رواية شيخ الشباب(بنت المؤمن) الفصل الثلاثون 30 - بقلم زهراء العراقيه

مساء الورد

جــــــــــــذاب
ردتك ولو جذاب
ردتك
تطش بعمري صم عتــاب
ردتك
ولو شباج
يملي حياتي تراب
ردتك
ولو صبيره حمره
تفي وجهي
من حجي الغياب
جذاب
جذاب يا ثعلب عنبنه الترف
ونعزك ،
ولو جذاب
دكيت بابي
وعشيت بابي فرح
والخشب عطب
ذاب
خدي اشتعل
والروح شبت ورد فلفل
والتراجي ،
ذابن بتيزاب
وأصهلت
مرجحت الكصايب
ياحبيبي ، ياحبيبي ياحبيبي
ومتت مثل الباب
جم دوب
مو كلنه الكلب بطل
ومنك تاب
جذاب ياكلبي يثعلب
من كبل جذاب

-مظفر النواب

•ياسر

وصلت لديرتي گبل تعنيت لبيت مرت ابوية
دكيت بالتليفون اعليها ...
وانتظرت
انتظرت اهواي الا ردت سمعها بطيئ
-ها يمة وينج اطلعي انه بباب بيتكم

طلعت كأنها كاعده بالحديقة تنتظرني

فتحت الها الباب واني كاعد بمكاني كعدت و سلمت اعليه

- اشلونك يريحة الغالي ..

- الحمد لله

- اشلونها اخيتك

- البارحة العصر رحت ليها سلمت اعليها ورجعت

- اشلونها عساها مرتاحة

- ما ظنتي بالي عفته يمها شو وجها اصفر
ما اعرف ما عجبتني

- لا يمة هاي خضة عروس
العريس ماخذ عافيتها عادي

- اكلج وين مكان بيت اخوج ؟

-اطلع گبل وانه ادلنك

حسيت الوحده تنهش بروحي و الراحة فاركتني بين رغبتي بالاستقرار و بمرة تخفف اعليه مر الليالي و بين مكان شهد الفارغ احس بوحشة چبيره بعده
خابرت مرت ابوية اشوفن بت اختها واذا صار قبول اخطبها من ابوها واشوف تاليها وياه اذا ما صار نصيب
اخطب بت عمتي ، هسة احاول ويه البت اليتيمة لخاطر اكدر اجيب مرت ابوي يمي ،

بگلبي متخوف لاتطلع تشبه خوالها ،
الروح هم تشتهي الحلو او المقبول
لهيج شي طلبت اشوفها اول قبل كل شي ، ببيت خالها الثاني متفقة مرت ابوي نشوفها اهناك
وصلنا ووكعدت انتظر خالها الصغير يصير اشوية احسن من غيره
ومرت خالها ...ومرت ابويه ننتظرها

دخلن حرمتين

عاينت أعليهم من سلمن ثاني وحده صارت عيني اعليها

طويله مثل ما وصفتها مرت ابوي و حنطاوية بعيون وسيعة
لفتت نظري و هنه يسلمن و كعدن يم مرت ابوي انه عيني تزوغ اعليها

وجان اشوفنها لابسة حلقة !

مرت ابوي كالت

-هاي بنية اخيتي ياسمين

اشرت الطولها وسطاني
عاينت اعليها ، تحسفت اخ لو الثانية
و حنطاوية بمعاني مقبولة لچن انه بالبداية
ظنيتها الثانية خشمها بالمسطرة والقلم منحوت ونظرتها اكثر حيوية و جذابة
طلعت المرة مزوجة وانه عبالي العروس
كلام جانبي حول الموضوع هي ساكته بس الوياها طلعت صديقتها و معلمة وياها و تشارك بالحجي بس ياسمين هادئة

كام خالهم ومرت ابوي وراه و كلهم تلاشو بقينا وحدنا

هي على صفحه كاعده من الجهة الجدامي .

- شنو تاخذين دروس شنو اختصاصج

•ياسمين
طلعت من بيتنا مكذبه على مرت ابوي
كلت ليها عندي مباشرة بالمدرسة اليوم
وهو جذب ماكو
احنه بالعطلة الصيفية ...

رحت لبيت ست رونق صديقتي

دخلت و خلعت بغرفتها البوشية و تعدلت و طلعنا لبيت اختها امنت جهالها يمها ورحنا لبيت خالي ...

-عزة رونق هاي شنهو السيارة العالية

رونق- مو كالت الج مرت ابوج ميسور الحال

-هاي السيارة مال زناكيل

-بالعافية عليج والله

- لا اهم شي شكله يطلع حلو جا ما اريد افطر على بصلة

-عبالي راح تكولين الاخلاق

ضحكت و دكينا الباب ...

-لا ولج اخلاقه اعرفها من خالتي هي مربيته والي ما يكطع بمرت ابوه وبار بيها اكيد خوش انسان اني شايفته من جنت طفلة مرة وحده وناسية ملامحة ابوي جان عسر وعلى خلاف ويه ابوه ياسر
نص كلامي كلته واحنه ندخل من فتح طفل ابن خالي الباب
كنت متأخرة بسبب مرت ابوي

اول ما سلمت

شفته وكف

انصدمت اعيوني بطولة ومن كعدت كل اشوية اصده بنظرة بس هو نظرة على رونق خرب عافيتي اي والله لو ادري ما جايبتها وياي عود تعيني اشتبه بينا

راحو حسب الاتفاق يكعد وياي ويشوف كلامي واشوفه هم .. خالي ابو علي احسن خوالي، خالتي اتفقت وياه قبل يستقبلنا ببيته بجلسة سرية محد يعرف بيها غير هو ومرته

من راحو گلبي راد يوكف اعيوني على الزولية ولا رفعت عيني مستحية منه حيل

سالني عن اختصاصي

جاوبته ..

- انه انه شسمة رياضيات
بس اخذ علوم و فنية وياه

- اشكد عمرج ياسمين

عزه هذا بس صوته اسمعه ما رافعه راسي ليه و هيج احس نفسي خايفة لا اسقط بالاختبار
بس احسن لا يكول اعليه جريئة لانه متربي بالنجف واكيد متزمت حيل

- شسمه ٢٧ سنة

- صارلج شكد متعينه

- خمس سنين

- اني عمري ٣٠ سنة عايش بالنجف عندي اربع خوات متزوجات بس ارملة يمي عايشه ماعندي احد ببيتي غيرها .. وبيتي واسع و اهناك مستقر حتى بعد الزواج

منفصل حاليا! عن ام ابني

اكيد خالتج كالت الج عن عملي وظروفي

-كالت كالت

- تعيدين الكلام ؟!

- نعم اخي !

- لا سلامتج ماكو شي

سويت نفسي فقيرونه بالمقابلة صدك لا كالو عاشر الناس الا تعرفهم

وهو عجبني وسيم بس و طوله مبالغ ما عجبني ردته اشويه اكصف مني لابس غترة بطريقة امارتية و ثوب رصاصي و كشخة ..
وسيارته تشهد عن امكانياته جا شريد بعد والله ما رايده غير الستر هذا اول واحد يجي متمكن هيجي كلهم على كد حالهم الخواطيب
هذا اضحي براتبي لأجله وهو يعوضني احسن ما اظل معنسة !
واعتقد بالغت حيل حتى اعجبه مرت ابوي من راح كايل الها قبل لا يطلع حيل خجولة خاف فطيرة
مرت ابوي ما قصرت بمدحي بس خفت لا ما اعجبه وحيل رغبت بهاي الزواجه اخلص من واقعي والعرب والخدمة اهنا العيشة صعبة وية مرت ابوي

بس مبين هذا متمكن ويريد وحده حلوة حيل عينه راحت لرونق عباله يمكن هي العروس

انه رجعت لبيت رونق ولبست البوشية الي انجبرت عليها بأواخر فترة من قبل مرت ابوي ....

رجعت للبيت بواهس مكسور ويأس واحباط
وعارفة روحته بلا رده من طلع من بيت خالي ...
بس حيل گلبي ارتاح اله لدرجة احس نفسي شايفته من قبل !!

•شهد

طلع مرتضى الفجر تاركني بحيرتي وحدي ...
كمت اباوع لروحي بالمراية و حاضنه بأثنين اديه صدري ثبتت الروب عليه
وكعدت ابكي ما اعرف شنو صارلي ...

دخل ورة نص ساعه وشعره ينقط ماي
عرفته كان بالحمام ...

و انطرح منطيني ظهرة ..
طلعت ثوب ورحت سبحت ورجعت للغرفة لكيته كاعد على السرير وايده
على جبينه ...

كعدت يمه

- اسفة مو قصدي ...

شفت اثار أظافري على رقبته وتحسفت
وضجت من نفسي مطلعه لحمه واحمر مبين يحركه ...

- احنه تعدينا هاي المرحلة حتى اكول ما متعودة واعذر
ولا انت من النوع الخجول الجبان

- ما اعرف شصار

-ليش نفرتي مني ؟
من العشرة للفجر واني احاول اكسر مخاوفج
اني كنت هادئ و صبور وياج
طلعتيني من طوري

- يمكن لان تعبانه

-ارتاحي
رجع انطرح و انطاني ظهره

حقة يزعل
كنت عنيفة وياه و ضربته كف قوي! اخر شي وطلع من الغرفة غضبان
تاركني مصدومه بروحي....

انفاسي ثكيلة عليه و دموعي مبللة خدي كاتمه صوتي و ما كدرت اغفى لحظة ،
واحدنا منطي ظهرة للثاني باول ليلة النا نهاية مأسوية لكل أتفاقياتنا....

خوفي لا اني مريضة او بيه شي نفسي يرفض العلاقة الكاملة
كمت ما كدرت احافظ على كتم انفاس البكاء طلعت للصالة لكيت غرفة ابصفنا مغلقه دخلتها (غرفة مقتدى) كانت فارغة كعدت على سريره ابكي و اعصاب جبيني صارت توجعني وحركة بعيوني قوية اشنجت. ونطرحت بس اريد ارتاح

حسيت بالحر ..فتحت التبريد و انطرحت على سريره ماخذه راحتي بالبجي

ورة فترة حسيت الباب انفتح التفتت

-اهنا ؟
خليتني انزل ادورج

كعدت
مسحت خدي بطرف ثوبي

اجاني
كومني بطريقة خوفتني ظنيته راح يضربني بس هو كومني ماخذني للغرفة

-نامي اهنا لو حتى مجرد قربي
ما ترديه
ذبيت روحي عليه
حاضنه رقبته بين اديه

- خل انام على صدرك

وخرني عنه وكام

شفته صلى واني هم تذكرت الصلاة صليت ...
و ظليت كاعده على السجاده

هو طفى الضوة و اتغطى بشرشف

دنكت على التربة و ظليت ابكي
حزن على ليلتي وعلى ردة فعلي خايفه منها حيل لا تخرب حياتي ماكو رجل يتقبلها....

حسيت بأيد على ظهري
تمسح عليه

-كومي شهد بجيتي اهواي

رفعت راسي عليه
- والله مو بيدي اني متفأجاة بنفسي اني احبك ما اعرف ليش هيج صار و رفضتك

-دكومي ننام اثنينا تعبت اعصابنه
لا تحجين بالسالفة هسة

هو نام تعبان مني لكن اني اختفى الظلام و اشرقت الشمس وما زالت عيني عليه تباوع ...

مابيه حيل لاحد يبارك ولا افتح باب غرفتي الي ندك الساعة ١٠ الصبح

هو كام فتحه ودخلت فاطمه
تهلهل و وراها زينب بصينية الريوك حطنها ..
وسلمن عليه

فاطمة- صباح سعيد يا عروس صباحية مباركة

بوسني وطلعن

طلع مرتضى غسل ورجع يتريك من غير ما يباوع لوجهي او يعزم عليه

اني كمت وكعدت يمة ...كان حيل جافي وياي ..
اجت امي و عماتي سلمن عليه وراحن راجعات لبيت ياسر ...

والعصر اجاني ياسر اني استقبل الناس بوجه ضامه شحوبه وذبولة بالمكياج .
لكن ياسر روحة متداخلة لعماق روحي ما يستر عنه ذبول روحي اي ساتر
الح بسؤاله عن راحتي وعن نفسيتي .

وكال باجر مسافر اشوف العروس واعتقد يوصل جزء من عماتي وياه باجر الصبح
خلص النهار المتعب

اختفى المكياج من وجهي بعد الغسل ظاهر تعب الليلة الماضية

القلق بدأ يدب بوصالي من بداية هاي الليلة.بالتالي بضعف عدت تعديل نفسي و لبست ثوب شيفون قصير
تحت الركبة و من غير ردن (كم)

كعدت اباوع للصورة الي راسمها ومعلكه بالغرفة ...
طلعت الرسمه مالتي و حطيتها على الميز .....
ندكت الباب دكه خفيفه
فتحتها اباوع محد بس باوعت لجواي
لأنه علي كاعد ويضحكلي من شافني دخل يركض
ويصيح تاتا تاتا ...

-علاوي صاعد وحدك !

- تعالي حبيبي
ما يريدني اشيله
لبست روبي و حجاب و نزلت بيه

لغرفة البنات ...

رجعته لامه
من صعدت لكيت زينب صافنه على صورنا ...

التفتت عليه
- شهودة شفت الباب مفتوح اجيت ادور على علاوي
-ها رجعته توني لامه

- هذا دومه يغافلنا ويصعد لمرتضى يحبه حيل

-حبيبي

- حلوة هاي الرسمات
بس الي معلكة احلى ولو اشوية مركز على الملامح اصير احلى يرادله بعد مرتضى صقل بس هو مفارغ لمواهبة

- اي صحيح
بس عندي اجمل من اللوحات العالمية

دخل مرتضى

- ام عطوب صاعده يا خيرج؟

زينب- مو كلنا بلا القاب كدام المدام اني شخصية وقورة

ضربها على علباها
جكرا بيها

-اصبرلي اذا ما اكت (افضح) الها القابك كلها

مرتضى- برااا برااا
كالها وهو يضحك
ريحني تغير مزاجه ..

طلعت زينب

-اليوم انت تمام مزاجك

اختفت ابتسامته

- بس كون ما يخربة العراق عليه

خلعت حجابي .و الروب

ورحت على الميز امشط شعري

حسيت بأيد تتلمس رقبتي.باوعتله من المراية وراية ويباوع لخدي ،
وكفت واخذني وياه

الصبح اني كعدت قبلة غيرت و حضرت جنطتي البارحه ما حضرتها كنت متوترة وما افكر بسفر وما الي واهس بشي

كعد على صوت حركتي

- صباح الخير ..

سديت سحاب الجنطة
وردت اطلع القاط الي البسة اليوم
لزم معصمي وباس كفي

-اعتذر

باوعتله بملامة
وسحبت كفي منه

- العراق زعلان لان احتليناه
ترة هذا حقنا

- جوعانه نازلة احضر ريوك

تركته و الدمعة بعيني لازمه خدي الي ضربني مرتين عليه !
لكيت زينب بالمطبخ

- صباح الخير

-هلا بالعروس صباح الخير

شفتها تغسل بالممة بستعجال

-حبيبتي رايده شي

-اي اريد اتريك بس كلشي ما اندل

- الملح اهنا و الشكر يمه دركزي الملح لون قندولة ازرق والشكر احمر
والباقي بالثلاجه

كالتها وهي تطلع مستعجلة

رحت وراها دخلت شفتها تسوي ممة بستعجال وعلي يبجي

حطتها بحلكه
وشافتني

- هذا ابو بطن خبصني والممة وصخه

-زينب
رقية نايمة؟

- ههههه نومها صاير ثكيل

- اشوفج انت الي قايمة بعلي

- لا امه هم ما مقصرة

- ها تمام اعوفج ترجعين تنامين ..

سويت جاي و جبن وكعدت اكل وحدي
حسيت باحد يدلك بمتني

نزيت
و وكعت جاي على ايدي
حطيت الاستكان
وهو جر كرسي وكعد يمي

-كلمة اسف تتكفل تشفعلي عند حضرتكم
؟
-لا طبعا

-شهد السعادة الزوجية امر نسبي اصنعيها انت لا تخلين اول ايامنا هيج
اعتذرت اكثر من مرة وكلت ما كنت قاصد
كافي دلع تعبت

- بس اني الي بيه مو دلال

-دلال
اني تأكدت
وغمزلي
اخذ ايدي الدبكه وباسها

-ايد مهيلة و خلقة مترفة
شريد بعد
بس لو تبطل دور القطة الشرسة

-ما اضحك

سحب الكرسي الي كاعده عليه مطلع صرير مزعج و بلحظه لكيت نفسي على رجلة كاعده

-بطل مرتضى

ظل يهمس بأذني احبك واحبك

سكتت بطلت اتحرك
سألته
- والضربة راح تنعاد

- ضربة حبيب هاي تختلف

- لا كانن راشديات

- لكل فعل ردة فعل
خل نعيد الافعال بس لازمنا غرفتنا

ابتسمت
-اي اضحكي ولا تبالغين ما بيج شي لا عقدة ولا غيرها بس اتركي نفسج الي ...

رقية -صب صباح الخير الخير

فزيت عنه متوترة ورحت صاعده لفوك

صعدلي يضحك

-ادري بس رقية بالعالم
شافتنا بكل حالاتنا

ضحك
- والدي طالع من الفجر للزيارة ماخذ راحتي الكل ما يكعد قبل ال٨

-حظي صحاها

-حظي الحلو حتى اصعدين
سد الباب وما وراء الباب معاناة من نوع اخر ...

بعدها رحنا للمطار حسب الوقت المحدد سفرة ١٠ ايام شهر عسل خيرت بين الشمال وتركيا واختاريت تركيا وتندمت حيل صارت مواقف ازعجتني بيها ، وبوسط الرحلة تمرضت وما تونست بيها وكانت اسوء ايام الي ..

رجعنا للعراق متعاركين من قبل ما نطلع للمطار ! وكل واحد نام على صفحة من التعب من وصلنا

بزعل طلبت اروح لبيت اخوية
وهو ما كال لا وداني ثالث يوم بعد ما
اجينا...

وصلني وراح.....

ياسر كان ب ال*** خارج المحافظة وادري بيه اليوم يجي...

سألت عن امي هليام تليفونها خارج الخدمه
كالت كوثر بيران تزور صارلها ٥ ايام

للعصر الا اجه ياسر..

،

بعد العشا دخلت لغرفته كان يباوع فلم اجنبي ويلعب بلحيته

•ياسر

مشيت اعليها البارحة و عقدنا مومن
مرتاح اشوية واخيرا الي بالي گرب

هاي بعد سالفة طويلة عريضه خطبتها و رفض بس قبل لا يوصل الابو الرفض الي انه عرفت من مرت ابوي،و وصيتها تخلي اخوها خال البنية اصغر واحد بيهم يشكيه لشيخ عشيرتهم و كعدات وياه سوو

وبعد التدخلات ما انطاني رفض استحى على دمه ، شاف اوضاعي تمام طلب مهر بالعالي خفضتها
و خليت المؤخر مثل ما يريد بس المقدم معقول ...
مشينا اعليها و انه جايب شيخ ويه العمام و عقدت اعليها ابوها ما ينحزر اضمنها ،

انطيت مهرها و بعد ١٠ ايام الكاها جاهزة وصيت مرت ابوي
وطلع شارط على بته نص راتبها اله و موافقه شغله ما تخصني انه ما اتفق وياي اذا ما عجبني الوضع ابطلها !
كل هذا سعيت اله حتى اجيب المرة الجبيرة لبيتي و حتى اكدر اسوي الي بالي و اجيب علي يربى بعزي ما يصيح لخاله لو لجده بابا!....

من رجعت وعندي علم مسبق شهد تواعدت وياي الكاها بالبيت..

ما حبيت فكرة بعد ١٣ يوم زواج تجي خطار بس ما ردت اكسر بخاطرها...
جنت مرتاح البال
وانه افكر ابلغ جدي بخطبتي دخلت شهد
كلت خل ابشرها انه ما كلت لاحد منا
مشية النسوان عماتي وبيبتي خذيتهم الهم
بس سألتها اشبيج
عينها مطرت دمع

-ما اكدر ياسر طلعت مالي قدرة اتحمل شي

ظلت تحجي وتشكي وانه ما فاهم شي

- حياتي كلها راح تخرب
اني كلي عقد نفسية ما اكدر اكدر

- تحجين وكلشي ما افهم منج شنهو مشكلتج شنهو ما اكدرين ؟

- ما اكدر على العلاقة الزوجية واني ومرتضى على خلاف
كل ليلة تمر احنه بصراع وعراك
گلتها و دنكت تنحب مو تبجي

- شهد فهميني ما فهمت انه مرتضى صعب وياج يأذيج لو شنهو
مخوفج
احجي

- هئ لا

اني
اشرت على روحها

-مو طبيعية من من
اااه
ما عندي احد قريب عليه غيرك
اني مو طبيعية
اعتقد هذا بسبب الي شفته بطفولتي

لزمتها من امتونها خضيتها

-يا طفولة
داود
مسوي
يعني انت مو

- مخوفني مو غير شي ، اني مبيه شي وين راح بالك

-جا انه هم خوفني وعادي ماشية الحياة
اشبيج احجي بالتفصيل
لا اظلين عودك خجلانه

- ما اكدر واضربة و حتى اصيح
يضطر لو يتركني لو يستخدم العنف وياي حتى اسكت وما اضربه

ضربت كصتي تلاث ضربات

-من طاح حظك يا ياسر ولا يكعد ،كلت سترتها وارتاحيت
رجعتلي بعلة

ولج شنهي اضربين رجلج انت صاحية

جاوبت وهي تبجي

-لا لا مو صاحية
من زمان اكلك اخاف من اهواي اشياء ما صدكني عبالك ادلل
عضيت ايدي وانه حاير هاي شتحطلها واطيب

انكسر گلبي عليها طبعا حسيت والله من اول يوم اكو شي
بس هو صوج الام الي ما تحس ببتها ولا تسألها

-امج ما سألتج ما شافتج

- من صباحية عرسي اخر مرة شفتها وكلت الها كلشي تمام عبالي يتحسن الوضع.....بعد ما حصلتها من سافرت حاولت اتواصل وياها اشوفلي حل

- شهودة انت بنية جبيرة و واعية وخريجة
- ما الها دخل من تجيني الحالة انسى اسمي
تجيني رجفة قوية وخوفه واحس نفسي جاي اغت

سكتت
-انت شفتي داود من يضرب مرته !؟

سكتت

-انت صغيرة جنتي ليش ما نسيتي

اااخ شفتيه يضربها لو شنو ؟

- هو دخلني
لغرفتهم و و
شفتهم سوة وكان يضربها وهي اصيح بس اتريده يطلعني

كالتها خلتني اتوتر واشنج من بس الفكرة
كمت على حيلي لازم راسي يفتر

- شفتيه هو ومرته ! و هو يعذبها

هزت براسها

ضربت اجفوفي وكلت
-لا حول ولا قوة الا بالله الله يعلنك بتربتك

الله يلعنك

كومي غسلي وجهج وارتاحي وانه اجيج احجي وياج ...

ورة ساعة عدت وانه فكرة اجيبني وفكرة توديني ...
رحت ليها

-كوثر اطلعي

-شكو شصاير اشبيها ضايجه كولو

-مالج دخل اطلعي ..

طلعتها وقفلت الباب ...

كعدت يمها

- شهودة شوفي ماكو حل غير انج تحجين لرجلج كلشي

- لا لا مستحيل اجيب طاري خالي شيكول عني ما اريد ابوح اله بأي سر من مشاكل حياتي السابقة اخجل منها

- شهد هذا رجلج هو الي يكدر يساعدج
ميخالف يعرف حتى يعذر ويكدر يساعدج
ميخالف يعرف مشاكلج الطفولية
هذا ابو بيتج و ساتر عرضج
لا تحطين سواتر بينكم وحواجز

- صعبة

انت اقرب شخص الي وتعرف كلشي وبصعوبة كلت الك

- شهودة لا تخليني انه اكله

-لا لا

-اي الاحسن انت موش انه
حتى يشوفلج حل ..
باجر اوديج اله

- خليني يومين ارتاح

- لا خل يتعود اعليج البعد يولد جفا
والجفا يولد نفور والنفور يولد كره والكره اخرته انفصال

انه ما بيدي شي لو عايش داود جان مثلت بجثته بعد ما اكتله بس يا حيف مات قبل لا اكبر

نامي نامي والصباح رباح

سودت ليلي بهاي السالفة طيرت النوم من عيني ..
كلبت بتليفوني شفت رقم ياسمين اخذته من خالتها

-انت الثانيه اشعندي ماخذ رقمج بلا تعارف بلا حب بلا بطيخ الي حجينا وياها شعرفنا منها اجيبج لهنا يا اصيب ويا تخيب !
•زينب
-وصال هاي بس سنة اتعرفيني بيها

- بس شفتج عملة نادرة وحيل نعجبت بيج. و وصلت انعجابي لاخوية وامي
حيل ارتاحو لأختياري

-ما اعرف شكول الج

-وافقي زوزي خل اجيب امي ونتعرف عليكم

- تكدرون تشرفونا بأي وقت حبيبتي

سديت من يمها الخط واني افكر بأخوها طبيب اطفال ...

كلت لامي وفرحت حيل وشهد بعد العسا من سمعت بالخبر

واحنه نغسل مواعين كالت

- فرحت الج وضجت الصراحه خليل خابص نفسه عليج
حيل معجب ويريد يخطب بس متاني جدي تتصلح علاقته ويه ياسر

- خليل !

-اشبيه

انتبهت لنبرة كلامي هازئة او مستقلة بيه

-لا والله العفو مو قصدي ونعم منه

بس ما ادري تفاجأت

كذب حاسة معجب بس مو بالي وما توقعت شهد تكولي شي
اني حذرة بعلاقتي بيها .

•شهد

ضجت على خليل حيل معجب بيها والموضوع عنده جدي يريد يخطبها بس سالفه خلاف ابوها وجدي واكفه عائل ..

صعدت لغرفتي لكيت مرتضى يقلب بتليفونه ...

اخذت غيارات و قررت امشي بكلام ياسر

يتبع