رواية شيخ الشباب(بنت المؤمن) الفصل الخامس عشر 15 - بقلم زهراء العراقيه

مساء الريحان

فيا رجال
يا رجال
وحدوا الصفوف خلفه
حيّ على السلاح
جئت من التاريخ كلّه
وجاء من فراغه العدّو
شاهرا فراغه
وعقمه
شهرت بندقيتي الشّماء للكفاح
لا تقهر انتفاضتي
وموقعي أدوس أنف من يشك
أنّ بندقيتي
تلقح الزمان
أشرف اللقاح
-مظفر النواب

•شهد

بعد ما راحو اهل رقية  ورة ساعة

كامت امي لغرفتها وطلعت لابسة  بس عباية
عرفتها لبيت جدي دايرة ، رحت وراها

دخلنا للبيت وامي سألت بيبي عن رسلان و  رنا ، جاوبت
- فوك بغرفتها هي واختها

دزتني امي اصيح الهن وكعدت تنتظرهن  بالهول يم جدتي

نزلت وهنه وراية
رسلان -  شفتي  رقية واهلها اشلون ناس طلعو .....اختها اتفل علينا شنو من ناس بيئة

مكنت اتوقع ابد امي اتكوم من مكانها وتوكف كدامها وتضربها كف هزها هز

ام ياسر - فضحتيني الله يهدج

رنا - ياا عزا اشبيج عمة هاي فوك ما ندافع الج

- شدافعين انت الثانية عود الكبيرة العاقلة ترحين اتفضحين بيه هيج

رنا- منو فاضح رحنا للحية الي حاطتها ببيتج ومسوية نفسها بركة وهي مفلفلة
بشرها

رسلان كامت تبجي وتشكي
- هيج عمة اضربيني وتوجعيني
المفروض هذا الكف لرقية واختها الي هانتني ببيتج المفروض اطرديهم

بيبي- ولجن شنو السالفه

امي- خَزني يمة گدام اهل رقية
سودن وجهي

رنا- اذا اتعرفيه سواد وجه اشعندج تتزوجين ها

دفعت امي رنا ورنا وكفت كدامها  بحدية ومخنزرة عليها كأنها اتريد تفترس امي وصاحت

- ليش هيج عمة ويانه اطكين رسلان لخاطرهن وما اطرديهن ليش هااا
ليش اكرهينا خايفة لا ما ياخذن شهد
مو ؟
واحنه اخونا كلج عمة اريدها ورفضتي ليش بالله هيج ويانه

رسلان -  عوفيها رنا ..... عبالي تحبني وتعزني ....

بيبي - يمة اشبيجن سمن بالرحمن

امي رجعت كعدت وكالت بنبرة تعبانه هزيلة  ما تفهما وحده من الخوات الواكفات كدامها ....

- زواجي موعيب صحيح
بس اني لابني ما كلت........ما اريد اهل مرته يعرفون بهاي الطريقة.....بغير وقت نخلي بتهم اتكول الهم بطريقة ما تنزل من شأن ياسر
وياسر......اه من ياسر لو موافق من البداية افضله وافضلي مكان هذا حالي

رنا- واحنه شعلينا احترينا عليج من خبثت مرته وفقدنا اعصابنا
هاي جزاتنا

امي -كدام مرت الشيخ سويتن شي ماله داعي و انفضح سر بيتنا ...مشاكلنا
صارت كدامهم

رسلان -اشمدرينا يمها اهلها

جاوبتها اني
- ردتي اتروحين ونهيتج وكولت الج وتدرين ومع هذا رحتي

متمتت رسلان معرفت شتكول

رنا- هسة شنو قابل همه اهم منا احنه كرامتنا راحت و امج كلشي ما سوت

رسلان
-فوكها تضربني  اني !

امي - لا تدخلن بشي ما يخصجن
و عوفني بحالي الي بيه كافيني

رنا ما سمعت كلام بيبي الي طلبت منها لا ترادد

وكالت  بنتر
- والله محد  ضربج على ايدج تتزوجين بالسر

امي وكفت
رنا خافت لا تضربها.....كعدت يم بيبي

وامي اصلا راحت يم باب الهول وكالت

- مو بالسر الحمد للة اهلة يدرون واهلي يدرون وابني بس لأن رافض و مشي كلمته عليه وهي باطلة  ....انت نفسج تدرين بضروفي وهسة غرزتي سهمج بيه شكول للغريب ....سويتي الي ما سوته رقية هاي الغريبة ظلت تبوس بيه من راحو اهلها لا ازعل مرات الغرب ارحم من الگرب  يا عمة!

طلعت  امي بس كلماتها وجعتني حيل حسيتها على اخر محطات التعب

اني رحت كعدت على الدرج و دايخة من حقدهن لهسة  يذكرن سالفة عادل من جنت بعمر ال١٧ وراحت ومشت

اشلون هيج انقلب وجهن و هاي رنا ناعمة الكلام اليوم شفتها بوجه فضيع مرة من عاركت اهل رقية ومرة هسة بالاولى عبالي من حبها لامي !
وهسة بالثانية من وكفت بوجه امي حسيت كره الدنيا كوله انجمع بين اعيونها لأمي...معقولة ؟
عبالي سالفة الوجهين للبشر بدعة !

سمعت صوت الولد عادل واحمد

بيبي كالت اله واخيرا مرتك خلتك تذكرنا

بادلها بسؤال- هذا المخبل ياسر
صدك ضارب راسة هههههههه شنو ورثها من عمي

بيبي - اسكت بسك شنو مخبل اسم الله عليه

- خابصينا بيه الربع شيخ الشباب ما شيخ الشباب وهو مخبل
الحمدلله كدرت اكص ايده عن مخازن جدي

عادل - احمد شنو هذا الكلام مو عيب
بيبي صدك اشلونه هسة ياسر اني توني سمعت من احمد

بيبي- وانت منو كلك ضارب راسه

احمد- رسلان

بيبي ظلت اصد بيه بالكلام وماقبلت وهو نزل فد نزلة عليه ورنا وياه
اني ما كمت من مكاني بعدني على الدرج بيني وبينهم  حايط ساد
انطلقو ما يدرون بيه نسو امري ..

بيبي -انتم ما منكم فايده اطلع اشوف
ربيعة (البقرة مالتها )

رنا - شايفين نفسهم علينا حيل ترة
واحسن شي سويته و انشالله يوم الي اشيلهم عنا

عاصرة ايدي عصر شرايني اتريد تنفجر منها.......اريد اكوم الهن لكن كعدت انتظر اسمع الصدمات اكثر واكثر

عادل ما عجبه الكلام وطلع واتبعة اعتقد احمد لان رسلان اخذت راحتها بالكلام  واني واكفه ع اول درجة حاطه اذني على الحايط

رسلان- عبالي اخرب عليه من اتعارك كدامهم و ياخذون بتهم  ونخلص شو انكلبت علينا السالفة!

رنا- هاي الكلبة رقية طلعت مو هينة فارا راسه عمه فر

رسلان - ولج لزكه خو ما لزكه كلت بعد الاسلوب الي حجينا بيه وياهم راح ياخذوها ويزعلون ما يبقون هيج بتهم

رنا- انت بعدج متأملة بهذا ياسر واحد شايف نفسه ترة
مثل ما شهد شايفه نفسها على عادل

خليت وطلعت من باب المطبخ للحديقة، شاردة من النفاق حسيت نفسي داخل وكر ثعابين اشلون جنت اشوفهن صديقات طيبات
حاسة نفسي غريبة عنهم ما اعرفهم

دخلت لبيتنا .....
ادور على دفئ يغطي گلبي الي يرجف من الصدمات

لكيت امي بالهول صافنة على تليفونها
كعدت يمها والغيرة والشك راودوني
ظنيتها اتريد تتصل او تقرة رسالة لهذا زوجها ...
شفتها حاطة رقم ياسر وصافنه عليه

- لا تتصلين هسة ماما

- ليش رجعتي تبجين شنو بيه شي صاير

- لا ماما ما صاير شي بياسر بس بس
مصدومة
اخر كلمة طلعت مع شهقات

- بيه !

-بيج ابد ما انصدمت لان كنت شاكة
الصدمة برسلان ورنا و واولاد خوالي..... ماما رنا ورسلان شايلات علينا حقد كبير

امي - شفتي هاي البشر هيج....واني هاي رنا وكفت الها بزواجها
ورسلان خليت ياسر يقنع جدج تكمل
شوفي اشلون جازني......فضحنا كدام الناس حتى بس يخربن على ياسر

- اشمدريج ماما حتى يخربن هيج سون

-مبينة يوم مبينة بس انت طيبة عبالج من حبهن الي
شماتت رنا بزوجه ياسر وصلتني مع كلام علينا من ناس......بعدها شايلة عليه وعلى ياسر لأن امها عرضتها وهو رفضها كايل هاي ما اتريحج اني اعرفها
اني بوقتها زعلت عليه.....وهسة طلع صدك كلامه اول اللاذعين والمشتين هي  واختها رسلان  نشرت  خبر زوجة ياسر هبلة

- بعد مالي علاقة بيهن

- خابري يمه انت اخوج هسة

- خابرته قبل نص ساعة ما جاوب

-بلكي يجاوب عليج ...

دكيت عليه ....

رد واخيرا

- شهد كولي لامج تحضر نفسها

- ياسر اشلونك حبيبي اشلون صارت ايدك

-شهد كولي لامج اجي ما الكاها اتروح لبيت الي اخذته

- ياسر شنو تحجي

-مثل ما كلت الج ..

سد الخط بوجهي

-ها يوم اشلونه اخوج ...؟

• ياسر

-شرايد مني هذا احمد يحاربني برزقي
اه اكلك...خليل سدة هسة اشوف
المرة شتريد

سديت الخط ويه خليل و رديت عليها

- ها رقية؟

الف علامة أستفهام  كانت ببالي اتجاه امي انحلت بعد كلام رقية

طلعت ما شايف دربي للبيت بالصلوات الا وصلت ...الضهر ...

غمست رجولتي بالوحل من عرفت  مدخلة رجال  ما اعرفة بيتي وياها  امي ومرتي!
رحت جبت خواتي يمها حالف اسوي جريمة اليوم

و اخذني جدي ... ما اتحمل عصبيتي ولا قدر موقفي ... 
اتعاركنا وكعت من على الرف شموع ومدري ايش زينة بالديوان الچبير

مطلع نيراني بشي ملموس دامي ما اكدر ادمي الي كبالي لانه جدي .. ضربت الرف اثناء صياحي وصياحه و
وانكسر......
جنني من كال الي
- بسك تحطيم واعقل حسبتك رجال سنين بس تاليها بعدك ما تفهم ....
امك رايده زواج مو بكيفك تكعدها مالك حكم عليها حتى تصدر امر بكيفك ردت توافق ما قبلت سنين مخلي الك اعتبار ومكعدها

- شنو مالي حكم عليها هي امي!.

ضربت الرف الزجاجي الي كاسر حافته والدم  صار يتخرخر

جدي اتگرب الي

- لا تگرب ليه
وانه اعلمها اذا ما اطلكها واكعدها ببيتها
ما ارتاح
مرة عدها كومه اولاد بطولها واطول و عدها إحفاد جان استحت من الناس

بعدها بديت ادوخ وجدي ترك السالفه
بس يكلي جرحك عميق انت تنزف ..
لزمت راسي دايخ .....شفت جدي وخالي لزموني اجيت اوكع ..مثل المخدر من الدوخه رحت وياهم ..اتخيط جرحي ورجعت لبيت خالي ابو خليل
بس محد بعد فتح الموضوع وانه تعبان نمت

وكعدت على الم ايدي
لكيت نفسي بغرفة خليل نايم

وين ملابسي بس بالداخلي  ..استحيت اطلع هيج لبست من خليل دشداشة
ما طلعت  گلت
اخاف بناتهم ماخذات راحتهم عيب

دورت تليفوني ماكو ...وكفت يم الباب وصحت خليل اهواي الا اجه

خليل
- صحيت واخيرا

ياكل تفاح

- جوعان كول لاهلك يسون الي شي اكله
وجيب الي تليفوني وينه ...

-طلعه من جيبة

-شسوي يمك ؟ وين ملابسي  منو نزعني وانه نايم ؟

-قصدك وانت قتيل
اني نزعتك و انطيتهن  لشمة تغسلهن كلهن  دم

- ذبهن لا اتعبها...وانطيني شي البسة منك

اتعشيت يمهم

كانو حذرين حسيت بهدوئهم حتى خالي كاعد ومغطي رجليه
،
حطت يمي  شمة الجاي

شمة- توجعك ايدك

خليل- صدك جيبي اله علاجه من غرفتي على الميز تلكيه

شمة-صار

اتصلت بيه شهد رديت اعليها

طلبت منها اتكول لأمها اتروح  لبيت رجلها

جابت شمة العلاج
اخذت العلاكة منها

- اني اروح

خليل- وين يمعود بات اهنا

- لا رقية تخاف وحدها

رقية شنو وضعها هسة خاف امي أذتها
وصلني خليل وراح لبيت جدي ينام يمهم  . وانه دخلت للبيت
مطفين الاضوية فتحت تليفوني الساعة ب١١
احد لزمني
التفتت وعلى ضوة شاشة تليفوني حطيتها كدامها ، لانها هي

- يمة اشلونها ايدك

- مو زينة توجعني

-سودة عليه

-هه ما تجي شي كد وجع
هذا
واشرت على گلبي

-ورمتي گلبي سنين احاول افهمج وما كادر

كعدت على القنفة و هي جثت على ركبها ....گدامي وانفتح الضوة شهد فتحته وكانت تبجي مثل امها ..

لزمت ايدي الي مضمدة و ملتف عليها الشاش الابيض ..

- حبيبي ليش هيج مسوي بروحك ..

-  ماكو شي يستاهل مو يم..  ؟

- عاجز لسانك يكول يمة....
ما أستاهلها اني ؟
حقك حقك
ربتت على ايدي وكامت اندارت

- باجر ترحين لبيت زوجج

التفتت
- لا يمة لا تطردني

- هذا الي ردتيه......مو ردتي زواج هذا الزواج فراگنا
كملت بهمست تعيس بارد
بالاساس  شنو فايدة وجودج الما موجود !

- ما اعوفكم يمة

- اني اكلج عوفينا وروحي شوفي حياتج......هي بقت أعليج كلشي بحياتنا كضينا (لزمناه ، او كمشنا )بدينا انه وشهد بالجذب ما ظل عدنا

رجعت جثت على ركبها كدامي ...

- سامحني يا يمة ما كدرت احميكم وابقيكم.....اني ما كدرت احمي نفسي
بالاساس .....حاولت اعوض الي فاتني

-  عوضي يا ام توبة عوضي

جحظت انظارها بخوف ورجفة جفن خاوي
كالت
-اني ام ياسر!

-مات يا يمة ياسر
مات يمة من كثر طعن زمانكم ما بقى مكان لجرح جديد

وكومتها عني...وكمت امشي لغرفتي

وصلت لفوك اتلمست الحايط ...فتحت الضوة 
شفتها فارشة سجادة و لابسة چادرها(اسدال الصلاة )
كفوفها وحده جوة الثانية والاثنين كان عليهن متوسد خدها الطري

مسويه محراب الصلاة الها منام امن
لا تفكير
لا هم
لا جروح
خالي هالراس القمري
مرات احسدها على راحة بالها

-رقية

همسة وحدها كعدتها
جنت كاعد يمها محني عليها
احتظنت بكفوفها وجهي

باست خدي وغرزت نعومة خدها بشعر لحيتي

هدتني و سجدت
-الحمد لله الحمد لله الحمدلله

رفعت راسها و دفنت وجها على صدري

- اشصاير؟

- دعيت دعيت اهواي قبل لا انام تجي
وا اجيت اجيت

- هيج دعاويج مستجابة  ما تدعين الي بالراحة

- ليش انت انت ما ما مرتاح 

كمت عنها
-انت شنو شايفه اني مرتاح

توها انتبهت

-ايدك ايدك

- بسيطة ما بيها شي

- هاي هاي ملا ملابسمن (ملابس منو)

- خليل ....

- اني اني اني اسفة اسفة
عبالي حرامي حرامي يبوك بيتنا
ما ادري ما ادري زوجها

- ريتة حرامي باك وطلع !

-ونظل من من غير غير اثاث

بدلت وانطرحت على السرير ، وهي تفرش بالارض

-ها هاي هاي هاي فراشك

- لا انام يمج اليوم

- هاااا!
ركضت عليه شمرت نفسها عليه
إلمت ايدي

- اااااه

-ها اسفة اسفة

حطت راسها على صدري مثل ما متعودة ...
وخرتها عنه

-اريد يمك يمك يمك حباب

حطيت راسي دفنته على صدرها مستنشق عبيرها مستجدي عطر ثاني

•رقية
حسيت راسه ينهز على صدري و ما رضى يرفع راسه من حاولت اوخره عني اشوفه..... من انفاسة عرفته يبجي من ابجي يصير بيه نفس الشي نفسي يثكل
ما فهمت ليش حط راسه على صدري وليش يبجي وما يقبل يطلع وجه الي بس اني لزمته من كفاه(قفا راسه )
ايدي صارت بين شعرة و ادفع بيها وجه على صدري اريد اضمه ما اطلعه ما اريده يبجي ما اريد اشوفه ، بطلت هو القوي مالتي اني ابجي عليه هو لا
حزين حبيبي  حزين يمكن ايده توجعه

كمت ابجي من غير صوت وابوس براسه وامسح كفاه ...

الصبح كعدت .. لكيت نفسي اني راسي على صدرة  وهو مغمض واكو فتحه خفيفة بحلكه من ينام......

قربت راسي عليه و بست جوة عينه و رحت للعين الثانية بستها بس على كيفي اخاف اكعده ،منهن بكى بالليل و من حلكه تنفس 
اتقربت  نزلت لجوة بشفايفي
وابتسمت
شفايفة حلوات ليش يطمسن  من ابوسهن حبيباتي يابسات اليوم 
كمت دورت على مرطب ما لكيت ...
جبت حمرة سحرية و حطيت اله

هم بسته
شو ما يكعد !
كل هذا الي سويته وما كعد
هزيته من صدره
فتح
- شرايده شرايده
انطاني ضهرة 

- اشبيك اشبيك نومك ثكيل وهم وهم الساعة الساعة ب٨ اشعجب نايم نايم

- ب٥ نمت  تعبان ما شابع نوم ....عوفيني ما اطلع اليوم

كيفت
عفته ورحت لمطبخي ... حضرت ريوك

ورجعت اله ورة ساعة .. اشوية تأخرت لان اسوي واني بالي وياه ...

لكيته ما هو وصوت ماي بالحمام ..

طلع نازع
- باردة باردة حبيبي بارده

- شغلي التدفئة
صدك
شنهو انه ليش محمر شفتي راحت الا راحت حمرتج بايستني بالليل !

- ههههه لا لا الصبح وحطيت وحطيت الك حمرة شفتك شفتك يابسة

-استغفر الله همزين انتبهت

لبس و نزل واني وراه بس يتريك ما سمعني

نزلنا
وهو يصيح شهد

طلعت كوثر
- شهد راحت للدوام ..

- وين امج ....حضرت روحها ...اتروح لبيت ابوها؟ .....و خل يجي الشفية ياخذها

- ليش يمعود ....خليها تطلك هي البارحه كالت اطلك

- مو بكيفكم كل يوم مزوجه ومطلكه
خل اتروح لبيتها ....

- واتعوفنا ؟

-مو احنه جهال وخايفة

طلعت امه تتوسل  تبقى

- لا تتوسلين روحي شوفي حياتج ....
احنه كبرنا ما معتازيج ( محتاجين الج /بعازة الج ، معتازين الج)
مو هذا كلامج ونفذتيه ...

- بس مو اطلع من البيت ياسر

- جا اجيبين رجالج يمي !

روحي يمة الله ومحمد وياج ...

- وبناتي

- تجين اشوفيه ...وهنه مالهن دخله لبيت رجلج عدا المزوجات انه مالي حكم اعليهن

الضهر ماكو....والخنكة ترست البيت طاردة الهوى منه اثاري مجرد وجودها
بالبيت متنفس الي...حتى لو جانت بس بالاسم بيه

الضهر نايم على السرير بطلت انام على الارض....انه من اتعب او انغث اظل بس اكوبس لو الجيثوم يخنكني بنومي....فراش رقية خوش وقاية الي
ما يجيني الجيثوم

دخلت اعليه شهد للغرفة وانه مطروح
- وين امي ياسر

بعدها ما مبدلة ملابسها

- ياسر وين امي
طردتها طردتها مثل ما كالت كوثر

- لا ما طردتها بس هذا الطبيعي

-الطبيعي تطرد امك ؟

- ما طردت احد انه هي الي عافتنا جا تردين اجيب رجلها يمنا يشاركنا بيتنا واشوفنه يطلع من غرفتها!
لو اطلكها مرة ثالثة!

ظلت تبجي كدامي

-روحي يا شهد روحي الي بيه كافيني

طلعت ....وصوت خطواتها واصلني

اشوية وكمت اشوفها جانت متعلقة بامي حيل حتى تنام يمها بالليل

لكيتها بالهول ،ورقية اااخ يا رقية تذكرني بالطفل من يشوف امه تبجي يكعد يبوس بيها ويحظنها بفكره البسيط الحضن يبرد الجرح...

تبوس بمتنها و راسها وشهد كاعده  على القنفة حانية راسها ، وتهتز من البجي
كعدت يمها...لزمتني من فانيلتي

-رجعها ياسر رجعها الي.....رجعها

-كبرنا يا شهد ....كبرنا من البجي(البكاء) على امنا .... اعتبري نفسج ببث تجريبي بالاعتماد  على العيشة من غير امج اتعودي
راحت لبيت رجلها.....

عفتها نامت على صدر رقية تبجي

صعدت كاعد بالغرفة وشفت كف نسائي اسود واكع بالارض شلته

صعدتلي رقية

- شنو البارحه طالعة...صدك شصار من طلعت انه من يمكم

- ها هذا هذا بيه  نقشة وردة
مال مال فاطمة مو مو مالتي

- فاطمة جانت يمنا

- اي اي ومن اتعاركت رسلان و و و رنا رنا يمكن نسته يمنا  يمنا
جيبة جيبة

خليته وره ضهري واني عاقد حواجبي
مستفسر
- منو اتعارك ويه منو

- اهلي اجو خواتي وامي العصر العصر العصر و رسلان  عبالها عبالها اني الي الي خبثت خبثت و كلت كلت
غلطت غلطت عليه  و و و كالت غلطة جبيرة
قوست  اديها ممثلة حجم الغلطة بايدها

-جبيرة حيل حيل و زي زينب ضربتها
ضربتها ضربتها من غلطت علية علية و فاطمه فاطمه طلعتهن من من الغرفة الغرفة

وزينب و زينب كالت اقفل الباب لا يجني الي مرة ثانية لان جانن يريدن يضربني يضربني

- هاي شنو

نزلت استفسرت كوثر كالت الي كلشي
الخيط الي براسي اجه يوكع
من فضاعة هالبنات
طلعت للهول واني اصيح

-لهلدرجة بلا تربية

شهد طلعت من غرفتها - شكو شكو

-بنات خالج....ذني الوكحات بعد اذا طخ السانج ويه السانهن الا ابترة الج وارقامهن مسح وحضر
فاهمات ....
اشكد ردت ابعدج عنهن ما كدرت بسبب ام ....بس من اليوم وجاي الي تخطي خطوة لبيت جدي بتر

ردت اطلع

لزمتني شهد
-وين

- اروح لهاي رسلان اشلون تتهجم على مرتي

شهد- لا حباب حباب لا تسوي شي تندم عليه حتى جدي تخسرة
امي ضربتها والله وما قبلت على تصرفها

انه الها  فلا انساها الها بسيطة

خابرت صديقي وطلبت منه بعد ما يجي خط عليهن على رسلان وشهد انه اوصلهن !

وهيج اوصل اني شهد ورسلان ظلت حايرة تتغيب  تتوسل باخوتها  ولا واحد راضي يعوف عمله ويوصلها

لحد ما اجرت لشهد عند نفس صديقي  و رسلان غلست عنها ..

العصر خابرتني عمتي ام رقية خجلان منها على الي صار بس ما فتحت موضوع  العركة،طلبت مني اخذ رقية احلل الها بأعتقادها حامل .
تسللت البهجة لدواخلي ،كسرها تذكري وضع رقية الام غيمت الخيبة من جديد. 

اخذتها للمختبر حللت الها طلعت حامل
ابسرعة حجزت الها بنفس البناية طبيبة
ومن اجه سراها...طلبت من السكرتيرة انه ادخل وياها....ظلت صافنه بوجهي ماعدنا هيجي الظاهر بس المرة تدخل

- اريد ادخل لان وضع المرة خاص واريده افهمه انه

دخلت طلعت الي دخلتهن ويه رقية و دخلتنا بس انه ورقية
ورة الستارة ، الطبيبة كالت حامل مرتك ب ٤٥ يوم

كومتها كعدت يمي كدام مكتب الطبيبة

-ماعدها وضع خاص وضعها الصحي عال العال

كتبت على فيتامينات  ومشهي
وطلعنا ..

انه ما كدرت ادرج مشاعري لاي خانه
بس هي فرحة مغشاية بخوف!

بالليل كاعد على ضوة النوم يمها وهي ذايبة بالنوم بثوبها الحني

حطيت ايدي على بطنها

- عندي نبض اهنا راجع الي اتمنى تطلع ولد.....اتكون عضيد ابوك.....انه ابقى يمك خطوة بخطوة ما اورطك بهالحياة واخليك مثل ما صار وياي

مر اكثر من شهر غياب امي ..
انه محمل اهموم اكثر من حمل النخل للسعف....و مجاي اتحمل رقية و بطئ فهمها فما عندي غير السكوت وسيلة
،
طفلة تحتاج من يراعيها بالكلام وانه روحي طافرة نفسي ما متحملها من كثر الضغوط من كل جانب العمل و البيت

أحتاج احد يسندني مرة تفهمني تالي الليل من اجي الها شاكي مو طفلة لا كلمة طيبة ولا حوار بينا اذا احجي كل كلمه احتاج وقت طويل افهمها المعنى
انه  هم بشر ورجال والي طاقة تحمل
خايف لا بيوم امل وين اتروح هاي البنية وابني اذا طلع مثلها! شنو ذنبة
منو الهم !

وصلتني رسالة  من رقم غريب ..

اني بت خالك رسلان ليش هيج بديت
اتحاربني ....

- ما حارب مرة انه .....وما انسى شسويتي برقية
ولا شماتتكم بأمي ما انسى شي
شهد وكوثر سولفن الي كلشي
منا وبينا وطعنتونا

- ما سويت شي اني...والي منك وبيك هو الي خدعك....وأسال شهد منو الي يدري عن وضع مرتك قبل الخطبة و رادك توكع هيج وكعة  منو الي دزو عليها قبل الخطبة الرسمية وسكت متعمد

شمرت التليفون وركضت لجوة انه شاك بس ماعندي دليل وهي تنكر  بس شهد عدها علم  هاي جديدة اعلية

فتحت الضوة عليهن شهد تنام يم كوثر
جريتها من شعرها مخليها تبجي

شهد-شكو شكو

- احجي لا اخنكج (اخنقكِ) احجي كوثر تدري مووو واجذب اعليه اتكول ام رقية ما كالت شي

ما اتحملت قسوتي وياها لأول مرة كالت

-اي اي تدري

هديتها وبديت اتقرب من كوثر الي بدت ترجع على كنتورها بخوف

وأطفالها كعدو من النوم يبجون

- اذا ادفنج اهنا احد يكلي ليش..
جريتها من زندها....لغرفة امي وسديت الباب علينا

- ليش حاقده اعلية هااا ليش

- ندمت والله ندمت

-المصيبة انت اختي الجبيرة
لا اكدر اطكنج ولا اكتلج واخلص منج

- سامحني ياسر والله ندمت

ظليت اغلط و اصيح أعليها وشهد ادك بالباب تبجي....

- هيج حقدج يسوي بيه......خليتني اكسر البنية لا اكدر ارجعها  ولا اكدر اتعايش وياها ظال اعاني.....اتعرفين شنو اعاني
منج لله انت واختها
دمرتونا اثنينا الله  يدمركم....

-سامحني يخوية

-الله لا يسامحج لا دنيا ولا أخرة
طلعت وقفلت الباب ...
لثاني يوم حابسها بغرفة امي
وشهد تتوسل اطلعها واطفالها هم يتوسلون ، ما طلعتها لثاني يوم ما كدرت اكعد بالبيت رحت لشغلي ..
تاركها بالغرفة كاتلها الجوع اكيد ...بس تشرب من ماي الحمام الداخلي اكيد..
اخليها بيه مثل المسجون عاد من تحقد اعليه على شي يسوة مو بلاية سبب

من طلعت غافلتني وكسرت شهد الها الباب   وطلعت زعلانه  لبيت عمها ما كدرت اروح ليها...خليها تنذل من مرت عمها وتردلي هي واطفالها منو يتحملها..
•شهد
عندي امتحان و وحدي بالطابق
يربي والله خايفة يمة شو اسمع طكطكة بالمطبخ
شهكت ولعنت ابو الساعة الي ضميت بيها الحقيقة عن ياسر...بس شسوي كوثر هم اختي وخفت يجرم بيها عاد هسة من مر وقت وعرف مرته حامل خفف عقابها اشوية
سمعت مرة لخ صوت بالمطبخ....خرطت العافية
كمت طافرة لفوك الساعه ب ٩ وياسر ما جاي بعده برة
ظلمة صالتهم وكعت مدري شنو طلع صوت

سمعت صوت خطوات

شهكت
وانركعت باحد اخترعت وصيحت
-يہہہہہہہہہہمة

- ياسررررررررررررر
هذا صوت رقية وهم خايفة فتحت الضوء

- عبالي عبالي عبالي حرامي لان ياسر ياسر خابرني توه ساعة ساعة ويجي ويجي

كلت-اااه انقطع خلفي حرام عليكم
اخترعت

رحت لغرفتها وانطرحت على سريرها

- اشبيج اشبيج

-مابيه حبيبتي قابل اني خايفه بس خفت عليج لا تخافين وحدج واجيت

-صدك صدك
ضحكت كيفت واجت يمي

همست
- خليني يمج حبابة خايفة وحدي

نسيت الامتحان ونمت
كعدت الصبح واستحيت على دمي من شفتهم نيام على الارض اثنينهم بفراش
سوة
- خرب اني اشكد غبية واشكد عيب نايمه يمهم

كمت اتخنس لبرة

وطلعت عنهم خطية اتكسرو بسببي

ههههه بس حلوين....

نزلت لجوة مستوحشة البيت حيل

.
ياسر نزل بغرفة ماما ينامون حتى لا اخاف...والصراحه اريد ادخل بغرفتهم لو لا العيب لان التخيلات تشتغل بدماغي وحدي.....ومالي غير ثوب امي احضنه الا اكدر اغفي

مرت الايام وتعودت اشوية

اني امر بفترة امتحانات...

طلعت جوعانه ادور شي اكله الضهرية

رحت لرقية واكفه يم سطل النفاية
ومدنكة

شفتها تتقيئ طفيت عن اللحم اجه يحترك بالحمس

-  شنو هاي البيت  ما منظف بعده

- اي اي تعبت تعبت اليوم بطني توجعني

شهكت

- ليش انت بعدج بالبداية

لزمتها من ضهرها

تعالي تعالي...دخلتها لغرفة  ماما

- نامي نامي

- والغده الغده

- معليج اني ادبر امري...

رحت للمطبخ .....اباوع للطباخ...اذكر مرات معدوده اوكف بالصلوات اقلي بيضة وابسرعه اطلعها من النار
ما احب الطبخ اوووف ياربي

لزمت الجداحه ومتردده ...

-لا لا ما افتح نار ولا اطبخ

لا شهد لا

رحت نظفت الهول و غسلت الكراج ...

و دخلت حطيت الحميسة الها
ما قبلت تلعب نفسها من اللحم
اكلتها اني جوعانه ،
و خلفت كلام ياسر ورحت لبيت جدي جبت الها جبن عرب من عدهم و زبد من خاله ام احمد  و انطتني لبن من دوابهم طازج اليوم الصبح حالبيه

اشبيها مشتقات الحليب اجنن اصلا واتبيض الطفل
واخذت خبز حار ومكسب منهم ورجعت الها .. 
اكلت واخذت علاجها ونامت اني طلعت برة إقرأ  .... 
اشوية وطلعت مصرة تكوي ملابس ياسر .... ما قبلت تأجل

-لا لا ثوبة السمائي  يريد يطلع بيه العصر ما كاويته  اليوم

-اووف حبكت يعني خل يطلع عريان

ضحكت
-عيب عيب واني ما اقبل ما اقبل غيري اشوفه
-من جماله عصاعيصة اروح اكوي اني بس كولي وين حاطتهم بغرفتج

صعدت اكوي

شكلت الكيبل بالنقطة الكهربائية واني هواجزي تندي على ذاكرتي...كم جلده نبتت على ضهري  بيه!

اكوي و ادردم على ياسر والعن الساعة الي اتبرعت بيها اكوي
-عزا عزا هاي اشبيه المكوى لزك الثوب بيه  مو خوش مكوى  اوه ماي الله
هذا العكرة اليوم  شخلصني منه

حطيته بالكنتور وشردت مكملت الباقي لا اجرم بيهن واحركهن كلهن ...
رجعت طفيت الاوتي ونزلت
العصر اجه ... وما لكه غده ...غير بيضتي !

ظل يتلاطم بس من كلت اله مرته تعبانه ...سكت وراح الها ...ومن ارتاح
لبس ثوبه السمائي (دشداشة)
ونزل

وكف كدامي وتك صدرة طالع من الفتحه

- موده حبيبي غير اني اتفنن

عضلي شفته وراح..بدل واخذ مرته للطبيبة

طلع الطفل نازل وعدها تقلصات

اهنا كانت مسؤوليتي دمار من نامت رقية واني البيت صار عليه طلعت سنوات الدلال كولها  ، انجبرت اسوي اشياء اجنبها طول عمري ....
وكلساع جايه أسالها عن طريقة الطبخ وكم حرك حركت بالمطبخ وانذب
منا من رحت بيوم لامي ببيت جدي
اشوفها وسولفت الها عن وضعنا
بس ما عرفنا امنين عرف ياسر بسالفة كوثر
ثاني يوم صار يجينا اكل  وخبز حار بكل الوجبات من مضيف جدي
اثاري ماما  حبيبتي وصت بيبي بينا
وياسر عارض بس بيبي سكتته

•ياسر
استشهد اعز صديق الي وشيعناه...خليل قرر يلبي الفتوى ويروح يلتحق مع الحشد الشعبي ...
انه دليلي لاب(خاف) اعليه و غيرتي
ما كدر خوفي على ابني يمنعني من ان اشارك ويه النشامى  والغيارا اصحاب النخوة ...... الانذال اخذو دم يابو دم ......ما تحملت اسمع بالنساوين الي انسبت وبالناس الي اتمثل بجسادها

صور الجنود ملت التليفونات سواء وهمه يحاربون او وهمه يموتون ....

جا انه المن ربي خالقني رجال وكاعد بداري وكاعي تحتل على ايد خنازير ..

خابرت خليل وكلت اله وبدا هو يقنع بيه لا اروح .  

لكن انه عزمت ....

سلمت شهد لجدي....و رحت اودي المرة لهلها بليلة  التجمع...والمرة بس تبجي ما اتريدني اروح..

حاول ابوها يقنعني
- انت الوحيد لهلك رجل لخواتك وامك
يا ابني انت سندهم ....

- الاعمار بيد الله عمي

- صدقت بس انت وحيد اهلك ....اذا تصوبت وما حان وقت منيتك اشلون بوضعك...اهناك لعبة ومدروسة يا ابني خيانة حكومة ماكو محافظات تسقط لو لا الخيانة

- نعوفهم ينتهكون كاعنا(ارضنا)!
نچتل(نقتل) الخاين و النذل ونحرر بدمنا وطنا ما يظل عرضنا بيد انجاس ما ينعرف نسلهم امنين

يا عمي الوضع ما ينسكت اعليه واحسن خطوة سواها السيد هي فتوى الجهاد
جا هو الحسين عليه السلام من طلع المن طلع غير مصلح ويحرر الدين الاسلامي  من مربي القرود مو نقرة(نقرأ) بزيارته ليتنا كنا معكم !
جا  داعش شنهو فرقهم عن يزيد وابن زياد من نفس الملة بأسم الاسلام ومحمد يذبحون اولادنا ويحركونا  ارضنا و ينتهكون حرمنا....

-حي الله البطن الي شالتك

-عمي الي خلق هاي الروح كادر يحميها
وانه رايدها للشهادة .

- جعلك الله من ركاب سفينة ابا عبد الله

كمت اله وكف هو الي بسته من متنة ..
ومن غير ما يتوقع اخذت ايده وبستها

- ابني امانتك عمي لا تنطيه لاحد من گرابتي

- ترجع سالم اوليدي واشيله على ايدك

طلعت للحديقة وام وابو رقية وهي وياهم يودعوني ...
دخل مرتضى كان برة ..

سلم عليه

- صدك الكلام الي كاله مقتدى راح تلتحق ويه الحشد الشعبي

- اي خويي

تحاضنا

وصيته
- ديربالك على العزاز
كان بعيوني رقية وطفلي وشهد !

طلعت مودع لركب المجهول

دكيت باب خالي فتحت الي اخت خليل دخلتني

لكيت شهد يمهم

بعد سلامي عليهم

- شسوين اهنا جاية

- اني اعيش يم خالي منا من تجي
وادنت على خالي ابو خليل

ابتسم
ابو خليل-خليها اهنا ياسر

-بس جدي ما

خالي-جدك عوفه عليه ...

- بس يعني خاف يعني ما

خالي-شنو الما ياسر . ترة اهناك هم عدهم شباب داخله طالعه وبيت جدك ما يخلى من خطارة وعدهم عادل و اولاد خالك نجيب
اهنا احسن الها خالي

اه يا شهد كاسرة ضهري كسر ... تمنيت الحك اسلمها  لابو بيتها قبل لا اروح

الفجر اتحضرنا وردنا نطلع

وكفت اودع شهد
- ديربالك على روحك ..ياسر
هاك هذا

-شنو هذا حرز؟

- ممم حرز من رقية من كنت اخاف انام وحدي انطته الي

اخذه بلكي ببركته تنحفظ الي وترجع
سالم

ودعتها وردنا نطلع
صاحت

-ياسر
التفتت

- ارجعلي ماعندي غيرك....انت ابوية

شهكت بالبجي
طلعت من البيت ابسرعه وخليل وراية
متفقين ويه ابن خالنا يوصلنا لل**
مناك ويه اولاد عمامي تلاثة ننطلق من كاعنا للكاع المنتهكة حالفين  نرجعها
لأصحابها
بعد الدورة التدريبية على السلاح رحنا بأسخن منطقة ب *****
انذار ماكو نزول ..
حياة ثانية ... او الحياة ما بعد الحياة عالم للتحضر للموت
صحراء قاحلة مجرده من كلشي موقعنا ،

ذبلت عيونا و اسمرت وجوهنا وكسبت من الهوى البارد وضعفت ابدانا لكن العزيمة زادت والموت صار بعيونه مثل دخلت العريس على عروسته نتمناه بشرف ...
مرت ثلاث اشهر  واحنه ما شايفين اهلنا ...

على الساتر والرمي اعلينا محاصرين ننتظر الاسناد 
كمنا نخابر على اهلنا ...... خليل
صور نفسة
-يمة  لا ازعلين مني لان ما خطبت بت اختج  والله سمينه عبالك تانكي ماي(خزان)....اني عروستي بالجنة حورية تنتظرني ونسة اهناك يمه ونسة
لا تبجين يمة و افرحي الي
يضحك ويحجي
مد الكاميرا اعليه
- وهذا ياسر الحقنة شيخ الشباب يمة سوة بطولات اهنا يابو بطولات
وصار وجه جنه بسطال من الشمس

ضحكت  وكلت
- ابنج شعرة انترس كمل وما زينة خالة

- خايب انجب صارلك ٢٥ يوم ما سابح وجايني
اكلج يمة دربالج على ابوية وعلى صحتج وكولي لمحمد اخوي يعرس لا يأجل عرسة
وسلمي الي على خواتي
الرمي واصل للستار واحنه نخابر و نصور

،

انه خابرت من هدأ الرمي ..
- الو يمة

- ياسر ياسر انت اوليدي
و ظلت تبجي وتنعى
-ما خليتني اشوفك يا يمة تعالي من تنزل

-انشالله
عوفج من البجي والعتب يوم

- سامحني يمة

- سامحيني انت يمة
ديربالج على صحتج ونفسج.....وعلى خواتي......صيري الهن سند يمة لا يذلهن رجل وشهد....يوم شهد اذا رجلج خوش انسان اخذيها يمج اتعيش منا من تتزوج تطلع من بيتج

- ياسر شو جنك (كأنك)توصي !

ارجعلي يا يمة ماعندي غيرك ارجعلي

-انشالله يمة انشاء الله ارجع
مودعه يمه

- لا يمة ماكو وادع في امان الله
محروس باسم الله
لا اله الا الله محمد رسول الله علي ولي الله

- لا اله الا الله
في امان الله ...

تأخر الاسناد و ازداد الوضع  سخونة كنت ما اريد اتعب رقية واقلقها
لكن حبيت اسمع صوتها حسبت الفراك  گرب

اتصلت بيها بنص الليل

- ياسر اشلونك

- اني زين وتمام

حبيبة شحن تليفوني راح يخلص ،
رايد اسلم اعليج واروح ...ديري بالج اعلى روحج و اعلى طفلج
سميہ على اسم ابوي اذا ولد واذا بت سميها الي ترديہ

- انت انت تجي تاخذلي تاخذلي سوناريو

-هههههه سونار مالحك اقصد اقصد انشاء الله حبي انشاء الله الي يجي من ربج  نعمة من الله

-اني اني اريد اريد اسميه اسميه علي علي

- ونعم منه  دخيل اسمة سميه
يلا حبيبتي مودعه لا تنسين ديري بالج على نفسج وظلي يم اهلج

خابرت ابوها وصيته الي بالي ...

•زينب

ثاني يوم اجتنا فاطمة دزت عليها امي ، تعرف اشلون تريح رقية المهلوعة واتكول ياسر مو بخير وبس تبجي ...

خلتها تتغدة اليوم الحمدلله

بعد الغدة كعدنا والدي فتح موضوع زواج مرتضى على الرغم من مرتضى ماهو بالدوام

امي رادت تحجي معارضه حيل ما اتريد شهد عروس لمرتضى

سكتها والدي
- لا تحجين ....من مشينا و حجزنا البنية  اعترضتي علينا  مو انت خطبتيها ؟

امي-مو حجينا بهذا الموضوع يارجال وكلت الك طلعت مو من مواخيذنا....
هسة حتى الولد ما كسر كلمتي وافق يعوفها

- واني اطلع صغير كدام الشيخ جدها و اخوها.....
اني وافقتكم من ردتو اتعوفوها وكلت الج اسدين السالفة وصلي لامها خبر

سكتي وانحرجتي وخفتي تأثرين على زواج  بتج وظليتي ساكته والناس على بالهم الخطبة قائمة

امي- انت وافقت نتركها شنو جد

- الي اجد...اخوها من اتصل بيه وصى عليها !

كلنا اتعجبنا وامي كالت شنو ؟

- اي وصى الرجال بأرض الموت وصاني  اتمم الخطبة بعد موته وما يعيقهم شي واخذها لأخته يمي و اصونها
سكت وبنبرة حزينة كال
-وصاني على مرته و طفلة

دمعت لا أراديا
هذا بدأ يوصي بأهلة وگلب المؤمن دليلة لا ياربي لا تفجع گلبها بيه، رقية تتنفس ياسر ....

امي سكتت ما نطقت من سمعت وصية اخوها ...

فاطمة -اشلون وصاك هيج

- لان اني خاطبها منه وماخذ زلم وياي ما طلب مني العيب ...و كثر الله خيرهم انتظروا أحزانه  تخف
هاي هي يا نسوان البنية ياخذها اخوجن و همزين ما فاتحنا اختج بموضوع  بتها عفاف ..

رحت لرقية شفتها مطلعة سن ياسر الي تركته يمي بعد الزواج....اني كلت الها لا تاخذه تذكره بضرب اخونا اله واني اعتني بيه....

- ليش تبجين

- اريد ياسر
حاولت اطمنها وسكتت....

رحت فتحت فيس بس شو سجل خروج حاولت ادخل يكلي الرمز خطأ
حاولت اهواي .... سألت مرتضى برسالة على الواتساب كال هذا متهكر حسابج راح خو ما بيه صورج

- لا ابد ما اصور ولا ارسل صوري لأحد
يلا خل يولي اسوي غيره ..

اهنا دك تليفون رقية وهاي تبجي
تخاف تفتح خط

- زينب زينب ياسر يتصل

-ردي ردي ..

فتحت
-ها ياسر ...شنو شنو والله والله

زينب زينب
عفت الشاحنه الي واكفه يمها وما لحكتها
وكع التليفون من ايدها  واغمى عليها

يتبع

٠٠