رواية شيء من رصيف الدم الفصل الثاني وثلاثون 32 - بقلم Leo Alfatlawi

شيء من رصيف الدم

بقلمي: leo Alfatlawi

بارتين سوة

بارت الثاني والثلاثون

***رايه***

صهيب صاح اخذ حرمتك بالمبارك عليك وهيه كامت ركضت لزمت ايد امها ضميت روحها يمها واشرت بخوف لاا

صاحت وحدة من العجايز گبل لانطلع اكو حجي محشور بزردومي بس خايفة تفهموني غلط

صهيب - بدون لاتحجين تاخذون البت ويه طي الفجر تلگونا جدامكم ان استگبلتونا بالرمي حي الله النسب وان رحبتوا و سترتوا عرضنا نرد البت وحگكم يصلكم ثالث مثلث من هالشارب

الشايب - افااا راسكم دوم مرفوع ابو صگر البت صارت حرمتي حالها حال حريمي الباكية تخش داري ماتعر الباب غير هيه ومحملة

- واحنا عرضنا ان مانستر بدارنا نستره حدر التربان الي بينا يفصله طر الفجر ان كلت رايتكم بيضة تتحلل عليك وتحرم خشتها لدرنا طول عمرها وان كلت حگي يمكم تعطينا البت وحگك مردود

اندارت كمرية لامها صاحت شني يمه تبريتوا منييي

بيبي - گمي ويه زلمتج وسمعي جلمته وبيضي وجوهنا الجسرتيها جدام العرب

- لادخيلك لاتجسر ظهررري انه بنيتج لاتظلميني هيج

- لو رادة اظلمج ماوطيت راسي على ايد ذباح لخاطر يمهلج وكت كبل لايجتلج

- يعني شنيي

- الصبح راح يسيرون على مضيفكم ان اثبتيلهم طهارتج وعطيتيهم علامة عذريتج من هون وتفض الخوة وتنسين عندج اهل وان ماصار كل هذا الشي ياخذوج ويعرون بيج لوين ماكتبلج الله مجان للستر

- لايممه لاااا ابوس ايدج دخيلج جسروني سحكوا على راسي بس لاتعملون بيه هيج ابوس رجلج يييمه

- مانه امج حرمت عليج حتى جنازتي لاريدج تجين ولاتصيحين وراي يله تگمي هوني ويه زلمتج گبل لايرد ذباح

دنگت على ايدها رادت تبوسها دفعتها وكامت راحت لغرفتها بقت كمريه كاعده تتلفت فاتحة حلكها تنفت بخوف

زحفت لصهيب دنكت على رجلي دفرها وصاح ام صگرر لبسها عباتهاا ذباااح گرب يصل

عافته وگامت اجت تركض لزمت ايدي دنكت رادت تبوسها سحبتها صاحت دخيلج انتي انتي يسمع منج ذباح احجي ويااا ابوس ايدج

دنكت

نامت على رجليه رجعت ليورا لحكنتي تسحف تبجي وتتوسل اخليها تبوسهن واحجي ويا

اباوع لصهيب بتوسل خزرني وجهه كله غضب اي رحمة مابي اندار لزوجته اشرلها يلااا

ركضت جرت العباة واجت دنكت عليها لبستها اتكابلن عليها هيه ومرت الشايب اخذنها يسحلن بيها وهيه تلطم وتملخ بروحها طلعنها بره البيت والعجايز الباقية دفعن عربانة الشايب طلعوا وراهم

وكفت صافنة على كمية الظلم ؛ فجر لازمه راسها ومدنگة نفس ماطلع منها وغيمة خانسة يم الدرج
جرتني رؤيا اخذتني للغرفة دفعتني ودخلت سدت الباب باوعتلي عيونها لمعت بخبث عضت شفتها

همست انتي السويتي كل هذا موو

رؤيا- لاا. اني شكوو صح جنت افكر بدون لاحس بصوت عالي گدام دسار ويمكن وهو حجه بدون لايقصد كم ذباح بس ماگناله روح سويها

- ليش هيج گلبج قاسي

- هاي وكفتي نفسها واني محتارة اشلون اضمج عن لايكتلوج

-شراح يصير

-تعيش اضعاف الذل الجانت ناوية تعيشج بي واول خطوة تبلش برجال مقعد وجباري ثتبت عذريتها ويا وانتي اتخيلي

- تره غيمة الجانت تعلمها

-لاهااي حصتها يمي مضمومة اويلي اشلون محضرتلها شغلة اضعاف دم رند وضياع رئال

- شراح تسوين

- خلي احصل بالاول جاسم

-لاتكولين اكتله

-لاااا هذا ابونا الربانه وتعب علينا اكتله اشلون

- رؤياا

- لاتخافين بطلت طريق الدم اتجهت لطريق الحلال لان لذته تنعش

-مافهمت

دتحجي ونفتحت الباب دخل دسار يطبگ برداناته القميص يريد ينفجر عليه گد ماضيگ وجهه كله مشخط وجوة عينه ازرگ مال ضرب باوعلي ابتسم واشرلي هلو

اخذت نفس وهزيت راسي ؛ راحت رؤيا ضربته بصدره وصاحت وين تأخرت لك

عفس وجهه فرك الضربة وكال عندي شغل

- ياشغل وانت مفصول

- وانتي متشتمة وجاي تعيريني

- دسارر اطلع من الاخير كول وين جنت بدون جذب

- اني اجذذب لااا وسفة

- من هذا وجهك شابع تكفخ بربك ماخجلت من تجيني مكتول

- بلكي يصير بعينج حسوة ملح وتقدرين الجاي اسوي الج

- ههه الي يسمعك يكول محطم سور الصين لخاطري

- تقريبا بس مو الصين سور الصايغ وربج شكفها اله شوية ويلكفوني

- كمت اتبوك؟؟

- جا شسوي شفت شي حلو وماعندي افلوس قابل اخلي بخاطري

رفعت حاجبها

دخل ايده بجيبه طلع علبة صغيرة

سحب بنطلونه وكعد كدامها نص گعدة فتح العلبة رفع ايده قدمها الها وهمس جنت اتمنى اقدملج عمري مكانها

باوعلته ساكته

- عهد عليه احميج بروحي وحقق كل حلم جنتي تتأملين بي واصيرلج درع تحتمين بي حتى من نفسج

- راح تتندم

- ندمت من ضيعت كل هالوكت بدون حضنج

- راح تتعب

- تعبني كلبي كد مايلعن بيه على المصيبة البليته بيها وكعدت مكابله اتصفن عاجز اشلون اطلعها منه

- مارح تكدر على مهري

- الي يكدر على دگاتج بگلبه يگدر يجتف كل امنايتج ويجيبهن سحل يخليهن بين ايديج

-تعرف منو اني

- وشفتج بأاسوء حالاتج عاجزة و معصبة ومريضة والاهم من ذني كلهن بكفشتج ووجهج الوسخ

-مم

- وحبيتج بكلهن

-دسار

- ولج وكلام الله اااحبج

ضحكت كام سحبها لحضنه الضحكة والفرحة الشايلها يثبتن اشكد يحبها

نزلت دموعي دنكت عفتهم طلعت سديت الباب وراي احس روحي اريد اطير مامصدگة واخيراً وحدة منه حققت حلمها وراح تكمل حياتها ويه التحبه

صارت كدامي هيام طالعة من غرفة بيبي مسحت دموعي رحت يمها سدت الباب وهمست عليش تبجين

- اشتاقيت لاهلي

- ربي يعطيج الصبر ويلم شملكم

- شنو صاير جوة

- يعني شصاير خيه اكثر من الصار خشي تنوعي لجدتي اشلون حالها يجسر الكلب

- لعد من هيج تحبها ليش ماوكفت جانبها ومنعت زوجها

- لخاطر يجتلها ذباح ويروح بيها ترا مانه هين العملته گمرية گوة كضوا السالفة لوماهذا الزلمة الضموها عنده يدگ صدره ويكلهم انه اخذها حرام يذباح يجتلها ويجتل نفسه ولاالفضيحه جدام الديرة

- بس حرام ترا كسروا ضهرها بهذا الشايب المقعد

- ام كلب الرهيف لو ماذباح ثاق بيج ويعرف شني الخالها بغرفته ويجلع ورا الزلمه جان انتي هسه حدر التراب

- من هيه تحب واحد وتعرف اهلها صعبين ليش هيج سوت

- كالتلك مايگضه بين مايسكط رايه يطفر الزلمة وهيج تضمن طلاگج هم هيه تاخذ راحتها ويا الزلمة وهم غيمة تصير لذباح وتستر عليها لبين مايلم نفسه ويجي يطلبها

- شنو حال غيمة هسه ولو حالها حال الشيطان يطغي ويكول بريئ

- ولج احنا بيا حال وهيه كاضه ايد عمتي فجر وتبجي تكلها انه شني مصيري على يوم هم يزتوني بمصيبة وذباح يجتلني احجي ويا عليش هيج تاركني خلي يتمم زواجه مني

- بمناسبه زواجه صدگ البارحة سويت مثل ماكلتيلي بس اشو حالته تعبت خلصها يدخن ويتگلب للصبح

- عليش اشكد عطيتي

- تقريبا ربع العلبة

- صخام بوجهج زين ماجتلتي الزلمة ولج كلتلج خاشوكة موش هيج

- شعرفني صارت شغله عناد

- يله بعد احسن كون ربي يجبر بخاطرج ويعطيج كد نيتج ويرزقنا بجاهل يحمل اسمه ويعوضه كل سنين النطرها

- يارب صدگ دسار خطب رؤيا

- شني خيه

- لاهمه صح متزوجين بس هيج هسه خطبها رسمي وراح يتزوجون صدگ

- اااي خلي نفرح شوية يبوو صار اشهر واحنا بهالاسود والحزن الكاض روحنا

- جان نزعتوا ليش لابسين لسه

- يااع جا ياهو غزوان غير اخيي صچ تحجين وبعدين من حجيت هيج وعلي مولان مغتاضة لاوداعت اميمتي لخاطرج اريدج تفرحين شوية وتشيلين عن كلبج

- الله كريم

- ترضين تعمل عرس اخيتج لولا

- اكيف والله هيج وازفها بيدي أمن عليها غير هاي امنيتي اقلها تضل عندي بس رئال اروح اشوفها وينها وليش هيج گطعت گطعه وياي وبعدها انتظر ماما اشوكت تطلع اخذها واروح نعيش سوه

- وتركيناااا

- هههه شنو ماملتي مني

- وعلي احيل ذباح اخلي يسحلج عاد هو اشلون اخلاقه الحين

- يبوو هاي الفكرة بعدلها اقل شي سنة يمعووده شو دوخري خلي اروح لغرفتي

- انطري اختج بعدها ويه زلمتها

- ماعليها لاتخافين عليها هسه تلكي حاصرته تسطر بشروطها وهو يكول تم واذا ابن ابو يتاخر بالجواب حتى يجي البوكس يعدل ترتيب خلقته

- اووي يخبلون من اسمعهم يجحون واشلون يتحمل خبالها ويسايرها حتى لاتصرخ بوجهه اكزكز عليهم

- ههههه صار استاذ بمزاجها يعرف اشلون يتعامل وياها

- هيه صح رعنه بس حليوه تنحب ربي يحفظهم دتعالي للمطبخ خلينه نزهب الزاد ماضل وكت

رحنا للمطبخ فتحت الثلاجة طلعت مخضر انطتني اخذته جبت سجينة وصنية كعدت وهيه خلت تمن وكعدت يمي تلگط بي

شوية ونسمع صوت هلاهل كمنا ركضنا للغرفة دخلنا لكينا عمتي لازمة الفون تباوع وتبجي وبيبي منتجية مغمضة لازمه سبحتها بدون صوت

اسمع صوت كمرية جاي من الفون تصرخ ؛ رحت يم عمتي واشوفها ملخه روحها وجهه ازرگ لازم قطعه قماش وتصيح لخاطر هاي تبريتوا منييي روحي كولي لاخوج حسبي الله بي عساه مايتهنى ولايشوف الرحة مثل ماجسر ظهري ونهانييي

كالتها شمرت القماش بي عذريتها وكامت تلطم بثنين اديها على وجها وتملخ بروحها درت وجهي ماكدرت اتحمل المنظر طلعت رجعت لغرفتي دخلت شمرت نفسي عالجرباية حضنت مخدتي وغمضت مر وقت حتى صوتهم على غده ماسمعتهم اجتمعوا مثل كل يوم الوضع يعصر الروح مثل هيج وقت تتلكه اخوتها تبوس امتونهم هيه وتضحك

اخذت نفس غمضت انگلب على ضهري واسمع صوت فجر تكول دخيلك يخوي وهيام تصيح شنو من گلب شايل ولك البت راح تجتل نفسهااااا

صهيب يسولف بصوت عالي وصگر معترض غيمة تبجي وتتوسل صارت هوسة دااكوم ورجعت گعدت على صوت صرخه ذباح رجت البت رج هو ويصيح وكلام الله الي اهيسه يتنفس ادفنه هو وعايش البت مااتتت مالها وجووود والي يذكر اسمها اترس فچه بارررود ومانه ابن البدوية ان ماعملتهاااا

هيام - البت اذا بخوتها ماتحتمي جا بيمن تنتخي طفلة غلطت وخذت جزاتهاعليش هيج ظالممم خاف رب…

بعدها مامكمله واسمع صوت ضربة ويه صرختها والكل ركض مخبوص

ثواني وصارت خنسة اندفرت الباب بسرعة كعدت عدل دخل عبارة عن بارود ثاگب عيونه حمر والحرگة واضحه على شكله

رد الباب برجله راح جهه الميز شمر الفون و باكيت الجكاير وكف يفتح بدكم قميصه اباوعله ولاكأنما مسوي شي بلحظه حسيته مريض نفسي لان مستحيل اكو هيج قابلية اندارلي صاح بدل ماصافنه كومي حضريلي الحمام وزهبيلي سم خلي اطفح

اشرت اي من خوفي سحفت صار شعري جواي نزلت جفي صاح الله وركض دنگ لزمني كال تأذيتي يبه

- بسببببك

- عليش وانه شعملتلج

-يعني تصرخ وتكول شسويييت

-وين تأذيتي

- رجلي كامت توجعني

- انه حيوان وهمجي وانتي شمالج ماتتنوعين طريجج

- سحگت على شعري ووگعت

- چم مرة اگلج لاتفچي يبه انتي عليش ماتسمعين الجلمة

- مو جنت نايمة

استغفر وگومني وخرت ايده من ظهري وابتعدت عنه لميت شعري لفيته رحت اخذت ملابسه للحمام علكتهن وطلعت بدون لااباوعله رحت للمطبخ

البيت نفس مابي كل واحد بغرفته دخلت صبيت عالسريع حضرت الخضرة واللبن خليتهن بالصنية شلتها ورجعت للغرفة دخلت لكيته طالع من الحمام متمدد عالجرباية بطرگ البنطلون ايده على عيونه رديت الباب وراي وكفت اخاف احجي ويطلع نايم واعرف بهذا وضعه يلبس الصنية براسي

وخر ايده اشر شكو واكفه

- هاا مو لبالي نمت

- اكو زمال عنده ذره عگل تغمض عينه بهيج بيت جيبي يبه الاچل

كعد اتقدمت خليتها يمه شال الخبره خلاها على جهه دنه الماعون - امي تغدت

- لا ولاواحد اكل اليوم

- يعني لسه بدون اچل حضرتج

- اكيد يعني دتشوف الوضع بالبيت

- وانتي شكوو عسى ما تكب نار جهنم بي رررايه اچلج بوكته علاجج قوي وانه مافارغ اراگبج يبه الف مصيييبه ورراي

- تره تكدر تحجي وياي بهدوء ليش تصرخ بوجهي

- لان خبببل والله غاضب عليه

سكتت

جرني كعدني گدامه دنه الماعون بينه ودنگ ياكل بعد حتى ماعترضت لان شكله كلش مومال واحد يعانده شنو يخلي كبالي اكل بدون صوت حتى شعري انفتح مالميته اشوفه كل شوية ياخذ نفس ويستغفر واني ضاربتها تغليسة خانسة بس ارمش اكل بهدوء

رن فونه كمت جبته انطيتهيا وشلت الصنيه دااطلع واسمع صوت گمرية جاي من الفون تصيح ارتاحيت ان شاءالله روح ربي لايهنيك بس على شني تتهنى وانت حتى بزر مايصير عندك شوف هذا الشايب النص زلمه بي رجولة تجيب راسك زلمه محبل حريمه كلها موش مخلصها مكاون ويه الديرة وهو جيله وحده تنهي اسمه

…ابتسم سحب باكيته الجكاير طلع وحده دنگ ورثها اخذ نفس نفخه وكال ياهو انتي

- حسبالك جسرتني من تبريت مني وشمرتني يم هيج واحد ؛خلي اگلك هذا الواحد حريمة حدر رجليه يتمنن الرضا لخاطر يرضى موش منيم حرمة رفيجه بحضنه وهيه ماتغمض عويناتها اذا ماتتخيله نفسه ولفها الراگد حدر التراب

اباوعله خله الجكاره بحلگه يتسنط بهدوء وهيه مستمره باللغوة خفت من شگله خليت الصنية وركضت سحبت الفون غلقته راد ياخذه مني لزمت ايده همست لخاطري اتركها تره اي وحده بمكانها تحجي هيج بس حتى اطلع الحرگة الجواها

-عطيني النقال يبه

-ذباح كلتلك لخاطري

- وهذا خاطرج وين ناوي يوصلني يحرمة غزوان

- مايوصلك لمكان موكلت انسوها انت هم احضرها وحسبها ماتت لاتهتم لكلامها هيه لوتفتهم ماتسوي هيج بسمعة بأخوتها مو تشمر هيج كلام

- وياهو كلج راح ارد عليها هاتي الجوال بنيتي ولمي شعرج لاابتره الج

- والله ياريت تسوي فضل لان صاير يخنكني بالتمشيط

- لهيج راح اريحج منه وهو وراسج فرد مره واخلص منج ومن اختج وزلمتها العوج

- صدگ اكو شي صار دااحجيلك عليه بس اهدأ شوية حتى اعرف اسولف

-تحجي يبه اسمع

-بالاول اكعد واخذ نفس ارتاح بين مااجيب شي حتى ناكل ونحجي

سكتت

شمرت الفون رحت للكنتور طلعت العلبة مالت العسل لان صدگ شفت لمعة بعيونه من ذكرت الجهال بس يحاول يبين مايهمه الحجي

اجت يمه كعدت شافه بيدي ضم وجهه بجفوف ايدي ودنگ

-شبيك

فرگ وجهه وكعد عدل اخذ نفس واشر ماكو

-تره بي خاشوگة

- يبه يأذيج

- لااكل شوية احب اكل شي حلو وره الاكل لايكون ماتحبه تره كلش طيب

- رررايه الجو حااار وابوي مشتعل بكبره بعدي عني لااهفج دفره اردج لحضن امج

مارديت اتربعت فتحت العلبة طلعت بالخاشوكة مديت ايدي

اشر شنو

- بس هاي حتى اعرف انت هادء واحجي براحتي

- يبه هاااادي هاددي ودين محمد هااادي

اكلتها ورجعت اخذت خاشوگه ثانية

-شني مطولة

- شوف رؤيا ودسار راح يتزوجون واكيد ياخذها لبيته بغداد

- اااي فكونه دخيل محمد

-واني

-انت شكوو رايه ماتتحرجين خطوة من الباب لحد ماتطلع امج واسلمج بيدها

- يعني شنوو اعوف اختي تروح وحدها

- وين رايحة لبيت زلمتها وماراح امنعج عنها اشوكت ماردتي اودج الها وبيتي مفتوح يمتى ماتريد تجي هلا بيها

- وشوكت تطلع ماما

- مااطول وسدي السالفة

-بس شوف

- مااتنوع ولااسمع وبسج اكل راح تنطحلين

- تمام اكل هاي حتى اظمه لو تقرف من الخاشوكة اكوم اغسلها الك

جر العلبه بعصبية اخذ الخاشوكة دنگ اكل الاولى والثانية خله الثالثة شحط كمت بسرعة دگيت على ضهره صاح بت الكلب شحطت موش لگمه حشرت جيبلي مييي

ركضت شلت بطل المي انطيته شرب وأشرلي شيلي العلبة

شلتها سديتها خليتها عالميز شفته شمر البطل انتجه ولزم الفون عرفته راح يتصل بصگر حتى يطلعون يدورن مشاكل صحت ذباح

-امري يبه

-جوعانة

-الزاد جثير والنفس طيبة ياهو الكاضج

-قصدي عطشانة والبطالة خلصت

- ثلاث ترباع الكرة الارضية مي ودارنا بنص الخير منين ماتميلين تغرفين

-كليتي دتوجعني وعلاجي خلص

- الصبح موعد الحجز ويه طر الفجر ياخذوج وبدل الكلى اعطيج اثنين بعد شني طالبة

- انت دتضحك عليه لو تريد تسكتنيي

- يبه شرايده

-كوم نطلع للمزرعة ضايجة

-وياهو المانعج ماتطلعين

- شنوو مخبلة اطلع افتر وحدي وبعدين اخاف من النوگ كوم وياااي

- هينه غيري ملابسج ولمي شعفتج

ركضت طلعت فستان رحت للحمام غيرت تراكي طلعت لكيته بعدة على نومته يراسل رحت يمه اتجتفت اشر دقيقة ورد لفونه

وكفت متجتفة يمه منتظرة شوكت يكمل صارت عيوني على عيونه مكحلات بطريقة قويه السواد المحاوطهن بكثافة عضيت شفتي امنيتي افرگهن داشوف يتصخمن لو اللون ثابت ؛ رفع راسه اشر شكو

- ماكو شي

هز راسه ورد يراسل

- هاي عيونكم من الله خالهن هيج لو امك جانت تخلي كحل لحد مالطش بعيونكم

- هالسؤال وجهي للبدوية

- زين انت من تغسل وجهك هم ترد تكحل لونهن اصلاً ثابت مايروح

-شتكولين انتي؟؟

-دسأل

-وانه مافارغ ولاعندي وكت لخاطر ارد على هيج تفاهه

- يصير امسحن والله ماافكس عينك عالخفيف بس داشوف ينطن اسود لولا

- فدوة الج العيون وصاحبهن جربي يبه لاتخلين بنفسج شي

هو يحجي واني ماصدكت عدلت وكفتي بسرعة بللت اصبعي بحلگي ومديته بعدني ماواصله لعينه لكفه سحبه عضه ودفعني كام- عگلي ينيتي وبعدي عن طريجي

باوعتله بنرفزة عرفته ناصب عليه رفع ايده بسرعة ضميت وجهي وخرني ودنگ جر تيشيرت لبسه واشرلي يلاا

لفيت شعري كباية خليت شال طلع كدامي طلعت ورا لكيت بيبي وعمتي كاعدات بالممشه وهيام واكفه تسولف وياهن

ذباح سلم وطلع للمزرعة رحت سلمت عليهن دنكت بست راس بيبي كالت وين طلع ذباح

- للمزرعه دنفتر شوية

- روحي يجده ربي يهدي سركم

هيام - بس لو تعلمينه الطريجه اشلون تگدرين بدگايگ تهدي هيج

- عوفي الطريقة وروحي حضري نفسج حتى تصالحي تره وكلته طن عسل راح ينفجر

- صخام بوجهج ولج كلتلج خاشوكه مو تجتلين الزلمة

- شعرفني اخذه الواحس دخل بالعلبه ديله روحي تره الليله يمج ماادخله لغرفتي

هزت ايدها وبيبي ضحكت عفتهن ولحكته اسمع بيبي وعمتي وراي يندعن بالخلفة

طلعت لكيته واكف اديه بجيوبه ويباوع لدسار كاعد عالحجر وگدامه رؤيا يظفر بشعرها وهيه كل شويه ومنداره ضاربته

همست اتعلم منه شوفه اشلون هادء

- مقتنعه هذا هادي شايفة من يخش المركز ويبلش بالربع شيعمل تراه موش گليل شر بس يطلع طاقته المكبوته ويفك عثره عظمة بالعالم ويردلها هادي

- اشو ايام يجي اكو وشم بجسمه وايام ماكو

- حسب المهمة اليگضها تتنوعين هذا النجر الجدامج الصاير مدمغة لاختج شني؛ اكبر شارب مايكدر يلاوي يختاروا لاسوء مهمات لان متأكدين منه مايهاب الموت ويجيبها بخفة ايده

- لعد ليش هيج ساكتلها

- كلبه متولع بيها رب الخسر وظيفته لخاطرها مايتحمل طكها وصراخها

-انفصل

-بعقوبة مسحت ملفه من انجازاته وتعبه بالكامل

- خطيه وهسه اشلون راح منصبة يعني انتهى

- خالة ابو حرمته رتبتة جبيرة اذا گدر ويلعبها ويا صح يساعدة يرده لمنصبة واكيد زلمة اختج جنه ابليس مايعتاز واحد يعلمه

دااحجي وستكتت على صوت ضربة ودسار صاح اااخ

درت وجهي لكيت رؤيا واكفه لامه جف ايدها ومستعده تريد تضربه بعد وهو رافع اديه يحمي نفسه ؛ رفعت رجلها قبل لاتوصل بين رجلي دنگ شالت ايدها رادت تضربه بوكس لزمها بخفة وكام شالها من بطنها كلبها بالمگلوب صرخت لك دساااار

- كولي اتوبه

- لو تمووت مااكول نزلي لكككك

عصر بطنها ضحكت وصاحت لااااااا دساااار اكول اكوول

- يلااا

- بعد مااغلط عليك ولااكتلك

- كولي احبك

- مااجذب

نزل ايده على بطنها اكثر حركها كامت ترفس وتضحك بصوت عالي

ضحكت على صوت ضحكهم شال راسه اشر ترديها

هزيت راسي لاا

رفعها اكثر گلبها على متنه تكول لعابة ويحرك بيها بكيفها اتناثر شعرها مشه بيها وهيه تصيح لا دساااار لاتتحيون لك لفووو جبان الوطن نزززلني

يااعالم هذا حراميي وتاجر اعضاء شارد من الحكومة راح يكتلنيي لحكونييي

مااهتم كمل مشيته وصل يم حشيش اصفر خاص بالحيوانات شمرها عليه وندار يريد يرجع كامت بسرعة ركضت ضربته بظهره بكل حيلها ودفعته وكف دار وجهه رجعت ليورا دنكت تتلفت ادور بالكاع شافت قوطيه معجون فارغة دنكت شالتها وشمرتها عليه رفع ايده بسرعة صدها

ردت دنكت شالت حجاره شمرتها اجت بصدره صاح ااخ ولزمه متألم وكفت متخصره تباوعله بانتصار

فرك صدره وابتسم بمكر نزلت اديها وهمست والله يدسار اذا تحركت اصرخ وافضحك

هز راسه ودنگ يطبگ ارداناته

- خليك متذكر اني حذرتك

رفع راسه واشر تعالي

رجعت ليوره - انت رجال والرجال مايمد ايده على وحده ابنيه

مارد اتقدم

دارت وجهه رادت تركض مالحكت جان اسرع منها لكفها ودنگ شالها واشتغل الصريخ شمرها عالحشيش هيه ترفس وهو يدفن بيها

ضحكت على منظرهم الي يشوف ضخامته وهيبته مايصدگ هيج يتماطل ويه طفلة وفوكاها متحمل الكتل ولسانها الطويل وهيه تصيح لك حيوان لفووو صير رجااال وعوفني

دفنها وكام نكث اديه واجه هز ايده ذباح وضحك راح كعد عالحجر كعدت بصفه وصل دسار يمنا كعد كدامنا اشر لذباح عالجكاير شمرله طلع وحده خلاها بحلگه دنگ ورثها اخذ نفس نفخه وكال اي ابن البدوية كالوا ملتقي بأبو عكرب

ذباح - اتمنى عندي ربع فراغك وبعدين عليش مكلف نفسك ومزحم ازلامك وراي جان نشدتني وانه ابلغك تحركاتي اول بأول

- مم حلو وينه

- ههه عالاساس ماتندله وغشيم عالجاي يعمله

- خليك بعيد عنه لخاطر لااسحك راسك

- اتخسى انت والمرافجه السبع بيكم مايحرج شعره من راس اجلابي موش مني روح حباب العب ويه الي ابكدك

- لازلمة

- غصباً عن شاربك لو مادايس عتبت داري جان عطيتك درس بالمرجلة وعلمك نواقيص الثقه شني نهايتهم

- وكلام الله يذباح كلمة وحده اذا وصلتها الها لو عرفت منطيها لمحة من الجاي اسوي قبل لااكمل الشغلة امحيك انت وعائلتك

- بس اركد اتحجه على كدك و ركز على غنيمك

-ابو عكرب عرف بالشغلة ؟؟

- ماادري بس شكله موش راحة وخله براسه البنوات هيست عندة علم بلعبتك ومناطرك بالدگيگة لخاطر يتحرك

- شسوي ؟؟

- افااا تحير وانه بظهرك لاماهكيتها منك يابن العم تحرك يخوي لاتخاف انه وزلامي راح نحاوطك

راد يحجي واجت رؤيا تنكث بروحها ضربته على ظهره اندار سحبها كعدها يمه وخر الحشيش من شعرها مسح خدودها رادت تاخذ الجكارة منه ضربها على ايدها خله الجكاره بحلكه وجرها لحضنه جتفها حتى ماتزعجه

رن فون ذباح طلعه باوع بي وكام كال يله انه اترخص وانتي يبه كومي ردي الحجرتج

اشرت اي هو راح واني كمت دخلت جوه

***رؤيا***

سحبت روحي منه لزمني من وجهي دنگ باسني وكال واني هم اروح

- لاتتحيون بعد وكت

- اووف الألفاظ تنگط عسل وباجر من الصبح اجي حتى نروح لوالدتج

- بس اني وياك

- خليني اروح بالبداية احجي وياها ونتفق واجيب امي

- صدگ اشلون قبلت امك بيه

- ليش اثر الجفجير ماواضح بوجهي؟؟ بس اريد اعرف انتن اشوكت تكومن تحترمني تره بالعباس اني ضابط والعالم تهابني ليش ماجاي تقتنعن بهالشي

خليت ايدي عالجرح مسحته همست كلاص حبيبي كلاص بعد ماكتلج

- جذابه وعلي

- واني اشوكت ضربتك

- لاابد هذا ابوي استلمني دگ وسب من ساعة ضربة الدراجة لقبل دقايق هفني دفره عدل فقراتي بيها بس هانت ماضل شي وتصيرين بيتي وسهل الحجي يصير

- مم وشنو تسوي

- امشطلج كفشتج الصار حلم اشوفها مرتبة وغسلج وجهج الوسخ الصاير جنه زوليه حبوبتي وهذا لسانج الينگط عسل كل دقيقه اعضه لحد اطلع شكو سب سمعته منه

- مو هسه نتزوج

- ليش كل شروطج نفذتها بيت واشتريتلج اهلي وراح يجون يطلبوج وحقج وراح يوصلج شنو رايده بعد

- يوصلني بس مومثل مااريد

- الموت راحة

-ماتعرف شنو جان يسوي بيه

سحبني لحضنه دنگ باسني وهمس حسيت برجفتج وخوفج من اول حضنه وحلفت اردها بي اضعاف

- هواي حاولت بس ماكدرت كلمااحس ايدك على جسمي اكو شي بداخلي يرفض ماينطي مجال حتى افكر

- الج كل الوقت شعره مالمس منج اذا ماانتي اطلبين عسى ماتضلين سنين اهم شي اخليج بحضني وغمض واني مأمن

- ليش هيج مستعجل تريدني يمك من شنو خايف

- الدنيا غدارة خايف اموت واني بحسرة حضنج

- لا خايف اني الي اروح منك شفت صاحبك خفت تكون مكانه موو

- صاحبي لوميت افضله ذاك الزلمه الجان ينحلف بي راح ضال يفتر مثل الخبل يخلص نهاره بأجرام ويگضي الليل لازم ضفيرتها ويشرب

- هيه اقلها تركتله ضفيره اني ماراح اتركلك غير اسمي

- لادخيل محمد رؤيا بروح اهلج لاتحجين هيج وعلي اتسودن اني مو مثله وكلام الله اخلي طلقة براسي واموت ثانية وحده بدونج مااكدر

وخرت راسي من حضنه باوعله رغم ضخامته وقوته بس اكو لمعة خوف بعيونه هادته ؛ ابتسمت لزم وجهي مشى اصبعه عليه نزل على شفتي مسحها عالكيف وهمس وروح ابوي عايش بيج

لاارادي غمضت حسيته دنگ على شفتي سحبها عالكيف ونزل ايده على ظهري بخفة وصل لخصري عصره وجرني اله احس روحي ذابت بين ايديه

شعور مااعرف اوصفه ؛ ياكل بشفتي بهدوء وايده تتجول بدون وعي اخذني لغير عالم بلحظه حسيت بده يفقد السيطره ولمساته بدت تصير قاسية ضغط عليه سحبت نفسي ماكدرت ونيت زاد اكثر ضربته ودفعته حيل وخر ينفت

مسحت حلگي - كوم دسار يله روح

-اذيتج مو

سكتت

لزم وجهي دنگ مسح شفايفي وطبع بوسه خفيفة

- تره موحلو منظرنا اذا شافنا احد

- صدگ رؤيا راح تصيرين الي وانيمج بحضني

- عززه تره مصار دقايق من حلفت ماتلمسني بدون رضاتي

- مرات الحلفان يكون بالاجبار حتى ترضي المقابل لااكثر

- هاا انت من هذا النوع يله دسار كوم روح لشغلك

- ماتخلينه نعوف الشغل وتجين وياي نكتب قصتنا

- والله ماشايله هم غير لعشرتك واعرف نفسي راح ارجع لنفس الصخام الجنت بي وياك اكلي شربي حليب ادفي لاتتحركين جواريبج لاتنزعيهن نامي يووو

- وين لاگية زمال مثلي يحبج

- واليحب يثبت مو يخنگ

- ولج انتي ليش ميصير بعينج البارحه ماخذلج بيت على نهر دجلة

- صدگ تحجي

- وعزه الله وهاي الضربة الثانية اكبر اثبات عوزت افلوس عود رحت لامي هفتني بالنفاضة

- يعني انوب اكعد على صوت النوارس واطلع كبل اشوف المي

- وكلام الله ارميج كون بيج حظ وتطلعين من حضني الصبح وتعوفيني مثل الجلب وحدي نايم حتى اعلمج الحيوان اللفو شيسوي

غمضت اشرت اي

- جذابه وروح ابوي غير الطگ والسب ماراح احصل

- لاع اصلاً ماراح اصيحلك بعد لفوو ابد

- كله حيوان ادري

ضحكت ضحك على ضحكتي و سحبني لحضنه دنگ اخذ نفس طويل باسني و همس رؤيا وحگ دين محمد احبج اكثر من روحي

غمضت خليت راسي بصدره عصرني حيل دخلت بحضنه امنيتي ماافتح عيوني بعد واعوض كل العشته بداخله

مر وقت لامني بحضنه وخال راسه على راسي بس صوت دكات كلبه تنسمع مااعرف ليش بس حسيت بي صدگ خايف يفقدني؛ رفعت راسي باوعتله جانت لمعة بعيونه مااعرف افسرها مد ايده وخر شعري عن وجهي حجه بصوت خافت لو بس تعرفين شنو الج بداخلي

اشرت شنو

ديرد ورن فونه دنگ باسني وعدل نفسه طلع فونه غلقه وكال يله صار لازم اكوم

- باجر تجي من وكت

اشر على عيونه رد لزم خدودي بوسهن وكام راح سحب الجماغ وكف يتلثم بي

- انت شوكت تصير رجال وتطلع بدون لثام ماتخاف

-من تغسلين وجهج

-وجهي انظف منك باجبان الوطن يالفو

-ديله اشلونها الرعنه

-اني رعنه يالحيوان مخلص عمره باللثام يتختل مثل الجريدي

شفته راد يتحرك واني بعد مااندل طريقي هيه كمزه وهيه ركضه بوجهي عالبيت دخلت حسيت هدوء مديت راسي لكيته على وكفته همست حيوان لفو

دنگ شال حجارة بسرعة ضميت راسي واشوفها اجت ترس بالحايط ضحكت دخلت داخل البيت صنته عرفت وكت وكت الصلاة الكل بغرفته

رحت لغرفة رايه دكيت الباب صاحت الله اكبر دخلت لكيتها واكفه عالسجادة سديت الباب ورحت تمددت على فرشتها منتظرتها تكمل

مرت وقت وهيه بعدها ادري بيها دتقضي لغزوان صلاة من لمعه عيونها ماكدرت اباوعلها درت وجهي لكيت فون غزوان عالكومدي اخذته كلبت بي شوية ورجعته احس قبلي يريد يطير

دخلت راسي بالمخده فكره تاخذني وفكره تجيبني اكثر من ساعتين لحد ماكملت صلاة قرآن لمت سجادتها اجت يمي باستني وكالت شو هنا

-اليوم ذباح يمج

-لا يم هيام ليش

-ااي حتى انام بحضنج مشتاقه الايامنا

-والله اني هم مشتاقتلج تعالي

مدت ايدها خليت راسي بحضنها دنگ اخذت نفس طويل مني باستني وخلت راسها على راسي صار هدوء مر وقت وهمست اشلونها هسه

نزلت دموعي

-ليش هيج مدتسأل عليه معقولة ماارف كلبها ماحست بخنگتي

- يجوز زوجها صعب

- حتى لو صعب اقلها تتصل مارايده شي والله بس اسمع صوتها والله احس بعد مااتحمل اكثر

- تجي وتاخذيها لحضنج وتعاتبيها وتشكيلها وحتى تملين منها

- رؤيا مدتحسين شكو بكلبي

- الي انهد بيتنا والراحوا اخوتي وهيه اختي

- هم يجي يوم ونلتم من جديد

-اذا عرفتي ابونا عايش شنو راح تسوين

- من يوم العرفت جاسم موابونا حلفت ماراح اسأل منو ابونا الحقيقي ولاراح افكر بي ولا يهمني معرفته من الاصل

- يمكن مظلوم

-خلي بكمل مظلوميته بعيد عنه ولاتجيبين طاري من الاصل

- عوفي خلي يولي صدگ داابشرج صار عدنا بيت وعلى نهر دجلة

- صدگ دتحجين

هزيت راسي مبتسمة مسحت دموعي بسرعة ونكلبت باوعتلي وضحكت

اخذت نفس وبلشت اسولفلها شنو طلبت بدل المهر واشلون راح اخذهن ونگعد هناك نسوي مكتبة لرئال وغرفة خاصه نلتم بيها بليل بحضن ماما حتى نسمع قصص رئال التافهه واني ارجع للمدرسة وهيه تربي اطفالي

ساعه نضحك وساعة نبجي لحد مارن الفون مسحت دموعها شالته باوعت بي وعكدت حاجبها اشرت شكو

- اتصال فيديو بس مااعرف منو

- اخاف دسار جيبي

اخذته فتحته واشوف رافد الدغش كدامي عيونه كلهن شر باوعلي ورد باوع لرايه ابتسم دااغلقه وصاح بس انتظري احجي وياج

- مااتصور اكو كلام بينه

- لااكو والي ماكو غير حضني اترديله

- عبنك هيج حنين روح دور بتك وين ضيعتها

- لهيج ماريد اضيع الباقيات لخاطر الحگ اردها قبل لاتروح مني صدگ

- كملت يله انقلع لك

- اوووكفي بس شوفي هذا اكيد يخصج

عدلت راسي ابتسمت بستهزاء دار الكاميرا قرب الصوره ضاعت ضحكتي واني اشوف هوسة وصوت هلاهل

من بينهم دسار واكف يم خطيبته لابس قاط وهيه بفستان ابيض مدنگ يلبسها الذهب ....

***رئال***

عمي يحجي واني صارت عيوني على عبدو جانت نظراته قذرة وعلى شفته ابتسامة تخوف دار وجهه دنگ تفل ورد باوعلي ومسح شواربه كوة اتمالكت نفسي ماتقيأت فززني عمي وهو يكول يله بابا الشيخ منتظر

اشرت شنو

- بنتي صح اني مارضيت بالاول بس مهما يكون كعدتج بينا موصحيحة انتي صغيرة واحنا عدنا ثنين شباب

- اي لعد ليش ماتخلوني اغوح للمغكز

- يامركز بابا انتي تعرفين شي واحنا شي اذا الله ستر عليج بذيج السالفة هاي محد راح يخلصج بالاخص اذا شكو بأمرج كبل يشمروج بالحجز وترحين بيها

- خلوني اغوح مالكم شغل اني ادبغ نفسي

- ليش يابنتي اذا على سعدية مضوجتج هاي بعد ماتكدر تحجي وتره هيه كلبها طيب وبحيل الله منا وجاي تصيرن اكثر من خوات

- مااصيغ شي وزواج ماغاح اتزوج شبيك عمو صدگ دتحجي

عبدو - اي صدگ وغصباًعنج سمعييي لج اخاف دللوج شوية وشفتي روحج تره كلج خلگ وحدة عاهرة اهلها متبرين منهاا كلمة وحدة اردج للمووت سمعتيييي

- وين ماتوديني وديني زواج ماغاح اتزوج

- اسوي روحي كلشي ماسمعتتت شمري البيدج ويله راح يسألج الشيخ كلشي ماتردين غير نعم وتردين مثل الزماال هنا ولاوروحه لابوي اخذج احبسج ويه الحيوانات بالحديقة تكملين باقي عمرج هناااك

عمي - على كيفك اني احجي وياها وانتي بابا ليش ماموافقة احجي شنو خايفة ترا اني ماوافقت اذا ماتعهد وانطاني كلمة يعاملج حالج حال سعدية وايده مايمدها عليج وشنو بنفسج يشتريلج

- عموو شدغاك اني مامتزوجة يجوز عندي زوج

- هم فكرت بيها وحجيت ويه الشيخ كال انسوي خلع بالاول ونعقد

- شنو بكيفكم تسألون واتسوون بدون موافقتي

عبدو - اهوووو اشلون شغلة موكلتلك هاااي موبشررر اذا مااسحلها ماتجي للطريق وراح تضل معاندة حتى نبطل وتنهزم وتشمرنا بمصيبة

عمي - ياعمي حقها هو اني تفاجأت من جبت الشيخ وحجيت مو هيه وانوب ماتذكر شي اكيد خايفة

- لااا موخايفة بس تريد ادحم وتلعب بكيفها اكص ايدي اذا طلعت صدگ فاقدة الذاكرة هسه تطلع مسوية مكسورة ومنهزمة من اهلهاا مامتعودة عالستر من سمعت حلال اتخبلت

- زين عوفها خلي الشيخ يروح اليوم واني احجي وياها لباجر تقنع هيه تحبنا وتعودت علينه ولو مااعزها مثل بنتي واعرف ابني مابي خير جان زوجتها اله بس اريدلها خوش زلمة يصونها وكادر يصرف عليها مويموتها جوع

- وهاي كدامك تدلل كل ماانزل اجازة انطيها افلوس واطلعها بس يله فضيني مو انعل ابو گاعد صار ساعة يلااااا لج

اشرت لااا

-شنووو لج

-السمعته ماغاح اتزوج ولاغاح تكدغ تغصبني والله اصيح وافضحكم

فتح عيونه على كبرهن رجعت ليورا وهمست والله لوموتكتلني مااوافق لو تذبحني

صك على سنونه ؛ عمي راد يحجي مالحگ دفعه عبدو واجه يمشي سريع اريد اتحرك مااگدر احس رجليه بعد ماتعيني وگعت الملابس رفعت اديه بسرعة حميت وجهي جرني من شعري وصاح تررردين بوجهييي لج

ركض عمي لزمه كله انطيتني كلمة ماتضربها اتركها اني احجي وياهااا

- لااا ماتحجي وغصباً عنهااا تجي وتوافق بدون لاتتنفس ولاوراسه لاابوي احلقها صفررر واشمرها ويه الحيوانات منااا لمن تموت سمعتي لج شنو اسوووي

لزمت اديه حيل وهزيت راسي لاا

شالني من شعري احسه اجت بيده شاطت روحي من همشت كلبي ضربته ماحسيت غير الراجدي من قوته انشمرت مسافة بالگاع على وجهي صاح عمي شبيك تخبلت

- مالك شغل اااانت اطلع برررة وسد الباب

-شنووو اطلع شناوي تسوي

-كلتلك اطلع بررررة

-عبدووو لاتتخبل

- اني شحجييييت

كالها واسمع صوت ضربة انداريت لكيت عمي ضام وجهه وعبدو يجر بي گوة يريد يطلعه

درت وجهي اريد استنجد اباوع لعمتي واگفة يم الباب والضحكة تارسة وجها صارت عيوني على امجد باوعتله بتوسل دنگ نزلت دموعي عرفت محد راح يخلصني ؛ شمر عمي على مرته راد يسد الباب ركض امجد دفر الباب وصاح شتريد تسوي ليش تسدهااا

- وانت شكووو بس لاحاسب روحك فد قندرة امشي لك منااا اخلي البسطال بلحگك

- تخلي بسطال اتخلي قندرة راسك وانت حر بي المهم لاالباب تنسد ولاتحجي وياها نص كلمة

- بعدد تعال اخذلج راجدي ربيني

- اذا شفت منها فايدة ليش لا الي يستفر بطفلة مو رجال زعطوط والزعطوط لازم يتربى حتى يمشي عدل

- شنووو لك شحجيت

- السمعته زواج بالغصب ماراح تاخذها على جثتي واذا على الوظيفة ادوس بيها افصلني اخذها واروح لو اعرف اجدي واوكلها بس مااخليكم تستفردون بيها

- شو دتعاااال خلي اعلمك اشلون تجاوب

كالها وجره من گد ماضعيف امجد وحيله رايح اجه بيده بخفة شمره بالگاع وسحب الباب بسرعة قفله
وندارلنا يباوعلنا بغل فاتح عيونه على كبرهن

زحفت ليورا بخوف واني اشوفه اشلون صك على سنونه ومد ايده على حزامة يفتح بي وجهه كله حقد وحقارة راد يكوم امجد اجاه بكل سرعته دفره بصدره گلبه عليه وجر الحزام

ديصيح وسكته بالسعة بنص وجهه صرخ لايبن الكلببببب واجته الدفرة براسه من قوتها دگه بالحايط دنگ لازمه متألم وهو بلش بالدفرات بعد يريد يحمي نفسه منه مايكدر كل ضربة تجي اكول هسه يموت

اباوعله يضم وجهه تجي الضربة بطنه يدنگ عاصر نفسه تجي غيرها بظهره

صرخت عمتي الي تنخي وهوسة سعدية تكسر بالباب و تصيح عوفه اني اخليها توااافق ومنظر امجد يتلوا بين رجلي احس مثل الشي نزل براسي

لزمته حيل عيوني عليهم ارجف ودموعي تنزل بخوف خانسة مااعرف شسوي مااسمع غير عمي دفر الباب وصاح تركه راح الشيييخ

اباوعله وجهه احتقن شال رجله ودفره بطنه بكل حيله انطوة امجد كاطع النفس تفل عليه واجاني رجعت ليورا مالحكت حتى اگوم دنگ لكفني من شعري حجه من بين سنونه ترفضينييييي ولج نزلت دموعي برعب استوني اترجاه وماحس غير دگ راسي بالكاع بقوة ؛

غمضت بلحظه صارت صورة بعيوني واحد مكتول وبنية لامه نفسها تهمس بخوف رئال لاتخليني وحدي ؛ ظلمت الدنيا صار غواش صوت امجد يصيح ششمس وعمي يصرخ رحت غير عالم

…الشمس تاكل بوجهي صوت دجاج يمي فتحت عيوني الضوء صار بيهن قوي رفعت ايديه داافركهن ماكدرت مثل الشي المانعهن شلت راسي وانتبهت لنفسي داخل قفص دجاج ايديه مربوطة بالحديدة والباب مقفول

احس ملابسي مبللة دنكت لكيت خياس جواي انگلبت انتجيت على متني گوة كعدت اتلفتت داير مدايري ماكو احد راسي يفتر گد قوة الشمس دنگت افرك بي واسمع صوت عمتي تصيح صحت بت العاهرررة

شلت راسي لكيتها جاية تمشي سريع بيدها عودة ماسحة وراها سعدية تركض وجها اسود من الحرگة عرفت راح انكتل ؛رجعت ليورا انضربت بالحديد ماكو مجال لميت روحي بسرعة وصلت رادت تفتح القفص لزمتها سعدية صاحت عوفيني افوخ گلبي بيهاااا

سعدية - يمه والله عبدو يكتلنا دخيلج كال لحد يوصللها

- ولج ابنييي راح يموووت بسببها ولج من البارحة لليوم ينززف ويصرخ من كسر رجله وهذا الكلب رجلج حابسه

- لان يدري بي يريد يطلعها منااا هو اخوي مو خوش ادميييي يتهدد يستاهل كل الكتل بلكي يتررربى

- خلي يطلعها مااريدها بيتيي بعد؛ وينه ابوج صيحيله خلي ياخذها يرجعها منين ماجايهااا

- هسه جايه تكولين خلي يرجعهااا ليش منوو قنعه حتى يزوجها لعبدو غيرج منووو هدم بيتيي

- كلت ثوله وبت شارع ماعدها احد كدام عيونه ماتكدر تفتح حلكها تجيبلنا طفل وتنطي الج وتخلصنا من نگت رجلج الزرفت راسنا شعرفني بت عاهرة وراح تسويلنا مصيبة

- وهاي صارت براسه بعد شيطلعها منه كله من وراج انتي الهدمتي بيتيي الصبح يهددني يكلي اذا طلعت منا اطلگج تردين اتضلين على ذمتي عيونج عليها ولج يمه يهددني بالطلاگ لخاطر بت ليل

- يبووو يبووو شكول عليك يقسمتي السودة منين جبتها لبيتي راح يرحون بزري بسببها اشلون اخلص منها كليلي

- مانخلي يتزوجها منا لحد مايلتحق وناخذها اني وياج نشمرها بغير محافظة ونكله انهزمت

- اذا تكولين مهددج بالطلاگ اشلون اتهزميها ولج

- جااشسوي كليلي روحي لابوي شوفي اشلون كاعد يم الباب يكسر الكلب يسمع صوت امجد ويبجي

- جا موكلتله روح اشتكي شمنتظر يموت ابنييي يااااالله

- جاماسمعتي عبدو من كله بس توصل للمركز اشمر تهمة على امجد خاطف البت ومن شاف روحه حبلها وتورط كام ضربها براسها خلاها تفقد الذاكرة وجابها شمرها يمنا وعندي شهود عالصار وتعالي جيبي الي يطلعه بعد والكاظم ييمه اذا لزموا بالمركز يموتوا تعذيب محد يصدگ السالفة لكاها ابوي وجابها

- واني ماانتظر لحد مايموت ابنيي

- شنسوي لاتكولين اخليها توافق عالزواج رجلي مااخلي ياخذ مرة علييه

- لا يتزوج وغصباً عنجن اثنينجن شنو حجته الطفل اله بليوم نص ساعة وبعدها تجي يمي بس تحبل يطلكها وتظل تخدم جوه رجليج لحد ماتخلف ناخذ الجاهل ونشمرها واذا حجه اني اروح للمركز واكلهم هو الخاطفها

- منو يكول يقبل هيج اذا هو يكلي الغرفه يوم الج يوم الها لحد ماابني غرفة عالسطح

- وخرري هسه احجي ويا شنو هيه بكيفه ماطلع عنده كم واحد بالمركز شو ستعبدنااا

شمرت العودة وراحت هاده اجت يمي سعدية دخلت رجليه بحضني اكثر كعدت نص گعدة همست والله اذا وافقتي اسود عيشتج تعرفين شنو اسوي بيج حتى زلم اجيب وادخل عليج اخلي يذبحج بيده سمعتيي

اتبلعمت بخوف

- امي راح تقنعه ويجي يحجي وياج تكليله لاا هيه دفره اتحمليها احسن مااتموتين تعذيب على ايدي لاحسبالج ابوي يخلصج تره جبان نفسه مايكدر يخلصها يخاف من رجلي

سكتت

- اذا غصبج كلش وكتلج كليله مونظيفة واني اطبگ وياج اتحملي كم يوم هنا ماضل شي ويلتحق وبعدها اندبرلنا سالفة اخلص منج بيها

هزيت راسي اي

تفلت عليه وكامت راحت دنكت مسحت وجهي بمتني رفعت اديه من كثر ماالحبل ضاگ عليهن صايرات زرگ درت وجهي محتارة شسوي حتى لوصرخت اعرف محد يخلصني لان البيوت بعيده عنه بس راح انكتل

قربت ايده عضيت الحبل بسنوني جريته بس ضك اكثر رفعت وجهي مديت رجلي لباب حركته سمعت صوت سنسله عرفته قافليني

دنكت اباوع ملابسي كلها مي من الكاع جسمي يصل من جوه رفعت راسي الشمس ترگع براسي اخذت نفس بيأس واشوف عبدو جاي هو وعمتي بيده صونده نزلت دموعي بعجز همست ياربي ساعدني

وصل يمي عصرت نفسي عيوني عالصوندة شفايفي ترجف والكسرة بروحي دنگ فتح القفص كعد مقابلي باوعلي بنظرة تقرف وكال هاا عقلتي لو اناخذلنا قاط ثاني

مارديت

-احسن ماتضلين هنا بالخيسة اخذج اليوم للفندق واشتريلج الرايدته محد يكدر بعد يحجي وياج اسويلج غرفة وانطيج كل شهر افلوس واطلعج هاا شكلتي

عمتي - ماتكول هيه موافقة. يله كوم جيب الشيخ قبل لايرد عمك من المستشفى

- مو اذا جبته وفشلتني هالمره اجرم بيها وتعرفيني من اضوج افقد هاي مو كسرت امجد تالي اموتها بدون مااحس

- لاهيه عقلت حجيت وياها بس هاا على اتفاقنا من هسه اكلك اذا رجعت بتفاقك اني اوكف بوجهك

- ميخالف دخلي يصير طفل وسهل الباقي عود اذا ماقنعت سعدية وضلت كارهتها اخذها اشمرها غير بيت

- يااا موهسه كلت اطلكها

- وينن اطلكها تردين تفضحونااا كدام العالم اذا وكفت اداعيني بي لو ترديني اكابل بتج بطرگ طفل كلتلج ماخذها علمود الجهااال

- جا ماتاخذها مناا تخليها يمنا اقلها تفيدنا بالخدمة واذا على سعدية اني احجي وياها بس هاا مالك غير ساعة باليوم موهم تطلع بسالفة جديدة

- كل عقلج اباوع لوحدة مثل هاي واني عندي تاج راسها يله هسه شنو اكوم اجيب الشيخ لو اكو سالفة جديدة

اشرت لا

- شنو لااا

همست برجفة مااتزوج

هز راسه وسحب الصوندة ولميت نفسي بسرعة حتى مالحكت احمي روحي واجتني اللسعة شوطتت روحي بعدني ماصارخة واجتني الثانية من كد الالم صرخت بدون لاحس ولج يييمه لحكنييي

سكتني بضربة على وجهي من وجعها غمضت عيوني احس روحي انسحبت نزلت ايديه وخليت راسي عالحديد بهتانة

تفل عليه وسحب الباب قفلها وكام اندار لعمتي صاح ممنوع توصلون يمهاا حتى اكل محد ينطيها تاكل وتشرب ويه الدجاج

- بلكي تموت اخلص

- ابنج راح يرجع اذا سمعت واصل يمها لو حاجي وراسه لابوي اضيعه سمعتييي

-وين سودة عليه اخذه ابو يسحل برجله منتهي بسبب بت الليل

- هالمرة رجله الثانية اشمره بتهمة حبوب واخلي يخلص عمره بالسجن وحتى رجلج افصله من الوظيفة اذا لمحت واحد واصل يمها لو منطيها اكل انهييي

- لاهاي هيه خليها لحد ماتتربى بت الشوارع عود نريد نسويها بشر ونستر عليها اثاري الاعوج ماينعدل

-ماعندي شي كل يوم اجي اخذلي كم قاط يااربيها ياادفنها

-هيج ونخلص من نكاستها رادلها بخت

دار وجهه باوعلي بحقد تفل عليه دنگ شال صوندته وراح لحكته عمته

شلت راسي للسما نزلت دموعي بضياع شي بداخلي مخنوگ عاجزه حتى عن الدعاء مااعرف بشنو اناجي

مسحت خشمي من الدم دنگت خليت راسي على رجلية صافة عالقفل مثل هيج مواقف البشر يسافر بجروحة داخل احلامه حتى يخفف عن وجعه اني حتى هاي محرومة منها راسي فارغ كلشي مابي غير صريخ وصور مرعبة غمضت بتعب

…مرت الايام واني بمكاني مايطلعوني غير مرة للحمام وبالتواسيل ويرجعوني كتل ارد الم روحي داخل القفص اتختل من مكان لمكان عن الشمس ساعة احشر نفسي بالزاوية وضم راسي بحضني ساعة اخلي ايديه على وجهي احتار شسوي من الحر

عمي يكعد مقابيلي يباوعلي ويبجي حالته اصعب من حالتي فقير ومدوهن بيني وبين ابنه المحبوس بالغرفة بس صوت اصريخه ينسمع يخاف يطلعه وعبدو ينفذ التهديد

اكل محد يجيب غير مرة يشمرولي نص خبزة والمي انتظر الدجاج يخلوله اطردهن حتى اشرب قبل لايوسخنا حتى حيل ماضل عندي يجي عبدو اشكد يحجي ويضرب براسي نفس مااتنفس لمن يمل وحده ويروح

يخلص النهار بين تعذيب وذل يجي الليل وياريت مايجي كل لحظه تمر بي موت بطيء الم نفسي وانحصر يم الحيوانات اتحامه بيهن اغمض وأبدي اشكي لنفسي من اذيتهم دموعي تنزل بألم اصعب شعور من تعرف ماعندك احد عايش وحدك بهاي الدنيا خايف من ظلام الموت

كاعدة عيوني على سعدية تعجن اجه عمي يركض بيده سجينة و المفتاح دنگ فتح الباب دخل گطع الحبل وسحبني طلعني راد يكومني ماكدرت اوكف سندني كوه وكفت رجليه ترجف اجت سعدية وكفت بوجهه صاحت وييين تريد بيها

- يعني وين دشوفيها حتى روح ما ضال بيها خلي اوديها اسبحها مو راح تموووت

- اذا سمع عبدو راح يسويها طلابة ويفصلك مثل مافصلك امجد

- انتي بس لزمي لسانج وهو مايسمع التحق ماهو

- بس لاطلعت امجد

- واذا طلع هو غيررر يكدر يتحرك مكسره كله حسبي الله بيكم

- دوكف عافلي افلوس

- روحي لامج ماادري يلا وخررري عني

جرني يمشيني دخلني للبيت صار امجد كدامي رجله مجبسه كلها وراسه ملفوف كاعد يم الغرفة شال راسه باوعلي بتعب ورد دنگ

اخذني عمي للحمام كعدني عالطابورية سبحني بملابسي سحب المنشفة لفني بيها وشالني كوه يمشي وداني للغرفة خلاني بفراشي ركض جاب ملابس خلاهن كدامي وكال راح اطلع بدلي بين مااجيبلج شي تاكلي

اشرت اي

راح سد الباب ورا وخرت المنشفة اريد ابدل احس اديه خدرانه وعيوني گوة فاتحتها مااعرف اشلون نزعت الدشادشه ولبست غيرها گوة بدون لاغير الداخليات؛ مديت ايدي ترجف سحبت المخدة خليت راسي عليها غمضت احس براحة؛ من گد التعب والخوف الجنت عايشة بي رحت بالنوم بدون لاحس

كعدت على ايد تمشي على شعري لاارادي همست بهظم ليش عفتني

- اني امجد مو هيذام

فتحت عيوني لكيت امجد گاعد يمي منتجي و ماد رجله اخذ نفس وكال لو بس اعرف منو هذا هيذام الصار ساعتين تشكيله

-شنو كلتله

-كل دقيقة شكل بين غلط وبجي وعتاب وتختمتيها بتوسل يجيج

-ما كلت اسم شخص ثاني

- القذر عبدو عذبج هواي موو ؟؟

-ههه بس ماخليته يتزوجني

- ماكدرت احميج

- خسغت وظيفتك ونكسغت غجلج وصاغلك اغبع ايام محبوس بسببي لااكل ولاماي

- تهون شموستي بس اكوم وكلام الله اخليهم كلهم يندمون واولهم الكلب عبدو

- اذا تعزني صدگ بس طلعني منا اني ادبغ نفسي

- واني مو ناقص واترك اخيتي وحدها بالشارع بس صبري عليه هالاسبوع افتح رجلي واخذج واروح وين ماالله كاتبلنا لكمة حلال

-اتعوف اهلك

-ذولة مو اهل يشوفنا يكتل بيه وحابسني بالترك ويه البريعصات ما واحد منهم حرك نفسه بدل مايوكفون بوجهه ويطلعوني يكلوله ربيه

- ابوك جان يكعد للصبح يبجي

- ابوي طيبة كلبه وخوفه خلته ماموجود ههه تصوري يوكف بالساعات يتوسل بي وحتى يدنگ على ايده يبوسها بس حتى يقبل يطلعني للحمام دقايق

- لان هدده يلبس بغاسك قضية ويضيعك بس يحجي ويا

- سهلة عوفج منه وكليلي شنو السر العجيب بوجهج الي اول ماشفتج طروني من شغلي بالكهوة تعرفت عليج انوخذ راتبي خاويتج فصلوني من الوظيفة

- يمكن لان حلوة

- انعااال

-شكغاً

- هو انتي بدون دجاج تغاغين انوب عاشرتيهن

- وانت بدون بغيعصي اتزابك انوب حبسوك وياهن

- بس اريد اعرف ربي من غضب على قوم البرعصات وكلبهم وين جانن امي واختي

- يجوز جانن بعدهن مامخلوقات

- لايمكن ماراد يخرب نسلهم بيهن

- من هيج سعدية ماتخلف وامك جابتك وگطعت

- الله يطيح حظج ولج الكعبة اخبل دشوفيني شحلاتي بويه غير املخ

- اجحد مهما كانت الادلة قوية

- حلوه هالحكمة منيلج

- ماادغي بس مبينة مال مثقفين موو

- تردين الصدگ شاك بيج عيونج وشكلج حتى الاسم التگولي مال عالم فايخة مو مال همج مثلنا

-حتى اني اكول هيج

- خايبة اكلي قنادرر صعدت الموجة بسرعة

باوعتله رافعه حاجبي

ابتسم وهمس بتعب وهمس اشلونج يخوية

- زينة

- لاشموسه موزينة بس وكلام الله كل الكدرت عليه سويته كسرني وحبسني حسبالج الليل انامه لاودعتج للصبح اكعد لان ادري بيج خايفة بالحديقة وحدج بس مابيدي حيله عاجز

- جنت اسمعك دگدك بالباب واعغف دتسوي هيج حتى تأمني وصدگ جنت انام على صوتك

- بس صبري عليه بين مااوخر الجبس

- اخاف يجي وماانلحگ

- لااسبوعين يضل بس هالاسبوعين اريدج تتصرفين كلش طبيعي كدامهم وماتبينين اي شي حتى محد يكشفنا

- وين نغوح

- اي محافظه المهم نطلع منا ونضيع اثرنا

- وعمي

- هو الطلب مني اسوي هيج لان عرف مايكدر بعد يحميج منهم

- ميته جوع

- واني هم والله وصار ساعة منتظرج تصحين حتى ادزج تبوكيلنا كم شغلة

- واذا لزموني اشلون

- يكملون التشويه الي بوجهج ويكسرون رجلي الثانية ميخالف مايضيعن بوجه العدو دكومي بسرعة وسمعيني عدل وسوي مثل مااكلج

كمت كعدت

- راح اصيح لسعدية بحجت تساعدني اغير ملابسي ترحين ركض لغرفتها تفتحين الكنتور الي بالنص اكو كراتين نساتل وعصير شيلي اشكد ماتكدرين اطلعين اتخلي وره التنور الطين سمعتي

- واشوكت ناكلهن

- ماضل للعشه ربع ساعة وتدخل تخمد واني وعبودي والليلة صباحي

هزيت راسي لميت شعري وكمت طلعت لكيتها تكنس شافتني شمرت المكنسة وصاحت يله لج دقيقتين و اريد البيت يبرح بررج حتى ترحين للمطبخ المواعين تارساته تخلصيهن اتسوين عشه وطلعين بوجهج عالحمام تغسلين ملابس سمعتييي

اشرت اي

-وبعدها دخلين غرفتي تغيرين الجراجف وتنظفيها

-حاضغ

-حاضغ ااااولغسل حتى حجيها اعوج مثلها اني ادري شعجبه منج يلااا تحركي بسررعة

سكتت رحت اخذت المكنسه كامت للغرفة دنگت احس راسي يفتر من الجوع بعدها ماداخله وصاح امجد سعدددية

وكفت تنفخ رد صاح لج نعاااال اندارت غمته وراحتله كالبة خلقتها ادعي طول ماتمشي لحد مادخلت سمعته يكلها انطي ملابسي بصوت عالي عرفته يكلي يلا

شمرت المكنسة وركضت للغرفة دخلت فتحت الكنتور لكيت كومة كراتين كلها حلويات واني بعد مااعرف اشلون انكل شلت كلبيتي كمت اشيل واخلي بيها شامي عامي لحد ماانترست شفته كام يطيح شلت اثنين لزمتهن بسنوني سديت الكنتور وطلعت اركض للحديقة وصلت يم التنور باوعت هواي مومال اخليهن ورا ننكشف

اتلفتت محتارة وين اخليهن مالكيت غير التنور نفسه فتحت الغطة خليتها رجعت الغطه ودخلت اركض سمعتها دتطلع مالحكت انبطحت عالمكنسة شافتني صاحت ثووول اشبيج

مارديت شلتها وكعدت مدنگه اكنس احاول اكتم النفس من الركض خايفة انكشف لحد مادخلت لغرفتها اخذت نفس براحة

لليل واني فد شغل كل شوية اريد اوكع من الجوع وكوة مسيطره ماصدكت صبيتلهم العشه وخليته كدامهم شالت عمتي ربع خبزة غطتها بالطماطة انطتنياها واشرت روحي

اخذتها ورحت كعدت بالحديقة اكل وعيوني عالتنور امنيتي اغدر امجد واكوم اجيت بي كد الجوع ؛ مر الوقت صار هدوء واني بمكاني اسمع صوت عودة ماسحة انداريت لكيت جاي يسحل برجله بيده العود كمت بسرعة سندته كعدته اخذ نفس وكال ادري مابيج حظ بس هم خلي اجرب وسأل وين الحلويات؟؟

- اسكت من جوعي بكتهن كلهن وهسه خايفة

- لج كفووو دروحي جيبي اولاد النعل تكول شمورة ولكفوا واحد من اتباع الحسين كطعوا عني المي والاكل الخنازير

- من ساع اجيت اغدغك واكل وحدي بس خفت انكشف اني البگت ومابية كتله بعد بس صدگ منو قابل ياخذ ؟؟

- اني شاك بابوي هالايام ايده صايرة طويلة جاي اشوف نقص بجكايري مااعرف يستحي يطلب مني ماادري يخاف

- امجد اذا عغف عمو دادخن يكسر غجلك الثانية

- عادي انوب بدل ماتبوكين نساتل تبوكين جكاير ونساتل ماكو مشكلة دروحي جيبي خلي اشوف شبايگة شمس الناصرية

كمت ركضت رحت طلعتهن رجعت لكيت بيده لفه خليتهن بالگاع كعدت مد ايده اشرت شنو

- اكلي هاي الحلويات ماتشبع

- هذا عشاك مو

- عشاي عشاج دلزمي لج راح تعيش الادراما

دنگت

- يله لج اخذي خلي ادليج على اجوارينا الطاگين واعلمج اشلون اطفرين عليهم لان شغلة اهلي داچه فكور ماتوكل خبز

ابتسمت لزم ايدي خله اللفة بيها وشال النستله فحتها ياكل

مر الليل واحنا ناكل ونضحك نتخيل وجه سعدية من تكتشف من صدكگ نسيت الجنت عايشته

…الايام ممله ونوم غير منتظم وجسد مرهق
وروتين مستهلك والوقت يمر ولاشيء جديد

كل يوم كعد على دفرة سعدية ويه الفجر وبلش شغل وكرف لليل اخاف جانت ادعي ودمغ هسه تتحجج تتفنن بذلي بس تريدني اكول تعبت حتى تركض لعمتي تلزملي الصوندة وتبدي بالكتل مااخلص لمن امجد يلزم اخته يكتلها وتكب العيطة ماتفض غير بضرب عمي الامجد وهيه تخابر زوجها ويضل يتحلف بس يجي يكسره

اني هم كمت اتحمل التعب واسكت صرت احسب للايام حساب اشوكت يفتح الجبس وياخذني منا

… مدنگه اكنس بالسطح امسح بوجهي ويرد ينزل العرگ من كل الجوانت رفعت راسي اباوع للشمس بعز الضهر تنشف مي البحر گد ماقوية؛ اخذت نفس مسحت وجهي ودنگت دااكنس وانتبهت علاگة بنهاية السطح كمت شلتها شلعت منها خيط لميت شعري شديته بيها واسمع من جوه امجد يصيح شمسس

رديت جاايه هسه بس الم التغاب

-لج نعااال تعالييي

- امجد لاتغلط تغه اگول لعمو يشغب جگايغ

- والكاظم راح اصعد اسحلج من لسانج الاعوج لج نزلييي

شمرت المكنسة نزلت دااعيط عليه ولكيت عمتي لابسه عباتها واعمي يمها واكف مثل المنتظريني باوعت لامجد اشرت شنو

امجد -روحي ويه سعديه خلي تنطيج عباتها لبسها وامشي ويه ابوي وامي

- وين

- للسوگ اريد جنطة وملابس بس كون كشخة مال شغل مرتب لان عندي مقابلة بعد يومين ويه الامر

سعديه - بس عبدو مايقبل تطلع

- وين مولييه هو للسوگ وابوي لازم ايدها وامي وياها بس تشوفلي جرود

- وليش هيه خو اني اطلع اجيبلك

- ذوقج خرررة مثل وجهج واني دز عليه امر الوحدة مو رئيس المجادية حتى ادزج انتي تختارين

- جاا ماتروح

- هاي هيه واني باجر افتح الچبس و اكعد هنا بدون شغل شعدي ماكل نايم بلاش صرفوااا

عمتي - يبووو ماعونه عبدو الله يهدي ويحجي ويه الامر يدز وراك بلكي يقبل ويردك هم تخسرها بسبب هالسگط

امجد - هذا العدي والله تردوني اروح تروح وياكم تجيب والي اني طلبته ماتردون ماعندي مشكلة

سعديه - وعبدو شتكله اذا عرف

- خلوها بطلت ماارووووح واتصلي برجلج كليله ماريد ارجع للجيش

عمي - كافييي اذا عرف اكله اني اخذتها للمضمد وانتي سعديه بسج مشاكل خلي الولد يشتغل ويفكونا من مذلتكم تكومون وتكعدون تصيحون احنا معيشيكم

- وصدگ عايشين بخيرنا لوماعبدو انتم بعدكم تشتغلون عماله كاتلكم الفكر

عمتي - جا انجبي وخلينه انولي مانتأخر حتى هم اتسوگ مال كم يوم ماطولها جايه وياي حتى تشيل بس انطيها عباية ونگاب

كلبت وجها راحت للغرفة جابت عباية راس ونگاب شمرتهن عليه باوعت لامجد غمزلي عرفته يوصلي رسالة جهزي اغراض حتى ننهزم

احس الدنيا ماشالتني ركضت لبست النكاب اشلون مجان والعباية اخذت نعالها مد عمي ايده واشرلي عمي تعالي رحت لزمتها جرني طلعنا صار گدامنا شي اصفر من السيارة يم الباب بي مثل السقيفة صعدنا بي اني وعمتي ورا وعمي كدام شغلها السايق ومشى

اباوع للشوارع منطقة زراعية بيوت قليلة اكثرها بساتين ومي جاري على طول الطريق؛ الهوا بي برودة ويه ريحة الزرع يرد الروح انتجيت شلت النقاب غمضت اخذت نفس احس خدرت كل حواسي صاحت عمتي نزلي النقاب لج

عمي - عوفيها منو يشوفها خليها تشم هوى

- هيه اشلون لابسته عاد مبينه عوجه ومامستورة بعمرها

مارد استغفر عيونه بالطريق واني اصلاً مويمها تكول عصفور واطلقوا سراحة احس الهواي يلاعب ملامحي

عمتي ملتهية بالبيع كل دقيقة اتصلت بوحده تكلها رايحه للسوگ ماتردين اجيبلج شي وياي وعمي يحسب افلوس الرتب اشكد بقن ويحاول يقسمهن على باقي الايام. واني عيوني تتجول مامصدگة طلعت لحد ماوصلنا للسيطره وكفنا ؛اباوع هواية سيارات منتظرة عيوني تتنقل بينهن كل وحدة تكول للثانية اني احلى منج

اخذت نفس درت وجهي من الجهة الثانية زلم لابسين عسكري كومة واكفين يسولفون داارد راسي وانتبهت لواحد منهم عيونه عليه عاگد حاجبه يباوع بتعجب

حرك شفايفة كأنما كال اسم خفت بسرعة نزلت النقاب اتحركت السير مشينا من گد خوفي وصلنا مسافة مديت راسي لكيته على وكفته عيونه ورانا ؛ من شافني رديت باوعتله مثل الي اتأكد من شي طلع فونه وركض للسيارة ؛ رجعت بسرعة خنست خفت احجي

گلبي يدگ عقلي كله يمه ليش طلع فونه وركض معقولة متهمة وشاردة لو مسوية شي وديدورون وراي

اريد افكر لو اندعي بعد مااعرف ماصدكت وصلت للسوگ ركن السايق نزلنا لزم عمي ايدي دخلنا لمكان كلش جبير كله اغراض وعالم من كد الخوف حتى لو جنت مفكره انهزم بطلت لزمت ايد عمي ودنكت

بلشنا بالمشترى من مكان لمكان اكثر من خمس ساعات وبعدنا نفتر وره عمتي ماخلت شي ماشترته واحنا نشيل احس روحي بهتت لحد ماصاح عمي كافييي صار الغروب عندي شغل هم يالله اوصلكم واروح

حملنا الاغراض رجعنا صعدنا بنفس الشي الي اجينا بي كعدت اخر نفس حتى سالفة الشرطي نسيتها خليت راسي عالكرسي الكدمي وغمضت من التعب

ردينا للبيت مارفعت راسي لمن ضربتني عمتي عرفت وصلنا عدلت العباية شلت الاغراض نزلت وياها عمي اشر للولد حرك مشى يوصله لدوامه واحنا دفعنا الباب دخلنا شلت النقاب دااخلي الاغراض بالكاع واشوف كدامي عبدو لازم صوندة وكاعد عالدرج وجهه عبارة عن نار مشتعلة اجانه صوت صرخت امجد من داخل المخزن يصيح والكعبه اذا مديت ايدك عليهااا اموتك على ايددددي

بعد اريد اتبلعم مااكدر كام اجه اتجاهي وكعت العلاگة من ايدي ونزلت دموعي وصل يم الباب سدها وجر الحبل شلعه

اندارلي سحب العباية نزعها وجرني؛ دفر امجد الباب وصاح لك عبدووووو

دفعني گدامي وكعت يم الدرج دنگ لزم رجلي كمشت ايده همست دخيلك عموو

دفع ايدي وهفني براجدي دك راسي بالدرج لزمته وشهكت

دنگ ربط رجلي ويه الدرج وكام شال الصونده گال اني كلت ماتطلع لولاااااا

امجد - اني كلتلهااااااا لك عوفهاااااا تعال اليييي

-واني الاكوله يمشييييي

كالها ورفع ايده وبلش بالدگ كل صونده اطفر مثل المخبلة اكمز ورجع اكعد على صوندة اقوة

سعديه واكفه تباوع بشماته وصوت امجد رج البيت صيح ويكسر بالباب واني مااعرف اشلون احمي جسمي اضم جهة تجيني الضربة بغير مكان تكتم نفسي اضغط على سنوني وارد اشهگ بضربة اسوء منها اكثر من عشر دقايق انهرط جسمي وهو مستمر لحد مانسمع صوت سيارات وكفت يم بابنا وانخبص المكان

ضغط على سنونه ورفسني بصدري گطع النفس احسه صار نصين همس اشش واشر على ركبته اذبحج اذا طلع صوتج

زحفت بصف الدرج بهتانة لميت رجلية حضنتها وغمضت على ألم الحبل دخل بلحم رجلي گد ماضاب ؛ تفل عليه وراح بعده مافاتح الباب واندفرت دفرة من قوتها طگت طلاكتين على كبرهن

فتحت عيوني بتعب گوه اجر النفس على صوت ضربة بسطال تعصر الگلب واشوف واحد لابس عسكري اسود دخل گد ماضخم شكله يرعب

شافني وگف باهت ؛ احس حماوة الدم نزلت على عيوني دااغمض باوعلي و همس بصوت يكتم النفس رأل …

لاتنسون التصويت❤️