رواية شيء من رصيف الدم الفصل الثالث وثلاثون 33 - بقلم Leo Alfatlawi

شيء من رصيف الدم

بارت الثالث والثلاثون

بقلمي : leo Alfatlawi

بارتين سوه

***رئال****

بلحظة دخلوا حرس يتراكضون  ترسوا البيت والضابط على وكفته مثل المامصدگ
غمضت اجه  يتمشى عالكيف  كعد گدامي نص گعدة ؛ ثواني واحس اصابيع تمشي على بشرتي بهدوء فتحت عيوني  صارت عيونه بعيوني شكله وهيئته تخوف بس نظراته تختلف جانت اكو  بيها لمعة مدموجة بلون احمر مليانة تعب

نزل الدم على عيوني مد ايده راد يمسحه زحفت ليورا بسرعة انجرت رجلي لاارادي صحت ااا وعصرت نفسي

دنگ باوع للحبل اتبعه بنظراته  لحد ماوصلت لرجلي٠٠ گد ماساحبتها وماحاسة وكت الضرب داخل الحبل باللحم رد باوعلي نزلت دموعي صك على سنونه وغمض بجوع

صاح واحد من الحرس وصل الضابط دسار فتحوا الطريييق ؛  درت وجهي اباوع  دخل واحد يركض نفس الضخامة هم لابس عسكري  شافني وكف متفاجئ  اخذله شوية و ضحك بستهزاء و هز راسه لااا

خفت لميت روحي صوت امجد يفلش بالباب ويصرخ ولكم جلاااب عوفوهااااا ؛ وعمتي تصيح  كلتله وراهااا مصيبة وراح تبلينااا

حركة ركضه الحرس و حماوة الدم ينزل عالسريع  صارت هوسة براسي؛  لزمته ظلام على صوت صريخ جثث سلاسل حديد ؛ضربة بسطال  وصوت خشن يصيح اشلون كتلتي

غمضت حيل وعصرته صكيت على سنوني صوت دفرت الباب وصرخت امجد يصيح شمسسسس انسحبت روحي ماحسيت بعد…

…ايد تمسح على شعري  بهدوء نفس بركبتي دفو  محاوط جسمي كلام شبه واضح بأذني شخص يهمس بخشونة تخنگ اجيتج ياروح هيذام

حسيت مثل قطرات المي على وجهي فتحت عيوني لكيت نفسي  بحضن الضابط  يباوعلي بقلق عيونه دم كلها شر ينتفس بغضب ؛ نزلت دمعتي برعب مسحها بسرعة وسحبني لحضنه عصرني بكل قوته دنگ واخذ نفس مني طويل حسيت روحي ضاگت  شهكت صاح الضابط اليمه لك هيذاام راح تموت بيدك يمعوود

رخه حضنه ينفت كأنما يريد بس يستوعب ؛ مسح وجهي ايد ترجف صارت عيوني بعيونه اريد احجي مااگدر باوعتله بضياع ونزلت دموعي بكسرة 

بسرعة جرني الضابط  منه خلاني على صدره وهو دنگ لازم راسه مثل الي انخفض ضغطه 

فجأه صارت صنته اباوع الكل واكف خايف عمتي وجها اصفر خانسة يم سعدية وعبدو بعده  الصوندة بيده يرجف والحرس مطوقة البيت

اجه امجد يسحل برجله وجهه كل دماية ازرگ من الضرب بيده دبة مي گعد يمي بعده ماغاسل وجهي سحبت نفسي من الضابط بسرعة وصرت ورا امجد راد يلزمني دسار ضميت وجهي بظهره وهو حاوطني بأيديه كالهم بس على كيفكم وياها والله مريضة ماتعرفكم

دسار  - لهيج رابطيها و صالخيها

عبدو  - لا سيدي لان هيه فاقدة الذاكرة كلشي ماتندل وكل شوية منهزمة ومسويتلنا مصيبة

- اهاا لااا لعد  تستاهل

عمتي - وروح ابوي يا سيدي اطلع اسأل الجوارين عليها فاضحتنا بينهم  حتى الليل مانامه بسببها بس نغفل نلكيها متعرينة ورايحتلهم لو دخل واحد

- اوووف

عبدو - مرتين لزمتها ويه واحد عالسطح وهاي گدامك هسه اجيت من الجيش بعدني بملابسي  اتلكتني مرتي كالت طلعت من الفجر ويه زلم واستوها دخلت اگلها وين جنتي تتفل بوجهي

شال راسه هيذام باوعلي نزلت دموعي وهمست بتوسل  والله جذب سيدي

اتقرب راد يمنعه امجد جره بخفة ايده شمره رجعت ليورا لزمني كمشت ايده وحجيت بشهكة  والله ديجذب غاد يعتدي عليه اني ماقبلت موتني  وحبسني بالحديقة  حتى خابغ عمو واسأله

مسح دموعي نزل ايده على بطني حركها عالكيف وباوعلي بنظرة كلها شر؛  اشر وينه

عيوني صارت على عبدو وشهكت غمض بحرگة و جرني لحضنه ضغط عليه حيل حسيت عظامي تحطمت باسني وگام  دنگ مسح عيونه ورفع راسه يباوع لعبد.و رجع ليورا يتبلعم

راد يحجي عبدو ؛ رفع اصبعه اشرله اشش وتقدم  اباوع لعبدو يرجع وهذا يتحرك بطريقة ترعب؛يطگ برگبته  فاتح عيونه ويباوعله  بنظرة  تاخذ الروح  اتحسه مو بشر

انتبهت لصوت ضربة بسطاله نفس الصوت اليجي براسي وصل يمه  لزمت امجد حيل واشوفه سحب الصوندة من ايده شمرها عالحرس جره من ياخته شمره كدامه بالغرفة دخل ورا  ورد الباب برجله

دتصرخ عمتي وسكتها واحد من الحرس بسحبة الاقسام خنست كعدت بالكاع وبتها يمها لازمتها بس دموعها تنزل برجفة

ثواني ومانسمع غير لادخيلك سيدي اااابوس رجلج وراها ضربة وصرخة رجت البيت احسها دگت براسي ؛ لميت روحي وسديت اذاناتي حيل دنگ الضابط  لزم وجهي وهمس اشش لاتخافين خليج وياي

- غاح يموته موو

- مايموته بس احجيلي الصدگ بدون خوف

- والله ماخليته يلمسني حتى شوف امجد كسغه لان وكف بوجهه واني جنت بالقفص حابسني غوح شوف مكاني والله ماجذب

- جان يعذب بيج ؟؟

هزيت راسي اي

- ماتذكريني

- هئ

- اكو وحده تنسى اخوها

نزلت دموعي

- لاتبجين يبعد اخوج

- لاتخلي هذا يموته حباااب

- اوووف يا هذا شسوه وراج ولج صدگ رئول بعدج عايشة

سكتت وخر شعري عن وجهي اخذلة شوية يباوعلي ضحك ونزلت دموعه سوه  جرني لحضنه حضني حيل وخرني رد باوع بوجهي مامصدگ كال وعلي كلتلهم عايشة بس محد صدكني

داحجي وصرخ عبدو بصوت يخوف ؛ كام الضابط وكف متخصر عيونه عالباب  واني لميت روحي احس جسمي مااسيطر على رجفته؛  اكثر من ربع ساعة وهو على صرخة وحدة  طريقة توسله وعياطه العالي وحدهن يخلنك تتخيل بشاعة ونوع التعذيب لحد ماتحول حسه بحيح واختفى نهائياً

شوية وانفتحت الباب طلع الضابط مدنگ يفتح  برداناته شكلة متوحش اي ملامح للرحمة ماكو بوجهه شال راسه  اشرلهم جيبواااا

ركضوا ثنين حرس دخلوا للغرفة دقايق وطلعوا يسحلون بي منتهي راد تصيح سعدية بس رفع راسه باوعلها  ملخت وجها وخنست يم امها

عيوني صارت على  عبدو على طول مايجرون بي ايده ورجله مگلوبات تگول ماتابعات اله بس نقطة دم مابي فاقد حتى الوعي 

شمروا بنص البيت اتقرب يمه شال رجله خلاها على خشمه وسحگ عليه بسطاله بكل حيله غمضت واني اسمع صوت العظم طگ وصرخته صحى 

نزل رجله دفره غفل بقوته  انطوه عاصر نفسه عافه واجه يمي زحفت ليورا انضربت بالحايط گعد گدامي اشر اهدي ورفع ايده عالكيف وخر شعري عن وجهي خلاه ورا اذني بهدوء وندار لامجد حجه بنبرة تعصر الگلب هو ويگله  اشلون وصلت لهنا

امجد  - ابوي جابها جانت منتهية عبارة عن جثة بدون نفس

- ليش مابلغتوا

- خفنا سيدي والله تعرف احنا منطقة كلها عشاير وهيه جانت بوضع تعبان وبمكان تعبان اكثر  من جابها ابوي ماحسبالنا تعيش وبعدين…

-  كمل

-سيدي والله

ابتسم ودنگ فتح ايده وسدها بعده مارافع راسه وبلش امجد يسولفله من ساعة الجابني ابو لحد دخلتهم ماخله شي حتى عن امه واخته حجه اشلون جان ابو ينطيهن افلوس حتى يغيرلي وهو مدنگ يتسنط بهدوء

عيوني عليه اباوعله اشلون كلما يسمعة يوصل لعبدو يصغر عيونه ويباوعله بنظرة تغلس الواحد خلاه يذكر كلشي  بدون لايحس حتى كم مرة تفل  لحد ماوصل لحالتي من تجيني النوبة واضل اردد نفس الكلمة لمن افقد الوعي اشرله لهنا كافي

امجد - سيدي والله اسئلها هاي گدامك  كللها شنو جنت ناوي اسوي باجر

- لااا انت احجيلي

- اخذها وانهزم بيها لبغداد هناك ادور شغل واعالجها لحد ماترد لصحتها

- وليش دور شغل مو جندي انت

- عبدو كسر رجلي وحبسني ماخلاني التحق وراح نزل بيه عقوبة فصلوني لان وكفت بوجهه ماخليته يتزوجها

- عفية بالبطل اتصلي بأبوك خلي يجي بسرعة بدون لاتذكرله شي

- هاا سيدي مو شسمة

- اشبيك بابا احجي

- هذا شمه ااااه  مو ماعندي رصيد

ضحك وهز ايده طلع فونه فتحه وشمره عليه لكفه امجد بسرعة ودنگ ديدگ الرقم وفتح حلكه على كبره شال راسه فاتح عيونه كلها  ؛ اشر هيذام شكو

امجد - يعني سيدي شموسة تصير زوجتك

دسار -  واني اخوها واخوها الثاني دقايق ويوصل ضابط بالتحقيقات

- لا تكول ابوها رئيس الوزراء

دسار - لايكون ماعاجبك

دار وجهه باوعلي فاتح حلكه ورد باوع لعبدو  الخانس خال ايده بين رجليه ينهز كله مبلل

دسار - يله لك اتصل  وانتم روحوا نبهوا ولدنا خلي يراقبون المنطقة عدل

دنگ يتصل وهيذام عيونه عليه  لميت نفسي بسرعة اباوعله بخوف ؛ ابتسم واخذ نفس بتعب   جرني لحضنه وگعد بالگاع  عصرني حيل دنگ باسني وحجه بصوت خافت اهدي يروحي لاتخافين

صار كدامي عبدو اتذكرت الظلمة ولسعات الصوندة غمضت بخوف مثل الحس بيه  فوت اصابيعه بشعري دخلني زايد بحضنه وهمس -كل التعذيب والاذيه الحسيتي بيها جانت بسببي

بجيت بصوت

- وكلام الله لحرگهم كلهم ماارحم بيهم لاجبير ولاصغير ودين محمد لطلع كل ثانية بعدوج من حضني بعزاز كلبهم

- منو اني

- قضيتي الراح اخلي شوفتها رعب الهم الراح امحيهم واحد واحد لخاطرها

- مدااذكغ شي

- راح تذكرين وتسحگين على روسهم قبل رتبهم

رفعت راسي اباوعله روحي رايحة كوة فاتحة عيوني من التعب والالم

مسح دموعي ردني لحضنه ضغط عليه حيل كله دسار  لازم ناخذها للمستشفى تره حالتها تعبانة

هز راسه

- اكيد هسه وصل خبر للربع  لكيناها

-بنفس الوقت اريدك اطش الخبر هيه انهزمت واتعرضت لحادث الي خلاها تفقد الذاكرة

-ابن النظام شناوي

-كل خير 

كالها وباسني وخرني  دنگ على رجلي راد يلزمها سحبتها بسرعة ونزلت دموعي بتوسل

- على كيفي وياج مااذيج

- لالا فدوه اشلع الحبل من الحديدة

-دسار سجينة  وجداحة  بسرعة

دسار - سمعت امجد

مجد - هاي جداحة بس  سيدي ترا كال دسار

- يعني هيه رئال قابل شنو تعاشر   بالمناسبة ابوك يدري بيك ادخن

- سيدي شنو نوع السجينة تريدها

ضحك ودفره بالشقى كام راح للمطبخ يسحل برجله  عيوني صارت على عمتي وبتها وحدة حاضنه الثانية يباوعن لعبدو  ويردن يباوعن لهيذام ويبجن مرعوبات

اجه امجد انطه السجينة لهيذام  وكله دير بالك سيدي  حامية كلش

- عفية اكعد ثبت رجلها لا تتحرك

دنگ امجد ثبتها وهو خله السجينة على طرف الحبل من يم رجلي حركها شوية حسيت روحي شاطت روحي لاارادي لزمت اديه و صرخت لاهيذااام  حباااب

غمض عيونه صك على سنونه وخر ايديه وكام راح لعبدو بس صوت ضربة بسطاله وحدها تبين كمية الغضب الشايله وصل يمه مثل الاعصار  رفع رجله دفره بين رجلي بكل قوته قبل لايصرخ اجته دفرة ثانية شلته بمكانه

لم رجلي وفتح عيونه على كبرهن لزمت ايد امجد حيل واني اشوفه اشلون رد دفره بدون رحمةبنهاية ظهره  وصوت طگة العظم ويه صوت ونته الگوة تطلع

ركض دسار لزمه جره حيل وصاح  كافي لايموت  قبل لانبلش شغلنا ويااا 

خله اديه ورا راسه وغمض رافع  للسما يهدأ بنفسه  اخذله دقايق  مسح وجهه ورجعلي گعد  شال السجينة  رد شغل الجداحة بطرفها يحميها ؛من كد مااشوف عيونه حمر وجهه غاضب حتى اللالم نسيه فتحها سحبت  رجلي لامه نفسي

كعد نص گعدة عيونه عليه رغم هاي هوسته وصلابته اله اكو لهفة ولمعة انكسار بعيونه تحسه لحد الان مامصدگ غمض اخذ نفس  بقلة صبر وجر راسي خلاه على صدره باسني وضمني بقوة ؛ حسيت برجفة ايدي  ودگات گلبه الفاضحته  ؛ رد باسني و دنگ شالني كام واشرلها  على عبدو شيلوا 

ركضوا الحرس عليهم راد يطلع صار بوجهه امجد گله سيدي حقك كلشي تسوي بس ضحيت بصحتي وظيفتي لخاطر احمي عرضك  واني مااعرفك دخيلك عرضي ذني لاتخليهم ياخذوهن

- لاتخاف محد يوصلهن والدك كلها ساعات ويكون يمك والي كعدة وياك ثانية

هز راسه اي باوعلي انملت عيونه دموع عرفته ديودعني نزلت دموعي دنگ وهمس ديربالك عليها سيدي

ضحك واشر اي طلعنا شهكت ضمني بحضنه صعدنا السيارة  كلهم يله بابا طلعوا

تحركت السيارة عيوني صارت عالجام الحرس مخبوصة كلها تصعد سياراتها وامجد واكف يم الباب ابتسم واشرلي باي 

بلحظة صارت كل مواقفة بعيوني من وكفته عالدرج لكعداتنا بليل بالحديقة لسوالفنا وضحكنا العبرة خنگتني دموعي تنزل بحرگة اتمنى انزل اركض انضم بحضنه واكله لاتعوفني

وجع الخوف على الم الفرگة على ريحة الدم  وتعب   افترت الدنيا  غمضت مااعرف اغمى عليه لو نمت

گعدت على صوت فون يرن وايد تمسح بوجهي فتحت عيوني لكيت نفسي بالفراش وهيذام مدنگ عليه عيونه حمر مبين باجي شافني صحيت غمض عصر جف ايده وهمس بحرگة من بين سنونه  ماسمع شنو بس حسيته يتوعد

انفتحت الباب دخلت بنية تركض لابسة اسود وكفت يمه متفاجئة خلت ايدها على گلبها  ونزلت دموعها

كام وكف باوعلها وگال وهاي قضيتي رجعت

شهكت بصوت

ضحك خربط شعرها ودار وجهه مسح دموعه مثل الماراد احد يشوفهن

فونه مستمر بالرن مسح وجهه طلعه رد بشروا-- كفوو علكواااا جايكم  …

اشر للبنية عيونها عليه هزت راسها شال سلاحه وطلع بسرعة سحب الباب قفله علينه وراح يركض

گعدت البنية يمي لزمت ايديه تريد تحجي ماتكدر البجية لازمتها مدت ايدها تلمست خدي وحجت بشهكة صدگ  بعدج عايشة

سكتت

- شوفيني لابسة اسود گومي شوفي حالي اشلون بدونج ولج مخلصتها اگعد بس اذكر سوالفنا ولعبنا ساعة اضحك وساعة ابجي مثل المخبلة وراج

- مااذكغج

- اني ضي الضيعتج الي اخذتج من حضن هيذام وخليتهم ياخذوج بدون لادافع عنج اني السكنت الغرفة لان مااكدر اطلع اشوف مكانج خالي ولاشوفه اشلون گاعد صافن يباوع لأغراضج  ولج متتت وراااج رئال متتت

جرتني حضنتني تبجي بصوت عالي شوية وخرت ردت مسحت وجهي - احجيلي وين ودوج اشلون جنتي عايشة وليش هيج حالتج

- كل الي اعغفه گعدت اسمي شمس وعايشة يم عالم بغيف الناصغية

- شوداج هنااك؟؟

- انتي اختي

- ماتذكريني ابد

هزيت راسي لا

- اني عايشة عدكم بت الحدقجي بس جنه اكثر من خوات

- عندي اهل

- عندج دسار  وعندج اني والاهم من هذا ابو درع الي راح يبلش يلطم بقوانين حمورابي بسببج 

-مافهمت

- لاحگه اتفهمين كلشي وتعيشي المهم رجعتيلنا بالسلامة ههههه ولج صدگ  رئال كاعدة گدامي ودااحجي وياج

- وين غاح هيذام بس لايأذي عمو تغه والله حباب بس هو فقيغ يخاف من عبدو مايكدغله

- اشلون يأذي وهو ردله روحه بس كولي راح يسحب منه معلومات ويجيب الجبروا يضمج كل هالفترة يمه اي

- هو لكاني بمنطقة مقطوعة مايعغف شي

- ماكو منطقة مقطوعة اكو كاميرات واكو ارقام سيارات دخلت للمنطقة بنفس التاريخ  تره اخوج يشتغل بالمخابرات وحماج بالتحقيق يطلعون الميت من جوة الگاع  ويسلموا لرجلج يسويله اعاده استدعاء  للحياة

- اشلون اخذوني وشمغوني هناك

- كلشي اسولفلج واذكرج بكل لحظة مريتي بيها مااتركج اذا ماترد ذاكرتج وتوكفين تفلين بوجهي لان رجعتها

- ههه شنو هيج حياتي موحلوة

- اووف ولج رئول مامصدگة عايشة بعدج

كالتها ونزلت دموعها جرتني لحضنها حضنتني حيل ووخرت  تباوعلي وتضحك مامصدگة

-اشو هدوء  شنو بس احنا عايشين هنا

- لا عائلة رجلج الملائكة كلها بس حالياً داخلة بصدمة رادلهم وقت على مايستوعبون تركج منهم كومي خلي اسبحج لان هذا الدم تارس شعرج لو مابيج حيل نخليها لباجر

- جسمي دياكلني من الوجع

- الله يكسر ايديهم ولو ادري وگعتهم بيد هيذام انكس من هالدعوة هسه مسويهم تعلكات بس هم الله يلعنهم

- شنو غاح يسوي بيهم

- حبيبتي لاتسألين خليج على فقدان الذاكرة كافي حرام عقل وذاكرة سوه

- هيج ماعنده رحمة

- حقج ماتعرفين شنو صار بي من شاف فيديو الحركوج بي فدوة رئال لاتذكريني ويله گومي وياي للحمام قبل لايرجع ماعنده مانع ياكلج انتي ودمج وهم اجاوبج على كلشي تريد تعرفي

وخرت الغطة كومتني رحنا للحمام دخلنا مو حمام تصميم يعجب وكفت صافنة بين ماترست الحوض مي دافي  ذبيت بس الكلبية ودخلت بي احس عظامي كلها تاكلني غمضت من الالم

اكثر من ساعتين وهيه تجلف بيه وتسولف ساعة  تضحك وساعة تبجي وكل دقيقة حاضنه راسي وبايستني؛اشكد جنت اتمنى اعرف شي عن الماضي بس ماحسيت روحي فرحانة لان جنت اسمع بدون احساس كأنما تسوف عن انسانة ماتمدلي بأي صلة

جابتلي تراك اسود لبسته طلعنا رجعت للفرشة گعدت وهيه گعدت يمي تمشطلي كملت تربعت كدامي كالت هسه شنو تريدني بعد  اسولفلج

- سولفتي عن كلش ماعدى اهلي

- مم اهلج اختصاص هيذام من يجي سألي عنهم لان يعرف ماضيج وعلاقتج بيهم اكثر مني

- ليش لبستيني اسود اكمل حزن على نفسي وياج لو شنو

- هاا لامو انتي اتحبين هذا اللون وتركج من الحجي جوعانة هاا

هزيت راسي اي

مدت روحها سحبت الفون من الميز دكت رقم دقايق واجت خشونة صوت هيذام طالعة من السماعة هو ويصيح رأل بيهاا شي ؟؟

- لالااا لاتخاف هياتها كاعدة كدامي دنسولف

-انعل ابو ابوج على هالقسمة جااا شكووو متصلة لج

-غير انت قفلت الباب وعفتها جوعانة

- ماتأخر ساعة بالاكثر وراجع

- بس خلي واحد يصعدلنا

- كلت ساعة وارجع والي يوصل يم الباب اعدمه واعدمج ويا سمعتييي

- زين بس خلي يدخلون اي شي من جوة

-  ضييي عيونج عليها لاتشرب ولاتاكل لحد ماارد سمعتي شنو  لغثتتت لولاا 

-فهمت

-يله ووولي

بعد ماغالق الفون ونسمع صرخت واحد صاح دخيلك سيييدي سدته بسرعة وابتسمت - نصيحة رجعي للعالم الي اجيتي منهم

-ليش ؟؟

-راح يحبسج حبسة اللذينه  كفروا ابسط حقوقج هو المي راح يحرمج منه لحد مايشرب البيت كله من نفس الكلاص يالله يوصلج وانتي قيسي اشلون راح تعيشين ويا

- مافهمت

- لاتفتهمين هواي احسلج بس خليج صبورة لان صاحب مقولة ردد الشعار تحول الي اسلم تسلم مايسلم اگطع راسه

- هو هم جان يكتلني

- والله گدامنا هو الي ينكتل بس داخل الغرفة ليش الجذب ماشايفته

-اني اكتله؟؟

- وتتجاوزين عليه وتختميها يلااا شتريد اتسوي سوي ماخاف منك

- هذا الجان يكسغ بعظام  عبدو بدون غحمة والحماية كلها تخاف منه اني احجي ويا هيج

- واكثر حبيبتي انتي قضيته العايش بيها ؛ شو وخري خليني اتمدد يمج لان هذا شكله يتأخر واكيد مانع اي بشر يوصلنا

ادنيت اجت يمي تمددت رجعت تسولفلي على امور العائلة واشلون عايشين هنا واشلون الكل يخاف يحجي وياي من ورا ؛  تأخر الوقت وهو بعده لحد ماراحت بالنوم ضليت وحدي كاعدة عيوني تفتر بالغرفة ضخمة ومرتبة بنفس الوقت 

باوعت للساعة اتذكرت امجد يومية هيج وقت كاعدين بالحديقة ناكل بحلويات سعدية ابتسمت اكيد هسه  كاعد وحدك وتباوع لمكاني

حسيت روحي اختنكت غربة على وحشة على خوف مااعرف شحس حضنت مخدتي غمضت استرجع ايامنا سوة دموعي واضحك على  سوالفه لحد ماراحت عيوني بالنوم بدون لاادري

مكان دافي نفس بركبتي بوسات تنطبع بهدوء فتحت عيوني لكيت روحي بحضن هيذام  دفعته حضني حيل  ردت اسحب نفسي عصرني اكثر وهمس اشش

هدأت خفت منه خنست بدون حركة مر وقت وهو خال راسه بركبتي وغمض گلبه يدگ حيل وجسمه رغم صلب بس احسه يرجف ؛ شوية واحس روحي اختنگت  حجيت بتوسل فدوة وخغ  والله كامت تحغگني غگبتي

- دخيييل علي اشكد مشتاق اسمع هاللدغة

-ضاغط عليه حيل بعد ماكدغ اتنفس

-تعرفين شحس  هسه  وانتي بحضني سامعة اليموتله عزيز شيصير بحاله ما يجي براسه غير يطلب من ربه يا ياخذه ويا يايرده  اله وهو يعرف ذني ثنينهن مستحيلات ؛  بس ردج الي

- بس اني مااتذكغك

- المهم مانسيتي اسمي

سكتت

باسني ورفع راسه باوعلي عيونه دم واللهفة واضحه بيهن اخذله ثواني صافن عليه مد ايده  وخر شعري عن وجهي عالكيف -  من شفتيني هم رف كلبج 

- هاي الحغكة كلما يسويها عمو الي احس شي بداخلي ينبض

- ماسألتي نفسج ليش

- هواي سألت نفسي بس مالكيت جواب

- تعبااان بگد ليالي البعدتي بيهن عن حضني

- ليش مادوغتني

- ماكدرت لاااا خفت اي خفت المس جثتج ووكتها افقدج من صدگ  واني عايش على اخر امل صورج بعيوني وصوتج وانتي تلدغين بخيالي

- كلما اغمض عيوني اتوسل بيك تخلصني

- بالوقت الجان اكبر امنية عندي اغمض ثواني

- مات الطفل  واني انعل بنفسي لبالي ابن حغام

- الحلال والصح الوحيد الصار بجمعتنا

- هم يجي يوم واغجع اتذكغ ؟؟

- حتى لو ماتذكرتي المهم رجعتيلي  

- ليش هيج سووه بيه

- حتى ينهوني

- اهلي وين

- موجودين 

- داحسك  غغيب

- راح تتعودين وتردين مثل قبل ماتغمض عينج اذا ماتخلين راسج على صدري

- كتلت عبدو

- الموت رحمة واني ماحب هالصفة

- سمعتك دتعذب بالعالم

- حذرت وتحدوا ؛الي مايحمل لسعة جهنم لايلعب ويه الشياطين

- يعني لزمت السووا بيه هيج

- ولكفت اسم الراس الجبير بيهم  وداعت غدرج ومعزت بكلبي اذا ماخليته يحرگ نفسه بيده وشرط گدام عائلة بس لخاطر يحميهم مااطلع ابن النظام

-  ماعندك صوغ النا سوه

- شنو

- صوغ يعني اني وانت بالعغس بالغغفه بالشاغع

- شبيج بنتي

- هيذام

- جوعانة يروح هيذام

برطمت

- ههه يابه اصيرلج صور 

رد دنگ باسني حيل وعدل ظهره عالجرباية سحب فونه فتحه طلع فيديو خلا گدامي اباوع نايمة على نفس الفرشة حاضنة مخدتي وهو يمي يلعب بشعري

كلبت واحد لخ بالحديقة گاعدة يم ضي عالميز ناكل وطفل يمنا يكمز

- منو هذا الطفل؟؟

- ابني

-عندنا طفل

-ليش بابا اشكد عمرج وخلفتي سنتين ماتشوفي شكبره

- لعد اشلون ابنك

- من زوجتي الاولى

- اذا متزوج ليش تزوجتني

- انتي اجيتيني تتوسلين وتبجين بابا اني متزوج صحتي اذبح روحي  لج بنتي مااريدج صرختي اموت بدونك يابه بعدج زعطوطة كمت تتمرغلين بالكاع

رفعت حاجبي

- شنو مامصدگة

- مم لاصدكت اي وبعدين شنو صاغ

- طردتح مافاد شمرتج بالشارع رجعتي تركتج كطعتي الاكل والشرب ليل ونهار تبجين كلت اخذج اكسب بيج ثواب

- هاا من هيج كالت ضي مااخاف منك

- خرب بضي واهل ضي ماذكرت غير هالشي مالج شغل بيها اجذب هاي

- جنت تضغبني

- سويت خدودج محتوى گد الراجديات

باوعتله ضحك وضمني بحضنه  اخذ نفس طويل وكال يابوييه شسويتي بيه

صح ماحس يمه غير بالغربة بس مابتعدت عنه جنت رايد شي استند عليه واغمض مأمنه من هالضياع العايشته

مر الليل ثانية وحده ما نام مااعرف خايف مااعرف لهفان ماادري مامصدگ ؛ حريني بتصرفاته يحضني ويرد يباوعلي بقلق مع هيج رحت بالنوم براحة اول ليلة انام هيج نومة

كعدت على طكطكة فتحت عيوني لكيته بملابسه العسكريه كاعد يمي مدنگ حاجزني بين ايديه من الجهتنين ويباوعلي بتأمل 

مد ايده وخر شعري عن وجهي بهدوء دنگ باسني وهمس بصوت خشن صباح الخير يااغرب قضية مرت بتاريخ العمر

- مانمت مو

-مو بس مانمت  خلصت الليالي نذور

- عيونك حمغ كلش

- رأل لاتلدغين گدامي ستري على نفسج

-اسمي شمس

-تردين الصدگ  شمس لايكلج اكثر

- انغيغ

- بعد مااكمل قضيتج وارد رتبتي اغيره

- شنو

- كومي يله الدكتور منتظرنا

- غاح تعالجني

- لابس أمن عليج شتسوين بالعلاج اهم شي  رجعتي لحضني واذا على قصتنا نرجع نبنيها من جديد وبكل وقت راح اخليج تحبيني غصباً عنج

- ضايج  على طفلك مو

-شنو حسيتي من راح منج

- صح مالحگت اشوفه حتى اتعلق بي بس حسيت شي انفقد من گلبي

- مو بگد الراح يشوفه هو ويكتل ابن روحه بيده بعد ماعاش طول هالسنين يتأمله اشلون يكبر كدامه

-منو هذا ؟؟

- نفسه الراح اخلي يفتر داير مدايره محتار بأي طريقة يموت يله كومي غيري ملابسج عندي شغلة لازم اروح اكملها

هزيت راسي دنگ باسني وگام راح للكنتور طلعلي ملابس اخذتهن رحت للحمام غيرت وغسلت وجهي عدلت شعري وطلعت  لكيته محضرلي حذاء وهو مدنگ يلبس بسطاله

اخذت الحذاء لبستها كملت وكف خله سلاحه بحزامه ومد ايده اشرلي تعالي رحت لزمتها رفعها باسها وجرني لحضنه ضمني بقوة اخذله مشوار عاصرني  ورد باسني خله ايده ورا ظهري سحبني ويا طلعنا

نزلنا الدرج صاروا كدامنا رجال بزي عسكري بس جبير بالعمر بيده عكازة ويمه مرة متوسطة بالعمر شافني مثل الي اتخربط وضعه حتى ضحكته امبينه جذب  كام كال  هلا بابا رئال الحمد الله على سلامتج

داارد قاطعني هيذام رد اجلها شوية

- عرفت منو السوه هيج

- اذا مو اليوم باجر وقتها تكدر تتحمدلها براحتك

- بابا بعد رجعت بالسلامة عوف السالفة ياابني عيشوا براحة

- ومنو كلك مامرتاح بعيشتي هيه قضية وقربت تكمل واعلگ بالغيم

- شقصدك ؟؟

مارد دنگ ورث جكارته اخذ نفس رفع راسه نفخها وضحك رد لزم ايدي سحبني طلعنا حتى المرة مالحكت اسلم عليها جانت واكفه صفرة

رحنا لكينا الحرس منتظرينا اول ماشوفونا فتحوا باب السيارة صعدني واندار صعد من الجهه الثانية

اباوعله اشلون كعد عدل المراية الامامية وانتجه  فجأه تغيرت شخصيته مونفسه الظل سهران للصبح والجان يحجي ويا لااا صار انسان ثاني شكله يخوف شخصية صارمة اي ملامح للتفاهم ماكو بوجهه

اشر للحرس طلعوا سياراتهم كدامنا وهو تحرك وراهم ؛ رحنا  للدكتور بس على  طول الطريق عيونه تتجول بين المري وبيني يحاول يهديني  حتى لاخاف لحد ماوصلنا

جان المكان محجوز بس النا اول ما نزلنا دخلنا بين فحوصات وبين اسئلة وختبارات اكثر من ساعتين ونص واني عالسدية لمن كام كال كله تمام وضعج كلش  طبيعي

كمت كعدت يم هيذام جر راسي باسه واشرله شنو

الدكتور - متعرضة لضغط قوي وضربه سببت  ارتجاج بمركز الذاكره بالاضافة الى تكتل من الدم وحالة نفسيه وقلق وخوف مفرط ادى الى مسح الذاكرة وبناء احداث جديده

-يعني شنو

- هذا مرض نادر جداً يحصل من الانسان يتعرض لامور اكبر من طاقة التحمل المعتادة يبدي العقل يغلق ويحذف قسم جبير من الذكريات المؤلمة والسعيده من تلقاء نفسه

-بس هيه ناسيه كلشي 

- لاموكلشي ذكرت تشوف بعض الاحداث على شكل صور وكلما جايها تزيد عدها وتكثر المشاهد

- تمام يعني حالتها مو صعبة بالعلاج ترجع ان شاء الله

- للاسف لحد الان مااكتشفوا علاج لهيج حالة

-اشلون يعني

-من الممكن ترجع ذاكرتها تلقائياً وممكن لااا  يم رب العالمين لان مهما اطور العلم عند البشر مايكون غير نقطة في بحر يم علم الخالق كل الي نكدر عليه نساعدها بمهدئات وبعض العلاجات التساعد على تنشيط الذاكرة  والاهم حالتها النفسية كون ماتتعرض لاي صدمة او تعب

ضل الدكتور يشرحله اشلون يهتم وكون ماانقهر ابد ولااخاف ووو كومه

وصدگ رجعنا مثل مااجينا صح اشوفه يبتسم ويسوي روحه مامهتم بس اعرف داخله مشتعل نار من طريقة تعامله ويا اهله والحرس اخلاقه بعد ماتنجرع فوگ هيئته الترعب صار عبارة عن كتله من الجحيم اذا جان ينهش بالعالم كام ياكل بشر

مر كم يوم واني بيناتهم صحيح تعرفت عليهم بس من بعيد  لان الكل  متجنبني محد يتقرب يمي بسببه  ولاواحد يعرف شناوي وشنو سبب سكوته لحد الان؛  بالاخص من يدخل للبيت يصير حضر تجول خال الكل واكف على تك رجل وعيونهم عليه معيشهم برعب حسيته مريض نفسي اذا عثرت يسويها هوسة كمت اشك بروحي  شي هش اذا وكعت راح اتكسر وتلاشه بدل مااتعود عليه كمت اخاف منه

كاعده يم ضي بالحديقة خاله راسي على متنها مغمضة  وبالي يم امجد روحي لهفانة عليه بس اخاف احجي

فتحت عيوني على ضربة بسطاله رفعت راسي شفته جاي هو ودسار ايد بجيبه وايده الثانية بيها جكارة اتحسرت ؛ همست ضي فدوة لاتتحسرين كدامه هسه يكول مضوجيها ويسويلنا تحديد ويخلينا كلنا نردد الشعار بصوت واحد

- اختنكت غاح اطگ منه

- هههه دشوفي اشلون يباوعلج

- امنيته يجتفني ويخليني بجيبه

- حقه رجعتيله بضربة حظ

- ادخل جوه تكول بيه جغب الكل يبتعد بس الخدم يلتم عليه كلها تصيح شنو معتازة اطلع بغه الحغس يحاوطني تكول غاح اختفي 

- الله يرحم عبدو  ومرته من جانوا يسحلون بيج الكاع صدگ مووجه دلال انتي

- اشكد مشتاقه لامجد وعمو

-باجر اتوسل بهيذام  ونروحلهم صار بنفس اشوفه

-واني بنفسي اشوف سعديه شسوه بيها هيذام

- ولج ليش ماتكليله يجيبها خدامة عندج

- خلي يگلي منو اهلي وبعدين احجي بسالفة سعدية

- بنتي الف مرة گنالج ماعندج غير دسار  وهذا المتحمل اخلاق راجلج السوء ومأيدة على اجرامه ؛ وميصير انسولفلج ليش ماعندج غيره لان يأخر بعلاجج ولاتلحين ويا بالسالفة لان داخل بمهمة بس الله اليعلم بيها شنو ويله سكتي اجه

اجوا سحب الكرسي شمر سلاحه عالميز  كعد خله رجلي عالميز ودسار اجه جرني من شعري رفع راسي لزمني من وجهي  عفسه اخذلي صورة ودفعني صاح هيذام لك خرره على كيفك وياهااا

دسار- انكتم لك

- اشلون يخليني اكوم اطگه اجتاف واسحگ راسه

- بمناسبه القنادر شفت  رجل امك يم ال…

-يدور على قيطان جديد

-بداعت اللدغة الاوراق يمك مو

-ههه اتحولن للريس

-بروح ابووك ؟؟

هو يحجي وجه ازر شايل ابنه يضحك ويا ورا امه ومرته سحبن كراسي كعدن وهو باس ابنه خلاه عالميز وكال اي سمعت اكو طفرة  مادخلوني وياكم 

دسار - شغلات زلم مايدخلون زعاطيط بيها

ام هيذام - يعني خراب دخيل الله من سمعت طفرة عرفت راح ترد المصايب

هيذام - لااا بالعكس راح تعجبج بس انتظري تكمل لخاطر لاتضيع متعتها

- خير ان شاء الله المهم ليش مانع هبة تجي تشوف ابنها ترا حرام عليك حتى عمك  الصبح كام يحجي يكول شنو حارمني من شوفت بنتي شطلعت هذا لحدمن يضل بهاي تصرفاته

- ليش هو وين ابنها

- طبعاً ماتدري ابنك وين متگلي اخر مره اشوكت شفته

- اليوم الصبح ودزتلج عمتي سلام وتگول بلكي تزودين غرفة الخدم فراش لخاطر لاينحرجون گدام ضيوفهم

- شقصدك  اذا على شغلة رئال روح اسئلهن كدام الكل اتوسلت بيها تروح تنام يم عمتك بس هيه رفضت اصرت تنام وياهن سوتها شغلة عناد لان رجعت مرتك وهاي كدامك احجي لج اشكد بوقتها كلتلج وحجيت

هالة - هههه شتحجي عمه غير فاقدة الذاكرة

- يوو نسيت يله عود تذكر وتحجي عوفنا منها المهم اليوم نروح اني وياك نجيب هبه وتراضي عمك بسكم زعل

- سهله تامرين بعد

- وترد ابنك ولاتخاف عود نعلمه مانخلي يسولف شي كدام السنيورة

دسار  - اذا اجه باجر وانت مو ويا
                      اكض باجر واشيله من الاسبوع

ازر - ااحم

هالة - عود ليش تردون تيهون السالفة ماتكلولها وتفضوها لاتخافون مايأثر على صحتها

باوعت لهيذام اشرتله شنو

حگ خشمه عدل گعدته خله  رجل على رجل وگال  على زواج ضي

ازر - شنو زواج ضي ليش هيه اشوكت انخطبت؟؟

-قبل فتره بس اجلتها بين ماتاخذ رأل على اجواء البيت

-ههه منو خطبها واني ليش ماادري

- زلمه صاحب كلمة  رتبته براس ابوك 

- ومنو كلك هيه تريد تتزوج

خله الجكارة بلحگه انتجه وباوع لضي

ضي - اذا تشوفه زين ليش لا

اخذ نفس وخر جكارته نفخه على ازر ورفع حاجبه

ازر  - هيذام لعب مخاااابيل  تلعبه بعيد عنييي

هيذام. - منو لاعب وياك ابني وشبيك اطفر اعصابك اخيتي  اجاها خوش زلمة ارفضه ليش

- انطيني اسمه 

ضي - مااتصور هالشي يخصك واني موافقة ياريت ماتدخل

دسار- اتمنى تتخطى

ازر - شنو اتخطى وابن ابو اليوصل وحگ علي ابن ابي طالب اترس جثه رصاص

ضي - شنو بكيفك

- ااااي بكيفي ونص حجاية مااسمع مننننج

ام هيذا م- شبيك يمه اتخبلت شتلغي انت

- الي سمعتوااا ضي ماتطلع منا غير واني بالتابووت

كامت هالة صاحت  لعد اسمع وهاي كدام الكل اذا ماطردت ضي وابوها من البيت هسه اطلگني …

***رايه***

اكرهك لانك جعلتني ابكي بصوت مخفي لكي لايسمعني شامت
لانني كنت اتباهه بك واقول لهم  مختلف عنهم

…رد الرجال الجبير دار الكاميرا اله باوع لرؤيا الغضب واضح عليه اكو لمعة بعيونه ماعرفت افسرها رادت تسد رؤيا الفون صاح اذا نزلت دمعة منج اااذبحج

رؤيا - ثقيت بي

- غبية

- حبيته بوكت جنت اتمنى الموت لشكو واحد على وجه الارض

- والگلب الدگ بالغلط ينسحگ

نزلت دمعتها صرخ  رؤياااااااا

همست  كسرني بابا

- مو خرزة البتاوين التنكسررر

- مرتين انطيت روحي للموت لخاطر احمي

- وراح تاخذين اضعافهن منه

- مااخذ شي  وصله الجهاز

راد يحجي صاحت لك وصله الجهااااز اشر  اي ودنگ على الجهاز حجه ويه الديصور

كعدت مسحت دموعها عدلت شعرها تمثل القوة بس ادري بيها جذابة هاي كلها واني صافنة على الرجال اشلون يحجي بصلابة وشكله يخوف

غمضت ويه نبرة صوته وهو يگول  اخذ الجهاز للضابط تسلملي عليه وتگله تعرف لما يسمون الذيب اعظم الحيوانات  لان من يقع بالفخ لايفكر كيف يهرب باليفكر كيف ينتقم

عرفت اختي من كثر اختلاطها بالشارع راح اضيع بين هيج عالم ؛ مااسمع شنو رد بس صار هدوء دقايق واسمع صوت دسار كال شكو ابني هنااا انت منو دخلك

رفعت الفون رؤيا  جان ديصيح الحرس  وسكت بشوفتها ضحكت وهمست  اعتذر  كطعنا عليك حفلتك بس حبيت اباركلك

مارد بس جانت نظرته كلها انكسار 

- جان عزمتني صح  مو من مستواكم  بس جان حضرت حتى لومن بعيد مهما يكون بينه عشرة والي الحق احضر واشاركك بيهج يوم

غمض ودنگ

- هه تدري شنو اتمنى

شال راسه باوعلها عيونه حمر گوة يسحب النفس

- اتمنى يمك واخذك لحضني واشكيلك من النار الداحس بيها بس لااا اعرف اذا شفتك وخليت راس على صدرك راح انسى كلشي  وبدل ماابجي واعاتبك من غدرك راح تغدرني دكات كلبي واكتفي بدفو حضنك ونبضاتي الك

همس وحگ معزتج بروحي ماغدرتج

- مبروك دسار روح ربي يوفقك وهسه اكدر اكلك صار الوكت تكتب اخر التاريخ

قبل لايحجي غلقت الفون شمرته باوعتلي وضحكت

- ديحلف ماغدرج

- تذكرين الاحلام الجنت دااسولفلج بيهن هسه انسيهن كلهن

- احلامنا نحققها احنا ما نريد من احد شي

- عاملني كأنما بنته حسسني بطفولتي الجنت فاقدتها  اتحملني بكل حالاتي وعدني يعوضني عن كل المريت بي خلاني احبه وادخل احلامه خلاني اثق بي وغمض بحضنه واني مأمنه من غدر الوكت

- هو الخسر

- لااا رايه الخسارة والوجع  كله من نصيبنا احنا موجودين هنا بس حتى ننوجع وننداس وننذل

- ليش بس لان ابونا اتخلى عنه

- لااا  لان احنا ماعايشين اصلاً

- ماحلمنا بشي مستحيل كل الردنا بيت صغير يجمعنا ونلتم تالي الليل بحضن امنا

- ماضل احد عدنا حتى نكمل حلمنا لخاطره

نزلت دموعي

همست ليش هيج كسروا كلوبنا

جريتها لحضني وبجيت خلت راسها على صدري وشهكت بصوت اول مره اسمعها هيج تبجي بحرگة كلب عرفتها وصلت لمرحلة انهارت بيها كل قوتها وخلصت طاقة تحملها

حضنتها حيل من گد وجعنا وكثرة الفاگديهم ضاعت دموعنا بينهم

حسيتها رخت بين ايديه وخرت عنها مسحت دموعها وهمست دخيلج كافي ماضل عندي غيرج

- جانت غصة بكلبي وجان لازم اخلص منها حتى اگدر اوكف من جديد

- رؤيااا

- لاتخافين ماعوفج بس راح ازعل منج  تعرفيني رعنة وبت شوارع ولازم ماارفع راسي عن مستواي  ليش مانصحتيني

- جبرونا  نحبهم غصباً عنه خلونا مانعرف نعيش بدونهم

- لاا هاي انتي عايشة ودتضحكين وتاكلين ماكو واحد مات ورا واحد واني راح اكون مثلج اذا مو احسن منج 

- جواي جمر يلسع بروحي كلما اغمض اتخيل ضحكته مااكعد الصبح اذا مااسمع صوته وهو يهمس بأذني بغنية حلمنا

- انتييي سبب عذابنا

- لااا مواني اني ردت احميجن اني خسرت حبيب عمري  لخاطرجن

- لاا انتي الماخليتيني اكتله وانتي المنعتي غزوان يرروح بسببج ضااااعوا

- مااكدررت اشوفج تضيعين عمرج بسبب واحد قذررر ولاكدرت ادير وجهي اعوفجن واروح ويااا

- هاي كلهم راحوا خسرنا كلشي صفينا بطرگ روحنا عايشين اخس عيشة راضين بالذل وساكتين لان ماعدنا مكان انروحله

- ماگدرت انتي مداتفتهمين شنووو دااحجي

-ولاانتي دتستوعبين احنا صفيناا وحدنا بدون ااااهل

حضنت رجليه دنگت خليت راسي عليهن ساكته ثواني وحسيتها خلت راسها على متني غمضت عيوني واني واسمعها تهمس رايه بردانة

-حضني ماضل بي دفو

- اشتاقيتلهم كلهم

- راحوا ماضل احد منهم

- گلبي يوجعني

نزلت دمعتي مااعرف شرد عليها صار هدوء عكس الهوسة الداخلنا

مر وقت واحنا على وضعنا لاهيه شكتلي ولااني شلت همها لحد ماسمعنا هوسة بره صوت ذباح يصيح وين داخل ودسار يصرخ وخررر عن طريقي ولاكلام الله احرگكممم 

صعدت اصواتهم دقايق ونسمع وصوت اسلحه تنسحب اقسام وصرخت صهيب يصيح يبه كولوا يالله شمالكمممم تسودنتوااا

اندفرت باب الغرفة وصرخت  دسار يصيح  طلعي احجي وياج

عدلت راسها على متني وغمضت

- رؤياااااا فتحي الباااب

ماردت

رد دفرها وصرخ لج فتحيهاااااا

ردت اكوم لزمتني اشرت لااا

دسار - على شنووو زعلانه كل السويته بسببج انتي جبرررتيني اسوي هيج كلتلج مايقبلووون اتوسلت بيج بس حتى نتركم ورانا  ونروح  حلفتلج اعوضج عن كلشي و بكلهننن جنتي رافضة

رؤيا- و هسه اكلك روح

- لاااا وكلام الله اخلي طلقة براسج وانهيج انتي ورطتيني مال تنسحبين انسي يانكمل سوه يانموت سوه

- ماطلبت منك غير ترد حق ماما من كلمة الذل الكسرتها بيها امك

- وكلتلج ماراح توافق غير بالمقابل وكلتلج راح اغدرهم لخاطر ارضيج وكلتلج ماتصير بحضني غيرج

- وضحيت بيه بالمقابل وخليتها بحضنك وسحكتني ورضيت اهلك على حسابي

- وكلام الله ماصار كل الذكرتي طلبت مني اعلن خطوبتي كدام الاهل وهيه تجي وياي تخطبج الي وضميت عليج لان جنت ناوي بعد ماتجي اطلبج بنفس اليوم ارد انهي كلشي

صكت على سنونها وخرتني وكامت فتحت الباب طلعت ضربته بكل قوتها وصاحت وتحجيهاااا كداميييي لك انت شنوووو

- اني اتخبلت بيج

- انت حيييوان واقذر بشررر شفته بحياتي كول شنو هذا القاط اللابسه نفسه قاط الكلت اشتريته لزواجناا لولااا وين هذا ماركه اني حدي توكف وياي بقاط جرد على كد حالتي

رايح تعلن خطوبتك منها كدامهم وجاي تكلي وافقت امي بس هيه تصير زوجتي بالعلني وانتي اتضلين بالسررر لان هذا مستواج

- لو افكر مثل تفكيرج ماغدرت اهلي ولاخنت وظيفتي ماجان خليت ايدي بأيد عدوي ونزلت نفسي لمجرم بس لان تابع الج

- عفيييه وهااي اني بت البتاوين التابعة لهذا المجرم  وانت ضابط المخابرات وعمر السادة ماصاروا بمستوا العبيد روح دسار كافي السمعته والحسيته  خليلك ذكرى حلوة بداخلي لاتكرهني بيك  اكثر

- اطلكها هسه وكدامج

- للاسف فقدت كل ثقتي بيك

- شنو التردي اسوي

- اطلكني وتروح  ماايريد بعد اشوف وجهك

- طلاك ماطلگ وباجر اروح اطلبج من امج واجي اخذج غصباً عنج

- ماتكدر تعرف ليش لان جبااان  واكبر دليل هاي اول مرة تجي بدون لثام وياك حماية تعرف ليش لان ماجان عندك وقت تأمن نفسك وتدري بروحك خسرت كلشي بعد ماتلحگ 

- ماسويت كل هذا لخاطر تصيرين الي برضاتج

- غلطان مواني الي انغصب على شي لو اعيش ويه واحد بالسر بس لان مايكدر يثبت رجولته ويوگف گدام جماعته يلكهم هاي زوجتي رضيتوا لولا

- انتي ماانطيتني مجال اسوي هيج ردتي كله بمزاجج خليتني محتار اشلون ارضيج

- تروح تكسرني بزواجك وتعيش الفرحة ويه غيري  ليش هيج مالي خاطر يمك لو اشوفني مااسوه اشاركك هيج شعور

- انت اغلى من كل هذا

- دسار لاجذب على نفسك اضل انت ابو الليل صاحب الرتبة واني رؤيا بت البتاوين عمرنا ماراح نرهم ننجمع سوة

- مااكلج ماغلطت من رحت سويت هيج من وراج  بس ماگدرت اكسرج بشغلة كلها ساعات وتنتهي زين انطيني فرصة اثبتلج اوهامج وصحه كلامي

اباوعلها سدت ايدها رفعتها ضحكت وهمست هذا كلبي-  فتحت  اول اصبع

هذا اول ظلام عشته والثاني روحه رند والثالث غزوان والرابع رئال وهذا انت الخامس؛  خلص ماعندي گلب بعد لاتترجه شغله من شي ماموجود

- شنو يعني

- يعني خلصت الفرص   انت غلطة وقررت اصلحها طلكني برضاتك احسن مااروح لسيد واطلگ غصباً عنك وهااا اختفي وأظهر بواحد يسوه راسك زلمة گد كلمته مو جبان ؛ ومن اوكف كدامك ايدي بيده وقتها نكون متعادلين

صگ على سنونه اجه طاير ركض ذباح لزمه صاح اتركنييي لككككك ذبااااح

دارت وجهه رجعت للغرفة سدت الباب واسمع صوته خبص البيت هو ويصيح وكلام الله يرؤيااااا اذبحج بس تسويهااا لج رؤياااااا ولكم عوفونييييي

صوت ذباح وصهيب يهدئون بي وهو يصيح وروح ابوي اكتلهااا ولج رؤيااااااااا

سدت اذاناتها ونزلت دموعها كعدت يم الجرباية كعدت يمها سحبتها لحضني شهكت

مااعرف شحجي حقها السوته لان خذلها وحسسها  برخصها وبنفس الوقت دسار من حقه مايگدر مركزه وسمه يرتبط بوحدة حتى نسبها مشكوك بي

الساعات تعدي وهو صوته برة ولاهدأ اسمعه يشيل بروحه ويرگعها بالگاع اخر شي كام يتوسل بس يخلوا يدخل حتى يحجي وياها

لحد ماصار وكت الاذان حسيت نفسها هدأ دنكت لكيتها غافية دااشيل راسها  وانفتحت الباب دخل ذباح وجهه مشخوط وقميصه مملوخ رد الباب عالكيف واجه يمي گعد نص گعدة خله ايده على شعرها مشها وهمس اشلونها

- استوها نامت شنو صاير وياك ليش هيج حالتك

- تسودن الزلمة اتماطل ويا اماطل گوه كضيته

-راح

-ماصار جثير جان كاعد بالباب يعارج الشياطين يااخش اجتلها يااخذها وياي عگله خل الزلمة

- عزه كل عقله هذا

- اي حگه حرمته وكلبه موجر عليها ماعمل شي   ذيج ماخذها گبلها وهم تنازل عنها  شيعمل بعد اذا هيه خلت عليه شروط اطگ الظهر

- ماطلبت غير حقها ماكو وحدة تقبل تتزوج بالسر ولاوحدة تقبل تشارك زوجها  بوحده ثانية

- يبه حرمته حلاله شتهجسين

- بس داافتهم انتوا شنو يعني هيه بس ذكرت گدامه تعوفه وتاخذ واحد غيره اتخبل جان مستعد حتى يموتها وانتم عادي تاخذون وحدة وثنين ليش شنو فرقكم خلي روحكم مرة وحدة مكانه هسه انت ترضى تشوف واحد ياخذ هيام منك

- ياريت ياخذجن ثنينجن ويفكني غير يخدمني خدمة العمر دكومي عطيني ملابسي خلي اولي للبر  اريح راسي وافتك من شجولجن

- انطيني مخدة

كام شمرلي مخده وراح للكنتور  شلت راس رؤيا عالكيف خليته عليها  غطيتها وكمت رحت طلعتله قميص وكف يغير همست تعبت من مشاكلنا مو

- اكو واحد يتعب من بنياته وهاي اخيتج عيونج بيها لاتغفلين عنها اذا طلعت منا ترد للادمان وخرابيطها

- انكسرت بعد مابيها تكوم

- ياهو انجسرت رؤيا يبه هاي عدها گوة ولسان اذا فكرت اطلعهن تخلينا سنة ليجدام ندور على كرامتنا

-كم يوم راح تضل بالبر

-يومين بالجثير

-ليش ماتاخذنا وياك نغير جو

-هيمة يبه وين تغير جو

-لعد شكو رايح

-نطرگ حلانا غادي يم الرعيان ونجيب كم راس للبيع

-لعد ذني النوگ الورا البيت مالتمن

-هم النا رزگ ربج جثير الحمدالله

-يعني اجواء حلوه اخذنا وياك حباب

-هيمة يبه هييمة ماكو بس ذيابه تاجلج وتتفل بوجهي

- فوكاها لويش عيني

- هلكدج بدل ماتشبعيها تصيرين بين انيابها

- ذباااح

-ههه امريني يبه

-اريد اخذ رؤيا ونروح لماما ولاتكول لاا

- من ارد اخذجن انه 

-هم كال انه

رفع حاجبه

- هههه لا صدگ دااخذ رؤيا يم النوگ من تگعد

- بس خلج نبهه تراهن حقودات ويغدرن

-تمام صدگ عيونك حمر ليش

- بشر صار اسبوع مامهود للنوم اشلون رايدته

- لعد ارتاح اليوم وباجر روح

- لا الطريج طويل وصگر رايح وياي  انام بالسيارة

- اتنام بالبدي

- عليش يبه اكو زمال كايلج ماخذتلج بهيمة

- انت لوبش دتصيح وبعدين ارتاح منا وجاي تره عيونك يخوفن هنه مصخمات ويتزيدهن بالحمار تصير جنك مصاص الدماء

- واضح الخوف عليج من هاي وكفتج بوجهي بعدي يبه لاهفج كله

- تذكر من جنت اعيب على عيونك وغزوان واكف يضحك ميكلي انت وراي

-ههههه الف رحمه على روحه

-ترا ادري بيك دتروحله كل كم يوم بس متكول حتى لاتاخذني

-عطيته جلمة  اجمعجن واخذجن لگبره صبري عليه بروح اخيتج

اشرت اي  ومسحت دموعي جر راسي باسه وخرت عنه فتحت الكنتور داطلع اله ملابس صار كدامي العسل باوعتله بسرعة  لزم ايدي سحبها دنگ عليها باسها و صاح دخيلج رايح للبر درجة الحرارة تعگب الستين وعلي انجلط

-ههههه لا حتى اني ماراح اكل انتظرك

-خير ان شاء الله يله يبه انه رايح اي شي تعتازي طلبي من الحجية

- تمام

رد جر راسي باسه شال سلاحه وجهازه راح طلع واني رحت تمددن يم رؤيا خليت راسي يم راسها وغمضت من التعب  بدون تفكير رحت بالنوم

مافتحت عيوني غير على صوت عمتي وهجامة بره كعدت لكيت رؤيا بعدها نايمة دنگت بستها غطيتها عدل وكمت غسلت وجهي وطلعت لكيتهن ملتمات يتريكن صبحت عليهم وكعدت يم هيام صبتلي جاي دنگت دااخوطه كالت بيبي شلونها يچدة اخيتج

-زينه بيبي

غيمة - وعلى شنو اتخبلت وطلعت هجمت عالولد خلي تحمد ربها باوعلها واحد مثله

فجر - عليش يمه شناگصها بت تتزاود ويه الگمر على مجانه

- عمه تره ضابط وهيه حتى اهلها مامعروفين منو

- شمالنا مامعروفين عدها اخوه يلاون الموت لخاطرها وچدة تخشها جوه عباتها ماتعطيها لو ثكلوا وزنها ذهب اذا ماتتنوع الجدامها ازلمة من صدر ديوان گد جلمة ويستحگ بت معدلة مثلها

- ماقصدي عليكم

- بسج انكتمي ماطولج ماتعرفين غير اللغث لاتتحجين

- عمة بس ردت اكللكم ذباح وصگر راحوا وصهيب  هسه دسار  هم يهجم علينه هو وحمايته ويسويلنا فضيحه كدام العالم

- لاتخافين الزلمة  معدل وابن اصول تحجه ويا صهيب كله اتركها كم يوم ترتاح لبين مايردون ازلام البيت تكون النفوس طابت  لخاطر تتفاهمون بعگل

هيام - بس بعدي الشر عنهم همه متصافين وحدهم هيه بت معدلة مارضت تطلع من بيت اهلها  اذا ماترفع راسهم وجدام الكل وهو عاشكها ومستعد يترك كلشي لخاطرها

غيمة - من هيج تزوج عليها

- ماتزوج بس لبس الحرمة ذهباتها لخاطر يرضي امه  واعترف بغلطة ووكف  بالساعات يتوسل يكلها اطلكها ومن تنوع دمعتها نزلت اجه يجتل روحه جا اشكد يحبها وخايف على زعلها

هجامة - ربي يهدي سرهم بسجن لغوه تركن العالم بحالهم وبشرني ماوحدة منج شالت

هيام - ماكو جده ولو هو اشوكت لحگ يطخ وحدة بعده ماخال راسه على المخده واجته المصيبة تجلع

فجر - ولج  رايه اخاف ما جاي تعطي من العسل

- لاوالله عمه كد ماوكلته اليوم بس شافه باس ايدي يباوعلي بترجي كسر خاطري

- ذباح باس ايدج؟؟

- هاااا لا اه هيج تعبير مجازي  لااكثر

- وانه اكول ابن البدوية يعملها شني اله اختل عگله وانتي يمه ميصير تتحجين هيج هالتتنوعين احنا بدو وعيشتنا اشلونها وهمه من غير كلشي يردون بس يكضون عليه سالفة ويطشوها بين ربعه

اشرت اي ودنگت اشتم وانعل بلساني الفالت كالت هجامه بنوات بغداد رجيجات عشيتنا ماطابت الهن لهيج يتأخرن بالخلفة

بيبي - يله وشنعمل هالتشوفي كلما چايه يكبر وضال يجسر الكلب يتنوع لبزرة  رفجانه لهفان لشيلتهم بس مايتكرب خايف يسمع جلمه تكدر خاطره

- موش كلتلج بت سلمان لجعه وكوية وعمرها مايتجاز الاربع طعش بركبنتي اذا ماشالت من ليلتها

غيمه - ليش تزوجوا لعد واني شنو مو مرته خلي اجرب يجوز احبل

هجامة - من حگج بس انطرج هالشهر اذا ماشلتي ترانه نعرسه  وهاي جدام حريمه

- اي والله واني بيدي اجهزه اذا ماحبلت بس احجوا ويا خلي يدخل غرفتي حالي حال نسوانه

- انه احجي ويا اول مايرد يبلش الي خاطر يمه ؛ وانتي اخذي حجرة كمرية حضريها وفجر تعر لحجرة البدوية

-اي فدوة بس بس قنعي وتركي الباقي عليه

- وانتي يمه رايه راح اعطيج اعشاب اقوى من العدج  بلكي ولن ربج متنوعله

شلت راسي باوعتلها وهمست بيبي اخاف يموت هو هذا اذا اكله بعد مايكدر ينام وجسمه يصير مي كد مايعرگ 

بيبي - عليش يچده جسمه يصب مي جاانتي شمالج بس لاولج تمنعي عنج

- هاا لابس داكلج يتعب خطية

- ماعليه يذباح گوته تسحگ الحديد وتعگب ما يضره شوية اعشاب مقوية

- تمام وصدگ شغله لخ اني دااكل منه حتى مااخلي يشك خوماعليه

- لاماعليج بلعكس يفيدج جثير ويله كملن اكلجن هيام وغيمه يطلعن للنوگ ويه حريم صهيب وانتي راية اتهيري ساعة ويجي عليج صهيب لخاطر ياخذجن انتي وفجر للمستشفى تكملون التحاليل هلبت والله ولنها مطابقة وتخلصين من هالهم

-ذباح مايقبل اطلع

-لا هو النبه علينا وعطه خبر لصهيب

-مااگدر اترك رؤيا وحدها

-ماعليها هاي انه جاعدة هون مااخلها تعر الباب ولاتخافين اخيتج گوية موش ركيكة وينخاف عليها ويله اكلي بساعج لا طلعين اعذار ونص جلمة مانه سامعة الكلته يتنفذ  وانتن يلااا فضنهااا

دنكنه كلمن عيونها بماعونها بس هيام دموعها كل شوية تنزل وغيمة تريد اطير والله كد الحقد الي اشوفه بعيونها شكيت هيه الورطت كمرية بالسالفة حتى تخلص مو بس مني لا حتى من هيام  وتاخذ غرفتها موبعيدة عليها الدكات الناقصة

مر يومين حتى مااعرف اشلون رحت وشنو سوولي تحاليل بالي يم رؤيا مااعون ارد واگابلها  حاجزة نفسها بغرفة بيبي لاتحجي ويه احد ولاترضى تتحرك ؛  اشكد دز دسار رسائل واشكد اتصل ماترد تحضره ويرد يتصل من غير رقم وضالين هيه ويا كلمن بجهة يطحن بروحه اوكف اباوعلها بس دموعي تنزل بعدها طفلة موكد الحيرة  والوجع الدتعيشه

غيمة صارت عبارة عن خدامة  جوه رجلين بيبي بس تريد ترضيها نهار وليل حلكها شاكته من الضحك تباوع لغرفتها وتحسب للدقايق اشوكت يجي كلبت روحها عروس من غير الملابس الدزت عمتي تجيبهن الها حتى اخجل اباوعلهن مو اتخيل اشلون راح تلبسهن اله

…واكفه اغسل مواعين العشه ودخلت هيام عيونها حمر وبيدها عباتها اشرت شكو

- امي متعارضة واخوي جاي عليه

- اتصلتي بذباح تره يسويها هوسة عليج

- اي كال جاي بالطريج روحي ويه خويج وانه جاي وراكم

- ربي يشافيها لاتخافين داده ماعليها ان شاءالله

- رايه اغديلج فدوة  خية اخاف ابات غادي عيونج على غيمة مااوصيج

- لاتفكرين حتى والله اليوم اخلي عبرة الباب حسرة بعيونه لحد ماتردين

- بعد جبدي ربي يبرد كلبج ويجمعج بأهلج على هاي وكفاتج وياي

ضحكت اجت باستني وراحت تركض رجعت كملت غسل المواعين طلعت صارت كدامي غيمة تعدل بفرشتها لابسة سيت وردي والمكياج بوجهه يصيح لحكوني مروتكم

تركتها ورحت لغرفة بيبي لكتها متمددة گوه كامشة ضحكتها هيه وفجر ؛ ورؤيا لازمه الفون تسجل فويز تعد وتصفي ماخلت حيوان بالكرة الارضية ماكالته  ادزه وترجع تسجل واحد اسوء منه تستلمه غلط ماموجود باللغة العربية كلها ؛  مااعرف منين تجيب وتسطر حمدت ربي ذباح جاي لان تأكدت دسار بعد مايتحمل اكثر ويسكت على طياح حظها

داادخل احجي وياها واشرتلي عمتي  روحي مالج شغل اني هم خفت من شكلها كفشتها منثورة وعيونها تلمع وتحجي بحرگة  وكل دقيقة اجه صوت دسار بعيطة يتوعدلها وتسكته تفلة

عفتها رجعت لغرفتي دخلت  كبل للحمام سبحت غيرت ملابسي وطلعت مشطت شعري فرشت لذباح بالكاع وشمرت نفسي عالجرباية حضنت مخدتي بين فكره تاخذني وبين ذكرى تجيبني انفتحت الباب شلت راسي لبالي رؤيا لكيت ذباح

دخل سد الباب وسلم رديت السلام  وكف يخلي أغراضه عالميز بدون لايحجي عرفته تعبان همست اكوم اصبلك عشه

- لامتعشي بس حطيلي ملابسي بالحمام

- خليتهن من زمان صدگ  مارحت لاهل هيام

- لاارتاح شوية بين مايطلعوها من المستشفى لخاطر اروح للبيت

- اروح وياك

- لا يبه بيتهم كله زلام وين تردين

- مريت على بيبي

- لااسبح واروح اسلم عليها

- لالاتروح استوها نامت وكالت لحد يكعدني حتى لاتضيع نومتي وتروح صلاتي

-اهاا

-شبيك مامصدكتي

-لايبه عليش حتى مااصدگج

كالها وشمر محفظته راح للحمام دخل رجعت حضنت مخدتي -يله  دااشوف اشلون راح تطلع اليوم من الغرفة

عيوني عالباب واكل بشفتي افكر شنو اسوي لحد ماطلع بيده المنشفة  شمرها عليه وكال لاتجهدين  نفسج جثير

- على شنو دتحجي

- مانه يمج صدگ ماعندج شي ادهن جسمي بي هلبت تهود الحساسية شوية

- منين اجتك اخاف ماكل شي حار بالطريق

- لا اول ماوصلت  غادي طلعت

- اذا انت مكابل النوگ شتريد يطلعلك غمازات طبعاً يطلع طفح جلدي وبكتيريا وحتى حصبى اطفال هم تطلعلك

- حتى طگه مابيج باگيه بطرگ الشعر

- يااا ذكرتني اتصلت هيام كالت امي نامت واخوتي هم ناموا لايجي ذباح

- والطريج انسد والجلاب بطلت تنطر

- انت ليش كل حجايه تحسسني دااجذب عليك

- لا حشى بس بشني خبرتج بالنقال لو طرشتلج خبر بطير زاجل

- هاا  لا بالفون بس وديته هسه لرؤيا

- وطلعي بهيج ملابس

- لفيت نفسي بالغطة ورحت واجيت ركض

هز راسه واجه لفراشه تمدد غمض عيونه بتعب  همس رايه بروح اخيتج نص ساعة وكعديني

حضنت مخدتي. انكلبت على بطني مديت راسي صار شعري على وجهه فتح عيونه كوه  اشر شكو

- من الاخير ذباح ماتطلع اليوم  

- تمام

- ماسألت ليش

- وعلي مابيه احجي

- صدگ امك راح تزوجك وحدة عمرها اربع طعش سنة

-بيها الخير

-شنو بيها الخير يعني تگدر تاخذها

- يبه انه ماخلف موش عاجر

- عززة شبيك مداقصد هيج وين راح عقلك داقصد صغيرة

- ماهيه صغيرة بت الاربع طعش عدنا تعادلج مرتين

- شو فرحت والله بس ترد هيام اكللها

- يبه ياهو الكلج راح اتنعل بساعج جلعتي عالخراب وعليش اظلم بت العالم وياي وتنحرم من الخلفة خليها بدربها كافيني الهم العدي

- ذكرتني والله مشتيه شي حلو 

ضم وجهة

كوة كمشت ضحكتي بس عصر كلبي من كال احرمها من الخلفة  كمت طلعت العسل الجديد رجعت گعدت يمي خليتها بالگاع اتربعت شلت شعري لفيته كباية دنكت فتحت العسل وهمست
- حلال يله  افتح عيونك

مسح وجهه  اخذ نفس  اتجتف يباوعلي بعجز

- شبيك ماانطيك بس اضوج اكعد وحدي اكل دنسولف شوية

- وعلي  الحساسية ماكله جسمي

- بيبي دتكول ذباح يكرط حديد لاطلع حجج

- حي الله البدوية

شلت بالخاشوكة  خلتها بحلكي ماسيطرت ضحكت ضحك على ضحكتي

جر الخاشوكة مني كعد اخذ العلبة اكل منها كم وحدة وغلقها بعدها عني وكال اكلت حتى مااجسر بخاطرج بس بسج تأذين نفسج لان انه مايصير عندي

- يعني جنت تدري شنو بي

- ردتج ترتاحين حتى تفكين ياخهة مني وتبطلين تمشين بحجيهن

- انت ليش هيج تعاند بلكي يكون سبب يصير عندك

-مارايد

-ليش ماتتمنى يكون عندك ابن؟؟

-عليش الجذب اكبر امنية جانت عندي قبل بس اشم ريحة الجاهل بس هسه لا

-ليش

-من تعرف گلبك مانه الك  وتفگد السيطرة على مشاعرك وينشغل فكرك بشي مستحيل ؛تتلاشى كل امنايتك مايضل غير حلم واحد تنطر الليل مناطر بس حتى تصل يمه وتغمض انت وتتأمله جدامك  وتشم عطره من بعيد

- هيج الحلم حلو بحيث شال فكرت الطفل من راسك

- حلاته بگد بعده عني بيني وبينه الالف السنين

-يجوز يكون من نصيبك ليش هيج دوم متشائم

- لانو مستحيل وانه ادري موش الي بس والكفل زينب مستعد اعطي عمري بطوله لخاطر نظرة رضه وحده تكتفي مو يكولون العاشگ ماتبرد ناره غير عصرت حضن من محبوبه انه لاا راضي بضحكة وهمسه من بعيد تطفي الجمر الموجره بروحي

-حبيت  ؟؟

-اعرفه نفسي حيوان وادري موش كد جلمتي بس وكلام الله موش بيدي غصباً عني لكيته روحي تسولف بي وگلبي مختنگ بهلفته  حاولت جثير ابعده عنه ماگدرت

- شصاير وياك

دنگ ساكت

-ذباح ليش هيج دترجف

مارد وخرني وكام اخذ مفتاحه والجكاير وطلع

دنكت باوعت للاعشاب - اني شسويت بالولد كالتلي قوية انطي وهو جاي تعبان اشلون

اخذت نفس وكمت شلت العلبة شمرتها بالزبل ورجع لفراشي تمددت خليت راسي عالمخدة  سحبت الغطة وعيوني عالباب اندعي كون مايصيرله شي

مرت اكثر من ساعتين واني انتظر لحد ماراحت عيوني بالنوم

نفس حار برگبتي وثكل گاطع نفسي فتحت عيوني واشوف نفسي بحضن ذباح دفعته حيل شال راسه عيونه حمر وريحة الشرب طالعة منه يباوعلي بلهفه وينفت اشرت لا اااا

همس احبج وكلام والله

-لاذباح فدوة

باوع بعيوني نزلت دموعي بترجي  سد حلكي ودنگ على رگبتي…

لاتنسون التصويت ❤️