رواية شيء من رصيف الدم الفصل الخامس وثلاثون 35 - بقلم Leo Alfatlawi

شيء من رصيف الدم

بقلمي: leo Alfatlawi

بارت الخامس والثلاثون

بارتين سوة

***راية ***

صرخة مكتومة الم على خيبة ؛ نار تنهش بروحي دموعي تنزل بتوسل؛   كلها لحظات فقدت شكو وعد بداخلي انتهت كل لهفة بنيتها أأمل نفسي بيها لجمعتنا  مرة ثانية …

ضمني بحضنه  ودنگ رد راسه برگبتي مغمض ينفت برجفة مثل الوعى لنفسه ؛ سحبت ايده من حلكي دفعته عني جريت الغطة لميت نفسي

انگلب على ظهره صار هدوء؛ غمضت گلبي ماحس بدكاته مشاعري خالية جسمي بارد داخلة بعالم ثاني بدون اي احساس عبارة عن جثه هامدة

مرت اكثر من ربع ساعة اخاف افتح عيوني لو اتحرك واكتشف الصار حقيقة مو حلم

حسيت ايده على شعري كأنما صحاني لزماني عدلت ثوبي من فوگ حسيت رگبتي حركتني  صكيت على سنوني وكمت ضربته بكل حيلي اجت بوجهه  لزم ايدي صرخت انوجعت موو

مارد باوعلي بتعب الحسرة واضحة بعيونه

-ليش ماترد هاااا ليششش لان تعرف روحك ناقصصص و حيووووان وخسيسسس

همس بكسرة لااا لان حبيتج

-شنوو حبيتني ولك انيييي مرة صاحبببك ولك امني عندددك ولك وثق بيييك

غمض مارد

-طلگني ذبااااح

شفته سكت ضربته و صرخت داكلك طلكنييييي   كام راد يلزمني دفعته جريت ايدي  وگمت اضرب بدون وعي واصرخ بكل حيلي  لزم راسه ودنگ لو احس شعلني ضغطت على سنوني اضرب واصرخ بكل ماعندي طاقة بس اريد النار الجواي  تهدا

على صوت صريخي  انفتحت الباب دخلوا يركضون  رؤيا وعمتي جرني وبيبي سحبته عني وصاحت شكووو

- كليله خلي يطلكنييي

- ياااع  شصاير يجدة

- لان ابنج مو رجال ولاعنده كلمة واحد ناقص وخاين راكض وره حيووونته 

- رررايه شمالج

- كله بسسبج انتي الورطتيني ويه وحيون مثله  عسى يحركوج بنار صدري عساج بوجع كلبييي كون ادفني مثل مادفنتينييي

فجر - رااااية

- كلكم اصيحون رايه ماراضين تعرفون لييش لان ماكو واحد بيكم شريف وعنده مخافة الله وكله شنو سويت بيهاااا

- يعمة هدي خلينه نعرف شصاير

- ماصاير شي گليله خلي  يطلكنيي لاوروح اختي هسه اذبح نفسيييي

- كولي يالله يعمة زعلج نچيب حگج من عيونه بس موش گبل تجعلين للطلاگ

- مااريد حقيييي  انتوا دفتهمووون شحجي مااريدددده خلي يطلكنييييي

وخر بيبي دنگ شال تيشيرته راد يطلع  من حركت كلبي بعد مااعرف شسوي دفعت رؤيا انداريت صارت تحفية كدامي شلتها وشمرتها عليه اجت بمتنه لزمه موجوع بس ماحجه زاد حركت كلبي رجعت شلت النفاضة  ضربته بيها وصرخت  لاترووووح

ركضت فجر لزمتني ودخل صهيب صاح شصايررر

- عموو  لاتخلي يطلعععع

فجر  -  ولج راح يوكف كلبج يمعثرة هددي يعمممة

-وخري عنييي

-ابعد بس اهدي وتحجي شعامل وياج

- احجييي كلللهم  شسووويت 

صهيب - شعامل يالخببببل طاكهااا  ؛ولك شمالك ماتركز وانوب شاررب يالكافرر

مارد دنگ

- انعل ابو شاربك لابو الحسبك ازلمة وعطاك حرمة تحجه عليش طاكهااا  هيج

سكتت

صرخت ليشش ماترد كلهم اني حيوووان موكد كلمتييي كللهم غدرت بصاحبي كللهم

ردت احجي واحس روحي بهتت لزمتني رؤيا بسرعة همست كللهم ماكفاني واني ادفن بي واشوف حركت روحها ورا لااا رجعت ذبحتها بيدي

صهيب - اهدي يبه وعلي اجسرلج راسه

اشرت لاا  ونزلت دموعي

- حكج تاخذي من هالشارب تحجي شني اليرضيج

- كله خلي يطلكني

- كولي يالله يبه طگج اجسرلج ايده واطرده برة الديرة لحد مايتربى  ويعرف وراج من الي يطگ ظهره

- اذا صدگ حاسبني بنتك  خلي يطلكني

صهيب - بسج يبه الج الرايدته

ذباح - وانه ماطلگ

كالها وخر صهيب عن وجهه طلع

كعدت بالگاع لميت روحي وبجيت بعجز لان عرفته  استغل ضعفي وراح يجبرني عليه

طلع ورا صهيب يركض ورؤيا كعدت يمي لزمت اديه دفعتها ماحس غير الراجدي اجاني على وجهي وصرخت كافييي لج

باوعتلها ونزلت دموعي مهضومة

- وكلام الله راح اندمه وهاي دموعج انزل  اضعافهن من روحه واليوم

همست بكسره رؤيا ذبحني

- لاتبجين

- غزوان عافني وحدي وراح

سحبتني لحضنها ضميت راسي بصدرها وبجيت بحرگة گلب استوني حسيت بموته كل دمعة تنزل مني تودع ذكرى بينا كل شهكة وجع احسه بيها تمحي وعد اخذنا على نفسنا

طلعوا سدوا الباب عصرتني بحضنها وبجت على بجيتي هنا ادركت مالنا احد صدگ  والكل يحاول يستغل ضعفنا لمصلحته

لاذان الصبح وحنا بس صوت شهكتي تنسمع صاح الله واكبر سكتنا ثنينا غمضت ورؤيا خلت  راسها على راسي  صارت صنته شوية وحسيت دمعتها وكعت على وجهي همست رايه صاح الاذان گومي  كعدي غزوان راح الوكت

- كعدي رئال على كيفج لاتفز رنود

- رئول تشلع كلبي ماتگعد اله اضربها وماما ماتقبل اكتلها

- كليلها اخذت كتابج هيه تطفر وحدها

- راح تشكيني لغزوان واتخلي يعيط عليه

- تره شفتج من ضربتيها بالختلة وهددتيها اذا حجت تردين تكتليها 

- اشش صوتج لايسمعج غزوان

- راح اكله واخلي يعاقبج حتى تبطلين تأذين بيهن

- كلبه ماينطي وعلى عنادج كلي راح اجيبلج ماسكة جديدة

رفعت راسي همست راح مالحگ يشتريلج

نزلت دموعي رجعت راسي بحضنها وشهكت بوجع مانسمع غير صوت رصاص علگ الجو وصوت ضراخ ترس البيت 

وخرتني رؤيا كامت فتحت الباب صار كدامي ذباح  وصگر بيدهم اسلحتهم  طلعوا يركضون

نسوان صهيب كلها داخلة مخبوصة كلمن تجر بجهالها تدفع بيهم لغرفة بيبي  وعمتي ايديها على راسها تحمي روحها اجتنا تركض دفعت رؤيا  دخلت وسدت الباب صاحت بعددي لغااادي ولج لاتلوحج البارود

رؤيا - شكو شصاير شنو الضرررب

- دكونااا المايخافون الله ولج يييمه رحوااا ازلامنااا سوده بوجهييي

- منو ذولة وليش هيج ديضربون

- هذا رفيج گمرية طلع من المستشفى وسمع بالصار جاي يريد دم ذباح

- عزه بعينها دزت صاحبها يكتل اخوهاا

- تعالي ليه يحبيبه يمه راح يصفي ازلامناااااا

هيه تحجي وكثر صوت الرصاص رج البيت رج بي ؛ دنكت بسرعة ورؤيا اجت يمي جرتني كعدنا بالزوية ضمت راسي بحضنها ودنكت

كلما يمر وقت يزيد الصوت صارت جبهة مو منطقة واحنا كلمن خانس بمكان اكثر من ساعتين والصوت مستمر لحد مانسع صوت صگر صاح يبويه  جتلووووووووا  

احس روحي غابت لطمت فجر ورؤيا عصرتني صافنة صار هدوء توقف الضرب شلت راسي باوعتلها اريد احجي مااكدر يبست شفايفي صرخ صهيب بصوت احسه اخذ روحي وهو يصيح يابوووية راح خووويي ؛غمضت بعد ماحسيت بشي

صوت هوسه رمي على صراخ ؛ لمسات خفيفة على وجهي احس بأطراف اصابع توخر بشعري بهدوء وصوت نحيب قريب ؛ فتحت عيوني بثكل صارت كدامي  عمتي واكفه ضامة وجهه بالشيلة تبجي
وذباح گاعد نص گعدة گدامي لاف شماغه على راسه سلاحه بمتنه يباوعلي بقلق  من گد الغضب الحامله لو الحمار الي بعيونه مخلوط ويه الكحل  ينتفس بحرگة شافني صحيت  اخذ نفس وغمض بتعب

نزلت دموعي همست الله ياخذك

دنگ لازم وجهه

- كالوا متت شرجعك

فتح عيونه باوعلي بوجع

- كوم ذباح اطلع لاتخليني اكره نفسي اكثر مااني كارهتها

رد دنگ اشر اي  وحجه بصوت مبحوح گوة يطلع حلليني

- عمري ماراح اسامحك

- اعرفج جثير عليه ومانه كفو واستاهل وحدة مثلج بس امانه الله بريني الذمة كافيني راح اگابله وانه  مااگدر اخلي عيني بعينه

- اذا اكو واحد راح اضل اعيش بس حتى ادعي عليه فهو انت روح ذباح وعود من تشوفه لاتنسى تگله شسويت بأمانتك

هز راسه وكام اندار لاخته جر راسها باسه وكاللها امانتي يمج يخوي حسبيها ابنيتج شمتلك يتگسم بالتساوي بينها هيه وهيام

- مروتك لاتحجي هيج وعلي البدوية تموت وراك

- بوسيلي ايديها وگلليها شريت رضاتج بالدنيا بس هذا ولد عمي وانه ترباتج خلها تندعيلي بالرحمة

- هيج يذباح نويتها يبعد اخيتك ماكلت اشلون اتركهن بعدي ينحون على فگدي

- جنت اتمنى اخلي وراي من يحمل اسمي بس ربي ماگسملي لهيج راح اتركلكم صيت ابن البدوية هههه يله راح ترتاحون من المشاكل والديره تهدأ

- بروح ابيك  لاتحجي وين الوعد العطيته لرفيجك موش كلتله اخياتك بحمايتي نام وانت مرتاح

ضحك ودنگ ساكت اخذله ثواني ورفع راسه عيونه مليانه دموع ياكل بشفته يباوعلها اخذ نفس وكاللها رديت بي يخوي

- تبجي يبن البدوية

- عشكتها غصباً عني يخوي

- واليعشگ مايعطي نفسه للموت ويترك محبوبته

- هلبت اذا تنوعت لتابوتي جدامها يبرد كلبها وتغفرلي

رادت تحجي جر راسها باسه دنگ اخذ سلاحه وطلع ضمت وجها وكعدت تبجي؛  لميت روحي  دموعي تنزل مااعرف على شنو

دخلت هيام تملخ بروحها وتبجي كعدت كدام عمتي لزمتها وصرخت كومي ورا طيحي عليه هلبت يهون ابوس ايدددج

عمتي - محد بعد يگدر يكف بوجهه هالمرة رافج المووت ابن البدوية

- لادخيلج يعمه ابوس رجلج ناويها عليه راح يجتلوا وعلي اموت مااگدر اتنوع يدخلوا محمل جدامي يمه دخيل الله

- سلم على خويه ووصانه  بيجن

-لاااا لاااا

ضمت وجهه دنكت تبجي بحركة  عافتها واجتني لزمت اديه همست انتي يعزج والله تكدرين تمنعي هو يسمع منج رايه تحسين بيه تنوعتي وجع دخلت تابوت رفيج روحج  شني ؛كومي كليله تموت هاي بدونك لاتعمل بيها هيج

شهكت

-لالاالا تبجين كومي وعلي ياخذ منج ولج من سمع طحتي ترك الازم طلع من نص الموت واجه يجلع خايف لخاطرج ولج يترجاني يكلي حسبيها اخيتج لاتشيلين بكلبج عليها و اذا تردين تأذيني بكبري اذيها جا شكثر يعزج رايه دخل الله ودخلج كومي منعي لا يروح

دنكت احس كثر الدموع بعيوني حجبت الرؤيا 

هزتني وصاحت ولج راح بجتلووووا ولج راح ذباااح ولج حتى مالحگ يفرح بجاهل 

وخرت ايدها وحضنت رجلية ضميت راسي ماينسمع مني بس صوت شهكتي

تربعت تلطم وتملخ بوجها وعمتي من الجهه الثانية

مااعرف اشلون مر اليوم علينه كلها التمت يمنا لان اكو حمام بالغرفة حتى لحد يطلع ؛ الي لازمة سجادتها والي لازمة زاوية الغرفه تبجي بيها والي صافنة ماكو اي خبر عنهم

رن فون بيبي سدت القرآن باسته خلتها بصفها ورد ياهو وياي واجها صوت گمرية تضحك بصوت عالي غمضت عيونها واستغفرت

گمرية - وعلي تمنيت يصلني خبر ذباح بس ياحيف طاحت بأبن عمي يله بعدها بأولها

- يمممه ياهووو النوب انجتل ولج

- عالاساس ذباح بس خطته وطاحت بيوسف گولي ان شاء الله البعدها بي

فجر - يبووووو راحوااا ازلامنااا تولاهم الموووت

گمرية - بجاه كلمن عنده جاه مايطر الفجر اله وكلهم يتسطرون بتوابيت نذر عليه البس احمر وگف بنص البيت اهلهل

بيبي - والله عرفت هالمصيبة من چوة راسج اااخ اشلون كضيت على ايد ذباح وماخليته يذبحج

- على شنو متندمة ماكفاج ظلمتيني بنص رجال بكد جدي حسبالج اخليكم تتهنون مثل ماشمرتيني هالشمره اله اخليج عمرج كله تنوحين على ابن گلبج المتباهية بي جدام ديرتج

- محد ظلمج غير مشيتج العوجه ررروحي گمرية ربي وگلبي غضبان عليج ليوم الدين

- غضبي منو انتي حتى اهتم بس والله كسر خاطري راد ينهيني راح بيها هو هسه اني اطلع حامل وهو حتى خلفة ماترك ورا يشيلون اسمه نصيحه ضمي نسوانه بالفاتحة لخاطر لايكولون هاي هوسته شكبرها وتالي طلع  اخرطي

- اااااخ يمه عسى گليبي  بالجسر عبنه رف عليج وحشتهم عن موتج 

- هههههه عود عزموني بفاتحة فشلة اخاف يسألون عني شتكلولهم كضيناها ويه رفيجها وتبرينه منها ماترهم جبيرة بحگم

لطمت عمتي وسدت الفون  وبيبي دنگ لازمة وجها خلت ايدها هيام على ظهرها كالتلها غير الكاتبة ربي مايصير

بيبي - يچدة راح الثاني بعد ماتكف اذا مايصير الدم للرجاب

غيمة - سودة عليه راح وهو شابع قهر وكاتم بكلبه بسبب هالعايبة

هيام  - ياهو عليش شصاير

- جا مادريتي البارح بليل تعاركت رايه ويا ماتعرفين الغلط منين يجي ماتعرفين السب حتى ضرب ضربته گدام اخو وهو سوده عليه ولارد سكت

- ياااع عليش ولج هيج عملتي هذا حگ الجزه زات روحه بالموت لخاطرج واستگبل عدوه بيته وصبر على مغثه بس حتى يرضيج هيج ترديها

رؤيا - واكيد اختي مو ناقصة تربية ولا ناكرة الجميل وهو لو مايعرف بنذالته ماسكتلها جان ردها مو اجه بعد كل هذا يتوسل بيها تسامحه

غيمة - لا بت شوارع ومو گد النعمة اليشوفها البارحة اشلون اطفر وتغلط عليه بس لان ضربها تكول جانت عايشة بالبياع بت دلال ولاهيه بت جاسم الجان يكومها ويكعدها بصوندة

هيام - عليش طگج

رؤيا - لان كالتله لو جنت صدگ رجال ماقبلت مثل غيمة تصير بأسمك

غيمة - يمه عزه بعينج واشبيه اقلها براسج لا يوم دخلت مراكز ولاسكنت التقاطع اركض وره الزلم واتمضحك لازمه بيتي ومحد شايف شعره من راسي

- وجاسم وابو طبر يشهدون لالبالج نسيت بس كلشي اله وقت وكلما تتأنه يكون الشغل ممتع اكثر

- ماتكدرين كلشي تسوين عندي رجال مثل ماسوالج  عملية وخلا مثل البشر بكلمة وحده مني يسحگ راسج ويردج لحضن جاسم وتعرفين اسويها لاتنسين منو اني

ضحكت وهزت راسها اي رادت تحجي صاحت عمتي فجر - بسجنننن انكتمن ولجن  الزلمة بالموووت شتلغثن انتن

غيمة - ماتسمعها اشلون تتهمني بشرفي

-انعل ابو شرفج لابو الفگر الدخلتي وياج غيمة نفس واحد وازتج بالوهاد اخليهم يسحكون فجج

- هاي لواني الضاربه ذباح وهيج حاجيه عليه جان شمرني 

- لا افااا يزتج شني وعلي يذباح  جان ترس فجج بارود ودفنج بمجانج وبسج نفس ماهيس منننج

سكتت عدلت راسي بحضن رؤيا غمضت هاي  الهوسة كلها مو يمي محتفظه بعالمي احس روحي بعد مابيها مجال للالم اكتفت بمافيه الكفاية

مر يومين على نفس الهوسة محد يطلع غير مرت صهيب تسوي  اكل؛  الوضع زاد سوء بالاخص من وصل خبر ذباح اتصوب واحد  من ذولاك انكتل والثاني داخل بحالة خطرة كلش

عمتي اتخربطت وبيبي حالتها تعبت گطعت حتى الاكل من غير هيام مخلصتها صفنات ودموعها تنزل بهدوء الكل عيونه بالباب منتظرين خبر موت ذباح حتى يوگف الدم

لزمت ايد رؤيا  الحيرة بكلبي تهد جبال ضايعة لااعرف بيمن افكر لو وين اروح

استوني اغمض ودخلت هجامة  تركض وتنجبح كمزت عمتي كالتها انجتل ذباااح مووو

- لااا عطوني البشااارة

بيبي - احجي والج ناگة اكودها بيدي لباب دارج

- اجه زلمة الخرزة نشر الحرس لحمايتنا وصهيب خابر اكبارية الديرة تالي تدخلوا الوجوه الطيبة راحوا خذوا عطوه من شيخنا

- ازلامنا  وين ؟؟

- ذباح اعترض مارضه لاهو ولا ولد عمه شمخي  وكالوا الدم بالدم بس صهيب وولد شيخ رماح  جتفوهم وخذوهم غصباً عنهم زتوهم بالمركز لحد مايفضون الشغلة

- ماكصرتي ياام العباسسس نذر عليه اذا فضت سالفة وتهده الخبل لاخذكم للعباس ونثر الواهليه بنص حضرته

- ياهو اليتهده ذباح هذا  الجتفوا وخذوا  يتماطلون اماطل ويا حرام همه يسحلون وهو يصيح وعلي اجتلهم لو دفنوني جوة الگاع موش تحجزوني تركوني احسللكم

غيمة - يعني شنوو يسجنون ذباح فوگ ماكتلوا ولد عمه

هجامه - خذوا  ثارهم شخلوا بيهم نسفوهم نسف غير هو خبل  عگله قافل يايصفي العشيرة يااينجتل تسودن مايكضه غير السجن خله غادي هلبيت يصلخون جلدة يعگلوا  لبين مايحلون السالفة ولو الكل يعرف يذباح اجته من الله  مايركد اذا مايتفگهم وينجتل

- يمه اسم الله زين اذا سجنوا  كم سنة يعني يضل بالسجن

- ماهو جثير بس يفض بحر الدم الجره بسبب ولد الحرام الجان ناوي يعلگ النار بنص ديره مابيها ماي؛  اندعي كون يعگل زلمتج  ويخلهم ينصبون فاتحتهم ويشيل من راسه الموت الجالع ورا

عمتي رفعت ايديها تبجي  وهيام دنكت ساجدة وبيبي انتجت عالحايط عيونها بالسما  تهمس بتوسل 

اندارت هجامة لرؤيا كالتلها وانتي يجده زلمتج بالباب كوميله

رؤيا- انتي كلتي زلمه واني الماخذته حيوان اي معالم للرجوله مابي يعني مااعرفه هذا التحجين عنه طلعي طردي

- يع دسار مانه زلمه ولج النار صار يومين عالگة ماوگفت لو ماخش بنصه ؛ الي يكف بوجه الموت وهو يعرف على ساعة ياخذه بس لخاطر يحمي ولفه  هذا موش بس زلمه لا سبع من ظهر سبع

- ههه وكف مولان سبع لااا لان يعرف نفسه عار والعار مايموت

- لج يجده وعلي يجسر الخاطر صار ساعة يتكاوت اتنوعله يتحجه ويه صهيب وعويناته عالدار يريد يخش وهو يعرف راح تصدي ويتفشل ضال مناطر يتنوع هلبت تمرين ويتنوعلج من بعيد

-لعد خلي بمكانه لحد مايمل ويولي بلكي يحس على دمة  يبطل اطفر ويخلي لنفسه قيمة

استغفرت وراحت كعدت يم بيبي مر وقت وهنه على فد سالفة  راسي بحضن رؤيا مغمضة حسيت دمعه نزلت على وجهي فتحت عيوني لكيت رؤيا لازم الفون تباوع بي وتبجي

گعدت بسرعة دااسألها واشوف صورة رئال گاعدة بلحظة ضاعت ضحكتي واني  اسمع الصوتيه  وصلت من دسار يكول مااكدر اتصل لان فاقدة الذاكرة  وذا حجيتي وياها راح تزيد حالتها سوء

ضغطت على الصوتي وحجت من بين سنونها  الله ينتقم منكم دموتونا وضعتونا اكثر ما احنا ضايعين بس وداعت الفرها بيكم وخلاكم مثل الزمايل تتلفتون  لخليكم  تبجون دم اذا ماخليت اكبر امنية عدكم يرد بيكم الزمن بس حتى تفلون بوجهكم بدل معرفتكم بينا مااكون طالعة من ظهر الدغش 

جريت الفون من ايدها دنكت  اباوع لرئال شعرها قصير صح بعدها على جمالها بس موهيه نفسها حسيتها مكسورة عيونها بيهن نظرة غربة

حضنت الجهاز وشهكت شالت راسها رؤيا كالت بدل لاتبجين لمينااا موانتي اختنا الجبيررة

- وين اروح بيجن جربت وعضيت اصابيعي ندم

- تعرفين منو صديقتي الحركوها وكضيت ايام مااكدر انام بسببها

- لاتكولين رئال

- اي رئال بس ماگدرت احجي كدامج ضميت وجعها بكلبي كلمااغمض عيوني اشوفها وهيه مشتعلة تعرفين شنوو جنت احسسس

- شنو الصار ليش هيج سووا بيها

- لان رخيصة و ماعدها سند لان استغلوا ضعفها لان عرفوا محد راح يداعيهم بيها وهاي فقدت الذاكرة وضاله ضايعة ماتعرف احد

- كليلي شسوي وين اروح المن اشكي اذااا هو سلمنا بيد حيواناااات ومااات

- ماترحين ولاتشكين اختي راح اردها مثل ماراح اخذج ونروح صار الوقت نعيش مثل مانريد كافي اذيه ذل

- وين نروح رؤيا

- لگبر غزوان

-شنسوي هناك

-خلي نوصل واگلج شنسوي هناك

- محد راح يخلينا نطلع ولااحنا نندله

- نطلع غصباً عن اكبر شارب عدهم  گومي لبسي اخيتنا منتظرتنا دااشوف اشلون متذكرنا وذولة الهمج  اشلون  يمنعونه

مسحت دموعي هيه اخذت الفون دنكت تراسل واني گمت لفيت شعري بسرعة  طلعت المناظر من جوه المخدة خليتها بصدري جريت الشال خليته على راسي كالت بيبي خيرج يجده وين تردين

- لرند

- بهالوكت 

رؤيا - اي بهالوكت واذا كلتي لا لو الزلم ماترضه اخابر دسار يجيني واخذ رايه واروح ويا وابن ابو اليجي يداعي بيهاااا

- وعلي يذباح يفر من سجنه يسوي طشاركم ماله والي تهدي يچده  وعگلي تركي حرمته مالج شغل بيها تردين ترحين ويه زلمتج مانه كاضتج حگج بس بتنا ماتعر الباب وزلمتها مانو موجود

- حلوو انتي من هذا النوع لعد سمعي وخلي اجيبها وياج من الاخير ماتردين مشاكل خابري صگر خلي يجي ياخذنا نزور رند ونرد واذا كلتي لا حسبي حسابج ماخذتها وطافره مثل ماالله واحد

-ولج يالرعنه  هالتشوفين هوستنا شمالج تسودنتي

- بيبييي تخابري لو اخابر اني وبدل هالمصيبة تصير اثنييين

هزت ايده وطلعت فونها دنكت دكت رقم  صهيب  دقايق واجه صوته سولفت ويا رد حگهن يبه خليهن  يجهزن حالهن هنه وفجر جايكم صگر بالطريج

سدت الفون اخذت نفس تستغفر؛  رجعت كعدت  ايدي عالمناظر عاصرتها عيوني على رؤيا الي ردت تراسل مااعرف ويامن

غمضت احضر كلام  اشلون راح اعاتبه  لا بالاول اشكيله وبعدين ازعل عليه لو لاخطية منتظرني كل هالفترة تالي اكسر خاطره بالزعل ؛ بالبداية اسولفله اشلون كل ليله ماانام اذا ما الزم مناظره وعيد سوالفنا وكعداتنا جوه الكمر وبعدين اشكيله شصار على وجع كلبي بغيابه

ساعة تنزل دمعتي والخنگة تلزمني ساعة اضحك مامصدكة واخيرا راح احضن كبره لحد مااجه صگر وكامت عمتي لبست عباتها شمرتلنا عبي و كالت يله

لبسنا وطلعنا لكينا مدخل السيارة هو وابن عمه صعدنا كلنا ورا طلع  من الجهة الثانية للامان ؛ على طول الطريق عمتي تسألهم على الوضع ورؤيا مستمرة بالمراسله ردت اگلها ويامن خزرتني خفت منها لمعة عيونها كلها شر  بطلت  رجعت عيوني بالطريق لحدما وصلنا للمگبره  دخلنا مسافة قليله والمح صورة غزوان من بعيد من لهفتي حتى العباية نسيهتا فتحت الباب ونزلت بطرگ الشال اركض اشكد جنت مجمعة حجي مجرد ماكعدت يمه وحضنته اشتميته حيل احس كلبي برد

رفعت راسي اباوع لصورته بمناظره مبتسم  همست  شكلك مشتاقتلك لو  زعلانه عليك

صدگ هاي انت جوه التراب واني كاعده يمك محتارة اعاتبك لو اشكيلك

غزوان دتسمعني لو ناسيني منو اني اصلاً

زين  ليش ماتجيني بالحلم هيج كلبك ينطيك تعوفني حتى ماتسأل عني ؟؟

تذكر من جنت تگعد بالساعات بالبرد جوة الكمر تنتظرني بلكي يحن كلبي واجيك  هسه اني كمت اكعد جوه الكمر وتوسل بيك بالساعات بس اريدك تمرلي بطيف

ههه تدري صارت نظارتك عندي اعز من روحي كلما اشيلها اذكر كلامك وانت تكلي احتفظ بيها يجي يوم وتذكريني بشوفتها بس ماكلتلي راح تموت وتعوفني

زين اذا ناوي تموت ليش علقتني بيك هلكد لااا اذكر جنت تتوسل وتكلي خليني احضنج خايف اموت واني بحسرته بس ماصدكتك اااه لو ترجع الدنيا بيه

غزوان شتاقيتلك لامااشتاقتلك اني متت وراك مداحس بشي تنازلت عن كل احلامي والله مااريده  بس اشوفك بالحلم  ؛اشكد متندمه اشلون ماخليتك تروح بس والله كلبي ماانطاني اعوف ماما وخواتي

ههه تدري خسرتكم  كلكم سوه راحت ماما وراحت رئول  ورؤيا انتهت حتى ذباح صديقك تدري غدر بيك وكسر كلبي 

غمضت حضنتها حيل اجه صوت رؤيا بأذني فتحت عيوني لكيتها تمسح بكبر رند وتهمس بصوت ناصي بعدج يروحي جوعانه وخايفة

غمضت حيل دورت وجهي مااريد اسمعها عصرت نفسي ابعد ونتها عن اذني لحد ماحسيت ايدها تبعدني شلت راسي اشرتلي وخري ودنگت مسحت صورته وابتسمت

باوعتلها ضحكت وهمست شفتي شكله

- لعد على شنو جنت  تتنمر عليه طلعت اصلا موحلو
لبالك اذا صرت جوه التراب راح اسكتلك كوم لك يله كوووم

غززوان كوم لك كووووووم غزززوان
كالتها وكامت دفرته بكل قوتها  اجت عمتي تركض لزمتها دفعتها وصرخة عوفينيييي  وخري عنييي لج كليله خلي يكووووم كليله خواتك ضاعنننن كليله رئال بعد ماتعررررفه

همست كليله حبيبتك  كل يليلة تنام دمعتها على خدها مهظومة بلكي يحس ويكوملها

كليله ماضل سند عدنا ولاعرفنا نعيش بعده

وخرتني وكعدت حضنت كبره تشهگ بحركة وضرب بي بعتب مكسورة

رجعت غمضت خليت راسي على الطابوگ  اتمنى ابجي مثلها واعاتبه  بلكي يحس بيه ويكوم

دقايق وصار هدوء فتحت عيوني احس غواش ماشوف بيهن كلش مسحتهن حيل وخليت ايدي على قطعته  امشي اصابيعي على احرف اسمه هالكيف ودموعي تنزل بضياع

ثواني واسمع رؤيا تهمس صغيره جنت وانت صغيرون حب عرفنا بنظرات العيون
گالوا  ترى ذولة يحبون من الصغر لمن يكبروون

شلت راسي لكيتها منتجية عليه وتغني باوعتلي ابتسمت مدت ايدها لزمتها رجعت راسي عالكبر اتسنط للكلمات واتخيل شكله هو ويگعدنا الصبح عالريوگ للطريق وهو ماخذنا للشغل لوكفتي واني انتظره يكمل عزف وغناء حتى ياخذ الغدة

فززتنه عمتي وهيه تكول موش بسجن ييمه

رؤيا - اي يعمة صدگ بسنا

- يله كومن قبل لاتظلم الدنيا

هزت راسها وكامت مدت ايدها دالزمها وشحطت سيارات يم سيارتنا بعده صگر  حتى مامطلع سلاحه ونزلوا زلم مثلمة حاوطوهم  خلوا السلاح براسهم رادت تصرخ عمتي خزرها المسلح وصاح نفس واحد وافجر روسهم

انفتحت باب السيارة نزل رجال شكله هيبة ضخم وشعره ابيض باوع لرؤيا ابتسم ؛ فتح ايديه وهمس خرزة البتاوين

ضحكت عافتني وركضتله جرها لحضنه دنگ اخذ نفس طويل منها وباسها وخرت راسها ومدت ايدها اشرتلي تعالي

اشرتلها وين

-موكلتلج لازم نعيش وهذا اجه الوقت وصار لازم نمشي يله كومي

-منو هذا ؟؟

- رافد الدغش ابونا …

****رئال****

ربما موطني حضنك وليس هذه الارض…

وخرت ايد الدكتورة وگمت كالت ماما بعدني  مامكملة

- واني مااغيدج تكملين لان انتي اصلاً كلشي ماتفتهمين 

-زين ميخالف بس خليني اشوف حجم الكتلة اشكد بلكي نكدر نسيطر عليها حتى احولج على مختبر التحليلات

- ماكوو كتلة انتي شبييج شيلي ايدج عنيي

- ماما عندج نزيف داخلي ومتجمع داخل الرحم لاسامح الله اي ثانية يصير انفجار بعد حتى مانلحگ عليج

- هم كالت مانلحگ باباااا ودتفتهمين شنوو احجي

- لاا بنتي احتمال موحميدية لاتخليني اجبرج ليش هيج حياتج رخيصة

- ياحياة دتحجين عنها انتي منتبهة شنو دتكولين لولااا شنو لازم نقلعه تعغفين شكد عمغي اني

- لهيج مجبرين نسوي العملية حتى لاتتعرضين للاسوء حياتج اهم

- لاالطفل اهم وعملية ماغاح اسوي وانتي شيلي ايدج ولاتدخلين

اندارت لعمتي الي واكفة ايدها على كلبها تباوعلي بكسرة  كالتلها انت امها

عمتي - لاعمتها

- خابريلي زواجها خلي يحضر حالاً وضعها خطر لازم نكمل فحوصات ونحولها للعمليات بأسرع وقت

دفعتها وكمت نزلت قميصي بسرعة ركضت فتحت الباب طلعت ودموعي تنزل وحدها احس الدم جامد بجسمي اريد احد يگلي السمعتي جذب انتي كلشي مابيج راح يصير عندج بدل الطفل اربعة  وتبنين وياهم ذكريات جديدة وتملين بيهم النقص بالضياع الدتحسين بي

صار گدامي امجد كام مستغرب وضعي  مامفتهم السالفة وصلت يمه  لزمت ايده رفعت راسي وشهكت

- شكو شموسة

- موكلت انتي اخيتي و مااخلي احد يأذيج

- ومستعد انطيج روحي احجي اشصاير ليش هيج ترجفين

- اني كلشي مابيه بس همه مايصدگون اخذني منا لاتخليني يمهم

- شمسسسس شكووو

- اخذني بسغعه غاح يموتوني

- منو يموتج غير الضابط يحركهم همه ومستشفتهم شبيج بابا على شنو خايفة تبجين

اجت ضي تركض كالت وين ترديننن

- مالكم شغل بيييه وعملية ماغاح اسوي

- امجد خابر هيذام بسرعة اذا مالحكنا تموت

- لاااا لا امجد وداعت الخوة  اكتل نفسي وابليك وانت تعغف هيذام ماغاح يغحمك

امجد - ههه شنو تموت ضي شبيج

ضي- لازم تدخل عملية هسه بس تتاخر تموت

صحت لااا دتجذب امجد مالك شغل بيها تجي وياي لو اغوح وحدددي

باوعلي عيونه مليانة دموع اشرت لاااا

مارد دار وجهه طلع فونه دفعته ركضت للباب داافتحه مالحگت جان اسرع مني سحبني انداريت ضربته وجريت نفسي جتفني  رفسته  ضغط عليه بيده شل حركتي  وايده الثانية طلع بيها الفون بسرعة شفته دنگ يتصل گمت اطفر واعيط بصوت عالي  بس اريده يتركني سمعت صوت هيذام كال ها بابا امجد واني صرخت مالك شغل بيهم هيذااام ديجذبون عليك لاتجييي

امجد - سيدي تعال للمشتسفى بسرعة

- لاااا هيذام  لاتجييي مابيه شيييي ولك عوفنيييي

غلق الفون بدون لايرد عليه عرفته جاي بعد اريد  اخلص نفسي مااگدر  اضرب وصرخ بعلوا مجتفني حيل وضي تبجي على بجيتي لحد ماعرفت انتهي الوقت وماكو فايدة من الداسوي حسيت  روحي بهتت لزموني ثنينهم كعدوني وكعدوا  يمي  باوعلت لامجد بتوسل نزلت دموعه

- اذا تحبني طلعني منا

- قبل لااعرفج انتي منو فديت بكل مااعندي موبعد ماوكفت كدام رجلج وتعهدتله بالدم احميج بروحي

-غاح ينهون اخغ امل عايشة علموده 

مارد لزم اديه ودنگ

غمضت مامستوعبة الصار قبل دقايق نتعارك على الاسم رجعت فتحت عيوني باوعتلهم ثنينهم يبجون واني ذكرياتي مجرد ايام وياهم موبعيدة اگعد من العملية ناسيتهم

خليت ايدي على بطني - مستحيل اخيلهم يقلعوا ويحرموني حتى من الامومة اني احسب يوم يوم اشوكت يصيرون وابني ذكريات جديدة وياهم 

اقل الربع ساعة وندفرت الباب رفعت راسي لكيت هيذام كدامي واكف متفاجأه نزع اللثام  شمره  واجه دنگ كعد گدامي يباوعلي بخوف نزلت دموعي مد ايده مسحهن وهمس احجي رأل  شنو الصاير 

-  اني مابيه شي  لاتصدگهم

- هه شنو مابيج شي رأل ليش تبجين

- يغدون يموتوني هيذام طلعني مناااا

حجه بترجي لاتكولين عندج ذاك المرض ابوس ايدج

- لاتخليهم يسوولي العملية والله اطيب

- لا رأل بروح اخوج خسرت كلشي  ماضل عندي غيرج

- واني اموت اذا ماصاغ عندي طفل

لزم ايديه كام كعد يمي جرني لحضنه ضمني بقوة  ودنک بس دكات كلبه تنسمع كد مايضرب سريع احسها يريد يطلع من صدره اجت عمتي كالتله الدكتورة كملت التحويل لازم تكوم تاخذها للمختبر يكملون الاجراءات هسه

رفع راسه باوع لعمتي أشر لااا

- ولك يعمه تموت الورم جبير يردون يتأكدون بلكي يطلع مو خبيث حتى نسوي العملية

- وكلام الله تبت وحلفت بعد مااظلم بشر ليش هيج ربي جاي يسوي بيه

- ظلموها بسببك اخذوها بذنبك ضيعتها يعمه بسود كلبك

- ماضيعتها اني ردت احميها غفرتلهم كل السوا بيه مقابل يتركوها بحضني اكتفيت بيها بين كل هالدمار العايشة

- كوم ييمه خلينه نلحگ قبل لاتروح من ادينا

ردني لحضنه ضغط عليه ساكت دنگت ضي لزمت ايده كالتله بتوسل والله تموت اذا تأخرنا

مارد

- هيذام حالتها صعبة ورحمها منتهي ماابي امل دخيلك كوم

غمض

- ولك راااح ينفجرررر وتموووت هيذااام اصحححى دااكلك كوووم ماعدنا وقتت

باوعلها بتعب

- حالتها النفسيه تعبانه دتزيدها عليها راح تموتها بيدك وتموت بعدها اعرفك ماتعيش وراها

- بعدها صغيرة ماراح تتحمل العملية

- لاتتحمل خايف عليها لاتتأذى هسه اخلي الدكتوره تخدرها ماراح تحس بشي والله بس كومنا

اشر  اي

رفعت راسي همست بتوسل لا هيذام لاتسمعلهم

- ماسويت كل هذا حتى اخسرج بالنهاية

- مااكدغ اعيش بدون اطفال

-واني مااكدر اعيش بدونج

- مااسوي لوتذبحني وخغ عنيييي

مارد لمني بحضنه صافن حسيته بغير عالم؛ ردت ادفعه عصرني كامت ضي ركضت دخلت يم الدكتورة
ضربته حيل وصرخت عوفنييي ولك هيذااام والنبي اكتل نفسييي بس تغصبني ولك امجدد لاتخلييييهم ياخذونييييي

شفت الممرضة اجت كمت اكمز واتوسل بي لايخليها تخدرني جر راسي ضمه بصدره وشرلها يله بعد اريد  اصرخ لو انخي احد يخلصني مااكدر ؛ لساني انشل گد ماروحي محترگة واحس نفسي عاجزة مااكدرلهم  ضربتني ابرة عرفت روحي انتهيت لزمت ايده باوعتله عيونه حمر وجهه تعبان يتنفس بحرگة اشرتله بتوسل لاا

نزلت دموعه وهمس رجعيلي رأل

غمضت  دخلني بحضنه ودنگ ضام وجهه بركبتي ثواني وماحسيت بعد

…سيارات تمشي سريع ؛الهورنات خابصة الجو صوت رجال يصيح عندج بانزييين مخلوط بصوت بنيه تصيح رئااال يله نرجع راح يصير الليل 

مكان ظلمة بيوت مفلشة امشي واتلفت بيدي علاگة وايدي الثانية لازمة بنيه تهمس تأخرنا رئال بعد ميفيد

صار غواش بيدي مشطي وكاعده يم مرية اجت وحدها عيونها ملونه دفعتني صاحت وخري حاجزة قبلج

طفلة تضحك ابراءه ولد يصيح رئول جوعان اخيج سويلي اكل

صار صريخ جثه على دم واحد ضخم صورته مشوشة صوته مرعب دنگ عليه همس اشلون كتلتي باوعتله بخوف بعدني ماحاجيه ماحس غير انسحب شعري بتره وكام لسعني بي طفرت واني اصرخ لاااا

لزمني هيذام صاح على كيفج بنيتي

فتحت عيوني لكيته كاعد يمي ؛ الصورة مواضحة   ماشوف بس عرض امتونه كدامي حاجبه عني الرؤيا احس بلمسات ايده يحرك بشعري عالكيف رجعت غمضت 

دقايق وصحيت على صوت ضي تسولف ويا  اباوع واكفة  تأشرلي وتضحك حسيت بحرگة بلعومي وجع بنهاية بطني السيروم مشكل عرفت انتهت  فقدت امومتي وراح اعيش عمري كله بحسرة الطفل نزلت دموعي

مد ايده مسح دموعي وحجه بخنگة  لاتبجين كلشي يتعوض

-كله بسببك

- همه جبروني عالغلط

-ليش خليتهم يسون العملية

- مادخلتج اذا ماحضرتلج العوض

درت وجهي

مرت الايام عازلة نفسي  بس دموعي تنزل دخلت بحالة كئابة  حادة لااحجي ويا احد ولااباوع بوجه احد اشكد جنت احس بروحي ضايعة هسه اضعافها  همه هم تاركيني براحتي

عمتي وضي ملازماتني اربعة وعشرين ساعة كمت احس بالغربة اكو شي بداخلي يكلي ذولة مواهلج  والزاد احساسي دسار مرة وحدة تحمدلي عالسلامة وراح مخبوص بدون  لايسأل اشلون حالتي هنا زاد شكي اكو سر ضامي من غير الاحلام التتردد عليه بنفس الاشخاص

كاعده لامة رجليه صافنة عالشباج وعمتي كاعدة على سجاتها شوية دخل امجد اجه  يمي دمغ ضي شمر بحضنها العلاج وكاللها كومي انطي للهايشة الحاسبة نفسها دكتوره وكليلها مرة ثانية خلي تحترم نفسها وتكتبه من داخل المستشفى بت النعال فريت نص شوارع بغداد يالله حصلته

ضي - الدكتورة هايشة

- انت شايفة وجها تكول ستوته ابو خضير اول مره اشوف كرش يطلع بالوجه

- شبيك مخبوص اليسمعك يكول مركبي البعير ودازي لمكة

- و شكو على كلبج خاتله هنا جوة التبريد وانتييي لج ماتكولين لرجلج يشدلنا سبالت بالشوارع لوشاطر بس يسحل بالعالم

دنكت خليت راسي بحضني

- شبيج يمعوده هاي كلها عالجهال صدگ جذب جنج على فرخ  باجر من الصبح اخطفلج واحد من عمي بهريشة عده خمس واربعين  طفل ضايع بيهم العدد خو اذا اخليت بجيبه خمسة ينطيني ثنين وعليهم امهم هدية

ضي - صدگ عده هلكد

- وداعت ابوي ماخذ اربع نسوان وساكن بهيمة هو ماعنده خبزه يوكلهم  ومستمر يخلف مااعرف شنو نيته يأسس قبيلة لو يغزو المحافظة الله اعلم المهم اخر بزره اجوا بدون ملامح كد مامخلف خلصت الجينات الوراثية 

-هيذام وين

-طفشش راح كعد بالحديقه يدخن من ضيمه  اذا صاحبتج تلط الاخضر واليابس تكول ملهوكة
خاله الزلمة امرمگة ارياكه وهيه جانت  عدنا معدتها  خايسة من خبز اليابس والشجر والنوب كلما شافته طفرت بوجهه تكول ملبوس ودخلوا حضرت العباس

- وين الحظ و يسمعك هيذام

- لاامأمن تركته يخابر بالمقر يريدون يجفتولهم شبكة بالبتاوين وعوفج منه تنوعيلها اشلون تخازر تكول جدي عفيفي درب الكياته ماواصللها؛  بربج هاي بصغرها هم جانوا يغنولها بنوتي الحلوه الكتكوته ؟ اكص ايدي اذا ماجانت امها تنيمها على اغنيه ام الكمل ام الصواب

دخل هيذام بسرعة سكت ورجع ليورا مدنگ  اجه يمي دنگ باس راسي وخرته عني ودرت وجهي اخذ نفس وندار لضي كاللها وصل العلاج

-اي جابه امجد

- خوش اخذي للدكتوره خلي تسجلج اوقاته حتى نطلع

هزت راسها وراحت رجع اندارلي كال فحوصاتج كلها تمام

-غووح  اطلع هيذام

-شنو الرايدته احجي

-ليش هو شنو الضل فقدت امومتي وذاكغتي صغت لاشئ حالي حال اي قطعة اثاث مالها اهمية ضعت  وخسغت نفسي كله بسببك وتدكول شغايده

- حتى لو ماجان بسببي هم راح تحمليني المسؤولية وتهفيني بغدر يردني الف سنه ليورا مو جديده عليك

- وتحجيها بهدوء ولاكأنما اكوو شي لك انت شنوو بس فهمني ماكو احساس ماعندك كغامه دااكلك غووح اطلععع

- الج يمي طفل تردين اسجل درع بأسمج تردين نتبنه طفل حديث الولادة

امجد - اتبنوني والكاظم اني خوش ولد

شال راسه خزره بسرعة سكت ودنگ رد كال ها شختاريتي

- اغيد حقي وبدون غحمة

- ومنو كلج مااخذت حقج لسه

- يااحق وامك عايشة حياتها بغاحة

- من يكون عدوك من اشباه بشر  افضل طريقة تنتقم منه هو التعذب بالموت البطيء عن بعد

اشرت مافهمت

هز راسه وندار دنگ راح يتمشى عالكيف صوت دبجه رجلي بالگاع وحركاته كأنما مارات عليه من قبل ؛ وصل يم امجد رفع راسه باوعله بطريقة ترهب استوى امجد يرد ليورا واجه راجدي من قوته شمرة مسافة 

اباوع لامجد عدل وكفته بسرعه لازم خده ويباوع لهيذام بغضب

هيذام - هنا حقد عليه وحالياً جاي يزرع براسه اشلون يرد حقه  مو بعيده يسحب سلاحه ويفرغه براسي

نزل ايده امجد ودنگ ؛ رد تقدم  جره من ياخته قربه عليه عدلها اله ونزل ايده لجيبه طلع طلقة گله شنو هااي

امجد - شنو سيدي منين اجت هاي

- اني الي اسألك

- ماادري والله اصلاً اني ماعندي مسدس وداعت ابوي اول مرة اشوفها

- وين رحت اليوم ؟؟

- الصبح جبت ريوگ وبعدين كعدت بالحديقة وهسه طلعت جبت العلاج 

- من كعدت اكيد غفلت عيونك بالنوم دقايق

سكت

- تعرف شنو معناتها من يخلون طلقة بجيبك

-هااا سيدي يعني دمك مهدور

-عفية واهم شي بالحارس الشخصي يكون ملفه نظيف تعرف هالشي لولا

- اي سيدي بس والله اني ماعندي عداوة ويه احد

- واحنا ماننتظر لحد مانتعرض بسببك للاذية على ساعة يهفوك بجيله ؛ تروح للولد تشمر سلاحك وملابسك تاخذ هويتك  وتتوكل

هز راسه اي بس وجهه صار اصفر خايف  مثل اليفكر منو الخالها اله دنگ شال بيريته ومشى اتجاه الباب وهو صافن وصل ديفتحه گله اوكف

اندارله شفايفه بيض

اجه يمي هيذام  دنگ خله ايدي من الجهتين  باوعلي وهمس بلحظة مر شريط حياته بكبرها كدامه وبدل مايفكر منو خله الطلقة بجيبه فكر اشلون يحمي نفسه من موت محتم باي غفلة ممكن يروح بيها وهذا عذاب يضاعف الموت بنفسه الف مرة

سكتت

وخر شعري عن وجهي وعدل وكفته اندار لامجد شمرله الطلقة وكله خليك نبه مرة ثانية حتى لارفعك من اذاناتك

ابتسم براحة اخذ نفس وكال والكاظم عثرت بالشهادة اربع مرات

- وعثرك بگبرك انت وعشيرتك اذا شفت خدش برأل  

-يعني قبلت تخليني الحارس الشخصي الهااااا

بعد ماراد دخلت الدكتورة هيه وضي سلمت واجت يمي تقرا  تقرير الموجود عالسرير اباوعلها صدگ اكو كرش بوجها عضيت شفتي

كملت شالت راسها كالت ماعندج اوجاع منا منا

اشرت لا

- تمام  كالتها واندارت لامجد -اكو نوع من العلاج موجود بمكتبي افضل من هذا الجايبي بلكي تروح اتجيبه

امجد - اشلون ادخل مكتبج

- روح تلگي زوجي هناك دكتور دنان احجي ويا هو ينطي الك

-منو دنان بس لاهذا الراسه تكول خرزه محبة

دنگ هيذام  حك خشمه كله سيدي والكعبة ماافتهم كلشي من حجي انوب يتنفس من حلكة  تكول صخله بالعة علاگة

ضم وجهه هيذام وهيه گلبت خلقتها اجت جرت ايدي بعصبية شلعت السيروم لاارادي صحت ااا شال راسه هيذام فاتح عيونه باوعلها بنظرة من يمي خفت بسرعة رجعت ليورا كالت اسفه والله سيدي مااعرف اشلون اذيتها

دفعتها ضي عني وكعدت يمي تفرك بيدي
ضلت واكفة تتعذر وتتوسل وامجد مدنگ عيونه على بلعومها اشلون يصعد وينزل لحد ماجره هيذام شمره برة

خلصنا الفحوصات كومني عمتي وضي غيرلي ملابسي احس كل الاحداث دتنعاد  نفسها شافتني ضي صافنة كالت شبيج هزيت راسي بماكو ودنگت لان حسيتهن وحدة تباوع للثانية  مثل الشكن تذكرت شي

طلعنا لكينا هيذام  منتجي عالسيارة جكارته بحلگه  وبيده فونه مدنگ يراسل عرفته من حركته يحجي ويه دسار على مداهمة لو مصيبة  انتبهي جاية وكف عدل غلق فونه واخذ نفس من جكارته شمرها بالكاع سحگ عليها ورفع راسه نفخ الدخان بالجو واشر للحرس طلعوا كدامنا

فتح باب السيارة صعدنا وهمه ركضوا راحوا يتراكضون كدامنا رجعنا لبيتنا على طول الطريق جان ساكت  عيونه يا بالمرايا ياعليه لحد ماوصلنا نزل اندار فتح باب السيارة كد قوة السحبة سمعت الباب طگت ؛  نزع الدرع شمره على واحد من الحرس  ودنگ شالني ضربته بصدره وهمست نزلني

- اتوسلي 

-عززه هيذام ديباوعون الحغس حتى هيبة ماضلتلك

- انعل ابو الحرس لابو ابوي هو انتي خليتي بيها هيبة سحلتي ابوي بكبره كل يوم  مسويتلي طلابة وخالتني لازم جكارتي وافتر مثل المسودن امشي واجرم بخلق الله

- لعد ليش الله عاقبني مكانك

- لان يدري اعز من روحي والوجع قبل لايمر بيج ينهش  بصدري اضعافه

- بس اني انتهيت

- محد انتهى غيرهم انتي رتبتي  والرتبة لايغير مكانها قزم ولا يطفي لمعتها غبار تكبر و تعلى  وتسحگ روس

- وجعوا كلبي هيذام

مارد  فجأه تغيرت نظرته تحولت لشر يباوع لدموعي التنزل

ارجع راسي على صدره حضني حيل ودنگ باسني  ؛ كمل طريقه دخلنا الكل جان موجود شافونا كاموا الي يتحمد عالسلامة والي يگله شلونها ؛حتى مارد صعد  لبالي راح ياخذني لغرفتي بس طلع كبل وصل يم اخر باب دفرها برجله ودخل

وخرت راسي اباوع مكتبة  جبيرة مليانة كتب وجلب صغير اجه يركض ويهوس يم رجلي  رجعت باوعتله اشرت شنو هاي

- اكثر مكان راح تشوفين نفسج بي

- منو كلك اني احب الكتب

- دكات كلبج اعرفها اشوكت دگ كبل لاتنبض بصدرج مثلاً هسه براسج كم حدث ضامته عليه حتى لاادري ذاكرتج جاي تتحرك

- ليش ماتغيد ذاكغتي تغجع

- لان اريدج بس الي مااريد تفكرين بغيري

- ليش ماجنت احبك قبل

- لابس جنتي متعلقة بأخوج اكثر مني واني اريدج  بس الي لوبيدي امحي شكو بشر على وجه الارض وماخلي غير حضني تختلين بي

-مااغاح اجيبلك طفل

-مكتفي بيج انتي ودرع حتى اخجل ارفع راسي لربي على گد كرمه 

همست بس اني اغيد 

نزلت دموعي ردني لحضنه باسني وهمس بدل كل دمعة نزلت منج راح تكون روح ؛ وبدل الطفل تعب عمره ومكان رجفتج هاي هيبته هو يتوسل بذل كدام اهله قبل حمايته بس لخاطر اخفف الحكم شوية

مسحت دموعي بصدره وخرته نزلت من اديه اجه الجلب يطفر على رجليه دنگت مسحت راسه اباوع لشكله غريب  كعد كدامي كال سميته تره

- شنو سميته وليش هيج شكله يخوف

- هذا بول تيري نوعية نادرة

- لاتكول سميته دغغ

- شنو درر لج فحل هذا مو بعينج دشوفي اشلونه واشلون اسمي درر والحرف ضارب يمج شيقنعه انتي لدغه

- الحمدالله شنو سميته

- براري

باوعتله رفع حاجبه اشر شكو

عفته وكمت ادردم الله خالقه حتى يضر البشر اترجه منه خير اشلون

- احجي بصوت عالي

- ماجبت طاغيك وبعدين هذا الجلب سنونه طوال اشلون ياكل كغات مجففة

دفع الجلب وكام وكف طلع باكيت الجكاير سحب وحده دنگ ورثها اخذ نفس ورفع راسه نفخه وكال هذا ماياكل غير جثث

- عزززه هيذام شنووو جثثث

- موشرط بشر عادي يستقبل لحم حيوانات ثانية

- منو كلك اغيد جلب منين اشتغيته غوح غجعه

- وين ارجعه اذا لكفوني يطيروني مؤبد غير ممنوع دولياً طلعت روحي يالله كدرت ادخله من الحدود

- وليشش جبته شتصخم بي ليش معوزز انت حتى تجيب بعد واحد

رفع حاجبه

- كلش ماتفخوفني نظغتك وفغها للحغس بلكي تغد هبتك الصاغت طشاغ

- اكيد هاي تعويذة حتى احبج 

برطمت ضحك اجه سحبني لحضنه حضني ودنگ  اخذ نفس طويل وكال دخيل محمد اشكد مشتاقلك

رفعت راسي - حياتي فاغغة مابيها بس انت هيذام لاتوجع كلبي بيوم

- انتي قضيتي

- ماتجي يوم وتطلب مني طلب مااكدغ انفذه

- نبضتي بصدري ويه اول لمسه الج تترجيني اتركج

- مااغيد اتذكغ شي غاح اكتفي بيك لاتخذلني

- احارب الدنيا بكبرها لخاطر ضحكتج

- صدگ تحبني

سكتت رفع ايده وخر شعري عن وجهي باوع لعيوني وهمس مااحبج اني اشهگج ويه النفس

اخذت نفس وخرت ايده رحت للمكتبه اگلب بالكتب مااعرف شنو بداخلي بس صدگ حسيت روحي ويه كل كتاب اشيله جانت اكو ترابط بيني وين الكلمات الي اشوفها

مرت الايام اذا جان الكل واكف على تك رجل صاروا حتى نوم ماينامون بالاخص اذا شافوا دمعتي نزلت ينخبصون لان يعرفون راح يكون عقابهم بدون رحمة ؛ مليت من تصرفات هيذام واخلاقة احسه متوحش موطبيعي فاقد شكو رأفة بتعامله

دلاله وخوفه زاد كأنما يشوفني حلم ويخاف يصحى منه على غفلة دوم عيونه وراي ويحاول يظلم الكل بس لخاطر يحافظ عليه

اني هم انعزلت صرت اخلص وقتي بالمكتبة بين اكتب قصتي من اول مافتحت عيوني بالعالم الجديد وبين اقرا  مااعرف اني صدگ جنت احب القراءة والقصص لو اريد اشرد من واقعي

درع مكابلني اربعة وعشرين ساعة يلعب يمي بالمكتب ادري هيذام يريد يعوده عليه بس مااحس اتجاهه اي حنية

اضيع اليوم بين كتب  وبين نلعب ويه الجلب لحد ماانسمع صوته وصل وحتى من ننزل صنته  نفس ماكو غير التوتر واضح على وجوهم يراقبون  حركاته؛  اباوعله على طول ماگاعد  جكارته بيده  منتجي يخلي رجل على رجل  ويگلب بفونه احسه يلعب على اعصابهم مدخلهم بحرب نفسية

مرات اصفن لان رتبة عمي اعلى من رتبته ليش هيج يخاف منه وارجع اكول يمكن لان يحبه مايريد يأذي

كاعدة بالمكتب ودرع بالگاع يوكل الجلب دنكت خليت ايدي على بطني غمضت عمرج ماراح تحسين شي بداخلها ينبض

رفعت راسي صارت عيوني على درع اتخيلت اكوم اضربه على راسه اموته واحسسهم بالدااحسه ؛ هزيت راسي صافنة اني ليش هيج تجي براسي شغلات اجرامية

مسحت وجهي واستغفرت كام اجاني يركض حضن رجليه كال رئول  خلي ننزل جوه

- غوح انزل بين مااكمل كتابة

- اخاف جدو يكتلني حيل

-حتى ابوك يعدمه لاتخاف مايوصلك

-كومي وياي حبابة هسه هم يجي عمو دسار مثل الصبح  ويعيط على بابا واني اخاف

-شبي عمك دساغ وعلى شنو عيط

-مااعرف بس اجه راد يكتل بابا يكله كله بسببك انت طلعته واذا مالكيتها احركك انت ومرتك

-منو هذا الطلعة وعلى منو ديدوغ

- وحده اسمها رؤيا وكام يكسر بالكراسي ويصرخ  وكوة لازمه عمو ازر صار مخبل بعدين تعب كعد لزم راسه وكله اخذها يخويه مني

-عزه يمه شبي  اخيي ليش لعد ماصحتلي

-ضي ماقبلت كالت لاتكللها ترة تكوم تبجي وحتى عمو ازر كال لبابا ماطول اخذ ذنيج هسه يرد ياخذ العدك حضر نفسك وبابا گله كون الله يورطه

- وين ابوك هسه

-رجع من قبل شوية سألني عليج كلتله دتكتب ؛طلع الكل للحديقة حتى لايسوون صوت وتضوجين وهو دخل للغرفة نام

- خوش يله انزل يم امك واني شوية والحگك

- مااا اتضل تصرخ عليه ماتخليني العب تكول اشمرك يم اسماعيل المخبل ياكلك بس طلع صوت واني اخاف اضل ابجي

- هاي تعلوم بيبيتك القذغه الله يلعنها ولاتكول ابنهم عائلة اتغيد واحد نظيف بيهم ماكو همه جبناء مايكدغون للبول تغي المهتلف يجون علينه

عگدت حاجبي شنو بول تيغي مهتلف

درع - يله رئول كومي وناخذ ويانه براري يلعب خطية ضاج

- يله بلكي ياكل جدج وبيبيتك ويخلصنا منهم

غلقت الدفتر خليته كمت لزمت ايده طلعنا والجلب ورانا يركض رحت للغرفة فتحتها لكيت هيذام شامر نفسه عالجرباية بملابسه وبسطالة كد ماتعبان  ايده على عيونه رايح بغير عالم اشرت لدرع روح كدامي جايه وراك

اخذ الجلب ونزل يركض دخلت رحت يمه كعدت دنكت عضيته من خده وخر ايده فتح عيونه بتعب وخرني وندار نام صفح 

رجعت دنكت عضيته من ركبته انكلب على ظهره همس وعلي تعبان بس ساعه انام

- تعذب بالعالم وتجي تسوي غوحك مسكين

- معذب بزازين زينة؛  غير كلاب ولد كلاب

- كوم خلي نطلع ضايجة

- رأل تعبان وكلام الله

دنگت عضيته من يم شفته بعدني وباوعلي بيأس ضحكت ضحك على ضحكتي  و خربط شعري

- شنو دتسوي بالعالم الله يغجها بيك

- اي وعلي اليوم واحد فلت مني حسيت عظمه طگ بيدي

- لهيج اليوم تنام بالكاع

- راضي حتى بالحديقة بس خليني انام ساعة عندي خفر واحتمال اطلع مداهمة

-اتوسل

-مروتج

-بوس ايدي

جر ايدي باسها

-كول اني مهتلف

-مهتلف وكلب ابن كلب عبني شمرت بنفسي بنص النار لخاطر احصلج واطيح حظي بيدي

-يعني ماتحبني

-والكعبة  الشريفة احبج وحق داحي باب خيبر اموت عليج والاسمه الله مااشوف غيرج بس خليني انام

- يله كسغت خاطغي بس هااا ساعة وحدة

هز راسه اي

دنكت بسته من خده وكمت رد اتجتف نام صفح طفيت الضوه وطلعت نزلت مالكيت احد طلعت للحديقة لكيتها كلها متجمعة رحت كعدت يم ضي الي متجتفه و تباوع بغل لهالة ندستها باوعتلي همست هاي منو غجعها

- وحدها الكرمة عدهن نعال هيه وبت عمها شوفيها اشلون مخصلة شعرها استوها جايه من الصالون  وصار ساعة تتوسل وتبجي لعمي تشكيله من هيذام مامكلبها

- لعد ماتتطلگ شكو ضاله

- ههه هيذام مايطلكها خالها هيج معلگه بعناد ابوها دشوفي اشلون يباوعلج و يطحن

- بي حظ خلي يحجي ويه هيذام حتى ينام ويه بته اني شكو محملني المسؤولية

- دخلي يقنعه يرد اسماعيل للمصح بدل وكفتهم على تك رجل خايفين لايطلع من المشتمل ويكتل واحد منهم

-يكتل ؟؟

- اي موبعقله ونهار وليل يتهدد اكتل واذبح فكرة مزروعه براسه روحي شوفي اشلون حابسي محد يدخل يمه غير ابو وعمتي يغيروله ملابسه ويوكلوا مايطلعون غير وجوهم اسود من الخوف

-شوفي منو اجه

شالت راسها لكيت ازر جاي مدنگ اديه بجيوبه كامت هالة ركضت اتلكته باسته من متنه باوعلها بعدم اهمية وخرها واجه سلم و كعد يم عمتي رحمه كاله عمي وين جنت

ازر -بجهنم

عمي -شبيك لك لو هذا تعلوم القذر الجوه

-ياطلابة  القذر الماراح تخلص بويه اني شغلي وحد وهو وحد فهموهااا

- شسويت بقضية الاغتلاس

- حولتها لمحمد وخذت مكانها المخدرات

- وال… المن صارت

- تحولت للمقر العام صارت بيد  لهيذام

- شنووو هيذام اني شكلت

- على شنو تصيح تعرف هيج شغلات اختصاص هيذام وعندك اعتراض روح حاجي لادخلني بمشكلة وياا

-رافد الدغش شنو سالفته

-اختفى ماله اثر تكول مامخلوق نهائياً

هز راسه وحضن ابن ازر عدل وبته حضنت ايده تباوعلي بقرف درت وجهي كالت بنعوصه بابا داافكر اسويلك بعد حفيد

ام هيذام  - صدگ ولج غير هيذام يطير من الفرح

- هو لعد منو قنعني غيره كال سوي اخو لدرع والج يمي سفرة شهر اخذج ونروح  لاي دولة تريدها وعملية تجميل بدل الراح يتلف بسبب الحمل

- اي بلكي الله يهدي ويبطل فرعنة وانتي شرطي عليه سفرتين وحده هسه حتى يكون الحمل هناك بعيد عن عيون الحساد والثانية بعد الولاده

- مم اني هم كلت هيج حتى ناخذ راحتنا بس هاا درع ماناخذه ويانه نريد نتونس مو نركض وره طفل

-خلي يمي

ابراهيم - والج مني سيارة اخر موديل اذا بشرتيني بحملج

- ههههه لعد حضر افلوسك لان حبيبي مستعجل كلش من البارحة رادني بس اني كلتله انأجلها شوية

ام هيذام - ولج احنا ماصدگنا يرد لعقله

- ولايهمج عمه  اليوم اردله الموافقة

ردت اكوم لزمت ايدي ضي وهمست والله جذب  درت وجهي داادفعها  صارت عيوني على ازر يباع لضي بلهفة امنيته يكون ياخذها لحضنه

اخذ حسره وغمض وخله راسه بحضن عمتي رحمه كالتله شبيك يبعد عمتك

ازر - اني هم ابن اخوج ليش ماتحبيني مثل ماتحبين هيذام

- يااا ولكم وداعت ابو كلب الاسود كلكم نفس المعزه

-تعبان عمه

- عسى تعب كلبك بكلبي شنو المتعبك يروح عمتك

دنکت باست راسه عدل راسه وهمس حلمت حلم خنگني

- خير يمه

- واكف على حافة كدامي ابني وهالة ومن الجهه الثانيه …

- اي كمل

- اجت هوية قوية وكعتهم  كلهم ضلوا مكمشين بطرف الحافة وكلهم على فد صرخة يردوني اخلصهم واني واكف محتار المن اسحب لان اذا تحركت من جهه الجهة الثانية اخسرهم 

-بعدين

غمض ماكمل حضنت راسه باسته- ادفع صدقة يمه

هاله - هههه على شنو الصدقة واكيد اني وابنه خلصنا شدخلنا بالباقي يطبهم مررض

دتحجي عمتي بسرعة قاطعتها كلتلها عمه تجين ويانه

- وين يمه

- اليوم جمعة نغوح للمتنبي

-كلتي لهيذام

- اي وكال غوحي ولاتگعديني اغيد انام

- لاعمه مابيه امشي وانت تردن تفترن اخذي ضي وروحي بس لاتتاخرين

اشرت اي كمت اجه درع كال وياج اروح

هبة -  درررع

درع - بابا كال روح ويه رئول

- ولي عساك مارديت

ابراهيم - هو وابو كون هفة وحده

ام هيذام - يمعود صوتك ساعة ونزل

استغفرت عمتي رحمه  كامت ضي دنگت شالته واني لزمت الجلب رحنا اني صعدت السياره وضي حجت ويه الحارس عيوني عليهم خايفة يخابرون هيذام ويكتشفون جذب ويمنعوني واتفشل كدامهم و هبة تتشمت بيه

گطعت حتى النفس اردد ياربي عديها بسلامة ماصدكت شفتهم اجوا اخذت نفس حمدت ربي؛

صعدوا شغلوا السياره طلعنا  الطريق كله واني عيوني على فوناتهم لايكعد ويعرفني طالعة ماوصلنا اله ونص روحي خالصة نزلت بسرعة 

دخلنا للمتنبي صارت الكتب كدامي مثل الخيال خطف نفس الولد ابو المناظر يضحك بيده كتاب يأشرلي بي هزيت راسي

رحنا نفتر من مكان لمكان ناسية روحي بين الكتب امنيتي اشتري المتنبي بكبره اخذ واشوف بعد واحد احلى لحد ماصاح امجد كافييي

-سم

امجد - بكلبج لج رجلج ماهو امطلج هنا امسح المتنبي بوجهج

- تغه بغاغي جوعان

- شبيج ماتتحملين شقة

- يله كافي صدگ اخذت هواي خلي نغوح لمطعم ناكل ونغجع

شال الكتب رجعنا للسيارة صعدنا طلعنا للمطعم   مااتصل هيذام عرفت النومة ماخذته وصلنا ركن سيارته نزلنا دخلنا للمطعم كعدنا وامجد راح يطلبنا للسرعة دنگ درع باس الجلب جريته همست هسه اشلون تاكل

ضي- ياكل مثل البشر ترا الجلب انظف منج

- بمناسبة الجلب منو هذا الدغش الديحجون بي وشبي دساغ معيط على هيذام

- هذا واحد عبارة عن قنبلة موقوته اتفق وياهم يطلعوا مقابل مصلحة متبادلة ؛ طلعوا بم فر اللعبة وطفر  واكص ايدي اذا ماطلع هم متفق ويا ابراهيم بالختلة  وراح يكمل مصلحته براسه ويااخذ شكو شي اله ويطفر ويشبجها بينهم وجيبي السبع ابن السبع اليطلع ابراهيم عدل من بين ايديهم

-عزة شنو هذا شيطان

-انكس وداعتج وياخوفج يوصل السرة وتحرش بهيذام ويورط نفسه ويا ؛ دخيل الله مااكدر اصور حجم الدمار الراح يصير

درع - رئول  اريد اروح للحمام

- يله كوم حتى اغسلك ايديك

ضي - خلي الحارس ياخذه

- لا اني هم اغيد اغوح اغسل اديه كلها وتغاب  من الكتب

- لاتتأخرين حبابة هسه بلكي نلحگ  نرد قبل لايگعد  هيذام

هزيت راسي كمت لزمت ايده رحت للحمام دخلنا سديت الباب وراي وكفت يم البوري

استوني افتحه ماحس غير باب من الجهة الثانية انفتحت دخلوا اثنين زلم ملثمة يركضون حتى مالحكت اصرخ كلها ثواني واحد يجر درع من ايدي والثاني ضربني بنهاية راسي …

لاتنسون التصويت ❤️