رواية شيخ الشباب(بنت المؤمن) الفصل التاسع والخمسون 59 - بقلم زهراء العراقيه

مساء الخير

#بنت_المؤمن
شيخ الشباب²
من كتابات زهراء العراقية
الفصل ٢٤
ارتبكت من نظراتهم أثنينهم وعرفت من نظرات السيد محمد لأخوه والي ، ماجد مسولف  اله احتقن وجهي بسبب الغضب

- تفضلي زنوبة

- بخصوص الاطفال ،
يعني  ادري مالي علاقة وما يصير ادخل

- انت خالتهم زينب

- مشكورة ،
يعني بخصوص المساحة الخاصة بينهم وبين العلوية اعتقد لازم يفهمون منك هي عدها نوع من انواع السلطة عليهم
سولفت  اله  وشكيت  الموقف الي صار
كدامي  وبالاخص الشكوى من المساحة الضعيفة  الي هو منطيها للعلوية
-ما عجبني موقفها بهيج طريقة راح تنضر شخصياتهم التعامل الضعيف مع الاطفال بسوء التعامل العنيف

 
ابو مصطفى ما يحجي ظل ساكت  ولازم لحيته 
ربكني ماجد ونظراته

- اني متفهمة هي ما سابقة الها الامومة
والاسوء اعمارهم الحرجة
بس اني درست بعلم النفس الطفل المضطرب هو الي يصير هيج عصبي ومتعب
ما اعرف لو تعلمها على طريقة تعامل اكثر اهتمام هي الي ترتاح

- البدايات حيل مهمة هي من البداية
ما كدرت تحتوي اضطرابهم
صحيح هي بفترة صعبة حيل لأن تغيرت والدتهم بيها  والموضوع ازداد تعقيد
يريد اله وحده اقوى وافهم بالطريقة التربوية

وكف السيد واخذ تليفونه

-خلي ماجد يدفع بدل عنك دية
ضرب الطفل ما يجوز

خجلني ردت اروح لغرفتي
صوت ماجد وقفني
- خوش تتفلسفين

-اختصاصي هذا لا تنسى

-زينب انتظري

ظليت واكفه كدامه واباوع اله بحقد

-اكعدي خل نسولف ونتفاهم الى متى تظلين تتهربين مني

كعدت
-ما متهربة منك بس ما طايقة الحجي وياك 

حط ايده على حلكه بحيث ابهامة طاخ خدة و سبابته صاعده لشواربة والحزن واضح على ملامحة

-ما توقعت نوصل لهيج شي بمدة زواج كصيرة حيل

- ليش ضربتني؟

- فقدت اعصابي اني ما....

قاطعته بلهجة أستهزاء ساخرة

-ها خير ان شاء الله كل ما تفقد اعصابك اني انضرب وانهان

اتقرب الي وحاول يلمس ايدي  وكفت
و رجعت لورة خطوة

- لا تحاول
تضحك عليه بحضن اعتذار وانسى عادي هيج

- لعد واحد يهجر الثاني و ننهي كلشي من اول خلاف ما يصير هيج
يا زينب

- لا تراوغ ماجد تعرف شريد
ليش اثنين تليفونات عندك و شنو ضام عني؟

-  تليفون مرتي السابقة

هدأت ارتعادات جسمي و انطفت حدت نظراتي ولمعت بالحيرة

- مرتك !......صورتها هاي؟......بس بس ما فهمت ليش ليش عصبت عليه

ظل ساكت رجعت كعدت

- اعتذر المفروض لازم ما افتش بغراضك نسيت انت عندك زوجة قبلي بس وجوده بالخفية سببلي قلق واصرارك على عدم فتح كنتورك هم

هم اتقرب يمي بكعدته و ايده توسدت على راسي تمسح بيه من خلف

- اجاوزت عليج اني الي فقدت اعصابي واستاهل منج هالجفا
شعتذر وشكول اكيد الاعتذار قليل
بس اوعدج ايدي ما تنرفع مرة ثانية

- دوم اشوفك تگلب بتليفوني واغلس
وانت اول ما شفتني فقدت وضربتني واذيتني
يعني اخذه ازعل مني
ردة فعلك خوفتني منك

-يا زينب كلت الج اكو خصوصيات ما احب احد يطلع عليها

- عبالي تخوني

-شوف العذر اقبح من الذنب
ما اتعرفيني قابل ويني وين هاي الامور

باوعت اله ببرود
-لا ما اعرفك !
منو انت ؟

-زينب كافي عاد

- البارد الهادي
لو العصبي الشرس
لو منو؟
تحب العلاقات
لو متدين لو معتدل لو منو انت
كل يوم اشوف  تقلبك شكل

ابعدت اديه عني

-عوفني ماجد ببيت اخوك مرتاحة
اهنا
بيتك ما حاويني بارد عليه

ظل ساكت اعتقد كلامي جرحة او صدمة ما ادري ، كعدت يمه اشوية و كمت
قبل لا اطلع كلت
-ادفعلي دية لان ضربت بت اخوك راشدي وحمرت خدها ، و ادفع عن نفسك ضعفها!

خليته يباوع الي وحطيت ايدي على خدي  ،رحت لغرفتي بنومة متعللة بسبب النفسية التعبانة
ماكو تابعة و وجع بخواصري بس احلام كوابيس تزعج ..

كعدت الصبح من طلعت اغسل سمعت نقاش بين السيد ومرته  .
غسلت و رحت للمطبخ كعدت اتريك واريك عبودي مستحية اروح اكعد يمهم اكل لان نقاش خاص بين زوجين اهنا حسيت نفسي عزول و لازم ارجع لبيتي افضل
يتناقشون وياخذون راحتهم ببيتهم وما انحرج ..

دخلت بتول يمي تلاعب عبودي الي ياكل

- متريكين بتول

هزت راسها بأي

-ابوج ما راح للدوام

-لا

-هااا
راح اغسل ادية بللي شعرج و تعالي لغرفتي امشط الج ...

خطفت لغرفتي واعتقد شافتني العلوية
فصاحت ورايه

-زينب زينب

اهنا كان موضوعهم خلص و هدؤ

دخلت
-صباح الخير

ردت هي ،والسيد جان مشغول ببايسكل ابنه

- بالله اشاهدج مو الحديقة صارت احلى من نزعت هالمتسلق من جذورة

ما فهمت قصدها يا متسلق؟

-ها؟

-اطلعي للحديقه بالله عليج وشوفي. 
الحديقة اشلون صارت نضيفة
طلعت والجهال خلفي

بتول
- وخرته الورد تكول يوصخ

ظليت صافنه ع الحايط الخالي موحش حيل
كانت بذور فاطمة بالبيت و خفتها العلوية متعاجزة منها ،

دخلت وما كلت شي ردت اروح لغرفتي

-ها شفتيها اشلون حلوة الحديقة نظفته من اوراقه
والسيد يكول  خربتي الحديقة
ما علقت
،،

بيومها الاطفال ما عدهم غير هذا الموضوع ببالهم  يسولفون بيه و اجه مصطفى من الدرس طالع كان من السبعة وتوه شاف الحديقة و ضاج
كالي اني الي جنت انظف الحديقة ليش تعاجزت منه

- انت طالب سادس  مدا نشوفك و اعتقد تعبت منه

-لا لان امي زارعته

-مصطفى عاد لا تحسسون منها على اقل شي
هذا بيتها ترة
-كالت الي و طلبت منها تعوفه حلو ومن اثار امي المفروض تحترم طلبي مو بيتها وحدها ترة احنه وياها

قاسم -لعبت لعب بالبيت ما حجينا
راحت للحديقة.....والله على عنادنا

-قاسم !
اسلوب المأمرة هذا بطلوه دا تأثرون على اخوانكم الصغار
ضجت من تذمرهم وطريقة تفكيرهم بيها رغم اني هم ما عجبني من شالته بس هذا بيتها وهي حرة و تصرفها طبيعي ما ينوخذ بنية سوء

بيومها جاب ماجد بنته جدتها مريضة ودزت عليه ياخذها كم يوم يمه ..

اني ردت اروح مصطفى توسل بيه اظل ما اكول لماجد عن روحتي
يكول من انت اهنا البيت هدوء بس ترحين اصير هوسات ذولة ما يكعدون وهو طالب سادس
العطلة راح تخلص و هو دا يهيئ نفسة للسنة الدراسية الجديدة،
،
لخاطره ما كلت لماجد ياخذني و بقيت

بيومها العصر كبت عركة ما اعرف اسبابها بين العلوية ورجلها
طبعا اني يوصلني بس صوتها
هو قليل يجادل وصوته انصى واقل حده هذا طبعة اعرفه ..

العلوية
-هي حاجتني معناها هم واصلها كلام

ما فهمت القضية شنو
"يوه يا زينب شعليج بالناس اووف لا هيج ما اكدر احس نفسي صدك حشرية

خل اطلب من ماجد يوديني لهلي اني والاطفال نريح صوفي منهم بس هاي مرت ابوه هايجه كلساع وقالبتها عركه وما تخليه يركز هههههه
يا ترى فاطمة من تتعارك اشلون كانت تتصرف مثلي اظل اشمر بيدها وتكت الاول والتالي لو مثل العلوية صوتها يعلى
مممم لا
فاطمة جانت هادية بس مدري تعامل الزوج مختلف
،
وافق ماجد يجي
"اويلي ع الثكل ، ابسرعة قبل يجي رغم هو توه واصل بيته بس يريد يرضيني
مدام يعرف حجم الي سواه يعني عنده مو عاده

بس خوفي على علاقتنا اذا اساهلت وياه تتحول الى عدم احترام بينا
الزوجة هي الي تفرض احترام زوجها و الي تحدد طريقة تصرفاته وياها بابا دوم يكول  التقدير ما ينطلب بالسان
يكتسب حسب تصرفات  الشخص
ويه الناس

وشغلتي صعبة ما لازم اصرف وياه برعونة مشاعر وارضى لازم اصعد الموقف وابين اله اني مفضلة عليه لان ما وصلتها لأبوية !
*
هسة اريد اكول للرجال اريد اخذ اولاده الصغار وياي ما اكدر غير يخلصون نكرة

دزيت قاسم يكله ورجع كالي قبل

لبست و حضرتهم و طلعت للحديقة انتظر على المرجوحه ويه عبود و فاطمة ركضو كدامي
امي تفرح بدخلة الاولاد عليها

قاسم -اروح وياكم

-مو على اساس تبقون انت و صوفي

-لا اروح ضوجه ..

مشينا سوة لداخل الحديقة قاسم فلت  رجع دخل من شاف ابوه على كرسي وحده و وجه ما يكصة طبر

كلت خل افلت اني هم
٠
عبودي- ماما تع تع (تعالي)
ركض هو وفاطمة للمرجوحة
اجه يوكعها وهو يحاول يصعدها
رحت يمهم نزلت عن الكرانيت للثيل و حطيتهم وهو ما زال كاعد بمكانه

- يجي ماجد ياخذكم لو اوصلكم

- لا بطريقة النا.....رحم الله والديك

اجت بتول وكعدت بحضن ابوها

- بابا شوف الحايط محلو جان كله اخضر

غير تسكت بتول هو من كاعه مطنكر ما اعرف سبب عركتهم   مو يم الورد اكيد، شي ثاني امه  مدري شنو كايلة الها وهي عبالها محمديشكي الها منها   فهمتها من هوامش  الكلام

سمعته يخابر امه يبوو
خل افلت عيب واكفه اسمعه هسة هو ليش يخابر بمكانه دكوم من يمي

طلب منها لا تتدخل بحياته بطريقة هادية مختصرة واني اهز بذولة

سكت عبالي خلص مكالمة طلع ما مخلص ورد عليها
-لا تقارنيها بفاطمة الله يرضى عليج يمة.......سدي الموضوع

خلصت المكالمة

لكاني اباوع اله بستغراب

- ادري بيك تدري ليش ماجد عصب عليه
ليش اضوجون اذا ذكرناكم بيهن؟
لهلدرجة اني غلط اشوف شي يخصها حتى هيج يصرف وياي؟

- يا الله
وين راح بالج خلافي  ويه العلوية ماله علاقة بالمرحومة
وبخصوص علاقتكم لو تخلوها بينكم افضل
روحتج لأهلج راح اتزيد الامور سوء

- اني رايحة مسيرة يوم وباجر ارجع
همست
-ارجع لبيتي

-عفية بوية
انت هم صيري سباعية مثل المرحومة اختج.....لا تعلميه عليج!.....وبنفس الوقت..........حافظي على بيتج

-هااا شنو بعدك تذكر فاطمة ؟
لو اني اذكرك بيها ؟

اجت علوية و صاحت لبتول بعصبية
-تعالي امشط شعرج عدل الا تروحين

اخذتها من يمنا 
وهو يباوع لظهر العلوية وهي تبتعد
وتمشي للداخل
- اكو فرق بين روح ما تمشي وجسم يمشي!

المعنى روح فاطمة ما ناسيها وياه
ما تمشي ، و العلوية جسد فقط يمشي
احسيتها ما فاهمة عليه لو فاهتمه تعرفه مستحيل يشكي لامه مو شخصيته هذي وما تعاركة ،

ندك الجرس اهنا طلعنا لبيت اهلي ومثل ما توقعت امي وابوية فرحو بدخلتنا كلنا سوية بس صوفي ما اجه ويانه
،
لكيتهم بترقب مخيف لظهور معدل مقتدى وكعدت وياهم اترقب ...
حيل الايام تركض بيه واني ما حاسه اخويه كبر هذا الطفل الي اصكع بيه
شبسرعة كبرنا؟
يا أيها العمر السريع خذلتني
ووضعتَ أحمالاً على أحمَالي
خذني إلى عمر الصغار لأنني
لم أنتهِ من ضحكة الأطفال  ..
*
بس لشهد سولفت  خلافنا تخبلت ، تكلي كولي لأهلج كلت لا مو من اول مرة،

لمتي مع الاهل خففت عني اهواية
بس بالليل توجعت و تعبت اعتقد نفسيتي تعبت لان انحرجت وكلت للسيد راجعه لبيتي واني مكنت اريد ارجع
  صبحت أتوجع اهواي ما خابرت ماجد كلت لشهد تاخذني لطبيبتها والعصر مجرد رسالة اله
"لا تجي تاخذني اتخربطت اني عند الطبيبة"
واني بالعيادة  رسلتها ،خابرني متخبل وعصبي لان ما كلت اله وطلعت من كيفي ،اجانه للعياده كان مرتضى موصلنه وراجع وعلى اساس ندك عليه يجينا من نخلص
بس اجه ماجد واخذنا للبيت ، و كلام الطبيبة  لازم راحه تامه و انطتني مثبتات

اخذتها حجة اقوى اخذ وقت اطول الا ارجع اله بعدني ماخذة بخاطري مني
واحس ما استاهل هيج يتهمش حقي

واني يم الطبيبة السيد محمد جاي ماخذ اولاده باقية بس البنية وعبودي
،،

ثاني  يوم هم اجه السيد ماجد
اني ما كمت طلعت اله ظليت مطروحه بغرفتي
اجت شهد كالت يصيحوج ؟

-يوووه
هسة كايمه

-لا تكومين كلت لمقتدى يكول الهم نايمه

-يا وين اكو واحد ينام بالاربعة العصر

-ههههه احسن خل يفهم السيد زعلج ثكيل واحسن درس انطيتي اله من رحتي لطبيبة وما اهتميتي اله وطنشيتي حتى من اجه اخذج
،،

مر وكت اهواي بالساعة وسمعت كلام يم غرفتي ..
مقتدى يكله ادخل محد يمها

جبت تليفوني و سويت نفسي اكلب بيه ..

دخل

-ما نايمة ؟
السلام عليكم

-وعليكم

-اشلون صارت صحتج هسة

- بعدني تعبانه

- الى متى

- مو الطبيبة كالت منا لشهري الرابع لازم راحه

-الى متى الزعل

عوجت حلكي وظليت اقلب بتيلفوني وهو يحجي وياي

وراها راح
شو انكسر خاطري وضجت عليه من راح واتجاهلته طول ماهو كاعد يمي يحجي ولا يمه ولا رديت فراح ما طول يمي

ردت اخابرة بالليل ، بس شو هونت .
بداخلي گلبي يعصرني عليه بس عجيب القسوة الي اكتسبتها
دخلت شهد تسولف وياي ،
وصلتني رسالة منه
كانت شعر
"حبيبتي اعذرينـي
عفت رمانج
وباتن بجفي قماشج
وجان بيوتهن جفي
تذكرين يلطولي عليج لحاف
اندل كل كطن متروك والعب بي احب سوالف النداف "

شهد رادت تكوم من شافتني اقرأ ومبتسمة

- اوكفي  شوفي الشعر رسلة السيد  بذيئ

قرته وضحكت
-لج هذا لعلي المنصوري

- ها هذا مرة دزلي اشعارة اسمعهن بفترة خطوبتنا ،بس من هذا الشعر شو منحط طلع هههههه

رسلت
- ترة احنه مزاعلين واني مو  ظالة وياك وصلح؟

شهد راحت لرجلها،وتأخر الا قرأ رسالتي ورسل
  "ظلي وياي
اسوي سواية العرساان
ولاتحتار المسافة البينة وبين الذنب قمصان
وعليش اتندم على الصار هوة العشك موكوة
مترهي من اطب النار انة مسوي ذنب يسوة"

ما رديت
،
اتصل فيديو رديت منطاني گلبي أجاهلة اكثر

يضحك و مطروح

ابتسمت لا أراديا على ضحكته الحلوة

- دضحكي عيشتي بلياج مرة

-مممم صدكتك تلكاك ماخذ راحتك

-لا والامير
الوحدة خنكتني واجيج گالبة الوجه
ادري وين اروح اني المسكين

- مممممم

-حن حن حن

-هههههههه اشبيك

- يلا حبيبي كولي كولشي تمام

- احححح

يضحك واني وجهي وياه لا ارديا يضحك

وين الحقد راح؟

- مممم 

-ترى اشعرلج

- هههههه شو بالله بس من عندك مو علي المنصوري
اخذلة صفنه وكال

"  من كثر ما مشتاك يمكن انجنيت...اكل بصل مثروم حسبالي جكليت

-هههه  هم اكل

الصبح كعدت واني اوزع أبتسامات
واستذكر غزل البارحة حسيته من صدك مشتاق الي ويحبني ،

اجتنا كوثر الضحى
وطلعت  توها انخطبت واحد من اقارب ياسر

وسولفت هي وشهد على المشية الي اتريد تجيها بعد ايام،والشروط الي حطوها

سألتها
-اكلج ما عندج صورة اله

كوثر
- يا امنين الي بعده الرجال ما مشي

شهد ضحكت مدري ليش

ضحكت كوثر وياها
-عابت طيحتي ثكلي كدام البنية

شهد
- الاخت داخلة لحسابة بالانستا ههههه

-شوفنيا

كلت
-ولج شهد هذا يشبه الشاعر الي البارحه دزلي اشعارة ماجد ..

شكله مرتب وهيبة ولا يكلك اربعيني

هي كوثر معانيها حلوة وحنطية  و جسمها ممتلئ بعتدال ..

اجانه ماجد وتغدى يمنة هالمرة طلعت اله والوجه يضحك ما گلبته عليه 
وتصالحنا من وجوهنا المنفرجة بس مصارت فرصة نسولف بشكل خاص الاهل حوالينا

من دخلت بشهر الرابع رحت ويه شهد للطبيبة وكالت الطفل صاعد ونبضة عال العال ، ردت اعرف جنسة ما واضح .
رسلت لماجد رسالة شرحت بيها وضعي .
خابرني كال رتبي امورج جاي اخذج ..
حضرت ملابسي اني والاطفال،
فاطمة لساها يمي و شهد لازكه بيها حبتها حيل
من ردت اطلع ضاجت  شهد وكالت راح يرجع البيت وحشة

البيت يلمع اول ما دخلت لكيت طقم قنفات صالة بالهول

-هاي شنو ماجد اشوكت جبته..

أمشي وأسأل بيه على التغيرات
ودخلت لغرفتنا ،

- حبيبي معقولة انت هيج مسوي
اضحك وممصدكة حاطلي فرشة عرسنا كريمية اللون و عليها وردة حمرة رحت
اخذتها اشمشم بيها

حضني واديه على بطني يتلمسها

-واني ما استاهل هالشمة

مديت راسي لعنقة شميته وبسته
-الله يحفظك الي

- احبج
- اني هم
-زين ماكو رحم  الله والديك

خلاني اضحك واتراجعت للسرير كعدت

دخلو الاطفال ،و بدلت و اتعشينا وهمه بوسطنا ما فاركونا على ايده مسنحة بنته
راح لبرة اشوية ورجع شافها جايه على ايدي وايدي الثانية لعبودي غافي بس هي بعدها لازمه خصلة من شعري وتباوع لشاشة تليفوني دقرة قصة بالواتباد

-اشوف فاطمة متعوده عليج

-اي مو كلت الك تعودت عليهو انت عفتها يمي و ماكو بس اني دونك فتعودت عليه وعلى شهودة وحتى ويه الولد سوت علاقات
ضحك
من نامت تعبت وخرت ايدي وعفتهم نايمين على السرير و طلعت للتواليت

شفت ضوة الهول مفتوح من خلصت
ليش؟
دخلت واتلكاني ماجد بحضن واتلاحمت روحي ويه روحه عطره ،صوته ، همسة ، كله مشتاقه اله
ظليت دافنه راسي بعنقة وما شلته ، اتحاضنا حضن دافي  يضم معاني اهواي ملتصقين واحدنا بالثاني وماكو فراغات او مسافات ولا أشخاص ببالنا غير بعض بهاي اللحظة كأنما الدنيا مابيها بس هو واني والشوگ دنمليه ريتنا بريحة بعض ، امتص جسدة الملتصق بيه كل ذرة غضب مدثرة بداخلي..

حط راسي على صدرة وظل يباوع الي واني عيوني مرفوعة اله  وما زلنا واكفين
بادرت بالكلام
- بلغة الجسد نظرتك الي وانت تحضني
معناها  كلمة احبك واضحة وصريحة
وتربيتك على ظهري هذا معناه مصالحة و تكولي اني موجود

-وانت حاسة بهاي اللغة

- اني حاسة بالامان

،
الصبح كعدت لكيت مكان ماجد فارغ باوعت للساعة ب٨ ونص
اووه ما ريكته حبيبي ما صحاني
لاحظت المفتاح متعلك بكنتورة
"ممممم اشعجب  ناسيه واحنه كل طلايبنه بسببه
كمت فتحتها وابتسمت واني اكول حقي اعرف كل  شي بيه واله ،
شفت البوم  صور على غلافة قصاصة
"صباح الخير مدري ظهر الخير
زنوبتي ام خشم المحشور هذا هدية الصلح واعرف كلش زين اول ما تصحين راح اشوفيه "
ضحكت بصوت صحيت الجهال

فتحته وكعدت اشوفه
حبيبي واخيرا طبع صور عرسنا كانت محفوظة برام

الجهال لحو على الريوك كمت سويت الهم وعزلت المطبخ ورجعت اشوفه ..
ضميته و رحت للجنطة الي بيها ظروفة طلعتهن ،
فتحت واحد منهم فهمت البقية .
رسائل  وداع من الزملاء  بمناسبة التخرج  مالته . 
حيل والله يحب يحتفظ بهاي السوالف،

بحوشت بيها تبحوش وشفت صورة مال الجامعة وزميلاته حتى حفظت اشكالهن ،
مالكيت شي لمرته المرحومة اعتقد حتى لو اكو شي فرغة منه لخاطر يترك الباب مفتوح الي ، اني حاسة اكو خلل بعلاقته بيها بس ما راح ابد المح بحساسي ولا أسال بيوم ، خل الي بالگلوب مضموم احسن اني هم عندي الي ما اكدر انطق بيه كدامه ، بس شكك احترمت السيد ابو مصطفى ما كايل لأقرب شخص اله اخوه من دمه ولحمه وما كايل اله سبب ترك عماد الي لعد شكد مقدرنا ما غلط بابا من دخلة بحياتنا ،
تغيرت اشوية نفسيتي وحتى بديت ارجع لسابق عهدي الضحكة ما تفاركني ولا التحشيش ، الاطفال اسمهم جايين يمي ..لحد ما قررنا نبيع البيت اشوية المنطقة شعبية ضايج منها ماجد ..
اهنا بدا الدوام والطبيعي اني اداوم

اني خططت ببالي لكلشي لأن احنه بس نشوف بيعه للبيت زينه ننتقل ببيت السيد محمد على ما نبني من جديد
وبهيج عبودي وفطومة يبقون يم العلوية وقت دوامي ...
فطومة بقت يمي بيبتها ظلت معللة واولادها اخذوها يمهم و فضو العزال
وماجد لكاها فرصة ياخذها منها ما اعرف ليش حيل خايف على مشاعر البيبية !

رحتله للهول جان يلعب ويه قاسم بلي وهو بايت يمنا 

-ماجد احتاج اروح للجامعة و اشوف شنو وضع الدوام والقسط هم اشوكت الدفع

- يا دوام !؟

-ههههه هاي اشبيك دوامي يا دوام

- عبالي ما تدوامين السنة

-شنو شنو هههاي وهم اضيعها عليه عمي الدفعات القبلي اتخرجت واني بعدني خليني اداوم واخلص

- افكر

و هيج بديت معاناة جديدة ويه ماجد الي فجأة صار يتحجج بالحمل ما يقبل اداوم السنة
وبعدها سدها بوجهي بأصرار كال ماكو دوام ...
ومن انتاقش وياه يسكتني لو يعصب ما ينوخذ منه حق لو باطل

اضطريت من رحنا سيرنا ببيت اخوه انتهزت فرصة و انفردت ويه السيد ابو مصطفى
و كلت اله يحجي وياه يخليني اداوم

تعشينا يمهم و كعدت احف للعلوية بس اشوية بطيئة توني متعلمة من شهد ..

العلوية كالت اشوية اصب جاي واجي

اجت بتول كعدت يمي

-خالة مرتجى اهواي تصيح على تقي

- بتول خالة، مو شفتها بس كالت اله لا تلعب بالجداحه بجى
وراح شكى لأبوه
خاله مرتجى تخاف عليكم  ترة وتحبكم

دخلت العلوية و رجعت احف الها ..
هم صاح ماجد
- جاي جاي زينب

كمت هالمرة اني
بما ان رجلي الي راد اخذتهن من يمهم ورحت احمي واصب ..
تأخرت الا حمة ودخلت

اخذ مني الاستكان وحطه على الميز

- زينب ماكو دوام وانت حامل

ابو مصطفى- مدام البنية عدها طاقة  تتحمل لا تضيع  عليها السنة

عرفت السيد توه مفاتحه

-اي عفية ماجد حرامات

- مو كلتي الي وكلت لا

عصب عليه كدام السيد و هم حيل بالغ بصيحته بيه
حتى اخوه سكت
اني دنكت اشيل الاستكان الي وكع و دخلت العلوية على صيحته

موقف حيل ما حبيته، طلعت روحي هسة لو بينا ما اهتم لعصبيته عادية
وتندمت لأن كلت للسيد

رجعنا للبيت ما نتحاجة ..
اجتنا بيعة للبيت و وافق عليها
بعز خلافاتنا ،
المشكلة مو بالحمل ولا بسنة وحده احسه كاره الدوام كله ما يريده بحجة السنة حمل  لهذا اصريت و وصلتها لوالدي يذكره بشرطي عليه قبل الزواج من وصلت لهذي المواصيل تيقنت اكو شي انكسر بينا من اجانه بيوم والدي وياه السيد محمد وكعدو وياه

حتى ما حبيت اكعد وياهم واسمعهم
اضطرني ادخل اطراف واحطة بهذا الموقف
كاعده بغرفتي  وخايفة لا تجيه حالة العصبية بوجه بابا
اترقب الجاي ترقب ياربي مايصير شي و يوافق  ويارب ما يزعل عليه لان فاجأته بجية ابوية ما يدري بيه موصلتها اله

صاحو الي  ،دخلت مثل الي مسوي عمله اباوع للأرض

-تعالي بوية اكعدي

ليش ما تنتظرين تولدين والسنة الجاية تداومين وهم مستقرين ببيت

-لا بابا اريد اخلص حتى نسيت الدراسة

-زوجج خايف عليج وعلى الي ببطنج
بوية

- صحتي زينه وما رايحه احارب اني بشهر السادس

-هاي هي اوليدي انت تدري بيها طالبة
تعاونو وخل تخلص هالسنتين ..

هز راسه بالموافقة بس اعرفة من ضايج والدنيا طالعة من عينه

تعشة برة ورجع  عرفته ضايج مني
وانطاني ظهرة
،
بدا الدوام و احنه منتقلين بغرفة ببيت السيد و غراضنا نص بمخزن اهله ونص بمخزن السيد  عدنان .

واهنا شفت الي جنت ما ادري بيه وعانيت  من مشكلة ما زلت اعاني منها وراح اظل لبقية عمري اعاني

يتبع

شكلكم هيج تباعون الي من تقرون كلمة يتبع 🤣