رواية شيء من رصيف الدم الفصل الثاني والعشرون 22 - بقلم Leo Alfatlawi

شيء من رصيف الدم

بقلمي:leo Alfatlawi

بارت الثاني والعشرون

بارتين سوة مثل ماطلبتم ❤️

 
***رئال***

لم يبقى شيئاً مضيئاً ؛  لقد انطفأ كل شيء 

…كال يله  امشي وطلع مستعجل انداريت لصورة هيذام همست اسفة والله ماكدغت لان الفقدته اعز من غوحي ياما اتحمل تعب علمودي يستاهل اضحيله بدنيتي

اخذت نفس استعديت لرئال الجديدة الي گدرت تمسح دموعها وتتخلى عن السوار قبل گلبها

وخرت شعري عن عيوني رحت  ورا لكيته واصل مسافة بس الفرحة واضحة على ملامحه يمشي ويسلم عالحرس مامصدگ  تحسه يريد يحضن الكل گد السعادة

امشي ورا واباوعله موهذا الحيوان الماعنده ضمير  لااا بلحظه تحول انسان ثاني الضحكة مافارگت حلگه وكل الي يصير بوجه يضربه بشقى لحد ما طلعنا  برا استقبلونا الحرس فتحوا باب السيارة لزم الباب وگف عيونه عليه يبتسم ويأشر صعدي

دنگت گوة مصبرة نفسي لااتفل بوجهه گد ماشايلة حقد غمضت وصعدت ؛ صعد سد الباب اتحركت السيارة  لميت جف ايدي اهدأ بروحي لايقل صبري وانكشف قبل لااخذ حق الضاعوا بسببي

اسمعه يحمد رب العالمين اخذت نفس درت وجهي لجام السيارة عيني على الطريق اباوع لمناظر الي بالشارع اشلون تتخطى مثل الحلم گد السرعة النمشي بيها حتى مالحگ انتبه الها نفس حياتي المرت بدون لاافتهم منها شي

خليت راسي عالباب صار منظر هيذام بعيوني من يرجع ويشوفني يم اسماعيل شنو شعوره راح يكون

هزيت راسي مهما كان شعوره مايوصل لواحد بالمية لشعوري من سمعت بموتت صديق عمري

غمضت ردت شي يگرص گلبي اتفاجأت من لكيت داخلي فارغ عرفت كلبي مات بعد ماحس بأي شي ؛ فززني عمي وهو يكول يله بابا وصلنا

فتحت عيوني لكيت داخلين بالكراج اسماعيل واكف يم عمتي ام هيذام ومن الجهة الثانية ضي واكفه تباوعلي بضوجة درت وجهي ماهتميت لان ادري محد يحس بألم الفگد غير المجربه ؛ فتحت الباب نزلت اجه اسماعيل يرگض لزم ايدي ضحك  وگال رجعتيلي واخيراً

اخذت نفس وابتسمت بحقد

عمتي - شرجعها صدگ ابراهيم تحجي ماصدكت من كال اسماعيل ماعونه نخلص من المشاكل ويهدأ الوضع

ابراهيم- ههه ماكو مشاكل ان شاء الله بعد ابشرج رئال حامل

-شنووو ؟؟

-اي حامل وابنج النگس جان ناوي يسقط الطفل حتى يكمل القضية ويرد رتبته

-من اشوكت حامل شعرفنا   من اسماعيل

اسماعيل - ليش اني مووو بعيننج

ابراهيم - لا بابا موقصدها بس تقصد اشوكت صار يعني تفاجأت

اسماعيل - اكيد صار بعد العملية من رجعنا للبيت لان كمت اخذ مقويات

عمتي- ميخالف هم اخذها هسه للدكتورة حتى نشوف

-ماتاخذيها ولا واحد يحجي وياهاااا

-يااا ترفع صوتك بوجهي لخاطر وحدة من الشارع كسرت وجهك ونهزمت

راد يحجي كلتلها مانهزمت اني طلعت بغه يم ضي دانطيها فونها لان نسته عندي وابنج الي دز جماعة اخذوني منا وبعدها جبغني اطلب الطلاق حتى يغجع منصبه ولو اجذب مااستغليت غيابه وسلمت نفسي وتحملت ثلاث اسابيع بالحجز وهم غجع من عغف اني حامل غاد يسقط ابني اتصلت بأسماعيل وهياتني كدامج واذا ماتصدگين اتصلي بي وسألي

اسماعيل - من گلتلكم رئال ماتسويها لو رايده تسويها جان سوتها من زمان ليش بيوم الرد هيذام بس كلكم وگفتوا ضدي

ابراهيم - يله بابا سالفة وخلصنا منها هسه تعال اباركلك

ضحك وراح حضنه بس عمتي تباوعلي بشك درت وجهي صارت گدامي ضي نزلت دموعها عرفتها على هيذام

رد اسماعيل خله ايده وره ضهري دنگ باس راسي وهمس نورتي بيتج

ابراهيم - تنزلون جوة بعد ماكو اصعدين فوگ ارتاحي حتى نحجزلج يم دكتوره اتابع حالتج

اشرت اي

-الصار بعد ماريده ينعاد

-عمو اني مالي ذنب

-الج ذنب لااا مااريد اعرف وديري بالج على الطفل لان هذا الي يشفعلج يمي

-هذا ابني اكيد احافظ عليه

-المفروض اذبح ذبايح على هذا الخبر بس الظروف ماتسمح هسه خليها لمن يجي للدنيا حتى تكون الفرحة وحدة

عمتي- هسه خلي يجي والله كريم

-يله بابا اسماعيل اخذ مرتك وروح خلي ترتاح

ضحك وسحبني طاير من الفرح  دخلنا جوه لكيت  هبة مرت هيذام گاعدة بالصالة والفلبينه  يمها تبرد  بأضافيرها شافتني عفست وجها

صعدنا فوگ تلكتنا هالة مرت ازر شايله ابنها تريد تنزل صاحت يااا شرجعج لج صدگ  عين صلفة

اسماعيل - وخري من وجهي لا اتفل بوجهج

-شنو؟؟

-اي منا وجاي الي يحجي ويه رئال يصير غير شي

-يمه هاي شلعبت براسك ولك مو هاي الي انهزمت وخلتك اسابيع خاتل بالغرفة

-مواني مره مثل رجلج حتى اختل بالغرفة واگابل  الشباج بلكي تمر من گدامي واباوعلها بالختلة

-شقصدك

-قصدي تعرفي بكل ليلة وهو مخلصها سهر بالحديقه كدام شقتها يتراجف خايف لاتحب غيره ويضل مثل الاثول يبجي وراها

-اسماعييل

-انعل ابوج لابو اسماعيل يله وخررري

كالها دفعها عضيت شفتي صعدت دخلنا للغرفة سد الباب قفلها اندارلي رجعت ليورا اشرت وين

-اني وين لو انتي ليش عفتيني

-ماعفتك كلتلك هيذام سوه كل هذا واذا مديت ايدك قسماً بالله يااسماعيل اغجع واذا منعتني  اكتل نفسي 

-لالا مااكتلج بس شنو سالفة الحمل

-حتى ابوك يقبل يغجني الك الي حجزني كل هالمدة وجان ناوي يضيعني لوماكايلتله هيج مايغجعني الك لو تموت

-بس راح يكتشف الجذب ويعرف بيج لسه بنيه

-قبل لايكتشف بم اصدمه بحمل كاذب وعادي نسوي جديد مثل مااكتشفت زوجي هو سبب موتت اخوي  وضيعت البقيه وهسه اني يمه عادي

-لكيت مكالمتج مسجلة بفوني وانتي تتفقين حتى تنهزمين

-وتكوم تنهي عائلة كاملة

-لان احبج ردتج بس الي ماردت عندج اهل غيري حتى تنغصبين وتضلين وياي

-هه وهاي صفيت بدون اهل كلهم غاحوا

-كرهتيني مو؟؟

-لا بلعكس شوفني دااضحك واتصلت بيك حتى تغجعني لذمتك لان اكتشفت انت اعز من اهلي ومااكدغ اعيش بدونك

-واني راح اخليج اسعد انسانه  مااخليج تتندمين ابد واعوضج عن كل اهلج واني صرت زين نكدر انسوي طفل 

-واني مااخليك تلمسني اذا ماتلبسني بدلة ودخلني مكانك واني بأسمك كدام الكل وتخليهم يعاملوني حالي حال بناتكم

-وست راسهم وهسه انزل اكول لبابا يعزم الكل واسويلج احلى عرس

-لا مو هسه

-ليش ؟؟

-تغه اخوي استوه ميت وغاح البس اسود تاني اقلها يطلع الاغبعين

-ميخالف انتظر اشكد ما تردين

-ملابسي بعدهم مكانهن لو شمغتهن بدون اهمية مثل ماسويت بأهلي

-لامكانهن والله شوفي

راح للكنتور يركض فتح الباب صارت السجينة بماعون الفواكه گدامي  غمضت عيوني

لارئال صبري الموت رحمة وهو ما يستاهل غير يرد لنفس المستشفى مال الامراض مذلول

مسحت وجهي فتحت عيوني لكيته صافن بوجهي ابتسمت كال بيج شي

-لاحبيبي بس تعبانه

-روحي سبحي واني انزل اخليهم يحضرولج اكل

اشرت اي

رحت للكنتور اخذت تراك اسود ودخلت للحمام سلقيته وراي ذبيت ملابسي فتحت الدوش ودخلت جوا غمضت عيوني اجه صورته بيهن يعدل بمناظره يأشرلي ركضي بساع ويضحك هزيت راسي بسرعة مااريد اذكره

مسحت وجهي وفتحت عيوني اباوع بين الشامبوات احاول اشغل نفسي بأي شي حتى ابعدهم عن تفكيري

من كد مادخلت صراع بيني وبين نفسي اخذت واحد ماميزته شامبو جسم لو شعر  درت من على شعري وبلشت افرك واني اغني بس ردت اثبت لروحي اني كدها وراح اكمل بدون لايرف گلبي

رفعت راسي اهمس بالاغنيه  واتحسس المي وهو ينزل سكتت شويه انتبهت لنفسي داردد بكلمات اغنية غزوان نفسها نزلت دموعي

سديت حلگي بأديه اثنينهن مااريد يطلع صوت شهكتي اسمع باب الغرفة انفتح عصرت روحي حيل امتص الحرگة

رفعت راسي  اخذت نفس مسحت دموعي - وعد يبعد اختك بدل دمك راح اخذ دم اعز واحد على كلبه وبدل كسرت رايه وراك وعقلها الي ماتحمل راح اكسره اضعافها وادخله مصح ومكان لهفتك للعرس وشوفتها بلبدلة البيضه راح انزف گدام عينه بيها

مسحت شعري دنكت سديت المي رحت لبست ملابسي حتى من غير تنشيف فتحت الباب لبالي هو راجع بس لكيت ضي واكفه عيونها حمر درت وجهي عنها طلعت رحت للمرايه سحبت المشط وكفت امشط بدون احساس بكل قوتي همست والله ماكدرت اكلج

نزلت دمعتي مسحتها بسرعة ورجعت امشط

-هيذام منعني مثل مامنعني اخليج توصلين للبتاوين بس خليت نفسي مكانج ماتحملت منظري بين عالم كاتلين اهلي واني اضحك ابراءه بينهم

عضيت شفتي

-رئال والله حاولت احجي ويا هواي بس هو ماسمع مني اشكد توسلت گال مااتحرك اذا مااخذها وياي كلتله غزوان ماتكدرلهم كلتله راح يأذوك رد تسمع بموتي افضل الف مره ماتسمع اتخليت عنها

جريت المشط جلب بشعري عتيته حيل اجت لزمت ايدي -ضربيني ابجي صرخي سوي اي شي بس لاتوكفين هيج

باوعتلها

-عاتبيني  كولي وعدتيني ورجعتي بكلمتج كولي غدرتي بيه كولي مااريد اشوف وجهج بعد

ابتسمت

-والله حبيتج اكثر من نفسي لو مامعتبرتج اختي ماوگفت بوجه هيذام وطلعتج منا واعرف راح تردين بس ردتج تشوفين بقيه اهلج

همست بكسره خالي البيت ماهمه

نزلت دموعها

-غزوان مات وغايه اتخبلت وغؤيا كتلت بابا وانهزمت

عصرت جف اديه 

-مالكيت كلشي حتى ذكغياتي ماخذيها عافوني وحدي اصاغع  الوجع

سحبتي لحضنها وبجت بصوت عالي خليت راسي على متنها صافنة واني اسمعها اشلون تعزيني واتخيل شكله يمشي گدامي هو وداير وجه الي عيونه تلمع يضحك ويتحركش بيه حتى يسمع لدغتي

دخل اسماعيل وخرت عني مسحت دموعها كاللها شكو هنا

ضي - اعزيها

-على منو تعزيها تره هو واحد تافه وولى

-شنو حكمتك يارب

-ضي هالمرة دخلتي غرفتي مرة ثانية اسحلج واشمرج منا سمعتييي

-لو مارئال بيتكم اصلا مادخله بس لخاطرها اتحملت مغثت شوفتكم وبدل ماتعيط روح اسمع مرت ابوك شنو دتحجي وره مرتك وشناوية تسوي

-ماتكدر كلشي تسوي

ضحكت باستهزاء راحت للجربايه سحبت كتابي  كالت اتصور سقط حقج من هذا

اشرت لا

-التهي بحياتج رئال وعيشيها صح لان محد يستحقها غيرج

-عوفي الكتاب

-لو جنتي رايدته صدگ جان حافظتي عليه ماجان دمرتي داخله بكل برود جنت اظن مضمونه راح يأذيج بس اكتشفت قساوة كلبج  تعادل جبروتة

-ضيعني

-محد ضيعج غير تصرفاتج ياريت تكونين وعيتي لنفسج وتكدرين تكملين عدل وتبتعدين عنه اتصور كافي اخذتي حقج منه

اسماعيل - شدتلغن انتن

ضي - كتاب قديم عندي وكلش عزيز عليه استعارته  لبالي صدگ تحب القراءه وراح تحافظ عليه طلعت تتسلى دمرت اوراقه وشمرته وهذا دتشوفه كدامك ماعاد يتصلح ولا راح تتعالج اوراقه غير بالحرگ والله يبعدك عنه

-لاتضلين تتفلسفين اشكد افلوسه

دترد وجه صوت هيذام من جوه رج البيت رج غمضت عيوني على شي انكسر وصرخت عمتي الي ترست البيت

رادت تطلع ضي ركضت اخذت الكتاب منها باوعتلي بأسف وطلعت سد الباب وراها اسماعيل بسرعه وقفله

رحت كعدت عالفرشة خليت الكتاب بحضني عيوني عليه ونبرت صوت صراخه بأذني هو ويفلش البيت بلا رحمة

تمددت حضنته ولميت رجليه اجه اسماعيل غطاني وهمس هسه يطلع لاتخافين ماياخذج مني

اشرت اي وغمضت اكثر من نص ساعة على نفس الهوسة لمن سمعت صوت طلقة ثارت وصرخت عمتي

كمزت واسماعيل فتح الباب طلع يركض ؛ردت اكوم  وخفت لان اصواتهم عالية ضليت مكاني اتسنط دقايق وصار هدوء صعد اسماعيل دخلت كلتله شكو منو انكتل

-هيذام الكلب رامي ابوي رايد يكتله لو ماملحگين الحرس

-وهسه وينه ؟؟

-جتفوا وخذوا سحل منا غصباً عن ابو راح يعيدون تربيته النكسة

-وابوك تأذى 

-لا وگعت الطلقة بالحايط ااخ اتمنين صدگ واكعة بي ويعدمون هيذام

-يعني ميهمك ابوك يموت اهم شي تخلص من هيذام

-يموت ابوي والعشيره كلها اهم شي انتي محد ياخذج مني تضلين وياي

-اتحبني؟؟

-اعشگج مااگدر اتنفس بدونج من رحتي شفت الموت

-واني هم احبك 

-صدگ رئال

-ماتعغف شنو حسيت من اخذني هيذام مانمت ولايوم تعودت على وجودك بحياتي ماجنت حاسة هلكد احبك بس من شفت نفسي وحدي خفت بدونك

-ماراح اخليج ولادقيقة وحدج وراح انيمج كل ليلة بحضني وماخليج اتحسين بالخوف ابد وشنو تتمنين بس طلبي راح يكون عندج

-وانت تعغف كلش زين شنو اتمنى

-بس يرجع ابوي احجي ويا

-ليش وين غاح؟؟

-ويه الحرس مو تكول بشر التموا الحرس كلهم عليه وماكادريله يريد يصعد يكتلج

-عززه لعد اني شكوو

-خبل يكله لو تخليها جوه الكاع هم اطلعها احركها واكتل ابنك

-هم حظي لعد ليش مايكتلني حالي حالك المهتلف  لو اله تعذيب حتى ياكل جثتي محمصة  البول تيغي يله المهم اني جوعانة

-هسه يجيبون الاكل

-لاع اغيد اكل جوة

-هاا مو

-مو شنوو اسماعيل تغه اني زوجتك ومن حقي اكون وياك گدامهم لو كول اخاف من هيذام

-انعل ابو هيذام كومي يعمري اريد اسمع واحد يحجي وياج

-اي هسه اكول هذا زوجي حبيبي

ضحك مامصدگ كمت لميت شعري وايدي ترجف من القهر گوة مسيطرة وابتسم

خله ايده ورا ضهري طلعنا نزلنا جوه واشوف الصالة صايرة دمار وعمتي تبجي يمها هبة تسكت بيها شافتني كامت كالت مو وليتي وكلنا خلصناا شرجعج

اسماعيل  - اني رجعتها ولو ابنج ياخذها للمريخ هم اجيبها هاااي مرتي والي يحجي وياها مايلوم اله نفسه

-منو مرتك بت البتاويين الخلصت عمرها تمسح جام سيارات وتگدي

-تمسح سيارات عايشة بالبتاوين هالشي راجعلي واني راضي بيها لزمي ابنج عني احسلج

-وينه ابني اتخبل على شعرة وجان مات ابراهيم بيده اخذوا يتماطلون ويا وهو يتهدد ماادري شصار بعقله اول مرة اشوف  هيج حالته

ـ يطبة مرض كون يعوقه ابوي ويشمره جوه الگاع

-يشمر منو جوه الگاع  هيذام؟؟ غير يحرگنا وداعت ازر يطلع ومايرحم احد نسيت من ربطك كدامنا ودار عليك بنزين حسبالك صعبة عليه من يحبسنا ويشعل البيت بينا تعرفه كلش زين گلبه اسود ويسويها بدون لايرفله جفن

-ورئال ماراح اخلي يشوفها لو يموت وراح اعزم الكل وعلن زواجنا واسويلها احسن زفة حتى ينجب ويگعد بعد مايگدر يحجي

هبه - ههه كل عقلك

-اي كل عقلي هاي زوجتي وام اطفالي رضيتوا لولا دگوا راسكم بالحايط

-سمعت بابا شنو كال لو اگللها اني شنو ر…

عمتي- هبببة كاااافي

-لاخلي تسمع حتى تعرف مقدارها لاتضل تزن براسه اخوي

عمتي - مو وقت هالحجي خلينا نخلص من هاي المصيبة بالاول ونشوف ابوج شنو راح يسوي ويا الغضب وهاي سهلة شغلتها اعرف اشلون اكسر راسها كل عقلها جاية من الشوارع تخلي راسها براس اسيادها

باوعتلها تفلت عليه وگعدت ؛ ضحكت هبة بشماته وكعدت يمها  خلت رجل على رجل ؛ اخذت نفس دنگت مسحت وجهي اجت هالة يمهن گوه كاتمة ضحكتها

سحبني اسماعيل للمطبخ دخلنا كال للمساعدة سويلنا اكل

رحت للسنگ فتحت البوري ودنگت مغمضه احاول اقنع نفسي كلها اسبوع اتحملي كملي البديتي بي هذا غزوان الراح يستاهل تنطين روحج مو بس تصبرين على اذيتهم لحد ماتردين دمه

صاح اسماعيل فضيها نفخت بقلة صبر غسلت وجهي ورفعت راسي ارسم الابتسامة على شفتي اجباري سديت البوري انداريت لكيته على وكفته عفته اتجهت للميز گعدت عليه وتربعت اجه يمي كال لاتزعلين

برطمت

-هسه يجي ابوي واحجي ويا يسكتهن وهم اسويلج العرس

-تغه مازعلانة اصلاً مااهتم اعغفهن غيغانات مني لان احلى منهن وزوجي يحبني

- مو بس احبج اموت عليج لعد على شنو زعلانة

-جوعانة

-هسه يجبون الاكل نزلي كعدي عالكرسي

-هئ هنا مغتاحة تعال اكعد يمي وشوف الشعوغ اشلون حلو

ضحك  وصعد گعد يمي گوه لزمت نفسي مااتقيأ  جبير وشكله مكروه وكعدته مقززه مصدگ روحه كيوت ومتربع

جابت المساعده الاكل خلينا بالنص اباوع اشكال بالصنية صارت كدامي صنيتنا الي مابيها بس خبز وماعون بتيته صغير كلنا عينه بي من گد الجوع

نكثت راسي لان حسيت روحي اختنگت مدت ايدي سويت لفة اكتلها اريد احس بطعمها لو نكهتها ماكو وين ذيج الخبزة المخلوطة بحنية جف ماما وتعب غزوان

فززتني هبة داخلة كالت شنو هاي وين كاعدة انتي شنوو ماتكليلي دخل احد وشافج وانت شبيك مسايرها بكلشي

اسماعيل- انتي شبيج شكو هيج متخبلة لو لان اخذوا هيذام سحل گدامج مجتفي  راح تنجلطين

-ههه الي انسحل هيذام متأكد  وهاي انت جنت خاتل وره عمتي مثل الدجاجة ترجف وانتي شنو ماعندج احساس اشكد تسمعين اهاين ماتأثر بيج

هزيت راسي لااا

-اكيد واله ماخذه واحد مثل اسماعيل وطايره بي شترجه منج

-احسن ماماخذة واحد مثل المهتلف وضالة اسحل نفسي وغا وهو مامهتم

-منو مهتلف؟؟

-هيذام ومو بس مهتلف لاا وبول تغي بلا شخصية واله اكو واحد غزن وبغاسه عقل ياخذ وحدة مثلج

-لاانتي صدگ بلا تربية

-وبت شواغع وماعندي اهل وضالة ملطلطة من حجز لحجز

-بس اريد اعرف بابا اشلون قبل يردج بعد مصيبتج

-شايله حفيدة

-ههه ذكرتيني بحفيدة كلج اسماعيل شرط بقائج هنا يتزوج بت عمي ويسجل الطفل بأسمها

باوعلي اسماعيل خايف راد يحجي غلبته كلتلها اي كلي واني موافقة لان متأكدة منه غاح يشمغها جوه حالها حالج بس اسمها متزوجة ويضل مكابلني

-منو مشمورة لج

دخلت هالة كالتها شبيج ضايجة دشوفيها اشلونها حتى خدامتنا انظف منها مصدكة روحها ماخذه ابن اللواء  ماتدري فرينا الدنيا كلها محد رضت بي ههههه

-المهم يحبني مو ينام بالصالة لو اذا دخل غغفتي يتخيلني ذولاك الناس  ويصيحلي بأسمها

-عالاساس عود تحرگين گلبي وبعدين  شنو هذا شعرج اتصور عمره مالايح الشامبو وجهج مامار بي غير المي شبيج داده مو كالوا جنتي تجدين شنو ماعرفتي تشتريلج شي تعدلين نفسج بي

-وجهي وسخ  ولا عايشة بلا كغامة ويه واحد امتاني اشوكت ترضى عنه حبيبته حتى يشمغني وياخذها

-والله وصدگ طلعتي خايسة

هبة - والخايس انظفه هسه يجي بابا والحجي كله يصير يمه دااشوف اشلون خلاها تنزل وتتجاوز بكلامها هيج اليوم لو اني لوهيه هنا

هالة - خلي يرد يحبسها فوگ لو يردها للمشتمل تره اني عندي طفل مااريده يختلط بيهج عالم بيئه هذا صغير يتعلم بسرعه

-الله يلعنها عكرت مزاجي امشي نطلع نفتر شوية

مشت وهيه تباوع بقرف عالاساس ماكو هيج الجمال مكطع بعضه يمهن

لزم ايدي اسماعيل سحبتها بسرعة كال زعلتي

-لا بس اغيد افلوس ولاتكول شنو تسوين بيهن اغيد اشتغي ملابس وكم شغلة حتى افعص ذني الحياية

-اشكد تردين انطيج بس مااطلعين ضي تروح اتجيبلج التردي

-عمتي غجمه وين

-بالمزرعة راحت زعلانه من ابوي لان وقف هيذام وحجزج

دااحجي واسمع عمي جاي عرفت اتلكنه وراح يضيعن شغلي كله ويردني للحبس  بسرعة سويت لفه وخليتها بحلگ اسماعيل راد يحجي ودفعت ضحك وعصر وجهي ضحكت واني ادفع بيده ؛ دخل عمي جان يسولف ويه هبة شافنا سكت وخرت ايد اسماعيل دنزل كال على كيفج بابا

اسماعيل- لاخليج اني انزلج

ابراهيم - هههه ولو كعدتكم مالايقه بس اخذوا  راحتكم 

اسماعيل - هههههه لا بابا نريد نطلع بره كملنا اكل

-الله يسعدك بابا لاتخليها طفر تره هاي طفلة ماتفتهم

-لاماخليها نكعد شوية ونرجع لغرفتنا

هز راسه وراح وهبة ورا تركض وتحجي براسه ضايجه عكسه عيونه بأسماعيل والدنيا ماسايعته يباوعله اشلون فرحان ويضحك بهبالة

مرن اربع ايام واني قليل انزل ضاله مكابله اسماعيل اربعه وعشرين ساعة اشكد مااگدر ادوس على نفسي ادلع واعلقه بيه اريده يوصل مرحلة الجنون حتى ابلش بالناوية اسوي

وبليل احضن الكتاب وانام مااعرف بيمن افكر بأهلي الي مااعرفهم وين وشنو حالهم لو بهيذام الي ما منه خبر ولاواحد يعرفه وين

نايمه بليل انكلب على ضهري اباوع للسكف احس جبل على كلبي  فركت صدري وكمت باوعت اسماعيل فاك حلكه ويشخر وريحه الدرار واصلة للشارع

غمضت بحرگة گلب اتحسف على ذاك الراح جوه التراب بسبب هيج قذر بس ااااخ شنو راح اسوي بيك اذا مابجيت ابوك دم وخليته ينام نومتي بالحجز واني اترجه الموت يوصلني مااستحق كلمة يبعد اخوج الجانت تطلع من كلبة

فركت صدري حسيت روحي مخنوكة بعد ماعندي طاقه اتحمل احتاجيت احد اسولف ويا سحبت الفون دزيت ضيونه كاعده ثواني وصلني مسج منها شرايده

-سلامتج اسفه اذا زعجتج

-نزلي رأل على سالفة ذولاك العالم اني بالحديقة كاعده

-اخاف انزل وعمي يلزمني

-خامدين بالرغد راح صگارهم

-ماكو خبر عن هيذام

-رئال لاتسألين عنه بعد وحتى لو رد لاتوصلي لان اذا لكفج مايرحمج

-عمي حاجزه مو؟؟

-محجوز ؛حر ؛ ديحضر مصيبة ؛محد يعرف بس الي نعرفه اذا رد ماراح يصير خير يله كومي نزلي تره نعست انتظريني بالحديقة شويه وطالعتلج

غلقت الفون لميت شعري اشلون ماجان شلت كتابي مأمنه الكل نايم حتى ماهتميت لملابسي طلعت بالبرموده والبلوزه ربع ردن

نزلت عالكيف لا احد يكعد  طلعت بره هدوء الجو بي لسعة برد ماكو احد رحت اتمشى للحديقة وكفت على الضوه العاكس على لون الخضار الباهت مثل حياتي

رفعت راسي الكمر واضح ابتسمت مااعرف ليش كلما اشوفه  اتذكر كعدته عالسطح

غمضت واجت بأذني صوت صح بعيد بس واضح اغنيه  لام كلثوم  وأبلتك انت ولأيتك بتغير كل حياتي

فتحت عيوني اتلفتت ماكو احد بس الصوت واضح اتفاجأت من الي كاعد هيج وقت

الفضول سحبني رحت امشي ورا الصوت عبرت الحديقة انداريت للجهة الثانية وگفت واني اشوف هيذام گاعد بالگاع بزيه العسكري ماد رجليه امجتف يمه بطالة منكر والجكارة بحلگه مغمض بغير عالم يسمع الاغنيه الي تكمل وتنعاد

غمضت اشكد مشتاقتله اخذت نفس كأنما قريب واشتم عطره

فززتني نبرة صوته وهو يگول وداعت ابني لخلي حتى شم الهوا حسره بكلبج

فتحت عيوني لكيته يباوعلي بتعب عيونه دم جواهن اسود وجهه بين باهت وبين معالم الغضب مخلوطة بي

نزلت دموعي

-هه بعد وقت البجي لاتستعجلين

-بس تانيني اخذ حقي وسوي التغيده

-ااااخ اشكد اتمنيت الرصاصة تجي بيج

-جذاااب

-اشگد ظلمت وغدرت بس ماوصلت مرحلتج ههه تعرفين شنو اليوجع من يكون الذابحك بين  ايديك بس انت عاجز حتى عن عتابه مو اذيته

-كلتلك عوفني اني مو الك من البداية

-قنعيييي قنعيييييي
كالها وكام اجه عبارة عن نار مشتعلة شكلة يرعب اكثر من وضعه رجعت ليورا بخوف وصل يمي لزم ايدي  سحبها ضرب بيها گلبه بقوة وصرخ تعرفيننن بشنووو جاي احسسسس

-لاتحاسبني على ذنب انت سببه

-لاا لاااا اني تركت كلشي لخاطرج سحگت على روس زلم الحجي وياهم يكص ارگاب؛ اتحديت رتب  بس شوفتها ترجف اكبر شارب وگفت بوجه شياطين ودخلت جهنم وتحملت لسعة جمرها بس حتى احميج

-واني حياتي مابيها بس الظلمة

-مو اكثر من الظلام الراح ادخلج بي حذرتج بعد ماتعهدتلج  مااخلي دمعتج تنزل واحرگ شكو واحد يفكر يحجي وياج مو يوصلج 

-وجعي جان اقوى من حمايتك الي 

-لا مو وجعج حقدج  انتي عايشة على الغدر  اشگد گلتله راح تلجمك كلتله راح تغدرك لاتثق  بيها بس ااااااه شكد ذلني ورخصني لوحده مثلج  ماتستاهل اباوع بوجها مو ادخلها واعيش بيها

-لاتحجي على شي انت ماحاس بي

-ههه حددي اي احساس منهن

-تعغف على شنو داحجي

-اتخليتي عن السوار بس حتى تغدريني و تكسرين اخر ذرة رحمة بداخلي حتى تأكديلي انو مااصلح غير للحيونة

-لااااا لان تلاشى بداخلي لان ماتحملت اشوفه بيدي واني افكغ بغيغه لان بعد مااگدغ اتحكم بنبضات گلبي

-تعرفين شنو اتمنى هسه

-تاخذني لحضنك بعد كل  السويته بيك وتگلي عمغي ماغاح اذيج ولا اخلي احد يوصلج

-هههه جا اشكد اني ضعيف وانتي ماتستحقين ؛ روحي رأل كملي مثل ماتردين مالي يمج غير رتبتي  اخذها واردج لنفس قذارتج الطلعتج منها وانعل ابو كلبي لابو هالذلة وداعت كل وكفة وكفتها بوجه الموت لخاطرج لندمج ندم مامار على بشر بالكون

باوعتله دفعني ودار وجهه ورجع دنگ سال سلاحه والقوطية راح  كوه يمشي كد ماشارب حسيت ايد على ضهري انداريت لكيت ضي شهكت جرتني لحضنها كالت جذاب والله لاراح يكدر يطلعج من گلبه ولاراح يگدر يأذيج

-وجعته هواي

-والسويتي هو الصح لان انتي ماتگدرين تعيشين ويه هيج واحد حياته مابيها بس الظلم اخذي حقج من الكتل غزوان وروحي كملي بعيد

-واهلي مقيديني بس اغيد اعغف خبغ عنهم حتى اگدغ اسوي الي اجيت علموده

-راح تعرفين وتاخذين دمج بس انتي لاترجعين للضعف بعد مادستي مشاعرج واثبتي قوتج

مسحت عيوني واشرت اي

-شيلي من گلبج حتى تكدرين تكملين طريقج

-مادخلته اصلاً ولاغاح يجي يوم افكغ بي

-مبين من هذا الكتاب الحاضنته

-هيج جبته لان مجايني نوم كلت اقغه شوية

- اي مصدكتج مثل مامصدگته من دخل مثل الاعصار كتل الحرس كلها ورمه عمي بس حتى يلوحج ويحرگج

-جان صدگ ناوي يحغگني

-هيذام محد يحزر شنو براسه ولاواحد يخطر بعقله  شنو من اجرام شايل هو بنفسه مايحس ولايفكر بالي يسوي

سكتت

دگدگت على متني مثل التريد تخفف من خوفي باوعتلها واخذت نفس ابتسمت بقهر وسحبتني وياها اخذتني للمرجوحه كعدت واشرت على متنها اتخيلتها رايه الگاعدة  مو هيه ابتسمت كعدت يمها  وخليت راسي عليه لميت رجلية لحضني وغمضت احس شي كاتب على صدري اتمنيها صدگ رايه واشكيلها  من الداحس بي

مر الوقت لااني حجيت ولاهيه صافنين كلمن عقلها بمكان بس كلبنا ثنينه بنفس النبض

صار الصبح واحنا على وضعنا حركت روحها وخرت راسي كالت يله كومي سسيد راح يگعد يلگاج ماكو تالي يسويها مناحة

- ماضل شي وغوح الابستله اسود واني لسه ماباجيه عليه لخلي الليل ماينامي هو ويصيح بأسمي

-تره تعلق بيج اكثر من اللازم وصار خطر لاتنسين  مريض نفسي هذا ديري بالج منه

-هذا التعلق كله ماغاح يجي واحد بالمية من الغاح اسوي بي

-شناوية مافهمت

-كم مغه طلگني

-مرتين

-يعني شنو

-شنو؟؟

داجاوب وشفت دسار داخل بلبسه العسكري مدنگ يعدل بسلاحه عفتها وگمت ركضتله من گد مامشدوهه وصلت يمه وعثرت صاح الله يول شبيج

-لكيتهن

-منو هنه ؟؟

-دساغ ادغي بيك زعلان بس بغلات امك بس طمني كلمة وحدة

-ولو ماتستاهلين بس اضل  احسن منج واحسب حساب للعشرة  ولگمة الخبز الماغزرت بوحده مثلج

-اشلونهن

-صوتج لاواحد يسمع وأمني بخير عايشات بمكان يسوى الشمرتي روحج بي الف مرة ولاتحاولين ادوريهن لو تسألين  ابتعدي عنهن استوهن استقرن

ابتسمت دار وجهه وكمل طريقه حسيته مو بشرني هنه بخير لاگلي يله راوينا اشلون راح تردين دم غزوان 

رجعت كعدت يم ضي سألتني شكو مارديت لان تفكيري گله بالراح اسوي

گطع صفنتي ازر وهو يسولف شلت راسي لكيته جاي ناحيتنا بيده فون يخابر ودسار ويا وصلوا يمنا اشر كومن منا

باوعت لضي رافعة حاجبها ورديت باوعتله بعلامة استفهام كمل مخابرته غلق الفون خلاه بجيبه وكال اظن افتهمتن من كلت گومن منا

ضي - اي وشنو يعني المفروض نخاف لو  نكول تمام سيدي ونطفر

-ها حلو كومي رئال سويلنه جاي

درت وجهي اله اشرت شنو  ؟؟

-سمعتيني عدل يله گومي

- ومنو كلك اني اشتغل عدكم

دسار- ضابط جيس حب

باوعتله - وانت لاتدخل احنا اهل بيناتنا

-حي الله الرتب

ازر- شنو بكيفهن هسه يكومن ويسون جاي وريوگ هم

-اترك الجاي وشوفلي هذا راس ابوك اول مرة البسه وانشلع

-هسه انطيك بسطالي

-رحمة الله والديك متريگ خلي لابوك  بس روح استعجلي ابن النظام خلي انلحگ انولي قبل لاينتبهولنا حرام حتى الشهادة مانلحگ ننطقها وياريت لخاطر وحده تسوى

-هيذام شجاي يلعب

- دعبل يااخي اگله كبرنا بطل هالعب يرد بس هالگيم وهاي جايبني يمرمط بيه من يوم الشفته  لهاي وكفتي يم هالشجول ؛ لانعل ابو ذيج الساعة لابو الورطني بهيج شغلة ماوراها بس سحگ الروس

-شعدكم شغل ويه ذباح

-منو ذباح ؟؟

-الي دزيت اوراقه لخاطر اكملهن للافراج

-وانت غبييي اشلون تفرج عن سجين من كيفك منو الزمال اللبسك رتبة

-الوالد

-حي الله الوالد وابنه روح ابني استعجلي الزمال الثاني خلي اولي

هز ايده راح

اندار دسار سحب كرسي مسافة عنه وگعد طلع فونه دنگ يگلب بي شوية  واجوي؛  ازر بيده بسطال وهيذام مدنگ يطبگ برداناته لابس عسكري اسود وبيده لثام وصلوا سحب كرسي كعد بدون لايسلم شمر اللثام عالميز وعدل ضهره باوعلي بعدم اهمية ورد باوع  لدسار كله شسويت

-كملت طلعت الربع ساعة ونجفتهم

-حلو وشغلة دحام

-منتظرين الاوامر اول ماتوصل اشارة نطلع ضل بس صاحب قضية الاسلحة التابع لابراهيم مانعرف وين اختفى

-سلم الملفات وردد الشعار  من الفجر

- كفوو عمك يدري؟؟

-لامنتظر اليوم اكمل شغلة دحام حتى اسفطهم سوة واقدمهم اله مباركة بمناسبة زواج ابنه

-تنطي التابعين اله وترد التابعة الك ؟؟حي الله ابن النظام بس هم ايدك لان الربع خلوها  براسهم مااگدر اتحرك ولااوصلها ضال اراقب من بعيد مثل الاثول مضيع امه يباوعلها ويدير وجهه يصيح وينها

-كلها ساعات وكلمن يرد للجحر اليستحقه  وانت
ازر كلهم خلي يجبولنا جاي

ازر - طلبت هسه يجيبوا

دنگ يفرك براسه مبين عليه التعب  شمر ازر البسطال يم دسار دنگ غير بسطاله بي ورد عدل گعدته انتجه

ازر- بالعافية

-على گلبك وگلب ابوك الحثل ابن السطل امريگني لو منطيني بسطال

-دخلي اتريگ اني بالاول وانوب افكر بيك صدگ هيذام عمتي تكول اتصل ليش ميرد وخلي يجيني اليوم

-درع جبته ؟؟

-لاهسه من اوصل هبة لبيت امها اجيبه بطريقي

-من اشوكت هنا

-من يوم الي اغتالوك جابها ابوي لخاطر ابنها

-حلو ومنو گلك تردها لبيت امها

-شنو يعني ؟؟

- يعني تروح تكلها ترجع لغرفتها تحضر غراضنا  لبين. مااكمل المهمة اجيب دراع واجي لخاطر نطلع للشمال

كالها وكام شال اللثام چلب بداية الميز عته حيل انسحب خيط منه شمره ودفر الميز بقوته گلبه ودار وجهه راح يمشي الغضب والحرگة واضحات عليه من ضربة بسطاله بالگاع

انتجه دسار خله رجلي عالكرسي اليمه اتجتف وباوعلي رافع حاجبه

سويت روحي اصلاً مامهتمة ولاسمعته ضحك بستهزاء واخذ حسرة

شلت الكتاب وكمت رحت للداخل امشي والنار مشتعلة بصدري مااعرف شحس بس حسيته صحاني يگلي لاتتأملين زايد ماشوفج غير رتبة واجه وقت ردتها استعدي ماضل كلها ساعات ويوصل السرة الج

دخلت واسمع هاله تهلل وهبة بيدها الفون تضحك طايره مامصدكة عرفت ازر خابرهم

صعدت فوگ اريد اسيطر على اعصابي مااكدر دفعت الباب صار گدامي اسماعيل كاعد ويمه عمتي تسولف دخلت وسديت الباب شمرت الكتاب ردت اروح للحمام كالت وين جنتي

-يم ضي بطني وجعتني غحت اخذت مسكن منها

-ومنو كلج تاخذين علاج بيكيفج

-متعوده اخذه بكل شهغيه يهدأ الالام

-شنو شهرية ولج شدتخربطين انتي والحمل

اسماعيل- طلع حمل وهمي واني منعتها اتكللكم كلت انسوي واحد غيره خليهم فرحانين

-يااا وكل هالمدة اجذب والله عرفتها من اجت بت شوراع ونكسة وبلا تربية

راد يحجي اسماعيل قاطعته كلتها لو بلا تغبيه مجان عشت كل هالوكت ساكته ومتحملة  ابنكم الي مايعغف من الغجولة بس اسمها وحتى اسمها هواي عليه

-شنو ولج

-اي منو تحمل تعيش ويه واحد جبان  ماعنده كلمة مثل الطفل وحتى حاجته جوا

اسماعيل - منو الجبان وطفل لج

-انت ومو بس هيج لا ومختل مكمش بيه ليل ونهاغ  تبجي وتتوسل حتى لااعوفك وتنفضح

-انتي طالق …

***رايه***

بخاطري اسأل ضميرك حاجتين

لوعكسنا الدور هل ترضيك المشاهد …

اباوع لعيونها يلمعن رفعت ايدي غمضت اتملسهن عالكيف ابتسمتلي گمت بسرعة سحبتها لحضني وصرخت لج مامااا رجع نظرهاااا

حضنتها وبجيت بصوت گمزت ماما مفزوعة باوعتلي شهكت وضحكت سوه بعدت  الغطة رادت تگوم ماگدر نزلت دموعها

وخرت عني رؤيا  راحتلها  كعدت گدامها رفعت ايدها مشتها على وجها ابتسمت وحجت بصوت ناصي اشكد مر بالعمر واني اتخيل اشلون  صار شكلج بعد هالتعب بعدج على جمالج لو كسرت الوكت غيرتج

ماما- وشنو شفتيني بعد السويته بيج

-احن واطيب ام بالدنيا الي اخلص عمري جوة رجليها ومااوفي لحظة من عمرها وهيه تفدي لخاطرنا

-كسرت وجهج گدامه

-صح ماحبج بس يروحلج فدوه هو والدنيا بكبرها الي يباوعلج بتكبر اسحك راسه مو يسمعج كلمة تكفي هاي الادين اشتغلت بالحلال وتحملت التعب والظيم حتى ماننذل لاحد

-قصر بحقكم هواي

-ماقصرتي يام رايه كفيتي وفيتي وصار  الوقت ترتاحين عهد عليه بدل هاي الايد الي انمدت للعالم بعوز تنترس عز  وبدل هالدموع العجز  فرح

دنكت باست ايدها سحبتها ماما لحضنها تبوس بيها وتبجي مامصدگه

زحفت كعدت يمهن رجعت سحبتها لحضني تكول صار دهر ماشايفتها مو رجعلها نظرها احضنها وارد امسح عيونها اتأكد صدگ ردت اتشوف

خلص اليوم واحنا ملتمين داير مدايرها تباوعلنا وتكرر السؤال نفسة عن شكل رئال اشلون صار وترد ماما مو احلى منج لان تعرفها تغار وهيه تضحك تدري بسوالف ماما ؛ تحضن اديها على صدرها تاخذ نفس منهن وتصفن تباوع لوجوهنا اعرف اكو غصة بكلبها تريد تسأل عن رند وغزوان بس ماتگدر

فرحتنا بجهه ونظرات غيمه الكلها حقد وانعزالها بجهه ثانية اني هم ماخربت فرحتي بيها  اخذت علاجي وكعدت بينهن ضلينه لوجه الصبح نسولف ونضحك لحد ماصاح الاذان كمنا صلينا عالسريع وتمددنا يم ماما  وحدة منا وحدة منا  لازمات اديها من گد فرحتنا وتعب سهر الليل رحنا بالنوم بدون تفكير حتى ماذكرنا الراحوا اول يوم انام هيج نومة بعد الصار

…گعدت على صوتها وهيه دغ براسي فتحت عيني لكيتها گاعدة ناثرة كفشتها عيونها تلمع فاتحتهن على كبرهن ولامة حلكها تكول لعبة خربانة بالمعمل صاحت هيي شكو تباوعيلي هيج

-عزة جفلتيني شبيج من الصبح اكو واحد هيج يكعدله بشر

-ليش بس لا حاسبة روحج من المجموعة البشرية لج بابا انتي حگج فزاعة يعلگوها بالمزارع

-عيونج حمر كلش صايرلج شي

-لابس يحرگني ويغوشن شوية هسه يصيرن زينات مابيهن شي

-لعد شكو مگعدتني

-كومي دااگدي بيج

-شنوو؟؟

-ومررض گومي نطلع للشغل

-ياشغل؟؟

-نخطف زلم انجتفهم ونبيع اعضائهم

-عزه رؤيا كل عقلج

-ها موخوش شغل اني هم كلت انتي خوثه مومال هيج شغل لعد اني اصيد جلاب وانتي فتحي بسطيه مال كباب ومعلاگ بس هاا حصرياً للزلم

-لا انتي مو طبيعية

-يوو تره حيرتيني وياج تركج من ذني الحجيتهن نشتغل قاتلات مأجورات اي وحده تريد تكتل زوجها نروح وبالبداية نسوي عرض

-اي كل اثنين الثالث مجاني رؤيااا گومي من يمي

-شوفي لج مال تعبانه وههه وعوفوني ماكو شوفيلج غيرها لازم نشتغل حتى نطلع منا نأمن ماما بمكان وندور رئول ونكتل زوجها ونتفل بوجه دسار

-وهم تكتلي بنتي ليش متعقده من الزلم

-مو معقده بس همه حيوانات مضره بالمجتمع لازم نتخلص منهم ابتداءً  من ابونا  لاخر حثالة بالدنيا

-ياابو منهم

-ديله عالاساس الاول مگطع روحه هسه يطلع خاتل ماميت كل هالفترة ويسويلنا سبرايز مثل افلام هوليود ويجي يركض ودموعة تجاره من الصوبين مثل نافورة بيت خالي العطلانه واحنا نتلكاه نبجي ونصيح باباااا اين كنت كل هذا  الوكت لقد تمرمطنا

-اي ونحضنه ونعيش عيشه سعيده

-لااكيد انكتله لعد واحد ناقص مثل هذا يورط هالمكروده بجوم بنات كلهن  عطلات الي بلسانها والي بصفنتها والي حلوه مثلي العالم كلها تركض وراها

-لاوالله بعرمه وخبله ومابيها اي منفعة

-انجبي مارد عليج اختي الجبيرة

-خليتي اخت جبيره سحكتي بالعمر وتركي الشغل هسه خلي ماما تطلع ادور مكان نسكن بي بالبداية وبعدين نطلع لان لاگشني گلبي من غيمه

-ماتگدر كلشي تسوي جاسم واخته طالعين من المنطقة صار اكثر من اسبوع وحتى ارقامهم مغيريها

-شعرفج

-سمعتها تحجي ويه المشعوذة كلتها انهزموا بسبب الدين العالم مخبوصة عليهم تريد بس تلوحهم وهمه ماكو مختفين محد يعرف يامحافظة طفروا

-ميخالف هم لازم نطلع من المنطقه هاي

-على جثتي وجثت ذباح

-وذباح شكووو

-عوفج من دروغو ماما ماتكدر اطلعنا بدون افلوس ومال اخليها ترد اتمد ايدها شيليها من راسج لو اعرف اشتغل بالمجاري

-عگروگ

-اشبي اسماعيل ياسين  گومي كلش مالايكلج التصنيف انتي حدج تفتحين حلگج وتركضين مثل البريعصي بالغرفة لاحگي بنعال

-ديله الي يسمعج يگول ماكو هيج جمال همزين جنج فلم اللعبة

-والكعبه اخبل هسه شفت وجهي بالمرايه كلت الله يساعد ام رايه على هذا الجمال  اكيد سبب حسدها بسبب شكلي صدگ ولج مااسوي كمين للزلم واستدرجهم للبيت اشوهم واطلب فديه من اهلهم

-قفلت ياربي قفلت عالزلم

-لعد شنو اشتغلللل

- رؤيااا الدنيا كلها شغل

- اي هم صدك شنو رايج  اشتغل ويه الدولة خو خوش شغلة

-اي شنو تشتغلين

-افخخ بزازين وادخلهم عالقاعدة افجر الارهابيين

-عفيه واتفقي وياهم  تاخذين عالجملة ربي شنو حكمتج من رديت نظرها

ضحكت ماما فتحت عيونها كالت حتى تسندجن

رؤيا- مو ماما كليلها والله ماصاير بعينها

-يصير يبت رافد

-هم بالراء اتمنى رئول تتخطى

-اذا اتخطيتي انتي السويته بيج البارحة هيه تتخطى

-من راواج شكله بالاتصال جان يوصلج اشارة بس انتي مالكفتيها  وبعدين كله حيوان لفو خاين على شنو مهتمة يروح فدوة لتراب رجليج اصلاً مو براسي

-جذبتي يبت الدغش

-ماطولج تعرفيني جذبت انطيني الفلوس الي جبتيهن البارحة وقبل لاتكولين ماطلعين وفري كلامج لان راح نطلع اني وراية نشتغل وانتي اطلعين دوريلنا غرفة لخاطر نعرف نعيش عيشه نظيفة بدون ذل حتى لو ضال اخر كم يوم بعمرنا اقلها من نموت مانصير مضحكة للكفار هم عيشة گشرة وهم نار جهنم

- سودة بوجهي هم نار جهنم وهم اكابلج ليش  شنو مصخمة بحياتي

-وانتي شكو لاحگتني حتى هناك الله واكبر لزگه

-شنو ولج لزگه

-تعريف للأنسان الطيب الي يحبنا ويتبعنا بكل مكان بس احنا موخوش اوادم لازم نلقبه بلقب وسخ مثلنا

-مايصير براسج خير ابد

-اي عفية وهذا الي اريد اوصله الج عوفيني مالج شغل بيه  حتى لو شفتيني الم حطب ويه ام جهل بنار جهنم ديري وجهج لاتحجين وياي

-رؤيا من الاخير طلعة بهيج منطقة ماخليج اطلعين

-لاماما فدوه اروحلج وانتي تعبانة لا تكدرين تشتغلين وهياتنا گدامج لاعدنا ندفع ايجار ولا عدنا لگمة ناكلها والله نحافظ على نفسنا ومنخلي احد يوصلنا بس فترة لحد مانكدر نأجر غرفة بعيده ونلم افلوس حتى لونفتحلج بسطية صغيرة تسترزقين منها

-ميخالف اني اطلع اشتغل

- بس جربي اليوم تره اكو خياط براسي لازم ينشال وعيوني يحرگني لازم اشتري قطرة من غير علاج راية ماما فدوه اروحلج لا توكفين بوجهنا راح نتلثم حتى محد يعرفنا وماندخل للمنطقة اذا ماتجين انتي ورانا

- شنو تشتغلن؟؟

-نمسح جام سيارات ونبيع مي الجو تغير يمشي المي

باوعتلي ما تعرف شنو تحجي لان صدگ معتازين افلوس وماعدنا اي حل هاي من غير رئال لازم نستقر اسرع وقت حتى ندورها

اخذت نفس عيونها عليه تباوعلي بحيره ابتسمت واشرتلها اي

-اختج مو عاقلة

-اني اديري بالي عليها

-وانتي تعبانة

-اقوى بيكم وبرجعة رئول بحضني

-توعدني ماترحن للبيت من وراي

-ماراح ارجعله بعمري لابعلمج ولامن وراج

-وانتي غيمة عمه ماتكومين وياهن حتى أمن عليجن اذا صفيتن سوة

غيمه - بعده اربعين اخوي ماطلع وصارت نيتج اتشغليني

- لاوالله يعمة علمودج اريدج اطلعين تشوفين ناس ترتاحين

-اني اعرف اشلون اعيش براحة  بس فوتي حالي

كالتها ولفت راسها دارت وجها للجهة الثانية رادت تكوم رؤيا لزمت ايدها خزرتها بطلت كيفت لبالي سمعت كلامي بس نظرتها الها وابتسامتها رعبتي حسيت وراها شي جبير وهاي لهفتها للشغل بس ربي ينجيها منه

كمت غسلت وجهي اخذت العلاج لان احس خاصرتي بلش الالم يملخ بيها بس مااگدر احجي لان لازم اطلع للشغل

اخذت المشط ورجعت كعدت كدام ماما اخذته مني اجت رؤيا تركض دفعتني وكعدت مكاني ضحكت وماما اشرتلي عوفيها

تذكرت هاي حركت رئال طلعت الحسره من كلبي شنو حالها هسه هم تذكرني لولا هم درت غزوان مات لو بعدها تتأمل تحضر زواجنا ونسمي بتنا على اسمها

ضربتي ماما بالمشط على رجلي كالت كومي يله حتى اطلعين ويه اختج

عرفتها مو من كلبها اطلعني  بس تريدني انسى شوية ما تدري ما نام اذا مااقنع نفسي منتظرني بالحلم

كملت شعر رؤيا كعدت مكانها هم مشطتلي وضفرتلي گمنها غيرنا ملابسنا وتلثمنا انطتنا افلوس وهيه خجلانا  لان مصدرهن يكسر الضهر سحبت ايدها بستها وهمست مكانج عالي بعيونه ام رايه

هزت راسها ودنكت راحت لبست عباتها طلعت قبلنا صح متأكدين محد يعرفنا وهيج وقت شكو سگط  نايم من غير جاسم طلع من المنطقة بس للامان

رجعت كالت طلعن بسرعة طلعنا نتراكض ملثمين هيه تمشي وتتلفت گدامنا واحنا وراها مدنگين كل شارع ندخل بي ياخذ من حيلنا گد ما شكله يرعب من غير الاصوات التطلع من داخل البيوت تحس نفسك داخل حلم مابي بس شياطين ؛  نص عمرنا خلص لحد ماخلصنا المنطقة

وكفت باوعتلي وكالت ترحن يم المركز

-ماما تره خلصنا عمرنا نشتغل ليش خايفة

-ميخالف  حتى أمن واني راح افتر بلكي احصل غرفه نستأجرها بعيده عن المنطقة

-الله يسهل وقبل المغرب انتظرينا هنا

-خوش يله توكلن وعين بهاي الرعنه وعدلن اللثام ولاتحجن ابد حتى لايعرفوجن بنات

اشرت على عيون لزمت ايد رؤيا الي على طول ساكته كل عقلي صدگ خايفة من الشارع اثاري بس تريد تأمن ماما ؛ مشينا مسافة شوية بس عبرت ماما  قبل لانوصل للشارع تركت ايدي ونزعت اللثام طلعت گصيبتها شمرتها وره ضهرها وكالت انطلقي

-صدگ دتحجين

-اشش ولااحجاية نزعي وصيري مثل البشر استمتعي بالحياة وانتظري هنا اروح اجيب ملمع من الاسواق واجي لاتتحركين

بعدني ماحاجيه رگضت فتحت حلگي على خفتها بغمضة عين دخلت للاسواق

وگفت صدگ حسيت روحي اختنكت وعلى شنو ضامة وجهي منين خجلانا اشو عمر وخلص ومستقبل انتهى

نزعت للثام طلعت گصيبتي ورا ضهري خليت اللثام على ايدي اجت رؤيا بيدها شدة ورد  وثنين سجاجين خلت وحدة وره ضهرها جوه ملابسها والثانية انطتنياها

ضحكت اخذتها سويت مثل ماسوت مدت ايدها لزمتها كالت هسه شنو يامرت العزيز

-مانخاف بعد ولانخجل

-وبعد

-ننطلق بكد الله مامنطينه عمر

-مم

-ورئول نردها من نص عيونهم

-هسه اكول صدگ انتي اختي

-وين الملمع جام

-هيه مال ملمع بهالزلگ دتعالي نبيع ورد وشوفي الشغل على اصوله

سحبت ايدي رحنا الصبح استوه صاير السيارت طالعة للدوام رحنا نفس مكانه لكينه مره مفتحة بي تبيع بنزين سلمت وكعدت  على كتر شوية ارتاح

شمرت رؤيا اللثام يمي اخذت الورد وانطلقت  اباوعلها بين الولد تتزابگ عكس رئال جانت ملثمة وتتحرك بخوف مع العلم مامبينه جانت بنية

الشارع وسخ وبس ولد ماكو بنات هاي اول مرة تصير الكل متفاجئ  هيه حلوة وصغيرة ورعنة  تكول الكار كارها وهيه ام المكان ركزت عليها عيونها بين السيارات تصيد شكو وحده بيها ولد وبنيه بثانيه  تصير كدامها تقدم الورده من جهة الولد حتى تحرجه

ضحكت واني اشوفها تأشرلي بالخمسة غمزتلي وراحت تركض لسياره ثانية

للظهر واني گاعدة عيوني بيها لان ماعندي شي اكوم اسوي عرفتها متقصدة رادت بس اطلعني من الحزن  لحد مااجت بيدها لفات كعدت تنفت كالت كولي اختي مابيها فايده

-ماطول صار عدنا افلوس انمر عالمستشفى تشيلين الخياط وتسوين مفراس

-هو مضمد ماغيره يعجبج او لا واذا بيج حظ كولي لااا شوفي ذاك الاسود صار صديقي بس أشرله اخلي يعدل ملامح وجهج

-عزه بعينج اشوكت لحكتي تصاحبين

-بنتي احنا بالشارع لازم يكون عدنا ايد بكل جهه نلتفت بيها ونكون  مستعدين للهجوم  قبل لا يفكر العدو بسحب السلاح

-امم جانت عازة وكملت بدسار

-اقلها علمني شغلة قبل لا يولي

-متاكدة

-ومنتظرة اشوفه  بس حتى اغسل وجهه بتفلة واگله مو خرزة البتاوين الي تباوع لحيوان  لفو خاين مثلك

-ومنو هاي البارحة الي عيونها تتنقل من الدرج للفراش للباب وتبتسم  كأنما تذكر حدث بيهن

-يله كملي اكلج لان الورد راح يخلص لازم نجيب غيره

-رؤيا بيش دتبعين الورده

-حسب اذا وياهم اطفال  بألف واذا عشاق لابخمسة

-مكسورة الرگبة هيه وردة نايلون ماتسوى ربع خمسة اشلون ؟؟

- التقفيص مهنة لايجيدها غير العظماء

كامت راحت بيدها كم وحدة  تفتر بيهن  اباوعلها صدگ توكف تخازر بشيطنة  تلكف الزبون عبر امتار اطير تصير بوجهه ؛ اكتشفت اختي موطبيعية تمتلك خفة وتفكير مايخطر على بال احد

للعصر كملت كل الورد اشرتلي يله كمت اتلثمنا رجعنا لنص الطريق لكينا ماما منتظره ويمها تكتك من خوفها لفلفتنا وصعدتنا والله لو تدري جنه بدون لثام جان حبستنا

رجعنا للبيت دخلتنا تهريب تكول مخدرات مو بشر  كعدت تسولف على غرفة محصلتها بس اجرتها غاليه وهم قريبه ماتفيد

مر كم يوم  ماما ليل ونهار دور شغل ومكان نسكن بي  ؛ رؤيا عارضت تروح للمستشفى اكتفت بالمضمد وغيمة على مكانها تشتغل ويه المشعوذة بالطلاسم

نطلع من الصبح ما نرد غير المغرب صح خوش افلوس بالورد بس خفت على رؤيا لان طفلة وحركة خلال فترة قليلة  كونت صداقات كومة  ويه الي بعمرها  وعينها بيهم تلگط شكو شي اعوج العفطة والتفلة والتجاوز تحولت الى شاذي ملون صارت صدگ تربية شوارع ماتنجرع والي داعيه عليه امه يتحارش بيها بعده ماشامرلها كلمة تشمرة بتفلة

كمت ادير وجهي من تصير مشكلة  اني اخاف لان ذوله ولد شارع شما اسوي مااكدرلهم وهيه ولا كأنما اطفر والفزعة مااعرف منين تجيها الكل يلتم ويصح حيووو بثواني يطلعوها من اكبر مصيبة ويردون للشغل ولاتكول صاير شي

مرات اضوج ومرات اضحك بالاخص من اشوف طفولتها المهدوره وتصرفاته الي ماتسيطر عليها على ساعة تجيها الحالة تلزم ورداتها وتفتر بيهن داير مداير وروحها  طايرة من الفرح على شنو ماادري

كاعده وكت العصر  مجتفه صافنة بالطريق وقت جيت غزوان تعبان اديه كلها مشخطة وملابسه متروسات رمل  بس يحاول مايبين هالشي يعدل بنظارته ويبتسم  حتى لايحسسنا بالدنعيشه

تلمست مناظره بصدري غمضت مر شريطة  من خلاهن بيدي وگال  يجي وقت تذكريني بيهن فتحت عيوني  نزلت دمعتي عصرتهن  صدگ رحت وعفتني هيج وراك عايشة عالذكرى

صارت كدامي نفس السيارة سودة  بسرعة مسحت دموعي عيني بيها عدلت گعدتي اترقب حركته هم وكف نزل الجام واحد ملثم بأسود عيونه على رؤيا هيئته وعيونه يذكرني بدسار

على طول ماالسير متوقف هو يباوعلها اشلون اطفر بشيطنتها من سيارة لسيارة والضحكة تارسة وجها
انتبهتله مرتين اشترى منها ورد بدون لايحجي بس بالمرتين يختار الوقت ويه اشارة المرور حسيته متقصد حتى ينطلق بدون لاينطيها افلوس ويخليها اطفر ورا من القهر

شكيت بي هو وستبعدته لان مامهما صار مومال يتخلى عنها هيج

صار الغروب اجتني تسحل بروحها  كالت متت تعب وهسه ماما نلكيها ناصبة مأتم لامه نسوان البتاوين وتلطم على حسناواتها

-تره كلش تأخرنا اليوم

-هو هسه وقت العشاق والبيع الصح المهم يله كومي

-ماعدنا خبز لازم نمر ناخذ ويانه

-واجيب جبس بالطماطة

-اي رنود تحبه

-رنود ماموجودة

باوعتلها بكسرة 

ابتسمتلي بوجع؛  نزلت دموعي دنگت  خلت ايدها على شعري وهمست وداعت هالدموع لاخذ حقها من عمرها  وكلام الله اخليها  تتوسل بربها ليل ونهار حتى ياخذ روحها بس صبريلي شوية

-اشتاقيت لرئول

-ماضل هواي الصبر حلو يامرت العزيز

-هم يجي يوم اشوفها وشمر همي بصدرها

-وتشكيلها من غزوان اشلون غدر بيج وعافج وتاخذين عزا منها الي لحد الان ماترضين تاخذي من احد   

-لان ادري محد راح يحس بوجعي غيرها

-ولا وهيه تحب احد غيرج 

-لاتحب غزوان اكثر مني

-وهذا الي زايد خوفي عليها اعرفها راح تفقد عقلها   اذا سمعت بخبره وتضيع نفسها بدون وعي

-يعني انتهت  اخيتي

- ماراح اسمح لوحده منجن بعد تروح مني بس صبري عليه لبين  مايطلع ذباح اخليجن يمه ؛وروح الراحت وهيه بحسرة الخبزة لرد اخذها من نص بيتهم غصباً على اكبر شارب بيهم اخليها بحضنج وارجع للحيوان احرگه بطريقة ماتمر براس شيطان

-رؤيا شنو دتشوفين

-ظلمة وتعذيب ودم

-وذني ماوراهن غير الموت واني ماعندي بعد قوة ادفن احد

-عود لادفنوني شمروني بالزبل  بس امانه اذا شفتي دسار تفلي بوجهه

ابتسمت

-ليش تضحكين

-شنو تتمنين رؤيا

-اتمنى ادير وجهي هسه واشوفه وراي

-شنو راح تسوين

-اركضله اهفه كله واللزمه من شعرة امسح بي ماخلق الله من گيعان واتفل بيدي امسح بيها وجهي لان ثقيت بواحد سگط مثله

-لعد شكد نيته سوء الي ربي ورطة بهيج وحده

-ومن اغلط تكولون مامترباية  كومي رايه

ضحكت

مدت ايدها لزمتها شلت اللثام وكمت خلت ايدها على متني وسحبتني مشينا عكس طريق بيتنا حتى نجيب خبز  خلصنا الشارع دنندار وشحطت سياره مضللة  بكل سرعتها كدامنا جريتها بسرعة كوه سيطرت ماوكعت

دا اسألها  تأذيتي مالحگت وهيه تشمرت الورد عليه؛ ركضت طايره للسيارة دفرتها بكل قوتها دگت الجام حيل وصاحت افتحهااااا لك

ركضت سحبتها دفعتني وردت دفرت السيارة بقوى اكثر وصرخت افتحها اااااا

نزل الجام الولد الملثم اباوعله دسار نفسه ردت احجي خزرني وندارلها اشر شكو

رؤيا - لاسلامتك ماكو شي من انت مابيك خير تسوق عدل تصعد سياره ليشششش

رفع حاجبه

-انزل لك لا تضل خاتل جوه حتى اعلمك اشلون الحجي يصير

حرك ايده كدام حلكه بمعنا اني اخرس

-حلوو انت من هذا النوع وتعال لك انت مو  نفسك  التبوگني كل يوم بله شكلت لروحك من تاخذ الورد وتنهزم ماعرگت گصتك

هز ايده بأستهزاء راد يسد الجام بلمح البصر طلعت السجينه من ظهرها طكتها ودخلت ايدها نبتتها بركبته - حركة وحده انحرك منو انت لك اطلع بالنضيف

فتح عيونه على كبرهن

-منو دازك وراي شكو لاحكني

اشر ماكو

-هاا صدكتك شوف لك تروح للدزك واكيد من حثالة الجانوا يركضون ورا اللفو  كله لاتعرف مكانه وين ولا تريد  تعرفه  من الاصل لان مامعوزة حيوانات بحياتها  سمعتتت

اشر بعلامة استفهام مافهمت

- اهوو  اشلون شغلة هاي اسمع حباب هالمرة راح اعبرها لك بس مرة ثانية اذا لمحتك داخل الشارع مو اشوفك  گدامي هاي خلقتك المرعبلة اسويها  طشار وعود انزع اللثام بلكي احس صدگ رجال ومشاعر الخوف تتحرك يمي يله ابني رد لماما وابتعد عن هيج شغل بعدك طفل

هز راسه اي

دفعت وجهه حيل انضرب راسه بالكشن سحبت السجينة واشرتله بايدها يلااا حباب

هيه تأشرله  واشوف الولد اجوي كلها تركض الي يگول شكو والي صار گدام السيارة  والي دنگ شال طابوگة ؛ طفر واحد منهم وجهه كله شخوط مصلبخ صاح  اتحرش بيييج احجيي

-لا متيه دليته طريقة

-رؤيااا عليج سيد مالك گولي وداعت امي هسه انفلش سيارته و نربي الج بسسس احجيي لاتخافييين

-عيب واني خرزة البتاوين اخاف من هيج واحد مخلصها صفنات خاتل وره اللثام تركوا اعتبروا زعطوط وغلط  هو بعد مايعيدها

-اسمع  لك هييي انت تاخذ المحروسه الجاي بيها  وتولي منا اذا شفناك بعد بهذا الشارع مو واصل يمها ماتريد روحك سمعت

عدل ضهره عالكرسي اتجتف يتسنط

-شنو لك مستهزأ  شوف هاي المزعطة التارسة الشارع اشارة وحده منها اتخليهم يسحلوك ويطلعوك منا بالزياجة

اشر وبعد

-ردت اعفطلك  بس فشلة من الخرزة واگفة - اندار لرؤيا كلها زيجيله انتي

بعده يحجي ركضت صميت حلكها حيل وهمست لادخيلج

اباوع لدسار گوة كاتم ضحكته مبين من عيونه  وخرتني  طگت  السجينة سدتها ودفرت باب السيارة  صاحت يله لك ارول ازحلك مناااا

اندارت للولد خلت سجينتها وره ضهرها وكالت صلبوخ الوردة ماتقصر مردودة 

صلبوخ- عد يناج رؤيتنا انوصلج للبيت

-لامايعتاز قريب بيتنا منا يله اودعناكم شباااب

اشروا كلهم وهمه يطافرون سحبتها ومشيت تركت دسار يباوعلها وكوة مسيطر مايضحك

رحنا للمخبز اشترينا خبز واني بعدني ماخذتني الصفنه بين دسار ليش مايرد يظهر نفسه كدامها وبين  اختي الي مااعرف اشوكت صارت عدها هلكد شعبية صاحت شبييج

-مرض منيلج هاي السجينة

-اخذتها من صلبوخ ذيج تعيقني بالشغل

-رؤيا انتي بعد كم يوم تكومين تسلبين

-وليش لا والله فكرة حلوة بس كون احصلي واحد كفو عليه الاعتماد يشوفلنا عالم  معدلة نجفتهم

-يمه وين جانت هالمصيبة مضمومة

-يله لج  امشي ظلمت كلش خطية ماما هسه تلكيها لازمه الشارع

-كله من وراج اشكد كلتلج تأخرنا ماسمعتيلي

-لاتخبصيني هسه ادخلج من طريق يختصر نص المسافة بس فضينا

اخذت علاكة الخبز شفت عارض خبز شكر ردت اشتري  وتذكرت ورانا اجار الغرفة من غير الاغراض الي لازم نشتريها حتى نگدر نطلع

بطلت شلت العلاكة ورجعنا خلصنا الطريق دخلنا بشارع اول مره ادخل بي بيوت مهدمة والفرع ضيگ وهدوء من غير الظلام مغطي على كلشي

امشي  امدنگه عقلي مشغول ليش  خزرني معقولة استعر منها لان شاف ماما تگدي بس لا عيونه عليها جانت كلها لهفة امنيته ينزل ياخذها لحضنه

اخذت حسرة ورفعت راسي على صوت فتحت باب بيت ؛ وگفت متبنجة عصرت جف ايدي رؤيا واني اشوف

بابا گدامنا  طالع هو ابو طبر …

لاتنسون التصويت ❤️