رواية شيخ الشباب(بنت المؤمن) الفصل السادس عشر 16 - بقلم زهراء العراقيه

مساء العافية يابعد عافيتي

شيخ الشباب
من كتابات زهراء العراقية

ناس ما منهم گُمر 
ناس ما يسوون خاشوكة شكر 

-مظفر النواب

أهداء لرسلان

•زينب
-رقية  رقية يمعوده اشبيج

اسمع صوت بالتليفون يكول وينج رقية رقية..

أخذت التليفون وحطيته على اذني بين ما ايدي الثانية جوة راسها .

-الو منو وياي

- اني ياسر  اشبيها رقية

- انت بخير؟  شكلت الها وهيج أغمى عليها ؟

- ماعت رويحتها ؟

انه جاي بطريقي  ليكم تونا وصلنا  لل**

- اها حمدلله على سلامتك....مابيها شي رقية لا تقلق هاي من فرحتها

- زين من تصحى خليها تخابرني

سديت الخط وهاي اترمش بعيونها بدت

- كومي رقاوي ، زوجج جاي النا
هههههه ادخلي للحمام ورتبي امورج
غمزت الها
هي بعدها مطروحة وتباوع للسكف....دمعت
- راح يرجعلي  مو

- اي المن يرجع لعد
صحت الماما وكلت الها الي صار ، اجتي فاطمه وياها كعدن بالغرفة وبابا بس سمع برقية تخربطت راح الها
ندك جرس الباب محد كام كلنا هذا مقتدى غلسنا مرتضى يفتح اله
بالفعل مرتضى الي راح فتح وسمعناه يكول ....
ادخلي لغرفتها هي تدري ومن فرحتها كاعده تبجي

اثاري يم باب واصل ودخل علينا ظيفة

شهد- السلام عليكم ...
دخل علينا مرتضى شهد وجها ضاحك

وكفتلها رقية وركضت الها

- ياسر جاي اليوم اليوم

- اي حبيبتي خابروني ...
تعالي انروح لبيتنا يلكانه بيه ..خطية يجي لهنا وبعدين للمشخاب يتعب طريقة طويل من ** للنجف
باوعت رقية لابوية الي وكف

- اشلونج بوية

شهد- الحمد للة...العفو منكم ما سلمت
اشلونك عمي ..
وراحت لامي وسلمت علينا ..
اني كنت مستغربة اخر مرة كنا بموقف
كريه...كعدت يم رقية وفاطمة
امي كالت شوديجن والبيت متروك

شهد - لا خالة اني بين فترة والثانية اروح اله و خالة ام احمد دوم بيه تسقي الزرع

امي- بكيف ابوها

ابوية
-خل اتروح بس وحده منكم وياها تنظف بدل منها ...
امي- فاطمة ترحين ويه اختج؟

فاطمة- يمة وذولة السرب الي وياي وين اخليهم وابوهم ما كايله اله...

-لعد زينب روحي وياهن

مرتضى - اني اوصلهم لعد...
انتبهت على مرتضى الي ما زال واكف واعيونه على شهد باوعت الها هي الثانية تباوع اله

بابا طلع ... وفاطمة كالت اروح اني .  طلعت عباتها و حجابها والبوشية تريد اتروح .. اني عين على مرتضى وعين على شهد ورقية كامت تفتر هم طلعت جنطتها ..... غمزت لمرتضى
ابتسم حك لحيته وطلع

انتبهت لامي هم مثلي صافنه عليهم وحاطة ايدها على خدها كانها ما عاجبها الوضع
كامت
رحت وراها للمطبخ ..تحضر شراب اي شي لشهد ..

- ها يمة رايده شي

- لا اني راح اسكب الها عصير زبيب

تنهدت
- اخوج كأنه عاجبتة
من كلت اله قبل اشوية كلام ابوه ما استفسر رفضي السابق والا اهتم اله
شفت بعيونه رغبة بهاي الزواجة
  و وافق على كلام ابوه

- ما ادري البنية حلوة حيل بصراحة احلى وحده من المرشحات الحاليات و جامعية وهو يريدها هيج مواصفات

- ما ادري شو ما مرتاحة الها

- ماما لا اشيلين ببالج منها ترى كانت بحالة تعبانه من ضغط مشكلتهم بيومها
وترة ما غلطت ولا سبت مثل ذني الي هجمن علينا

- حسيتها تشبهن ما ارتاحيت الها
وبصراحة تندمت لو ما حاجين بيها استعجلنا مبينة جريئة ، منو من بناتنا هيج تطلع وحدها و وتكعد وتسولف جريئة جريئة ما ارتاحيت الها اني اريد وحده خجولة خام

- هذا بزمنكم ماما هسة زمنا اختلف
وبعدين شمرة عصى بين بيتنا وبيت ابو خليل

رحت بدلت ...

وصعدنا ويه مرتضى .. وصل يم ابو خليل ونزلت شهد
انتظرنا...جابت جنطتها واستأذنت من خالها وطلعنا
اني كاعده بالصدر يمة وكلساع اصيدهم واحد عينه على الثاني....كل ما اباوع من المراية الامامية الكه عينها عليه و هو مو بكثرها من اصير عينه بعينها ينزلها ومن حس بيه منتبه بطل يباوع الها.....جريئة حيل لو احنه الي عايشين بدنيا ثانية وهو  العصر هيج صار حق للمرة تباوع واتكول اعيونها اريد بلايا خجل مثل شهد ما اريد اظلمها يمكن اني الي من غير هاي الدنيا...
اباوع للبنات الي من عمري حفافة و حتى عادي صبغ شعر...
اني اخجل  احط مرطب لشفتي كدام احد!
صحيح رافضة البوشية لكن من ذاتي اخجل البس هذا الشال الي لابسته شهد ولافته. وحاطة قراصة معليتها مدري شعرها طويل المهم طالعه عاليه وعباية من هاي الخياط الحديث ما ادري ايراني مدري كويتية خياط قطعة وحده مو قطعتين  ولا بيها خبان مو عراقية ..

حجابي اقربة لحواجبي و تحنيك  وعباية عراقية و معاصم او كفوف
ما اعتقد بيوم حتى لو كنت مخيرة اكدر ذاتيا اطلع للدنيا عن مبدئي
وصلنا للمشخاب .. حسيت بالانقباض

فتحت شهد بابهم و مرتضى ينزل جنطهم من سيارته الي ما صارلة مدة بسيطة من اشتراها
ليش بيتهم بارد...فاهي .....داخلته قبل كنت احس بفخامتة هسة غير مكان بارد مقلق.....يمكن لغياب صاحبة

شهد- مو كولش وصخ(وسخ)
امي اجته قبل اسبوع نظفته .....
مرتضى ما قبل يدخل للداخل بقى بالحديقة ، وشهد خمس دقايق اسلم  على أجدادي  وارجع

اني صعدت لفوك انظف طابق رقية ، رقية غسلت الكراج واجتي وياي،

من نزلت اريد من شهد تفتح السخان
لكيت رسلان  الخلقة السزز عفتها وصعدت وذبيت كلام بسيط عليها!

من خلصت خابرت مرتضى كلت اله ونزلت
رقية من شافت رسلان خافت
بستها من خدها   شاورتها

- لا تخافين ياسر جايج ومحد يكدر يندك بيج لازم اروح ما كايلة لعماد لازم ارجع واكله يلا حبيبتي باي

شفت رسلان شالها نص شعرها طالع منه وتباوع لمرتضى الي بأخر الحديقة يم الباب ينتظرني

رسلان وكفت يمي هاي شعدها تودعني وجاية اتزتتني للباب شنو الخوف يعدل الشوف الظاهر!
رسلان -مع السلامة حبيبتي

- مع السلامة !

ادنت يم اذني
- اضربيني مو الكي نصيبج لعد يا شريفة! الا ابچيچ دم

دنيت راسي عنها مرتابة وخليت وطلعت وية اخوية واني محتارة بهاي شتقصد!؟ طايحة الحظ لو لا نسوان كبار واكفات و مرتضى كان علمتها اشلون تهنبل علية بوخة ،

رحنا للبيت وامي بس تسأل عن رقية ..
كلت الها اكيد ياسر يجيبها ويجي يسلم علينا
بس اليوم خطية صارله اهواي ما شايف  اهلة ومرتة اكيد مشتاق الها

وكفت كدام المراية ..

-اوي اخبل صايرة فادت الحمية اشوية صار جسمي ارتب
منا للدوام اطلع كشخة

رحت فتحت الكنتور واباوع للجبة الي جابها الي عماد هدية، الا البسها هي اول يوم الي مممم بس هو شوكت يبدي الدوام دراسي الجديد اوووف  بعد الصيف اشطولة يجينا الناس بعدها ما ممتحنة

خابرت رقية وهي طايرة من الفرحة كالت اجه رجلي حبيبتي الله يهنيها
ااه الحمدلله كلنا أستقرينا رقاوي راح اصير ام و اني  الحمدللة انخطبت لخوش رجال وراح ادرس وفطومة رجلها صد هاي الي اتريد تخرب بيته وحط الها حد و ما انطى بفاطمة ابد

خابرت عماد وبلغته

-ليش ما كلتي

- خابرتك ما رديت
بعدين هو البيت فارغ ما بيه رجال
وساعدتها واجيت

-اذا هيج ميخالف ، طمنيني شخبار غراضي بعدج على الحمية التعبانة

- هههههه شنو مفتح محل وحاطني حارس علية

- هههههه اااخ لو اتعرفين اشلون متحلف بيج بس هي خلي تطلع دورة سنة ايمن

- ونحن بالانتظار هههههههه

- ااااخ گلبي تضحك بت ال...

- ال شنو هاا

-بت عمي شيالة همي

- مابيه حيل للهموم اني كافي علية هم وزني اشيلة اكثر من هيج ما اريد

-غير جسمج يسطر سطر حبابة بطلي
تفاهه ولا اضعفين اكثر

- هههههه مو عندي اماكن لازم اخففها

- لا دخيلج معليج اني اريدها هيج حلوة مثل صاحبتها

- عماد لا تجر على الخارجي قاصده بطني والله
عندي كروشي صغيروني وهسة راح بس اريد بطني تنخسف خسف وانت وين راح بالك
صحت بيه الا رجع لوعيه ...

،
مرت ايام اخابر  علية ما يرد ما اعرف شسالفته يمكن مشغول هم خطية مسؤوليته كبيرة هو مرت ايمن سو الها مشتمل لان يتيمة الابوين وهم تعذبت يم اخوتها ، فحطوالها  يمهم مشتمل  صغير طالع من بيتهم ..

•شهد
من وصلنا بعد غياب للبيت
الي مشتاقة لكل كتر بيه ..
اليوم من دخلت غرفة زينب وشفت ابوها بيها مشارك بنته فرحتها غرت حيل ، الفقد صعب كلش لكن الاصعب من ما تعرف معناه ولا مجربة اصلا!
ياسر رغم الفارق القليل الي بينا استجدي منه مشاعر الابوة مغيرة بيها علاقة الاخوة،

كلت الهن خمس دقايق وارجع الجن
طلعت للحديقة  شفتة كاعد على مرجوحتي هذي مالتي ياسر جابها الي
اجاني شعور حلو وهو كاعد شي مالتي ...
ظهرة علية و ومندك على تليفونه ما تنهز مرجوحتي و رجلية خاطة بالارض

ابتسمت واني يادوب يطخن بالارض
هيبة هالرجل تحيطة هالة هدوء راكزة تعلق عين اي بنت وتخطف من گلب دگاتہ  
طلعت لبيت جدي قاطعة روي عيني
بشوفتة  الصراحة داخل بالي! ومن زمان من يوم الي شفته وهو رجل كامل مكتمل بعد زواج اخته من اخوية

دخلت وسلمت على بيبي و كالو جدي طالع  بكعدة .....
طلعت الي رسلان
ردت اروح من غير ما اسلم عليها

رسلان - ان حظرت الشياطين غابت الملائكة
شهود ليش هالوجه الثكيل ما لايك الج

باوعت الها من رجلها لراسها و ظهرت بزاوية شفتي ابتسامة وهزيت راسي ورحت عنها طالعه للحديقة صاحلي عادل

- اشلونج بذاته عفتينا

- الحمد لله على كل حال

- صدك شنو هاي الصورة الناشرتها بالفيس

- قصدك صورة حفل تخرج !
اشبيها

- ما يصير اتنشريها هيج

- هههههه هو اني شطالع مني غير روب التخرج! مغطية وجهي بملصق

- اكو برنامج يوخره  احذفيها احسن

- منو بحال وجهي هاي الحسابات مليانه صور حقيقية يجون الي
ههههه
اروح للبيت

-سمعت من بيبي ياسر جاي اليوم

- اي يجي وامي هم اشوية وتجي

رحت من كدامة عافصة وجهي اشلون منطق يجون عليه ويحذفون الملصق
اجه وراية
-منو جابج ؟

-  اجيت وية زوجة ياسر واهلها

-اهلها كلهم اجو جا خل اكل لجدي نكوم بواجبهم

- لا مو كلهم اخوتها ... اقصد هي واختها تساعدنا بالتنظيف و اخوها الي وصلنا

- ها مرتضى !

استغربت من حفظه لأسمة وجاوبته اي

-جا شنهو اخته تبات اهنا ليش عافها ما انتظرها

-دا ينتظرها بالحديقة ما تركها

عفته ومشيت وهو وارية

- شنو تعالي حديقتكم

- لا مال الجيران ...اي بالحديقة مقبل يدخل منا من تخلص اخته وياخذها

- ما عدا نخوة يدخل بيت زلمته مو بيه
وكفت يم بابنا واصلة
- اشبيك شنو هالمنطق ..ترة البيت خواته بيه وبيت اخته وما رضى يدخل لان اني وياهن شتريد يعني يظل مكسر بسيارته ..

- دوخري
اتعداني و دخل من دون احم او دستور .. اني وراه شفت رقية واكفه وتضحك وترش بالكراج واخوها يمها هو الي بيده الماسحة و يودي الماي للمجرى

من شافونا ذبت الصونده بللت مرتضى ودخلت هي وبطنها كانت ما لابسة شي على راسها
عيونه السود طوخ مثل الفجوة المظلمة
من كثر سوادها و كثافة رموشة يبين مكحل هالكوفي وجه مرسوم رسم بية شبة من رقية وابوه
ضرب گلبي نبضة بقلق من احتدت عيونه الوسيعة وبحاجبة صارت كسرة من كثر ما انعكد  غضب لعادل
الي يبادلة النظرات

بعدها نفس النظرة وجهة الي

جاوبت مبررة
-عادل عادل ابن عمي اجه يسلم عليك من عرف انت هنا
اعذرني اني السبب دخلته وما ادري
الغلط مني اسفة...
ذبيت الغلط بيه حتى لا يحتد الموقف اكثر

عادل - خلي النسوان تاخذ راحتها ويا هلا بيك بمضيف جدي وابوي اتفضل

ما قلت حدة نظراته اصلا أزدادت كأنها تأنيب و راح للحنفية سدها وكال لعادل
- الله يكرمك ما اكدر اعوف البنات خاف يحتاجن شي الاحسن ابقى اهنا بالحديقة انبهن اذا اجه احد
!

اهنا دخلت علينا خالتي ام احمد وبتها رسلان و بنات خوالي ثلاثة مو خوات رسلان من غير خال سلمن عليه
وعادل اصر على مرتضى بس اشوية اسلوبة صار لين من شاف اهلة وامة

راح وياه...

رسلان- يلا حبيبتي نساعدكم احنه هم

دخلن و أمل كالت وين رقية كالو جايه وياج

- اي جاية
اه تذكر زينب البانزين والنار اهنا

گلت
- رسلان....اختها زينب وياها تعاونها
مبين كلامي واضح

رسلان- واذا شعلية بيها انه انتظر عمة تجي

مالهن اثر الظاهر صعدت لفوك لطابق رقية .....

ام احمد - عوفجن من سوالفجن اليوم انسنها ولا تحاربن عيب انتن بنات مالجن غير بعض و لا تخلن الزلم تحتار وياجن يلا كلمن اشوفلها شغلة البيت كبير ويحتاج تنظيف صارلها اسبوع من نظفته ام ياسر.....والغرفة محد منظفها

رحت لغرفتي نظفتها....وافكر بمرتضى صار المغرب اشلون يرجع بالليل ما اريده يسوق......خاصة مبين مو سائق ماهر بعدة حذر حيل وبطيئ بالسياقة

اني اعرف اسوق واعرف اميز بين المحترف والي بعده....ياسر علمني بالچول واهواي مارستها
اهنا نزلت زينب اصيحلي

وتفاجأت من شافت رسلان كدامها تمسح بالاثاث

زينب - !
ا شهد افتحي السخانات خل يجي ماي حار الجو بعده ربيعي  الماي ينزز

وها صدك البيت بيه اهواي حشرات عدكم مبيد نبيدهن

تحجي وتباوع لرسلان الي مبتسمة
بحتقار الها

كلت- مدري ... هسة افتح الگيزر وها صدوك البنات أجن يساعدن اذا رقية تعبانه خل ترتاح واصعد اني الها بس اخلص المطبخ

زينب- على راحتج ..... اهم شي لا تصعد النا هالمرادين الطيارة ( الصراصير )
تقصد رسلان مبينة
ولا تكعد راحة هالزينب ابد وصعدت بس الغريب رسلان ما مدت السانها ولا ظلت تغلط وتعارك دارت وجهة ورجعت تمسح بالاثاث ...

رحت للمطبخ وية ام احمد ...
وابالي نظرات مرتضى  
ابتسمت وكمت اضحك بلهاث واني اغسل السنك واذكر شكلة وهو رافع اشوية من بنطرونة الجوزي و ويمسح
حبيت حيل حبيت تواضعة هذا
بعمري ما شفت زلمة من عدنا لازمها  وضحكاته ويه اخته بس اااخ من عادل جفتهم ضيعها وبدلها بغضب مع هذا عادل احترم وما تعارك ويه عادل...احترم صاحب البيت الي ما احترمه عادل  ااه اشكد أحب حضورة
يشبه ابوه حيل

،

اجتنا امي رحت لأحضانها ..ضعفانة
وحسيتها تعبانه

-ماما متغيرة

-اشلون ما اتغير واني اعرف اخوج بجهنم حمرة والله ليلي ما انامه

بوستها وسألتني جبتو مسواك للثلاجة

ام احمد- عيني انزعي عباتج وارتاحي خلصنا تنظيف و المسواك بيت ابوج مفتوح وبية نسوان تطبخ

،
صعدت عاونتهن

زينب كالت اروح اني خابرت اخوها

ونزلت لابسة عباتها ورقية وراها...

رقية من شافت رسلان لزمت زينب من عابتها
-زينب لا تعوفيني!

امي كامت الها بوستها

وسلمت على زينب

-وين رايحه يمة وكت عشة

- لا خالة غير مرة انشالله تأخرنا وخطية مرتضى ينتظرني

اشلون بيه گلبي كل ما يجي طاريه يكمز...

ما قبلت زينب تظل وكانت صارمة بقرارها مو لينة اشوية حادة الظاهر بعدها حتى ما ناحيتي ما صافية شخصيتها مبينة صعبة  ،طلعت واني وراها

مرتضى جاي بالحديقة واكف
عدلت شالي  وحكمت شعري واباوع لل  يباوع لحذائة و كفته جانبية واديه بجيوبة

ومن طلع انطاني نظرة مدري حسيتها الي رغم هي عشوائية من سلم مودع الكل وطالع.... غرت من مدح بنات خوالي لشكله و الكاريزما والحضور القوي
وهاي رسلان ما تسكت
- هذا خطيب شهد الظاهر بالمستقبل شيخ هههههه اعيونه اجت تلزك بالكاع كثر ما مدنك
هزيت ايدي هازئة ورحت وية امي ،
اي هذا الواحد يبتوش مو بس يحذف الصورة لخاطرة مو استاذ عادل يبووو شجاب لجاب..رحت فدوة لخزرة اعيونه

واجانة ياسر دخل علينا ب ١٠ بالليل

اني عشر مرات خابرته وكلساع كان يكول اسماء المناطق الي يوصلهن

اني واني بواجي ومحاضن .. 
ما انطينا مجال لام احمد تسلم ...

امي وخرتني عنه وكالت
-شصاير بيك ضعفان ومسمر وهاي اشبيه وجهك شنو مجروح شنو هذا الشخط

ظلت تلزم بأديه
-خو ماكو شي بيك يمه

- مابيه شي لا تخافين ، باوع لرقية وهو حاضن متني بأيده
- رقاوي اشلونج ...
واكفة على صفحة مستحية وتضحك ..

راح الها هو وحط ايده على متنها
- اشلونج ام علي !

وتركها راح لجدي الي توه دخل جاي بنفس ملهوفة فاتح ذراعاته لياسر اخر رغم فترة علاقتهم كانت متوترة...

واجو البعض من ولد خوالي سلمو و اخذوه لمضيف جدي يتعشة واحنه رحنه وراه كلها تباوع عليه وهو ولا مهتم ياكل كأنه صارله دهر ما ماكل
وحده ويشرب من لبن بقرة بيبي
رغم هو ما يحبه كان

ام ياسر- يمة ياسر شنو مجوعيكم

- شنو يمه عبالج اهناك هم عايشين احنه لا ابد  حصرة علينا البيضة

متغير حيل وجه بس يضحك و ملهوف على الكل لك حتى رسلان سلم عندة هناك موت واجه للحياة محب للكل

ياسر-كلت جذب ارجع اشوف هلي هاي هي متت لو لا يجينا اسناد عمي الموت اهناك ببلاش  شحجي الكم ابن عمي مصوب قبل شهر بغير فوج هو و وصل للموت....

لساعة ١٢ كال تعبان اريد انام طريقي طويل تكسرت من الكعدة ..

رسلان - بات اهنا
ونتريك مثل قبل سوة على خبز عمة بالتنور الطين

عادل-اي عليك الله

ياسر- انشالله بعد اسبوع هاي البيتة الي تردوها
كيفت رسلان من ضحك بوجها

لكنها تلاشت فرحتها من راح لمرتها حط ايدها جوة ايده

- اليوم اخذ امريتي واروح لبيتي..
و اخذني اني هم  من ايدي و طلعنا وامي ورانه

• ياسر

نزلت لهلي ما مصدك عافيتي بعدها بروحي شفت هلي ومريتي صايرة عدها بطن طفلة وحاملة طفل ذولي شلون ردت اعوفهم ..!خذيتها للغرفة

و سديت انه الباب لانها فتت گلبي بطيئة وتضحك هالفطيرة
- مشتاق حيييييل ترة مو عبالج تعبان

- اني اني هم هم مشتاقة مشتاقة

-جريتها وكعدتها على السرير حاضنها

- انام على ايدج اليوم

-هههه ميخالف ميخالف هههههه واقرأ الك الك أية الكرسي الكرسي

حكيت شواربي
- ميخالف....بس احجيلي اشلون اتنامين من دوني.....هم تفكرين برجوعي
سكتت تضحك

-انه تندمت اهواي.....يمكني ضوجتج بمزاجي  و نومتي وحدي
ظنيتيها كره لگربج...... بس هي غير شي........هي توابع من الطفولة.....

الانسان من يوصل للموت الا يعيد كل حساباته انه  حسيت بنفسي تجددت بهاي التجربة ....
تجربة غير عن كل الي شفته بيها تفاني وعذاب و مواقف بطولية

- يعني يعني انت انت  تجددت توضيت مو !

- !
ضحكت لايم نفسي اشلون متعب فكرها المحدود وياي

- ههههه انسي كل الي كلته وتعالي

انه ناري موجرة واصلة لأخرها و بسرعة تحولت لرماد لان صارلي اهواي من محترك  ومحد يطفيني  اشهر
ونمت وما صحيت الا وية اذان الضهر على صوت حركتها بالغرفة

رجعت لداري ولبيتي والحياة
رجعت بني ادم ءاهناك نشلع عاكول كمنا ونحركه نقلي عليه بيض خربان كمت اترحم على ايام بيض شهد!

وبالي كله ويه رقية واشلون بيها ويه الطفل اهواي افكر بيها مثل ما يفكر الابو بأبنه مع الاسف عاطفتي كزوجة بدت تقل وتطغي مشاعر المسؤولية  و العطف اكثر  ، ملامحها بدث تثير عطفي والحب يتحول لأشياء ما مفهومة

، انه الصراحة اهناك بديت اعيد حساباتي ومن اجاني الموت ما فكرت غير بالولد
  وشهد اليوم زودتها بشكواها وبجيها

كاعدين بالحديقة العصر على مرجوحتها

- ياسر انذليت حسيت نفسي ماعندي اهل
الله يخليك ابقى الي ماعندي غيرك لا تعذبني

- منو ذلج ؟

- محد.....بس ابقى احس نفسي مهمشة لا ام لا اب لا اخ.....بوجودك بالبيت اني عندي اهل ، ياسر الله يخليك خلي الجهاد لناسها، انت الوحيد النا ،

دمعت عيونها
- ما كنت مرتاحة ببيت خالي كد ما هم زينين وياي وماخذه عليهم حسيت نفسي مثكلة....اريد بيتي حباب  لا ترجع

الله  يخليك

- ما اعرف انه جنت متراجع بس والله مو خوف من الموت فلا والله بس خايف اعليكم روحي بعدها ما زاهدة الدنيا وبس افكر بيكم انت ورقية

-فكر حباب واتراجع وانت معذور.......

وها صدوك خاف محد كال الك ترة احمد  هو واخوه ناصر احتلو كاعك ودومهم  بيها على العناد و بغيابك على كشي أستولو و وصلني كلام من اختك توبة رجلها يشوفهم نص الليل يجون لبيتنا مسوينه مجمع ليلي والله الي يعلم ليش بيتنا وشنو يسون همه وصديقهم اسمة شاكر المطيرجي

عرفتة هذا معروف يمنا سكير قذر أيا احمد الدون ادخل السكارى لبيتي...!

الظاهر تغافل جدي ولو جدي ما عاد يخوفك الظاهر

- اشلون يدخل

-اكيد ماخذ نسخة مفتاح من امه سواء تدري بيه او لا

- الا اكسر اعظامهم

- اني ما كلت الك حتى هسة تكسر عظامهم اني كلت الك حتى اوصل الك الوضع شصير بينا بغيابك  وانت ما ماخذ اقرار  بكاع هذا البيت  ،على المكاتبة بس
شوف مستقبل ابنك او بتك

تحلفت بهذا احمد الفاشل انه اله يجي وكته وانوشنة هسة خل اشوف حالي ومحتالي........

امي رادت ترجع لبيتها شفتها  وحدها شايلة جنطتها ، شلتها الها

- انه اوصلج

- صدك يمة

- اي اصعدي بسيارتي

شغلتها و طلعنا لبيتهم قريب ..
نزلت واباوع اله زين مبين امورة معدلة رجلها من واجهة بيتة

نزلت وكفت كدامي

-ما تدخل يمة

- مرتاحة اهنا؟
- اي عمك جاسم خوش رجال

-يلا ادخلي مو حلوة وكفتج هيج

رجعت ما دخلت دارها

رحت ،شفت اختي توبة و اختي الثانية  ا واخذت عند كل وحده هالقاسمة الله لجهالهن تفرح الاخت بزيارة اهلها..

خابرت كوثر وانه بطريقي للبيت

تتعذر وكامت تبجي
- ارجعي  كوثر لبيتج والج مني كلمة ما اطخج ...

رجعتها للبيت ولكيت شهد ورقية ماهنه خابرت شهد كالت بالمزرعة مال جدي طلعنا نتمشى رقية اتريد اشوفها الورد ...

•شهد
طلعنا العصرية رقية تمشي وتباوع حواليها وتضحك

- هاي شنو هاي شنو

- هذا خباز بيبي  زارعته هههههه تحبة

،
تعالي نكعد اهناك
كعدنا على كراسي الخوص

-اشوية ونروح رقية لان تجمعات بنات خوالي اهنا كل يوم وما اريد نظل اكثر خاف يشوفنا

-اي شو احس بوجع ببطني
-امج كالت الي انت ما اتعرفين الوجع من التقلص او الريح ، عادي لا تخافين اكعدي واني اجيب الورد لحد عندج

-اخاف اخاف

-هههههه ارتاحي راجعة

رحت  قطفت ورد الها وانجرحت ايدي بشوكة ..
- يبووو ارجع ذني كافي الها

لكيتها كاعدة بمكانها  بس يمها رسلان و امل بنات خوالي سألت نفسي
اشبيها رقية  مدنكه!

من تقربت اتبين الي تبجي
وهنة سكتن اول ما شافني اجيت

- شكو اشبيكم وياها ؟

رسلان-وعليكم الشكو والرحمة

كعدت كدامهن يم رقية

- اشبيج رقية منو وياج

امل- اكلج هاي دوم هيج مثل الطفل تبجي
الله يعينكم بس

كلت- كومي رقية نرجع للبيت

كامت رقية وانطيتها الورد

رسلان -هاي كل اللواكة حتى تاخذين اخوها

درت بس وجهي عليهن

- ما يخصج .....

رسلان- لو ادري على شنو هالتكبر انت و اخوج

درت وجهي عنهن وكلت
- والله مو مشكلتي اذا اشوفين نفسج صغيرة كدامي

أمل- عيب هذا الكلام شهد نسيتي احنه صديقاتج

رسلان -عوفيها عوفيها تلوگ لرقية واهلها
اهل الشرف والعفة

ضحكت ضحكة مسمومة ...

التفتت عليهن
- بس كافي الله الي يعلم شنو كلتو الها ومخليها تبجي ...... مو حرام عليكم البنت حامل  .......

- كولشي ما سوينا بس كلنا الها الحقيقة

-يا حقيقة كفونا شركم كولشي ما انريد منكم

رسلان-حقيقة زينب !
زينب الي اتحب رجل اختها

همست
- زينب !

رقية -جذب جذب جذب

خلت وركضت رقية وهي تبجي...

-  شنو هذا الكلام ..... وصلت بيج الدنائة هيج تحجين على البنات مو انت بنية مثلها

رسلان - شهد بطلي فطارية....هذولي ضاحكات على
ياسر خلو بتهم تحجي وياه وتحبه واتريده
وانطوه ثانية وبينهم حب وغرام والله الي يعلم شنو مسوية بالولد خلته يهج

امل - هذا الكلام متأكدات منه زينب وياسر بينهم علاقة لهسة  والله الي يعلم من كان يروح الهم اشلون تطلع اله هاي زينب التعبانة

-اش كافي ما اسمح لوحده اجيب طاري اخوية اشرف منكم كلكم

عفتهن  ورحت لبيتنا

لكيت رقية بالهول تبجي
وتخابر
رقية- زينب شسوي شسوي يكولن عليج عليج  كلام كلام مو حلو مو حلو حرام حرام

وكفت طالعة روحي معرف ذني من يا طينة

كلت لرقية
- عوفج منهن لا تتأثرين بكلامهن اظن لان زينب ضاربتها هيج حبت تغيضج

- زينب يعرفن انتي كنتِ  كنتِ تحجين ويه ياسر يعرفن يعرفن

-شنو رقية!؟ منو يحجي وية ياسر وشنو القضية

سحبت التليفون منها بس تبجي

كلت- زينب شجاي تحجي اختج وشنو القضية ؟

زينب- هو اني فهمت شي...اشبيها... رسلان شكايلة لرقية

سمعت صوت يمها ..
زينب- بعدين اخابر شهد وافهم
اي مرتضى اجيت

سديت الخط واني اسمع صوت مرتضى يصيح !

•زينب

خابرتني رقية فلقت گلبي نصين وخوفتني ذني شنو يحجن عليه وكلشي ما فهمت ...
دخل لغرفتي مرتضى وبصياح كال

-زينب تعالي لفوك وراية

شافني اتصل صاح بيه بصوت اعلى اجي وراه وطلع

سديته وصعدت

- ها

-اكعدي اهنا

اشر على سريرة
كعدت وكف كدامي وحط تليفونه كدامي

- هاي شنو اريد تفسير .....حسابج هذا لو مو حسابج؟

نشف الدم بعروگي و تخربطت مسيرة دگات گلبي .....انمردت روحي حتى الساني انشل واني اقرة واشوف جاحظة عيني ،سوادها يريد يفترق عن بياضها .......

سحبة عني وكال

- شوفتها لفاطمة قبلج واعرف كلشي ترة

رجفت بعدني ما ناطقة ضربني كف لوى رگبتي لوي !

يتبع ....