رواية شيء من رصيف الدم الفصل الثالث عشر 13 - بقلم Leo Alfatlawi

شيء من رصيف الدم

البارت الثالث عشر

بقلمي: leo Alfatlawi

***رؤيا***

هيه تحجي واني وگفت احس گلبي يريد يطلع اسمعها تگول بس الصغيرة بنته ذنيج مو بناته بس استغلوا حاجته للفلوس جان مطلوب هواي وهو لابيت لامرة  يشتغل يم خالهن وينام بالمحل  عرض عليه يتزوج اخته ويسجل البنات بأسمه مقابل يسدد دينه ويخلي يعيش ويا نفس البيت

- لعد منين جابوهن

-شعرفني كلما اسئله يگول ماشفت واحد ولااجه احد سأل عنهن اول شوفة الهن جانت راية ورئال صغار كلش ورؤيا بالملف من دخلوا للمنطقة حتى محد يعرف منين جاين ضلوا حدود السنة خاتلين بالبيت حتى طلعة من الباب مايطلعون غير خالهم لحد مافتح اسواق من نفس البيت واشتغل يمه جاسم وره فترة حجه ويا  عاد وافق بسرعة ماصدگ واحد يدفع دينهه وينطي مره بلاش

-اخاف موبناتهم ؟؟

-اني هم شكيت بالبداية لان البنات يلمعن مومال هيج مكان واعمارهن متقاربة ولاتكول اكو فرق بينهن

-ماعدها عقد زواج ماكو جناسي

-ابد لااعقد ولاهويات ماتعرفيهم منين جابوهن بس الاخو جان مخبوص خسر كومة افلوس بس حتى جاسم  يقبل اشلون مجان راد يسد السالفة قبل لايكبرن ويطلعن للشارع يشوفهن

-البنات من كبرن ماسألن ماگالن منين احنا

-ميدرن وهذا عمر امهن عايشة جوه رجلين جاسم  متحملة الكتل والذل بس حتى لايگللهن وتردين الصدگ هو هم جان مستفاد ماگاللهن حتى يستفاد من شغلهن

-وشنو استفاد من شغلهن وينه هسه

-سوده بوجهي مو بذرتهن مو نظيفة ماصار بعينهن لاتعب ولا خسارة ضيعلي اخوي وكل وحده سفطتلي واحد جوه رجليها هو ولاغيره وانوب يردن يشمرن امهن على كلبه يمه غير ينتحرر هم المصيبة  وهم مصرفها دخل الله ودخلج دبريني

-اسويلج شي اخلصج من امهن واردلج البنات يزحفن جوه رجليكم

-الله وايدج اشكد تردين انطي بس كون صدگ تخلصي من المصيبة

تركتها تحجي ورحت امشي مامستوعبة السمعته  كعدت يم الحايط  لميت رجلية لحضني واني فاتحة عيوني على كبرهن رغم العتمة الي اني بيها بس استوني حسيت بالظلام العايشة بي

اذني يمها اسمعها مستمرة تنطي بالاسماء وعقلي بالكلام الكالته اعيد بالكلمات وارجع اهز راسي اجذب السمعته لمن كامت طلعت

غمضت عيني مااعرف حتى افكر او لامااريد افكر  لان حبهم بكلبي يرفض شكو شك اتجاههم

مر الوقت واني صافنة بغير عالم عقلي مشوش؛الشريط ياخذني لذاك اليوم الي وكف بابا بالباب يهدد ماما ياخذنا  منها وهيه تبجي جوه رجلي يخليها تجي ويانه

…هذا صوته يضرب برئال وصرخة غزوان يريد يبعده عنها
رايه تتوسل ورند تبجي بخوف

هاي اني ادفر باب الغرفة المحبوسة بيها  حتى اكسرها  واطلعله

ماما وين  ؟؟

ماسمعت صوتها تكول لاتضربهن  ولامرة شفتها وكفت بوجهه دوم جان اكو خوف بعيونها وتبجي بكتمة 

منو احنا ؟؟

احس  برد نزل بداخلي جمد كل جزء بيه لميت رجليه لحضني حيل جسمي يرجف

…رايه تضحك على غزل غزوان ؛ رند تكمز ؛رئال تصيح ماما وين كتابي

همست انتن خواتي اي داحس بيجن تنبضن ويه دگات كلبي

صدري اختنگ  صعدت راسي للسما اريد احجي ويه ربي مااگدر  شي بداخلي يمنعني

انفتحت الباب دخل واحد لبالي ضبع حضنت رجليه  ودنگت اسمع صوتها نسد صار هدوء مرت دقايق ماكو اي نفس غمضت حسيته اتقدم صار كدامي كعد عرفته من عطره دسار مد ايده مسح خدي وهمس شبيج

-ليش رجعت

-المكان خطر خفت ضبع مايدبرها

-خفت لو ماتثق بي

-رؤيا تركتهم واجيت لازم ارد ماعندي وقت

-نعسانة

-شنو نعسانة  بيج شي

همست وصلني لفراشي  مااگدر اگوم

-بنيتي  شصايرلج

سكتت حتاريت شنو اگله طلعوا ذولة مو اهلي لو  مااعرف نفسي اني  بت حلال او حرام 

دنگ لزم وجهي  :- اكو شي يوجعج احجي

-اشتاقيت لخواتي 

-دقايق وراح تكونين بحضنهن

هزيت راسي لا ونزلت دموعي

اخذ نفس و گعد يمي  سحبني  لحضنه خليت راسي بصدره ضغط عليه  واني  ماصدگت  احصل حضن  اشمر خنگتي بي  بجيت بحرگة طلعت شكو ليالي عشتها بخوف كارهه نفسي من التحرش لزمت بلوزه وعصرته بقوة صرخت رئال وهيه تتوسل لايصب الزيت عليها حضني حيل شهكت دموع رند على خبزتها

طلعت  شكو كتمة بصدري تكول دااودع اخر الم وذكرياتي وياهن

دنگ باس راسي وهمس ادري ضغطت عليج هواي  بس وداعت امي خفت لان اعرفه حيوان وخلاج براسه راح يأخذج بذنبي

مارديت ضميت راسي اكثر امنيتي اضم نفسي مااريد احد يشوف ضعفي

- كافي لاتبجين گومي غسلي وجهج حتى اوصلج

-دسار گلبي يوجعني

- لاتجبريني اخذج واختفي وانعل ابو المهمة لابو اهلج

-لاتعوفني وحدي

-اشصاير رؤيا

-ماكو شي بس لاتتركني  بعد

-منو اجه؟؟ سامعة شي

-لا بس اعرفك حيوان مثله وراح تشمرني عليه مثل ماسوه هو 

-استغفر الله مو تردين ترجعين  لاهلج

-هئ

-شنو الرايدته  احجي

-اضل وياك

-مااگدر اخذج حياتي صعبة راح اظلمج وياي

-لاگول لان عاجزة

-وحگ كلام الله اخليج بنص روحي واترك كلشي  اصيرلج السند قبل النظر بس انتي ماراح تتحملين الدرب الماشي بي  واني مااگدر اجبرج واذيج بعيشتي

- مااريد ارجع اريد ابقى يمك

-رؤيا جاي تفتهمين شنو احجي بنتي ماتتحملين حياتي

-اتحمل والله وانت دتكول راح احميج يعني محد راح يگدر يأذيني

-والبنا الگعبة اليفكر مجرد فكرة يباوعلج امحي مو يوصل يمج

-لعد اخذني وياك لاطلگني وترجعني للحيوان

سكت

-هم راح يبيعني

-لخاطر ادفنه هو وعايش

-دسار لاترجعني

-ماراح يجي يوم وتلوميني اشلون استغليت  صغر عمرج ومانصحتج تبتعدين عني ؟؟

- اني مو صغيرة واعرف شداسوي بس انطيني كلمة ما تتخلى عني

-اتخلى العمر  ومااتخلى عنج

-راح تتحملني بعجزي مايجي يوم وتتندم 

-من اصير جوة التراب وتركج وحدج ذاك الوكت   سألي

-كلهم كسروني لاتكسرني انت هم

-رؤيا متأكدة من التحجي

-هيه كلمة وحده اريد اسمعها منها حتى مااكمل باقي عمري ندم

-اخذج لامج

-لااا مااريد اشوفها

- مكاني بعيد وخطر اذا اگدر هسه اخذج بعدها ماراح اگدر

-ولا اني اريد اروح  وهاي اخر مره اطلب منك اسمع صوتها

- تمام. كالها وطلع فونه دقايق واسمع صوت ضبع يگله ابو الليل حبيبي

-وين وصلتوا

-حالياً يم ابو العز أمر

-تروح لمستشفى ال-- ومناك تخابرني

-لام الخرزة ؟؟

-اخذ وياك واحد من الولد وافتح عيونك عدل الطريق التدخل منه لا ترد بي

-لا يضل بالك اقل العشر دقايق  اكون هناك

سلم وغلقه  صارت صنته اني لامه رجلية لحضني وهو يمي ساكت اعرفه اكو هواي اسئلة يريد يسألني بيها بس اكتفه بالسكوت وهو يشوفني اشلون امسح دموعي قبل لاينزلن

مر وقت ورن فونه رد ها يول

-قريب من غرفة الوالده شنو المطلوب مني

-اكو احد يمها

-لا بس مريضة نايمه بالسرير المقابيلها

-روح يم امها وتفتح كام

-تمام خليك وياي

كمش  ايدي خله الفون بيها مد ايده مسح دموعي گال احجي كل الي بگلبج لاتضمين شي اني طالع عنج

-لا خليك يمي

-قبل لاتحجين وياها انسي كل الطلبتي مني شوفي انتي شنو يگلج عليه  كلبج اني حاضر تردين تضلين وياي اخليج بنص روحي تردين ترديلها اعتبري نفسج صرتي بحضنها

-هيه راح تحدد هالشي

-طالع بره حسبيني ماموجود اخذي قرارج براحتج مهما يكون راح تلكيني مساندج

اشرت اي  دنگ باس راسي وكام طلع كمشت الفون ايدي ترجف ودموعي تنزل غصباً عني امسحهن ويردن  اجاني صوتها تعبان وهيه تكول رؤيا راحت اخيتج

شهكت ضميت وجهي

-يمه ابنيتي هم نختني اخلصها  هم توسلت بي هم بجت خايفة

عضيت ايدي حيل 

-من ردتوا دافنوها هم شفتي دموعها  وهيه دورني بينكم

رفعت راسي اشر لااا

-راحت بنيتي واني مو يمهاا

-اسنين واني اتوسل بيج تخليني انزل اموته  خلصتي عمرج وانتي تضمين السجينة وتوصيهن عيونهن بيه ضيعتينا  راحن خواتي بسببج

-ااااخ يا نار گلبي ولج يمه تعالي ليه ولج يمه  اريد بنيتي

-راحت حالها حال رئال وراية ضيعتيها مثل ماضيعتيني اني وغزوان ليش ماما هيج سويتي بينه

-جنت احسب لغزوان يوم يوم يكبر وياخذجن  حتى اكتل ابوج  جنت اتحمل الوجع واكتم بداخلي حتى لايرف گلبي جنت اسد عيوني واني احسب عدد صرخاتجن لخاطر اطلعها من روحه

-وهو جان يبيع بينا لان مومن لحمه جان يكتلنه لان ماراديله جان يظلمنا  لان متأكد ماراح توكفين بوجهه تدرين ليشش

-انتن بناتي

-مااكدر اگلج ماما لان احسه تخنگني هالكلمة بس اريد اسمع كلمة وحده وبعدها ماراح تشوفين بوجهي عمرج كله

-گضيت عمري  واني احميجن بروحي عيني جانت ماتغمض اذا ماشفت كل وحده بيجن الضحكة تارسة وجها كبرتجن   وامنتجن بيد ابن احضني ورجعت انهي سنين تعبي بروحه حتى تكملن مرتاحات

همست بترجي گولي ذني خواتج ودمجن واحد

-دمجن حلال وروح  الراحت جوه التراب

-اخر مره اسألج ام رايه

ردت وهيه تبجي بتعب وتعيد بكلمات وجعت كلبي اكثر ماهو موجوع عرفت ماراح احصل منها اي جواب داغلقه واجاني صوت شهكت رايه حسيتها لجمة كلبي مسحت عيوني وابتسمت اسمعها كالت برجفة اشلونج لو تگول خمشت روحي

عصرت الفون خليته بحضني دخل دسار اخذه مني رد عليها واني ضميت وجهي بحضني اسمع صوتها وهيه تتوسل بي واني دموعي تنزل اضعاف الالم الي احس بي دقايق وغلق الفون دنگ كعد يمي  لمني بحضنه وهمس شنو التحسين بي

-احس روحي دتطلع

-و هالاحساس مايجي اذا مااكو صلة تقارب بين الارواح

-اتوسلت ردت بس احجاية ترحيني بيها

-هالشي ماتنطلب ينحس

-مداحس بشي غير الوجع

-وهذا اليثبت  الجنتي عايشته  صح وكل الي يدور بعقلج من الوهم

-ماحصلت  من ايام العشتها بينهم  غير الندم

-بس لحد الان ماعرفتي  من عيشتي شي

-مااريد اعرف شي تركت كلشي  وراي وثقيت بيك

وخر راسي مسح عيوني  :- رؤيا اخر مره راح اسألج

-ماراح ارجع عندي دين يم واحد اخذه واني بعيده واخلص باقي عمري وياك

-واهلج

-حتى لو ماجانن خواتي تضل معزتهن بكلبي الهن حق العشره واني راح ارده الهن بأكثر شي يتمننى 

-كومي وياي

-وين

-دقايق وتعرفين

كالها وكام  كومني ويا  جاب قمصلته لبسني وجرني طلع يمشي بسرعة وصلنا للدراجة  سحب الخوذه لبسنياها وصعدني صعد بس شغلها كمشت ضهره داس بكل سرعته

الجو بارد والهوا يگرص يمشي سريع خليت راسي بظهره غمضت  ماعندي اي مشاعر ؛ طاقتي خلصت بعد مااگدر افكر بكلشي ولااريد اعرف السويته صح لو غلط

وصلنا يم مكان عرفته من صوت المي نهر دجلة ركن الدراجة  نزل رفعني من خصري نزلني نزعني الخوذه بعد شعري عن وجهي  همست ليش جبتي هنا

-اريدج تهدئين

-هادئه واعرف شنو داطلب

- تدرين اشكد عمري

-مايهمني

- ٢٩ يعني بگد عمرج مرتين

سكتت

-شكلي وتصرفاتي ماتنطي للبشر صله فتحت عيوني على نظام واوامر  الي يفكر يتمرد  يكسرون ظهره والي يعترض ينهون حياته بدون رحمه حياة ظلمة مابيها غير الظلم ومايكمل بيها غير المثلهم

-راح احملك بكل حالاتك

-ماريد منج غير تكونين وياي صادقة

-ماراح اجذب عليك ابد مثل ماراح اخلي ثقتي بيك بس انت  لاتخذلني ماضل عندي غيرك

-اجذب  اذا اگلج  بعد ماعشت وياج وتعودت على وجودج بحياتي راح  اترگج بس يمكن اذا حسيت بقائج يمي بي اذيه الج وماگدرت اوفرلج الحياة الطالبتها اردج  واضل ارقبج من بعيد منتظر النصيب بلكي يحن ويردج لحضني

-لعد اشلون جنت توعدني ترجعني

-لان درستج وعرفتج اكثر من نفسج  متأكد رجعتج مو لخاطر اشتياقج لا لخاطر تردين حقج وماراح تكدرين تردي بدون سند وماطلبي غير من واحد تغمضين عيونج يمه وانتي واثقه بحمايته

-راح تساعدني اخذ حقي؟؟

- واحميج بروحي واعاملج مثل اب لبنته الوحيده بعد خبر عقمه

-راح اتعبك بعجزي

-اصيرلج الضوه الي يعوضج عن كل عتمه مرت بحياتج

-ماراح تمل  

-جان مليت واني اراقبج كل ليلة عيني بيج خايف تكمل المهمة وتجبريني اردج واني بعدني ماشبعان منج

-عشت حياة باهته  لاتنتظر مني شي

-بقائج وياي يختصر كلشي  اول مره شفتج  بيها حسيت گلبي طاير مثل نوارس دجلة

-لهيج جايبني هنا

سحبني صار وراي دار اديه عليه دخلني بحضنه عصرني و دنگ همس يم اذني لا حتى اگلج كلمة جنت خايف اعترف بيها لنفسي

-مااريد اسمعها لحد مااحس بيها

دنگ باسني عالكيف من ركبتي ورد همس حاولت اسيطر وابعدج عن تفكيري  بس كلبي غدرني  صار يزيد الدگات اضعاف خلاني افقد كل  عهد ماخذه على نفسي بكد مااريد اكتم مشاعري يمج بكد ماصرت مفضوح احس روحي عاجز تلاشت شكو قوه جنت حالف بيها

-يعني تحبني

-مااعرف شنو الحب لان نظام عيشتنا جبرتنا نمحي شكو مشاعر جوانا حتى نگدر نسحگ بدون ضمير  بس الي اعرفه مااگدر اتقبل بعدج عني اذا افكر اطلع شوية احس روحي ضايع ومخنوگ حتى شغلي هملته مااصدگ اشوكت ارد ومن ارجع صرت ادور الحجج حتى اضغط عليج وتتجاوزين لخاطر بس اصرخ بوجهج وارد اخذج لحضني وطفي شكو لهفة حسيت بيها 

-مداحس بأي شي

- بس اني  حسيتج من اول ضربة وانتي ادافعين عن نفسج وتترجيني اتركج حسيت هيج  لازمه گلبي تضغطين عليه وتجبري يرفلج

-انت تزوجيتني لان سمعتك

-غلطة كلفتني سنين هواي وعوضتني بيج

-ماكو مشاعر  بهالسرعة

-بيوم الضربتج بالدراجة رجعت للمقر اريد انام اول ماغمضت اجيتي بعيوني ضحكت بدون لاحس ثاني يوم لا ارادي رجلي خذتني لنفس المكان  اتمنيت اشوفج حتى لومن بعيد  ليش ماادري ولاتسأليني

-من دخلت لبيت اليهودي جنت تدري

-لا ومن شفتج خفت لان حسيت واحد منتبهلي واني اراقب المكان ودزج وراي  مر الليل واني اراقب حركاتج ونظرات اختج

-واشلون تأكدت محد دازنه

-لمعة عيونج ودموعج التنزل ويه كل رمشه جانن كافيات يلعبن بعمري ويخلني بدل ماادور وراج على معلومة اقنع گلبي لايتورط

-لهيج خدرتني وحلفت بس تنقل الاغراض تتركنا

-رحت وصدگ جنت ناوي اترگجن لان منين ماجبتها مارهمت  تركت جمال يراقب المكان بين مادز ولد يشيلون الاغراض

-امم شنو الرجعك

-شعور مراهقة متأخره بداخلي  ماگدرت اسيطر عليه گلت بس هالمرة اشوفها وبعدها ابتعد كلمن يروح بدربه

-لعد ليش رجعت بكلامك

-لان گلبي ناقص دگ لطفلة وبوقت كلش غلط

-يعني اتندمت

-لااتندمت  بعد ماشفت دموعج على اختج وانتن جنتن بطريقي ماعرفت احميجن

-اشلون تحمينا وانت الحكومة ملاحقتك

-هيه الحكومة فتحت على حضي صار ماعدهم غيري كل دقيقتين ودزت دورية وراي طالبيني  تگول  ابو بكر البغدادي مو دسار

-صدگ هذا اسمك الحقيقي

-شبي موحلو

-لابس داسأل معقولة داخل بهيج شغل باسمك الحقيقي

-ليش منو اني حتى اخاف لاينكشف  اسمي ؟؟

-انت زوجي  وراح اكمل عمري وياك ولازم اعرف كلشي عنك

-مثل شنو

-كلتلي قبل انت متزوج

-امم وزوجتي  شلعت گلبي بكد ماهيه حلوه بكد مارعنه وصلفة خو لسانها ينگط عسل وايدها خفيفة لاتعرفها خبلة لاتعرفها واعيه كل ثانية داخله بشخصية وماتركك اذا ماتسحل بعشيرتك الكاع

-عندك اهل

- ترگج من اهلي شعرج اكو امل تمشطي

-من تگلي ليش اجيت لبغداد ودخلت هيج مهمة

-انجبرت

-اذا تركته شنو راح يصيرلك

-يعاقبوني ويشمروني بمكان الشيطان مايوصله يخلوني اردد الشعار الوطني حتى بالحلم

-واذا كشفوك ذولة الدتشتغل وياهم

-يصلخون جلدي وبعدها يفلعون راسي يسوه عبرة لليفكر يوصلهم 

-يعني من الجهتين راح تعوفني وحدي

-ما قررت اعترفلج حتى اعوفج خلص كلشي ماضل بس انفذ واسلم القضية واخذج وروح لاهلي اعرفهم على مكافئه تعبي

-راح تصيرلك مشاكل بسببي وتتحيون عليه

-لسانج اكبر مشكلة بحياتي

ابتسمت عصرني ودخل راسه بركبتي اخذ نفس طويل وخرت راسي

-اريد اطلب طلب منك

-بدون لاطلبين الج كل الوقت ما المس شعره منج اذا ما انت تسمحيلي

-اسمحلك بعد ما ترجعلي نظري

-اول شغلة اسويها بعد ماتمم المهمة

-تساعدني اعرف منو اهلي الحقيقين

-اطلعهم الج من جوه الگاع 

-قبل زواجنا تاخذني ازور گبر رند

-واجيبلج اختج تلبسج البدلة بيدها اخوج يسلمج الي بيده

كمشت ايده دنگ باسني من ركبتي  وحضني حيل همس ليش جاي ترجفين

-بارده

-حضنتي مضوجتج لو خايفة مني

-مااعرف

-اوعدج بعد كم سنة اجيبج بهذا المكان  ويانه جهالنا بس الفرق  انتي الي راح تعترفيلي بمشاعرج

-واكلهم ابوكم خطفني

-وعلي اكلهم جذب هيه الدخلت عليه البيت وفكست بالمهمة السرية بكبرها ومن كد رعونتها  دفرتني بطني

-اكلهم جان يربطني ويسد حلكي ويتركني بالساعات مثل المخبلة اطفر وحدي

-ولاتنسين تذكريهم بالكفشة الي صارت اكثر من شهر مامشطه

-ماعندي مشط

-خرزة البتاووين

-حقك والله ماتحس بالالم شايف من اتخلي المشط وتسحبه وراسك يتمرمط ويا  شنو الشعور

-عوفي شعرج وجهج هذا ماناوية تغسلي 

-الصبح غسلته وبعدين المي باررد شنو ماتحس

-تمام ماضل شي للصيف هم تركي لسانج الي ينگط عسل اشوكت تغيري

-من تبطل تتحرش وتصير خوش رجال

-گلتي خوش رجال

غمضت وهزيت راسي اي

عصرني حيل صرخت دنگ باسني وكال يله  قبل لاتتحول نيه الاعتراف الى شمر

-دسار

-عيونه

-تنطيني وعد

- ماطولني عايش الدمعة ماراح تنزل من عيونج

-لاتعلقني بيك وتعوفني

-طلبي هالشي من ربي لان بس الموت يبعدني عنج

-لعد لاتخليني اتعلق بيك

ضحك وسحبني اله باس راسي لبسني الخوذه همس لاتشمريها بروح اخيتج استوني مشتريها

اشرت اي رفعني من خصري  صعدني عالدراجة وصعد جر اديه دنگ باسهن ودارهن عليه شغل الدراجة كمشته حيل مشى 

شوية وحسيت الخوذه خنكتني نزعتها بسكوت شمرتها وخليت راسي على ضهره غمضت صلابة ظهره والحنية بخشونة صوته هو يحاجيني تحسسني صدك راح اقوى وانسد بي شكد مااجيت مهمومة رجعت واني گلبي يرف

بلحظة تغير كل تفكيري وبدل ماجنت افكر اشلون احرگه هسه ارد كل الم  حسيته بضعف وهو يخلي ايده القذره على جسمي واخذ حق الظلمة العيشني بيها سنين و دموع خواتي الي مافد يوم نامن اذا ما شافها على خدودهن وهنه يترجنه 

وصلنا للبيت سمعنا صوت  عالم جوه نزل ونزلني قبل لايخلي ايده ويسد حلكي كمشتها اشرت لا

جر ايدي باسها همس تندلين الطريق لو اوصلج

-ليش وين تريد

-تركت شغلي واجيتج لازم ارد للولد  الاكل خاله  الج يم افراشج و الغرفة عدل گدامج

-تريد تعودني لو تختبرني

-بنيتي الذكاء مالازم نتسعمله بكل وقت مرات يكون عثره بطريقنا

-ومرات استعداد

-هههههه لو طيرين لكوكب ثاني اجيبج بعد مايفيدج هالحجي

-ليش هاي بس لان اعترفتلي

-لا لان دخلتج مكان جنت حالف مااخلي بشر يقترب يمه

-تكدر اطلعني بسهولة

-لواگدر ماجان شفتيني لسه مجازف و واكف گدامج  اتلفت خايف بأي لحظة يطير راسي

-يجوز يكتلوني مكانك مو شرط انت

-حتى احرگهم  برتبهم وبنفس المقر وعلي مااخلي حتى ذكر الهم اسويهم رماد

-وانت معرض روحك للخطر من الجهتين لخاطر وحده عمية

-مشكلة موبس عمية رعنه وجنها جنية

ضربته بصدره ودرت وجهي مشيت  اسمع ضحكته كملت طريقي عالكيف اتحسس المكان الاطلع منه لمن وصلت للغرفة دفعت الباب دخلت  سلقيتها وراي نزعت القمصلة شمرتها

رحت اتلمس كعدت بمكاني اسمع خطواته قريبة على باله مااعرفه مراقبني بكل خطوه خايف اروح مايدري بعد الصار  لو يشمروني باب اهلي هم راح ارجعلهم

سحبت الغطة دا اتغطة واسمع صوت علاكة قريبة تذكرت اني بدون ريوگ  لحد الان

مديت ايدي انضربت بيها جريتها يمي فتحتها طلعت المي شربت منه ورجعته طلعت اللفه استوني اكل واحس بطني عصرتني غمضت عرفت وقتها حتى نفسيتي انسد عن الاكل

اخذت نفس  خليت اللفه ردت اكوم اطلع احجي ويه العجوز واسمع دخلوا عالم بطلت رجعت گعدت   سحبت الغطه ولميت رجليه لحضني محتاره شسوي

مرت اكثر من ساعتين واني اتسنط بلكي يطلعون لمن  انفتحت الباب دخل دسار سدها  اسمعه شمر اللثام والسلاح اجه يمي دنگ  نزع جفه وخر شعري  عن وجهي گال ليش مانايمة لحد الان

-ماجايني نوم  صار الليل لوبعده

-لابعده  بردانة اشغلج الصوبة

-لا بس تگدر اتصيحلي للعجوز

-ليش شعدج بس لا تردين اتسويلي  سحر

-على شنو اسويلك انت بكد بابا وخاين الدولة قبل المجرمين اشكد عندك ثقه بروحك

-وعلي حلو

-صدكتك من هيج خايف اسوي عملية حتى لاشوفك وابطل

-وليش ماتكولين خايف تشوفين وجهج و بدل العمى يصير بيج توحد من الصدمة

-جان انصدمت من خشونه صوتك الي تكول وحش يصارع الانقراض

-وحش ولا جنيه گصيبتها اطول منها 

-الجنية من الملائكة بس الحوش شنو فنك

-اللاصق وين خليته

-عود اذا سديت حلكي راح تثبت انت رجال

-والله تردين الصدگ لا بس اكو غير طريقه تحبين تجربين

-هاي كل قوتك  تره حتى الحيوان يكدر يسوي هالشي

-ويگلك ليش مجتفها وكاتم صوتها طول الوقت بابا اشوكت تعدلين الفاضج

-من تعدل نيتك وتبطل تشمر حجي

-الي يسمعج يكول صاحبتي بنتي تراج مسجلة بأسمي 

دارد وحسيت بطني وجعتني عصرت روحي بسرعة دنگ عليه كال شبيج

-صيحلي العجوز فدوة

-يمها عالم حتى طفرت من السطح ماگدرت ادخل من الباب احجي شنو يوجعج

-اشوكت يطلعون

-والله  شفت مسودن بره وصخلة يعني شغلتهم مطولة رؤيا احجي بنيتي شصايرلج

سكتت ودنگت واحس روحي فرد مره صرت حتى فراشي راح  اتمنيت الگاع تبلعني على وضعي والعجز الي اني بي  رفع راسي همس شكو بابا فهميني

كوه لزمت دمعتي

-اخذج للمستشفى

هزيت راسي لا

-اجيبلج الصوبة اخاف الالم بسبب البرد

-اي اريد اسبح

-تمام دقايق بس اشوفلج الدرب

-لااني اعرف بس اريد --

-شنو تردي اجيبلج ملابس

-مم وشي بعد

-شنو هو رؤياااا احجي لاتشلعين كلبي

-روح للصيدلية وهو يعرف

-نعم؟؟

-دساررر

-شنو دسار بنتي غير افتهم اروح للصيدلية شنو اكله

-شي مال بنات وهو راح يعرف

-اهاا شي مال بنات كولي مبرد وفضيها

دمعت ضحك وخربط شعري سحب الغطة لفني  عدل كمش وجهي و همس صح الخجل زادج جمال  بس ماريد اشوفه بعد انتي زوجتي تعرفين شنو يعني

دنكت

-العالم شي وحضني شي ثاني الج ؛ صح اني مااعرف بهيج سوالف لان شغلي جبرني ابتعد عن الجنس المغاير بس اشكد مااكدر راح احاول اتعلم لخاطرج

هزيت راسي اي

- هالمره حقج ماحجيتي بس مره ثانية اذا طلبتي من  غيري شغلة راده بينه راح يكون غير كلام وياج

-مااطلب شي من احد اني اعرف اشلون اعتني بنفسي

-يالقويه لعد  كومي بطريقج عدل عالصيدلية

-انت هم عندك غيره روح زين شواربك افضل

-ااف بويه اللسان الي يوم اگطعه واربطج بي

-هاي بس كلتلك ماعندك غيره

-خليتي بيها غيره بربج من اطلع مجازف براسي واحتمال جبير اللگف شكلهم من يسالوني ليش طالع هيج وقت وشنو هذا بيدك

-دساااار كوم روح

-اني الجبتها لنفسي من انت صاحب رتبة وروس كبار تحسب حساب الاسمك   اتورط نفسك بهيج سالفه  ليشش

-محد ضربك على ايدك

-لوعلى ضربة الايد سهلة تنبتر المصيبة بضربة غير مكان

-يعني شنو

-يعني خليج مكانج بين ماشوفلج الدرب واجيب  الصوبة

گام راح طلع واني  بسرعة اتملست الفراش حمدت ربي مابي شي جان كرهت نفسي اكثر مااني كارهتها

دخل الصوبة وصلني للحمام دخلت سبحت وغطيت ملابسي بالمي فركتهن عالسريع  بين ماجابلي ملابس صح اتاخر وحسيت روحي جمدت بس حمدت ربي بوجوده يمي

مر كم يوم  وهو يتصرف وياي تكول طفلة گدامة مايخليني اتحرك من مكاني كل عقله الشهرية شي مؤذي  واني ماافتهم كلشي مايطلع اذا مايلفني بالبطانية وكل مايرد يجيبلي حليب ويجبرني اشربه

شعري خلصت منه مرة وحدة مشطته شافني نزلت دموعي بطل ظفرته اشلون مجان وتركته

رغم جنت خايفة من طريقة عيشته بالاخص من  اسمعه يخابر يسولف بالقتل والتعذيب بكل راحه ولاتكول هاي ارواح بين اديهم بس بديت اتقبل حياته واحسب الدقايق اشوكت يخلص المهمة وياخذني ويا اسوي العملية حتى ارجع اسوي الي براسي

نايمه واحس اصابيعه  يمشيهن على بطني كمشت ايده فتحت عيوني همس دخيل البتاوين واهلها

-كلش مالايكلك تتغزل لاتخرب صوتك بهيج اشياء

-ديله اشلونج انتي جنج قرده نايلون بوجه وسخ  روحي بابا غسلي وجهج بلكي تبين ملامحج

-قرده نايلون ولالفو خاين

-رؤيا خدودج ترفه ليش تخليني اخربطهن الج

-عود شنو هسه المفروض اخاف

-لاوالله واني الي انجب واسكت گومي جبتلج حليب شربي قبل لااطلع

-تره صرت زينة بعد مايعتاز وما صار ساعة من نمت حتى مالحكت اغفة

-بنيتي سمعتي شنو حجيت عندي شغل كومي اكلي حتى اولي واني مأمن ماتوصلين للصوبة

-تره اعرف وين تريد تروح

-رؤيا شغلي ابتعدي عنه حتى لاتكرهيني اكثر ماانتي كارهتني

-ليش هيج دتحس صح ماعندي مشاعر اتجاهك بس مااكرهك

-واني ماريد تحبيني مكتفي بهالشي يله حبابه ماعندي وقت وذني الجواريب اذا شفتج مره ثانية نازعتهن اشلع اذانج

-اني موطفلة دسار تره بديت امل لاطلعين تبردين؛ اكلي زين وجهج  اصفر؛ لاتتقربين للصوبة تنجوين الجواريب والكلاو لاتنزعيهن وو

-اي كملي ليش سكتي لو الاخيره ماعجبتج

-اي بعد لاتحضني مااحب هالشي

-تره انتي زوجتي

-بعدني ماصرت زوجتك من اللبس البدلة البيضة وادخل بيتك ذاك الوقت الك حق حالياً مخطوفة وبيت المشعوذه

-اهاا كلتي ادخل بيتك

-مم

-والي يرد بكلامه شنكول عليه

-طفل

-وشنو الجديد

-هم رد كال طفلة دساااار

-هههههه كومي يخرزة البتاوين  ماضل شي كلها كم ساعة ونشوف الحجي اشلون يجي

-شنو كم ساعة تره الشغلة تأجلت بعد يومين  دسار شناوي تسوي

-لايضل بالج تركج من هالسالفه ؛ رؤيا اذا نفذتلج طلب راح تنفذيلي بالمقابل

-مثل شنو

-بكيفج اي شي يخطر على بالج

-شنو التغير وخلاك تطلب هالشي

-ماكو شي هيج خطر على بالي بما انو ماضل بس كم ساعة على حياة اللفو  والخرزه كلت نختمها بذكرى حلوه

-شنو اطلب اتنفذ

-جربي

-تاخذني لاهلي  قبل لانروح اودعهم حتى لو من بعيد بس اسمع صوتهن اذا خطر عليك

-تم

-واذا اجه يوم ومليت من عجزي لاتسمعني كلام يكسر كلبي تعال وكول راح اتفهمك وابتعد من وحدي قسماً بدون لااعاتبك ابد

-ماعاش اليوصل يم گلبج

-اذا غثيتك بكلمة لو تجاوزت عليك بدون لاحس   عاقبني  بزعلك احجي عليه بس لاتضربني مثل ماجان يسوي وياي

-ماكو اب يعاقب بنته على كلامها مهما كان جارح لان عمره ينقص ويه كل دمعة تنزل منها

-مايجي يوم وتستعر مني وتاخذني بذنب بابا ومنطقتنا

-هاي المنطقة نفسها الي خلت دگات كلبي تتخربط  واحس اني  بشر ومن حقي اعيش بعد ماجنت رجل ألي يحركون بي الجهتين بمزاجهم

-اذا مانجحت العملية ماراح اكدر اشوف اطفالك ولااعتني بيهم 

-راح اضمهم بداخلي همه وامهم عيوني تكون طريقهم  قبل روحي  هسه صار وقت طلبي

-شنو طلبك

-تنامين بحضني حتى لو خمس دقايق كافي بداعت  لايام الكضيناها سوه  لاتخليها بنفسي وعلي خايف تغمض عيني واني احلم بيها

-لاتحجي هيج وعدتني راح تخلصني من حياتي موتكسرني بكسر ينهيني

تمدد يمي سحبني لحضنه باس خدي وخله راسي على صدره حضني حيل وهمس مالگيتج حتى اعوفج بس ادري بيج ماراح تجيني اذا ماحجيت هيج

-لاتعيدها دسار والله كلبي كام يوجعني

-رؤيا هم يجي يوم وتحبيني

-مااعرف 

-شنو اتحسين وانتي بحضني

-اغمض براحة لان ادري اكو من اليحميني

-ومن تسمعين صوتي

-شي بداخلي مثل الامان

-اذا طلعت

-اضل منتظرتك احسب الثواني اشوكت ترجعلي

-اشلون تتخيلن شكلي

رفعت راسي مديت ايدي اتلمست وجهه من حواجبه اكو طبر بنهاية واحد ومنهن  نزلت على عيونه غمض مشيت ايدي وصلت لحيته

شلت ايدي خليتها على صدره حركتها صح عريض بس صلب كمش ايدي گال هااا

-شنو لون بشرتك

-تقريبا مايله للسمار

-اكو وشم بجسمك

-اي

-مو عالاساس ممنوع الوشم بالسلك العسكري

-وشعرفج اني بالسلك العسكري يجوز مجرم صدگ

-ميهمني لو حيوان هم راح اضل يمك

-حي الله الشوارب والرتب  اي حبيبي كملي

-داتخيلك تشبه القراصنه حاجب مطبور ورموش طول وضخم جسمك كله مطبر ووشوم

-يله قرصان ولاغير شي

- راح اتسلم ضبع وياهم

-انتي والضبع  مكافأت سنين الخطر الي جازفت بنفسي بيها

-اشلون راح تخلصه

-مااعرف محتار احس روحي بدوامة

-كم سنه ينحكم اذا لزموا

-مواقل من عشرين سنة

-وانت اذا خسرت القضية

-رگبتي

-زين كله خلي ينهزم ميصير

-اسمه مسجل يمهم مثل ما اسمي اتسجل يم الباشا

-يعني شنو

-يعني لازم واحد منه يطير راسه اليوم حتى يكمل الثاني

-دسااار

-ههههه يخرزة البتاوين اريد نام ساعة لازم اكون مفتحلهم زين

ردت اوخر بس من ذكرت كلامه شي بداخلي يمنعني  دخلت زايد لمني بحضنه دنگ اخذ نفس طويل وباسني خله راسه على راسي اغمض اعرفه جذاب مانايم وخايف بس ماراد يشغلني ويا

دخلت راسي بصدره امنيتي ادخل بداخله واروح ويا مااعرف بشنو احس  بس شعور مااعرف اوصفه ؛خايفة من الوحدة بعد  ماحسيت بالامان

مر الوقت وهو صافن  يلعب بشعري لمن رن فونه جر كصيبتي باسها سحب ايده عالكيف من جوه راسي وكام رد اجه صوت الضبع  ابو الليل حبيبي

-وين وصلتوا

-كلشي كمل والباشا دز الشباب لبيت حسن بلعة وهو ودوهان  طلعوا يم ابو الحديد  بس جاي اشتم حركة موطبيعية

-گلت للباشا هالحجي

-اي گال لاتخاف دارسين المكان عدل وبلغ الشباب يستعدون ويخلون عيونهم مفتوحة بس من نظرته حسيته شاك بيه

-وهذا المطلوب اشكد ماتگدر شغله اقل العشر دقايق وتلكيني سابقكم لبيت اليهودي

-عليها

-ضبع اي حركة تحس بيها اطفر لاتباوع وراك اني اعرف اشلون اخلص نفسي

-لايضل بالك صدگ الخرزتك اشلونها

-انجب ونتبه للطريق راح اطلع

كالها وسد الجهاز  رد دز فويز سيدي خبر الولد ربع ساعه ونلتقي بنفس المكان

قفله ودنگ باسني راد يگوم لزمته سحب ايدي باسها كال كومي تحظري اقل الساعتين واجي عليج

-ماراح تغدر بيهم

-مااگدر اخسر صاحب عمري

-راح يأذوك

-مايلحكون اسلمهم الروس الكبار من بعيد ارد بنفس اللحظه الگاج بالباب اخذج وابعد بكد مالله خالق بعد

-منتظرتك

-رؤيا اخر مره اسألك مستعده تعيشين وياي تره هاي حياتي

هزيت راسي اي

-يله كومي شربي حليبج وتريكي  لان طريقنا طويل احتمال مانحصل اكل ولبسي قمصلتج اول مادگ هورن طلعين

-راح اوكف وره الباب

-اندعيلي

گالها ودنگ اخذ نفس طويل باسني وكام لبس اخذ سلاحه وطلع كمت بسرعة  اتلمست وصلت للصوبة لكيت على طرفها قوري اتلمست يمها كوب صبيت حتى نفس للاكل ماعندي قلق وخوف حياة جديده  ومصير  مجهول  مااعرف الداسوي صح لونابع من غضب وراح اتندم

ماادري اشلون شربته عالسريع وكمت لبست قمصلتي وكفت احسب الدقايق واحلم كل عقلي الحياة صدگ ضحكتلي ورجع نظري  الي مرت اسنين واني ابجي بكتمه ماريد اراوي احد كسرتي

مرت الساعة والثانية وهو ماكو  بده القلق يتسلل الگلبي  كمت اروح اجي اكثر من نص ساعة صوت مااسمعت   تعبت رجليه كعدت يم الباب الهدوء يكتل اكثر من دگات كلبي الي بدت تتسارع

الوقت يمشي عالسريع  والنهار بده  يطلع من صوت الناس الي بلشت تدخل للبيت

ماكدرت اكعد بعد كمت وكفت خليت راسي عالباب اتسنط  استوني  اندعي واسمع صوت دراجة وباب الطارمة  انفتحت ماصدگت  فتحت باب عالسريع  دااطلع وصار بوجهي گلتله ليش تأخرت متت خوف

رد ضبع بس صوته مختنگ گال وهاي اجيت

-ضبع شتسوي هنا وشبي صوتك

-امشي وياي بسرعة اهلج منتظريج

-شنو امشي وياك  وين دساار

-ماكوو وقت دخيل ربج رؤيااا امشيي راح يجون بعد مااكدر اخلصج

-ويين دسااار

-راااح دساررر ررراح وهو يوصينييي بيج ---

***رايه***

وكفت  واني اشوف واحد ملثم يم ماما وهيه بيدها فون اتسولف ويه الشاشة وتبجي رحت امشي عالكيف وصلت يمها واشوف رؤيا كدامي باوعت لماما الي دموعها تنزل بكتمه رجعت باوعت لرؤيا وهيه تكلها عمري كله ماراح اسامحج اتبري مني حتى لااضل ادعي عليج

من همشت روحي نسيت حتى ماما استوها راده لوعيها جريت الفون همست رؤيا صفنت شويه ونزلت دموعها  نسحب الفون من ايدها اباوع واحد مبين من شكله مجرم عرفته من طبرة اليم حاجبه دسار گلتله بترجي دخيلك رجع الجهاز  بس اسمع صوتها

-مووكتها تعبانه  اختج

-من بعيد ابوس ايدك والله راح اموت بعد ماتحمل بس اسألها اشلونها مروتك خويه

-عايشه بخير وصحتها زينه يله عندي شغل روحي

-لالااا انتظر  گللها والله مانسيتها ولالحظه
ادري مابيه خير وماعرفت احافظ عليهن  بس وكلام الله  سويت كل الاكدر عليه  حبسني وعذبني حرمني حتى من الاكل بس حتى ماجيب طاري اسمها

-ولاتجيبين طاري اسمها  نهائيا رؤيا تنسوها  اعتبروها ماتت روحي خويه عينج بالي يمج هيه بعهدتي ماعليها

-مثل ماخذتها مني غزوان طلع وراح يرجعها منك غصبآ عنك

ضحك وسد الفون  بسرعة سحبه الولد مني راح ردت اللحگه  كمشت ماما ايدي انداريت  همست بتعب راحن اخياتج

نزلت دموعي جرتني لحضنها وبجيت بصوت عالي عصرتها همست بوجع يمه راحت رنوده هيه وتبجي من الجوع

-راحن اخياتج يرايه صفيتي وحدج

- يمه كلبي يوجعني

-دورن حضني نشد عن العافتهن بروحهن ولج رايه رنوده  هم دورتني قبل لاتغمض عينها

-ماتت وهيه تون من المرض ماتت وهيه تگلي وين ماما 

-دفيتها عدل قبل لادفنوها

-ماشفتها دفنها بدوني مالحكت اخذها بحضني وأمنها بعدني يمها

-ررربي  متگلي اشوكت تگلبهاااا

-راحت رئال وهيه خايفة تباوعلنا وراها ورؤيا خذوها  من حضني غصباً عني

عصرتني بحضنها  وشهكت بقهر  حسيت رخت حضنتها شلت راسي لكيت راسها عالسدية مغمضة كمزت كمشت وجهه اضرب عليه ماحسيت نفس انخبصت شسوي طلعت اركض بره صارت بوجهي دكتور  صحت الحكنييي  ماما راحت منييي

اجه  يركض رجعت للغرفه لكيتها على وضعها ركضتلها كمشت راسها اهز بي وابجي بتوسل  ترجعلي وصل الدكتور وخرني دنگ فتح عيونها باوع بيهن رد كمش ايدها يقيس النبض

هو يتفحصها واني وكفه متصنمة جسمي يرجف اباوع لوجها بدون لون  حتى مالحكت اشكي كل همي ولا اسمعتها تهدي بيه  احس رجليه بعد متعيني

رجعت ليورا كعدت بمكاني وعيني ويه ايده  تتنقل لساني عاجز حتى عن الدعاء

اكثر من نص ساعة يحاولون وياها  واني حتى حيل ماضل عندي دنگت حضنت رجليه  استعد لفقدانها غمضت واسمع الدكتور گال فاقت كافي تركوهاا

نزلت دموعي وضحكت

اندارلي گال انتي وياها

هزيت راسي اي

-تعتاز ابره راح اكتبها ترحين تجيبيها من جوه لان مامتواجده بالمستشفى 

كمت اجيت يمه لزمت ايدها وهو دنگ يكتب  مسحت وجها  مد ايده انطاني الورقة و گال اذا تجيبين اثنين يكون افضل

-هسه كلها معزله تتحمل للصبح

-والله وضعها مايبشر بخير من الافضل هسه تاخذها لان حالتها تعبانة كلبها لاسامح الله  على ساعه يسكت

-لالا اسم الله عليها گلي وين اروح

-اكو صيدليات خفر بعد ساعة عن المستشفى

-تمام هسه انزل اجيب منها

اتحمد عالسلامه وطلع  باوعت داير مدايري اريد احد اطلب منه افلوس لو انخاه ماكو بس وحده جبيره نايمة

دنگت بستها من راسها  كعدت يمها  همست يم اذنها ام رايه لخاطري كومي گليلي شسوي لاتخليني هيج محتاره

صفيت بيج لاتكسريني اكثر مااني مكسوره والله مااغلي روحي عليج بس عجزت وين اروح منو ينطيني افلوس

رفعت راسي خليت ايدي على راسها امسح على شعرها وترجه ربي ينطيها القوة لحد مايرجع غزوان

مر الوقت واني اراقب نبضها  واقرا ايات قرآنية خايفة افقدها بأي دقيقة  استحقرت فقرنا وعوزنا اتمنيت اغمض عيني ماافتحها شي بداخلي ينعصر ويه كل شهگه منها

لحد ماارد الممرض رجال جبير  گمت كال جبتيها للابره

دنگت العبره لازمتني

-سويلي مجال خلي اقيس ضغطها

وخرت وهو وكف قاس ضغطها والسكر  همست بس شويه لبين مايجي زوجي

-الحمدلله استقرت حالتها واذا استمرت على هذا الوضع راح تتحمل للصبح بس هم لازم تجيبوها

-والله اجيبها بس يجي زوجي

-ان شاء الله خير هيه شوية وتصحى تبعدها عن اي توتر لان حالتها النفسيه جدا تعبانة واستوها صاحية من غيبوبة خطر عليها اي انفعال

-ماراح اخليها تذكر كلشي

-اول ماتصحى حاولي بأي طريقة اتوكلها بالبداية سائل دافي وبعده اشياء خفيفة وتاخذيها تغسليلها حتى تتنشط الدوره الدموية عدها

-تمام

اتحمد عالسلامه وراح حسيت براحه موتكول كال حالتها استقرت تكول  انطاني امل جديد بست ايدها  ورجعت گعدت كدامها  لازمتها حيل احس راسي يفتر من الهبطة  خليته  على السديه عيني بالساعة منتظره رجعت غزوان اكثر من ساعه ونص وهو ماكو 

غمضت بتعب اجت بعيوني رؤيا ليش هيج جانت تحجي وياها بقساوة  وشعرفها صحت معقولة مراقبتها من بعيد

رئال شنو حالج هسه هم بعدج تذكرني لو هم كلبج قسه مثل اختج

اخذت نفس فززتني ماما وهيه تهمس  رايه رفعت راسي ابتسمت بوجهه

-اريد مي

-هسه انطيج بس بعد لاتحجين وياي زعلانة منج ماما

-تعبانه يبعد امج

-تعرفين شنو سويتي بيه من غبتي عن الوعي اجيت اموت بحال راح غزوان يجيبهن لاسامح الله اذا صارلج شي شنو اكللهن

-بعد مايجن

-لاراح يجن بس جانن منتظراتج تصحين لان البيت بدونج ماينراد ولالبالج رؤيا سمعت هيج حجي وصدگتي شنو ماتعرفين ام لسان تريد بس اتعزز روحها

-راح يأذون اوليدي

-محد يأذي غزوان اتغير موذاك الطري السجن سواه انسان ثاني وانوب صاحبله واحد من العرب جنه ثور هايج من ذوله اهل العرض اول كلمة گله افاا وانه اخوك  ذني عرضي قبل لايكونن عرضك تاخذهن من هالشارب

ابتسمت

دنكت بستها :- اووف تدرين اشكد اشتاقيت لهاي الضحكة واشتاقيت لمكانج بينه

نزلت دمعتها مهضومة غمضت لزمت مداليتها وهمست بحرگة راحن بنياتي بسببك 

-والله راح يرجعن

-ولك ربي عاقبني بشر اعمالك ولك تعال ردلياهن

-فدوه اروحلج كافي

-ولج گلبي يسعر نارر ولج رايه بنيتي عفتها تلعب

-دخيلج لاتذكريها لخاطر الباقيات ماما والله اتبهذلنه بدونج محد رحمنا تعرفين رئال فاهيه وجبانة  ورؤيا عرمة تشمر روحه بتهلكة بدون لاتحس لاتضيعيهن مثل الراحت اتحملي علمودهن

-رئال غصوبها عالزواج

-تعرفين رئال تموت ولاتخلي واحد يغصبها بس سوت هيج حتى اتخلص رؤيا وغزوان وتاخذ حق رند

-تكول مرتاحه  بس كلبي وجعني عليها حسيتها  اجذب

-اتصلت بيج

-اي حمدتلي بعيشتها  وگالت زوجي بس عالورق   وكالت لغزوان اني ادزلك افلوس بس طلعهن

-هاي شوفي عرفتها رئال ماتنغصب على شي يعني متزوجه بقناعة وهسه اجه الوقت الي نرجعها ورؤيا هم اندلوا مكانها راحوا يجيبوها

-متجذبين عليه

-لاااه يبا انه هيج على گوله ذباح

-هه منين هذا ذباح

-صديق غزوان الي ناوي  يناسبا بوحده منهن والله رؤيا تجي ويا عدل نفس السوادين لولاا رئال هيه جبانة وهو مبين مايتفاهم راح يكون اكشن  

-وليش مو انتي

-ام راايه لاتخليني ابلش لو لا مارد عليج هسه يجي زوجي هو الي يرد

-تزوجتي؟؟

-مم من شوية عقدنا اتمنيتج وياي بس يله اريدج تعوضيها بعرسنا

-ربي يسعدكم ويرد خواتج بحضنج تاخذيهم وترحن تكملن حياتجن براحة

-الامان اذا مو بحضنج مانريده گومي فدوه اروحلج رجعي لمينه مثل قبل والله تعبت وحتى دموع ماضلت بعيوني ادري وجعج جبير بس احنا مالنا ذنب

سكتت

-اتحبينا لو ناوية تخليني هيج مطشرين تره اني هاي كدامج مااكدر المهن اشما اسوي اضل ضعيفة مومثل قوة الام وحنانها على بزرها

باوعتلي اشرتلها  اي ودنكت بستها صح ادري حزن كلبها جبير وادري كل الحجيته يمكن مايتحقق بس ردت اردلها الامل واخليها تتمسك بالحياة اشلون مجان

شوية وجابوا وجبه العشه شوربة سندتها گوه كعدتها  وكعدت يمها اوكل بيها واسمح دمعها قبل لاتنزل اكثر من ساعة ونص اني اقنع راح يرجعوهن ولازم تقوين نفسج لمن شفتها صدگ بدت اتفك

كمت دااشيل السفري حتى ارد انيمها ودخلوا ذباح وغزوان عيونه تلمع باوع لماما وابتسم  اجه بسرعة دنگ باسها و گاللها البشارة عمة

-فرح گلبي

-اخذنا حق رند النكس اخذوا للمغتسل

فتحت عيوني على كبرهن درت وجهي لذباح  بسرعة ودنگ يحك بحاجبه

ماما -واخياتك

- رئال اندليت مكانها مااگلج مااردها بس رادلها وقت لان عاشية يم عالم كلهم ضباط

-ورؤيا

-مكانها محد يندله الولد الي يوصلنا مكانها غيره وعمي من رجعنا للبيت لكيناه منهزم لان اهل النكس هاجمين عالبيت  طالبين دمه

-انهزم بعد ماضيع بنيتي

-مامهزوم خاتل بنفس المنطقة خلينه جماعة ذباح هناك مراقبين المكان مايفلت يلكفوا ناخذ العنوان ونسلمه لهل النكس مكان ابنهم

-غزوان يمه  اخذ رايه وروح منا

-لاراح ادزجن انتي ورايه لاهل ذباح تضلن هناك  لحد ماجيب خواتي واجيبكم

-روحي مو اعز من روحك ماتحرك اذا مااخذك وياي ترجعني لبيتي انتظرهن هناك ردهن لحضني ساعتها كول يله نروح منا

-ماراح تتحملين مكانهن الخالي

-انطيني كلمة ترجعن الي واني ادوس على كسر گلبي مو بس اتحمل فكد الراحت

-انطيج روحي موبس كلمة

-روحك الك يبعد عمتك غزوان لاتوجع كلبي بيك

ذباح.- يبا عسى گلبج طيب غزوان بأمانتي وحريماتج اخياتي  تاخذيهم من هالشارب بس انتي كوميلنه بالسلامة

- الله يحفظك لشبابك ويرزقك بنت الحلال

غزوان. - عمه عنده ثنين

ذباح-  يباا عليش تگطع حلال ربك وهاي جنت ناوي اناسبك برضيعتي

اتجتفت باوعتله رفع حاجيه رد كمل بس يله شنكول للنصيب

غزوان. - يمعود استوني عقدت كلش موقتها

-هههههه تتهنى يبوي يله اسند عمتك لخاطر ازتها يم الاهل واردلك

غزوان باوع لماما اشرت لا اتوسل هو وذباح رادوا منها شافوها تعبت بطلوا ضلينه للصبح جابولها الابره اخذتها حالتها استقرت طلعنا رجعنا للبيت جنت متوقعه راح تبجي وتنهار بس تفاجأت  من دخلت للغرفه دنگت شالت اللعبة  وراحت كعدت بمكانها حاضنتها ردت اخذها خزرتني بطلت

غزوان راح ويه ذباح  وغيمة اصلا ماصعدت معزولة حتى حجي ماتحجي ؛ ضليت اني  ايد بالغرفة انظف عالسريع وعين بماما خايفة يصيرلها شي

گوه لازمة دمعتي احس العبرة جارحة بلعومي بالاخص من اشوفها لازمة مداليتها عينها تتنقل بين مكاناتهن وصافنه بغير عالم

اشكد حاولت اكمش روحي بس كل شغلة اشيلها ترجعني لذكره لمن وصلت لكتاب رئال ذكرت ضحكتها من دخلت تأشرلي مشتريته وضاعت ضحكتها بركضت رند وهي تتلكاها لبالها شي الها

ماتحملت گعدت حضنته وبجيت بصوت عالي طلعت شكو قهر واشتايق الهن لمن سمعت صوت ماما انداريت لكيتها عاصره لعبة رند وتون بدون وعي

مسحت دموعي وكمت بسرعة اخذت الابره رحت يمها سحبت ايدها ضربتها جريت راسها  لحضني لحد مااخذ مفعول العلاج ونامت خليتها بفراشها غطيتها 

مر كم يوم وغزوان مايرد غير تالي الليل  عيونه تعبانة كوه يمشي اديه كلها شخوط حتى دم طالع منهن اعرفه بالنهار يدور وبليل يشتغل يحمل سكراب شفت مسائي لان كثرت عليه المسؤولية فوگ البيت وخواتي علاج ماما

…كاعده عالدرج عيني بالبيت ظلمة وصنتة مابي بس غيمة وخانسة بغرفة بابا بعد ماجان هيج وكت ماتكدر تگعد من صوت من جهة جماعة بابا ومن جهة خواتي وهوستهن  

باوعت گدامي باب البيت ابتسمت مر شريط رئال من تكمش ايدي اتشجعني ندخل وهيه ميته خوف

شلت راسي رؤيا وهيه تتلاوه وياي تريد تطلع تكتل بابا ضحكت وين صفى بيجن الوكت اشلون حالجن هسه

اخذت نفس كمت اتمشيت للسطح  وكفت جتفت اديه انتجيت عالحايط اباوع للگمر مر وقت واني اتأمل بي حسيت اندارن اديه عليه انحضنت من وراي حسيت بدفوا وتعب متونه من لزمته دنگ همس بصوت هادئ

صغير جنت وانت صغيرون  حب عرفنا بنظرات العيون گالوا تره ذولة يحبون من الصغر لمن يكبرون

ابتسمت

باسني عالكيف :- ليش بت روحي كاعده لسه

-دااذكر واحد جان هنا يكعد بالساعات بدون ملل وهو ينتظرني بلكي يحن گلبي واجي يمه

-مم وينه هالواحد

-شالع گلبي صرت ماشوفه غير دقايق هو ونايم  بعد ماجان يركض وراي بس يريدني احجي ويا

رد دندن مثل النهر ماتغيرنا حبنا كبر واحنا كبرنا محله الحب الي جمعنا مثل الطيور احنا طرنا

-ههه جانت اغنيتها المفضلة  تنتظر الصبح حتى تطلع وتسمعك تغنيها بالطريق

- الوحيده الشاهدة على العذاب والعشنا واحنا نحلم يجمعنا حضن بالحلال

-وهاي انجمعنا بس هيه راحت

-ماراحت راح اردهن واخذجن واروح بعيد اخذلجن بيت اعوضجن عن كل الشفتنه بحياتجن

-خايفة

-من شنو

-خايفه افقدك مثل مافقدتهن وكتها مااكدر الحگك لان ماما وراي ولااكدر اكمل بدونك

-شنو مخبل اموت وعوفج بعد مادخلتج بحضني الي خلصت عمري احلم بهالشي وحتى هنه راح اردهن واواصل ليل ونهار حتى الم مهرج واسويلج عرس تحلم بي كل بنيه

-ماريد غيرك

-اني ماريد اخلي شي بنفسج ادري مقصر وياج بس وروح اهلي مااكدر اسوي اكثر من هيج بليل احس امتوني متعيني واني احمل الحديد من التعب والنهار حيلي مهدود من الهم واني ادورهن بكل مكان مثل المسودن خايف تنزل دمعة وحده منهن واني بعيد عنهن

-بابا ماحصلته

-ماكو اختفى ماخليت مكان ورا ماخايف على رئال بكد رؤيا احسها تنهش بروحي كل ماغمض عيني تجي لمعة عيونها العاجزه بعيوني

-مهري وحفلة  زواجي مكانهن عملية الها

-واسم اول بنيه  انسميها رئال

-هههههه واذا ولد محمود لخاطر تحرمناحتى من شوفته تكابله ليل ونهار تلدغ ويا

-متنازل عن كلشي ماريد غير افتح عيوني الصبح اشوفج بحضني نايمة اخذ نفس واحمد ربي على عوضه

-بس هااا من هسه مااروح لديره هذا صاحبك نشوفلنا بيت بغير محافظة

-ليش تره  كفو وصاحب مواقف وهاا انطيته كلمة اناسبه بوحده منهن بعد وكفته الي اخ مايوكفها

-هو الي ساعدك تدخل المستشفى تكتل الولد لو زوج رئال ؟؟

-تعرفي منو ومن يردن خواتج بحضنج نطلع منا ونستقر بالبادية

-شنسوي بالبادية

-اشتغل ويه ذباح بالنوگ هناك هدوء وامان راح اگدر احافظ عليجن احسن من هالمكان الي دخلته  وحدها تخليك تكره نفسك كد القذارة

-اهم شي كون اكو مدارس قريبة  خطيه رئال ضل بنفسها تكمل

-وانتي

-اني انتظرك كل يوم ترجع من الشغل اتلگاك بالباب اشمر روحي بحضنك ازيد فوگ تعبك تعب اخليك تنعل ذيج الايام الجنت تحلم بيهن بيه

-احلى تعب ربي لايحرمني منه

انداريت باوعتله  لمعة عيونه واضحة من وره المناظر  وجهه تعبان

ابتسمت خله اديه على خدودي خشونتهن مبينه گد الشغل حس راد يوخرهن كمشتهن

اتحسر نظراته تتنقل بين عيوني صافن تحس روحه تعبانة اكثر من جسمه اخذ نفس وهمس وكلام الله احبج

مااعرف شصارلي واني اسمع الكلمة واشوف لهفته وهو يحرگ ايده بهدوء على بشرتي غمضت حسيت انفاسه قريبة لزمت ايده عصر اصابيعي  ودنگ على شفتي طبع بوسه

روحي رفرفت كمشته حيل وهو سحب شفتي شعور مااعرف اوصفه واني بين اديه اتبنج كل جزء بيه  گلبي ماحس بدگاته 

طفرنا على صوت تكسير بطل كزاز وصوت واحد يغني بثكل واحد باوع للثاني هو ضحك واني دنكت خجلانة

جرني گعد يم الحايط وكعدني يمه سحبني لحضنه خليت راسي على صدره ريحة التراب والحديد بملابسه وحدهن يخلني احس شكد تعبة وخوفة علينه 

غمضت حضني حيل دنگ باسني ورفع راسه للسما يشكر ربه ؛ مو تكول على السطح والجو بارد حسينه روحنا  بالجنه  خله راسه على راسي مامصدگين كاعدين سوه

ضلينه للصبح هو يسولف  شنو ناوي يشتغل حتى يسيطر على المصرف اكثر واني لامه روحي  راسي على صدره اباوع للكمر وابتسم مثل الي اكله شوف هاي امنيتنا  اتحققت

ماجنت ادري الدنيا اشلون راح ترجع تجبرنا واحد يترك الثاني ونظل نباوع لحلمنا من بعيد بكسرة

مرت الايام ويوم اصعب من يوم اهل الولد اتخبلوا بس يردون يلوحون بابا الي اختفى نهائيآ

غيمة  دائماً الزمها تسولف ويه عمتي بالباب وبعدها بدقايق ترش مي بالاخص من شافت ذباح وصلابته صارت غير شي اني هم مالي شغل بيها محتارة بماما الي حالتها كلما جايها تزود

واكفه بالمطبخ اسوي الغده وماما گاعده  تباوع لغيمة بنظرات تخوف استغفرت ودنكت دااثرم وانفتح الباب دخل غزوان وراه ذباح صاح ياالله

طلعت  لكيتهم داخلين  ذباح بلبسه الاسود مطبگ ردانات قمصلته بيده سلاحه وغزوان يمه يعدل بنظارته ؛ اختلاف شاسع بين الترافة والشر

باوعلي غزوان وابتسم همست الله يساعدكم

غزوان-  ويساعدج حبيبي كملتي الغدة

-اي دقايق اخذ ابو في للحمام حظرتلكم مي دافي بين ماتغسلون  راح يكون الاكل حاضر

اشر اي اني دخلت للمطبخ وهو اخذ ذباح  للحمام دقايق واجه يمي حضني من وراي باسني بركبتي دفعته حجيت بصوت ناصي صدگ دتحجي وخر ساعة واجه صاحبك

-حبيبي تره يعرف هالشي متزوج اثنين

-اي وانت ليش مركز عالاثنين بس لاقنعك تاخذ اخته

-مم واذا اخذتها شراح تسوين

-اصلا عادي مااهتم تلكيها تشبهله الي هيج ضاله على گلبه لسه محد ماخذها

-حمم

-مامصدك روح شوفها  اذا ماطلعت محترگة  مثله؛ وجها تكول جينكوه مزنجره مثل وجهه تعال عتبني

باوع وراي كوه كتم ضحكته انداريت لكيته وراي رافع حاجبه دنكت  احس الخجل كام يطلع من عيوني وغزوان طكها ضحكة بصوت عالي

همست اسفه

مارد دنگ حك خشمه

-والله ماقصدي  هو استفزني

-لايبا ماصار شي ومچان هالچلمة زواجكم عليه بس سجبيلنه الزاد 

غزوان- هههههه ياغده والك نيه  تاكل بعد

-الله يغسل حضك

-اكثر من هالغسل حرام بس لاوالله ذباح التشبه قاتل ههههههههه

-استغفر الله اشلون يخليني اجرب اسمي بي

ديرد  وندگت الباب حيل وصوت واحد يصيح بعلو صوته غزززوان

طلع يركض واحنا ورا فتح الباب احس الدم جمد بكل جسمي …

لاتنسون التصويت ❤️