رواية شيء من رصيف الدم الفصل الحادي عشر 11 - بقلم Leo Alfatlawi

شيء من رصيف الدم

بقلمي: leo Alfatlawi

بارت الحادي عشر

***رايه.****

تعبت من كوني سند دائماً لانني انا ايضا اريد من استند عليه …

فتحت عيوني على كبرهن واني اشوف غزوان واكف كدامي ورا ذباح ؛ باوعلي بتعب عيونه حمر واثار التعذيب مشوه وجهه

نزلت دموعي بلحظه اختفى كلش ما ذكرت غير ضيعت خواتي ردت حضن اذب وجع گلبي بي 

ابتسم بكسره و فتح اديه بدون شعور ركضت اله اخذني لحضنه  ضميت راسي بصدره كمشته  وبجيت بصوت عالي

نسيت وين احنا ولا شنو الدااسوي  تكول الكل اختفوا ماضل بس اني ويا بالدنيا ؛ لمني بقوه حسيته  يريد يدخلني بروحه  دنگ اخذ نفس طويل مني وهمس اوووف ياوجع گلبي ولهفته

شلت راسي دااحجي ماحسيت غير  انسحبت من شعري انداريت لكيت ابو طبر وراي جرني شمرني ودفع غزوان بكل قوته من صدره عثر قبل لايوگع سنده ذباح

صاح  ايدك تمدها عليها مرة ثانية اكسرها الك يله ولي منا لا اخلي العالم تسحلك

اباوع لغزوان وكف عكد حاجبه اشرله شنو

-مثل ماسمعت تاخذ الخنيث الجايبه وياك وتطلع من المنطقة اذا شفتك بس معتب الدربونه تعرف شنو اسوي

-ياهو اليطلع وعلى منو انت دتغلط

-عليك انت والدثو الجايبه تستسبع بي واذا ماوليتوا هسه اسحگ روسكم واردكم لنفس الخيسه الطلعتوا منها

- واني اريدك تردني للخيسة

كالها وارح لابو طبر كمشه  من ياخته راد يدفع ايده ماشوف غير غزوان هفه بوكس من يمي غمضت قبل لا يفكر يحجي سحله دفعه داخل البيت

ركض بابا صار بوجهه الباب فتح ادية  راد يمنعه يدخل خنگه من رگبته دفعه ورا بكل حيله من قوة الدفعه انشمر على ظهره قبل لايفتح حلگه طلع غزوان سلاح من ظهره سحب اقسام  ودخل وراهم اشر اششش

صاح بابا اكيد تخبلت

-وروح الراحت وهيه ماشبعانه خبز اترس روسكم رصاص  بس اسمع نفس

-شرايد لك

-روحك النكسه

- منووو انت وتاخذ روحه مصدگ نفسك كلك زعطوط ابن زنه خريج سجون

-عفيه ركز على خريج سجون وهااا طالع من حلگ الموت يعني عشت الظلمة بجزعها بعد ماتهمني كرصت الخوف

-تره ذني بناتي وبكيفي عسى مااذبحهن

-وخواتي الخلصت عمري واني اواصل ليل ويه النهار لخاطر اوكلهن  يجي واحد نكس مثلك يضيعهن بهالرخص شنو جان بعقلك حسبالك مالوح روحك القذرة

-ابيعهن اشمرهن اذبحهن كلمة ماتكدر تحجي

-واني مااحجي انفذ

كالها وصاح ذبااااح الباب سده

اباوعله تقدم ليكدام  بيده السلاح يفر بالكاتم  ويباوعله بحرگة وبابا يزحف ليورا عرفته ناوي يموته ويرد يضيع نفسه  ركضت ردت الزمه  لكفني  ذباح بسرعة جرني  وخله سلاح براسي اشر ولانفس

ردت احجي خزرني شكله مبين مجرم يلعب بالموت وخرت ايده ورجعت ليورا انضربت بالحايط كعدت خانسه ؛ اندار سد الباب وكف عيونه على غزوان الي مستمر يفر بالكاتم ويتقدم مثل الفاقد عقله

وصل يم بابا دفره بصدره رده على ظهره سحگ عليه وگله بس حتى تعرفني اني احسن منك راح اخليك تتشاهد

-ماسويت شي والله وحده شردت ويه صاحبها جبروني اعقدها  والثانية سحلوني حتى اوافق على زواجها

-وبنيتي الصغيرة

-الكتلها منتهي بالمستشفى وروح ابوي مالي شغل اني وحتى ماادري من دخل عليها حتى اسأل غيمة

-بيش بعتهن ؟؟

-مابعت مابعت وراس امي حتى افلوس مهرهن تلكيهن يمك بالاستقبال  اخذهننن

-ههه ورند شاخذ مكانها

-مو اني سبب مو تتها والله كالها وبجه بصوت

ضحك غزوان وشال رجله خلاها على حلگه سحگه گله حذرتك هواي

صاحت غيمة على شنو حذرررته  ؟؟ حتى تضيع روحك على بنات ماتسووواا تره محد غصبهن هنه نهزمن وتزوجن غصباً عن عمييي

شال السلاح وجهه عليها صرخت  اي اكتلنييي لعد مو سويتها قبل تكتل اخيتك بس لان جانت تتوسل حتى دافع عن نفسها وماصرخت لان خافت من الموت

-والموت اكبر ستر للمثل نوعج

حجت بكسره ليش مو اني اخيتك الي وصوك اهلي عليه وروح ابوي خفت كال اذبحج بس يطلع صوتج غزوان وروح امي  خفت

-طمعة وقذرة تمنيت عندي وقت واخذ روحج عالبطيء بس حرمات حتى الوقت بيج

-لالاااا بروح امنااا كافي السويته بيه صار اشكد اعاني بالمستشفيات بسبب غلطة اني مالي ذنب بيهااا

-رخيصة كالها ديضغط عالسلاح 

همست اني مو رخيصة لو جنت رخيصة جان سويت مثل راية  بعت نفسي وتزوجت لخاطر كم دينار

عگد حاجبه اندارلي متفاجأه باوعلي نزلت دموعي بكسرة بلحظه وضعه كله تغير ايده رخت ونظرته تحولت من غضب لصدمة

عيونه بعيوني متانيني اگله جذب بعدني على وعدي مارجعت بي منتظرتك ؛دنكت وشهكت بألم

-ههه ليش تبجين

مارديت غمضت اتمنى ماافتح عيوني واشوف نظرة الخذلان

صار هدوء احس النفس كتم صدري ثواني اسمع خطواته يمشي عالكيف كأنما يريد يطول المسافة بلگي يتغير السمعه ؛ عصرت روحي واني اشوف خياله صار كدامي؛ دنگ رفع راسي احس ايده ترجف باوعتله عيونه تلمع همس بتوسل ما تسويها اعرفج اني

-والله غصباً عني

-شنو غصباً عنج  تزوجتي رايه؟؟

-ماما اخر امل ضلي مجان عندي غير هالحل

-تتزوجين

-وروح رند على وعدي وياك

سكت يباوعلي نظرته اختصرت شكو عتاب بالدنيا

همست بيأس سامحني

هز راسه اي  وكام اندار  قبل لايتحرك كمت ركضت صرت بوجه-  لا تروح

-من البداية ماجان الي مكان بينكم بس جنت اغلط نفسي

-هم راح تعوفني

-عمري ما فكرت اعوفج  انطيتج روحي قبل گلبي

-غزوان ماعندي غيرك

-بعدي  رايه

-وروح رند جنت ناويه اذبح روحي بس اكمل علاج ماما وانتظرك هناك

-اي كالها وخرني عن وجهه

ذباح دنگ مسح وجهه وهو توجه للباب حتى اخته نساها عرفت انتهى كلشي وهاي اخر نظره بينه 

انداريت لبابا احس نار الاخرى كلها مشتعلة بكلبي لكيته يباوع لابو طبر ويبتسم  بشماته بسرعة طلعت السجينه من جوه رداني خليتها على ركبتي وصحت بعلو صوتي غزززوان

وكف بدون لايندار

-ديربالك على ماما واذا صحت وسألت عليه  امانة لاتكللها على السويته بس كللها ماقصرت غير بحق نفسها وخلي تسامحني لان ماكدرت احميهن

مارد كمل طريقة

-ادري جرحتك هواي ومااستاهل بس بداعت كل لحظه صدگ بينا ادفني يم رند

اندار عيونه مليانه دموع يبتسم باستهزاء گطعت ضحكته السجينة وهيه نابته بركبتي

همست خواتي منتظراتك لاتاخذهن بذنبي ماعدهن غيرك

-رايه السجينه

-ماحبيت ولا فكرت بيوم اصير بغير حضنك بس مااگدرت اشوف ماما وهيه تموت كدامي

-راااايه

-ماما بأمانت انكسرت هواي لا تكمل كسرها بيك

-وعلي اتركهن ومااسأل حتى عن گبر رند وين

-گول لرئال خلي تزورني حتى لو بالسنه مره بس لاتنساني  راح انتظرها  كل يوم بس حتى اسمع لدغتها وهيه تقرالي كتابها

- لااا رايه لاتكسريني مرتين

-سامحني

كلتها وغمضت  استوني اسحبها واحس دفرة اجتني من ابو طبر بظهري طگته  بالنص گعدت بالگاع گاطعة النفس بعدني ماشاهگه الهوا  ورد دفرني بطني وصاح تتمعشگين گدامي بت الكلببب

غمضت مختنگة دنگ شالني  من شعري مالحگ يرفع ايده وركض غزوان صاگ على سنونه وجره من ملابسه شاله ورگعه بالگاع

كام بسرعة بابا راد يسحبه وماحس غير ذباح بلمح البصر ضربة  بنهاية السلاح براسه كعده مكانه

رجعت ليورا اسحب بالنفس گوه واني اشوف غزوان  اشلون كامش ابو طبره من راسه بثنين اديه يرفعه ويرگعه بالكاع بكل وحشية

اول مره اشوف غزوان هيج  ماعنده رحمه عرفته اتغير مو نفسه غزوان القديم ؛الظلم  و صحبة ذباح خلقت منه شخص مايقبل غير بالموت

ابأوع لابو طبر الدم تارس وجهه  يريد يخلص نفسه مايگدر  وغزوان مستمر يضرب بدون وعي لمن بده يفقد رفع راسها ليفوگ وضربه بكل قوته غمض وزاع دم

صاح ذباح بسسسك يبااا چتلت الزلمه

تفل بوجهه وگام اجه ناحيتي يباوعلي بغضب ايده كلها دم رجعت ليورا نزلت دموعي بخوف وصل يمي دنگ ضميت وجهي بسرعة احمي نفسي  شال السجينه من يمي  وندار

اباوع لابو طبر فتح عيونه گوه شافه راجعله  بيده السجينة  راد يصرخ مالحگ ركض غزوان جر من شعره كتمه بيها حجه من بين اسنونه حركة وحده انحرك

همس دخل الله ودخلك والله بعد ما اضربها

-وين رؤيا

-ما ادري مااادري

-روياااا ويين وهذا اخر سؤال راح تسمعه

-والله ماادري انهزمت ويه صاحبها وجاسم عقدهم على الموبايل

-منو هو

-مااعرفه ولا شايفه اختها تعرفه والله  حتى اسألها 

-عقد شيخ لو من وساختكم وشنو عنوان الولد

-لاشيخ شيخ وجماعته ماخلونا نعرف عنه اي شي غير اسمه دسار لان همه الشهود

-ياشيخ عقدتوا يمه

-شيخ رشيد الي يگعد بگهوه رزاق وحتى العقد هناك صار

-بيت رجل رئال وين

-مااعرفه وروح ابوي  حتى زوجها ماشفنا  اجت سيارة مضلله جتفونا واخذونا  نزلوا بس جاسم اني ضليت بالسياره ومن رجعونا شمرونا بنص الشارع حتى ماحجوا ويانه

-الكتل رند وين صار

-بالمستشفى حالته خطرة فاقد الوعي

-يعني جاسم الناقص اتنازل عنه

-اي بس ماطلعوا لان اكو واحد واكف ضده مانعرفه  كلما نروح ونسوي تنازل يختفي ويشدون عليه بالتعذيب  محد يدري ليش

-افلوس النكس وين ضامهن

-بالاستقبال جوه الكاشيه

-غيممممه روحي جيبيهن وانت طلگ

-هاا

-سمعت شنو حجيت

- خلي يرجعولي افلوسي واطلگ

مارد رفع راسه اكثر و ضغط على رگبته  ديسحب السجينه صاح لالااااا طالگ طالگ

دفعه وگام دفره دفرة  گلت انشگت بطنه من قوتها انطوه يعصر بنفسه اندار خله السجينه بنطلونه  اجت غيمه تركض انتطه الفلوس طلع السلاح وجهه عليهن ضربهن طلقة بالنص وشمرهن على بابا ورد دفره بكل قوته براسه رده لوعيه فتح عيونه بتعب

تركه وراح يم الشجره زاح برميل النفط طلع جيس من جوا خلاه بجيبه واجه اخذ من يمي علاگة الفلوس  شمرهن على ابو طبر  دنگ لزمني گومني وندار لبابا گله  اسمع لك رايح ماطول ساعات وارجع  اريد اشوف رؤيا كدامي نصيحة تروح تجيبها لان وروح الراحوا مااطلع منا فارغ لو رؤيا لو روحك بيدي

-منين اجيبها تزوجت

-لعد لاتضل  وهم لو اطير للسما اللگفك واخذ حگهن من عيونك الافضل رجعها بلكي يقلل شوية من الناوي اسوي بيك

-انت مالك حق بيهن ذني بناتي  الك  بس رايه اخذها وروح لا ترجع بعد

-حظرلي  نفسك  وسلملي على صاحبك گله بدل دم رند دمه هو وعائلته بكبرها

ذباح- غزوان طلع  البت غادي

-لااا لاتكتله بعدني ماخلصت شغلي ويا

-الجتل لمثل هيج ازلمة تصغير وانه مااحب هالچلمة مثل ماامنت اخياتك يم  هلي وماطلعوا كفو وحموهن الك يمي حگهن واعتذار الي يرضي خاطرك

بابا-  وراس ابوي اذا خدشتني اشتكي عليك واردك للسجن

-صار ساعة واجف اتنوع للمهزله ومنكتم  مناطر وين تصل وياك بس الضاهر طلعت موش بس ناگص غيره ومضيع عرضك لاتافهه وتتلاوه ويه الجهال

-شنو يعني

-يعني تعال لخاطر اعلمك شغل الاكبارية  اشلون يصير

كالها وراح دنگ شاله من شعره  رجع راسه ليورا ورگعه كله كعده بالكاع اندار  باوع لغزوان اشرله طلعها منااا

جرني غزوان فتح الباب طلعني اجت غيمه تركض راد يمنعها اشرله ذباح طلعها سكت طلعت جر الباب استوه يسد الباب واسمع عطيت بابا بكتمة كلتله لاغزواان فدوه اروحلك لاتخلي يموته

-امشي رايه

-لالاااا غزوان خواتي محد يندل مكانهن غيره والله يرحن لاتوجع كلبي اكثر ماهو موجوع

-راح اردهن وداعت عيونج

-ماراح يردن  ضيعتهن بيدي

-اني الضيعتجن بحيونتي من تركتجن بيد واحد نگس  ورحت بدون لا فكر بس وروح اخوي لاخذ حق كل وحده بيجن مضاعف مااروح اذا ما أمن عليجن بحضن امجن

-يعني هم تعوفنا

-ماطول وجودي وعدمه واحد يمج مايفرق بعد الحجي

-كلتلي مؤبد ضليت بروحي شايله حملهن ماعرفت شسوي

-وهاي طلعت

-ماراح تسامحني مو

مارد باوعلي عيونه حمر الكسر والخذلان واضحات بيهن

نزلت دموعي دار وجهه شهكت بصوت غمض واخذ نفس بحرگة گلب

ابتعدت عنه واني اشوفه اشلون وخر ايديه عنه وراح وكف على صفحة اتجتف يباوع للجهه الثانية عرفت بعد مالي وجود بحياته

وكفت مسافة اباوعلة بس دموعي تنزل حتى صوت شهكتي مختفي گد ماصدري مختنگ

مرت دقايق واحنا على وضعنا ماكو نفس غير دموعي التنزل بكتمة ؛مسح وجهه  اندار صارت عينه عليه  دنگت ماگدرت اباوعله

اخذ حسره واجه كمش وجهي بين اديه رفع راسي  مسح دموعي بأصابيعه همس ماكو واحد يزعل من روحه

-بس رجعت بالوعد وياك

-مارجعتي لوما جنتي متأكده راح تسرعين جمعتنا سوه لان تعرفين بنفس اللحظه اليوصلي خبرج اللحگج

-اوعدني ماراح تعوفني بعد

-راح اردلج خواتج وامنج بيت يعوضج عن ايام التعبتي بيها

- غزوان لا تتركني

راد يحجي وفتح الباب طلع ذباح خله السلاح وره ظهره شمرله السلاح الثاني لكفه غزوان اشر يله وراح كدامنا يفتح برداناته يمشي بثگل ولاتكول جان يكتل بعالم حتى نفسه طبيعي اثر للتعب ماكو

اباوع لغزوان عيونه تلمع ويه لون الگمر مبين عليه الهم  ابتسم بتعب لزم ايدي رفعها باسها وخلاها على گلبه همس وحق نبضج بگلبي اردهن الج

-وتخليك دوم وياي  لان اموت بدونك

-مايفرقنا بس الموت

-حتى الموت مايفرقنا بساعة الي يوصل خبر واحد يلحگه الثاني بدون تفكير

-هههه ونترك ام لدغه وحدها

-هيه ماراح تتركنا متأكده راح تجي كل خميس تكعد بين كبرنا وتقرانا كتابها الي مانفتهم منه شي بسبب لدغتها

ابتسم ودنگ خله السلاح جوه بلوزه وسحبني ورحنا ورا ذباح الي عيونه عالمنطقة تحسه يمشي على اعصابه بس يريد واحد يشمرله كلمة حتى يطلع غضبه بي

ذكرني برؤيا اشگد تحب هيج اجرام عكس غيمة الي تمشي ورانا بلا صوت  الخوف والجبن كاتلها ؛

دخلنا  الشارع الثاني صارت كدامنا نفس السياره مالت اخو صعدنا ؛ صعد شغلها وگال يالله نتوكل

غزوان-. بشر شنو عرفت

-مامش بس عطيته مهلة لفجر ربه  اذا ماردهن نرد روحه لراعيها

-اطلعنا للمركز

-ابشر بس خلنا نرد  البنوات لامهن ومناك نعر للمركز

-عمتي اذا شافتها وحدهن راح تروح بيها مااگدر اردها وحدهن واني منطيها كلمة ضامهن بمكان امن

-محگوگلك وعلي وجهي مسود منك يبن عمي  بس ثق بالله العظيم تكاونت وتخاربت ويه خويي من ساعة الطلعت بيها لاهلي عرفت رادين بدونهن حاولت جثير لخاطر اوصلك واخذ عنوانهن بس ماگدرت  ضليت مناطر الزياره  وهاي انت سبگتني بالمخابره  تنشد  عنهن

اخذ حسره طويله ودنگ خله راسه بين اديه

-افاا تتحسر بحيره وانه اخوك لا يغزوان ماهگيتها منك

-يخوي بعدهن صغار يخافن يحجن مو يدافعن عن روحهن

-هذا شاربي ماهو عليه اذا ماجيبلك خبرهن الليلة بس يخوي خلينه نرد البنوات  لامهن ماراهمه ندخلها مراكز ويانه

مسح دموعه واشر اي

-وشغلة ثانية ادري ماهي وكتها بس مانگدر نتحرج اذا مانعملها

-شنو

-نعقدلكم لخاطر  تصير بعهدتك لان ابوها مبين كواك وكلب ابن كلب ناگص مرجلة ماهي بعيده يروح يردها لرفيجه بالختله ويضيعه لخاطر يكضنه من ايدينا

-اشلون اعقدها وهيه ماعدها هويه

-افاا حسبالك ماقريته وعرفت شني براسه وشناوي اول مانطلع يعمل  هاي الهويه عندي بس البت قاصر لولا

-لامو قاصر

-بيها الخير نگول يالله

اشر اي دگدگ على متنه وحرك السياره مشينا واني عيني بغزوان الي على طول الطريق دمعته تنزل ويمسحها اعرفه على رند لان شاف لعبه مشكله بالسيارة تشبه لعبتها وراح يعقدني واحنا  حتى مالحگنه واحد يواسي الثاني عليها ونحزن 

ابجي على بجيته بدون صوت بس مااعرف عليمن
صدگ على رند لو خواتي لو ماما الي نامت صحت لكت بناتها كلهن ضايعات

ذباح يسوق عيونه ليكدام  وبيده الجگارة كل نفس ياخذن بحرگه كوه متمالك نفسه محمل روحه المسؤولية  مرتين اتصلوا بي اهله رفضه

وصلنا لبيت الشيخ نزلوا راحوا دگوا الباب دقايق  وانفتحت سلموا وكفوا يحجون ويا مااسمع شنو بس شويه واشوف ذباح شاله من ملابسه صاگ على سنونه يحجي بعصبيه وغزوان راح كعد على جهه كامش راسه مدنگ

هنا تأكدت رؤيا انتهى امرها لزمت  الكشن الكدامي وخليت راسي عليه بجيت بصوت طلعت شكو وجع بكلبي كاتمته لمن حسيت روحي بهتت وباب السياره انفتحت شلت راسي لكيته غزوان اشر نزلي

-راحت رؤيا هم مو 

-لاما بيها شي

-لا تجذب كول ماعدت تفرق  خليني بجي عليهن سوه بلكي ارتاح 

-وداعت عيونج مابيها شي بس تزوجت واحد  مطلوب للدولة وماخذها ورايح غير محافظة محد يعرفها منو

-يعني هاي هيه هاي الاخيره راحت

-ماتروح اكو واحد يگول الشيخ من اجوي اخذوني حتى اعقدلها جان كاعد من رحت ورجعت كال شوداك ويه هيج ناس من سائله ليش ردا ذوله قتله مأجوره

-عزه بعيني وهسه اشلون

-ذباح گال  اتركها وراي اني اعرف  اشلون اوصلهم بس خلي نعقد حتى نخلص من شغلة عمي يله نزلي

مسحت دموعي ونزلت بسرعة كمش ايدي  تركنا غيمه خانسة رحت ويا للبيت دفع ذباح الشيخ صاح يالله بصوت عالي ودخل دخلنا ورا

وصلنا يم غرفة صغيره تعبانه كال تفضلوا دخلنا
كعدنا بالبدايه عالقنفة وذباح كعد مقابيلنه مدنگ

راح الشيخ دقايق ودخل بيده اوراق  اباوع لشكله مخربط وسخ گعد وره المكتب فتح سجل

- الهوياتكم  ومنو الوكيل عن البنيه

كام ذباح انطاه هويتي وگله انه الوكيل عنها والشاهد بنفس الوقت

-اشلون صايره هاي

-مثل ماصارت وملجت طفلة مخطوفة لمجرم املچ وانكتم نص چلمه افشگ راسك بالنص

-تمام شتعود للبنيه

-البنت رضيعتي وهيه بالغة ماهي صغيره لخاطر تحتاج وكيل استعجل يله لاتضل تهذي جثير

-اسمها وسنها

رد غزوان ضل يسأل وهو يرد اخذ الهويات سجل كل المعلومات وسألني اذا موافقه رديت بلش يعقد  ذباح يباوع للشيخ ويباوع لغزوان اشلون يمسح دموعه قبل لاتنزل حتى لاينتبهون اخذ نفس ومسح وجهه

حسيته صدگ اخوه وخايف عليه كمل عقد باركلنا الشيخ اجه ذباح حضن غزوان گله بالمبارك يخوي وهدية عرسك ردت اخياتنا لحضن امهن

-خليك مساندني

-افااا تغديلك روحي فدوه لحدر رجليج

- وحده يم ضابط والثانية يم مجرم

-عسى مابنص الموت وعلي ودفگهم تفگ واردهن وفوكاهن حگ النخوة الهدرت بغفلة

-راح نرجعهن

-وعملك عرس ماصاير بالديره بكبرها ما انه ابن البدوية ان ماگضيت الليل بطوله رمي ماكفي اذا مااتنوع ضوه ربك طر  

-مااريد كلشي والله بس اريد المهن يمي

-بس انه رايد؛  اصدگ اذا كلتلك من گالوا افراج اكتضيت تگول بلغوني بأعدامي موش بمفارگتك هسه بعد مارديت لرفجتي وملچتك بيدي ماتريدني افرح بعرسك

-مكان العرس ساعدني ارد خواتي واخذ حق الصغيره حتى اكدر اروح ابجي يم گبرها والله كلبي بعد مايحمل يكتم اكثر 

-ابشر وانه اخوك

دگدگ على متنه واندارلي كمت اجه خله ايده على ضهري طلعنا رحنا وكفنه يم السياره بين مايحاسب الشيخ على افلوس العقد

عيوني على غزوان الي واكف وخال اديه عالقمارة  مدنگ ضام وجهه بيهن مهدود حيله منو اليصدگ زواجنا الچنه نحلم بي هيج يصير وبدل الفرحة الجنه نتخيلها تنگلبت حزن فاقدين اي احساس جمعتنا

طلعت النظارات حركت ايدي على ضهره شال راسه باوعلي همست هاي نظارتك

-وين جانن

-على گلبي خالتهن حتى من اموت اكو شي منك وياي

-لو تعرفين معزتج شنو بگلبي جان تأكدتي راح تلكيني هناك قبلج واكف انتظرج

-خفت حسيت روحي ضعيفة وحدي بمكان ظلمة ماكو غير ضوه بعيد صح بي اذيتي واعرف اذا وصلتله راح اموت بس المهم اعيش الباقين بنوره

-واني شنو مافكرتي بيه

-انت وعدتني ماتاخذ غيري وهالشي جان كافي عندي اروح  انتظرتك هناك لحد ما يجي يومك ونرجع نلتقي

ضحك وسحبني لحضنه دنگ همس يم اذني صح مااكدر اباركلج لان صعبة عليه اكثر ماهيه عليج بس من حقج اسمعيها

-ماريد اسمعها كافي اني هسه بحضنك وبأسمك صرت

-احبج يااجمل عوض ربي الجنت منتظره

-اوعدني ترجعلي خواتي وماما

-وعد وهالمرة بيتنا الخاص وراح يصير عدنا اطفال واول بنت انسمها رئال حتى تطلع حلو عليها

-بس ان شاء الله ماتطلع لدغة مثلها

-هههههه لدغة عليها ولا رعنة على الثانية

-اووف اشكد مشتاقتلهن

-مو بكد مامشتاقلج وحق الخلق الكون نايم وگاعد احلم بيج

رفعت راسي دنگ باس راسي وهمس اعشگج ونور محمد

-واني احبك

احنا نحجي ونسمع احمم ورانا بسرعة سحبت روحي من حضنه  انداريت لكيت ذباح  مدنگ يحك بكصته كله غزوان تأخرت

-بيها الخير واذا تأخرت يبه تحصر البت بالشارع  اشمالك انت خبببل

-لاتعلي صوتك لك لااجي افلش وجهك

-استلم  تعلمه الطگ اول مايجرب بيك اصعد لاحرام اربطك بالبدي حالك حال الحلال

-ذباح وروح اخوي واصلتلي للستار لاتجبرني اخربط ملامحك اكثر ماهيه مخربطة احجي ليش تأخرت

-هذا اثر السجن عالزعاطيط

-اهووو اشلون يخليني اعدل فجه بكله ماتحجي لك

-يبه رايه صعدي للسيارة هذا زلمتج باينه جلده واچله على طگة وفشلة ادوفه چدامج

-اندليت مكانهن

-وحده منهن 

-عهد عليه اناسبك بيها

-هههههه اتشرف بيكم وعلي اخليها على راسي  اصعد يخوي خلنا نتوكل

ركضت للسياره صعدت ماصدكت الي اسمعه صعدوا شغل السياره وتصل تحركت اجه صوت واحد عرفته صهيب گله هلا بأبن البدوية

-هلابيك ابو صگر  چايك بطلب

-ابشر تاخذه من هالشارب

-لكيت مچان  واحد يوصلني لرضيعة غزوان بس المجان چايد معتاز كم ازلمه وسلاح

-مسافة الطريج اسبع ازلام الديره واحسن سلاح يصيرن يمك

-ماتگصر يخوي

-ذباح اچيك

-افاا يخوي ذوله جهال مگدورلهم انت بس فضني من البدوية  لان حرگت النقال كد ماتتصل وارفضه

-وعلي ماخلت واحد ماتكاونت ويا كلما تتنوعلي وگالت اعرف  ذباح زات روحه بمصيبة وانت تستر عليه

-يمكن ارد للحجز افضل

-وسبع الدجيل  اذا تريد تضل تشم الهوا كضلك واحد بالطريج  طگه  وبوجهك للمركز

ضحك وكله ربي يحفظها النا ضل يحجون منو راح يدز وشلون يجفتهم حتى ماينطي مجال يسيطرون علي رغم حجيهم خطر ومبين بي اذيه وموت بس ماحسيت اكو ذره خوف باصواتهم وكل شويه يرد يتعذر من غزوان ماحمانه بعد ماامنه يمه

وصلنا للمستشفى نزلنا اني وغيمه وهمه راحوا دخلنا تركت غيمة يم ترمز المي تشرب واني رحت اركض وصلت للمصعد   لكيت احد صاعد  ماكدرت اتاني  بس اريد اوصل اخذ ماما لحضني وابشرها

صعدت الدرج الوقت متأخر ماكو احد صنته وصلت للغرفة ماصدگت

ابتسمت وحدي دفعت الباب داادخل بلحظة تلاشت الضحكه واني اباوع …

***رؤيا. ***

صوت غيمة  رجع شكو امل جنت فاقدته هيه تحجي واني احس ديه رخت حتى الباب اريد افتحه بعد مااعرف

اتلمست السلقي سحبته فتحت الباب واجه صوتها بأذني وقفني بمكاني وهيه تكول عمتي صحت وناوي يردها للبيت فدوه اروحلج اريد شي كون يخلي يكره يسمع اسمها مو يشوفها

-نعلها بمرض نخليها تنجن وتسكن الشارع 

-واريد عمل ثاني لبنته كون يخرسها ويخليها ترضى بصاحبه قبل  لايطلع غزوان

ردت عمتي يااا راح يطلع

-اي  هاي رئال ماخذه ضابط  جبير بالدولة مااعرف اشلون لفلفوا الشغله وافرجوا عنه هالايام يطلع بس هيه ماتعرف اريدها كون تعقد قبل لايجي

-وذيج وين راحت الصغيره

-اخذها واحد سگط سكير مثل ابو طبر يمكن هم يبع مخدرات  يكول مايطول كم يوم لو يلزمو لو يكتلوا وترجع وين تولي

-ياابو طبر  بعده يبيع ممنوعات ماتاب وره السجن

-وداعتج رد انكس هسه لازملج المنطقة بكبرها حتى بنات يطلع يكلج يكرف افلوس وانوب الشرطة مصاحبي يجون يسهرون يمه انسند اكثر صار الكل بالكل

-اذا ردت العمية شغلوها عنده خوش تجيب افلوس حلوه

-خلي ترد وهاي تاخذ ابو طبر وشوفي شنسوي بس خلي نخلص من سالفة ابو  الولد الي انسجن

-موتنازلتوا عنه  بعد شنو

-وين غير الولد حالته تعبانه موات ويوميه ابو هاد علينه بلكي هاي العميه ترد ونعقدها اله كم شهر نسد حلگه

-يع  منو يكول ترضى بي هالصلفة لاانطوها لابو طبر ذاك يحبسها وشغلها غصباً عنها ولج اتجيبلكم ذهب حرمات بهالشايب

- مو بكيفها حتى ماترضى العمية والله  يكسر ظهرها وينطيها بس اندعي ترجعلنه قبل لايموت مكسور الرگبه ونبتلي انوب يهججنا من بيتنا

-اشكد حجيت وياج ماسمعتي مني موگلتلج من البدايه شمروا غزوان بتهمه وزوجوهن لجماعته جان هسه انتوا فوگ الفوگ بدل هاي بهذلتكم

-هو انيي غير هو يبس راسه اتخبل عليه كل مااحجي وگال لا احصل اكثر بيهن ذوله مايدفعون هواي وخليهن يشتغلن فايداتنا هاي راحن كلشي ماحصلنا بيهن بس المشاكل

-الله يعوضكم

-ماريد بس خلي اخلص من امهن اني بخير اريد اخذ راحتي واسوي البيت بمزاجي لحدمن اضل هيج عايشه بفگر  وقلق

ردت المشعوذه. سهله شغلتها بس اتكلفج

-اشكد تردين حاضره والج فوكاها الي يسر خاطرج

دااطلع اسحلها وماحسيت غير واحد يكتم نفسي ويسحبني ليجوه دخل وسد الباب عرفته دسار

صرخت ونبتت اضافيري بأديه لمن حسيت الدم صار بيهن  انداريت ضربته بكل قوتي ضغط اكثر
كمت اكمز واصرخ سحبني لحضنه طوق حركتي وكتم نفسي بالزايد اشكد حاولت يتركني ماكدرت لمن سمعتها طلعت دفعني صرخت حيووووان واحس اجتني دفعه  لطشني بالحايط

كعدت بالكاع لميت رجليه  وشهگت دفر الباب دفرة رج الغرفة بيها ضميت وجهي ابجي بصوت ناصي  صار هدوء 

نزلت دموعي بحرگة كارهه روحي وعجزي العايشة بي؛ الوجع احسه يطلع من نص كلبي دقايق واجه كعد يمي انتظرته يحجي حتى اطلع شكو قهر من عيونه

مر وقت وهو ماكو منه نفس بس صوت الجداحة وريحه الجكاير  غمضت يائسه واحس ايده صارت على شعري رفعت راسي دفعتها حيل صرخت حيوووان انت حيوووان قذررر تعرف شنووو حيوووان

اخذ نفس مارد

-تدري ليششش ضجت وماترد لان تعرف روحك انت هيييج وانكسسس لفو خاين حتى الكلب افضل منك

-تأذيتي  

ضغطت على سنوني ونداريت ضربته بكل قوتي اجت بمتنه رجعت ضربته اقوى كمش ايدي وجرني لحضنه دفعته عصرني حيل گال وجعتج مو؟؟

بجيت بصوت عالي

-لو احد لامح ضلج هنا جان رحتي بيها

-راح دمر ماما وتضيع اختي

-الي تجي تنتخي بمشعوذة هاي اسخط خلق الله ماتكدر تأذي حشره مو بشر

-دتسويلها سحر حتى تمرض ماما وتزوج رايه

-لو صدگ الشعوذة بيها نتيجة ماضلت صاحبتها مشموره بيت حتى الحيوان مايسكنه واهااا اذا كلتي مو هاي انت ساكنه افلش حلگج

-رجعني

-وحزام الحمزه اردج بس كلتلج انطيني مجال شوية

-لشوكتتت انت تفتهم شنو دااحجي لولا

-اني لوافتهم ماخليتج بأسمي وتورطت بيج كل هالفترة

-محد جبرك تسوي هيج

-من تحس  تعب عمرك يضيع  گدامك تنجبر؛ من تعرف كلمة وحده راح اطير راسج تنجبر؛ من تشوف طفلة مالها ذنب وگعت بالغلط بمكان مابي بس وحوش وتدري بس دير وجهك ينهشوها هنا موبس تنجبر لا تتخلى عن كلشي وتنطي روحك

-وشنو السويته موهياتي جبتني وحبستني يمك

-حبستج لخاطر احميج لبين مااخلص منهم واردج لاهلج

-جذاب تحمي نفسك لان انت جبان وتخاف افتن عليك

-مو مشكلة انعبرها

-لاااا لاتعبرهااا رررد

-امج رجعت لوعيها ؟؟

-واختي تزوجت ضابط

-اووف ضابط مرة وحدة

-تره هيه جانت اصلاً مخطوبة لابن خالي هم ضابط وراح بحادث

-امبينه نيتها نظيفة

-قصدك اني نيتي وسخة

-لااني الوسخ ابن وسخ واستاهل كل الجاي يصيرلي وانعل ابو ابوي اذا اعترضت

-وليش تعترض عالاساس انت موهيج

-جنت اسأل من الله يغضب عالبشر ويريد يطيح حظه اشلون هسه افتهم المهم هذا الضابط اختج وين حصلته

- نفسه الي جان يحقق ويانه

-شعرفج هو ؟؟

-متأكده هو لان جان على طول الوقت تارك التحقيق بالجريمة ويسألني على علاقتها بمحمود اشلون جانت مع العلم جان صوته صارم ومبين متوحش من طريقة تعذيبه بس والله بطله اللدغة جابت راسه

-والخرزه شناوية تسوي

-هواي اشياء

-والي منهن

سكتت

-شنو هيج امنياتج صعبة

-لا بس توجع كلتها ونزلت دموعي

لمني بحضنه ضمني بقوه دنگ باس راسي وهمس بعدج صغيره لاتخلين الحقد يدمر حياتج

-هو دمرني

-الوقت كله گدامج كلشي يتعوض بس العمر مايتعوض لاتفرطين بي بلحظه غضب

-راح اعمي عيونه مثل ماسوه بيه واسود حياته مثل ماضيع رند  واحرگه بكد ماظلمنا

-اشكد صار فاقده البصر

-من يوم الحادث اعتازيت عملية بسيطه براسي مارضه مع العلم اهل الولد  الضربنه عوضنا بفلوس بس الحيوان حب يعاقبني

-اكيد لان لسانج الحلو جان يكتب بي شعر ويتغزل بنور وجهه

ابتسمت ضحك عصر خدودي وخرت ايده وسحبت روحي من حضنه داامسح عيوني واسمع صوت الفون  رن اخذ نفس ورد بشر

ضبع -الاخبار مو زينة

-شصايرر

-فلتوا من ادينه

-لك انتم زمااايل ماصار عشر دقايق من تركتكم

-اكو حركة بالبتاوين خفت عالولد ماگدرت اجازف بيهم

-حركة ؟؟ حلوو يعني وصل خبر للواء 

-الضاهر واشترى راسك بدون حتى لايعرف منو انت كلتلك لاتدخل زايد هيه مهمة انخلصها ونطلع

-ههه وعساها ماخلصت وهلا بالموت انتبه لجهازك وخليك مستعد ماطول دخلوا للمنطقة يعني التسليم هالاسبوع

-انطيني ساعتين واجيبلك  المعلومات الكاملة

-كفوو بلغت الجماعة

-اي والباشا دز كم واحد يراقبون المقر اظن اشتم الريحة اويلي اذا لگفوك يدسار اله يسوون عظامك قفص للطيور ويشمرون الخرزة تكمل باقي حياتها بي

-الي يطلع بيدهم لا يقصرون بمناسبة الخرزه شسويت بسالفه اهلها

-ماكو هدوء بيتهم بس عرفت عدها اخو راح يطلع لو اليوم لو باجر بالاكثر

-دز واحد يراقب بيتهم واذا حصل اختها وشاف مجال ياخذها بمكان أمن ويتصل بيه

-تأمر بعد

- فتح عدل اذا حسيت مجرد احساس مكاني انكشف بلغني بساعتها  قبل حتى لا تتأكد

-الولد ابو المنشأة شنو سالفته

-ماعنده سالفة حب يخفف دمه خففتله وزنه

-حيييل يله معتاز اجيبلك شي وياي

-رايد حبل ولاصق تجيبهن قبل الفجر يله توكل

- ابو الليل حبيبي

غلق الفون وگام طلع بره قفل الباب ورا  عرفت بعد مايأمن بيه بس رغم هالشي احس روحي مرتاحة من عرفت رئال مستقره وغزوان راح يطلع  ويرد رايه وماما لحضنه راح ترد لمتهم وضحكتهم بالبيت

خليت ايدي على كلبي لارؤيا لاتشتاقين راح دمرينهم برجعتج

رئال ضحت بحب عمرها حتى اتخلص غزوان ورايه ضحت بت گلبها وتحملت موتتها بحضنها بس حتى اتخلصني

صار الوقت الي تردين اتخلصينهم من الحيوان حتى يعيشون براحة وتردين لمكانج الصحيح عمرج ماجان مكانج بينهم

خليت راسي بحضني غمضت مااعرف شنو ضامتلي الدنيا

مر يومين وصدگ دسار كام ما يروح اذا مايربط اديه ويسد حلگي حتى الباب يقفله بالاخص من عرف راسه انطلب زاد خوفه عليه مايصدگ اشلون يأمنلي المكان حتى يرجعني لاهلي

يطلع من الفجر مايرد غير الغروب واني اضل هذا الوكت كله منتجيه عالحايط اتسنط  للعالم التدخل للمشعوذه صاروا تسلايتي الوحيده رغم حجيهم جان يخليك تتخيل ماكو حساب ولا اخرى على گد بشاعة الاعمال اليطلبوها

الي تطلب عمل مرض لطفل ابو السنتين حتى تأذي اهله والي تخرب زواج والي تخبل شاب بداية عمره والي اكثر من هذا تنشر مرض بالعائلة وتفلش بيت كامل

اشياء مايستوعبها العقل جان بالي كله مو وياهم ضاله اترقب صوت غيمة بلكي تجي واعرف اخبار اهلي منها حتى حزني على رند اتلاشي بگد ماقلقي على الباقين

صار الغروب وهم  ماسمعت صوتها غمضت رفعت راسي عالحايط يائسه اكثر من ساعتين واني على وضعي جسمي مشنج وروحي بهتت جوع على عطش على تعب وملل احس الدنيا ظلمة بعيني اكثر ماهيه مظلمة

انفتحت الباب دخل دسار عدلت راسي سد الباب واجه يمي فتح اديه وخر اللاصق كال تأخرت عليج مو

-ما تفرق

-هسه اجيبلج الاكل

-مو جوعانه وخر عني داريد انام

-بعد وقت تره استوها غربت

-واااانت شنووو دتعيرني لان ماشوووف ترره اني موحيوانننه ليششش هيج تعاملنييي

-يابه والله ماقصدت على كيفج

-كلكم نفس الشي الله ياخذكم ويسود حياتكم مثل مداتسوون بيه

سحبت الغطة نمت غطيت راسي وضميت وجهي بالمخده احس الغصة بلعومي مختنگه اريد بس ابجي اسمعه كام طلع دقايق ورجع كعد يمي سحب الغطه انداريت دااصرخ سد حلگي گال كافيي

نزلت دموعي

كومني جرني لحضنه شهكت

-وداعت امي ارجعج بس انطيني صبر

-مختنگة

-ضربيني راح ترتاحين

-ايدي تكوم توجعني

- لعد اكلي حتى اطلعج 

-وين ؟؟

-اخذج مكان راح يغير نفسيتج كلها

-مو تكول خطره اطلع

-افااا اتخافين واني وياج لعد بعدج ماعرفتيني

-ولااريد اعرف لفو مثلك

-رؤيا والحمزه عيونج حلوة بنيتي ليش تخليني احرمج منهن

-عود ميخالف  يلاا گوم وديني للحمام

سكت شوية وكام اسمعه  يهمس ربي گلت تقلب الامور بس مو هيج من رتبة على الروس الكبار لأيد طفلة تكومك وتگعدك بأمر الك بيها اراده

-مدااسمعك احجي بصوت عالي

-لاتچذبين

همست والامير

-اي حلفي جذب بصوت ناصي عالاساس ربج ماراح يسمعج گومي رؤياااا 

عضيت شفتي وكمت وداني للحمام خلصت وغسلت عالسريع طلعت رجعت للغرفة كعدت اكلت واني الفرحه ماسايعتني  تكول موراح يطلعني تكول راح يوديني لطريق الجنة

خلصت عالسريع كمت كلتله يله خلصت ضحك وكام اجه يمي دار شي عليه عرفتها قمصلة لبستها سد السحاب كمش ايدي مشينا وصلنا يم شي وكف اتلمستها عرفتها دراجة

وخر شعري عن وجهي لبسني خوذه ورفعني من خصري صعدني وهو صعد  گدامي كمش اديه دارهن على ضهره كال كمشي عدل تره توگعين

هزيت راسي اي شغلها كمشته حيل وهو داس بكل سرعته حسيتها اطير بينه ماتمشي عالگاع  شعور مااعرف اوصفه بس اول مره احس بروحي فرحانه من جواي  احس نفسي طايره ويه الهوا فلتت ايدي ضليت مكمشه بس بوحده

نزعت الخوذه شمرتها ورجعت كمشت رافعه راسي مغمضه صح ماشوف بس اتخيل وين ندخل وين نطلع

اكثر من ساعه واحنا نفتر لمن وكف يم مكان نزل ركن الدراجة و  نزلني گال وين الخوذه

فلتت من راسي

-رؤياااا

-شنوو قابل اجذب عليك وهم لاتهتم من ترجعني لاهلي انطيك افلوسها

-عندج افلوس يم اهلج

-لاابوگ من بابا هههههه

سكت مارد حسيته  يباوعلي نفسه قريب

درت وجهي :- احنا وين ليش وكفت هنا

-ياخرزتي الجميلة نحن امام اجمل منظر بالكون

-وين داحس هوا بارد وصوت مي

-نهر دجلة

-ليش جبتني هنا

-مااعرف يمكن لان اني احب هذا المكان حسيتج راح تحبي تعالي نگعد هناك

لزم ايدي وايده الثانيه  دارها على خصري كمشني حيل عبرني عثرات هواي لمن وصلني يم حجر كعدني وكعد ؛  هدوء  برودة المي ويه الجو تضرب بالوجه غمضت اتحسس صوت المي ويه صوت الصراصير  غير عالم من صدگ راحه نفسية

اسمع جداحه همست اشلون لون المي

سكت شويه ورد شبيه بلون عيونج صافي ويلمع مثل  الخرزة

-متزوج؟؟

-امم

-اشلونها زوجتك حلوه

-سبحان الصورها گمر ضاوي بهيئة ملاك  تحس ربي خالقها من ورد الجنة وضايفلها لمعة يعجز الانسان عن وصفها

-هيج حلوة

-امفلتره اعلى دقة اچ دي 

-تحبها

مارد

-هههههه تخجل تكول احبها

-لا بس مااعرف او بالاصح مااريد اتورط

-من شنو

-هواي امور غلط بحياتي ومن ضمنهن هيه قربها نهايتي وبعدها يوجع تعلقت بيها بفتره قصيره ماجنت حاسب حساب راح يرف كلبي الها بس بتمردها ولسانها دخلت بدون استأذان احتلت مكان غلط توصله

-مو تكول زوجتي

-مم

-لعد ليش هيج دتحجي عليها

-حتى  ابعدها عن طريقي

-ماتحبها

-يمكن 

-اتحبها

-احتمال

-ههههههه هذا المشروب الماخذه مغشوش

-وين اكو بنيه تحجي هيج

-اشبي  اللفو المخلصها اطفر بالبتاوين

-يله عالاساس انتي من البياع

-هههههه والجمعنا بيت اليهودي

ضحك ورجع طگ الجداحة عرفته ورث جكاره اتعده الوقت واحنا كاعدين بس كلمن بعالمه الخاص صافن لمن فززني گال بالمناسبة هذا شعرج اشوكت تمشطي

-من ترجعني لامي

-بقيتي شهر اشلون بالله

-لو سنه مشط مااراح اخلي على راسي  وبعدين انت ليش مهتم

-الله راحمج وماحي حاسة البصر ومخلصج من شكلج الي ماينوكل  يمه خبزه العالم الباقية شذنبها تصبح وتمسي بهالكفشه

-مادام دتقلد هسه تطلع مرعبل  وشكلك مايتباوع بي

-هذا اليجبرك اتخرسها وبعدين اني رجال والرجال مايعيبه شكله الدور على الحاسبة روحه بنية وهيه رادلها طن تجميل  يالله توصل بس حرف الباء

-الله عليك انت من امك جابتك هم فرحت اجاها ولد

-والله على حد علمي اي

-ارجع كللها رؤيا اتسلم عليج وتكول دوشيش

-انتي متأكده من صنف النساء

-قبل لاعيش وياك اي بس هسه لاليش الجذب لان القارب الرحال مايحمل اكثر من تشبيه

-هسه المفروض اعبر التجاوز  ومارد

-والله على حد علمي اي لان احنا بالشارع واكدر اصرخ واگول خاطفني وشنو دتشتغل وافضحك

-وضيفي معلومة لذكائج ماكو واحد يدخل هالشغل اذا مايكون نسبه نباهته اكثر من ستين  بالمية عن الانسان العادي

-مرات الاربعين بالمية تغدر

-ماكو غدر بدون دراسه مسبقة

صفنت حسيت على كلامه كمت بسرعة همست احنا وين

-بمكان حتى الشيطان مايفكر يوصله

-والله ماجنت ناويه انهزم

-حذرتج لولا

-ردت بس اعرف خبر عن اهلي وانت عاقبتني

حسيته اتقدم رجعت ليورا عثرت بشي اجيت اوكع بسرعه كمشني نزلت دموعي 

-ليش خايفة؟؟

-ماعيدها بعد

-تذكرين شنو كلتلج اول مره

سكتت

-شنوو

اريد احجي الكلمه ماتطلع وياي دنگ يم اذني حسيت نفاسه بركبتي  همس الغلط مايأذي غير صاحبه

همست بترجي دسار اخاف من المي

-واني ماشايل سلاح

جريت  ايدي ردت اشرد بحركه سريعه سحبني اله ودنگ رفعني من بطني كمشت بقمصلته وصرخت لج مامااااا

ماحسيت غير نزلني  واخذني لحظنه من كثر الرعب بدون وعي ضميت راسي بصدره دموعي نزلت برجفه ضمني حيل وگال هذا الجان صارلج لو طالعة من البيت بس الفرق بدل ماحضن   يحميج نكس ينهش بحلمج

حجيت بشهگه ماردت اشرد والله

-الي بعقلج شيلي الجنص يجي مره والمكان الطلعتي منه الف وحده مثلج اندفنن بي

- ماراح يخليهم يعيشون براحة

-والقذر  مايگدرله غير القذر  مثله رؤيا مو كل وقت راح اكون وياج ولا كل مره راح اتحصلين  ضابط يوكفلج؛ عقلج شغلي حصرا بحماية نفسج محد يعيش حياة الثاني راح تكونين غبار تتلاشين ويه والزمن

-اني ضيعتهن

-وراح تنهيهن اذا ضليتي مصرة بنفس التفكير

- ماانهي احد غيره

-شنو حسيتي من قربتي من الموت

رفعت راسي

-خفتي وتراجعتي الف خطوة عن فكرته تدرين ليش مولان ضعيفه

-لعد

-لان طفلة وعقلج مايگدر يستوعب فكرته؛ زلم صلبة  الدهر ماكل من روحهم اعوام مجرد ماينذكر اسم  الموت كدامهم ينرعبون مو طفلة بدايه عمرها

-ماراح يخلينه نعيش مثل البشر

-ولاراح تعيشون اصلا اذا ماتبعدون ؛يروح ابوج يجي مكانه عشره الغلط مو بي الغلط بأمج

-ماما تخاف علينه

-لوجانت تخاف عليكم ماجان محت شكو اثر الكم بالواقع  وسلمتكم بيده

-مافهمت

- ولاراح تفتهمين اذا مااخذتي الميداليه وساومتيها

-قصدك عدها ماضي وبابا ديعذبنا حتى يغيضها لان ماتحبه

-يمكن ويمكن لااا  استعملي ذكائج

-راح استعمله واني اعمي واحرگه بطريقة ماتترك اثر اللزم بي

-محد راح يحترگ غيرج 

مارديت لان ادري بي متخيل كل هالكره بس لانو اخذ نظري  مايدري كل يوم يمر اضم روحي بالساعات بس حتى احمي نفسي من تحرشه واني اصبر روحي بالف يمين راح اطلعهن من روحه

-وين صافنة

-بردانة

-لاتگولين باردة كولي ماقتنعت

سكتت

-ماراح اضغط عليج بالكلام لان الدنيا بعدها طويلة گدامج واشياء هواي راح تفر طريقة تفكيرج يله امشينا

هزيت راسي مسحت عيوني خله ايده ورا ضهري رحنا للدراجه صعدني رجعنا للبيت دخلت واسمع صوت رجال يهدد وصوت بنيه مبينة صغيرة تتوسل وياها وحده تحجي

سد حلگي وجرني للغرفة دخلني سد الباب دفعته

-تره اگدر اصرخ واني داخل الغرفة موشي صعب

-وهذا ابسط شي يسوي المتلبس بجني

-اگلهم خاطفني

-خاطفج واشتغل ضد اسماء مالهم وجود وحابسج هنا حتى اضيعج منهم واهلج منا كم شارع وابوج ملقب جاسم الكرن وبعد شنو ناسي ذكريني

-عالاساس ما تخاف

-ليش الجذب لااا  بس انتخيلج بواحد بي حظ مو جايب عرضه يم مشعوذه يسوي بيهن اعمال قذره وهاا لابفكرج سديت حلگج خوف من صوتج الي تكول صوت صرصر ارعن لا بس حتى لااخليهم ينتبهون لخلقتج الي تخلي حتى الشيطان ينهزم من عمله

-تجرررب

-بدون لا جرب صرخي اشكد ماتكدرين قابل شيسوي المتلبس ومحبوس داخل غرفة يم وحده مغسول حظها غير يكمز

-حيووان لفو

-رؤيا روحي نامي افضل ماانيمج نومه ابدية

-وانت يله اطلع مناا

-هاي عالاساس اني  بيت ابوج

-اني غبية ماخليتهم يشلعون راسك

-قسمتي الگشره حتى اضل مگابل هيج مغثة

-يسولف عالمغثة هو بي طن تنمر

-لو عندي شكلج  ماافتح حلگي مو ارد

-دساااار لاتحربك حتى لاامسح بكرامتك الكاااع

-احربك ؟؟ والگاع؟؟

سكتت عرفت روحي جفصت حسيته تقرب بسرعة رفعت اديه احمي وجهي همست تره بس الماعده رجوله يستسلع على  مره

كمش اديه نزلهن - قصدج قردة مرعبلة

-شوف تعيل وتكول ليش اطولين لسانج

-روحي بنيتي حرمات حتى الراچدي بيج 

كالها ودفعني مارديت رحت اتلمس وصلت لفراشي نزعت القمصلة شمرتها على صوت جداحته صاح ااخ عرفتها اجت بوجهه

بسرعة دخلت بفراشي اسمعه استغفر  صار هدوء حسيته يباوعلي خنست اخذله شويه وداس دكمة الضوه واجه تمدد عكس اتجاهي صارت صنته مرت دقايق ماكو اي نفس استوني اغمض واسمع صرخت البنيه تكول لاحباب واحد صاح اثبتييي لاوالزهره اكتلج

همست شنو ديسوولها ليش هيج دتبجي وتتوسل

-جاي يقرالها قصة وصل مشهد ماعجبها

-دتضحك بدل ماتكوم اتخلصها شنو انت ح--

-اذا گلتي حيوان وحزام الحمزه  اخليج بصفها واسوي الانكس منها رؤيااا انطمري  احسلج

انطيته ضهري غمضت ادعي عليه  بگلبي

-للعلم الدعاء يفتر ويرد على صاحبه

-الي اضوج منه ادفره ماادعي عليه

-يالقوية

-تصنف حضرتك

-لاعلى شنو قابل اكو طفله جانت بين اديه من دقايق تتوسل خايفة لو وحده ماتنام اذا مااخلي راسي قريب منها وايدي بشعرها

-هذا ما يتسمى خوف

-صح والله اني وياج شيجيب ظلام الليل والهدوء يم مصباح بكفشه وجهه كد ماوسخ صاير لوحة فنية بالرعب

انداريت مديت ايدي كمشها گال شكو

-لاتخاف ماضربك  شيل ايدك

-لعد  شرايده تحكيلي تره مابيه جرب مثلج اغسل كل يوم

-هم لفو وهم تافه شيل ايدك بس اتلمس خلقتك اشلون صايره الي هيج ماخذ راحتك بالحجي

-وعلي اخبل بس حظ ماعندي وگعت بوحده تكول قرقوز

-والله ماكو وحده مظلومه مثل زوجتك بس اريد اعرف اشلون رضت بيك

-غير كتلت روحها ماخلت امام مانخته كل شباج تكمشه ماتهده اله وماتشلع وصلة خو النذورات مااحجيلج عنها

-هاي وانت اسمك دسار

-دسار ولارؤيا بربج مقتنعه باسمج

-عندك جهال

-مم بنية خبلة

-الي هيه ليل مو

-لاهذا لقب

-هاا لقبوك باابو الليل لان متام بليل

-شهالمعلومة العظيمه وشدراج ماانام بليل

-للعلم اني عمية مومااحس

-همزين نبهتيني

دااحجي واسمع ضربه قويه وياها صرخه البنيه كعدت جرني رجعني لفراشي غطاني وگال نامي

-مداتسمع راح يموتوها كوم خلصها خطية

-بصفتي شنو اخلصها وياها اهلها وزوجها

-عزه اهلها وزوجها ديسوولها السحر

-سحر من نوع اخر

-شلون يعني مدتسمع اتعيط وهو ديضربها لولان رجال هذا من صنفكم لازم توكفون بجانبه

-ولو هو حجي مال كبار المفروض الزعاطيط مايسمعوا بس حتى تفكين عني هذا التكولين عليه رجال هب بياض وهاي الخوثه التصرخ  زوجته

-مافهمت يعني ليش جايبها لهنا

اتقرب اكثر همس يعني مثل اني هسه اشلون متزوج وحده وضال بس اباوع هو كذلك بس الفرق هو مسويله عمل شيطاني  واني الشيطان نفسه نايم وياي المهم مثل هذا يجيب مرته ويجي للمشعوذه تساعده يحل مشكلته ويتزوج

-هم مافهمت

-تعالي واني افهمج اشلون وشرط بثواني بدون مشعوذه وداعت هالعيون الجنهن خرز

كالها وتقرب عرفت نيته بسرعة ضربته اجت بصدره كمش ايدي عصرها ضميت وجهي بسرعة همس هالمره سويتها الثانيه اللبسها بركبتج

دفع ايدي سحبت الغطه غطيت حتى راسي لان نبرت صوته  اتغيرت مثل المختل  ساعة يكول ضربيني وساعة يعصب اذا مديت ايدي

غمضت وصوت البينه تبجي بتوسل مستمر لتالي وقت مااعرف  اشصار وياها لان رحت بالنوم بدون لاحس

مرن يومين تعودت كل مايطلع نفس الحالة  جان المصبرني ماضل هواي لرجعتي بالاخص من سمعته اتفق وياهم على يوم  التسليم وجانت هاي اخر مهمة وتعهدلي يردني 

كمت احسب بالدقايق اشوكت يجي الخميس اكثر الوقت اخلصه ورا الباب واني اتسنط للعالم غصباً عني عيوني تغمض ترجعني لايد امي وهيه تمشط شعري وصوت رئال  تعاركني حتى تاخذ سراي

احس بخنگة بسرعة اهز راسي وغير الفكره من اللهفة لتفكير اشلون احرگ بابا بدون لااترك اثر وراي

ماصدگت صار الخميس كعدت من الفجر على صوت دسار يحضر غراضه حتى يطلع يتمم المهمة

گمت كلي لهفه حسته قرب دااحجي سكتني وهو يسحبني لحضنه ضمني بقوة بدون لا يحجي اخذله دقايق دنگ باس راسي وهمس بصوت هادئ  حضري نفسج ساعتين ويجيج ضبع

رد دنگ باسني وراح طلع حتى ماودعني ؛ مااعرف شصار بيه بس شي بداخلي انعصر رحت اتلمس سلقيت الباب خليت ايدي على كلبي وگعدت ورا

مر وقت واني صافنة ماادري شنو الشعور الداحس بي بس احس دگات كلبي تأذيني

اخذت نفس على صوت بالبيت مسحت وجهي واسمع وحده دخلت من عياطها عرفتها عمتي تركض وتصيح مروتج  لحگيني انهد بيتييي

دااكوم واسمع المشعوذه تكلها  شكو يالمصخمة عياطج وين واصل

-كولي شنو الماكو خيه راح اتهجول جاسم طالبين راسه ومهدديني يكتلون جهالي اذا ماسلم نفسه

-ليش شمسوي الگرن

-كلشي ماكوو بس حضي الاعوج اتخبل علينه ابو الولد دز خبر من المستشفى اذا ماراح سلم نفسه اليوم للمركز واعترف هو الكاتل بذبحنا كلنا

-لعد مايولي وين خاتل

- خيه يمي اني ضميته يمه ترديني اخلي يروح يسلم نفسه ويروح بيها سوده بوجهي ابوس ايدج سوي التگدرين عليه واي شي اطلبي اني حاضره

-المن اسوي

-لغزوان موته يحل هالهوسه كلهااا

-شنو تردين  مرض لو خرب لو اسودنه گبل

-كلشي يطلع بيدج اهم شي تخلصيني منه والام تنجن لو اگلج سوي اعمال نگسة بيه اني راضية بس مرضي غزوان ورديلي العمية حتى اطبگها هيه ورايه انطيهن لابو الولد واخو بلكي يفكون عنه

-ليش تنطوهم بنات مو طلبوا افلوس همه

-هاي قبل لايوصلهم خبر ابنهم غير ماتحمل ومات بالتعذيب

هيه تحجي  واني دمعتي نزلت رفعت راسي ليفوگ اتخيلت صوت ضحكت رند من تجي تعاند وياي وادفعها  همست رد حق دمج  صار الولد يمج كمشي واشكي لربج گليله هذا الكتلني ردلي حق طفولتي منه

دنكت امسح دموعي بمتني اضحك وابجي سوه احس ربي رجعلنا حقنا  راح نرد نلتم سوه راح ارد لحضن ماما اشتمها وگلها التوبة بعد ماصرخ بوجهج

رفعت راسي  احمد ربي واحسب الدقايق لدسار اشوكت يرد واكله خلصت من بابا بعد لاتخاف عليه

غمضت واني اعاهد نفسي بعد ماتعارك ويه خواتي ولاتجاوز على غزوان  وهي مستمره تشكي متخبلة ماتعرف شنو تسوي والمشعوذه تهدأ بيها كالتها وين اروح دبريني حتى الفلوس ماعندي

-عندي عمل يلعب بعقلهن وينهي غزوان بمرض مايفكه لحد ماينتحر بس غالي شوية

-ميخالف ميخالف اداين  بس كون مضبوط صدگ وهيج واسد حلگ الناقص عن اخوي

-العمل اسود من هسه اگلج مويجيني بعد كم يوم اخوج يكول ليش خبلتوا بناتي

-يمتى بناته منيله بنات هيه طرگ وحدة

-موكلتي عنده اربع بنات

-يااا خيه هاي حتى نسد حلوگ العالم عنه

-يااع لعد منين جبتوهن

-راح اگلج  بس بينه الحجي  بروح ابيج مايطلع ونظر عيني يموتني

هيه تحجي واني فاتحة عيوني على كبرهن وكفت احس كلبي يريد يطلع  اسمعها تكول -----

لاتنسوا التصويت ❤️

الي طلبوا صور اشباه دسار وازر دقايق وانزلهن