رواية شيخ الشباب(بنت المؤمن) الفصل الخامس والخمسون 55 - بقلم زهراء العراقيه

مساء الفل

#بنت_المؤمن
شيخ الشباب²
من كتابات زهراء العراقية
بارت ٢٠

نشرت البارحة واليوم فأكيد البارت قصير مو سوبرومن انا😁
بالمناسبة بفترة انقطاع النت مكان عندي تواصل مع زينب فما كتبت شي دكتب وياه وياه ❤

سمعت تأوه التفتت توني انتبهت لشهد كاعده يمي

-اشبيج شهد ؟

-ما بيه
اروح بغرفتج ارتاح الا اشوف مجودي الا اطلع للبيت
كانت تلهث وكامت من يمي طالعة

بتول يمي كعدت بمكان ماجد

-خالة اريد صورة وياج

اشرت لبت خالتي شايلة الكاميرا تجي تصورنا وخطفت ببالي صورتي ويه امها ابتسمت للصورة بألم معنوي
خليتهم يجيبون عبودي لحضني و كلهم التمو عليه اولاد فاطمة وعلي عدا مصطفى وقاسم كبار بزفة عمهم و اتعاركو الولد اكيد على وكفتهم . اهنا صاحو اجو الزوافيف اجه العريس اجه وصارت ركضة النسوان تلبس عبيها
اجتي خالتي غطتني بعباية بيضة .
وكالت
" عادتهم يدخلون كبار بيتهم ياخذوج من ايد ابوج "

كالو ابوها راح يدخل

دنيت العباية على صدري اغطية ودخل ابوية بعمامته المهيبة و جدي ابو امي
ارتاح قلبي بس شفته واكف يمي و حط ايده على متني مبستم

ربت على ظهري

- لا تخافين بوية ..

باوعت اله وبعيوني غلالة دموع من الي راح يدخل ابتسم الي فضحكت بعيون لامعة ... رفع العباية على راسي
و لزمتها مطلعة بس قرص وجهي ..

دخل رجال معمم بعمامة سودة

يمة منو هذا مو ابو ماجد ؟
لا ارادياً تشبذت بكف ابوية ..
همس
-هذا عمة الكبير ...
ودخل السيد محمد ،بصلاوات محمدية

حسيت جيش زلم خلفهم وهمه قادة اتقدمو بس همه
و دخل ثالثهم واخيرا رجل طوله متوسط عالي الجبين بشعر اسود لامع صاعد للخلف بتسريحة رجالية متقنة بقاط اسود و قميص ابيض ورباط شكلة رجل عصري بملبس كلاسيكي

وسط ارتعادات دگات گلبي المتأهبة دخلت اله من زوايا ضيقة مسرات رغم داخلي مايل للحزن بس تخللت زواياه
ضوة نجوم وتسربت لقناديلي فرحة منتصرة على كل رهبة بداخلي
هدتني ايد ابوية و لمستني ايد السيد الكبير و لكف ايدي كف ماجد الدافي و هو يبوس راسي و تعهد لوالدي وهو ياشر لعيونه "بعيوني اخليها "
طلع والدي ومنو وياه وظل بس ماجد
العلويات بدت هلاهلهن و يرددن قفلات
للعريس

ظلينا واكفين ناخذ صور وهمسلي نكعد ..
كعدت
-ملكة اليوم

-رحم الله والديك
ليش تأخرت ؟

-بعدين اسولف الج

حسيت صاير شي اااه فال مو خوش يعني اني نحس
قرب راسه اكثر وهمسلي واني اباوع لبت خالتي الي مقابيلنا تاخذ صور النا واحنه كنا نتهامس و وجهي تعكر بالفال

- أحبج
كالها و انتكأ على الكرسي توسعت عيوني كد فرحة گلبي ضحكت واتسعت ضحكتي
نطت وحده وكالت على شكل قفلة
"ومدري شاكلها وضحكت
ام كذيلة"
رجعو لبسوني العباية من جديد على متني والبرنص وعليه حجاب ابيض وطلعت و ية ماجد كعدني ابصفة وانطلقنا خلفنا الزوافيف وسيارة بيها نساء اهلي و كية بيها نساء من اهلة
و فرونا وبنهاية المسار وصلنا لبيتنا اني ما رايحة اله مصارت الي فرصة بس خالتي تكول حلو...

نزلت و تلكتني مفاجأة ما كايل الي عنها هالماجد ووكفني اول ما دخلت بالحديقة و وتعالي لازم يذبحون تجرات دم ...
اخترعت واني اسمع معمعت طلي تشبذت بيده
-حباب خطية خليهم يعوفوه

ولا يمي يمكن ما سمعني واسمع اصوات زلم ومن بينهم كدرت اميز صوت السيد محمد
يحجي ومدري شنو يقرأ دعاء

اعتقد نحروه للمسكين كلبي انهار عليه بس شسوي الهم ذولة

دخلت وهو وياي ، ودخلت ورانه كومه نسوان من اهلي واهلة
طلع و كالو لبسوها يردون يزفوهم ...

دخلو وامهم كالت الي لا تخافين بس اخوته
مشيت مثل العمية لان رجعو لبسوني و هو لازمني و خلفي الزوافيف ثشع
يصفكون ..
اني اتعثرت من انحراجي ببدلتي اجيت اوكع الا اشوية ..

ودخلنا لغرفتنا مع المصورة بت خالتي ورقية دخلت جنطة متعلقاتي و كالت
-خليت العشا بالمطبخ بالمطبخ ...

وظلت بت خالتي تاخذ النا صور وتحدد حركاتنا
وطلعت بعد ما اكتفت

-اروح اودع الجماعة وارجع هم على ما الاهل يودعوج

بس طلع دخلن خالاتي اثنين ورقية و كوثر سالتهن عن شهد حسيتها تعبانه بنهاية الحفلة
كالن عفناها بدلت ونامت بغرفتج .

طلعن بعد ما ودعني و اهلة هم راحو ..
اخر سيارة راحت هي لخالاتي واهلي

طلعت علج من جنطتي الصغيرة وكعدت اعلج للاحتياط وهاي توصيات شهد كعد الهي فكري بيها

شنهاي ليش غرفتي لونها اسود وفضي كلنا احب الاسود بس محبة كأثاث
كئيب
وشنهاي لون البردة جوزي معجبني اني برد اهلي كلها ذوقي أجي لهنا ماكو شي يعجبني، بس عاد زين بيها تول

مممم الشاشة ليش اهنا غير كدام السرير ليش صفح
كافي تفاهه زينب كاعده تعيبني حتى تنسين نفسج وماكو داعي لهاي الخوفة انت تميلين لماجد و واعية
لا لا خايفة خايفة لا اكعد ابجي عليه
لا السحر يخليه ينفر مني
دنجبي عاد وخري هاي الافكار عن بالج وعيشي هاي ليلة العمر
اوووف لا لا اني خايفة
غير تنجب وتسكت
لا ما انجب اني خايفة
ليش تأخر خاف شرد؟

دخل قاطع جلستي ويه نفسي

-زنوبتي حبيبي
اشلونج خو ما تعبتي

همست
-تمام

-هيي لا اظلين اتهمسين مثل الاء حسين وانت اعرفج مثلها صويتية ترة شاهد ثوارتج

ضحك

-بس اطلع تغنين يما الولد حاجيني

ابتسمت ببهوت

خلع جاكيته وعلكة بالتعلاكة .

-اشكد حلو هالفستان

- ثانك

- يلا يابة كومي لا اظلين منشلة
البيت بيتج
واني جوعان وفهمج كفاية

-ها يعني ابدل ؟

دقايق خل اشبع منج بالفستان
وكف يمي وما زال لابس يلك فوق القميص
-شو كومي
وكفت اخذ ايدي وكالي لفي

رقصني واني لازمه ايده لفني ادور مثل عروس وعروسة يرقصون داخل صندوق موسيقي

دخت ووكفت عن الدواران حضني من خلف محاوطني بأديه

وظلت انفاسه تكفح اوداج رقبتي

-هسة

باسها

- اتوضى

هم باسها

- وانت هم.....تتوضين...لاجل تصلين وتقرين دعاء رسله الي ماجد الج تقريه الشيخ انطاهياه....و يلا عروسي اريد همة جوعان

-اوكي

خلع ملابسة ظل بالداخليات حطيت ايدي على جبيبني اضحك بصمت متوتر على لون التحتي "اسود
و اخذ غيارات و راد يطلع اعتقد يسبح

-انتظر
احم
افتحلي السحاب

رجعلي ،وانطيته ظهري رافعة الطرحة الطويلة الي خلفي وفتحها ،باس رقبتي من خلف جمدت عضامي بحركته
،طلع ،غيرت ملابسي لروب من العادة العراقية مدري العربية لبسة بأول ليلة زواج ابيض طويل يتكون من قطعتين
القطعة الاولى ثوب من قماش حريري ناعم الملمس بفتحه صدر مغلقة بتول شفاف والظهر كذلك بس اكبر الفتحه مثلثة ويغطيها التول الي متقشم بسيم فضي ،و روب منفوش النهاية تصميمة بوق
اني محافظة على وضوئي حطيت شال ما فتحت تسريحتي وصليت الفرضين ..
وانتظرت ماجد من طلع اخذت تليفونه وقريت الدعاء وصليت الصلاة الي راسلها السيد
حسيت بشوية ارتياح خاصة ماجد كان هادئ و بس يردد جوعان بس خلص صلاة وكأني مزوجته قبل عشر سنوات ومحتار بمعدته،دخلت شفت رقية حاطة الاكل ومغطى بالسليفون
وخرته كان نواشف دجاج شوي ومقبلات

دخل ماجد

-عود ليش جايبين عشا؟
اني محضر

-هيج جرت العادة

-هااا زين حميه اني ما اكل بارد و جايب مشاوي حارة ما تحتاج

-اوكي

حضرت الصينية وما لكيت ميز طعام .. دخلت للغرفة لكيته متربع ويقلب بتليفونه

-تعالي يمي حبيبي

كعدت يمه
اني قليلة اكل اكثر اهتمامي تحركات ايده واريحيته
عجيب اشكد سريع خلص وكام

ظليت صافنه على المكان على التغيير هاي حياتي؟
ماكو بعد بابا يتفقدني بالليل والفجر يكعدني للصلاة ولا ماما اصحيها الصبح واريكها
ولا مقتدى ومرتضى وطلباتهم
ما اطلع ويه مرتضى اتبدل بماجد

بطلت رقية جارتي وصارت بعيده عني
دخلت الكأبه لنفسي وخاصة دا احس البيت هذا بارد ومو الي يعني اول مرة ادخله واتعرف عليه ، شي فوضى صارت بكياني قلبتني قلب
دخل ماجد

-ها حبيبي ليش صافن ما تاكل
اجي اوكلك

-لا شبعت ، كمت صفيت الاكل
وظليت اتمشى بالممر واتلفت
ممم مابيه لا لوحات اثاثه هم قليل
طلعت للهول مابيه غير سجادة مفروشة و الاستقبال بس بيه طقم قنفات و لوحة حفر بالحايط
-شسوين
اخترعت من صوته

-هاا
-اشبيج فزيتي

تباوعين لبيتج الجديد

-تعالي اراويج شي غباء صار

وكفت صافنه وين الغلط بالهول
-شنو الي غلط ؟

-انتبهي للشباك

فتحت البردة
-شنو هاي ماكو شباك ينفتح ؟

-غير عود اعتمدت على العاملين
استلمني عدنان تقليد على اهواي
امور واغلاط بيه
الدنكة الي بالحديقة هم نشاز

- عادي تصير هيج اغلاط

- عجبج بيتج ؟

-مممم
مشيت وهو ما زال بصفي يمشي وياي ماخذ كفي وحاطه خلف ظهرة ...

-هذي الغرفة جديدة الي ؟

-بلي جديدة وما كطعتها من مهرج
كالها بضحك

ظليت واكفة كدام السرير و ادية خلف ظهري شابكة اصابعي ببعض

- شفته مدري شيدور بالمجر

- شدور

طلع اني طلعت خلفة شفته وكف كدام البراد و شرب حبوب

-هاي شنو شربت مريض

- راسي شو كام يوجعني

اخذني وياه للغرفة مشاني

-شصار اليوم ماجد حيل قلقت
وانحرجت من تأخيرك عليه

انطرح وكال
-اااخ
غمض و لزم بين اعيونه

- ماجد؟.
قلقتني هلكد يوجعك راسك ؟

-ما ادري من تعشيت كلش صدعت زيادة

كعدت يمة تلقائيا افترش روبي داير مدايري
ظليت العب بردن الروب و هو ما زال مغمض ،

اجرب انطرح يمة ؟

اني يمة وبيته وحدنا ؟ عندي مشاعر اغتراب غير مألوفة ، ظليت صافنة على المخده الفارغة بتردد التعب لح عليه انحني و انام ابصفة بمشهد غريب عليه حيل
مطيته وجهي و اديه جوة خدي واباوع اله نايم على ظهرة تحرك وانقلب على يمنته صار وجه كدامي ، نزل راسه عن المخدة و اتقرب حطه قرب صدري ...و رجعت للخلف ورجعت اديه جوة راسي ما اعرف هو نايم لو كاعد ،
هالمرة ادية حضنت خصري و بنفس اللحظة اندفن راسه بين صدري سببلي ارتعاشة منفعلة و رهبة ارتخت خيوط حلكي مكدرت انطق وراسة يتحرك وما زال مغمض يركص على حواف صبري

هدأ عن الحركه واستقر رأسه حسيت برطوبة بوسة على عضمة جوة رگبتي،
تسلل دفئ لگلبي قاتل برودته السابقة الي كانت مثل الثلج ،و انتفض مرتطم بأضلعه من صحوت الي معتليني وغامرني بمشاعر حب قوي وهو يهمسها بأذني او يهمس اسمي قبلها
شفت ماجد بغير صورة كأني ما شايفته ابد ،وبصورة فاقت كل تخيلاتي المسكينة كان نهر عذب متدفق من حلاوة مجنونه وتوحدنا مثل مايندمج العبير ويه النسيم،

وجه كدامي وجهي كدامه نطق، بصوت ناعس مايل للذبول بخريف الليل
- البدايات دائما الهام للتوالي و اضح حياتي الجاية راح اكون محظوظ بيها

همست
- ليش تأخرت لعد شصار المغرب

كان صوتي الثاني واضح عليه التعب
اتحاضنا وايدة متشابكة مع كفي..

- صار سوء فهم بين جارنا و اخوية بسبب السيارات الي سدت الفرع وانحل الموضوع

-اها اشعجب اخوانك كلهم كبار هادئين من سيد محمد وقيس حتى اذا واحد يغلط بحقة السيد حليم

- لا مو شرط
عدنا عدنان اشوية عصبي

-شصار

- كلت الج سوء فهم بسيط

بعدها غفيت سيطر عليه النعاس
فزيت الصبح ببالي فكرة الصلاة راحت عليه
فتحت عيوني احس الوضع مو تمام،رجع الي ادراكي اني تزوجت البارحة و مو بغرفتي يم اهلي وهذا رجلي نايم يمي على بطنة وحاط ايد جوها وايد مطلعها ومكشف
اشوية اسرسحت للخلف وصعدت المخده انتكأت عليه واني موصله الغطة لرقبتي ،
شعرة رطب كاعد قبلي مبين و سابح
مممم هذا الغطى مكان موجود البارحه اووه هو مغطيني واني نايمة اشلون انان هيج ،

نزلت متلفلفه بيه و اخذت روبي لفيته عليه و رحت للكنتور ادور شي البسة
طلعت ثوب بحذر لا يكعد ويشوفني بهاي الهيئة المكعورة مرة لخ
طلعت
-وين الحمام

فتحت باب طلعت غرفة صغيره بصف غرفتي ..

الباب الي ابصفه فتحته صار بوجهي منزع و بيه بابين تواليت منفصل عن الحمام ..
دخلت اخذت شاور سريع
ولبست الثوب الوردي ثوب صيفي بيتي عادي...

دخلت لكيته على نومته مشطت و عدلت وجهي بلمسات بسيطة و شديت شعري ذيل للخلف واصل لتحت متني
بس اشيل الاكستيشن يرجع لطولة القصير...

هسة شسوي اصلي قضاء ما في ذمتي واحترم حالي

خلصت واخذت تليفوني فتحته كان مغلق تلكتني رسالة

شهد
"من تنفتح الاندلس و تفتحين تليفونج واشوفين رسالتي بشريني "

ايا مزعجة
رسلت الها
-تمت العملية وبنجاح
اشلون صرتي البارحة شفتج تعبانه"

خابرت ماما ..

- ماما حبيبتي صباح الخير
خرب اجت الدموع من وحدها وخنكتني العبرة

-صباح الخير يمة
مبارك عليج الفرح
اشلونج زينة

-اي ماما زينة وكلشي تمام

-ها يعني كلشي تم على الخير؟

-اي وجان هادي و طيب وياي

-ها صلوات الحمدلله
يا الله يمة سوي ريوك لرجلج وروحي اله
لاحكين على السوالف

كنت مشتاقه الها ودي اخابر بابا واسمع صوته بس استحي ..

طفيته ورحت للمطبخ طلعت تفاحه اكلت حتى ريحة حلكي تتطيب وفرشت اسناني ورجعت اله هم نايم

و شو حلى النوم بعيوني اني شصحاني خل ارجع انام ،بس اكيد مو بثوب

بدلت لثوب نوم احمر ما غفيت بس افكر بأحداث البارحة
هسة غير يكعد شو اشتاقيت احجي وياه
مممم ياترى شنو هذا سوء الفهم البسيط الي هيج اخره ساعتين عن الموعد ..
مممم وليش مرت اخوه ما اجت دوناً عن نسوان اخوته الباقين؟

اتحارش بيه لو عيب اثكل ؟

بس الزمه من خصرة و اسوي نفسي دنام بلكت يكعد ويقتل الملل

يمه حبيبي عبودي كنت احضنه اخذته ام ماجد مني من باجر ارجعه لو خطية ماجد اقيده بطفل اصبر يومين تلاثة

حطيت ايدي على خصرة اتلمست بطنه مممم اشكد حلو معنده كرش
هسة بس يكعد يمليها

حسيته اتحرك و غير نومته على ظهرة

ظل يتحرك غمضت اعيوني سويت نفسي نايمه

سمعت صوت طقطقة عظام ، فتحت
شفته دا يتمطة باديه

ويثاوب ..
كام طلع يمشي بكسل ، رجع بعد دقايق

- فرشت اسناني على ريكي كل مرة اتريك الا اغسلهم اكل فد اربع كرص ويه معلاك لو تكة
هسة راح اتريك بهالرمان الاحمر

-لا اني جوعانه

-المن لابسة لعد الاحمر لقوري الجاي ..
اتقرب يمي
وباسني
- صباحية مباركه

- الله يبارك بيك
،
بعد الريوك لحيت عليه اريد اعرف شصار البارحة
وسولف الي اخوه عدنان متعارك وية جيرانهم بسبب سيارته الي سادة الفرع مع سيارات اقاربهم
بس هو عدنان شايل عليهم لأنهم نفسهم الي(( ابنهم سحك مصطفى سابقا وتصافو ))والبارحة ما متحمل اخوه ضارب الرجال على سوء فهم بسيط وصايره طلابة ،مأخرة الزفة
اووف هذي العوارض كلها مني اني فالي مو خوش بس ما كلت لماجد هيج
بس باداخلي اكول اني الخلل بيه ورادت تخرب الزفة والله تلطف بيه والا ما معقولة يتعارك اخوه بهذا اليوم
،

نايمة واحس بأحد يشاهك يمي صرت اشوف اوجوه تخوف فتحت بثكل ،
صوت الشهكات ما راح مديت ايدي فتحت التبلام الاخضر الباهت

-ماجد؟

ركضت فتحت ضوة الگلوب

- ماجد اشبيك ...
مغمض ويشاهك

خرعني ،حاولت اصحيه ،مكدرت الا من حطيت بايدي ماي و غسلت رطبت وجه الا فتح

كعد يلهث وبالكوة ياخذ انفاسه

-شنو جيثوم لو شنو اشبيك ؟

- ما ادري ما ادري

طلع ،ورجعلي سابح

وانطرح ابصفي

-اشبيك ماجد

-ما ادري شي جثى على صدري خنكني ما يخليني اصحى

- يمه اشبيك ما عونت اني ارتاح بنومتي تدري من البارحه واليوم ما شفت لا أحلام ولا كوابيس مرتاحه

-اني البارحه كله كوابيس و احلام
ما نمت الا وجه الفجر

-هاي دوم انت هيج

-لا
اول مرة بحياتي ما مختنك بهذا الشكل

- ممممم اول مرة؟

استغربت

-البارحه اول ليلة واليوم الثانية واني يمك
حتى تصدكني اني مسحورة جبت سحورتي طفرت عليك

-لا ياربي

ضرب جبينه وسحبني لحضنه ننام

،
ثالث يوم اجوني اهلي وياهم رقية عصرية شافوني وراحو

رحنا بعدها للشمال

رغم ماجد اشوية تمرض ودومه مصدع
بس تونسنا اهناك تغير جو و رحنا للمصايف واخر ونسة وياه

بأخر ليلة النا بالفندق
طلعت من الحمام و فتحت الضوة
حضرت جنطتنا باجر ورانا سفر ساعات للنجف
ممممم اهنا ولا ينشبع من المناظر اف حرجع لحياطين البيت
وتنتهي همين اجازة ماجد بعد يومين
يلا اجيب عبودي يمي يونسني
ممممم اشتاقيت لأهلي اخليه يوديني ابات يمهم يوم
وهاي شو شهودة ما تخابر لا تسأل اخر مرة خابرتها مشغول خطها وما اتصلت ؟
اني كل يوم اخابر امي أسال عن اخبارهم وتكول بخير وبلكت من دخلت بشهر السابع الحمل ثبت اكثر..

نمت ابصفه
الصبح كعدت
شفت الساعة ب٨ تخبلت احنه كلنا نطلع من السبعة
-ماجد كوم ماجد تأخرنا

رحت للحمام غسلت وجهي ورجعت على نفس نومته .
بدلت واني اغير هم افتر يمه اصحي بيه بين ما عدلت وجهي
-ماجد شنو القضية اكعد نتريك وانروح

كعدت يمه هزيته بخفه ،شلت الغطة
-كافي عناد كوم
ليش عركان ؟
الجو حلو

فانيلته ماي صايرة من جوة ابطة
لزمت جبينه حار نار

بهلع
-ماجد اشبيك يمعود ؟
البارحه تعشينا برة وفرفرنا
ما بيك شي

كوم ماجد
هسة شسوي
انت كلت بس راسي يوجعني كوم حباب

يتبع