رواية شيء من رصيف الدم الفصل الحادي والعشرون 21 - بقلم Leo Alfatlawi

شيء من رصيف الدم

بقلمي: leo Alfatlawo

بارت الحادي والعشرون

بارتين سوا مثل ماطلبتوا ❤️

***رئال***

عيوني  عالبيت صافنة على دراجة غزوان الضحكة بين شفايفي ودموعي جامدة بعيوني مااحس بأي شي دنگ الشرطي لزمني من ايدي كأنما  صحاني لزماني شلت راسي گال كومي وياي

ضحكت

-شنو اتخبلتي اكلج كوميي

همست شوف هاي دغاجته

-ادري يله طالبيج بالمركز

- يعني صدگ غاح وعافني زين اشلون يغوح بدون لايودعني واني جنت احسبله يوم يوم يجي يخلصني ويغجعني بين خواتي

-الله يرحمه

-لالا اسم الله على گلبه لاتكول الله يغخمه والله غايه تتخبل يعغفنا مانگدغ نعيش بدونه

-يااسم الله بويه شبع موت الولد دگومي

احس كلمته دخلت بكلبي مثل الرصاصة خليت ايدي على صدري غمضت صار منظره كدامي هو ويعدل بمناظره عيونه تلمع من ورهن يباوعلي ويبتسم بحنية

حسيت ايد على متني فتحت عيوني الشرطي يأشر  يله نزلت دموعي بخيبة اريد أكله كومني مااگدر لساني ثگيل

دنگ سندني عليه كومني لزمت الحايط وگفت عيوني داخل البيت احس روحي جوة بعدني  وصوت هوستهم جاية من فوگ وراية واكفة بالطارمة تأشرلي يله دخلي

وخرت ايده راد يجرني دفعته ودخلت اتحرك بخدر وصلت للدراجة خليت ايدي عليها  مشيتها بهدوء وابتسمت-  ها يبعد اختك هيج يغزوان تروح وتخليني وراك مكسورة لعد وين بت گلبي وين ام لدغة الي اسمي بنتي على اسمها لااا غزوان ادري بيك ماتسويها تدري روحي متعلقة بيك

عصر مكان گعدته حيل ودرت وجهي صار الدرج گدامي همست  تذكر من جنت توكف هناك تأشرلي نزلي بساع حتى تاخذني بالختلة تفرني بالدراجة هه ترا جنت ادري بيك تعبان بس احب اخلي اديه بظهرك حتى احس بحنيتك علينا

زين اذا جنت  ناوي تروح لااا اسم الله من عمري على عمرك اني ماعندي احد يبجي وراي بس انت وراك راية تموت اخيتي اعرفها

صاح الشرطي يله فضينا

وخرت ايدي عن الدراجة وكفت اتلفت بس اني بالبيت المكان وحشه خالي مابي نفس الغرف ظلمة وهدوء

عيوني انتقلت من الاستقبال هو واكف فاتح اديه يحمينا ورا ظهره حتى الضربة توگع بي

للمطبخ يضحك اشلون اسويله عشه بعد ماتنمر  عليه وبجاني

ضحكت ودرت وجهي للباب منا جان يدخل مبين التعب على وجه  بس الفرحه تارسه روحه وهو يشوفنا كدامه وحدة تجر الثانية من گصيبتها  ياهيه الترگضله اول وتاخذ معزته

عيوني صارت على غرفتنا واسمع اطفر رند وصراخ رؤيا عليها  رف گلبي بدون شعور مشيت دموعي تنزل بتوسل متأملة اوصل واشوفهم كدامي مايطلع الاسمعه وهم

صعدت الدرج وصلت اللغرفة ردت ادفع بابها ايدي رجفت بخوف غمضت وحركت الباب انفتحت عالكيف ويه كل حركة منها ذكرى

اجتني ريحة الجاي عالصوبة وصوت غزوان يگول لراية  عوفيها تقرا اني اسوي الاكل لاتضلن تتعاركن

فتحت عيوني لعد وينكم اني ليش واكفة وحدي

دنكت قمصلته بالگاع مشمورة بلحظة حيلي راح ردت اوصللها ماگدرت روحي اختنگت گعدت بالگاع مهدودة

حسيت ايد الشرطي على متني شلت راسي لكيته واكف وراي  اشرتله عليها  بترجي ردت بس يجيبها الي اضمها بحضني واشم ريحتها لاخر مرة

دارت الدنيا بيه صارت ظلمة غمضت ماحسيت بعدها

…راسي يفتر اصوات عالية حركة رجلين تروح وتجي اريد افتح عيوني ثگال رجعت دخلت غير عالم دقايق وردت الاصوات اقوى وصوت صراخ قريب فتحت عيوني بتعب صار گدامي ضرغام عرفته من صوته واكف يسولف ويه  عمي ويمهم كومة حرس

احس راسي خالي دااغمض وانتبهلي عمي ضغط على سنونه  لم جف ايده بغضب  واجه طاير دفرني بقوته وصاح صحيتي يبت القذررر  حسبالج مالوحج

نزلت دموعي

-على شنووو تبجين بت الكلببب اذا ماخليتج عبرة لكل عاهرة وندمج على الساعة الفكرتي بيها تنهزمين مااتسمى عالزلم ولج اني تالي وقتي وحدة مثلج لا اصل ولا اشرف تلعب عليه وتنزل راسي

همست بغصة مات غزوان

- يطبه مرررض

-لاسم الله على گلب اخيي

-انعل ابوج لاابو اخوج لو مانكس مثلج ما يموت هيج موته مال جلاب يله كومييي لج

خليت ايدي على گلبي غمضت لعد ليش ماحسيت بي من صابته الطلقة لا حسيت اي جنت وكفة يم الشباج  وكلبي لجمني 

-موياااج گومييي

-جنت كل يوم اعاتبه ليش مايتصل لبالي ناسيني ماادغي ميت جنت ناوية بس اشوفه اگله زعلانه منك مااحجي وياك بعد بس جذب والله اول مااشوفه اغكض لحضنه واشكيله على كلشي حسيته بدونه

-انتي خبله لو شنو تسمعيني شنو الغييي

-يعني شنو بعد مااشوفه يعني من گلي اخذي خواتج ونهزمي من الباب هاي اخغ مغه زين لوگايلي جان بس ودعته جان شكغته على كلشي سوا النا

-لاانتي الضاهر عاهرررة صدگ

كالها وتفل بوجهي دنگ شالني من شعري جرني من التخم ماسيطرت اكوم وكعت سحلني لنص المكتب استوه ديوكفني وندفرت الباب دخل هيذام مثل الاعصار صاك على سنونه

تركني عمي بسرعة رجع ليورا وصاح عالحرس لزموووا ؛ ركض ضرغام صار بوجهه بعدهم مامتحركين الحرس وشاله هيذام من ملابسه شمره عليهم ولگف عمي من رگبته عصرها وحجه من بين سنونه بنبرة تبين كمية الشر الناوي هو يگله - شگلتلك انييي

لميت رجلية بخوف رجعت ليورا واني اباوعله اشلون ضاغط عليه بقوة ويباوعله بنظرة مابيها اي رحمة والحرس مخبوصين كلها تتراكض الي يجر بي والي يحاول يسحب عمي من ايده والي  يصيح يولد لحكونااااا

هاي الهوسة كلها وهو ولا ويا مستمر خانگه گد ماشايل حرگة دمارات اديه ناطه عرفته ناوي يموته  اشكد ماحاولوا يخلصوا منه ماگدروا  لحد ماسحب اقسام ضرغام خلاه براسي وصاح هيذااااام

دار وجهه باوعله بغضب عيونه دم صك على سنونه  شمر عمي واندارله بخفة ايده هفه بوكس بنص وجهه من قوته انگلب للكاع  على راسه رفعوا الحرس اسلحتهم  اشرلهم عمي تركوا هو ويفرك بركبته

هيذام -لااا ليش خليهم يرررمون

-مستحيل قبل لا اربيك

-تربي منووووو  لك

-اخذوا للحجززز

لم جف ايده ورد اجا گام ضرغام صار بوجهه ودخل ازر  يركض بكل سرعته لزموا منعوا عنه صرخ عمي اخذوووا

هيذام -ياخذون منووو وبتهمة شنووووو

-بتهمة متستر على خاين و حدة متهمة بجريمة قتل

-حلوووووو كالها وصفگ

-اعتقلوااا يلاااااا

-شوف لك تعتقلني؛ تدفني؛ ترميني ؛خليها بصدرك كفيلك محمد وداعت درع كل شعره منها بعزيز؛  ماخليلك نسل احرگهم گدام عيونك تعرف شنوو احرگهم

-عود خلص نفسك وبعدين هدد

-واني ماهدد اني انفذ وكونك زلمة ومن ضهر ابوك  والله يورطك وتحجي وياها مو تلمسها وكتها بس  اعلمك ابن النظام منووو

-اخذوااا 

التموا الحرس  اندارلهم بس باوعلهم  ابتعدوا بسرعة ضحك بستهزاء راد يحجي ازر كمشه من ياخته شمره على ضرغام واجه يمي گعد نص گعده

لزمني من وجهي عيوني كوه فاتحتها اشرلي بعتب ليش نزلت دموعي اخذ نفس دنگ يمسح بخدودي غمضت احس روحي رايحة

صوت عمي يصرخ جتفوااا  وصوت ازر يتوسل بعمي يعوفه ؛ضرغام يصيح هيذام اتركها وتعال وياااي

هوسة براسي كلمن يصرخ من جهة وهيذام يردد بأسمي صورت ضحكة غزوان بعيوني اريد اركز مااگدر ثواني ورحت بغير عالم 

كعدت على صوت الاذان فتحت عيوني الدنيا ظلمة هدوء شبه ضوء جاي من جوه الباب

تلمست الگاع حديد جواي وصوت الاذان عالي رف گلبي ردت اكوم بلكي اذا توسلت بهيج وقت يردهم الي انتجيت دااگوم فلتت ايدي  غدرتني  قوتي رجع راسي عالگاع

درت راسي لجهة باب الزنزانة واسمع واحد يصيح استعجل لك راح يطلع النهار

ابتسمت لميت رجلية لحضني تذكرت من يستعجلنا للشغل  نفس الكلمة يكولها
غمضت احاول ادخل بالحلم وارجع لذيج كعدتنا  والايد ماما اتمشطلنا وصوت غزوان يغني هو ويسوي الچاي

عصرت عيوني حيل ردت بس المح واحد منهم ماكو غير الغرفة فارغة ومكان كل واحد خالي واني واكفة بالنص مفجوعة

فتحت عيوني صفنت عالباب اريد اقنع روحي راحوا ماضل بس صوت ضحكتهم بأذني

لميت روحي الرجفة لازمتني شي بداخلي ما يرضى يقنع

مرت الايام واني شبه فاقدة اكبر امنياتي تنزل دمعة من عيني لو اعاتبهم واشكي

اخذ بالساعات كاعدة افرك بكلبي احسه فارغ عكس روحي المختنگة ؛ اكوم افتر بالسجن بدون وعي مااعرف شريد

الحارس يباوعلي بقرف حسباله اختليت  مايدري اتمنى افقد عقلي ولاهالشعور الدحس بي

الليل يخلص بونه يجي النهار بصفنات استنزفت كل قوتي صرت اترجه  النومة ترجي  بس اريد تغمض عيني بلكي اشوفه وتبرد روحي شوية

اسبوعين مرن ما تغير غير حيلي خلص بعد حتى كومة مابيه اكوم مشمورة بمكان مابي اي بشر ولايوصلني احد  غير الحارس دقايق  يشمرلي  الاكل ويختفي عرفت هيذام معتقلي وهذا المكان الجوة الگاع الجان يهددني بي عمي

رغم الظلام والمصير المجهول العايشة بي بس اي احساس  بالخوف ماعندي ماادري فقدت شغفي بالحياة لو كلبي مات ويا وبعد مااحس بأي شي

لامه روحي  بزاويه الزنزانه خاله راسي على رجليه امشي اصبعي بالگاع  ارسم بوجوه اخوتي واكتب على كل واحد اسمه واشخطة بالموت بأبتسامة  اسمع الحارس يركض فتحت الباب ودخل كال كوميي بسرررعة

رفعت راسي بتعب اشرت وين

-بت النكس اكلج كوميييي من انعل يوم البلانه  بيجن

مارديت رجعت دنگت دخل تفل عليه  ودنگ شالني من شعري شيل احس روحي شاطت لزمت ايده دفرني برجلي وصاح ايدج بت الكلببب وخلينا نرد واعلمج اشلون ماتردين عليه اذا مادست على راسج مااتسمى عالزلم

غمضت اكتم الالم دفعني بقوته طلعني من الزنزانه  گوة سيطرت ماوگعت اجه وراي لزمني من شعري اخذني يسحل بيه اريد الحگ على خطواته  مااگدر  روحي باهته هو يمشي بكل سرعته ويدردم

صعدنا درج وصلنا يم باب حديد دكها بكل حيله انفتحت صار  بوجهي شرطي ثاني صاح شبيك مخبوص

-ليش ماسمعت صوته ماگلت ليش هالهدوء والخنسة الصارت فجأة

-لابروح موتاك لا تكول رد

-دخيل الحمزة اشلون رد رده ربي يجفيك شر شوفته وجهه

- اللواء  وينه ؟؟

-اخذ الحرس طلع مستعجل امبين راح تعلگ الحرب بينهم  بس الله اليستر

-مو گالوا اعتقلوا بتهمة وگلنا خلصنا منه

- محد يدري اشلون طلع منها حتى اللواء اتفاجئ  اليوم بدخلته وانوب فوگ هذا الزين كله يگلك اكو ضابط مخابرات نفس نكاسة طينته داخل للجو  وصاف ويا مانعرف منين اجه وشنو ناوين

-واكيد محد يطيح حظه غيرنا

- دصعد شوف اشسوه بالولد الي حجزوا غير وذرهم وذر ؛ ودز جماعة يجيبولة الي الشهد عليه وزور القضية اللبسوها براسه

- خو ماعرف انت الجنت تنقل المعلومات للواء

- لا محد يعرف غير الضابط ضرغام وهذا اكثر واحد مستفاد مني ومساندني

-هم دير بالك وهاي العاهرة وين ماخذها

-واصلتله  الة تعذيب جديدة يريد واحد يجربها بي

-الله يبعدنا عن شره روح خويه اشمرها وخليك بعيد لحد ما نشوف وين تصفى

دفعني گدامه ومشى  اخذني كتل وسحل لحد ماوصلنا يم  غرفة واكفين اثنين شرطة بس شكلهم مو طبيعي مبين مرتبكين اول ما شافونا گبل دكوا الباب وفتحوها

دخلني الحارس ساحلني ورا ضرب تحيه شلت راسي واشوف هيذام بلبس العسكري الاسود مدنگ عالميز منطينه ظهره على صوتنا وگف عدل واندارلنا

بعد الحارس ما حاجي بدون شعور دفعته وركضتله ضربته بكل قوتي وصرخت حيوااان عمغك ماتصيغ بشغ

اشرلهم طلعوا

-ليشش اطلعهم هااا لان تعغف نفسك متحيون وحقيغ وبلا ضميييغ

مارد  يباوعلي ساكت

-تسكت مووو لبالك بس اني اكغهك اطلع شوف اشلون يدعون عليك بالموت تدغي ليش لان واحد حثالة مثلك مايستحق يعيششش

مارد اتخصر ياكل بشفته وعيونه عليه

ضغطت على سنوني وضربته بقوتي على صدره اخذ نفس وغمض بتعب لو تكول گلي طلعي شكو بگلبج  صكيت سنوني لميت جف ايدي وگمت اضرب واصرخ  بدون وعي اشكد ردته يرد لو يمنعني حتى اطلع حرگتي بي ماكو

احس الضرب ما بردني بكد مازاد ناري رفعت اديه ودفعته بكل حيلي  عالميز اختل توازني رجعت ليورا لزمني بسرعة  باوعتله بتعب ونزلت دموعي سحبني لحضنه ردت اوخر عصرني وهمس والخلق السماوات العليا لجيبلج حقج من ارواحهم ؛ غمضت وشهكت بصوت عالي

لمني بحضنه واشرلهم روحوا سمعت الباب انسد   ضميت راسي بصدره لزمت ملابسه وبجيت شكو وجع جنت كاتمته من ساعة سمعت الخبر لمن رخت روحي ضمني بقوة ودنگ شالني خلاني عالتخم گعد كدامي نص گعده مد ايده مسح وجهي عالكيف فتحت عيوني همست مات غزوان

-اردلج دمه

-مااغيد دمه اغيده هو

-شنو اسوي وتهدين

-يعني شنو هاي هيه  غاح بعد ماشوفه ولااسمع صوته وهو يگلي يبعد اخوج

-اخذج لقبره

-لاتكول قبغه اسم الله عليه بعده صغيغ ماشاف غيغ التعب ليش حتى يموت

-اذا جبت الكتله وذبحته گدامج راح ترتاحين

همست بتوسل لااكتلني اني ابوس ايدك خليني الحگه والله مااگدغ اعيش بدونه

قبل لايرد اندكت الباب اخذ حسرة وگام انفتحت الباب دخل واحد گله ابو درع الغالي حي الله من رد بينا من جديد

- حي الله باليكض شاربه وهو موگدها

-وراس ابني صلخت من جاسم لحم ودزيته للمستجدين بس اللواء امر بالافراج  عنه واصدر عقوبة بيه

-وشعرفه يمكم

-بيومها محمد جان يمه يكول اجاه تلفون من ابنه اسماعيل وهو راد عليه كله لاتضوج روحك اعتبرهم اتبخروا وصفت الك بس على شنو جانوا يتفقون مافهمت بالضبط

- خوش حجي روح صيحلي محمد

-تامر ابو درع اي اومر ثانية

- قضيه رأل  يم منو

سكت مارد

-هه حول اوراقها لدحام الناقص مو ؟؟

-يابه ست الاف قضية اكو شبيك لطشت على هاي عوفها رحمة لدينك لاتمشكلنا ويه دحام تعرفه خالك براسه اذا اللواء خلاك تشمر رتبتك هذا مستعد يشمرك ورا الشمس  ماطول عرفها راجعة الك راح يجلب بيها بسنونه

-وانت كلت راجعة الي يعني قضيتي اذا المرة الفاتت راهنت برتبتي هالمرة براسي والسبع بيهم  يوصلها  تروح تحضرلي زلم كلفه وتجهز الهمر وسيارتين تنتظرني يمهن ربع ساعة والاحگك 

-هلا والله ردينا يالربع  هلا بالشغل النظيف

-اطلبلي ازر وشوفي دسار شسوه بالمهمة الكلفته بيها

-هاي شنو مهماتك صايرة ويه والغرب ويامهمة تحجي عنها

-رافد الدغش

-اوووف اشوصلك اله

مارد ضحك بستهزاء ودنگ ورث جكارته

-اللعب الحلو حي الله ابن النظام ربع ساعة وكلشي يكون جاهز

رفع راسه نفخ الدخان وابتسم اشرله روح

ضحك الولد دنگ اخذ جكليته من الميز اليمه وطلع استوى الشرطي يسد الباب  واندفعت بدفرة رد  الجگارة بحلگه هيذام

اباوع دخل دسار بلبس  العسكري سد الباب برجله واجه بيده اوراق شكله يختلف تماما الي يشوف ضخامته  بالزي وهيبته ولا يكول نفسه الي يلاعب البريعصي ويطفر سطوح   

شمر الاوراق عالميز واندار لهيذام گله وهذا ملفهم راوينا قذارتك بالشغل

- كلها ساعات مو اكثر وراح تشوف روسهم جوة بسطالك

-شجابك هناا موگلنا ماترد لحد مانكمل شغلنا

-جان عندي شغلة كملتها دقايق واطلع

-شغله لو رتبتك السحگت على روس ابهاتنا ورجعتنا الف سنه ليورا

- ورتبتي شنو الغاثك

-يااخي انت من گد حيونتك بالتعذيب بعد ماتحس لو شنوو نسيت ويامن جاي تلعب لولااا غير اذا لكفوك يخلوك رماد

-وهاي رديت يله خلي يظهرولي مراجلهم

- خوش الحجي لعد اسمع هاي عمك حس بلعبة وسلم اسم خرزتي للباشا

-محد يعرف شكلها ولاين خاتلة  انت بس ابتعد عنها محد يوصلها

-مااتقرب بس خلي اعرف وين هيه أمن عليها من بعيد وازرع يمها كم واحد لحمايتها لبين مااحصل طريقة اطلعها من بغداد

-الگرن شخباره

-صل مابي شي

-خلي عيونك عليه محد يوصلك الها غيره

-مراقب الاجهزه ودزيت ضبع  يراقب اخته اكو اتصال صار كم يوم بينها وبين غيمة بت خالهم

- جا شمنتظر ماسحلتها

-البت نغلة ماجاي نكدر نحدد مكانها  تفتح الجهاز ثواني ترسل رسالة قبل لا نشتغل تغلقه وتشلع الشريحة الضاهر الجهاز سارقته وخايفه تلكف 

-شنو مضمون الرسالة

-ماكو شي جديد تسأل اذا كملت الفلوس لو بعدها

-حلوو باعتهن

-مو شغلت بيع اكو براسها دالغة اكبر من الفلوس

-ذكاء المخابرات مايوصلك لباب المركز خليني ادز الولد كفيلك محمد ماطول بيدي نص نهار  وتكون مشمورة كدامك هيه والساندها

-مااكدر اجازف قبل لانكمل شغلنا  اخاف يوصلوها قبلي حددتلك المواقع وجهزتلك كم واحد سبع اذا گدرت تطلع مناك دزلي اشارة حتى اطفر للبر بلكي احصل شي

- اللثام ضل بصندوگ الدراجة وديربالك من المنطقة  زرعوا كمين

-وسفه وعلي لو يزرعون روحهم الي تربه عالدفن مو مثل اليسولف بي

-ازر وين ؟؟

-دزيته يكمل شغلة ذباح حتى نفرج عنه

هز راسه ودنگ اخذ نفس من جگارته وداس دگمة الجرص دقايق واندگت الباب دخل الحارس الجابني كله اوامرك سيدي

رفع راسه نفخ الدخان واشرله تعال 

-مامسوي شي سيدي والله مو بكيفي اللواء كال شمروها جوه صح نفذت اوامره بس وروح ابوي خليت عليها حرس اربعة وعشرين ساعة يشوفون طلباتها و احسن اكل يوصلها حتى اسألها اذا مقصر لو خال واحد يحجي وياها كلمة الك حق

-سد البات  وتعال

-دخيلك سيدي والله غصباً عني

-سمعتني شنو لغيت

-دخل الله ودخلك سيدي وداعت جهالي ماوصلتلها

- حلو خليك مكانك

كالها ورد الجكارة بحلكه دنگ يطبگ بردانه؛  باوع الحارس لدسار بتوسل يريده يوگفله الخوف والرجفة امبينات عليه

دار وجهه كأنما مايشوفه خله اديه بجيوبه وراح يم الشباج  ؛ و هيذام اتحرك جكارته بحلگه  يمشي بهدوء ويطبگ بالردن الثانية بس صوت ضربة بسطاله بالگاع وحدها تاخذ الگلب مو هيئته وشكله الي مابي اي شي يدل على انو بشر

وصل يمه اباوع للحارس واصل لبدايه صدره كد ماضخامة هيذام طاغية على وجوده رجع ليورا وهمس بخوف دخيلك سيدي

استوه يرفع اديه واجته الدفرة بطنه بس دنگ بلمح البصر انسحب من رگبته فره ضغط على نفسه وجتفه صاح بصوت مخنوگ امروتك سيدي …

الكلمة بعدها مامكملها وهيذام سحب الجكارة من حلگه دخلها بأذنه صرخ صرخة رجت المكان

ثبته عدل وطلعها اباوعلها مطفيه بأذنه وهو يشهگ  النفس گوه؛ شمرها و اشر لدسار

درت وجهي واشوف دسار  مدنگ ديورث وحده لخ تكول اصلاً يدري بالسالفة ومستعد سحب نفس جمرت وخرها  نفخ الدخان وتقدم انطلها لهيذام

اخذها ورد وضغط عليه شل حركته اكثر؛  وگف دسار قريب منه لزمه من شعره رفع راسه و كال شيسوي  بثنين عيون اظن وحده تكفي 

اباوعله مارد عليه بس قرب الجكارة من عينه  كمت مفزوعة من تصرفاتهم  بجه الحارس بصوت وصاح  لااا بداعت ابنك سيدي وكلام الله جبرني ومااگدرت اوصلك وداعت امي انجبرت

هيذام -حلو  منو گال للواء على  جاسم

-دز دوريا سألوا عليه بالمنطقة وعرف

-منو الذكره بي

-ابنه اسماعيل جنه طالعين بمهمة واتصل يبجي يكله سمعتها تتفق حتى تنهزم مني تريد تروح لاهلها وتعوفني كله لاتبجي ماراح تكدر البيت متروس حرس

-اي

-كله لا اذا ماكدرت هسه راح تكدر بعدين خلصني من اهلها حتى ما يضل مكان تروحله وتنجبر تضل يمي

-حلو وبعدين

-كله اعتبر ضاع خبرهم وحضر نفسك للعملية حتى بعد تشيل الفكره من راسها نهائياً من سد الجهاز كال راح انطيكم اسم تجيبوا الي من جوه الكاع

-شنو جان رايد منه

-والله مااعرف سيدي والله

دسار - راد يخلي ياخذ البنات من غزوان اجباري  ويدري غزوان ماراح يسكت اقل شي  يسوي ياخذهن وينهزم وهيج يضيع خبرهم

هيذام - متأكد هذا  الحجي راح يوصل للواء بالحرف الواحد بس تدري  شنو راح اسوي بيك بعدها

-اي سيدي اتعلكني من شاربي وتخليني اشلع اضافيري بسنوني

-عفية السبع

-وداعت اطفالي مااسويها اتوبة اتوبه وكلام الله اذا عدتها عوقني واشمرني جوة الكاع

-وشغلت السجينات شنو

-والله والله سيدي بعد ماتحرش بوحده وروح ابوي واذا سمعت بيه حاجي ويه سجينة سلمني لغرفة التعذيب

-شنو تعذيب لاااه من اشوكت نعذب جنودنا كول اجتفك واشمرك بين الولد يتسلون بيك لبين ماتخلص محكوميتهم اگلك احتمال اي

هز راسه وبجه بصوت

-يله ولي كالها وشمره اجه جفي على وجهه عدل روحه بسرعة و طلع يركض

اندار لدسار كله تاخذ رئال لغرفتي الخاصة وتضل قريب منها لحد ماارد  

-تمام بس دقايق اطلع انطي خبر لاحمد يروح يستقبل الوالده مكاني

- دز حرس ويا وخلي ينقلوها لبيت عمك ويفتحون عيونهم عدل نبهم  اي حركة يحسون يبيها  يدزون اشارة 

-الباشا وجماعته اشلون هربوا

-الربع طلعوهم  لان اعمالهم انضربت بدونهم وزعوهم عالبتاوين بعد ماحركوا صورتك يمهم وزرعوا عيون بكل مكان

-الله اعلم اشكد دافعين بيه

-والله هيه لعبتها

-لاياناقص المرجلة ولك اني عديلك

-انت ميت ميت اذا مو اليوم باجر خليني استفاد

دگدك على متنه وكله نفس الصيدة والدفنة وكلام ربك اذا اني ورقتي يم الباشا انت بيد الدحام دير بالك على نفسك

-افاا واني ابو درع

-واني ابو الليل

-حي الله اللفو 

-هههه حي الله بزلامها وحامين العرض

-عينك عليها ماتأخر

-هاي اذا رديت

-عود احسبلي الجيلات الي راح تترس حلگك من تطلع منا هاي اذا ضل بمكانه من الاصل

-لا بروح ابوك اقلها بس اشوفها وعلي زحمة بعد كل هالتعب تالي اموت بحسرتها

- انت بس لا تبعد هواي لخاطر لايطير راسك

-الي مگابل ولفه لايسوالف عالعشگ

ابتسم دكدك على متنه واجه يمي دنگ وخر شعري عن وجهي عيونه حمر  والتعب واضح على وجهه اشرت وين

-صح غدرج كثر وكلفتيني هيبتي قبل تعب السنين بس هم حقج راح يوصلج

-كله بسببك انت المنعتني اكتله جان هسه اخوي عايش

-اخوج مات قبل لا ارد بيومين

-ليش ماخليتني اغوح ليش خليت شوفتهن حسغه بكلبي

-ردت اخليج بأسمي بالبداية حتى من تسمعين الخبر تلكين من التضمين راسج بحضنه وتشمرين شكو الم  بصدره

نزلت دموعي همست ضيع عائلتي كلها حتى ابقى ويا زين ليش ماگلي والله مستعده اعيش عمري كله اخدمه بس يخليهم يعيشون

-وداعت ابني  لابجي مكان كل دمعة عمر على اعزاز كلبه

-واني مااتانيك تاخذلي حقي  اعغف اشلون اخذه  الك يمي منصبك وهياتني اجيتك كمل القضية وابتعد عني

-اااخ يارأل اذا سويتها هالمره دخيل محمد الندم الراح اعيشج بي وداعت كل ليله گضيتها اتأملج بيها لدخلج بجحيم يعادل العشتي اضعاف اخلي اكبر امنياتج تردين لحضن ابوج

-وانت تعغف ماعندي ابو

-اني ابوج واخوج والسند الراح تكملين   باقي حياتج  يمه برضاتج او غصباً عنج

هزيت راسي لا

رفع ايده ضميت وجهي بسرعه سحب اديه بعدهن وخر شعري خلاه ورا اذني -  كل المر بجهة واليوم مجازفتي براسي بجهة رأل لاتخذليني وتجبريني ادخلج للجحيم بيدي

-واني مااغيد اعيش بعد غزوان

-راح تعيشين

-وانت غاح تموت ماغاح تغد بسببي

- تذكرين اول مرة التقيت بيج هنا شنو كلتلج

-اندعي يغتالوني و مااغجع

-وهسه امانه اذا مارجعت تعالي زوريني  حتى لو مرة وحدة بس مكتفي اقلها احس ماخسرت كلشي

نزلت دموعي ابتسم مسحهن ودنگ باسني من راسي اخذ نفس طويل وكام عدل وكفته راح شال سلاحه خلا بحزامه  وطلع بدون لايباوعلي

سد الباب دسار دار وجهه راح كعد شوية عني عيونه عليه راد يحجي شاف دموعي تنزل عالسريع سكت اخذله شويه وگال رؤيا هم هيج جانت تحبه

-جان عكازتها وضوء التشوف بي

-ابوج بعده عايش راح تعرف بي وترجعله و تتأذى  قبل لااوصلها

-غوح دوغها ليش كاعد موهذا صاحبك غاح للموت انت شتختلف عنه

-ماخليت مكان وراي من يوم الي اختفت لسه وكلام الله النوم ماشفته

-بس ابتعدوا عنها هيه بخيغ

دنگ خله راسه بين اديه

مرت اكثر من ساعة واحنا على وضعنا بس بدل ماجنت ابجي واحس بوجع خانگ صدري  بلحظة تحول شكو الم لانتقام  بگد ماجنت حاقده على بابا واريد موته هسه ماكو براسي غير اسماعيل اشوف صورة دم غزوان  بيديه وحق دمعة خواتي بضحكته

شكد حاولت اطلع حتى اروح لغرفة ابراهيم  ماگدرت مكابلني وگاعد جكارته بيده يدخن بغير عالم  مدنگ لازم شغلة ماشوفها شنو بس مثل الخرزة تلمع يفتح ايده عيونه عليها يتأملها ويبتسم بتعب ثواني ويرد يغلقها

يگوم يروح يم الشباج يوگف ياخذله  مشوار واكف يدخن ويباوع لبيره ويرجع يگعد لحد ماارن فونه فتح كام رد هلا بالضبع

-هلا بأبو الليل وينك شنو هاي لابس عسكري

-بالمركز خيرك

-الله يبعدنا وليش هيج كلامك جاف هاي هيج الملابس تغير الله يرحم ايام اللثام من جانت ادمغ بيك خرزة البتاوين

-اشلون يخليني اجي ادوس حلگه الغي لك شكوو متصل

-ردت اشوفك وهسه بطلت لعبت نفسي من جهرتك

-ديله توم كروز صدگ الثقة كنز لك لوعندي شكلك مااطلع بي باب البيت مو اسولف

-هذا شكلي الماعاجبك ساحل نص بنات محافظتك بي غير ذاك اليوم وحده باست ايدي وكالت مستعده اعيش وياك عالحصيره بس وافق

-حشى خلقة الله على هاي ترعبلك ماعيش وياك بالمالديف مو على حصيرة ويله ولي اترس الدراجة بنزين وحضر امورك حتى اول مااوصل نطلع

-اذا خليت بنزين باقي المصاريف انت تتكفل بيها؟؟

-ابن الكلب شنو هو الي اتكفل بي ماخذك حملة لسوريا لو للبر روح ضبع كلش مو وقت اتسربتك

كالها وسد الجهاز دنگ ديخلي بجيبه كلتله اذا كلتلك على مكانها توعدني غاح تحميها

رفع راسه متفاجئ
-تندليها ؟؟

-انطيني كلمة ماتخلي احد يوصلها

-دخيلج احجي ماكو وقت للوعود ابوج  باعها

-يم الولد صديق غزوان

-ماهيه

-لا هناك بس انطي السواغ وگله غئال تكول خلي بيدها و كللها عكازتج جوه مخدة ماما

مارد رجع الفون بجيبه و كام مخبوص يتلفت دنگ شال بيريته واجه بسرعة  نزعت السوار اخذه وگال ماتاخر  راح اخلي عليج حارس لاتخافين

اشرت اي اخذ سلاحه وطلع يركض

اخذت نفس درت وجهي للميز صارت صورة هيذام كدامي ابتسمت -وهاي للمره الالف راح اخذلك

لميت شعري كمت للميز شلت التلفون دگيت رقم اسماعيل خليته على اذني رن شويه ورد منو

-اني غئال

-الله يلعنج اللوحج لو اطيرين للسما راح اشوهج وانهيج مثل مانهيت اهلج

-واني الجايتك لبالي بعدك تحبني مثل قبل وغاح تسامحني وتغجعني لحضنك

-اي اي والله ارجعج واسامحج بس رجعي وشنو تردين اسوي ماازعلج ابد

-اهلك ماغاح يقبلون تغجعني لذمتك

-موبكيف اهلي واني هاي رجعتج بس تعالي والله اخليج تعيشين ملكة والي يحجي وياج اطيح حظه

-تخابغ ابوك تگله غئال موجودة بمكتب هيذام  واني غجعتها لذمتي خلي يجيني قبل لا يغجع هيذام

-اي اي  يله يله هسه اخابره

كالها وسد الجهاز  رجعت كعدت مكاني تفكيري محصور بين ضحكه غزوان هو ويباوعلي بتعب ودم اسماعيل بيدي

اقل الربع ساعة ندفرت الباب دخل ابراهيم وجه محتقن صاح من بين اسنونه بت اليهوودية شجابج هنااا

-هيذام وغاح يسحب قضيتي من الضابط حتى هو يلزمها

-الله يلعنه مثل ماراح العنج واخليج عبره حسبالج من خليتي اسماعيل يردج لذمته  وبجيتيله راح يوكفلج ويمنعني عنج

-اني حامل

-شنو لج

-حامل وهيذام من عغف اتخبل سمعته يخابغ على احد يجيبله شي يوكع الطفل بي  قبل لا تعغفون حتى يكمل القضية

-حتى من اكول عليه كلب ابن كلب محد يعترض

-عمو اتندمت فدوة حتى لوما تغجعني لزوجي بس احميني  مااغيد اخسغ ابني ماضل عندي بس هو

-ولاراح تخسرين زوجج امشي وياي …

***رايه***

بعدها تحجي غيمة وماما  وگعت ساكته من شدهتي مالحگت اكوم زحفت ازحوف  دنكت شلتها اباوعلها بلا نفس  نكثتها حيل وصرخت بكل حيلي 

جرتها مني هجامة وصاحت ولج جلعي جيبي مي يالمعثرة

كمت بدون شعور طلعت  للمطبخ اركض واعثر بس اريد اوصل من كد مامرتبكة تيهت المطبخ دخلت للحمام صار گدامي طشت متروس دنكت شلت دبه مي  ورجعت بكل سرعتي دخلت لكيت هجامة تضرب بوجها ورؤيا لازمة ايدها تفرك بيها وهيه شبه واعية كامشه مداليتها وتنفت

اخذت هجامة المي غسلت وجها رادت تشربها صحت لااا مو نظيف

همست ماما بتعب مااريد بس كومني

هجامه- شمالج يخيه واذا عدل يطبه حريشة وعلي يذباح ينهش لحمه ويدفنه حدر رجليجن

-اشلون عاش بيدي كتلته والله

-عبنه عاار لو خير جان بچلمة سلمها لربه موش جتلة

-راحن بناتك يرافد ولك تعال ليه اشلون اخلصهن منه ولك الحگني وين اوديهن

-شني شيخلصكم منه ياهو يخلي يكرب صوبجن هسه اخابر صهيب واذا هو زلمة خله يخش الديرة موش يعملجن شي

-راح يشمرني بالحجز وياخذهن يبيعهن ومحد يكدر يوكف بوجهه نص المركز اله مو بعيدة متفق وياهم ينطيهم وحده منهن يمه عزة بعينييي

-بس هدي لاتنجلطين

-عساني متت ولاسويت بيهن هالسواية بس لااا مواني هو السوه بينا هيج هو الضيعنا وخلاني ابيع نفسي لمثل هذا حتى احميهن من شره والله كله  بسببه

-يااع خايبه هدي

-ولك غزوان يعمه راحن اخياتك ولك منو بعد يوكف بوجه ولك اشلون انطاك كلبك تروح وتخليني هيج محتارة يمه وين انطي وجهي

-بس انطري شوية خلي اخبر صهيب لخاطر اعرفن شعمل گبل لا يصل

رؤيا - لاااا عوفي لان ماراح يكدر يسوي شي بسبب ماما مطلوبة واني تحت حمايته وحتى راية هم يكدر ياخذها لان ماكو شي يثبت هيه متزوجة وطالعة من شوره

-موش تكولن انتن مانجن بنواته

-وجيبي اليثبت بين مانقدم شكوة ويسوولنا اثبات نسب واحنا اصلا حتى اهلنا مانعرفهم لانه موبس ساحلنا  لاا حتى بايعنا

-جا اشلون ولج نتركجن هيج وروح ابوي لو اعرف اجتله موش اكف بوجهه وانعل اصله ماراح اخلي يجيس شعره منجن

-تردين تساعدينا طلعينا منا وهسه

-وين اعر بيجن يجده مااعرف احد گضيت عمري هون

-اني اعرف مكان نختل بي لبين مايطلع ذباج بس نعتاز افلوس

-اعطيجن عمري موش افلوس بشري بس لازم نشور ابو صكر بالاول

-ماعدنا وقت صهيب بغداد ودتكلج الحيوان جاي بالطريق بين مايجي صهيب احنا نصير بحضن الامن وغصباً عنه

-يجده ما يگدر موش حسبالج ابو صكر بحده تراه نص الديرة تكفله بأشارة موش انوب نخوة وعلي يفدولج الديرة بكبرها ويخلون الدم للرجاب

-هاي كلتلها دم كافي ضيعنا ذباح ماضل عدهم غير صهيب شنو ذنبهم يرحون بسببنا كافي الوكفه الوكفوها النا ماقصروا صار الوقت نبتعد

-يجده …

-بيبي ما نطول كم يوم تره هو مامتأكد احنا هنا جاي على طريق وحده نكسة بس مايلگانه يولي واحنا نرجع لان ماعدنا مكان غير هنا بعد ليش الدماية والهوسة ولو مو تكولين لصهيب اني مامستعده اضل على احتمالات يمكن مايكدروله وياخذنا ويمكن ينكتل ويوكع دمه براس صهيب  وبالحالتين  اختي وماما يرحن مني اذا مو اله لاخوته الحيوانات

-والله يجده خايفة يرد ذباح ومايلگاكم وعلي يدفن رايه حدر عريس المنية لان حذرها اذا اتحرجت بيجن حد الباب يطبر راسها موش تاخذكم وتحدر لغاد

-مايگدر يسوي شي كل قوته يهدد

-چا ماعرفتي بعدج والحر الرياحي مسودن خو لاسامح الله اذا انخدشت وحدة بيجن ماهو بعيد يجتلها ويرد بيها للسجن

-واذا ضلينه راح انضيع احنا وياها ولاتخافين اني احجي ويا واگله هاي فكرتي

-والله شكلج

-لاتكولين كولي اذا ماعندج افلوس عادي نروح مشي وربي يدبرها

-لايجده اشلع عيوني واعطيج جنج على افلوس اغديلج اني وافلوسي فدوات

-وعد اردهن الج ادري ماعندج بس ماعدنا غيرج ننخاه

-ابشري الج من افلوس الوكت لفلوس الچفن بس بالاول كولي وين مهونين

-لبيت امان  يندله ذباح بس تكليله الي جانت بي رؤيا هو يعرفه دخيلج بيبي ماكو وقت

-گمي يله تهيري وانه جايه وياجن ماراح اتركجن بحدجن

-لالااا هيج راح يعرف جنا هنا وانهزمنا اذا شافج ماكو وراح يرد كلتلج مانطول يومين لو ثلاثه وراح نضل على اتصال وياج واذا طولنا اكثر انكلج تعالي يمنا  فدوه بييبي لا طوليها راح يوصل

-لاتخافين ماراح اخلي يكضجن بس همن اديجن بين مااجلع للشارع اجيبلكم سيارة تاخذجن

اشرت اي ولزمت راسها دنكت تعصر بي عرفتها رجع الوجع بس مابيدي شي اسوي ولااگدر اتأخر بين ماترتاح  لان ادري تموت بس توگع بيد بابا

كمت بسرعة حتى ماسألتها وين راح نروح بس ردت اطلع بيهن ركضت لميت ملابسنا بعلاگة اشلون مجان وعيني بغيمة الي واكفة تباوع وترجف عرفت ماراح ناخذها ويانه وهيه ورطت نفسها ماحسبت حساب  ذباح ينحجز وتوكع بيها

اركض مثل المخبلة مااعرف شسوي سديت العلاكه جبت العباية كومت ماما لبستها ورجعت ركضت لرؤيا كومتها عصرت جف ايدي همست رايه راسي

نزلت دموعي

-سمعيني اخذي ماما لبيت المشعوذة هو مو بعيد عن بيتنا نفس المنطقة ماما تندله انضموا هناك واني اخلي عنوانجن يم هجامة اول مايطلع ذباح يجيجن

-وانتي؟؟

-اني مااكدر اتحرك خليني هنا

-جذابه تردين تأمنين بابا حتى ترحين ويا وتكتلي هو وغيمة

-روحي راية

-واني مااتحرك اذا ماتجين وياي على شنو عايشة منو الي بالدنيا حتى هيج متمسكة بيها

-رئال

-ورئال اذا عرفت ضحت بروحها لخاطر تحميج واني الي عالحاظر اتخليت عنج مو بس راح تحتقرني لا راح تتمنالي الموت

-ماراح يتركجن

-ماراح يلكانه وين وعدج الي رؤيا تره والله كوه واكفه داحس كلبي ميت كاره الدنيا بكد كرهي لعمري لاتزيديها عليه خليني عايشة بس لحد ماازور قبره وبعدين شتردين تسوين سوي لان مايهمني عسى ما تحركين نفسج لان اني وراج بنفس الثانية  بس خليني اشم ترابه واخذه لحضني والله ضل حسره بكلبي حضنته

سكتت

-طلب مني يحضني واني رفضت وراح وخلاني انهش بروحي من الندم دخيلج بس احضنه بلكي ابرد شوية وعد ايدي على ايدج نگطعه هالمره مانتركه غير وهو جثه

اخذت نفس دخلت هجامه تركض صاحت يله عجلن

لزمت ايدها حيل ابتسمت ضحكت ونزلت دموعي سحبت ايدها لحضني حيل تكول ردتلي روحي مو كالت يله

دنكت شلت العلاكة وكمشت ايدها عدل بجت غيمة وركضت لماما لزمت ايدها همست بتوسل لاعمه دخيلج لاتعوفيني والله ماراح يرحمني

ماما-  منو كلج اعوفج

رؤيا - لاتعوفيها واذا اخذتيها وياج اني مااروح

-ولج ليش يمه هاي بنيت خالج وامانة غزوان اشلون تردين اتركها للحيوان يستفرد بيها

-لعد روحوا ودبروا نفسكم اني ضالة

-ولج اشبيج تخبلتييي رؤيا يمه لاتعبيني وياج راح يوصل

-وعلى شنو متعبين نفسنا ورايحين اول وتالي راح ادلي مكانه وكتها يامسهلها لكفتنا خلينا هنا

-وهيه شدخلها البنيه

-كليلها شدخلج وشنو جانت خطتها بس مااجت بيدها عدلة

اندارت لغيمه بجت بصوت ودنكت على ايدها باستها و كالتها غلطت عمه وروح ابوي ماادري بي عدل لبالي داحجي ويه عمتي وجرت لساني دخيلج عمه لاتخليني والله يضيعني ابوس ايدج

-ليش يعمة هيج تسوين بينه مو على ايدج موتوا اخيج

-ضحكت عليه كالت اكو افلوس جان ضامهن عدنا وذني ورثكم عمه وروح  غزوان مااعيدها بس لاتعوفيني ماعندي غيرج تعرفين شيسوي بيه اذا كمشني

رؤيا- مامااا يله

غيمه- لالااا عمه بروح اخيج اني عزيزته وأمانته يمج لاتتخلين عني اذا على الفون هاج بعد بشنو اتواصل ويا واذا ماتامنون بيه ربطوني بس لاتعوفوني دخل الله ودخلج وروح اخوي انتحر اي انتحر ولااوگع بيده

اباوع لماما وگفت محتارة عين بيها وعين برؤيا الي منتظرة كلمة حتى تتربع مثل الخبلة دنكت غيمه على رجليها رادت تبوسها كمشتها ماما كالتها شمري الجهاز هنا واذا حسيت عليج شي اشمرج بالشارع  واهج غير مكان

-اي عمه والله اتوبة اخر مرة

رادت تحجي رؤيا صاحت ماما اني عيني بيها اذا شفت  غلطة صغيرة منها اربطها واحرگ لسانها احرمها من الكلام نهائياً

رؤيا -  ههه هواي سمعنا هذا الحجي انتي مثل ام البزازين ماتكدرين تعيشين طبيعي اذا ماتسحلين بزرتج گيعان الدنيا كلها وتختميها بأكلهن بسبب اغلاطج وضعفج بحمايتهن

-عود من يوصل سراج للاكل شوهي وجهي وروحي بطريقج

-وليش اشوه وجهج خو اخذ خواتي واتركج من الاصل

-وهيج حضني ماغزر بيج ناويه تركيني وحدي يبت الدغش

-كل واحد يحمل نتيجة اغلاطه عشت وياج هواي ماشفت غير الظلم  والضعف واني مامستعده اعيد التجربة

-هاي هيه مثل ماتردين  اخذي اخيتج وروحي مودعة بالله ومحمد بگلب راضي بس ديري بالج عليها واني اضل اندعيلجن بكل خطوة تخطنها بس يله طلعن ماضل وقت يبعد امج

هزيت راسي لااا

مسحت دموعها واجت جرتني اني و رؤيا سحلتنا سحل طلعتنا لكينه السيارة بالباب صعدت رؤيا  وجرتني وراها صعدتني  رادت تحجي سكتت لازمتها العبرة اشرتلي ديري بالج عليها وسدت الباب

شغل السيارة ديتحرك فتحت الباب بسرعة نزلت لزمت ايدها كلتلها امشي ويانه

-لايبعد امج صدگ الحجته اخيتج اني مو بس ماانفع اصير ام اني ضيعتجن وكسرتجن هواي بس والله غصبا عني كل الردته  احميجن واني وبلا سند

-ادري ومحد يلومج موهياتنا كلنا كبار ومحتارين اشلون نحمي نفسنا مو انتي جنتي وحدج وكلنا اطفال بين ايديج

-صح ظلمتجن وعذبتجن بعيشتي بس الحمد الله گدرت اضمجن كل هالوكت عنهم وهسه صار الوقت تاخذين  اخيتج وترحين بعيد اني ارد لبغداد ادور رئال أمن عليها وراوح اسلم روحي

-مادورين رئال وحدج ندورها سوه وماتسلمين نفسج قبل لاتاخذين ثار بزرت كلبج من دمه وقتها ماراح اوكف بوجهج بس هسه لا بعدنا معتازيج نضيع بدونج ماما جربت ماكدرت بدونج لاتتخلين عنه ماعدنا غيرج

-مااكدر اعوف بنيت خالج هاي امانه حتى لوغلطت ماتفتهم صغيره وضاگت المر رادت بس تطلع منه بدون عقل وهسه هالفقدت كل اهلها وضلت بروحها وماكو واحد يسندها راح يبيعها جاسم

-جيبيها مالج شغل برؤيا اني راح اراقبها اربعة وعشرين ساعة اذا حسيت عليها شي صدگ وقتها اخذ اختي وابتعد حتى مااكلج

-رؤيا گلبها اسود مثل ابوها ماوراها غير الدم والشر بس راح تسندج وتنطيج روحها مثل ما هو سوى ويانه

-واني مااگدر افقد بعد احد روحي خلصت واني اودع وادفن ماما تعالي ويانه هيه موته موته خلينا نخلص اخر ايامنا سوة

ماردت باوعت لرؤيا شافتها ساكته اشرت يله
ركضت غيمة صعدت وهجامة خلت بيد ماما افلوس وحضنتها مااسمع  شنو همست بس كالتها اول مااوصل اتصل بيج سلميلي على فجر وكليلها ماقصروا والنعم منهم كفوا وفوا

سلمت وصعدت تركتهن يتوادعن  ويتفقن دقايق واجت صعدت تمسح بدموعها حرك ابو السيارة طلع بينا

رؤيا دنكت نفرك براسها من الوجع واني عيوني بالطريق كل ثانية رافعة راسي للسما اهمس يارب ورد اباوع للطريق ماطلعنا من المنطقة اله ونص روحي خالصة

شفت صعدنا الشارع العام لطريق بغداد اخذت نفس براحة انداريت لرؤيا لزمت ايدها همست رايه بعد مااكدر راح اموت لحگيني

-سوده عليه شسوي شبيدي عليج

-انطيني العلاج

-ميصير بعد وقته راح تتأذين خلي راسج على متني  بلكي شوية وتنامين

-مااكدر ولج راح اموووت

ردت احجي شفتها صدگ متخبلة وتعصر بجف ايدها وماما تباوعلي بتوسل حتى انطيها ودموعها تنزل على حالها  تخاف تلزم ايدها لو تحجي تعرفها راح تصرخ بوجها

اخذت حسرة ودنكت فتحت العلاگة طلعت العلاج حتى بعدني مافاتحته اخذته من ايدي طلعت حباية شربتها بدون مي

ودنكت لازمه راسها

رجعت العلاج سديت العلاگة سحبت راسها خليته على متني ودخلت اصابيعي بشعرها افرك عالكيف وماما تقرا ايات قرانية وتندعي بدون صوت لحد ماحسيتها هدأت عرفتها نامت

مرت الساعات واحنا بعدنا بالطريق لحد ماهمست ماما بأذني بصوت رايح وين نروح

-رؤيا كالت لبيت المشعوذه تندلي

-يمه ولج  هذا بعد عن بيتنا شارع

-اي بس تكول أمن ومحد يندله لان هناك جانت كاعده ويه زوجها فتره طويلة محد اكتشف مكانها

-ومنو يگول تقبل تلفنا واشلون نأمن ماتروح تگله

-ماتعرفنا هيه وتقبل اذا انطيناها افلوس يعني نأجر غرفة منها لبين ما الله يفرجها

-ليش مانروح لبيت عالم ديني ننخاه لو نروح  لمكان زراعي بلكي نحصل ناس زينة تقبل تخلينه عدهم لحد مايطلع ذباح

-اشلون نجازف برؤيا ونفتر بيها لازم مكان هادئ  ترتاح بي تره العملية براسها ماما مانگدر ؛ ويا عالم يستقبل هلكد  هسه خلينه نوصل لبيت المشعوذة بالسلامة واذا شفنا الوضع مو امان نروح لعالم ديني

اخذت نفس وانتجت لازمة مداليتها عيونها بالشارع حيرة الدنيا وتعبها  كلها بيهن دخلنا بغداد سأل السايق دلته المكان  لفيت راس رؤيا بالشال عدل واني وغيمة اتلثمنا والله لو ماالرجال من البادية  جان شمرنا بنص الطريق وانهزم

وصلنا قريب عالمركز تلقائي ابتسمت خليت راسي عالجام  اباوع لمكانه نزلت دموعي واني احس راس رئال على متني وهيه تحجيلي عن الكتاب التحلم تشتري

غمضت على صوت غزوان يضحك ويكول ها ولجن ليش تسختن تره اليوم ماادفع افلوس مكانجن

شلت راسي  اجت عيوني بعيونه ابتسم وهو  يهمس اروحلج اني وافلوسي فدوة لهاي العيون

رفعت ايدي خليتها على كلبي اتلمس نظارته عصرتها وحجت بحرگة گلب رحت بس جوه التراب ولك اشتاقيتلك

لزمت ايدي رؤيا همست ماضل. شي ونزوره

-رؤيا منا جنه نجي على هذا الرصيف يدفع برئال ولازم ايدي  يسولفلنا اشلون راح يعوضنا  هنا جان يوكف يتقاسم تعبه ويانا حتى يحمينا من بابا ؛
شوفي هذا الرصيف نفسه جنت اجي منه اجيبله الغده  الكي گاعد منتظرني بيده العود

-وبنفس الرصيف الي راح اخذ حق دم كل واحد بيهم

-مااريد حقه اريده هو رؤيا گلبي لهفان على شوفته مااگدر اتحمل بعد مخنوگة محد ديحس بالنار الجواي ولج حتى بالحلم مديرضه يجيني اشكد داندعي ربي ياخذني يمه ليش مديستجاب  والله ماعصيته بشي ليش مايسمعني وتاركني هيج اتعذب

-راح تشوفي  وراح تسولفين وتنامين بحضنه وتشتاقين لايام وجودج يانا

غمضت

دكدكت على ايدي باوعتلها مبتسمه اتمنيت عندي قوة كلبها

رجعت راسي عالجام اباوع للمنطقه كلما اكول خلصت منها ارجع لبدايتها من جديد مااعرف الدنيا شتريد منا ليش هيج تحب ادولب بينا اشوكت تكتفي من اذيتنا

وصلنا لبيت تعبان اكثر من بيتنا بابه مفتوحة اتحاسبت ماما ويه السايق اتلفتت تأكدت ماكو احد عرف شالت العلاليگ ونزلت

نزلنا وراها رحنا وكفت ماما دادگ بس سبقتها رؤيا دفعتها وسحبتني دخلنا

طارمة ضيگة مفلشه بنهايتها باب حديد تعبان  امشي وعيوني تتنقل بين البيت وبين  رؤيا الي تگول عايشة عمرها كله هنا تندل وين متجهه بدون حتى لا تسأل

وصلنا باب الحديد اتلمست لزمت الخيط جرته فتحته دخلنا مطبخ شبه واگع

طلعت مره عجوز من جوه تلف بشيلتها كالت هله بيكم تفضلوا

رؤيا -  هلابخرابة البيوت العامره اشلونج ام الوسخ

-منو انتي صوتج مو غريب

-لا بس لانسيتيني وسفة او لاحقج  العتب موعليج على اللفو  الراح بدون لايتركلج بصمة اتخليج تذكرين اهله حتى بنومتج مو بشوفتهم

-مرت ابو الليل ؟؟

-خرزة البتاوين

-يمصخمة شرجعج

-اشتاقيتلج

-عساج اشتاقيتي لجهنم انتم شنو ماعدكم غيري ماتفكوني ترا بزعتوني بعيشتي كل يوم واحد ناط منكم على راسي

-دسار رجع ؟؟

-اشتعلت روحج ورحه بساعة وحده شرايده  ومنو ذوله الوياج 

ماردت ابتسمت بفرح  تركت ايدي وراحت تركض وتتلمس  دخلت جوه خفت عليها لحكتها لكيتها واكفه يم غرفة رحت يمها خليت ايدي على ضهرها  اندارتلي گالت هذا عطره

-يعني بعده  عايش 

-كال ماراح اتركج وحدج

-يعني ديدورج

-راح يرد لهنا متأكدة

اجت العجوز صاحت شعدج جايه وشبي حالج بس لامسويتلج مكسورة  وراده اتشمريها عليه

- اشوكت اجه اخر مرة

-من زمان ماجاي الله اعلم وين لافي هو ومصايبة

-وضبع؟؟

-قبل اسبوع اجه تالي الليل كم ساعة واختفى عسى اختفت روحه مثل ماجفلني ابن العاهره احجي شردج وشبي راسج مضبر وهالبنات منين لافتهن

-مابيه شي وكعت وخيطوا راسي وذني البنات اشتغل وياهن وساكنين بيت هاي المرة  رادت تعدله لان تعبان كالت نروح للفندق تذكرتج كلت ليش نروح فندق وندفع كومة افلوس خو نأجر الغرفة العدج هم نأخذ راحتنا اكثر واهم انتي تستفادين بالفلوس

-وشعرفني ماوراج اطلابة

-مقتنعه اوجوهنا مال طلابب  وبعدين بكيفج نروح للفندق هنه كم يوم ونفس السعر لبالي افيدج وهم احنا نرتاح مكان نعرفه

-الاسبوع اخذ عليه مية

-ليشش خمس نجوم هيه غرفة معفنة

ماما - ميخالف ندفع

المشعوذه - واكلي وشربي عليكم والمولد انتم ادفعوا

رؤيا- بعد ماتردين رجل

-وهاا اذا اجوي ضبع وجماعته انام يمكم

-بس خلي يجي وسهلة نومتج اذا مانيمتج نومة ابديه على هذا استغلالج مااطلع مرت الحيوان اللفو

-لومامسوية اصخام ومنهزمة منه مالفيتي على بيتي

-ديله اشلون بيت الي يسمعج يكول بيت الرحمة والملائكة اطوفه من كل مكان

-لاطولين لسانج حتى ماشمرج بره

-كونج مره وتسويها وكلام الله اربطج مكان الصخلة بره واخلي الشياطين تسوي عليج طقوس للصبح

-ياااع صدك صلفة

-منو صلفة ام الوصخ  شو تعالي

شفتها هدت ركضت لزمتها بسرعة وماما صارت كدام المرة

جريتها دخلتها للغرفة وسديت الباب تركت ماما تتأسف منها دفعتني وراحت تتلمست وصلت للفراش كعدت ضايجة

دقايق ودخلت ماما سدت الباب كالتها صدگ انتي تحجين

رؤيا- اي ياتتأدب وتلزم لسانها من تلغي يااگصه

-ولج مره شكبرها واكفه  انتي ليش ماتحترمين احد

-من انتي اطلعين من حياتنا وتخلينه نعيش مثل البشر

غيمه- عوفيها عمه خلي تولي وبعدين شنو هذا المكان البيئه الجايبتنا بي

رؤيا- مبينه الترافة تكت من عيونج من المخزن الجنتي اتختلين بي

-رؤيا لاتخليني اخليج براسي وروح اخوتي اندمج

-واني اريدج تخليني براسج  بعد مااكوم اسحگ بحلگج وانعل ابو اصلج النكس

ماما - انعم الله عليج يمه اصلنا نكس

-اي ولو دمكم طاهر ماخلفتوا هيج خلفة خزي حضرية الخنزير اطهر منها وهاي بت الملاهي  اذا ماتسكتيها وروح اخيتي  اخرسها نهائيا الج

-انوب بت ملاهي يمه اني وين اولي وارتاح

-انتي شنوو بس اذنج الي بصفحتي تشتغل ماسمعتي شغلتتتت

-عوفيها  زعطوطة تلغي وحدها وتسكت خليج انتي التفتهمين لاتردين عليها

-ذيج مره جبيرررة لاتردين عليهااا هاي زعطوطة لاتسمعليها لعد ويامننن اتعاررك

-يبوو عليج ياروحي اشطولج متكليلي اشوكت اتولين

دارت وجها رؤيا حسيتها همست بين شفايفها اسم الله عليج عكس غيمة الي كعدت تبتسم شمتانه اشكد مرت عليه عالم قذرة بس مثلها ماكو

الغرفة رغم صغيرة بس دافية ونظيفة دكت الباب العجوز شمرتلنا بطانيات ومخاد احنا هم ماگلنالها على فراشات خفنا رؤيا ترد تتعارك كلمن اخذت بطانيه ومخدة لفت نفسها وگعدت

مر كم يوم على وضعنا محد يطلع غير ماما راحت مرتين ملثمه عالسريع  جابت خبز ومخضر وردت ركض  تنتظر الليل لمن تنام العجوز تكوم تگلي بتيته وطماطة مال وجبتين حتى لاتخلينه نطلع بالنهار غير بس للحمام وهم تتأكد ماكو احد يالله طلعنا

اني لزمت الفراش بسبب مرض عجز الكلى من كد شدهتي نسيت حتى العلاج اتحملت كم يوم بس بعدها خلص حيلي بعد مااگدر افتح عيوني مو اتحرك

فلوسنا بدت تخلص ورؤيا عبر موعد فتح الخياط انتقل الالم من راسها لعيونها لاعدنا نجيب علاجها  ولانگدر ناخذها للمستشفى نخاف لايشوفونا ضاله تفرك براسها وتفتر تلوج

غمضت مابيه افتح عيوني ايدي على خاصرتي يائسه من كلشي واسمع ماما تهمس عالسجادة بالدعاء اعرفها محتارة خلص الاسبوع والمره تريد اجرتها من غير هم رؤيا وعلاجي

عصرت خاصرتي انكلبت حسيت مثل السجينة نبتت بيها لاارادي طلع صوتي موجوعة كامت ماما كعدت يمي لزمت ايدي وكالت ها يبعد امج شنو اليوجعج

ابتسمت بتعب

نزلت دموعها همست شنو فايدتي اذا حتى وجعجن  مااكدر اشيله عنجن

-مابيه شي ماما لاتبجين شوية واصير زينة

-ماراح تصيرين زينه ولا رؤيا راح ترد تشوف ولا رئال راح ترد لحضني راح اضل اتفرج عليجن عاجزه لمن ترحن مني اني مااستاهل اكون ام ربي ديعاقبني مثل ماعاقبه بالبعد لان انطانا نعمة وماعرفنا اشلون نحافظ عليها

-وانتي شنو ذنبج هاي قسمتنا يجوز الدنيا مو النا وراحتنا هناك

-لايبعد امج لاتحجين هيج اموت بدونج  لارايه كلها احمل بعدها عني بس انتي لااا ولج انتي موبس اول فرحتنا انتي املي العايشة عليه متأملة تلم خواتها بعد ماتغمض عيني

-اذا تحبيني صدگ اندعي خلي الحگه كافي العشته لا ضلت روح تحمل افراكه ولاضلت صحى حتى اكوم اعينكم

-قبلج كلتها واني اشوف الضيعني  يباوعلي بأسف ويأشرلي عينج عليهن وهياتني عشت بعده وحتى كمت ادعي عليه بدل ماابجي ورا وعلى شنو تعينيني مارايده منج كلشي بس اشوفج هيج گدامي كافي

-وينه

- كسر ضهري بيجن وراح

-اذا تعرفين هيج جان موزين ليش خلفتينا

-احن واحد بهالدنيا بس اااه ياذيج الساعة

-شنو الصار

باوعتلي عيونها تلمع  لزمت المداليه دنگت مكسورة

عرفت وراها قصة خانكتها مثل ماضيعتنا وياها ماتريد تذكرها گد وجعها اخذت نفس وهمست  رؤيا وين

انداريت لكتها لازمة راسها وكاعده ورا الباب؛  غمضت ساكته

-ماما اقلها اخذيها للمضمد خلي يشيل عنها الخياط خطيه ديأذيها بس ماتحجي

-راح اخذها للمستشفى افتح الخياط واسويلها مفراس واجيبلج علاجج

-منين حتجيبين افلوس كل هذا

-بس عينج بغيمة

-ماما وين راح ترحين

-لاتخافين مااترگجن اذا ماأمنجن كل وحده يم نصيبها

-هه يعني جنتي تعرفين التاروت قاصدني مو

ماردت اخذت نفس بهضم وكامت اخذت عباتها لبستها ردت امنعها بس شفت رؤيا زحفت للفراش شالت المخده خلتها على راسها ونامت تضغط عليه

اتلثمت ماما وطلعت رجعت غمضت اعصر بروحي دقايق بس سمعت باب الطارمة انسد كامت غيمة طلعت من الغرفة اصلاً ماهتميت لان ماضل شي مهم نخسره بلكي تعجل بموتنا ونخلص

اجتني نغزه درت راسي للمخده عضيتها وعصرت خاصرتي حيل

اكثر من اربع ساعات واحنا كل وحده بفراشها تلوج لحد ماردت ماما شلت راسي متأمله بيدها العلاج بس خاب ضني واني اشوفها دموعها على خدودها فتحت اديها تراويني عجزها عرفتها لاحصلت شغل ولافلوس

مر الليل عينه ماغمضت للصبح من غير الوجع اكل ماكو  ماما ضالة محتارة تجي تگعد يمي تسمع رؤيا تلوج تكوم يمها اتشوفني گوة افتح عيوني  ترجع يمي اخر شي كعدت بينها وبجت

ضلينه لاذان الصبح من گد التعب والالم غمضت بعد ماحسيت مااعرف نمت لو فقدت ماكعدت اله على ايد تتلمس بوجهي فتحت عيوني رايح الوقت صاير الليل الغرفة هدوء ماكو بس اني وماما بيدها علاج وعيونها حمر كلش ردت احجي ماكدرت احس لساني ثگيل  سكتت ؛  ابتسمت ماما وگالت بصوت مبحوح گومي يبعد امج اخذي علاجج حتى تاكلين لكمة

همست بتعب منين جبتي افلوس

-لكيت واحد ابن حلال شغلني يمه

-ياشغل يجيب علاج بهذا السعر

-مو كلتلج ابن حلال سولفتله ظروفي انطاني اجره شهر ليكدام

-رؤيا وين؟؟

-بالحمام دتسبح

-اشلون خالتها وحدها هسه تبلل جرحها وتتأذى

-ماقبلت ادخل وياها

-شنو الصاير مامااا

-ماصاير شي بس تعرفيها عنودية كالت بس اغسل جسمي مااوصل لراسي لاتجين وياي

-لا ماما عرفت بيج طالعة اجدين

-ايي طلعت جديت يم التقاطع  وتعرفين منو لكيت؛ رجلها وامه  بالسيارة  من همشت گلبي ردت افرح ابنيتي ركضتله كلتله وين عن رؤيا تاركها كل هالوكت تنتظرك

-لامامااا ماتسويها

-سويتها وامه سألته منو هاي اشر مااعرفها انطاني الف وراح

-ليش هيج دمرتيها

-لان شفتجن جوعانات گدامي واني ماعندي اوكلجن لان شفت عيونها خزنت من الضماد واني ماعندي اوديها يغيروا  لان دتموتين من الالم وماعندي اجيبلج علاج

-شفتي فرحتها من عرفت بي عايش

-واني موتتهااا مثل ماضيعت ذيييج

دنكت لازمه راسي عقلي متبنج مااعرف اواسي ماما لو اكوم لرؤيا

كمشت ايدي خلت بيها العلاج وكامت لفراشها سحبت البطانية تمددت وغطت راسها اباوعلها تهتز كلها ويه صوت البجية

من حركة كلبي شمرت العلاج وعضيت ايدي بكل حيلي على  الزمن الوصلها  لهيج مرحلة

غمضت اشكد جنت حاقده عالدنيا مو كد الحقد الحقدته على نفسي عرفت  بأنانيتي دمرتهن

سمعت خطوات رؤيا قريبة عالباب ماكدرت افتح عيوني واخلي عيني بعينها دفعت الباب ودخلت غمضت حيل جنت منتظره تنهد بيه مثل كل مرة تدخل اصرخ وتكسر بس ماحسيت غير هدوئها عرفت كسرها هالمرة مايتعالج بعتاب

اجت تمشي بطيء  وصلت يمي گعدت كدامي خليت ايدها على شعري رفعت راسي باوعتلها موخره الضماد شعرها مبلل وعيونها حمر دم نزلت دموعي بقهر

ابتسمت وهمست هيج  رنود جانت حلوه مثلج …

لاتنسون التصويت ❤️