رواية شيخ الشباب(بنت المؤمن) الفصل السادس والعشرون 26 - بقلم زهراء العراقيه

مساء الورد
اعضاء افتقدناهم واشتقنا لهم ❤

Fatima_alsheikh
user95437800
Noor_Ali7
Hamzayhoocom1996

•شهد
كاعدة قرب الشط بس اخاف اكعد على حافته ..
كاعدة على حجارة على بعد مسافة منه
واباوع للفراغ ، لا منتبه للجو ولا للسما ولا لماي الشط الاسن

لازمة الحلقة بأيدي وافرفر بيها.
رن تليفوني
كان ياسر معصب مني

- وينج شهد

- طالعة يم الشط

- شسوين تعالي ارجعي ...

رجعت لبيت عمتي ..لكيت ياسر بالحديقة يريد يطلع

-وينج اجيت اجيج تأخرتي

-اشوكت نرجع للمشخاب مليت

-مليتي ؟

اتكلمت بهدوء مرتبك
-اي مليت ياسر صارلنا شهر اهنا نتنقل من بيت لبيت اشوكت تفض مشاكلك ويه جدي ...

تنهد وظل يفرك بأديه يمكن حيرته بملحتي عليه...

غير الموضوع و احنه
-ما ترحين وياي
- لاء

،
ظليت بغرفة عبير بت عمتي كل وحده لازمة تليفونها
ماعدنا حديث مشترك ...
من شهر اجينا لهنا من ضرب ياسر احمد سكين !
صارت مشكلة كبيرة وما كنت اعرف السبب ولا ياسر يحجي حتى جدي ما يدري بالقصة عباله هو صدك سكران و رايح لبيت المومن لان الشيخ حسن دز خبر لجدي يشكي جية ياسر الهم نصاص الليالي وتسبب بالفضيحه الهم ..
اجه جدي لبيتنا وتعارك ويه ياسر و ياسر ورة ايام بس كدر يكوم طلع برة البيت وسمعت بيه ضارب احمد سكين موصلة للموت ومحد يعرف اله درب ..
خوالي كلهم ضده لان ماكو سبب يستحق يدفعة لقتل ابنهم ... حتى جدي غضب عليه وكال لخليل الي بس هو يعرف مكانه خل ياسر يروح لعمامه
اخوة احمد متحلفين بيه ...

اني ياسر دزلي خليل اخذني اله وجابني وياه ياسر لهنا وكوثر ظلت بالبيت ..
،
بيوت عمامي متفرقة كل واحد بحي
اتوقعت الكاهم بريف و ناس بسيطة طلعو ساكنين بالولاية و كل اولادهم واصلين بالدراسة ....اني كنت منغرة بعيوني الخضر اهنا ما شاء الله اهل ابوية كلهم شكران بعيون ملونه ...
لحد الان ما رحنا لبيت عمنا الكبير اضوج من بيبي الي عذبت امي وعاندت ياسر اروح يمهم.
عماتي ازواجهم ما طالعين من قريةال***
و احنه ببيت عمتي . وزوجها ابن عم ابوية واهنا الشغلة عالكه كلهم اقارب مع بعضهم اتيه بينهم .

وعماتي ثلاثة ماخذات الاخوة وكلهن مجاورات مثلنا بالمشخاب شي حبيته ..
اليوم ياسر راح لمرت ابوية يشوفها ...اني رفضت اروح وياه ..

ويوم الجمعة عزمنا عمي الكبير وغصبا ما عليه اخذني ياسر ..

الطريق كولة اتذمر عليه وهو ولا مهتملي
ضعفان وعايف لحيته ما محددة و شعرة هم حيل ثخين هو بيه تجعيده خفيفة اذا طول وحيل ثخين ،

-ياسر ما اطيق اروح اهناك اووف

- بيبتج بس تسأل عليج عيب ما ترحين الها

-ما احبها
حيل

-شهد

زمخ بيه

-عذبت ماما

- هي بيبتج ما الج علاقة بعلاقتها بأمج

-ما اعرف اشلون انت اتروح لمرت ابوك وبيبتك الي هنه دمرن ماما

- اوووف هاي سوالف نسوان قديمه يعني امنا ملاك اكيد كيد بكيد مشتغلات
مرت ابوي هي الي ربتني والمرة متعلقة بيه جانت
وبيبتج هي ام ابوج دمج من دمها ..

نفخت نفسي بنزعاج

التفت عليه بنظرة جانبية

-حتى اشبهيها

وصلنا لهناك ...
وبيبي بعيونها الخضر تخزر بيه اول ما دخلت

- طالعة على امج قاسية شهر زمان بالديرة وما تجين اتحبين بيبتج

تعالي يا ريحة الغالي....
بوستني وكعدت يمها مغرمة ..
و اهنا صارت هوسة اولا عمامي وبناتهم
مشكل سمر وبيض حتى سمرهم عيونهم ملونه ...عدنا حيل اهنا وراثة قوية
ياسر بيه شبه قوي من جدي ابو امي
بس دمه دم اهلنا اهنا ..
نسوانهم جبب
والشابات بعمر ال١٤ وال١٥ بلايه حجاب و الحياة مو عسرة اهنا مثل ما كنت متوقعة

صاحت بيبي

-مرتضى ولك مرتضى شغل المولد وجرنا ( احترينا)...
گلبي هاجت اهاته واني اتخيل مرتضى راح يدخل عليه وكان الاسم بس اله خلق .....
دخل واحد مراهق وكال اي اي اجيت .هو هذا مرتضى مراهق ..
فتلي گلبي اسمك .....
بناتهم عشريات ما انطني مجال احس بغربة او استاحشهم يحجن وياي كأنهم يعرفني من زمان ...
كلامهم كله جا وجا غيدة وعيشة
عبالي جايات من جوة الهوايش وهنه وحدتهن بكالوريوس والي موظفة بس سبحان طين البساطة الي مخلوقات منها وعدم نكران الاصل كلهن مثل ياسر هاي اذا سمعتهن رسلان لو خواتها يظلن يصنفن عليهن ...

بالليل الا صفيت وحدي يم ياسر من كل واحد بيهم راح لبيت وفرغ بيت عمي من الخطار ..
حطيت فراش اله بالاستقبال.
وكعدت يمه ..

-الى متى نظل مهجولين اريد ارجع لبيتنا ....

- سمعتي بالخبر

-يا خبر ..؟

- جدج مخطب كوثر من وراية

- ما ادري كالت اجو ناس عليه بس هي ما عاجبها

-وامج ما كالت الج شي

- لا امي اصلا ماتدري بسالفة الخطبة حايرة بقضيتك ...
شنو يعني عقدت لحد البارحه خابرت كلشي ماكو

- جدج منطي كلام للناس و متجاهل وجودي

-ها يعني حتى كوثر توها صار عدها علم مو اكول ...

ياسر

ياسر جاوبني احلفك بروح بابا شصار بالضبط وليش حاولت تقتل احمد.؟

باوعلي مستغرب

-ادري ادري بيك مو قصدك تقتل بس من تفقد اعصابك تطلع الامور عن سيطرتك

- انه ما جنت رايحه جتال اله رحت اتعارك وياه واطكه على تصغيرة الي

- اي احجي هو الي شربك

سكت ومبين عليه الغضب

-شنهو طفل ويشربني

-دحجي يا ياسر

نطق وهو مدنك
- حاطلي حبوب الله الي يعلم نوعها بأكلهم مدري شربهم

كالها بكرامة مجروحة

- انه رحت اتعارك وياه هو ايده جبانة ما كدر يرد الطك الي رفع عليه سجينه نبتتها ببطنه

فهمت سكوته عز عليه كبريائة يكولها للأهل وظال ساكت ما يكول السبب وهو مخدوع و مشربيه لا يبين مغفل ،ساكت و
الكل عبالهم هو يحضر سهرات عربدة ويه احمد ومن رايح لأهل طليقته وانكشف طلع حركته بأحمد اتعارك وياه .

خربت علاقتنا بخوالي بهاي الفترة وعمامي ما كدرو يسون شي

بس الي فهمته من كوثر جدي ما قابل لاحد يسافر لياسر او اصير كعده زلم يكول ياسر ابني
هو بس زعلانه عليه وما يحجي وياه
يحبه حيل لياسر ومخليه بعيد حتى لا اصير اشتباكات بين اولاد الخوال وبينه وهو وحيد ...

ثاني يوم
خابرني خليل يسأل عن ياسر .

-يابة اخوج ليش ما يرد

-ما ادري

- اكلج اني رحت ترة لبيت الشيخ

- قصدك ابو رقية

-اي و حجيت الهم الحقيقة كلها

-خاف ياسر ما يقبل

-خاب خل يطير لعد يظل منزل راسه ما يكدر يشوف ابنه

-منو بالضبط لكيت

-هو ابو علي واولاده

- وشكال مرتضى

ا ا اقصد شكالو

-الشيخ ما كال شي ..بس مرتضى بين استغرابه هو هم كان ما متوقعها من ياسر ...
وحتى كال الي اجه يضربه لو لا الجيران
وضاج عليه وعلى وضعة
- مرتضى راد يضرب ياسر!

- اي اخوج كلشي ما يدري لا تكولين اله

- الله كريم اذا ياسر وين ما يدير وجه تنسد اشلون بعد تتحسن علاقته بيهم وهمه هيج صايرة بينهم

- ما اعرف ،بس مرتضى التقيت بيه مرة ثانية بالكهوة وكعد يمي وسولفنا مثل الي يريد يصحح العلاقات!

سكتت ...
تذكرت خليل على الخط

- يلا خليل رايد شي

- صافن على صفنتج

-لا ما صافنه

- والله جان حليت الكم مشكلتكم وتزوجت اختها وناخذ مرة منهم بس جدج عسر ما خلاني اخطب منهم بعد
طلاك ياسر

كالها بشقة ضحكني على افكاره ..

،

اتصلت بكوثر

كوثر- هلا واخيرا طاح الزعل شهودة

- مرحبا

-مراحب كلت راح تقاطعيني

- مو لهلدرجة بس انت ضوجتني كلت الج سالفة شقة مرت عمي اول ما شافتني كالت اخذج لابني
رحتي وصلتيها للخطبة

-هههههههه جا غير ردت اكيد العواذل رسلان وربعها
وهم ما كلت الهم خطوبة رسمية بس كولت انعجبو بيها ورادوها
لعد غير هنه مشمتات بيج مو زين اسوي

- مو على هاي زعلت لان سويتي نفسج عمة حنينه وخابرتي رقية بحجة تسألين عن علاوي وطشيتي الخبر الكاذب يمهم ولا وبعد مؤكد مسويته خطبة

ضحكت ضحكة قوية

- غير ردنا نشوف شهريار الي فراكه مطلع الدنيا من عينج شسوي وكلشي ما سوة

- لا سوة دز اخته تتصل بيه
زينب اتصلت بيه تتأكد

-عزة كملي ولج

- بحجة تسأل عن صحة ياسر بعد الحادث وباركت الي على الخطوبة

-وشكلتي الها

- رديت التبريك وكلت الها بعدها مو رسمية .وبين عليها الزعل والضوجة ابسرعة انصرفت

-هههههه شوفي حتى انت تردين توصليها للحبيب
ما نكرتي

- انت لهسة ما فاهمة اني ليش زعلت منج
اني ما اريد اوصله اخباري ولا اريد ابين اله شي
انت رحتي و كلتي شي مو صحيح اضطريت اساير ما كدرا اكذبك كدامهم
وكلت شي مو رسمي

-حبيبتي لخاطري طلع ما تردين اتبينين اني كذابه كدامهم

-لا مو لخاطرج ما كذبتج لأن حتى لا اصغر بعيونهم وابين اوصل اخبار كاذبة وابين مهتمة
حبابة كوثر لا تسوين الي لبلبة وحدها نفسيتي تعبانه حيل
ااوف دخلتينا بهوسة ونسيتني عليمن مخابرة

-على موضوع خطبتي

-اي صدوك شنو سالفتج

- رجال مزوج اني ما راغبة اله هلكد بس بيبتج وامج قنعني مرته موافقه
وكرايبنا و راضي بالجهال

- امج تدري

-امي كالت نكول لياسر بس جدج شو فاجئ الكل انطى موافقة وخلة امي تحتار بياسر ...
جدج بدا يضهر زعلة من ياسر وسلم الشغل لخوالي
و حتى كاع ياسر بدا يدخل بأمورها و كانه يريد يرجع كلشي لأصله

- والله ما ادري هي شو الشغلة كبيرة و كلشي متخربط وزعل جدج قوي
اكلج شخبار احمد

- زين مثل الثور
بزون بسبع ارواح وانه بس اوكع اكسر وهذا انضرب سجين كلشي مابيه

-مو سمعت كبدة متأذي

- يمعوده كلها ايام ويرجع مثل الحصان
ابليس ما يصير بيه شي

ودعتها والاخبار ما تبشر بخير ما اعتقد النا رجعة هليام ....

•ياسر

ما يقارب ٣ اشهر ما شايف ابني والروح اعلية متوجرة ....

خاصة اليوم حيل احس روحي رايحه صوبه انه بعد ذيج السالفة ولا راويتهم وجهي اكدر اروح للنجف ما خايف من اكبر شارب من اولاد خوالي بس مالي وجه اشوفه للشيخ حسن ...

سالفة اولاد خوالي بعدها حارة و جدي اجه لل*** تعارك وياي و ضوجني وزعلته علاقتنا جاي تتكطع خيوطها خيط ورة خيط .... وهو ادري بيه بوسطنا حاير لكن من اجه اعليه وراد ابيعة كاعي وادري بامر من ولده صدك ضجت فضلهم اعليه وتعارك وياي وراح ...
السالفة ما دخل بيها عمامي سدوها خوالي بس همه شرطهم انه مالي رجعة بوسطهم اذيته لاحمد أستأصلو من كبدة بوقتها تأزمت حالته لكن هسة يكول خليل زين ..
انه اجرت بيت قريب على بيت صغير عمي الجبير حتى اتقرب من جدتي ..
واثثته شي بسيط بس الضروري غرفنا و المطبخ الواحد ماله غير ديرته تلفيه
اجوني كل ربعي وخلاني وعلى مقدمتهم خليل ..
اول ما شافني خليل

- شيخ الشباب الك وحشة
حضني وانه اختنكت من هاللقب
لأول مرة ما اشيم بيه ! احسة جان گريب عليه لأني گريب من جدي هسة انه لا حفيد الشيخ اهنا ولا احد يعرفة لجدي منهو

محلاتي وتجارتي خليل واخوه قايمين بيها ومن يلتحق خليل يظل بس اخوه همه بس اولاد خالي ابو خليل صدك اخوان ......
،
ورة فترة

رحنا لبيت عمتي بسبب الحاح شهد
صارت صديقة بناتها وتلح اتحب
اللمات اخذتها وجدتي هم رادت اشوف بتها ورحت ليهم ...
وكعدت يمي عمتي ..
تلمح من بعيد لبعيد على رقية
شهد كعدت كدامي هي وعبير ويسولفن بهمس

خابرني رقم مكتوب اعليه مرتضى
تيهت يا مرتضى منهم عندي ثلاثة

رديت اعليه واشرت لشهد من ضحكت تسكت ...سكتت وكامت عني ..
همستلي
-رايحة ويه عبير لبرة...

سألت
-منهو وياي بلا زغرة بيك

طلع مرتضى خال علاوي ...يكول انت وين اخي اني قربت اوصل لل***
هذا جاي لديرتي ...
انطيته عنوان عمتي ما الحك اروح لبيتي ..

• مرتضى
ثلاث أشهر واني اترقب يوم عرسها ادعي الله تخرب وما اصير زواجتها من يوم الي سمعت الخبر من رقية لليوم ما ضايك (ذائق) طعم النوم ولا راحة عندي أرهاق وتعب وندم على التعب النفسي الي مريت بيه تمنيت لو ماخذها من اجتني ولا تاركها لغيري
الي مجنني ورة انفصالنا بمدة قليلة
اشلون هيج صار
منو هذا الي راح تسمح اله يشوف شعرها تكعد بقربة
وتحجي بدلال كدامه ؟
منو ياريت اكدر بس اتوصل الهم ..
بس شنو يفيد اذا هي مخطوبة ؟

زينب خابرتني واني بالدوام

- تعال اخذني يمعود بابا ما يجيني اليوم

- جاي ..

طلبت زمنية ورحت الها

- لو بس ابوج يقبل اشوفلج خط

-تعبتكم وياي
بس غير بابا ما يقتنع ..

- ليش ما اجاج اليوم

-اني طلعت من وكت اليوم ماعدنا شي مهم وخابرتك

اريد ابشرك بشي

شو سكتت الوو مرتضى
نحن هنا
ادري وجهك بعد ما تفرحه البشاير
بس هاي غير كل البشاير
ترى شهودة ام عيون خضر ما مخطوبة
والخبر جبته من مصدر موثوق يمكن حاجين عليها ورايحه السالفه لحالها ما مخطوبة رسمي ما قابلة شهد

وكفت بنص الطريق

- امنين جبتي الخبر

-من كوثر
هاي كانت دوم عود تخابر تسأل على علاوي وتتطقس اخبار رقية واخبارك
بس من اجانه خبر خطوبة شهد اختفت واليوم الصبح خابرت ..
وسالتها على شهد ..كالت مصايرة رسمية وما صارت قسمة
كلت خاف الامر يهمك يعني
لأن الحجي بينا
كوثر كالت ياسر ماله رجعة للمشخاب مشاكل بينا وبين جده

الو رضاوي

شو سكتت

رجعت سقت وزينب تلح واني ساكت
جريت نفس طويل مرتاح ...
وصلت لغرفتي اباوع للمراية ولل كم شيبة ظهرت بهاي الاشهر
لكيت نفسي متخدر نوم نمت ساعات الليل ماكلها من البداية لأذان الفجر صحيت على صوت والدي وهو يأذن بالجامع
مطيت ادية ورحت توضيت وطلعت للجامع ... صليت ورة والدي وبعد اصلاة سولفت اله الي بخاطري ...

ما انطاني رد شافي ... لا كال صح او غلط

-بوية شكلت

- روح بوية روح واخذ علاوي وياك ....

اني اعرف بسالفة المشكلة الي بين ياسر وخوالة بس ما اعرف مستجداتها وما كنت مهتم لكن هسة بعد ما عرفت شهد ما مخطوبة يهمني حيل الخلاف وحجمة
اروح حتى لا اخلي للندم مكان هاي محاولة مو اخيرة بس بعدها يحبط الامل اذا اخوها رفضني ....

اخذت علاوي وياي ورحت لل****مو بسيارتي الطريق طويل مو مال اسوق وطفل وياي ، من قربت ادخل ال****
خابرته
خيط وعقد لساني من سمعت ضحكة اعرفها و كانت نغمة لروحي بيوم من الايام سكتت اتنفس صوتها الي اقل اللحظة واختفت الضحكة وصوت ياسر الخشن اتوجه لمسامعي ..

يسأل اني منو ..بعد المعرفة والسلام
بلغته اني جاية بس ما كلت اله ابنك وياي حسيت بستغرابة وتفاجئة ...

وصلت بعد ما دلاني ياسر المكان الي اوكف بيه حتى هو يجي ياخذني .
من شاف ابنه اخذة و ضجت عليه واضح عليه التعب حتى دمع من شاف ابنه كبران ومتغير ...وعلي ما يعرف ابوه يبجي منه وماد اديه اله ...
اني واكف اراقبهم على صفحه وهو يرفع بابنه كدام وجه ويحجي وياه

- متغير يبن ابوك صاير نسخة من عمتك
بصيارها (بصغرها )
ذكرني بأخته وبودي هسة أساله عنها

واكله اشلونها اختك حبيبتي!

علي يبجي وما انطاه الي راح للسيارة وحطه بحضنه كعدت يمه وطلعنا لبيت اقربائهم دخل يسوي الي طريق مع علي واني برة واكف
اباوع للبساتين كدامنا ..وللمنطقة
و صارت كدامي ما شافتني اتباوع للتمشي وياها وتضحك ، اشتعل بروحي الحنين روحي مثل قطعة جليد لامعة طلت عليها شمسي وذابت اعيونها صارت بعيوني ....ما بيهن عتاب بيهن شوگ ولهفة محرومة ....

•شهد

اتمشى اني وبت عمتي وخربانه ضحك على نفسي اشلون امشي هيج بشحاطة بيبي و العباية اتربت من كعدتنا مثل العجايز على ضفاف الشط
-هههههه عبير فدوة لا تحجين حموت من الضحك ...
حاطه ايدي على صدري واضحك من كل گلبي وهاي اسولف الي اشلون تدعبلت بالشط والناس تتفرج عليها

وصارت عيوني بعيونه ....ما اعرف من اشوكت هو صافن عليه ...
مرتضى شجابه لهنا اول سؤال خطرلي ..
رجفت اوردة دمي وصل كهرب لكلبي
عبير وكفت من شافتني واكفه وكالت امشي ولج وظلت تفر بعيونها بينا
-لج عيب تباوعين للغريب لا يطلع صديق الولد

غريب ؟
هذا فتحت عيوني على حبة من غير سبب او وقت معلوم
هذا ما تخيلت رجل غيرة يلمس طرف مني
هذا زوجي الروحي معتبرته !
ضحكتي اختفت وداهمتني الدمعة السايبة على الخد .....
واني اضم ايدي عنه لا يشوف حلقتي وينعصر گلبه !
طلع ياسر وبيده طفل يبجي
- اتفضل مرتضى اتفضل
شافني ياسر اشرلي بحاجبه اجي ادخل ..
لا عفية والله مكدر افوت من يمه عفتهم ورحت متجه لبيت عمتي الثانية ماالتفتت منطيته ظهري وگلبي يمة يرف

كولوله شما التفت وجه ليصير كبالي
كولوله من دون زلم هوه الي شاغل بالي

دخلت لبيت عمي بجثة ترتعش والعب بحلقته الي لهسة ما نازعتها

اقوي يا شهد جاي وجايب طفل هذا يمكن علاوي حبيبي ما جاي الج لا ترجفين
الحمدلله ما اجاني عقل وضميت حلقته عنه ما اريد گلبة يعطف عليه .

انضربت على متني
-اوه عبير خرعتيني

- اشمالج ولج اكلتي الرجال بعيونج

هاا

-هذا خطيبي

بلعت ريكي كملت من رفعت حاجبها مستغربة وكملت الها الجملة

-السابق

- جا شنهو جابه

- جايب ابن اخته يشوف ابوه

-هاا نسيت هو اخو طليقة ياسر
اكلج الله يعوض بالاحسن
ان شاء الله شكله خاطب حريمة مبينه اتحبيه

-شنو تحجين انت اشمدريج خاطب؟

-لابس حلقة جا انه اتفرجت اعلية وياج
من وكفنا ناخذلة صورة

-صدوك تحجين متأكده شفتي حلقة

-وغلاتج حلقة فضة هم

الارض لفت بيه واجيت اوكع بحديقة بيت عمتي
• ياسر

اشمن بالولد واحبن بيه كبران الولد ومتغير

جدامي مرتضى
انه ما اتذكر شسويت وشصار بذاك اليوم
جنت بغير دنيا ... بس خليل كالي مرتضى هاد اعلية وحكة مسوي ليهم فضيحة بنص الليل

فالسكوت مو محلة لازم اواجه الموضوع

- خوية مرتضى......بخصوص سالفة جيتي ليكم نصاص الليالي

-انت كلتها اخوك ..والتمس لأخيك الف عذر
اني اقتنعت بسالفة اولاد خالك لأن اعرفك واعرف اصلك شنو وما تخيب نظرتي بالناس
ما انصاح الك شيخ الشباب عبث
انت شيخهم و غلطة الشاطر بألف
ما كان لازم تثق بالناس مرات الاقارب منهم تجي الضربة القوية

- ما ادري شكلك انت كلتها غلطة الشاطر بألف
ردنا عود نطيب النفوس وما نخلي تكلف و يحسبها تكبر اعليهم لان جدي بوقتها فضلني عنهم
بس بعد الي صار صار
مالي حكم اعلية

- انت ليش ما تجي اشوف ابنك
كالها وهو يداعب الولد

- والله مستحي اشوفكم وجهي

- اشلون شفته لعلاوي

-كبران ومتغير و بحضنك ساكت وانه
ما يريدني

-هههه يكبر ويفتهم
،
النفوس اشوية ارتاحت بجيته
سهل علية الطرق ظنيت ابوه دازه
ابوه انسان طيب و حكيم ،
بس لنص الحديث لمحتها للسالفة بعده اله خاطر يناسبنا ...وجاي يمهد الطرق

حلفت ما يرجع لديرته واجه رجل عمتي وابنها ....
ما خلوه يطلع حلفو براس ابوه يبقى بضيافتهم ويسون وياه الواجب .وانه خذيت الولد لعمته ...

لكيتها اعيونها حمر اخذت الولد مني ودخلت لغرفة عبير

اخ يا خيتي نارج صوبت دليلي

ثاني يوم الظهر راح مرتضى ماخذ علاوي وياه ....

انه الشوگ بيه تأثر حيل من جابو علي يمي واخذوه بسرعة .. اليوم الي بقاه مثل لمحة بسيطة

رحت گرب الشط كاعد ...
وافكر انه شراح اسوي حتى اكدر اربي الولد ...
ابوها بعد ما يردها ليه وين اجيبها لهنا انه اخوان احمد حالفين اذا ادخل ديرة جدي يصوبوني ، حلالي اتحرم اعلية ...
وهي هم مالي نفس بيها البنية مريضة
ينكسر گلبي اعليها اعاملها كمرة اتعصب واصيح اعليها انه نار وهي ملاك
لا تكدر تمتص غضبي ولا تعرف تجاريني
دائما شهد جانت تسألني انت مو تحبها ؟
ليش ما تتقبلها وترضى بيها ..
ما تدري
الحب يبدأ بنعجاب جسد او انعجاب موقف للشخص !
وينتهي بعشگ روح انه الروح لكيتها شفافه ما لحك يكمل الحب تحول لعطف وشعور بالمسؤولية وتعلق بشخص ملاك يحبني واشوفه متعلق بيه ...
باخر فترة حتى تعلقها اختفى و نفرتني
وانكسرت روحي اعليها مالها حول او قوة تحمي نفسها وصونها مثل البنات خلتني انهار اعليها وانه اتخيل غريب اتعدا اعليها
كلشي صار بينا دار بعگلي
انه الح على رجعتها لخاطر الولد
ما افكر لا بروحي ولا بيها كلت بيوم اجيب الها الي تخدمها وتراعيها واعزل بيها گرب اهلها لخاطر علي
بس انه شنهو دواي !

اخ ما اعرف آمنين الكاها من ابني البعيد لو شغلي لو جدي الغضبان اعليه وهو سندي عمامي كلمن حايرة بهمة ما حاسبهم سند قوي ...
وانه احبه فوك هذا كله جدي هو الي سواني ياسر .....

انضربت بطوبة التفتت ولد سمين شمرها عليه وراح ...
ورجع ضربني طشرلي افكاري

شلتها وشمرتها بالشط

ظل يبجي

ضجت اعليه
-عمي موتتني كاصدني(قاصدني) تشمرها اعليه كلساع

راح الولد يركض لمرة تمشي وبيدها كتاب

شكى مني العا الظاهر

وكفت كدامي ومتوبشة من صوتها عرفتها شابة

- ليش خطية كسرت بخاطر هاليتيم

- لا حول ولا قوة الا بالله
ثبرني يا خيتي كفخني (ضربني) بيها

-ميخالف طفل شمرتها وفرفحته اعليها
اشصاير اعليك لو ما كاسر بخاطرة.
على كيفكم ويه الجهال

- راح اخذه واشتري اله وحده
وما يكون خاطركم الا طيب

اخذت الولد من ايده يمها وكالت

-لا مشكورين لا تاخذة ولا تردة من البداية ولا تحط عقلك وياه اشمالك

-استغفر الله شنو احط عقلي
جيبي عمي خل اشتري اله وحده واخلص
فد مشكلة يعني

- ما انريد منك عوض بس على كيفك ويه خلگ الله
جرت الولد يبجي يريدني اشتري اله وما قبلت
اعتقد خافت عليه مني ..

لا حول ولا قوة الا بالله انه عايز حوبات انوب طلع يتيم

مشيت وانه اكول
خرب حظك ياسر لو تطك(تضرب) طابوكه تطلع مرقد ولي وتشور بيك طلع يتيم يحظي وامه ما تتحاجى اكلتني حاصل فاصل
،
رحت لبيت عمتي وهي تلمح الي على عبير
ومرت ابوي كالت اذا فكرت تزوج عروسك يمي
وانه حاير بزماني وذني عبالهن يجي يوم واجرب حظي مرة ثانية ....
رجعنا لبيتنا اني ، وشهد
وشهد اضوج من الرجعة اتحس بالوحده فظل دوم ببيت عمي ...

فترة وكامت تبجي على امي اتريدها واحتاريت بيها هاي ما بيه اعوفها وحدها بالمشخاب ....
كوثر فشلت زواجتها مرته الاولى طلعت ما موافقة ، مكذب عليهم انه ولا تدخلت شلت ايدي ....

•ياسمين
دخلت للبيت مكسورة الخاطر
انه ليش كلت اله يتيم وخليته يتعاطف ويانه
اشبيه طلعت غضبي وكبتي برجال ما اعرفة ..
دخلت وشفت خالتي ام ياسر تعجن

- خالة كومي انه اكمل

-اجيتي من المدرسة

- اي خالة ما اشوفيني يمج ..
خالتي ام ياسر اخت امي
ارملة من سنوات ما مخلفة وياسر ابن رجلها مشى عليها هاللقب لانها مربيته
انه بت اختها
يتيمة الام انه واخوي عباس عمره ٨ سنوات ..
ومرت ابوي مشوفتني الضيم والقهر راتبي كله ينوخذ مني وابوي ظالم ..
عمري ٢٧ سنة صار وموكف قسمتي لخاطر اربي اخوي واخدم وراتبي الهم ..
ماخذة نصيبي من ضيم من الدنيا
..
خدمت خالتي هم خطية عايشة ببيت خالي والخدمه عليها ،، ساعدتها ورجعت لبيتنا ...انه معلمة
خذيت اخوية ورجعت شفت سيارة ايباخ هذا الصاعدها شنهو يزوع ذهب(يتقيئ ذهب)

ظليت بس صافنه اعليها لونها حليبي

مرت من يمي وانه لمحت الي كاعد بيها ابو غترة الي جان كاعد صوب الشط ...
هذا الي طلعت حركتي بيه ....
عزة هذا طلع زنكيل يبعد حظي ااااخ اكول ليش ابسرعة راد يكفى لساني ما مهتم بفلوس الطوبة ....
شنهو هذا هنيالة مال وجمال شريد من رية بعد مرتاح باله اكيد !

وانه عبالي يخطف اخويه. هذا عبيس لو صاعد وياه هو الي يخطفة ...

وصلت للبيت ولكيت مرت ابوية كالبة وجهه اعليه انه شفت ابوي ماكو كبيتها عركه وياها وما اشتغلت
بس من ابوي اهنا اسكت الها لان طكه يأذيني ...وهي ما تشكي اله من يجي من برة تخاف منه يجي تعبان بس من اهنا ويشهد العركة يكتلني ...

• شهد
كاعدة واسمع اغاني حزينة على الفراق

وعرفت من كوثر ما خاطب مرتضى
توقعت حلقتي وافي بوعده وما نازعها ..

مطروحه على سريري واديه جوة راسي

مد راسه ياسر
-ادخل ..

- بعد دخلت

- الله كرمني وراح اخلص من اكلج

- ليش يابة راح تتزوج

-لا راح ازوجج

- هاا نعم !

- من كال ها سمع ،
خطبوج مني و وافقت انه !!!

- شنو هي بكيفك توافق اني تختة زلاطة

- انجبي وارجعي لخطيبج مرتضى طلبوج مني مرة ثانية
وانه گلبي خلصان
جدج وخسرته
هي ما تسوى بعد اشيل ذنبج ..
،

يميزان الذهب واتغش واحبك

وارد اكلك فرني حسنك يا بنفسج

وانت وحدك دوختني يا بنفسج

وعلى حبك انه حبيت الذي بحبهم لمتني

يا ياطعم ياليلة من ليل البنفسج

ياعطر عطرين

-مظفر النواب
من مرتضى لشهد

يتبع