رواية شيخ الشباب(بنت المؤمن) الفصل الستون 60 - بقلم زهراء العراقيه

#بنت_المؤمن
شيخ الشباب2
من كتابات زهراء العراقية
الفصل ٢٥
أن كان البارت يظهر لكم قصير احذفو القصة من المكتبة واعيدوها
اهداء للبارت المقطع ☝️
الحب يتحمل الموت والبعد أكثر مما يتحمل الشك و الخيانة

حاطتها كدامي صارلي بالنص ساعة و صافنه عليها ، اكره الضروف الي تجبرني ارضخ ولكيت نفسي اسوي الي كنت الوم فاطمة عليه و كفت كدام المراية  وثبتت البوشية(مثل النقاب غطاء للوجه)

طلعت اله كان بعده يشرب جاي بالمطبخ

- يلا لبستها
باوع الي بالتفاته جانبيه للتأكد كمل شرب و طلعنا تاركه الاطفال نيام وموصية من البارحه العلوية عليهم ،
عسى ولعل يرضى من نفذت طلبه وينسى قصة تدخل بابا،

وصلت للقسم بأول يوم دوام واني ما خلعت البوشية
ام محمود و نور تخرجن و زميلاتي هم ما اعرف احد من الدفعة هذي كعدت بأخر مقعد ومطلعة بس عيوني،
كان يوم صعب و ماعدنا محاضرات بس وحده  فخابرته اني مخلصة اشوكت ما كمل غده ،هو كال لا هسة جايج ،

-وين تجيني انت مو ببيت صديقك معزوم

الي اعرفه يم صديقة معزوم  ع الغده وهمه غداهم ب٣ اكيد بعد الدوام وهسة توها ب٣ وربع يعني بعد ما واصل لبيته

-ليش ما ترديني اجي شجاي اسوين؟

-كاعده وساكته شسوي  يعني
بس قصدي خلص غده وتعال

سد الخط
و من اجه طلعت اله مسافة مشي  ما يسمحون اله يدخل ..

-ليش ما ترديني اجي ؟

-ردت اكلك خلص و تعال....اني المن خابرتك لعد....ماجد....ماجد ليش دومك عصبي هليام

ما رد و صاير كلش وجه ما يكصة طبر

بس دخلنا بعدني ما نازعة عباتي اخذ جنطتي وطلع تليفوني يقلب بيه وحطه ع الميز ، وهيج بدت معاناة الشك والسؤال و الجواب طول الدوام

عنده جدول محاضراتي  و يحسب عليه الدقايق اذا اتأخر دقيقتين يحقق وياي و تليفون صار بلاية رمز لأجل على راحته وكدامي التفتيش صار واجب ،حتى بثخن جواريبي يدخل اصلا اهه هو صار يجيب الي الكفوف والجواريب ويختارهم على ايدة
هذا كله واكول تهون مدام احبه اتحمل

نايمة واحس نفسي مختنكة حاولت اطلع راسي لبرة ما هدني ،

-ماجد طلع راسي اختنكت
ما قبل ..

كعدني الفجر اصلي ، خلصت وكلت اله واني انطرح
-  ترة بالليل خنكتني وبالكوة اجر نفسي

-هسة حضني صار ما يعجب
من داومتي

-شنو !......هسة الدوام شعليه؟

انطاني ظهرة

"ياربي هذا ليش هيج تنحس كنا يا محلاتنا قبل لا يبدأ الدوام كأنه طفل يسنن متنحس فد نوب"

بيوم جمعة لكيت العلوية مسوية حملة تريد تفرش شتوي ..

الضحى وهي تنظف اني رحت اطبخ .

سمعت هوسة الاطفال تعاركو ..
لكيت بتول تضرب بأخوها وصادق يدافع عنه

-ولكم شكو

بتول
-يبسطون بالجهال شبعو فاطمة كتل

تقي
-جذابة الصفرة

-ولك منو صفرة عيب

كامت تبجي بتول
و خرمشته لأخوها

صديق يضحك
- الصفرة الصفرة

- اش ولكم
لا تبجين روحي غسلي وجهج وبعد لا اضربين اخوج....وانت لا تضرب فاطمة
وشنو هاي الصفرة ولك

تقي- ههههههه هي  صفرة خالة مرتجى  اتكول عليها

صديق - وانت الاكطش هههههه

تقي-انجب

-هش كافي
شنهاي الالفاظ ولكم

على الغدة

السيد ابو مصطفى اجه الظهر هو وماجد من الصبح طلعو للزيارة وصلو صلاة الجمعة ..
،
السيد محمد
-اليوم فارشة شتوي

-اي قبل لا يداهمنا الشتا

-تعبتي اكيد لو منتظرة العصر اساعدج

-اي والله انهد ظهري

ماجد كال الي
- ما ساعدتيها ؟

ردت هي عليه
- لا خطية حامل شتساعد
اني ما اريدها تتعب نفسها

بلعت اللكمة واني اباوع الها بستغراب
اني طبخت الغدة و لمعت الها الاثاث
ليش اسوي نفسها هلكانه ما يسوى؟

-بابا اني اليوم غسلت ويه خالة الحصير

ابتسم الها ابوها

العلوية-و خبصت التايت خبيصة
و بس تكتل بالجهال موتت تقي كتل اليوم
بتول باوعت الي
وكالت- جان يكت...

ما خلاها ابوها تكمل ما مهتم لكلام العلوية
-اكلي بوية اكلي

من خلصنا دا نلم بالسفرة سوة
العلوية كالت
- عفية محمد كل لقاسم يذب الزبالة
ما يصخر شلع كلبي

-ليش بوية هيج

قاسم-  ها بابا

محمد
-عوف التليفون وكوم كافي لعب
دخل ماجد وهو ينزل بردنه توه مغسل عن الاكل
-عاشت الايادي زنوبة

ابتسمت اله عرف يميز طبخي

دخلت وراه ادردم
- ما تنحمل اذا احد عطس بوجها تشكيه لرجلها ما يصير هيج

- اشبيج تتشكين

-ماجد ترى بزعت منها ما دا اتحمل تعاملها ويه الاطفال كلشي وشاكيه
وكلشي ومسوية نفسها مهلوكه بيهم
اني دا انحاز الهم خاف بيوم يصير صدام

-ميخالف لا تتدخلين ابوهم يعرف يميز بين اللغي الفارغ وبين اشوكت يدخل

اختصاراً للحياة النمطية العيشة صارت روتينية،تعودت على الكوابيس صارت شي روتيني المهم ما اهلوس بالحقيقة   ولا اشوفها من اكعد ،والشك والتدقيق بمرور الايام تأقلمت وياه لأن اصل المراة العراقية تتأقلم مع ضرف مثل النخلة تتحمل عبأ المحيط عليها وحتى لو ازعل من داخلي تجي ايام اخاصمه وارجع لأن احبه و اغفر واعدي وامشي اهواي مواقف اكول تهون واتحمل وتجي مرات احسه سجاني و احس نفسي اتعرض لظلم كبير بسبب مالي ذنب بيه اني مو غبية فاهمة  من ذاتي الخلل بزوجته السابقة و شبه متيقنه السبب والا ليش جن من دراستي وهيج رقيب عليه واني والله احاول اريحه و اسولف اقل تفصيلة بيومي ، اما جانب العلوية توضحت شخصيتها  مو ضعيفة مثل ما كنت متوقعة بس تريد تعيش حياة طبيعية تزوجت واحد مقتدر ماديا بس الدنيا ما تنصف وتجي عدلة عنده ست اطفال  هي ما اتريد تدفع مقابل هدية الدنيا الها زوج صالح طيب و تتحمل المسؤولية  و من بداية زواجها لليوم هي تراجع ع حمل و
،  هو راعاها و قبل رغم اعرف ما يريد بعد ، و صرت احس ما بينهم أتلاف حتى هي مو ذاك الحب تكن اله وان كانت ببداية زواجها اتريد ترضيه هسة بعد ما ثبتت نفسها و عاشرناها ضهرت شخصيتها الطبيعية ما تتحمل طفل غيرها  وحملت  واعرف السيد قبل تحبل لخاطرها لأن العلة كانت بزوجها المرحوم  وهي محرومة ، اني طالبة  اسوي الاعمال الي عليه بالليل من عشا و تعزيل مطبخ ، واعمالي الخاصة والصبح اقرة وهم ايدي على الاطفال رقيب للظهر بعد اتوكل لدوامي  ومخليه ابن اخوه يوصلني وهو يجيبني ،

بيوم احد بداية الاسبوع كان يوم نحس عليه ..
كعدت الصبح سويت ريوك لرجلي وللسيد ! والاولاد كلهم مدارس اهلية و صباحي ، عدا مصطفى حكومي بس اصلا هو معايش يمنا اخذ غراضة وملابسة وراح ببيت جدة اهلي يكول اكثر هدوء ومكان مناسب الي للدراسة
العلوية من صارت حامل  صارت ما تكعد الصبح حسيت بأوجاع غير اولد واخلص ، باوعت لتاريخ الشهر بعد ٣ ايام على الموعد الي كالته الطبيبة

حطيت   الجاي على التهدير ونصيت عن مخلمة البيض ورحت للاطفال صحيتهم

-يلا تقاوي صدوقي
طلعت الهم ملابسهم وقماصلهم حضرتها كلمن على حافة سريرة و خضيتهم خض الا كعدو سكرانين 
رحت لبتول وقسومي هم كعدتهم
لكيت ماجد كاعد على الارض بالهول ينتظر ، ركضت لحافظة بيها باكلة مسلوقة بالثلاجة  طلعتها  وسويتها اله مثرودة باكلة والجهال يمي بالمطبخ كاعدين يتريكون ،كعد عبود ركضت نزعته حفاظة الليل هو وفاطمة  وكعدتهم بمكان اخوانهم الي خلصو ، ركضت حطيت الفركاعه والدهن الحر للمثرودة واخرها رشيت عصير رمان عليها وحطيتها بصينية وكدام ماجد ، صباحي ركض بركض واني امشط لبتول حطيت حليب على النار وكافي بالمطبخ مشطت الها ،
بتول
-يوه خاله هم كصيبة صفح

-اي مودة اشبيج

بتول بضجر
-كل يوم

ابتسمت بتأنيب ضمير كوني ما اضبط الظفيرة العدلة دوم اسوي الها صفاحي اسهل

كعد السيد قدمت اله الحليب و صمونه كهربائية عكس ماجد بالأكل  ما يكملها

و كعدت كدامة اريك بعبود ما ماكل كان يلعب بدوني
دخل ماجد وبيده صينية الريوك مالته

صاحلي من طلع رحت وراه، رزلني لأن ناسية اعدل ردني من كاعده كدام السيد ،وطلع وهو متعارك وياي
كرهني بيومي،   صعدو الاطفال لخطوطهم الا ارتاحيت ،
كلت كلها راحت للدوامات خل اكعد اقرالي كم كلمة اليوم اخر امتحان امتحنة قبل الولادة وتبدي اجازتي والحمدلله الله سهلها مع اساتذتي و تم تأجيل بعض الامتحانات المستقبلية نظرا لسبب الاجازة ، اجو خطار امهات العلوية اني طلعت سلمت و دخلت غرفتي حاطه الجهال يمي  واقرة
التهيت وطلعو للهول ،دخت من سوالفهن توصلني صعدت لفوك لغرفة صوفي اقرة بيها، وسمعتها صاحتلي ..
نزلت الها  للمطبخ

-ها علوية

-عفية اني وخالتي نروح ساعة زمن وما نتأخر للسوك

-ها !؟

- بس الدجاج ما عدنا شي بس يموع احمسيه وركبيه عفية
واني ارجع اكمل التمن

-اوك
استحيت ارفض اني حايرة بمتحاني ويني وين الطبخ

ظلن خالاتها اثنين يمنا و اني ركبت التمن و صارت الساعة ب١١ ونص على السريع بدلت 

صاحتلي خالتها لكيت عبود مبدي ماي مسحته و بدلت اله ومنتظرة الخط وكلبي نار ادك على العلوية ترجع لخطارها والاطفال وما ترد ،
رحت واني لابسة عباتي وجنطتي انتظر الخط يمهن بالهول
كلت لوحده منهن
-عفية خالة حروح الخط مالتي راح يجي الاطفال يمكم بلكت اشوية وتجي العلوية

وحده منهن كالت
-اي خوش خالة

والثانية كالت
-العلوية متعوبه سودة عليه وي هالايتام وهمه هم خطية
خالة حببيهم بيها  ليش يكروهها انت خالة يا يمة ما دايمة الهم حتى يصيرون بس من جانبج

وحده مرة جبيرة  هاي شحجي وياها بالله وشنو تقصد شنو من جانبي شنو يكرهوها ؟

-ما فهمت خالة اشبيها العلوية

- الجهال اهواي وهي شما سوت مرت ابو
يبدون نفط حاجة هي تحاسبهم ميخالف امهم هي بعد صارت وحامل بأخوهم

عزة فهمت توني !

قبل ايام هي حطت ببطل نفط للحرمل و عافته مفتوح و بداه عبود فصارت عصبية على الولد ودفعته اني كلت الها هو طفل المفروض ما ينترك يمه شي
اعتقد اسلوبي كان بيه نوع من الحدة لكن مكنت قاصده عادي اصير اللحظات الواحد بيها يصرف غلط بس ليش شاكيه لخالاتها على هيج سالفة كلشي يوصل لأهلها ونفس ما تتشكى لرجلها تاشكى لاهلها طلعت

تضايقت و اجه الخط ورحت لبرة
لكيته نازل من السيارة الولد
سلمت عليه وردت ادخل
سألني اذا ما بيها زحمة يدخل للتواليت

دخلته هو من  عمر مقتدى وابن اخوه لرجلي  يعني ابن حماية

دخلته لتواليت الحديقة ووكعدت على المرجوحة اكنك على ما يطلع طلع وكفت نطلع اني خلفة،  دخلت  العلوية سلمت على الولد  و دخلت   رحنا بعدها للدوام ،

المغرب وية الاذان صارت رجعتي ويه ماجد

-ماجد باجر اروح بعد لهلي قربت ولادتي ..

ما جاوب
سالته  عن شي ثاني هم ما رد

يوه بس لا  لاحظ هم شي و راح يكعد يأنبني عليه ، شو بوشيتي من اطلع من القسم حتى اعيوني اغطيها وما ناسية الكفوف شنو ملاحظ لخاطر ربه
دخلت للغرفة وكبت العركة بينا
-ليش مدخلة الولد للبيت وانت وحدج

ذيج الرزالة والصياح بجاني ما يسمع مني

طلعت للحديقة الدنيا ضايكة بيه

كعدت ومن صدك بديت افكر بهم هم جبير على گلبي طبعة جاي يزداد كل ما اتحمل اكثر كل ما يزود كأنه يختبر صبري...

-ليش اهنا كاعده باردة ؟

نزل من سيارته بعد ما صفها بالكراج ..
واني من دخل حتى ما بيه حيل اكوم
عفته يشوفني

وكف كدامي الظاهر شافني امسح بدموعي

-خير بوية ؟

-ماكو شي
صوتي واضح باجي

ودرت وجهي عن سيد  محمد بهاي اللحظة كلت هو بلاني بيه

- كومي بوية بارده كومي

ما كمت وين اروح ارجع لماجد وهسة هو متحول عليه

- ليش تبجين

غير يعوفني بحالي ما راح انوب كعدلي 

خلاني انهار من عطف حنانه مذكرني بابوية و بجيت بصوت

اكره نفسي من ابجي واحجي صوتي يصير مخنوك وعاصف بالشهكات  واخربط بالكلام

- الشك دمرني.......ولد راد يدخل بيت عمه......يقضي حاجته  من الحديقة ويطلع اني امنعه

ما فهم عليه وظل يكلي اسكتي بوية بس اهدأي و فهميني يا ولد دخل ..

-يا ولد زينب

- امير ابن اخوك
دخل للتواليت وطلع و الله
مكنت وحدي بالبيت خالات العلوية جوة
وهو ولد صغير حاله حال صوفي ما اعترف بيه رجال

- كلب الجو عليه اخوك
اخر جملة كلتها ببجي وعصبية

-هو وين كان لعد ؟

- بالدوام

-اشمدريه؟

ظليت ابجي وما بيه احجي الدنيا طلعت من عيني
بالتواسيل الا خلاني ادخل من ممر المبطخ وجانت العلوية بيه

-ها زينب شنسوي عشا

محمد-سوي انت العشا

-لعبانه روحي سيد

اكيد ما لاحظتني مدنكه ومنهارة ما تباوع لأحد غير روحها

-عوفيها تعبانه سوي انت اي شي بسيط وصلي الا اسوين لا تنسين الصلاة!

روحي بوي اتوضي وارتاحي واني الي كلام وياه

التفتت عليه
-لا عفية لا تحجي وياه حسبالة اني اشكي الك ويتعارك وياي هو وحده يهدأ و يراجع نفسه تعودت

العلوية وكفت بينا ما فاهمة شي

-وانت يا علوية ليش كلشي يصير يتسولف  يمتى وحدنا كنا مو خالاتج اهنا

-يا  على هاي ؟
اني ما كلت اله وحدكم هيج اجت سالفه وكلت اله اصلا الموضوع مو بالي!

رحت اني بزعانه منها لان ماجد قافل  هي كايلة اله وحدنا و العلوية طالعه وهو ما يسمع مني من كلت اله خالاتها بالبيت نار صاير من يهدأ وتنحل بس كود اني اهدأ وترتاح نفسيتي صفر ، عفتهم السيد يرزل بيها

لكيت ماجد كاعد وضارب صفنه ..

بهاي الزعلة ما تركني لثاني يوم ،راضاني بالليل اعتقد اخوه مفهمة  و اعتذر مني وكالعادة الاعتذار يغفرله عندي وانسى واكول بسيطة مدام يحبني كلشي يهون ..

ثاني يوم بدت اجازتي واخذت هالولدين فاطمة و عبد ورحت لهلى اتهيأ للولادة ،،

كعدت بليلة الساعة ب ١٢ وما كدرت ارجع انام من الوجع لل٣ اجني الي يخلن الواحد يشاهد ..

دكيت على شهد مرتين مبيه اصعد الها ما ردت نزلت الي

انفتح بابي

-ها زينب عندج ولادة

-اي شهد  عفية كولي لمرتضى

اشتغلت الاضواء بالبيت
ما حبيت اكعد ماجد كافي اهلي سلبت راحتهم
وطلعت ويه مرتضى وشهد وصلت للحديقة دريد اكعد بالسيارة ولحكنا ابوية ملثم بهليل القارص

و اخذوني للمستشفى بالطريق بردت وراح الوجع  الطوارئ   كالو بعدها ما عدها ولاده
اني هم كلت ارجع ما احب المستشفيات باجر العصر وعلى موعدي ويه الطبيبة اولد بالعياده
طلعت ويه شهد وبابا خطية بعده واكف النا بالاستعلامات ما راجع للسيارة و اتلكاني واحنه دنمشي للشارع اني افرك كف بكف من البرد غطى بابا كفوفي بغترته الخضرة!
ودخلني للسيارة ادفى
ظليت اباوع الها واني اتذكر اشكد تعني لوالدي هذي الغترة انطاها اله مرجع ديني متوفي رحمه الله و سيد من نسل رسول الله ،  وظل بابا معتز بيها رغم هو عامي ، نهايتها الي من نزلنا كلت اله ما ارجعها منا من اولد احسها فال خير عليه
ابتسم والدي وكال هاي الج اخذيها بس لا تهمليها( تذبيها) انطيها لأبنج السيد

ثاني يوم الاوجاع زادت والله سهلها للعصر اني عندي ولادة اخذني ماجد وشهد ومرتضى ويانه
ولدت بالعيادة اشويه صار تعسر و صارت  امور طبية متعبة لأني بكرية ،
تركتني الطبيبة ويه المساعدة تنظف بيه و تغيرلي ملابسي خلف الستارة .
وهي حطت الطفل ونظفته الي ويه شهد الي مدري اشبيها تبجي واني اغفي اريد بس انام ....

خلتني الطبيبة نايمه على السدية و والطفل يمي يبجي ما اعرف شسوي اله
وشهد طلعت تبشر ماجد ومرتضى ..

طلعوني بعد الولاده بربع ساعة للسيارة
والطفل يم شهد
وصلنا للبيت وذبيت نفسي نوم و الطفل و ماجد ما اعرف عنهم شي

باليل كعدتني رقية

-ها رقية اشوكت اجيتي ؟
-من زمان
انت نايمة والطفل شلته شلته حلووو

-وينه

دخلت شهد
-ها زوز دكعدي عمتج وحمواتج اهنا وعالكة كلها اتريد تتحمد الج على السلامة

-اعتقد نازفة اهواي خل اغير بس شو مبيه اكوم

كومني للحمام و غسلت الي رقية وطلعت لكيتهم بغرفتي ينتظروني النسوان

بعدها جاي عمي ابو ماجد وصار العشا
واني عمتي حاطه الطفل واشربه ماي وشكر كاتلة الجوع ..

شبعوه وانطوه الي

وباوعت اله اول نظرة تركيز  الي عليه

"حبيبي قطعة حمرة وجه مطرك
تعبتك حبيبي الا طلعتك
سودة عليه"

ظليت مبتسمة اله
من يوم ما عرفت جنسة وهو صارلة اسم حسين وهو داخل بطني

بيومها بات ماجد يمنا وكلساع احسه يفز يباوع لأبنه ومن يكعد يكعدله هو
ثاني يوم شهد اقامت يمي ..

ظليت يم اهلي عشرين يوم  وبعدها رجعت للبيت و معاناة خلصتها السنة
كون عندي رضيع ،نصها غيابات و بس احضر للامتحانات ومن اداوم اعاني
مو دوم احطه يم العلوية اضطر مرات  اروح احطه يم شهد ومن ارجع اخذه او اروح يم اهلي وقت الامتحانات اظل يمهم فترة هم الولد احطه يمهم وهم اكدر اقرأ ما عندي مسؤلية بيت لان العلوية اشوية تراجعت عزيمتها بكسب اهتمام السيد التهت بالحمل وتضغط علية ... ولحد ما استعصي عليه الامر من شهد حبلت و تعبت وراحت لبيت اهلها ، مو بس ابني احتاريت بيه لا امي حيل احتاريت بيها لأن من  تزوجت كوثر ياسر رفض رقية تعيش وحدها وسحبها لبيته الثاني وشال منا استقر ببيت واحد وابوية ما تدخل بعد ترك رقية تستقر ويه زوجها ، فماكو احد يمها بس كثر الله خيرة لياسر من وحده من شهد راحت يمه خلة رقية ببيت اهلي عاد تساعد امي وامي ترشدها ما تعوفها وحدها  ، مرات اخلي حسوني يم رقاوي وامي ومرات يم العلوية ومسلكه اموري على الهاوية 
ويه ماجد بس يريدني ابطل ، حتى مرة كال بطلي وانزعج البوشية !
بس مقبلت بالمساومة
خلصت السنة الا ارتاحيت و لكه ماجد بيت قريب على بيت اخوه بهاي الفترة، ما قبل يشتري يم اهلي واني اشكد ردت بس مكدرت اقنعه يريد يم اخوه حتى يم اهلة ما يريد
بيت هم غالي وهم نازل بناء متهالك .. هدة وكقطعة يريد يبنيها لكن اهنا البيوت غالية فلوس بيتنا كلها دفعناها و سوة سلف للبناء من راتبه وبعده ما قابضها
،،،
من رحت لأهلي
انطتني شهد الفلوس الي ضامتها يمها
اربعة مليون من مهري وانطيتها اله، عاد يدفن بيها القطعة و يدك الأساس

ثاني يوم مدحني اهواي السيد محمد على تصرفي ويه ماجد وعرف الظاهر من اخوه
علاقتي بالسيد ذاتيا صارت اكثر قرب
لان أني  اقرب لأطفاله من مرته ودوم اسولف اله سوالفهم المضحكة او تطوراتهم وبالعطلة هي سلمتني بيتها من راحت يم اهلها شهر تعبانه من الحمل ،

اني هم حسيت اشكد الاطفال تغيرت نفسياتهم بدت ترجع لأصلها وحسيت اني كنت مقصرة بحقهم وملتهية بدنياي

ماجد اه يا ماجد رجع واحد ثاني واريحي و متعاون كلش يعني اقل تفصيلة بيه ينتبه الها لقصة شعري لوزني ويمدحني احب تركيزه بيه و اهتمامه بيه اهواي اشياء حلوة ما متوفرة بهواي زلم وروحه شبابية من يطلعني وياه  هو مو مثل السيد حيل ملتزم لا معتدل بس اخ من يبدي الدوام اشلون يصير شكاك !
هي بس هاي العلة  خايفه لا يرجع الدوام ويرجع يختلف عليه يامن يخلصها للسنة الباقية الي واخلص
*
اجونا بيوم بيت  عدنان  ابو هاشم ..
شفت صوفي  ردت ادزه للمحل ، واكف كدام مرايته ويعدل بشعراته

-صوفي ماعدنا خبز عفيه جيب وبطريقك جيب حبشكلات للجهال

-دزي قاسم

- طالع هذا

-هسة لعد

-اكلج هذا البدي حلو لو الازرك احلى

-شنو وين طالع انت

-ما طالع

-حلو الماروني عليك والازرك هم

نزلت  مستغربة اشعنده كاشخ بالبيت

كعدت يم الخطار والسيد هم كاعد بس ماجد طالع
دخل صوفي وكعد كدامي وبنت عدنان يمي كانت شو هذا كلساع ومباوع عليه

ابتسمت واني الاحظ سرقات نظرات اعيونهم

السيد - جبت خبز بوية؟

-ها اي كايم بوية كايم

ضحكت من كال بوية عود هو رجال كدام البنية ما يكول بابا

بنت عدنان ١٤ عام حليوه بعدها ما مبوشيها وصوفي بفترة عطلة مراجعة قبل الامتحانات  اجه يمنا من البارحه وعاف بيت اهلي وعرفت هواه المن رايح لبت عدنان ، بعد الغدة اني كمت و وياية بت السيد عدنان نعزل المواعين
دخل صوفي

-ها خالة محتاجه شي؟

-لا خالة روح

- ثوبج خالة  حلو

التفتت عليه وهو مبتسم

-روح مصطفى روح
عكدتله حاجبي

هو عرفني فاهمته وعادي ما يخاف مني

- لا ترحين باجر لبيت عمو احمد

باوعت الها وهي مبتسمة وخجلانه وتغسل بالماعون

كلت-سمعتي كلام ابن عمج

تضحك الفطيرة
هذا وكف يمنا وما طلع يدك سوالف والبنية خجلانه ما تحجي قليل

- عدلي ربطتج

-ماكو محرم غيرك ترة اخوانك ما مكلفين

-ميخالف خل اصعدها ليش نازلة
على عيونها
يحجي بصيغة امر وياها وحسيته اشكد كبران !
اجانه صوت السيد محمد

-شسوي اهنا ؟

-هاا !!!

كلت اني بخبث
-يذبلي الزبالة

ابو يكصه بنظرات مو خالية وهو اخذ الكيس شده وطلعه للحاوية البرانية البنية خلصت شطف وطلعت التفت للسيد الي يحمي الجاي لروحه

- صوفي كبر

- اي كبر ابني البكري عينة فتحت على بت عمة

- كشفته

- ادري بيه جاينه اول تالي يعوف بيت اهلج
مبتسم كاشف الاعيب ابنه

-بس يثخن اخذها اله

- ههههه صوفي عريس ما اتخيل هههههه

- المصيبة الاكبر  اختار بنت عدنان!

ضحكت متذكرة عصبيته حتى بالكلام

-صدوك اشوكت تجي العلوية اشتاقينا الها

- كم يوم
كالها وهو يشرب الجاي

-اشلونه ماجد هليام

كلت مبتهجة
-كلش  زين كون يظل هيج يارب

-امين

و بدأ الدوام ورجع ماجد للشك مالته مرض مو شك ،
بيوم رحنا لبيت اهلة اني الظهرية بعد الغدة  رحت لغرفة عمتي فارغة  اخذ راحتي واني ارضع حسوني واني ارضعه طبيعي وممة هم ، اتصل  بيه
صوفي ويسألني على بت عمه جاية لو لا

- ههههه والله وشفتك واكع

-خالة دجاوبي جاية لو لا

- واحد غيرك ينتبه لدراسته يا صيدلاني المستقبل (طلع قبولة صيدلة)

-هسة دكولي سمعت كلامي وما اجت

-اوف يالفارض شخصيتك لا ما اجت
يا عاشك
يا ولهان خف عليه بالاتصالات صرعتني  اليوم واني كلساع.....اكلك باي

قطعت المكالمة لان شفت ماجد واكف يم الباب ، دخل وسحب مني التليفون

- منو تخابرين وعاشك ولهان؟

ظل يباوع للرقم كأنه ما صدك دك عليه الا  صدك شمرة وكع على صدري

-  اشكد اكره تصرفاتك  هاي
عود تعال  بعدين اعتذر ما اوصيك

طلع ما حجي وياي وكال لمدري المن وخري عن طريقي ، دخلت اخلاص اخته
كنت امسح طرف دمعة طلعت
- ما  تتركين هاي الدراسة المهجومة وتريحين نفسج

ما جاوبتها مالي خلكها ..

سدت الباب

-  والله انت بت شيخ و مرباية ونعم الاخلاق والتربية ما تستاهلين الي يصير بيج
جنت عبالي مو خوش مثل مرت عدنان عامية لا والله طلعتي  درة احسن من العلوية لميتي جهال اختج ومتحملة
طبع هالماجد ..

ما تجاوب وياها على صراحتها الغريبة! اخاف منها تريد توكعني واسوي عليه كالة حيل حذرة وياها ..

-ماجد هذا فد جان سبورت و طيب والله احسن اخوتي لا متشدد ولا شكاك
راح اسولف الج ليش صار بيه منو ورة الي ما تخاف ربها

دخلت امها وهي سكتت وطلعت واني ظليت كاعده بمكاني مزداده سكم
،

اجاني ماجد واني ظالة عازلة نفسي بغرفة امه ما طلعت منها صارلي ساعة

كعد يمي واعرفه من يريد يرضي

يحط ايده على متني  ويبوس راسي

- حبيبتي ماشيني  شسوي طبع مو بيدي
ظليت ساكته

-يلا  البسي عباتج و روحي  لبيت اخلاص اتريدج تحفين الها بس اهنا هوسة
وراح انطيج الثقة ترحين وحدج

من طلعت من بيتهم وهو اشر الي وين بيت اخلاص هزيت ايدي هازئة من الوضيعة طلع كدام بيت اهلة و واكفلي بالباب خوش ثقة رحت الها واني احف الها وكفتني عن الحف  وسولفت الي، الي اني فاهمته  تقريبا من ذاتي" مرته الله يغفر الها ذنبها امها مرة من اهل الله كانت تجي تشتغل ببيت العلوية ام ماجد سابقا   ومن كبرت بطلت ..
بس ظلت تحضر دروس دين بمضيف العلوية ام ماجد و تنطيها مساعدات لحد ما بيوم شافت بتها وعجبتها وهم لان يتيمة وطالبة كالت ازوجها لابني واريحها واكسب بيها ثواب لخاطر امها يعرفوها ويحبوها ، بس البنية بالصدفة ماجد بعد زواجه منها شايف رسائل بينها وبين واحد طالب وياها
بس رسائل مو ذات جرئة قوية بس تدل هي على تواصل مع حبيبها السابق  وداها لامها و كايل ما اريدها بعد هذا الكلام ، هي حامل وامها نذلت توسل لماجد يرجعها و لخاطر امها رجعها وسامحها .

من توفت، اخلاص تحلف تكول

- واني الم بغراضها واعزلهن لكيت خزنه ذهبها بس تنفتح  هي عبارة عن صندوك صغير  لكفته وكلت انطيه لرجلها لا ياخذنه بنات خالتها الي وياية يعزلن بغراضها من راحن ما لكيت مفتاح الصندوك
كسرته  كلت اشوفه ذهبها ،شفت تليفون بين غراضها
فتحته ما بيه رمز و استغربت لعد الجهاز الي مكسورة شاشته و كال ماجد مال المرحومة وياها بالحادث انكسر شنو ؟
مالي قصد بيها والله  من فتحت الجهاز

اني باوعت لاخلاص صفح

-شفت يختي بلاووووي يابو بلاووووي
شكلكج اكو كلام بينها وبين زميلها ما يلبس عليه ثوب اني مجنت اعرف هي عدها سوابق و ماجد لاكفها بعدين عرفت بس مسكين مجان يدري عدها ٢ تليفونات مشترية واحد بالسر من افلوسه و تاخذ من اخوية و تدز ارصدة
لذاك !  بس شنو من كلام جريئ وفيديوات وياه بالجامعة ضحك وسلفيات واكل..
طلعت تعرف واحد على رجلها ، واحد جانت تعرفه قبل ماجد من ايام ما جانت بالاعدادية حتى قبل لا تدخل جامعة و وصار وياها زميل بس الظاهر لان فقير طمعت بالزنكيل واخذته وتندمت ورجعت اله الي ماعدها مخافة الله

- علوية شنو هذا الكلام جبير

- اووف كرهته بعيشته

- علاقة كاملة لو بس الي شفتو؟

-لا  مجانت تطلع هي غير للدوام وهم من خلال كلامها ويه ذاك العار مبين منه ما صايرة بينهم خلوة فراش
بس الكلام يا اختي هم خيانه جبيرة
والضحك والسوالف كلها خيانه ..
هذا غير الرسايل استحي اكتبها لرجلي!

ظلت اخلاص تحلف بيه ما اكول لاحد محد يدري غيرها هي ومحمد وعدنان
واذا عرف ماجد كايلة. الي تخرب علاقتها وياه
تكول والله ردتج تعذريه وتعرفين تتصرفين وياه ما ينهجم بيتج فكلت الج ..

طلعت من بيتها مسطولة بالكلام الي سمعته رجعنا لبيتنا واني ما اعرف افسر مشاعري هو عبالة بعدني زعلانه منه بس اني بوادي ثاني" هذا لو اجمع مصاحف الدنيا واحلف اله عليها ما يثق بيه بعد سواية مرته الاولى اشلون كدرت هيج اسوي كل ظني الخيانه اصير اكثر شي من قبل الرجال فقط
معبالي اكو نسوان تخون وهي مدللة؟
اهنا حلفت ما اسولف اله سالفتي الصغيرة التافه مال الاشاعة وسبب ترك عماد الي لو مهما يكن ...

ولدت العلوية
وتحقق حلم فاطمة  واجت اخت لبتول واحنه وصلنا مرحلة ببنائنا وتوقفنا خلصت افلوس السلفة الاولى ومنتظرين القبضة الثانية...
اهنا صرت من غير قصد فطريا مسؤولة عن الاطفال و همه ما يسون شي الا ياخذون اذن مني همه خلوني وصي من غير ما اسعى ، وهي مكان عدها مشكلة محتارة ببتها ورجلها حسيتها بدت تحبه من صار الها من عنده طفلة

عبود ابني الي اني ماما وماجد ومحمد اثنينهم  بابا يصيح الهم ،
بت ماجد بعد ما توفت بيبتها خوالها ما سالو عنها و اصيحني ماما واني هم ما فرق انطي الي حولي على ما اكدر امان
حتى الزوج المتعب احبه وخايفة عليه من شكوكة صرت اكثر احتواء لطبعة و اجي على نفسي اهواي اهواي لحد ما بيوم وكعت عليهم واني بالحمام ومحد يدري بيه كعدت لكيت نفسي مفشوخة ..
طلعت و كلت لمصطفى ، ينزلي من غرفته..

-ها خالة

- نفسي صوفي وكعت و نفسي هسة يحركني

جاب كطن و قطب كصتي وراح كال لأبوه
العصر اخذوني للطبيب ماجد ومصطفى .

وطلع عندي بداية ذبحة صدرية !
زين من صبرت عليه كل هاي المدة اني دومي اعصابي تعبانه وكلبي خلصان جبتها شبابي كله اشلاع كلب ..
من شافني واصلة مرحلة تعب الا حس بيه ، 

نايمة بفراشي بعد يوم حافل بالاشعة والفحوصات

-هاج حملت الج الواتباد

كان هو قبل بيوم حاذفة بحجه ماخذ كل وقتي بالليل اسهر عليه واعوفه
اخذته وطلعت قصة اكملها من غير ما اباوع لوجه حسيته يفرك بمتوني
عفت التليفون ونمت على بطني

-اي عفية اصفاحي اصفاحي مرغهن

نسيت الزعل ! شسوي احبه متأملة اخلص الدراسة الكشرة ومن اظل كاعده بالبيت يرتاح بس شسوي الدراسة ما اكدر اعوفها صايرة حلم عنيد الا احققه لأني اعند منه وقاسيت اهواي اريد اثبت لروحي شي بس ما اعرف هو شنو! المهم اني صح
رسلت هاي القصة بفترة مرضي للكاتبة زهراء و كنت دوم اقرأ قصص وما زلت
اتابع، هذي القصة بيها اضافات منها بقبول مني حطتها لان هي دوم تكول ما احب التقييد اني كاتبة مو دا انقل قصة
لدافع المصداقية دانكول الكم كوثر مستقرة ببيت زوجها ... شهد ولدت قبل كم شهر بنت سبيعية واول ما اجت عدها نقص بالرئة و بالصلوات والادعية الا ربنا استجاب لأبويها وعاشت ،بس ما زالت دومها متعلعلة الطفلة ..وهي حاليا صغيرة بعدها كم شهر 
ياسر مستقر ويه مرته  ياسمين بت عرب و تحبة  حتى سولف الها عقدة طفولته و  كدرت تحويه و كدر يصير طبيعي بنومته بجانب اي شخص من غير ما يتخيل اله الشخص الي ينام يمه يخنكه ! نعم ما كان ينام يم احد ووحده بسبب هذا الهاجز يجي هو ونايم . رقية  متألفة ويه ياسمين لأن رقية بركة وين ما تحطها تطرح خير بس الدور الاكبر برعاية رقية الحجية مرت ابو ياسر...
والدتي نفس صحتها  و وضعها وبمساعده ابوية وشهد بعد الله سبحانه عايشة .
البقية مثل بيوت اعمامي ولحد هاي اللحظة ما اعرف اشلون اخذت اثر مني ام كرار من ضربتني لو عدهم شي من زمن خطوبتي ما بايعيه لان غراض خطبتي الاولى رجعت لعماد ،
ظالة بالتخمين ما اعرف اشلون بس متيقنه همه ماعدنا غيرهم ناس تكرهنا والفترة هم الي تهجمت بيه عليها تمرضت وراها .....
عماد صار اب مرة ثانية  ام كرار سمعت صاير بيها بوجها بهاك
اخبار ضعيفة اعرفها عنهم لأن ما نهتم الهم ...
حاليا رجعت لحيلي و هم وكفت لخاطر ماجد !

من يكعد زوجج تالي الليل ويبجي عليج ويحضنج بمرضج يعني واصل مرحلة حب عظيمة يسامح على اي اذية يسببها ! اعاني عادي تعودت اعاني منو ما يعاني بهذي الحياة
كل زوجة والها هم شكل كل ام وعدها
بحياتها ما يقلقها سواء كانت ارملة متزوجة مطلقة محد بينا بالة صافي وكلمن يباوع لغيرة عبالة الناس ماعدها همة هذا راي اني و بس وتبقى كل مرة وطاقة تحملها وطريقة تفكيرها ما تقبل احد يفرض غيرها عليها ..اعرف من تحمس البعض يريد الابطال ملاك على سراط مستقيم لكن الواقع شي ثاني

انتهت
ارجو ان اكون ما جريتكم للملل كوني كتبت لأول مرة رواية من جزأين بهذا الطول لأن ردت انوع واكتب القصة الطويلة الي تحوي تفاصيل اعرف اراء قليلة ملت لكن الاكثر يحب هذي التفاصيل اني اعرف قرائي واعرف تنوعهم انتظروني بقصة من احد متابعاتي اذا رسلت الي شي يقنعني اكتبه  وهم بطريقة جديدة  بعض ما يحبها! والاكثر يرغبها واعتقد تطخ عندي واكتب قصة قصيرة كوميدية  خالص شكري للمتابعة وخالص تقديري للي راح يفتقدني
أهداء
الى
كل من  قرأ واعجب بيها نعم انتِ فأبتسمي

تابعو كتاب نساء من هذا البلد  حنشر بيه قصص قديمة حاذفتها من صفحتي
احفظو بالمكاتب...
مودتي
زهرتكم 🌹
زهراء العراقية