رواية شيخ الشباب(بنت المؤمن) الفصل الرابع والخمسون 54 - بقلم زهراء العراقيه

السلام عليكم
#بنت_المؤمن
#شيخ_الشباب²
من كتابات زهراء العراقية
بارت ١٩

يوم من الايام كالها الي بديت أحبج ريحني و حسيت بالارتضاء كونه كالها وتوه بدا ما بالغ لسانه بالحب المجمل والكامل، ابتدى وية تعلقي بيه كان اكثر صادق بالنسبة لگلبي هذا شي مرضي اكثر واكثر صراحة
نمت بليلتها برتياح وكدرت اشيل جزء من مخاوفي على جنبي ولو مؤقت
كعدت الصبح دكيت عليه من غير ما باوع للوقت

رد
عليه وكان صوته ناصي و ناعس حيل
-منو
-اني زينب
سكت لحظات الا سأل
-صاير شي ؟

- لا اريد اصبح عليك صباح الخير

- صباح النور

خرب عقلج
تدرين الساعة هسة ب الخمسة ونص
يا غضب توني مصلي ونايم

هزيت اكتافي اتغاضيت عن كلمة غضب ببتسامة مذكرة سوايتي بيه البارحة
- مشكلتك.....منو كالك اخطبني
اي وهسة كولي......من شوكت بديت تحبني.....و شنو الي حببك بيه
اني اعرف خصالي اهواي.....يعني تحتار شنو تحب...بيه....بس اريد اعرف اكثر وحده بيهن شنو؟

جنت احجي و بصوتي لهاث ضحكي عليه الكلام يطلع متقطع مو جرة وحده وهو بس صوت انفاسة اسمعة
-الو ؟!

ماكو رد

صحت
-كااابتن

- يا الله
دااغفة زرفتي اذني
زينب خفة دمج ما اجت الا الفجر

- اي هسة اجت و لازم انت تكعد تنهتز الفرصة قبل لا اغير رأي واقلبها دراما

- اللهم طولك يا بال البارحة ما نمت تدرين من وراج خايف منج

ألمني كلامه حيل من داخلي ابتعلت شبح حزني...
-هههههه  لا يمعود ترة ما انكلب عليك وحش

- خايف اشوفيني وحش مو تنقلبين

- كابتن ماجد  لا تكلبها نكد
ويلا كوم صحصح

- ما اكوم الا اجاوبيني
اشبيج البارحة

- عندي مخاوف لا هم تفشل علاقتنا

- اكلج انت بس مرة وحده انخطبتي و لأسباب أجهلها فسختي قابل اكثر من مرة صايرة وياج  هيج خوف قوي وشك

غيرت الموضوع حسيته يريد يعرف الي ما اكدر ابوحه..

- كوم يلا العب رياضة خفف من كرشك
اريدك بيوم العرس رياضي

سكت للحظة الا جاوب بمرح عاكس لمحة ضجرة ببداية المكالمة
-اييه تردين جسم رياضي بعد روحي
اصيرلج رياضي
اااخ ليش ذكرتيني

صوته اختفت منه اثار النوم و الاحباط
و ردت خدودي نزلت التليفون لا ياربي وين راح باله بعدني استحي من هاي المواضيع

-احم وين راح بالك اقصد

-تقصدين الي تقصديه صار
اجيج بجسم رياضي و نعلب اني وياج شناو
ايييي احجيلي حبيبتي شتحبين  البس الج
اييي  احجي لا تخجليني هذا حقج

- احب القاط الي كلاسك اسود وحطلي وردة بيضة

- قاط شنو يابة
بس هم ميخالف اجيب اسود
بس قصدي مو القاط خليج بالاهم
ملابسي الداخلية شنو برأيج البس الج
بليلة عرسنا!

انخطف الساني مني وكمت ارجف ضحك و عاصرة حلكي بيدي

- م مستفز انت.

-كولي مرتي كولي

- هههه كافي عاد

- حبيبي كووولي

تعلب بيه بسيطة اني الك

-احب اللون الاسود و انت حنطاوي فاتح يطلع عليك حلو

-هم رجعنا للقاط

- لا يا قاط اقصد الشورت
كلتها واني رافعه حاجبي اصرار اردها اله بس حيل خجلت من كملت

نزلت التلفيون ومتت ضحك على روحي ..

رجعته

لكيته يقلد صوت معلق رياضي يكلك صدك معلق

-وهكذا الهدف بالدقيقة التسعين يا الله ما هذا يا جمالك مين بكمالك يا راجل

-هههههه هاي شنو انكلبت معلق
تراك كابتن ماجد

- زينب

- نعم

-اريد اجيج هسة يصير وشوفج شلابس

-لا عادي صور هههه

اشوية واتحول الاتصال كامرة
ياااا عزة
اجاني طلب فيديو منه
رفضته

-وين ما صدكت انت

- ردي  لو خفتي مني
هممم ترة ما اكل اني بس اشوفج

يضحك عليه ويستفز بيه حتى افتح وظل يسوي جبانه وجبانه
واني مشهورة بندفاعي

-لا مو جبانه مخايفه ولا خجلانه منك
بس خايفة عليك

- هههههه سولفيها للدب

- ممممم خايفة عليك لا تفقد اعصابك
اني لابسة بس منامة

سكت ماكو منه رد للحظة
بصوت شرس مخيف حوله
- شلون لونه

انوب ضحك ضحك قوي ضحكت على حسة

- تعال شيخ محمد شوف اخوك وين نزل للحضيض يسأل شلابسة
ظل يضحك على نفسة
- لا تعذبيني افتحي الكاميرا

-ماااا يعني ماااا خليها مفاجأة منا للعرس

-لو تلبسين الي الف ثوب نوم بعد العرس ما يروي فضولي بهاي اللحظة
افتحي لا اجيكم للبيت

بالكوة كاتمه ضحكتي واني اباوع لروحي ، لابسة ثوب فانيلة وردي كالب لونه و بربع ردن ارتاح بيه

- نو
لونها اسود كولت الك احب الاسود و قصيرة

حول الاتصال  كاميرا

رفضته و سديت الاتصال كله
ورسلت اله
"ارجع نام ماجد

رسلي كلام عيب ظليت صافنه على جرأته يتوعد بيه بيوم العرس، لان صحيته من نومه و تركته

اخر رسالة
-اليوم اصيدج

،،

طالعة من الخلفية وكلي ريحة سمج
افرك بأيدي الخدر اشتغل بيها ..
حطيت بلم السمك .( سمك صغير""زوري "حرش") على الطباخ وغطيته

رحت لتليفوني ادور رسالة منه ما لكيت ..
تغديت ونمت تعبانه اقل شغلة ترهقني مو مثل قبل اشتغل بنشاط ...

بنص نومي صحاني واحد يبوس بيه فزيت لكيته تقي

-اني اجيت

-حبيبي يروحي
جريته طرحته يمي وظليت ابوس بيه
دخلو الي صديق و  بتول

كالو بابا وعمو اجو ويانه

ركضت للحمام اسبح كلي عطر السمج
كملت سبح و طلعت لكيته راسلي

-وينج؟

-جنت بالحمام اشوية واطلع الك

- متاني

دخلت لكيت محمد و ابوي كاعدين يسولفون بموضوع ديني و ماجد يقلب بتليفونه و واضح مو يمهم باله

-السلام عليكم ...
وكفلي السيد
كعدت يم بابا مخبثة

اشوية وكمت اسوي الهم جاي
دخلته الهم وطلعت .

اجه قاسم
-عمو ماجد يصيحج
طلعت ..

كال لأبوية من رخصتك عمي عادي احجي ويه زينب ..

كعدنا يمهم بس ابصف بعض واني منحرجة حيل منهم
كنا نتهامس لا يسمعونا
- شنو هذا الاحراج يربي ماجد شتريد تكول

- اريد ابوسج

فتحت اعيوني على وسعهن و صديته
بنظرات  نارية

- اي يعني قابل شنسوي غير موضوع مهم عندي ليش الانحراج هذا ياما كعدتي بحظنه لمحمد  والثاني ابوج

درت وجهي عنه ومبوزة واني واباوع لابوية و السيد محمد وصارت عيني بالصدفة بعينه دنكت مستحية

-بعدني استحي من اخوك

- عوفج منهم كلت الهم اريد اسولف وياج و كعدوني يمهم

همس بصوت بعد اوطى وهو حاط ايده على حلكة  خوفا منهم يسمعون

- ما يدري ابوج اني انتهازي و استلمت هاي الشفايف الحلوات بصحوتج من مرضج من كانو يسمحون الي ادخل للغرفة بحجة انت طريحة

-كافي عاد  هياتني ما خليتك بعدها

-على اساس اني طلبت واني رفضتي ترة كلشي يسري بمزاجي اني ...

رفعت حاجبي اله

- جذبت الصراحة هو مزاجي بس على مزاجج

ابتسمت وغطيت حلكي واني اهتز

- لا اضحكين هاي الحقيقة عفتج على مزاجج بمزاجي
احسج متخوفة لا خطوبتنا ما تكمل للزواج 

التفتت عليه بدهشة

هزلي راسه
- اي حاس بيج
بس هلمرة اجيت لأن اني الي متخوف

همست بتردد
-منو شنو؟

-منج
اشرلي و بسرعة حك راسه بحركة واضح هو حاليا متردد و متوتر
حسيت عليه

-شتريد تكولي ماجد ؟

-مكالمة البارحة ثارت عندي اهواي امور  بالسابق غضيت طرف عنها

- وضح اكثر

- زينب انهيارج شنو سببة

اني لحد لأن ما فاهمج
انت مرضج هذا سببه شنو ؟
ليش بفترة خطوبتنا
ليش من يقرب زواجنا يصير بيج هيج

-شنو يصير بيه

لاحظت والدي كام بقى بس السيد و مدنك على تليفونه ..

رجعت اباوع لماجد الي يحجي

- مرضج هذا
لأن فكرة الزواج اتعبج ؟
انت مراجعة طبيب نفسي ؟
لو

-انت تظن اني مريضة نفسية

رد ماجد لا تسكت

- بالفترة السابقة اي

- وليش بقيت  لعد؟

-اهدي

حسيت نفسي انفعلت و السيد
انتبه النا و كام طلع

- اشبيج عليتي صوتج

-ما صيحت صوتي طلع  عادي  من
كلامك مكدرت اتاهمس ما اشوفه جارح
انت ما تؤمن بيه مسحورة
تظني اني مريضة نفسيا؟

شفته ساكت وباوعت اله يباوع الي ومنتكأ على القنفة ويحك بذقنه
و كأن يتفرج على شي شاك بيه ودا يتحقق منه

-ليش هيج تباوع الي ؟

رد
ليش سكتت؟

اذا اني هيج
يعني بنظرك مريضة نفسيا ليش تورط نفسك وياي ؟
ليش ما انسحبت ؟
شنو جابرك عليه ؟

رد ماجد
بطل تباوع الي بهاي الطريقة

- ما ادري احاول اكمل بس انت ما تنطيني مجال

اشوفج تعبانه
تحتاجين وقت للعلاج
او للراحة الدائمة من محاولة الارتباط ؟
والدج و حتى اخوية
رفضو يسمعون منا  و ياخذوج لطبيب نفسي

- رفضو يسمعون منكم
انتم منو ؟

-اني واخوج

-اخوية!!

اني
اني زينة ؟
ارتاح على البرنامج الي اسوه ابوية واخوك !
الرقية صارت تريحني بعد ما كانت تعذبني بسبب العمل
اني ما كنت هيج من قبل حتى فجأة اتمرض واتخبل
كلامك مو صحيح
لو مريضة نفسيا ما كان اطيب

كنت اتكلم بدفاع عن نفسي بطريقة اعتقد حادة

- ما اعتقد
والدليل البارحة
رديت بانفعال اقوى واني اكوم اوكف
- خرة بالبارحه صوجي اني خابرتك

لزمت صدري شاعرة بضيق

حطيت ادي على حلكي مستنفرة اللفظ الي طلع مني

هو ظل ساكت زادني رعب

دخل بابا سأل عن السيد

جاوبه  السيد محمد كال اني اهنا بالاستقبال راحله ابوية واني طلعت
،،

صاحلي مقتدى اطلع اودعهم راح يرحون قرابة المغرب..

بوست الجهال وراحو يتراكضون لسيارة عمهم و عمهم وابوهم واكفين ويه بابا ومقتدى
عافهم ماجد واجه يمي اني واكفه يم باب الممر

- اشلون صرتي

فتحت اعيوني على وسعهن

- بطل تعاملني بهاي الطريقة اني مو مريضة نفسيا

- ما كلت هيج اني

-كلتها قبل اشوية

التفت هو على ابوية و السيد كان يضحك

كانهم يباوعون علينا ومنتبهين ..
سمعت السيد يكول
-هاي بعدهم وهيج
استلم عمي

يضحكون  علينا لأن احجي واشر عليه منفعلة منتبهين علينا ، هو راح و هو يضحك الهم مجامل

قل واهسي بجهازي حيل
كملت رصة الملابس بالجنط اقصد الملابس الجديدة طلعتها من الاكياس وبعلاماتها خليتها ..
كمت للميز اجيب منه صندوك احطه وياهن ، لمحت نفسي بالمراية واتذكرت شعري، كان ببالي اراويه التغيير
وهنت ملامحي من تذكرت مشاكلي اكبر من ان افرح احس هذا الزواج مراح يتم مثله مثل غيره و هاي بدت العلامات بالظهور من قبل اليوم صارحني و طلعت بنظرة مريضة نفسيا
اااه
رجعت للجنط احط شكو شي جديد مشتريته حتى بس ابث بروحي الاطمئنان واثبت روحي واكول وصلت للنهاية مراح تخرب ..

رسلي مرتضى رسالة
-بيج حيل تحمين العشا ؟

طلعت ادورة
صعدت اله الظاهر توه اجه من برة

دخلت لغرفته لكيته دا يكمل تبديل

-زنوبة عشا جوعان

- ميخالف

شافني ظليت واكفه ما تحركت

-ها زوز؟

- انت كايل لماجد اني لازم اراجع طبيب نفسي

بستغراب رد عليه بسؤال
-هو كال الج هيج؟

- لا مو هيج كال بس المضمون هيج فهمته
وهو هم مأيدك

انطرح على سريره

- زينب  هاي من جنتي تعبانه حيل جنت بس اريد اريحج من شفت كل الي يسويه ابوج كلام خلف السيد محمد
خفت لا نخسرج بسبب الرقية وما ادري ايش
اقترحت طبيب نفسي وابوج ما قبل

بس الحمدلله رجعتي وذاك الهم كله راح

- مرتضى انتم غلطتو من خليتو ماجد يشهد مرضي

- لا  ما كان بيدنا اخوه كان يجيبه ما يدخل للغرفة الا وهو وياه

يعني حتى لو ما شايفك هو اخوه الي شارك بعلاجج

- هم صدك
مرتضى انت هسة يعني تكول علاجج
يعني امنت بالسحر  مو مريضة

-من بديتي تتعافين بديت اقتنع
يعني.....المهم هسة طيبة مو مهم اقتناعاتي

طلعت من غرفة مرتضى وأني  افكر بغلطة اتصالي و بكائي كدامه هسة اشلون اريح باله ظال يظني بعدني تعبانه ..

منها لله السبب خلتني هيج اتعب من يقترب زواجي شسويت الهم شي هيج يستحق هاي القسوة
مرت لا حساب ولا عقاب ماعندي دليل
واكل الحق  الباطل كالمعتاد
امي بس تتحسب عليهم لعل الله بيوم ياخذ حقنا منهم بالدنيا قبل الأخرة.
_________
بعد يوم

اتصل بيه ماجد ،الصبحية

- هلاوي
- صباح الخير

-صباح الخيرات

- امج خابرتني اجي هسة
لبيتكم

-اي كالت راح اخليه يجي حتى تحجون سوة

- زينب

- تعال انتظرك
ابوية ومرتضى ماكو
بس مقتدى عنده درس  الظهر وهم اسمه رجل بالبيت

-اخذ زمنية واجيكم ساعة...

انتظرت جيته رحت جهزت عبودي وغيرت اله

وكعدت بغرفة امي انتظر دكة  الجرس ..

طلع للباب مقتدى ودخلة للهول وصعد لغرفته اني ما طلعت خليت امي تطلع اله ورحت طلعت عصير وماي  الا طلعت اله

شفته باوع الي بنظرة جانبية ورجع لامي ..
امي طلعت وتركتنا لوحدنا

- حلو لون شعرج

-ما صابغته

-ما اعرف بس متغير حلو

- شكرا
ما شربت عصيرك

-ما اشتهي عصير توني ماكل مثرودة باگلة ودهن

- ايبووه
من الصبح

-يا صبح بالتسعة الا تريكت تأخرت اصلا اليوم

-ههه

-اي زينب
بعد بس اسبوعين على زواجنا

-بعد ستة اشهر خطبة اربعة منها ما فهمت منها شي اهه واثنين طلعت انت بيهن ماكلك الندم وتريد تنسحب وما تعرف اشلون وما ادري اشلون مرت واشبيها

اتغاضة عن اتهامي اله بالانسحاب
-أشبيها؟

-انت تعرف اشبيها واشلون قضيناها يوم زينين و ايام ننجاهل بعض

- اي شنو تردين تحجين وياي

-امي شافت حالنا مايل كالت اصلحو قبل الزواج

- واشلون نصلحة .

-ما اعرف

لكيته كعد يمي ،ابعد كذلتي عن خدي ولزم ذيل شعري من خلف
وغاصت اصابعة بين خصلات شعري .
وهو يباوع لخدي ..

- باسني من خدي

- عطرج يجذب ...
وريحة شعرج تفتح الانفس

انتبهت عليه دا يشم بشعري

- ما ماجد لا احد يدخل

-محد يدخل همه تركونا و صاحتلي امج بطلعة ابوج حتى نصفي امورنا وناخذ راحتنا

زينب ما اتقرب اكثر لا تخافين ..

هد شعري وابتعد عني شبر

- هاي ابتعدت
اصلا اني معدتي  هاجت عليه مدري ليش عندي جالي

وفرك معدته

- ليش ابتعدت ؟

-ما اريد ازعجج
اسبوعين ويمي

-اوك
سلامتك

- هاي مواضيعنا ؟
هيج باردة ..

- ماكو جديد

- لعد اروح لا تأخر

كالها وبقى كاعد يباوع الي بنفس الطريقة الي كرهتها

- اي اي صحيح خفت من الزواج
بس هاي هسة من قرب....مالها علاقة بالحالة الي مريت بيها.....بليلتها جنت  اريد منك شي خيط امان الزم بيه ولكيته بوقتها واتصلت بيك بعدها الصبح و حاولت افهمك اني متمسكة بيك و مخاوفي ماتت
بس انت بجيتك بعدها العصر...وكلامك

همست منصية صوتي
-خيب ظني و تعبتني بزيادة

- اسف

كمت من مكاني كعدت يمه
لكيته تنحى اشوية و سوالي مجال اكبر موسع بينا

اتقربت و اتوجهت انظاري لحظني وبيأس أستنجدته
- هاي هي ماجد انسى
حباب انسى الي مريت بيه وابدي وياي من جديد اعتبر خطوبتنا من اليوم بدأت
شتريد تعرف عني أكولك وانت هم

- حتى لو كان سؤال حساس بس نايم بالي  ما ينزاح

- أسأل

-ابن عمج شنو الي صار وفسختو وشنو سبب خلاف ابوج مع الاعمام

- سببه فسخ خطوبتنا
ماجد اني اجبن من ان اسولفه الك وجه لوجه
خليه اتصال

- متفأل بهذا التجاوب

-ظلك متفأل ولا تجرحني بعد
اهواي انجرحت بحياتي

خليك فاهم شي لو لا قوة ايماني و قوة شخصيتي مكان طبت من الي صارلي وهذا كلام اخوك الا اذا كان مكنت تأمن بأخوك

سكت

ابتسمت اله بعيونه ندم والتأنيب مرسوم رسم على تعابير وجه
ظليتني مبتسمة لمشاعرنا الي اختطلت سوة قبل لا اوجهنا تنطبگ وقبل لا تأخذنا سكرة الاقتراب بوادي من اندماج غريب كسرت الظلام وفتحت اعيوني لكيته هو هن مغمض و ياخذ شفايفي برقة عذبة و كأنه دا يتلذذ غمضت ذبلانه ما فتحت الا لأخذ نفسي
وهو هم سحب انفاسه و ابعد وجه عني وراح رجع كعد بمكانه الاول و فتح بطل العصير و صب بالكلاص و شربه دفعتين
ظليت منحنيه ..
حسيته رجع يمي و اخذ راسي لصدرة
و طبگ راسي عليه  مثل وشم حار
طبعة

- اسف حبيبتي.....ما قصدت اجرحج
بس خفت لا اخذلج.....والله خوفي عليج اكبر لا اكدر اسعدج....واشوفج تعبانه مو مال احملج فوق طاقتج زينب.....زينب

رفع راسي و حظن اخدودي بكفوفه و وجه كدام وجهي وهو يكول بلوعة

-جنت خايف من نفسي لا اذيج واكسرلج خاطرج بأكثر وقت محتاجتني بيه

خايف عليج مني  لا يصير الزواج وما اكدر اتحمل

- اوعدك راح اخليك تتحملني

لكيت نفسي رجعت راسي على صدرة
وهو  سحب القراصة من شعرة وفردة
و اتوغلت بوساته وتنعثر بشعري بطريقة هادئة..

-من اليوم اطالبج بحقوقي

ما رديت عليه ..

-ماكو كابتن هاي
تتبدل بحبيبي
او غيرها من المرادفات

ضربني على ظهري

-اه
-كولي حاضر حبيبي وخليه البساط احمدي

-حاضر.....كاب.. اي

ضربني مرة لخ على ظهري

وخرت عنه

- وشلت شعري عن وجهي

- حبيبي
بس كسرت ضهري

- يلا رايح اخرتيني

وكف كان ينزل بقمصة واني بعدني كاعده خلفه اعدل بشعري القصير..
لزمت ايده الي كانت تنزل بقمصة و احتل كفي ايده
وكمت وصرت خلفه ما بينا مسافة .

- بديت اتعلق بيك
سيد لا تفكر بيوم تكسرني......انتهى
وقت الانسحاب وماكو شروط ولا تفاوض بعد العقد

التفت بس وجهه عليه

- هذا كلامي!

هزيت بوجهي بنعم ..
التفت كله عليه  و تقابلت قلوبنا من خلف صدرونا و لامس كفة وجهي يتحسس قوة مشاعري

- احاول وانت هم حاولي

باسني قرب اذني و ظل لازم ايدي لحد ما طلعنا للحديقة لباب البيت هدت ايدي ايده وراح

خلصت صلاة المغرب  ودكات گلبي ترعد بطريقة ترعبني  والرهبة محتلة داخلي، طلعت ادور على امي ،اخوتي وابوية بالجامع يصلون
شفتها ،بالهول اصلي وهي كاعدة على كرسيها
انتظرتها تكمل...
ورحت جثيت على ركبي وشكيت الها

- ماما عفية شسوي حيل خايفة

- يمة استعوذي من الشيطان الرجيم
رجلج مو غريب عليج
ليش الخوف

-ما ادري

-اذا اشوفين نفسج حيل متخوفه منه كولي اله وهو ابن ناس ويخاف الله بيج يأجل الموضوع لغير ليلة

- ما ادري يمة صارلي تلاث ايام ما اكدر انام بعد بس يومين على زواجي واني مرتعبة حيل حيل والله

مدري اشبيه

- لا تخافين يمة صيري واقعية شصير يعني زواجج  هذا  راح يتم حالج
حال البنات وانت مو جبانة
يتقرب  بالمعروف الرجال
سابقة الة المعرفة مو ولد صغير، و متورج على طباعج راح يراعيج
باجر يجن خالاتج لا تبينين لأحد هاي السوالف واتغاضي عنها حتى تنسيها

كمت ابجي
- يمة اكو شغلة ضميتها عليكم

- اسم الله خوفتيني يمة

- ماما
اني اني......احلم بماجد....صارلي.....اسبوع يجيني بشكال تخوف....يتقرب الي و....
صارلي ايام....بثلاث ايام النوم ما مستلذة بيه انام بنص عين مفتحه بسبب الكوابيس او الشغلات الي احسها بيها.......يمه اول ما احط راسي على الفراش احس الباب تنفتح وماجد يباوع الي بطريقة تخوف لو احس تليفوني يدك وهو ما يدك
ماما اني احس نفسي دا اتراجع وترجع الي الحالة

من خلصت كلامي الا انتبهت لأمي دموعها متسرسبة وتباوع الي بخوف و حزن

- يمة!

-الله لا يوفقهن الله لا ينطيهن العافية
دمرن البنية
يا الله شنسوي الج اكثر بعد

ظلت تبجي وتكول

-عبالي طبتي ليش من يگرب عرسج هيج تنتكسين يمة

هاي اني شسويت بأمي ريتني ما كلت الها بس خفت حيل خفت لا كلش اصير  بيوم عرسي ردت احد يشيل عني ويساعدني لان ما اكدر اكول  حرف لماجد يلزمها عليه  ويظن حالتي مرضية نفسية وخاف يجرحني مثل من اتصلت بيه بالليل  من نهدها تعلمت الزوج مو كلشي ينكال اله....

ظليت ابوس بيدها و اكول  الها مو لهاي الدرجة مجرد كوابيس لا تخافين يمة لا تخافين مابيه شي

ورحت اسوي عشا واتختطف من يمها واضحك حتى تنسى
الى ان انشغلت بالقلي حسيت الباب انطبك يمكن اجوي بابا و الولد .
التهيت اقلي الى ان انفتح الباب من جديد وسمعت صوت ابوية ومقتدى

دخل مقتدى للمطبخ

- هاج زينب هذا صاج كليه الي

- شنو توكم اجيتو

-اي

سمعت بابا يصيح الي رحت للهول
-ها بابا

-وين امج بالتواليت لو بالحمام ؟

- ها ؟

- مدري
ما تدخل ما تكدر تكعد الا اني اساعدها
وبالحمام سبحتها الصبح  هم شسوي وحدها؟
خاف بالغرفة راحت

- ماهي

مقتدى اجه وكف يمنا وهو يسأل
-لعد وين راحت

عفت بابا طلع للاستقبال واني لغرفتي ماكو امي تذكرت الباب الي عبالي واحد منهم اجه وفتحها. خاف هي طلعت!

سالت عن مرتضى اشوكت اجه كالو ويانه سولفت الهم الباب انفتح قبل لا يجون وعبالي همه...

البيت فارغ من امي احس گلبي اشتعل نار عليها

رحت لغرفتي ودكيت عليها ما ترد
دخل بابا وبيده تليفونها

-هذا جهازها عايفته بالغرفة
بوية شنو صار بغيابنا
امج عبايتها ماهية؟

-هااا شنو يعني طالعة ؟
وين تطلع وحدها؟

- شنو اخر شي صار ما صا، ودار كلام بينكم؟ ما عرفتي بشنو جانت تفكر

-هااا
يمكن يمكن راحت لبيت عمي ابو كرار

-ابو كرار

-اي

همست

-كله مني....سولفت الها على كوابيس و اشياء تخوف رجعت تجيني

-لا حول ولا قوة الا بالله

-هي ظلت تتحسبن عليهم
خاف راحت الهم بابا الحكها لا يسون بيها شي حباب  ،صارلها اهواي من طلعت فوك الربع ساعة

طلع بابا وصاح لمرتضى نزل وطلعو بس مقتدى ما خلاه بابا يعوفني وحدي.....

دخلت علينا امي بكرسيها على الشحن

-ماما وين جنتي ؟

مقتدى كعد على ركبه كدامها

-يمة وين طلعتي وحدج؟

سألتها
-جنتي ببيت عمي؟

-يا عمج ؟
لا

ركضت جريت تليفوني خابرت بابا يرجع

ظلينا نسالها وما اجاوب اتكول عندي شغلة سويتها...

دخل علينا بابا و كان مسرع مرتضى وراه

-وين جنتي

مرتضى لزم متن ابوية
-بوية اعصابك

-وين جنتي ؟؟؟

جاوبته
-  اشبيك نار
ودارت كرسيها تريد تطلع ..
ابوية وراها وكف الكرسي

-وين جنتي طالعة والدنيا تليل
رحتي المن احجي

باوعت الي وكالت
-جنت جنت
اريد اروح لام كرار
لنص الطريق و تراجعت ورجعت للبيت

مرتضى-بوية يالله مصار شي

-لو رايحه لبيت عمك كان شفناها وهي راجعة وصلنا لبيتهم ورجعنا وما شفناها طالعه

-رجعت من الشارع الرئيسي
واجيت مناك طريق الساحة طسات ما يتحملها الكرسي...

- هيج نسرين اطلعين لا اذن لا كأن اكو زلم وراج وحدج من راسج تتصرفين

-ساعة شيطان يا رجال

عافته وراحت ...

مرتضى يهدي بابوية الي صاير اعصاب

- لا ما رايحه لبيت عمك

مرتضى-بوية مو كالت طالعه  للشارع الرئيسي

-لا اعرف امك من اجذ....
ما كمل كلامه وعافنه وراح الها

وبس ركعة الباب سمعناها مرتضى امرني اكمل عشا ..

رحت رجعت فتحت النار على البتيته واني اقلب بيها دخل مرتضى وفتح الثلاجة
- من اشوكت رجعت الج هاي الشغلات

طلع خيار و لهانه ،ووكف يغسلهم

-من بدا يقرب يوم عرسي..

-لو كايلة الي او لابوج

-اي غلطت

كعد كدامي يثرم زلاطة

-  ما بيج شي لا تخليها ببالج مخاوف عروس

-هيج اشوف

- ما ادري انت زينة
جاي اشوفج ..

حطيت صينية العشا وكعدنا ثلاثتنا ورابعنا عبودي ننتظر امي وابوية .

دخل بابا وكعد يمي شايل عبودي لحظنه و كال روحي حطي لامج على الميز صينيتها

اني محضرتها بس اخاف ادخل عليهم جنت .
رحت حطيتها الها و عفتها تسمي تاكل .
رجعت مديت راسي اباوع الها صرفنت ردنها وبايد وحده تاكل الثانية صعبة التحريك ولا كأن صاير شي
-ماما خو بابا ما زعلان عليج

-معليج بيه يصفى وحده

-ماما
انت ليش طلعتي

-بعدين اكلج روحي اكلي

رحت تعشيت وعزلت المطبخ

و دخلت للحمام اغسل ملابس.

خلصت ملابس بابا الهن الافضليه وحدهن اغسلهن
حطيت ثوبي

مممم وين اتكي ؟

شنو اني ما حطيته للغسل

رحت لغرفتي دورته ماكو
اني العصر سبحت وذبيت كل ملابسي للغسل ..
اووف وين راح هذا

،
صار الليل وكالعادة اخابر ماجد بس اليوم  ما رد وين لوين الا رد عليه برسالة مختصرة
-اعذريني ما رديت اكو امور صارت

ظل عقلي يدك اخماس بسداس
ياربي هذا مفعول السحر اي اي
هاي مراح يتم الزواج الله الي يعلم شنو دا يصير ويه ماجد يمكن السحر ضرب ضربته القوية وخله ماجد فد نوب ينفر مني

▪︎ماجد

لكيت الباب مفتوح ما دكيت الجرس

وصلت لباب الصالة وكلت

-يا الله

مصطفى
قاسم

اجاني صوت محمد
-ادخل ماجد ..

دخلت وشفته كاعد على الكرسي و وجه يغوص بالتعب

-خير محمد
ليش خابرتني اجيك بسرعة صاير شي للولد

-اريدك توصل المرة لأهلها

- ليش يعني ما توصلها انت

-وديها ماجد تعبتني حيل

كعدت مقابلية شفت الموضوع مو خالي

-محمد مو شغلة زيارة مو ؟.

-لا مو زيارة لأهلها وديها الهم الى ان تعرف اني أب مو جلاد

- الاطفال السبب
فهمت
بس ليش المرة اشوفها مو سيئة لهاي الدرجة

- وديها هسة ما اتحمل الكلام ...

تركني ورجع و هي خلفة كاملة للطلعة .

- اتفضلي خوية
اشرت الها وطلعت كدامي .
كعدت بالسيارة و اخذتها
بالطريق

-علوية شصاير.....ليش محمد هيج تعبان وليش الزعل خلي مشاكلكم داخل بيتكم

ردت عليه بصوت باكي

-والله ما اريد اروح هو حلف اروح لهلي

استغربت بعمرها ما طالعة من محمد هيج سالفة اني شاهد حياته الزوجية السابقة وبالاخص قبل لا يطلع من اهلي من كنا نفس البيت واحس يصير زعل بينهم يظل يمي كاعد ما يروح للغرفة بس مرته ما يطلعها خارج بيته

ما سالتها اكثر ولا ردتها تحجي بعد لان صوتها باكي يجذب الانتباه خاف تنهار

نزلت لبيت اهلها ورجعت اني لبيت محمد ..شفت مكالمة من زنوبتي .
حبيبتي شافتني ما اتصلت هي بادرت .
بس هسة اريد اعرف شنو قضية محمد و مرته واحاول احلها...و رسلت الها رسالة
،

دخلت لكيت مصطفى واخوانه كاعدين بالهول يلعبون بلي

-مصطفى شصار

كعدت يمه واخذت اليدة من قاسم

-هذا كله من صديق

-شو تضحك لعد

مصطفى-احسن يمعود خلصنا منها

-شصار مصطفى من غير كلام زايد

-سبت امي

- اشلون

قاسم-اي واني كلت لابوية عليها دخل   لغرفتهم و طلع خابرك تجي تاخذها مندري شصار.....

-ليش سبت امك؟

قاسم
-عمي لا تخسرني
حباب انطيني العب ما تكدر لمصطفى

-اسكت انت اريد اسمع من اخوك
وانت الثاني احجي شصار بينكم وبين مرت ابوكم

مصطفى-انت كلتها مرت ابونا
بس يلا اصيح على بتول ما تقرا
ما تكعد تقري مثل امي
و صديق وتقي كسرو البيت تكسر ماتكدر عليهم بس تتشكى منهم لأبوية
واني مكابلة وياي لأن ما اغسل جواريبي

ضحك

-ولان ارادد ههههههه

-وتضحك  مفتخر !

مصطفى- والله اني هالمرة معلية... بس هي ضربت تقي وما دخلت بس ادخل اطلع اني مو زين  وما خليها تربيهم
عفتها تضربهم بس صديق جاب النعال وضربها على ظهرها وهي تضرب تقي
كفرها ههههه

قاسم - وبتول الشفية كملت تكللها امنا ما تضربنا  وخالة مرتجى عصبية خلت وسبت امي

مصطفى-جانت حيل عصبية طلعت منها مو بقصد بس هذا قاسم ما يكعد راح وسولف لابوية من اجه و تقي ما قصر شوفه ايده بيها زراك صاير
وانطردت مرتجى اعتقد هم صار بينهم شي بالغرفة و دزها بابا مدري هي هجت منا

يضحكون  و كأن يوم عيد ولا كأن شخص ألفيه عايش كان وياهم ليش هيج ما اعرف بسبب منو
هي او الاب الي نفسه ما احسه الفها حتى يحبب اطفاله بيها ،

بيومها نمت يمهم ابوهم ما شفت الوقت مناسب للكلام وياه
،
كعدت وشفت مكالمات اهواي من امي وخواتي اني مخلي جهازي صامت ..
اتصلت بيها
وسمعت صوت هلاهل

-يمة انسطرت

-كوم يمة كوم يالعريس
بعد بس يوم على زواجك كوم خلص امورك
،

تذكرت عروسي اخابرها ...

ما ردت عليه ...

رحت شفت محمد مسوي ريوك لأطفاله ..
تريكت وطلعت حجزت مقعد للحلاقة
العصر
اني عازم الأصدقاء  المقربون للزفة ...
خابرت من جديد زينب ما ردت ..

رسلت
- زنوبة وينج ..

عفت  سيارتي تنغسل وتتزين ورجعت بتكسي اجيب قاطي من المكواة .
رجعت لبيتي اني منطي المفاتيح لأمي لكيتهم بيهم ينظفون ...

امي كالت
- يمة خالات العروس على جية يرتبن ملابس مرتك
وين مفتاح غرفتك  خليه يمي
انطيته الها
وطلعت اكمل كم شغلة بنفسي .

▪︎زينب

-شنو ماما اشلون هيج اسوين
اذا عرف بابا مصيبة

-ما نكلة
بس ما اظل وراه
يمة شوفلي حالتج هذا وجه عروس ؟

اوف كله مني لو ما مسولفة الها
طلعت من غرفتها و الخوف تمكن مني
مودية اثر مني لوحده ام خيرة وفال
تعرفها سابقا من خالتي صفية .بالشارع الي ورانة
مودية الها اثري تبيته وتكشف عليه  من خلالة وتعرف عود اشبيه

الصبح بين الكاعده والنايمة اسمع يبو يبو

فتحت وانفزعت ويه فتحته الباب

خالتي صفية
تهلهل مو اصيح
وبناتها وراها يهلهلن وياها

حطيت ايدي على صدري بتها كالت
-يمة خرعتن البنية من الصبح

كومني  وتريكت  و اجن خالاتي البقية واحتلال كامل لبيتنا للضحى اجني رقية و حمواتها كوثر وشهد .
بس شهد فرشت بالاسقبال ومطروحه
اني حاجزتلي عمتي ام ماجد يم صالون حسب معرفة بتها اسمها اخلاص ام غسان

واني مكملة صبغ شعر و السوالف البقية من صالون من معرفة شهد ..

بيوم العرس كعدت وهم على صوت هلاهل بس خلاص ما بيه حيل  مهدوده و مثل اللعبة شيكولون خالاتي اسوي  وبس اصفن واحس الروح جاي تطلع مني مو عرس فاتحة ليش هذا الإحساس  ما ادري

للضحى اخذوني للصالون

شعري اشقر رمادي  ميش وعليه صبغ وبعدين تخصيل هو حلو بس خلف الكواليس متعب و حاليا حاطة اكستيشن  وكانت تسريحة شعري من اختياري .  فرك ببداية شعري و يتربعها تاج فخم و كعكة كبيرة تتوسط راسي اكيد محشوة خصلات.  
اخر لمسة تكتمل بيها أطلاتي هي من لبست الفستان والكعب وطلعت من غرفة التبديل و بدت زبونات الصالون والعاملات بالالتفاف الي وسط هلاهل عمتي ام ماجد الي رافقتني مع خالتي للصالون
اتقدمت للمراية اشوف نفسي .
فستاني كان ناصع البياض باكمام طويلة حاصرة ايدي كيبور مبطن بالقماش الكرستالي الناعم . و هادل من جهة المتن عاري وظاهر نهر الصدر تهدل المتن وتعلايق شفافة مثبته هدلة الفستان بحيث مرصوصة رص على صدري قصة  صدر الفستان الي عبارة عن مثلثات صغيرة مأطرة بكرستال
و كانت حركة الفستان ناعمة فيكته بالتصميم الهادئ اكثر من الشغل ..
و من تحت يسمة فستان الكرة
لان يكون دائري منفوش .

وكفت خلفي عمتي وطلعت ذهبي لبستيناه ..
و اكو ذهب مو الي هم لبستني قلادة طويلة واسوارات اني ما احب هيج ابرز بس شكله مغري و انطاني احساس بالارضى من صار ينصع بايدي وكالت
-هذا ذهبي البسيه اليوم

طلعنا لبيتنا .
لكيت كلشي جاهز الاستقبال مفتوح على الهول اني اعيوني ادور امي من بين المعازيم و الملة الي كاعدة تنتظرني ... كعدت و اجو الاولاد
قسومي و تقي و التوم  وبتول خلفهم تمشي بتاني وكأنها عروس بثوبها اللابيض المصغر وشعرها يحيطه طوق ورد ..
حبايبي جايين ويه عماتهم بس ما لمحت مرت ابوهم شو ؟
المهم من كعدت الاطفال كعدو يمي والي على الارض عود يحمي فستاني و النسوان تجي تسلم وتبارك دخلن بنات خالاتي يتمركصن امي وراهن دخلت

- على كيفجن

-يووه خاله خلينا نفرح

النسوان كامن يسلمن على امي الي المفروض هي تستقبلهن بس خالتي قامت بمكانها بهاي المهمة هي توها طلعت بثوبها النيلي و شالها الجوزي

ظلت تباوع الي وكفت الها شفت بعيونها لمعان دموع ...

وام العريس هلهلت واخذتني من ايدي الامي ..  بست راسها ورجعت كعدت بس ظلت امي تباوع الي وما نزلت نظرها عني تراقبني ..
دخلت شهد مثل المليكانه ببطن صغير طالعة توها من الصالون مبينه هي خواتها ثلاثة خلفها ..

وعلاي استلم عرك ويه التوم طلعوهم من يمنا ..همه وقوطهم

رقية حايرة توزع ماي وعايفتني

همست لشهد الي كعدت يمي

-مودين رقية صالون

-اي وديناها قبلنا سوت ورجعت من ال١٢ هي اهنا ..

-هااا
-اكلج طالعة حلوة؟
-تخبلين ولج والله مو مجاملة كلش حلوة يكلك فرنسية وكاعدة عاش ذوقي لاك الج الصبغ والمكياج تحفة ملكي هادئ خوش اختيار صالون اعيالج مذوقين

-اممم هاي عمتي دخلت

باوعت لعماتي الي اجن بس حضور خالاتي كان اقوى هنه كخطار كعدن ..
وبدت الملة تقرا مدح بدت بيه للرسول ومن ثم اهل بيته مع الصلوات
قبل كل مستهل قصيدة ..وعلى الصفكات فقط . جلوني الجلوة تنحط قماش ابيض و البنات يلزمنا من كل اطرافه والملة ترش الياس و تقرأ بدته بدعاء و بعدين قصيدة تراثية الكل يتذكرها ..
"جميلة في معانيها أمينة في امانيها"

كملت واني طلبت اكوم اغسل ايدي عن الحنه توهم حنوني لان مسوين حنة اني بس يوم واحد عرس لان تعبانه
مو مال كعدات مطولات ..

خلصت الملة وبدن خالاتي بتوزيع الاكل عبارة عن اكل مسلفن صمون وكباب وفاكهه و بطل عصير ..
بعدها أكياس كرزات  وختموها بالجكليت هاي عاداتنا حبيت اطرق الها ..

من خلصت الحفلة اريد اقرا حرف من القران مكدرت ..
طلبت اكوم للتواليت اخذتني رقية
- ما اخذيني لغرفتي ..
دخلت وكعدت احاول اكتم دموعي ما اريدها تطلع

رقية
-اشبيج اشبيج

-منخوكه رقية حموت بالكوة تحملت الحلفة . 

- شسوي شسوي اكول الهم الهم

-لا صيحي شهد بس...

دخلن خالاتي بهاي الاثناء وحسن عليه
وكامن يضحكن و يسولفن يوم عرسهن وكان الي امر بيه كلهن مرن بيه ارتاحيت عبالي بس اني بيه شي ..
والصراحة هاي الحقيقية كانت بس اني هيج بيوم عرسي لسبب مخفي بس هنه حاولن يخففن عني .
طلعت كعدت واذن الاذان واكيد صلو الرجال والمعازيم خفت بس المقربون بقو مع الي يردون يشوفون العريس
صارت الساعة سبعة والعريس ماله دخلة
وبدت التسألات عن التأخير تطرح من قبل النسوان . 

وام العريس اشوفها شايلة تليوفنها على اذنها وتدخل وتطلع من يمنا وخواته صارت عدهم حركه وكامن خلف امهن
هاي هي ماجد مراح يجي . يلا خل يخرب ولا اموت  دحس نفسي حموت اختناق اذا اكمل الامر ودخل

لج زينب اشبيج هذا يوم عرسج اذا ما اجه مصيبة
اووف كون من صدك اموت  وارتاح . 
من هالخوف

كل كنت كل ما يتأخر عن الرد ماجد اكول خربت بس هسة من صدك عرفتها راح تخرب من تغيرت الاحوال و تأخر الوقت وهو ماكو وخالاتي يسألن اهل العريس يكولن بالطريق بس واضح عليهن التوتر واكو شي صاير ..

يتبع