رواية شيخ الشباب(بنت المؤمن) الفصل الأربعون 40 - بقلم زهراء العراقيه

مساء الخير
بنت المؤمن
شيخ الشباب²
من كتابات زهراء العراقية
في عينيك غيم أسود
و بدايات شتاء !
-نزار قباني

- روحي لغرفتج روحي هسة

رحت للغرفة و اعضامي صارت اطكطك
وية بعض

-زينب تعالي ابسرعة

  صوت ابوية !

ظليت كاعده بمكاني اجتني فكرة طفولية اختل جوة السرير لو داخل الكنتور

-زينب تعالي بسرعة

لا ما  ما  اطلع اله!

سمعت كلامه بالممر

-نسرين زينب مو كلتي رجعت ؟

فتح الباب واني ارتعدت اباوع اله بخوف و وجه مبلوع وملامح باهته

- شنو ما اسمعين
اشبيج مريضة؟

حركت شفايفي وما طلع صوت

-كومي بوية! نظفي الطفلة تقيئت و فيضت السيارة
-!

-كومي

-ها

كمت وراه واني ممصدكة الي ديصير بابا غض نظرة عني؟

شفت بتول على الدرج وملابسها كلها قيئ وتعبانه ...

اخذتها سبحتها وبالي يم بابا وابوها والحساب
اني بالي اكول شو وجهة مكان عليه علامات الغضب !  وكال بوية ! كلمته الحنينة ما تطلع بوقت الغضب؟

بتول -لا تلزميني !
-هاانت الثانية اشلون البسج بالطاقة الشمسية  مثلا

طلعت من الحمام مشطت الها واسمع اصواتهم بالهول
صاحتلي امي رحت الها للغرفة
عبودي كاعد يبجي

شلته

-ما لامحيج

-صدك

-أبوج ما شايفج
دخل غير ملابسة ما مبين عليه شي طبيعي بعد رجل اختج ما ادري يالمفجوعة

-الحمدلله ياربي

- من وصلو لراس الشارع  بتول متقيئ على ابوج و ظل محتار بيها من وصل للفرع

- بتول حبيبتي

أبتسمت بتأنيب  ضمير لأمي

وهي تخوزر بيه على سريرها مطروحة
وحطت ايدها على خدها

-أسفة
الصوت أقل صدى من ان يوصلها

-  روحي نكعي دجاج ابوج اكيد راح يأخر  رجل أختج يمنا على الغدة

-ماما خاف شايفني هو شجابه

- رايح يزور بته ويجيبها النا ابوج شايفة بالحضرة وجاي وياه

-ها هيج السالفة

احنه ببداية الفرع بيتنا رابع بيت و من  دخلت السيارة الا شفتها گلبي ساح ع بالي شافوني بس بابا مبين ما شايفني لأن اجاني للمطبخ واني اطبخ وطبيعي وعزم ياسر يجي يمنا من يخلص بس الخوف كله من السيد و بعدها الرجفة گلبي  لا يسولف لأبوية ويطيح حظي اذا شافني واكفه يم الباب والي اتقدم الي بالسابق يمي...

التهيت الظهر بتعزيل المطبخ وع النص عفته واجت رقية تكمل لأن عبود يبجي يريد ينام

اني حمدت ربي عزمو ياسر وصار غدة الرجال منعزل عنا لو بس محمد كان كعدنا سوة و اني بروحي انفاسي  ترجف منه مو انوب اواجهه
انوب ياسر هم شافه بالحديقة واكف يمي يربي ليش هيج اني حظي هاي البنات اشلون تحب قبل الزواج اني حظي بس بالنية وكاتمة بگلبي واسمي مشهورة

بعد الظهر اني اريد اغفي على نومه عبودي ...
انداسيت على بطني فتحت ..
صديق صاعد عليه و حاط رجليه على جوانبي ويرجع نفسة للخلف و لكدام
بصوت نص غافي
-مسويني مطي؟

يضحك
سحلته من راسه ونيمته يمي و ما يكعد بس يتحرك منا ومنا. 

و اجه التوم مالته كملها فوك راسي

مغمضة واحس بأحد يفتح بجفوني

- شنهاي وخر
صديق - نايمة ؟ عبالي مايته
-مايتة!؟
- قاسم يكول ماما غمضت ومايتت

- صديق انت متحلف بيه اريد انام
ما ميته بس مغمضةمتحملة  صعدتكم عليه لان تعبانه

كعد عبد الله من اصواتهم
كمت حطيتله الممة

-ابوكم راح ؟

محد جاوبني ملتهين يصعدون على سرير رقية ويطفرون علية

كعدت العب بالتليفون صاحلي مصطفى

-خالة تعالي جدي يصيح

-اي اجيت

اجيت اطلع سدلي الباب مصطفى
وصرت حيل قريبه كفخت انفاسي ريحة دخان

رجعت خطوة خازرته

ما انتبه هو لنظراتي
- وين طالعة هيج
ابوية يمه وهو يريد يحجي وياج

تطايرت الافكار الي بالي و الرهبة دخلت گلبي بلعت ريكي النشف بصعوبة

- ابوك !!!

- اي
راح مصطفى
غامت عيوني بغلالة من دموع الخوف

لبست صاية على ملابسي و حجاب لفيته باي طريقة ما اذكرها. .
وطلعت بعيون لامعة قريبة الدموع على ضفافها
مرتضى كاعد يلعب بجهازة و ياسر رايح 
ابوي بابا كاعد و حاط علاوي بحضنه يلعب بتليفونه وبابا يدور بخرزات السبحة ويحرك شفايفة

السيد كاعد ومظلل عيونه  بأيده وبتول كاعده يمه لازكة نفسها بيه وماخذه هم تليفون ابوها
اني الجهال اجو ورايه جوة ذيالي  يتعاركون مدري يلعبون صديق وتقي

اريد انطق اعلن عن وجودي لساني الخوف شلة وتمادة خوفي اتضح على ادية الي ترجف ..

واخيرا رفع راسه من بابا
كالي
- زينب السيد يريد يحجي اوياج

بلعت ريكي من غير ما اجاوب

مرتضى
-اكعدي ليش واكفة

كعدت يم مرتضى وكرصني حيل بزندي
التفتت عليه بعيون متسعة متسألة؟
شاورني تقريبا
-اشبيج خايفة راح تبجين

وضحك !

السيد -  قاسم بوية اخذ اخوتك و روح ..

طلعو الجهال و بالتواسيل الا بته عافته وراحت ويه اخوتها اني من طلعو الجهال زهقت روحي..

-اليوم صارت شغلة نبهتني لهواي امور
ولاحظتها بطريقنا من أجيت لبيتكم

أسبلت جفوني

- بتول شخص متوحد بصعوبة تتألف
من تعبت بالزيارة كالت وديني لخالة زينب

ضحك وكال أبتليتي بيهم

- ما يفيد اخذهم منج  صديق وتقي يوم
اليوم الثاني يصبحون يبجون
  بس كلت طبيعي خالتهم صورتها  أقرب  الهم لأمهم

بدأ گلبي بالنزف و الخفق بطريقة أذت صدري

صوته تحجر و صارت ثكيلة تقطعاته
-  الولد اكيد وضع مؤقت بس بتول
انت الشخص الوحيد تطلبة من تحتاجة

تدخل بابا وكال
-يمكن لأن اكو شبه من أختها
حتى نبرتها بيها قرب من صوت المرحومة ..

خطت دمعة أثر من محجر العين لتحت ذقن الوجه ..

حمحمت الا كدرت انطق وهمست
-خليها يمي بتول
وبعد الجهال سجلتهم روضة قريبة علينا انت خليهم ما مأذيني دوام مثلي صديق وتقي وهمه حبابين

طكها ضحكة مصطفى
-  حبابيش مو البارحه صديق جاب الجداحه وحرك عطوبج

ضحكت مدنكة مستحية من عطوبي و ضحك السيد وكال
-ايا مؤذي
حيل مؤذي هذا الولد حرك

ابوية - غير ذاك اليوم هد على خالته رقية  بالسكين  لان باستة

صارو يضحكون وظلو يذكرون وكاحة الاطفال .
وهذا طلع  موضوعة الاطفال الله يسامحك طلعت ما شايف شي واني الي اجه يوكف گلبي وادعي

تنفست بأريحية ..
وطلع الرجال بس يبرر بقاء الاطفال يمي ويتعذر مني ..و مدى تعلق بتول بيه الي استغربت منه ما تبين هذا الشي اذا المسها تتضايق مني وبس تقلد على اي شي اقدمه الها  وما يعجبها شي ، اتغاضى عنها كونها يتيمة و اتحمل دلالها گلبي ما ينطيني ازجرها بعيني اصير فاطمة تصدني عن أي عصبية اتجاه البنية  كانت متعلقة بيها اكثر شي كونها بنت.  

بالليل امي صاحتلي
رحت الها

-ادخلي وسدي الباب

- اشكد أخاف من هاي الكلمة

-ادخلي ادخلي هو اني بعد ينخاف مني

-يمة اني

-اجيتي تركضين الصبح يمة الحكيني

و شنوخلصت السالفة  ما راح تبررين الي شعنده هذا واكف وياج

كعدت كدامها على طرف سريرها

سولفت الها الاعجاب الي بينا

-لو هو خوش رجال جان احترم حرمة بيوت الناس وما يحاول يباوع من الشبابيك 
ما انطيناه  خلصت السالفة يروح يشوف نصيبة

- يمة اني اشوفه خوش رجال وجه سمح والله مو مثل ما متخيلة
سالفة شربة قديمة حيل

- لو خوش رجال يحترمنا من رفضناه ما يوكفج يم بابج هاي سواية شخص خايف عليج؟!

-يو...

-اش اشبيج ولج معمية
شتترجين من واحد دخل منكر لمعدته
باجر عكبة يرجع يراهق  بعمر  الاربعين

-لا ماما لا

-فرضاً رجع
تاخذين واحد بيه احتمالات  وميول قديم وانت بت الاشراف
وبعدين اني ما مرتاحه اله
لا شهادة لا ثقافة اشلون يربي اولاده؟

- يمة انتم كلكم كلش تتأثرون بالسيد لو ماهو ما كان سألتو اصلا عنه كان اكتفيتو هو ابن خال شهد

- السيد ما ضرب ايد ابوج يرفض

-بس

زجرتني وكالت
- هم راح تعدين واصفين الي مثل ما سويتي ويه اختج الله يرحمها لخاطر هذا خليل

سكتت واتعجبت محتارة

-  اختج سولفت الي ،شصير وياها بنيتي تجيلي تلجأ الي  تشكيلي
سولفت الي اشلون اختها الصغيرة اجاوزت عليها

-ماما اني

- ما طيبتي خاطرها

أظلمت  ملامحي

- هي الي بادرت وياج  بعد تطاولج عليها

هزيت راسي وبصوت باكي جاوبت

-   كنت ضايجه من تدخل زوجها
بس اكيد لو ما هي مبادرة أني أبادر بس يصفى بالي

-زوجها ابوج الي يمشيه مو هو الي يمشيه
ابوج اذا رأي واحد ما يعجبة ما يمشي بيه لو دهر يلح عليه

كمت ابجي وامسح بدموعي بباطن كفي

- جانت مثل النسمة اختج صديقة الي .
كسرتني روحتها ..
سرها يمي ما يوم طلعته غير اليوم

-اذا انت تدرين ليش ما كلتي الي
تدرين بسالفه اقصد

-سالفة خليل ...
انتظرتج تيجيني مثل اختج !

شهكت انفاسي بطاقة دموع و طلعت من يمها ..

راكضة لغرفتي
رقية- ز زينب. ياسر ياسر مشتاق الي
هو هو الي كال  كال

فتحت كنتوري و طلعت الصورة الي اخذتها  من البومها

اني بحضنها وهي ببدلتها

وكعدت على الارض اناشغ واتذكر كم مرة صار بينا زعل وهي الي تتغاضة وكأن شي لم يكن . ازماتي انكساراتي كان صدرها حايط يسندني من انحني عليه عاطفتها تمحي بطيبة الآمي

" تعبني غيابج
ليش عفتيني تعالي ولو طيف
صورتج الاخيرة لهسة محفورة بعيوني وانت مودعة بجروح بخدج
دخلت بتول
وبأمر طلبت
-خالة اريد موزة

رفعت راسي الها واكفه كدامي
كمت و جريتها و ضميتها بين اديه وصدري اشم بيها ريحة امها
-كافي كافي
يلا كافي صرتي رقية

،
مثل كل مرة من خلصت عطلة نهاية الاسبوع  قاسم ومصطفى راحوا لبيت جدهم الثاني  وابوهم وياهم ببيت أهلة مقيم عجبي ؟ بيته كبير تاركه !
 
صديق وتقي حاول ابوهم يضمهم ويه اخوتهم بس جابت نتيجة عكسية وياهم صارو عنيفين ببيت جدهم غير متألفين وياهم،  رجعتهم اني الي و سجلتهم روضة و بتول ما تقبل تروح لبيت جدها تبقى يم امي من اروح هي ما داومت السنة ايدها اليمنى بعدها على العلاج الطبيعي و عبودي اااه يا عبودي اخليه يم رقية بس نار اظل عليه واجيه بلهفة اله ...
لحد ما رقية آن آوان روحتها لبيتها كمل ...

▪︎رقية
(ملاحظة حديث النفس رقية ما تعيد بالكلمات )
زينب تكوي بشعري واني اتوجع شعري طولان ...

-آي آي حبابة حبابة على كيف اسحبي أسحبي

-اش تتكرظمين وابنج يدفر بيه يدافع الج هو بس هذا الي محصلته منكم اني
وخر ولك لا اجوي امك

امي - عبالة تأذين بأمه  لأن تتأوه

امي كاعدة كرسيها وتباوع النا ..

مشتريتلي زينب ثوب نيلي و حطتلي مكياج خفيف و لبست بوشيتي وطلعت ماخذه علي بأيد وبجنطه صغير بالايد الثانية الكبار وديتهن قبل يوم
ياسر كاعد ويه مرتضى ينتظرني اخذني ورحنا لبيتنا كانت الدنيا ليل وما جاب اخته،  باجر الصبح يجيبها

تنحس علي من طلعنا وظل يبجي

-ياسر روحي للغرفة  نيمه

بدلت اله و بدلت الثوب بثوب نوم ملون كريمي فاتح ستن بصدر كيبور

علاوي ظل يلعب بشعري

-كافي كافي كطعته كطعته

-ولك عوف شعر امك ..

شفته دخل اخذ ملابس وطلع لبرة ..

رجعلي بسيت بيتي
شال علي النام حطة على فراشه بالارض . 
اني رحت اعدل شعري واعيد تمشيطه ..

حضني ياسر من خلف لازم خصري

- عودة ميمونة

-شنو شنو يعني ميمونه ها ها

أبتسم وهو  دارني عليه وهو يحط شعري ورة ظهري ويباوع لوجهي جاوب
-  يعني الطيبة المباركة

-ها ها فهمت فهمت

- بابا بابا ضايج ضايج ترى
لأن لأن عفته عفته
لان يحبني و و تعلق تعلق بيه و و و علي

كلت هيج لأن ماما كالت الي و وصتني ابرر سبب عدم وجود بابا اليوم هو صدك  ضايج والصبح كال الي يجي يوم وياخذج حتى من حينا اذا  رجعتي بعد ما اكدر اجبره
وتعودت على كعدتج يمنا بالي مراح يرتاح وانت بعيده عني ..

حضني ياسر ...
واني اشم بيه ريحة حنينه مثل بابا لزمته من فانيلته حيل

▪︎ياسر
-خلافج رزقي قل حتى نفسيتي دومها متكأبه مصايب وحلت علية من شيلتي من المشخاب وانهجام بيتي واهواي سوالف  من عفتيني صارت

- اني اني شعليه شعليه

-انت حبة بركة
ما جذب ابوج من لقبج بركة تحل وين ما راحت
خرزة رزق وعافية على شكل مرة

- ما ما فهمت شنو خ خرزة

- اني اكلج معناها
حطيت ايدي على متنها و رحنا للسرير كعدتها بحضني وشعرها المسدل على ظهرها طاخ بصدري

- رجعت ورجعت الاسئلة والاجوبة

-  بعد ما ما أسال لا لا اضوج اضوج

- لا انت أسألين واني مجبور اجاوب

-ليش ليش مجبور مجبور اني ما ما اضربك !

- ههههههه ، حلاتج أطكيني ،
مجبور  لأنج بتي
انه تعهدت لأبوج  

- انت انت راح راح ترجع مرتك مرتك ذيج مو مو

-وين ارجعها هي بعصمتي
-لأهله بعد رجعت اني اني شسوي بيها بيها

-هااا

باوعت الها متفاجأة

باعدت حواجبها وكالت ببراءة

-ما اريدها اني اني اغار منها

-اها

-يا عزة

- شكو رقية

-اني كلت الك
اني اني اغار اغار
زينب زينب وصتني ما اكول ما اكول
يا

عضت اصبعها وانه صافن اعليها حيل مشتاق لروحها الطيبة ولعالمها البريئ
حبي الها موشوم بصدري حب فوك الشهوات والمصالح الجسدية كنت بس اريدها بحياتي اضافة مهمة جنها جزء من عائلتي الاصلية جنها  بت مخلفها ،دمي يرف الها ويرأف اعليها

،

ثاني يوم جبت اختي يمها هي وشهد مقربها من بيت  رجلها

شهد متغيرة حيل واحس الحمل يسحب من طاقتها ،وضعيفة بدن وحال

وبدت سوالف من نوع خاص اصير
غيرة من الطرفين

ياسمين تحسب مراعاتي لرقية حب قوي
وهو الحقيقة انه احب ياسمين وقوتها احبها كمرة مرتي اخذ برايها متعملة تعرف تبرد گلبي من مهموم جزء مهم بحياتي 
  و رقية كجزء مسؤول عنه ومن دمي  هي وعلي نفسي واريدهم يمي للدوم

مشيت الحياة  مرة اصد ومرة ارد و مرات اتغاضى 

▪︎ زينب

سوينا خط ولمينا بنات والي سوه هاي الفكرة خط خاص بينا نور ولمتنا كية ..

صحيح اتأخر بالرجعة لان يفر اكثر من حي بس افضلي وامن ..وبابا كل ما اكبر احسة يرفع عني قيود 
مرات بالستة ادخل البيت اذا طلعنا متأخرين ومرات بالخمسة وهليام بالاربعة  افوت نص المحاضرة الاخيرة ما اريد أتأخر على الاطفال وامي وحدها ...
وكل عصرية انزل بيها خليل واكفلي يم بين ياسر ..

بيوم رحت وية مرتضى للدوام ابو الخط اعتذر  عطل بسيارته بالكوة اجاني لان بال١ الظهر هو بالدوام خطية

وبالرجعة خابرتهم قبل ما اطلع بوقت ..
كالو راح يجي ابو مصطفى ياخذج مرتضى طالع ويه مرته  .. وابو مصطفى يمنا يشوف جهالة

تضايقت من الموقف بس شسوي بابا اشوكت يجيب سيارة بدل الي باعها ما ادري 

تفأجات من جاي وياه عبد الله و صديق وقاسم وياه
سلمت وصعدت بالخلف
وطلعت عبودي من الهزاز مالته وحطيته بحظني الاعبة ...

السيد كال
- ظل يبجي وبس امج وابوج بالبيت يتعب امج فجبته وياي ..

-افكر احطة بحضانة
بس اني ما اعرف مكان كون امن و ثقة

- مديرة روضة الولد ترة اعرفها معرفة شخصية وزميلتي(ام محمود) اصير اختها و ثقة  وبيها حضانه ترة وحتى بيها دوام مسائي ..
اني وياك بهاي الفكرة

-خوش هاي هي مدام انت اتعرفيهم خل أسجلة

-بس عبود مو متألف خاف ما يتعود
عليهم ..

-بلكت يتعود

-الله كريم

انتهى الكلام بينا ..

بهاي الاجواء الخريفية شمس ال٤ العصر تخفف أشعتها  علينا و الناس ما تنقطع من الانتشار بكل مكان  وكلعادة فكرت بخليل اكيد مثل كل يوم راح يتحداني، ويوكف يم باب بيت ياسر بحجة يروح وياه للشغل و هو ذاك وينه مبين جاي بس حتى يلمحني انزل من الكية ، ااوه اليوم ماكو كية
واني صاعده وية اكثر شخص يكره خليل

وصلنا لفرعنا و دخلنا وشفته واكف وياسر طلع
توه من بيته و اني مريت من يم خليل بسيارة السيد.
وطفل بحظني  و صديق بالصدر نايم بين ما ابوه يصحي بيه

اني فتحت الباب الي كدام خليل وكفتنا ولمحته مستنكر رجوعي ..

السيد وكف سلم على ياسر بين ما اني اخذت غراضي من السيارة وعبدلله مخربط عباتي تخربط

سلم سلام قوي على ياسر وسلام عابر على خليل والتفتت عليه
-جيبيه
اخذ مني الطفل

فهت رجليه بالمشي و أنكسار وحسرة نظرة خليل عطلت فكري
وعبد الله بجى
وكال بوضوح
-مامة مامة
ماد ادية  الي
السيد-ادخلي يلا

صغيت اله مثل ما اصغي لأبوية يخوف وعاني على حالي ومشيت شبه مهرولة داخلة بيتنا وقاسم و صديق وراية
ظليت ادردم بگلبي على مرتضى يعني يدري اليوم اني معتمده عليه حبكت يطلع مرته اليوم ...

خابرتني رقية ضايجه اتكول ياسر يم ياسمين اليوم ...

بيوم الجمعة  العصرية اجت ام محمد و احنه على علم مسبق ..

دخلناها للأستقبال وامي كاعده بيه تنتظرها مّدد على القنفة و مغطيتها لنصها بشرشف

العلوية ام تحسين سلمت على امي وامي تعذرت منها ما تكدر توكف و تعذرت لان ما كدرت هي تروح الها

- والله يا علوية حيل خجلانه منج
المفروض اني الي اجيكم وانت جاية من سفر و اتحمد لسلامة ام رامي(بتها واخت محمد)

- قابل غربة العتب مرفوع بينا واني ادري بوضعج الصحي  لا تهتمين

-  روحج طيبة  علوية

- انت شخبار صحتج هاي هيج دوم
نايمة

-اي والله لو نايمه لو مددة ما اكدر المهن

-الله يكون بالعون الكعدة ما تراد

-شسوي راحت و اخذت صحتي وياها .

دمعت امي و المرة ظلت تواسي بيها ..
اني رحت جبت ظيافة صينية بيها كلاص ماي و صحن فواكه وصحن حلويات و عصير برتقال طبيعي

-شنو هاي الزحمة

امي-قابل شحاطين احنه..

-هاي منو ياكله اني شكل عندي السكر يا ام علي والصحة ما اساعد ..

رحت جبت الها عبودي وغيم صاير شو يستغربها لان قليل يودوه لهناك وعى عليه  اخذته بعمر ال٥ اشهر وهسة ٩ اشهر عمرة

بنهاية الزيارة
- والله يا ام علي حيرة هالايتام ظالين بالبيوت
واني اترخصت من اهل مرت ابني الله يرحمها
تقصد ابنها الوسطاني وكالت الاسبوع الجاي يعقد اريد المة ببيتها

-خوش اسوين هذا الصح الرجال من غير مرة يطشر شملة هو واطفاله
واني اكولها الج السيد ابو مصطفى هم دوريلة بت حلال اتكون كبيرة و واعية
تراعي ايتامه ومرخوصة مو الا ادور سنتها

- والله جنج بگلبي بس اااخ منه يكول ما ازوج ولا اكدر افتح بيت بعد

-خطية

-اي والله من يوم ما راحت المرحومة وهو يمنا بيته ما يروح اله

-اشوية انطيه وكت وهو يجيج يطالب بمرة

-الله كريم

بتول كاعده يمي وتلعب بالايباد

باوعت الها جدتها

-ما تجين ابوسج بيبي

هزت براسها بلا بتول

- العلوية (بتول) زين متعلقة بيج

ابتسمت ما تدري بيها اشكد شالعة كلبي ومربية علة بسلوكها.  

ام تحسين -يحبون خالتهم اولاد محمد

-لعد خالتهم والدم يحن

العلوية- الله يسهل الله يسهل!

اترخصت وامي عزمتها على العشا اتعذرت اتصلت ابأبنها اجاها وكامت

الحجية من نوع العلويات البيضات الي يتضح عليهن الحكمة والرجوح  وجها مليان تجاعيد ولبقة حيل هي مشرفة تربوية  سابقة  عمرها متوسط الستين اذا مو اكثر  

نظراتها الي بيهن ابتسامة ربكتني من وصلتها للباب
-حيل بيج لمحة من المرحومة

ابتسمت بحزن الها وهي ظلت للحظة تباوع لوجهي و ربتت على متني

-الج اجر وثواب على رعاية هالايتام
حتى وجهج نوراني !

طلعت و اني رحت للمراية بس اباوع لخلقتي ادور على النور!

وبيوم رجعت للبيت ولكيت امي متكدرة

-ماما اشبيج

- ااوف اخوج طلعت مرته مريضة حيل يطارد بيها بين الاطباء وما يكول النا

-ليش واشوكت

- صارلها اهواي كل يوم طبيبة
بس ما يكول ما يريد يكدر خاطرنا  ويقلقنا

-خطية  ضجت عليه واني اكول كثرت روحاته الهم

،
اتصلت برقية رزلتها كالت هو وصاني يكول زينب وامي ما عايزات هم

-لعد شو امج درت اشلون

-  اني كلت الها الها فلتت حجي حجي و خلتني اعترف اعترف

-ليش هلدرجه صحتها مو زينة

-ما ادري ما ادري بس هي هي مريضة

بعد يومين  رجعت كالعاده من الدوام امر بالحضانه بالخط مالتي اخذه  واروح لبيتنا العصر ..

شفت سيارة مرتضى واكفه ببيت ياسر نزلت وشفت مرتضى وياسر يمشون بيها دخلوها للسيارة

رحت لمرتضى
- شكو مرتضى

- ما ادري يمكن الطفل هم راح

جان ضايج حيل  ..
ورة وقت خابرت كال اي مسقطة  وضجت عليه حيل ...

،
انفجرت وعصبت من شفت بغرفة مقتدى  باكيت جكاير انتظرته يجي لليل ، صعدت لغرفته وشمرت الباكيت عليه
-هاك هذا مالتك

نز من حركتي

-شنو هاي

-سوالفك التعبانه غير

-اروح اونس بابا بهذا الخبر

-لا اوكفي
وكفني يتوسل ما اكول

من يأس مني وشافني رحت للدرج

-والله ما ادخن مو مالتي البارحه يمكن نساه يمي مصطفى

التفتت عليه

-جنت واثقه هو مو انت
اااخ بلغه اني عرفت

ثاني يوم العصر اجه يتوسل ما اكول لاحد
لزمته من طرف ياخته
-ولك انت كل عمرك ١٦ سنة
ليش هاي العادة المضرة حتى محلو شكلها عليك

-والله قليل واكدر ابطل والله

-توعدني مصطفى

-وعد والله

- وعد رجال

-اي والله

هزيت راسي برضا وعفته يروح ..

مرن شهرين ..

كنت انظف بالبيت وصعدت لغرفة مقتدى
صارت كدامي غرفة شهد كلت خل ادخل عليها
ادري بمرتضى طالع لهذا مديت راسي كالعاده ..

شهد- يعني هسة يسون مهر لو لا

دخلت وهي شافتني

خلصت مكالمة

-اي عيني عدكم حفلة منو راح يعرس ها ها بس لا كوثر

ضحكت

-لا

- لعد شنو

انطرحت على سريرها يمها

-زينب باجر مهر خليل !!!

يتبع ...