رواية شيخ الشباب(بنت المؤمن) الفصل الحادي والثلاثون 31 - بقلم زهراء العراقيه

مساء العسل

فوراء محيطات الرعب المسكونة بالغيلان 
هنالك قلعة ُ صمت 
في القلعة بئر موحشة كقبور ركبن على بعض ٍ 
آخر قبرٍ يفضي بالسر إلى سجن ٍ 
السجن به قفص تلتف عليه أغاريد ميتة 
ويضم بقية عصفور مات قبل ثلاثة قرون
تلكم روحي
-مظفر النواب

•شهد

على السرير ماد رجل و ثاني الثانية  و منتكأ على المخاد و اني بين رجليه حاطة راسي واباوع للسكف بحيرة و هو يلعب بشعري
بديت اسرد اله اول خيوط من قصتي

(كنت بعمر الخمس السنوات او اقل ما اذكر بالضبط
وعيت على بيت جدي ...
خواتي عادي الصياح عليهن من قبل خوالي الكل اله كلمة عليهن امي ما نشوفها الا بالليل دائما تفتر بالبيت
كنت اظن هذا العادي من كبرت فهمت كانت تحارب لأن عاندت جدي واصرت ع الطلاق تحارب لانها مطلقه تنضرب منه ومن الاخوان تهان اذا قصرت بشغل البيت امها تخلي خاطر لنسوان الاخوة و تجي عليها زايد!
وهي ما تكعد لأن تخاف اتصير مشكلة..
كانت هي الثانية صغيره ودوم اشوفها بالليل تحضني وتبكي وتكول اشوكت اشوف اخوج ..
ياسر طفل  يجينا بالعطل وياخذني وياه بنهاية اجازته لبيت بابا اكيد احد يوصلنا
.بس دوم أجازاته يقطعها و يروح ما يظل اسبوعين لو اكثر ما يرتاح ..... الوحيد بخوالي ما كان يضربنا  هو خالي داود!
كان حباب وياي ويجيب الي حلويات
بس ما افهم دومه منعزل مرات ادخل عليه الكاه يحجي ويه نفسة فترة قصيرة وعزل عنا طلع من المشخاب
للنجف
هو كبير بالعمر يطلع بهذاك الوقت اربعيني ... متزوج من سنوات طويله وما مخلف بهذاك الوقت وصارت مشاكل نساء ببيت جدي و دائما مرتة مظلومه فأخذها وطلع...

بعدين اختفى ومرته شو اجت يمنا عاشت ايام طويلة
ما كنت اعرف ليش
من كبرت عرفت من ياسر داود اعتقل بالنظام السابق .. ومرته يتيمه وبت اخت جدي فجابها يمنا ..
بفترة طلع من السجن بس واحد ما عرفته متغير وضعيف واصلع و وجه مورم ...
ظل فترة يم بيت جدي هو ومرته ..

بس بطل يجيب الي حلويات وبطل يطلع ..
الا ان رجع لبيته ويه مرته..

بهذي الاثناء بدو ولد جدي (خوالي) يبنون يم بيت ابوهم ويطلعون ..
بس خالي ابو احمد مابيه امل يطلع
كان مأذينا حيل متسلط واحكامه قاسية
ما يحب يشوفنا كاعدين وياهم ناكل
واذا ابن واحد منهم شكى ننضرب احنه حتى لو ما النا علاقة ..اني كنت صغير  بعمر الخمس او اربع سنوات اشرد بس خواتي الي دائما ينضربن
او بالاحرى كوثر حتى اذا سويت شي تشيل عني
كانت حيل حنينة علية حارسي الحامي
عكس هسة ابتعدنا
ومن يجي ياسر اصير ايام عسيرة على امي بسبب  يكولون نسوان خوالي وكح مشياتها عليه  ياسر  وكح وعصبي، بس الصحيح ياسر من صغرة ما يقبل احد يضربنا ويعارك انوب من صار عمره ٩ سنوات مو بس ويه الجهال يتعارك لا حتى ويه خوالي يتلاسن وبالاخر ينكتل

وامي كانت حيل تخاف منهم لا يأذوه تنصرهم عليه وتكول هو غلطان و مرات تحاول هي اضربه كدامهم حتى بس لا همه يضربوه لان ضربهم قوي ما يرحم
هو طفل ما يفهم الي اسويه حماية قليلة حيلة فبدت اصير بينهم فجوات من الصغر ...

بوحده من نزلات ياسر بابا كاله اتظل ٤ اشهر يم امك عندي بناء وهو نفسه بابا متهجول مرته عند اخوتها وهو عند اخوته خفيف

مرن شهرين ببيت جدي وبدت مشاكل الاطفال كان بيت واسع ومو كل خوالي طالعين بس ثلاثة منهم ابو خليل 
وخالي ابو احمد مستقر ما يريد يطلع لان الابن الكبير لجدي ..
ومنو الغلطان اكيد احنه لان ما عدنا اب ياحمينا ولأن امنا وكحه مثل ما يكولون نسوانهم ما تتحمل الزواج  وحاطتنا عالة عليهم ....
اهنا امي طلبت من ابوها يرجعها لزوجها بابا وتوسلت بس البنات تاخذهم ما قبل بابا
حتى ظليت شايله عليه حقد لان ماما دوم تكولي حاولت ارجع لبوج لخاطر مرت ابوج ما قبل بس يلا خلفتله وذبني......

على العموم ما نعرف الدوافع لتصرفات اي شخص منهم

بيوم احمد دفعني ووكعني من الدرج طلع من خشمي دم ..

رحت مفزوعه ادور على امي ما لكيتها
رحت لياسر ابجي واشكيله خلى توبة تنظفني وراح ونسمع صياح خالتي ام احمد ادعي واصيح..

امي اجت طلعت احمد من جوة ياسر رغم احمد اضخم واكبر منه

للعصر اجه خالي و ضرب بالعكال على ظهرة......
من جدي اجه  الا ابعده عنه وبيومها تعاركو جدي وخالي
جدي كان ما يقبل على ياسر احنه البنات ما يهتم النا انضربنا لو لا بس ياسر اذا تواجد ما يقبل عليه...لكن هو دومه طالع بوقتها هو صاحب تجارة كبير بزمن الحصار وشيخ عشيرة ما يتواجد بالبيت مسلم زمام امور لبيبي وبيبي تاركه خالي ما تكدر اله ولا لأحد من اولادها...

بيومها بيبي تعاركت وياه لان اتعارك ويه ابنه
ففض للمشاكل يعزل الاولاد عن بعض .
كال النا روحو لبيت خالكم داود ما عنده اطفال تجنبا للمشاكل كم يوم يهدأ الوضع ونرجعكم..

بيبي ما قبلت ترسل توبة وديمة اشوية كبيرات يساعدن بشغل البيت ...
احنه الي عزلونا الي اصير بينا وبين اطفالهم مشاكل احنه الصغار عود كبيرتنا كوثر
كيفنا بس ياسر ضايج

اني فرحتني كوثر من كالت خالي حباب وما يضرب ابد ويرجع يجيب النا حلويات ومرته حبابة حيل خل نظل كم يوم نتونس

ياسر وكف بالباب معند وجدي يقنع بيه

-جدي وديني لابوي

-ابوك ما فرغ الك عنده بناء ببيته

- ما وديني يمهم ما اروح لخالي
انتم اتكرهونا

حط ايده على متن ياسر وكاله تعال وياي اخذه وياه للحديقه ما اعرف اشلون قنعه وصاحلنا نطلع للسيارة وياه لبيت خالي
،
فتح الباب خالي
كان بارد السلام
كعدنا احنه وجدنا

- ذولة اولاد اختك خليهم يمك اسبوع
على ما يهدأ الوضع اخوك عذبنا

ظل يسولف اله على تجاوزات ابو احمد

اكتفى داود بأجابه قصيرة
- خليهم
كلمة وحده بارده طلعت منه

سأله جدي عن مرته كال نايمة

-جا ما اصحيها اسلم عليها

- اشوية تعبانه بوية غير يوم اني اجيبها الك !

طلع جدي

واحنه كاعدين واحدنا ابصف الثاني
اني كمت من مكاني وكعدت على حضن  ياسر قلب طفلة حساس ما يفهم لكن احساس الطفل يسبق الفهم ويفوقه حسيت برهبة من البيت ...

ياسر نزلني وراح لخالي
للمطبخ

- اهنا خالي ما عدكم بساتين مثل بيت ابوي وبيت جدي
جا شنهو ما تزرع

طلع خالي طاوة و حطها على الطباخ
اني مديت اديه لياسر ورفعني شالني

واجتماعي ما يسكت ياسر ...
و خالي ما يحجي ...

اجتنا كوثر مخلوسة
تندس بياسر

شاورته
- شفت شفت خالة اسماء مربطه بالغرفة

ياسر- شنهو تحجين انت

كوثر-والله بغرفتها مربطة خل نشرد منا

ياسر - خل نشوفها
نزلني وكنا تلاثتنا نتاهمس

-ياسر وين غرفتها تعالي نروح
كوثر ظلت صافنه لكدام التفتنا اني وياسر و شفنه خالي لازم السكين و واكف يمنا

- وين تردون تروحون

كوثر جرتني وشردت ...

ياسر اجه ورانه كال ليش شردتن

كوثر-شسوالك خالو

-ما سوة شي تعالن نشوف الغرفة

اني ما رحت
هم راحو واجت بس كوثر

-وين ياثر؟

-عزة هذا جسر دخل يفتح رباطها
يربي اني خايفه حتى حلكها ساده

سمعنا صياحها

-منك لله يا ظالم
رحنا شفناها واكفه بالممر تخوف مضربه ومحنية الظهر
وياسر طلع من الغرفة وراها
اجانه من المطبخ

-منو فتحها

صفن علينا تلاثتنا
رجلينا كامت تطكطك

ياسر-مو اني والله!

كالها وهو بعده ما طالع كله من الغرفة على اعتابها واكف راد يشرد
خالي من ياخة قميصة شاله رفعه لفوك و رجليه تتلولح
وشمرة على الكاشي

ياسر-اااخ

اني وكوثر كمنا نبجي
لزم كوثر من ظفيرتها طواها بيده
وضربها راشدي طلع دم من حلكها ..
مرته كعدت على  الدرج ادعي عليه
جرها ورجعها للغرفة اني لزم ايدي ياسر
اخترعت
- امشن نشرد منا
طلعنا للحديقة تلاثتنا ...

داود-وين رايحين

ياسر لازم بطنه وسرع ركضه بس اني وكعت
وكوثر كدامنا وصلت للباب
ما لحك ياسر يركض بيه و ركض خالي لكوثر شالها من تك ايد وبطريقه سحل ياسر من شعره يحاول يتملص منه و حطنا بالاستقبال ...

اني جوة ياسر  و يرفس بخالي برجليه يحامي نفسه لكن بالتالي كان طفل تعب و هدأ  سكن عن الحركة على ضرب الحزام ، وهو قبلها ماكل ضرب من خالي ابو احمد هاجت عليه جروحه..
طلعت رجلي بس مر من يمها الحزام حسيت بشوغه ...
ضمها ياسر وظل هو فوكي حتى راسي يحاول ما يطلع مني شي ...

خلص من ياسر  وطلع ما ضربنا اني وكوثر...
..
لليل جعت حيل
-ياثر دوعانه
توثر اريد  اكل

محد يرد عليه نيام

للصبح على نومتنا كعدت بطني موتتني من الجوع تنعصر
اول ما فتحت اعيوني ، فكرت اروح لماما اسوي الي لفة ..
باوعت للحياطين تذكرت اني مو ببيتنا اهنا ماكو ماما

اشتميت ريحة بيضه
ظليت اتنفس الريحة بشراهه ..رحت للمطبخ وصلت يم الباب  وكفت خفت ادخل...
شفت خالي يقلي و يغني...

لمحني .صفن عليه حط الصينية على الارض وكعدت
اشرلي بأصبعة اروحله

رغم الجوع يصرخ بداخلي بس اني

شمر الي بيضة سلك مقشرة على الارض

ظليت اباوع الها ما مفتهمه

-ازقنبي!!

دنكت شلتها صايرة نصين والصفار واكع من جوعي لكيت نفسي اكلها بنهم و حتى الارض ما خليت بيها صفار او بحروثة ...
شمرلي حرف خبز
اكلته

للظهر اني على هاي البيضه و كاعده يم كوثر وياسر الي كاعدين كاتلهم الجوع .
كمت ابجي
من الجوع واريد امي
طلع ياسر يعرج ويطوطح من الجوع والعطش والضرب ..
اجاني بيده خبز و خيار وماي

كعدنا ناكل ...
خلصنا
كوثر- اسبوع اهواي الا يجي جدي يأخذنا خل نشرد

- تندلين اذا شردنا ؟

-لا لا ما اندل بيت جدي بعيد
بس اعرف اسم الحي الي بيه خالي ابو خليل

-بلكت ينام ونشرد

اجانه العصرية حط خبز و بتيته و طلع قافل الباب علينا ..

ما النا مهرب منه ...
ظلينا يومين عذاب وجوع و اذلال مختصر البهذلة الي احنه بيها مرات ياسر يروح يسرق النا خبز وماي واذا خالي ما دخل لغرفته نظل جواعة

ونشوفه يطلع مرته يضربها ويرجع يربطها ...

لو يطلعها تطبخ  غصبا ما عليها
ياسر وكوثر ما يروحون للمطبخ حتى من يكتلهم الجوع اذا هو بيه  بس اني ينطيني بالارض واكل حتى التمن !
ومن يطلع او ينام يقفل الباب علينا ..

رحت للثلاجه وطلعت تفاحه
وشافني اجاني مثل الكلب المسعور واجاني ياسر حاماني

ياسر- كلب لا تضربها

داود شبعه راشديات
-منو كلب ولك

ياسر-انت

لزم راسه وركعه بالحايط

-منو كلب ؟

-ا انت

وكعه كام يرفس بيه وياسر يصيح انت انت عنداً بيه !

مرن اربع ايام جسد ياسر اكثر شي ينضرب خدر ...

عفتهم بالاستقبال ياسر مضروب كالعاده ورحت للهول شفت تلفزيون
ردت افتحه رفعت رجليه ما انوش النقطه...حركت الميز وكعت منه مزهرية صغيره

حطيت اديه على حلكي صرت ارجف
اجت كوثر
- شسويتي
طلع من غرفته خالي
-منو وكعتها بنات ال***
كوثر-  اني اني  بس مو قصدي

رفعها من كصيبتها حست شعراها راح ينقلع من جذورة من راسها
انوب حط ايده على رقبتها كامت ترافس و عافها تكح ..

ياسر يسمع ما يكدر من مكانه متخدر من الضرب ..
ركضت يمه حضنته ابجي

هذا الكلام امي عبالها اني بتها الصغيره احضى برعاية ودلال من خالي ومرته الطيبة ما يدرون المعتقلات  الي انوخذ بيه مشتبه بيه ،طلعت شخص عنده انفصام شخصية او مريض نفسي سادي ..  بقيت بس اني ما لاحاني بضربه ..
،

رحت افتر ادور على ماي اشربه واحك بشعري صارلي خمسة ايام بلا سبح

صاحت خالة اسماء

-منو اهنا يفتر
تعال افتح رباطي ياسر
افتح رباطي خل نشرد ما طول خالكم  ماكو
دخلت عليها .

ما مشدود حلكها بس على السرير مربطة ...

خفت اتقرب الها
تخوف و وصخه

- تعالي شهد اني خالة اسماء لا تخافين افتحي
ابسرعة
قبل لا يجي خالج

افتحي

يلا ماما

كمت اكل بأظافري
-تعالي اني خالة منو جانت تنطيج تفاح مو انت اتحبيه تعالي انطيج

بس افتحي رباطي واني انطيج تعالي

اتقربت منها

-ابسرعة ماما الشاطرة
تعالي

اتقربت ..
ادية صغار ما كدرت افتح العقدة
-اكو مكص بالجرارة  ابسرعة
طلعيه

رحت افتح المجرات
وهي ادلي بيه

-لا بالمجر الجوة يمكن

يلا ماما ابسرعة ابسرعة خل نطلع م....

شهكت

التفتت لأنه خالي لاف روحه بخاولي
توه طالع من الحمام

صفن عليها
كامت ترتعد وترجف تبجي ..

-تردين اشردين مني

- داود لا لا

قفل الباب

- لا دواد لا

- تعوفيني وترحين وين اسماء احنه حتى من نموت سوية

- لا داود

رفع الخاولي عنه

-الطفلة طلعها طلعها

صارت اصيح واني غمضت جالهة الي يصير ...

من وعيت فهمت  خالي سادي مريض نفسي...

اغمى عليه من الخوف ظليت لليل بغرفتهم

كعدت على ايد اشيلني
شمرني يم اخواني النيام مدري المغمى عليهم من الجوع لو الضرب ..
جاب ماي و رش عليهم مثل التعذيب الي نشوفه بالتلفزيون لاهل السجون

وحط كرسي وكعد حاط رجل على رجل
اثنينهم نزو منه...

-منو بيكم اليوم يكون قربان ... تعبان اريد ارتاح

اني ختلت ورة ياسر...

ياسر- ليش تعذبنا
ما اتريدنا ودينا لامنا

-امكم ابتلت بيكم المرة بلوة

ياسر-ما سوينا شي الكم

- اريد واحد يتبرع يكون ملك تعذيب الليلة

انخلسنا ثلاثتنا ...

- اخذ اختك جرني
-هاي ترفة حيل و ما لايحه حزام
ارتعشت واجه يغمى عليه

ياسر بصوت ضعيف
- اني عوفها اني
بعده ماكمل جملته كأنه ينتظرة جرة من بينا و احنه وراهم نمشي
ونتوسل بيه بكل طفولة

-خالو عوفه عوفه

دخل لغرفة ما داخليها من قبل وما نسمع بس صوت اهات ياسر بعدين سكنت وبس صوت الضرب . كعدنا على الدرج ونبجي ...

شافت كوثر يدة الباب تتحرك جرتني وركضنا للاستقبال رجعنا و جاب ياسر شمرة يمنا لا حركة ولا صوت وعينه مسدوده  وقميصة ممزگ
اني عبالي نايم اجيت يمه  انطرحت

كوثر هزته
- ياسر شنو متت ياسر
اكعد بعد يومين ويجي جدي ياخذنا

واليومين مرن

ومحد اجه !
ظل ياسر بيهن ما يتحرك.

واحنه مثل الدجاج يجيب الاكل يشمرة على الارض و يروح و يحط النا بماعون فافون ماي ..و بالختله نمشي للحمام

اما ياسر بس نفس اله يجري .  وكوثر توكله وتغسلة وجهه .

بيوم اني انجنج(الحاح ببكاء) على امي و جوعانه

وكوثر حاطو راس ياسر بحضنها وكاعد

كوثر- باجر تجي ماما تاخذنا

وكفت اصيح وابجي
- ما ، ما اريد ماما انت انت تتدبين(تكذبين ) كل يوم باجر

ظليت ابجي

دخل خالي وبيده الحزام

-منو يتربع اليوم ..

كوثر- والله كلشي ما مسوين عوفنا حباب

-كلشي ما مسوين وهذا صوت البجي شنو

هااا ومن ادخل توكفن و اتكولن تأمر سيدي
عبيد عبدة  القبور كفرة

فتح ياسر عيونه شال راسه عن كوثر

همس بتعب
-عوفهن

- اريد واحد من يتبرع يصير ملك التعذيب ...

كمنا تنراجف و رفع راس ياسر  من كذلته بعنف

-انت اليوم ما تفيد اتموت بيدي
تركه وباوع علينا
رجع جر ياسر

-اليوم انت تختار منو من ذني العميلات 
اخذ
صاح بياسر يختار بينا ....

-منو  ولك
لزمني من شعري

-هاي !؟
نطق ياسر
-عوفها

لعد هاي وجر كوثر

- لا عوفهن واخذني ...

- جرنا اثنينا

-لو تختار وحده لو اثنينهن اسوي عليهن حفلة تعذيب

اني اصيح ياسر الحكني وكوثر تتوسل بخالي يعوفنا ...نطق ياسر من جرنا اثنينا

-عوف شهد!

دفعني وكعني على ياسر وهو يضحك ضحكة شريرة

شفنا بعيون كوثر عتب وسكتت عن التوسل بخالي وظلت تباوع لياسر  وخالي سحلها.. 

ورجعها النا جسد هامد مثل ياسر

ورة يوم جاب النا اكل وشمرة جوة رجليه ..خبز و بيض قلي بالارض

رحت الم واكل  ..
وكوثر سحلت نفسها اكلت

اشر لياسر

-تعال ..ولك دنك و انحني واكل

ما اجه وعندا بيه يرفع بعنقة ياسر خلاه يروح يضربه راشدي ..

ضحكلة ياسر

-كلب
جرة وسحب حزاامه وكدامنا يضرب بيه ..

للعصر ...
كنت نايمة وكعدت
بس اسمع صياح كوثر بعيد عنا .. طلعت خايفة لانها واكفه بالحديقة اصيح يا ناس الحكونا الحكونا يا ناس 

طلع خالي يمسح بعيونه نايم

-كلبه نسيت اقفل باب الاستقبال جرها
اهنا ندكت بابنه

قفل علينا الباب و
طلع  ومدري شكال للي دكها ورجع ربط كوثر وحلكها اما ياسر نايم ..
بس طلع خالي فتح كان مسوي نفسة نايم حتى لا يربطه وياها ..
وفتح ربطها او رباطها
الاسبوع صار ١٥ يوم عذاب مثل عذاب المعتقلات لكوثر وياسر. أكثرنا ياسر
يمكن كوثر ثلاث مرات ضربها وعافها
لكن ياسر اذا ما يجلده تعذيب من نوع اخر ...

بالليل  جوعانه ...
ما انطانه ولا وجبة اكل

كمت ابجي و اكعد بكوثر
كالت
-كلبة ما عليه بيج ولي!

اول مرة كوثر تردني وتطردني رحت لياسر

-كال ما اكدر
ظليت ابجي
-ظل يسولف الي قصة ..
قصة النجوم الثلاثة الي بالسما ...
يلهيني وينسيني لجتي ...
سألته
-النجمات موجودات
-اي
اكدر اطلب منهم  اني هم امنيه مثل الولد الي بالقصة
- اي
-يا نجمة الاماني اريد تفاحة حبابة

نمت
كعدت الصبح اتقلب من الجوع
اجيت اكعد ياسر
.شفت فوك راسي تلاث تفاحات حمر
فتحت اعيوني على وسعهن فرحانه
و اصفك
- ياسر ياسر هاي منين

-ما ادري يمكن النجمة جابت الج الامنيه

-ها صدك صدك
اني طلبت منها
ههههههه
كعدت اكل ...
-بس بس اني طلبت وحده منهن

-مو النجمات تلاثة فكل وحده جابت وحده
اقتعنت وكعدت اكلتهن كلهن

كوثر كعدت شافتني اكل باخر وحده قضيت على الگعم
- هاي امنين التفاحه

-تلاثة تلاثة النجمات جابن الي

-يا نجمات
عابت اذا تلاثة ما انطيتنا وياج

-جوعانه نسيت
اليوم هم اطلب منهن اطلب منهن اهواي  اهواي
-لا هنه بس ذني خلصن
سكت ما كمل ياسر ...
كام  طلع ورجع النا

بيده خبز و طماطة
- خل ناكل قبل لا يكعد خالي يموتنا
اكلنا ..

وطلع ياسر بمشيه مو المعتدل للحديقة ووكفت كوثر تراقب اله الغرفة خالي لا يطلع ...
واني يم ياسر بالحديقه وهو يحاول يعبر الحايط الصعب عليه بجسد مكسر

ظل يحاول لحد ما كوثر
اجتنا كالت طلع
اجينا نرجع للاستقبال وشافنه
وضرب ياسر جلاق دخله للاستقبال وربطه ...
وربط كوثر يمه مرة ثانية
واني وياهم ...

-كلاب ماكلين الثلاجه كلها حرامية

اني كنت بس اقضيها بجي وانام واريد امي ...

ثاني يوم فتح الربط  عنا
ركضت كوثر للحمام
ياسر ظل نايم ؟

من ربطهم ما ضربهم لمدة يوم بس الجوع كاتلنا صاح النا للمطبخ وكالعاده ناكل بالارض الاكل ونسمع صياح دعاوي مرته بالغرفة وهو يضحك ..
-اخوجن وين

كوثر-نايم ما كعد

خالي-عساه بالموت

طلب منا ننظف المطبخ ..
وراح يم مرته وبس اصياحها نسمعه

داود-وصخه

اسماء-غير منك وصخه فك ربطي الله لا يرحمك

اني تذكرت الي سواه بيها ذاك اليوم ولزمت بذيال كوثر وهي محنية الظهر تنظف وكل عمرها ١١ لو اكثر

سمعنا دك قوي 
طلع خالي الهم و احنه للهول نباوع من الشباك
شفنا رجال بس شو يمه ياسر نازع قميصه وظاهر التعذيب

ودخلو تلاث زلم للحديقة مو واحد ما افتهمنا
ياسر يحلف خالي معذبنا

وعنده خوات بعد بالداخل

وخالي يصيح عليهم

-يجذب هذا خبل هو يضرب نفسه

-عمو والله ما اجذب خواتي جوة

اثاري ما نايم كاعد ورانه وناجح عابر من الحايط وصاح للجيران...

كوثر-هذا داود سوة ياسر مخبل راح يصدكوه يربي

ظل مدري شنو يحجون وخالي يحلف الهم ياسر مخبل
واحد منهم كال
-خاف صدك مخبل  الولد
ياسر يحلف ويبجي

لمحنا واحد بيهم من ورة البردة
سديناها خفنا ..

ياسر- لا والله خواتي جوة
كوثر شهد اطلعن ...
طلعنا نركض

كوثر-والله عمو خالو ياذينا طلعونا منا
هد عليه وهمه لزموه .

و شافوه وجهي هم بيه اثار
كالو اطلعو
قاومهم خالي
كتفوه .
وياسر كال
-خالة اسماء مربطة

ربطو داود كام يصيح بكلام مو منطقي

و اجني نسوان فكنها وشافن حالها والقذارة الي هي بيها . 
سبحنها

رجعنا للمشخاب احنه واسماء ويه جار طيب وصلنا لبيت جدي
طلعنا من بيت جدي اطفال شبه ايتام رجعنا بتشوه داخلي 

رجعت زوجة داود لبيت عمها وطلبت الطلاق
وتطلقت منه فيما بعد
محد مكتشفه من طلع عبالهم هدوئة حالة نفسية من التعذيب الي متعرض بس ما يدرون لهذا الحد مجنون
راح اله ابوه بيومها

اخذه لبيت خالي ابو خليل

امي انصدمت بمنظر ياسر جسمه لونه ازرق كأنه بيه مرض او  وباء جلدي

ياسر يبجي يريد يروح لبابا ما يريد يبقى يمهم لحظه
وجدي اخذه يمه بغرفته اسبوعين مرعاة لحالته ...كأن يعوضه لكن  بعديش
من طاب من جراحه الا ودانا لبيت بابا
بعد ما جدي قنع ياسر ما يحجي شي
لبوية ...

ورجعت وحدي ويه خالي ابو خليل اجه اخذني
رادو يجيبون داود لبيت جدي واني دب بيه الخوف
لكن ما انسى منظر امي من راحت للحديقة حطت على نفسها نفط
متهسترة

بيبي صاحت لجدي والولد خوالي يلحكوها

جدي- هدي الشخاطه

كانت غركانه بالنفط

-بالله العلي العظيم اذا ما حلفت بالعباس بوية توديني اعيش بالمدينة
يم اخوي ابو خليل احرك روحي

-تهدي لعني الشيطان

- ما كفاني ابو احمد ابنك حارك عليه حياتي
اجيب الي خبل موت جهالي وعذبهم

- ذبي الشخاطه ونتفاهم
قربتها رادت تشخطها

-احلف توديني بعيد عنكم وما تردني الكم  ترة والله الموت ما فارق بعد وياي
بس لخاطر هالجهال عايشة اني
شبعتني مدكه انت وولدك
والله دوم اتمنى اني لو  ولد وخلصانه من هالذلة

جرها خالي ما خلاها تسويها

ومن شافوها متهسترة اتعضو لان عدهم واحد مخبل لا يصيرون اثنين عزلونا عن حياتهم ورحنا عشنا ببيت ابو خليل
ظنت امي طلعتنا من العذاب بهاي الحركة منها بس اجت متأخر حيل

كنت اسولف لمرتضى وهو بالبداية كلساع مقاطعني يسأل عن شي
بس من وصلت لجزء عذاب داود سكت كأنه يريد يعرف لأي مدى عذابي

سالني اشلون يخلونا كل هاي المدة يمهم

كلته امي ما رايده نرجع عود خايفه علينا من ابو احمد عبالها اخوها داود حنين ما كان يضرب ويأذي قبل لا يدخل المعتقل ..كل ظنها مرتاحين ويه مرت خالي
ما تدري مرت خالي نفسها من دخلت وياه بيتها بعد ما طلع من المعتقل
سواه الها معتقل تحاول بس تشرد وما فلحت
،

لكيته يمسح بوجهي عن الدموع الي يكلك كنت اغطس وجهي بالماي مو دموع ...
رفعني و كعدنا وطبق زنودي على جوانبي

-ليش ما كلتي من زمان....من ايام خطوبتنا

تزحلكت الدموع على خدي
-اكيد كان ما ورطت نفسك بعقده مثلي
بس اني لو ادري بروحي ما كان تزوجت من الاساس
انت اول رجل بحياتي يشاركني تجربتي

رفع وجهي و حط وجهه عليه

-غبية كنت راعيت هذا الشي واجتازينا هاي المشكله سوة
ارتجفت شفايفي على كمية العطف الي بعيونه ضعفتني اكثر
-مكنت ادري بنفسي ع بالي خوفة طبيعية واتروح من أول ليلة
لان بفترة الخطوبة كنت عادية ومتقبلتك بلهفة

-اووه اعتراف خطير يشعل شموع الحرارة  تذوب الروح

ضرب خدي بطرف اصبعه
- مشكلتج العلاقة الكاملة مو الحضن
عراقي

-هزيت راسي باي

-ولا القبلة

-بلا فزلكة بوسة
هم اي بس غير ش..

حط اصبعة على شفتي

-هشش يكفيني وعيونج ..

واخذني بعطف شفايفة لمحطة مسحت اثر الدموع ...
حضني على صدرة

-راح نتجاوز هذا الشي
سوة
ياريتني وياج من اول العمر

لزمته حيل من فانيلته

- مراح تزعل مني مرة ثاني

- سوة وياج على الحلو والمر نجاوز كلشي
اهم شي بعلاقتنا الاحترام و التقدير
قدريني  راح احطج بين عيوني..

رخت اديه عني
- احضني حيل حبيبي احس بعطرك بأمان مفقود ... خليك يمي خليني ادلل عليك و اتحملني

- جل من زرع محبتك بداخلي
اتحمل منج كلشي  مثل حب الاب لبنته

رفعت راسي بعيونه اريد التمس الحنية الي بيهم

- انت تعويض الي
بس كون ما يجف حبك و تمل

-عيونج تخضر الروح كل ما باوعت الهم وترطب گلبي تخليني اتحمل كلشي منج انت واقعي بعد تورطت بيج

ضربته على صدره

-  روح مو كنت ماشي عدل

.

عرس ياسر قريب كنت فرحانه بيه حيل واخيرا راح يستقر..

سوت ياسمين حنة بال***
حضرو اقاربها ...

اما ياسر ما يريد يسوي زفة اله ولا حنه
راح الها بليلة الحنه ..
الصبح اخذها هي و خالاتها مرت بابا وخالتها الثانية ... من *** للصالون
وهو يجي ياخذها من الصالون للبيت ..

اني المفروض اروح من وكت لكن  تأخرت ما هونت اعوف مرتضى كلت هو ما مسوي عرس اروح الظهر اله و ومن يجيبوها نبارك الهم ونتركهم ياخذون راحتهم ...

ندكت الباب كانت رقية تغسل الحديقة اجتني وكالت خليل يريدج

رحت اله
الصبح اجاني خليل دازته امي. تريد اسوي  حفلة صغيره  توها اليوم الا فكرت بيها وطخت عندها ..

-ادخل بالحديقة يمعود

-يمعوده وين ادخل

-انتظرني اهنا خليل انت ما جاي بسيارة
اتأخر على مال الم غراضي و واخبر مرتضى قدمت الموعد
،

دخلته وهو يدرم علينا

-ياسر كل يوم مزوج واني مبتلي

-تدخل

- ادخل ..

- اكلج هاي شايفتها عروسته الجديده
لا اخوج لو هم يكول انغشيت

- يمعود لا تحجي بالموضوع
ما كلنا لرقية

-يا خطية رقية ما تدري بياسر زواجه اليوم ...

عفته ودخلت صارت رقية بوجهي لازمه المساحه واعيونها مملية دموع .. اعتقد ظالة واكفة يم باب المدخل

-حبيبتي !

-اليوم ياسر يزوج ؟

- ها لا  اي لا
تؤء رقية حبيبتي

عافتني وراحت لغرفتها

ما عرفت شكول الها ..
رحت لزينب بالمطبخ وكلت الها سمعت كلام خليل

-هذا خليل صاحي يحجي بالموضوع

-اشمدريه هي قريبه علينا
شوفيها خطية كامت تبجي ..

رحت لغرفتي حضرت جنطه صغيره وبلغت مرتضى بتصال كال هو جاي بالطريق

-ترة مو بس اني وخليل نروح وحدنا حتى امه وخواته

-اذا هيج روحي

رحت دكيت بابا غرفة امه

لكيت عمي ما طالع حيل استحي منه

- عمة راح اروح دزو عليه عادي اروح؟

ابو علي- روحي عمي 

-روحي الله وياج وسلمينا على امج

كالتها بحزن مبينه شايله بخاطرها من زواج ياسر  رحت ويه خليل  لبيته ومناك اخذنا لبيت ياسر

رجعت العصر للبيت ،هم خليل وصلني .

،

مرتضى
متحملني بكل مزاجياتي واني هم اكتشفت  مزاجه وبالبداية صار تصادم
طبيعي باي بداية زواج

  دارت اشهر و صرت اتقبله من غير  ما اتهرب واتهستر  لكن ما احبه لهذا الشي ومتأملة اتخلص من هاي الحالة لأن حالتي بدت تتقدم والحمد لله على كل حال مرتضى مرات يفقد اعصابه ويزعل ما يطول بال وياي بالنهاية هو رجل ومرات يطول بال .... والمهم هو احترامه الي ولحالتي .....الى ان اكتشفت حملي ببداية سنة ٢٠١٦  كان خبر مفرح لكل العائلة
شعور حلو تحس اكو قلب صغير ينبض داخلك يحسسك انت حي وان الحياة ملكك ..حملي زادني تعلق بزوجي

يتبع

بنات نهاية هذا الجزء مغلقة مو مفتوح هذا الجزء مثل ما عبالكم
الجزء الثاني اله خيوط اخرى.....

زهرتكم   ❤