رواية شيخ الشباب(بنت المؤمن) الفصل الخامس والأربعون 45 - بقلم زهراء العراقيه

بنت المؤمن
شيخ الشباب²
من كتابات زهراء العراقية
لحد تغلط على اي طرف من اطراف القصة احتراما لطلب زينب

وما بين فصل الخريف، وفصل الشّتاءْ هنالكَ فَصْلُ أُسَمِّيهِ فصلَ البكاءْ تكون به النّفسُ أقربَ من أيِّ وقتٍ مضى للسّماءْ
-نزار قباني
دخلت بغضب وحرارة  بوجهي بالحسرات الا كدرت أكظم غيضي وما  ادخل اصرخ بيهم واسوي الي سويته بالسابق ،
لفيت الحجاب و العباية ودخلت للمطبخ شفت شهد دتصب جاي استغربت لبسي لعبايتي

-وين طالعه ؟

- لبيت اخوج اشوف مرت اخوج ليش جاية لاختي

- شنو اوكفي
زينب ما فهمت

وصلت وياي للحديقة
قبل لا اطلع جاوبت
-ياسمين

دكيت باب بيتهم بستعجال و ببال مشتت بالافكار ..

فتحت الباب الي رقية بت كوثر

ضحكت بوجهي الطفلة

- خالج اهنا

- لا

- منو اهنا

- محد

-يوووه اقصد اكو رجال

-هو محد

-ها رقية  وين

كوثر- شنو يمة منو بالباب
زاحت بتها عن الباب و رحبت بيه ادخل

دخلت

-السلام عليكم اشلونج ام رقية

- وعليكم السلام يا اهلا وسهلا اتفضلي ليش وكفتي ..

دخلت ويه كوثر للهول شفت مرة كبيرة ومرة  شابه اعرفها ياسمين وبتها بحضنها بعبيهم كخطار

وكفن من دخلت

-السلام عليكم ...

ما اتقربت الهن مجرد جملة السلام كلتها وكأنهن رادن يتقربن للسلام واني
كملت مشيتي لغرفة رقية.....

دخلت عليها لكيتها كاعدة على سريرها

- ليش تبجين سون الج شي

-كوثر تكول لازم اطلع الهن ما ما اطلع اخاف اخاف

- خابرتي رجلي
-كوثر كالت لا اكله لا اكله

-دخابري يلا

-كوثر ما تقبل

-اتصلي رقية

كامت تبجي ومكبرة الموضوع

سحبت تليفونها منها وطلعت رقم ياسر ودكيت عليه

لانها ما تقبل تحجي تخاف وتبجي خليته يسمع عمدا بواجيها وعمدا كلت الها
-احجي  وية رجلج كولي اله لا تبجين

-فاتحه مايك .

-الو رقية شجرالج
رقية ؟

- احجي وياه ردي عليه

رقية-الو ياسر

كامت تناشغ

-كولي اله

-شتكولين شصاير صوتمن هذا وياج انت وين

- ببيت منو انت ياسر
لا تبجين واحجي اشبيك ريجي نشف هبطتيني ولج احجي  شجرالج

-كولي اله مرتك الثانية يمنا

- ياسمين بالهول
ما ،  ما اريد اطلع اخاف اخاف منها
ما اريد اشوف مرتك ما ما حباب كل لكوثر لا تزعل عليه عليه

- انعل الساعة الي اجيت بيها

خافت وظلت تبجي
- لا تبجين مو اعليج رقيتي لا تخافين
اسكتي

-ما ما  ما اريد اشوفها حباب خليها ترجع

- مرتي السباعية انت هاي جاية تتعرف اعليج روحي اطلعي الها ولا تخافين انه وراج محد يطخج

التفتت رقية لخلف ظهرها اشوفه وين وراها !

- رقية وين

-ماهو انت وراية !؟

اني لازمة التليفون الها وهي تحجي وتمسح بدموعها ..

دخلت شهد اجت وراية

-اشبيها رقاوي ..

كعدت يمها تمسح بوجهه

بس هداها رجلها كأنها بنته وزال رعبها ..

شهد- صدوك جذب تبجين وخايفة يكلك الشرطة جاية تقبض عليج حبيبي
كومي بدلي و خل احطلج شي بوجهج واطلعي ورافعة راسج ولا يهمج هذا بيتج وهي جاية بيه

-مو بيتي اجار اجار هذا
عضت شفتها شهد وغلست عن ملاحظة رقية
- دكومي كومي

باوعت الي رقية تطلب القبول مني تثق بية
كلت
- كومي اطلعي الها بس لا تحجين اهواي والافضل بس سلمي واشوية وكومي

شهد-هاي اصير طردة

- اي خل اصير طردة
يلا رقية كومي

شهد ضاجت وراحت ما عجبها كلامي ..

بدلت رقية لسيت اسود برمودة فانيلة  ربع ردن و بيه حرف A ذهبي جلدي ..

ولبستها ذهبها و حطيت الها حمرة وردي و كحلة نص عين و فليت شعرها من كعكه كبيرة الى ظفيرة  طويلة ولبستها أسوارات تخرخش بيهن .

وبعدها بلون الخوف والتوتر  متلونه

طلعت واني ابصفها اترددت دخلت اني خليتها تدخل
- السلام ...
سكتت اشوية الا كملت -عليكم

وكعدت يمي كدامهم المرة الكبيرة
كالت
-صدقة لله اللهم صل على محمد وال محمد
كامت وكالت
-تعالي يمرت الغالي احبنج

باوعت الي رقية طالبة اذن اشرت براسي بايجاب ولمحت ضرتها اشلون تباوع الها وشبه فتحه ذهول بثغرها

رفعت الها حاجب وحطيت ايدي على خدي

خلبتها تنزل نظرها عنها و رقية المرة الكبيرة بوستها وبس اصل على النبي

ظلن يسولفن شهد وكوثر اطراف حديث احنه ما لزمنا بيها خيط السكوت كان حليفنا اني بالي يم الي دا يحاك بالهول اعتقد بس ارجع الكاهم يخططون يعقدون الي مو بعيد الكاهم جايبن شيخ وليش شيخ بس ابوي و اخواني ويعقدولي متوسلين بشيخ محمد وين يحصلون منه الي هذا تفكيرهم الي ضهغطوني بي

ياسمين - اشكد عمرج رقية

رقية باوعت الي اني كلت
برخاوة

-   عمرها ٢٦  وانت مبينه ثلاثينية مو

- لا بعدني مو بعمرج

استغربت من سؤالها

شهد- زهورة كبرانه حبيبتي

- اني اصغر من رقية بسنتين

كلتها ببهوت

ياسمين- تبينين ثلاثينية اكبر مني ما شاء الله

رقية- زينب احلى احلى منج

التفتت  على رقية باوعت الي واستحت ودنكت كانها اذنب من اتكلمت ما تدري شبه ابتسامة طافت بين شفايفي حسيت بعودة فاطمة وهي تدافع بأسلوب فطري بسيط
وهي حبة البركة الي ما تأذي الشوك

هنه غيرن السالفة كوثر و شهد واني رقية نتبادل النظرات ....

الحجية سوالفها بسيط

بالاخير صرحت سبب الزيارة

تعارف وهنه اهل وبينهم يجمع دم  الاخوة ومو عداوة ان شاء الله

دخل ياسر كامت رقية بخيلاء جسمها الغض و راحت اله بستعجال ...

-ما ما خايفة اني ليش اجيت راحت الخوفة الخوفة
اديها حطتهن جوة ابطه و راسها على صدرة

اني من يمي ثار تحفظي هذا المشهد و استحيت بس هي كانت خايفة والي سوته طالبة الامان اعرفها.....
هو ربت على متنها و زاحها بخفة وظل حاط ايده هلى متن رقية
وسلم سلام بارد وبيه نبرة تخوف شو نظراته لمرته مريبة كأنها تنذرها بشي

و هي هم حسيت برتعاشة ذقنها و اعيونها ذبلت

الحجية الي وياها كالت

- اني الي جبتها هذا رايي

- بعدين نحجي تعالي رقاوي

اني ماي بارد ونزل على ريكي من دلعها كدامها كأنه هو الثاني ضايج من جيتها ..

-ها هاي زينب يمنا

توه انتبه الي لوجودي

- اشلونج خوية

-الحمدلله بخير ..

ابتسمت لعد منو الي خابرك يحظي ولو يمكن ما عرف صوتي .....

كلت لشهد لازم اروح عدنا خطار عفناهم ورقية ما اهتمت لان رجلها وامانها يمها ...

دخلت للهول واسمع  كلام قوي من بيبي

- انت ما اتعرفين مصلحة اولادج
جا ما فشلتيني كدام المرة

- عمة
سكتت امي عن الموضوع من دخلت

-كافي عمة

كالتها بقلة خلك اتريد تسد الموضوع وهم واضح عليها التعب من لهثتها بالكلام ...

- ليش هيج يعمة والله من حبي الكم اشبيه الرجال ما يتعيب  و صغير شكله ما يبين عليه

- عمة هسة خل تنسد السالفة

-بتج تدري اني كلت الها

صفنت امي بوجهي مذهولة

- اشبيج ماما هيج تباوعين عليه

التفتت على بيبي وكالت معاتبة
-أشلون هيج تكولين الها

- خرب كلشي بعد حجابتج هاي

- خل يخرب ما انطي بتي لرجال جان مزوج اختها

- البنية ترتاح وياه مثل ما ارتاحت اختها الي تعرفة احسن من الغريب

- عمره جبير بتي طفلة وطالبة شجاري عليه انطيها هيج عطوة

هزت ايديها بيبي 

- مرة شكبرها مو طفلة بتج وانت اتعرفين لحبي الها اريدها ترتاح فرصها قلت للبت
دخل بابا و بيده كتاب سلم لكن الجو مشحون ولاحظت امي ما زالت تباوع لبيبي بغضب وزداد وجها احتقان

- لا تكولين هيج عمة
كله من ورة حفيدج غير كلتها للعلوية بتي صغيرة و طالبة ما تكدر تتحمل مسؤؤلية بيت بست اطفال

سأل ابوية عن سبب لهجة امي
-شكو نسرين ؟

-أسال امك
كالتها بزعل
-اخذيني لغرفتي زينب

زينب نطقتها بصوت مبحوح اخذتها لغرفتها اول ما دخلتها انطلقت بالبجي وبالتأوه كعدت على ركبي لازمه حجرها بأثنين اديه

-ماما لا تنقهرين
الله يخليج

ماما الله يخليج الي
حطيت راسي على حظنها

دخل بابا ونزع عمامته وحطها على الميز....

- أشبيها امج ؟

قبل لا انطق سبقتني بعتاب من بين دموعها

- أمك دللت على بتي كدامي و خلت المرة تتجرأ و تطلبها منا لواحد اكبر منها ب١٩ سنة قبل  اشهر كان زوج اختها!!

شفت امي ايدها ترجف من تحجي و متشنجة اعصابها ، بابا بادر بطلب مني اعوفهم واطلع وكان القلق واضح عليه

وكفت يم الباب وهي انهارت مرة لخ بالبجي و كعد على ركبه زاحف لازم ايدها ....

-ميخالف يهون يهون كلشي بس انت اخذي نفس

- امك تكلي بتج بارت كالت الي فرصها قلت

بابا التفتت ونهرني

-اطلعي

طلعت واني ابجي رغم اعرف كلام بيبي صحيح لكن منظر امي على كد ما رضاني تصرفها زعلت واحتركت روحي عليها

رجعت لغرفة امي وما كدرت اعوفها لكيتها بحظن بابا على صدرة وباسها
-لا بأس عليج حبيبتي
ظهره صفحته عليه ما شافني طلعت بخدود وردية انصدمت بشهد  واتكعبلت بيها ووكعت عليها
شهد- اي ضلوعي زينب كومي اتكسرت
كمت عنها رافعه اديه

- ما شفتج

- اي ظهري
كومتها وهي رقة بحد ذاتها مكسرة اخذتها لغرفتي انطرحت على سريري وهي تدردم عليه ..

- بيبي بالهول

-اي ولج ظهري ااخ ادري اشبيج

-لا ولج بس جنت خجلانه من روحي

بابا وماما وهمه شباب حذرين حيل بتالي العمر اشوفه يبوسها ويكول الها حبيبتي !

طكتها ضكحة شهد لحد ما وجه حومر وضاق نفسها و دمعت

- شهد لج كافي

- متت بعلي
وراس ياسر هلكت ضحك
صرت اتخيل

بس ترة الي شفتيه كان تراضي الها بيبتج اهواي جرحتها

-اووف المصيبة ما اكدر اغلط بيبي تحبنا حيل
ومرة كبيرة ما تعرف لا لتطابق ارواح ولا لفارق عمر اذا جدي اكبر منها ب٢٣ سنه شترجى من فكرها

عدها عقد مرمن  وهاي هي  تنحل مل العقد

- تحبج هيج تسوي ترة اني ويه امج حقها واني سمعتها لامج من قدمت جاي ما رضت على كلامهن واختصرت اعتراضها زينب صغيرة وطالبة ...
سكتت العلوية وكالت هم صدك اعذرينا والله لأجل هالايتام والا البنية بتكم وكلامك صحيح وحقج ...

- ها هيج الكلام ..

-اي وبعد اني طلعت لبست واجيت وراج ...

-اكلج هاي ياسمين اشعدها جاية

- يا اختي  جاية تتعرف على رقية

بس اني ادري خالتها جابتها من وره ياسر لان ما يقبل بس حتى تريح بالها وتبطل تتعب ياسر بغيرتها منها

-واشبيها اختي حتى من اشوفها تبطل تغار

كامت وهي لازمه ظهرها وكالت

-الصراحة ياسر اهتماماته برقية اكثر من ياسمين وهم حقها معذروة وين تعرف رقية هي ..

-يعني التقصير من اخوج

- مو تقصير بس رقية وضع خاص
مدارات اكثر ومراعاة الها مو مقصودة

-ها فهمت خالتها جابتها حتى تشوف بعينها

-بس اظن الامور تعقدت بعد الي شافته بعينها

ابتسمت

- لج اختج طالعة قمر و الي شافته ياسمين دلع من راحت حظنته كدامنا
واشلون تدلل عليه

-هههههه خرب والله حبة بركة على سجيتها تتصرف  بس هي الله عينه عليها

- ههههههههه مجنصة رقية اني مجربتها

- الله يسعدها يارب و يطول بعمرها...
فطومة الله يرحمها بنص عمرها الثلاثين وراحت ما فرحت بأولادها وما اعرف شنو مصيرهم ويه بس اب

-ليش احس بنبرة كلامج تأنيب  ضمير

- احس بيدي المهم يا شهد

بس والله يا شهد ما اكدر ما اكدر واهواي ارتاحيت من موقف امي معناه هاي هي موضوع محمد انسد بس شو ما فرحانه  ابد بالعكس انغمتت حيل واختنكت
اوووف لو اشوفين التوم اشلون يتختلون جوة عباتي يردوني

على طاري الجهال وين صوفي مو جان بغرفتي؟

-بالهول يم بيبتج تفلي راسه

ابتسمت لبيبي ورحت الها اشكد عادتها
هاي

كعدت يمها باوعت الي بطرف عينها

- بيبي لا ازعلين من ماما

- عبالي تعرف تفكر صح

- بيبي اني ما اتقبل الي ترديه

ما كدرت اذكر الموضوع لان صوفي راسه بحجر بيبي

فكالت

-بيكفكم والله من حبي الج ولهاي الايتام

حطت راسه بالارض وكالت اني هم يالله اروح لبيتي ....
راحت لغرفتي تلبس واني وراها منكسر خاطري عليها....

-بيبي  لا ترحين وانت زعلانه

-ما زعلانه يبيبي منكم
زعلانه عليكم
كعدت و هي تحط فوطتها البيضة بالجنطه بجت وكالت

- والله يبيي كلت الها لزهراء هاي حوبة بت عمج الي شهرتي بعرضها حوبتها جوت كلبج بأبنج ما صدكتني

- بيبي!

- حتى هذا عماد كلت اله

ردتج تنسعدين ويه رجال نعرفه و ضامنيه الغرب ما يجي منهم غير التوايه والگرابة بعدهم صدقة
وما زالو اذا انجاب طاريج يعذبون دليلي

-بيبي
لا تفكرين و تشغلين بالج اكو رب اسمه الكريم يلتفت لهاي الايتام والي الله اكرم الكارمين اني سلمتها اله من زمان
وارتاحيت
تـسابقوا نـاس بـأذيتي
طـاحوا ومـاطاح صـيتي
الله يـدري شـكـد نـظيفة
ومـاخذةالـدنيا أعـله نـيتي

وكلت لبيبي سبب رفضي للموضوع
 -بس بيبي ترة مو عناد بيج
ما كدرت احجي كدام صوفي واكلج زوج اختي  ما يصلح الي ما اكدر اتقبل شخص جان خليل اختي واصير اني مرته  ....!

بوستني كأنها رسالة اعتذار و طلبت مني اكول لابوية يوصلها ...

بس بيومها ما خلاها ابوي تطلع من البيت وعلى العشا كعدنا عادي كأنه شي لم يكن وما ندري بالقلوب بقى شي او لا .....

توالي الليل فاتحه الضوة وواكفه كدام مرايتي خليلة مراحل عمري ..

اباوع لوجهي شغيره !؟

وين وجهي الطفولي ليش شكلي صاير اكبر من عمري!؟

العمر هو عدد ايام عمري ؟
لو بكثر متاعب الروح؟

دكت ببالي  كلمة ياسمين

كعدت على سريري و اباوع لصوفي الي نايم ....

نزلت على الارض راجعة على الفراش يم عبودي و بتول بفكر خربان

بعد ثلاث ايام و سمعت بالسيد جاي ياخذ ابنه صوفي

حظرت اله ملابسة و طلعت من غرفتي حتى يجي ابوه وجده يكوموه ..

رحت للمطبخ عندي كم شغلة اسويها بس من سمعت بجي صوفي رحت للغرفة اشوف شكو

اسمع صوفي يكول ما اروح حباب ويبجي بحركة
طليت من الباب
-بوية اول وتالي نرجع ما تكلي اشبيك وانت الكبير هيج تبجي

-اظل ببيت جدي اهنا لو بيت جدي اهناك بس حباب خليني ما اروح لبيتنا

ابوية كال اله

-انت كلتها بيتك يا جدو ذاك بيتك وغرفتك ما أشتاقيت الها

-ما اريد

السيد-دخل نكومك ولا تظل تبجي

اني وراهم ما حسو بوجودي ضايجة على صوفي

-اخذ اخوتي و خليني

ابوه مثل العصب كال بقلة خلك

-اشعندك وحدك غير ويانه ترجع هاي اني راجع

- ارجع وازوج بعد امي  وعوفني بحالي

رد ابنه كان مثل السهم وصوبة عليه خلة ردة فعلة صادمه النا من ضرب الولد كف سكته وهظمة اتعديت الباب ودخلت اله

همست- صوفي

كال -وخري انت عني!!

استغربت نفرة الي

-ازوجو شتريد اسوي اسوي بس عوفني بحالي لا اجرني وراك
جنا نتوسل بيك نرجع لبيتنا
بعديش جاينا هسة
ازوجها وعوفنا بحالنا

يحجي ويبجي هشم أحساسي وجرحني وهو ما يدري خليت وطلعت ساحبة انفاس البجي بالختلة ..

بعدها سمعت طلعو واخذوه ...

بالمطبخ
شكيت لشهد على ظن مصطفى بيه

-لج ما شفتيه يباوع الي على اني مذنبة كأني راح اخذ مكان امه

لج ما يريد يرجع لبيت ابوه
اخذوه بالغصب ...

ما حسيت بوجود ابوية الا من كال

-زينب بوية تعالي

رحت وراه للهول ..

- بوية محمد اعتذر عن سوء الفهم الي صار

-يا فهم !؟

- من طلبتج أمه
كان موضوع والنسوان اطرقن اله مو بشكل رسمي و مجرد اقتراح لا اكثر
وامج خصمت الكلام

-بس الجهال شو معبالهم هيج

- الغلط كله من محمد المفروض يكول لأمه ويبلغها هو من شهر كال انريد زينب لماجد ورجع فتح موضوعه من جديد 

كعد بابا كدامي مستريح

- يا ماجد بابا ؟

-اخوه الصغير الي طلب ايدج مني

-هاااا هذا مو تزوج ومرته دخلت بغيبوبة ايام واتوفت ؟

-  الرجال رجع اعزب

اجيت اكول" عندة بنية بابا اني اكيد ما ازوج شخص مزوج سابقا
بس سكتت استحيت اجادل اكثر

وهو ختم الحديث بعبارة  "الشغلة صارت مخربطة بسبب امه همه يصفون أمورهم ونشوف احنه بعدها شنصرف
هو هم عنده بنية و انت اول زواجة والله حيرة
روحي بوية سويلي جاي

رحت واني افكر انوب  عليه ماجد اخلص من اخوه يطلع هو ااااخ من الندم الي رجع اكلني هسة اكل لو من البداية وراضيه بيه لا حرية ولا دراسة شحصلت لا حظيت بيهن ولا حظيت بزوج بيه حظ من وره عماد الي خلاني ارفضة اوووف ياربي جان ما ظليت بحيرة وقريبة على اطفال اختي ..
خدرت الجاي
واتذكرت وكلت لنفسي حظي الفكر لو اني مرته جان ويه اختي متت بدل مرته  ويا يمة جنتِ بوحدة وصرتي بأثنين
يلا عمر  الگوي بگي...

وكابتن ماجد تررن
صرت ادندن و رحت لابوية وديت الجاي ...

رحت لشهد لغرفتها ابشرها بالاخبار

-شهوود رضاوي طلع

كالت
-ادخلي زوز
مديت راسي وكلت
-  لكم اخر  الاخبار كابتن ماجد تقدم لزينب حسن

ضحكت من غير اهتمام

-احجي صدك ترة طلع اخو السيد رايدني ههههه

-يا سيد

-ابو مصطفى اشبيج هذا الي كلت الج عليه مرة خطبني

-هااا كم عمرة

- يعني يطلع من عمر مرتضى

-ياي عمر مناسب مو هو هذا الي مرته هم اتوفت

-نعم

-واو اي على الخير

-خير يصيبج بس اني ما اخذته وهو ولد اولود اخذه ارمل؟

-حبيبتي مو مهم اذا كان بتول لو لا بالعكس المجرب اضمن

هفيتها بكروشية و كعدت يمها

-لا جديات هاي العيلة ما اريد اتقرب الها
بعدين السيد لمصلحته هو قبل مجان مقتنع بيه ترة هسة صرت عزيزة ويححي لبابا عني ..

-ما اعرف بس اشوفه شي مناسب الج ماعنده غير بنت طفله تكدرين تشكليها وتربيها على ايدج
وظروفة سامعه عنهم كلهم واصلين
وابوج واخوج ضامنيه يعني زواجه دهر ليش الرفض

- يكفي هو اخو السيد

-وانت شعليج بالسيد
هسة وجه مقارنه مرتضى ابن الشيخ حسن بس الفرق بالشخصيات بين السما والارض

شفتها اتريد تقنع بيه عفتها ورحت لغرفتي .. 
وبالفعل خطبوني رسمي مو بس كلام عابر ورفضت رفض قاطع واجهت بيه امي الي فرحت بيه
وفرحتهم بيه كانت سيف غدر منهم ليش ينطوني  لأرمل ولخليل عزوني عليه خاصة من سألت عن أحواله وعرفت ما راهم ويه مرته ويكول طفلة وهم منصدم بالواقع من صحى على زمانه وظال مشتت
،

كنت انظف بالبيت و كالو الي امج اصيحج رحت الها

-ها يمة اوديج للحمام

-لا تعالي اهنا يمي اكعدي

كعدت على طرف سريرها

-ها ماما

-موضوع ماجد يمة زوج اختج خطبج اله مرة ثانية وانت تدرين ال......

-هم رجعنا يمة مو رفضت

-بعدنا ما كلنا الهم شي

-يوهووو وتعال حلها يا حلال ماما ما ازوج واحد سابق اله الزواج ولا اربي طفل غيري...نفسي ضيق اني

-مو اشوفج ويه اطفال خواتج  حنية الدنيا بيج يتيمة واتكسبين ثواب بيها

-ماما  اولاد خواتي انت كلتيها طبيعي اصب عطفي عليهم شنو صاير عليه
ازوج واحد ارمل واني أنسة

-يمة

صفنت اهواي الا كالت  الي بكلبها واذاني

-كلام بيبتج ترة صحيح
فرصج بالزواج الزين قلت وقلت حيل
يا يمة هاي الزواجة مناسبة ليش تضيعيها من ايدج

صعد عندي الغل و ما كدرت اكتم عتابي

-مو خطبني الي ما همه شي من الاشاعات  وتدرين بيه يا امي رايدته ومن ورة ظهري صديتي امه
بس لان هذا من طرف السيد فرحانين بيه وتذكرتو فرصي قليلة

-زينب يمة؟

-اش ماما اش الله عليج كافي تعبت منكم حيل. و وصلت حدها اظل معنسة ولا اخذه خوش هيج ارتاحيتي

▪︎ماجد
  كنت كاعد ممتعض من ابوية والشيخ ابو علي من اتنازلو عن حق مصطفى بعد الاضرار الي لحقت بيه بسبب هالحادث المقصود ..

دخلت علينا أعصار متحركة بثوب اسود يعاني من هزل صاحبته مرسوم على جسدها الهزيل التفتت عليه من غير ما تلاحظ  وجودي استدارت عليه مثل موجه حريريه عنيفة موجهة كلامها لأخوية السيد محمد ...
تسأل عن حال ابن اختها بخوف
وقلق حسيت وجهه شديد الجاذبية قريبا للنفس مريح للنظر ببساطة معانية و اعتدالة عرفتها هذي الي ردتها بيوم ورفضتني !
نطق اخوية محسن" تشبه اختها  المرحومة
اخذها اخوها وساد الباب خلفهم
شفت لمحة انكسار بوجه محمد من انذكر طاري اختها كأنها جرح ما يندمل ذكراه ملح يهيج اوجاعه رافض ينجاب طاريها .....

،
اني الصراحة فكرت بيها مرة ثانية وكلت الفكرة من قبل لمحمد وهو كال بعد وكت على هذا كلامك  الجماعة موجوعين على بتهم 
وبعدين انت المفروض تحتار ببتك هسة مو تفكر بالزواج من هسة
اجلت الموضوع   وهم احترام لام المرحومة والا المرحومة اذتني اهواي ولا رايد احترم ذكراها اذا اني عايش وما احترمتني ...!

رحت لبيت اهلي مثل كل يوم بيتي قريب واكل وجبات يمهم وبتي يم بيبتها ام امها ...

من دخلت استغربت عصبية السيد على أمي ..

-اشلون من كيفج تتصرفين يمة

- خير ابو مصطفى على كيفك ويه الوالدة اعصابك ما كنت هيج..

- تعال استلم امك اليوم حاجية بخالة الاطفال

-ها كلت لامي تخطبها الي وليش ضايج انت  لعد

مسح وجهه بعصبية مبالغ بيها

-لا امك خطبتها الي وامها صادتها

انبلع الكلام من صعوبة الموقف وكعدت محتار بمكاني ...
يتبع

انفتحت شفرات القصة وانزالت علامة السؤال حول منو خلف علامة الاستفهام ،  والقصة وصلت لنصفها الثاني تقريبا ...  هاي لو ٢٠ لو ٢٥ اذا الله شاء يمكن اكثر او اقل ....