رواية شيخ الشباب(بنت المؤمن) الفصل الرابع والأربعون 44 - بقلم زهراء العراقيه

مساء الخير

بنت المؤمن
شيخ الشباب²
من كتابات زهراء العراقية
والصبر لا صبر له والنوم لا نام وساعة الجدار من ذھولھا ضّعت الأّام.
-نزار قباني

كعدت بالمطبخ حيرانه شصاير
غير يجي مقتدى خابرته يجيب الي طلبه بابا ولهسة ما اجه للبيت
دخل وكفت بباب الممر وهو جاي الي شايل الكراتين حطهن يمي

- سمعتي شصاير ؟

- شنو خطابة؟

- المن الخطابة الي قابل
كالها بهزلية رفعت اله حاجبي و بوزت حلكي

ما ضحك و كال بزعل

- مصطفى داعمة واحد

لا اراديا ضربت صدري

-اشوكت ؟

-متعارك وذاك صاعد دراجته وداعمة كدام جماعته متعمد

شهكت بهبطة خوت ركبي
رجعت لورة جريت كرسي وكعدت عليه

انهطبت واني اتخيل شكل اختي من اتوفت

- اشلونه لا تكول اتوفى

- لا انت درامية بسرعة بجيتي
العار ما يموت

كالها بهزلية بس هو ضايج كعد يمي

- خابرت مرتضى مابيه شي بس رجل صاير بيها تمزق والثانية كسر

-يا الله حبيبي صوفي
الله يكسر رجله السبب ما سجنوه الكلب ابن الكلب

- راح يسون كعده هسة بس يجون اهلي

- لازم اروحله حبيبي

- من يطلع من المستشفى نروح لبيت جده

-شصبرني

- من الظهر ترة هو وهسة كبسوها رجله يمكن هسة طلعو لبيت جده وبطريقهم النا يمنا راح يسوها الكعده

- ليش مو ببيت جده ابو ابوه ليش اهنا

- سألت مرتضى كال ،عدهم هوسة صايرة مال اطفال و يردون اهنا بعيد عن عمه العصبي

- زين امي لا تكول الها خوش

- ميخالف هسة حطي العصير بالبراد خل يبرد

-أسقيهم زقوم وسم وزهري

-اروح ابدل اكعد وياهم

اجه بابا ومرتضى مخبوصين ومحد برد قلبي على صوفي

سمعت مقتدى كال الزلم الغرب طلعو اني رحت للاستقبال وراه من دخل وسد الباب
سمعت قبل لا ادخل تعقيبهم على الكعده
صوت السيد
-عمي ما ردت اكسر كلمتك كدامهم
بس اني ما راضي
ابني منتهي

سمعت كلام محمد لو گلبي نط من مكانه كأن شريان منه انداس
فتحت الباب ودخلت والبجية رافقتني

- اشبيه منتهي

صار هدوء انتبهت لمرتضى اتقدم عليه

مسحت دموعي وعدت سؤالي عليهم بعبث
- وينه صوفي اخذوني اله عفيه

انتبهت من لزمني و شفت زلم ما اعرفهم مو بس بابا ومرتضى والسيد

سمعت همس بابا
- هاي خالته قلقة عليه

حاوطني مرتضى وطلعني ظليت ابجي
ربت على متني واني متحاوطه بايده

-مابيه شي لا اسمعج امج

مسح دمعه من بين الدموع الغزيرة
مني

-مابيه شي صدكي اشوية واخذج اشوفيه
باسني خطافي على جبيني ورجع يم الرجال

شهد- تعالي حبيبتي لا اسوين هيج بنفسج لا تحس عمه بيج

كعدت انتظر واني لابسة وخاتله بغرفتي عن امي لا اشوفني وتحس هي بغرفتها ..

اجتني شهد
-اكلج انت قبل اشوية دخلتي
وشو هسة الا دريت اخوة السيد وابوه بالاستقبال ما رايحين !!
دخلتي هيج عليهم

-ما ادري بيهم حتى سمعت واحد كال تشبه المرحومة عرفتهم اهلة

- اروح البس واروح وياكم

-لا عفية امي منو يمها يبقى

-هم صدوك....

لبست بتول و عبدالله وكعدت انتظر
اجاني مقتدى كال يلا نروح

طلعت و شفتهم يصعدون بسياراتهم الزلم واني صعدت بسيارة مرتضى اني وبابا ومقتدى والجهال ....

مرتضى - لو مخليه معفن بالتوقيف

ابسرعة انطيتو تنازل

جاوبه ابوية وهو يباوع للطريق

- ولد مراهق يضيع مستقبله ويه اهل السوابق ..

- خل يتربى

- ما يتربة يسقط واهله خوش ناس و ابو السيد مثل موقفي يعرفهم جيرانه

-بس السيد ما يريد يتنازل

- ميخالف هسة الغضب ماخذ صوابه

صار وصلتنا وية اذان المغرب لبيت
السادة ..

نزلنا الباب مفتوح وكانه سيارة توها داخله نزل منها السيد و اجانه دخلنا

اني بودي أعكب الي أستقبلونا واختصر المسافة قلبي مشتعل نار على الولد ..

امه الي أستقبلتنا ودخلنا لغرفة صوفي

- صوفي ..

نايم من صوتي فتح وابتسم

كعدت يمه بسته وايدي ظل متوسد على جبينه يتلمس صحته

ابوية ومرتضى ظلو واكفين

- اشلونك جدو حمدلله على السلامة

مرتضى- ابو المشاكل حمد لله على السلامة

هز راسه وكأنه مستحي منهم

استغربت الغرفة نايم مصطفى على سرير نفرين وغرفة اخشاب متزوجين حلوة وجديدة حافظتها عن ظهر قلب وكأنه الحجية قرت نظرات اعيوني المستغربة

- غرفة محمد جابها اهنا هاي الغرفة اله اخذها و اولاده وياه ينامون بيها بس صوفي بالاستقبال كان ينام هسة بعد يحتاج سرير نومه ابوه بيها ..

اتلمست الفرشة واني كاعده عليها وبطرف جفني انرسم قطرة دمعة

طلعت المرة و دخل محمد ورة اشوية

- شفت ابو علي سوالفه التعبانه

احاديث جانبية بسيطة وطلعو الرجال بقيت يم صوفي

- شجاك يا اخي اشرد

- اشرد؟
عيب والله بعدين اني نهيته فصلته تفصل بالكتل بس هو نذل صعد دراجته وركض ورجع عليه غدر

-يا عكيد ابو شهاب اخذوك غدر !
ولك ما سمعت صوت دراجة اخذها ركض و افلت من يكول عظمك يلتئم منا للسنة الدراسية الجاية

-بعد وكت يا دراسة ذاك اليوم استلمت النتيجة
بعدين شنو افلت اني اصلا الي وكفت معاند متحديه

-واتكول غدر !؟

-اي معبالي يسويها صدك
بس اني اعلمه خل اكوم

دخلت عمته من عمر فاطمة سلمت

- شوفي بالله سوالف الولد زين ما مخلص عليه

- اسم الله

-لج عيني من كالو الي خليت زوجي يوديني للمستشفى واشوفه اشلون يردون يحطون جبيرة وهو شايغ يبجي گلبي انمرد عليه

باوعت بنص التفاته اله وابتسامة لئم ظهرت على وجهي

انتظرت عمته تكوم بعد ما طلعت فضايحة وكلت اله

-ها باجي الرجال المتحدي عكيد ابو شهاب طلعت فاحط ابو بدر ههههههه

-ولي زينب

-انجب ولك كول خاله

- ما بجيت بس دمعت عيوني من حركة الوجع

-اها ههههه
تريد اصدكك واجذب عمتك العلوية ولك اتكول يصيح ويبجي بابا الحكني لازم ايد ابوك وتعوي

غمض اعيونه حسيت ضوجته

-يلا يلا لا تبجي علينا مرة ثانية بس هم لو شارد الشردة نص المرجلة

دخل ابوه

اني اتكترت جوة كعدت على زولية حط ايده على جبينه

- هاي حتى يصير الك درس وما تمشي ويه هاي الشلة التعبانه
عندك حرارة

- كلهم جيران بيت جدي ويامن امشي لعد ويه الطلقاني لو الشيرازي !!!

ضربه بخفة على خده بظاهر ايده
- ما كلنا صير متدين بس معتدل مثل خالك مرتضى
هسة لا اصير مثل مقتدى وهو من عمرك وحافظ نص القرآن الكريم
صير مثل خالك مرتضى وريحني هاي كبر وما شفنا منه الي شفناه منك
رجال معتدل ومعدل

ابتسمت متذكرة مرتضى و عركاته ويه نسيبنا الظاهر نسى محمد هو الي كان يدافع عن مرتضى كدام بابا من كشفة يدخن

لمحت لمحة انكسار بمصطفى ممزوجة بتمرد مغلوب على امره
كال
- اريد انام تعبان
ودار وجه عن ابوه

اجوي صديق و تقي ركضو عليه

وعمتهم الكبيرة وياها جايين
ظلو يمي يتمايلون عليه و الي حط راسه على متني
اخت السيد سلمت وكعدت يمي عرفت هي جيران اهلها والاولاد كانو يمها يلعبون ..

كالت-ها بعد اجت خالتكم عفتوني مو بسيطة

ضحكت ضحكه مريحه و امها صاحت الها
اعتقد دا يسون عشة ومكلفين نفسهم
بس ما اعتقد والدي يقبل نظل.....

جابت الي بتول عبود متنحس عدهم ومستغرب
بس حطيته بحظني نام
اجاني قسومي هذا الوحيد الي فاصل فيشة عن العالم ومتألف ببيت جده لان ينطوه تليفون و يكعد بعالمه .
كعد يم اخوه وهم يلعب بتليفونه

تقي- انروح وياكم حبابة

صديق- اي حبابة وما نبسط علاوي

تقي- احب علاوي بس هو وكح يخلينا نزربا
ضحكت وحطيت ايدي على حلكي

-كول نضربة يمعود

-نزربا

هم دخل ابوه بس هالمرة جايب كماده طبية لونها سمائي وفتح قميص صوفي فتح مخترع
- هاا

-ارجع نام
حطها بوسط صدره و دكم قميص
ابنه
- نام نام
كالها بغضب و طلع كمت وحطيت عبود على الارض والجهال بذيالي والي لازم عباتي من خلف عبالهم راح اطلع حتى يروحون وياي خو تقي طب جوة عباتي حتى لا ابوه يشوفه ويطلع وياي بالخفية !

- ابو مصطفى

التفت عليه وهدت ايده يدة الباب

-ها

- ميخالف تسمعني بخصوص الاطفال

صديق-اي اي كولي اله انروح معاكي

ابتسمت لصديق وجريت ايدي منه

اتقدم بخطواته واني اسمع اصوات نسوان بالمطبخ هوسة وهو اشر على الهول دخلت محد بيه غير اطفال بعمر قاسم واكبر واصغر ما معروفين المن
طلعهم للحديقة بأمر واحد كلهم انصراف سريع سو عدا التوم
ظليت واكفه وهو هم

سألت
- اشوكت يرجعون لبيتهم

- بتول ما تبين بس هي متعلقة بيكم

-ما قصدي بتول والرضيع

قصدي انت و الكبار صوفي دوم يكول الي ما مرتاح اهنا
وقاسم هم ما الهم غرف خاصه ولا العابهم الخاصة
همه متعودين على اجواء عائلة متكاملة من اب وام فقط مو اجداد وعمام و همه ما يعرفون المن تابعين كل الاطراف متدخلة بتربيتهم

- الله كريم

كعدت على كرسي الي خلفي من الجهال رادو يوكعوني

- اذكر مرة مرتضى رجع راسه مدمي
دخل للبيت بغياب بابا وكبل للحمام

ولفة ظل نايم ما طلع من غرفته حتى لا بابا يشوفه ...

بس امي كالت لأبوية من رجع

وجان هو نايم من وقت بالليل اذكر كعد يم راسه ظل محني عليه وما شال راسه عنه يبوسة ويشمة

كنت اباوع لتقي الي بحضني واتكلم بتأمل الذكريات الي جاي تنعاد

- الصبح من كعد مرتضى صحته يتريك دخل بابا وراية زفة كدامي لامه اهواي و كسرلة لعبة بيانو صغيرة كان ناسي يضمها عنه

اذكر من طلع مرتضى شكال

-شكال

-كال ياريتك مو ابوية !!

طبعا هي كلمة عابرة بموقف عابر مالها معاني ولا اصحية بس تبقى هي فكرته بفترة مراهقته
هي اصعب مرحلة عانينا بيها من تغيرات شخصيتنا وفرضها على الي حولنا . بس زادت معانتنا ضعف بسبب التعامل الجاحف كأنا مذنبين بمجرد محبتنا لفرض نفسنا وانخراطنا

رفعت نظري لأتاكد بعده يمي لو راح ما اسمع اله رد
ما انتبهت اشوكت كعد السيد مقابيلي
و صديق بحضنه صافنين عليه !

احنيت نظري عنهم لتقي
وكملت مع تحشرج بصوتي مرتبك ..

- صوفي يشبه مرتضى حيل مع هوايات مختلفة طويل و رشيق و يحب الطوبة حيل تعرف احلامه ينضم لنادي

حسيته تذكر من شك الطوبة بالسكين من رجعله قبل ايام صوفي ب١١ بالليل ولازمها سولف الي صوفي واتعمدت بلكي احنن قلبه عليه

- بعدين بابا الا فهم مرتضى بعد ما كبر تركه يختار وخيرة بين هوايته و مستقبلة ... اختار مستقبلة وراح هندسة وترك حلمه بدخولة الفنون الموسيقية
ركنها هواية على رف اوقات الفراغ

-انتِ هم هيج ؟

ما فهمت سؤاله .

رفعت نظري عليه ما فاهمة

- عانيتي بسبب والدج؟

- انت تحب مصطفى ،
بس هو ما يعرف ما يشوف غير التذمر عليه لأنه بمرحلة ما قبل الادارك والنضوج ..

شفته وكف

- اروح يم الجماعة

دخلو اطفال يلعبون و التوم وياهم التمو...

اني هم وكفت وحجيت من وره ضهره

- بعد موت فاطمة صرت افكر واخاف من العمر يروح شخص من ادينا قبل
لا نصحح اله او هو ماخذ فكرة بباله غلط عنه
التفتت بنظرة صدمة و اهنا سمعت صوت والدي من الاستقبال يكول لازم انروح تأخرنا على الحجية ام علي

وهمه رجالهم يأخرون بيه ،تركني وراحله السيد

بس بابا اصر يروح ظال قلق على امي .

،،

كنت اغسل بمفرش المطبخ بالحديقة

ومخليه عبود يمي يلعب وهو يكوم ويطيح على مقعده ..
ومبلل وياي .

دخل مقتدى للبيت

- سمعتي بالخبر

-يا خبر صوفي اتحدى صاحب جارجر هالمرة

- ابن عماد مات

وكعت الصونده مني

-شنو هو عنده ولد ؟

- اي مات
جنت بالساحة وشفتهم شالو بكفن ابيض للسيارة سالت طلع طفل عماد

تذكرت مرة شفت مرته حامل هسة يطلع من عمر علاوي لو اصغر اوووف جاي خيرة مو بيبي

-الى رحمة الله

-شو ضجتي ؟

- ولد طفل مات لا حول ولا قوة الا بالله

-ابن عماد يستاهل

صفنت عليه صادته

-مقتدى !!

خله ودخل واني كملت وغسلت الحديقة واني بالي يم عماد وزهراء وتسألت اذا ظنيت هاي حوبتي تعتبر شماته لولا
بس بابا يكول لا يتكابر الشخص ويظن بالله الظنون و كل ما يصيب الي اذاك مكروه تحسة حقك ياخذ منه لذنب اقترفة بحقك يمكن تهذيب ، مرة كالها لمرتضى.....

،
كعدت الصبح كارهه أحلامي وكفت كدام المغسلة و عصرت غسول وجهي وكع بايدي سال منها من كثرة غرك ايدي حطيته كله على وجهي و فركته بقهر جلفته و رحت انشف واعيوني حمر بالمراية بغرفتي ...قررت اعوف شعري ما امشطة تعاجزت خاصة منفش و شعرات بسبب التساقط طالعات مثل الابر وهو مو سرح، ناعم لكن مفلفل
من غير ما امشطه لميته بقراصة طلعت اسوي ريوك لكيت مرتضى كاعد يتريك و شهد يمه بس تشرب حليب

صبحت عليهم و ظليت كاعده صافنه بوجه تعابيرة مطنكرة ..
مرتضى اخذ سويجه وطلع للدوام و شهد كالت
-ما تتريكين

- حلمت حلم كريه كلش

- خير اللهم اجعله خير

- حلمت بشخص
حلمت بشخص يبوسني !

- منو هذا الشخص بس لا فاطمة الله يرحمها ترة مو زين

- لا شخص حي و كحبيب مو بخدي

-اووباااه منو حبابة كولي ههههههه

- ياااع كرهت الحلم و روحي و كعدت طالعة روحي

- هههههههه خرب منو الله عليج

- ما اكلج شخلصني منج

ظلت تضحك عليه و اني رحت اسوي ريوك لامي لو ما كايلة الها افضل ..

الضحى صعدت شايلة ملابس مقتدى اريد احطها بكنتورة ..
حطيتها و شفت باب شهد مفتوح دخلت

-عفية اذا عرفتو وين راح ظل بالي عليه وين اختفى هيج

-شهودة

شافتني خلصت مكالمة سألتها منو مختفي ياسر البارحه كان يم رقية ؟

شفتها تتهرب مسوية نفسها ممنتبها الي

- شهد خليل الي طالع واهلة ما يعرفون وين صارله اشكد

ظلت ساكته ما عرفت تكذب

- شهد كولي

هزت رأسها باي

- شكد صارله

-يومين

-ياسر ما يعرف

-لا

- لا تخافين ما بيه شي بس هو خبالات باجر تلكيه يخابرج يضحك

-ياريت

زينب

أسفة

- على شنو

-على كلشي

- ما فهمت قصدج

-كله مني الي صار .. هو كان معجب حيل بيج
بس لو ما اني قربتكم مكان صار الي صار وتحول لحب قوي

شافتني سكتت رجعت بررت لنفسها

- ثقي زينب ما كنت اعرف هيج الحياة صعبة والناس ما تنحزر شفت والدج اشلون طيب ومتساهل بالبيت وامج كذلك .... شفتهم ماكو اطيب منهم ظنيت كل صعاب خليل هو طلاق رقية وياسر و من يرجعها ياسر يوافق عمي بالمرة الثانية من خطبج خليل
اصلا ما ادري والله بخليل بمراهقته
او بداية شبابة هيج مسوي لو ادري
ولا احط نفسي بهيج موقع
كنت واثقة اهلج يشوفوه مناسب جدا

-شهد

-بلي

- لا تلومين بنفسج ولا اطلعين تبريرات حتى ترتاحين
لو ما اني عندي ميول بداخلي لأحد يحبني ربع الحب الي شفته بعيونه ما كان حبيته ...
اني تعبانه واريد من يحتويني بحبة حتى اعوض النقص الي تركه غيره بيه ..

- أثنينكم تعانون بسببي

-لو ما ضاغطين عليه بالزواج

-كبر و لخاطر امه المريضة كلنا وكفنا وياها

-يرجع صدكي يرجع خليل مسؤول

اني رايحه ابلش بالغدة تعالي ساعديني ..

اجتنا بيبي وعلى العشا عاتبت والدي لان ما راح لابو عماد من اتوفى ابنهم
اتريد ولدها يرجعون مثل قبل اعتقد قلب ام ما تلام عليه لكن الجرح اكبر من أن يلتئم بوقفة تعزية همه اجو بفاتحه المرحومة لكن معاملتنا الهم كانت كقريب بعيد والدي كذلك اذا شافهم بالشارع يبادر بالسلام اذا التقى بيهم بالاعياد يبادر ويصل رحمه من خلال زيارته لامه لكن ما يروح الهم لبيوتهم الي طلعو منها اشاعات قاتلة على بنته، كالعادة يسمع لأمه من غير ما يجادل ويختم كلامه وياها بالله يهدينا..

جابو النا صوفي هم ضايج من النومه ببيت جده وهم امي اشوفه لهسة ما شايفته وظالة تتحسر عليه من عرفت لليوم وبيبي بعدها يمنا ..

جابه ابو وامه اجت وياهم اسلم على امي وهم جايبة التوم وقاسم وياها واترجعهم وياها

بعد ما امي شبعت شوف من مصطفى طلعتها من غرفتي و وديتها للهول لوين ما كاعده الحجية ام السيد وبيبي

بيبي-روحي يزينب سوي جاي

كمت طايعة اوامرها حطيت ماي على النار وكعدت على الدرج العب بفوني واسمع احاديثهم من غير اهتمام دخلت العب كلاش ويه صوفي و قسومي و مسوين كروب خاص بينا نسولف ..

بيبي - هالاطفال اشلونكم وياهم تثلاث
نسوان راحن بلمح البصر اشلونكم ويه ايتامهم

- زوجنا واحد بقو اثنين منهم

- يعلوية زوجي محمد عنده ست ويلاد
منو الهم

-والله دالح عليه ..

- دور على مرة بس كون بت وادم تخاف الله بيهم

العلوية
- الله وايدج اني هم حذرة خايفه ماكو مرة تحمل اطفال غيرها

-هم صدكتي اذا مو من دمهم ما يرف الها عرج
هاي خالتهم قايمة بالبت والطفل و التوم متعلقين بيها ماكو وحده خاف تحن عليها

انهز كياني و ايدي رجفت وكع تليفوني بحجري من تلميح بيبي والقوري كام يصفر ركضت طفيته ورجعت على الدرج اسمع بيبي شنو تحجي

العلوية
- اذا راحن الامهات دنو الخالات

ارتعدت حواسي مدا تستوعب حديثهم ومدا صراحتها الي وصلتها بيبي الها خلتني انصعق انخطف لوني وغارت اعيوني بالدموع كأن احد طعني حسيت برخص روحي عند اهلي امي تسمع تلميح بيبي و ساكته من المرة حجت واستمرت بالكلام عن مدى حنان الخالة على الاولاد

رحت للمطبخ

خابرت رقية
اريدها محتاجه حيل لمسة اديها لخدودي

- زينب زينب تعالي تعالي
هاي هاي ياسمين بالهول تعالي الي زينب اخاف منها منها !!

معرفت شسوي الها سديت الخط و وصلت يم باب الهول

وكفت يم الباب ما دخلت قاصدة اسمع كلام العلوية

- هو يحجية احنه نريدها لزينب

ياريت تنطوها للسيد ابو مصطفى !

سلام على ما تبقى فينا من ألم
ووجوم على كل الجروح المضطرمة
ووداعا لكل الأشواق التي بلغت نقطة النهاية
نحن يا سمراء لا عشق يأتي بعدنا
ربما نفضي بكارة قلوبنا بالهوى
لكن هناك شيء في ارواحنا لا يفضى لأحد
نحن الذين إذا أحببنا انهمرنا كالأنهار
وإن أمسكنا امسكنا كصخرة
اما النور كله او الظلام جله
لا نقف في منتصف كل شيء
الزمن، الوجود، الكأس، اللون، والحس
نحن لا نرضى بالجمال كله
ولا بالقبح اجمع
بل نحن الإثنين معا
نحن يا والهة
اما كل شيء أو لا

يتبع

.