رواية شيخ الشباب(بنت المؤمن) الفصل الثاني والثلاثون 32 - بقلم زهراء العراقيه

البارت ٣١
شيخ الشباب

من كتابات زهراء العراقية

عفوية الأمس ماتت
وماعاد في قدرتي أن أتسامح
لم تمحُ أنت الهوى .. بل محوت فؤادي
-مظفر النواب
•زينب
‏"عرفتوني خفيفة الروح، فضفاضة القلب، أقصى أمانيِ ألا أفقد خفّتي، خفّتي في البقاء، خفّتي في الشقاء، خفّتي في الرحيل، لطالما كانت أكبر مخاوفي أن أكون ثقيلة، كنت آخر من يغـادر، أهدأ من يغادر، أجمل من يغادر، كان قلبي ورقة شجرة يافعة، وكأن العالم خريفًا دائمًا."

كنت انظف بالثلاجه بخاطر مكسور
بعد ما حضرت امه واخته يتعرفن علينا
وراحن مقتنعات بيه ،
قرار ظل بخاطري و هو الي خافي عليه فرحتي

شاورت امي ما قبلت ، مع هذا حتى ارتاح بلغت وصال ما زالت اعاني من الذبحة الصدرية وبلغتها الطبيب يكول حالتي بتحسن على العلاج تختفي ماتكون مرض مزمن ..
  ، لكن بعد  ما فتحو بعد الموضوع
الخطبة وغلسوا على السالفه خلوها بس سالفه تعارف و وصال اعرفها مستحية مني اختفت اتصالاتها ..
بكيت اهواي بحضن امي البارحة
مو على العريس لكن اشياء انكسرت بيه من غير ما اكول الها أسباب تركهم ولا كلت الها اني بلغتهم ، كلت امه طلعت ما مقتنعة بيه....
كملت الثلاجة..رحت للطباخ اعزلة
اجتني شهد بلغتني ان رقية عرفت ياسر راح يزوج ...
رحت الها

-رقية لا تبجين حبابة روحي خلصانه
انتي مو عفتيه شاف حاله الرجل ما يظل اعزب

حجيت بخلك خلصان مابيه للتراضي
و المواساة
- انت تدرين ؟

- ها
اي

-يعني يعني ازوج مثل ما ما ازوجني

يعني سو سوالها عرس عرس و بدلة بدلة

غرفتي لو اشترى الها غرفة ؟

زين زين  هم هم راح يخلف منها منها

- رقية حبيبتي  شنو يهم هو بعد طلع من حياتج

الله يسعده

-ما يسعده يسعده
اريده اريده

تحجي وتمسح بطرف ردنها خدودها

- اني اني ام علي
وهو ابوه ليش ليش ازوج وحده وحده مو ام علاوي
اني امه اني

كعدت كدام سريري على الارض وراسها على السرير تبجي ضامه وجها عني

-رقرق
حبيبتي گومي

اعتصر گلبي حزن عليها

سمعت صوت ورانه
-رقية ليش تبجي

كمت وكفت وكلت لبابا

- سمعت بالخبر ....

دخل وگومها

- ليش ليش
ليش ما رضيت
ازوج ازوج عليه جديده

-انت مو زوجته بابا لا تبجين

-لا لا اني اريد ارجع  ارجع ما اريد انام وحدي

اني اني كلت كلت الك وانت ما رضيت رضيت

رجعت نامت على السرير وتضرب على المخده

وصوتها يقطع القلب

بابا صاح لأمي...
ظلو يمها يهدون بيها

ام علي- انت ام علاوي  و حبيبج
ابوج واحنه مدللينج محد يزعلج ويغثج
ولا ياسر يعصب عليج ولا كوثر  تعيب
اهنا كلنا نحبج

-ما ما يعصب دوم بس بس من من يصير شي

-انت مو كلتي اخاف منه يضربني
انت اهنا محد يخوفج

- بس من من عافني اهواي اهواي اشتاقيت اشتاقيت اله ميخالف اخاف

ليش ازوج عليه ليش
كوله بابا يعوفها  و و و ويرجعني
كوله بابا انت انت انت انت

ما كدرت اكمل السانها حيل شكل
و امي خافت من خنكتها بالكلام ..
بابا اخذ ماي دافي من ترمز علي
وصار يبلل وجهه المصفر فجأة

علاوي دخل و اجه يمي شلته

رجع تنفسها من شهكت وبجت..
حط بابا راسها على صدره وهي توخر بيه وهو يرجعه ويقرة الها

- رجعني رجعني بابا
رجعني اني زينه
زينه رجعني....

توخر براسها و هو يرجعة ،تاليها كامت ركضت لبرة
واني حطيت علاوي وركضت اسرع من بابا يمشي سريع خلفي

طلعت للحديقة انركعت بمرتضى الي توه نازل من سيارته

-الزمها دخلها بوية
دخل اختك

ادفع بيه وهو مشاها غصبا عنها
للداخل

-مرتضى مرتضى

اريد اطلع اطلع

ادفع وترافس اخذت علي الي ما فاهم شي وكام يبجي على بكيها و دخل ....

متحلفة بخليل ودي اقطعه قطع على سوايته الغبية
والله بس اشوفه اذب ثوب المستحى و انعل ابليسة جاي يمنا يسولف دخذها من ساكت ما تفهم بالاصول الي جايهم اهل طليقة العريس احترم اشوية
يوه اشكد اكرهه شدخلة حديقتنا

كانت ايام عسرة اعسر من طلوگ البكرية
رقية بس تبجي و البيت كأبة وما نعرف شنو انسوي الها
اجت فاطمه اخذتها هي وعلي .
للعصر رجعو علي قالب الدنيا متعود ينام يمي فرجع الي

بس مهما طالت هي ايام وتمر ..

رقية اسبوعين نست لجتها وبطلت
تبجي  عليه
و لو ما زالت محتفظة بسنة  يعني حبها اله فطرة لكن الابتعاد عنه مريح الها

،،

كنت اساعد امي بخياطة عباتها
هي لازمة طرف واني طرف نخبن بيها
(خياط العبايا)
وظلت تسأل بيه عن وصال وما ردت خبر ليش غلسو
وعيب ومو اصول

ساكته ..

لحد ما كالت

-اتصلي بيها هسة

-شتصل يمة مو كلت راحو اعتقد ما عجبت امة

- هيج بس أسالي عن حالها

-من سكوتهم معروف الجواب ليش احرج نفسي ؟

- قابل همه طلبوج رسمي بس اجو اتعرفو وراحو شو بتهم بس بالاتصال كالت ومن راحو على اساس يجون و يجيبون  ابنهم يشوفج شو كلشي ماكو
وامه جانت طايرة بيج شغيرها؟

- ماما من الاخير اني كلت لوصال عن الذبحة الي عندي وهمة انسحبو
خلاصة الكلام وسدي السالفة

- ليش ؟
زينب انت صاحية ؟

عافت العباية وبعصبية كالت

-انت تحجين من عقلج قابل مريضة بسكري لو قلب
هاي عادية منو بينا صاحي لو كل بنية حطت عللها كدام الناس يوكف النصيب محد تتزوج

ما تفتهمين طفلة تتصرفين من وحدج

-اي اني ما افتهم بس من يرجعوني عليج مثل رقية تتندمين
ضربتني بالبكرة

تعاركت وياي واني جادلتها و رقية وشهد اجن على صوتها

عفتها حيل معصبة ورحت لغرفتي

اجتني شهد
-ميخالف لا تبجين عادي امهاتنا هي....

زمخت بيها
-رجائاً لا تدخلين بشي ما يخصج

-على راحتج اسفة

للعصر رحت سولفت لبابا سكت ما كال منو غلط اني لو ماما
وما عرفت اني الي سويته ظنيته صح ابلغهم

انتهت هاي السالفة بعد ايام من غير تعقيب او كلام نست امي السالفة
،،
على العشا لاحظت
شهد ما نزلت و مرتضى ضايج من العصر وما صعد...فهمت اكو شي بينهم

دكيت بابها

- شهودة صبينا عشا

كانت تباوع بتليفونها

-ما اشتهي...شكرا على الاهتمام

-عابت قابل اني زميل عمل وعازمج
دكومي ما عدنا احنه وجبة تتفوت الشيخ حسن يزعل

-دايت

-اكلي روبة المهم اكعدي ويانا وبعدين على سمنج حتى اسوين حمية
دكوم يالعراق

-ها لكفتي من اخوج

-واشبيج ما عاجبج ها
عاد صرتي عراق اني خلك حي العامل محد يصيحني عمي راضية  يصيحون الي ارض الطفوف

ضحكت وكامت نزلت وياي ...

و احنه نكعد على الارض كلت
-مرتضى كال ما اكل اذا ما تنزل شهودة

كعدت يمه وهو خزرني وهي ابتسمت اله  كاعدة كدامة
ظل يباوع الي صفح
همست اله
-ابتسم اشبيك لكيتها غركانه بالدموع خطية ما اشوف اعيونها شحلاتهم مثل عيون علاوي

من خلصنا شفته صعد وياها و حاط ايده على ايدها

-اااه شحلاتهم

،

فرح والدي بيه من طلبت اسجل بحوزة علمية طول عمرة كان يلح عليه واني اعاند اريد اكاديمية من  حققتها
لكيت نفسي اريد بس ارضيه لان احس بمتنان قوي اله...
بيت الشيخ قريب علينا زوجته فاتحة مضيف للنساء يوم جمعة واثنين .. اروح اله مشي
اول مرتين بابا
وصلني بعدها مرتضى ،  بعدين ملو شافوها عادي هي خطوتين صرت اروح وحدي وطبيعي علي وياي لازك يفضحني اذا طلعت وعفته واذا اكلت وما انطيته
دور رقية يقل كل ما يكبر، صدرها كان الرابط بينهم واحنه فطمناه قسرا من صار عمره سنة حتى اكدر انام اني لان كل ما يبجي لازم اني اكعد واكعدها
الممة اسهل احطها وانام

متطلباته  السريعة هي تعتمد عليه بيها
وهو  وكح رقابة مني ومن امي قوية اثناء غيابي
لان رقية تخاف عليه يبجي حتى اذا يكسر تعوفه تكول خطية !
بحيث عرفها  من هسة وشيريد صار يسوي

تنام قبل لا هو ينام فمنو يسهر ينيمه غيري و على ايدي 

لهذا تعلق من غير قصد مني
جربت اتركلهم مساحة
فشلت فشل قوي وبابا طلب مني ادير بالي اكثر عليه لا يروح يصير بيه شي

طلعت يوم الجمعة الصبح عندي درس و علاوي لازك بعباتي ويغني بالهندي

لفت على الساحة.. ودكيت باب بيت ابو خليل

كالو ابوه يريده كلت احطه يمهم واخلص من وكاحته بالدرس

فتح الي الباب خليل همه يدرون بيه جاية شكو يطلعون هذا المستفز

-اهلا اهلا اتفضلي

-لا هاكم علاوي تأخرت

-وعليكم الهاكم ورحمة الله وبركاته

كالها وهو مبتسم
اجيت اركعة بالجنطة الي عندي على اعيونه الي اكلت وجهي اكل
عدلت تحنيكة ذقني

-روح علاوي

-ما ما
لزك بيه لزك
-روح خالة ابوك يريدك

خليل- اشلونج

غلست عنه

-ممكن تاخذه غصبا عنه

-اعصابج عيني لا الولد نفسيته تتاثر

- شنو انت تكول
حضرتك  تمزح

- لا حضرتي امسح كاشي هاهاها

صحكته مصطنعة ناصب عليه هذا
الكريه المايع ابو شعر

-علاوي روح
لزك بعباتي وهذا مكتف اديه وواكف يتفرج ..

تلفت اعصابي  وجر عباتي اجت تنزل
ضربته كف و خرته عني بالغصب لكدام
-روح لعمك

-لا ليش هيج ضربتيه

فضحني علي بالبواجي

-خطية طفل
اشكد عصبية انت

- انت شايف وكفتي حلوة اهنا
اخذه ودخله اشكد تلح انوب تشاقه اعرفك تعرفني

-على كيفج عيني

-مو عينك اني

-على كيفج خشمي ترة ما وكعنا حايطكم ولا سبينا القدس

اييه مستفز مستفز ويضحك عفته شايل علاوي الي يبجي ورحت

سلمت على الحاضرات وكعدت

اووف شجاني ضربته....يوه كله من هذا المستفز
انوب عفته دموع تجري حبيبي شجاني وضربتك
يوه بس يرجع اشتريله و ادللة

العصر قطعت الكيك بابا يحبه صنع بيتي و سكبت عصير ورحت الهم ..
للهول كاعدين باباوماما و رقية

اول ما دخلت جفلت على صيحة والدي

-عيب
عيب كم مرة عديت الج
و انت تفتهمين عيب اجيبين طاري رجل غريب
ياسر ما يحل عليج عيب البنية تحجي بواحد كدام ابوها

كامت تبجي
لزمها من زندها وهي يمه

- حرام وبيها اثم فاهمة لا تفكرين بيه بعد
واني اغضب عليج لحد ما اموت 

كانت المرة الاولى الي ينهي بيها رقية بهذي الطريقة الي خوفتها

خلت اعيونها تتنرس دمع

-اسفة بابا ..

ظلت تبوس بيه هو وخرها واخذ كتابه وراح للغرفة وما اكل من الكيك شي ..

امي- مثل ما كال ابوج عيب تلحين ..

رقية- بعد ما اسويها

طلعت سألته عن ياسر ليش ما يجي يشوف علاوي اهنا ويصير تطلع تسلم عليه لو لا
..

كل ليلة قبل لا انام رقية تكولي هي بعدها تحب ياسر وتشتاقلة بس تخاف تكول لبابا  زعله عليها طول يومين

،
ومرت الايام
طلعت مستعجلة لجلسة قرأة القران
بالمضيف
ما طول علي بالحمام ويه امه شاردة منه
  و من هسة عطشانه الصيام مأثر عليه ..
وجان هم اشوفه واكف يم باب بيته مثل كل مرة
ما اكدرت هالمرة اخفي الضحكه كل مرة يحط الي اغاني ويوكف  قبل   هلمرة حاط الي اغنية سامي يوسف يارب العالمين لان احنه بشهر رمضان
المبارك
معجب حسب الاشهر والمناسبات
يشتغل

عفته نفس كل مرة ما انطيه وجه بس الضحكه فضحتني
(هو ترك الحشد ورجع لشغلة بالسوك وشهد خابصتني بيه)

شهد شالت من مسؤليتي جزء تساعدني بالبيت بس الطباخ ما تقبل تتقرب اله
دوم اكول انطوني البيت كله تنظيف بس طبخ وخبز لا ..

،،،

امي اعترفت لشهد كانت ما مايله الها حيل بس البسمة الي زرعتها بوجه مرتضى خلتها تمتن الها

شهدت  ضحكت بيومها من سمعت الاعتراف الصريح

-ليش خالة اني حبابة

-ادري حبابة
بس عبالي دلوعة وتشلعين گلبه بس طلعتي بت خير واصول  مشيتي على ماية

- الله يخليج  عمة النا
صدوك ضحكتيني صريحة

امي سالتها-اشلونه ياسر ويه مرته الجديدة
جاوبت بحذر
- زينين

- الحمدلله على كل حال
مرات الوم نفسي اشلون انطيت البت 
للزواج
بس يمكن بيها خير 

-شنو الخير ؟
كالها بابا وهو يحط تليفونه على ميز التلفزيون ..
كان بالاستقبال واحنه بالهول يمكن سامعنه

اني علي يمشط بشعري منفوش وصاعد على القنفة وراية وهاجم على شعري ...

جاوبته امي بهدوء وهي تثرم فاصوليا  خضرة وشهد وياها

- انت ما دايم الها للبنية ولا اني
والاخو يمل
بكبرتها و بموتنا عدها ذخر هالولد
لو ظالة فارغة تظل غريبة بين الاخوة
ابنها يشيلها مثل ما سوة ابوه  وية امه وخواته  هذا هم بس يشب ويجي خيره
شنو تغير لو ما مزوجة؟ بس  هي ما عدها علي

بابا - وحدج تتنبأين
ما تعترفين ابد زواجها غلط منا

-اي طلعت مو مال زواج مثل اختي صح بس فادها جان لسه الح عليك
وضحكت

-عنيدة صدك لا گالو علما تقنعهم انت واوي، جلدك یروح للدباغ

هز ايده وكعد يقلب بالقنوات ودخلت
رقية
-خلصت خلصت ماما غسل هدوم ...

-عفية بنيتي

،،

باجر يبدي  الدوام الرسمي لسنة (٢٠١٥_٢٠١٦)
تذكرت اول يوم داومت بيه
وضحكت ...
بابا وياي و كايدته لازكه بايده وامشي ابصفه هو يعرف رئيس القسم ...

دخلته وياي هيبة كأني اكول الهم اني بت المومن !

ودخلته تكررت وياي بثاني سنة الي لكن هالمرة مو مثل المرة الاولى كنت تايهة بوسط غربة ...
بس لان حبيت صيت بت المومن بين الزملاء توسلت بيه يجي وياي
.
واستمرت بت المومن الي هي اني بالدوام و رتبت بين شغل البيت ورعاية علي ودراستي
اذا احس بالاحباط أتذكر عزيمتي واصراري على دخولي الكلية و اشجع ..الدراسة كانت صعبة عليه بعد ما تركت ورجعت لكن قدر الله وما شاء فعل ..
اهم شي راحة البال والشمات خليتهم گدامي وسيلة للنجاح والتفوق...

اخر مرة شفت بيها عماد
اخذت علاوي  ويه مرتضى رحنا للمستوصف نلقحه

شفتها لمرته بالممر كاعده تنتظر سراها عند الطبيبه اني لزمت سرة على طبيب الأطفال   وزهراء خلفي صارت

اجاهه عماد شفته من بعيد والتفتت على علي ..

اكيد شاف مرتضى و ما سلمو على بعض .

دخلت للطبيب وطلعت و هي على كعدتها بس عيني لمحتها لكيتها تخزر بيه عفتها ووكع الكارت مني

صاح الفراش
- طاح كارتكم
ما سمعته فاجه ورانه وكال لمرتضى

-طاح الكارت هذا من مرتك ..

اخذه منه
واني ضحكت
-يبوووو شنو مرتك شنهاي

ابتسم
-جكمة عادي قابل مكتوب على كصتنا اخوه

-يوه انوب هذا الوكح ابنا
تكمل
ابتسمت
صار كدامي عماد راجع واكف على صفحه ينتظر مرته وعينه صارت بعينا

غريب ماكو نغزة توجعني عليه بس احساس بالأشمزاز منه فاق الوصف

وصلنا
نزلنا من السيارة شفنا خليل يدك بابنه
سلم على مرتضى وجاي ياخذ علاوي ابوه يريده

عاتبه مرتضى ليش ما يجي ياسر لهنا او يخابره يودي ابنه اله

جاوبه خليل بضرافته المعتاده  يلون الموقف
- خايب اشبيه وجهي ما اتريد اشوفه
لا اشوفني هيج تراني وجهي سمح ويرد العافية

حسيته يبسمر عليه ضحكني ودخلت
اني افكر اذا بيوم تقدملي ليش ارفضة ؟
اي والله اني غثة عاد اخذه نتكاسر اني وياه ههههههه
ضليت بس اضحك على الفكرة
.
داومت ثاني يوم مثل المعتاد بعباتي وتحنيكة حجابي ما تتغير ولا يتحول لشال  .
الزميله الوحيدة الي تقربت مني صار بينا نفور و وصرت منعزلة

بت المومن خط احمر اعتقد يخافون مني الزملاء يضحكوني دوم من يتفقون على شي يدزون الي بنية تبلغني بعزومه او غيره دفعتي بيها شباب اصغر مني وبيها كبار وشباب لان مسائي

عايشة اليوم بيومه ومتانية اخلص دراسة و اسس حياة مثلي مثل باقي البنات حياة طبيعية هادئة تنتظرني خاصة بعد ما صحتي تحسنت رسمي 

•شيخ الشباب

وديت البنية للصالون ..
وخابرني خليل
وراه ربيع صديقي اكدو عليه اروح الهم لبيت خليل

شسون ذولة ؟.

رحت واخذوني لحمام السوك ...

وعاد خليل عليه يوم زواجي الاول

خليل-يا ناس ترضوها عمري ٣٤ سنة وهذا كل يوم معرس وانه لا

-احد لازم ق...... مو امك وابوك يتوسلون بيك وانت ما راضي

- جدك ما يحن عليه

ربيع- هواه غربي  اخيك

غرف خليل ماي حار وذبه على ربيع

خليل-مثلك انه مزوج اثنين وزايغه عينك على البنات بالسكايب والمايب

-انت طيب يا خليل الله يجعلها من نصيبك  ههههه
كلتها هازئة اعرفه ابو البنات سابقا وهليام مستقيم بعد ما طوع بالحشد و استقال وهو ماشي عدل

صفنو جماعتي عليه

بركات- لك كرامتك شيخنا صاير متدين

خليل- لا ما توقعتها منك تنهدي هيج عيب عليك ولك ترافقني وتبتعد عن الانحراف....

رفع اديه ويضحك

-لا خليل ديربالك والله اذا شقاكم يصير ماصخ انهيك ولا تگربون الي

يضحكون ضحكات حقيرة ربيع وبركات وخليل ويتقربون اعليه

خليت وركضت للدلاك قبل لا يتكربون مني بشقاهم الماصخ

خليل - تعال ننطيك نصايح

-انه خبرة مشكور كلاب انه الك

رحنا لبستان اهل بركات لكيتهم عازمين الربع ..

للعصر كل من بسيارته وطلعو وياي زوافيف ...

الا انه صعدت بسيارة خليل كاتب اعليها بالنشرات مبارك زواجك شيخ الشباب 

بهذا العرس مالبست الزي العربي
قاط اسود بقميص ابيض من غير رباط ...

زفوني عليها ...

كانت بالغرفة كاعده على كرسي المراية

بدلتها تسحل بالكاع

- حياهم الله

همست ما سمعتها

-هااا شنو

ضربت باصبعي اذني موجها اعليها

- الله يحيك

-هسة شنو نسوي ناكل تبدلين نحجي
ذني كلهن نسويهن اختاري وحده منهن

- الي اتكول اعليه

افيش هاي تحجي مثلي نسيت انه ماخذها من ديرتي

- لعد نحجي حتى تنفتح نفسي

ابتسمت
-اوك

-لا خربتيها شنهي اوك

ابتسمت
اليوم طالعة جنها اميرة ذني الدمى( باربي)

-انه مو كلت لا يصبغون الج شعرج

-ليش ما عجبك

-لا مو هيجي بس انه احب الاسود هيجي ينزل على على على ال الخصر الخصر

-اني شعري مو طويل

-يطول
بس لو سامعة كلامي

- على العموم انه حاطة صبغ مؤقت ما صبغت لأجلك بس انه عاجبني الاشگر

- ها هيجي
نكوم نبدل

- اي

افتحلج السحاب

-لا قيطان انه افتحه ..

طلعت منطيها الحرية اليوم كوثر  ومرت ابوي واختها بالطابق الفوك صعدن وما نزلن كالن اخذو راحتكم ..

صفنت بدنياي  اجت بالي رقية
بثوبها الابيض ليلتنا الاولى
جنت فرحان كد فرحة امي من اجاها ولد...
لكيت نفسي اتصل بشهد

- ياسر هذا اتصالك خوفني

- لا ماكو شي
ردت اشوفج اشلونج وصلتي للبيت

-اليوم البارحه من طلعنا من بيتك المغرب وصلنا

ياسر خير صاير شي

-اشلونها رقية
ظليت اتنهد والحرارة تطلع من صدري جنه گلبي تبخر حسرات

-ياسر !
رقية زينه
وما تدري بشي انت اشبيك

-خفت لا سمعت وانقهرت

-اتفكر بيها بهيج ليله وين عروستك عنك؟
انت تحبها

-موش حب حب هذا الي يحجون عنه
والي يتغنون بيه الشعار(الشعراء ) انه بس
گلبي ما يتحمل يحن الها
جنها بتي جنها انت يوم الي تلبدين ورة ظهري

-ياسر اشلونك زين
اشبيه صوتك

-مابيه شهودة بس تذكرت صوتها وخفت لا عارفة وباجية

- لا تقلق عليها اصلا هي ناسية تعرف رقية  طفلة بريئة

سديته من يمها
على دخلة ياسمين الي ..
بروب بصلي مدري حليبي

-حميت العشا اجيبه لهنا لو للغرفة؟

- اهنا

-تم ..

،
سبحت وطلعت امسح براسي بالخاولي ......

شفت الوكت حان صارلي ساعتين افتر وعايفها

لكيتها تصلي وماسحه كل مكياجها ...

خلصت كعدت تقرة بكتاب صغير ..
و ما طولت دقايق و نزعت الي اصلي بيه(اسدال صلاة)

وكعدت يمي

-صليت ابو علاوي

- اي صليت

ظلت تطكطك بصابعها

-نحجي لو شنهو

- ليش هو اكو كلام لازم ينكال

ضحكت وضحكت على روحي

اني متدوده لو يشوفني خليل يشهرني شهيرة
بس هاي جبيرة و مبينه نبهة
لا اتفشل جدامها

•ياسمين
كان رومانسي وياي خفف انشداهي
وخجلي و كانت ليلة يسرة عليه
مفرح محزن هو عنده خبرة بالحياة ومحزن مو اول بخت اله مثل ما هو اول بخت الي ..

كعدت اباوع اله وهو نايم يمي وغافي

-لو ما مزوج  من قبل ما تاخذني
تصير شاب متطلب وكان حسيت انت اهواي عليه ،مدري انه الي احس هيج

بعدنا ما متألفين وزواج مستعجل
كأن الي صار حلم و ما صار خجلي بعده منه مثل العذري كمت لبست ثوب بيت محتشم و سحبت شرشف وتغطيت تاركه مسافه بينا .. 

لنص الليل كعدت اغمض وافتح على شخص يتلمس بيه ...
باسني من ركبتي
-وين تعالي
احبج ...

ابتسمت مابينا حب بعد ادريه ما واعي لنفسه ساعة حب وتروح ...

-رقية حبيبتي

انتفض جسمي كله صرت ارعش مثل الي كسروها تكسير هاي الحبات (البوسات) مو الي جا شنهو عباله مرته الاولى  انه
اجتني ردة فعل وهو استقر حاضني من ظهري ..
دفعته حيل بعكسي اعتقد انضرب كعد

- اه ها شنو

كمت للضوة فتحته وكلت اله واني انكث نكث عصبيه

-انه مو رقية مرتك الاولى
تدري احسن شي اروح انام يم خالتي هو الماعنده حظ معروف تاليه

صاح
- ولج تعالي
عفته يلبس تيشيرته

كضني(لزمني )من خصري دارني ليه
- تعالي جوة

-عوفني اذا انت تحب مرتك ليش تورطني وياك انه مو رقية
جرني ودخلني بعصبيه

- جنت نايم ما واعي
ويمكني متعود اعليها لا تاخذيها بغير شي

- واضح متعود عليها
واضح حيل

-يا بت الحلال  هاي اول ليلة النا تعوذي من الشيطان

- اريد اروح يم خالتي ما اطيق نفسي اظل اهنا

اتقرب عليه حسيت كصته راح اطخ بكصتي من دنك عليه وكال بحواجب معكودة

-انه گلبي وعلي فارغ اذا ما تمليه انت يظل فارغ  لو ينترس عند غيرج
لا تتهورين وياي  تخسرين
اذا طلعتي من هاي الغرفة مالج دخله الها ومن اول ليلة

تركني ورجع انطرح...
طفيت الضوة و جريت مخده من يمي وانطرحت بالارض....
ما نمت متوسفة على حظي انه كلت هذا اهواي عليه مال وجمال وصيت ياخذ يتيمه ابوها عاطل وكاعد بأجار

ظليت وقت ساعات قرب يجي الفجر.   حسيت بيه وكف فوك راسي

وانشاليت
اول مرة انشال بعد هذا العمر
لزكت اديه برگبته لا اوكع ميته خوف من الوكعه ثكيله انه

رجعني على السرير وحبيته من هاي الليلة حبيته حيل وجن فتح گلبي ودخل نفسة بيه فجأة 
ويه كل حبة يحبنياها يتغزل ويرضي بيه ردته الي واملي گلبه اذا جان صدك فارغ
حتى من نمت لازمته من خصرة جني اخافن يشرد مني ....

كعدت الصبح اباوع للسكف وهاي صارلي سنوات ما مفتحه عيني على سكف بناء فاخر بدل الفطور الي بسكفنا !

و بسرير بدل السفنجه .. ورجال وسيم حيل بدل اخوي عبوسي

رحت للحمام .. ردت اطلع شفت وجهي عزة خل اروح الطخه جني شبح ..
مع الاسف لحك على وجهي الشبح ولكيته كاعد....
ونزلن كوثر وخالاتي يهلهلن النا ..

•ياسر

بس اول ليلة خذيت عنها فكرة عصبية
بعدين طلعت فطيرة بس عصبية
مر اسبوع زواجي وهي هادية وانه حذر لا اغلط بأسمها هاي حارة نار مثلي اشلون بينا
وانه جني اول مرة اتعامل ويه مرة رقية جانت ملاك بريئ
هاي مزاجيات مثل شهد
بس للامانه شريد تكول  تم واحب هاي الكلمه منها واشوفها خطية مكيفه بالخير مبينه متعوبة .

بعد شهر من زواجي اجاني خبر وفاة خالي ابو قاسم هو من زمان بيه سكر ..
ميت على اثر جلطة ...

عوايدنا نترك الزعل ونوكف بالفاتحه ..
رحنا انه وخليل ما عليه بولد خوالي الي عادوني بس الي جانو محايدين سلام عادي  بينا و  جدي جان حزين حيل ..

•شهد
رحنا اني وامي و كوثر وأخذنا ياسمين ويانه 
ياسمين اول ما دخلنا صاحت خرعتنا
وامي هم صاحت
-يا خووووي

و ياسمين   گفلت(رثت ، رثاء ) مدري نعت وطبت بصوت ونعي قوي

-كوثر هاي شنو

كوثر -ذبة عرب هيج يطبون ترة هيبة تعتبر مو مثلنا ثولات نحصر البجية نستحي
دخلن كدامنا للفاتحه امي ويه بيبي ومرته كعدت تستقبل الي يعزون من اهل الميت واني قبل لا احمل هاي السالفه صارت رحت ويه الشابات نوزع .
وعرفت ياسمين على بعض القريبات بس الي معاديهن ما تقربت الهن رغم احنه نفس المطبخ واكفات ناخذ صواني جاي وماي ونرجع  نردهم فارغات ..

ياسمين واكفه على الجاي
تصب وتكول

-علي وياج يلا همي ايديج
خية

احنه فاتحتنا حيل كبيرة مضيف  جدي مفتوح على الصالة الكبيرة والحديقة مفروشة وبيها مراوح
متروس البيت نسوان وبيت خالي المتوفي للراحة .
وجدي ناصب جوادر للزلم مكيفة ..

واحنه الشابات اهواي يا دوب نلحك نضيف

هذا غير طبخ عشا ورانه ما جايبن طباخ بعدهم  لان ناسنا كلهم بياته اهنا ..

خلال يومين انعرفت ياسمين هاي جنة ام ياسر  الجديدة لانها كلش الها دخله دخلة ذولة اهل العرب القدامى حتى من تحجي و مو مثل البعض يتهربن وياخذن الخفيف ، تذب نفسها بالشغل و خدومه
امي اشكد كانت ما موافقه بفكرة ياخذ من طرف مرت ابوه اشوفها صارت تتفاخر بيها وتكول جنتنا جبناها من اهل ابوه بت عرب واصول

مرت ابوي اجت يوم وهم دخلتها مثل دخلت بت اختها تسوي  الواجب باخر يوم.
هي بعرس ياسر اثناء الحفلة متجنبة امي وامي كذلك ...

سمعت كلام من الناقلين رسلان تعيب وتضحك على ياسمين بالغرفة وعلى كلامها

ردت اغلس عنها هذا الحجي ثالث يوم
وكفت يمي ياسمين
-منهو رسلان

-ها شنو

-سمعت ذيج البت تكلج رسلان تضحك على مرت ياسر معيدية وبيئة
تفشل
انه فشلتكم ؟
جا انه ما سويت الا الواجب كلت خال رجلي خل ارفع راسه هاي عدنا همة و تصرف اهل اجاويد صح فقرة بس نعرف بالواجب

-ياسمين رسلان وحده بومة واحنه ما نحجي وياها و بينا مشاكل فهمتي هسة حتى علينا تحجي ..

وبأخر اليوم  كمنا نعزل .

اجت مرت خالي تشكرت منها

- هذا الواجب خالة صدك جذب احنه المعدان الي معناها معدنة اصلي نوكف بالشدات و ما نغتر ونمنن هذا الواجب وعلى راسنا نسويه

راحت مرت خالي ياسمين ما سكتت
-ماعدنا نسوان تتختل بالغرف و تاخذ غيبة بعزا الخال والعم  مثل الابوه بموته تعمى العين من البجي

اووباه هاي جاي توجه بسامير حامية على الي اتكلم عليها من غير تعين واكيد وصلت رسلان كاعده اتعزل بالجدورة ...
طلعت مو هينة وفطيرة تاخذ حقها مربع
واصلا تباوع لرسلان
اعتقد من اسمها عارفتها ...

،
شيخ الشباب اخوية ما ترك جدي بحاجته ... و ظل يمه يأزرة 
علاوي يجيبه  اسبوع يمه واسبوع يم امه ويبجي ما متعود من غير خالته وامه..

ومرت بابا استقرت عنده عاشت

كوثر عزل الها طابقها ومدللها حتى لا اصير مشاكل ....

مرته طيبه والسان مجامل يغرد بالبداية جانت خجولة كدام ياسر هسة لا ظهرت شخصيتها و وضحت كدامنا . 
وبدأت تداوم من نقلها ياسر ونصف راتبها لابوها ..

واخيرا شفت ياسر مستقر بحياته ورجعت الابتسامه على وجهة ترسم بعد المعاناة ...

مثل ما راد ام و زوجة وبيت دافئ هذي كانت مطالبة بالحياة امي ما مقصر وياها ببره الها ولا مع خواتي المتزوجات صارن يجن لبيت ياسر نلتم سوية و مرت بابا مرة كبيرة و ما اضوج احد و ياسمين خدومه وترحب دوم ...

اما خليل وما وراء خليل شكلة جدي ويريد زينب ما يريد غيرها  كان متاخر بالزواج لانه يلعب بذيلة ومن راد يستقر عاف كل البنات واختار نقيضته مجرد تخيل هذي البت الي حيل متدينة و جادة زوجة خليل اخذ صفنه وما ابلعها ..

خابرني ياسر بيوم وخبرني مرته حامل وجان حيل فرحان بالحمل واني هم بشرته بحملي  الجديد ...

رجع شغلة احسن من الاول و رجع ياسر شيخ الشباب اشترى ارض بالمشخاب بعيد عن حلال جدي اصرار منه  هاي بعد ما باع بيته الي بصف بيت جدي ...

اجمل شي  كاتب على قطعة. محلاته

محلات  شيخ الشباب للمواد الغذائية
احلى جملة

*

ياصل حيد بلصيدات ينچب

ومن تخزر وچيب الچاب ينچب

يسامه الضبع من طرواك ينچب

ايخسه الحرباش يسحگ عضم حيه

شيخ الشباب
تمت الجزء الاول

من كتابات زهراء العراقية

دمتم بخير

تم تنزيل  هذا الجزء بتاريخ ليلة ٨/٢٧