رواية شيء من رصيف الدم الفصل السابع عشر 17 - بقلم Leo Alfatlawi

شيء من رصيف الدم

بقلمي:leo Alfatlawi

بارت السابع عشر

**رئال***

انرفعت من الگاع  درت راسي عصر وجهي  حيل وعدله دخلت اضافيري بأديه وگمت ارفس بس اريد اخلص نفسي

ضغط على بطني رفعني اكثر وتحرك واني بعد مااعرف شسوي اصرخ مايطلع صوتي اضرب بي مايهتم مستمر بالمشي  ؛ المكان ضيگ واني اهوس ماحسيت غير يدفر الگن سوا طشار

صفح نفسه صار وجهي عالحايط عصرني بصدره  راد يعبر حشرنه لمني لحضنه اكثر وفتح جف ايده مثل الراد يحمي  من الحايط احس روحي اختنگت سحبني حيل وطلع لو سحب روحي

انتبهت لباب البيت بي فتحة جبيرة فاصلته عن الحايط رفسته حيل وعضيت ايده بكل قوتي لبالي راح يتركني بس تكول انطيته طاقة مشه عالسريع

رجعت اديه ليورا اجه بيدي اللثام دخلت اصابيعي بوجهه سحبته هو واللثام وضربته برجلي حسيت روحي اضرب بحايط ولاويا صار كدامي باب المر عرفت راح يدخلني  رجعت دنكت عضيته بكل حيلي نكثني وضغط اكثر دفر الباب طگ القفل دخل بسرعة شمرني بقوة اجيت عدل على وجهي

انداريت داصرخ سكتت واني اشوفه يباوعلي ويباوع لاصابيعه  نزع اللثام مسح خده المدمة بضهر ايده وباوعلي بنظره كتمتني حتى عن نطق الشهادة

اريد اتبلعم مااكدر رجعت ليورا ابتسم بستهزاء ومد ايده وره ضهره گمت بسرعة ردت انهزم مالحگت بحركة سريعة لكفني من شعري لطشني بالحايط عصر وجهي ورفع السجينة خلاها يم عيوني غمضت ضغط اكثر حسيت وجهي طگ بين اديه نزلت دموعي عصره وحجه بنبره عصرت روحي وهو يگول فتحيهن

-والله كله بسببك

-وكله شخط واحد ينهي هالمهزلة بكبرها فتحييهن لج

-تغيد تشوهني بس حتى يضوج من شكلي ويشمغني

-واني ماانتظر احد يشمرج لو رايد اردج من اول دقيقة اسحلج انتي وياهم وانهيج مثل مااضيع اثرهم 

-انت جبغتني

-لااا اني حذرتج وانطيتج اكثر من جنص بس طلعت  صدگ ماافتهم وزمال ابن زمااال من سلمت راسي لخاطر حيوانه مثلج

فتحت عيوني همست مو حيوانة اني بشغ مو ذنبي وكعت ظلم بين ايدين امثالك

-امثالي الي نهوا حياتهم وسلموا روحهم لجنهم بس حتى يحمون حثالة مثلج

-لبالك اذا شوهتني غاح اغجعله وغوح محمود لو تدفني هم تگدرغ تجبغني اغد اعيش ويا

-ليش مو هذا الي تحديتيني حتى تاخذي لو الي سلمتي روحج اله بس حتى تمنعيني ابعدج عنه

اشرت لا

-راح ترديله وتكملين ويا غصباً عنج وهذا وجهج الي كاتل نفسه عليه راح انهي مثل ماراح ادخلج للجحيم واخليج تحلمين بالموت

نزلت دموعي

قرب السجينة لزمت ايده خزرني اباوع لنظرته ترعب گد الحرگة الشايلها عصرت ايديه حيل وشهكت ضغط على خدي غمضت وعصرت نفسي منتظرة يسحبها واسمع طفره بالبيت اندار بسرعة باوع للباب

صوت واحد ثاني يطفر باوعلي اشر اشش وسحب ايده عالكيف دنگ خله السجينة بالگاع وشال اللثام وگف عدل لبسه وطلع اسلاحه  قبل لايتحرك لزمته من ملابسه دار واجهه باوعلي

همست لاتخليهم ياخذوني

-تحتمين مني ؟ بيه ؟؟

-غاح يكتلونه موو

مارد سحبني خلاني وره ظهره تقدم قريب عالباب  وكف يم الحايط لم جف ايده وقربها من فتحت   الباب  اباوعله عينه بالصورة العاكسة بساعته ثواني وجر ايده بسرعة ورفع سلاحه  وايده الثانيه دارها عليه يحميني بيها لزمته حيل اسمع حركتهم وضحت ضغط عليه وهمس رأل سدي عيونج

ضميت راسي بظهره وغمضت صوت شي وگع ويه حركة رجله يفتح الباب ويسحب اقسام بعده مامتحرك وصاح واحد منهم كميييين وصوت طفرتهم  دفعني وطلع وراهم بسرعة

من الهبطة گعدت مكاني احس النفس ضاگ فركت صدري ودنگت ثواني ودخل هيذام بس شكله مخبوص سد الباب برجله  خله سلاحه وره ظهره وطلع فونه اتصل اول  رنه اجا صوت واحد خشن گله يول وينك صار ساعة مشتول من احرتگ كبر ابوك

-انحصرت بالبتاوين

-اشتعلوووا شوصلك للبتاوين لك هيذااام انت صاحييي

-اكل تبن واسمممع لك اريد سلاح وكاتم راح ادزلك الموقع انتبه للطريق ودز الولد خلي يأمنون المكان بسرررعة

-افاااا منو هذا الي يطلب نأمن المكان ابن النظام  لاوسفة

-تخسى انت وربع قبل لاترمش عيونهم امحيهم مثل مااضيع نجاسة ابهاتكم الخونة

-وصلتتت عينك بيها جايك يخوي

سد جهازه دز الموقع رجع يم الباب فتحه وكف  دنگ يراسل عين بالطارمة وعين بالجهاز اباوعله كل دقيقه يفتح ايده ويسدها عرفت مكان العظة يحرگه

اقل من خمس دقايق غلق فونه خلاه بجيبه ورفع راسه باوعلي دنكت

اخذ نفس وكال اشكد مريت بمصايب وشكد  ولعبت ويه الموت كل مهمة ادخلها اسباع ماتطلع منها اتخطى على حافة جهنم بس ولامرة حسيت بالجاي احسه هسه

-كله بسببك

-لو اخلي روحي مو انطي ربعي ماراح اكدر اطلعج منا صاحية

-انت الجبغتني اسوي هيج

-ليش انهزمتي

-لان يغيد طفل

-من حقه

-لاااا مو من حقه وانت تدغي كلش زين زواجنا باطل وحتى لو مو باطل انت واحد باااطل وحيوووان وماعندك اي احساس عايش بس حتى تأذي اليييمك

-عمري ماتمنيت يرد بيه الوقت مثل ماتمنيته بهاي اللحظة

-ليششش شنو الضل ماسويته هااا  تغه نهيتني مابقى شي حتى تكمل بي  كلت لاتتحديني غاح اندمج اي غلطت وتحديتك بس ندمت والله خليتني اتمنى الموتتتت خليتني احس غوحي حيوانه خاينننه خليتني انعل نفسي كل ثانية واني احس …

سكتت باوعلي  اشر كملي

-خليني اغوح منا واوعدك كلها ساعات وتشوفني كدامك بالحجز

-ماشمرت رتبتي اذا ماحلفت اشوف كدامي دموع الندم  تنهش بروحج وانتي تترجيني ارد الكلبجات بيدج

-ندمت والله

-لااا بعدج بالبداية كدامج هوااي

-ماغاح اغجع لاخوك غاح اطلك وغجع لاهلي واخذ حقنا من بابا واختفي واخليك تباوع لمنصبك بحسغة بگد ظلمك اضعاف

-هه

-تضحك لبالك مااسويها

-من تريد تاخذ قرار اول شي لازم تسحك كلبك صح تتألم ايام لو اشهر وحتى لو كان سنة بس قرار بعقل صح افضل الف مره ماتعيش حياتك بغلطة نبض ماله وجود

-يعني شنو

-ذيج السجينة گدامج وهاي اني كدامج والج كلمة ماراح امنعج اعتبري جنص  من اغلاطي المتكرره وياج لان بدون موتي ماتتحركين خطوة وحدة

باوعت للسجينه ورجعت باوعتله رفع راسه واتجتف اشر يله

دنكت عدل وكفته راح لناحية السجينه شالها واجه يمي دنگ كعد كدامي نص گعده سحب ايدي خلاها بيها ولزم وجهي رفعه گال وهاي اني جبتها الج واجيتج

-اشكد اتمنى اشوفك ميت كدامي

-وليش تتمنين ضربة وحده وتنهين كلشي

باوعتله صارت عيونه بعيوني مااعرف شنو شفت بس حسيت شي رف گلبي وعصره بنفس اللحظه اشر شنو

همست مااكدغ

-ليش

نزلت دموعي

-شنو الي يمنعج خوف لو شي ثاني

دنكت رجع رفع راسي همس احجي اذا خوف وكلام الله اني انهي نفسي

-اني احبه اله

-اي

-واكغهك

-ثبتي هالشي

-اني مومثلك

-رأل تدرين شنو ناوي اسوي بيج

-ماضل شي تسوي هيذام انت نهيتني

-لا اكو مكان بعدني ماوصلتله

-وماغاح اسمحلك توصله

-ماراح تگدرين تعرفين ليش

-لان اني احبه

- لان طفلة وضعيفة واحلامج وهمية ونبظات كلبج غدرنج

-لاااااا

مد ايده بعد شعري خلاه وره اذني دنكت نزلها  عالكيف بلمسه خفيفة وصل لشفتي مسحها بطراف اصابيعه شي بداخلي رف رفعت راسي  لكيت عيونه تترقب رد فعلي  همس بكلمة مافهمتها

احس خدرت حواسي كلها واني اشوفه يتقرب مني غمضت بدون شعور اتحسس انفاسه الصارت تضرب بركبتي هو ويسحب النفس مني بلهفة ؛ دااخلي ايدي على صدره وصارت صورة اسماعيل كدامي نزلت دموعي ودفعته وصحت ولك اني زوجة اخوووك

رجع ليورا مثل الوعى لنفسه باوعلي عيونه حمر شهكت عصر جف اديه وضغط على سنونه كام دفر الباب بكل حيله وصاح ليشششش ليشششش

ضميت وجهي بجيت بصوت فتح الباب وطلع لميت رجلية خليت راسي عليهن صار هدوء  حتى دموعي تنزل بكتمة  ندم على عتاب وعلى كره  مااعرف شنو الشعور الجواية بس احس بألم دقايق واسمع صوت جداحة

مسحت دموعي ورفعت راسي ديري بالج رئال هذا نفسه الي ضيعج وناوي يدمرج انتي تحبين محمود

خليت ايدي على گلبي لعد هذا شنو الدااحس بي
ليش ديدگ حيل ليش اتمنى اگوم اركض لحضنه احتمي بي واشكيله عن كل المريت بي

لالا هذا اكثر واحد ناوي يأذيج ماسمعتي شنو كلج المفروض اول واحد تنتقمين منه هو ؛ گومي كليله رجعني لزوجي وبدل ماتاخذين حقج بالكتل خلي مقابيل الطفل تهمة تضيع ابوج العمر كله

هزيت راسي اخذت نفس بعدني مامتحركة واسمع احد ينزل من الدرج صرخت هيذااام وكمزت طلعت اركض صار بوجهي  صرت ورا لزمته حيل بعده ماسأل شكو واجه صوت من جوه يول وينك

شمر جكارته سحكها جرني من ورا سحبني رجع جوه دخل اباوع فات علينه واحد من الداخل ملثم طويل جسمه مرتب لابس جفوف بيده اسلحة وكف نزع اللثام شكله حلو

شمر الاسلحة بالگاع باوعلي ورد باوع لهيذام گله بربك مقتنع انت

-هه غبي

-مااختلفنا مشهودتلك بس مو لهاي الدرجة

-هذا اليجبرك تحطم هيكل وجهه ودوس على راس ابو

-ابن الكلب بيك حظ اندار هفها راجدي سحلت بشاربك الگاع وختمتها بشمرتك بمنبع الخيسه 

-لا بشرف امك

-هيه امي لوعدها شرف جان عرفت واحد مهتلف مثلك المهم اكو جهاز يمكم مراقب بسببه انكشفت

اندارلي باوعتله اشرت شكو

اجه رجعت ليورا انضربت بالحايط دنگ گد ضخامته حجب الضوه عني ردت احجي لزم ايدي بحركه خفيفة دارني ليورا شل حركتي طلع الفون من جيبي ودفعني انشمرت مسافة كوه سيطرت ماوگعت

وگف على جهه فتحه گلب بي اخذله شوية وعگد حاجبه شال راسه باوع للولد ضغط على سنونه وهمس بصوت يخنگ الروح  لكفوهاا

-منو هيه

-ضييي

-والزمااال اخوك وينه

مارد شمر الفون بسرعة خله سلاح بضهره ودنگ شال اللثام ديطلع  ركض الولد صار بوجهه گله وين تريد وعلي بس تطلع يرمووك

-اخلص نفسي بس ديرباك على هاي  واذا ماگدرت اطلع منها اخذها منا واخفيها لاتخلي احد يوصلها

-وكلام الله ماتخلص ولك مطوقين المنطقة بس يردون يتأكدون من وجودك

- دسااار بعد عن طريقي لاتجبرني افلش راسك

- وداعت امي اني احلها  بس انطيني مجال

-مااانلحگ ياخذوهاااا

-افااا ياخذوها واحنا بظهرها بس مو كلشي عضلات  شتكول ابو درع

صفن بوجهه

-اضن اجه وقت تصفية الحساب وصار وقت يرددون الشعار

-اخاف قضيتي تروح مني  دسار مااكدر اجازف بيها

-انأمنها بمكان لوينبشون گبر الموته بكبرهم  مايوصلوا

-تعرف اذا صارلها شي شسوي بيك

-رب السحگ على راسي حتى يطفر من السياج  ويردلها مايضيع ملامحي ؟؟ ادري  لاتخاف  خليها وراي

سكت شوية ورد باوعلي وخر ايده عنه واجه يمي انحشرت يم الحايط   همست شنو

-مبينه الدنيا بدت اتساومني وتطلب مني اسدد هواي حسابات

-مااغجعله  لو مو تهددني لو تموتني

-لاتستعجلين الموت جايج بس اكو دين لازم نسدده مووو لو اني غلطان

-مالك شي يمي بس الكتاب وعفته لان جانت هدية غلط واني ماتعودت اخذ شغلة من العدو ماعده حقي واخذته

-بعد الج شي يمي صح حلفت مااخلي الكلبجات اذا ماحس ماخذ شكو غدر من عيونج بس روح ضي اغلى من هالشي

-غاح تساومني  بيها

-شتكولين انتي ؟؟

-تستاهل ضي

-بس انتي ماتستاهلين المكان الدخلتي بي واجه الوقت الي لازم اطلعين منه

-لان اني مو اله من  البداية

-راح اتصل بأسماعيل تردين عليه

-شنو اگله

-تنقلين الي راح اكتبه بالحرف الواحد ؛
دساااار جيب الجهاز وخبر الولد خلي يستعدون  راح نطلع

اجه الولد انطاه الجهاز  وراح اخذ سلاح وطلع بسرعة

شغل الجهاز  دگ الرقم  فتح الكام  سحب ايدي خلاه بيها وطلع جهازه دنگ يكتب

اباوع للجهاز يدگ وباوع لهيذام الي واكف تكول وحش بدون مشاعر مدنگ يكتب صح ادري بي گلبه اسود بس ماتصورت واصل لهيج مرحلة ولاتكول بشر كدامه راح ينهي حياتها كل همه اشلون يزيد بطغيانه

فززني صوت اسماعيل وهو يصيح  حيوانه وعاهرة وداعت ابوي اطلع من جوه الكاع وسحگ على راسج القذر

سكتت

-وييين انتييييي

رفع هيذام الفون كدامي واشر ردي باوعت الكتابة نزلت دموعي

- عاهررره بيت البتاويننن مو وياااج بت الكلبببب ويه اي كواد انهزمتييي حسبالج مانحصلج وراس ابوي اردج واعدم اهلج كلهم كدام عيونج

مسحت عيوني باوعتله تفل عالفون غمضت واسمعه يحجي من بين اسنونه كلها كم ساعة وراح يجيبوج جوه رجليه واعلمج اشلون تنهزمين

فتحت عيوني وهمست مانهزمت

-شنو مانهزمتي اضحكين عليه لج

-اني يمك مااگدغ اعوفك لان احبك بس انت  الجبغتني اسوي هيج

-شنو سويتلج اذا على الضرب بعد مااضربج بس كولي وين انتي

-اسماعيل زواجنا باطل وانت تغيد طفل

-مااريد ماااريد هسه انزل اكول لبابا بس رجعي

-واني اغيد اتمنى يصيغ طفل عندي منك

-لعد ليش عفتيني شنو التردي كولي والله مستعد كلشي اسوي رئال رجعيلي دخيلج  والله اموت من غيرج

-اغجع بس اوعدني تعقدني عقد صحيح حتى نكدغ انسوي طفل حلال

-وراس ابوي اعقدج وشيخ برضاتج وحتى مهر اخليلج بالتطلبي وهسه واذا جذبت الج حق تعوفيني

-واني ثاقه بيك واعغف انت تغيدني بالحلال مثل مااني اغيدك  بس ابوك ماغاح يقبل لان مايقبل اصيغ بأسمك كدام احد

-مو بكيفه هسه اتصل بالشيخ وانتظرج اول ماتجين نعقد وغصباً عنه

-لعد طلگني  وگله بحالة عصبية طلكتها حتى يقنع يعقدنا من جديد

-اي اي انتي طالق طالق طالق…

***رايه ***

انحنيت لاقبل جبينك قبلة الوداع

ثم انني لم استطيع الوقوف بعدها ابداّ…

لحظات مثل الحلم خطفت وگع بالگاع جثه بدون نفس؛  ميلت راسي اريد اتحرك مااگدر اباوعله دم ترس المكان  وذباح الي صوت صرخته رجت الشارع  وهو يركض دنگ عليه شال راسه نكثه حيل وصرخ لااا غزوان لالااا لا يخوييي تگفة  لا تغمض عينك لاااا يخوي دخل الله ودخلك فچ عيونككككك

كمش وجهه يباوعله بتوسل زاع دم حضنه حيل  وصرخ لك لااااااا

ضحكت ورفعت البرگع اريده ينتبهله بلكي يگوم  غمضت واني اشوفه فتح عيونه وايده وگعت   ظلمت الدنيا ماحسيت بعدها

بين مفتحة وبين مغمضة اسمع  عمتي فجر تبجي وتصيح ولك وصهيب الحگ خويك تسودن  --ولك اخذ السلاح وراح يجلع ماگدرت اكضه  --اي حمزه ويااا -- عجل يخوووي

هيه تحجي واني فتحت عيوني عالكيف لكيت رؤيا كاعده لامة رجليه بالزاوية مال الغرفة صافنة ويمها مرت ذباح ملثمة تبجي  وماما منتجية عالحايط  بس دموعها تنزل بدون صوت  شافتني عمتي غلقت الجهاز واجت يمي گعدت كمشت ايدي باوعتلها وبتسمت ضمت وجها بشيلتها وبجت بصوت عصرت ايدها وهمست  وينه

مسحت وجهه وردت بالمستشفى خذوا اخوته

-ليش تبجين تره عايش هسه يرد  مايعوفني وحدي انتي ماتعرفي اشكد يحبني

-ادري يمه  هسه هم امني عليه صهيب

-كولي لماما لاتبجي خلي تكوم  تستعد  اليوم زفتنا

-انه احضر كلشي  بس گومي غيري ملابسج لخاطر نروح لغادي

ردت اگعد خانتني قوتي سندتني عمتي گمت كعدت همست وين ملابسي

-يمه هيام عطيني هذا الثوب الاسود اليمج

-ليش اسود وين بدلتي

ضمت وجهه وبجت لزمتها وحجيت بترجي لاتبجين والله يرد

-لك يعممه غزززوان  لك تعااال ليه ولك مريتك مناطرتك بدلتهااا ولك يرد يبعد عمتك اخياتك واميمتك عينها وررراك

-لاتصرخين عمه موزين تفاولين عليه

-ولكم صغير بعده ولكم اوليدي عريسسسس  ولكم راح وعيونه بمريته مالحگ يتهنه ولج يمه تعالي ليييه

رجعت ليورا واني اشوفها فتحت شيلتها وشكت دشداشتها وگامت تلطم وصرخ بعلو صوتها

انضربت بالحايط لميت رجليه لحضني صافنة عليهن  احس نفسي داخل حلم  ومنتظره واحد يگعدني

فزيت على صوت واحد يصيح سووو مجااال وذباح  يصرخ  وعلي اليوصل يمه ادفنه ويااا ولكم وبعدووا عنييييي

كامت عمتي ركضت هيه وهيام طلعت وراهن ماما ثواني  وبده الصريخ واللطم ياخذ الكلب

اريد اكوم مااكدر حسيت بشلل  زحفت زحف وصلت للباب واشوف ماما نايمة على تابوت وعمتي يمه اتملخ بشعرها

وصهيب ضام راسه وذباح لازم التابوت بثنين اديه ويباوع لاخو بغضب حسيت ايد عليه شلت راسي لكيت رؤيا همست بتعب  سنديني

دنكت گومتني امشي عيوني بالتابوت  ويه كل خطوه اتامل اوصل واشوف البي موهو  كعدت يمه كمشت الغطه ردت ازيحه لزم ايدي ذباح اشر لاا

-بس اشوفه

-لاتتنوعيله ولاتبجين لحد ماچيب دمه

حجيت بتوسل خلي اوخر الغطة بلكي بعده عدل هو وعدني

-عدل يتنعولنا مناطرني ارد حگه وانتي تحللي من وعده

-وخر ايدك والله ماشوفه بس احجي ويا هو اذا سمعني راح يگعد

دفعني على رؤيا  وشال السلاح وطلع يركض   رجعتله  وخرت البطانية عنه لكيته ملفوف خليت راسي على صدره حضنته همست غزوان حضنك بارد  هاي اني راية حبيبتك شنو ماعرفتني 

موجنت تكول گلبي يشتعل من احضنج لعد وين اشو مداحس بشي كوم اليوم زفتنا خلص بعد ماكو شي يمنعنه  كوم سكتهم لاتخليهم يكسرون فرحتي  كلهم هاي الخلصت عمري احلم بيها مامعوفها لان ادري ماتعيش وراي

گوم غزوان لاتخليني اتوسل بيك ينطيك كلبك هيج تسمعني اتوسل وماترد مو جنت تگلي اسمعج لو بالتابوت  ومااخلي دمعتج تنزل وهاي انت صرت بالتابوت لعد ليش ماترد عليه

غزوان جنت تحسب لهذا اليوم بالثواني حتى تنام بحضني مو تنام بالكبر  كوم شوف اشلون سويتلك شعري وجبت البدلة الجنت اسولفلك عليها

جرتني عمتي دفعتها ورديت كمشته وصرخت ولك كوووم اشلون تريد تروح بدون لاتودعني ولك اشلون تخليني وحديييي ولك غززوان كوم لاتموتني ورراك

صوت رصاص علگ المكان مخلوط بصوت صياح العالم ثواني ودخل ذباح يركض صرخ ميلوها عنننه وشيلوووا ردينا دمناااا

لزمته حيل خليت راسي على صدره بسرعة وحضنته  بقوتي غمضت جرتني عمتي وهيام صرخت و دفعتهن سحبني حيل ضغطت على اسنوني وصرخت صرخة طلعت من نص روحي

اشوفهم اشلون غطوا بدلتي واجه ذباح ملابسه كلها دم يمشي گوه وصل يمه دنگ باس راسه واشرلهم يله

بهتت روحي كعدت اباوع بين واعية وبين لااا شالوا والمسيقى والگفلات ورا

عمتي تطش جكليت وتهلهل وماما تزحف بالكاع وراهم ؛ رؤيا لازمة نظاراته واكفة اتصفگ تضحك وتبجي سوه

باوعت للتابوت لافي بدلتي وهو طلع همست بوجع لاتعوفني غزوان وغمضت

**رؤيا.**

طلعوا اخر فرحة محملة من البيت واني على وكفتي صافنة دموعي تنزل والضحكه مرسومه على شفايفي عاصره مناظره اتسنط للهلاهل واصفگ بس اريد استوعب الديزفوا للكبر هذا غزوان نفسه

سمعت ضربة التابوب بالباب كأنما وعيت لنفسي احس النفس خنگني خليت ايدي على كلبي استوني  اركض ورا حتى اودعة وجاني صوت صرخه هيام وهيه اصيح رااااية

انداريت فاتحه عيوني على كبرهن واسمعها تصيح لحگوني راحت البت

بعد اريد حجي لو اصيح وينها ماأكدر لساني انعگد رفعت اديه امشي وهمش مثل المخبلة مااعرف وينها وصلت على الاصوات دفعتهم ودنكت اخذتها لحضني اتلمس وجها عيونها مفتوحة هزيتها حيل ماكو صوت اخذتها لحضني وصرخت ولج يمه اخيتي راحتتتت

ماحسيت غير انعتيت من وراي وصوت فجر تصرخ بعلو صوتها بعدني حتى ماناخيتها سحبتها من ايدي  شالتها وكامت ركضت للغرفة كمت وراها  رحت اسحل بروحي وكفت يم الباب لزمتها بهتانه  اخاف ادخل وتگلي صيحي على اختج 

عصرت نظارات غزوان حتى دموعي ماترضه تنزل غمضت شفايفي يابسة واسمعها كالت ابچي يعمة ورا يستاهل غزوان النووح

شهكت النفس بخنگه دخلت اتحسس وصلت يمها كعدت مديت ايدي اتلمس لكيتها وجها مبلل شلت راسها خليته بحضني لزمت ايدي وهمست بصوت گوه يطلع رؤيااا غزوان ماات ؛عصرتها حيل وشهكت 

…مرن يومين والثالث واني على صفنتي مامصدگة لو مااريد اصدگ اصلا غزوان راح بعد مااسمع صوته الصبح يغني لو بليل يجاكرني؛من كثر الحزن وصلت للجزع احس روحي بعد مااتحمل

راية راسها بحضني مامنهه صوت لازمه مناظر غزوان تغيب عن الوعي وترد تون

ماما حاضنه قمصلته  ومتمدده بغير عالم ؛  ماكو غير صوت هيام وعمتي بالبيت يفترن حتى فاتحة محد سوه لان ذباح انسجن واخو ضال بينا وبينه

متربعة خالة رايه على صدري حاضنتها حيل اتحسس نبضها كارهة عجزي  ؛ انفتحت الباب دخلت هيام كعدت يمي كالت بصوت مبحوح تگعديها هاي عملت شوربة هلبت تاجل اشوي

-لاعوفيها ماعونت تنام شوية

-الله يساعد گلبها موهينه حگها سوده عليه ماتهنوا اشلون جانوا فرحانين ويتنطرون هاليوم

-راح ارد حقها وحق كل يوم ظلمنه بي من روحه

-اخذ ثاركم ذباح

-الرجال  الكتله ذباح ماله ذنب الذنب يم الحيوان الي شمرنا واحد وره الثاني بالجحيم  مثل ماراح احرگه واخلي يتمنى الموت امنية

-خيه رؤيا حگكم يم رب العالمين تركي الثارات وتنوعي لميمتج وخيتج هالتشوفيهن لاحول ولاقوه ضالات بطرگ النفس ماعدهن غير الله وانتي

-مااتركهن اذا ما أمن عليهن

-وين تركيهن وبيدمن تأمنيهن لاحسبالج الغريب يحن عليهن ولاتضحيتج راح تريحهن ترا امج مواته  مچابلة عود غزوان تتنوعله تضحك ودموعها تصب عگلها زال 

-ياريت تموت وتلحكها رايه على شنو ضالات

-استغفر الله انتي من جهه وذاك من جهة متسودن ومسودن ورا خويه محتار بي لاياكل ولايشرب گاضيهه يبجي بالاخص من سمع الزلمة بعد بي نفس يكلهم بس طلعوني اچتله وعدموني

-هو الرجال مو انهزم اشلون حصله ذباح

-دز ورا ازلامنا لگفوا بيت ارفيجه جابوا لان حلف مايدفن اذا مايخذ حگ دمه وهذا لاهو الي اخذ حگه ولاهو الي ضل على روسنا ضيع نفسه بالخالي

-وهسه يخلون شرط مايتنازل عنه ويطلع اذا ماتنازلنه عن دم  غزوان

-وحگ دين محمد يبن البدوية  طلع يذبحنا كلنا مايخلي بينا واحد يشم هوا ؛ماعليه يطلع ابو صكر حطله محامي وراح لاهل حرمته هلبت يحلوها وياهم بفلوس

- كلها تنحل وكلها تعيش ماراح بيها غير غ--

ماكدرت اكمل احس بخنگه عصرت راس رايه بحضني الي بعد ماحس بي گد ماحاضنتها خلت ايدها على مانتني هيام وگال شمالها اخيتج ولج

همست مصخنة

-جا عليش هيج شفاها زرگ

سكتت

-رؤيااا خيه موش وياج احجيي

-لان ماراح تصحى ؛رايه ماراح طول وره غززوان

-شووو عطينياهااا

-تركيها بحضني خلي اشبع منها اخاف هم تروح مثل الباقين واضل بحسره حضنها

-شوو بعديي

كالتها وسحبتها مني  صاحت  يمه سودة بوجهييي ولج عمممه لحگي علي البت بلا نفسسس 

كامت واني رجعتها لحضن وخليت راسي على راسها  اتسنط  لنفسها بكسرة بداخلي غصة تخنگ الدنيا بكبرها

دخلت عمتي تركض اخذتها مني تضرب على وجها ضليت بمكاني حتى مارفعت راسي وندعيت احس بعد ماله فايدة

زحفت ليورا انضربت بالحايط ابتسمت واني اسمع الي تصرخ تريدها تصحى والي تغسل بوجهه وتبجي وصوت ماما تكلهن لابلكي بعدها عايشة

لميت رجليه لحظني اعرفها قررت نهايتها من نفس الدقيقة الراح بيها غزوان؛  بس جان عندي امل اكون مو اني الاخيره بالموت

اكثر من نص ساعة وهمه يحاولون وياها بديت استعد للصرخة الي اختم بيها كل وجع واسمع صوت ونتها وهيه تهمس  بغزوان

نزلت دموعي ودنيت اتلمس سحبتها منهن مسحت عن وجها المي حجت بتعب رئال  بردانة

صعدت  البطانية لفيتها عدل و ضميتها بصدري دنگت خليت راسي على راسها وغمضت مااعرف اشلون اواسيها

مر اليل وهيه تسولف بدون وعي ويه رئال وتشكيلها من غزوان مضوجها

صار الفجر وحنا محد نام عمتي لازمه السجادة وماما على وضعها بس صوت بجيتها اسمعه وهيام يمي كل شوية وغسلت وجها واديها لحد ماصاح الله واكبر خفت صخونتها احس حيلي انهد انطتني مخده هيام خليت راسي وهيه بحضني تغطيت بنفس البطانية وغمضت رحت بالنوم بدون لاحس

***رايه.***

كعدت  على صوت غزوان بأذني وهو يغني صغيرة جنت وانت صغيرون ابتسمت وفتحت عيوني على دگت الباب حيل ردت اكوم كمشتني رؤيا گالت وين

-اريد احجي صوتي مايطلع همست بصوت رايح افتح الباب اجه غزوان

-غززوان مااات

باوعت كدامي العود مالته عالحايط وماما يمه حاضنه رجليه تباوعله ودموعها تنزل

رؤيا.- رايه تسمعينيي

-كومي وديني اله

-مااندل مكانه

-رؤيا نعسانه اريد انام

-ماراح تشوفي بالحلم

خليت راسي عالمخده احس داخلي فارغ فاقدة كل شعور لكيت نظارته يم المخده سحبتها حضنتها وعيوني عليهم كلهم يباوعولي ويبحون مااعرف ليش

اندفرت الباب دخل بابا صاح بنات الكلببب تقفلون الباب عليه حسبالجن اتمنعني من بيتييي

عمتي- . اي انه القفلته لخاطر ماتفوت خلي عندك نخوه واخجل على شيباتك بيت كله حريم ماعركت گصتك وانت تفوته

-هذا الخجل جان شفته يمكم وانتوا محتلين بيتي فاتحة وخلصت شكوو بعد ماتولون شنوو ابتيلنا بيكممم

-انت شني ماتحس ماتتنوع لحالتهن اشلونهاا

-مرتي وبناتي اني اعرف اشلون اداريهن ياريت تاخذين بتج وتردون بيتكم افضل مااسحلج واشمرج بالشارع

-تشمر ياهو لك ؛ انت هم حاسب نفسك ازلمه واجف تتحجه ولك چلمة وحده مني حرام بالحرمة ياذباح يطلعلك من جو الكاع يمدك بحبل ويجسر فچك

-هههه ياذبااح بس لاهذا ابن البدوية الي شمرته  بالحجز حاله حال الفاره يبجي ويتوسل حتى اطلعه

-افاا موش ذباح اليبجي تارك البجي والتختل للخوثان  النجسة ؛اذا تنوعت بعيونه چسره فهاي لخاطر اخياته يخاف تغمض عينه وهو مامأمنهن  ويعرف راعيهن اعوج

-سمعي لج

-لج بعينك يالناگص  انكتممم لااكوم اسحك راسك واخلك عبره للزلم العوجة امثالك تفوو عليك وعلى البطن الشالت هيج نطفة قذرة

-راح اعبرها الج واكول مرة

-لاتجيب طاري المرة على لسانك حرمات تنجس اسمها بلحگ خايس مثل حلگك  ويله رد منين ماچيت لخاطراخليك تشم الهوا

-عالاساس اذا هددتي راح اخاف

-انه ماهدد انه اسحگ وانعل ابو اصلك وخاف زتيت واحد للموت انكرص گلبي وراح اكتفي لااا وروح الراح بحسرة العرس ازت الثاني والثالث بدون لاتنوع وراهم  ولااخليك توصل لوحده منهن

-لعد سمعي الج مناا للصبح وليتي خوش مارحتي اشمرج واروح للمركز اشتكي على اخوج هذا الينبح واگلهم مانعي ادخل للبيت حتى يتحرش بناتي هو وجماعته

-اتفوو روح زين شاربك افضل يالزبالة

-كلمتي يله لمي غراضج راح اسوي بأصلي واخليج للصبح هنا بس بعدها معذور بلي راح اسوي

كامت دفعته طلعته من الغرفة وسدت الباب اندارت لهيام كالتها بساعج اتصلي  بصهيب

رؤيا- لا عمه بابا واحد وسخ وصدك راح يشتكي متحرش بينه ومسؤول المركز انكس منه راح يضيع اخوج الثاني

-افديج بديرتي بكبرها موش بس بخوتي انتن وصية العزيز غلطت گبل وعضيت اصابعي ندم ماعاودها على كص ركبتي

-ماراح تگدرين تاخذينه  راح يحاربج بيه لان بعدني قاصر بدل ماتحافظين علينه اتهدمين بيتكم راح يصفي اخوتج مثل ماصفانه

-چا اشتردين الم اجويلاتي اعوفجن ورد ديرتي طلع ذباح ونشدني شني ارد  تركت اخياتك بأيدين هالنجس لان خفت على خويك

-لا ماراح تركينا راح تاخذيهن وياج بس بالبداية خلي يدخل يگعد وأمني وبعدها اخذيهن وانهزمي هو جبان حده هنا ينبح مايوصل لهناك

-شني اخذهن چا وانتي

-هاا اي قصدي اني وياكم بس سمعي مني حتى اتسوين مثل مااگلج لان ماراح نطلع منا اذا مايأمن

-شتهذين يعمه ماچاي افهم

-بس يصير الصبح ترحين تگليله جنت ضايجة وانفجرت بوجهك صدك ذولة عائلتك وانت اكثر واحد تخاف عليهم  اني راح ارد لديرتي بس قبل هاي اريد اخذ ام رايه للمستشفى بلكي ينطوها علاج يهدئها

-وترگجن يمه لاااع

-عمه ماعلينه حتى يأمن اخذيها وروحي اجري سياره خلي ماما وضلي متانية اتصال مني بين ماقنعه يطلع يجيبلنه مسواك اول مارن عليج تعالي اخذنا

-يالفسفورية گلبي گارصني منج من هاي عيونج التلمض احس وراهن مصيبة

-هه لاامني انكسر ضهري ورا بعد مابيه واكفة

-الف رحمة على رويحته لاتكولين هيج ييمه وعلي ذباح وصهيب موش بس يسندوج لا يكفون بوجه الوكت ويعطون روحهم للموت بس حتى يحموجن

-الله يحفظهم لاهلهم  اني اعرف اشلون  اسند نفسي اهم شي رايه وماما امانه الله يمج ذني

-ملتوحة واكو شي براسج بس ماهو وكته  خليني وراج لشوف وين توصلين يله يمه هيام طر الفجر كومي سويلج لگمه لخياتج

هيام- عمة اخاف اضهر لحالي  لان تنوعت ازلمه دخل للمضيف واسمع صوت طرب

-الله يلعن روحه كل ماتهل وتغيب  ااااخ  يبعد عمتك تروح انت وتظل اشباه الزلم ربي لاعتراض على حكمتك كومي يمه لاتخافين انه چايه وياج هم اجدد للصلاه ماضل عن الاذان جثير

كامن طلعن واني عيوني تتنقل من العود لماما الي تباوع لرؤيا وتعرف وراها سالفة

ابتسمت وغمضت لان احس عصرات گلبي تبلغني بأخر ساعاتي

صار منظره كدامي يباوعلي ويضحك حضنت نظارته  وسديت عيوني حيل اترجاه لايطلع من حلمي ردت بس اعتابه

حسيت ايد رؤيا على راسي  هزيت ابعدها خايفة عطرها يلغي عطره من روحي دنكت همست يم اذني كلها دقايق  وداعت دمعتج هاي راح اخلي يتمنى الموت ويدنگ على رجلج يبوسها بس حتى اترحمي وتكتلي

كمشت ايدها وعصرتها

-بس وعديني تاخذين ماما وترحين وياهم حاولي توكفين على رجليج لخاطر رئال ماعدها غيرج لاتتخلين عنها منتظرتج تردين  تخلصيها

مارديت عيوني على دموع ماما  اتمنى ابجي مثلها بلكي اگدر اطلع  الجواي

دخلت هيام عيونها حمر بيدها صنية الريوك خلته وكعدت تباوعلي ودموعها تنزل دقايق ودخلت عمتي خدودها ملخته باوعت لرؤيا و صاحت لج سمعي يالملتوحة راح اخذ امج وعر لغاد ساعة الج موش اكثر وارد ان خلصتي منه خوش لا اخش اخذجن وانعل ابو شارب

رؤيا - حجيتي ويا

-عمري ماعملتها بس ااخ منج فريتها بيه بس هينه ماضل جثير ويصل چسار راسه اذا ماخليته يبوس قنادر ماطلع انه اختك يذباح

-طلع الرجال الويا لو بعد

-طلع ماضل بس هو غاط لهامتة بالنجاسة

-لعد استعجلي اخذي ماما وهيام وغيمة وروحي ولاتبعدون هواي اجري تكسي خليهن بيها واول مااتصل تعالي بس انتي

-هيام تضل حدجن

-لااااا بس يشوفها وحدها راح يتحارش بيها ولو تصرخ لباجر محد يفزعلها ويخلصها منه اخذيها وياج واستعجلي لان هسه تجي عمتي وتصير صعبة طلعتنا

هزت راسها وراحت لماما دنگت كومتها ولبستها عباتها بين ماتلثمت هيام بالشيلة  كالت لرؤيا يله راح نطلع اخليهن بسيارة واكف عالچاده  اناطرج تتصلين

اشرت اي طلعن بس سدن باب البيت طلعت رؤيا تتلمس وراهن؛ ردت اغمض ماگدرت  احس جمر بعيوني رديت اباوع للباب وكت جيته ابتسمت متأمله يفتحها ويدخل مثل كل يوم 

ثواني وفاتت رؤيا تركض وتنردم  بيدها سجينة  اجت يمي شالت مخدتي خلتها جواها  بعدها ماگاعده دخل بابا يطوطح شافنه ضحك وكال هاا راح فطيسة  الجان ساندجن

رؤيا.- يكول رب العالمين بشر القاتل بالقتل ولو بعد حين بس للاسف ا اعتبر الموت رحمة واني ماحب هالكلمة

-انجبيي وهاي شنو اختج ميتة عدلة شو ماترد

-عوبة حسبالها البجي والمرض راح يطفي نارها ماتدري راح يضل ينهش بروحها لمن يقضي على اخر نفس بيها بدون فايده

-كافيي لغوة وسمعي عدل هاي تصحيها غصباً عنها لاتضل تتحجج بالصخام مات يطبة مررض ماعندي افلوس زايده اضل اصرف عليجن من باجر تاخذيها وطلعن للشغل والي اسمع منها نفس اكسر ضهرها

-عاد عندك شغل النا لو ناوي اطلعنا للجداوة

-وشبيها الجداوة  معيشة عوائل اقلها اطلع مصرفكم لحد ماحصل نغولة يسترون عليجن

-شخبار رئال هم تعرف عنها شي لو مو من ضمن بناتك

-تسوه راسجن لو ماعمها جان هسه بعدني بالسجن بسبب اليهودي الله يحرگة بكبره صدگ وين افلوس محله 

-يم ماما

-اشتعلت روحه هو وامج بيوم واحد خرب بغيرتها صل لايسكت كلبها ولاتنجلط ضالة على كلبي وين غيمة

-طلعت وياهم للمستشفى

-منو كلها تطلع بت المداس بدون اذني خلي ترد واني اعلمها العاهره اذا ماسحكت على راس اخوها بكبره

-منو يكول ترجع يجوز تروح ويه ام ذباح لان هيه ماتعود النه اصلا

-لخاطر اطگ ضهرها بالنص واسحلها اشمرها على انكس واحد بجماعتي اني ربيتها وغصباً على ابوها ترد وحالها حالجن منا وجاي تطلع للشغل  وانتي  يله كومي حطيلي فراش انام ومن ترد القذره گليلها خلي تفرش الغرفة ماخذ غرفتي النكس يريد يعرس براسي يلاااا لج

-ليش ماتجي تنام هنا  لحد ماتجي غيمة حتى تاخذ افلوس من ماما تروح تجيب افراش جديد لان القديم كله بعنا

-لايااولاد الكلب مصفين بيتي تفوو عليكم وعلى روحه النكسه وخررري اختج وطلعي بره  خلي اخمد

-لاتعال هنا مكاني نام  خلي امرغلك ضهرك حتى تنام مرتاح بين ماتصحصح راية حتى باجر نطلع للشغل مااكدر اطلع وحدي

تفل عليها ودخل دنگ دفعها وتمدد عالفراش اباوع لرؤيا غمضت تكتم غضبها  مسحت وجها اخذت نفس وابتسمت گالتله تريد امرغلك ضهرك لو اطلع اسويلك ريوك

-لاااا ماريد سم فركيلي اعظامي تحطمن من نومة الحجز ربي يحجز ارواحجن بجحيم

هزت راسها ودنت يمه انكلب على وجهه وهيه بدت تتلمس بضهره وتفرك عالكيف حسيتها دور على مكان يشله مو يموته بالطعن  كمزها بصوته وهو يصيح فرگي عددل

بدت تفرك وهو غمض اقل الدقايق بعده ماغافي اندفعت الباب ودخلت ماما تركض بيدها سجينة جبيرة وعمتي وراها تصرخ

ديندار مالحگ على سرعتها وهيه تدفع رؤيا وتغرزها بنص ظهره -----

لاتنسون التصويت❤️