رواية شيخ الشباب(بنت المؤمن) الفصل الحادي والخمسون 51 - بقلم زهراء العراقيه

السلام عليكم...
البارت غير مصحح

بنت المؤمن
شيخ الشباب²

من كتابات زهراء العراقية

رفقااا ياصاحب النصيب ...فأنا مازلت احبه !

ضحكت بداخلي على نفسي
يجيك يوم وتتعود على الفلافل الي براسي

ظليت احرك بالحلقة ادخلها وارجعها لمكانها واشعر بتوتر من الكعدة و هو ما ادري وين سارحه اعيونه بيه لو لا حانية راسي شو ما متقبلة شكله ولا حضورة كخطيب الي حتى ما مطية لعيوني فرصة تعيد النظر عن مقربة
،محتدة من داخل بالنفور
فأجاه الجواب البارد بعد سكوت قليل
- بعدني ماخذة عليك اعتذر

ظميت ضحكتي  اله بصرامة احاول اكتم ضحكاتي طلعت اله الوجه المطنكر  و رجعت عيني على حلقتي

شو هذا وكف ...

عبالي راح يطلع اجه وكعد يمي
يمي يعني مو مجرد بجواري ،يمي يعني فخذه طاخ بيه
زادني ارهاق  هذا القرب ما أستسيغته
يا اللهي ما اقبح انفاسك احسها سحبت  الهوا مني

- شنو السر الي يفتح تعابير هذي الكصة

حسيت بكلامه قهقة ضحكه خفيفة

اجيت اكول تصميم وجهي ...لكن سكتت !

- اني كلش متفهم وضعنا طبيعي  اثنين اغراب
بس اعتقد اكو فكرة مصعبة  الوضع اكثر

-فكرة !؟

-نعم
جر الكلمة من نطقها

وترني اكثر خلاني ابلع ريكي بصعوبة لان لمحت كعدته جانبية يعني عليه متوجه وجه و متكأ على يدة الطقم
ولشدة ضيق القنفة  اتلاصق جسدة بيه ..
لهذا من كال
- اهنا فكرة
متحملت وهو يتكلم واشر على دماغي كمت وكعدت باالي بصفها وحطيت كوشة ابصفي متقصدة حتى اذا كعد يمي حاجز

- ماعندي اي فكرة عنك اساسا ما اعرفك ولهيج سبب اني متحفظة منك

بعد وهلة سكوت منه أستقبال لكلامي
الي بدى حاد جاوبني

-  احس اكو فكرة  مغلوطة
عني أني متشدد

-والدي متشدد عادي  يعني متعودة!

-  ما اعرف محمد حاس سبب رفضج الاول
هذي الفكرة خاصة انت كارهه حذوة والدج

-شنو !؟

- مو قصدي كاملاً لكن نكول بعض التشدد الزيادة يعني من وجهة
نظرنا احنه الشباب

-اها
لا
اقصد الصراحة
رفضي الاول كان لأن محجوزة لأبن عمي مو شخصي

شفته سكت اهواي
اخذت انفاسي متحضرة اجابهة
وكأني بحرب فرض شخصية !

- جيد

-شنو الي جيد

-ماكو هاي الفكرة
زينب احنه زواجنا قريب !

-اعرف

-  اشوف نأجلة اشوية مو افض....

قاطعته بحزم
-لا ماكو داعي

-يعني كلت حتى اتعرفيني و ما يكون زواجنا صعب

حسيت بان ماكو داعي التأجيل اريد اتقرب من اولاد اختي  ونسيت انطي مبرر اله على عدم موافقته

محسيت الا هو يمي

-اني اهنا حتى نتقرب من بعض

مو

و ضحك ظهرت رصعة جوة ذقنة استغربت مكانها !
على العموم هو شكله مقبول ليش نفسي حيل كاشة منه ومن قربه
،للحظة فكرت اني وياه كزوجين !
فار النفور بداخلي مسبب حموضة بالمعدة

ظل يسولف وياي يعرف يظهر مواضيع يحاول من خلالهن يظهر شخصيتي اله ، لكن
كنت حذرة متخذة منه الشخص الي ما اعرفة ما انطي طابع عني الا اعرفه هو شنو
هو كان يسولف عن حياة الموظف ومقارنه بينها وبين حياة الطالب ..

ومض سؤال ببالي فلت لساني مني وسألته مقاطعته ناسية اداب الحديث

- ماجد هم اتريد اتبوش ؟

-ليش انت ما متبوشة

ابتسمت بألم مذكرة المواقف التعيسة
الي بينا قبل الخطوبة

- اعتقد شفتني قبل الخطوبة
لا ما متبوشة

- اشعجب

-هذا التعجب لأن والدي شيخ
لو تعجب مستهجن عدم لبسي الها؟

سكت اهواي  باوعت اله مباشرتاً

شفته صافن عليه وبس اعيونا تلاكت طكها ضحكه قهقة جفلتني
هذا اشبيه صوته راح يوصل لأهلي....
تماسكت وما كلت اله اسكت
عكست الغضب الي بداخلي  بصوت هادئ سائل
-ليش الضحك

- ههههههههههههه عيدي الكلمة

- شعيد ؟

- مستهجن

وظل يضحك صفناتي عليه قطعت ضحكة و كال و هو يمسح بحلكه

- مو كبيرة الكلمة على الموضوع
واساسا ليش فتحتي هذا الموضوع مو بالي

- ما اعرف شفته من المهم نتفق عليه من هسة

- لو متفقة وياي من اجيت اشوفج رؤيا شرعية هسة لا تراجع بعد
ظل ينهي لهاث ضحكة 
واني اباوع اله بستنكار

-اها

لاحت على وجه صرامة فجائية
-  ماكو جبر بينا لكن اكو اقناع

-ابوية وما كدر  يقنعني اني هذا الشي رافضته
واذا ارفض شي ما مقتنعة بيه ما اكدر امارسة اعذرني ...

- اكيد لازم بينا لغة اقناع والا حياتنا تنعدم
خلي هذا راس سطر ببداية علاقتنا
هاي اولا
ثانيا ما اسمح بشرط بعد العقد

- ليش لازم نتفاهم مدام بعدنا بأول علاقتنا ...

- العلاقات الي تبدي بشروط غالبا تفشل نتركها على سجيتها اي خلاف واختلاف يمر وينتهي مدام الاحترام متبادل
ثقي الاحترام اهم من بنود العقد والشروط وحتى اهم من مؤخر المرأة ضمان اكثر لحقها اذا شافت بعلاقتها احترام

بادلته 
-صحيح الاحترام اهم شي اهم حتى من الحب

كلتها و كلت ببالي استوب لا ،
اظن جفصت (عكيت) مدري ليش نغزني گلبي من ذكرت هاي الكلمة و تخايل لخاطري الشعر السرح الذابل على الجبين و الضحكة المرنة
نمت بعيوني دمعة عذبة

-لا مو وياج الحب هو الي يولد الاحترام و الاحتواء اذا مات الحب و بقى بس الاحترام تتحول العلاقة الى واجب وفرض واذا  تحولت واجب صارت طاعة  جبرية و اتصير العلاقات ميتة بالتعامل منا من يدخل الضغط بيها و نخسر حتى الاحترام

اني اريد اتمالك نفسي كدامه و احنيت راسي و الدمعة ساحت مني  ما بودي اطرق للحب ادري بروحي انهار..
سويت نفسي احك خدي مدري انتبه مدري لا ،  مسحتها ..

حسيت بأطراف اصابعة ترفع بوجهي

-نرجع لموضوعنا شنو الي غير رأيج وغيرتي

- اهلي قنعوني
كلتها و وجهي هو رافعه من ذقني على وجه 
تغضنت زوايا اعيونه و هو مبتسم

- مو الشخص الي يقتنع  انت

-اشمدريك

-اشوف بوجهج العناد و ال

-وال شنو

-فاطمة  الله يرحمها الها كلمة وياي
كانت تحجيلي عن البنية المتمردة والي اطالب بحقوقها و انت كلتي قبل اشوية اذا  ما اقتنع  ما وافق !

- فاطمة !؟
سألته برتجاف متعجب

- اي كانت اتريدني من نصيبج
لكن القسمة ما جمعت بينا ...
بالوقت الي خطبتج بيه وانتظرت الرد
كانت تحجيلي عنج

- الله  يرحمها

-منو جان بباله اصير من جديد بينا قسمة

- الله بس

- ممكن طلب

-اتفضلي

- ايدك

همس وهو يباوع الها

-وخرها عني لو امكن يعني
كلتها بهمس خجلان معاند لمسته الي

-  ميخالف راح اوخرها الظاهر ما حبيتي ايدي اليسرى

ابعدها عني ،دا اخذ انفاسي الي حجبها عني بقربة اريد احرف نظري عنه ايده الثانية انحط كفها على خدي كله غطاه مثل اللحاف وخدي اتلحف بيها سببلي جفاف بحلكي و حمى قلبيه احس دم صدري كله صار بخار من الحرارة

مديت ايدي و حطيتها على كفه محاولة ابعدها عني...

- ايدج ناعمة عكس هاي النظرات
اشر على اعيوني ، اربكني  هيج عصبيتي عليه

وكفت

-اجيبلك شي اشربة

- ما يحتاج رايح اني

- اوك

هم ضحك و هو ياخذ تليفونه وما اعرف سبب الضحك و كال يا الله 
اني رحت ابلغ اهلي يزتتوه
ودخلت لغرفتي مصخنه كلي حارة

- ياربي ليش صخنت من الخوف
اووف يكلك غريب بس لا اظل هيج وياه احسة فرض انفرض عليه ..
بس هذا قراري حتى محد حاول يقنع
هلمرة قراري نابع من داخلي ليش هيج منتفضة من داخل ....
الرجال زين و معدل حتى كلامه موزون
بس يلا بلكت لان بعدني بأول علاقتي بيه ...

،
-يارب اذا جان هذا قسمتي الاخيرة فرغ گلبي اله ودخله بيه يا مؤلف بين القلوب.....
كلت هذا الدعاء و لميت سجادتي بعد صلاة المغرب والعشاء ...

خابرت صوفي هو على تواصل وياي يومي او اكثر من يومي مرات بكل الاوقات اخابرة او يخابرني  اسمع اخبارهم
بعد مشاداته ويه مرت ابوه و عدم معرفتها  بأحتوائهم قلقت حيل عليهم لكن كنت اكول يجي وقت و يتألفون وابوهم يحبهم  ويحببها بيهم،
لكن من زادت  الامور حدة و صارو يفكرون بيها بشكل عدواني ...اقصد بتول و قاسم
اما مصطفى كل يوم عايف البيت ورايح لبيت عمه زعلان ..
شفتهم بدو يفقدون تربيتهم مو فقط الحنان .. والدهم مهما يكن هو رجل بعمله 
ضميري صار يأنبني كاني مقصرة من رفضت عمهم ، دورة الصغير الي امن لحضني واعتبرني امه من عفته بلا حضن سمعت عنه تعب وما تأقلم كاني عدت عليه يتمه من جديد....
ف من اجاني خبر بواسطة مرتضى السيد راجع من جديد يريدني كلت اله موافقه !

الكل استغرب بس محد ناقش كانهم يخافون اغير رأيِ
لحد يوم قبل العقد بابا كعد وياي و ظل يتأكد مني ..

امي طايرة طيور من الفرح وتندمت لان حجبتها عنها كل هاي الفترة لو ادري هيج تتغير تعابير وجها اوافق  عليه من زمان لخاطرها ..

رفضت  حفلة مهر و مدري ايش وعلى اساس بس مشية و قراية فاتحه بس بعدين كالو اهلة ويانه شيوخ يجون خل نعقدلهم العصر 

الصبح الا عرفت عقدي اليوم  سويت كلشي على السريع  ودبرت الي شهد ثوب من احد خواتها شتائي محجبات  و اجت كوثر حفت الي ورمت وجهي خلتني طول هاي الايام استحي من ابوية والولد...

ولبسوني حلقة شهد بيومها ..

على سالفه حلقة شهد تذكرت شو ماعندي مهر  وين العشرة الي حطتهن بيبي عليهم
ضحكت واني اتذكر عركة بابا و بيبي امه ،هو ما يريد يكثر وهي عاطت بيه الا عشرة بثلاثين مليون غايب 
والله شنو  هو مزوج قبل  وهي عزباء وظلت تعاند وتعارك قبل المشية منا من مشت كلمتها وهمه شو ما تناقشوه امهم العلوية هادية بس علقت تعليق بسيط على المؤخر  مو ضمان و هاي هي

اليوم
خابرت شهد واستلمتني شقى و ضحك
وأسالة عن اللقاء

-هسة ما حصلت الف دينار منه
اريد اشتري حاسبة و بنيت امالي اسوي ليزر شعر وجهي  و اشتري مبيض

- بس  لا مناطق حساسة  هههههههه

سطرت اذني بضحكها

-عابت والله عابت مبيض اسنان اسنوني مو بيض
وبنيت امال اضم منهن لقسط الجامعة
مرحلتي الاخيرة

-عيوني اكيد ينطوهن الج
بس شغلة قسط الجامعة ليش عيني اضمين شي هو راح ياخذج و مجبور يصرف

-يا خطية راح انهبة بعشرة مليون انوب كم شهر واخذ منه قسط لا شو احس نفسي أستغلالية ما طلعت زواجه

-مشكلته عيوني هاي مسؤليته والمهر الج عيني مو مصرف
بعدين يا دوب يكفي

-عااا لج اني مراح اجمع ملابس يروح موديلهن ولا احب الذهب
اشتري الي احتاجه  واسوي ليزر و اروح طبيب اسنان اشوف مبيض او هو يشتغلهن ما اعرف

-سوي ابتسامة هوليود

-اها هاي رخيصه؟

- اي بخمسين الف!
وسوي بعد جلسة ليزر لتنظيف جسمج كله
وسوي بلازما و جلسات تنظيف كاربوني
و اشتري بيت و اسسي حياتج

-عابت تقلدين

- اي هههههه حاطة احلامج كلها بيهن

بعد ما غلقت من عدها حاولت انام مكدرت الارق غالب على النعاس
نمت على يمنتي صارت الساعة كدامي حطيت روحي بالميل من يتحرك 
انوب صفنت بتصميمها قلب الحب والاميال سهام ،وين جنت عنج خرب دخلتي براسي
كمت طفيت ضوة النوم ..
حسيت الشرشف اتحرك من يم رجلي يمه
كمت فتحت ضوة النوم واني الممنونة عبالك جني يغدرني بالظلمة !
ورجعت حاطه بالي ويه الساعة

اجتني رسالة
.
ياي هذا  ماجد كاتبه عليه السيد !
اول شي يوصلني منه ابد من اخذ رقمي لليوم توه اول رسالة منه اليوم .

صباح الخير

صفنت يا صبح هذا باوعت للساعه بالوحده يااع اني هلكد سهرانه
رديت عليه ...وسأل

- شنو جاي اسوين

- جنت اصلي صلاة الليل ولهسة ما اجاني النوم

اجيت اكتب اشعجب تراسل بس استحيت

-ها تقبل الله

-وانت اتصليها

-لا اتعاجز

ظليت اهواي صافنه على جملته مدري ليش حسيت برتياح قوي
هو رسل غيرها كلام عفته وظليت صافنه على اتعاجز !

كلامه مو اهواي و ودع ..

بعد يومين اذكر اجه و صلني واني متحنطة و مجهزة لأي كلمة منه ...

اللقاء الاخر لا كان يرجعني بعد ايام و حاولت اكون على سجيتي اكثر بساطة وياه بالكلام لأن بديت احس بيه يضحك عليه معناها حاس بيه متكلفة بالكلام وياه ...

و اخذني غدر من وصلنا ونزل سلم على بابا وطلب اذن كدامي نطلع باجر جمعة نتغدة بمكان عام ....

ظليت اباوع لبابا بتعجب من وافق بوجه مستبشر ....

صارت بينا لقائات خلال شهر خطوبة
بس اني جنت متخوفة ولا كدرت اسيطر  واكون على طبيعتي  ظالة اصرف وياه كشخص غير معرب معرف احسه مو هذا الي ظاهر الي صاحب الضحكة القريبة على حلكه و صاحب الكلام الواعي ...مدري ما حاسة برتياح اله
و كلت هذا الشي لشهد هي اقرب شخص ممكن ابوح اله بمخاوفي ..امي تقلق وتخاف وتلوم ...

- شو بالعكس اني شفته بس مرة لكن وجه مريح

-ما اعرف شهد ولا مرتاحه بطلعاتنا او من يجي احسه غامض احسه يخوف

-ههههههه هاي لان من طرف السيد محمد

- ما ادري شهد

شو لحد الان ما دا اتقبله

- طبيعي اذا هاي المخاوف عندج معناها الا يتم زواجج الا تتعودين عليه

- شهد مجاي احبه

-زينب
شوفي انت مريتي بتجربة خطوبة فاشلة و تجربة حب فشل  طبيعي تتشتتين بالتجربة الثالثه واصير صعبة
بس معرف خوفتيني وياج لا ما تتأقلمين ولا

-و لا شنو

- لا الي بگلبج يظل

- الله كريم
غيري السالفة

-اكلج هم خطيبج اتقرب منج

-لا شحده

-اها اشعجب يكولون السادة حارين
و صاركم مدة اشوفون بعض

-لا شحده بعده خطيبي

-زين ما طلب يشوف شعرج يالعنيده

- لا هم شحده

-ادري الرجال كاعد ويه شرطي هاي السوالف المفروض اصير
بس شو ضجت لان مصارت

-ليش ضجتي.

-اخاف من المتزوج فرحته باهته و فضولة مخمود
يعني بأول لقاء يحاول الرجل العراقي  يتقرب ويكتشف بنهم مو هيج بارد اخاف لا يحب مرته اوووف

-هااا !!

صفنت بكلام شهد اني هنبلت عليها وما كلت عود اريد اصير كدامها اني ام الراهي ما انطيتة مجال ، لكن بالواقع هو اتقرب و بقوة هم فارض روحه ولزم لحد الان ايدي و وجهي خو بأول مقابلة 

- اووف زوز الوحام تعبني انوب اخوج صاير مثل سيد ماجد بارد وياي من نتواصل

-شهد

-هاوز

-كذبت عليج تقرب ترة

-ااوباااه

-اي اي حتى لا اظلين فاتحه حلكج وتتماوعين وتنصبين عليه كلت لا
اتقرب ومزعج بكيفه ما اكدرله اهواي اجاوز حدوده

- وكول وعلي

- والله

- ايي سولفي اول بوسة بينكم وين واشوكت ممممم

احمر وجهي

-لا ولج شنو يبوس والله لاضربه

-لعد مو كلتي اتقرب

-اتقرب حرفيا مو بتفكيرج التافه
يعني كعد يمي

-هيلاووو وبعد

-وطلب يشوف شعري ورفضت

- اي وبعد

-ولزم ايدي بالسيارة

-وبعد
وعادها من طلعنا سوة ..
بس اني خليته لازم اشوية انفها وياه
الو
شهودة
الو
الو

-وياج بس ضربت دالغة

-  خاف نعستي

- زينب تسمحين اكلج وثووول اي والله
انوب هي ام الراهي مخليته يلزم ايدها مو ايدج ايد كيت ميدلتون
و واضح مطيته وجهج العكر اووف هذا الوجه يطير النعمه

-شهد احترمي نفسج عاد اووي

-مزعجة

- مو خليت ذاك و فسخنا وظليت اشعل بروحي شعل اشلون انكشفت عليه

سكتت  منغثة

بصوت هادئ كالت
-اوك
ترة جنت اشاقة
زوزي اخذي راحتج وياه سوري ما ادري هيج السالفة عندج
يلا اروح اشوف شنو بالثلاجه كتلني الجوع

،

بوحده من المغربيات ،خلصت خبز طلعت من الخلفية نزعت ثوب الخبز بالحمام . وسبحت بس ما غسلت شعري ..الجو بارد...لبست ثوب صوفي نيلي واني ادندن لقصيده لمحمد الحلفي ..

لكيت صوفي متصل عليه ثلاث مرات ..
اتصلت بيه ابسرعة رد
-خالة اشلونج

- صوفي حبيبي شخبارك
شنو هذا  عبودي يبجي ؟

-اي حبابة سمعيه صوتج بلكت يسكت

-لك اوكف ليش هو مو تعود !

- لا هو زين بس من اتمرض اتنحس ويصيح امه وامه
ما نعرف شريد

-وين خالتك لعد ..؟

- جاي اصلي
الظهر كله شايلته وابوية هم اليوم كضاها بجي مدري اشبيه
،
حبيبي عبودي ..
الولد روحه احسة جاي تطلع ويه روحه خلص الاتصال بجي ما يسكت ...

سديته من يمهم واني روحي راحت عليه و كمت اكل بروحي ليش قبلت ابعد موعد  الزواج  من ماجد كال الي مرة ثانية ...
طلعت رقمه ودكيت عليه ..

▪︎ماجد ..

ساعدني محمد بلم المهر منه خمسة و من عدنان اثنين والباقي من والدي اني ما عندي هيج مبلغ  اني دخلي معيشتي  متوسط   والبيت خلف الله على ورث جدي الي قسمة ابوية علينا بحياته الله يطول بعمره احوالنا ترتبت من الاراضي الي انباعت وتقسمت على والدي والاعمام   .. جدي جان مختار و بنفس الوقت  بدأ فلاح الى ملاك الى رجال غني وتعين  بعدها  صار مختار خمس سنوات وتوفاه الاجل......لكن مجان يوثق كل املاكه بالعقار وصارت عليها مشاكل لهذا السبب ..

العروسة اجلت موعد الزواج ما استعجل جاي اشوفها صعبة وعنيده
اذا من النوع المتعب تهلك العمر وتخلصة ملجة فطلبت أجل بحجة ما مهيئ ظروفي  و صرت دائم اللقاء بيها واتصل   لكن هي ماعدها بوادر للحديث و ما يطلع منها موضوع فعلاقتنا جامده اشلون اثنين حطوهم و ربطوهم سوة محد يعرف الثاني !
على كل الاحوال بعد ما اكدر عيب امي جاي تجهز نيشان الها انطيه ويه المهر الاسبوع الجاي،

اجاني اتصال ظليت اباوع للرقم اركز بيه كاتب عليها زينب٢
لأن اختي زينب١ 

- مرحبا زينب

-  السلام عليكم ...

-وعليكم السلام يا اهلا وسهلا  طلع الكمر اليوم

- ماجد حباب اريد منك شغلة

-أمري !!

-اريد  اودي ...
نص الكلمة انبلع بصوتها اليبجي ما فهمت شنو اتريد

- شنو تردين
كلتها واني مغوش اعيوني اريد افهم

-ليش تبجين ؟

- احجي ويه اخوك يرجع

سكتت وظلت تاخذ انفاسها الي ومضت بداخلي شي لمع ...!
- يرجع الي عبودي حباب

تبجي وتتوسل كسرتها ازعجتني و ريحتني!

- بس اسكتي و روحي صلي هسة يمكن اذن ويصير خير

-حباب ما اكدر اعوفه بعد اكثر

-لهدرجه اتحبيه

-عبودي ابني !
ومريض  ويردني الله يخليك احجي وياه بلكت يقنع
هو كله منك

- الو مني شنو ما فهمت

-انت اخرت الزواج

-شنو !!

-هيج هيج حباب بس احجي وياه ..

سدته

يا الله هاي البنية ليش هيج الله خالقها جسرة لا وبعد نترت عليه وسدته
ضحكت على الموقف يكلك مزوجها صارلي عشر سنين وماخذة ميانه وين البارحة اخر اتصال متكلفة و وين اليوم تنتر وتزجر
بس عاذرها كانت منهارة بجي  وسدته شاردة مني.....

▪︎ زينب

صليت و ملخت روحي بجي على السجادة ...

رحت لأبوية من اجه من الجامع

-بابا حباب احجي ويه السيد يرجع الي عبودي
بس عبودي حباب مريض ومتنحس

- زينب اشبيج بوية
اذا مريض اهلة يمه
لا اظلين متعلقة بيهم زيادة و اتشتتيهم  خلي الهم ام وحده

-ما كادرة اسد هي وعبودي صارلة شهرين يمها بس واعي عليه

امي سكتتني وطلبت اروح اصب عشا عفتهم بالهول ورحت فتحت  النار على جدر كبة التشريب الاحمر ..
واني اعيوني ازغلل من الدموع ندك جرس الباب ..
و سمعت ربدة ..

اجينا اجينا !
هاي صوت الولد التوم ..
دخلو عليه من ممر المطبخ

-خااااالة
صاحو

بوست تقي و صديق
واجاني قاسم وبتول الغريب بتول اجتي عليه وباستني!!!!

-ولكم والله مشتاقه الكم ..

قاسم-عمو جاب الج عبودي واجينا وياه هههه

-يا عمك

-عمو ماجد!
فزت روحي على حلات  الخبر  
طفرت اني وجفجيري للحديقة حاطه
كلبي يرعد يريد يطلع من قفصي الصدري ... شفت بابا و السيد ماجد شايل عبودي بايد والثانية بيها جنطة بيبي صغيرة سمائية

-عبودي ...

ماجد-  السلام عليكم

اتقربت اخذت الولد منه و اني اهمس من غير دارية وعليكم السلام واعيوني ترسم عبودي رسم

-حبيبي ذبلان وين خديداتك
ظليت ابوس واشمشم بيه
دافي وماله خلك كام يبجي وفحط طرحته راسه على ايد والثانية جوة مقعده  ضاغطة راسه على صدري بينما والدي يحاول يدخل ماجد الي يريد يروح ..
بس مع توسل الجهال الي حولنا يبقون اشوية يمنا و إلحاح بابا قبل بابا كدامه يتمشى و اني ابصفه شايلة الولد الي سكت على ريحة صدري ...

همس همسة جفلتني
-حلو شعرج!!!
ظليت بمكاني واكفه وهو دخل و كلهم دخلو اني لفت راكضه للمر ودخلت من باب المطبخ ..
دنكت لمراية الطباخ

-يا شنو هذا الشكل !؟

الشعر كعكة مهملة و من كدام شعر قصير يطلع من يوصل للبقية فصاير ملولو
والوجه اصفر والشفايف زرك بسبب البجي لا وبعد العيون بياضهن احمر

رحت لغرفتي حطيت الطفل الي غفى وغطيته وصفنت على خلقتي شتحط الها واطيب

دخل مصطفى وكال اتكول بيبي صبة عشا النا كلنا سوة

- هاا
اهنا تسكب العبرات تذكرت جدر الكبة الي حاطه بيه عشر كبات مكدرات
ركضت اله لكيته كارض من كثر ما فاير.
حطيت ماي عليه ازيل ثخنه

ورحت وكفت كدام الثلاجة لا ياربي

رحت لكنتوري طلعت فلوس.
وتوسلت لصوفي يروح بالبسكوت يجيب كباب من راس الشارع لا اتفشل ..

كعد حضرت الزلايط على ما يجي الكباب ..

وصعدت لغرفة شهد انقذ ما تبقى من انوثتي الي اطشرت ....
شو انبني ضميري استخدم من غير علمها اتصلت بيها

-شهودة ماجد اجه

-يا اهلا بيه

-اني بغرفتج اريد اخذ منج شي

-اخذي حبي اي ثوب يعجبج

-لا احنه اصلا ما نتلابس
اريد مكياج شي احطه بخلقتي

-لا

ما اقبل الا مكياجي خط احمر

-حبابة انقذيني بس باودر وكحلة شي يظم التعب الي بيه

- هسة الي يسمعج يكول عمرج مليون
يلا اخذي بس عليج الله لا تلفين شي اووك مكياجي اهم من الي بطني

-عابت

- ممم اكو صندوك وردي بيه باودراتي اووك
اخذي واحد منهم الج لا ترجعيه

ظلت توصي على مكياجها  سديته بوجه ...خرب هاي شكد عدها مكياج صناديق و مجرات وين الوردي  كل الصناديق وردي متدرج عابت الها

فردشت الا لكيت حطيت  وحطيت كحل .
و مسكرا نسيت فتحت ابسرعة ولزك بجفني صخام ...
ظليت امسح بعيني ..  نزلت غيرت ثوبي النيلي  لفيروزي شتائي ..
وحجاب زيتوني  و طلعت كملت تحضير عشة و همه ودوه يمه و اجه مرتضى من برة كعد وياهم

دخلت بجدر الخبز ... واني مدنكه مستحية منه ومن بابا الي طلعت لخطيبي كدامه بعطوبي خاف عباله بابا متعمده

كعدت يم امي الي على كرسيها كالت الي اتروح تقرأ  مفاتيح الجنان ..
عرفتها تتحرج من كرسيها وهمه كاعدين على الارض ..
عفتها على راحتها بعد العشا اعشيها

شو بعد العشا والشاي بابا اشوية وكام ...
رحت وراه من تأخر شفته بالغرفة يعشي بماما
مرتضى كام للتواليت
خل اروح انتهز الفرصة واشكره وبلكت يخليه كم يوم يمي ...

اول ما دخلت هو وكف
وامر الاطفال يرحون للسيارة  منطي السويج لصوفي

- عفية اريد عبودي يمي كم يوم

لاحظت مقتدى طلع ...

صرنا مقابيل بعض واكفين

- اذا كدرين يبقى يمج
بس اذا دوام و هاي كم يوم على راحتج

-تحجي صدوك ابوه يعني قابل

-ابوه شنو اني موافق اني ومحمد واحد

ضحكت وحتى طلع لضحكتي المستبشرة صوت

-تعالي وصليني للباب ...

عندي احجاية وياج وبعدين صيحي لأهلج اترخص منهم

طلعت وراه  بالحديقة الاطفال اسمع حسهم بالشارع والي يدك هورن

-سيارتك راح تتفلش
محاولة الطف الجو لأن حيل ممتنة اله

- ملابس الطفل باجر اجيبها الج ..

- رحم الله والديك ..

ابتسم

- العفو ...

بعد كم يوم تجي الوالدة و خواتي
يجيبن الج حقج
ها و عبدالله علاجه بالجنطة لا تنسين مكتوب عليه الاوقات والجرع اتكول العلوية

مفهمت قصدة  يا حق هو كمل

- بالنسبة للكبة عاشت  الايادي ما ردتها تخلص
وطبطب على بطنة
خلاني ابتسم

" يلا روحي صيحي احد اترخص منه قبل لا اطلع...

صحت لمرتضى ورحت لعبودي ....

ثاني يوم الضحى جنت ابدل للدوام و اباوع لعبودي  وندك الجرس ..
كلها بالدوام بس اني وامي هاي رقاوي حبيبتي اجت تظل يم ماما والطفل ...

طلعت بس جبة والحجاب بعدني ما لافته ...ذابته ذب ..
فتحت الباب

-ادخلي  لج رقاوي
انمدت جنطة
ورجل ... ومدلي راسه بمناظرة الشمسية
-اني ماجد مو رقاوي
جان مبتسم
عدلت حجابي وهو وسع فتحة الباب ودخل عليه
-هاي ملابس الطفل

-ها
تعبتك وياي ...

-اسلم على الحجية واروح
استحيت ارفض وهم استحيت من دخلته ماكو رجال بالبيت
اشرت اله يدخل و مشيت خلفه  بتردد شفته وصل للممر ووكف
- الحجية وين شنو محد ماكو من الولد
-بغرفتها
لا
-جيد ما يصير ادخل اكثر هاي بس وصلت الجنطة لهنا

-هاا  !!!

اتقرب عليه و بجسارة رفع الحجاب عني !
-شعرج حلو
ترة انزعي من عندي الحجاب اني زوجج ترة

ظليت اباوع اله بذهول مستغربة

قبل لا اعترض اتقرب و رفع راسي اله

- البارحة ما نمت واني اتخيل هاي العيون تبجي
الصراحة ردت اشوفها  بذاك الوقت

- ها حباب كافي هاي شنو

مديت اديه لكدامي امنع قربة

ابتعد و وصل لنص الحديقة ...اني مشيت وراه وحاطه ايدي على كلبي
لا يرجع  ااه همزين اجلنا موعد الزواج قربة يهلك ويخوف ...

ظل اكثر من يومين غايب ..

ما ظهر صوته بأتصال واني هم نسيت امرة ...

جنت بالمطبخ اسوي  جاي  العصرية واني اذمر ماجد جاي وية امه

اعتقد ينطوني المهر بس ليش دخل اووف لو بس امه داخله
بديت اصب  ...

حسيت ببرودة كدام وجهي ...

هزيت راسي اركز بشغلي ...تحولت
لحرارة حطيت القورية ع الطباخ  لازمه منتصف صدري ، وايدي ارتخت ويه رجلية

وكعت مكدرت اتحرك بوسط المطبخ ...بس اعيوني تباوع للجانب الايمن الي وكعت عليه ...
اباوع يمنة ويسرى اريد انطق لساني ارتخى ....

يا الله شنو ديصير بيه دا احتضر !؟

لو شنو ؟

صرت اون من الوجع الي بصدري والانفاس الي نحبست ....

حسيت بحركه يمي

-يمة زينب اشبيج .
صوت امي و صوت كرسيها ...
اريدها توصل يمي ..
وكفت ما تكدر توصلني اني جوه وهي فوك..

ظلت تصرخ بيه ، اني عيني ازوغ عليها بس ما اكدر احرك غير جفن

-ولج يمة زينب كومي

شفت مقتدى الي الوحيد من الرجال بالبيت اجاني رفع راسي

-كومي زينب اشبيج

يمة مفتحه بديت اون من وجع صدري الانفاس مدا اكدر اطلعها .... كلت هاي روحي جاي تنتزع مني هاي هي جاي اموت اني ...

مقتدى -يمة اشبيها
كام يبجي وعافني ...

على اصواتهم دخلت العلوية

- البنية صارت زركة ....

ماجد يمة تعال ....

بدت اعيوني ادمع معلنة انتهاء انفاسي ونهاية صراعي ويه النفس ...

حسيت نفسي انرفعت وانشلت و كاني اريد اوكع من ايده اتهزهز
بعدها غمضت عالنة استسلام ريتي!!

يتبع