رواية شيخ الشباب(بنت المؤمن) الفصل التاسع والعشرون 29 - بقلم زهراء العراقيه

مساء الحب

شيخ الشباب
من كتابات زهراء العراقية

حبيبتي…
أشم زنديك العروسين
وعقم الليل في فراشنا
والهمس
أنا أرى باللمس
ما عاد غير اللمس

-لـ مظفر النواب

• ياسر
طول ما هي كاعدة يمي انه عارف شتريد اتكول  وخجلها مانعها

بديت انه
- شهد انه ما أجلت زواجج انت الي اجلتيه الا اطلعين من بيتي ...
هاي هي هانت

- لا منو كال اني على هاي جاية

-شهودة من دخلتي لغرفتي و كعدتي تصفنين بوجهي عارف شرايده
جاية تسألين اشوكت يخلص البيت تشطيب

- ههه صحيح
اني حضرت كولشي
والبدلة يمي من شهر
اخاف موديلها يروح شو طولت

- ها خايفة لا الثوب مودته تروح

بلهجة خجلانه
-مو بس هو حتى ملابسي صارلهن ثلاث اشهر من جهزت خاف تروح مودتهم

- ههههه ما اتروح ما بقى الا القليل
وانت الي اجلتي زواجج ثلاث اشهر انه ومرتضى اشكد لحينا عليج انت راسج جان والف سيف الا نرجع للنجف ونستقر الا اطلعين من بيتي

- وبعدني هم
الا توكف على رجليك من جديد

- جا انه يا يوم حبيت (زحفت)

- راسك سالم حبيبي دومه مرفوع

-يلا روحي سوي استكين جاي الي

-تم

ما بقى شي و ازوجها جا انه وين اروح بحالي يظل وجهي بوجه كوثر
مونسة حياتي شهودة حياتي تصحر بعدها
،
بعد ما فضت سالفة الثار وجدي لزم كل واحد حده من رجع من السفر ، وانجمع بيه وياهم من طلبني و حلف الي يتعرض الي يطلعه من العشيرة وماكو ثارات بينا  من احمد حالته استقرت ورجع لمرته و اولاده غلطة وهو دفع ثمنها و ظال معلل ولو ميت جان حالي اختلف وجدي نفسة ما ياخذ موقف لكن الحمد لله على كل حال ، ..
انه بعد ما ينفع اجاورهم  وماعندي كاع بالمشخاب ،
خذيت بيت بحي******  الحي قريب على حي بيت ابو علي لخاطر علي ..
البيت ما كامل بناء جديد بس غرفة و هول واستقبال  ،وصالة مسويها مطبخ والحديقة ماخذة اكثر من نص المساحة صاحبة  ماعنده يكمل ويريد يبيعه خذيته و كملته بطابق ثاني  لكوثر مشتمل كامل غرفتين و صالة صغيره تصلح مطبخ صغير .. و صحيات ... وحده لجهالها و وحده الها .
انه كملت بناء النص الجواني الي وهذا الي اخرني ...
محلاتي بالسوك رجعت اديرهن كل اسبوعين انزل ليهن  واشوف عمال بيتي  مع مساعدات خليل العسكري ..

هذا الاسبوع اخر اسبوع الي اهنا بديت افكر اصفي بغراض البيت بس وين اوديهن وما يسون المية والميتين عليمن ابيعهن
خل انطيهن لمرت ابوي وهي تتصرف ببيعهن بحجه ما عندي وقت ابيع اساعدها اذا تاخذهم او تبيعهم الها ..

وانه بطريقي  لمرت ابوية اشوفنها رايده شي قبل لا اروحن للنجف واستقر بيها من جديد ..خابرني ابو البيت الي مأجرة منه
يتأكد مني على التسليم لان الشهر خلص

- الاسبوع الجاي خويي اسلمك المفاتيح  واغادر الديرة ..

وصلت ليها و كالت
- اجتي بوكتها الغسالة ادية راحت
من الغسل

- ليش ما بلغتيني من گبل
ماعندج اجيب الج وحده

- ما اريدن اكلفك يا يمة مو كافي عليه اخذ منك كل شهر مصرفي

- واجبي يمة
ناسية انت اساهلتي وياي بحصتج  من بعت بيت ابوي

- الله يخليك الي انه لو اعرف اخوي ياخذهن مني بحجه الدين وهاي سنين مرت ما شفت منهن  فلس احمر جان انطيتهن  الك كلهن يا يمة اشغلهن الي و اعيش منهن كريمة الحال ،

- بعد شي وصار لا اظلين اتلومين نفسج فداج المال

يمة ما تغيرين رايج وتجين وياي

- لو بيدي اروحن وياك وارتاح بتالي عمري من الخدمة، بس منهو الي يخليني
يحسبوك اخوتي غريب اعليه

بس انت لو تسمع چلمتي(كلمتي ) واجي يمك واراعيك وتراعيني بكبرتي

-انه محتاجج حيل بحياتي

بخصوص الموضوع صرت افكر بيه بشكل جدي
بس ابوها مو گلتي ما يزوجها حاطها للخدمة والصرف اشلون اخذها منه

- هذا حظ ياسمين اليتيمة
ابوها ومرته متوليها كبرت البت الي بعمرها بزرن(خلفن ، انجبن اولاد)
بس انه اكول اذا انت موافق اعليها
وردتها
انه اكولن  تروح تخطبها منه وانه اكولن لخوتي و افشلة كدامهم وانت انطي كلمة راتبها يظل مثل ماهو لابوها حتى يرتاح

-هاي شنهي السالفه اتروح للدوام و تترك بيتي على الخالي بلاش انه ما محتاجها صح بس ما احبن الغبن ابوها مكسح ما يشتغل عايش على مرة

-يشتغل يوم وعشرة لا وهو عودك خلفه
( اسطة بالبناء)
- والله شغلتها معقده وانه رايد ازوج
بس اريدن ارتاح واستقر

-بكيفك ابني سوي الي يريحك

- و وجودج يايمة يرحيني

-مو بيدي
انه جنت متاملة من تاخذ بت اختي اكدر اروح اكعد وياكم

- راح احاول افرها براسي والكه لأبوها حل

-اي والله تكسب بيها ثواب
من اطلعها من بيت ابوها
والله هي جمال و طول و فرعة تخبل

- الله يستر عليها

- اكلك خل اطرش الها خبر تجي مدامك حاط الفكرة براسك وشوفها اليوم

- لا خالة  ما مستعجل و ما اريد أمل البت
انه ما مقتنع بسالفه ابوها ما اريد اتورط وهم ياخذها مني عايز انه

طلعت واني اسوق اباوع  لديرتي طفيت التبريد ، وفتحت جامتها(نافذة)
اباوع للنخل  الي جذعة يعاتبني على  سعفة المفقود  على عثوكة المحتركة ومختفية....اصحابها خانو بيها و حولوها لكاع سكنية ، وجاي يبيدون النخل

اباوع للحمام الي بالسما  ما عنده عش يحط اعلية لأن الوطن ما ظل بيه شجر
لأن الوطن انغدر وانباك مثل أعمار شبابة ، اه والف اه عليك يا عراقي
فات عام وهذا الثاني راح يكضى(يخلص) وداعش يمتص بالشجعان ....

سقطت وانغدرت يا عراقي من قبل ما انولد انه من زمان طويل وانت فاقد الامان ، شبابك بذاك العهد تغبرت بالحروب ونسوانك هي واطفالها جوة التراب بالمقابر الجماعية ، عوز وجهل و حرمان .....
خلص العهد وكلت راح الجور واجه الاقوة منه
ديرتي ما عادت ديرة الخير الي توزع خيرها على خياتها(المحافظات) ديرتي تريد حامي يحميها ويصونها
راح اشتاگ الج وانت غالية اعلية لكن الواحد وطنه يحسة ويه ناسة وهلة
وخلانه انه اهناك خلاني و اهناك الله كاتب رزقي بين خياتي و ابني ...

•شهد

رجعنا للنجف ...
وكفت بنص الصالة معترضة

- وين غرفتي ليش مالي غرفة
؟

ياسر وهو كاعد يقلب بتليفونه
- ليش افرشلج غرفة وانت رايحه بعد اسبوع لبيت رجلج

- بالله اجيك زعلانه ، خطار
شنهاي
نفيتني انت

سوة حركة بحلكه و راح لغرفتة ما عاجبه  هو الي ما عاجبة

رحت لغرفة كوثر الي تعدل بملابس اطفالها

-عيني عيني رجع الهم كنترورهم
ليش اني ما سوة الي غرفة مو اكو غرفة يمه فارغة

-كلها كم يوم ورايحه لا تلحين

- اوف منكم انتم وين اروح بحالي
اني وجنطي ظاله جوة الدرج
- خليها وطلعي بس كم غيار
كلها خمس ايام و ننقلهن لبيت رجلج

- ياسر ما صدك يخلص مني

وكفت عن الشغل وحطت كفها كدامي كوثر

-ابصم الج بكف ايدي
ياسر ما يحب وحده بينا كثرج
حتى مكتئب علينا لان قرب موعد زواجج

-صدوك يعني مكتئب عليه

سمعت بيه يريد يروح لبيت خليل حشرت نفسي  مشتاقة الهم ما ادري من صار الليل وطلعنا الا كال امر بعلاي اشوفه
اخذني لبيت رضاوي واني وجهي صار ينطي الوان ما كايلة اله طالعة مكبرة راسي مدام عند اخوية هو المسؤول عني عود من اصير ببيته الا يتحكم   وهسة اجيته  وانكشفت ...

الي فتح مقتدى ... و  دخلنا للاستقبال وراح

واجانه مرتضى گايد علاوي بأيده ..

-السلام عليكم
اني بوست علاوي وراح وكف يم خاله
دنك اله ياسر 
ومرتضى واكف يم ياسر واني گبالهم كعدت
عضلي شفته
ابتسمت متوترة
دزيتله بوسة هوائية

ياسر- ولك علاوي شنو هاي الخدود
كول بابا

علي - تا تا تا

ياسر-هههه كول بابا ولك

رجعت باوعت لمرتضى حاط ايده بجيب سروالة ورسلي بوسة هوائية
غمزت اله و كعد ياسر يمي وصرنا عقال اني اباوع لعلاوي  و مرتضى للباب

واجه كعد يمي
همس
-عنيده

-حبيبي علاوي كبران
مضيعة السالفة

كام مرتضى وراح ...

علاوي يريد يفلت من ايد ابوه ويروح ورة خالة ..

ياسر-   شنهو انت الثاني هم اتريد اتغمز من وراية

فزيت من كعدتي  مخترعة وكفت ورجعت كعدت دايرة وجهي  عنه
احرجني وطلع  شايفنا ومغلس
بس هسة حسيته مو ضايج من التصرف لا غاير اعرفه كلش زين
من يغار .

ظل يذب حسرات

دخلت ابوه سلم وهو راه الظاهر راح صاح اله ...

همست لياسر
- هذا الحجي لابس تراك  هههه

ياسر شكلة جدي ولا ضحك ورسمي وياهم ...

واني هم اخذت الجانب الهادئ كالعادة  وبس العب ويه علاوي الي حاطته بحضني اشغل ناظري عن مرتضى ،
ما منتبه اله بس اداعب بخده وهو اعتقد ضايج مني
ضربني راشدي گد ما كفة صغير گد ما قوي  هم خرعني شهكت وهم وجعني

ابو علي- لا بابا

ياسر- اشكد تلحين

استحيت ونزلته راح لجده الي يكولة عيب جدوة

ولمحت مرتضى حاط ايده على حلكه
ضاحك عليه

فشلني وفلشني من شبه اباه  فما ظلم

ردنا نروح ..

الابو بالحديقة طلع كدامنه هو وياسر
يحجون بخصوص الابيوت اهنا واسعارهن ..

و مرتضى  يمي وكف

- كلها كم يوم وتجين لهنا

- اي و اكتم على انفاسك

- تعطرين انفاسي بعطرك الصباحي

عفصتله وجهي ورحت يم اخويه

الليل وياه غزل لحد الساعة ١١ وقت نومه يروح  بأمر منه ، ما يزعل ولا يعاتب طبعة مريح
حتى من يضوج ياخذ جانب ويبتعد ويخليني افكر بشنو زعلته
هادئ حيل وياي واعتقد ويه الكل عكس ملامحةحادة ،اعيونه الكحيلة تبين غاضبه وهو بمنتهى الهدوء
بس بيه حالة تزعج يشتغل على البارد ويستفز يطلع خبال الواحد 
،

و امي  أجه زوجها  النا   حاول يقصر المسافات بينه وبين ياسر واجانه مع امي لبيتنا و جاب وياه فضل هدية لأنتقالنا للبيت الجديد .. لكن ما لكة بياسر وجه مرحب بفكرة الاقتراب ...
هو حسيته انسان طيب ، ما كان عايش بالمشخاب من وفاة مرتة ترك البيت وعاش بالكوفة يم والدته ، بس ولده وبناته المتزوجات  بالمشخاب
،
هو وبنته الانسة بالكوفة لهذا ياسر ما كان عنده معرفة بيه  من تزوج امي استقر ببيته وابنه عزل الي كان بيه

من راح  زوجها امي عاتبت ياسر ليش جاف حيل وياه
كال ما اكدر اتقبله
ولا راح انسى بيوم دخل بيتي واخذ امي من غير علمي ..
حاولت امي تلين قلبه بس هو على موقفه
و حاولت تبرر دخولة للبيت ماهو الا الحاح منها لكن ياسر عسر مو مثلي حنيت ابسرعة و قدرت اعتقد الرجل غير البنت بهذي المسألة ويصير اكثر تسلط على الام  وقسوة

،

خلص الاسبوع سريع ويه اخر لمسات للعرس
صبغت اشقر بلاتيني ... حواجبي تاتوه  اشقر

بدلة العرس شراء من بغداد قبل فترة اشتريتها والجهاز مشكل من بغداد والنجف و المحافظة الي كنت كاعده بيها ،

و بدلة أجار  قصيرة وهم بيضة لان بنفسي البسها ...
اما الحضور اقتسر على مجموعة عماتي و بنات اعمامي واهلنا من ال***
وبيت خالي ابو خليل ونسوان خوالي وبناتهم ...
عدا نسوان بيت جدي محد حضرت ولا انعزمن ....

بين حايرة اكد على صديقاتي ما نسن وحده من الدفعه وبين الحيرة خاف محد يجي لعرسي !مخاوف مو منطقية ظلت تحوم فوك راسي ..
نزلت من الدرج ادور صمام اماني حاسة نفسي ضايعة بالحياة الجديدة المقبلة عليها

دورته بالبيت الي بيه اقاربنا و لكيته بالحديقة كاعد  بسيارته

-راح تطلع ؟ .

- افرغ البيت للنسواين الي اتريد تتمكيج والي تهلس شعر وجها

ضحكت بصوت
-خرب شنو هاي افكارك
كلهن متحضرات قبل وقت
كولي وين رايح وعايفني

-اشبيج ناقصج شي

-لا بس مو تنسى تجي للقاعة الساعة سته
قبل الزفة

-ما انسى ولج وين لكيتي هاي السالفة

- مو تنسى مكان القاعة

- لعنة الله على ابليسج اشلون انساها وانه الي اعطيت عنوانها لمرتضى خبلة و بعدين تعالي هاي دكه ادكيها بينا ثربتينا و ما اعرس الا اطلع من بيتك والا تستقر بيه
وتاليها بقاعة

- اولا البيت استقبالة مو واسع حيل مثل القاعة ثانيا اتريد الصدك واعتراف بيوم عرسي السبب الاكثر اهمية والحقيقي
ما ردت  اطلع لحياة ثانية واني الرعب ياكلني عليك حتى بعد ما جدي حلها وطلعو من حياتنا كنت اريدك تستقر اهنا الا استقر بحياتي اخاف تسويها واتظل بال***

نزلي من السيارة
و عصر خدودي وباس جبيني

-هاي هيج شايله همي

-جا غير انه اخيتك

ضحك على نطقي لهجة اهلنا

- معتبرة صايرة شهيده

-شعبالك لعد

-شنو هاي حواجبج صايرة شارب ضابط اجنبي

متت ضحك ودمعت على التشبيه

-خرب ما فد يوم مدحت  واشلون تشبيه هاي لان عود الاجنبي اشقر

-انه ادري ذابة بوية اعلى روحج

-فرحني بيوم عرسي وكولي صايرة حلوة
عمي راضية بس تكول حرف الحاء

-  ما احبن  الصبغ منهو ضحك اعليج

- غير عروس ولازمني تغير بعدين هذا الكل انعجب بيه و كوثر اختارت اللون يلوك الي اني بيضه

-شوف مشت ورة منو خذت الشور من راس الثور

ضحكت على مثله

واخذني ورة ساعة للصالون وصلني
باوعت اله من نزلت

ودنكت احجي وياه من الجامه

- ليش انحنيتي  بالشارع روحي

- وين راح اتروح ترجع للبيت

- لا اروح يم خالي ابو خليل اتغده
وانت روحي يلا للصالون

من راح مدري ليش انكسر خاطري واجيت ابجي عليه المفارق حيل صعب و صرت احس بيه كل ما يمر الوقت ..

بعدها ما شفته اجه مرتضى اخذني ولابس قاط  نيلي  كلاسك من غير جاكيت بس يلك ورباط احمر ..

وصلنا اني ببدلتي البيضة القصيرة  المنفوشة  وهو اخته فاطمه عدلته ..ودخلنا  سوية.  على صوت دي جي و مولد  (قصيده مدح  اسلامية)  بدأ بالف الصلاة والسلام عليك يا رسول الله محمد وهلاهل .
وتحول لمولد  لحنه خفيف حلو

اجوااء عرس حلوة ومفرحة ....

غيرت الى بدلتي بوسط الحفلة
وبالنهاية
دخل ياسر  مع عمي الكبير تفاجأت بحضورة حبيبي ياسر اكيد هو بأصرارة جايبه

النسوان اهنا ممتعودات على هيج استايل  قليل هيج زي عدنا اهنا خاصة الشباب اقصد الكبار عادي ..
غترة  وعقال و زي عربي كامل ببشت
كانه هو العريس لفت نظر بهيبته وهيلمانة
حبيبي يا سندي بالوجود يا اجود ما بعمري
باسني من جبيني والحركة نفسها عمي سواها
مع كم صورة اخذو
اهل العريس نصهن تبوشن  من دخلو
ودخل مرتضى  وابوه
وهوسة وزحمة صارت ...حسيت بحر

ياسر - صونها و ارعاها زهرة بيتنا هاي

مرتضى حط ايده على صدرة وكال بهمس بعيوني
ياسر طلع  حسيت بحرارة الدموع تشغل( مو تشعل) عيني وتنزل شاعلة خدي  بحرارتها

بس طلعو اخوية وعمي رفعت فاطمه البوشية و كفت ويه بنات خالاتها تكفل مدري يدبكن
و حده منهن وكفت وصاحت بالسماعة
- رضاوي رايد رادته وعايف بنات اولايته
ضحكتنا
همسلي
-هاي خالتي
ذولة فريه  حستهم اهل الام
عكسها امه ثكيلة وكاعده هيبة بشالها ما نزعته و صاية خليجية بمكياج هادئ

ورقية وفاطمه بدلات سواريه ومكياج صالون
عدا زينب  ثوب محجبات محتشم اعتبرة بناتي بسيط لونه وردي فاتح و شعر مسرح للخلف وبوجه خالي من المكياج وهادئة  و رقية وفاطمه ركصن خاصة فاطمه رقصها كولش حلو
واختهن الصغيرة كاعده يم امها وحاطة علي الي لابس قاط بحضنها وطول الحفلة هو عدها ...

الخروج مالتنا طلعت وياه والتصوير مرافقنا بس طلعنا من القاعة بالمدخل لبسوني البرنص وعباية و حطو طرحة بيضه على راسي
انسدت الرؤيا والنفس ضاق .. ايد كوثر بايدي
-امشي شهودة
و الثانية مرتضى كعدوني
وكوثر كعدت بالصدر يم السائق ابن خالة مرتضى

اختنكت على ما وصلنا للبيت كنت اريد فندق لكن مرتضى كال الطابق فارغ بس الي مقتدى نزلته ما اريد اول ليلة مو بغرفتي عاندني . ..

بس صعدتني كوثر وزينب ذبيت كل الي عليه

-اختنكت اريد بروده ...

زينب-ادخلي للغرفة مشغلين تبريد بيها

دخلت وضاربة اتفاقنا اني ومرتضى عرض الحايط عود كنت شارطه عليه ادخلها بين ذراعاته شايلني
هسة ما افكر غير بالهوى ومكياجي خاف تلف .. الواقع غير

دخلت كوثر خلت جنطة صغيرة
-هاي تليفونج وجنطه ايدج بنصها و ذهبج

وفتحت الكنتور طلعت روبي الابيض

-هذا روبج خليج سباعية ولا تخافين
دخلت اختي  توبة

- اكلج ذهبها جبتيه

-اي

اني بوسط الحفله من غيرت البدلة خلعته ولبست طقم كرستال ....

راحن خواتي لجوة وهنه يباتن اهنا اليوم مثل ما جرت العادة

رحت للميز حطيت مبيض ورشيت عطر ورجعت كعدت ..

سمعت صلوات واصفك

هاي زفة ! دا يزفوه عليه
اووه اشكد حلوة
واحد منهم صاح يوما الي  ان شاء الله واحرك العيون الحارة وصار ضحك بينهم و حسيتهم ينزلون اصواتهم وابتعدت .
وانفتحت الباب
دخل مرتضى رافعلي اديه مثل الي يدعو الى حضنه ويغني

- زيديني  عشقاً زيديني يا أحلى نوبات جنوني
زيديني
زيديني غرقاً يا سيدتي إن البحر يناديني
زيديني موتاً علً الموت إذا يقتلني يحيني
يا أحلى امرأة بين نساء الكون أحبيني
يا من أحببتك حتى أحترق الحب أحبيني

كل ما يتقدم خطوة ببطئ يكول  مقطع منها بصوته الهادئ   ....

بعده ما واصل يمي انقطعت الكهرباء

اجتني ضحكة قوية عليه ....

خرستني بوسة منه على خدي

وحط راسي على حضنه ...

-  خوش تذكار حلووو الوطني طفى وعلى السحب راح نظل

-كولت الك فندق عندت

-ما اكدر ما اخذ راحتي اذا مو بيتي
فلا اخلع ملابسي

ضحك واني جمدت ضحكتي

واجت الكهرباء
واستقبلني ببوسة الي هي جسر الاحبة
هي المعبر المتعوده عليه بيني وبين حبيبي نعبر عنها مشاعرنا العميقة المشتعلة لكن بالزواج كان قربه اعمق الي
فتح علية مخاوف اكبر من تحملي ...

الفجر

فتح الضوة عصبي وطلع راكع الباب وراه
تركني وحدي ابكي ..!

يتبع ...