رواية شيء من رصيف الدم الفصل الثاني عشر 12 - بقلم Leo Alfatlawi

شيء من رصيف الدم

البارت الثاني عشر

بقلمي: leo Alfatlawi

***رئال****

ستضل يتيماً في غياب من تحب
حتى لو احتضنك العالم بأسره…

شمرني عالباب بكل حيله وصاح اخذوهااا؛
من قوة الدفعة ماسيطرت وگعت على وجهي احس خشمي صار نصين وشي حار نزل؛رفعت راسي گوه واشوف عمتي ام هيذام ويمها اثنين حراس شكلهم يخوف

بثواني مر شريطها من وكفت تهددني بمصح الامراض النفسية ؛ شفتهم تقدموا بدون شعور گمت ركضت لعمي لزمت ايده باوعتله بخوف وهمست والله ماسويت شي دخيلك

ضغط على سنونه جر ايده مني وكمشني من شعري شالني شيل منه حسيت روحي شاطت لاارادي صرخت ماحسيت غير الراجدي سطر راسي رفعت اديه احمي نفسي واجتني الدفره بنص بطني  گعدتني بمكاني

غمضت باهته شال رجله دفعني للگاع بقوه انگلب خلاها على رگبتي وحجه من بين سنونه كم مره حذررررج

اريد اعدل نفسي لواحجي مااگدر حذائه كاتمة النفس ؛صرخ موياااج ورد دفرني بوجهي سديت عيوني حيل وانطويت

صاح اسماعيل واني بعد مااريدها هيه طالق

- تعالوا شيلوهاااا

هو صاح وعمتي ركضت دنگت گومتني خلتني وراها وگالت بس اهدأ خلي نفتهم

ابرهيم - وخرري عنها خلي ياخذوها لاوداعت ولدي اخليهم ياخذوج انتي وياها يدفنوجن سوه

- خلي يدفنوها يطبها مررض بس خلي نعرف منو الي انطاها موبايل وويامن تحجي

-راح تعرررفين خلي اسلمهاا واخليهم يسحگون على راس اهلهااا  وتعرفين النكس منوو وخررري عنهمم

-بس اهدأ منو يكول حجي هالة صدگ انطيها مجال تحجي خلي نفتهم

-شتفتهمين هذااا الجهازز بيدي شوفييي مكالمة ست ساعاااات وسمعتها بأذني تسولف اشلون تنهزم

-افتح الجهاز وشوف ويامن جانت تتفق اذا صدگ جانت ناويتها موبس حجي  ماامنعك اخذهاا وضيع خبرها نهائياً 

وكف شال الجهاز ايده ترجف اتصل خلاه على اذنه كمشت كلبية عمتي من ظهرها اول مره اشوفه هيج متوحش

ثواني وشمر الجهاز بكل قوته فلشه بالحايط وصاح  اخذوهااااااا

همه اجوا و عمتي لطمت على وجهه احس رجليه بعد ماتعيني گعدت بالگاع وصلوا يمي دنگ واحد راد يلزمني دفعت ايده ورجعت ليورا بسرعة  وباوعت لعمي بتوسل همست دخيلك عمي

-انعل لابووو لابووو عمج  شيلوهااا ولكممم

-والله اختي والنبيي اختي

-يااختج بت الزنااا اني تالي عمري وحده مثلج اتسود سمعتييي

-والله والله ماسويت شي حتى افتح الفون وشوف الغسائل والحجي بينا وغوح اختي مااجذب

-واختج هيج تجين  تتختلين هنا تحجين وياهااا

-ماتختلت والنبي  حتى سأله هو گلي ضلي بهاي الغغفه هذا يمك وداعت ماما هو گلييي

- خوش حجي نگول هو گلج وهاي اختج ليش ماترد

- عايشه يم ناس بالجنوب اصدقاء غزوان وتتصل بسكوت لان ميقبلون عد ابنية جهاز والله عمي اتصلي بيها بليل غاح تسمعين صوتها

-منو انطاج جهاز؟؟

-محد اني لكيته على الميز واخذته لان اشتاقيت لماما والله ما غلطت بس اسولف وياها شويه أمن وسده حتى  اسأل اسماعيل اذا قصغت ويا لو شاف عليه شي

-صار اشكد عندج

-كم يوم يعني مو هواي ماعغف اشكد شوفوا المكالمات

-كل يوم تتصلين بيها

- بس بليل شوية

-واذا اتصلت وعرفت غير هالشي

-وغوح اختي مداجذب واذا مجذبه صدگ ادفني

-بالنهار هم تتصل

-لاااا والله الوكت كله ويا مااعوفه ولا لحظة

اندار لاسماعيل اشرت شنو

اسماعيل - اي وياي حتى بليل بس مرات اضوج من وجودها بالغرفه اكللها تطلع تنام بالثانية

-وبالنهار هم تختل هنا

-لالا ابد لو تنظف لو يمي ماتختلي بروحها ابد عوفوها مالكم شغل اني راح اردها لذمتي

-تردها لذمتك شنوو  اثوول انتتت

-لا تسرعت وطلكتها غلطت واني اربيها  على ضمت الموبايل واذا صدگ طلع عدها شي اخذها اشمرها بالمصح لحد ماتموت يطبها مرض

- خوش حجي ام هيذام سحليها حبسيها بالحمام لليل اذا ماخابرت اختها وسمعت صوتها اعرف اشلون اسحگ راسها وامحيها هيه واهلهاااا

اشرت اي  اندارتلي دنگت سندتني كمت وياها ؛ عيوني بأسماعيل اريده يوكفلي لويعترض ماكو هيه جرتني وهو دار وجهه عرفته موبس مريض نفسي لا جبان واي رجوله ماعنده

اخذتني تسحل بيه تكول حيوانه فتحت باب الحمام  مجرد شوفته وهو اظلم والرطوبة الجايه منه تعصر الروح

دااگلها فتحي الضوه مانطتني مجال دفعتني وسدت الباب قفلته وگفت  اتلفت هندس ماشوف كلشي

تلمست الباب لميت نفسي گعدت وراها حسيت بروده الگاع ثلجت جسمي مسحت خشمي بضهر ايدي نزلت رداناتي سحبت رجليه لحضني خليت راسي عليهن وحضنتهن صافنة اني شسويت بروحي

مر الوقت ماكو اي نفس اذني يم الباب روحي باهته منتظرة مصيري المتعلق بأتصال راية ؛البيت هادئ مابي غير الحرس بالباب عرفت الدنيا متوقفة يمي مالي اي وجود  حتى لو اموت محد راح يلاحظ

صار الليل واني على وضعي خاله راسي بزاوية  الباب وفاتحة عيوني اباوع لصورتي المعكوسه والدم اشلون يابس بوجهي؛ فزيت على دفره صارت  ظهري مو بالباب

انفتح القفل والضوه سوه ردت اگوم مالحگت  اندفعت الباب بقوة انحشگت بالحايط دخل عمي ويا مرته وگف باوعلي بغل رجعت ليورا اريد اتبلعم مااكدر

كمزني وهو يصيح سمعييي لج راح  اسألج اخر مره قبل لااتصل حتى لا اجرم بيج

سكتت

-موياااج احجييي

-وداعت بابا اختيي

-اختج خوش حجي راح اتصل وكون الله اطلع بسواد الوجه تعرفين شسووي مااگلج اشمرج بالمصح واتركج لااا وداعت ولدي اخليج تتمنين المووت امنية

هزيت راسي اي

-تمام وانتي جيبي الجهاز وطلعي مناا

ام هيذام -يااا  شناوي تسوي

-كلتلج طلعييييي

رادت تحجي جرها دفعها بره وسد الباب فتح الجهاز اتصل واني عيوني عليه ولساني يردد يارب كون ترد

اخذله ثواني و دنگ خله الفون على اذاني اسمعه يرن ويه كل دگه كلبي ينبض بخفوت اخذت نفس  واني اسمع الخط انفتح وماكو صوت عرفت رحت بيها غمضت نزلت دموعي همست برجفة رايه  لحكيني

والراجدي  اجاني دگ راسي بالمرمر من قوة الضربه رج الحمام بي؛ غمضت دالزمه واجتني الدفره بنص بطني گطعت النفس انطويت عاصره روحي

اندار يفتر بالحمام مثل المخبل يدور على شي يكتلني بي غمضت حيل واني اشوفه جر التعلاگة الحديد من الحايط واجه كاز على سنونه

وصل يمي شال ايده استوى يريد يضربني واسمع صوت هوسه صارت بالمشتمل والحرس يدگون الباب بقوة ويصيحون الحكناااا سيدددي

جرها الباب فتحها وصرخ شكووو اولاد الكلببب

-الحگنااا  سيددي وصلتنااا اخبارية الضابط ازر تعرض لاغتيااال 

-شنوو اغتيال ابني وييين

-مانعرف سيدي مجرد تلفون وصل من مجهول كال سلمولي على اللواء وكله هذا حصتي بالمقابل

-شنو مجهول شنو مقابل انتوا اشتحجووون وينه ازررر اتصلتوا بهيذااام

-مايررد سيدي ماايرد

شمر التعلاگه وطلع يركض مخبوص ورا مرته ردت اشيل راسي من الگاع ماگدرت الدنيا ظلمت؛جسمي خدران شي ينسحب من روحي غمضت دقايق وماحسيت بعدها

صحيت على هوسة وصياح فتحت عيوني غواش الصورة مو واضحة رجعت غمضت ثواني وطفرت على صوت صرخة هزت المشتمل

فتحت عيوني  واشوف هيذام حاصر اسماعيل شكله يخوف الحرگة زايده رعب رفعه من شعره ومبلش  بي راچديات من گد ضخامته مامبين من اسماعيل شي غير صوته

كعدت اريد افتهم شكو واشوف الراچدي اجاه من قوته سطر راسه بالحايط وكعد بالكاع شبه الفاقد

رد دنگ رفعه من رگبته وگفه؛ عمتي تلطم وتصرخ لحگوني وعمي يضرب بضهره يريده يتركه

زحفت لورا لازمة اللحاف حيل اباوعله اشلون خنگه بدون رحمه واسماعيل يرفس بين اديه صرخت  عمتي مات ابنك يابررراهيييم

هيه تصرخ وعمي طلع سلاحه وضرب هيذام بنهاية راسه ؛ لزم مكان وندارله ؛باوعله بنظرة من يمي خنست

شمر اسماعيل وضغط على سنونه رجع عمي بسرعة ليوره وجه سلاحه عليه وصاح وداعت ولدي بس تتحرك  ارميها

-تتحامه بطفلة لا زلمه عجبتني

-وكلام الله يهيذام اخليها الك جثة وعود روح دورلك على وحده غيرها ترد رتبتك بيها

-كون صدگ گد كلمتك وتجرب حضك  تذكر اشلون حرگت ابنك گدام عيونك هالمره اربط عائلتك بكبرها واغطها بتيزاب

-شبييك تسودنتتت شرررايد

-روحك انت ولدك

-شتلغيي انت

-تارك اللغوة الك اني انفذ حذرتك قضيتي اذا صار بيها  خدش اخدش  روحكم مثل مااخذتوها من الحجز مابيها اثر ترجعوها لخاطر  افتح قضيتها بدل ماافتح  قضية اخرتكم

- شغلة شيلها من راسك طلعة منا ماراح تطلع غير للگبر صارت مرت اخوك رضيت او لااااا

-هذا الشي تضحك بي على امثالك ماصارت ولاراح تصير غير المتهمة مالتي واردها هيه ورتبتي  غصباً على راس اكبر واحد ان جان هسه لو بعد الف سنة

-يعنيي شنوو

-يعني نصيحة عينكم بيها  منا لمن اردها اذا ردت تضل تشم هوى 

- تاخذ ابنك وتولي من بيتييي بسرررعة

- وطلعة مناا مااطلع غير محمل بعد ما اسطر بزرتك  جوه رجلية مثل الغنم ساحگ روسهم گدامك

- هيذام  لاتجبرنيي انهي حياتك وانت تعرف كل زين اسويها بساطة

-سوي التگدرله

-اطلع يلاااااا

-طالع بس خليك متذكر هذا ثاني تحذير الثالث انت اعرف بي قضيتي مقابيل روحك

كالها ودنگ شال سلاحه من الگاع  رفع راسه باوعلي بنظرة ماعرفت افسرها خوف لو لهفة لو غضب

نزلت دموعي خله سلاحه بضهره وطلع.؛ اندار عمي على اسماعيل دنگ راد يسنده دفعه وگام وحده  اجاني يسحل بنفسه عرفته راح يكتلني بسرعة رفعت اديه احمي وجهي صارت بوجهه عمتي رحمة دفعته من صدره صاحت وييين تريد

-وخررر  عمممه

-اي اوخر وبعدهاا شنو تضربهاا موو؟؟

-وانعل ابوها كله منهاا العاهره اذا ماربيتهاا من جديد وكسرت راسها ما تسمى عالزلم

-بعده هيذام  ماطالع من البيت ودعت نظر عيني اذا فكرت تلزم شعره منها اروح اصيحله وانت تعرف الباقي

ام هيذام - تهددينا بالسگط مالتتتج

-ماهدد بس عتقوها ماتت شوفيها شضال بيها كوه اجر النفسس

ابراهيم -. يطبها مرررض تحمد ربها لحد الان خالها عايشة بعد هالمصايب الصارتلي بسببها

- خاف ربك وانت حاج بيت الله ترضاها على بناتك هيج  وهيه ماغلطت بس اشتاقت لاهلها حقها طفلة بعدها تحن الهم ليش تكسرها فوگ ماتهمتها بشرفها

-ياشرف تحجين بي واني جايبها من نص البتاوين بس الغلط مني وهسه اصلحه

-اي يخوي زينة العقل رجعهاا  للمركز  ماطول طلگها اسماعيل  هم تخلص من المشاكل وهم وهيذام يرد لمركزه بدل هوسته وخباله الي مانعرفله اول من تالي

اسماعيل- لا رجعتها لذمتي والله العظيم اذا فكرتوا تاخذوها منا ادير بنزين واحرك روحي

ابراهيم - بابا هذا تسودن وخلاها براسه وتعرفه خبل تالي يسويلنا مصيبة

-خلي يولي يمسلت وحده  هاي مرتي ماياخذها لو يدگ راسه بالحايط واذا عليها ماسوت شي غلط رادت تخابر اهلها واسمعها كل يوم تخابر ومتأكد اختها

-لعد وين جنت هسه ياله حجيتتت

-ماحجيت مولان شاك بيها بس حتى تتربى وما تسوي شي بسكوت عنه الي تتختل بشغلة صغيرة تسوي الاكبر منها هيج بعد تابت ماتعيدها

-استغفر الله هذا اشتحجي ويااا ولك لو خالهم ياخذوها لهناك اشلون بالله

-امنعكم ماخليكم  وهيه منا وجاي دوم اضل وياي ملازمتني من هسه اگلك غيرها مااخذ لو الدنياا تنگلب وحق ربي ما اتزوج لو تذبحونيي سمعتوووا

-خوش حجي تريدها تضل وياك تجيبها وتگعد يمنا بالبيت الجبير اني مااضل تارك شغلي ومگابلك اربعة وعشرين ساعة لخاطر احميك من هذا الباطل  لاطخ براسه على غفلة ويدخل يكتلك

-مااطلع من شقتي واقفل الباب عليه محد يگدر يوصلني بعد

-بس كم يوم يوم لبين ما شوفلي صرفة ويا اذا ما الله اخذه وخلصني منه اني  اسلم راسه بيدي افتك من مصايبه

رحمه- . لايخوي هذا وصيت اخيك لاتخلي الغضب والشيطان يعمي عيونك عنه

- ياوصيييه ايده طالت وتفكيره واجرامه بعد محد يحمله لاخال صاحب رتبة لاخال  متهم ؛مااگعد دقيقة اذا مااجتني شكوه عليه محد يعرفه شيريدد

اسماعيل - هواي سمعناها منك وكلشي ماسويت

ابراهيم -جنت حاسب خاطر لعمتك بس  الضاهر جنت غلطان انطيته مجال يتمادى ويتفرعن وانتي رحمة حضري البنيه وجيبيها لهناك وهذا المشتمل ينسد نهائيا

رحمه.- حاضر يخوي بس خابرت الطبيب يجي يشوفها اخاف بيها كسر لو تعتاز مستشفى 

راد يحجي ورن فونه طلعه باوع بي عگد حاجبه رد گال الو واشوف وجهه  اتغير اخذله ثواني يتسنط وطلع بسرعة وهو يكلهم طلعوا الولد قبلي جاااي بالطريق

صاحت ام هيذام ؛ هيذااام  والله ماكو غيره يمه  تعالي ليه راح يسودنلي الرجاال

رحمه- كافيي كل شغلة عوجه وشمرتوها براس الولد ماكفاكم خسر رتبته وشمر نفسه بمكان مابي بس الموت

-منو جبره هااا اشبي هيج اتخبل اول قضيه يخسرهاا  لو هيه اعناد لان شاف اخو استقر كتله الحقد وانتي كافي ادافعين عنه محد ترس راسه بالسم   ولاخبله غيرج

-استغفر الله ربي روحي خيه الله يهديكم

-مخابييل والله يهدينا شو انتي ماتعرفين تحجيين
يمه نذرر عليه بس اخلص منه اذبح ذبيحة لوجه الله

-صح ولد اخوي عزاز على گلبي ومااگدر انطقها بس عينج بزرتج لايتذبحون قبل الذبيحة

-ومنو گلج راح انتظر لذاك الوكت

-وينطيج گلبج  تضيعين شباب اوليدج وتشوفين  تابوته داخل عليج

-ابجيلي يومين واسكت افضل ماابجي عمري كله على عائلتي  هيج خايفة عليه اخذي روحي فكيني متنازله عن تعبي بس خلصيني من شره

هزت راسها بقهر وهيه جرت اسماعيل وطلعت اندارت عمتي رحمه باوعتلي عيونها كلهن دموع اجت يمي عدلت الغطة وگعدت ضامه وجهه محتاره شسوي

دقايق ودخلت ضي تركض صاحت لحگي يعمة هيذام مااعرف شمسوي البيت انگلب

لطمت على وجهه وطلعت تركض اجت ضي كعدت يمي لزمت ايدي وعيونها عالشباج عاضة شفتها  حتى مابية اسأل شكو  لحد مادخل الدكتور ويا وحده  جيكوا وضعي كال مابيها شي بس رادلها راحه يومين ماتتحرك

كتب علاج وضربني ابره مهدئ صدگ ثواني واختفى شكو الم رحت بالنوم

مر يومين الكل مخبوص مااعرف شصاير واني اصلا مااريد اعرف بعد السمعته والصارلي عرفت  ماراح اكدر اخلص روحي منهم اذا ماانهزم؛ ضي ملازمتني بالنهار وعمتي بليل صارت حالتي احسن كمت اكدر اكوم واكل وحدي

گاعده على فرشتي لامة رجلية لحظني اتسنط لضي تقرا يمي وعقلي بغير عالم افكر  اشلون اكدر اطلع منا وين انظم  فززتني وهيه تكول ويين شارده ام لدغة

شلت راسي باوعتلها واشرت ماكو شي

-احجي رئول اسمع لاتضلين هيج صافنة

-ماكو شي تعبانه شوية

-مم خوش بس تره اكو ناس زرعت وراج بدل العين الف عين بالاخص من رجع تراهن عليج وهالمرة بروحه

-لعد خلي يستعد للموت

-تردين الصدگ اني وياج انهزمي لاتضلين هنا بس وين ترحين اذا مفكره لاهلج فأكلج راح دمرينهم

-ماغاح اوصل لاهلي استوهم عاشوا مثل الناس

-لعد وين واشلون تعيشين

-نص حياتي خلصتها بالشاغع لاتخافين عليها اعغف اشلون اعيش واشتغل بس ساعديني اطلع منا

-والله اساعدج بس بالاول  لازم ندرس الموضوع زين رئال لاتستهينين انتي عايشة بنص عائلهم اقل رتبه بيهم عدها عيون بكد عمرج مرتين يطلعوج من جوه الگاع

- اعغف لهيج غاح اغوح مكان لو بنطي عمغه هيذام  مايحصلني

-تمام بس صبري خلي تصفى الحرب الي مسويها  ويرجع  لان لو اخليج  بطاقية اخفاء هم راح يلكفنا وساعتها جيبي اليخلصنا من ايده

-موگالوا بس يومين ويغوح

-ههه يايومين غير انتي ماتدرين شكو بالدنيا نايمة هنا دروحي استمتعي بمنظر ابراهيم  النكس اشلون يفتر مثل المسودن  لايعرف يحمي شغله لو ولده

-ليش شنو صايغ

-ههههههه كلشي ماكو بس ابن النظام مشتغلهم لعب عالبارد گومي شوفي اشلون كاعد بالحديقة خال رجل على رجل يحرك بيهم بهدوء كل شغلة يسويها  اسوء من القبلها خالهم يترادمون مثل المخبل الشارد من مصح

-موگال عمي غاح اسلم غاسه واضيعه

-يسلم  منو ابو درع  ههههه ضحكتيني خلي يلحگ يردد الشعار وانوب يضيعه ولج اخاف مستاهنه بهيذام  لان سكت عنج بنتي هذا يتزاود ويه ابليس عالشر

-ماساكت عني لان متأكد غاح يغجعني للحجز ويفتح القضية من جديد وبعدها ياخذ حقه مضاعف مني 

-والله تردين الصدگ ماخاشه براسي 

-اشلون يعني

-اكو شي صاير  حتى بابا يكول هيذام  مو نفسه القديم الي يمشي ويسحگ مايهمه احد هسه مثل الي عنده شغلة خايف عليه مكابل الحديقة حتى نوم ماينام بس يدخن ويتصفن  والي ميريد نفسه يروح يمه والله الي يلكفه مايخلصه من غير عزرائيل

-يجوز مدخل نفسه بمصيبة ومحتاغ اشلون يطلع منها

-موجديدة على احمد راضي  كومي خلي نطلع بره لان اليوم اخر يوم الج هنا عمج گال كافي بعد خلي تجي يمنا  وسدوا المشتمل

-بدون لايدز عليه اني غايحه

-شناوية رئال؟؟

-سويتها قبل وندمت من طلعت من بيت بابا بدون لااخذ حقي وبعد العشته والوجع الحسيت بي خلاني اقسم مااعيدها

-يعني ؟؟

-يعني مااطلع منا اذا اخذ كل حق الي بهذا البيت بعدها اغجع لمكاني الي اخذ غوحه والي انطي غوجي

-تاخذين روح ابوج وتنطين روحج لهيذام حتى يرد منصبه موو

باوعلتها وضحكت اشرت شنوو

-اغيد اكوم اسبح داحس وسخة

-اي واعيد ترتيب وجهج واذا كلتي لااهفج كله  لان وراج خطة اي غلطة بيها ننشمر وره الشمس

- لهيج نويت ادوس على نفسي لان وصلت للنهاية يااسحگ ياانسحگ بس اني انسحكت هواي وصلي الدوغ

-مافهمت

ـ اتوسلت  وبجيت وتغجيته بدل مايخلصني هددني اذا طلعت منا ينهيني بس حتى يشوفني مذلوله بسبب غلطة هو الاساس بيها

-تره هو يريد يرجعج للحجز حتى يرد رتبته

-من بعد مايندمني ويخليني اتمنى الموت بعيشتي على السويته وكتها عود يفكغ يسحلني للتحقيق حتى يكمل البلش بي بس الما حاسب حسابه غاح اگلب الطاوله بي واني الغاح اخلي يحس بكل هذا وانهيها ويا بشغله اخلي يتمنى من اول كلمه كلتها اله بتوسل مغجعني

-شنو يعني ؟؟

-يعني مو غاد يعاقبني باسماعيل واسماعيل زوجي حبيبي مااقبل يحجي ويا كلمة مو يفكغ يبعدني عنه

-هله والله  اشتغل كيد النساء امووت على الي تشتغل بعقل بدون مشاعر

-لهيج كمت انام من وكت

-لان بعد منتصف الليل العقل يسلم المهمة للقلب مم هذا الحجي مو غريب عليه سامعته من قبل

-اغبى المخلوقات من يعطي النصائح قبل ان يوجهه لنفسه

-ياخوفي الغبي جاي يلعبج  عالخفيف لحد مايوگعج بمصيدته وكتها لا نصائح ولاذكاء ينفع ويا

-ماطول الگلب مبني بالحقد والعقل متغسخ بالانتقام ما تفيد لا مصيده ولا صاحبها

-اووف احبببج كالتها وعصرت خدودي ضحكت وخرت اديها وكمت للحمام سحبت عالسريع واني ارتب بالافكار اشلون ابلش واول خطوة شنو اسويها 

طلعت لكيتها محضرتلي الأغراض كعدت بدون اعتراض سلمتها نفسي ما خلت شي ماسوته من شعر لوجهه الاظافر اكثر من ساعتين كالت يله كومي شوفي

كمت باوعت وجهي و ابتسمت على التغير اتمنيت محمود موجود ويشوفني اشلون كبرت وصرت مثل ماجان يتمنى غمضت حسيته قريب مني يباوعلي  همست ماضل شي جايتك

ندستني ضي فتحت عيوني اشرت يله

شلت شعري لفيته ربطته بالكتر بس نزلت اديه تناثر غمضت محترگ گلبي همست جايتج استعد للراح اسوي بيك

شلت المشمر طلعنا دخلنا للحديقة صار كدامنا ازر جوه عينه ازرگ وگاعد نص كعد يم ابنه يسويله البايسكل ويمه درع شال راسه باوعلنا اشر هلوو

خجلت مارد رحت يمه  همست الحمد الله على سلامتك ان شاء الله ماتنعاد

-عفيه طيرتي تنذكر بثانية المهم هالشي راجعلج والله سلامة وجهي بسلامة وجهج

ضي.-  صدگ كالوا تعرضت للاغتيال

-صدگ والله

-امم

اشر اي ودنگ يكمل يشد التاير

ضي- عرفتهم منو ؟؟

-على شنو تحجين

-الي رادوا يغتالوك

-نفسهم الي راحوا يغتالوج اذا جربتي بس تأييدها  على اوهامها

-شنو دتقتصد مافهمت

كام شال البايسكل انطاه لابنه اشرلهم  روحوا اخذوا وراحوا وهو اندارلها باوعلها رافع حاجبه

-ازر اكثر شي اكرهه هو اعاده السؤال وانت تعرف هالشي

-ابتعدي عن قضيته

-قضيته هناك بالمركز هنااا هيه مرت اخو ومايكدر كلشي يسوي

-رب الي طير ملامحي وجان مستعد ينهيني بس حتى يشغلهم لان حس بيها بخطر واني من دمه   مستعد  يطير اسمج من سجل الحياة بكبرها اذا حس بيج مشجعتها مو مساعدتها ؛ وانتي مرت اخوي اشلونج

اشرت زينة

-اي بداعت امج حاولي تحافظين على وجهج بس كم يوم لبين مااستعيد شكلي

-ليش دتحجي كله بالالغاز

-اللغز يمج مرت اخوي مو يمي يااخي احسج مستقصدتني بويه تعرفيني من قبل

-اي انت واخوك الي شمغتوا البنزين بالشاغع وخليتوني انكتل

-اشتعلت ذيج الساعة الكشره على يوم الفكرت  اطلع بيها من المركز يول رتبتي وجهي شناويه اطيرين بعد  بدل بطل البنزين 

-اخوك

-الله ويدج ياريت والله هيج وتخلصينه كون هيج شمر ورا  القارات صدگ كولي ورا القارات

ابتسمت ضحك گال الحمد الله على سلامتج خويه

-الله يسلمك

-ليش طلعتي وانتي بعدج مريضه

-لاصغت زينه اللواء ابغاهيم يغيد يقفل المشتمل لان  دنغجع للبيت الجبيغ

-ضي ترجمي

ضي -يوعد ويخلف ويكسر ويسوي روحه بعيد عن الوجع

-ويمثل السعاده وهو ماشام ريحتها

-عساك ماعشتها ولاتمر بطاريها

مارد هز راسه اي ودنگ دفعتني مشيت انداريت لكيته يباوع لايده انتبهت لاصبعه بي الحلقة رجعت باوعتلها عيونها حمر اخذت نفس حسيت بألمها وعرفت ليش دتساعدني 

وصلنا للبيت مسحت وجها ابتسمت دنكت ضربتني على ضهري كالت يله يابطله اجه دورج راويني شطارتج بالشطرنج

-حسبي حساب اسبوع  مو اكثغ وتشوفين كدامج اشلون اغلق اللعبه واني اكول كش ملك

-كل ماتضوجين تلكيني گاعده على نفس الميز

-حاولي تتعودين على غيابي

-تعودت ادمن بالاشخاص ونجرح بفراقهم

-جان كلتلج تعالي وياي بس الامان بحضن ابوج يسوه دفو الدنيا بكبغها

-روحي رئال وخففي اللعب ويه هيذام حتى لاتنوجعين هواي

-هه من گد مانوجعت  بعد ماحس بي

-روحي واني بظهرج لو اعرف انطيج روحي مو  اوكفلج بس تخلصين من هالعائلة القذره

ابتسمت دكدكت على متني رحت دخلت وهنا بدايه اول خطوه بمكان ماجان المفروض افكر ادخله مو اجازف احارب بي

فتت  صارت بوجهي عمتي رحمه واكفه يم المساعده تحضر عصير شافتني  ضحكت گالت هله بيج يبعد عمتج تعالي نورتي بيتج

رحت حضنتني وسحبتني تمشي بيه فرحانة دخلتني للصالة الي تگول قلعة تذكرت صالتنا الي ماادري اشلون ضالة مقاومة واكفه على رجليها

كملنا طريقنا  للاستقبال دخلت جانوا كلهم كاعدين ام هيذام تسولف ويه هاله باوعلي بقرف من غير هبه مرت هيذام منتجية على ابوها گالت هاي شجابها هنا

عصرها وگال هلا بابا تعالي كعدي يم زوجج اريد احجي وياج

اشرت اي رحت گعدت يم اسماعيل الي على طول ماجنت واكفة يباوعلي بخوف متوقع راح اتغير عليه بعد الصار تفاجئ  من باوعتله مبتسمه همس بعدج مريضه

-شتكول انت

-والله تعاركت ويا بابا وكال بعد مااضربها

-وهيج هامتك تغه صاغ يومين  حتى ما سألت عليه

-مااكدر اكوم تعبان

-شبيك

-مابيه شي بس انتي لاتعوفيني خليج وياي

-لو اغيد اعوفك مجان دخلت لهذا البيت

ضحك ولزم ايدي غمضت لان ادري هالشي حرام وعقدنا باطل بس جان لازم مو بس ادوس على كلبي لا حتى عالضمير لخاطر  اعرف اكمل  صح

انتجه مامصدگ خله ايده وره ضهري ويباوع لزواج امل وابو عود اني هم صار عندي مره وحالي حالكم  رغم هوسه ناس تتناقش والجهال تكمز هبه مركزه وياي تباوعلي من فوگ ليجوه وترد تباوع الهالة وگوه كاتمات ضحكتهن

اني هم ماهتميت لتفاهتهن بكد مابالي بجمالها واشلون هيذام تاركها وهيه شايلة كل هالترافة

فززني عمي وهو حمحم صارت صنته عرفته الي اجه من ضربة بسطالة الي تكتم النفس

انداريت صار گدامي من جهه الباب نازل من فوگ يعدل بسلاحه لابس تيشيرت نص ردن اسود وبنطلون عسكري بسرعة اسماعيل سحب ايده من وراي خلاهن بحضنه وعدل كعدته

وصل يمنه خلا السلاح عالميز و كعد عالتخم اصلا ماباوعلي شال رجله خلاها عالطبلة الكدامة گاله عمي عاشت ايدك على هالثقافة

رفع حاجبه وطلع باكيت الجكاير سحب وحده خلاها بحلگه

-اشوكت تولي لوحدتك

مارد ورثها اخذ نفس نفخه وابتسم باستهزاء

-المتهم اشلون مات ؟؟

-التحقيق يمك اني ضابط مستقيل

-هيذام الولد البارحة جان بالمستشفى وحالته متحسنه وحتى اهل المجني عليها متنازلين صبح التنازل مسحوب والولد ميييت اشلوون

-ماعندي علم هذا شغل عزرائيل تگدر توجه السؤال اله

-اخر مره اسألك اشلون مات ؟؟

-ردد الشعار ولحگ ربعه

-انت صاحيييي شنو المووت هيج سهل عنددك لك هاااي اروواح بشررر انت حيييوان

-عفية حيوان

-راح افتح التحقيق بموته واشوف شنو سبب الوفاة

-يعجبني ضميرك من يتحرك بطريقك افتح كبور اهل الصعقات الكهربايئه حتى توفر وقت على نفسك هيه قضيه قضيه العبها صح

-خوش حجي نتواجه

-ياريت تستعجل مثل ماتعرف اكره الانتظار بالاخص اذا طلع هوبعه يابه بعلي اشكد انغث

اخذ نفس بحرگه وهيذام انتجه اشر الابنه تعال

اجه يركض شاله خلاه بحضنه ندسني اسماعيل رفعت راسي دنگ همس يم اذني كومي صعد للسويت

-بس اغوح اجيب حاجاتي تكوم تجي وياي

-لاترحين هسه اكول الهن يلمن غراضج ويجيبنهن

-لاا غاح يكتشفون كلمن بمكان جان نايم

-لعد مابيه حيل اكوم وياج اخذي هاله

-عيع مالكيت غيغ المعفنة

ابتسم دمغني كمشت ايده وضحكت  درت وجهي  لكيت هيذام  صافن علينه دنگ بسرعه سوه روحه مو يمنه ورث جكاره لخ

اذني يم اسماعيل  يسولف فرحان اجاوب ويا وعين بهيذام  الي حاله انگلب مدنگ يحك بگصته ويسحب كل نفس من جكارته يطير نصها اتحسه گاعد على نار روحه تلوب كملها اسماعيل وهو يهمس لج مو احجي وياااج

باوعتله رمشت براءة وبرطمت 

-اشلون تخليني اكلها

-تغه صوتك عالي

-دخيل اللدغه اني

كالها وكرص خدي ضحكت ودنگت عود خجلانه

قاطعنه  عمي وهو يكوم يريد يطلع وصل  يم هيذام شمر مفتاح كله هذا مفتاح المكتب اتصل الرائد همام ويكول اريد ملفات المتهم ابو المنشأت يم ابو درع اتصل بي ميرد عليه

شال راسه باوعله بنظره من يمي نرعبت  سحب نفس من جگارته ودنگ طفاها عالميز كام دفعه بخفة ايده وعبره ؛عثر عمي كوه سيطره ماوگع وهيذام  اصلا مامهتم كمل طريقه وصعد الدرج

وكف عمي يباوعله بيأس  هز ايده

ام هيذام - تركه بداعتي

-شتركه الملفات يمه العالم تريد تشتغل اشلون يعني هالولد متراهن يسودني وياا 

-قابل شنو يسوي بيهن

-ماتعرفيين شنو براسه على ساعة يسويله كارثه يخليك ماتندل دربك والله العظيم بزعت روحي صار يومين النوم ماشايفه  ماخليت واحد ماخابرته وترجيته على السالفة السواها كوه گدرت اسدها

-راح يرد  بعد شهرين ماراح اتشوف وجهه لخاطري اتحمله بس هالايام

-واني ماضل عندي صبر اكثر وصار الوقت اتوبه

اتحسرت ضايجه

-كوم بابا اسماعيل  اخذ مرتك وصعد غرفتك ارتاح حتى للاكل بعد لاتنزل همه يصعدون الكم

اشر اي وكام كمت ويا طلع كدامي صعد كوه يتحرك كل كم بايه يوكف ينفت  من اثر الضرب ويرجع يكمل لحد ماوصلنا اخر بايه صار كدامنا هيذام مدنگ على مغسلة يغسل براسه على صوتنا رفع راسه باوعلنه انتبهت لعيونه صايرات دم كد ماحمر

جرني اسماعيل بسرعة  فتح بابا الغرفه دفعني ودخل وراي  قفلها وكفت عاضه شفتي واني اسمعه صاح من بين سنونه ودفر المغسلة بحرگه گلب

اشكد توسلت بيك رجعني ماقبلت ناوي تعذبني مو حضرتك لعد خليك مستعد للراح اسوي

باوعت لاسماعيل راح كعد على الجربايه وهو يضحك ويحك بركبته  شكله مكروه طويل ورفيع ولحيته نصها وسخ مدموجه ويه الحرگ انوب فرحان انجمع وياي بغرفة وحده

اكبر غلط  عاملته مثل البشر بس بعدها بأولها اذا ماطلعت شكو ذل من عيونكم ماطلع بت البتاوين

اشرلي تعالي كعدي بصفي

-اكو فغاش لو انزل اجيب من جوه

-ليش ماتنامين يمي

همست اسماعيل كلمة والثانية واصغخ وعليه وعلى اعدائي  وعاد هيذام مايصدگ بالاخص هسه غاح ينجلط لباله صدك علاقتنا كاملة

-لالا هاي هيه بس فرشيلي جوه  لان العلاج قوي اخاف مالحگ حتى ماانفضح

-ماغاح اخلي احد ينتبه لاتهتم

-رئال لاتعبيني فرشي وتأكدي الباب مقفول عدل  اخاف احد يدخل

-حتى لودخلوا مالهم شي يمنه هذا مكانه وبكيفنا ليش هيج متغدد

-ههههه متغدد حلو من تحجين

-ممم تعيب وعلي صوتك بعد حتى يوصل اوضح

-احبججج

-متأكد

-رئال اسف والله بعد ماضربج ولااخلي احد يوصلج وعد بس سامحيني وخليج يمي

-شنو الي خلاك هيج تتبدل  فجأه

-لان والله  احبج

-من اشوكت

-وراس ابوي صار يومين مانايم لان بعيده عني حسيت فاقد روحي اتندمت اشلون مادافعت عنج بس والله مااگدرت لان كسرتيني عرفت نفسي مامالي عينج لان مريض وخنتيني لهيج شي

-ماخنتك والله هاي اختي ليش مدتصدگ تغيد هسه اتصل بيها كدامك واحجي وياها

-مااريد اتصل ولااريدج تتواصلين ويه احد غيري اريدج بس الي انسيهم خليج يمي واني اسوي اي شي تردي والله حلمي وكولي واني انفذ واذا قصرت وياج بشي الج حق تعوفيني

-تمام وين علاجك وجهك بهت لونه

-رئال اذا ترديني اتعالج ماراح اعترض حتى تجميل اسوي  ميخالف اتحمل وجع العمليه حتى اكونلج زوج مثل ماتحلمين بي

-تغيدني اضل وياك ومااعوفك لاتحجي بهيج شي لان  اتقبلتك مثل ماانت واني مايهمني الشكل بكد ماتكون غجال اعتمد عليه

-ماراح يجي يوم تحنين للطفل

-لا مااحب الاطفال واذا كلش حنينه انجيب بزونه عادي بس هااا اني اسميها

باوعلي وضحك ابتسمت

-يله وين علاجك دنطيكك  حتى اطلع اجيب ملابسي

هز راسه عالميز راحت جبته انطيته شربهن وتمدد غطيته غمض وجهه باهت ماعرفت شبي ولاهو يقبل يكول لاحد

طفيت الضوه فتحت الباب طلعت لكيت هيذام  بعد عالمغسلة مدنگ منتجي عليها بثنين اديه ومغمض المي ينزل من راسه عالسريع  عرفته جان يتسنط بس وضعه تعبان

عدل وكفته بدون لايباوعلي  مسح وجهه وراح دخل للغرفه المقابيل غرفتنا سد الباب برجله

نزلت لميت غراضي رجعت لغرفتي الجديده رتبتهن اسماعيل  اصر ينام بالكاع اني هم بعد ماعاندت ماصدكت يطلب هذا الشي بنفسه 

مر كم يوم واسماعيل  معاملته اتغيرت تماماً صار مايرفضلي طلب

هواي اشوفه يحاول يقربني ويحببني بي حتى علاجه صار ياخذه بأنتظام  راد يشفى بأي طريقة في سبيل يرضيني

افكاري بدت تتضارب من جهة افكر اشلون اعلي صوتي بالضحك والشقى  بالاخص من اسمع هيذام صعد غرفته  تبدي كل فعالياتي وصدگ احسب ثواني واسمعه ينزل وتبلش الهوسة محد يعرف شبي البيت يحترگ بعد مايكمل تفليش البيت يطلع ماتمر دقايق واسمع عمي يخابر ويطلع يركض مخبوص وعمتي تضل تلطم ورا

ومن جهة الخوف بده يسيطر عليه بسبب نظرات الحب الي اشوفهن بعيون  اسماعيل  لان تعلقه بيه صار اكثر من اللازم خايفة يفكر بالعلاج قبل لاانهزم وقتها صدگ اكون عميت على نفسي

الليل يخلص عالسريع انام براحه عكس هيذام الي كلما افتح البرده اشوفه يفتر بالحديقة بيده جكارته وبالنهار البيت يصير صنته لان وكت نومته بس صوت درع يكمز والي مايريد روحه يصيح بي قبل لاتنزل دمعته  البيت ينرج بصوت ابو تكول بركان ينفجر اتحسه بس يريد حجه حتى يطلع الغضب الي بداخله

قللت اطفر لان اسماعيل بلش يتعب  مااعرف شبي بالاخص التدرر بعد مايسيطر عليه حتى هو وكاعد

اني هم  كمت انطي علاجه واروح  للشباج  وهذا هدفي الثاني اراقب الجو حتى اختمها بعبوة تسحگ روسهم واعلمهم مو كل فقير ينوكل لحمه

واكفة ساحبة اثر من البردة اباوع للحرس اشلون يتركون مكاناتهم وكت الاكل ابتسمت

بثواني ضاعت واني اشوف هيذام   گدامي واكف منتجي عالسياره يدخن مصغر عيونه يباوع للشباج شكيت بي منتبهلي

دارجع ليورا اتأكد اخذ نفس من جگارته نفخه وشال ايده اشرلي شيليها من راسج واندار راح  بسرعة رديت البرده خليت ايدي على كلبي  عزه بعينه اشلون شافني من كل هالمسافة

بس لا يمكن موالي البرده سادة وعتم لونها مامبينه

انتي حماره لعد المن اشر

والله لو اعرف موتي على ايدك هم انهزم وبدل رتبتك اخليك تزين شاربك على هذا القرف المتحملته من اخوك  اذا ماخليت العالم كلها تسولف بالضابط الي سحلته بت البتاوين ما تسمى رئال

گطع تفكيري دكت الباب وصوت عمي وهو يصيح رئاااال

ركضت رتبت فرشتي ودنكت گعدت اسماعيل  وخربطت غطاه  رد اندك حيل نكثت شعري و رحت فتحته لكيته هو وزوجته واگفين عگد حاجبه گال ليش تأخرتي بفتح الباب شنو جنتي تسوين

-جنت نايمة عمو

-اشلونه  اسماعيل

-زين هياته كاعد  اتفضل

دخلوا راد يكوم اسماعيل گله لاخليك بابا مكانك ليش نايم بالگاع

-الجربايه بيها صوت مزعج وماترهم هيذام  غرفه قريبه بالگاع   افضل واريح

-جان گلتلي اغيرلك الجرباية اذا هيج زاعجك صوتها

-گلتلك هيج مرتاح ليش صعدت جان گلتلي اني انزلك

-لا ردت اشوفك واحجي وياك بخصوص السفره شقررت تجي لولا لان ماضل وقت كون اليوم نطلع ويه الفجر

-اي اجي بس كون مانطول لان اني تعبان مابيه اضل بعيد عن مكاني

-لامانتأخر كلها يومين والثالث نرجع ورئال وصيت عليها ابو ضي وضيونه يضلون يمها

-ليش يضلون يمها شنو ماتروح ويانه

عمتي -ومن يشوفوها ويسألون شنو انكللهم

-كولي مرت ابني شتكولين مثلا

-يامرت ابني انت مقتنع مثل هاي تصير من ضمن چنايني دشوفها اشلون مخربطة تريد تفشلنه وبعدين يردن يجن هبه وامل ويانه

-هااا هيج كولي اخاف ينزعجن 

- الصراحه اي شنو يكون منظري من يوصل الحجي لباقي اهلنا ويعرفون وحده من البتاوين تبيع بالشوارع صارت راسها براس هبة وهاله

-ياهاله نفسها الساحگها ازر وخالها بس للخدمة لو هبه الشامرها هيذام يم امها حالها حال الحيوان

-كله بسببك انت الخربت حياتنا ودولبتنا بسالفتك العوجة

- اني لو انتي البدون كرامة عاديتي حتى اهلج واجيتي تركضين ورا ابوي بحجت مااكدر لابني خلصني هديتي بيتنا وسلمتي ارگابنه للخبل وخليتي يتفرعن علينه

- اااخ الصوج مني وكفت بوجه ماخليته يذبحك بذاك اليوم

-على شنو يذبحني انتي ضميتها وماخليتيهم ياخذوها للمستشفى لحد ماماتت

ابراهيم -كافي بابااا اشبيكم

اسماعيل - دتسمع انت لولااا

-ميخالف بابا لاتعيدون السالفة  شغله اندثرت لايسمع غضب الله وهو مايصدگ بس يريد شي حتى يطلع حيونته وهمجيته الباطلة

- احنا نضل هيج خايفين اشوكت تخلصناااا منننه

-ماضل شي هانت

-خلينه نشوف يله طلعوا

-يعني ماتجي

-لاا وراح اضل طول عمري خاتل محد يعرف اني متزوج حتى ترضه زوجتك

-لا ليش خاتل بس منتظر تتحسن حالتك اكثر ازوجك وحده تكون من مقامنه وهاي اذا تريد تخليها هم ماعندي مانع خليها تخدمك بس مثل ماهيه ماتنزل من الغرفة

- تمام يله طلعوا تعبت اريد ارنام

- بيك شي بابا نلغي السفره خلي تولي

-لامابيه شي بس اريد ارتاح شوية من الهوسة وهذا شوكت يولي لجهنم

- ويه الاذان دز غراضه شويه ويلحگهن

-هاي هيه روحوا  مابيه اروح ويه عائلة وهوسه عود من ترجعون اخذ رئال واروح للمزرعة

-براحتك راح اخابر الدكتور يجي يضل هنا يم ابو ضي مانتأخر يومين ونرجع واذا اعتازيت شي گبل خابرني اجيك

-ماعتاز شي بس انطوني جهازي

اشر اي طلع الجهاز انطانيا دااخذه گال ابو ضي راح يجي يگعد هنا والخدم موجوده اي شي تعتازي ادكين الباب يجوج ممنوع تعتبين الباب ابد

-ماغاح اطلع

-الجهاز يضل يمه اخاف حسبالج تلعبين بكيفج لو تتواصلين ويه اهلج تره مربوط على اجهزتنا اي غلطه تعرفين شنو يصيرلج

هزيت راسي اي

-لبسه اكله علاجه كله بوقته هذا الباب راح ينقفل تعتازين شي دكي همه يفتحوا وينطوج  اذا سمعت  مسمتعه كلمه لو غاثته اعيد ترباتج  راسج لاترفعي حتى لااكسره الج سمعتيي

سكتت مارديت  انطاني الجهاز وراح يسلم عليه كل عقله خفت وسكتت راضيه  مايدري  صار اشكد اخطط لهاي اللحظه ولو مو يقفلوا للباب لو يبنون باب ثاني هم انهزم و اعلمه منو العبده الي جابها فار تجارب الابنه

سلموا وطلعوا قفلوا الباب انداريت لاسماعيل باوعتله كام اجه يمي گال ليش ضايجة

-ههه لاعلى شنو اصلا مو متفاجئة حتى طلعوا جايبيني بس حتى تتعالج بيه

-مالج شغل بيهم اني احبج الج ومااخذ غيرج شوفي اخذت الجهاز حتى تتصلين بأهلج

-اسماعيل بيك شي ولك قفلوا حتى الباب معناتها حبسونه ممنوع نطلع حتى الاكل يدخلوا من جوه

-لا بس يطلعون اتصل بالحارس اخلي يفتحه وتنزلين بالحديقة اشكد ماتردين

هزيت راسي

لزم ايدي همس كرهتيني مو

-لا زاد حقدي على هيذام لان هو سبب كل الي اني بي

-وحتى اني اكرهه تعرفين شنو سوه بيه

-هذا التشوه هو سوا

-ربطني وحركني بالتيزاب

-ليشش

اباوعله مثل الي اتذكر شي عصر نفسه خايف كمشت ايده بسرعه رجعته للفراش ركضت انطيته العلاج لان اعرف اذا وصل لهاي المرحلة معناتها تحضري راح افقد واكتلج

ابتعدت عنه اترقبه واندعي خايفه احس قصه جبيره وراهم الي خبلت اسماعيل وحولت هيذام لحيوان ما صدگت هدأ باوعلي بتعب واشر تعالي كوه فاتح عيونه

ماردت اكوم بس تذكرت هاي اخر ساعات ويا لازم اتحمل وكملها  بدون مشاكل

كمت كعدت يمه لزم ايدي همس اني غلطت بس والله تبت وهو عاقبني بعد مااعيدها راح احجيلج بس  لاتعوفيني و مستعد حتى اهلي اتركهم علمودج

-ماغاح اعوفك ومااغيد اسمع عن حياتك القديمة شي ولااغيدك تطلع من اهلك لان ماغاح تحصل احد يحبك كدهم

-مارايد محبتهم اريدج انتي تحبيني حتى لماتحبيني بس ضلي يمي

-لومااحبك مااضل وياك كل هالفتغه

-ههههه لدغتج حلوه

ضحكت عصر ايدي وباوعلي بكسره تكول كلبه حاسه بالراح اسوي ماگدرت اباوعله احس كلبي وجعني عليه

كمت تمددت عالجربايه رد سحب ايدي ماعاندت  غمضت وهو ضل يلعب بأصابيعي

مر الوقت  حسيت ايده رخت عرفته نام سحبتها عالكيف طبگتها جوه راسي عيني بي شراح يصير بيك اذا تركتك

بس هو عنده سند خواتي الماعدهن اذا رف كلبي  معناتها رايه ماراح تتزوج غزوان ؛ ورؤيا ماراح ترجع تشوف وماما ترجع للذل

اخذت نفس انگلبت اباوع للسكف بيدي الفون راح ادوس على جبروت ابراهيم واخذ حق كل ضعيف استغل وضعه

خليت ايدي على كلبي همست رئال كلها منتظرتج ديربالج اضعفين

مسحت عيوني حضنت مخدتي غمضت افكر اشلون اطلع وشنو اول شي اسوي ؛ مااعرف اشكد مر وقت بس رحت بالنوم بدون لاحس ماگعدت اله على صوت شهگة نفس قويه فزعتني كمت بسرعة واشوف اسماعيل يتشاهد من شدهتي عثرت بالغطه كوه سيطرت ماوكعت وخرته ونزلت يمه لزمت ايده وصحت شبيييك

همست بتعب مختنگ

-هسه اجيبلك علاجك اتحمل ثواني

- راح اموت

-لالااا ما تموت ماتمووت هسه انطيك علاجك

-صيحي لابوي

ردت احجي شهگ وفتح عيونه على كبرهن تركت ايده وكمت ركضت ادگيت بالباب بكل حيلي وصرخت فتحوااااا

رجعت انداريت اباوعله منتهي

رديت دكيت بثنين اديه واصرخ واكم ماااات ولك هيذااام الحكنيييي

رد شهگ تركت الباب وركضت اله دنگت لزمت ايده دمسح وجهه واسمع هيذام دفر الباب صاح رأأأأل فتحييي

-ماعندي مفتاااح الحكني  ولك غاااح يمووت

-وخرري عن البااااب كالها ودفره رج الباب رجع دفره دفره ثانيه طگ القفل دخل يركض دفعني واخذه مني شال راسه ضرب على وجهه وصاح لك ااااصحى

فتح عيونه گوه  همس راح اموت يخويه

-ماتموووت ماتمووت بس خليك صاحي وياااي

-رئال ديربالك عليها لاتخلي احد يأذيها

-لك لاتصيررر حيووان لج رئااااال مفتاح سيارتي عالميز جيبي بسرررعة

-خايف  لاتعوفني وحدي

-اكل تبن وكوووم مابيك شييي لاتخليني اشيلك ودكك بالگاع

باوعله ابتسم بتعب غمض عيونه

همس بتوسل لايخوي كوم وعلي بعد ماضربك 

ماسمعنا غير صوت الشهگة وايده وگعت عرفته راح

بدون شعور  شاله هيذام وطلع نزل يركض واني ورا حافيه اتلكونه الحرس صاح السياررره  هو ويركض

طلعوا كدامه فتحوها صعده واني ركضت للباب  الثانيه فتحتها وصعدت شلت راسه خليته بحضني

شغل هيذام ورجع بكل سرعته حتى ماانتظر يفتحون الباب  طكه بالنص وشحطها طلع طاير

راس اسماعيل  بحضني اباوعله بلا نفس تذكرت اشلون جان يتوسل خايف  لااعوفه تالي هو سبقني 

نزلت دموعي صاح هيذام  رفعي راسسه لاتخلي يفقد

همست بقهر  ماات  وشهكت

-لالاا مامات ضربييي  نكثييي حيييل

-هيذام  مايتنفسس والله

-لك حيوووان اصحى لك اسماعييل  وعلي اعدمهاا وراك لك كلبببب گوووم

دنكت باوعتله شفايفه بيض صار كدامي وجه محمود من شلت راسه نفس الهيئه جان؛  حضنته  وشهكت  بصوت عالي بدون لاحس

اني ابجي بصوت وهيذام  يسوق بسوادين ماخله سيطره ماضربها لمن دخلنا للمستشفى شحط السياره ونزل فتح الباب حيل وسحبه مني شاله دخل يركض 

نزلت ورا اريد امشي مااكدر نفس اللقطات تنعاد هذا محمود خذوا مني وهاي اني مااكدر امشي اباوعله بتوسل يرجعلي

كعدت بمكاني لازمتني الرجفهة بغير عالم شبه فاقده الشريط يندار بيه منتظره صديقه يطلع يجي يدنگ عليه يباوعلي ويكول بغصه جان امنيته انتي تلبسي الرتبة

لميت روحي خايفة اباوعله بتوسل مااريده يگلي مات دقايق وكفت سياره نزل ازر يركض شافني صاح  شيصااار اشبي وين اخوووي

-اني جبغته يجي عليه الحادث صاغ بسببي

-ياحادددث رئال وييينه

-كله لايموت اضيع بدونه

-لج  هيذااام صارله شييي

- غاح جوه هو ماغاح يموت موو يدغي بيه احبه ومااكدغ بدونه

مارد دنگ كومني ودخل يمشي بسرعة ونسمع صوت هيذام  راج المكان وهو يصيح  وحق الخلق الكون احركم كلكم مااخلي ابشررر بيكم صاحي اذا اخوي صارله شيي

عافني وراحله  يركضله كمشه گله اهدأ يمعوود

-ولك مااات اخوووي لك ازررر مااات اسماعيل

-مايمووت هسه يصحى

-ولك كتلته ازر كلتله اخذها منك واعرفه روحه بيها  ولك كتلت اخوي بيدي

-وييينه

-دخلوا لغرفه العمليات  ماراح يطلع منها راح اسماعيل يخوي

كالها وكعد مهدود دنگ كمش راسه وغمض

اباوع موهذا هيذام نفسه رغم شره وشكله الي مايوحي لبشر بس حسيته انهد بثواني  ؛ كعدت  من الجهة الثانية حضنت رجلية عيوني عليه گلبي مخنوگ

اكثر من نص ساعة واحنا مانعرف خبر عن اسماعيل لحد مااجوا طلبوا دم كام هيذام وياها لان  نفس الزمره شويه ورجع مرت نص ساعة ورجعوا طلبوا رد راح سحبوا منه  بالثالثه كام  ازر صاح كافي راح توگع

-مايصير بي قز القرط وخررر عن وجهي

-هيذااام  وجهك صار اسود

-من اگلك وخر توخر لااسحگ راس ابوك بسطاليي

-مامعتازين كلش  لاتضل اتلح اذا وگعت محد يكدر  يشيلك جنك مدرعة اني ارووح

-دوخررر كالها ودفعه شمره على صفحة وراح اباوعله عيونه مابيهن غير الغضب يمشي ويدج الگاع گد ثگله حتى الدكتور خاف بسرعة وخر عن طريقة خلا يعدي

عرفته يائس من حاله اسماعيل لميت رجليه لحضني برد على خوف على تأنيب ضمير اشلون عودته عليه وخوفته بالبعد ؛تنزل دموعي كارهه نفسي اخذلي شويه وارفع راسي اندعي ربي ينجي

ازر مو احسن من حالتي اقل الساعة وانگلبت المستشفى  كلها حرس وأصدقائهم

احس روحي بهتت ربع ردن وبرموده  من غير بروده الجو القلق استوني احضن رجليه اجه  الطبيب كمت بسرعه عكس هيذام الي يباوعله بتعب وكامش  راسه صاح  ارز بشرر

-الحمد الله على سلامة المريض

-نجحت العملية

-اي نجحت  بس هم  بعدنا مانگدر انقرر  النتيجة النهائية

-يعني حالته اشلونها بس فهمني زال الخطر لولا

-كلتلك نجحت العملية  بس لازم نضل مستعدين لاي مضاعفات تصير مثل ماتعرف المريض جاينه وحالته  متأخره

-ميخالف مضاعفات بس اهم شي   يصحى

-ان شاء الله بس ممنوع الزياره لحد مايصحى ونحدد حالته الصحية وشنو الإجراءات الي لازم نتخذها بمثل حالته

نفخ واندار لهيذام  ضحك دنگ مسح وجهه راح يمه ضربه على ضهره كله حتى تتأدب ماتضربه بعد

-كفيلك محمد بس يكوم اذا ماحطمت عظام وجه  ماانحسب عالزلم

-هههههه ولك غير خال وجهه عنده

-حضينة امه  كلب ابن كلبب وخنييث اذا ماسحلت الكيعان واعيد ترتيب رجولته اطلع امعتب

-يله بالله اكتلك وانعل ابو سلفاك  ولاتكول اخ ياخي الولد ما يريد يصير رجاال شنو اجبارري يابه متنازلين برجولتنا الك مكتفين بحيونتك بالبيت

باوعله وضحك كام حضنه عيونه تلمع اليشوف هيج خايف والفرحة بعيونه ما يكول نفسه الي يكتل بي

التموا جماعته كلمن يسلم عليه ويتحمدله بالسلامه  احس ضغطي انخفض تركتهم ورحت انداريت  للجهة الثانية يم الغرفة گعدت احس  الدنيا تفتر بيه دنگت افرك براسي واسمع صوت بنيه تحجي بترجي

شلت راسي لكيت وحده تقريبا بعمري ويمها ابوها يتوسل بيها حتى تدخل للغرفة اخذله بالربع ساعة لمن بجت سحبها لحضنه يبجي على بجيتها

نزلت دموعي  دنكت احس غصة بگلبي حسيت قمصلة على امتوني رفعت راسي  لكيت هيذام  عرفته جايبها من جماعته  رجعت  باوعت للگاع

كعد يمي عيونه عالكدامنا ثواني وهمس بصوت هادئ حلو منظرهم

مارديت

-اتمنيتي انتي بمكانها واكفة

-اتمنيت انضم بحضنه واشكيله من كل الدحس بي

-مافد يوم حضنج

-جان اكثغ وحده بخواتي اني يكتلني ولامغه  صاحلي بأسمي لو ام نص السان لو بت اليهودية

-ماجربتي مره تسألي ليش

-لان يعغف ماغاح اخضعله واتزوج من بعد محمود حتى لو يموتني

-متأكده هذا ابوج ؟؟

-مثل مامتأكده اشكد اتمنيت انت الي بالداخل مو اسماعيل وبدل ما تنزل دمعتي لان گال طلع بالسلامة اضحك بسماع خبغ موتك

-تحبي

-لا

-ليش مانهزمتي

-لان غمض عيونه وهو يوصي عليه ما تعودت اظلم احد وغاي

-ووعد محمود

-بسببك غجعت بي وخنت الكلمة الي تعاهدت بيها اله

-لو رجع بيج الزمن لاول لقاء بينه وبدل ماارعبج احجي وياج بهدوء شنو جان صار

-بدل ماانهزم اشكيلك من بابا والديسوي بينه وبدل مادعي عليك احتمي بيك

-تعرفين منو هذا الجوه

-ابن عمك بحسبت اخوك

-وانتي

-زوجته

-وهذا اكبر دعوه ربي جازاني بيها

-غاح انهزم

-اردج

-ماتحصلي مكان

-اللكفج لو اطيرين بالسماء

-ماتگدغ غاح اختفي ماتشوفني اله واني گدامك بالمكتب تساعدني اغجرع لمحمود

-الي يكسر حلفانه ينكسر  گلبه واني انكسرت كسره   لو الف سنه الف بيها ماراح تنجبر الي ضاگ الوجع مايعيدها رأل لاتجبريني  اخسر سنين عمري بأذيتج

-تعبت واني اتامل حلمه من بعيد

-اليحب من صدگ مايصبر على البعد ويضل يتأمل خياله ويحلم بدفوا حضنه

-احبه اكتغ من غوحي

-ماحبيتي شفتي بي الامان الي فاقدته عشتي بي براءه طفلة للضحكة وشغف مراهقة للمشاعر

-يعني شنو

-الامان يتبدل بالقوه البراءة بالصلابة والمشاعر بالنبض الي يلجم ويه كل دگة

-انت مغيض

اتجتف وانتجه يباوعلي رغم هيئته الترعب بس جانت نظراته تختلف

همست بعد مااخاف منك

مارد

-كل يوم غاح ادعي عليك

ابتسم 

-غاح تتعذب بحياتك ماغاح تنام ولا ليلة بهدوء كل ماتغمض عينك غاح اتشوف اشباح الظلمتهم يسودون حلمك

-شايفة حيوان يخاف من ظلمة لو سامعة جثه تحس بالوجع 

-غاح تحس وغاح تخاف مثل ماخليتني اختنگ كلما اشوف الظلمة 

سكت

-ضيعتني 

-ماضيعتج اني …

سكت ماكمل؛ همست تعغف ليش ماكملت لان تعغف نفسك باطل  الله يجوي كلبك يحسسك بالناغ الداحس بيها؛  كلتها ونزلت دموعي

مارد دنگ خله راسه بين اديه

شهكت بصوت  غمض وهمس  بروح اعز شي على كلبج لاتبجين والكفل زينب مااكدر احمل كل هالوجع

-تعغف اليوم شنوو

-عيد ميلادج

-جان محمود كل سنة يحققلي امنه ويگعد يحسب للسنة البعدها متاني ادخل السن القانوني حتى يحققلي اخغ امنيه الي جنه نحلم بيها

-بدل الامنية احققلج ثلاثة

سكتت

شال راسه باوعلي شر شنو

-صدگ دتحجي

-طلبي

-مداتضحك عليه

-ماعده طلعتج من البيت گولي رأل

-اشوف اهلي

-بعد

-اسواغي

-اخر امنية

-تبعد بابا عن خواتي

-كومي يله

-هيذام دتحجي صدگ

مارد كام ومد ايد مديت ايدي مامصدگه لزمها كومني عدل القمصلة سد السحاب وباوع لعيوني ساكت حسيته يتأملني مثل اليريد يحفظ ملامحي

دنگت نزل شعري على وجهي رفع ايده راد يوخره  وبلحظه اتراجع لم جفه واندار همس يله رأل

مشى  واني بعدني مامستوعيه الگاله اصلاً صارت مسافة بينه شفت ديعبر ركضت ورا  بسرعة اندارينا صار بوجهنا ازر گله وين

-ماتأخر عينك بحضينة امه

-الاهل راح يوصلون اذا مالگوها شگلهم

-گلتلك ماطول لاتلح ارجعها قبل لاالزمايل اهلك يردون

-لاتطلع بدون حماية

-ان جان على قضيتي لاتخاف احميها بروحي واذا عليه ماترك ابوك ونتقل لربك  اذا مااسحگ على فچه وتركله علامة بخلقته النگسه تذكره بيه طول ماهو عايش

مارد وهيذام اشريلي يله

رحت ويا طلعنا وصلنا للسياره ردت اگعد ورا جرني فتح باب الامامية دفعني بيها  وصاح بت المداس سايق بمافيا ابوج

طبگ الباب حيل وراح صعد شغل السياره طلع بينا اباوع من الجام وارد اباوعله فاتحة عيوني هذا هيذام  الي هددني بالشارع اذا لكفني بنفس المكان ينهيني نفسه هسه ماخذني حتى يحقق امنياتي

وارجع  اباوع للشوارع احس روحي بحلم لحد ما وصلنا يم ماركت ركن سيارته  نزل راح على جهه وگف يخابر اخذله دقايق  وغلقه ؛ دخل للماركت  شوية  وطلع بيده علاگة صعد انطانياها وسد الباب

اشرت شنو هاي

-محتفلة قبل بعيد ميلاد بدون كيكة؟؟

-اي كل سنة جنت احتفل بدون كيكة

-ليش

-لان جنت اطلب مكانها امنية

-جنتي يعني ماضي والحاضر يختلف بكلشي

-يعني شنو

-يعني ماكو امنيه بدون لاتنطفي شمعة الامنيات مو لواني غلطان

-بس اني ما احب هيج شي

-واني ما اشتغل شغل ناقص لو ابلش  بي من البداية وتممه للنهاية لو اصلا مااخلي  ايدي بي

فتحت العلاكه لكيت كيكة صغيرة طلعتها ؛  دنگ طلع الشمعة  خلاها بيها وجدحها اشتغلت  عدل گعدته

باوعتلها ورجعت باوعتله غصباً عني ابتسمت

-لوجان نبضه حقيقي  جان عرف شنو تحبين بدون لا اطلبي

-شي ماحاسه  ميصغ تحجي بي

-مااعرف شنو الاحساس ولا اريد ادخل بي بس الحب شي جبير مستحيل يختصر بكلمات اذا مو فعل  وتضحية تكون اوهام لا اكثر مو؟؟

-ليش هيج دتحجي

-يمكن اصحح غلط ارتكبته بلحظة حيونه او اريد اترك ذكره تحذف ولو شي بسط من التشوه الرسمة

-غاح تغوح

-مو هذا الرايدته

-لهيج دتحققلي امنياتي

راد يرد ورن فونه طلعه شافه فصله اشر يله

نفختها دنگ فتح الجگمجة سحب علبة فتحها  ديطلع منها السوار والمح مثل الشعر بيها بسرعة سدها انطاني السوار كال وهاي اول وحده

-بعد اثنين

-الثانية راح تشوفيهم من بعيد لان قربج منهم راح ياذيهم

-ليش

-غزوان شاب مراهق ومتسرع  اذا شافج بهاي الحالة ماراح يسكت يضل وراج لحد مايشمر نفسه بتهلكة

-زين يصيغ اشوفهم واخابغهم بس حتى أمنهم عليه لان غايه تضل قلقة اعغفها

-ولو كلشي مافتهمت بس ميخالف

درت وجهي تريدلك واحد شريف ماينصب عليك ماكو هو مهتلف جنه بول تيغي ويعيب

-سمعتج

-ماحجيت شي

-تدرين ليش المافيات يستعملون البول تيري بمهماتهم

باوعتله

-لان يسمع صوت الضحية عبر مسافات خيالية ويلكفهم حتى لو جانوا جوه الگاع والي يوگع بيده مايخلي اثر منه يمحي حتى جثثهم

-يعني شنو

-يعني الج كل امنية اطلبيها بس لاتحاولين تتشاطرين والي براسج شيلي

كالها وشغل السيارة دارها  للشارع الثاني طلع بي واني عيوني عليه صافنه  شعرفه بهالاسم والاكثر من هذا اريد انهزم

لحد مافززني كال وهاي الامنية الثانية درت وجهي اباوع قريبين عالجسر  راية وغزوان واگفين مثل المنتظرين احد من لهفتي  مديت ايدي ردت افتح  الباب ونزللهم ركض  كمشني باوعتله بترجي

-نزلي ماعندي مانع بس بدل هاي وكفتهم يم الجسر راح  تكون وره الحديد

-بس احضنها والله مشتاقتلها

-الاشتياق  اذا بي اذيه للنحبهم الافضل نكتمه ونبتعد

تركت الباب اباوعلهم اشلون يسولفون ويضحكون  غزوان بعده على حنيته يعدل بنظارته ويباوع لراية بلهفه اشلون تسولف تذكرت من انزعها اله بليل وهو شامر روحه من التعب بس حتى يجيب افلوس اكثر وماننكتل

نزلت دموعي دنگت امسحها انمدت ايد هيذام  بيها فون باوعلتها كال ردي

اخذته خليته على اذني واسمع صوت غزوان يگول نعم سيدي

رفعت راسي لكيته يخابر ويتلفت شهكت بصوت صاح رئااال وين انتي

ماكدرت ارد احس روحي مخنوكة رد صاح مووياااج لج رئاااال شصايرلج احجييي

مسحت دموعي همست مابيه شي بس مشتاقتلكم

-ويين انتي بس انطيني العنوان وروح اهلي لواعرف بيها نهايتي  هم مااخليج احجي وينننج

-والله مغتاحة وماعندي شي وهياتي دااحتفل بعيد ميلادي بس شفت مكانكم خالي احتنكت

-لاتوجعيين گلبي احجي بروح محمود والله ما تسمى اخوج اذا مااخذج منهم

-تاخذني من منو تغه اني بيت زوجي وعايشة احسن عيشة ماناقصني بس شوفتكم

- تجذبين والله

-تعغفني مااجذب  غزوان لاتزيد همي بداعت الخوه

-يأذوج مو؟؟

-اكو واحد يأذوا يسووله عيد ميلاد ويجيبوله هدايه وحققوله كل امنيه يتمناها وتغيد اثبتلك انت واكف هسه لابس اسود ولازم ايد غايه ومدنگ

-وينج يبعد اخوج

-مو بعيد عنكم دااشوفكم بس مااكدغ اجيكم لان زوجي مهدد بالاغتيال ولو ماناوين نسافغ ماجابني حتى اشوفكم

-راح تسافرين

-اي حجزنا هسه غايحين للمطاغ غزوان لاتخاف عليه  بيش احلفلك مغتاحه بحياتي

رايه-. هيج هنه عليج كالتها وبجت

دنكت عضيت ايدي اكتم صوتي غمضت  واني اسمع شهكتها ردت كالت :-ماراح ترجعين مو

-ماعغف

-لعد وين حجيج واني البسج بدلة العرس بيدي هيج تركتني كلجن هان عليجن واني واكفة وحدي بالعقد اتلفت ادور وعدجن الي

-تزوجتوا؟؟

-عقدنا جنت منتظرين  رجعوج حتى نتزوج

باوعت لهيذام بتوسل اتجتف وانتجه برطمت ابتسم و اشر اي

همست شنو اي

-راح تحضرين زواجهم بس خلي يبلغوني قبل وقت واني اجيبج

ضحكت وغزوان كال سيدي امانة الله يمك رئال

-ماعليها لاتخاف يله ابني اخذ راحتك عدنا شغل

-اذا ردنه نسمع صوتها عادي اتصل على نفس الرقم

-لاا هذا رقمي الشخصي راح احولك رقم خاص تكدر تتواصلون وياها

تشكر منه وسلم اخذ الفون مني غلقه وشغل السيارة مشى واني عيني برايه الي بعدها تبجي وغزوان مدنگ لازم وجها بين اديه يحاول يسكتها بس جذب كل دقيقة ويمسح دمعته بمتنه ويرد يسوالف وياها

باوعتله لهيذام  اشر شنو

-بابا ماغاح يخليهم يكملون زواجهم

-محلوله كم سنه تردين ابعده الج

-اشلون تبعده

مارد دنگ دك رقم بالشاشة مال السياره اول رنه اجه صوت واحد خشن گله حي الله ابو درع

-حي الله الشهامة طالبك بخدمة

-انت تأمر مو تطلب كول يخوي

-جاسم ال------- الي بالبتاوين والد الطفلة رند

-شبي ؟؟

-اريدك تستضيفه  وتكرمه بكد غلاته يمك

-الله جابه غير من زمان خاله براسي وادورلي واحد ادرب بي المستجدين

-كمل تدريب وشمره ويه الربع لحد ماتفرغله

-ابشررر  نص ساعة مو اكثر وعتبره غبار ونمحى بسحگت حذاء

-ما تقصر مردوده

-ابو درع الغالي ضاميك للكبار 

سلم وسد گال وهاي الثالثة

دنگت كمل طريقه وصل مسافة عن  المستشفى وكف انداريتله اشرت شنو

-نزلي هنا  الظاهر العائلة الكريمة وصلت واذا سألوج وين جنتي كليلهم كاعده بالحديقة

-تمام

-رأل

-همم

-ديري بالج على نفسج

-غاح تغوح

-من زمان المفروض اسويها بس الضاهر ربي راد يكسرني گد ما ظلمت عالم

-ابنك معتازك

-اكو من اليحمي رأل لاتعيدين الغلط لخاطر لاينوجع كلبج اكثر من هيج

-تنصحني بدل ماتاخذ حق منصبك مني

-اليخسر نبضه مايهتم لباقي احلامه

-بسببك دخلت هالبيت

-ولنفس السبب راح  اطلعين منه

-مافهمت

-هديتج خالها  على ميزي 

باوعتله  مد ايده وخر شعري خلا ورا اذني باوعلي وهمس لاتخلي يطول

-ليش

-يله نزلي

مافهمت كلشي فتحت باب السيارة داانزل  وماشوف غير سيارة سودة اجت بكل سرعتها  طبگت گدام سيارتنا كلهم ملثمين

صرخ هيذام دنگيييي  ومد ايده لزمني بعدني مامتحركة  سحبني حيل ضمني بحضنه وندگ وصوت واحد صاح ارمووووا…

لاتنسون التصويت …