رواية شيخ الشباب(بنت المؤمن) الفصل التاسع والأربعون 49 - بقلم زهراء العراقيه

مساء الخيرات
البارت من غير تصحيح
#بنت_المؤمن
شيخ الشباب2
من كتابات زهراء العراقية
الفصل ١٥

إقرئيني.. كلما فتشت في الصحراء عن قطرة ماء
إقرأيني.. كلما سدوا على العشاق أبواب الرجاء
أنا لا أكتب حزن امرأةٍ واحدةٍ
إنني أكتب تاريخ النساء.

كاعدة بالسيارة و ضايجة من نفسي كلش حسيت ماعندي سيطرة حيل على نفسي صايرة هشة انفعالية مهتزة لا لا ما رايدة ابد اصول لهيج شخصية ، محتاجة احد يلومني محد نطق حرف ملامة لكن العيون تعاتب حيل يأذيني هدوء والدي و كأني حمل على حمل گلبة زاد عليه زعلانه من نفسي حيل شفت بعيونه خوف فقد ثاني اعرف ما راضي على تصرفي و ادري بيه صعب الموقف عليه حيل وعنده ما اكبره بنية ترفع صوتها لكن كله هان و كتم زعلة و اصر اليوم اراجع الطبيب مالتي سويت تخطيط قلب مع الفحوصات ...

حاليا كاعده كدام الطبيب الجراح ..
و اعيوني على دزستة قصاصات اوراق ملاحظات صغيره اعيوني تركت المكتب وراحت على سدية الفحص

جعدت جببني من تشنج افكاري بالبارحة نمت على هذي السدية ومع مساعدة الطبيب فحصني شي جدا اكره الفحص اه خاف مرة ثانية يطلب انام عليها بعد ما يقرة الفحوصات ....

شاف التخطيط و اشعة لصدري

- لا جيد
جيد جدا ...

والدي سأله بقلق
- ها دكتور بشرني

- بشارة خير ....صدرها نظيف
جيد جدا ما بيها الا كل عافية

بشر والدي اني رفعت راسي مستغربة
وبابا سأله عن توكعي قبل البارحة بالليل

كال تقلصات عضلات القلب ماكو شي ما بيها اي شي

من والدي ظل يلح خاف رجع عندي المرض

ضحك الطبيب وكال
دا اكل ماعدها اي عوارض حتى حتى
احمد ربك مولانا
طلعنا من العيادة للبيت واني واباوع للشارع بتوتر و غضب من نفسي

لو طالعة بيه ميت ذبحة ولا النظرة الي اتفحصني بيها بابا من طلعنا من العياده

تفسيرها يجرح بس لا حسباله امثل استجذب تعاطف بس والله حسيت نفسي ذاق ما يطلع لبرة واختنكت بيه و حريك قوي بريتي

الولد ما اخذوه مني بالموعد وما اعرف اشوكت يجون ياخذوه على ساعة يجي ابوه ياخذه و والدي ما يحجي وياي ومرتضى اساسا صرت اتهرب منه و زادهم واحد مقتدى مثكل وياي كلها زعلانه

بس امي وهم اشوفها ساكته لا حجت ولا كالت شي تعبانه من كلشي و حزينه
وتركتني بوحدي عاصفة بيه موجات التعب احلامي تمكنت منها الكوابيس و اكعد تعبانه مرهقة كأني كنت بالفعل كنت اركض ...

كعدت الصبح على ادين تهلس بشعري

- اااه ولك عبودي
شعري

ارجع نام بعد وكت ..

حباب

حط خده على خدي وظل يناغي طراوة غده وسدت النعاس من جديد على عيوني غمضت وغفيت ..
فزيت على عضة و لعاب على خدي

كمت كالعاده من غير ما امشطه الفة و كمت ...

شفت صحنين و كوبين شاي على الميز اخذتهم غسلتهم وعرفت مرتضى وبابا طالعين اليوم تأخرت بالكعدة ..

رحت لأمي حبيبتي خاف جوعانه ..

لكيتها تباوع مسلسل تاريخي قديم

-صباح الخير

امالت براسها كرد واستمرت تباوع

-شتردين ماما بيض لو جبن

- ريكني مرتضى ..

-اهاا بس اني باقية بلا ريوك

-اخوج مقتدى طلع بلايه ما ياكل

-ها راح للدوام
عادي هو ما يشتهي الصبح ... اروح اسوي ريوك الي ولعبود

كالعادة اجت رقية الضحى اني طابخه وكلشي مسوية رقية بس تكعد يم امي وما تفاركها ..

وصيتها على عبود ورحت طالعة من بيتنا للكية توكف بالشارع ما يقبل يدخل ...

يووه البارحه مطرت و الشارع ما ينمشي بيه عود مجاري هو ...

يا وين الكية صارلي خمس دقايق واكفه انتظر وما اجت اااه اشكد اكره هاي الوكفة ليش تأخر هذا راح اتأخر بسببة .

صادفتني مرة ظلت صافنه بوجهي اني هم استغربت من صفنتها عليه وكانها اتريد تحجي رمشت بعيني واستفسرت بنظراتي ...
هي سلمت
- اشلونج خالة
انت بت المؤمن موو
-هااا اي !!!

- شفتج بفاتحه الي صارت عدكم

اني جارتكم أم زيد

- هلا خالة

- ما الكم حس ولا اطلعون واحنه هم ملتهين بالهحياة و اختفت الفة الجيرة

ابتسمت معرفت شرد عليها غير الابتسامه المصطنعة

- انت طالبة مو

-اي

- شنو كلية لو مدرسة

- لا خالة يا مدرسة

-ها عبالي مثل بتي تدرس مسائي خامس اعدادي

-لا اني كلية

-ها نفس زيودي يدرس بالكلية

اجه الخط اهنا وصعدت دقلب بكتابي بملل وصفنت على الشارع وشفته ... اي شفته دا يحط اكياس بسيارته بالشارع العام ابسرعة خطفت الكية من يمة ...ظليت اباوع لحد ما كلش ابتعدت السيارة و عدلت راسي واحتبست الدمعة مدري ليش .. مدري ليش من شفت شعرة يرفرف و ية الهوى الرطب رف گلبي كأنه شخص قريب مغترب عنا !

اااه يا روحي ليش الظروف و الگلب عليج ...

دوام روتين يشغل بالي ..

رجعت للبيت و للوجوه المگلبة عليه

خابرت المغرب شهد من كلش حسيت بحتسار وكأبة

- زنوبة الج وحشة

-بذاته خواتج اجن بدورة سنة حماتج وانت لا

- عابت مو تدرين بيه كنت قبلها متخربطة وكلت الج وخابرت عمة واعتذرت شذكرج

-طالعة. روحي والكابة فول كلت انغص عليج اشوية

ضحكت
-الله يساعد الي ياخذج نكدية

بجيت و ظليت اجر بالعبرات

- زينب!

الو
شكو يمعوده

سديت الخط

الخنكة اشكد ردت اخفيها وابلعها مكدرت خابرت احد بس مكدر اشاقة ولا اضحك ولا حتى اسولف ما اعرف شبيه اباوع لحياطين البيت احسها تريد تنطبك عليه ...
لزمت راسي الوجع الفجائي اجه يفلقة نصين ...

غمضت اعيوني شفت راس مرعب يباوع الي فتحت اعيوني مرتعبة ..
طلعت من غرفتي

صادفني عبودي بطريقي بالممر سمعت صوت الباب ...

شلته و كلت اشرد فوك السطح قبل لا اموت اهنا!

دخلت شهد و راها مقتدى اظن هو فاتح الباب ...

مقتدى
- اكول لمرتضى بغرفته

- لا خليه مرتاح
لزمتني من ايدي و دخلنا لغرفتي

- اشبيج زينب شنو صاير

- ما اعرف

شهد حموت صدمي حموت احس اهلي كارهيني ...
ومحد طايقني حتى امي ما تباوع لخلقتي ...

- زوز شصاير بس لا هم بعدج على سالفة دخلتج على السيد
ترة عادي لا تحبكيها موقف بايخ وصار ياما اصير بينا موافق بسبب الضغوط نصرف بغباء
لا اظلين تلومين بنفسج

- صيحت كدام غرب

- والله عادي بالعكس مو ذاك الموقف الفضيع ترة ....
ينحسب الج
خالة وتحب طفل اختها

- خاف بابا كرهني مدا يحجي وياي عباله مثلت من صحت صدري

-زوزي حبيبي مو الطبيب كال عادي حالة اصير ما كال ماكو هيج شي حتى تخجلين قابل انت صدوك مثلتي

- ما ادري اشبيه
شهد بس اريد ابجي ... ودوم احلامي تخوف لو مادري شسوي لا مقصرة بصلاتي ولا بطهارتي

ليش اكوبس
واحس بوجع دوم قوي براسي بسبب قلة النوم وجه الصبح الا انام

سمعنا صوت رقية ودخلت علينا

-شهد شهد اشبيج اشبيج شنو صاير

صفنا اثنينا على رقية بعدين فهمنا بسبب شهد لابسه وطالعه بسرعة ومن غير جواريب فهمت كوثر جاي النا وعبالها صاير شي جايبه شهد وجاية ...

دخلنا كوثر يمنا اول ما دخلت غمت اختها وكدامي تعجبت

-وكعتي كلبي ولج عبالي رجلج بيه شي حتى هيج اطلعين واني طلع بلساني شعر احاول الين راسج تخابرين رجلج ماكو

- ترة لعبت نفسي من شعر السانج

- اشعندج طالعة

- هيج اجيت اسولف ويه زينب شفتها ضايجه

-ضايجه ولمشتاقه لاخوها وسويتها جسر

ابتسمت على حوارهن

كمت صبيت عصير وشفت دخلنا بالغروب ...واني سالت رقية ياسر اليوم ببيته الثاني خل اعزمهم والح يبقن يمنا يتعشن ...

من دخلت هم لكيت كوثر محاصرة شهد واتريد تعرف ..

اني اعترفت ورحمت شهد

-لا الحقيقة هي صدك الي جاية .. اني كنت ضايجه حيل مدري اشبيه الكابة صعدت فول

شهد-سمعتي حتى تصدكين

- اشبيج يعني شو وجهج مبلوع بلع

-مدا انام والله كوابيس لو ارق ما اعرفلة سبب ...
انوب راسي موتني ...

اجاني عبودي يشكي من علاوي

حطيته بحظني ...

واجه علاوي هم كعد ..

بنص حوارهن الي كان تحشيش كوثر مستلمة شهد لان رجلها فوك وهي جواه بغرفتي ..

كوثر-اخ لو يوكع السكف ويكعد ذاك الرجال بحضنج واتفضوني

دمعت ابعد دمعة تجي غيرها ..

شهد همست-زينب

-ما اكدر بعد اريد
ابجي واعلن بكائي وبصوتي ما اعرف الوجوه اشلون صارت تباوع الي ..

بس ايد جرتني وحطتني على صدرها وعصرتني

-لا تبجين ابجي ابجي ..
زينب

رقية كامت تبجي وهي حضانتني

حيل

شهد -هاي مو سالفة عبودي زينب صاير شي ما اعرفه اشبيج هيج تبجين بحركة

-ما ما اعرف

لج اريد

اسكت ...

كلتها واني انحب

كوثر- هاي مسحورة

شهد- انت شنو تحجين
اكلج زينب خاف شي يوجعج

غطيت وجهي وظليت ابجي بحضن رقية ...

جرتني ايد انتهبت عليها كوثر تباوع لوجهي

-صلي على النبي

مكدرت من كثر البجي..

شهد-دكومي غسلي بلكت جوة الماي اسكتين

كوثر ورة اشوية رشت على وجهي ماي من الي قدمنا الها

صحيت اشويه على روحي ..

ظليت امسح بوجهي

كوثر-قريت عليه المعوذات ترة انت شغلتج مو خاليه

شهد-عفية اسكتي لا تخوفيها بهاي الخزعبلان منو يسوي الها سحر

-اشوف اشوف بأحلامي مرات مرت مرت عمي تخوف تخنك بيه

كوثر- هاي نفسها الي اجت وشبعتج كتل ..

واني امسح بخدي باوعت لشهد شفت اعيونها اتهربن مني

كوثر- سولفت الي رقية ترة مو شهد
عادي اني مو غريبة ترة اهل احنه ترة وبعدين ادري صاير خلاف من ياسر بس ما جنت اعرف السبب

- راسي تجيه نوبات صداع قوية

- هم اتحسين صدرج يوجعج وما اكدرين اجرين النفس؟

- شنوو اي
اي والله واخرها كدام السيد واخوته

بس ما بيه شي بابا اخذني سويت فحوصات

-والله هذا مو مرض
هذا سحر
والله اعلم ...

شهد- اعوذ بالله عود صدوك

كوثر-انت طفلة جنت من اختج توبة صار بيها سوته الها مدري منو ما تخاف من الله وصلت للخبال
بس امج راحت فرت عكة ومكه هي وببيبتج حتى للبصرة راحت لشيخ

تاليها راحت للكاظمية افتحوه الها بيت سيد ***

-بس هاي الي ناقصة الها اذا صدك

رقية- زينب اليوم انام يمج حتى من من من
سكتت اخذت نفس الا كملت

- من تجيج مرت عمو اني يمج

ما راحت شهد و قبلت تظل ع العشا لخاطر حالتي المريبة طلعن بالهول و طلعت الهن امي ...
ابوية من سمعت بيهن يمنا كال ورة الصلاة اجيب عشا جاهز لا تسوين شي
كال هالكلمتين وراح يتوضا مولي ظهرة عليه
نزل مرتضى دخلنا سوة للهول مثل الي ممصدكه بالبداية وظل يباوع للخظة الا نطق السلام من شاف مرته كاعده وذابة العباية ومطروحه على النفقة راسها على حضن رقية وبحجابها ..
من شافته كعدت

ردت كوثر
-وعليكم السلام
ووكفت اله

- اشلونج ام رقية

-الحمدلله خوية بخير شخبارك صحتك

-الحمدلله
-اشلونك بعد
- بخير الله يخليج ويحفظج
حاط ايده على صدرة مرحب و التفت على رقية كامت اله
بوسته وكعدت يم شهد

-هاي شهد شهد اجت اجت اسكت اسكت زينب
عضيت الها شفتي

خنست تضحك

- ها ها لا ما تبجي تضحك

وجه شهد جان مطنكر لاحت ابتسامة عليك من كلام رقية الي تريد تلزك كلامها ..

انتبهت لنظرات امي اتهربت منها اكيد عرفت بيه ...

امي كالت
-يمة تعالي اريد اتوضى

مشت بالكرسي واني وراها ..

وصلنا للمغسلة

- اشبيج يمة

-ما بيه يمة .

فتحت الها الماي

- محد ياخذ عبودي ابوج حجى وية ابو مصطفى

-صدك يمة

-على الاقل بهاي الفترة
تتحسن نفسيتج وياخذوه يومين اهناك ويومين يمج منا من تتعودين انت وعبودي

- يااا يعني هم ياخذوه بعدين

-لعد يعوف ابنه

- اني ربيته

-سدي الحنفية

سديتها وهي كالت
- يمة الفترة الي ربيتيه بيها هي سنة مدة وفاة اختج تردين ابسرعة ابوهم يلم نفسة وما تتخربط اوضاعه وياخذه قبل لا تتعلقين بيه ...

اثاري مو حتى تتوضا حتى اشوفني

رجعت و مرتضى كاعد كدام مرته و هاي وجه مكلوب و تباوع لتليفونها

رادت اتروح واصرت تحجتت تعبانه دخل والدي واصر يبقن و صاح لمقتدى اعتقد يجيب العشا ..

اتحسنت بوجودهن وارتاحت روحي
تعشينا وحدنا كوثر تستحي من ابوية
و شهد حاولت تطلعني من المود تضحك وتشاقة .. وبس دخل مرتضى بعد العشا هم كلبت الوجه ..

-شهد تعالي اريد احجي وياج ..

راحت على كيفها ومبين على وجها عدم القبول بس احرجها كدام امي متكدر اتكول لا ..
بغرفتي وسدها ،
كوثر ظلت تسولف وياي امي راحت يم ابويه بالغرفة تعبانه من وكت تنطرح ..

سوالفها عن السحر اني مو كلش مقتنعة بداخلي شي ينبذ تصديق هاي الامور ...

اني لأن مضغوطة و ضايجه من نفسي دا يعكس على نفسيتي هذا الشي ..

طلعت شهد من الغرفة كالبة وجها اكثر عبالي راح يصافون و اترخصن وراحن هنه ورقية رجعت للوحشة مالتي. وحيده احس روحي

صفنت على نفسي اني اشبيه مربطة نفسي شو خل اروح لمرتضى .
دكيت الباب

-ادخل مقتدى

دخلت اني

من شافني لبس فانيلته وكعد

- ها رايده شي

- رايدة اعتذر

ما زال الزعل عن وجهه

- مرتضى
عفية لا تزعل عليه كافي عليه بابا

صوتي ارتجف وهم و بجيت

- اكعدي

كعدت يمه على كرسي متحرك لشهد بيه نمر مهيب كدامه وهو على سريره
كاعد

- اشبيج مكتأبة ؟
واشبيه صدرج تختنكين منه مو كال دكتورج مابيج شي

-ما ادري

خاف عندج شي بالجهاز التنفسي

-انت اشمدريك دعاني ؟

- شهد كالت
كالها ويطلع جكارة من بكايته

-عفيه من اطلع ورثها ما اتحمل

-باجر اخذج بس ما اعرف طبيب ولا وين اخذج

- ما اريد اطباء

رجع انطرح على سريره

-يلا اطلعي اريد ادخن

- بعدك زعلان عليه

- سوايتج تحرج حيل
لو كدام محمد تهون بس كدام ازلام غرب

كمت اشاهك من كرهي لنفسي بهاي اللحظة

-ما اريده ياخذ الطفل مني ...

-شسوين اهنا ..

رفعت راسي على والدي الي اصلا ما يدخل غرفة مرتضى من تزوج اليوم يعتبرها غرفة خاصة ...

-بابا!

- ليش تبجي اختك ...

مرتضى - ما بيها شي اسكتي يلا وروحي لعرفتج نامي ...

شردت من كدام نظرات بابا وانزلت اهرول

وصوت بابا خلفي

-على كيفج

اشصعده يحظي
التفتت من نزلت اخر باية وهو نزل اخر درجة صرت بطريقة

الكلمة صعبة تطلع حيل اخجل من بابا حتى اخجل من كلمة الاعتذار !

- بابا اني
اسفة حقك عليه ...

شفت بعيونه التأنيب وعدم الرضا اتقربت عليه جامعة كل جرأتي و قوتي

و رفعت احواف اصابع رجلي و بسته من جبينه. وشردت راكضه

لغرفتي واركعت بيها قبل افتحها و دخلت سادتها واتنفس بتثاقم واني ظهري مسنود عليها ...

شفت عبودي نايم بكاروكه طلعته حاس اشوية من حطيته يمي و نمت نووومه عميقة على حس السيد ما اجتني احلام مخيفة مدري لأن حسيت بشوية رضا عن نفسي ..
الصبح وكفت كدام مرايتي

- كال سحر كال
كوثر ما تعرف اذا النفسية تعبت يمكن تصاب بكتأب او وعكة نفسية ..
اي يا زينب خليج هيج عفية عليه اواجه اغلاطي و ما اظل الوم الي بيه كافيني
بس ااه لو ما معليه صوتي
يوووه رجعنا للملامة
دنجبي يلا انت غبرة ورعنه
لا مو رعنة عادي ضغوطات عليه مو اشوية ابني ينوخذ مني واني مالي حق بيه
مشكلته ليش خلاه يمي

طلعت من غرفتي
ورحت للدوام ورجعت ومصدعة حيل

لكيت قسومي بالحديقة
من شافني اجاني سلمت عليه

- اليوم انتم هنا

-بس اني وصوفي وابوية

انذرني كلبي من جيته ...
-ابوية اهنا مو

-لا جدو طالع بس مقتدى و بيبي يمه بالهول .

لفلفت روحي بعباتي و دخلت من باب المطبخ شارده منه لغرفتي ..

اجاني صوفي

-اشلونج خالة

- حبيبي صوفي ابو دماغ

- تعالي ابوية يريدج

-يمة شريد ابوك مني

- يريد يلقي عليج احد محاضراته اكيد

- لا جديات شنو يريد

- يريد يعينج خطيبة وياه

-انجب عاد واحجي

- يريدج تخطبين الي مرة

-ولك احجي
طلع وما كال الي الخبيث المزعج ...

دخلت بعباتي و اريد اعثر من المستحى

يبووووه تذكرت من اللباقة اعتذر عن ما بدر مني يا يابة اشكد ما اطيق اعتذر منه واني بروحي على غلط بس شسوي لخاطر تربية بابا

وكف من دخلت
همست السلام عليكم

رد عليه

- اعتذر منك سيد
على ....
قاطعني وازعجني

- انسي ... اجيت احجي وياج بموضوع

كعدت وهو كدامي باوع لأمي ومقتدى الي كاعد بقربها

-هي اختي ان شاء الله

امي فهمت مقصده و اني ارتعبت من امي كالت لمقتدى
-تعال يمة وياي

راح مقتدى وصوفي وياه انسحبوه

واني دخلت بوسط عباتي ودي اخفي وجهي عنه ...

- بخصوص عبد لله

- الله يخليك والله بعيوني مخليته حتى من اروح للدوام يم امي و اختي تلبي طلباته ..

- اعلم واعي الحنو على اليتامى يذهب قسوة القلب لكن اهم شي كون يصب بمصلحتهم ،
تعتقدين ما افضل الطفل يربى عند اقرب شخص لأمه و افضل بديل لكن
صعب ارمي بمسؤوليتي عنه احاسب اذا اترك رعيتي حمل على غيري تعلقج يوم عن يوم اذا زاد مو من مصلحة نصيبج سنة اهون من ثلاث او اربع

ما عندي رد للنقاش ظليت اسمع و اني شبه مقتنعة

- حسبت حساب هذا اليوم و طلبت والحيت بس للنصيب رأي اخر ...

ما فهمت كلامه عن شنو

- يعني تأخذه

- يبقى يمج لو كنت موافقة و مرت عمة

جفلت من تطرقة لهيج موضوع شايل الحواجز !

- ماجد مختلف عني صح بطريق سيره
لكن ما يتخير عني و ما فاقد روح الشباب مثلي

توترت واتضح عليه التوتر

- وبنته جدتها ما تقبل تنطيها تخاف عليها من مرت الاب متكفلة بتربيتها وهي ماعدها اولاد وبصحة جيدة ان شاء الله على الدوام الها
ماكو عقبات لو
هسة الكلام هذا ما يقدم ولا يأخر

المهم عبد الله لازم ينظم لاخوته تأخيره يضرة حيل لازم يتعود عليهم

-اشلونها رجاء

-قصدك العلوية مرتجى؟

- هاي اي نسيت

-اشوية اسمها صعب ذكوري اكثر
بخير

-اقصد اشلونها ويه الاولاد صدوك عصبية ؟

- منو بينا مو اعصاب

يووه ذكرني بروحي

-من الام يتقبل الطفل العصبية
فطريا الدم يحن

- الله كريم يتعودون عليها بعدها شهرين وياهم بمرور الايام يندمجون وياها ...

- الها خلك تربي طفل عمره سنة وخمس اشهر ...
ترضع و تغير و تتحمل دا يطلع رحي
و تتحمل تقلب مزاجه براحبة صدر
اذا واثق انت

- يعني؟

-اخذه ...
اخذه
كلت الثانية بدموع تجري ....

انطيته اله وليلي ما نمت
حاطة اوفر اله ما انطيته حاضنته وابجي ...

ثاني يوم توسلت بمرتضى ياخذني يزوني مرقد الامام علي عليه السلام

دخلت واول ما دخلت احس اشلون روحي محبوسة جانت و انفرجت بدخلتي احس الهوى من صدك هوى يدخل ريتي يزيل صدأ هم صدري ...

ظليت كاعده كدام الشباك وما وصلت اله ادمع واشتكي من فراك عبودي ...

كمت بيت شباك الضريح و شفت علك اخضر مشدود لزمته و شديته وتمنيت بالزيارة الجاية الله شايل من گلبي تعلقي بيه ..

طلعت ورجعنا للبيت و رجعت الي الكوابيس ماكو الطفل السيد يبعدها عني بحضنه اخذوه مني غصبا ما عليه قلعو مني قلع حتى جذور ما انقطعت ظلت تجرح بداخلي ...اوصف حالتي لأن عبودي مو شي عابر بطريق عمري شخص جزء من حياتي هدني هد غيابة جدد عليه وفاة عزيز عليه ...

طلعت باليل من غرفتي وانطرحت بالهول واني اقرا قصة الهي نفسي بيها
ونمت ...

كعدت معدتي توجعني ومصدعه ما مرتاحة ...

ندك الباب العصر واتفاجأ بجية الجارة الي سلمت عليه ذاك اليوم لأنها جاية مسيرة .. كعدت ويه امي ورحبنا وضيفنا .. اني عفتهن سوة ودخلت وامي صاحت الي ازتت المرة من رادت اتروح ...

-امشي كدامي خاف ولدكم يطلعون!

ممم كلت بكلبي مع هذا مشيت كدامها التفتت لانها مبتسمة
فتحت الها الباب وطلعت ..

رجعت لأمي

-شعجب يمة وحده من الجيران تجينا معدنا اختلاط

- ما اعرف والله شو جاي تتعرف واسولف !

،
توقعت وحسيت معجبة بيه المرة
فطنت اني سالفتها مو خالية ..انقبض
گلبي من السالفة ...

بس شو توقعي ما صدك وما اجت بعد وراحت السالفة ونسيتها ...

مرت فترة واني ما زلت أشتاق لعبود الي كطع عليه حتى يتعلم على مرت ابوه اذا يشوفني يحن ويخافون عليه ..

اني بهاي الاحداث صرت اهتم بدراستي و البيت الحياة تلاهي بس الليل صعب وما زلت اعاني والحروزة الي اسويها كثرت والاستغفار الي الزمة
والصلوات خفف مني الارق كمت انام
حتى من اكوبس عاد ارجع انام

صافنه بنص المحاضرة على الاستاذ ببال شارد ولا يمة مصدعة حيل كالعادة

انتهت ما كمت مابيه ارفع راسي مو اكوم ...

ولا انتبهت للي طلعو ...

ودي اغفى على الاستول
- زينب حسن

عندج أستفسار
رفعت راسي عزة الاستاذ ما طالع

لملمت نفسي ..
وردت اطلع شو هذا لمحت ابتساماته الي ونظرات مزعجة حيل ...

الشايب العايب تف
بكلبي كلت

من رجعت لكيت كوثر...
هي زينة احسها بس هيج فضولية حيل وتحب السوالف والاندماج

استغربت من جيتها ..
من رحت يمها بعد ما بدلت

كالت من رحت يم امي للمشخاب

اخذتلج خيرة عد وحده تاخذ فال بس كلت الها اسمج واسم امج وابوج وصفتج فلستج تفليس

- شنو القضية هههه
اني ما صدك ابد بهاي السوالف كذب المنجمون لو صدفوا

- لا عيني هاي مضبوطة صدكي
اتكول هاي مسوين الها عمل والعمل مالتها قوية يوكف قسمتها

ضحكت على عقلها بس ما صديتها برد يحرجها استمعت الها بخلك كضيان ..

- اتكول وحده تعرفها وتكرها حيل
ينعجبون بيها الناس بس اكو صداد يصدهم

-يا علي هههههه شسالفه

- اتكول اخر قسمة راحت منها بيها راحة و رزق

- كلشي بيد ربج محد يكدر يمنعة

- الله واعلم جنج ما مصدكه بس اني من شفتج ذاك اليوم عليج علامات المسحور
كلت اخذلج فال واشوف

- ما امن بهاي السوالف الله يبعدنا عنهم
بابا يكول محرمة هاي السوالف

-لا هاي المرة أعمالها تساعد الناس

-كلهم دجالين ....

▪︎ ماجد ..

رجعت من السفر ما كانت رحلة موفقة لأن بارده وتمرضت من تغير الجو ..
تعلمت على الوحده ما رحت لبيت اهلي
...

اشتاقيت لاطفال محمد حيل بعد ما طلعت من بيت اهل المرحومة مرتي .

رحت اله ..
من دخلت تلوكني ياخذون الصوغات

طلع محمد

و لحد ما قررت اروح مرته ما طلعت سلمت ...

سالته عن حاله

-زين

بليونه كالها ما اقتنعت بيها !

- هااا هذا عبودي

اجه لابوه يبجي

حطه بحضنه

-تعال ولك شو ضعفان

- ما جاي يتألف ويه مرت ابوه ولا حتى ويه اخوته
نومه متعلل

- يتعود

- الله كريم

-اشوكت رجعت من السفر

-قبل البارحة ...

بشرني مرتاح ؟

- الراحة نعمة غالية ما نحصلها الا بالرضى والرضى ما يخضع اله ابن ادم

- مبين طبعا من شكلك

رحنا للاستقبال ناخذ راحتنا بالكلام واعترف الي بالفرق الي يحسة وجاي يعاني منه وطلع مو بس عبد الله الي ما متألف !

- صارلك ثلاث اشهر من متزوج مدة بسيطة لا تقارنها بعشرة ١٧ سنة

-من اول يوم حسيت بالفه و واتباع
حسيت اني تابع الها وهي تابعة الي
يا اخي الخلل بيه ما جاي اتأقلم ويه المرة ولا بداخلي اعتراض
استغفر الله واتوب اليه ما اكدر اخضع نفسي ...

- زواجك الصح الي سويته بهاي الفترة رغم الي تشكي منه يبقى بيتك عمر بيها

البيت بلا مرة سكف بلا عمود انت بس انطي نفسك مجال

-ام مصطفى ما تفارك هذا

اشر على صدغ رأسة

تألمت على حالة ..

- اكلك اني اتكلمت من جديد ويه عمي ابو علي

-على شنو ترجع الطفل

- لا يا طفل
على بنته

- لا يمعود
ما رايدها ليش هيج سويت
ليش خطبتها بعد رفضها الثالث الي اني ما رايد زواج بعد غيرت راي الاستقرار يجي براحة البال

- ماجد اسمعني
اني ما خطبتها مجرد كلام لصديق ابوها من احجي كأنما احجي ويه نفسي

- هم غلط منك يا اخي اني شلت الموضوع من راسي بعدين اني عجبتني حياة التحرر من القيود
كنت بسبب بنتي اريد استقر هسة البنية بيبتها توسلت بيه اخليها تربى بحضنها وهم من صالح البنية جدتها تعطف عليها واحن عليها من اي احد
ماعندي ما يلزمني استعجل مثلك

-هو هم كلت لعمي بنته يم جدتها تتربى يعني ماجد فارغ ..

رحت راجع لبيتي ذبيت نفسي للنوم الغربة تعبتني ورجعت

جنت بالدوام وخابرني محمد ...

- ماجد تكدر تمرلي اليوم

-لا والله مشغول
خير

-على راحتك ...
بس ردت احجي وياك

- ما فارغ اليوم والله

- زين نأجل الكلام ...بس راح ابلغك
عمي ابو علي اتصل بيه والبنية وافقت عليك

-يا بنية

- اخت المرحومة

- لا تكولها

- ليش

- محمد ورطتني اني صرفت نظر عنها

-ليش

-ما اعرف شو احس نفسي ما رايدها مو مثل قبل! اصلا ما رايد الزواج

،

رجعت للبيت واني احاول الكه مخرج من توريط محمد الي

اذا غضيت نظر عن الموضوع احطة بموقف لا يحسد عليه ، اني بعد ما شفتها عن كثب صرفت نظر عنها حسيتها مهزوزة و شخصية متعبة

اشلون اتخلص من هذا الموقف مو غير ما احرج محمد

رحت اله بالليل ....
اهواي دكيت الجرس .. طلع الي تقي فاتح الباب

-صيح ابوك
-بابا طالع هو وقاسم و صوفي وعافوني
محمد ما يطلع هيج وقت

-وين طالع هسة ؟

- يراضيهم ههههه كتلهم اليوم كتله

-ليش ولك

- صيحو على خاله

! ياستار بعدنا بأولها

-يلا طب عمو

- لا ما ادخل ابوك مو بالبيت .

طلعت راجع لبيتي ورة ساعتين اتصل محمد

- كالو الجهال اليوم مار بيه

-اي ما لكيتك اشعجب طالع .؟

- اشوية ارفه عن الولد

-ليش ضاربهم ؟

- هااا كالو الك وكالة الانباء

-اي تقي هههههه

- تجاوزهم ما عجبني وماعدهم احترام لخالتهم

- اكلك مو هيج انت الي نضرب بيك المثل بحلمك مو راح يكرهوها

- فقدوني صوابي

وهي الله يسلمها ما تتصرف كام اقل شي وتجي شاكيه منهم وهمه ولد وكحين ...

-شنو هاي الهوسة

-هذا عبدالله يبجي
اشوكت ترجع تقتنع بالزواج
و ترحم هذا اليتيم يريدها ما جاي يتعود على العلوية

- يمعود اخر موقف الها كرهني بالزواج ..
ذكرتني بالمرحومة !

- لا بينهم اي وجه مقارنة هاي رابية على ايدي و اعرفها او بالاحرى عرفتها

- محمد لا تورطني لخاطر اولادك

- اني اكلك لخاطر اولاد اخوك اخذها ترتاح و تريحها وتريحني ..

- شطلعت هاي ضامن الراحة لجميع الاطراف بهاي الزواجة
ما ادري افكر ....

ما خلاني افكر محمد يومين صدعني بالالحاح ....
وهو مقنع ...
كلت اله موافق بس بشرط اطلب رؤية شرعية ونكعد وحدنا ...

لكيت نفسي ببيتهم بمضيفهم وحاس بعدم ارتياح كبير ودي اطلع لو الاحراج الي اخلفه لمحمد ..
دخلو والدها وياها . وهي بعباتها خلفه
همست
-السلام عليكم

-وعليكم السلام
مرحبا

مدري شنو كالت ما سمعتها ...
ابوها طلع ...
راسها مدنك ما شفت من وجه شي وينها ذيج ام صوت اليرعد

شو انكسر گلبي عليها من لاحظت ارتجاف ايدها

-باي تخصص او قسم انتِ

ردت بتوعك

- ليش مسائي مو صباحي

- لأن لأن تأخرت الا قدمت ..

- مرتاحة بيه

-يع يعني ...

-وانت بأي جامعة درست

مرت نصف ساعة سؤال وجواب من الطرفين وهي حيل مرتبكة لكن تجاريني بالحديث

-ترة لهسة ما شفت وجهج
حاولت انكق بطف وتهذيب لا احرجها اكثر

رفعت راسها ..
رجع عجبني من جديد تحفظ ملامحها

عدم تشذيب حاجبها كان نقطة اعجاب
من الها ...

مقابلة لمشروع زواج وكاعده من غير ادنى تدخل تعديلي بالمكياج ..
رغم ثقافتها و اطلاعها لكن حسيت بملامحها ثقة مجملة ...

حسيت بنعقاد حواجبها

- حضرتك اتريد تعوف بنتك عند بيبتها ؟

- اي!

- تعيش بعيد عنك للابد يعني

- ما اعرف بعد بيد الله تغير الاحوال

- انت من سمعتي بيها بعيده عني وافقتي لو الموضوع ماله علاقة بيها

- تقريبا الصراحة خايفة لا
ما اكدر اعتني بيها واظلمها

- مافهمت اشلون اظلميها؟

- ما اكدر اعوضها حنان امها

بداخلي كلت امها عدها كان حنان؟

- او افرق لا اراديا بينها وبين اولادي بالمستقبل
ما اريد احمل اثمها

-انت عمرج ٢٥ ؟

-بلي

مسحت بوجها بالكلنس وكالت

- تدخن ؟

استغربت السؤال

-لا

ليش عندك مانع يعني بالرجل المدخن

-لا بس سؤال ...

حسيتها توها بدت تنفتح بالحديث

اخذت راحتي بالنظر الها ...

- عندك مانع اكمل دراستي

-سنة ما اضر

-اتعين اذا اخلص

شافت نظراتي ما مقتنعه
اختصاصها مابيه تعين

- اقصد اذا حصلت

- ما اعرف بعد حسب الظروف وشطارتج

- زينب رفضت من قبل؟

شفت الحيرة علمت على ملامحها ...

- مو كلت الك خفت لا ما اكدر اعتني بالبنية!

-اول مرة

سكتت فترة ودنكت وشفت اديها تشابكت .

- كنت صغيرة؟

كالتها بتردد وكانها تسألني مو اجاوب

-اتحبين الحياة المنعزلة لو اجتماعية

- يعني الى حد ما اني مو اجتماعية ما انخرط وية الناس بسهولة

توقعت اجابة مختلفة !؟

- انت عمرك بس ٣٣ وهيج

-ما فهمت
سكتت وعضت شفتها بتعلثم

- من رخصتك ..
شو كامت كانها شردت مني

اني فهمت قصدها ابسرعة وضحكني هذا الشي قصدها على بطني ...

عدها طلعات هاي البنية اضحك بس مدام محمد مدح بيها تقبى ما تشبه المرحومة وبلكت انسعد وياها مالي طاقة بعد للفشل !

مشينا عليها و السادة ما قصرو طلبو يعقدون النا وابوها ما كال لا ..

عقدت عليها كدام الرجال الحاضرين والوكيل ابوها ....

ارتاحيت على ارتياح محمد ..

ظليت كاعد منتظر ما كمت ويه الي طلعو .. بقى بس محمد .. اني منتظرها تطلع الي ...

دخلت التفتت على النساء الي دخلت ..
امها بكرسيها ونسوان ما اعرفهن قليلات
وهي بثوب أرجواني و محجبة ..

اول شي نظري لاحظة حواحبه مشذبة ومتقوسة مطيتها هيئة اكثر تطور

ليش الجبين معقود ...ليش الحلك مغلق بنزعاج ما اعرف هاي البنية من تخجل هيج وجها يصير لو هي هيج ..

بعد ما سلمن وكعدت يمي ..
شاورتها
-وين تليفونج ...

-هااا ليش

- وينه
ابتسمت اهدا خوفها الي ظهر وكان احد من الشارع يريد يرقمها ..

باوعت لوحده من عمرها وكالت الها اجيبه ....

جابته الها ..
اول ما لزمته كلت الها ماد ايدي
-ممكن
اخذته

-افتحيه

فتحته ...

خزن رقمي عدها ودكيت على نفسي

-تبادلنا الارقام

-اوك بس لو كايل الي ارده الك
اخذت تليفونها

ما طولت بالكعدة طلعنا اني ومحمد من عدهم واني حاس برضا هاي فرسة طلعت جسم و طول ورشاقة ..
باوعت لبطني وضحكت هاي بعدها
اتريد واحد بالباكيت

بس والله عليها جسم الجاحده تباوع الي بفوقيه شو من دخلت هذا كله لان سابق الي الزواج
اخ لو اعرف ليش رفضتني باول مرة لا يكون كانت تحب ابن عمها !!!!!

▪︎ زينب

وهاي انخطبت وينها كوثر وام الفال مالتها خوش تعسير

حاولت انام باليوم الي عقدت بيه

بس ما كدرت فتحت الضوة ورحت وكفت كدام المراية اشوف روحي
-شنهاي حواجبي سوني مرة

مممم يا ترى عجبته لو لا

شو نظراته عادية كأنه يعرفني من زمان ولا بيهن انبهار

اووف ياربي هاي الي تاخذ مزوج كلشي عايشة قبلي اوووف
والله لو مرت ابوهم كادره تحتويهم فلا اوافق على هاي الزواجه !!!
ما كسر عنادي واصراري بعدم قبولة غير هذي الاولاد الي تشكي الي !

رجعت باوعت لنفسي

-بس اشبيه شو صايرة ينطلع بيه
لعد اشبيه هالمصكوع الاعمى على عينه

ولا باوع الي !

ولو اني وين شفته بس مدنكه مستحية من بابا والسيد .

بعد اسبوع كان موعد لقاء ثاني بعد العقد بيني وبينه واني ولا متحضرة نفسية شو مدا اتقبل زوج حتى ارادتي بان اعجبة ماهو الا غرور انثى توها حست بأنوثتها
بس كزوج او حبيب او خطيب نفسي قافلة

الاهل دخلو و امي لحت اذب الحجاب عندت
كالعادة امي كعدت اشوية وراحت

-ممكن الحجاب
اريد اشوف شعرج

عزة هذا صدك يحجي واني الي ما مشطة !

يتبع

الموعد ما اعرف اشوكت ههههه
حسب الظروف ❤