكفت شنو معقوله وفاء بس لا شفتها نايمه يم ماما

ترست الجلكان عالسريع داسده ورجع صوت الهمس  اجاني الفضول اعرف منو هذا وشديحجون الي هيج يهمسون خايفين احد يسمع

تركت الجلكان ورحت امشي عالكيف وصلت للغرفة واسمع صوت غيمة وهيه تگله لااا موهيج ولك وتضحك

دنكت على فتحت الباب جمدت مكاني واني اشوفها ويه بابا بوضع يخزي وكفت متصنمه ماحسيت غير انسحبت من ورا انداريت دااصرخ وسدت حلگي رؤيا اشرت اشش

ردت احجي جرتني تتلمس بالهوا وتمشي عالسريع

رحت وياها اخذت الجلكان وصعدت دخلته للغرفة احس جسمي كله يرجف صوتها وبأذني ومنظرها المغزز بعيني ماعرف اشلون خليت الجلكان بالصوبة حتى ماشغلتها  رجعت لفراشي صافنه مامستوعبه الشفته

سدت رؤيا الباب واجت تتخطى كعدت يمي همست نامي قبل لاتصعد وتشوفج كاعده وتعرف بيج شفتيها

-غيمه وبابا سوه

-من زمان

-شمدغيج

-مثل ماادري من نزلتي هسه راح تشوفيهم وبدل ماتفضحيها راح يكولون لزمناج ويه واحد ويشمرج على سگط من جماعة حتى يسد السالفة

-انتي اشوفين؟؟

-رئال شكو شي شفتي جوه تمسحي من راسج اذا تردين نضل محافظين على نفسنا  لحد مانطلع منا بسلام

-هاي اشلون هيج تتقبل على نفسها

-لان عاشت عيشة وسخة وضاگت الجوع وعرفت ماكو مهرب منا غير بي

-مافهمت

-ولاراح تفهمين هاي خلت بابا براسها هدفها الوحيد تسيطر عليه واول شي تسوي تقنعه يخلص من غزوان حتى يصفالها البيت وتگلبه ملهى بينا

-يمه عزه بعيني احنا وين عايشين

-بمنطقة محد يدخلها غير الوسخ واب بعد اوسخ لالبالج هاي استوها بلشت تره من زمان ويا  من ايام ماجانت ماما مريضة ورند صغيرة اخذها وطلع اسكتها بره تروح تدخل يمه عالاساس ماحس عليها

-من هيج دوم عدها فلوس وتضمضم ومن دونه لايكتلها ولايطلعها للشغل

-افلوس ابوج بعد ماتكفيها احلامها كبرت انتظري كم يوم وشوفي شراح تسوي

-غزوان اذا عغف يموتها

-ماراح يعرف بس سدي حلگج لا تضيعينا رئال غزوان بدل ماراح يطلعجن راح يموتها ويدخل للسجن وانتن اصيرن بيد ابوج تعرفين شنوو

-منو كلج غزوان غاج يگدغ يخلصنا من بابا وشنو يطلعجن لعد انتي وين تضلين

-مالج شغل بيه ولاتحجين بهذا الموضوع نهائيا

-ناويه تكتلين بابا ؟؟

-ماادخل لجنهم بسبب حيوان مثل هذا

-لعد شنو ناويه تسوين ؟؟

ماردت اباوعلها صفنت نزلت عيني على نهاية ايدها اشوف حرگ الزيت رجعت باوعت لركبتها اثار شخوط بيها  عرفتها متحملة وكاتمة بكلبها هواي زاد خوفي عليها  لزمت ايدها رمشت وابتسمت  بقهر ؛ همست تعرفين ليش بابا كيف بالعمى و مارضه اتعالج

-حتى يتحغش  (يتحرش)بيج وماتكدغين تمنعي

-هه استعمل وياي كل اساليب التعذيب زيت وحبس وجوع وضرب شايفة من يعلگني من رجليه ويخلي راسي بالگاع والدم ينزل  شحس

-وصلج

-لو لامس شعرة مني مجان شفتيني لسه يمج اشتم هوا بس تعبت مااكدر كرهت جسمي كرهت عجزي مداتقبل نفسي بعد كمت اشمئز  من كلشي حتى النوم بعد مااگدر انامه بس تغمض عيني احس ايده تتجول على جسمي  تعرفين شنو الاحساس من ابوج  يفكر بيج ومنتظر اي غفلة منج حتى يستولى عليج  ماكلج شي مقرف لااكلك الموت ارحم لاشي اكبر من ذني احساس بشع

-والشاغع انكس من تتسابقين بين الشباب وكل واحد بيهم اقذغ من الثاني الي يهددج اذا ماتجين ويا يشوهج والي يحاول يسحبج بالفلوس والي يسمعج كلام يحسسج انتي اخس من الحيوان وهاي كلها تتحملها وتكتمين بكلبج لان عقلج مشغول بالي عفتيهم بالبيت بدون اكل واشلون تغجعين ويتلگاج ابوج وافلوسج ماكاملة

-كله بسبب محمود

-لااا محمود ماله شغل بسببي اني  لحيت عليه اني هددته اذا لبس النجمات بدوني غاح اعوفه

-هو هم سمع منج بس بدل النجوم لبس الجفن ولبسنا الضياع

-ماضاع شي غاح يجي يوم ونطلع منا وانتي تسوين العملية تشوفين وتغجعين للمدغسة وماما تغجع لضحكتها وجمالها الجانت تتباهه بي وغاية تتزوج غزوان واني افتح مكتبة وأمليها بكتب الدنيا كلها اكعد لازمة كتابي المفضل وتخيل محمود كدامي كاعد مثل قبل واتناقش ويا وهو يتغزل

-بعدج عايشه بحلم محمود

-ماكعدت منه حتى انساه تذكغين من لزمت ايده قبل لايدفنوا وكلتله ماغاح ابجي لان غاح اخلص ايامي بساع واجيج  وهاي اني بعدني على وعدي ويا داحسب للوقت اشوكت يخلص واللحگه نكمل سوه هناك

-المفروض محد يعيش منا بعد الحادث

-بس غزوان وغايه لااا لان هواي عانوا بسببنا  ضحوا بنفسهم وسعادتهم علمودنا خليهم يحققون امنيتهم ويتزوجون وياخذون غند وياهم يكملون بعيد عنه

-غزوان مستعد يعيش عمره كله بحسرة رايه ولا يتركنا وحدنا هذا موبس اخونا لا ربانه بيده وراقبنا يوم يوم نكبر گدامه بتعب امتونه

-مو بكيفه  بس تدخل غايه السن القانوني احجي ويه ماما تقنعه ياخذهن ويغوح بيعد كافي السوا ويانه والتحمله علمودنا احنا ندبغ نفسنا بعد مانعتازه

ابتسمت واخذت نفس سحبت مخدتها رجعت تمددت خليت راسي يمها كمشت ايدها همست وعديني ماتسوين شي وتضيعين لمتنا

-ماكو لمه اصلا احنه عايشين بوهم منتظرين اشوكت تجي بيعه زينه للحيوان ابوج حتى نروح بدربنا

-لاتكولين هيج واني عايشه على املكم بعد مافقدته

-راح تصيرين بغير حضن وتنسي مثل مارح تنسينا

-مانسيته وبعد حضنه مانام بس بالتابوت وانتن غاح اتضلن يمي ماتعوفني وحدي مثل ماعافني

-نامي رئال

-اذا ضغبتي  غزوان غاح يشيل القضية وابوج يزوجنا غصبا عنه غاح نضيع من صدگ

رادت تحجي وانفتحت الباب عصرت ايدي وغمضت بسرعة

دخلت غيمة ركضت لفراشها نامت اشكد لعبت روحي منها ؛ داسحب اديه من بين ادين رؤيا  ضغطت عليهن همست خليهن

-وعديني

-بس الموت يفرقنا

-حتى الموت ماغيده يبعدنا لونموت سوه لو نعيش سوه

-بكيفج تحجين منو يكول رايه تريد تموت ويانه

همست رايه الدنيا المابيها انتن  مااريدها

ضحكت اتقربت يمنه دخلنا كلنا جوه غطه واحد اتحاضنه صح الغرفة بارده بس جان دفو حضنهن وحنان رايه وهيه تمشي ايدها على شعرنا معوضنه عن كل تعب  نحس بي

من كثر الرحة والامان  الحسيت بي بسرعة رحت بالنوم  كعدت على ريحة الجاي تارس المكان  كمت لكيت ماما كاعده وغزوان حاضنها من وراها يبوس بخدها شافني كال صح النوم رئول

-صباحوو  ابن خالي اشوكت غجعت

-ماصار هواي كومي جايب اشلون خبز حار وجبن

-الله عليك اشلون دخلتهن لهنا

-تهريب وروح ابوي تگول مخدرات مو خبز وجبن دكومي بسرعة لايبرد الجاي

-يله بس اغسل وجهي واجي

كامت رند ركضت اله شالها يبوس بيها رحت غسلت وجهي رجعت الغرفة دافية والريوگ بالنص لمتهم وكعدتهم ترد الروح

غزوان يتحارش بماما والكل يضحك  وهيه كوه تباوعله بتعب وتبتسم همست  ربي يديم الضحكة ويريح كلبك يعمه

-ماطول دورين راحه گلبي ماتنطيني بنتج

-هو بيدي يعمة وروح اخوي لو تطلب عيوني مايغلن عليك

-الي يوم اخذها واطفر

-وتتركني وحدي اهون عليك ولك

-لاوالله اتشاقه شعندي غيرج اذا انتي امي وكدرت اتركج مااكدر اترك اخياتي واعرف النذل مايخاف الله بيهن

-هيه الك بس  شد  عودك شويه بعد لخاطر تاخذهن كلهن وتروح منا

-اكثر من هالشد حرام ربي مايرضه

-كلها ايام  اصبر بس تدخل ال ١٨ حتى تعقدها ومحد يگدر بعد يوگف بوجهك

-هذا الكلام اليريح الگلب منتظره من اسنين

رند-: غزوان اريد ثوب هذا صار مزگ

-هذا الاسبوع الج احلى ثوب انتي ورؤيا

رؤيا- مااريد ثوب جيبلي ماسكة امشي عليها بدل العودة ملخت ايدي

-هم اجيبلج ماسكة وهم تكسريها على  ابوج

-لاعيب هذا ابونا بعد مااكسره بالماسكه عندي ماسحة اكتله بيها

- والله فلا تعقلين والج يمي ماسكة بس صبري عليه هالايام

كلتله واني شجيبلي غزوان

-الج عيوني

-ماغيد عيونك هم ياالله هنه والمناظغ يكفن ذولاك الناس ويله وخغ خلي ماما تمشطلي اتاخغت

-شبيها ايدج هم كتلجن الناقص

-شنو كتلنا غير شلوطنه وجان ناوي  يصب الزيت علينه ويشمغنا بالسغداب يمه بس سمعت اسمه اجه بالي بيت اليهودي اشلون انحبسوا الجهال بي لمن ماتوا كلت غحنا انتهينا

ابتسم ابتسامه جذابيه وعيونه تلمع الدموع بيهن جر راسي باسه كال وروح ابوي  لواعرف انطي روحي ومااخلي وحده بيجن تتأذى لاتخافين ماطولني موجود وياجن

غيمه:- ترا اني اختك بس للتذكير

-كلجن خواتي واعز من روحي ماشوف الدنيا غير بضحكتجن

جريت  نظارته منه
-هسه تشوفني

-ماريد اشوف جهرتج جيبيها ويله كعدي اتريگي راح يخلص الاكل

دفعته كعدت يم ماما انطيتها المشط واشرت على شعري يلااا

ضحكت اخذته درت ضهري  اعرفها تعبانه بس بيوم الماتمشطلي احس يومي خنگه احب ايدها وحنيتها من تمشيهن على شعري

هيه تمشط وتظفر ورايه صبت جاي خلت گدامنا ناكل ونضحك الي يسمعنا يگول ماكو هم على گلبنا دفو المكان  وهاي لمة الصبح يمها  وصوتها وهيه تحجي تروي كلبنا

خلصت عالسريع كمت عصرت خدودها بستها ورحت لبست رند وكفت الف الجماغ اجت يمي رايه همست ذني الفلوس

-خليج يم ماما لاتجين اليوم اني اشتغل وحدي

-ولي وتگدرين اتگعدين وحدج بدوني

-يااختي فكيني يوم واحد اغيد اخلص شوفتج اتصعد الجالي عندي

-ولي يله تأخرتي راح يكعد بابا ولاتفرحين  وراح اجي وراج بس حتى اغثج

-بيج حيل بعد زين والله على كتلت الليله اني منج بعد سنة ما كوم

-من اشوف خلقتج گدامي واتذكر ازعاجج  بتصنيفي على لدغتج  اصحح وحدي هيج عافية تنزل عليه من السما

-مشكلة اغيد اغد عليج بس اختي الجبيغه مايصيغ

-غير كلمة اختي مافهمت  

عفست وجهي ضحكت ودفعتني طلعت اضحك وصلت للباب انداريت  اباوعلها راحت رجعت كعدت يمهم لواعرف هاي اخر نظره بينا جان اخذتها لحظني بگد الوجع والبعد الراح اعيشه

اشرت باي ودزيت بوسه بالهوا ضحكت طلعت واني اسمع ردوا يسولفون

كمشت رند نزلنا  طلعت اجه وراي غزوان شال رنود خلاها على امتونه يمشي ويدمغ بيه اوخر ايد ياخذله ثواني ويرجع يدمغني ويشمر حجي

الطريق كله نفس الكلام هم وجه اصبح بي؛ انتي هم حاسبة روحج بنية ؛ منو ياخذج وانتي لاشكل وبنص لسان لحد مازهگني

-صحت تغه زودتها غزوان والله غاح ابجي

-لاه بس لاعندج احساس

-لا مخلوق الاحساس خاص بالفاهيه مالتك

-دخيل ربها اروح فدوه لضحكتها وفهاوتها وانتي تردين تجيبين روحج لمصباح وجها

-عيع ماعغف اشلون غاح تتزوجون يااخي هيه ماتنبلع و تاخذك انت اتعس منها شتخلفون متگلي

-وجوه مشگلبه على خالتهم الي نص حجيها مگلب

-صدگ غزوان اذا بنيه سموها على اسمي حباب

-من حلاته وين اكو وحده اسمها رئااال

-هم صدگ المفغوض  ابدله لان ماعاجب حضغتك   اكلك انت ذوقك  جبته وياك لونسيته ويه عقلك يم غايه

-لاوالله عقلي يفتر  اشلون يلم افلوس وايسويلها زفه الي تحلم بيها

-وتسمي بنتك على اسمي مو گول گول لاتخجل اعغفك معجب بأسمي بس تكابغ

باوعلي صفح

ضحكت ضحك على ضحكتي ودمغني

-صدگ اغيد اسألك سؤال

-اعرف الشفت الثاني وين اودي افلوسه

-دتجمع مو؟؟

-من اول يوم دخلت بي للبتاوين  اتفقت ويه عمتي و بلشت اجمع واحسب لعمر رايه

-بابا ماغاح يخليكم تتزوجون

-ومنو كلج منتظر موافقة ابوج حسبي حسابج بأول يوم تدخل بي رايه لعمر ال١٨ ماخذكم ورايح لغير محافظة

-الله عليك غزوان مدتجذب صدك غاح اطلعنا منا تغه ماضل شي كلها كم اسبوع

-وداعت اللدغه اطلعكم بنفس اليوم

-كلت لغايه هالشي

-لا طلبت منها  نتزوج وننهزم وحدنا رفضت ضليت مصر على هذا الطلب حتى اعصرها لان ادري بيها جبانه اذا كلتلها ناخذ خواتج ونروح راح ترفض تخاف من ابوج بس من طلبت منها هيج وخليتها كدام امر الواقع راح هيه تطلب مني بلسانها  اخذجن وياي وهيج بدون شلعان كلب نروح

-غاح يتقبلونا المحافظات واحنا من البتاوين

-محد يعرفنا ونگعد بمكان زراعي ننعزل عن العالم مالنا شغل بأحد وبس نستقر ابلش الم افلوس لعمليه رؤيا

-تدغي اشك بغؤيا تشوف

-رؤيا عيونها مابيهن  شي الضربة براسها وعمليتها سهلة ماطول ساعتين بس الله يلعنه قفل عليها  حتى ياخذ راتب براسها

-لاتكول هذا الكلام گدام اختك منا لمن نطلع والموبايل مالتك لاتخلي يم ماما بعد اخذه وياك

-ليش صاير شي

-لاهيج بس للامان لان غؤيا وغيمة دوم مو على وفاق اخاف يفلتن الحجي كدام بابا والموبايل دوم بيد غند اخاف تحطمه

-شتحطم منه هو جده كامز حتى رصيد مابي ضال بس ترميشه ولازم يضل يمهن يصير مايصير اقلها يرمشن  على صاحبي واني اتصل هاي عمتي على ساعة توگع

-غزوان اطلب منك شي

-لااا رئال اذا كلتي كتاب اهفج دفره

-شبيك هااا شبك اخوج واخوج تالي كتاب ماجيبلي والله نفسي ضلت وغاا

-وهذا الكتاب اشلون  تقري بلدغه لو همس

باوعتله صفح ضحك عصر وجهي وكال لاتبجين اليوم من اكمل شغلي امر عالمتنبي اشوفلج كتاب حلوه

وصلنا للشغل  اشترالي بنزين  وملمع جام من صاحبه وصلني لمكاني وراح يركض كالعادة مااعرف حتى يدفه لوصدگ تأخر

كعدت رند خليت يمها الاغراض شلت الملمع وركضت للسيارات لان هذا وقت الشغل

اكثر من نص ساعة واسمع رند تصيح تعالي هذا يريد يبوگ انداريت لكيت واحد يضحك وياها كرصها من خدها وراح

رجعت يمها كعدتها ودنگت داخلي الفراش وكفت سيارة يمي لبالي واحد يريد بنزين كملت تسطير بعدني ماگايمه  نزل من السيارة وخله رجله على القماش اباوع بسطال عسكري  رفعت راسي لكيته نفسه الملثم الي شخطت سيارته

اريد اتبلعم بعد مااعرف كمت باوعتله بخوف دارجع ليورا بعدني مامتحركه بحركة سريعة كمش ايدي كال وين تردين

-مااشغد والله

-ونهزمتي شنو حسبالج  مالگفج

- اسفه عمو وداعت خواتي بعد ماعيدها

-ماتعيديهااا ؟؟

-حتى لهنا  بعد مااجي ابد ابد

-خوش حجي والسيارة

- مامبين شخط  صغيغوني حتى ماينشاف 

-حلوو  كالها وطلع سجينة من جيبه فتحها نزلت دموعي

-ليش البجي يابه  هم شخط صغير بوجهج ماراح يأثر شي مو

-والله بعد مااوصل هنا والله

عصر معصم ايدي - من صحتج  ليش انهزمتي

-خفت تضغبني

-يعني عرفتي راح اضربج

شهكت

-شيلي اللثام

-اتوبة اتوبة سيدي اخغ مغه والله

راد يرفع ايده كمشتها بسرعة بأيدي الثانية اباوعله بتوسل

دنگ عصر معصم ايدي حيل صارت عينه على السوار رد رفع راسه باوع للثام  بعدني مامترجيته واجانه صوت واحد من  داخل السيارة صاح  هيذااام وصلوا الربع  استعجل

دفع ايدي وكال دقايق و راجع كون الگاج نفس المكان  والكفل زينب اهطرج بالگاع

اندار صعد بسرعة شحط السيارة وطلع طاير  دنكت جمعت البطالة بسرعة ولميت الفراش خليتهن بالعلاگه شلتهن كمشت رند وركضت احس كلبي يريد يطلع

رجعنا امشي عالسريع اسحل برند واتلفت خايفة يطلعلي واحد ثاني واني وحدي  ماصدكت عبرت والشارع صاحت رند  اوكفييي هذا غزوان

انداريت لكيته استوى جاي شافني ضحك كال يمعوده استوني وصلتج

-واحد  لابس عسكغي لو ماالحظ يخلصني منه  جان الله اعلم اشصار بحالي

-ذولة قوات …هالايام مسوين حملة يفترون شكو مشبوه يشيلوا  ميخلون واحد بالشارع وانتن قريبات عالمركز ممنوع مكانجن

-لالا موهمه هذا اول مغه اشوفه شكله يخوف مبين موبشغ بس لزم ايدي عالكيف طبگ السواغ عالحم صدگ من كالت غؤيا بول تيغي

-حظج وحظ رؤيا تعرفين شنو بول تيري انتي لوبس تحجين

-لا

-جلب محرم دولياً ياكل جثث يستعملوا  اهل الماڤيات حتى يخلصون من ضحاياهم

-اي لعد صدگ شايفه انت اشلونه تكول وحش متحول انوب يگلي غاجعلج عالاساس اني ماكو هيج مايدغي حتى لگمة ماابيه نص جثتي ملابس

-اذاج

-لابس متت خوف وادغي بابا يغيدها من الله 

-هانت يبعد اخوج ماضل شي يله امشي واشولفجن غير مكان بعد ماتردن لهناك

-وانت لويش غجعت

-اخذت اجازه ساعتين  كلت ارد  اغير ملابسي والحگ رايه للمستشفى  ادري بيها ماراح تسوي تحاليل للكلى حتى لايگللها الدكتور  لازم تسوين العملية وهيه تريد تطلع للشغل

سكتت

دنگ شال رند يلگف بيها  ويبوس

رجعنا للبيت جان مبين التعب والربو خانگه بس يكابر مايريدنا نقلق عليه

وصلنا للبيت دفعنا الباب مسلقيه من جوه ؛صفن متفاجأه لان هاي اول مرة تنسد

نزل رند  ونزع نظارته انطانياها اتشلبه طفر فتح الباب هو وعاگد حاجبه يباوع ليورا

دااگله شكو وسكتت واني اشوف واحد واگف ويم غيمه  بيده جگاره وعيونه علينه مثل المامتوقع رجعتنا

ردت الزمه الزمه دفعني وركض كمشه من ياخته جره للگاع ذاك رگعه بوكس بوجهه دفره وكام راد ينهزم مالحگ لگفه غزوان من ملابسه ورجعه للكاع نام عليه يريد يفترسه

ركضت غيمه لزمته من ضهر كامت تسحل وتضرب تريده يتركه

عيني بالهوسه واسمع  صوت صرخة مكتومة من فوگ  تركتهم وصعدت بسرعة دفعت الباب  واشوف واحد ساد حلگ رؤيا ويملخ بملابسها

صرخت غزواااان الحگناااا وركضت بسرعتي شمرت نفسي عليه جريته من شعره  اندار دفعني بكل حيله من قوة الدفعة انشمرت مسافة وكعت على وجهي وهو رد لرؤيا عرفته شارب موبوعيه

بعد مااعرف شسوي  كمت بدون تفكير ركضت  دنگت علیه اضرب واملخ بشعره بس اريده يوخر من كد مامشدوهه ماحسيت نفسي غير ادنگ وانبت سنوني بمتنه بكل قوتي ماتركتها لمن تركها وصرخ اندار جرني  من شعري ودفعني وكعت 

جرت روحها رؤيا بسرعة كامت ترافس وتصرخ لحكونيييي 

ردت اكوم كمش رجليه سحبني اله وصار عليه ضغطت على سنوني دخلت اضافيري  بوجهه وسحبتهن حيل ماحسيت غير الراجدي سطر راسي غمضت افترت الدنيا بيه

راد يبوسني دفعته لزم اديه رفعهن ودنگ يبوس بقرف وريحة الشرب تخنگ بلحظه حسيت روحي انتهيت انشلت كل حركتي

رؤيا تملخ وتضرب بي واني اجر بأديه واصرخ متأمله  غزوان يلحكني

مااسمع غير غيمة صرخت ااااخ يمه وصوت ركضة عالدرج؛ ثواني ودخل بيده سجينة كلها دم

لحظات مثل الحلم مرت بلمح البصر  ركضت غزوان والسجينه نبتت بنص ظهر الولد…

لاتنسون التصويت ❤️