رواية شيء من رصيف الدم الفصل السادس عشر 16 - بقلم Leo Alfatlawi

شيء من رصيف الدم

بقلمي: leo Alfatlawi

بارت السادس عشر

***رئال***

اختفى صوت  عمي بشوفة هيذام وهو يدخل بزي عسكري اسود مسلح بيده واحد من الحرس يسحل بي وجهه كله دماية وصل يمه  شمره جوه رجلي وگله كم مرة نبهتك عالحماية يااخي اختار زلم بيها حظ

عمي -شرجعك

رفع حاجبه اشر شنوو؟؟

-يعني قصدي وين اختفيت كل هالمدة ماضل مكان مادورته  وراك

-لاه ماتقصر

-اخوك بالمركز حتى ليلة ماينامه واني ماخليت مركز  ولامسؤول بالدولة مابلغته عن اغتيالك

-ومنو گلك اغتالوني

-الحرس كالوا ياابني تعرف مستهدفيك اشلون جازفت وطلعت وحدك

-جنت ضايج ردت اتسلى بس اشلون تسلية مكانك خالي يله ملحوگة

-عرفتهم منو ذولة وشنو جانوا رايدين منك

-عالم فارغة تجبرك تعجل اخرتها لاتخلي بالك دزيتلهم واحد يلعب وياهم بين ماافرغلهم و جدد العقد ويه عزرائيل

-منو دزيت ؟؟ كافي بابا ماطول رجعت بالسلامة اتركهم لخاطر ابنك لايتأذه

-شعره من راس ابني مقابيل اصلك بكبره  كفيلك محمد من اصغر طفل لشيخ عشيرتك كلها امحيها ماارحم بشر منهم

-شقصدك لاحسبالك الي ايد بالصار تره انت حالك حال ابني لاتخلي الحقد يسود عقلك ولك حتى النوم مامر على عيوني وراك  

ضحك بستهزاء دگدك على متنه وهمس بصوت يكتم النفس - حظاً اوفر

اندار باوعلي احس كلبي من كثر النبض صار واضح اعرف غلط بس اتمنيت اركض انضم بحضنه واشكيله عن كل السووا والحسيت بي بغيابه

عگد حاجبه نزلت دموعي ابتسم  واشر على ادية بوضعية كلبجات عرفته يقصد ماتركج اذا ماردهن بيدج

شهكت وضحكت سوه ؛ ضحك ورفع راسه ليفوك صاح درررع

مسحت دموعي صارت عيني بعمي الي واكف وجهه باهت ايده ترجف يباوع للحارس الي ماضال منه شي صاحي ويرد يباوع لهيذام بخوف رد ليورا على نبرة صوت هيذام الي رجت البيت وهو يصيح لك دررررع

انفتحت الباب طلع درع يركض ورا عمتي رحمة تسحل بروحها  وگفت لزمت الحايط  ؛ دنگ شال ابنه حضنه بقوة اشتمه وباوعلها  همست عساك بوجع كلبي

-دخيلج عمه ادعي بكلشي بس گلبي لاتوصلي مامعوز

-ليش  هيج هديت حيلي ولك ليش هيج تسوي بيه

-شفتج ضايجة كلت خلي اشاقيها شوية

-تشاقيني بالموت والك هيج هنت عليك تعوفني  عيوني وراك لااكدر ادعي بالموت خايفة تغمض عيني وابنك يضل وحده ولااكدر  اصبر واشوف مكانك خالي

-حتى تكثر محنتج وتبطلين كل شوية  هاينتني  وطاردتني

-انعل ابو حنيتي  لابو گلبي التعلق وره واحد مابي خير مثلك رد منين ماجيت مارايدين شوفتك

رفع حاجبه بجت ضحك باس ابنه وراح سحبها لحضنه

على صوتهم الكل طلع ؛ ام هيذام لزمت الدرج وكفت متفاجأه وازر الي نزل بخطوات ثگيلة يباوعله مامصدک بشوفته

اسماعيل بالباب متبنج وعيونه على ابو بعلامة  سؤال والابو صافن  يباوع للحارس المشمور يم رجلي ويرد عيونه على هيذام الي واكف بصلابة  تكول ملك الموت

الكل مخبوص عرفت ماراح احصل فرصة اخلص نفسي اكثر من هاي

رجعت ليورا عالكيف دخلت للمطبخ انداريت ركضت بسرعة فتحت باب المطلة عالطارمة اباوع  الحرس ملتمين يم الباب يم واحد مصاب

رجعت باوعت وراي  محد منتبهلي صوت هوستهم وهلاهل عمتي وين واصلة ؛همست بسم الله وكتمت النفس

سحبت نفسي بهدوء مشيت على طراف اصابيعي عين بالحرس وأذني وراي اتحرك بدون وعي اي مشاعر ماعندي من كثر الخوف حتى اطرافي ماحس بيها

وصلت مسافة واحس روحي اختنگت گد ماكاتمة النفس وعيوني جمدن من الرعب عصرت جف ايدي وگمت اسحل بروحي سحل ماكو بعيوني غير الجحيم الراح اضيع بي روحي اذا انلگفت

صار باب مدخل الحديقة كدامي تكول باب الجنة من گد شدهتي بدون لاحس ركضت دخلت بيها هيه دخلها وهيه ركضة بكل سرعتي للمشتمل دفعت الباب ودخلت سديته وراي وگفت ايدي على كلبي اشهگ النفس

لمض الفون رفعته لكيت ضي تتصل فصلته داضمه وانتبهت گدامي افلوس عالميز ابتسمت عرفتها خالتهن الي

رحت شلتهن واتجهت  للشباج من الجهه الثانية فتحته اباوع الشارع خالي هدوء ماكو بس صوت السيارات جاية من بعيد  ردت اتصلت غلقته وضميته بصدري لان عرفتها درت برجعة هيذام وتريد تمنعني 

خليت اديه على الشباج همست ياالله ورفعت نفسي طفرت منه وكفت اتلفت محتارة منين اروح  ظلمة هندس ماكو اي بشر انداريت دااسحب الشباج واسمع صوت واحد  جاي من جوه رديته  بسرعة وركضت بدون لااندار 

خلصت الشارع صار واحد ثاني بوجهي  دااندار واشوف سيارة جاية وكفت بسرعة وكمت اهوس بأدية   وصل قريب فرحت لبالي راح يوكف عبرني من حرگة كلبي صگيت على سنوني دنگت شلت حجاره دااشمرها عليه واشوف سياره ثانية اجت ركضت صرت بوجها ورفعت اديه شحط الرجال وگف انداريتله لزمت الجامة وصحت دخيلك عموو اخذني منااا

عگد حاجبه متفاجاه

نزلت دموعي همست بتوسل بابا  اتصل بيه غاح يموت وماكو سياغة تاخذني اله

-شنو اتصل  شعدج طالعة بهيج وقت وين اهلج

-داگلك بابا غاح يموت  ماكو احد يمه ابوس ايدك وخذني بسااع خلي الحگ عليه

-وين هو وشعدج  هنا

-اني اشتغل مساعدة يم وحدة عجوز هنا وهو اتصل  بيه حالته تعبانه كلش فدوه عمو دخيلك غاح يغوح منييي

-وهاي الي تشتغلين عدها ماعدها ابن اخ

-لا بس هيه بالبيت واني خاليني يمها اساعدها  بداعت اطفالك بس وصلني مغوتك

- صعدي بوبه الله يستر عليج

بعد يحجي فتحت الباب صعدت سديت الباب اتحرك واني شهكت مامستوعبه  خلصت  استغفر وباوع للطريق

درت وجهي للشارع احس جنت بكابوس وكعدت منه؛  السياره تمشي ودموعي تنزل مااعرف لان گدرت اطلع لو لان بعد ماراح اسمع صوته

تعدينا المنطقة اخذت نفس  مسحت دموعي  وانتجيت عيوني بالشارع شنو راح يسوي من يعرف انهزمت

غمضت عدلت راسي واني ماهامني عسى ماتنتحر  راح اروح منا اشمر راسي بحضن راية ابجي اخر دمعاتي واحملها امانة الباقين حتى ادير وجهي عنهم واني مطمئنه ماعندي غير حق طفولتنا الضاعت 

وصلنا قريب عالمركز  اتحاسبت ويا ونزلت ؛ وكفت اباوع الوقت متأخر بعده الفجر ماطالع  ماكو عالم بس صوت جلاب والجو بي بروده

صار گدامي الطريق الچنه نرد منه اني ورايه نتلفت مرعوبين  ضحكت لان احس اي رفة للخوف ماعندي كأنما صرت انسانة ثانيه فاقد الاحساس

اخذت نفس ودخلت بي مو تكول بيوت محطمة وشارع يخوف تگول جنه بعيوني بعد العشته

امشي اباوع للاماكن وابتسم اتخيل من نمشي ونعد افلوسنا برچفة اخاف ماكاملات وننكتل وبنفس الوقت نتلفت لايطلع واحد ويلكفنا

دخلت الشارع الثاني ضحكت هنا كعدت من انهزمت من هيذام ورايه واگفه ترزل بيه

دااخذ حسره وكتمتها  على صوت سيارة الشرطة انداريت لكيتها استوها تدخل للشارع

اتبنجت بمكاني بعد مااعرف شسوي حسيت  احلامي تلاشت بلحظه ؛ اتلفت محتارة وين اروح ماشفت غير بعد عني مسافة ستوته ويمها مرة مشيلة شمرت كونية بيها ودخلت للبيت

بلا تفكير ركضت بسرعة دفعت الباب ودخلت داحجي وتفاجأة بالمنظر مكان شبه مهجور كله حطب وسكراب وعلى جهه ثانية مثل الحديقة متروكة  فززتي صوت المرة وهيه تفتح الباب الجوه

انداريت لسيارة الشرطه صوتها قرب رجعت باوعتلها مدنگة تسحل بكونية ثانية شمرتها بالطارمة وردت دخلت

ركضت للحديقة  صار كدامي مثل المنور مغلق برميل اباوع  مكان ضيگ اظلم  مليان حطب وبنهايته گن دجاج ؛صفحت روحي فتت امشي عالكيف حتى ماشوف وين اسحگ عيوني وراي  لحد ماانضربت بالگن واسمع السياره تعدت  غمضت براحه داحمد ربي اجت وحده لخ

طفرته بسرعة صرت ورا  لميت روحي ردت اگعد ماكفاني المكان جعصت نفسي وحيل وحشكتها گوه احس النفس ضاگ  رفعت راسي للسما استوني اهمس يارب سمعتها وگفت وصوت شرطة نزلوا غمضت وخليت راسي بحضني

صوت سحلت الكونية طلعت من البيت وصوت المره وهيه تكول خيرر ياطيرر اليوم شكوو يامهجوب مسويله مكسوره من صباحية الله

رد صوت واحد خشن كالها  وحده وحده مو واحد حجية

-يعع عوذذه بت منوو هاي المصخمة وشنو مسوية

-ارهابيه منهزمة سوي مجال خلي يدخلون يفتشون البيت وانتممم  طوقوا الشارع بسررعة

-ولك شنو عندي وتفتشون  مره گاعده بحدي وهالتشوفني اريد اطلع على باب الله

-لاطوليهااا حجيه وخرري خلي الولد يدخلون وانتم يلاااا كدامي

-ياااع ولك ماعندي شي لاتكسرون غريضاتييي

-انعل ابوج لابو غراضج وخررري

اسمع دخلوا وهيه وراهم ادعي وتصيح يبوو لحگوني هجموا بيتي

كتمت النفس غمضت صارت بعيوني ماما وهيه تودعنا للشغل ابتسمت بوجهي نزلت دموعي همست مافد يوم شكيتلج لان مااريد ازيدها عليج بس ماما بعد ماتحمل اندعيلي لان عذبوني هواي ؛كسروا خاطري وجعوا كلبي اكثر ماهو موجوع

حسيتهم صارا قريبين عضيت ايدي اكتم شهكتي عصرت نفسي حيل وسمع العجوز  صرخت ولكم مكسورين الرگبة هججتوا دجاجاتيييي ولكم يبووو لحكونيي ياعالمم

صاح واحد منهم من اشتعل ابو ابوج على هذا الصووت

-عسى ابهاتكم كلها اشتعلت ولكم مهجوب كله فضلات حيوانات شعدكم داخليينه ادورون على بت لو صخلة مثل اوجوهكم

-تفوو عليج وعلي الدخل وينكم  طلعوووا انعل ابو هيج صباح بهيج اوجوه

غصباً عني طلعت صوت الشهگة واني اسمعهم طلعوا وهيه مستمره ادعي سدت الباب حيل وردت دخلت جوة

رفعت راسي مااعرف اشلون اشكره باوعت للسما ابتسمت مسحت دموعي الي ماترضه تبطل

مر وقت وصوتهم بالمنطقة من مكان لمكان واني عيوني بالضوه اخاف تطلع ويردون يدخلون يفتشون تذكرت غزوان هسه اكيد وصلولهم وضل خايف عليه

طلعت  الفون فتحته لكيت كومه مكالمات  من ضي اول ماتصلت اجاني صوتها وينج يالغضببب

-عوفج مني ضي بداعت الصداقة اتصلي  بغزوان كليله لايقلق اني بمكان امن 

- عوفج منه رئاال عرفوا بيج انهزمتي وطلعوا دوريات وراج راح يحصلوج ماتكدرين تخلصين نفسج احجي وين انتي لاتخافين هيذام رجع بعد محد يگدر يأذيج 

-ضي اتصلي بغزوان

-رئاااااال لاتخبلينييي احجي وينج ولج اذا لزموج مايرحمووج

-مايلزموني وحتى لو لزموني عادي خلي يكتلوني بس مااغجع لاسماعيل

-رئااال رئااال بس سمعيني والله هيذام كال

-هيذااام هيذااام هو سبب كل الصاغلي هو خلاني اشمغ نفسي بهيج قذاغه  اذا اكو واحد لازم انعله  هو هيذام

-رئال وين انتي

-بمكان انظف من الجنت بي بألف مغه

-راح يحصلوج والله وكتها محد يكدر يخلصج لان ياخذوج لمكان محد يعرفه غيرهم

-خلي ياخذوني وين مايغدون ضي اهلي امانة الله يمج اخاف انلزم لاتكليلهم شي گولي  سافغت ويه زوجها وضلي أمنيهم عليه اشكد ماالله ينطيهم عمغ

همست بترجي رئال

-غوحي ضي وكتابي ضل فوگ اخذي غجعي  لهيذام كليله كلماته الجانت  تشوفهن بداخله مو نفسهن اختلفن مثل احلامها وتفكيغها

-وين راح ترحين

-للمكان الجان لازم اغوحله من اول قغغت اخذ حق غند 

-شراح تسوين

-مااسوي همه الغاح يسون واني ماغاح امنعهم لان ماضل عندي غير حقنا يمه اخذه واتوكل

سكتت شويه واسمع صوت شهكتها ضحكت وسديت الفون خليته يمي وعدلت گعدتي منتظره اشوكت تطلع المره ويردولي

صار الصبح احس عظامي كلها تكسرت وهمه بعدهم كل دقيقة يضوي الفون وافصله ماينطيني كلبي اغلقه واقلقها اكثر انتظرت يا يلگفوني وانهي روحي يااني اخذ روحه واروحلهم ينهوني اقلها اكون مسويتلي شي قبل لا اموت

طلعت الدجاجات من الكن  ضحكت على شكلها ام وفروخها وراها  خليت راسي على رجليه عيني بيها اشلون تحفر وهنه داير مدايرها ياكلن اخذت نفس مر شريط ماما من نگعد داير مدايرها هيج وكت الي تسويلها لفه والي تمشطلها

رفعت راسي لفوگ اجه بالي صوت  غزوان من يغني صغيره جنت واني صغيرون ضحكت 

تزوجتوا  لااا ؛ بعدكم تفكرن تسمون بتكم على اسمي لو نسيتوني اصلا

رجعت راسي عالحايط اباوعلهن وعقلي يعيد شريط ذكرياتي من طلعتي الصبح اطفر بين غزوان ورايه لضربة سياره هيذام. لحياتي الجابتني تسحل بيه لهاي گعدتي

مر الوقت والشمس نزلت اسمع الباب اندگ عدلت گعدتي دقايق و المره فتحتها مااسمع شنو حجت بس طلعت وسدت الباب  وصوت الستوته اشتغلت

شلت راسي اتسنط ماكو صوت للشرطة سكت شوية اسمع الناس بدت تطلع  اتلفتت هدوء احس الفرحه ملت روحي باوعت لجهة البيت اكو شباج مكسور جامته . رفعت راسي للسطح موعالي كلش يعني اكدر اطفر منه للشارع الورا

خليت ايدي بالگاع ردت اكوم ماكدرت حاشگة رجعت حاولت سحبت روحي حيل هم ماكدرت استغفرت وهمست  عزا بعينج غئال اشلون حشغتي نفسج هسه منو يطلعج هسه

غيغ موته نكسه بحال اني واني بس اطلع افلش واكتل تالي حشغتي بكن دجاج امداج

لزمت الكن سحلت روحي حشرت ازيد صحت الله يشعلك يالبول تيغي لج ماما تعالي ليه بتج انجعصت 

صفنت اشلون راح اخلص غمضت اخذت نفس اهدأ نفسي ورجعت كررت السالفه سحبت روحي حيل لمن حسيت ضهري انصلخ بالحايط كمت واني اردد اشتعلت غوحك يالمهتلف 

دنكت شلت فوني خليته بجيبي شلت شعري لفيته 
اخذت نفس بعدني مامتحركة  واسمع صوت طفرة وراي

استوني ادير وجهي مالحگت بحركة سريعة انسد حلگي وانرفعت من الكاع  -----

***رايه***

وكفت جامدة واني اشوف الرجال دنگ عليها يريد يلزمها دااصرخ وسكتتني هيه وتتفل بوجه ودفعه بكل حيلها

رجع ليورا كامت راد يحجي رجعت تفلت بوجه صك على سنونه مسحها ورفع ايده رگضنا اني ماما هيه صارت بوجهه دفعته واني سحبتها لحضني

ماحسيت غير ضفيرتي انجرت بقوة درت وجهي لكيت بابا وراي عرفته يريد ياخذها مني حضنتها حيل ودنگت بعدني ماگايلتلها لزميني واجتني الدفره بخاصرتي من قوتها گعدت مغمضة

عصرت رؤيا  حيل مستعده للضربة الثانية واسمع  صوت رج البيت ويا سحبت اقسام سلاح

شلت راسي واشوف غزوان خانگ ابو طبر خال السلاح براسه ويباوع لبابا بحرگة حچه من بين سنونه  اثاري النكسس يضل نكس لو تسبحه بزمزم

بابا- ليش نكس هاي بس لان اجيت اخذ بنتي

-هاي ياااابت لككك

- شنوو يابت غزوان سوالف السجون ماطبقهن عليه بنتي اخذها برضاتك لو غصباً عليك

- ورؤيا ماتطلع  اله واني جو التراب

-يعني شنو؟؟

-مثل ماسمعت تلم جلابك وتطلع هالمرة اجيت الثانية اذا لمحت ضلك قريب من البيت مو داخله وكلام الله  افلش مخك بالرصاص

-ياعااالم بنتي شنو هيه خاووه 

-عفيه خاوه ومالك بنيه يمي والك ثانيتين اذا مااختفيت منا اخفيك من الحياة بكبرها

-اطلع منا اروح للمركز واخذها منك غصباً عن راسك

-اذا انت زلمه روح الك كل الأمان بس بعدها ضم  نفسك زين

-ليشش الدنيا سايبة بكيفك تهددد هاي بنتييي عرضييي لو تموت مااخليها يمك وراس ابوس اخذها بالمحاكم وكدام عينننك

-واني اريدك تروح لدرب المحاكم وثبت هاي بنتك  لخاطر اروحله والباقي مايحتاج احجي تعرفه كلش زين

-شقصدك لك

-قصدي واضح جاسم اخذ اولاد الزنه واطلع كلمة ثانية وروح الراحت وهيه بحسره اللعبة دقايق وسمك يكون بحضنه وكلام الله اخلي يطلع سنين حرمانه منهن من روحك وروح اخوي ينيمك جوه التراب بخياسك

بالي بكلام غزوان وعيني على بابا الي وجهه وجسمه مشوه من التعذيب اشر لااا وهو يباوعله بخوف 

اتحرك يجر برجله كوة ؛ ابتسمت ماصدگت نوصل لهيج يوم واشوفه مذلول خايف من غير ابو طبر جوه ايد غزوان يرجف مايگدر يحجي

طلع بابا شمر ورا ابو طبر راح يركض اول ماعبر العتبة غزوان دفر  الباب سدها وندار لماما خزرها وصاح  ليشش فتحتي الباااب انتي وين تردين توصلين بالضبط فهمينييي

ماما-  والله يعمة مافتحته  اني بيدي قفلته مااعرف منو فتحه وراي

-ماتدرين  شنووو لاتخبلونييي كلتلكم اطلع اخذوا حذركمم تعوفون الباب مفتوح انتم شنوو عقل ماكووو تعرفين لو ماملحگ عليه  وين ياخذهااا لو مو ادورها لو اطلع ابوي من گبره مااگدر اردها بعد

-بدل ما تصرخ اركضلي دورلي الشيخ حتى اتجيبلي العقد قبل لا يروح للمركز  ويجي ياخذها مني

-ياشيخ هذا هو اني وين اعرفه واجيب العقد وين رجلها حتى اسم لو هوية مااعرفله عمه انتي ماتردين تستوعبين الورطة الوگعنا بيها

-شتريد اسووي غززوان وين اولي و منو يصدگني  ولك يحرموني منهننن ولك يرحن بناتييي

-كله بسببج

-لااا بسبب ابوك هو البلاوني  هو الخلاني اوافق عليه دگلي صدر كال بناتج بأمانتي كال اني احميهن مااسمح لبشر  يوصلهن كال راح اعوضهن مكانه ماراح اخليهن يحسن على غيابه روووح گله وين وعدك روح عاتبه اله لا تجينييي

-عوفج من ابوي اني الراح احميهن وكلام الله حتى رئال اردها لو اعرف نهايتي بيها بس كليلي وينه

-مااعرررف مااعرف ولااااريد اعرررف كل الصارلنا من ورا هو الدمرني كلتله خلينا نبعدد كلتله راح ياخذوهن مني كلتله ماراح تگدرلهم ماسمع لحد ماضيعنا

- ابوس ايدج  اذا ذني گدرت احميهن ذيج لااا والله تنتهي گدام عيوني واني مااكدر حتى احجي

اشرت لااا ورجعت ليورا  كعدت يم الحايط خلت راسها بين اديها 

ضغط على سنونه دفر الحايط وراح صعد فوك كمت رحت يمها كمشت راسها باوعتلي ونزلت دموعها بعجز  اشرتلها شنو الصاير

همست تحبي

-غزوان شنو جان يقصد

-اخذي وروحوا منا جاسم ماراح يخليكم

-منو هذا الجان يحجي عنه وخالي ليش هيج وعدج

-جان يعرف ابوج مابي خير ردت اطلك بس هو مارضه كال انتي يمي محد يكدر يأذيج بي راح وتركني بين اديه مكسور ظهري بيجن

-منو هذا الي يريد عنوانه غزوان ماماااا جنتوا تحجون عن شخص منو هووو

-واحد جان يشم الهوا بيجن واحد جان يواصل ليل ونهار شغل حتى لايقصر عليجن واحد جان ماينام الليل اذا مايشوف ضحكتجن بعيونه

-منو هو  وين راح

- مثل مااجاني بدون لا اعرف عنه شي راح بعد ماكسر گلبي وسلم روحنا للموت دورت عليه هواي ماخليت احد ولا مكان بس ردت احصله واگله ليش هيج سويت بينا

-جاسم  مو ابونا؟؟

-لااا مو ابوجن ابوجن راح وعافني محتارة بيجن بعد ما خلاني اعض اصابعي ندم اشلون حبيته ووثقت بي ابوجن الشيطان براسه

-هه شدتحجين انتي

-الشي الي تحملت بسببه الاهاين والقذارة طول هالسنين بس حتى احميجن

-ياحماية هاي ماما انتي واعية للدتگولي  لو انتي هم مو امنا

-لالااااني امكم لاتحجين هيج راية

-لو صدگ جنتي امنه جان حافظتي علينه  وما جان خليتنا انشوف كل هالظلم ونعيش بهيج قذاره  واحنا نترجاج تبعدينا عنه

-ماكدرت والله  هددني بيجن والله گال بس تتنفسين اروح اگلهم بعدهن عايشات خفت يردولجن واني ماصدگت اضمجن عنهم بس ردت تكبرن حتى امن عليجن بيد غزوان واكتله 

-تأمنين  منووو وينهنن هنه رند الي سكنت التراب لو رئال الي مااعرفها وينها

رؤيااا هاي گدامج  عاجزة حتى عن النوم من كثر ماداخلة بالظلام  لو اني الي عين بغزوان وعين بخواتي الي ضاعن من حضني مااعرف اشلون ارد المهن

-راية

خليت ايدي على حلكها  همست بكسرة بس كلمة وحده ماريده غيرها احنا خوات لولا 

جرتني رؤيا رفعت راسي گالت حتى لو مو دمنه واحد اضل هاي امنا وذنيج خواتنا

-يعني شنو؟؟

-يعني جنه عايشين بجذبة يعجبج تكملين هلا بيج ماتردين كومي اخذي رجلج ولي منااا

كمت كل ذره بيه تنكر السمعته  دفعتني وتلمست كعدت يم ماما الي تباوعلي ودموعها تنزل بتوسل  خذت راسها لحضنها وماما شهكت بصوت

رجعت ليورا مامصدكة اريد واحد يكول جذب اريد واحد يگلي انتي بحلم وكل هذا وهم هسه تگعدين

عثرت كوه سيطرت مااوكع لزمت المحجر  صعدت الدرج احس رجليه خدرانه مااكدر احركهن وصلت اخر باية لكيت غزوان كاعد يم الحايط مدنگ خال راسه بين اديه على صوتي رفع راسه ابتسمت واشرت شنو

مسح وجهه وكام اجه راد يسحبني وخرت ايده جرني لصدره دفعته ضغط حيل گال وكلام الله عقدها  بالحلال و ابوجن جان زلمة ينحلف بأسمه

-يعني جنت تدري

-مثل ماادري انتي حبيبة كلبي ومستعد اموت ولااخلي دمعه تنزل من عيونج

-ليش ضميتوا علينه ليش وهمتونا كل هالسنين بواحد حيوان مثل هذا

-ابوي الجبرها راد يضمنجن تضلن يمه مثل ماراد اخته ترد للحياة بعد ماتمرضت وفقدت الامل من كد ماخايفة  لاياخذوجن منها

-وينه

-ماادري  كل الي اعرفه ابوج  جان سايق يوصل عمتي للمدرسة ماعنده حتى اهل وحداني بس الكل ياهبه اخو خيته  بهالفتره كام يحب عمتي اتقدملها جدي رفضه ضل اكثر من سنة هو يحارب ماخله شي ماسوا بس راده يقبل تعب هواي اخر شي كام يهدد اذا انطيتوها لغيري اذبحكم

-انهزم بماما ؟؟

-صح طلب منها هالشي بس هيه رفضت رد يحاول من جديد ماترك واحد ماجابه لخاطر يقنع جدي حتى البيت اليمهم اشترى الها وجهزه وكلهم هاي گدام عيونكم تضل وكلشي تردوا اني جاهز بس انطونياها من شافه هيج متمسك بيها وعمتي تمرضت عليه وافق

-اشلون ماسأل عنه

-سأل الكل يمدح بأخلاقه لهيج أمن وصدگ حب عمتي حب ودللها دلال مامر على بشر  والزاد عشگه  الها من صرتن كام يشوف الدنيا بعيونجن صار همه الوحيد اشلون يسعدجن جان مستعد ينطي نفسه للموت ولايشوف وحده بيجن نازلة دمعتها عيشجن عيشت ملوك  لحد ماصارت سالفة دمرت  هذا كله

-شنو السالفة وين راح

-مااعرف شنو الصار الي خله عمتي هيج كارهته وابوي يغير هويتجن يسجلجن بأسم جاسم ويغير عنوانه حتى يضيع اثرجن

-معقولة مادور علينه

-مااعرف ولاواحد يدري بي عايش لوميت

-زين ماما اشلون انطاها كلبها تخلينا هيج نعاني ويه جاسم  ليش مابعدتنا

-جاسم استقوى بعد  موتت اهلي كام يهددها اذا تنفست يشمرها بتهمة وياخذجن يبيعجن واذا تحركت لوفكرت تنهزم يروح يفتن بعدجن عايشات وهيه ماصدگت تضمجن

- بس جان كالتلنا وهيه تشوف نظرة الموت بعيونه واحنا كارهين نفسنا من نظرته الوسخة وهيه تتنقل بينا 

-لان هو وسخ وبس تعرفن راح يأذيجن بالزايد كم مره ردت اكتله وهيه منعتني هددتني اذا سويتها  تنطيج لاول  واحد يدگ الباب حتى لوجان نكس مثله

-وانت ليش ماكلتلي

-خفت تفلت منج كلمة گدام رؤيا وادري بيها متهوره وهو حيوان صرت احسب الدقايق لعمرج حتى اخذجن وانهزم بس مااجت عدلة بيدي بدل مااخلصجن خسرت ثنين خذن روحي وياهن

- راح ياخذ الثالثة منه

-وروح اخوي  اذبحه واخذ اعدام  بي ولا اخلي يوصل لوحده منجن

-يعني هم راح تعوفني

كمش وجهي رفعه باوعلي عيونه تلمع من وره المناظر همس صدگ تحبيني راية

-واموت اذا صارلك شي

-دخل الله ياهالكلمة التمحي تعب العمر كله 

-غزوان خلي نروح منا فدوه ماضل عندي غيرها

- والله راح ابعدكم بس خلي اصفي كلشي لان مااكدر ارد بعد ادري بي خنيث وراح يتبعني وياخذها مني بالقانون

-شنو راح تسوي ويا هسه

-اطمعه بكم دينار لان هسه متوازي ادري بي وخاتل مايكدر يطلع لو مامتأكد ابو الولد بالمستشفى ما يتجرأ ويدخل المنطقة لبين ما ابيع كلشي واخذكم واختفي

-يعني جان جاي  حتى ياخذها ينطيها مكان دم الولد

-حيوان وناقص يريد بس يخلص نفسه بأي وسيلة بس سهله اذا ,مافريتها بي وسلمته بيدهم تسليم اهالي مااطلع ابن ابوي

سكتت

-رايه لاتقسين على عمتي وكلام الله من كثر حبها وخوفها عليكم هيج سوت تره هيه اكثر وحده تحملت وجع لا تزيدي

-جانت تشوف الكسرة بعيونه وسكتت

-لان كلمة وحده منها تنحرم منجن ادري مو سهلة بس خطية كافي عليها بتها اندفنت بدون لاتودعها

-بالعكس والله حسيت  هم ونزاح من عرفت دمنا مومن نكاسة دمه بس خفت بنفس الوكت

-ماطول يمج مااريد اسمع هيج تحجين

-هم يجي يوم ونرتاح

-ونتزوج ويصير عدنا  بيت واطفال وارجع من الشغل تتلكوني ادفر الجهال واخذج لحضني اطلع  تعب وطياح حظ الشغل  من عيونج

-واضح

-ولج احبج والله  ليشش ماتصدگييين

-احلف بأعز شي عندك

-وحگ الرزقني بيج اموت بطاري اسمج مو  شوفة عيونج

-اوعدني مايجي يوم وتمل وتتركني بسبب مشاكلنا

-روحي فدوه الج ولمشاكلج  اذا انتي نبض گلبي هنه الروح العايش بيهن مايبعدني عنج بس الموت

-لاتجيب طاري الموت على لسانك والله مااتحمل اسمع هالكلمة مو احسها

-ههههه بداعت ام لدغه اذا متت شتسوين

-اموت وراك دنيا مابيها هواك مااريدها

-يعني تحبيني

- مو كلش

رفع حاجبه ضحكت سحبني لحضنه حضني حيل ودنگ اخذ نفس طويل همس دخيل الخلقج اشكد احبج

-بس نتزوج اكتب قصتنا حتى من يكبرون جهالنا يشوفون اشكد تعذبنا حتى نتزوج ونجيبهم للدنيا

-منين تبلشين بيها

-من اول تاريخ اختاريته حتى تعترفلي بي  ١١/١١ الساعة ١١ بليل ويه موعد اول كلمة احبج لاحلامنا وحنا بطريق المدرسة لسهراتنا جو الگمر بالختلة  لكلامنا بالهمس والاغنيتنا المفضلة  لبعدنا ايام السجن وانهيها بهاي وكفتنا ولبستي للبدلة

-مااوصيح طفري حدث العود الي اشتريته بدم گلبي وكفته بالساعات منتظرج  حتى تجيني واغنيلج بلكي ترضين حضرتج وتنطيني بوسة وانتي تضربيني بوري واضل مثل الزمال بس اباوع وراج مكسور الخاطر

-علم النفس يگول الحضن والبوسة  قبل الزواج يقلل الحب

-بروح اخيتج

غمضت وهزيت راسي عصرني حيل ضحكت ضحك على ضحكتي  باسني عالكيف همس بس يمي تزيد النار بروحي

-مم صح يله وخر خلي انزل يم ماما احس كلبي وجعني عليها سمعتها كلام يوجع

-يمها رؤيا ام گلب الطيب هسه تلكيها هافتها كله وخالتها تطفر بالطارمة گد مامرضية تعالي نكعد هنا   شوية تعبان والله

اتسنطت صدگ ماكو صوت جوه جرني من ايدي رحنا كعدنا سحبني لحضنه ضميت راسي بصدره حضني بقوة وخله راسه على راسي همس زعلانه مو

-الي مثل  وضعي وتسمع بهيج خبر المفروض تنصدم لو تبجي على الاقل بس اني ولاحسيت تكول جنت متوقعه هالشي لان ولا مره اعتبرته ابونا بكد ماجنت متمنيه موته

-احبج

سكتت

-بعد ماتحبيني مو

-هو اني اصلا ماحبك

-هم صدگ بس انطيني نفس شويه لان خنكتيني

-اسكت غزوان

-يعيون غزوان الروح وراعيها فدوه الج

كالها ودنگ باسني عدل راسي على صدره حضني حيل وانتجه عيونه بالگمر

مر الوقت ثنينه ساكتين نباوع للگمر تكول نريد نشهده على قصتنا وتعبنا ؛  بدت النجوم تختفي والصبح يطلع حتى الجو برد ضمني بقوه اخذ نفس طويل باسني ورجع  راسه على راسي غمض  همست غزوان

-روحه

-اذا طلبت منك طلب راح تردني

-لوطلبين عمري وحگ الرفع السما ماعزها عليج

-اريد اسمع صوت رئال قبل زواجنا لان تواعدنا تكون اول وحده تباركلنه هيه

-من يوم السمعت طلع ابوج  لحد دخلتي اليوم للبيت واني ادور على احد يوصلني لزوجها گلبي يگلي  صايرلها شي لان متأكد ضحت بروحلها لخاطر تحمينا  وروح اخوي  محتار وين اروح والمن اسأل

-يعني راح نروح بدون لانعرف وينها

-كل عقلج لج هاي ام لدغه اخيتي الصغيرة وحق كلام الله مااتحرك اذا مااحصلها وتحلفلي بروح الراحت بحسره الثوب مرتاحة يالله اطلع منا

-ويلوموني ليش احبك هلكد

-مم بس الحب موكلمة تنگال الحب اثبات

-غزوان ماضل هواي على زواجنا اصبر

-بس انيمج بحضني وداعت عيونج كلشي مااسوي والله صارت حسره بگلبي انام على عطرج وبعد مااكدر اتحمل اكثر

-لااا

-كلها ساعتين ويصير الصبح  اول مره اطلب منج بروح خالج  لاتفشليني

-لاتخرب حلمي وانت تعرف امنيتي ادخل حضنك باول ليله النا حتى تكون ذكرى حلوه 

-تمام خليج هنا لاتتحركين هسه جاي

كالها باسني وسحب ايده كام راح للغرفة كعدت منتظره شراح يسوي  دقايق وطلع بيده مخده وبطانيه ضحكت

اجه يمي  شمر المخده  وفتح البطانية كعد سحبني لحضنه لفني وانتجة عالمخده عصرني حيل ضربته على صدره  همست راح اختنگ

-اگطع النفس قبلج واكتب وصية يدفنوج بكبري وقتها ماكو مفر راح تنامين غصباً عنج

-وهاي تنهي حياتك حتى انام بحضنك

-حقج لو تدرين شنو داحس هسه  ماحجيتي هيج

-ضهرك راح يوجعك من الحايط

-لعد شسوي اذا بت كلبي ردتني بلكي اكسر خاطرها وتكلي كوم الجو بارد وراك شغل

-صدگ بردان

-لاوروح ابوي  الحماوة مفولة يمي بس لاتتحركين لان الشياطين بدت تقره براسي وكلام الله  ياذباح مايقتنع لو تحلفله بالكتب السماويه كلهم حرام  يرميني بصباحية العرس

-هههههه لعد صير حباب

-تره اني حباب من زمان بس جيب اليثمن

-مم غزوان

-الروح والنبض العايش بي غزوان

-احبك

صك على سنونه وعصر خدودي دنگ باسني عالسريع وگال ورحمة ابوي  كلمه ثانيه انعل ابو العرس لابو ذباح

برطمت رد دنگ باسني وضحك رجع راسي على صدره دخل ايده بشعري حضني حيل ورفع راسه للسما اسمعه يحمد ربي بهمس

اكثر من ساعتين واحنا بغير عالم انحس روحنا بحلم يمشي ايده على ضفيرتي ويرد يطبع بوسة خفيفة على راسي ويحضني حيل لمن اجاني صوت رؤيا من جوه تصيح تره صاار الصبح ياعالمم اكو ناس جوعانة

ضحك باسني وخر الغطة كمنا نزلنا  لكيناهه واكفه باب المطبخ وماما عالسجادة كاعدة تسبح  صبحت ورحت للمطبخ بدون لا احجي  دخلت جريت القوري ترسته مي خليته عالنار وكفت غسلت وجهي اجت يمي رؤيا ضربتني بظهري گالت انعدلي لج لااعدلج

-من اشوكت تعرفين

-من قرن لو البارحة شنو اليفرق تره كله واحد حثاله حرمات حتى انكس لسانه بي

-بس جان من حقنا نعرف ليش خلتنا كل هالسنين عايشين بظلام خايفين لاوحده تعترف للثانية اشلون ابونا يتحرش بينه  ونكره روحنا بالزايد

-اذا مو ابونا ابو اختنا وجان لازم نتحمل لخاطرها لان تعرفين بس تتنفسين مو تفكرين طلعين منا راح ياخذها ويبيعها كدامج واذا انتي مره احجي

-اشلون تزوجت ماما واكو احتمال ابونا عايش

-ماما تعرف الحلال والحرام اكثر من شيخ الجامع واكو لغز يمها محد يعرفة والصراحة مااريد اعرفه ولاهامني

-رئال تدري جاسم مو ابونا

-رئال ماتعرف حتى زواجها باطل راحت ضحية بيد ناس انكس من جاسم الحيوان  لاحسبالج الضابط  ادمي تره واحد كلب ابن كلب طالع من حظيرة خنازير مايعاشره غير المثله

-بس هيه كالت غير هالشي

- لعد  شنو ترديها تكول تكلج اغتصبني بعد ماعذبني وجبرني اضل ويا مقابيل يفرج عن اختي ورجلج  لو تكلج اذا فكرت  اعترض راح يشمرني بالحجز ويردهم وياي

-هيج ماعنده رحمة

-مايعرف غير الحيونه من كثر قذارته ماكو واحد ينطق اسمه اذا مايكول الله يلعنه

-ودسار

-ما يفرق عنه بشي من جنت اسمع مكالماته احس نفسي عايشه بغابة كل كلامه دم وقتل وغدر بس جان الامان الي ماحسيت بأي خوف واني بحضنه لان ما اذني بكد ماجان يأذي نفسه وهو يحاول يحميني

-لعد راح يرجع ماطول بابا رد

-راح انتظره لاخر دقيقة بعمري بس حتى يشجعني بالطرق الي راح اعذب بيها الحيوان  قبل لاارحمه بالحرگ ويله روحي احجي ويه ماما تره للصبح مانامت وانتي مخلصتها بحضن الشفية

-رؤيا

-ادري راح نروح منا كافي ضيعتكم مرتين لاتفكرون بيه ربي يسعدكم ويعوضكم عن كل المريتوا بي

-اذا يحبج صدگ راح يندلج

ابتسمت وهزت راسها اباوع لعيونها تلمع رحت يمها اخذتها لحضني دفعتني وصاحت اشبييج

-وجع حسبالي عندج مشاعر وكلت اواسيج

-واسي نفسج راح تاخذين واحد عنده اربع عيون وتعيشين ويه البهايم

هيه تحجي واجانه صوت غزوان من بره ماكو بهيمة غيرج

-غزوان الماسكه ويييين

-شتسوين بيها وانتي تندلين اكثر مني بالبيت

-ومنو كلك اتلمس بيها

-راحت مرتي رايه حبيبي تعالي اخذي الريوك

خليت الجاي بالصنيه طلعنا نضحك لكيته حاط الريوك يم ماما وكاعد خال راسه على متنها وهيه تقره عليه ؛

رحنا يمهم حطيت الصنيه وكعدت يمها كلتلها شنو هااي ام راية  تره اغارر

ضحكت وجرت راسي لحضنها باستني دفعتني رؤيا وكعدت مكاني همست ماعليج بيهم حبيني اني ذوله مايستاهلون

ماما-  كلكم نفس المعزه اذا غزوان النفس انتن النظر ؛عايشة بيكم اني

-قسمي ماراح تحبين جهال غزوان اكثر منه

-صدگ وهيج اشوفهم يمي يلعبون بالبيت وانتم كدامي ملمومين الضحكة بوجوهكم

-من اشوكت كلتلج خلي اشمر الحيوان بالمجري واكول انتحر جان هسه بعدها ام لدغه تعيط من الصبح على كتابها وغزوان يركض وره جهاله احسن ماضال يركض وره رايه على بوسه وهيه لابسته ووو…لو يله كلشي قسمة

-ورند اطفر يمي وانتي اتمشطين كدام المرايه

غزوان-  رؤيا راح توكف كدام المراية ورئال راح ترد تعيط على كتابها ومكان رند راح يجون خمسة يترسون حضنج

-الله كريم بس ربي يفكنا من شر هذا السكط

-هذا شغلته سهلة يمي بس صبولي جاي لان تاخرت  وانتي راية لاطلعين بعد قفلوا الباب زين وصعدن بالغرفة الفوك لحد ماارد

صبيتله جاي اتريگ وگام گمت  للغرفة جبت القمصلة رحت ورا جان واكف يم المغسلة يمسح بمناظره لبسها واخذ القمصلة وباوع ورا رجع بحركة سريعة لزم خدودي عضني حيل صرخت صاحت ماما شكوو

عافني وطلع يركض  فركت خدي ضايجة  وصل للباب اندارلي باسني بالهوا هو ويضحك طلع سد الباب ورا

مرت الايام واحنا عايشين بخوف گمنا نحسب للوقت حساب اشوكت  نصفي غراضنا حتى نجمع كم دينار وننتقل بدون لايحس

بدل شغل المحل صار يشتغل عامل بالنهار وبليل بالحمل حتى يسرع بجمع الفلوس مايرد اله وجه الصبح اخر نفس اباوعله من يدخل اشلون ملابسه متربه واديه مدماية من كثر النقل احس روحي تنعصر يضحك وياخذني لحضنه يهمس تعب اليوم كله مايوصل واحد من نظرت عيونج 

احس هو اليهون عليه مواني اهون عليه التعب ؛رغم كل هذا القهر بس كله يتلاشه  من نلتم يم ماما تالي الليل ويصير الشقة والضحك بين غزوان ورؤيا على الماسكة الي كل يوم توصي وهو ويأجلها على اليوم البعده لان يعرفها المن تريدها

… نايمه واسمع صوت طگطگة فتحت عيوني الشمس بوجهي عرفت غزوان بعده مانايم ديلم غراضنا لان ماضل غير يوم واحد عن زواجنا

ابتسمت وكمت مامصدگة واخيرا راح ننتقل ونخلص طلعت من الغرفه لكيت الكل يفتر يلم بصفحة

نزلت صبحت عليهم كوه لازمه فرحتي رغم عيني بالباب منتظره رئال تدخل بس احس حلم عمري يتحقق كدامي واني اباوعله لغزوان اشلون يشيل بالجنط ويعيونه تلمع من وره المناظر هو ويباوعلي   

طلعنا غراضنا بالممر كملنا كل امورنا رجعنا كلمن گعد بجهه منتظرين ذباح يجي ياخذنا ؛ماما تمشط لرؤيا  وغيمة لازمة سرة

غزوان متمدد يلعب بضفيرتي واني مدنگة  اصبغ بأضافيري حستها انجرت درت وجهي باوعلته غمزلي وهمس احبج خزرته شمرها وكعد گال عمة بطلت ماريد بتج

ماما- يااا ليش ولك

-شوفي اشلون تعاملني شلت گلبي عمي بطلت ماايريد اتزوج

-لاليش ماتتزوج عوفها خلي اتولي واني اخطبلك احلى وحده بالدنيا

-يعني رجعتيلها يله شسوي اتحملها

رفعت حاجبي

-شبيج ولج شكو تباوعين هيج اكو واحد جايب طايرج

-مم المهم راح اروح للصالون ما تأخر قبل لايجي ذباح ارجع

-شعدج رايحه تره ماارضه تلعبين بشكلج

-ماالعب  بس اخصل شعري والله عاجبني

-لااا رايه اله شعرج وروح اهلي لساني مايخاطب لسانج اذا وصلتي يمه لو غيرتي لونه

-غير عرووس هاي وجهج لاتلعبين بي شعرج لاتغيرين لونه لعد عليمن متزوجة

-لا وتكولها بوجهي عمممه شمرضعتها هااي جلي لوحليب اشو اي احساس ماكوو

-اني ماعندي احساس لو انت مشاعرك صارت اكسباير گد ما تلح وهااا راح اروح للصالون اغير وجهي  وهم اسوي شعري دااشوف شنو تسوي

-سهلة الغرفة موجوده والزفة حاضره حتى مايحتاج اطلب قبل لافتح حلكي المره تجيني للحضن

-لعد روح اخذها من هسه يله بطلت ماتزوجك

-واهون عليج اصبح بوجه غيرج

-بس انزع نظارتك انت اصلا ماراح اتشوف

-سمعتييي عمه هي گدامج وتكولين انت تعيل بيها

-اااانت  بديت كلت راح اخذ غيررررج

-وانتي وين صدكتي اكو ثوله تقبل بيه غيرج

-غزززززوان

-هههه عيونه كومي يعمري اوصلج للصالون بس بروح اخيتج لا تلعبين بشعرج

درت وجهي ضايجة جرني من ضفيرتي دفعت ايده ضحك ورد جرها باسها وكام لان الباب اندكت طلع

شلت عدت الاظافر داخليهن على جهة واسمع صوت فجر اخت ذباح تهلهل بالبيت عرفتهم اجوي ؛ كامت ماما راحتلهم  واني لملمت عالسريع كترتها طلعنا اني والبنات بعدني مامسلمة  وهيه نثرت الجكليت وهلهلت ضحكت جرتني باستني وكالت بالمبارك يبعد عمتج يارب السعادة ماتفارچكم طول العمر

غزوان.-  الله يبارك بيج عمة يوم النفرح بأبن ذباح

-يارب يسمع من حلچك بچاه كلمن عنده چاه كون يرزگكم اثنينكم فد يوم لخاطر تخاوهم بالروح  وتكون رفجتهم بالدم مثل رفجتكم

-ان شاء الله بس خلصيني من هاي البلوه واخذيها للصالون  بلكي يتغير شكلها شوية حتى اگدر اباوع بوجهه

ذباح.- گدچلمتك يبا

-اااي طبعا لاحسبالك اخاف اخذيها خوية واذا گدرتي تبدلين وجها افضل

ذباح -انه اگول انكتم  افضل ماتنطگ وتصير مضحكة بين الخلگ

-افااا وانه ا

بعده مامكملها شلت ايدي داوخر شعري عن وجهي وهو طفر

اندارله ذباح رفع حاجبه عدل نظارته وكله شبيك لاحسبالك خفت

ذباح - لاه افاا ياهو يخاف دگف عدل لاتگع وبطل تعيل وانت مانك گدها

- شنو موكدها تره من طفرت مو خوف بس ردت اشوفك تحميني لو بس حچي

-اه صدچت يبن العم غربي يخوي فچر خذي البت للحلاقة بس لاتبطين جثير بروح اهلج العالم ناطرتنا غادي

فجر.-  بس املص  اذانات هذا الواراك واني ماابطي

-مايعتاز كلها كم ساعة وتكضه الي موش بس تملص اذانه لاحتى تچسر راسه وتمشي سيده يله يبعد اخيج كونج تردين گبل لا نكمل نگل باگي الاغراض لخاطر نرد على وكت

هيه ردت وغزوان اشرلي تعالي راح گدامي للاستقبال دخل دخلت ورا دنگ فتح الدولاب طلع افلوس كام مد ايده كال كمشي ذني وكلشي  يعجبج سوي لاتخلين بنفسج شي

-مااريد والله كافي العندي

-رايه لاتشلعين گلبي ادري ماگدرت اجيبلج كل الرايدته  بس ثقي بالله سويت كل الي اكدر عليه واوعدج اعوضج عن كل حلم ماكدرت احققه الج بس صبري عليه  شوية

-مارايده غيرك مكتفيه بوجودك يمي

ابتسم  خله الفلوس بيدي وكمش وجهي بين اديه باوعلي عيونه نترست دموع  راد يحجي وسكت عرفته مايگدر يحجيها ؛ همست احبك

-مامصدگ رايه واخيراً بعد هذا التعب واليأس راح نتزوج

-ماضل كم ساعة ونام بحضنك

-خايف گلبي يوگف واموت  قبل لاشم عطرج

-اسم الله غزوان والنبي راح ابجي

-ههههه صدكتي اموت واعوفج خلصت عمري احسب بالثواني لهذا اليوم اله مخبل يالله اسويها

-حتى وانت مخبل ماراح اسامح غزوان اوعدني ماتعوفني عمرك كله

-بدون لاوعدج الروح ماتفارك التحبها حتى بالموت لاتخلين بالج تركي كلشي لا تفكرين غير بالعرس اريدج اطلعين اليوم احلى عروسة وتعوضيني عن كل ليله انامها بحسرتج

-يعني أجر بدلة منا على ذوقي عادي

-كلتلج لاتخلين شي بخاطرج

-راح اخذ وياها برگع طويل كلشش حتى يكفي يغطينه سوه واحنا ناخذ صور

-هههه اخذي وسوي التردي خادم الج اني

-يله دااروح لاتاخرني

دنگ راد يبوسني دفعته وركضت بسرعة وصلت للباب انداريت لكيته متخصر شعره نازل على مناظره لمعة عيونه نبضت بروحي

بسته بالهوا وضحكت ضحك على ضحكتي وهز ايده كملت طريقي لكيت عمتي منتظره بالسياره هيه والبنات  صعدت اخذنا الولد لصالون قريب نزلنا لبالي يروح بس شفته ركن السيارة وكف عرفت ذباح موصي

دخلنا  لكينه هوسه عليها راحت عمتي اتفقت وياها واحنا رحنه يم البدلات اني اوصف لرؤيا وهيه تعترض ماعاجبها  لمن وصلنا السره  صاحتلي ام الصالون رحت كعدت كالت شسويلج تذكرت غزوان كلتلها بس سرحي شعري وترتيب بسيط

هيه بلشت بيه وعمتي ضلت تلح على رؤيا هم ترتب شوية كوه قنعت هم بلشت بيها المساعدة اكثر من ساعتين ونص اني مغمضة لحد ماكالت يله

فتحت عيوني كمت باوعت بالمراية وضحكت صلت على محمد فجر كالت يستاهل غزوان هالجمال

-هههه صدگ اتغير شكلي

-موش جثير انتي گمرية  من البداية

-عمه شوفي شعري شطوله من انسحب وبشرتي صارت تلمع

-ماشاء الله ولج بسج  لاتحسدين روحج لاتتنوعين للمرايه جثير

-خو هسه بعد عزوان مايگدر يحجي

-من البداية مانه گادر يتحچه  ويتنوعلج بروحه موش بعيونه ربي يسعدكم ييمه يله اختاري بدلة لخاطر نرد تأخرنا

رؤيا.-  وبالنسبه الي شنو مو من ضمن القبيلة

-والله ييمه لواعرف هيج راح اطلعين ماجان لحيت عليج اله الفج بعباتي ياله احفظج من العين

-لعد عوفوني هنا

-كميي نوعفها هنيه لخاطر ذباح يرد للسجن بيه
يله كومي روحي ويه اخيتج اخذن بدله بين ماادفع الحساب

كامت رؤيا ابتسمت على شكلها الشعر طگ بنص رجل البنطلون والمكياج ويه لون عيونها صار شي خيالي ربي حارمها من النظر منطيها  جمال يعادل نعمة الحواس كلها

كمشت ايدها  رحنا وكفت كلتلها هسه شنو اختار

-اي شي يعجبج

-منو هااي رؤيا

-اشلوني طالعة حلوه

-تلمعين من فوگ ليجوه

-ههه جان يگلي بس مشطي اتمنى اشوفج مره وحده مرتبه

-مم من هيج جان يسميج خرزة

-رئال شنو شعورها من تعرف تزوجتوا

-اتمنيتها وياي  اشكد تواعدنا وخططنا لهيج يوم بس ربي ماكتبلنه

-كلشي يتعوض العرس يصير غيره والغايب يحضر والخاطر ينجبر بس تعب غزوان وتضحياته النا الي ماتتعوض رايه انسي كلشي وسعدي يستاهل غزوان

-راح اسوي كل الي اگدر عليه يله راح اختار هاي الطويلة

ماردت اشرت اي وطلعت قبلي بين مااتفقت ويه ام الصالون وكلت لعمتي خليتها تتحاسب وطلعت لكيت رؤيا واكفه يم الحايط متجتفة ومنتجية عالباب  صافنه بغير عالم  عيونها تلمع  جنها لعابة

ضحكت رحت يمها استوني دااحجي وكمزتني شخطة دراجة انداريت واحد ملثم بأسود طلع طاير  بلحظة عبر الشارع

اجه السايق كال صعدن بسرعة جريت رؤيا صعدتها وصعدت  عيني بالشارع شكيت بي دسار رجع لان نفس الضخامة 

قطعت تفكيري عمتي وغيمة الي صاير عروس اكثر مني صعدن حرك السياره گالت هاا يعمه نعر  لغاد  جدامهم لو نرد  للبيت

-لاعمه فدوه خلي نرجع ناخذ ماما خطية تضل وحدها

-ماما لو ابن اخيها المهم نرد عليش ما نرد

همست رؤيا خزتينا الله يخزيج كلتلج داري مو سحلي روحج ورا

-ولي خطية دافع كومة افلوس اقلها خلي يشوفني اشلون طلعت قبل لااروح

-مو بليل راح تلطمين ويا بنفس الغرفة بس صدگ راح ينزع مناظره بعد مايشوف يخلصها اتلمس

-انجبي لاتعيبين عليه لاالطمج على حلكج

-يله من جماله اشلونه عاد وفوكاها اخذ وحده مثلج الله يكون بعين الخلفة اشلون راح تطلع يله بكلي تطلع عليه

-اسم الله يطلعون قروده ولاعليج

-اتخلي يطلع قرد عليج و لابس نظاره على ابو  ويلدغ على خالته

-رؤيا والنبي راح ادفرج

-جربي حتى اشمرج من الجامهة واكول لغزوان  مارادتك بس من كثر الثول بدل ماترفضك  انتحرت

-كملتي بايخة

-ابيخ منج مااتصور اكول انلصمي يله صوتج مزعج تكول ذبانه بيها جرب

-مارد عليج لان اليوم زواجي مااعكر  مزاجي ويه وحده مثلج

-يله اشلون زواج وحده ثوله والثاني اربع عيون

مارديت درت وجهي للجامة وهيه ضحكت ضحكت على ضحكتها وصلنا قريب عالبيت لكيت غزوان واكف يم ذباح يصعدون بالغراض ويضحكون  ركن السيارة نزلنا اشرت عمتي لذباح انتبهلها دنگ بسرعة واجه يمشي لجهتها

اندارلي غزوان وگف باوعلي هزيت راسي هاا اشلوني

رفع حاجبه واجتف عود ماعاجبته

برطمت ابتسم ومال راسه باوعت لعيونه شفت بيهن لمعة عمري ماراح انساهه دنكت خجلانة

ضحك استوه يريد يجيني ومانسمع غير صرخة بابا وهو جاي يركض بكل قوته ؛ كلها لحظات شريط مر اسرع من الخيال
بابا يوكف ورا غزوان وابو الولد يرمي
الطلقة وهي تخترق راس غزوان الي يحاول يشهگ اخر نفس قبل لايغمض عن اخر حلم ----

لاتنسون التصويت …