رواية شيخ الشباب(بنت المؤمن) الفصل السابع والعشرون 27 - بقلم زهراء العراقيه

مساء الحب يا الحب كلو

شيخ الشباب
من كتابات زهراء العراقية

خبزه وستكين چاي
و راحة بال تكفينا

مظفر النواب

•ياسر
رحت للنجف تحديدا لبيت جدي حسب موعد بينا مسبق
لكيت جدي وخوالي اربعة

بس ابو خليل ما يريد بعدي عنهم ...
اما خوالي البقية
ما يردوني
وجدي كاعد بوسطنا منتظر حكمه الكلمة كلمته صح لكن الشور  شور ولده لأنهم سندة ما يكسرهم ابد 

واضح من لهجة خالي الوسطاني الحكم
- وصلت الولد للموت مهما صاير بينكم ما يشفع الك الي سويته
لو جاينه احنه نصرف وياه بس وصلت بيك تقتله
هاي السالفة جبيرة و ولدنا متحلفين بيك
لو  ما احنه انطيناك الامان چان ما طلعت صاحي من بيتنا

- بس انه هم ابنكم وابن اختك
ما رايد اكتله لو ما طاعنه هو الي يطعني

خالي الثاني تدخل بضيق خلگ
- يدافع عن نفسة ومتأكد ما ناوي يضربك بس يخوفك انت نعرفك جا نسيت شسويت بنصار

- لساك تذكرها نصار عايل وتحرش ببناتكم وانه حفظت كرامتكم عبالي هلي هسة تعيرني بيها

خالي الوسطاني
- مو نعيرك بس نذكرك انت اشكد عنيف وعنفك  دمرك
عزلك عنا 

جدي طلب منهم يروحون يريد ينفرد بيه
،
- اشوفك محتار يا جدي
وساكت
شكلك مضحي بيه

ظل يفر بسبحته
وصافن لجدام  للفراغ

- خليها للعمر بلكن الايام تنسيكم الحقد وبلكن من تتحسن صحة أحمد تتصلح الامور
انت ما ضاربه لو كاسرلة رجل
طلع من الموت بصحة معلولة
وما نعرف ليش ظال معلول من كبده

- ما متقصد يا جدي وغلاتك جنت بحالة انفعال و دفاع

- ريتك جيتني و شكيت الي
سوايته
جنت تبريت منه ولا ضحيت بيك

عصرت سبحته السودة ما زالت بيدي
وكلت  بقهر
- انت هسة شنهو قرارك بداخلك اتريدني اظلن بعيد

- ما عندي حل مجبور
ارجع بگرب خواتك بس ابتعد عن المشخاب
بالوقت الحالي

-ضحيت بيه وتعبي يا جدي

-محفوظ ، و بيع كاعك خالك حيدر يريدها

- خالي حامي اعليه ولا جني ابن اخته
وهو ما رايدها الي من زمان

-الي ضربته رباته (يقصد احمد تربية حيدر)

- من زمان يا جدي عارضك لان بعتها ولا جني مشتريها بفلوس

- لا تحقد ياسر شيل الحقد من بالك

- تعبي ما افرط بيه يا جدي ان جنتو ما تردون المسامحة لا تاخذون حكي

- حكك ما يضيع لخاطرك اني اريد ابعدك  نار بكلوب صلاح وعادل (اخوان احمد)
وخالك ابو عدنان (حيدر) منك
وصلت احمد للموت ولهسة معلعل

- جا لو ما داجه انه الي معلعل
بالله اعليك هم اطردوه وتتبرون منه لو الي مسويها
لا طبعا  بس انه مضحين بيه وخوالي
خوش وكفة وكفوها ضدي وانه ابن اختهم الوحيد عودك

ذب سبحته جدامي اتفرط خرزها جدامنا 
وكال بعصبية

- اني  حاير بحل بينكم
وانت تعاتبني
انت شتعرف عن النار الي جواي
راح اموت ناقص عمر واني اشوف احفادي تتذابح كدامي
اني بضهرك ولهسة جتال الي يجي صوبك
افهم
واعقل  لا تضغط على جروحي امنين الكاها انه  حتى ما دخلت عمامك وكلت هذا الولد ابني الي يريد حكه يجي ياخذه مني .. طاحو حهكم بس ما يردوك بديرتهم
ما اذوك خوالك وانت جتال ابن اخوهم
لأن انه واكف الهم بالمرصاد
عوف المشخاب
و النجف كلها ترحب بيك ...
بس قضائنا اطلع منه لا اشوف دمك سايح على ايد واحد من احفادي 

طلعت من بيته غضبان والدنيا طالعة من عيني اجه اعلية جدي  هو واولاده حيل
رحت شفت ابني و مرتضى هالمرة اعلن عن رغبتة بنسبنا
انه ما انطيته جواب وقرار خليته محير

مرت الايام وابني صار عمرة حول كامل

وكل يوم اشوف شهد تذبل يوم عن يوم
هذا غير معاناة كوثر
ببيت جدي عايشة ذليلة بسبب اخوها ضرب ابنهم
خواتي جاي يتأذن بسببي وانه عودك حاميهن وسندهن
صدكت  شهد من كلت الها عمامنا مو سند كلمن عايش بحالة ما يردون الزياده
ذبلت اكثر وهي تحس بالغربة
امي اتريدها يمها بس انه ما اكدر اخليها يم زوج ام غريب عنا
موش طبعي اخذ قرار مستعجل اشهر كلفتني موافقتي اتمم موضوعها واسترها وخليني انه بس المتهجول
عاد اذا صار بيه شي ما اخافن اعليها
هاي امانة ابوي ...

كلت الها مرتضى خطبها

شفتها دمعت وانهضمت

- ليش مو من البداية و وكفت وياي
ليش هسة 

-ما ردت اكسر جلمة ابوي

- ابوك ظلمني وانت

حطيت ايدي جدام حلكها من غير ما المسه

- اش لا تحجين
ما اتعرفين انت الامور
تفكرين بعاطفة

-جدج مو بس ابو
جدج جان حماية النا ..
عمامج مو سند اذا اظلين يمهم اسبوع يكلبون اعليج
همه نفسهم تعاملهم تغير من صارت مشكلتي ويه جدج
نفسهم حاطين اله مقام 
انه حتى شغلي  ماشي على صيت جدج
امشي الي كل اموري وتجارتي

اله افضال اعليه

تجين للصدك كله مني

هو ما راد يروح للشيخ يرجعلي مرتي يفهم ويدري لان ما جان رايد الج الخراب
بس انه اااخ
اخذته ولحيت جنت متأمل بجية جدي ابوها يرضخ  بس هو صده
وهاي جبيرة
لوميني انه كله مني

- لا تفكر هيج

- جدج و شال ايده عنا بعد واليوم كالها
ما جنا النا خط رجعة  بعت كلشي بالغصب  الهم بقى بس البيت

- و مرتضى شراح تكولة

- منتظر ردج انه
الحجي بينا من زمان هو كايل
وانه معلل كلبه
مدامه شاري بغلى ما يبيع بالرخص

-وجدو اخاف اثر عليك اكثر

- بعد الي صار  انه مالي مرجوع اله
ولا تفكرين بيه
انه  بلايا مرتضى او برجعته
هو هو الموقف كلش اجه عليه جدج
وحكم حكمه ونفذ جردني من تعبي
  رغم سمعت احمد صحته صارت زينه
وهو لهسة طاردني
-وعمامي مو هم كانو ويه جدي

-مالج شغل انت انه اصرف

• شهد
بعد اشهر طويلة
حسيت بثقل عمامي من كثر روحاتي الهم لكن عبير بنت عمتي صارت صديقة الي .
،

فاتحني بموضوع مرتضى  وانطى موافقة
ضارب عمامي وجدي بعرض الحايط
ما اعرف احس بيه مثل الي بدا ينازع الموت و يريد يلحك يخلص اموره دومه مشدوه ومرتبك
لا اهتم بعد ببيت ولا بحلال
عاف كلشي وحاير بيه يريد بس يتمم زواجي

اني كنت غافلة عن كلشي
واتصل بكوثر ترسلي أخبارهم ماكو
مغلق جهازها

اخابر خواتي
يكولن كلشي على حالة ما صاير شي
واني ما مرتاحه ،

واخيرا رد عليه خليل وهم ما حسيته صادق وياي
اريد اعرف شغير ياسر ويريد حتى البيت يبيعة !
ما حسيت ابد برتياح واني اشوف ياسر بهاي الحالة من الضياع
،
صاحلي بليلة و انطاني دفتر ورقم بطاقه بالبنك
- البيت ما لحكت اداورة جدج سافر
من يجي افض بيعته

هاي افلوسي بالبنوك

بنك ال*** بيه **** مليون

وبنك ال***** بيه مليون
واحد بالنجف والثاني اهنا

-هاي افلوس الارض مو

- اي

واريد اسوي الج وكالة ..

- ياسر الله عليك شكو وليش احسك جاي توصي او

- ماكو شي بس هاي دنيا لازم اتعرفون انه شعندي وشنو ماعندي
انه لازم اعلمكم بكلشي 

من لحيت عليه طردني من غرفته يريد ينام ...

خابرت شمة اخت خليل وحلفتها  ببنها
هي تزوجت وعدها ولد
وسولفت الي كلشي اذا كنت اتامل العلاقات تتصلح هسة بس اريد ببعدهم يظل ياسر بخير
خفت لا بيوم تنتهي حياته على ايد واحد منهم
باع ارضة لخالي
وبيتنا فارغ مهجور تركه وهم مستعد يبيعة واتغير بعد ماكان شامخ ما يرضى يبيع شي  وفهمت  هسة
احنه بعد ما نكدر حتى نرجع للنجف
وخصوصا جدي ماكو
سافر حاليا ويه احمد تارك حكم المشيخه بيد ابنه ابو قاسم ومسافر هو و ابو عدنان لرحلة علاج  لأحمد بسبب حالته الحرجة ،حالة كبدة جدا خطرة

دخلت على ياسر لكيته كاعد يدخن

- عرفت كلشي
عرفت ليش بهذا الوقت الا وافقت اتزوج مرتضى
تريد تأمن عليه
مو

صارت الدموع تنساب مني والخوف اكل من وعيي جزء صرت ابكي و ابوس بايده
سحبني على صدره وهو يكول

- الله يسعدج وياه

خابروني واتفقت ويه عمج يستقبلهم

رفعت راسي سألته
- اشلون قنعته

- مالهم چلمه اعلينا انه گبل من طلكناج
ما حاسب إحساسبهم
الحساب جان لجدج همه لأجلة واجل رضاه على كلشي يوافقون ....

- ها فهمت يفكرون اذا كتلوك اولاد خوالك اظل برگبتهم  فمحد يذكر سالفة اخذو بتهم (رقية)وطلكوها غصب وما يصير ننطيهم كل الحسابات اختلفت مو

سكت و وخرني عنه ورجع منتكأ على الحايط و ورث جكارة

وتركني بحيرتي وخوفي وقلقي ما ضمرة ودفنه ما انطاني الامان

اجانه عمي بعد كم يوم ...
وطردوني اطلع اعوفهم وحدهم؛.وكفت يم باب الهول اسمع اشصاير

- ياسر لازم نهزمك عوف سالفة شهد هسة

اجوي لبيت عمك و مسلحين متحلفين بيك يردوك منا اعتقد ابنهم مات وهيج صاير ..

صارت ربكه واجه عمي الثاني و ولده
وبس يتناقشون والخوفة سيدة الموقف
ظليت اتخيل كل دقيقة يندلون بيتنا ويجونا
رن تليفوني

هذا رقم زينب شنو تريد ..؟

ما اهتميت جنت ارتعش خوف على اصوات عمامي ونقاشهم ..

طلعت لبرة مرة ثانية

دخلت متحملت حديثهم الي يكله سافر والي يكلة اطلع للشمال منا من  الله يفرجها ...

خابرت شمة اريد اعرف شصار

كالت سوة اله عملية زرع و هو بالعناية المشددة حاليا واولاد خوالج وحدهم سافرو الكم مالهم كبير يردهم من بعد جدج ...

- زين وكوثر كوثر وين

- كوثر يم امج بس شمسوين بيها شابعاتها كتل و تليفونها وذهبها كله اخذوه منها و جهالها مأذيهم

شهكت
-ليش ليش ما راحت من البداية لامي
وليش امي تركتها هيج يصير بيها

-من جان جدج موجود ما يقبل تطلع من بيته و محد يكدر يأذيها هو سافر وام وخوات احمد تولنها مثل السبية صارت مدكه حتى رائد  ضاربها (رائد ابن خالي حيدر الي مربي احمد ورائد حيل يحبه ويحب ام احمد  )
من ضيمها شردت  لامج
وامج ما تكدر اتروح الهن برجليها بعد ما سافر جدي

ام احمد ظهرت وجهة وبحجة ابني نايم ويه الموت محد يكدر يحاجيها ..

ما اعرف على شنو صفو عمامي وياسر
شو صار هدوء و ثاني كال الي اريد اروح واخذج وياي لمرت ابوي ما عندت عفته على راحته شفته متعوب فاخذني  ودخلنا لبيت اخوها رجال كبير بالعمر دخلنا وراح، طلعت النا مرة مشيلة كبيرة بالعمر بثوب اسود 

-هلا هلا بريحة الغالي

حظنت خدوده بديها وبوسته

خمنت من سلامها زوجة بابا الي حاربت ماما

باوعتلي للحظات و ياسر عرفها عليه

- لعابة شهد
صلوات

هم نفس الحركه اخذت اخدودي بين اديها وبوستني ..

علاقتها ويه ياسر كأنه ابنها الفعلي

اني ماخذه حذري ومتكلفه وياها
بقيت ساكته لحد ما طلع ياسر وياها
للحديقة
دخلت بنية سلمت
-السلام عليكم
-وعليكم السلام

حطت صينية الجاي كدامي
اني كاعده على زولية كعدت يمي

-انه بت اخت خالة ام ياسر

- ام ياسر !؟

- مرت ابوج
اهنا يعرفوها بام ياسر  على لقب زوجها
الله يرحمه

- الله يرحمه
انت عايشة وياها

- لا انه بيتنا قريب دوم امر اعليها اشوفها شنو معتازة

حل سكوت بينا وهي كسرته بتعريف عن عملها

-انه معلمة بمدرسة ال***
اهنا متنا الكادر قليل وما يعينون
و الطلاب كل ٦٠ نفر بصف
مشلوع كلوبنا بينهن

- الله يساعدكم

- انت خريجتيش

- ***
- ها هذا الاختصاص بيه تعين؟

- اكيد لا

-جا ادري ما يعينون هاي الحكومة التعبانه حايرة بس باللغف

اسولف واطلع مواضيع واني بالي يم ياسر شراد من مرت ابوه بس لا هم يودع ويوصي !

كامت البنية طلعت من باب الإستقبال  الثاني اول ما سمعت حس ياسر قرب

دخل وشرب جاي وطلعنا..

بالسيارة سألته

- شنو حجيتو سوة

- هيج ما يخصج

اكلج  هم شفتي بنية شابة
منو قدم الجاي ؟

- بت أختها

-لعد هي

- شنو هي ما فهمت

- مرت ابوي اليوم كالت الي بصريح العبارة عدها بت اخت يتيمة اذا افكر زوج اكسب بيها ثواب وارحمها من ظلم مرت ابوها
وهي يمهم من رحنا الهم

- ها
هيج علاقتكم عميقة لهلدرجة تتجرا تطلب منك هيج طلب؟

-جا هي امي ربتني كملت  يمها٢٠ سنه .
من عمري

-وانت تريد تتزوج بهذا الوقت

سكت ما جاوب كأني ذكرته بكومة الهموم الي فوك راسة
وتندمت 

بالليل شكى الي واعترف بندمة وتأنيب ضميرة
ليلة ما ينام يخاف لا يموت احمد ويصير دمه برقبته  ..

،

ورة ايام رحت  لبيت عمي الكبير
على  ، الموعد واجه مرتضى وابوه ..

و من ورة الباب شيخ صديق عمنا جايبه  عمي هالمرة عقد النا  
لا مسرة تبهج الروح ولا احساس هيبة الفرحة سرة بعروقي هالمرة بيها كسران خاطر اكثر من الجبر
احس كل كلمة بالعقد انكالت هي حرف من حروف الوداع لياسر ، كأنه  كارت تأمين  مو زواج
ما كذبت بيوم من كلت اله انت دنيتي وانت لا تعوض خفى حزني عليه لهفتي وقتلها من العروق ، كلشي ثانوي بالنسبة الي بس ياسر الاول والتالي
ما اعرف شصار بعد وراحو
ما شفت مرتضى ولا ردته يشوفني نحلانه مكسور عودي بأخوية الي اكيد لاحظو من شكله انكساراته الداخلية

ليلة بس يفكر لا يموت احمد
لا خايف على مال ولا على الحياة

بس التأنيب ماكلة اكله حتى اشوفه يحجي ويه نفسة بهاي اخر الايام الي سمعنا بيها احمد حالة من سيئ الى أسوء

•مرتضى
انتظرت اشهر بعد التواصل مع ياسر الا قررت اطلبها من اخوها ...
بيومها هو الي اجة للنجف
والدي طلع من سمع بيه يجي متحسس منه و حتى قبولة برجوعي لشهد استقبلة ببهوت لخاطر البنية ولخاطري
لأن بعده ما متقبل ياسر
أثناء كعدته وياي 

- ابو علي عندي يمك طلب و اذا تلبيه
اكون الك شاكر

- إذا  اكدر اعلية ما اني رادك

- هو المفروض اني الي اجيك لحد بيتك واطلبه ، بس هسة بس اريد موافقه مبدأية
اني رايد نسبكم بعدني مشتريه

سكت باس كف علي و اجه الي  زاحف و وكف منسند على ركبي ...
ابوه ما انطاني جواب شافي
كال الله كريم هسة اموري مخربطه بعدين نحجي بهاي السالفة واردلك خبر
ظروفي مو تمام  واشهر مرت
الا ردلي خبر بمكالمة تليفونية .....!
بعد ما كلت الله ما كاتبها الي وما راح
بيوم اعيد طلبي حسيت بالاهانة
لكن من اتصل
فهمت سالفة ويه خوالة ما خلصانه واجت من صالحي !

بلغت ابوية وامي ضاجت لان اهواي صارت مشاكل بهاي الخطبة بس بالتالي محد خالفني لأن شهدو حالة ابتعادي عنهم وانعزالي حزناً عليها
حالف هالمرة ما اطولها اسابيع واخذها
لكن هم طولها ياسر الا انطانه موعد اعقد عليها  ورتبها ويه عمامه

الصبح واحنه  نطلع الساعة ما تتجاوز ال٩

امي واكفه بالحديقة ووالدي يخابر يوصي بزينب
منسند على السيارة ويحجي وياها

- بوية مو توكفين بالشارع
دكو عليه يجيكم ابو زميلتج الا طلعين
خل يوصلج للباب  بالرجعة مو تنزلين براس الشارع

امي كالت الي -ابوك اليوم مراح يخلص وصايا 

-  شتردين اجيبلج وياي

ام علي- شجيب عيني رجعتك الي بهذا الوجه المستبشر هي كلش كافية
وين كنا و وين صرنا قبل يومين عابس الوجه
اليوم الضحكه ما مفاركة وجهك

لزمت خدها مداعبها

- انتِ الخير والبركة
اعذريني يمة غثيتكم بالفترة الي راحت

- بس غثيتنا كأبتنا وياك
وجهك ما يكصة الطبر

خلص والدي مكالمة  توصية بزينب الي بالدوام

ورقية طلعت شايله علي شافنا لابسين رفع اديه وكام يبجي يريد يروح ويانه

علي-  دة دة دة

كلت اله- علاوي رايح لبوك راح اجيبلك اهواي سلامات واجي

رقية- سلم سلم الي الي عليه

خلت والدي يخزرني الي

- يلا بوية انروح

ابو علي-نسرين ديري بالج على الولد عينج عليه صاير حرك

- بعيوني علاوي وانت ديربالك على رضاوي رجعه يضحك بصوت اذا هسة مبتسم اريد صوت ضحكاته يوصل لسابع جار

ضحكتني
-! ادعيلي ارجع سالم يوم مو مجنون
اشعندي امشي واضحك

صعدنا ورقية وكفت يم الباب تفتحها
النا  وامي ذبت ورانا ماي

التفتت عليها
- يوم غركتي السيارة

-  رايحن لهاي عمة علاوي
دربكم طويل
.
كلشي صار بسرعة  و عقدت عليها مرة ثانية بس صوتها المرتجف سمعته وافق يوكل اخوها .  ما لمحت طولها
والدي ما طول كعدتنا كأن النفوس ما صافيه وهمه هم حسيت بتوتر عصبي ساكن داخلهم ....

عمها هذا كان مؤيد و هو الي كان مصر ويه جدها  واكيد والدي متحسس منه

طلعنا
نتعاون على الطريق بسيارتي ..

اني الي كنت اسوق  وبديت احس بالنعاس
باوعت للساعة توها ب ٩  بس اني البارحة ما نايم وبين عليه التعب
بعد  ما امنت ورجعتها لعصمتي ..

-شكلك نعست

- اي والله لو قابل نبات والصبح نجي

- صعبة اقبل عزومتهم على المبيت غض النظر هي عزومة كانت لينه  بالاصل
بس غلط نبات ونزحمهم
وعلاقتنا بياسر بعد الي صار ضعيفة
بوية

- لو فندق  تعبان  حيل

-ميخالف اتحمل بوية ما اكدر ابات برة بيتي وامك وخواتك وحدهن

توقف خل ابادلك

-ياريت بعد ما احس بدية
بس حباب ما بيها مجال
ما انزل منا اعبر حظنك و تعبر لمكاني

ضحك وهز ايده وفتح الباب نزل
خلاني انزل
بادلنا هو يسوق واني الي منتكأ على الكرسي ...

- شكلك نعسان حيل

- كلش ما تنطيني عمامتك اتوسد عليها

ابتسم
- هاي ورث ابوك اسويها مخده
هاي تالي الهندسة

- لا يكون ما مفتخر بيه

زارته شبه ابتسامة بزاوية شفته

- مفتخر بيك
ونعم الولد الصالح

-هسة ما تنطيني هالعمامه
خلعها وهو يسوق حطها على راسي مالت
عدلتها  واني اباوع للمراية

كانت اول مرة اتعمم بيها بعمامة علم دين بيضة

التفتت عليه

كال وهو عين على الطريق وعين عليه
- لايك الك

كلت مقلد بعيون منعسة
- هسة انطيك خطبة بمنافع الطرب للروح

- هذا الجانب الي رافضة طربك يا ابن حسن

- اشبيه يا ابو مرتضى
مو حتى الانشوده حذفتها

-هي هاي  هم انشوده عبارة عن غناء

يقصد انشودة نزلتها قبل فترة ونجحت باسم مرتضى الكوفي و حصلت نسبة مشاهدة لا بأس بيها
لكن  توزيعها ثار حفيظة الوالد وحذفتها

- مرتضى لا يكون لهسة مزعوج
لأجلها
رجعها اذا تريد!

- لا اصلا نسيتها
لا تخلي ببالك

- كانت حلوة كأداء وكلمات بس لولا خفة الايقاع والتوزيع  الموسيقي

- راح اسمعها الك بيوم من غير ايقاع

- اصير اجمل متأكد مثل الترنيمة

-برأيك الترانيم اجمل من الاناشيد

سكت للحظة  الا جاوب

- مو شرط

انت صوتك حنين ليش ما اجرب تقرة الطور الكربلائي بالقصايد هم الك اجر وثواب وهم تمرن صوتك اكثر

غمضت منعس واني حاب نقاش والدي حول شي احبة
صاير اكثر سلاسة من وقت سالفة زينب و ازمتها الصحية  بهذاك الوقت ..

حسيت العمامة مالت

- لا توكع عمامتي هاي اريد اورثها لاخوك مقتدى

- لا عجبتني باجر اروح للدوام بيها

ضحك
ضربني على متني
- تسخر حضرتك

-  لا ثق حبيتها

- مو كد حبي الك
فتحت اعيوني
نازع عمامته على صدري انشبكت بين اديه.

-هاي اول مرة اسمعها منك بعد ما شارفت على عمر التسعة والعشرون !

-  اني ماشي على مبدأ لا تحدث عن الحب عاملهم به ... 

يمكن بفترة من الفترات قسيت عليك
لكن لو يرجع الزمن هم اكرر نفس الشي حتى تطلع بهذا الشكل المهذب

حتى الاصلة الطيب من غير تقويم يميل عودة

هذا ياسر ، حسافة الي وصل اله
لو كان عنده من يقومه اعتقد ما وصل للي وصله اليوم

-حيل ظايج عليه
بس اني عندي احساس هو انظلم
بس اخ من تسرعة

- الله اعلم ب الي مرة بيه
لا نحكم من بعيد افضل جائز ظالم او مظلوم بكل الاحوال غلط غلطة كبيرة..
واخته مالها ذنب
لأجل سترها و رعايتها اني اجيت اليوم
وياك .
والا عمها اني لحد اليوم ماخذ موقف منه
مرتضى
نمت

- لا افكر بكلمتك

- اي كلمة اكعد الطريق طويل اذا تتركني وحدي انعس

- انك تحبني !

ابتسم هاز راسة هازئ مني

-بوية بعدك متحسف لان ما اتجهت نفس اتجاهك ؟

سكت للحظة ..
وجاوب
وهو  يباوع للطريق  ولحظة الي

-‏تحدث أشياء كثيرة لاتعجبنا مبدئياً ثم مع الوقت يبين الله سبحانه عز وجل حكمته، فتشكر الله، وتذكر "ولسوف يعطيك ربك فترضى" لا يأخذ الله شيئاً منك الا لمصلحتك، وفوق كل هذا يعطيك سبحانه لاينسى الله أحداً أبداً
ربما كنت متزمت بأحلامي بأولادي 
لكن مع مرور  الوقت ارضى و اتحمد الله
على كل حال مهندس  ، عالم  ،  معلم
المهم انت مجتهد

بعد ساعتين على وصولنا للنجف الاشرف
والساعة صارت ب ١٠غفيت وما وعيت من ثقل النوم !

يتبع