رواية شيء من رصيف الدم الفصل السادس وثلاثون 36 - بقلم Leo Alfatlawi

شيء من رصيف الدم

بقلمي: leo Alfatlawi

بارت السادس والثلاثون

بارتين سوه

***رايه***

ضحكت بستهزاء واشرت شنو

رؤيا - الدغش الجان ضامته امج عنه عمر كامل حتى لانسألها ليش عافنا

- وين جان كل هالفترة

- بالسجن

- هذا  نفسه  الخابرج

- ونفسه الاخذ ثار رئال وكتل عمها لان سلمها لجاسم الكلب ونفسه الضحى بروحه حتى يخلصني من الخطفوني وراح ياخذ حقنا من كل واحد ظلمنا

سكتت مامستوعبة التحجي

- گومي راية

فجر  - لااا ييمه زلمتج  يتسودن  وعلي وانت رؤيا يبعد عمتج خلاج دسار امانة عدنا شني نرد  اذا سأل وينها دخل الله ودخلجن لاتعملن هيج بينا

- گومييي راااية

كالتها ومدت ايدها تستعجلني
باوعت للرجال عيونه عليه نظرة الحسرة  والحنية واضحة بيهن درت وجهي على عمتي تباوعلي وتبجي بتوسل لااسويها

لزمت مداليتي صارت عيني على كبر رند كلبي متلهف اكوملها وبنفس الوقت محتارة بيمن اثق لان ماضل عندي حيل بعد للخسارة

اخذت نفس بكسرة ابتسم الرجال ومد ايده اشرلي تعالي

- اني مااعرفك ولاادري ليش ماسألت علينه بعد كل هالسنين بس شوف هذا كبر زوجي وذاك كبر اختي وذوله روحي من الدنيا راحوا مني  يعني اذا ضالة عايشة هو علمود رؤيا ورئال

رافد - وانتن كلجن بناتي واجه الوقت تردن لحضني مسحي دموعج يبعد ابوج  و گومي موبت الدغش التنزل دمعتها

- ههه نزلت ونوجعت ونظلمت وين جنت

-جنت اجمع سنين عمري الضيعتها لخاطر عالم شرب دمهم حلال انغدرت اخذوجن من حضني وشمروني بعالم مابي طريق نجاة غير الموت وجان  ثمن ثقتي الهم انتن

- واحنا شنو ذنبنا

- ذنبجن بنات واحد جان مستعد يبيع الدنيا علمود يحميجن وداعت كل ثانية جنت اتأمل بيها شكلجن لاخذ حق كل وحدة منجن من اعمارهم

- مااريد حقنا رجعلنا رئال

- قبل لاتغمض عيونج اختج بحضنج بس كومي يعيون ابوج  قبل لايجي احد

رجعت درت وجهي لعمتي اشرتلي لا وبجت بصوت  باوعت لصگر كال لايخوي  لاتعمليها ابوس رجلج وراس ابوي ينحرني عمييي

لزمت كبر غزوان باوعت لصورته نزلت دموعي  همست كوم كلي شسوي لاتخليني هيج ضايعة

اجوا رؤيا وبابا دنگوا كوموني لطمت عمتي على وجها وصكر كام يدفع بيهم ويصرخ  بعلوا صوته تركوهااا  ولج رااااية لاتعمليهاااا ولكم  اولاد الكلببببب تركوهاااا

جروني للسيارة صعدوني ردت احجي عصرت ايدي رؤيا اشرت لاااا وسدت الباب
صعد بابا بالكدام حرك السيارة شحطها وطلع يمشي بكل سرعته اباوع من الجام عمتي كعدت بالكاع اتملخ بروحها وصگر يتضارب يريد يلحكنا لحد ماطلعنه شهكت جرتني رؤيا لحضنها وهمست محد يستاهل دمعتج

- ماقصروا ويانه

- الدنيا بكبرها قصرت ويانه محد اله يمنا حق غير اخيتنا التركناها تصارع الحيوانات وحدها بس حتى تبعدهم عنا

- وماما الضحت بنفسها وسلمت روحها لخاطرنا

- وذني الوحيدات لازم نفكر بيهن من بعد طفولتنا العشناها برعب

-من اشوكت تدرين بي عايش

- من جنت ارجع بليل من الشغل واحس واحد يراقبني من بعيد بس حتى يأمنلي الطريق من جان يوصيني عليجن ويگلي لاتخافين اني بظهرج

- ليش ماكلتيلي

- ردتج تعتازي حتى تتقبلي بحياتج

- كلش تأخر علينه مو

عضت شفتها ولمعة عيونها نزلت دموعي خليت راسي على متنها صارت عيوني  بالمرايا الامامية اجت بعيونه رغم شكله المخيف وشخصيته الصارمة  بس جانت ابتسامته كلها الم ولهفة ؛ غمضت لان مااعرف اعيط بوجهه لو اضربه لو اعاتبه

مافتحت عيوني غير على صوت رؤيا وهيه تكول البتاااوين

بابا - ملجأ الذئاب الخارجة عن القانون

- ماتعودت اثق برجال لان كلها حيوانات بس هم راح اثق بيك

- ابوج الترگج طول هالسنين وخلاج تصيحين بأسمه لواحد ثاني مايصلح تثقين بي

- راسك بيدي قبل لاتلتفت ابتره

- وگلبج بيدي  اقل غلطة اقلعه واشمره جوه رجليج

-جبان ماتكدر تسويها

- تجربين يالخرزة

- مالعب ويه جهال تتختل جنها جريدية

- ارد ابنيتي ونتواجه يبت الدغش

باوعتله رافعه حاجبها ابتسم  وانتجه ضحكت ضحك على ضحكتها اباوع لمتونه تنهز كد ماشايل هيبة؛ وخرت راسي وصلنا يم بيت قديم نزل فتح الباب رد صعد دخل السياره نزلنا

اندار راح يسد الباب واني اباوع للبيت قديم كلش ممر صغير مفلش وبصفه حديقة هم صغيرة يابسة مقابيلنا باب مفتوحة مبين مطبخ بس كله تراب وسخ

حسيت ايد على ظهري درت وجهي لكيته وراي باوعتله رفع ايده مشه اصابيعه على وجهي همس رايه  اول فرحتي الجانت تتلگاني من الباب تركض وتعثر حتى تحضني

ابتسمت

- بيوم الماجيبلها نستله تزعل ودير وجهه توصل نص الطريق وكلبها ماينطيها ترجع تجي تركض تخلي راسها بحضني

- مافد يوم حسيت بكلمة بابا واني اكولها دوم احس اكو نقص بروحي ادور على ذاك الحضن الي اضم نفسي بي واشكيله من تعب يومي

- تلزم ايدي وتاخذني للغرفة بسكوت عن امها تأشرلي على خواتها حتى اشيلهن اخليهن بحضنها 

- ماكدرت احميهن حرموني منهن حيلي خلص واني اتوسل يردوهن الي منين ابدي اشكيلك من اختي الجانت دنگ على رجلي حتى لايدير الزيت عليها لو من الثانية الجانت ماتغمض عيونها وهيه بنص الظلام بس حتى تحمي نفسها من قذارتها لو الصغيره الي تركتها حتى اجيبلها لكمه تاكلها اجيت لكيته دافنها

- ماخليت مكان مادزيت بي اسأل وراجن اسنين واني احسب بأعمارجن وارسمجن عالحايط حتى من اطلع  ماكون ناسي شكلجن

- اتمنيت اكول كلمة بابا واني حاسة بيها

جرني لحضنه بجيت  حضني حيل وكال اووف يابوية شكد محتام لحضنتج

صاحت رؤيا ديله اشلون ابو هو جنه غلف ثلاجة خربانة بس شكل

وخرت عنه ضحكت واني امسح بدموعي باوعلها رافع حاجبه

رؤيا - بس نزل حاجبج لان كلش مالايكتلك وليش جايبنا هنا ماحصلت بيت انظف منه شوية

- من تكون مفلس تحترم نفسك وتعيش على كد شربة المي

- استلم انت منو الطلعك من السجن ودلاك علينه

- رجل اختج

- نفسه الي راح تغدر بي وتاخذ مرته منه

- حذرتهم كلتلهم بناتي اذا انخدشن اخدش ارواحكم

- المكان مكشوف ياابو عگرب

- انتي بس لاتغدريني محد يلكفني

- للاسف كلشي احتمال ورثت منك اله الغدر لااا

- الغدر اختصاص رئال والصبر والتأني راية 

- شوكت تجيبها

-اجيبها وتملين منها وتردين تكتلها وملص اذاناتح

- اهااا انت من هذا النووع لعد اسمع ياسبع اخوتك شايف هذا وجهك المشبوه التكول وجه فرخ اطراح  ماتنعرف ملامحه وين؛ اسوي الك كرشة عجل ارمل

- شايفه ذيج التربة الوراج ادوفج بيها دوف شرط اخليج قبل لاتسمعين صوتي ادفنين راسج حالج حال النعامه البيها جرب

- لك منو النعامة الجربة

- نفسها الرجلها شمرها على كلبي وطفر بسبب وساخة وجها

- ويگلك ليش ماتنطي مجال لمعتوه يحجي وياك دتعال خلي اعلمك منو الزمال الشمرني على مخربط  مثلك

هز راسه ودنگ يكف برداناته ؛ وكفت تتلفت شافت حديده بنهاية الحديقة ركضت نزلت شالتها اباوع لبابا طگ ركبته من الجهتين وشرلها تعالي؛  فتحت عيونها بمكر واجت بسمة الشر مزروعة بشفافها عرفتهم نفس العقل وراح يسون مصايب مالها حل

رفعت الحديدة واجت تركض بعدها ماضاربته بخفة ايده لكفها نتلها اخذها منها شمرها  اندارت رادت تضربه بوكس لزم ايدها لواها وره ضهرها شل حركتها بيده الثانية كمش وجها عصره دنگ باسها وحجه من بين سنونه اكو وحدة تكتل ابوها

- الي يبرز عضلاته على مره موجال خليك زلمة واجهني وجه لوجه

-رعنة

- لاتغلطط

- تربية شوارع

- شوارع ولا سجون

كز على سنونه دنگ رفعها من بطنها اشرلي يلا ومشى كدامي ضحكت دخلنا جوه باسها وشمرها  وكف عدل قميصه خله ايده على متني كال ادري البيت تعبان بس ماردت اسكنجن ولا اوكلجن بفلوس حرام

- يعني راح نعيش هنا

- لبين ما الله يفرجها وأمنلجن مكان  يلوگ بيجن

- مانريد والله كافي  بس كون ترجعلي اخيتي ماتتخله عنه بعد وكل فتره تاخذنا نشوف ماما لحد ماتطلع وتجي ويانا

- راح اردلجن اخيتج واعوضجن عن كل المريتن بي

- يعني بعد ماكو ذل ولاخوف

-هواي تعبت حتى اوصللجن وارجعجن لحضني اديت دين قسم مااوصل لحرام ولاامد ايدي لمنكر بس يرجعجن الي

-تأخر علينه هواي لحد ما انتهينا

-لكل نهاية بداية وانتن بداية ضحكتي للدنيا دفعت نص عمري فداء لخاطر اردها

-رجعلنا  رئول

-رئال ماخذه ضابط يتسابق ويه الشيطان على جهنم مااكدر اتحرك اذا ماأمن الطريق  اكيد وصل  الخبر لرجل الخرزة  وهسه حضرولي الشطرنج واخذوا الجولة الاولى لخاطر يلعبوني عدل

- يعني شنو ؟؟

-كلفت جماعة تراقبهم بين ماياخذون كم كيم خلينه نظف البيت ونرتبه حتى تخف الصدمة عليها شوية ماكو عاقل يجيبوا من قصر وخدم يشمروا بيت مهجول ويكلوله عيش يضل صاحي

- مابي شي بس تراب ووساخه هسه نضيفها  والله اسوي الك جنة ورئال حتى لو عاشت بقصر راح تضل روحها متلهفة لحضنه اختي اعرفها اكثر من نفسها

باوعلي ساكت صارت عيونه على الميدالية بصدري اخذ نفس بحسرة وابتسم وهمس الضاهر خلصت معزتها وتخلت عنها مثل ماتخلت عني

- عمرها ماتخلت عنها جانت بكل كسرة تلزمها وتعاتبك ليش عفتها وحدها

- ماتركتها هيه غدرتني

- ليش هيج سوت بيك وهيه جانت تتأمل المدالية بلهفة وتسولف وياها بالختلة حتى لانشوف دموعها ونسألها منو صاحب هالخنگة الي خلصت عمرها تشكيله

- كبرتي راية

- وبعدني انخاك تخلي خواتي مثل قبل بحضني

جرني لحضنه باس راسي وهمس اردهن داعت هالمحنه الشايلتها

- تدري قبل كم ساعة جنت مأيسة  من الدنيا وواصلة مرحلة  بس الله اليعلم بيها

- منا وجاي بعد ماكو شي اسمة يأس بناتي غير الضحكة ماتمر على تعبير وجهن

وخرت منه  مسحت عيوني وباوعتله

- ادري مستغربتني وحقج

- داحس روحي بحلم وكل هذا وهم

- ماطول دخلتي بحضني وشمرتي همج بي يعني راح تضلين متمسكة بالحلم وتسامحيني عالصارلجن بغيابي

-غزوان جان يدري بيك مو

- وذباح المنعة يگلج لخاطر لايوجع كلبجن بماضيي اكثر

-وهاي انت رجعت وراح تعوضنا مو

-شتكولين انتي  يابنت الدغش ؟؟

- لعد يله خلينه انظف البيت حتى ترجعلي اخيتي

- انتن كعدن واني انظف بس كليلي شنو اسوي

وكفت اباوع داير مدايري المطبخ خالي مابي بس بريمز وكم حاجة مال طبخ  مشيت دخلت جوه صالة صغيرة بيها صحيات هم تعبانة وغرفة نوم وحدة فارغه بس تراب وسكراب

انداريتله اشرلي  هااا

- نعتاز ادوات تنظيف وكم شغله دااسجلهن الك تروح اتجيبهن

- تأمرين

- واريد كم شغلة نفرشها يعني موهواي

- طلبي التردي من عيوني  

رؤيا - وانت وكعت من عيني رجل ماڨيا واني واني تالي وحدة مثل هالثولة دزك تجيب ماسحة حتى تنظف بيها وسفة زين شاربك احسن

- ذكريني من ارد اغسل وجهج ويه البيت

- ههه يالكوميدي من هيج ماما خذتنا وطفرت

دنگ

- اووو راح يعيش الدور لاتضوج  يله حلو حلو

هز راسه بيأس وطلع باوعتلها همست اشلونها المفاجأه

- والله بعدني مامصدگه  داحس روحي داخله بتخيلات

العشنا جان تخيلات منا وجاي ماكو غير الحقيقة صح ماجنت طايقته وماتخيلت يجي يوم وغفرله بس لخاطرجن ادوس كلشي اسوي

-بعدج محملة نفسج المسؤولية

-لان اني الضيعتكم واذا مارديت لميتكم اعيش طول عمري كارهة نفسي

- صدك رؤيا خلصت معاناتنه وراح ننجمع من جديد

- ويه اب بس اسمه يرجف اكبر شارب ااااخ شكول عليج ماما الله يسامحج عالسويتي بينه

- احسه حنونه ليش جذبت علينه وحرمتنا منه كل هالسنين

- سأليها بلكي تلكين عدها جواب يرضيج ويجبرج ماتحقدين عليها

- رؤيا احترمي  فدوة ترا دتتجاوزين هواي عليه ميصير

- انجبي وخليج بالوساخة هاي اشلون راح انظفها ابن الحمقاء تاب على حضنه اخاف معوزين طياح حظ

- صدگ تحجين والله اخليها جنه غير هاي جانت امنيتي عزززه مامصدگه والله

- شتكولين اذا وصل الخبر لذباح شراح يسوي

- لاتجيبين طاري لان مااعرف واحد بهذا الاسم

هزت راسها دنگت طبكت رداناتها ولمت شعرها كالت يله

ضحكت سويت مثلها وبلشنا نشيل بالسكراب ونطلع بره رغم كل الصار وبعدني احس روحي  بحلم صح جنت ادري بي عايش وسمعت كم مرة رؤيا تحجي ويا بالختلة بس ماصدگت انجمع بي

شوية واجه جايب كومة اغراض حتى دواشگ سفنج وبطانيات ماخال شي؛  شمرهن بالطارمة وذب قميصه واجه ويانه

اذا احنا جنه مامصدگين هو اكثر يوكف يباوعلنه ياخذله صفنة ويرد يسحبنه لحضنه يبوسنا ونرجع للشغل بس هيهات رؤيا تعوفه بحاله اذا ماتشمر كلمة لو تتحارش بي ياخذله عصره وجه لو ضربة ويرجع ينگل بالحديد

واكفه داافرش بالغرفة دخل كال كافي يله ارتاحن الصبح نكمل شغل

خليت الدواشگ طلعنا  احنا غسلنا ادينه وهو قفل البيبان ؛ رجعنا للغرفة دقايق ودخل بيده لفات انطاني واخذ واحد من الدواشگ كال شديتلجن سلقي سلقن الباب وراي

طلع بالصالة فرشه وكعد وحده احسه شال الهم عنه بهاي سوايته صح ابونا بس الرعب الزرعه بينه جاسم خلانا مانثق بأحد وهو هم حس علينه

كامت رؤيا سلقت الباب واجت شمرت روحها يمي تمددت بيدها لفتها تاكل وتغفي من التعب خليت راسي بصف راسها لگمتين ورحت بالنوم بدون لاادري

كعدنا على دگة الباب اباوع صاير الضهر كمت فتحته لكيت بابا بطرگ الفنيلة ام التعلاگة والبنطلون واكف بيده صنية ريوگ انتبهت لشكله صدگ يجيب التايهة ووجه مشبوه موقانوني على گولة رؤيا عضيت شفتي كوة كاتمة ضحكتي

حسته لكفها بسرعة رفع حاجبه يباوعلي صفح ماسيطرت ضحكت ضحك على ضحكتي وگال ماعاجبج شكلي يبت رافد

-لابابا موقصدي وشنو هذا بيدك ليش تعبت نفسك

- ريوگ لاحلى  اميرة بوجه الارض صباح الخير يروح ابوج

-وين رئول جان كالتلك صباح النوغ

- ماضل كلها كم يوم واسمعها يله روحي غسلي وتعالي انطيني رئيج بشغل ايديه

- جان كعدتني اني اسوي

- اميرتي ماتطبخ بس تتأمر يله لج روحي بين مااصبلج جاي

ضحكت وطلعت بين مارحت للحمام طلعت واكفه اغسل وجهي واشوفه جاي گالب رؤيا على متنه وصل  يم البوري وخرني نزلها وكمشها من كفشتها دنگ مد ايده للمي كام يشيل ويغسل بوجهه وهيه تصيح لك لييش

دفعها وصاح  بت الوسخ  مي وبلاش حتى البزازين كامت تغسل شمنتظرة

- رافددد لاتخليني اتجاوز  وداعت امي اذا مديت لساني اخليك ترد للسجن بس لخاطر تلم كرامتك 

- كمي لج ام الجكاير لمي كفشتج بالاول خلي نفرق بينج وبين القردة حتى نعرف شنرد

-ويجي الكلب ابن الگلب يكول هذا ابوج لازم تحترميي

رفع ايده ضمت وجهه بسرعة دفعها وراح للغرفة رحت ورا بسرعة لان مالي خلگ لسانها اعرفها تندار عليه و تشمرها براسي

كعدنا يم الصنية لكيته مگلي بيض وخال جبن صبلي جاي ونطاني صمونة اجت دخلت گالبة خلقتها كعدت كدامنا تربعت تباوعله بغضب صبلها جاي واخله صمونة كدامها درات وجهه زعلانة

دنگ اخذ صخام من نهايه الطاوه ولزم وجها مسحه من الكترين كالها يله بابا لاتضوجين رجعنا وسخ وجهج اكلي

باوعتله صغر عيونه گوة تمالكت نفسي لااضحك  دمغها كامتله تريد تتماطل ضحك وكاللها بس نكمل ريوگ؛  رجعها گعدت

مرت الايام يوم احلى من يوم رغم احن الايامنا القديمة ومرات اخذ صفنا وين جابتنا الدنيا بس من اشوف رؤيا اشلون تتماطل ويا وهو معاملته وخوفه علينه احس نفسنا رجعنا لايام الطفولة صرنا نكمل شغلنا عالسريع وننتظره يدخل من الباب بهيبته وابتسامته المليانة حنان نتلكا حتى ناخذ من ايده العلاليگ 

اكثر الوقت يمنا مايكدر يتركنا بسبب المنطقة وهم يعرف يدورون عليه  مايطلع غير بليل يجيب سيارات عطلانة ويضل الصبح بالساعات واكف على رجلي يصلحها علمود يحصل فلوس بالحلال بين يوكلنا بيهن وبين يلم حتى يأملنا مكان احسن من غير مغثة رؤيا الي مااعرف اشلون حاملها ماتگعد ولاترتاح اذا ماتغط لراسها بالدهن

هو يصير العصر وهمه يتجهون للحديقة ترتيب وزراعة واني لازمة المطبخ والبيت 

كاعده اگلي بتيته  واباوعله اشلون واكف بالحديقة  والعرگ ينزل من الكترين بس مستمر يشد حبال حتى يكمل مرجيحة رؤيا

صفنت شيصير لوما تاركنا ومكملين طفولتنا بحضنه 

اخذت نفس طلعت البتيته خليتها بالماعون وهمه مستمرين بالشغل رغم كل هذا بس مرات اخاف منه خاصتاً بليل من يتلثم ويطلع لو اسمعه يخابر واكثر مخابراته ياعن بضاعة ياينطيهم تعليمات اشلون يلگفون واحد ويخلوا بمكان ويبلغون عليه من بعيد 

متمددة على فراشي تعودت عيوني ماتغمض اذا مايأذن الفجر انگلبت صفح العب بشعر رؤيا واسمع طگطگة بره عرفته راح يطلع كمت فتحت الباب لكيته واكف يدگم بقميصه رحت يمه شال راسه كال ها بابا كعدتج من النوم

- لااني منتظره يأذن حتى اصلي فرد مره وانام وين تريد بهيج وقت

- يبعدج ابوج اودي السيارة كملتها واكمل شغلة عندي انتوا لاتنتظروني على الريوگ وعينج بالخرزة لاتخليها تطلع بره

- بابا وعدتنا ماتوكلنا حرام

- لواعرف اشلع من لحمي واخلي كدامجن ولااللوث دمجن بفلوس حرام

- تره منتبهتلك صار كم يوم مهموم  حتى ضحكتك مونفسها احجي بابا اسمعك منو مضوجك ذباح لو دسار

- ههه لاذباح بعده بالسجن وصح رجل هالرعنة يطفر كل يوم بيت ويفتر جنه مسودن بس هم مو يمي

- رئال بيها شي موو

دنگ

لزمت ايده  همست شبيها اخيتي

- لابابا مابيها شي بس تعبانة شوية وصار كم يوم طلعوها من المستشفى ماجاي احصل طريقة اوصل لاخبارها

- ماتكدر ترجعها النا

- خلصت عمري اشمر نفسي بالموت واجازف بروحي بشغلات ماتمر على عقل صاحي من توصل لبنت روحي ترديني اعجز ؟؟  لو اعرف اخرتي بيها هم اخذها منه واردها بينجن

- لابابا لاتعوفنا استونا كمنا انام براحة واحس روحي عايشة بأمان والي قيمة بيتي

غمض وهمس ااااخ اشكد اتمنى اطوي الوكت احرگ ذاك اليوم الثقيت بي واني اسلمهم سري

-موجوع من غدر ماما  موو

باوعلي ساكت  رفع ايدي باسها وابتسم

- مااعرف شصار بينكم وليش هيج صار بس امانة ماما ما تزوجت بس حتى تحمينا عمرها مااعتبرته زوجها حتى رند من صارت اني جبيره اتعده عليها غصباً عنها واردت تطلگ بس خالي منعها

هز راسه اي ودنگ يكمل بدگم بقميصه

-مم شنو تحب اسويلك غده

رفع راسه ضحك مد ايده لزم خدي وكال اي شي من ايد بنيتي الحلوة طيب

- لاتتأخر علينه تره بتك الخبلة اذا ماشافتك اضل اطفر تشلع گلبي

- البارحه لكفتها دخن عينج عليها

- بابا مااكدرلها  انوب تهددني اذا شكيتلك تكتلني

- هههههه مشاغبة وماخذتلها واحد نفس الخبال ضال يكمز من بيت لبيت بدون عقل على ساعة يلزموا يشلعون راسه

-كسر كلبها

-الصار غصباً عنه بس اني ردت ابعدها عنه حتى يعرف وراها ابو يكسر ظهره اذا فكر يضوجها موبنات  الدغش الي تنزل دمعتهن 

-واني مااريد ارجع الاحد

-صح الخبل مالتج گوه لازمي بالسجن ويكولون يمشي ويفلش براسه ويتهدد اذا طلع يحركني  بس هم راح اگرصلج اذانه

-بدون لاتكرصه اني ماعوفك ولاراح اباوعله من الاصل

-صدگ التحاليل طلعت والمتبرع نتيجته متطابقة واكو علاج لازم اجيبه الج حتى تاخذي قبل العملية

-كلشي مابيه صرت زينة بعد مااسوي عملية

-ميخالف هم اجيبه محد يعرف الدنيا شضامة

- ربي يحفظك النا 

ضحك وجرني لحضنه باس راسي - هاي تكوليها من ارد حقجن واجيب الاذوجن امدهم جوه رجليجن مثل الحيوانات يبوسون رجليجن ويترجوجن بس حتى تسمحولي ارحمهم بالموت

- واني اكول رؤيا على منو طالعة درو المشاكل مداور

- هههه هاي  خرزة البتاوين لاتحجين عليها 

- يله راح يطلع النهار روح بسرعة

-تخافين عليه رايه

-البت مالها قيمة بدون ابوها عشت ذاك الشعور   مااريد احس بي مرة ثانية گد بشاعته 

راد يحجي وندگت الباب مسح على شعري كال يله قفلي الباب وراي ورجعي نامي

دنگ شال اللثام طلع هو يلف بي وكفت يم باب المطبخ  راح فتح الباب دخلوا ثنين سمر كلش وضخمين شكلهم يخوف بسرعة صرت ورا الباب سديها دااسلقيها واسمعه يكلهم شسويتوا

-كلش تمام  ريسنا منتظريك يم المسطبات

-حضرتوا الاسلحة

-والولد اتوزعوا حسب التعليمات الأمرتنا بيها

-مااريد نقطة دم وتخليكم نبهين اول مااتحرك تبلغون الامن وراي

عفتهم ودخلت جوه للغرفة عرفته دياخذ حقه ويسلم شكو واحد غدر بي تسليم ايادي بدون رحمة من بعيد

سلقيت الباب  ورديت تمددت يم رؤيا صفنت واني اكول هالبنية ليش هلكد  كمية الاجرام بداخلها اثاري ماجايبتها من خالي

اباوع لخدودها وسخة وجوه عينها شخط وبحنجها طبر مغمضة بغضب  اتحس جابريها عالنوم گالبة خلقتها اي براءة ماكو بوجها  ضحكت لزمت ايدها  وغمضت دقايق ورحت بالنوم بدون لاحس

كعدت على صوت سيارة تدخل للبيت انتبهت لرؤيا ماكو كمت واشوف الساعة ٣ الظهر رحت غسلت وجهي دخلت للمطبخ دخل بابا بيده علاگة ويده الثانية لازم رؤيا من كفشتها يجر بيها كلها تراب حال الضيم حالها  كلتله الله يساعدك بابا

- على اختج لامااتصور شكد عاشرت عوجان بحياتي بس مثلها لااا مامر عليه

- عزه شنو سوت اني خذتني النومة

نتلها وصاح  احجي كولي اجنتي تسوين

رؤيا - ايدك رافد خليني محترمتك 

- انعل ابو الاحترام الجاي منج الكبررر مال الزمايل الحافرته بالحديقة المن من اخذج هسه وادفنج بي اكو ابن عاهرة يعترض

- هاي نتيجة الجهل كلتلك موگبررر موگبرر هذا مسبح

- يامسسسبح بت الكلببب حفرة مليانة خياس ليشش معوزة وصخخخ

- انت بس اهدأ وتعال وياي نوخر الخياس نترسه مي وشوف اشلون راح يصير اذا ما حتى بليل كمت تنام بي اطلع ماافتهم

- هو الجرو ابن الجرو الگلج انتي تفتهمين منوو؟؟ ولج انتي عبارة عن ضفدع قذر نطلعه من خيسة يشمر روحه بخيسة انكس 

- شوف انت غلطت واني مارديت عليك ليشش لان انت ابوي ولازم احترمك حتى تعرف اشكد مترباية

دفعها وصفگ بأيديه هز راسه يائس ضميت ضحكتي نكثت ملابسها راد يدخل ليجوه ركضت صارت بوجها منعته  اشر شكو

رؤيا - شفتك تشمر السجينة على صاحبك وگعت الشفقه مالته بدون لاتأذي

- المطلوب

- علمني اشلون اشمرها بدون لااطير صفحة الوجه

- روحي حبابة  غسلي وجهك وغيري ملابسج جبتلج ملابس  يم اختج

- ميخالف بس علمني حباببب مواني بتك تقبل اكتل واحد واخلص عمري بالسجن

- التسويها وهيه عمية ماتصعب عليها وهيه مفتحة

- غلطت

-مرات الطمع يكلف

- ردت اعذبه ماردته يموت بسهولة

- التعذيب اله اهله روحي غسلي وتعاليلي بسرعة خلي اعلمج اصول المتعة باللعب ويه هيج حيوانات اشلون يصير 

ابتسمت لمعت عيونها تكول كاللها راح اخذج للمتنزه مو اعلمج اشلون تعذبين بشر

ركضت اخذت العلاكة مني من استعجالها مافتحتها شكتها بالنص طشرت الاغراض  طلعت تراك خذته وبوجهه للغرفة استغفرت كعدت لمتهن خليتهن على صفحة طلعت المخضر خليت التخته كعدت احضر بالطبخة

دقايق وطلعت طايرة اشرلها على شعرها دنكت لمته بين ماذب قميصة وطلع سجينة راح خله مخدة واجه سحبها خلاها بنهاية الصالة وكف وراها

اباوعله خله السجينة بيدها وبلش ينطيها تعليمات اشلون تشمرها ويامكان الخطر وشنو المكان اليشل الحركة

اكثر من ساعة وهو مستمر شكد جانت رعنة  وتضوج من تخطيها بس جان صبره عليها اكبر من رعونها ماتركها لمن ضبطتها؛  دفعها شمر السجينة  وكف طگ ركبته  رفع اديه واشرلها تعالي عرفته راح يعلمها اشلون تحمي نفسها من ضربة مفاجئة

وصدگ ثواني وبلشوا يتضاربون اباوعلها حركاتها سريعة مااعرف لان عاشرت ولد الشارع هواي لو دروس دسار خلتها هيج خفيفة ونبهه رغم بابا خبرة بس ماكدر يغلبها تكول ريشة اطفر وتفلت بخفة

اشوف الفرحة بعيونه بس مايريد يخليها تحس بي؛ اشكد مايكدر يقسى عليها حتى يعرف شكد تتحمل

مر وقت وهمه مستمرين لحد مارن فونه جان مجتفها دفعها راح ينفت شال فونه بس باوع بي ركض لبس قميصه اخذ اللثام وطلع يركض

اجت رؤيا مسحت وجها دنگت شالت المي شربت ورجعته كعدت يمي مددت رجلها كلتلها وين راح

- وين يعني كل قوته يكتل واحد ويرد

- وهيج تكوليها بساطة

- لان همه حيوانات اصلاً الموت هواي وياهم

-ليش ماكو براسج غير الدم والكتل

-من تختلين جوة الدرج وتسدين حلگج بثنين ايديج حتى لاتطلع شهكتج وتلكفين وبدل الصوندات يصير زيت حار يخليج تتمنين الموت ؛ من اكبر امنية عندج تغمضين عيونج بدون لاتحسبين الوقت خايفة يجي الصبح وماتعرفين اشلون تحمين نفسج من لمساته وقذارته؛ من تموت اختج بين ايديج وهيه كل همها تاكل لفة تسد جوعتها تعالي كولي ليش

-ماراح تنسين

-من تتخلين عن مناظر غزوان وتتقبلين حياتج الجديدة

- ماكو شي جديد هياتنا بالبتاوين ودااسمع كل ليله صوتهم وضحكهم بعدنا خايفين نطلع؛  عايشين بدون مستقبل على ساعة ابونا يلزم وجاسم يرجع يمكن ذاك الوكت جان عندي امل وبيه انهزم  حتى  اعيش هسه لا اي شغف للحياة ماكو  ولامستعدة احارب لخاطر شخص لان تعبت ومليت

- هم يجي يوم ونعيش مثل باقي البشر

-ماردنا شي حلمنا بسيط لدرجة اخجل اسولف بي

- بيت صغير نلتم بحضن امنا ورئال تقرانا كتابها للمرة الالف وابن ابو الما يتفاعل وياها بالاحداث

-هم يجي يوم واشوفها

-ونرجع لذاك البيت نحرك جاسم وناخذ لعبة رند  ونروح نعيش بغير محافظة ننتظر ماما

-وغزوان

-غزوان الحلم الجان لامنه وگعدنا منه

خليت راسي على متنها صافنة الوقت يعدي احنا على كعدتنا ساكتين لحد مانفتحت الباب دخلت السيارة نزل بابا يركض سد الباب وفتح باب السيارة دنگ گمنا على حيلنه واحنا انشوف طلع رئال شايلها بيده احس جسمي كله انشل اريد اتحرك لو احجي مااكدر

دخل يركض عالسريع صاح رؤيااااا مااااي

رحت ورا گوه اجر بنفسي دخلت للغرفة لكيته خالها عالدوشگ يضرب بوجهه اجيت يمه صاح عينج بيها وگام طلع يركض

كعدت يمها اباوعلها وجها باهت نايمة بعمق بعدها على براءتها  ؛ مديت ايدي مسحت وجها عالكيف همست موكلتلج ماتأخر عليج بس اجيب ماما من المستشفى واجيج ليش مانتظرتيني

شرجعج بذاك اليوم ماكدرتي تشوفين مكاني فارغ  لو خفتي وحدج

ههه تدرين من رجعت الطريق كله اشكي لماما منج واكلها شوفيلنا حل وياها تره صرعت روسنا ويه قصصها

نزلت دموعي مسحتهن وضحكت - غزوان جان يغار منج يكول تحبيها اكثر مني جنت اصرخ بوجهه واكله هيه لزگة النهار وليل مكمشة بيه حتى بليل تدحس روحها يمي تكول بزونة

عضيت شفتي - من رحتوا كمت انام براحه بعد لاغزوان يزعل وانتي تزعجيني بنومتي  هه دريتي بيتنا انهد وضاعت لمتنا؛  ماما راحت ورنوده ماتت وغزوان نكتل صفيت وحدي افتر النهار كله ادور على اثر لصوت هوستكم وضحكتم  براسي صرت اكعد الليل كله بس حتى اسمع اذان الصبح وتخيل كعدتنا

اشلون انطاج كلبج تعوفيني مو تدرين  دقيقة مااكدر بدونج زين من سمعتي غزوان مات ماگلتي اشلون حال اخيتي هسه؛  ولج حتى عزززا مااخذته ولاشكيت لاحد جنت منتظرتج لان ادررري بس انتي تحسين بألمي  لييش هيج سويتي بيييه گومييييي رئال ولج كوميييي شوفي حالي بدونكم اشلووون

جريت راسها لحضني وبجيت بعلوا يصوتي صارت كدامي رؤيا دموعها تنزل ضحكت وحجيت بشهكة رجعت رئال

هزت راسها  وبجت بصوت

- شوفيها اشلون حلوة

-راية اخيتنا ماتتحرك

-عرفت كلبها راح يحن وراح تردلي لان ماتتحمل بعد اكثر

-لج راااااية مابيهااا نفسسس 

-بعد مااخليج تمدين ايدج عليها واخليها للصبح تقرا وكل ماتخلص ارجع اكلها عيدي

جرتها حيل من حضني رجعتها للمخدة  ردت اخذها دفعتي وسحبت المي غسلت وجهه دنكت تمسح بي وتباوعلها بخوف نفسها ضعيف عبارة عن جثة هامدة

زحفت تقربت يمها لزمت ايدها امرغ بيها ورؤيا تضرب بوجها بس دموعنا تنزل مانعرف شنسوي اكثر من ساعتين واحنا مكابليها  ساعه نبجي وساعة نتلفت محتارين وين نروح ؛ الي تغسل والي تفرگ باطرافها بس نريدها تصحى احس روحي خلصت وبديت ايأس منها  استوني اريد اگول لرؤيا تكوم تنخي احد من برة واسمعها هذت بأسم هيذام

غمضت اخذت نفس براحة  ورؤيا  تفلت عليها وصاحت واني الكاتلة روحي صار ساعه امرغ  صدگ ضايع بوجهه المرعبل

داارد ودخل بابا ملثم بيده طفل يبجي وخر اللثام  كال ها ماصحت

رؤيا - لااا استوها بلشت تهذي  بس حرارتها عالية كلش

- ماعليها لاتخافن كومي اخذي درع وجيبيلي مي بارد بي ثلج وقطعة قماش

- منيلك هذا

-ابن هيذام الزمايل جايبي وياها بالغلط

-وشكو جبته جان رجعته

-حتى يلكفهم ابو ويسوي بيهم تعداد همه وعشيرتهم عالمحرقة عدل

-يعني تورطنا

-على شنو تورطنا هذا حصة بنتي وهاي جبته الها يله خلي يشوفني مراجله ابن النظام

اباوع الطفل يفرفح نزل من ايد بابا اجه يركض خله راسه على صدرها وصاح رئول كومي خابري بابا ذوله حرامية

رؤيا - وعالاساس ابوك شريف ابن البول تيري انت الله جابك كوم تعال يمي

- هسه تكوم  رئال تصرخ عليج

- انعل ابوك لابو رئال دتعال خلي اغطك بالحفرة اخذ كم صورة بيك اخلي ابوك يستمتع اليوم

صحت كل عقلج انتييي

- طبعاً كل عقلي اذا ماخليته يطفر مثل ماسوه بيه بالتحقيق مااطلع خرزة البتاوين ؛  ابن الجروو اكله مواني كتلت يشيليني من شعري ويكول كم طعنة طعنتي

- حيييل عاشت ايده كون شالع لسانج وانت حبيبي تعال لاتخاف هاي مخبلة

درع - اريد باباااا وديني حبابة والله مااسوي وكاحة اني

- يروحي انت بس تكعد رئول تاخذك وتروح احنا مانندل بيتكم

- هو موبعيد هنا يم الحرس

رؤيا  - على شنو حرس دخلي العالم تخلص من شر ابوك الجنه جلب شارب دم  مصاص دماء؛ هو يصير الليل وهو يتحول يكوم يطلع افكار استجلابية بالتعذيب ابن الناقص

- انتي مو حبابة رئول ماراح تحبج

رايه - هيه رئال ماتحبها بس تحبك انت

- لعد ليش عايشة هسه بابا يكتلها ويسجنها يم عمو المخبل

- هاي كل المايحب رئال هيج مصيره هيج

- لعد مو هيه تضوج وبابا مايقبل تضوج

- ابوك هم يكتلها

- لابس هيه تضربه وتكوم تبجي لان ايدها توجعها وبابا يضل يبوس بيها يكلها لاتبجين بعد مااضوجج

رؤيا- ام لدغة تكتل هيذام وفوگ هذا هو الي يعتذر

ضحك بابا بصوت عالي واني ابتسمت رديت اباوعلها امنيتي اضمها بروحي دنگت لزمت ايدها بستها احس حرارتها صارت اقوى گمت جبت ماي وثلج اخذهن بابا كعد يمها يسويلها كمادات على راسها واني استلمت اديها ورجليها

داارفع ابلوزها لزم ايدي بابا كال تركي بطنها

-ليش

-حرارتها مو من برد اثر ضربة

دااحجي واسمعها همست غزوان غوح… غاية غاح يلزموناا

غمضت عرفتها بعدها تحلم برجعتنا بليل مسحت دموعي ورجعت امسح برجليها وبابا براسها الساعات تمر وهيه كلما جايها تسوء حالتها بدل الهمس كامت تسولف سوالف واكثره لوغزوان لو تصيح مواني الكتلته

رؤيا استلمت درع صح بالبداية جانت عنفوانية بس حسيتها شافت بي براءة رند اخذته لحضنها وصارت تلعب ويا هو ماستغرب اطبع عليها بسرعة

صاح الاذان واحنا بعدنا اباوع لبابا يمسح بگصته مبين التعب على وجهه ويرد يغسل الوصلة ويخليها على راسها بخفة ويدنگ يايبوسها ياايشمها بلهفة ؛ الي يشوف شكله وهيئته مايكول هجي شايل حنية

احس راسي داخ والكلى بلشت بالالم بعد مااكدر اقاوم اكثر  اشرلي نامي اني اكمل؛بعدت الطاسة. مال المي وتمددت يمها لزمت ايدها خليته على صدري وغمضت اتخيل بعدني بذيج الغرفة ايدها على گلبي وصوت الاذان بأذني اندعي لايسمع غزوان حتى يخلينه شوية بعد نايمين

…هوسة  بابا يهدأ والطفل  يعيط بصوت فتحت عيوني لكيت رئال حاضنة درع لامه روحها  وخاتلة بزاوية الغرفة ورؤيا تصيح هيي لا تعيشين الدورر من الاخير احنا لكيناج بالزبل وجبناج حتى انجدي بيج واذا تضلين هيج فاهية ماتفيدنا انبيع اعضائج

كمت ركضت كعدت يمها رجعت ليورا حاضنه درع حيل رفعت اديه همست لاتخافين ادري فاقدة الذاكره بس  خليني احضنج  بلكي تحسين بيه وتردين تعرفيني

رئال - اني شايفتج وحتى هاي شايفتها بالحلم بس مدااذكغكم

- يمه اللدغة اووف اشكد مشتاقتلها

-منو انتم ؟؟

-هاي اختج رؤيا واني راية معقولة تنسيني رئول

-بس  اني ماعندي خوات

- لاعندج ثلاثة واخ اسمه غزوان

- لعد ليش هيذام يكول ماعندج اهل

رؤيا - غير ماصدگ فقدتي الذاكرة شتردي يكلج اني كتلت اهلج واخذتج غصب

انداريت خزرتها ورجعت لرئال باوعتلي بكسرة كأنما جانت شاكة بشي وتأكدت منه ؛ هزيت راسي لااا وهمست مالج شغل بيها هاي اجذب

رئال - دوم جنت احس بي ضام شي عني وخايف تغجعلي الذاكغة بس ماتوقعت هو الكاتل اهلي

- مو هو الكتلهم والله هاي اجذب  وهو ماسوه هيج لو ماجان يحبج وخايف عليج

- كل يوم دااشوفكم واشوف الولد ابو النظاغة والطفلة  والمغة اليم الصوبة تسويلي لفات

- ماشفتيني لازمة ايدج ونرد من الشغل نركض خايفين

- اي وانتي تكليلي غاح الوكت بعد مايفيد

- راح الوكت رئال وصفينا بروحنا غربة وحدة ماتعرف الثانية بعد ذيج المعزة الجانت بينا

نزلت دموعها وهمست بهظم  مدااذكغ شي

حسيتها خذت روحي سحبت درع منها وخرته وخذتها لحضني وشهكت ضمت راسها بصدري وبجت بقهر ؛  خفت عليها وخرتها بسرعة مسحت دموعها وهمست  لاتبجين يعمري والله ترجع ذاكرتج المهم رجعتي لحضني راح نعوض كلشي فقدنا

رؤيا - من باجر دشوفيها اشلونها وشلابسة وين ترديها تعيش وياج هاي تلكيها تسبح بحليب وماتاكل غير لحم غزال

- انتي بس انجبي احنا بخير

-على شنو دتصيحين وبعدين وين اكلتي راسي حلوة وحلوة اصلاً  تلعب النفس عيع الحمد الله جنت عمية جان صار بيه توحد هم عيشة جاسم وهم شكلها المقزز

- كملتي يله وروحي سوي ريوگ

- اووو رجعتلها رئال ورجعت تكرهني وتتامر عليه وانتي لجج هيي تره انتي  فاقدة الذاكرة يعني قصص وكتب بحح ماااكو  سمعتيي 

لمت رجليها خايفة؛  هزت ايدها غمتها وطلعت

ضحكت كال بابا اظن بلشت الغيرة

- هههه لا هنه ارويسة من صغرهن وانتي يعمري لاتخافين منها والله تموت عليج ومامصدگة رجعتي  بس هيه حمارة ماتعرف اتعبر غير بهاي الطريقة

رئال - هم جانت تضغبني

- لا جانت تنكتل  وتنحبس بمكان مايحمله حتى الحيوان علمود لاتنضربين

صفنت ضايعة

سحبت ايدها صعدت ردانها طلع الحرگ باوعتله وهمست ماسألتي نفسج منيلج هذا الحرگ وانتي عايشة يم واحد يخاف عليج من الهوا

-سألت بس محد جاوبني

-لان محد عاش الخوف ولاحس بلسعة الزيت هو ويندار على جلدنا غيرنا 

-ليش هيج عذبونا

-لان بنات  وماعدنا  سند

-ليش تخليتن عني وعفتني وحدي

- خذوج من حضني غصباً عني تعرفين شصار بحالي من رجعت للبيت ومالكيتج  ؟؟ تدرين اشلون عشت بعدج

- شنو الصاغ ليش بعدونا واشلون جنه عايشين 

انداريت لدرع حتى اگله روح يم رؤيا صار كدامي بابا واكف ايدية بجيوبه مدنگ يتسنط بس شكله صاير يخوف فاتح عيونه بطريق ترعب

اتبلعمت وهمست بابا اخذ درع يم رؤيا خلي تسويله بيضة

رفع راسه باوعلي عيونه حمر يتنفس بغضب اشرتله بتوسل لااا ؛ لان عرفته ديجمع معلومات حتى ينتقم واحنا راح نضيع من جديد

ابتسم اخذ نفس دنگ شال قميصه ومد ايده لدرع  تعال

-وين تريد بابا النهار طلع

-لاتخافين مااتركجن اذا ماأمنلجن حياة تخليجن تاج على روس السلاطين ومكان مايتجرأ حتى ابليس يتقربله

- كلشي مانريد مكتفين بيك  هاي خواتي ردن لحضني وهذا اكبر عوض بس انت لاتعوفنا بعد وخاصتاً هسه اكيد مخبوصة الدنيا وراك ماراح يعوفوك

-ههه لايضل بالج يبعد ابوج شغلة صغير اكملها وارد ماتأخر صح ورطتني بناسبة  جنهم شياطين بس اضل عكرب الدغش

-راح لجاسم مو

-لاهذا شغلة بعده اريده للخاتمة  ؛ تركي هالسوالف وانتبهي لاختج عيونج عليها راح اتركلج جهاز يم رؤيا اخاف ترد حرارتها لو يصير شي اتصلي بيه بسرعة وهم اراح اخليلكم واحد يراقب البيت من بعيد لبين ماارد

هزيت راسي

- يله ياحفيد النظام تعال خلينا نشوف صاحب الشعار شنو محضرلنا

اشر اي اجه باس رئال وطلع يركض ويا رجعت  لزمت ايدها وكعدت يمها بالبداية صفنت بوجها مامتغيرة بلعكس زايدة جمال ونعومة جنها لعابة تباوع براءه تنكرط من الكياته عذرت هيذام عالسوا

رفعت ايدها وخرت شعرها عن وجها بهدوء واشرتلي احجي

ابتسمت وبديت اسولفلها من طفولتنا لحبها لمحمود لدخلتنا للبتاوين لشغلنا ورجعتنا بليل وكلما اوصل لغزوان ورند اعبرهم مااريد ازيد حالتها لان تباوع بتمعن حسيت بيها تتخيل الموافق حتى تذكرهن  لحد ماوصلت  لذاك اليوم ؛عگدت حاجبها وهمست هو  الجان يحقق وياي بكل مغة يدخل للبيت اسمع نفس ضغبة البسطال

داارد وقاطعتني رؤيا بدخلتها بيدها صنية اكل خلتها كدامنا اجه درع يركض كعد بحضنها كاللها رئول اشوكت يجي الحيوان

باوعت لرؤيا دارت وجها تصفر استغفرت- حبيبي هذا ابوك ميصير تغلط عليه

- لاهو جلب بس يصرخ ويضرب

-هيج راح تضوج رئول لان هذا زوجها

-بعد ما نريده خلي يولي احنا نعيش هنا  بس نجيب ضيونه ويانا ؛رؤيا راح تلعب وياي وتاخذني للالعاب والمسبح مالتها

-حبيبي لاتختلط برؤيا موخوش بنية

- لاااا هيه حبابة بس همه حيوانات وجلاب تف عليهم بعد مانعيش يم  الزبالة

- زباله ؟؟ لج رؤيااااا كلشي يرهم تعلمي بس زبالة ويه ابن هيج عائلة ماترهم

- لااا اعرف شنو زبالة يعني  جدو بيبي هبة وهالة ووو ومنو

رؤيا - وابوك يالزمااال

دنگت ضميت وجهي  ضحكت رئال ؛  اخذت نفس ورفعت راسي كلتلها كومي خيه ردي لبيتج هاي هيه شفناج راح يضيع مستقبل الطفل

رئال - عمغي ماحسيت ذاك بيتي ولاهمه اهلي

- اووف رئال صدگ رجعنا التمينا من جديد

- جنت اصيح بأسمائكم واحنلكم بدون لاذكغكم

رؤيا - اني اذكرج شوفي لج انتي جنتي كل يوم تمشطيلي شعري وتغسلين  ملابسي

-اكو گصيبة مثل گصايبجن بكنتوغ هيذام كلما اغيد الزمها مايقبل وبساع يسد الباب

- يخاف ترد ذاكرتج وترگعي دفرة على ذاك الشعر البترة الكله گمل المهم همزين خلصج منها هيج احلى ولاتفرين الحجي تره حتى المواعين انتي جنتي تغسليهن

-مم

-مم  لا هواي غسلتي مواعين على هاي ايدج التلمع وفهاوتج تعالي لج يكولون تضربي للبول تيري صدگ

-لاخطية حيوان ليش حتى اضغبة

- شنوو لج لاتكولين عندج بول تيري حقيقي

- اي جابليا هيذام

- اموت على رب هيذام ولج اني اختج وانتي جنتي تموتين عليه واني جنت احبببج ومدللتج كلشش

- تغه يخوف اذا جاع يصيغ خطغ لازم اكو حغس عندج حتى ينتبهون لان ياكل لحم بشغ اذا مالحكتي تنطي لحم معلب

- وليش معلب هاي حياتنا متروسة نواقيص خلي يمارس طبيعته الفطرية

ابتسمت

-عيع ضحكتج موحلوه ولاشكلج تف عليج

عوجت راسها تباوعلها براءه شفايفها حمر وجهه كد الترافة امنيتك تاكله

دفعت الصنية رؤيا وصاحت تره اني احلى وحده بيجننن والله

غمضت عيوني واشرت اي

- انبجي رايه وانتي لج ام لدغة يله كومي ولي احنا موخواتج وكل السولفته رايه جذب اصلاً احنا خطفناج لان من اكلي لحوم البشر

رئال -تغه اني بت البتاوين

-هاي ذكرتيها

-لا كم مغه عمتي تغلط وتكولها كدامي جنت دوم اجمع كلمات حتى اوصل الكم واني اصلاً مااعغفكم

-مرة شفتج يم التقاطع واكفة يم بنية  ملتمين عليج الحرس وانتي تباوعين  لمرية تبيع كلنس  وتبجين كلت هاي شكد فايخة  ماتحملت المنظر

درت وجهي باوعتلها - ليش ماكلتيلي

رؤيا- بنفس اليوم وره كم ساعة وصلي خبر …

ماكملت دنگت عيونها مليانة دموع ؛ خرت رئال  درع منها وتقربت يمها لزمت ايديها رفعتهن باستهن؛  شالت راسها رؤيا مسحت دموعها وكالتلها تره اليوم عليج غسل المواعين لاتتلوكيلي

اشرت اي ونزلت دموعها بكسرة

-وهااا راح يجي بابا  لادگين ميانة ويا زايد ترة امرعطج سمعتي

-اكيد يحبج انتي اكثغ

-اي هو كلي مااطيقها بس لاتحجين كدامها خطية تضوج تره حتى ماما ماتحبج

-اشلون شكلها ماما

-تلعب النفس هيج اشلون انتي وهاا تكرهج تموت منج كلما تجيب طاري اسمج تتقيء

برطمت

-راااية كومي طلعيها قبل لايرد بابا سرحيها من بالباب

ضحكت جريتهن لحضني مامصدگة يمي سحبت نفسها رؤيا جرت درع خلته بحضنها وكالت يله تريكن لاتعيشن الادراما وانتي رايه سويلنا لفات اني بحضني طفل مااكدر امد ايدي وهاي فاقدة الذاكرة ماتعرف اشلون تاكل

ابتسمت اخذت نفس الفرحة مالامتني دنكت اسوي لفات انطيهن  وعيوني عليهن اشلون ياكلن امنيتي اضمهن بروحي كل شوية احضن رئال حيل اشتمها وارجع  ادنگ  حتى احضر لفات قبل لايكملن البيديهن

جانت من اسعد الساعات المرة بحياتي صح  اباوعلها  مستغربة وتاخذلها ساعات تتصفن واكو كسرة بنظرتها لان ماتذكرنا بس اشكد ماكدرت اسولفلها على ماضينا واخليها تبني ذكرياته بداخلها

كملنا اخذتها وياي للمطبخ كعدتا كدامي وكعدت اسوي الغده واسولف وياها  على طول ماجانت تتسنطلي عيونها على المدالية مثل الي اكو حدث براسها تحاول تسترجعه ؛ اطبخ والضحكة تارسه وجهي اول مره احس هذا بيتي صدگ والكل ملزوم مني  ورجعت فرحتي ولهفتي للحياة من جديد

كاعدين دنحضر المواعين ونسمع عيطت بابا بره كمنا طلعنا وانشوف رؤيا تارسة الحفرة مي ومتربعة هيه ودرع بيها جنهم ضفادع بس روسهم طالعة وسخه من الطين

ضحكت رئال باوعلها بابا ابتسم وفتح ايديه راحتله سحبها لحضنه ضمها بقوة ودنگ اخذ نفس وصاح اوووف يارفة كلبة لابوج

رفعت راسها - اتصل بهيذام هسه قلق علينه

- وانتي بنتي محد اله حق بيج غيري

-وهو مامأذيني يخاف عليه حتى من نفسه

-ماراح اغصبج عالعيشة  وياي غير هالاسبوع  لبين ماأمن المكان الراح اخذجن اله وهم انتي تاخذين قرار ياتضلين ويه خواتج نتنظرن امجن ترد لحضنجن ياترحين ترديله وتخلينا ذكرى حلوة براسج

- ليش ميصيغ اعيش وياكم سوه

- كتلت عمج لان جان سبب بالصارلج ونطلبت للدولة

-صح حسيت بالامان وياكم ومغتاحة بس مااكدغ اعوف هيذام ونفس الوقت اغيد اضل يمكم

-اواني مامستعد اترك بناتي مره ثانية قبل لاأمن عيشتهن واخليلهن صيت يرعب اكبر شارب يحجي وياهن مو يوصلهن

-والله اني ادز خبغ بيد واحد لهيذام ومااغجعله اذا ماينطيني كلمة يخلصك

-هيذام حالياً مايسمع اي مخلوق على وجه الارض  مستعد يحركنا بالجملة  بس حتى يحصلج تدرين اذا لكفوني هسه هو ودسار شيسون بيه دمي ماراح يشفي غليلهم

-لعد غاح يلكفوك والله

-وسفة واني رافد الدغش تربات البتاوين اذا ذولة يلعبون ويه ابليس اني ماخذ كرسي وتزاود ويا على لسعة جهنم 

-تعغف شنو غاح يسوي

- هههه لاابشرج سوا هو وعديله كلمن كامشله كتر ويفتر مثل المسودن ودزوا خبر بطلاق سراح ثالثهم حتى يكملون اتحاد زواية مثلث برمودة بالشر

- غجعله ابنه

- اتوسلت بي ؛ ايام واني اترجاه بس حتى يخليني اشوفج من بعيد خلاها حسرة بكلبي والمارحمني بضعفي ماله يمي غير الموت

-لاتكتله بابا

- اتحبي

هزت راسها اي

ضحك وجرها لحضنه باس راسها مانحس غير رؤيا طلعت تركض سحبتها وصاحت موكافي دراماا

بابا - جيبي بنيتي لج وردي للمستنقع مالتج

باوعتله بغضب وجرتها حيل شمرتها بالحفرة بصف درع  ردت اجت بسرعة  جرتني شمرتني بكل قوتها ماسيطرت اوكف اجيت ترس يمهم 
وكفت اتخصرت بتحدي وصاحت يله ذني بناتك راويني شدتسوي

هز راسه طلع سلاحه شمره بعده مامتحرك ركضت  وركض وراها طفرت صعدت السيارة لبالها مايلوحها  ماتوقعت بهالخفة خله ايده عالبنيد وطفر صعدها لكفها رفعها من بطنها وطفر نزل
جابها وهيه ترفس وصل يمنا  جتفها شل حركتها وگعد مد ايده كام يشيل طين ويمسح بوجها؛ رئال تضحك بصوت عالي وهيه تهوس  تريد تحرر نفسها  وهو مستمر بالتلغمط ماتركها لمن خربط ملامحها شالها شمرها بالحفره وكال يله كملي نظافتج يم خواتج

…مر كم يوم واحنا يوم اسعد من يوم خوفنا الوحيد جان من رئال لاتطلع بالختلة وتضيع بابا وتضيعنا ويا

بعد ماجنه نخاف من جية الليل كمنا ننتظر بالدقايق حتى نلتم يمه ونسولف ونضحك براحة

بلشنا نحضر للبيت الجديد كلما يدخل بابا جايب كم شغلة وحنا نتلكا الدنيا ماسايعتنا  كل وحدة لازمه مهمة عالسريع نرتب ونطلع عصريات نتربع بالحديقة ناكل حبشكلات ونسولف ونضحك بالاخص من كالنا بابا حصلت مكان أمن وبعيد عن العين بغير محافظة بس اكمل شغلي وننتقل نستقر هناك

كاعدين بالحديقه كدام مسبح رؤيا لاوالله خيستها دخل بابا كام درع اتلكا يركض ويصيح جدووو

دنگ شاله شمره ليفوگ وحضنه يبوس بي اجه يمنا شمر علاكه حلويات  كال شسويت عشه اليوم رايتي

- رئال گلت بتيته واني سويت شوربة عدس

-رحمه وانتي يالخرزة

رؤيا - وجودي بينكم كافي

- بس اريد اعرف هذا المغسول حظه صار كم يوم مثل المسودن ملثم ويطفر بين الموت على شنوو

-صدگ بعده ديدور

-لاا وابشرج لكف واحد من جماعتي واخذه لرجل اللدغة ومن العصر لحد الان مالهم صوت

-واكيد ذباح طلع

- لاهذا مستلم المنطقة انتظري بعد يومين اذا ماحصل خبر عني يدخل دخلة انتحاري

- عوفك منهم وگلي جبتلي جبس حار

- جبس حار بهذا شكلج بابا انتي موكل يوم تسبحين وجهج ليش وصخ

- والله اغسله بس هو يتوصخ بسرعة مااعرف ليش

- اكص ايدي اذا صدگ واصله الصابون

-نزل درع وتعال مرجحني ذني بناتك غثة اتوسل محد تقبل تدفعني

درع - لاااا جدوو اني اول حباب هاي جلبه  ماتخليني اگعد بيها

رؤي ا- ابن الحيوان مو كعدتك الصبح

- انتي بت حيوان اني ما جذب

- شترجه من قذر ابن حثالة على منو تطلع وانت ابن ازبل عائلة على وجه الارض

- تف عليج زبالة

هزيت ايدي وكمت للمطبخ ضاع مستقبل الولد  وينك هيذام تجي اتشوف ابنك وبيدمن وشديعلموا

صبيت الكل جبت الصنية لكيتهم لازمين سرة عالمرجوحة

اباوع لبابا واكف بطرگ الفانيلة والبنطلون يمرجح بدرع ؛ رغم جبير بالعمر بس جسمه مرتب بالاخص شكله مبين صاحب شغل موقانوني يمتلك كاريزما خاصة حتى نظرته وطريقة ضحكته تختلف

خليت الصنية بالكاع صاحت رئال تغه وصل السغه الي بابا كافيي

نزل درع كعدت فرها وهيه تضحك بصوت عالي وهو يضحك على ضحكتها عرفته يريد يعوض فترة طفولتنا ويا

شلت السجينه دنكت اسوي زلاطة بين ماكملت ثرم دااسطر المواعين  كال يله راية كومي

-شنو بابا؟؟

- كومي لج يله جوعان اريد اتعشى

رؤيا - يعني شنوو بعد ماتصعدنييي

بابا - وكلام الله انبت الطابوگة براسج رؤيا اختفي من وجهيي وانتيي يلااا

ضحكت وكمت كعدت بالمرجيحة فرني اجه الهوا بوجهي غمضت اتخيل نفسي بعدني طفلة ماكو بالي بس اشوكت اكمل لعب حتى احضر كارتون

ما تصورت راح يجي يوم واعيش هالشعور بعد موتت غزوان اجمل دقايق مرن عليه حنية صوته هو ويسولف وخوفه عليه هو ويدفع شالت شكو هم من گلبي استوني حسيت صدگ ورانا سند وبعد ماكو خوف

وكفها نزلني دار ايده على متني رحنا كعدنا كام درع ركض گعد بحضنه قبل لا تكوم رؤيا وتجي يمه باوعتله بغضب طلع لسانه يعيب ؛ ضحك بابا و اشرلها  كومي تعالي

كامت كعدت بصفه دار ايده عليها باس راسها كاللها بنوتي الصغيرة شنو تريد اجيبلها باجر

- تلفزيون

رئال - بابا واني

- يروح ابوج امري انتي

- اريد تغاكات ذني ينغزن واغيد قغاصات صغاغ واغيد

رؤيا - وجع كافييي منيله بابا

- انتي انجبي هو يجيبلي مو بابا

بابا - كلشي تردن اجيبلجن يبعد ابوج يله اكلن

رؤيا - صدگ بابا ماعدك اهل

- لاعندي وجنت عايش وياهم لحد مانفصلوا وتسربتت بالشوارع

- ليش انفصلوا

- مااذكر بالضبط بس اذكر جنت عايش ويه مجموعة جهال مشردين وجنت اني قائدهم كلها تخاف مني لان جنت ماارحمهم الي اللگفه ماتركه اذا مااسمم دمه

- لهيج لقبوك بأبو عگرب

- مثل مالقبوج بخرزة البتاوين

- اشلون تعرفت على ماما

- جان عندي صديق قريب على بيتهم فد يوم جان عندي شغل ويا من الصبح رحتله وهيه طلعت من بيتهم صعدت خط المدرسة جنها كمر ضاوي بصدريتها القصيرة وگصيبتها الطويلة اخذت روحي من اول نظرة لاارادي وبدون مقدمات كمت كل يوم اغبش بس حتى اشوفها هيه وطالعة ليش ماادري

-مم بعدين

- شاب طايش وبت صارت براسة قابل شيسوي اكيد يشمر نفسه بتهلكة بلا تفكير بس حتى يحجي وياها

-شنو سويت

- اجيتها بكل الطريق مانطتني مجال مالكيت نفسي غير ادخل عملية جبيرة جازفت بروحي حتى احصل افلوس واشتري سيارة و اشتغل خط يمها

-واشتريت

-اي ودخلت بليل لبيت السايق مالتهم طبطبت عليه بشوية حنان صار الصبح رحتلهن كلتلهم السايق صارله حادث ودزني مكانه بين مايكدر يرد للشغل

-هاي هوستك تالي طلعت عينك  على رزق الولد

- يارزق ؟؟ اجرتهن مال شهر جنت اطلعها بربع ساعة بس غير جنت صابر علمودها

- بس انت هواي اكبر منها اشلون قبلت بيك

- تعبتني هواي يبووي اشكد سهرت ليالي وشكد انذليت يالله جبتها للطريق وخليتها تقبل بيه

- اكيد دللتها بعد الزواج

- مادللتها لااا خليتها تگعد على عرش النساء انطيها روحي قبل حالي خليتها تغمض وتحلم قبل لاتفتح عيونها حلمها متحقق 

- وصرنااا احنا

- وزاد دلالها گطعت الشارع  بكبره وجنت مستعد اشتري بيوت المنطقة كلها  بس حتى تاخذ راحتها

-لعد شنو الصار وليش هيج سوت بيك

باوع للمدالية الي برگبني مثل الي مرشريط كدامه لمعت عيونه ودنگ

لزمت ايد رؤيا  عصرتها بسرعة غيرت السالفة  كالتله تره اني بتك مو درع يله سويلي لفة

دمغها ودنگ يضحك ويسوي لفات بينها وبين درع شاف رئال مبرطمة جرها لحضنه باس راسها ودخلها بالسرة وياهم عاللفات

خلصنا شلت الصنية دخلنا نغسل اماعين ضل هو ورؤيا يم السيارة يصلحون بيها حتى يوديها ويجيب غيرها

كملنا تنظيف المطبخ دخلنا للغرفة خلينا الحبشكلات تمددنا  ناكل اني ورئال الي تحجيلي على قصة العاشرة القاريتها من مكتبتها واني بس هز راسي اي لان بس ادير وجهي اتبرطم وتكول ماتحبوني اعغفكم

تأخر الوقت دخلت رؤيا صاحت راااية وين قميص بابا ديطلع

- بابا جان يصلح بوجهك لوبالسيارة

- انجبي وكومي ويله اليوم انام بدون لاغسله هيج عناد بيجن والتحجي منجن اكتلها

صاح بابا رؤيااااا

- بابا هنه ديعيلن بيه سكتهن

رئال  - دجذب بابااا

اجت دفرتها صرخت رئال بابااااا كتلتنييي

دخل وجهه غاضب اشرلها تعالي

رؤيا - كلشي ماسويت بس هيه نعواصة هاي بسبب دلالك

بابا- رؤيا اعلكج بجطل البنگة للصبح انضبي احسلج

اشرت اي

هز ايده كمت انطيته قميصه لبسه وجر راسي باسه وكال لاتحاجنها بابا طفلة هاي

- والله محد يمها هيه تحب تتمشكل

- ميخالف هاي لان محبوسة وماكو شي تلتهي بي باجر اجبلها تلفزيون راح تفگ عنجن

- لاتكلف روحك بابا منيلك انت النهار كله مدنگ عالسيارات

- اذا الجن مااتعب جا المن التعب يله تعالي سدي الباب وراي  وانت لج رعنة اذا وصلتي يم رئال هذا وجهج اجلفة بسيم التايرات

- كللها هيه لاتتحارش حتى لاعدل لدغتها العوجة

استغفر هز راسه يأس منها  اخذ اللثام اثلثم وراح  طلعت ورا ؛ انتظرته بين ماطلع سيارته وسد الطلاگة الاولى اشرلي يله دخلي رديت الباب سلقيتها  اسمع سد الباب وحرك السيارة راح

افتريت عالشبابيج تأكدت مسدودات قفلت باب المدخل دخلت جوه  داگول يله نامن ولكيت رؤيا واكفة صافنة ورئال بيدها فون بابا جريته حيل منها كلتلها شدتسوين

دنگت اريد اغلقه واجاني صوت خشن صاح  راااية

عصر كلبي بعد مااعرف اشلون اغلقه ما اشوف ؛  داادوس الدگمة وبطلت واني اسمعه كال ابوج مقابل  امج  …

لاتنسون التصويت ❤️